Portieri Aridon Bllaca është bërë shumë shpejt me ekip të ri pas largimit të tij nga Gjilani.

Bllaca edhe zyrtarisht është bërë pjesë e klubit të Llapit, lajm i cili u konfirmua nga vet faqja zyrtare e klubit përmes një njoftimi në Facebook.

24-vjeçari ka nënshkruar kontratë deri në vitin 2028 me ekipin e drejtuar nga Tahir Batatina.

Njoftimi i plotë i Llapit:

Klubi Futbollistik Llapi ka kënaqësinë të njoftojë angazhimin e portierit 24-vjeçar, Aridon Bllaca.

Bllaca vjen nga radhët e SC Gjilanit për të shtuar konkurrencën në portë dhe ka nënshkruar kontratë me klubin tonë deri në verën e vitit 2028.

Portieri shtatlartë e ka nisur karrierën e tij si i ri tek SC Gjilani, ku ka qenë pjesë e këtij klubi deri më tani, ndërsa nga edicioni pranveror do të vazhdojë t’i mbrojë ngjyrat bardhekaltër të KF Llapi.

Bllaca ka debutuar me ekipin e parë të Gjilanit në vitin 2021, ndërsa ka regjistruar gjithsej 39 paraqitje zyrtare në të gjitha garat, duke e mbajtur portën e paprekur në 12 ndeshje.

Tashmë është koha që Aridon Bllaca të shfaqë cilësitë e tij në klubin e ri, teksa nga ai presim të japë kontribut maksimal në realizimin e objektivave tona./Telegrafi/

I ftuari i radhës në podcastin “Arena e Yjeve” ishte futbollisti i njohur Albin Krasniqi. Ky episod realizohet me mbështetjen e sponsorëve zyrtarë Golden Eagle , Air Munich dhe Exfis.

Albin Krasniqi ka rikujtuar me shumë emocion fillimet e tij në futbollin profesionist dhe mënyrën se si, pothuajse rastësisht, u gjend në provë te Shkëndija e Tetovës si adoleshent, një hap që më pas do t’i ndryshonte rrjedhën e karrierës.

“E kam një njeri të familjes, shkojë në Tetovë shpesh edhe shkojë te ai edhe ai ma bën kështu kështu janë do prova nëse je në pushim, nëse nuk je duke bërë diçka, hajde provoje”.

“Edhe unë kam menduar që po shkojë me juniorë, pasi kam qenë shumë i vogël 15 vjet, edhe kur hy aty në zhveshtore kur i shoh krejt njerëz të mëdhenj, mendoj që kam hy gabim njëherë, nuk e dija çfarë po ndodhte”.

“Edhe më thanë jo me ekip të parë, qenke i ri, por shohim e provojmë. Hy një ditë, dy ditë, u bën një javë, i kryejmë një javë provat, akoma pa shku në shtëpi po më thirrë trajneri, në atë kohë ka qenë Qatip Osmani dhe ndihmësi Bashkim Livoreka, ma bëjnë për 2 javë i fillojmë përgatitjet me ekipin e parë, duhet të jesh pjesë e ekipit të parë”.

“Edhe çuditna 16 vjet sapo i pata mbushur, akoma isha me juniorë, po i tregoj babait kështu kështu po ma bën po more shko qysh jo Shkëndija në atë kohë sapo e përfundojë ndeshjen me Milanin edhe shkojë atje hy në zhveshtore çfarë të shohë, krejt yje, Ferhat Hasani, Besart Ibraimi, Armend Alimi, Ardian Cuculi, Egzon Bejtullai”.

“Për mu ka qenë habi të jem pjesë e zhveshtores e lëre më të stërvitem me ta”, ka rrëfyer Krasniqi.

Episodin e plotë me Albin Krasniqin mund ta ndiqni në kanalin zyrtar të Telegrafit në Youtube./Telegrafi/

- YouTube www.youtube.com

Arsenali ka shënuar fitore me rezultat 2-1 në shtëpi ndaj Brightonit në kuadër të javës së 18-të në Ligën Premier.

Ndeshja nisi me ritëm të lartë dhe që në minutën e katërt, Bukayo Saka u shfaq rrezikshëm, duke depërtuar në mbrojtjen e Brightonit dhe u përball me portierin Bart Verbruggen, por goditja e tij u ndal nga holandezi.

Dominimi i Arsenalit u konkretizua në minutën e 14-të, kur Bukayo Saka asistoi për Martin Odegaard, i cili nga skaji i zonës realizoi saktë për epërsinë prej 1-0.

Brighton reagoi pas golit dhe pati një moment të artë në minutën e 64-të, kur Yasin Ayari goditi fuqishëm nga jashtë zonës, por topi u përplas në shtyllën e majtë të portës.

Vetëm pak çaste më pas, mysafirët barazuan shifrat. Pas një topi të kthyer në zonë, Diego Gómez u tregua më i shpejti dhe realizoi nga afërsia për 1:1.

Arsenali u rikthye menjëherë në sulm dhe në minutën e 52-të, një krosim i rrezikshëm përfundoi në rrjetë pas një devijimi të pafat të Georginio Rutter, i cili shënoi autogol për rezultatin 2-0 në favor të vendasve.

Në pjesën e dytë, të dyja skuadrat patën raste të pastra. Viktor Gyokeres ishte pranë golit për Arsenalin në minutën e 60-të, por Verbruggen reagoi shkëlqyeshëm.

Nga ana tjetër, Yankuba Minteh rrezikoi seriozisht në minutën e 77-të, por David Raya bëri një pritje vendimtare duke ruajtur avantazhin.

Pavarësisht përpjekjeve të Brightonit në minutat e fundit, Arsenali arriti ta administrojë rezultatin dhe të marrë tri pikë të rëndësishme./Telegrafi/

Liverpooli ka shënuar fitore me rezultat 2-1 në shtëpi ndaj Wolves në kuadër të javës së 18-të në elitën e futbollit anglez.

‘Të Kuqtë’ e nisën ndeshjen fuqishëm dhe që në minutën e 11-të ishin shumë pranë golit, kur Hugo Ekitike depërtoi në zonë dhe goditi fort, por topi u përplas në shtyllën e djathtë të portës.

Presioni i Liverpoolit vazhdoi dhe në minutën e 28-të ishte Alexis Mac Allister që u afrua sërish me golin, por goditja e tij e menjëhershme nga brenda zonës përfundoi sërish në shtyllë.

Epërsia erdhi në minutën e 41-të, kur Ryan Gravenberch përfitoi nga një pasim i saktë në zonë dhe me një finalizim të bukur realizoi për rezultatin 1-0.

Vetëm një minutë më vonë, Liverpooli dyfishoi rezultatin. Hugo Ekitike asistoi bukur për Florian Wirtz, i cili nga brenda zonës goditi saktë për 2-0.

Në pjesën e dytë, Wolves reaguan dhe në minutën e 51-të fillimisht Arokodare rrezikoi seriozisht me kokë, por portieri i Liverpoolit reagoi shkëlqyeshëm.

Nga aksioni pasues, Santiago Bueno përfitoi nga një top i kthyer dhe shënoi nga afërsia për 2-1.

Liverpooli kërkoi ta mbyllte ndeshjen dhe pati disa raste të pastra. Në minutën e 61-të, Florian Wirtz ishte pranë golit të tretë, por goditja e tij përfundoi ngushtë jashtë portës.

Ndërsa në minutën e 65-të, Curtis Jones u ndal nga një pritje brilante e Jose Sa, pas një goditjeje të rrezikshme drejt këndit të poshtëm.

Në fund, pavarësisht përpjekjeve të Wolves, Liverpooli arriti ta ruajë avantazhin dhe të sigurojë tri pikë të vlefshme./Telegrafi/

Liverpool po shqyrton një lëvizje të guximshme në formë huazimi gjashtëmujor për sulmuesin e Paris Saint-Germain, Gonçalo Ramos, pas dëmtimit të rëndë të Alexander Isak, i cili e ka lënë trajnerin Arne Slot me mungesa serioze në repartin ofensiv.

Me “Të Kuqtë” përballë një periudhe vendimtare të sezonit, kampionët e Ligës Premier po eksplorojnë zgjidhje afatshkurtra për të ruajtur garën për titull, teksa presin rikthimin e plotë të rekord-transferimit të tyre.

Sipas CaughtOffside, një nga emrat në listën e Liverpoolit këtë janar është sulmuesi i PSG-së, Ramos, i cili mund të jetë i disponueshëm për një huazim afatshkurtër.

Interesimi për reprezentuesin portugez pasqyron dëshirën e klubit për një sulmues të gatshëm, që mund të kontribuojë menjëherë pa ndryshuar planet afatgjata.

Sulmuesi i “Le Parisiens”, i cili ka shënuar nëntë gola këtë sezon, shihet si një opsion ideal afatshkurtër falë aftësisë për presion të lartë dhe instinktit brenda zonës së rreptësisë.

Një huazim do t’i lejonte Liverpoolit të mbetet konkurrues, duke shmangur një angazhim të madh financiar pas verës së shpenzimeve të larta në vitin 2025.

Ramos nuk është i vetmi emër në radar, teksa klubi po vlerëson alternativat. Ivan Toney i Al-Ahli dhe Dusan Vlahovic i Juventusit vlerësohen brenda klubit, por shihen më shumë si objektiva afatgjata sesa zgjidhje të shpejta për sezonin aktual.

Liverpool është i kujdesshëm të mos bëjë një transferim të përhershëm në janar që mund të komplikojë planifikimin e skuadrës pas rikthimit të Isak në formë të plotë./Telegrafi/

Barcelona ka disa vendime të rëndësishme për transferimet për t’i marrë para përfundimit të sezonit aktual, dhe një prej tyre lidhet me Robert Lewandowskin.

Sulmuesi veteran pritet së shpejti t’i skadojë kontrata dhe klubi duhet të vendosë nëse do t’i ofrojë mundësinë për ta zgjatur qëndrimin në Kataloni.

Lewandowski, i cili po tërheq interes të fortë nga klubi i MLS-së Chicago Fire, ka folur për të ardhmen e tij për gazetarin polak Bogdan Rymanowski.

Ai pranoi se aktualisht nuk ka asgjë konkrete sa i përket kësaj çështjeje.

“Ende kam kohë për të marrë një vendim. Për momentin, nuk e di se ku dua të luaj. Nuk ka nevojë të mendoj për këtë tani. Nuk e di se cilin drejtim do të marr, por nuk kam asnjë presion.

Nuk po flas me trajnerin për klubet e interesuara. Nuk bëhet fjalë për ta përgjysmuar pagën time. Shumëçka varet nga plani i klubit dhe nga ajo që dua unë”, u shpreh Lewandowski.

Sulmuesi polak foli gjithashtu për objektivat e tij për pjesën e mbetur të sezonit.

“Shpresoj t’i luajmë këto dy ndeshje në një mënyrë që të na ndihmojë të kualifikohemi për Kupën e Botës”.

“Do të doja t’i kisha të gjitha: kualifikimin në Kupën e Botës, titullin në Spanjë dhe Ligën e Kampionëve. Jam i vetëdijshëm se këto janë vitet e mia të fundit në futboll”, përfundoi ai./Telegrafi/

Mbrojtësi i majtë i Milanit, Davide Bartesaghi, po lë përshtypje këtë sezon në Serie A dhe progresi i tij nuk ka kaluar pa u vënë re në Europë. Real Madrid është klubi më i fundit që ka nisur ta monitorojë nga afër zhvillimin e tij.

Në tetor të këtij viti ishte raportuar se Barcelona po i kushtonte vëmendje ecurisë së Bartesaghit, ndërsa interesimi i Arsenalit ishte tashmë i njohur.

Bartesaghi ka kontratë me Milanin deri në vitin 2030 dhe, si produkt i akademisë së klubit, “Rossonerët” pritet të jenë hezitues për ta humbur kaq shpejt pas shpërthimit të tij në ekipin e parë.

Tashmë, sipas Caught Offside, edhe Real Madrid i është bashkuar listës së klubeve që po e ndjekin nga afër mbrojtësin e majtë.

Përveç Barcelonës dhe Arsenalit, edhe Manchester City dhe Bayern Munich janë të njohur mirë me aftësitë e tij.

Mbrojtësi adoleshent është tashmë pjesë e rregullt e Kombëtares U21 të Italisë dhe deri më tani ka regjistruar 13 paraqitje me ekipin e parë të Milanit, duke shënuar dy gola dhe një asistim.

Milani është kundër çdo shitjeje në afatin kalimtar të janarit dhe synon ta mbajë lojtarin për momentin. Megjithatë, është përmendur një çmim rreth 45 milionë euro për verën.

Thuhet se Arsenali është klubi më i interesuar për talentin italian.

Nga ana tjetër, Real Madridi mund të jetë në pozitë për të nënshkruar me një tjetër mbrojtës të majtë së shpejti, në varësi të zhvillimeve me lojtarët aktualë.

Përforcimi i verës, Alvaro Carreras, shihet si një opsion afatgjatë në “Santiago Bernabeu”, por ka më shumë dyshime rreth së ardhmes së Ferland Mendy dhe Fran Garcia./Telegrafi/

Ruben Amorim u pa duke “shpërthyer” ndaj njërit prej lojtarëve të tij gjatë fitores së vështirë të Manchester United ndaj Newcastle United.

Manchester United u rikthye te fitoret me triumfin minimal 1-0 kundër Newcastle në ‘Boxing Day’.

Patrick Dorgu shënoi golin e vetëm të ndeshjes në minutën e 24-të, kur goditi bukur me volej në këndin e poshtëm të portës.

Kjo ishte fitorja e parë e Unitedit që nga suksesi 4-1 ndaj Wolves në fillim të muajit, ndërsa Newcastle tani ka tri ndeshje radhazi në kampionat pa fitore, me klubin që tashmë ka marrë një vendim për të ardhmen e Eddie Howe.

Nga ana tjetër, Amorim ndryshoi skemën e lojës për të siguruar jo vetëm fitoren, por edhe portën e paprekur. Pasi e nisi takimin me katër mbrojtës, trajneri portugez kaloi në një mbrojtje me gjashtë lojtarë në minutat e fundit për të neutralizuar presionin ofensiv të Newcastle.

Trajneri i “Djajve të Kuq” bëri edhe ndryshime në repartin ofensiv, përfshirë aktivizimin e Joshua Zirkzee, i cili zëvendësoi Benjamin Sesko në pjesën e dytë.

Megjithatë, Zirkzee e nervozoi Amorimin në një moment shqetësues.

Sipas gazetarit Samuel Luckhurst, Zirkzee e zemëroi Amorimin për faktin se “nuk po bënte presion” dhe “nuk po jepte maksimumin”.

“Amorim shpesh po shpërthente ndaj Zirkzee për mungesë presioni dhe angazhimi maksimal”, shkroi Luckhurst në platformën X.

Një video e publikuar më pas tregoi trajnerin portugez duke reaguar ashpër pranë vijës anësore, reagim që duket se ishte i drejtuar pikërisht ndaj Zirkzee./Telegrafi/

I ftuari i radhës në podcastin “Arena e Yjeve” ishte futbollisti i njohur Albin Krasniqi. Ky episod realizohet me mbështetjen e sponsorëve zyrtarë Golden Eagle , Air Munich dhe Exfis.

Krasniqi ka rrëfyer në detaje rrugëtimin e tij në futboll, duke nisur nga vendimi i guximshëm për të shkuar në prova te Shkëndija si 15-vjeçar, një hap që fillimisht dukej i zakonshëm, por që shumë shpejt u shndërrua në një mundësi serioze për karrierën e tij.

Ai u ndal edhe te takimi i parë me trajnerin Bylbyl Sokoli në Ferizaj, një moment që, sipas tij, i dha besim dhe shtysë për të vazhduar përpara.

Futbollisti kosovar foli edhe për një nga dilemat më të mëdha të karrierës, kur kontrata me Shkëndijën ishte gati, por në fund vendosi të kalojë te Drita.

Po ashtu, Krasniqi u tregua i sinqertë për periudhën e vështirë teksa ishte nën drejtimin e Adian Nuhiut, ku për 16 xhiro nuk mori minuta të mjaftueshme, por sa herë që u aktivizua, arriti të tregojë vlerat e tij.

Një pjesë e veçantë e bisedës iu kushtua edhe finaleve, ku Krasniqi njihet si “njeriu i ndeshjeve vendimtare”, me dy finale të luajtura me Prishtinën, nga të cilat njëra mbetet e paharrueshme për të.

Në fund, ai foli edhe për hapin e madh drejt futbollit jashtë vendit, kalimin në Ukrainë dhe rolin e rëndësishëm që pati Debatik Curri në realizimin e këtij transferimi.

Episodin e plotë me Albin Krasniqin mund ta ndiqni në kanalin zyrtar të Telegrafit në Youtube./Telegrafi/

- YouTube www.youtube.com

Real Madrid ka plane për të nënshkruar me një mbrojtës të ri qendror verën e ardhshme, duke pasur parasysh se mund të humbasin dy opsione të skuadrës së parë.

David Alaba pritet të largohet pas rënies në hierarkinë e skuadrës gjatë viteve të fundit, dhe mund t’i bashkohet Antonio Rudiger, i cili gjithashtu ka kontratë që skadon në qershor.

Në javët e fundit, disa mbrojtës qendrorë janë lidhur me Real Madridin. Ibrahima Konate i Liverpool ishte më i përfoluri, por një lëvizje për ta nënshkruar si lojtar i lirë është përjashtuar nga zyrtarët e Bernabeut.

Dayot Upamecano dhe Marc Guehi gjithashtu janë përfolur, por në rastin e fundit, ai gjithashtu do të mos konsiderohet.

Sipas ESPN, Real Madrid nuk ka plane për të nënshkruar me Guehi gjatë muajve në vijim, pavarësisht që lojtari është i hapur për t’iu bashkuar skuadrës së Xabi Alonsos.

Ky qëndrim mund të shpjegojë pse reprezentuesi anglez është më afër për t’u bashkuar me kampionët aktualë të Ligës Premier, Liverpool.

Interesante është se raporti thekson se Real Madrid kanë filluar të shqyrtojnë opsione të tjera, duke përfshirë Jeremy Jacquet dhe Nico Schlotterbeck.

I pari ka qenë në radar për 18 muaj, ndërsa për rastin e fundit, ai mund të jetë një mundësi e tregut për shkak se kontrata e tij me Borussia Dortmund skadon në 2027, megjithatë paga mund të jetë një çështje./Telegrafi/

Robert Lewandowski raportohet se ka bërë një hap më afër largimit nga Barcelona, teksa përfaqësuesit e tij po përgatiten të zhvillojnë një raund të ri bisedimesh me përfaqësues nga Arabia Saudite për një transferim të mundshëm dhe shumë fitimprurës në Lindjen e Mesme.

Reprezentuesi i Polonisë po ashtu është në radarin e klubit të MLS-së, Chicago Fire, në prag të skadimit të kontratës së tij në fund të sezonit.

Sipas një raporti të ri nga e përditshmja spanjolle AS, agjenti izraelit i Lewandowskit, Pini Zahavi, pritet të zhvillojë një takim të ri me zyrtarët e Arabisë Saudite përpara hapjes së afatit kalimtar të janarit, më 1 janar.

Raporti pretendon se Lewandowski tashmë ka marrë një ofertë nga Lindja e Mesme, ndonëse nuk specifikohet se cilat klube janë të interesuara për shërbimet e sulmuesit, i cili këtë sezon ka shënuar tetë gola në 18 paraqitje në të gjitha garat me Barcelonën.

37-vjeçari besohet se është i tërhequr nga mundësia për të luajtur në Lindjen e Mesme, ku Superliga e Arabisë strehon disa nga emrat më të mëdhenj të futbollit botëror, përfshirë Al-Nassr me yllin portugez Cristiano Ronaldo, si dhe dyshen e Al-Ittihad, Karim Benzema dhe N’Golo Kante.

Në një raport të veçantë të BBC më herët gjatë këtij muaji, u bë e ditur se përfaqësuesit e Leëandoëskit kanë zhvilluar bisedime edhe me Chicago Fire për një transferim të mundshëm në Shtetet e Bashkuara të Amerikës.

Chicago Fire, klub që më parë ka tentuar të transferojë emra të mëdhenj si Neymar dhe Kevin De Bruyne në vitin 2025, raportohet se e ka vendosur Lewandowskin si objektiv prioritar për të paktën gjashtë muaj, veçanërisht duke pasur parasysh se Çikago ka komunitetin më të madh polak në SHBA./Telegrafi/

E ardhmja e Mohamed Salah te Liverpool është rikthyer në qendër të vëmendjes pas raporteve që tregojnë për një qasje nga Fenerbahce, ndërkohë që po rritet spekulimi rreth rolit të tij nën drejtimin e Arne Slot.

Megjithatë, agjenti i yllit egjiptian ka reaguar për të sqaruar situatën dhe për të përjashtuar mundësinë e një transferimi në Stamboll, duke dhënë qartësi mbi të ardhmen e menjëhershme të 33-vjeçarit.

Raportohet se Salah ka përjashtuar mundësinë e bashkimit me gjigantin turk Fenerbahce, pas kontakteve të drejtpërdrejta mes klubit të Stambollit dhe përfaqësuesve të tij.

Ky zhvillim ndodh në një kohë kur e ardhmja e sulmuesit të Liverpoolit është nën vëzhgim të shtuar për shkak të rolit të reduktuar që ka pasur te skuadra këtë sezon.

Sipas raporteve nga Turqia, zyrtarët e Fenerbahçes zhvilluan bisedime me agjentin e gjatë të Salah, Ramy Abbas, më herët gjatë kësaj jave.

Qëllimi i takimit ishte të shqyrtohej nëse ndërkombëtari egjiptian do të konsideronte një lëvizje drejt Stambollit, me palën turke të vetëdijshme për spekulimet se Salah është ndjerë i pasigurt te Liverpool nën drejtimin e trajnerit Slot.

Agjenti i Salah, Abbas, nuk la shumë vend për paqartësi kur iu përgjigj interesimit të klubit turk, ndërkohë që ish-lojtari i Chelseat përfaqëson Egjiptin në Kupën e Afrikës.

"Salah do të qëndrojë ose te Liverpool, ose do të shkojë në Arabinë Saudite”, raportohet të ketë thënë Abbas për përfaqësuesit e Fenerbahces, sipas portalit turk sabah.com.tr./Telegrafi/

Sulmuesi i Real Madridit, Vinicius Junior, ka kontratë edhe për 18 muaj të tjerë me klubin madrilen dhe aktualisht ka pak shenja se kjo çështje do të zgjidhet shpejt. Megjithatë, ende ekzistojnë faktorë që i afrojnë të dyja palët në negociata.

Sulmuesi brazilian raportohet se kishte rënë dakord për kushtet e një kontrate të re gjatë pranverës, por në qershor agjenti i tij rriti kërkesat ndaj Real Madridit.

Kërkesa kryesore është që Vinicius të përfitojë të njëjtin nivel page si Kylian Mbappé, duke përfshirë edhe bonuset që i paguhen sulmuesit francez, diçka për të cilën Real Madridi nuk ka ndërmend të pajtohet.

Pavarësisht që të dyja palët po qëndrojnë fort në pozicionet e tyre, presidenti i Real Madridit, Florentino Perez, vazhdon të jetë i vendosur për ta mbajtur Viniciusin në klub.

Javën e kaluar u raportua se për herë të parë lojtari po e konsideronte largimin, pas pritjes armiqësore që kishte marrë nga tifozët në “Santiago Bernabeu”.

Sipas RadioMarca, Perez nuk dëshiron “në asnjë rrethanë” që Vinicius të largohet nga klubi. Edhe pse në treg ka lojtarë të krahasueshëm, thuhet se nuk ka asnjë që është qartësisht më i mirë se braziliani.

Po ashtu, theksohet se nuk do të ishte aspak e pazakontë që Vinicius ta rinovojë kontratën në muajt në vijim.

Megjithatë, raportimet më të fundit sugjerojnë se bisedimet do të shtyhen deri në verën e ardhshme dhe mund të zhvillohen pas Kupës së Botës.

Duke pasur parasysh rënien e formës gjatë vitit të fundit, Vinicius tani ndodhet nën presion gjithnjë e më të madh për të dëshmuar se e meriton kontratën që i është ofruar, e lëre më një marrëveshje të ngjashme me atë të Mbappes./Telegrafi/

Real Madridi është lidhur me një transferim të mundshëm për një mesfushor që nga largimi i Toni Kroosit dy sezone më parë, por gjithnjë e më shumë po duket se klubi madrilen mund të dalë në treg verën e ardhshme për ta plotësuar këtë pozicion.

Një nga emrat që është përfolur më së shumti është mesfushori i AZ Alkmaar, Kees Smit.

Mesfushori holandez 19-vjeçar ka qenë në radar të Real Madridit dhe Barcelonës gjatë vitit 2025, por publikisht ka deklaruar se dëshiron të vazhdojë zhvillimin e tij në Eredivisie.

Së bashku me Adam Wharton dhe Rodri Hernandez, ai është një nga pak lojtarët për të cilët “Los Blancos” duket se janë bindur për këtë rol.

Dëshira e vetë Smitit për të luajtur rregullisht dhe për t’u zhvilluar gradualisht ka ndihmuar pa dyshim AZ Alkmaar që ta mbajë talentin e tyre në rritje.

Megjithatë, një numër klubesh të mëdha tani duket se po e ndjekin nga afër situatën, dhe një transferim i madh financiar nuk përjashtohet në vitin 2026.

Sipas The Athletic, nëse AZ vendos ta shesë Smitin, do të kërkojë një shumë prej 60 milionë eurosh.

Real Madridi ka investuar më parë shuma të mëdha në talente të rinj, me Vinicius Junior që u transferua për 40 milionë euro, ndërsa Endrick u ble për 35 milionë euro plus 25 milionë në bonuse, shifër që potencialisht mund të arrijë shumën e kërkuar nga AZ Alkmaar për Smitin./Telegrafi/

Legjenda e Manchester Unitedit, Louis Saha, u ka bërë thirrje “Djajve të Kuq” që ta transferojnë Morgan Rogers gjatë afatit kalimtar të janarit.

Manchester United do të hyjë në një ndeshje të Ligës Premier pa Bruno Fernandes vetëm për herë të dytë në gati gjashtë vjet, kur të presë Newcastle United, një mungesë e rrallë që ka rritur debatet rreth kreativitetit dhe thellësisë në repartin kreativ të skuadrës.

Mungesa e portugezit pritet të lërë një boshllëk të madh në formacionin e Ruben Amorimit, në një moment kur diferencat në krye të tabelës janë minimale dhe çdo detaj ka peshë të madhe.

Duke folur për FootItalia, Saha vlerësoi se Rogers përfaqëson profilin ideal për t’i dhënë energji dhe kreativitet mesfushës së Amorimit.

“Besoj se Manchester United ka bërë disa lëvizje shumë të mira dhe më ka pëlqyer të shoh rritjen e ekipit. Portieri Senne Lammens ishte një transferim i shkëlqyer dhe mendoj se ka ndihmuar shumë në stabilitetin tonë”.

“Në janar, shoh nevojën për një përforcim që mund të ndezë kreativitetin në mesfushë. Përveç Bruno Fernandes dhe Mason Mount, ka nevojë për shpejtësi dhe dinamizëm në krijimin e lojës”.

“E shoh Rogers si një lojtar që mund të shpërthejë përpara, por edhe të përballojë presionin, ta mbajë topin dhe t’u japë kohë lojtarëve të tjerë të pozicionohen më mirë”.

“Ai është tipi i lojtarit që i duhet Unitedit. Është një profil shumë interesant dhe i rrallë, sepse shumë lojtarë janë atletikë, por të bësh zgjedhjet e duhura me atë atletizëm nuk është e lehtë. Prandaj, Rogers mund të jetë një transferim ëndrrash”, ka deklaruar ai./Telegrafi/

Egjipti është ndëshkuar dhe ka marrë një “paralajmërim të fortë” nga Konfederata Afrikane e Futbollit (CAF) pas fitores ndaj Zimbabvesë në Kupën e Afrikës 2025.

Mohamed Salah shënoi golin e fitores në minutat shtesë për skuadrën e drejtuar nga Hossam Hassan, teksa shtatë herë kampionët e AFCON-it u përmbysën rezultatin për të siguruar tre pikë shumë të rëndësishme në ndeshjen hapëse të Grupit B.

Pavarësisht dominimit me pothuajse 80 për qind të posedimit të topit në pjesën e parë, favoritët absolutë Egjipti shkuan në pushim në disavantazh 1-0, pasi Zimbabve kaloi në avantazh befasues me anë të sulmuesit Prince Dube.

Megjithatë, pasi Omar Marmoush i Manchester Cityt barazoi rezultatin në minutën e 64-të, ishte i pashmangshëm goli i Mohamed Salah, i cili realizoi në minutat e fundit, duke treguar qetësi të madhe përballë portierit Washington Arubi.

Sa i përket mësimeve të nxjerra, Egjipti do ta mendojë dy herë sjelljen pas ndeshjeve, pasi u gjobit me 5,000 dollarë pas takimit të parë në AFCON të hënën.

Konfederata Afrikane e Futbollit vendosi sanksionin pasi lojtarët dhe stafi teknik i Egjiptit nuk përmbushën detyrimet e detyrueshme mediatike në zonën miks pas fishkëllimës përfundimtare, sipas Africa Top Sports.

Gazetari afrikan Micky Jnr pretendon se e gjithë delegacioni egjiptian kaloi pranë gazetarëve pa iu përgjigjur pyetjeve pas ndeshjes, gjë që përbën një shkelje të qartë të rregullave mediatike të CAF-it.

CAF i ka dhënë gjithashtu një paralajmërim të fortë Egjiptit, duke theksuar se do të aplikohen masa më të ashpra nëse situata përsëritet pas ndeshjes së dytë të fazës së grupeve kundër Afrikës së Jugut, e planifikuar për të premten.

Të folurit me median është një komponent i rëndësishëm i rregulloreve të turneut të CAF-it, pasi intervistat pas ndeshjes dhe komunikimi në zonën miks konsiderohen thelbësore për imazhin e përgjithshëm të futbollit./Telegrafi/

Ditët kur Real Madridi dhe Barcelona shfaqnin një lloj bashkëpunimi dhe projektesh të përbashkëta kanë marrë fund.

Edhe pse klubi katalanas ndodhet në një periudhë zgjedhore, nga ‘Santiago Bernabeu’ po zbatohet ajo që Florentino Perez deklaroi në Asamblenë e Anëtarëve.

Kjo qasje ka sjellë prishjen përfundimtare të çdo afërsie mes dy klubeve, të cilat historikisht janë kuptuar më mirë përmes përballjes sesa përmes një harmonie të dukshme.

Real Madridi nuk ka ndërmend të ndalet vetëm te procesi gjyqësor dhe planifikon të kërkojë dëmshpërblime milionëshe ndaj Barcelonës për pasojat e pagesave ndaj Enriquez Negreira.

Ndëshkimi sportiv mbetet në kompetencën e nenit 4.1 të rregullores së UEFA-s, ndërsa disa klube të tjera po ndjejnë se nuk kanë reaguar mjaftueshëm ndaj asaj që tashmë është provuar.

Çështja përfshin pagesa për raporte të dyshimta, dokumente për ndeshje dhe turne që nuk ishin zhvilluar ende, si dhe deklarata kontradiktore nga ish-drejtues të Barcelonës për rolin e ish-zv/presidentit të Komitetit Teknik të Gjyqtarëve.

Në qendër të hetimit janë 8.4 milionë euro të paguara nga Barcelona drejt kompanive të lidhura me Negreira.

Ndërsa pagesat janë të provuara, mbetet për t’u sqaruar nëse ka pasur korrupsion sportiv mes viteve 2001 dhe 2018. Real Madridi është klubi më aktiv në kërkimin e së vërtetës, duke synuar të zbardhë nëse ka pasur manipulim të garës dhe “blerje vullnetesh”.

Klubi madrilen arriti më herët të zgjerojë hetimin deri më 1 mars, duke treguar se nuk i ka kthyer shpinën asaj që presidenti i UEFA-s, Aleksander Ceferin, e cilësoi si “gjëja më e rëndë që kam parë ndonjëherë në futboll”.

Ndërkohë që La Liga dhe RFEF kanë qenë pak aktive në proces, avokatët e Real Madridit kanë intensifikuar ofensivën ligjore.

Më 24 dhjetor u bë e ditur se Real Madridi ka kërkuar zyrtarisht auditime, fatura dhe dokumente financiare të Barcelonës për periudhën 2010-2021, përfshirë buxhetet ku shfaqen pagesa ndaj disa kompanive të përfshira në çështje.

Në total, janë kërkuar 625 dokumente, me synimin për të zbuluar destinacionin final të këtyre fondeve./Telegrafi/

Futbolli turk po përballet me një nga skandalet më të mëdha të viteve të fundit, pas zbulimeve për përfshirje masive në bastvënie të paligjshme nga lojtarë, drejtues klubesh dhe zyrtarë të futbollit.

Sipas Zyrës së Prokurorit Publik në Stamboll, të paktën 27 futbollistë të klubeve të Superligës dyshohet se kanë vënë baste në ndeshje ku përfshiheshin ekipet e tyre, një shkelje e rëndë e rregulloreve sportive dhe ligjit penal.

Në total, prokurorët kanë urdhëruar ndalimin e 46 personave, mes tyre 29 futbollistë, presidentë klubesh, komentatorë sportivë dhe individë të tjerë të përfshirë në këtë rrjet.

Një nga emrat më të njohur në listën e të dyshuarve është Metehan Baltaci, lojtar i kampionëve në fuqi të Turqisë, Galatasaray, i cili është pezulluar më herët për nëntë muaj për lidhje me bastvënien.

Prokuroria ka bërë të ditur se hetimet kanë zbuluar se shumica e lojtarëve kanë vënë baste drejtpërdrejt, ndërsa disa të tjerë kanë përdorur llogari të personave të tretë për të shmangur gjurmimin.

Në këtë kontekst përmendet edhe Mert Hakan Yandas i Fenerbahces, për të cilin autoritetet thonë se bastet janë vendosur përmes një llogarie tjetër.

Mediat turke raportojnë gjithashtu se në listën e personave të ndaluar përfshihet edhe ish-presidenti i Adana Demirsporit, Murat Sancak.

Hetimi mori përmasa të reja më 10 nëntor, kur gjashtë gjyqtarë futbolli dhe presidenti i Eyipsporit, klub i Superligës, u vendosën në paraburgim.

Dy presidentë klubesh të divizionit të tretë janë gjithashtu nën hetim për përpjekje për të ndikuar në rezultatin e një ndeshjeje të sezonit 2023/2024, e cila u bë e dyshimtë për shkak të mungesës totale të tentativave për gol nga të dyja skuadrat.

Deri tani, policia ka ndaluar 35 nga 46 personat e përfshirë në urdhrat e arrestit, ndërsa pesë të dyshuar ndodhen jashtë Turqisë. Asnjë prej klubeve të përmendura nuk ka reaguar zyrtarisht.

Federata Turke e Futbollit ka marrë masa drastike, duke pezulluar më shumë se 1,000 futbollistë në të gjitha kategoritë. Mbi 25 prej tyre janë nga Superliga, me dënime që variojnë nga 45 ditë deri në 12 muaj ndalesë loje.

I vetmi futbollist i huaj i përfshirë është senegalezi Alassane Ndao i Konyasporit, i cili është pezulluar për një vit.

Shumica e të pezulluarve janë nga divizionet e treta dhe të katërta, ndërsa në tetor federata suspendoi gjithashtu rreth 150 gjyqtarë për përfshirje në bastvënie./Telegrafi/

Trajneri i Chelseat, Enzo Maresca, ka shpjeguar arsyen pse ‘Blutë’ kanë pak gjasa të fitojnë titullin e Ligës Premier këtë sezon, ndërsa ka reflektuar gjithashtu mbi deklaratën e tij për “48 orët më të këqija” pas fitores ndaj Evertonit më 13 dhjetor.

Pas triumfit kundër Evertonit, trajneri italian deklaroi se sapo kishte kaluar “48 orët më të vështira” që nga momenti kur u transferua në ‘Stamford Bridge’ në vitin 2024.

“Kjo është arsyeja pse i vlerësoj lojtarët, sepse pavarësisht kaq shumë problemeve, ata po bëjnë shumë mirë pas një jave të komplikuar”.

“Që nga momenti kur iu bashkova klubit, 48 orët e fundit kanë qenë më të këqijat, sepse shumë njerëz nuk na mbështetën”.

“Jam shumë i lumtur për Malon në atë moment, sepse përpjekja e tij dhe e gjithë ekipit tregoi se të gjithë janë aty dhe duan ta ndihmojnë këtë klub”.

Këtë sezon, në ndeshjet në shtëpi, Chelsea ka mposhtur kampionët e Ligës Premier, Liverpoolin dhe ka mposhtur Barcelonën me rezultat 3-0 në Ligën e Kampionëve.

I pyetur nëse është e drejtë të thuhet se Chelsea luan më mirë kundër skuadrave “të mëdha”, italiani u pajtua, por theksoi se ekipi duhet të ruajë një nivel shumë të lartë çdo javë.

“Ndoshta kjo është e vërtetë për momentin dhe kjo është arsyeja pse aktualisht nuk jemi shumë pranë kreut të tabelës, na duhet më shumë vazhdimësi kundër llojeve të ndryshme të kundërshtarëve”, ka deklaruar ai./Telegrafi/

Interi po sheh përpara drejt afatit të ardhshëm dimëror të transferimeve, i cili hapet pas pak ditësh.

Ndër emrat që zikaltërit duket se po shqyrtojnë është edhe Federico Chiesa.

Sipas Alfio Musmarrës, gazetar i lidhur ngushtë me Interin, klubi ka shprehur tashmë interesim pranë Liverpoolit.

Marrëveshja mund të realizohet në formën e huazimit me opsion blerjeje.

Ideja e transferimit të Federico Chiesës vjen nga fakti se lojtari mund t’i japë Cristian Chivut mundësinë të kalojë në skemën 3-4-2-1 kur të jetë e nevojshme.

Gjithashtu ai mund të shërbejë si alternativë në krahun e djathtë, duke pasur parasysh se në disa rrethana, veçanërisht te Fiorentina dhe Juventusi, italiani ka luajtur herë pas here në atë pozicion.

Deri më tani gjatë vitit 2025, Chiesa ka zhvilluar rreth 30 ndeshje në të gjitha garat me Liverpoolin, duke numëruar katër gola dhe dy asistime./Telegrafi/