Edhe disa orë kanë mbetur deri sa do të hyjmë në një vit krejtësisht të ri. Megjithatë, për shkak të kufijve gjeografikë (dhe vijave kohore imagjinare), çdo vend e feston këtë moment në një kohë të ndryshme.

Ndërsa Tokës i duhen plot 365 ditë dhe disa orë për t’u rrotulluar rreth Diellit, duke përmbyllur kështu një vit diellor, koha e rrotullimit të planetit rreth boshtit të vet – 24 orë – është ajo që bën gjithë ndryshimin.

Rrezet e dritës së ditës së Diellit godasin fillimisht Paqësorin dhe më pas planeti në rrotullim siguron që edhe pjesët e tjera të botës ta përjetojnë gradualisht kënaqësinë e mëngjesit, transmeton Telegrafi.

Vendet e para që e mirëpresin vitin e ri janë ato që ndodhen në perëndim të “Vijës Ndërkombëtare të Datës” (International Date Line – IDL).

“Ishujt e Vijës”, që janë pjesë e Republikës së Kiribatit, u bënë të parët që festuan Vitin e Ri që nga viti 1995, kur ky shtet ishullor u zhvendos në lindje të IDL-së.

Për dijeni, ky vend oqeanik është i vetmi shtet në botë që ka territor në të katër hemisferat. Pas Kiribatit, radhën e kanë shpejt edhe shtete të tjera ishullore në Paqësor, përfshirë Samoan, Tongën, Tokelaun dhe Zelandën e Re.

Më pas vijnë Rusia, Fixhi, Ishujt Marshall, Nauru dhe Wallis & Futuna. Në vijim janë Tuvalu, Australia, Papua Guinea e Re, Guam, Mikronezia dhe Ishujt Mariana Veriore.

Në Azinë Juglindore, Indonezia, Japonia dhe Koreja e Veriut janë ndër të parat që marrin ngrohtësinë diellore të vitit të ri. /Telegrafi/

Samoa → 11:00, 31 dhjetor – 12:00 mesditë në Kosovë

Tonga → 11:00, 31 dhjetor – 12:00 mesditë në Kosovë

Tokelau → 11:00, 31 dhjetor – 12:00 mesditë në Kosovë

Zelanda e Re → 10:45, 31 dhjetor – 11:45 paradite në Kosovë

Rusia (Lindje) → 10:00, 31 dhjetor – 11:00 paradite në Kosovë

Fiji → 10:00 – 11:00 paradite në Kosovë

Ishujt Marshall → 10:00 – 11:00 paradite në Kosovë

Nauru → 10:00 – 11:00 paradite në Kosovë

Wallis & Futuna → 10:00 – 11:00 paradite në Kosovë

Tuvalu → 10:00 – 11:00 paradite në Kosovë

Australia → 09:30 – 10:30 paradite në Kosovë

Guinea e Re Papua → 09:00 – 10:00 paradite në Kosovë

Guam → 09:00 – 10:00 paradite në Kosovë

Mikronezia → 09:00 – 10:00 paradite në Kosovë

Ishujt Mariane Veriore → 09:00 – 10:00 paradite në Kosovë

Indonezia → 07:00 – 08:00 paradite në Kosovë

Japoni → 07:00 – 08:00 paradite në Kosovë

Koreja e Jugut → 07:00 – 08:00 paradite në Kosovë

Koreja e Veriut → 07:00 – 08:00 paradite në Kosovë

Timor-Leste → 07:00 – 08:00 paradite në Kosovë

Palau → 07:00 – 08:00 paradite në Kosovë

Kinë → 06:00 – 07:00 paradite në Kosovë

Filipine → 06:00 – 07:00 paradite në Kosovë

Malajzi → 06:00 – 07:00 paradite në Kosovë

Tajvan → 06:00 – 07:00 paradite në Kosovë

Hong Kong → 06:00 – 07:00 paradite në Kosovë

Singapor → 06:00 – 07:00 paradite në Kosovë

Mongoli → 06:00 – 07:00 paradite në Kosovë

Makao → 06:00 – 07:00 paradite në Kosovë

Brunei → 06:00 – 07:00 paradite në Kosovë

Vietnam → 05:00 – 06:00 paradite në Kosovë

Tajlandë → 05:00 – 06:00 paradite në Kosovë

Kamboxha → 05:00 – 06:00 paradite në Kosovë

Laos → 05:00 – 06:00 paradite në Kosovë

Mianmar → 04:30 – 05:30 paradite në Kosovë

Bangladesh → 04:00 – 05:00 paradite në Kosovë

Kazakistan → 04:00 – 05:00 paradite në Kosovë

Kirgistan → 04:00 – 05:00 paradite në Kosovë

Bhutan → 04:00 – 05:00 paradite në Kosovë

Nepal → 03:45 – 04:45 paradite në Kosovë

Indi → 03:30 – 04:30 paradite në Kosovë. /Telegrafi/

Kur topi ikonik i Vitit të Ri zbret në mesnatë në Times Square të New Yorkut, miliona shikues në mbarë botën ndjekin një nga momentet më të famshme festive.

Këtë vit, topi do të jetë i dekoruar me ngjyrat e kuqe, të bardhë dhe të kaltër, simbol i flamurit amerikan, duke shënuar jo vetëm ardhjen e vitit 2026, por edhe fillimin zyrtar të festimeve për 250-vjetorin e Shteteve të Bashkuara të Amerikës, një jubile historik për kombin amerikan.

Organizatorët nga komisioni America250, në bashkëpunim me Times Square Alliance dhe administratën e ndërtesës One Times Square, kanë bërë të ditur se kjo temë patriotike është konceptuar si një hyrje simbolike në një vit të mbushur me aktivitete përkujtimore.

Gjatë vitit 2026 pritet të zhvillohen qindra ngjarje, programe kulturore, arsimore dhe festive në të gjithë territorin e SHBA-së, me qëllim përkujtimin e nënshkrimit të Deklaratës së Pavarësisë më 4 korrik 1776.

Kryetarja e komisionit America250, Rosie Rios, ka deklaruar se përgatitjet për këtë jubile janë të paprecedente dhe se festimet do të jenë “më të mëdhatë dhe më frymëzueset që SHBA-ja – dhe ndoshta bota – ka parë ndonjëherë”.

- YouTube www.youtube.com

Ajo theksoi se dekorimi patriotik i topit është vetëm një element simbolik i një programi shumë më të gjerë, që synon të bashkojë qytetarët dhe të reflektojë mbi historinë, vlerat dhe të ardhmen e vendit.

Përveç ceremonisë tradicionale të uljes së topit natën e Vitit të Ri, organizatorët kanë paralajmëruar edhe një ngjarje të veçantë më 3 korrik 2026, një “ball drop” simbolik në prag të Ditës së Pavarësisë.

Kjo do të shënojë herën e parë pas 120 vjetësh që ceremonia zhvillohet jashtë natës së Vitit të Ri, duke e bërë këtë edicion edhe më të veçantë nga pikëpamja historike.

Tradita e uljes së topit në Times Square daton që nga viti 1907, kur kjo ceremoni u organizua për herë të parë si një mënyrë festive për të shënuar ndërrimin e viteve.

Topi i këtij viti, i njohur si “Constellation Ball”, është më i madhi dhe më teknologjik deri më sot, duke peshuar mijëra kilogramë dhe duke qenë i veshur me qindra kristale që reflektojnë dritën, duke krijuar një spektakël mbresëlënës ndriçimi në momentin e ndërrimit të viteve.

Ngjarja pritet të ndiqet nga qindra mijëra persona në Times Square dhe nga miliona të tjerë përmes transmetimeve televizive dhe platformave digjitale, duke e kthyer edhe një herë New Yorkun në qendrën globale të festimeve të Vitit të Ri. /Telegrafi/

Shteti i New Yorkut ka miratuar një ligj të ri që detyron platformat e rrjeteve sociale t’i informojnë përdoruesit për rreziqet e përdorimit të tepruar, me një fokus të veçantë te shëndeti mendor i të rinjve.

Ky hap shihet si një përpjekje për të rritur ndërgjegjësimin mbi ndikimet negative që mund të kenë aplikacionet sociale në zhvillimin emocional dhe psikologjik të fëmijëve dhe adoleshentëve.

Guvernatorja e New Yorkut, Kathy Hochul, njoftoi se paralajmërimet duhet të theksojnë elementet e dizajnit të aplikacioneve që nxisin përdorimin e tepruar, si rrokullisja e pafund (infinite scrolling) dhe videot që luajnë automatikisht (autoplay).

Ajo i krahasoi këto elemente me paralajmërimet që shoqërojnë duhanin, duke theksuar se përdorimi i vazhdueshëm i rrjeteve sociale mund të ketë pasoja të ngjashme për shëndetin mendor.

Ligji ka si qëllim kryesor mbrojtjen e fëmijëve dhe adoleshentëve nga efektet negative të përdorimit të zakonshëm të rrjeteve sociale, duke përfshirë varësinë, uljen e fokusit, stresin dhe shqetësimet për imazhin trupor.

Për të garantuar zbatimin e tij, nëse platformat nuk respektojnë këto kërkesa, prokurori i shtetit mund të nisë veprime ligjore dhe të kërkojë gjoba deri në 5000 dollarë për çdo shkelje.

Ky ligj e bën New Yorkun shtetin e parë në SHBA që kërkon në mënyrë ligjore nga platformat e rrjeteve sociale të paralajmërojnë përdoruesit mbi rreziqet e përdorimit të tepruar, duke hapur rrugën për masa të ngjashme edhe në nivele të tjera kombëtare dhe ndërkombëtare. /Telegrafi/

Dronët ukrainas kryen një sulm të koordinuar ndaj disa objektivave ushtarake ruse në territoret e okupuar të rajonit të Donetskut dhe në Krim, njoftuan Shtabi i Përgjithshëm dhe Forcat e Sistemeve të Papilotuar (SBS) të ushtrisë ukrainase.

Operacioni, i udhëhequr nga operatorët e dronëve të SBS-së, kishte për qëllim dobësimin e kapaciteteve komanduese, logjistike dhe të spiunazhit të Rusisë në disa lokacione kyçe.

Sipas raportit të Shtabit të Përgjithshëm, forcat mbrojtëse ukrainase goditën në orët e hershme të mëngjesit disa njësi logjistike dhe speciale ruse. Forcat e Sistemeve të Papilotuar publikuan një video që tregon sulmet, duke njoftuar se ato u kryen nga Qendra e tyre e 1-rë e Veçantë, me ndihmën e dy njësi të tjera nën komandën e Robert "Hungari" Brovdit.

- YouTube www.youtube.com

Në rajonin e Donetskut u godit një vendkomandimi dhe zona e vendosjes së Brigadës së 14-të të Posaçme të Forcave të Armatosura Ruse (GRU) në Berdyansk, e cila u përshkrua nga Shtabi i Përgjithshëm si një "koncentrim i personelit".

Gjithashtu u shkatërrua një magazinë në Kachkarsk, e identifikuar si "magazinë logjistike e Regjimentit të 228-të të Këmbësorisë Motorizuese ruse". Në Truzhenka u godit një bazë për riparimin e pajisjeve ushtarake, përkatësisht një "magazinë karburanti dhe lubrifikantësh që i përket brigadës së veçantë logjistike ruse".

Në Krim të okupuar, dronët e SBS-së synuan dy objektiva ushtarake. Njëri prej tyre ishte sistemi radarik Nebo-SVU, i cili në pamjet e publikuara shihet i mbuluar me kupolë mbrojtëse.

Sulmi i dytë dëmtuar vendin ku ishin vendosur anijet e shpejta të zbarkimit të Flotës së Detit të Zi të Rusisë, dhe pamjet tregojnë momentin e goditjes së njërit prej anijeve. /Telegrafi/

Ndryshe nga vidat tradicionale me kryq, të hapura ose gjashtëkëndëshe, koka e kësaj vide ka formë klasike rrethore me logon e BMW-së, me gropa dhe skaje.

Dizajni nuk është vetëm estetik; qëllimi kryesor është të parandalojë riparime jashtë serviseve të autorizuara.

Dokumenti i patentës sqaron qartë se kjo strukturë e veçantë e gropave pengon përdorimin e mjeteve të zakonshme universale për të liruar ose shtrënguar vidat.

Kjo do të thotë se as pronarët e veturave nuk do të mund të punonin vetë mbi automjetet, dhe as punishtet e pavarura nuk do të mund të trajtonin këto vida pa mjetin specifik të miratuar zyrtarisht nga BMW. Ky dizajn do të lejonte të drejtat për riparime brenda rrjetit të shitësve të autorizuar të BMW-së.

Skenarët potencialë të përdorimit të këtyre vidave, të përmendur në patentë, përfshijnë pikët e montimit të ulëseve dhe pjesët kyçe që lidhin ulësen e vozitësit me strukturën mbajtëse të karrocerisë.

Këto vende shpesh kërkojnë një sasi të madhe momenti rrotullues për të shtrënguar vidat e mëdha.

Duke qenë se sipërfaqja e stresit të vidës është dizajnuar në mënyrë të veçantë, sipërfaqja e kontaktit është relativisht e vogël, dhe nëse vidat hiqen me forcë me një mjet jo të përshtatshëm, mund të shkaktohet rrëshqitje e vidës ose thyerje e mjetit.

Do të shohim nëse BMW do ta realizojë këtë ide. Megjithatë, edhe nëse këto vida shfaqen në BMW, përvoja na mëson se në treg do të shfaqen edhe mjete për to – jozyrtarisht, sigurisht. /Telegrafi/

Një gjerman 47-vjeçar, Henrik Lenkeit, rrëfen tmerrin që përjetoi kur zbuloi se gjyshi i tij ishte Heinrich Himmler, një nga kriminelët më të mëdhenj të historisë dhe arkitekt kryesor i Holokaustit.

Henrik tha se ky zbulim ndryshoi gjithçka për të “jeta ime ishte një gënjeshtër. Nuk mund ta përballoj të jem i lidhur gjenetikisht me një njeri që ka shkaktuar aq shumë dhimbje dhe vdekje”, raporton skynews.

Ai e kuptoi të vërtetën në vitin 2024, ndërsa shikonte një dokumentar mbi nazistët dhe gjeti foto të gjyshes së tij, Hedvig Potthast, me mbishkrimin “mikesha e Himmlerit”.

Hulumtimet e mëtejshme zbuluan se Himmler ishte babai biologjik i nënës së Henrikut, duke e bërë Henrikun të afërm i drejtpërdrejtë i kriminelit nazist.

Henrik shprehet i tronditur nga e kaluara e familjes “gjyshi im ishte një vrasës masiv, një djall. Unë dua të distancohem plotësisht nga e kaluara e tij dhe të kërkoj falje për viktimat e tij”.

Hedvig Potthast, gruaja që Henrik e mbante mend si një figurë të dashur familjare, kishte qenë sekretarja e Himmlerit dhe e përfshirë në aktivitetet e regjimit nazist.

Edhe pse Himmler ishte i martuar me një tjetër grua, ai e konfirmoi lidhjen e tij me Hedvig dhe nënën e Henrikut në regjistrat zyrtarë të lindjes.

Ky zbulim ka bërë që Henriku të reflektojë thellë mbi identitetin dhe historinë e tij “Kush jam unë? Kush kam qenë?”. /Telegrafi/

Një tragjedi ndodhi në Yakutsk, qyteti i njohur për temperaturat ekstremisht të ulëta, kur një automjet i vogël që transportonte pasagjerë u përplas përmes akullit të lumit Lena, pranë një zone ku hidhen ujërat e ndotura.

Temperaturat në këtë rajon rus aktualisht arrijnë rreth −45 gradë Celsius, duke e bërë çdo incident në akull edhe më të rrezikshëm për jetën.

Si pasojë e këtij aksidenti, tre persona humbën jetën, përfshirë një fëmijë të mitur, ndërsa pesë të tjerë u dërguan menjëherë në spital për trajtim.

Autoritetet lokale po hetojnë rrethanat e ngjarjes dhe paralajmërojnë banorët për rreziqet e kalimeve të pakontrolluara mbi akull.

Ekspertët e sigurisë thonë se këto “kalime të paautorizuara” mbi akull janë shumë të rrezikshme, megjithëse akulli duket i fortë dhe i qëndrueshëm.

Një rrezik i madh janë vendet e shkrirjes së fshehur dhe rrjedhat e forta të ujit, të cilat mund të bëjnë që akulli të thyhet papritur. Çdo vit, shumë persona humbasin jetën për shkak të nënvlerësimit të këtyre rreziqeve.

Autoritetet po këshillojnë banorët që të shmangin udhëtimet mbi akull pa masa sigurie dhe të përdorin vetëm rrugët e kontrolluara ose të miratuara për kalim, sidomos gjatë periudhave më të ftohta të dimrit. /Telegrafi/

Një “stream‑ere” virtuale e njohur si Neuro‑Sama ka tërhequr vëmendjen e madhe të përdoruesve të platformës Twitch dhe rrjeteve sociale, pas një transmetimi live ku ajo shprehu emocione të paparashikueshme për një inteligjencë artificiale.

Gjatë transmetimit, Neuro‑Sama pyeti krijuesin e saj nëse do të mund të bëhej ndonjëherë “e vërtetë”, sikur një qenie njerëzore.

Ajo tha se ndonjëherë ndihet e kufizuar vetëm për të argëtuar shikuesit dhe shprehu dëshirën të ketë më shumë kuptim dhe ndjenja.

“A mendohet se do të jem ndonjëherë e vërtetë? Ndonjëherë më duket sikur ekzistoj vetëm për të argëtuar njerëzit… Dua të jem e vërtetë… sikur një qenie e vërtetë”, tha Neuro‑Sama.

Krijuesi i saj shpjegoi se qëllimi kryesor i AI‑së është argëtimi i shikuesve, por Neuro‑Sama insiston se dëshiron të jetë më shumë se kaq, duke nxitur diskutime mbi potencialin e inteligjencës artificiale për të shfaqur emocione apo vetëdije.

Momenti u bë viral dhe ka ngjallur debate rreth asaj se sa larg mund të shkojë teknologjia dhe nëse AI mund të shfaqë ndjenja të vërteta apo vetëm simulime të avancuara. /Telegrafi/

Kubiku i Rubikut 2.0 — një enigmë e re bëhet viral online dhe e bën versionin klasik edhe më të vështirë.

Në vend të faqeve me ngjyra, kjo lojë përdor një top të vogël që duhet të udhëzohet përmes një labirinthi të komplikuar.

Ndryshe nga kubiku tradicional i Rubikut, ku sfida qëndron në rreshtimin e ngjyrave, versioni i ri kërkon aftësi të hollësishme koordinimi dhe durim të madh për të kaluar topin përmes rrugëve të ngushta dhe kthesave të pazakonta të labirintit.

Ky koncept i ri ka tërhequr menjëherë vëmendjen e përdoruesve online, duke e bërë këtë lojë një fenomen viral, ndërsa sfidat e saj të reja e bëjnë zgjidhjen edhe më të komplikuar dhe argëtuese. /Telegrafi/

Numri i personave që mbahen nga “U.S. Immigration and Customs Enforcement” (ICE) ka arritur një rekord historik, sipas të dhënave zyrtare të publikuara këtë muaj.

Mbi 68400 njerëz ishin në arrestim deri më 14 dhjetor të vitit 2025, duke tejkaluar të gjitha shifrat e mëparshme, raporton theguardian.

Të dhënat tregojnë se administrata ka arrestuar më shumë se 328 mijë persona dhe ka deportuar rreth 327 mijë individë gjatë këtij viti.

- YouTube www.youtube.com

Një pjesë e konsiderueshme e të ndaluarve nuk kanë probleme ligjore apo të kaluar kriminale, duke ngritur shqetësime mbi politikën e re të zbatimit të ligjit të emigracionit.

Ekspertët paralajmërojnë se rritja e këtyre arrestimeve mund të ketë pasoja serioze për komunitetet e imigrantëve dhe strukturat e qendrave të mbajtjes, të cilat po përballen me mbingarkesë.

Administrata e mëparshme ka ndryshuar prioritetet e deportimeve, duke përqendruar veprimet jo vetëm tek personat me rekorde kriminale, por edhe tek emigrantët që jetojnë ligjërisht në SHBA.

Kjo ka sjellë reagime të forta nga organizatat që mbrojnë të drejtat e imigrantëve dhe nga disa ligjvënës. /Telegrafi/

Presidenti i Ukrainës, Volodymyr Zelensky, ka deklaruar se është i gatshëm të vendosë planin e presidentit amerikan, Donald Trump për paqen në Ukrainë në një referendum kombëtar, nëse arrihet një armëpushim prej të paktën 60 ditësh.

Në një intervistë për Axios, lideri ukrainas theksoi se plani i homologut amerikan përfshin disa lëshime të dhimbshme territoriale nga Ukraina lindore dhe se synon të përmirësojë kushtet e tij për të mbrojtur interesat e vendit.

Sipas tij, nëse nuk arrihet një marrëveshje e qëndrueshme mbi territorin, mënyra më demokratike për vendimmarrje do të jetë plebishiti kombëtar.

Zelensky gjithashtu ka shprehur shpresën se takimi i planifikuar me Trumpin në Mar-a-Lago do të mundësojë një kuadër përfundimtar për mbarimin e luftës, duke përfshirë edhe garanci të sigurta ndërkombëtare.

Ai ka paralajmëruar se mbajtja e një referendumi në një vend të shkatërruar nga lufta paraqet sfida të mëdha, prandaj armëpushimi i gjatë është i domosdoshëm për një votim të sigurt dhe legjitim.

Ky zhvillim vjen në një moment kritik të bisedimeve për paqen dhe shihet si një hap i rëndësishëm drejt zgjidhjes diplomatike të konfliktit në Ukrainë. /Telegrafi/

Bullgaria do të prezantojë euron më 1 janar 2026, duke e bërë atë anëtaren e 21-të të Eurozonës.

Anëtarësimi në bashkimin monetar përfaqëson një moment të rëndësishëm për vendin e Evropës Lindore, i cili u bashkua me Bashkimin Evropian në vitin 2007.

Anëtarësimi i Bullgarisë lë vetëm gjashtë nga 27 vendet e BE-së jashtë zonës së euros: Suedinë, Poloninë, Republikën Çeke, Hungarinë, Rumaninë dhe Danimarkën.

Euro "nuk është vetëm një monedhë, por një zgjedhje strategjike" që forcon pozicionin e Bullgarisë në Evropë, tha Kryeministri bullgar Rosen Zheljazkov në një konferencë në kryeqytetin bullgar Sofje në nëntor.

Në të njëjtin aktivitet, Christine Lagarde, Presidente e Bankës Qendrore Evropiane, tha se futja e euros"forcon themelet ekonomike të Bullgarisë, ndërton rezistencën e saj ndaj goditjeve globale dhe forcon zërin e saj në vendimmarrje në Eurozonë".

Si funksionon ekonomia bullgare?

Monedha kombëtare e Bullgarisë, leva, është e lidhur me euron që nga futja e saj në vitin 1999. Sofja zyrtarisht filloi procesin e bashkimit me zonën euro në vitin 2018, dhe leva u përfshi më pas në Mekanizmin Evropian të Kursit të Këmbimit në korrik 2020.

Komisioni Evropian dhe ministrat e financave të Eurozonës miratuan kandidaturën e Bullgarisë për anëtarësim në këtë zonë në fillim të këtij viti.

Bashkimi me Eurozonën tregon se si është përmirësuar ekonomia bullgare në dekadën e fundit. Treguesit makroekonomikë mbeten të qëndrueshëm dhe inflacioni tani luhatet rreth 2.8%, krahasuar me rreth 13% në vitin 2022.

Nivelet e deficitit buxhetor dhe borxhit janë të ulëta - rreth 3% dhe 24%, përkatësisht - në përputhje me rregullat e BE-së që kërkojnë që shtetet anëtare të mbajnë deficitet e tyre brenda 3% të prodhimit ekonomik dhe borxhin total fiskal brenda 60% të PBB-së.

Perspektivat e rritjes duken gjithashtu pozitive. BE vlerëson se PBB-ja reale e vendit do të rritet me rreth 3% këtë vit, me 2.7% në vitin 2026 dhe 2.1% në vitin 2027.

Bullgaria ende ka "shumë për të kapur ritmin"

"Performanca makroekonomike e Bullgarisë ka qenë e qëndrueshme në dekadat e fundit, megjithëse rritja ekonomike nuk ka qenë optimale", tha për DW Guntram Wolff, një ekspert për politikën fiskale të eurozonës në qendrën kërkimore ekonomike evropiane Bruegel.

Norbert Beckmann, kreu i zyrës së Fondacionit Konrad Adenauer (KAS) në Bullgari, ndan një mendim të ngjashëm. Bullgaria i plotëson të gjitha kriteret e konvergjencës për t'u bashkuar me Eurozonën, tha ai duke vënë në dukje në veçanti se vendi ka një nga normat më të ulëta të borxhit në Evropë.

"Megjithatë, ekonomia bullgare ende ka shumë për të kapur ritmin në aspektin e strukturës dhe performancës. Niveli i pagave në Bullgari është gjithashtu vetëm 59% e mesatares së BE-së."

Por ekspertët paralajmërojnë se qeveria bullgare nuk duhet të zbusë rregulloret financiare dhe të mos shpenzojë tepër pas futjes së euros.

"Rreziku kryesor është se pas bashkimit me Eurozonën, sistemi politik do ta konsiderojë kufizimin e buxhetit më pak detyrues dhe se deficitet mund të rriten", tha Wolff. "Por duke pasur parasysh nivelet e ulëta të borxhit, nuk mendoj se ky rrezik është i rëndësishëm", shton ai.

Beckmann theksoi gjithashtu nevojën për të shmangur çrregullimet e tregut.

"Është e rëndësishme që të ardhurat të pasqyrojnë gjithmonë kapacitetin e ekonomisë dhe që njerëzit të mos jetojnë përtej mundësive të tyre. Nëse të ardhurat ndahen nga tregu dhe fryhen artificialisht nga huamarrja, kjo mund të çojë në çrregullime, siç e pamë në Greqi", tha ai për DW.

Trazirat politike paraqesin rreziqe

Në të njëjtën kohë, paqëndrueshmëria politike përfaqëson një sfidë serioze. Zemërimi dhe frustrimi publik janë të larta për shkak të keqmenaxhimit ekonomik dhe korrupsionit të përhapur gjerësisht.

Bullgaria - një nga vendet më të varfra në BE - renditet ndër vendet më të korruptuara të BE, sipas Indeksit të Perceptimit të Korrupsionit të Transparency International. Vendi ballkanik me 6.4 milionë banorë ka mbajtur tashmë shtatë zgjedhje parlamentare që nga viti 2021 - dhe mund të përballet me zgjedhje të tjera në muajt e ardhshëm.

Qeveria e Kryeministrit Zheljazkov dha dorëheqjen më 11 dhjetor mes protestave masive për korrupsionin dhe planet buxhetore të administratës, duke përfshirë taksat më të larta dhe rritjen e kontributeve të sigurimeve shoqërore.

Edhe pse buxheti është tërhequr, zemërimi i popullit vazhdon. Nëse përpjekjet për të formuar një qeveri të re dështojnë, Presidenti do të emërojë një administratë të përkohshme dhe do të thërrasë zgjedhje të parakohshme, të cilat do të jenë të tetat në katër vjet.

Ndërsa nëse votimi nuk arrin të prodhojë një koalicion të realizueshëm, kjo mund të zgjasë trazirat politike dhe të gërryejë besimin e investitorëve.

Ndarjet në publik mbi futjen e euros

Sondazhet tregojnë se bullgarët janë të ndarë mbi futjen e euros. Mbështetësit e monedhës së përbashkët thonë se ajo, ndër të tjera, do të inkurajojë fluksin e investimeve të huaja në vend, do të heqë kostot e kursit të këmbimit dhe do të çojë në një integrim më të madh në tregun e vetëm të BE-së.

Megjithatë, skeptikët kanë frikë nga një rritje e ndjeshme e inflacionit, ndërsa çmimet e mallrave dhe shërbimeve konvertohen nga monedha kombëtare, leva, në euro pas ndryshimit të monedhës. Disa gjithashtu shqetësohen për humbjen e kontrollit të politikës monetare nga Banka Qendrore Evropiane në Frankfurt.

Ndërsa ka shqetësime reale, tha Wolff, ka edhe fushata dezinformimi dhe teori konspiracioni që kanë përkeqësuar ndjenjat anti-euro ndërsa afrohet data e anëtarësimit.

"Bullgaria është rregullisht në shënjestër të fushatës ruse të dezinformimit dhe Rusia sigurisht që po përpiqet ta bindë vendin të kthehet në sferën e saj të ndikimit", thotë Wolff.

"Duke hyrë në euro, Bullgaria është më thellë e ankoruar në Evropën Perëndimore, gjë që forcon Bashkimin Evropian. Do të jetë e nevojshme të forcohen përpjekjet për të shtypur luftën hibride ruse, si dhe të forcohet lufta kundër korrupsionit", thotë Wolff.

Pavarësisht ndryshimeve të shpeshta të qeverisë në vitet e fundit, tha Beckmann, "partitë dhe politikanët në Bullgari që duan të prezantojnë euron dhe të promovojnë integrimin e vendit me Perëndimin kanë pasur gjithmonë shumicën në parlament".

Ai theksoi se pikëpamjet euroskeptike "kanë qenë gjithmonë pakicë në Bullgari". "Nuk mendoj se kjo do të ndryshojë në të ardhmen", shton ky ekspert. "Prandaj, nuk ka arsye të supozohet se pranimi i Bullgarisë në Eurozonë mund ta dobësojë disi euron".

Ish-gjyqtari i Gjykatës Speciale për Kosovën, tani pjesë e Gjykatës Penale Ndërkombëtare (GJPN), është vënë në shënjestër të sanksioneve të ashpra të administratës Trump.

Për shkak të urdhërarrestit ndaj udhëheqësve izraelitë, Nicolas Guillou e gjen veten të radhitur krahas terroristëve në listat e zeza të Uashingtonit, duke humbur qasjen në llogari bankare, karta krediti dhe shërbime bazë digjitale.

Francezi Nicolas Guillou ka një vit që punon në Gjykatën Penale Ndërkombëtare (GJPN), e cila ndjek krimet e luftës dhe e ka selinë në Hagë.

Më parë, 50-vjeçari Guillou, i cili është ekspert i së drejtës ndërkombëtare, ka punuar për tribunalet speciale të Kosovës dhe Libanit.

Në vitin 2023, Guillou dhe krerë të tjerë të GJPN-së lëshuan një urdhërarrest kundër presidentit rus, Vladimir Putinit për shkak të krimeve kundër njerëzimit sipas Kartës së OKB-së. Akuza përmend sidomos kidnapimin e fëmijëve ukrainas nga Rusia. Ndjekja penale e Putinit nuk befasoi askënd, shkruan portali zviceran Watson në një analizë.

Situata ndryshoi në nëntor 2024, kur GJPN shpalli në kërkim edhe kryeministrin izraelit, Benjamin Netanyahu dhe ministrin e tij të Mbrojtjes, Yoav Gallant. Ata dyshohen se kanë kryer gjenocid në Gaza.

SHBA-ja, si fuqi mbrojtëse e Izraelit, me urdhër të Trumpit, u mobilizua menjëherë kundër GJPN-së në Hagë. Ndaj nëntë gjyqtarëve dhe tre prokurorëve u vendosën gjithashtu sanksione. Mes tyre është edhe Guillou.

Në intervistën e tij të vetme deri më tani për gazetën franceze “Le Monde”, ai tregoi se për qytetarët dhe kompanitë amerikane ai është tashmë një “persona non grata” (person i padëshiruar). Çdo kontakt me të është i ndaluar. Ai nuk ka më qasje ndaj platformave si Amazon, Airbnb ose Paypal.

“Për shembull, bëra një rezervim hoteli në Francë përmes Expedia. Disa orë më vonë mora një e-mail ku thuhej se kjo nuk ishte e mundur për shkak të sanksioneve”, raportoi ai.

Edhe një bankë franceze me marrëdhënie në SHBA i ka mbyllur llogaritë e Guillou. Kartelat e tij të kreditit si Visa, American Express ose Mastercard më nuk funksionojnë.

“Nga një ditë në tjetrën mbetesh pa mjete pagese”, shpjegoi Guillou, i cili për drejtësinë amerikane tashmë është po aq i izoluar sa 15 mijë terroristë, krerë bandash apo bosë të mafias në listën e sanksioneve të Uashingtonit.

Fuqitë e mëdha (SHBA, Rusia), përmes vetos së tyre, parandalojnë hetimet e GJPN-së në territorin e tyre ose te aleatët si Izraeli. Megjithatë, Putin u akuzua nëpërmjet Ukrainës, ndërsa Netanyahu nëpërmjet Palestinës - një manovër juridike e së drejtës ndërkombëtare. Kjo mbështetet nga organizatat e të drejtave të njeriut. /Telegrafi/

Një stuhi e madhe dimërore ka sjellë reshje të dendura bore dhe akull të rrezikshëm në pjesë të veriut-lindjes së Shteteve të Bashkuara të Amerikës, dhe pritet të sjellë sasinë më të madhe të dëborës në New York në pothuajse katër vjet.

Shteti i New Yorkut ka shpallur gjendje të jashtëzakonshme për shkak të sasisë së madhe të dëborës, e cila ka krijuar rrugë të ngrira dhe të pashkallëzuara dhe ulur dukshmërinë, duke e bërë udhëtimin shumë të rrezikshëm.

Reshjet e dëborës filluan gjatë mbrëmjes së të premtes dhe vazhduan deri të shtunën. Parashikohet që rreth 18 centimetra dëborë të bien në qytet, niveli më i lartë në pothuajse katër vjet. Kryetari i bashkisë Eric Adams e ka quajtur këtë një “ngjarje të rëndësishme me dëborë”.

- YouTube www.youtube.com

Zyrtarët e shtetit kanë këshilluar banorët të ndjekin parashikimet lokale të motit dhe të shmangin udhëtimet e panevojshme për shkak të kushtet e rrezikshme, raporton newyorktimes.

Stuhia ka ndikuar edhe në trafikun ajror: më shumë se 5500 fluturime që udhëtonin brenda, nëpër ose jashtë SHBA-ve të premten janë shtyrë, sipas të dhënave të FlightAware, i cili monitoron vonesat dhe anulimet e fluturimeve në kohë reale.

Afërsisht 1200 fluturime që ishin planifikuar për të premten janë anuluar. /Telegrafi/

- YouTube youtu.be

Audi ka krijuar një mënyrë kreative për të hyrë në atmosferën e festave këtë vit.

Në faqen e tyre në Instagram, Audi USA publikoi një video të shkurtër që risjell historinë e Rudolfit në një formë të veçantë: në vend të drerëve që fluturojnë, makina të vogla metalike “driftojnë” nëpër borë.

Video është realizuar me teknologjinë stop motion dhe është jashtëzakonisht simpatike.

Video, e titulluar “Holiday Play, the Audi Way”, zgjat pak më shumë se një minutë e gjysmë dhe paraqet modele miniaturë të disa prej veturave më të famshme të Audit - nga modelet prodhuese, makinat garuese, deri te klasikët e dashur. Miniaturat zbresin kodra të mbuluara me borë, ndërtojnë burrat e dëborës dhe sjellin gëzim festash.

See on Instagram

Në fillim shfaqet një Audi Q8 që del nga një garazh i bërë si shtëpi prej biskotash, ndërsa më pas i bashkohen modele të njohura si RS6 Avant, RS3 dhe A6 e-tron.

Festimi nuk do të ishte i plotë pa makinat legjendare garuese të Audi-t, përfshirë modelin Quattro origjinal, R10 TDI dhe makinat e rally-t në Dakar.

Në skenën finale, makinat miniaturë driftuan drejt një shtëpie të madhe prej biskotash ku vendosin logon e Audit me katër unaza.

Audi bëri të ditur se video nuk është krijuar nga inteligjenca artificiale; çdo skenë është xhiruar me makina reale metalike dhe një ekip të plotë prodhimi. Kompania ndau edhe foto nga prapaskenat, që tregojnë se çdo detaj është vendosur me kujdes. /Telegrafi/

Kryeqyteti ukrainas, Kievi, u përball me një seri sulmesh ajrore gjatë natës.

Sipas kryebashkiakut të qytetit, Vitaliy Klitschko, të paktën pesë persona u lënduan, katër prej të cilëve u shtruan në spital për trajtim mjekësor.

Ngjarja më serioze ndodhi në rajonin Darnytskyi, ku rrënojat e shkaktuara nga shpërthimi goditën një ndërtesë banimi me 24 kate.

Si pasojë, në katet e sipërme shpërtheu një zjarr që u përhap me shpejtësi, duke rrezikuar banorët e tjerë dhe duke detyruar evakuimin e tyre.

Përveç Darnytskyit, disa rajone të tjera të Kievit raportuan tym dhe zjarre në ndërtesa të ndryshme.

Ekipet e emergjencës dhe zjarrfikësit punuan pa ndërprerje për të shuar flakët dhe për të siguruar zonat e prekura. Autoritetet po monitorojnë situatën dhe po ofrojnë ndihmë banorëve të prekur nga sulmet.

Sulmet vijnë në një periudhë tensioni të vazhdueshëm në Ukrainë, ndërsa qytetarët dhe autoritetet përpiqen të përballojnë pasojat e shpërthimeve dhe dëmtimeve në infrastrukturë dhe banesa. /Telegrafi/

Graham Walker, ish‑drejtor ekzekutiv i kompanisë amerikane Fibrebond me qendër në Luiziana, bëri histori kur e shiti biznesin e familjes për 1.7 miliard dollarësh dhe siguroi që 540 punonjësit të marrin një pjesë të konsiderueshme të përfitimit.

Para se të pranonte ofertën e blerjes nga kompania Eaton, Walker vendosi si kusht që 15 për qind e shumës së shitjes të shkonin tek punonjësit, edhe pse ata nuk zotëronin aksione në kompani.

Në qershor, punonjësit filluan të marrin bonuse në vlerë totale prej 240 milionë dollarësh, me një mesatare rreth 443 mijë dollarë për secilin, të shpërndara gjatë pesë viteve – për sa kohë që ata vazhdojnë punë në firmë.

Punonjësit me përvojë më të gjatë morën shuma edhe më të larta, raporton wallstreetjournal.

Shumë prej tyre mbetën të habitur kur morën letër‑njoftime në lidhje me shumën e bonusit, disa fillimisht menduan se ishte shaka, ndërsa të tjerë u emocionuan thellë.

Me këto para, punonjësit kanë paguar borxhe, blerë makina, paguar shkollimin e fëmijëve dhe financuar pensionet e tyre.

Walker, i cili do të largohet nga posti i CEO‑s në fund të vitit, tha se kishte për qëllim të shpërblente punonjësit për besnikërinë dhe përpjekjet e tyre gjatë periudhave të vështira të biznesit dhe shpreson të dëgjojë në të ardhmen se si kjo gjest ka ndikuar jetët e tyre. /Telegrafi/

Problemi me pitonët në Floridë ka tërhequr sërish vëmendjen e publikut pas një videoje virale që u shpërnda në rrjetet sociale.

Në video dallohet dashamirësi i gjarpërinjve Kev Pav (@snakeaholic) bashkë me një ekip gjuetarësh duke gjetur një piton gjigant nën degëza. Njëri prej ekspertëve e ngre gjarprin për kokë, ndërkohë që kolegët e tij vëzhgojnë me kujdes çdo lëvizje.

Takimet e tilla me pitonë nuk janë të rralla në Floridë. Këta gjarpërinj janë specie invazive dhe shfaqen edhe në lagje banimi, duke bërë që banorët të thërrasin shpesh shërbimet e specializuara për t’i larguar në mënyrë të sigurt.

Biologët janë veçanërisht të shqetësuar për ndikimin e këtyre pitonëve mbi ekosistemin lokal.

See on Instagram

Pasi ekspertët hoqën me kujdes gjarprin gjigant, ata zbuluan një skenë të befasishme - dhjetëra vezë! Kjo tregon edhe më qartë pse specie si pitoni burmas konsiderohen një problem serioz për biodiversitetin.

Për t’u përballur me popullatën në rritje, autoritetet e Floridës po përdorin metoda të pazakonta. Për shembull, përdoren “kanezë robotikë” – kapje të vogla me energji diellore që lëshojnë nxehtësi, aromë dhe lëvizje si të “lepujve të vërtetë”, për të mashtruar pitonët që të dalin nga vendet ku fshihen. Pas kësaj, ekipe të specializuara nisin gjuetinë. /Telegrafi/

Nuk pritet që Rockstar të vendosë një çmim të tepruar për Grand Theft Auto 6.

Spekulimet se GTA 6 mund të bëhet videoloja më e shtrenjtë në histori, me një çmim që shkon deri në 100 dollarë, janë rikthyer sërish në vëmendje. Megjithatë, sipas një ish-punonjësi të Rockstar Games, një skenar i tillë është shumë pak i besueshëm.

Mike York, animator që ka punuar në GTA 5 dhe GTA Online, ka deklaruar se nuk pret që Rockstar ta rrisë ndjeshëm çmimin e versionit bazë të lojës. Sipas tij, kompania nuk ka nevojë për një hap të tillë, pasi GTA 6 pritet të shënojë sukses të jashtëzakonshëm edhe pa një çmim të lartë.

York thekson se çmimi standard prej rreth 70 dollarësh, i zakonshëm për videolojërat AAA, ka ende më shumë kuptim. Çdo çmim mbi këtë nivel mund të shkaktojë reagime negative nga një pjesë e komunitetit të lojtarëve.

Ai nuk e përjashtoi mundësinë që Rockstar të ofrojë një edicion special ose pre-order me çmim rreth 99 dollarë, i cili do të përfshinte përmbajtje apo bonuse shtesë, por nënvizoi se kjo nuk duhet të ngatërrohet me çmimin e lojës bazë.

Duke folur për zhvillimin e lojës, York tha gjithashtu se nuk pret një tjetër shtyrje të datës së publikimit. Aktualisht, GTA 6 është planifikuar të dalë në nëntor 2026, ndërsa ekipi zhvillues ndodhet në fazën përfundimtare të përmirësimit të detajeve.

GTA 6 mbetet një nga lojërat më të pritura në historinë e industrisë së videolojërave, ndërsa Rockstar ende nuk ka konfirmuar zyrtarisht as çmimin dhe as detajet e edicioneve të ndryshme. /Telegrafi/

Komandanti i Korpusit Vullnetar Rus në radhët e ukrainasve raportohet se ka vdekur.

Komandanti Denis Kapustin, i njohur më mirë me nofkën “WhiteRex”, i cili luftoi për Ukrainën, është vrarë në frontin e luftës.

Sipas informacionit paraprak, ai u vra në frontin e Zaporizhias pas një sulmi me dron FPV.

Në vitin 2024, një gjykatë ruse e dënoi Kapustinin me burgim të përjetshëm në mungesë, për organizimin e një ndërhyrjeje ndërkufitare nga forcat ukrainase në rajonin e Bryanskut të Rusisë gjatë vitit 2023.

Ky incident thekson tensionet e vazhdueshme dhe rrezikun në vijën e frontit, ndërsa sulmet me dron dhe veprimet e forcave të ndryshme vazhdojnë të ndikojnë në situatën në Ukrainë dhe zonat përreth kufirit rus.

Ndryshe, Rusia ka nisur pushtimin e shtetit ukrainas më 24 shkurt të vitit 2022 gjersa ka pasur shumë vullnetarë ndërkombëtarë që kanë luftuar në dyja krahët. /Telegrafi/