Vijojnë të jenë të shumtë individët që po plotësojnë Deklaratën Vjetore të të Ardhurave me qëllim përfitimin e kompensimit për arsimimin e fëmijëve.

Bazuar në disa shembuj konkretë të publikuar nga Monitor, shuma e kompensimit ndryshon në varësi të të ardhurave vjetore dhe shuma e zbritur e shpenzimeve që ndryshon sipas numrit të fëmijëve në ngarkim, përfshirë edhe shpenzimet fikse për arsim me vlerë maksimale 100 mijë lekë nëse të ardhurat janë nën 1.2 mln lekë në vit.

Për rastin me të ardhura bruto vjetore mbi 1,2 mln lekë në vit me 1 fëmijë në ngarkim, kompensimi për arsimin 62 euro në vit.

Në rastin e individit më të ardhura mbi 2 mln lekë në vit me dy fëmijë në ngarkim të moshës nën 18 vjeç, pas zbritjes së shpenzimeve për fëmijët me vlerë 96 mijë lekë, tatimi i mbipaguar apo kompensimi është në vlerën e rreth 12 mijë lekëve.

Për individët që paguhen mbi 200 mijë lekë në muaj dhe i kap tatimi prej 23%, kompensimi është 11,040 lekë për fëmijë.

Shuma maksimale e kompensimit e përfituar sipas shembujve rezulton për individët me të ardhura nën 1,2 mln lekë që përfitojnë edhe shpenzimet për fëmijët në ngarkim dhe për arsimin me vlerë 100,000 lekë.

Sipas shembullit kompensimi për një individ me të ardhura nën 1,2 mln lekë që ka 2 fëmijë në ngarkim arrin rreth 250 euro.

Për të gjithë individët që rezultojnë me tatim të mbipaguar pasi kanë plotësuar DIVA brenda 3 muajve pas përfundimit të afatit të deklarimeve do të dorëzojnë në tatime kërkesën me qëllim përfitimin e kompensimit. Procedura për dorëzimin e kërkesave pritet të sqarohet nga tatimet.

Shembull 1

Të ardhura mbi 1,2 mln lekë në vit 1 fëmijë në ngarkim

Konkretisht në DIVA-n e plotësuar dhe dorëzuar të individit A, rezulton se të ardhurat e tij vjetore për vitin 2025 ishin në vlerën e 1,470 mijë lekë. Tatimi i paguar gjatë vitit është 144,424 lekë.

Individit i janë zbritur të ardhurat nga punësimi:

– Zbritje nga të ardhurat nga punësimi sipas nenit 22, pika 1, germat a, b dhe c me vlerë 360 mijë lekë në vit (apo 30 mijë lekë në muaj).

– Shumë kompensimi për çdo fëmijë në ngarkim të tij më pak se 18 vjeç në vlerën 48 mijë lekë.

Në DIVA pasqyrohet se baza e të ardhurave të tatueshme pas zbritjes arrin në vlerën e 1 mln lekëve. Llogaritja e tatimit vjetor të paguar është 138,184 lekë.

Tatimi i mbipaguar rezulton në vlerën e 6,240 lekëve.

E llogaritur nga Vlera e Tatimit Vjetor të paguara 144,424 lekë- 138,184 lekë= 6,240 lekë.

Shembulli 2

Të ardhura mbi 2,2 mln lekë në vit 2 fëmijë në ngarkim

Për të ardhurat vjetore bruto me vlerë 2,232,140 lekë, rezulton se për vitin 2025 është paguar tatimi me vlerë 255,796 lekë.

Në rastin në fjalë individi ka në ngarkim 2 fëmijë të moshës nën 18 vjeç dhe përfiton zbritje të shpenzimeve me vlerë 96,000 lekë.

Pas zbritjes së shpenzimeve tatimi i ri i llogaritur është 243,391 lekë.

Tatimi i mbipaguar apo kompensimi është në vlerën e 12,405 lekë.

Shembulli 3

Të ardhura nën 1,2 mln lekë në vit, 2 fëmijë në ngarkim

Sipas të dhënave të DIVA-s të plotësuar dhe dorëzuar të individit C të ardhurat bruto vjetore për vitin 2025 ishin 1,189,374 lekë.

Tatimi i paguar vjetor gjatë vitit 2025 është në vlerën e 107,820 lekëve.

Individi C ka dy fëmijë të moshës 5 dhe 9 vjeç, ku një prej tyre ndjek arsimin fillor në shkollë private.

Përveç zbritjes së shpenzimeve për fëmijët në ngarkim me vlerë 96,000 lekë individi përfiton edhe zbritje shpenzimi prej 100,000 për arsimin e fëmijëve duke qenë se të ardhurat nuk kalojnë kufirin e 1.2 mln lekëve në vit, pra janë nën 1.2 mln lekë në vit dhe disponon dokumentacionet justifikuese, në këtë rast faturat e shkollës private për shpenzimet e arsimit të fëmijës.

Pas vendosjes së këtyre të dhënave sistemi ka gjeneruar automatikisht tatimin e mbipaguar, apo kompensimin me vlerë 25,481 lekë.

Konkretisht nisur nga të dhënat në DIVA, individi ka përfituar:

-Zbritje nga te ardhurat nga punësimi sipas nenit 22, pika 1, germat a, b dhe c me vlerë 360,000 lekë

-Shumë kompensimi për çdo fëmijë në ngarkim të tij më pak se 18 vjeç me vlerë 96,000 lekë (kjo shumë u gjenerua automatikisht nga sistemi pas vendosjes së numrit të fëmijëve).

-Shpenzime për arsimin e fëmijëve me vlerë 100,000 (vlera u shtua nga deklaruesi gjatë plotësimit të DIVA, pasi disponon dokumentacionin justifikues të shpenzimeve në rast kontrolli nga tatimet dhe të ardhurat bruto vjetore janë nën 1.2 mln lekë)

Pas zbritjes së shpenzimeve totali i të ardhurave bruto arrin 633,374 lekë.

Tatimi i rillogaritur pas zbritjes së shpenzimeve është në vlerë 82,339 lekë.

Tatimi i mbipaguar rezulton: 107,820 lekë (tatimi i paguar për 2025) – 82,339 lekë (tatimi i rillogaritur pas zbritjes së shpenzimeve) = 25,481.

Lexo këtu : https://monitor.al/shembull-sa-kompensim-per-arsimin-perfiton-prindi-me-2-femije-me-te-ardhura-nen-1-2-mln-leke-vit/

Hapet aplikimi për DIVA. E-tax llogarit automatikisht kompensimin e arsimit   

The post Shembujt e DIVA, nga 62 deri në 250 euro, sa varion kompensimi për arsimin e fëmijëve  appeared first on Revista Monitor.

Nga përparimet e shpejta në IA deri te ndryshimet në rendin ekonomik pas Luftës së Dytë Botërore, shumë forca po riformësojnë sistemin global.

Ndërsa këto ndryshime përshpejtohen, ato sjellin rreziqe në rritje. Jo vetëm që ngrenë pikëpyetje për konkurrueshmërinë dhe sigurinë kombëtare, por pritet gjithashtu të godasin në mënyrë disproporcionale tregjet e punës.

Ky artikull tregon rreziqet kryesore globale në vitin 2026, bazuar në të dhënat e Raportit Global të Rreziqeve 2026 të Forumit Ekonomik Botëror (World Economic Forum).

Një vështrim më i afërt mbi rreziqet kryesore globale

Për këtë analizë, Forumi Ekonomik Botëror ka anketuar më shumë se 1,300 ekspertë mbi rreziqet më urgjente globale në vitin 2026.

Të anketuarve iu kërkua të përgjigjeshin në pyetjen:

“Ju lutemi, zgjidhni një rrezik që mendoni se ka më shumë gjasa të paraqesë një krizë materiale në shkallë globale në vitin 2026.”

Anketat u zhvilluan midis 12 gushtit dhe 22 shtatorit 2025.

Lista e rreziqeve kryesore globale për 2026 (sipas përqindjes së përzgjedhjes)

1. Përballje gjeoekonomike – 18%
2. Konflikt i armatosur midis shteteve – 14%
3. Ngjarje ekstreme klimatike – 8%
4. Polarizim shoqëror – 7%
5. Keqinformim dhe dezinformim – 7%
6. Rënie ekonomike – 5%
7. Erozion i të drejtave të njeriut dhe/ose i lirive civile – 4%
8. Pasoja negative të teknologjive të IA-së – 4%
9. Pasiguri kibernetike – 3%
10. Pabarazi – 3%

Përballja gjeoekonomike renditet si rreziku më i madh global për vitin 2026, i përzgjedhur nga 18% e të anketuarve.

Krahasuar me vitin e kaluar, ajo është ngjitur dy vende në renditje, për shkak të tensioneve të vazhdueshme në Lindjen e Mesme dhe në Ukrainë.

Së fundmi, presioni i SHBA-së për Groenlandën, si edhe kapja e presidentit venezuelian Nicolás Maduro, kanë shtuar më tej tensionet.

Në të njëjtën kohë, sipas ekspertëve, indiferenca e perceptuar e presidentit Trump ndaj mbrojtjes së Tajvanit mund të krijojë një “stuhi të përsosur” për përpjekjet e Kinës për “ribashkim”.

Konflikti i armatosur midis shteteve renditet i dyti në raportin e WEF, i përzgjedhur nga 14% e të anketuarve.

Aktualisht ka 59 konflikte aktive midis shteteve në mbarë botën, numri më i lartë që nga Lufta e Dytë Botërore.

Tre vendet e para në listë plotësohen nga ngjarjet ekstreme klimatike, të përzgjedhura nga 8% e të anketuarve.

Nga zjarret masive te thatësirat, fenomenet ekstreme po kontribuojnë ndjeshëm në rritjen e çmimeve të ushqimeve, zhvendosjen e popullsive dhe rritjen e kostove të sigurimeve.

Me rritjen e vazhdueshme të temperaturave globale, këto pasoja pritet të intensifikohen si në frekuencë, ashtu edhe në ashpërsi. / Visual Capitalist, Shqip.al

The post Rreziqet më të mëdha me të cilat përballet bota në vitin 2026 appeared first on Revista Monitor.

Ndryshe nga Shqipëria, ku anëtarët e Këshillit Mbikëqyrës të Bankës së Shqipërisë nuk janë zëvendësuar disa muaj pas mbarimit të mandatit, Presidenti Donald Trump sapo ka emëruar Kevin Warsh për të pasuar Jerome Powell si kryetar të Rezervës Federale, duke i dhënë fund një odiseje të zgjatur që ka shoqëruar një periudhë trazirash të paprecedenta rreth bankës qendrore.

Vendimi kulmon një proces që zyrtarisht nisi verën e kaluar, por që kishte filluar shumë më herët, me Trump që nisi një breshëri kritikash ndaj Fed të drejtuar nga Powell, pothuajse që nga momenti kur Powell mori detyrën në vitin 2018.

“E njoh Kevinin prej një kohe shumë të gjatë dhe nuk kam asnjë dyshim se ai do të hyjë në histori si një nga kryetarët MË TË MËDHENJ të Fed, ndoshta më i miri,” tha Trump në një postim në Truth Social duke njoftuar përzgjedhjen.

Zgjedhja e Warsh, 55 vjeç, ka të ngjarë të mos trazojë tregjet për shkak të përvojës së tij të mëparshme në Fed dhe perceptimit të Wall Street se ai nuk do të bënte gjithmonë atë që kërkon Trump.

“Ai ka respektin dhe besueshmërinë e tregjeve financiare,” tha David Bahnsen, drejtor i investimeve i The Bahnsen Group.

“Nuk kishte asnjë person që mund ta merrte këtë detyrë dhe të mos ishte duke ulur normat e interesit në afat të shkurtër. Megjithatë, besoj se në afat më të gjatë ai do të jetë një kandidat i besueshëm,” shtoi Bahnsen.

Kontratat e së ardhmes të tregut të aksioneve, megjithatë, ishin paksa në territor negativ të premten në mëngjes, ndonëse larg niveleve më të ulëta pasi u bë i qartë emërimi i Warsh.

Që nga konfirmimi i Powell në vitin 2018, gjatë mandatit të parë të Trump, presidenti ka ushtruar vazhdimisht presion mbi vendimmarrësit për të ulur normat e interesit në mënyrë agresive. Edhe pas tre uljeve radhazi në pjesën e fundit të vitit 2025, Trump vazhdoi sulmet, duke kërkuar norma më të ulëta dhe duke e akuzuar Powell se ka lejuar që kostoja e rinovimit të selisë së Fed në Uashington të dalë jashtë kontrollit.

Nga ana e tij, Warsh verën e kaluar bëri thirrje për një “ndryshim regjimi” në Fed.

“Deficiti i besueshmërisë, sipas mendimit tim, qëndron tek drejtuesit aktualë në Fed,” tha ai gjatë intervistës në korrik. Ky qëndrim mund ta vendosë atë në një rol përballës në një institucion ku ndërtimi i konsensusit është thelbësor për zbatimin e politikave.

Vendimi i Trump për të nominuar Warsh vjen në një nga momentet më delikate për bankën qendrore amerikane në dekada, me inflacionin ende jo plotësisht të mposhtur, huamarrjen e qeverisë në rritje dhe vetë Fed që po përballet me presion politik jashtëzakonisht të drejtpërdrejtë mbi mënyrën se si e zhvillon politikën monetare.

Së fundmi, Departamenti i Drejtësisë i dërgoi Powell-it një thirrje zyrtare (subpoena) lidhur me projektin e ndërtimit. Në një reagim jo të drejtpërdrejtë, Powell akuzoi se ky veprim ishte një “pretekst” për ta shtyrë Fed të ndjekë urdhrat e Trump dhe të lehtësojë më tej politikën monetare.

Në këtë kuadër, nominimi vjen në një kohë kur pyetjet mbi pavarësinë e Fed, një shtyllë themelore e besueshmërisë së bankës qendrore, kanë kaluar nga debat akademik në shqetësim konkret. Trump dhe zyrtarë të tjerë të administratës kanë hedhur ide që variojnë nga mbikëqyrje më e fortë e Shtëpisë së Bardhë deri te ndryshime në mënyrën se si banka qendrore vendos normat e interesit, përfshirë detyrimin që kryetari të konsultohet me presidentin për vendimet mbi normat.

Nominimi i jep fund një gare konkurruese që në një moment përfshinte 11 kandidatë. Ata varionin nga ish-zyrtarë dhe zyrtarë aktualë të Fed deri te ekonomistë të njohur dhe profesionistë të Wall Street, në një proces intervistash të udhëhequr nga sekretari i Thesarit, Scott Bessent. Në fund, lista u ngushtua në pesë, pastaj në katër, me Trump që javën e kaluar la të kuptohej se kishte arritur në zgjedhjen e tij. Mes finalistëve ishin guvernatori aktual Christopher Waller, shefi i obligacioneve në BlackRock, Rick Rieder, dhe drejtori i Këshillit Kombëtar Ekonomik, Kevin Hassett.

“Christopher Waller, Rick Rieder dhe të tjerë u intervistuan për pozicionin në Fed. Të gjithë do të kishin qenë të shkëlqyer dhe kanë një të ardhme të madhe dhe të pakufizuar me ‘TRUMP’. Talent i jashtëzakonshëm në vendin tonë,” tha Trump në një postim të veçantë në Truth Social.

Nga ky moment, i nominuari përballet me një rrugë të vështirë.

Senatori republikan Thom Tillis nga Karolina e Veriut ka sinjalizuar se do të bllokojë çdo nominim në Fed derisa të përfundojë hetimi i Departamentit të Drejtësisë.

“Kevin Warsh është një kandidat i kualifikuar me një kuptim të thellë të politikës monetare. Megjithatë, Departamenti i Drejtësisë vazhdon të ndjekë një hetim penal ndaj kryetarit Jerome Powell bazuar në dëshmi para komitetit, që asnjë person i arsyeshëm nuk mund t’i interpretojë si qëllim kriminal,” shkroi Tillis në rrjetin social X.

“Qëndrimi im nuk ka ndryshuar: do të kundërshtoj konfirmimin e çdo kandidati për Rezervën Federale, përfshirë edhe për postin e kryetarit, derisa hetimi i DOJ-së ndaj kryetarit Powell të zgjidhet plotësisht dhe në mënyrë transparente.”

Nominimi gjeti mbështetje edhe gjetkë në Kongres. Senatori Tim Scott (republikan nga Karolina e Jugut), që kryeson Komitetin Bankar të Senatit, e vlerësoi Warsh për “njohuritë e thella mbi tregjet dhe politikën monetare, që do të jenë thelbësore në këtë rol”.

“Vendimet e Rezervës Federale prekin çdo familje amerikane, nga normat e kredive hipotekore te kursimet për pension. Presidenti Trump ka qenë i qartë se sjellja e llogaridhënies dhe besueshmërisë në Rezervën Federale është një prioritet, dhe nominimi i Kevin Warsh reflekton këtë fokus,” tha Scott.

Megjithatë, çështjet janë më shumë sesa thjesht politike.

Edhe pse Trump ka këmbëngulur se inflacioni është mposhtur, ai mbetet ende dukshëm larg objektivit prej 2% të Fed. Në të njëjtën kohë, tregu i punës është ngadalësuar, me ekonominë aktualisht në një klimë “pa pushime nga puna, por edhe pa punësime”, gjë që përbën një tjetër sfidë për politikën e Fed.

Në çdo rast, tregjet nuk presin shumë veprim nga kryetari i ri: tregtarët po parashikojnë maksimumi dy ulje të tjera të normave këtë vit, përpara se norma bazë e fondeve federale të stabilizohet rreth 3%, nivel që vendimmarrësit kanë sinjalizuar se është norma “neutrale” afatgjatë, që as nuk stimulon dhe as nuk frenon rritjen ekonomike.

Pastaj është edhe çështja se çfarë ndodh me Powell.

Edhe pse historikisht kryetarët kanë dhënë dorëheqjen nga posti në Fed pasi janë larguar si kryetarë, këtë herë mund të mos ndodhë kështu. Powell ka edhe dy vite të mbetura në mandatin e tij si guvernator dhe mund të zgjedhë ta vazhdojë atë si një pengesë ndaj përpjekjeve të Trump për të komprometuar pavarësinë e Fed. Gjykata e Lartë po shqyrton tashmë lëvizjen e Trump për të shkarkuar guvernatoren Lisa Cook, një çështje që përfundimisht mund të përcaktojë se çfarë pushteti ka një president mbi anëtarët e bordit të Rezervës Federale. / CNBC

The post Trump emëron Kevin Warsh si kryetar të Rezervës Federale për të pasuar Jerome Powell appeared first on Revista Monitor.

Tregu i sigurimeve e përmirësoi rritjen gjatë vitit 2025. Sipas statistikave të Autoritetit të Mbikëqyrjes Financiare (AMF), primet e shkruara bruto arritën vlerën e 27.1 miliardë lekëve, në rritje me 10.6% krahasuar me një vit më parë. Për vitin 2024, rritja e tregut kishte qenë më e ulët, në nivelin 7%.

Sipas vlerësimeve të AMF-së, tregu është rritur edhe në terma realë. Primet e shkruara bruto vlerësohen sa 1.03% e Prodhimit të Brendshëm Bruto, nga 0.97% që kishte qenë një vit më parë.

Edhe primi i sigurimit për frymë u rrit për të pestin vit radhazi. Ky tregues, i shprehur ndryshe edhe si densiteti i sigurimeve në vend, arriti në 11463 lekë (rreth 119 euro), në rritje me 11.8% krahasuar me një vit më parë.

Tregu i sigurimeve vazhdon të dominohet nga produktet e tregut të Jo-Jetës dhe kryesisht sigurimet e detyrueshme motorike.

Primet e shkruara bruto në sigurimin e jo-jetës arritën në pothuajse 24.7 miliardë lekë, në rritje me 9.9% krahasuar me një vit më parë. Ky segment vazhdon të jetë dominues, me 91% të primeve totale të tregut, por megjithatë pesha e tij pësoi një rënie të lehtë për të shtatin vit radhazi. Kjo i detyrohet një rritjeje në vazhdimësi më të lartë në tregun e sigurimit të Jetës.

Tregu i sigurimit të Jo-Jetës edhe për vitin 2025 u dominua nga sigurimet e detyrueshme motorike për përgjegjësitë ndaj palëve të treta. Primet e shkruara bruto në këtë segment arritën në 16.9 miliardë lekë ose sa 68.6% e totalit të tregut. Sigurimi i brendshëm motorik TPL ngelet produkti më i madh i tregut, me 58% të primeve të shkruara bruto në sigurimin e Jo-Jetës. Vitin e kaluar hyri në fuqi sistemi i ri i llogaritjes së primeve mbi bazë rreziku, që ka ndikuar pjesërisht në rritjen e primeve të shkruara bruto nga ky produkt. Primet e sigurimit të brendshëm TPL u rritën me 13.3% krahasuar me një vit më parë.

Ndërkohë, produktet e sigurimit vullnetar në përgjithësi shfaqën një rritje më të ngadaltë edhe vitin e kaluar. Megjithatë, gjatë muajit dhjetor, produkti kryesor i sigurimit vullnetar, sigurimi nga zjarri dhe forcat e natyrës, shënoi një rritje të fortë, duke e përmirësuar ndjeshëm rritjen krahasuar me 11 muajt e parë të vitit. Primet e shkruara bruto për të gjithë 2025 u rritën me 10.25%, por pesha e këtij produkti në treg ngeli e ngjashme me vitin 2024.

Ndërkohë, tregu i sigurimit të Jetës edhe për 2025 shfaqi ritme rritjeje më të larta.

Primet e shkruara bruto arritën në 2.44 miliardë lekë, në rritje me 17.6% krahasuar me një vit më parë.

Tregu i sigurimit të Jetës ngelet i dominuar nga produkti i sigurimit të jetës së debitorit, i lidhur kryesisht me sigurimin e jetës për huatë e marra në institucionet financiare. Ky produkt u rrit me 15.4% vitin e kaluar dhe përbënte 77.5% të primeve të shkruara bruto të tregut.

Burimi: AMF

The post Tregu i sigurimeve u rrit me ritme më të larta në 2025 appeared first on Revista Monitor.

Ministrja e Ekonomisë dhe Inovacionit, Delina Ibrahimaj, drejtoi mbledhjen e parë të Këshillit Kombëtar të Punës për vitin 2026, njëkohësisht edhe mbledhjen e parë të Këshillit të rikonstituar me mandatin e ri.

Gjatë fjalës së saj ministrja Ibrahimaj u ndal në diskutimin e disa problematikave që pritet të adresohen për sektorin e punësimit, përfshirë plotësimin e vakancës së fuqisë punëtore, rritjen e vazhdueshme të pagës minimale dhe ndryshimet në Kodin e Punës.

“Kjo mbledhje ka për synim që të vendosë funksionimin korrekt të Këshillit Kombëtar të Punës për vitin 2026, të forcojë dialogun për çështjet prioritare, për reformat në punësim, në siguri në punë dhe të tregut të punës, duke krijuar një proces bashkëpunimi të qëndrueshëm mes qeverisë, punëdhënësve dhe punëmarrësve, si dhe për përmirësimin e politikave aktive të punësimit në përputhje me standardet europiane dhe nevojat reale të tregut të punës.

Përveç atyre që do të diskutohen sot, në fakt, viti 2026 është një vit,  i cili do të jetë i mbushur me ndryshime ligjore të lidhura me tregun e punës.

Ne, në kuadër të gjithë procesit të anëtarësimit dhe të integrimit në Bashkimin Europian, kemi disa detyra të rëndësishme në ndryshimin e legjislacionit, duke filluar nga Kodi i Punës dhe të gjithë legjislacionin poshtë kodit.

Ndaj, besoj se do të jetë një vit intensiv, ku do të duhet të diskutojmë bashkërisht për përafrimin e direktivave, për rishikimin e legjislacionit, por edhe për të gjithë periudhat tranzitore që do të kërkojmë me qëllim zbatimin me efektivitet të të gjithë legjislacionit europian në fushën e punësimit dhe të aftësimit.

Ministrja Ibrahimaj u ndal edhe çështja e mungesës së fuqisë punëtore dhe adresimi i problematikës.

“Në pikën e tretë do të diskutohet për mungesën e fuqisë punëtore dhe migracionit, siç jeni në dijeni qeveria shqiptare ka një politikë për migracionin, ka një strategji kombëtare për migracionin e cila ka të parashikuar një sërë masash.

Ndërkohë që sigurisht adresimi i mungesës së fuqisë punëtore, por edhe i fuqisë punëtore të kualifikuar do të jetë pjesë e diskutimeve të ditës së sotme, ku në fakt qeveria shqiptare ka ndërmarrë masa të rëndësishme me qëllim kualifikimin e fuqisë punëtore, por edhe me qëllim plotësimin e nevojave për fuqi punëtore edhe nëpërmjet marrëveshjeve që ne jemi duke nënshkruar me vendet të treta”.

Nga 1 janari 2026 ka hyrë në fuqi paga e re minimale nga 40 mijë lekë në 50 mijë lekë.

Ministrja e Ekonomisë dhe Inovacionit Delina Ibrahimaj nënvizoi se politika për rritjen e pagës minimale do të vazhdojë deri sa të  arrijë sa 60% e pagës mesatare.

“Në fakt, paga minimale, siç jeni bërë me dije, ka hyrë në fuqi rritja e pagës minimale dhe në programin e qeverisë parashikohet që do të ketë një rritje të mëtejshme të pagës minimale përgjatë katërvjeçarit të ardhshëm, me qëllim që të vendosim atë limitin, që punonjësit të kenë një pagë sa më afër nevojave të tyre, por gjithashtu për të shkuar drejt standardit të Bashkimit Europian, i cili parashikon që paga minimale duhet të jetë minimalisht 60% e pagës mesatare në nivel vendi.

Në këtë pikë, sigurisht do të diskutohet dhe për reformën e pensioneve.

Ne, në fakt, prej më shumë se një viti jemi duke punuar edhe me asistencën e Bankës Botërore me qëllim hartimin e një reforme e cila, sigurisht që përpara se të marrë vendimmarrje, do të duhet që të diskutohet edhe bashkërisht dhe do të jetë një pikë që do ta diskutojmë në pikën e parë të pikës së ndryshme”.

Ministrja tha se gjithashtu në rendin e ditës së mbledhjes do të përfshihen edhe diskutimet për ndryshme  mbi statusin e minatorit.

“Çështja e statusit të minatorëve dhe problematikat e lidhura me përfitimin 1% apo 0.6% për 1136 minatorët, e cila trajtohet në kuadër të ligjit të përkatës është një element që sigurisht ka marrë vëmendje dhe diskutime dhe në mbledhjet e mëparshme të Këshillit Kombëtar të Punës dhe besoj që sot do të kemi një diskutim shterues për këtë çështje”.

The post Gjetja e fuqisë punëtore, Ibrahimaj: Drejt marrëveshjeve me vendet e treta appeared first on Revista Monitor.

Edhe gjatë ditës së sotme, sistemi self-care, një platformë e rëndësishme e bizneseve për të bërë rakordimet e faturave, funksionon me probleme. Bizneset raportojnë te “Monitor”, duke çuar foto live që sistemi bie.

Një ekonomiste pohon se nëse përdor shfletuesin Moxilla, atëherë sistemi paraqet probleme, ndërsa me Google chrome funksionon mirë.

Pasditen e djeshme, Tatimet njoftuan se problematika e konstatuar ditët e fundit në aksesimin e Platformës Qendrore të Lëshimit të Faturave të Fiskalizuara është zgjidhur, dhe se platforma prej pasdites së 28 janarit, është në shërbim të plotë dhe funksionon normalisht.

Ky njoftim erdhi pas tre javësh kur sistemi ishte tërësisht i bllokuar, ndërkohë që dhe në dhjetor kishte pasur probleme të përkohshme.

Tatimet: Problemet me self-care janë zgjidhur, platforma tërësisht funksionale

Edhe pas këtij njoftimi, shumë subjekte raportuan për probleme, që vazhdojnë edhe sot. “Platforma selfcare që njohim vazhdon të gjenerojë probleme. Është pothuajse e pamundur të shkarkosh faturat dhe nëse ia arrin me siguri tentativat kanë zgjatur me orë të tëra.

Nxitimi për të përgenjeshtruar problemet e pazgjidhura thjesht sa do të thellojë mosbesimin në infrastrukturën kritike dhe aftësinë e shtetit dhe për të justifikuar shpenzimet e larta të buxhetit të shtetit për shërbime që lënë për të dëshiruar”, shkruan një lexues.

Shqetësim tjetër i bizneseve lidhet me inventarin. Administrata tatimore u ka kërkuar bizneseve që të dorëzojnë inventarët deri në fund të këtij muaji.

Pas problemeve me Self-Care, Tatimet u kërkojnë bizneseve të dorëzojnë inventarët deri në 31 janar

Ka biznese që ankohen se pas probleme që ata hasën me self-care, ky afat është tepër i shtrënguar, pasi nuk kanë pasur akses në rakordimin e faturave.

Të tjerë pohojnë se mosfunksionimi i self-care nuk pengon për inventarët, pasi informacioni mund të merret nga sistemi i tatimeve e-filing. Bizneset janë të trembura se ata mund të bëhen subjekte kontrollesh dhe në një situatë që nuk ka qenë në dorën e tyre të gjobiten padrejtësisht.

The post Sistemi self-care sërish me probleme, bizneset të shqetësuara për inventarin appeared first on Revista Monitor.

Në vitin 20255, nga dhe drejt Aeroporit të Rinasit kanë fluturuar 11.6 milionë pasagjerë, sipas të dhënave të bëra publike nga INSTAT, duke shënuar nivelin më të lartë të arritur ndonjëherë. Në krahasim me një vit më parë, numri i pasagjerëve u rrit me 8.7%.

Por, pavarësisht rekordit të numrit të pasagjerëve, ritmet e rritjes janë ngadalësuar ndjeshëm në raport me një vit më parë, kur në 2024-n fluturuan 10.7 milionë pasagjerë, me një rritje prej 47% më bazë vjetore.

Edhe në Porte, rritja e pasagjerëve ka qenë e dobët, sidomos në Portin e Durrësit, me një shtim prej 2.2%.

Transporti ajror

Sipas INSTAT, në transportin ajror, gjatë tremujorit të katërt 2025, kanë operuar 28 shoqëri.

ajrore, nga këto 27 janë shoqëri të huaja dhe 1 shoqëri shqiptare. Në hapësirën ajrore shqiptare kanë fluturuar 89.257 avionë, nga të cilët 82,8 % të tyre e zë numri i mbikalimeve. Volumi i mallrave (duke përfshirë postën) të hyrë dhe të dalë nëpërmjet transportit ajror rezultoi 743 ton, nga të cilat 72,4 % janë mallra të hyrë dhe 27,6 % janë mallra të dalë. Krahasuar me tremujorin e katërt 2024, volumi i mallrave paraqitet me rritje 18,9 %.

Në tremujorin e katërt 2025, kanë udhëtuar me linja ajrore 2.611.748 pasagjerë, nga 2.385.329 pasagjerë që kanë udhëtuar në të njëjtën periudhë të vitit të kaluar, duke u rritur me 9,5 %.

Volumi i mallrave të tregtuara (eksport dhe import) me ajër, në tremujorin e katërt 2025, është 545 ton.

Krahasuar me të njëjtën periudhë të vitit 2024, ky tregues është rritur me 8,8 %.

Volumi i mallrave të importuara me ajër, në tremujorin e katërt 2025, zë 0,03 % ndaj volumit gjithsej të mallrave të importuara.

Portet, transporti i udhëtarëve rritet më shumë nga Vlora e Saranda

Në Shqipëri operojnë katër porte detare, të cilët shërbejnë për transport mallrash:

Porti i Durrësit, Vlorës, Shëngjinit dhe porti i Limjonit (Sarandë). Porti i Durrësit është porti kryesor në vend, prej të cilit, gjatë tremujorit të katërt 2025, janë transportuar 93,8 % e volumit të mallrave të transportuar me det, ose 1.999 mijë ton mallra. Volumi gjithsej i mallrave të transportuara nga porti i Durrësit është rritur me 5,5 %, krahasuar me të njëjtën periudhë të një viti më parë.

Llojet e grup-mallrave kryesore të transportuara nëpërmjet rrugëve detare, sipas klasifikimit NST 2007 (Nomeklatura e Statistikave të Transportit), për tremujorin e katërt 2025, paraqiten si më poshtë:

• Grupi i mallrave ” Koks dhe produktet e rafinuara të naftës ” përbën 15,2 % të mallrave të transportuara nga portet;
• Grupi “Metale bazë; produkte metalike të fabrikuara, përveç makinerive dhe pajisjeve” përbën 12,5 % të mallrave të transportuara nga portet;
• Grupi “Produkte të tjera minerale (jo metalike)” përbën 12,2 % të mallrave të transportuara nga portet;

Numri i anijeve të hyra dhe të dala nga portet në vend rezulton 268 anije, nga këto 253 anije janë të huaja dhe 15 anije vendase. Numri i anijeve të hyra dhe të dala në porte është rritur me 0,8 %, ku numri anijeve të huaja është rritur me 7,7 %, krahasuar me tremujorin e katërt 2024.

Portet detare ku kryhet transporti pasagjerëve në vend janë: Porti i Durrësit, Vlorës, Sarandës dhe porti i Shëngjinit. Lëvizja e pasagjerëve në tremujorin e katërt 2025 është kryer nga porti i Durrësit, Vlorës dhe porti i Sarandës.

Numri i pasagjerëve që kanë udhëtuar nëpërmjet porteve detare në vend është 221.628 persona në tremujorin e katërt.

Porti i Durrësit është porti nga i cili kanë udhëtuar 61,9 % e pasagjerëve, ndjekur nga porti i Sarandës me 30,8 % dhe më pas porti i Vlorës me 7,3 %.

Në vitin 2025, volumi i pasagjerëve në portet shqiptare u rrit me rreth 101 mijë persona krahasuar me vitin 2024, duke arritur në gati 1.7 milion pasagjerë, ose një rritje vjetore prej 6.3%. Rritja ka ardhur kryesisht nga portet turistike të Sarandës dhe Vlorës, me Sarandën që ka pasur fluksin më të madh gjatë sezonit veror, ndërsa Porti i Durrësit ka shënuar një zgjerim më të kufizuar, me rreth 16.6 mijë pasagjerë më shumë, ose 2.1% në krahasim me një vit më parë.

The post Ngadalësohet rritja nga ajri në 2025, fluturuan 11.6 milionë pasagjerë, dobët dhe porti i Durrësit appeared first on Revista Monitor.

Ekonomitë më të mëdha të Eurozonës u rritën me një ritëm modest, por të qëndrueshëm në tremujorin e fundit, ndërsa konsumi dhe investimet morën hov për të kompensuar eksportet e dobëta dhe pasigurinë e jashtëzakonshme që vjen nga politika tregtare e paqëndrueshme e SHBA-së, treguan të dhënat kombëtare të publikuara të premten.

Këto shifra sinjalizojnë një qëndrueshmëri të jashtëzakonshme për një bllok prej 350 milionë banorësh, i cili pritej të dorëzohej përballë një lufte tregtare me SHBA-në, konkurrencës në rritje të eksporteve nga Kina dhe viteve të konfliktit ushtarak në kufirin e tij lindor.

Megjithatë, në çdo tremujor të vitit të kaluar, eurozona arriti rritje të respektueshme – edhe pse jo spektakolare – pavarësisht vështirësive të industrisë dhe eksporteve, që më parë ishin motorët kryesorë të zgjerimit ekonomik.

Spanja mbetet morori i rritjes

Spanja vazhdoi të udhëheqë bllokun, duke u zgjeruar me 0.8% në tremujor, shumë mbi pritshmëritë prej 0.6%, ndërsa Gjermania, ekonomia më e madhe e Eurozonës, gjithashtu rezultoi mbi parashikimet, me rritje prej 0.3% në tremujor, kundrejt pritjeve të ekonomistëve për 0.2%.

PBB-ja e Francës u rrit me 0.2%, në përputhje me parashikimet, duke kapërcyer frikën se paqëndrueshmëria politike do të ndikonte në ndjenjën e tregut. Italia, ndërkohë, u rrit me 0.3%, pak mbi pritshmëritë, ndërsa Holanda u zgjerua me 0.5%.

Të dhënat kombëtare sugjerojnë se shifrat për Eurozonën do të jenë përgjithësisht në përputhje me parashikimet e ekonomistëve për një zgjerim prej 0.2% krahasuar me tremujorin e mëparshëm dhe rritje prej 1.2% krahasuar me një vit më parë.

2026 nis mbarë

Të dhëna të tjera tashmë sugjerojnë se blloku e nisi vitin 2026 mbi një bazë relativisht të fortë.

Një tregues kyç i ndjenjës ekonomike, i publikuar të enjten, tregoi një rritje të papritur, e nxitur nga Franca dhe Gjermania, me përmirësime të gjera në të gjithë sektorët kryesorë.

Ndërkohë, industria po tregon shenja stabilizimi, familjet më në fund kanë filluar të ulin normën historikisht të lartë të kursimeve, papunësia po qëndron pranë niveleve rekord të ulëta dhe inflacioni është fort rreth objektivit 2% të Bankës Qendrore Europiane.

Perspektivat përmirësohen më tej nga bumi i shpenzimeve të Gjermanisë për infrastrukturë dhe mbrojtje, i cili mund të jetë i ngadalshëm në fillim, por do të ketë ndikim të matshëm në rritje duke nisur nga tremujori i dytë.

Kjo do t’i japë fund tre viteve të stagnimit gjerman dhe ka të ngjarë të përhapet në pjesën tjetër të Europës, pasi industria e saj mbështetet në një bazë të gjerë furnizuesish të shpërndarë në të gjithë bllokun.

Megjithatë, eksportet nuk ka gjasa të rimëkëmben plotësisht së shpejti, pasi tarifat amerikane, konkurrenca gjithnjë e më e ashpër nga Kina dhe rënia e dollarit gjatë vitit të kaluar tregojnë një zhvendosje të përhershme në modelet tregtare.

Kjo e vendos barrën mbi ekonominë e brendshme për të gjetur burime të reja rritjeje. Por ekonomistët argumentojnë se konsumi ka ende rezerva të mjaftueshme, ashtu si edhe tregtia brenda BE-së, duke i mbajtur perspektivat relativisht pozitive.

Shumica e parashikimeve shohin rritje për vitet në vijim në intervalin 1.2%–1.5%, ose rreth potencialit të bllokut.

Kjo e vendos BQE-në në një pozicion jashtëzakonisht të qetë, pasi inflacioni është në objektiv, normat e interesit janë në një nivel neutral dhe rritja është në potencial, një treshe që disa politikëbërës e quajnë nirvana e bankave qendrore.

Kjo është arsyeja pse investitorët presin norma interesi të qëndrueshme gjatë gjithë vitit, me vetëm goditje të reja që mund ta prishin këtë perspektivë. / Reuters

The post Ekonomia e Eurozonës e mbyll vitin 2025 në gjendje të fortë, konfirmon qëndrueshmërinë appeared first on Revista Monitor.

Në Shqipëri, në fund të vitit 2025 qarkullonin në vend mbi 1 milion mjete rrugore, duke shënuar një rekord historik. Nga këto, 847 mijë ishin autovetura.

Sipas të dhënave të INSTAT, në tremujorin e katërt 2025, numri i mjeteve rrugore në qarkullim në territorin e Shqipërisë ishte 1.048.092. Ndër to, autoveturat përbëjnë 80,8% të mjeteve gjithsej, të ndjekura nga motorët me 6,1% dhe automjetet për transport të përzier me 5,8%.

Tirana zë peshën më të madhe me 34,7 % të mjeteve gjithsej, ndjekur nga Durrësi me 13,6%.

Ndërkohë, Gjirokastra dhe Kukësi kanë numrin më të ulët të mjeteve, përkatësisht me 2,1% dhe 2,4%.

Gjatë këtij tremujori janë regjistruar për herë të parë 24.854 mjete, nga të cilat 81,2% ishin autovetura. Sërish, qarku i Tiranës udhëheq me 40,3% të regjistrimeve të reja.

Ndryshimet krahasuar me të njëjtin tremujor të vitit 2024:

-Numri total i mjeteve është rritur me 9,3%.
-Regjistrimet e reja kanë shënuar rritje prej 8,5%.

Sipas INSTAT, Në mjetet e regjistruara për herë të parë, Volkswagen mban vendin e parë me 18,6 %, e ndjekur nga Mercedes Benz me 17,5%.

Në Shqipëri, numri i automjeteve për 1 000 banorë është rritur në 358, nga më pak se 200 që ishte disa vjet më parë.

Megjithatë, ky nivel mbetet nën mesataren europiane prej 550 autovetura për 1 000 banorë sipas Eurostat dhe ndër më të ulëtat në Europë, duke ia kaluar vetëm Turqisë dhe Maqedonisë së Veriut.

The post Për herë të parë në Shqipëri, numri i makinave e kalon 1 milion më 2025 appeared first on Revista Monitor.

Pavarësisht rritjes në muajin janar, nga 40 në 50 mijë lekë, paga minimale bruto në Shqipëri ka vijuar të jetë më e ulëta në rajon dhe në Europë, pa përfshirë vendet e ish Bashkimit Sovjetik. Diferenca thellohet dhe më shumë kur matet sipas fuqisë blerëse, duke treguar një më rritje të shpejtë të çmimeve në raport me pagat.

Eurostat ka publikuar sot të dhënat e para për pagën minimale bruto në shtetet e Europës që e zbatojnë këtë standard.

Për Shqipërinë, paga minimale është 517 euro, nga 408 euro që ishte në tremujorin e mëparshëm. Vlera në euro favorizohet nga kursi i këmbimit. Sërish, ky është niveli më i ulët në rajon, teksa shtete si Serbia, Maqedonia e Veriut, Mali i Zi kanë ecur më shpejt në drejtim të rritjes jo vetëm të pagës minimale, por edhe të pagës mesatare në përgjithësi.

Pagën minimale më të lartë në rajon e ka Serbia, në 744 euro. Pas saj renditet Mali i Zi, me 670 euro, e ndjekur nga Maqedonia e Veriut me 586 euro. Të dhënat për Kosovën mungojnë, por edhe qeveria e këtij vendi ka vendosur ta rrisë pagën minimale me dy faza për të arritur në 500 euro në gjysmën e dytë të këtij viti.

Të dhënat e Eurostat tregojnë se ndërsa diferenca mes pagave minimale në rajon mes Shqipërisë dhe vendeve të tjera nuk është shumë e lartë, sidomos me Maqedoninë e Veriut, ajo thellohet në treguesin tjetër atë të pagës minimale sipas fuqisë blerëse, që krahason në terma fuqie reale blerëse (PPS), pra duke marrë parasysh sa shtrenjtë apo lirë janë çmimet në secilin vend. Me fjalë të thjeshta, pagat janë korrigjuar me paritetin e fuqisë blerëse për vitin 2024, që krahasimi të tregojë sa mund të blejë realisht paga minimale në secilin vend, dhe jo vetëm sa është shuma në monedhë.

Për Shqipërinë ky tregues është 708 PPS, ndërkohë për Maqedoninë e Veriut është 1069 PPS. Pra, ndërsa paga minimale në Shqipëri është vetëm 11.7% më e ulët, e matur sipas fuqisë blerëse është 34% më e ulët. Kjo do të thotë se një shtetas maqedonas, jo vetëm e ka pagën më të lartë, por ai blen dhe shumë më tepër për njësi në krahasim me një punonjës shqiptar. Kjo tregon një rritje të çmimeve në Shqipëri me ritme shumë më të larta sesa pagat.

Në Serbi, paga minimale sipas fuqisë blerëse është 1105 PPS dhe në Mal të Zi, 1058 PPS.

Paga minimale në Europë

Sipas Eurostat, më 1 janar 2026, 22 nga 27 vendet e BE-së kishin paga minimale kombëtare, të gjitha përveç Danimarkës, Italisë, Austrisë, Finlandës dhe Suedisë.

Nga këto vende, 8 kishin paga minimale nën 1 000 euro në muaj: Bullgaria (620 euro), Letonia (780 euro), Rumania (795 euro), Hungaria (838 euro), Estonia (886 euro), Sllovakia (915 euro), Çekia (924 euro) dhe Malta (994 euro).

Në 8 vende të tjera, paga minimale varionte nga 1 000 deri në 1 500 euro në muaj: Greqia (1 027 euro), Kroacia (1 050 euro), Portugalia (1 073 euro), Qipro (1 088 euro), Polonia (1 139 euro), Lituania (1 153 euro), Sllovenia (1 278 euro) dhe Spanja (1 381 euro).

Në 6 vendet e mbetura, paga minimale ishte mbi 1 500 euro në muaj: Franca (1 823 euro), Belgjika (2 112 euro), Holanda (2 295 euro), Gjermania (2 343 euro), Irlanda (2 391 euro) dhe Luksemburgu (2 704 euro).

Diferencat ngushtohen pasi eliminohen diferencat e nivelit të çmimeve

Të dhënat tregojnë se paga minimale më e lartë në vendet e BE-së ishte 4.4 herë më e madhe se më e ulëta. Megjithatë, diferencat mes pagave minimale në vende të ndryshme janë dukshëm më të vogla kur merren parasysh dallimet e nivelit të çmimeve. Kur shprehen në standard të fuqisë blerëse (PPS), pagat minimale në vendet e BE-së me nivele më të ulëta çmimesh rezultojnë më të larta krahasuar me ato në vendet me nivele më të larta çmimesh.

Pas përshtatjes për dallimet e çmimeve, pagat minimale varionin nga 886 PPS në muaj në Estoni deri në 2 157 PPS në Gjermani, që do të thotë se paga minimale më e lartë ishte 2.4 herë më e madhe se më e ulëta.

Në terma PPS, vendet e BE-së me pagë minimale kombëtare mund të klasifikohen në tre grupe të ndryshme:

• paga minimale mbi 1 500 PPS në muaj: Gjermania, Luksemburgu, Holanda, Belgjika, Irlanda, Franca, Polonia dhe Spanja;
• paga minimale nga 1 000 deri në 1 500 PPS në muaj: Sllovenia, Lituania, Kroacia, Rumania, Portugalia, Greqia, Qipro, Hungaria, Malta, Sllovakia, Bullgaria dhe Çekia;
• paga minimale nën 1 000 PPS në muaj: Letonia dhe Estonia.

Krahasuar me janarin 2025, në vitin 2026 tre vende kanë ndryshuar grup: pagat minimale në Sllovaki, Bullgari dhe Çeki tani janë mbi 1 000 PPS në muaj.

The post Shqipëria mbetet me pagën minimale më të ulët në Europë edhe pas rritjes, sa pak fuqi blerëse! appeared first on Revista Monitor.

Në takimin me fermerët në Divjakë për Skemën Kombëtare 2026, ku të pranishëm ishin Kryeministri Edi Rama, Zëvendëskryeministrja Belinda Balluku dhe Ministri i Financave Petrit Malaj, Ministri i Bujqësisë dhe Zhvillimit Rural, Andis Salla, deklaroi se po rishikohet plani i mbështetjes duke marrë në konsideratë kërkesat dhe sugjerimet e fermerëve.

“Janë shumë të domosdoshme dhe të dobishme që ne ta rishikojmë pjesën e mbështetjes dhe mënyrën si do të jemi ndaj aplikantëve, për të ulur numrin e krerëve për bagëti në mënyrë që të përfitojnë sa më shumë fermerë. Kemi marrë sugjerime për bletarinë dhe kërkesa që lidhen me certifikatat e pronësisë dhe kontratat e tokave me qira. Jemi duke i rishikuar, kemi bërë një plan me AZHBR dhe Ministrinë e Bujqësisë dhe do të shikojmë atë që na sugjeroni, për t’i përafruar edhe me skemën e naftës, ku kemi pasur problematika të shtuara sipas propozimeve të fermerëve.

Duhet të jemi sinkron, të mbështesim edhe përmes IPARD-it, ku së shpejti do të ketë mbështetje për të gjithë sektorin bujqësor. Do të ndërtohen edhe dhoma frigoriferike, do të ketë mbështetje për fermerët e të gjitha fushave, si bimët medicinale, dhe mbi të gjitha duhet të jemi në terren bashkë me fermerët. Ju do të jeni zëri dhe mbështetja për çdo punë që do të krijojmë së bashku,” përfundoi Ministri Salla.

Na ana tjetër kryeministri Edi Rama deklaroi se fondet për bujqësinë nuk mungojnë, por problemi qëndron te mungesa e instrumenteve dhe projekteve të mirëfillta për t’i përthithur ato. Sipas tij ka një mangësi në pushtetin vendor, i cili duhet të jetë shumë më aktiv në bashkëpunimin me fermerët dhe bujqit për të adresuar këto financime.

“Si pjesë e këtij cikli dëgjesash që ka organizuar ministri i bujqësisë për të kolauduar të gjithë planin e mbështetjes për këtë vit. Ministri i financave foli me shifra konkrete që janë domethënëse. Unë dua të fokusohem në një tjetër aspekt që ka të bëjë me mundësitë e pashfrytëzuara pasi ne jemi mësuar që t’i referohemi buxhetit të shtetit, por buxheti është tani vetëm njëri nga komponentët e zinxhirit të financimeve të bujqësisë.

Natyrisht që buxheti është më i thjeshti se përcaktohet nga qeveria dhe vjen tek bujku me një kanal të drejtpërdrejtë është aplikimi përkatës. Komponentët janë pak më të vështirë, por janë komponentë që do të jenë më të pranishëm që duhet të gjithë të përpiqen të mësojnë dhe të aftësohen për ti shfrytëzuar. Unë them që sot në vendin tonë çështja e financimit të projekteve që secili ka, nuk është problem në aspektin financiar.

Ajo që është problem është  mungesa e informacionit dhe mungesa e përgatitjes për t’i thithur ato para, e njëjta vlen dhe për atë që lidhet me BE. Ne do të kemi gjithmonë e më shumë fonde nga BE. Por sa të aftë do të jemi ne për t’i thithur ato para. Duhen disa gjëra të pashmangshme, që lidhen me dosjet që duhet të ketë një projekt dhe argumentet pse duhet financuar.

Ne kemi vënë në dispozicion 250 milionë euro, që mund të shkojnë edhe në 1 miliard nëse do të shfrytëzohen. Të gjithë mund të shkojnë të marrin kredi në banka me garanci nga shteti. Për të shfrytëzuar këtë garanci duhet një dosje e mirëfilltë.

Ka një mangësi në pushtetin vendor, duhet të jenë shumë më aktivë me fermerët dhe bujqit për t’i adresuar këto financime. Nuk duhet të ketë asnjë problem nëse duhet një komponent agro-përpunimi. Bujqësia është një sektor që, për të funksionuar siç duhet, duhet të ketë mbështetjen e duhur”.

Deri më tani janë zhvilluar 18 takime me fermerët në qarqe të ndryshme të vendit, nga 23 të planifikuara gjithsej. Dëgjesat për Skemën Kombëtare 2026 do të vijojnë në të gjitha qarqet e vendit, me synimin që politikat mbështetëse të ndërtohen në bashkëpunim të drejtpërdrejtë me fermerët dhe të reflektojnë nevojat reale të sektorit bujqësor.

Malaj: Jemi besimplotë dhe shpresëplotë se në shtator do të hapet dhe IPARD III, 118 milionë euro për bujqësinë

Ministri i Financave, z. Petrit Malaj tha se qeveria është e angazhuar të ndërtojë një model i cili synon të mbështesë drejtpërdrejt fermerët dhe është i ngritur në katër komponentë kryesorë:

1.Skema e Granteve, me një fond minimal prej 20 milionë euro për vitin 2026;

2.Skema e Subvencioneve direkte për fermerët, me 31 milionë euro të buxhetuara për vitin 2026;

3 Garancia Sovrane, e cila mundëson për të gjithë fermerët kredi të buta me normë interesi 2 %, me garanci shtetërore rreth 70 % të vlerës së kredisë, në total 30 milionë euro për vitin 2026;

4.Kompensimi i TVSH për të gjithë fermerët, ku nga 1 janari 2026 fermerët do të kompensohen me 10% të vlerës së faturave të shitjes së produkteve bujqësore, dy herë në vit.

“Për çdo produkt që keni filluar të shisni nga data 1 janar 2026 e në vazhdim do të duhet të mblidhni faturat për produktet që çoni te grumbulluesit dhe dy herë në vit, më 30 qershor dhe më datën 1 janar do të çoni faturat pranë autoriteteve tatimore dhe do të kompensoheni me 10 % të vlerës së faturave”, tha z. Malaj.

Ministri i Financave u shpreh optimisht për hapjen e programit IPARD III në shtator.

“Bujqësia ka nevojë për më shumë, por jemi të bindur se jemi në rrugën e duhur për ta bërë bujqësinë shqiptare më konkurruese dhe më të fortë në tregjet evropiane. Nga ana tjetër, jemi besimplotë dhe shpresëplotë se në shtator do të hapet dhe IPARD 3, që janë dhe 118 milionë euro të tjera për sektorin e bujqësisë.”, përfundoi Ministri Malaj.

The post Qeveria takimi me fermerët: Po rishikojmë planin e mbështetjes, në shtator pritet të hapet IPARD 3 appeared first on Revista Monitor.

Me qindra hidrocentrale (HEC) të ndërtuara në të gjithë vendin përmes 186 kontratave koncesionare që nga viti 2013 kanë arritur të prodhojnë vetëm rreth 20% të energjisë së projektuar në momentin e nënshkrimit. Të dhënat janë kalkuluar nga Ministria e Financave dhe i referohen vetëm HEC-eve që janë aktualisht në punë dhe që raportojnë prodhim energjie.

Sipas raportit të fundit përmbledhës për kontratat koncesionare, mesatarja totale e prodhimit për periudhën 2013–2024 rezulton në 9,374,155,094 kwh në vit, ose vetëm 20% e sasisë së kërkuar sipas parashikimeve kontraktuale.

Vetëm gjatë vitit 2024, prodhimi arriti në 2,464,766,525 kWh, që përfaqëson rreth 26% të objektivit të vendosur.

Megjithëse këto hidrocentrale kanë kontribuar në rritjen e sigurisë së furnizimit me energji në vend, performanca e tyre financiare dhe teknike mbetet problematike. Sipas Ministrisë së Financave,

HEC-et koncesionare rezultojnë biznese me rrezik të lartë operacional, pasi nuk kanë arritur të përmbushin rreth 60% të kritereve të prodhimit të përcaktuara në kontrata.

Arsyet kryesore të performancës së dobët lidhen me mungesën e burimeve hidrike të qëndrueshme, ndryshimet klimatike dhe vitet e thata, vlerësimet jo realiste të prurjeve ujore në fazën e projektimit. Gjithashtu shumë nga objektet u përballen me probleme teknike dhe financiare në ndërtim dhe operim. Në disa raste, kapacitetet e instaluara kanë rezultuar më të larta se potenciali real i lumenjve.

Gjatë viteve 2005–2013, në kuadër të procesit të privatizimit të sektorit energjetik, një numër hidrocentralesh të vegjël u privatizuan, ndërsa të tjerë iu dhanë kompanive vendase dhe të huaja përmes kontratave koncesionare të tipit ROT, BOT dhe BOO. Ministria e Financave raporton rreth 186 kontrata aktive që prodhojnë energji, por numri real i HEC-eve në terren është më i lartë, pasi një kontratë përfshin shpesh më shumë se një objekt.

Qëllimi i këtyre kontratave ishte rehabilitimi i hidrocentraleve ekzistuese, operimi i tyre nga privati dhe më pas transferimi tek shteti. Ndër kontratat më të mëdha koncesionare të miratuara janë

“Hidrocentrali i Ashtës” dhe “Kaskada e hidrocentralit të Devollit”, të cilat përfaqësojnë edhe investimet më të mëdha në sektor.

Rezultatet e deritanishme tregojnë se pritshmëritë fillestare për rritjen e prodhimit të energjisë përmes HEC-eve koncesionare kanë qenë dukshëm më optimiste se realiteti në terren, teksa kostoja e tyre në mjedis dhe në bujqësi ka qenë e lartë.

Ndërtimi i objekteve ka ndeshur në protesta të forta nga komunitetit, pasi HEC-et kanë tharë lumenjtë dhe kanë ezauruar ujin si burimin kryesor të jetesës. Dëmet në habitate në zonat ku janë ndërtuar janë të pallogaritshme duke përfshirë edhe parqet kombëtare./ B.Hoxha

The post HEC-et koncesionare prodhojnë vetëm 20% të energjisë në kontrata appeared first on Revista Monitor.

Një virus është një lloj programi keqdashës (malware) që mund të kopjohet dhe të përhapet nëpër skedarë dhe programe të tjera. Viruset dhe malware të tjerë mund të ngadalësojnë performancën e kompjuterit, të shfaqin dritare reklamash, ose të vjedhin informacionin tënd personal ose financiar. ‘Infektimi’ mund të ndodhë shumë lehtë, për shembull duke klikuar në një link phishing në email ose një reklamë të rrezikshme.

Shenjat që mund të tregojnë një virus:

Ngadalësim i performancës. Kompjuteri mund të funksionojë shumë më ngadalë se zakonisht, të marrë më shumë kohë për të hapur skedarë ose programe, të ngecë ose të çkyçet papritur.

Dritare pop-up të shumta. Shfaqje të dhjetra mesazhesh të padëshiruara ose reklamash që të shpiejnë drejt faqeve të dyshimta apo të të kërkojnë të shkarkosh software, janë shenjë e malware-it.

Ndryshime në faqen kryesore të shfletuesit. Nëse homepage (faqja fillestare) e shfletuesit tënd ndryshon pa lejen tënde, apo shfaqen mjete ose shtojca që ti nuk i ke instaluar, ky mund të jetë virus.

Programe të panjohura. Nëse në kompjuter shfaqen programe që nuk i ke instaluar vetë, këto mund të jenë malware që po përpiqen të vjedhin të dhëna, të korruptojnë skedarë ose të të japin akses hacker-ave në sistem.

Email-e të padëshiruara dërgohen nga llogaria jote. Hack-er-at shpesh përdorin kompjuterat për të dërguar mesazhe spam ose phishing tek kontaktet e tua, duke u bërë të duket sikur janë dërguar nga ti.

Siguria është çaktivizuar. Disa viruse mund ta çaktivizojnë software-in tënd antivirus ose firewall-in, duke e bërë kompjuterin më të cenueshëm ndaj poten­cialëve sulmeve.

Bateria harxhohet shumë shpejt. Viruset mund të përdorin burimet e sistemit prapa skenave, çka rezulton në konsum më të madh të baterisë, veçanërisht në laptopë.

Rikthime të shpeshta dhe ngrirje të sistemit. Nëse kompjuteri bie shpesh në gabime apo ngrin pa shkak, kjo mund të jetë rezultat i një virus i cili po përdor shumë nga memorja dhe procesori.

Çfarë të bësh nëse mendon se ka një virus

Nuk duhet të bësh panik, por duhet të veprosh shpejt:

• Skano sistemin me një program antivirus. Ndonjë paketë e mirë antivirus do të zbulojë dhe fshijë problemet.
• Përzgjidh rrjetin Safe Mode. Ndalo internetin (fshi wifi ose ethernet), dhe nis kompjuterin në Safe Mode që të ndalosh nisjen e programeve të panevojshme.
• Fshi skedarët e përkohshëm dhe bëj update. Për këtë përdor funksionet e sistemit për të fshirë cache-in dhe bëj azhurnimet e fundit për OS dhe programet, shumë prej tyre përfshijnë rregullime sigurie.
• Nëse problemi vazhdon, kërko ndihmë profesionale. Teknikët e IT mund të përdorin mjete më të avancuara për të hequr malware dhe për të rikuperuar të dhëna./ FORBES

The post Si ta kuptosh nëse kompjuteri yt ka një virus appeared first on Revista Monitor.

Agjencia Kombëtare e Shoqërisë së Informacionit nuk po gjen qetësi dhe sikur të mos mungonte problem me sistemin e SelfCare të Tatimeve, këtë të enjte në Komisionin e Prokurimit Publik u ankimua tenderi 4.8 milionë euro për internetin e këtij institucioni dhe atyre të tjera publike.

Ankesa është bërë nga një prej operatorëve pjesëmarrës në procedurë dhe ka të bëjë me vlerësimin e bërë nga Komisioni i Vlerësimit të Ofertave.

Më herët në dhjetor i njëjti tender që ishte pezulluar nga ana e Komisionit të Prokurimit Publik për shkak të ankesave të bëra nga disa operatorë lidhur me dokumentet e procedurës.

Për një pjesë prej tyre KPP pranoi kërkesat ndërkohë për disa të tjerë jo duke nënvizuar arsyet. Ankesat e vazhdueshme kanë sjellë vonesa të shumta me afatet normale që duhet të ndiqte kontrata. Konkretisht tenderi u çel në datë 13 gusht 2025.

Procedura kishte në objekt kontrate “Shërbimi i internetit dhe intranetit për agjencinë kombëtare të shoqërisë së informacionit dhe institucionet publike”. Fondi limit është 4.8 milionë euro dhe shërbimi parashikohet që të ofrohet për 730 ditë.

“Objektivi i Përgjithshëm i kontratës është instalimi, aktivizimi i shërbimit të Internetit dhe Intranetit për institucionet e administratës shtetërore nën përgjegjësinë e Këshillit të Ministrave.

Shërbimi do të ofrohet gjatë gjithë periudhës së kontratës , për këtë arsye secili operator ekonomik ka përgjegjësinë e garantimit dhe disponueshmërisë së shërbimit në çdo moment, duke ofruar suport teknik , mirëmbajtje të linjave fizike konform SLA-së”, thuhet në termat e referencës së procedurës.

Tenderët e lidhur me sistemet e IT të institucioneve të ndryshme por edhe mirëmbajtjet janë ndër procedurat e ankimuara më shpesh pranë KPP duke krijuar edhe zvarritje.

Një rast si ky ishte edhe ai i mirëmbajtjes së fiskalizimit i ankimuar disa herë dhe që ka një fond limit 7.7 mln euro, duke qenë dhe një nga arsyet që çoi në mos funksionimin e platformës self-care dhe bllokoi aktivitetin e bizneseve për rreth tre javë!./ N.Maho

E-Albania bllokon aktivitetin e bizneseve, prej një jave SelfCare nuk punon, askush nuk përgjigjet

Dobësitë teknike që shembën e-albania

The post AKSHI dhe administrata tani mund të mbeten dhe pa internet, ankimohet sërish tenderi 4.8 mln euro appeared first on Revista Monitor.

Në muajin dhjetor, Banka e Shqipërisë dha miratimin paraprak për licencimin e bankës JET Bank, për të ushtruar veprimtari bankare dhe financiare në Republikën e Shqipërisë.

Jet synon të jetë banka e parë plotësisht digjitale në Shqipëri, në kuptimin që nëse bankat e tjera aktive në vend kanë edhe sportele fizike edhe aplikacione mobile apo web, kjo do të ketë vetëm Aplikacion mobil si kanal aksesi e komunikimi me klientin.

Ndërsa këtë javë, kompania që ishte themeluar paraprakisht për të përgatitur procedurat e licencimit është regjistruar zyrtarisht në regjistrin tregtar si bankë, duke ndryshuar njëkohësisht edhe emrin nga Jet Albania në Banka Jet.

Me licencimin si bankë, Jet ka regjistruar njëkohësisht edhe ndryshimin e pronësisë, duke deklaruar shitjen e kuotave nga shtetasi britaniko-izraelit, Idan Avishai, te shoqëria e regjistruar në Hollandë, Jet Holdings.

Megjithëse është regjistruar zyrtarisht si bankë tregtare, Jet ende nuk e ka përditësuar akoma informacionin mbi pronarët përfundimtarë përfitues. Në regjistrin në fjalë, pronar pëtfitues vazhdon të rezultojë Idan Avishai.

I vetmi informacion i disponueshëm është struktura aksionare e shoqërisë së re pronare, Jet Holdings.

Sipas dokumentacionit zyrtar të depozituar, Jet Holdings ka gjashtë shoqëri aksionere, përkatësisht:

• Constador LTD, shoqëri e regjistruar në Qipro, me afërsisht 71.5% të aksioneve;
• Don Albania Holdings LTD, shoqëri e regjistruar në Izrael, me  afërsisht 3.7% të aksioneve;
• Ori Eyal LTD, shoqëri e regjistruar në Izrael, me afërsisht 2.6% të aksioneve;
• Yebogogo, LTD, shoqëri e regjistruar në Izrael, me 4.9% të aksioneve;
• Nathan Lawrence LTD, shoqëri e regjistruar në Izrael, me 4.9% të aksioneve;
• Israel Albania HoldingLTD, shoqëri e regjistruar në Izrael, me 12.4% të aksioneve.

Informacioni direkt rreth kompanive aksionare të Jet Holdings është i pakët, ndërsa nga emërtimi krijohet përshtypja se të paktën disa prej tyre janë themeluar enkas për pjesëmarrjen në këtë investim ne Shqiperi.

Aksionari i ri direkt, i bankës, Jet Holdings rezulton një shoqëri e themeluar në shtator të vitit 2025 dhe e regjistruar në Hollandë.

Aktualisht, kjo shoqëri përfaqësohet dy drejtorë menaxhues, shtetasi amerikan dhe britanik Louis Grant Silver dhe ai izraelit, Doron Hacmon, ndërsa në aktet e themelimit drejtor ekzekutiv rezultonte shtetasi nga Lihtenshejni, Oliver Hemmer, që më herët pati qenë edhe një nga anëtarët e Këshillit Drejtues të Jet Albania.

Të dhënat e pakta dhe të tërthorta rreth aksionerit të ri, Jet Holdings, kompanive pjesëmarrëse në strukturën aksionare dhe nga menaxherët përfaqësues të këtyre kompanive duket të jenë me eksperienca të mëparshme në sektorin e platformave të tregtimit online ose “FX online trading”, por jo të një banke digitale në një vend tjetër apo në BE.

Akoma nuk dihet se kur Banka do të bëhet gati të fillojë shërbimet për klientelën, që varet edhe nga Vendimi i Bankës së Shqipërisë për dhënien e Licencës përfundimtare për aktivitet dhe kjo bëhet edhe më e paqartë për faktin se Këshilli Mbikëqyrës i Bankës së Shqipërisë është akoma për tu zgjedhur pas skadimit të mandatit të 6 anëtarëve të tij.

The post Banka JET regjistrohet zyrtarisht appeared first on Revista Monitor.

Administrata tatimore u ka kërkuar bizneseve që të dorëzojnë inventarët deri në fund të këtij muaji.

“Bazuar në Ligjin nr.9920 datë 19.05.2008 “Për Procedurat Tatimore në Republikën e Shqipërisë”, i ndryshuar, neni 60 “Detyrimi i tatimpaguesve për të dhënë informacion administratës tatimore”, Ju bëjmë me dije se duhet të depozitoni inventarin analitik të datës 31.12.2025”, thuhet në njoftimin që u është dërguar subjekteve.

Inventari duhet të përmbajë informacione në lidhje me lëndën e parë, produktet e gatshme, mallrat për rishitje, të detajuara në njësi, sasi çmim dhe vlerë.

Ky informacion duhet të ngarkohet elektronikisht në sistemin e tatimeve e-Filing, në rubrikën “Çështjet e mia”, brenda datës 31.01.2026, me emrin Inventari 31.12.2025

Bazuar në analizën e riskut duke marrë për bazë një sërë indikatorësh si mosdorëzimin ne afat , pasaktësinë e tij, mospërputhjen me të dhënat nga fiskalizimi etj , tatimpaguesi mund të konsiderohet me risk dhe bëhet objekt i verifikimit në vend, për saktësinë e këtij inventari, përfundon njoftimi i tatimeve.

Ka biznese që ankohen se pas probleme që ata hasën me self-care, që për tre javë, deri ditën e djeshme ishte tërësisht jashtë funksioni, ky afat është tepër i shtrënguar, pasi nuk kanë pasur akses në rakordimin e faturave. Të tjerë pohojnë se mosfunksionimi i self-care nuk pengon për inverntarët, pasi informacioni mund të merret nga sistemi i tatimeve e-filing.

Mosfunksioni i self-care ka penguar bizneset dhe në hartimin e pasqyrave financiare të 2025-s. “Normalisht, Self Care është baza kryesore për rakordimet. Edhe tani, gjatë përgatitjes së Planit Financiar vjetor 2025, duhet të kryhen disa rakordime me Self Care, prandaj është e nevojshme të kesh akses në platformë”, ka pohuar me herët kontabilisti Sotiraq Dhamo.

Edhe Shoqata e Kontabilistëve dhe Financierëve të Shqipërisë kërkoi një plan emergjence dhe një shtyrje e afateve të bilanceve, që është 31 marsi, por që përgatitja e tyre kërkon kohë dhe puna nis që në janar.

Sipas shoqatës, rakordimi i shitjeve dhe konfirmimi i blerjeve midis asaj që raporton softueri dhe asaj që ka “gllabëruar” serveri tatimor është kthyer në një mision të pamundur. Pa këtë pasqyrë të qartë, hartimi i Pasqyrave Financiare kthehet në një ushtrim hamendësimi, duke cënuar parimin bazë të vërtetësisë.

Bizneset nuk gjejnë qetësi, sistemi self-care pothuajse nuk punon

The post Pas problemeve me Self-Care, Tatimet u kërkojnë bizneseve të dorëzojnë inventarët deri në 31 janar appeared first on Revista Monitor.

Juria zgjodhi këtë të enjte projektin fitues për Shtëpinë e re të Fëmijëve dhe Korpusin e Inspektorateve. Ndryshe nga herët e tjera, juria vlerësoi që projekti fitues të ishte një kombinim i dy projekteve të ndryshme: njëri për Shtëpinë e Fëmijëve dhe tjetri për Korpusin e Inspektorateve.

“Juria konstatoi asnjë prej projekteve si plotësisht të suksesshëm në trajtimin e të dyja programeve. Dhe juria vendosi që dy programet duhet të zhvillohen nga dy ekipe të ndryshme arkitekturore, njëri prej ekipeve të jetë përgjegjës për Shtëpinë e re të Fëmijëve, dhe tjetri për Korpusin e Inspektorateve.”

Konkretisht, për Shtëpinë e Fëmijëve u përzgjodh prezantimi nga Shoqëria “PROGEEN l.l.c” me nënkontraktor të specializuar Taller Hector Barroso + Studio B&L l.l.c + Doriana Bleta + Agim Seranaj + Ardian Paci.

Çfare parashikon: “Në këndvështrimin tonë shtëpia e fëmijës nuk është thjesht godinë apo institucion por është një shtëpi e vërtetë duke pasur parasysh aktorët e përfshirë në këto hapësira. Në rastin e shtëpisë së fëmijëve duam të jetë përtej fëmijëve dhe administratës por të përfshijë edhe komunitetin për një zgjidhje më të plotë. Kemi një kontekst i formësuar nga vila me pak kate, projekti jonë ka sjellë këtë shkallë mes dy aspekteve dhe diferencën mes rrugës dhe rrugicës pas rrugicës. Ne fillojmë me oborrin që në mënyrë kolektive formëson jetën në këtë kampus. Shtëpitë lidhen me njëra tjetrën duke ruajtur individualitetin dhe janë të pavarura. Organizimi mundëson ndriçim natyror dhe lejon më shumë lëvizshmëri dhe ndërveprim më lozonjar. Kemi oborre që ndërveprojnë duke u shkrirë. Pra këto oborre ofrojnë hapësirë për aktivitetet dhe kanë mundësi të luajnë gjatë gjithë vitit. Ka bibliotekë një hapësirë ku studiohet, zyrat administrative|, u tha gjatë prezantimit.

Ndërkohë që për zhvillimin e Korpusit të Korporatave u përzgjodh Shoqëria “MOTUS” shpk, me nënkontraktor të specializuar “Asab” shpk + Son Engineering & Construction + Rojkind Arquitectos S.C + Julian Kasharaj.

E cila parashikon ndërtimin e tre kullave.

“Secila është një notë dhe shndërrohet në kor, kulla të thjeshta, struktura të thjeshta. Njëra është pas, e para është hotel dhe zyra, ndërkohë që kemi ura lidhëse. Duam që mënyra sesi njerëzit hyjnë në kulla të ketë hyrje shumë të bukura. Pamjet e para, një kor urban”, deklaroi shoqëria fituese gjatë prezantimit.

Zhvillimi i pronës me privatin

Projekti është pjesë e nismës së marrë nga qeveria për të zhvilluar pronën shtetërore në bashkëpunim me privatin ku ky i fundit do të mbajë edhe barrën e financimit. Pjesa takuese e Korporatës të Investimeve Shqiptare shkon drejt ndërtimit të institucioneve publike në këtë rast Shtëpia e re e Fëmijëve e cila do të zhvillohet në një zonë me vila në rrugën Gramoz Pashko.

“Projekti parashikohet të realizohet nëpërmjet instrumentit të sipërmarrjes, ku partneri privat do të financojë ndërtimin e dy objekteve publike, Korpusit të Inspektorateve dhe Shtëpisë së re të fëmijëve “Zyber Hallulli”, ndërsa në këmbim do të ketë të drejtën të zhvillojë një pronë tjetër për përdorim multifunksional, në përputhje me vendimin e Këshillit të Ministrave.

Ky instrument është zgjedhur pasi ofron vlerën më të lartë zhvillimore për pronën, duke mundësuar optimizmin e saj për përdorim publik dhe privat në mënyrë efikase dhe të qëndrueshme” do të sqaronte më herët KISH.

Kulla tek Shtëpia e Fëmijëve “Zyber Hallulli”, ja projektet bashkë me Korpusin e Inspektorateve

The post Juria shpall dy projekte fituese për Shtëpinë e re të Fëmijëve dhe Korpusin e Inspektorateve appeared first on Revista Monitor.

Të gjithë kemi punuar me atë personin. Atë që këmbëngul gjithmonë se ka të drejtë, dominon mbledhjet dhe ua pret fjalën të tjerëve.

Mund ta fitojë debatin në moment, por në plan afatgjatë humbet diçka shumë më të rëndësishme: respektin.

Prania emocionale nënkupton mënyrën se si një person i bën të tjerët të ndihen në praninë e tij, jo çfarë thotë, por çfarë emocioni transmeton.

Është gjurma emocionale që lë te të tjerët. Disa njerëz i bëjnë ata përreth të ndihen të qetë dhe të aftë, ndërsa të tjerë, pa dashje, krijojnë tension apo ankth.

Kjo nuk do të thotë që duhet të jesh gjithmonë dakord me të gjithë. Bëhet fjalë të mësosh si të mos pajtohesh pa dëmtuar besimin dhe bashkëpunimin.

Ja tre mënyra për të mos rënë dakord në punë, pa u dukur si i pasjellshëm.

1. Niseni me kureshtje

Kur tensioni rritet, shumica mbrojnë automatikisht pikëpamjen e tyre. Kjo mbyll dialogun.

Kureshtja bën të kundërtën: krijon siguri psikologjike dhe ul temperaturën emocionale.

Në vend që të thoni: “Kjo nuk shkon”, provoni:

“Jam 80% dakord. A më ndihmon me 20% që më mungon?”

“Ide interesante. Mund të ma shpjegosh si po mendon për [X]?”

Kjo gjuhë tregon hapje dhe rrit besimin.

2. Zëvendësoni ‘por’ me ‘po, dhe…’

Parimi i improvizimit “Po, dhe…” ndihmon të vazhdojë biseda, jo të mbyllet.

Kur përdorni “por”, e mohoni atë që u tha. Kur përdorni “dhe”, e pranoni dhe ndërtoni mbi të.

Krahaso:

“I shoh përparësitë, por jam i shqetësuar për koston.”

“I shoh përparësitë, dhe jam i shqetësuar për koston.”

E para tingëllon kundërshtuese. E dyta bashkëpunuese.

3. Propozoni një eksperiment

Kur njerëzit dëgjojnë një “jo” të prerë, mbyllen. Në vend që ta refuzoni idenë, sugjeroni një test:

“Çfarë mund të testojmë javën tjetër?”

“Po sikur ta provojmë fillimisht me një klient?”

“Duhet” krijon mbrojtje. “Mund” krijon hapje. Studimet tregojnë se kjo qasje nxit zgjidhje më krijuese.

Kjo ju kalon nga roli i bllokuesit te ai i bashkëkrijuesit. Dhe kur njerëzit ndjejnë se po përmirësoni idenë e tyre, jo se po e rrëzoni, ata angazhohen më shumë. / CNBC

The post 3 mënyra për të mos rënë dakord pa lënë përshtypje negative appeared first on Revista Monitor.

Një studim i ri kritikon procedurën e vlerësimit të rrezikut të Bashkimit Europian për pesticidet, duke argumentuar se ato analizohen në mënyrë të izoluar dhe jo duke u fokusuar te ndikimi i efektit “koktej”, pra kombinimi i disa mbetjeve pesticidesh të pranishme në fruta dhe perime.

Trembëdhjetë vende europiane po shesin mollë në tregje dhe supermarkete me një përqendrim shqetësues mbetjesh pesticidesh, të njohura zakonisht si “kokteje pesticidesh”, sipas një raporti të një OJQ-je që i bën thirrje Bashkimit Europian të rregullojë ekspozimin ndaj këtyre kimikateve.

Belgjika, Kroacia, Çekia, Danimarka, Franca, Gjermania, Hungaria, Italia, Luksemburgu, Holanda, Polonia, Spanja dhe Zvicra kanë raportuar ndotje të mollëve, sipas raportit më të fundit të Pesticide Action Network (PAN) Europe, i cili kritikon procedurën e vlerësimit të rrezikut të BE-së për faktin se i trajton pesticidet në mënyrë të ndarë dhe shpërfill efektin “koktej”.

“Një nga rezultatet më tronditëse është se 85% e mollëve të testuara përmbanin disa mbetje pesticidesh,” tha Gergely Simon, aktivist në PAN Europe. “Autoriteti Europian për Sigurinë Ushqimore (EFSA) u ngarkua 20 vjet më parë të zhvillonte një metodologji për të rregulluar efektet koktej të pesticideve, por ende nuk e ka përmbushur këtë detyrim ligjor.”

Raporti thekson se, nëse këto mollë do të shiteshin si ushqim i përpunuar për foshnje, 93% e tyre do të tejkalonin kufirin ligjor të BE-së për nivelet e pesticideve për fëmijët nën 3 vjeç.

“Prindërit e rinj nuk janë të vetëdijshëm se ushqyerja e fëmijëve me fruta ose perime të freskëta konvencionale e rrit ndjeshëm ekspozimin e tyre ndaj pesticideve, ndonjëherë deri në 600 herë,” tha Simon. “Autoritetet publike duhet t’i informojnë ata dhe të promovojnë me prioritet ushqimin organik.”

Raporti kritik vjen në një kohë kur rregullat e BE-së për trajtimin e “koktejeve të pesticideve” mbeten pezull, me shumë grupe aktiviste që i bëjnë thirrje Komisionit Europian dhe EFSA-s të përshpejtojnë vlerësimin e rrezikut kumulativ të pesticideve.

Ndërsa çështja e vlerësimit të efekteve të kombinuara të disa pesticideve u pranua për herë të parë në vitin 2005, vetëm në vitin 2020 EFSA kreu një vlerësim pilot të efekteve të kombinuara mbi tiroiden dhe sistemin nervor.

Që nga viti 2021, Komisioni dhe EFSA kanë punuar për të zgjeruar vlerësimet kumulative të rrezikut për më shumë grupe pesticidësh, me synimin që t’i integrojnë plotësisht në legjislacion deri në vitin 2030.

Një zëdhënës i EFSA-s tha se puna për të vlerësuar problemin e “koktejve të pesticideve” është “komplekse”, pasi përfshin grupe të mëdha të dhënash, mjete të reja softuerike dhe bashkëpunim të gjerë me partnerë europianë dhe ndërkombëtarë.

“Aktualisht po përgatisim udhëzime se si të kryhet vlerësimi kumulativ ‘prospektiv’ i rrezikut, përpara se përdorimi i synuar i pesticidit të autorizohet, në kuadër të aplikimeve për nivelet maksimale të mbetjeve,” tha zëdhënësi.

Një ushtrim pilot me vendet e BE-së është planifikuar për fundin e vitit 2026, për t’u dhënë mundësi ekspertëve kombëtarë të testojnë mjetin dhe metodologjinë që po zhvillohet nga agjencia europiane e ushqimit, shtoi zëdhënësi i EFSA-s.

Pesticidet dhe “kimikatet e përjetshme”

Studimi shkencor i PAN Europe u zhvillua nga 1 deri më 20 shtator 2025, gjatë të cilit studiuesit përzgjodhën nga tre deri në pesë mostra të mollëve konvencionale të prodhuara lokalisht, nga supermarkete ose tregje, për një total prej 59 mostrash mollësh të prodhuara në nivel kombëtar, sipas raportit.

Gjetjet zbulojnë se 71% e mostrave të mollëve përmbanin të paktën një mbetje të kategorisë së pesticideve më toksike sipas BE-së, 64% përmbanin të paktën një mbetje të pesticideve PFAS, të njohura edhe si “kimikate të përjetshme”, dhe 36% përmbanin një pesticid neurotoksik.

Fludioxonil, një pesticid PFAS, u gjet në pothuajse 40% të mostrave, sipas raportit, i cili vëren se ky kimikat i rrezikshëm u klasifikua si çrregullues endokrin në BE në vitin 2024.

Komisioni propozoi ndryshime në dhjetor 2025 që do të dobësonin rregullimin e pesticideve, duke lejuar që miratimet të zgjasin pafundësisht dhe duke hequr kërkesën për të rivlerësuar toksicitetin e pesticideve mbi bazën e provave të reja shkencore çdo 10 deri në 15 vjet.

Propozimi do t’u lejonte gjithashtu vendeve të BE-së të shpërfillnin gjetjet më të fundit shkencore kur vlerësojnë rreziqet e pesticideve.

“Ka prova shkencore gjithnjë e më të shumta që tregojnë se ekspozimi ndaj pesticideve përmes ushqimit lidhet me infertilitetin dhe ndoshta edhe me kancerin,” tha Simon. “Ekspozimi i vazhdueshëm i qytetarëve ndaj përzierjeve të substancave toksike përmes ushqimit, ajrit ose pluhurit nuk merret parasysh; kjo çështje e rëndësishme duhet të trajtohet nga organet rregullatore.” / Euronews

The post Studimi i ri: Mollët europiane të kontaminuara me “kokteje pesticidesh” appeared first on Revista Monitor.

Një studim i Universitetit Aston nxjerr në pah rreziqet ekonomike për BE-në dhe Mbretërinë e Bashkuar nga përshtatja me kërcënimet tarifore të Donald Trump

Bashkimi Europian dhe Mbretëria e Bashkuar do të paguanin të dyja një çmim më të lartë se SHBA-ja në një luftë tregtare “sy për sy, dhëmb për dhëmb”, nëse Donald Trump do të ringjallte kërcënimin e tij për tarifa ndaj Europës lidhur me Groenlandën, sipas një analize të re ekonomike.

Udhëheqësit politikë europianë u detyruan të përballeshin më herët këtë muaj me pyetjen se si t’i përgjigjeshin Trumpit, kur ai kërcënoi se do të vendoste tarifa të reja deri në 25% ndaj tetë ekonomive europiane, në një përpjekje për të ushtruar presion mbi Danimarkën që të shiste Groenlandën.

Analiza e kryer nga Universiteti Aston në Birmingham tregoi se Europa do të kishte pësuar më shumë dhimbje ekonomike sesa SHBA-ja, nëse të dyja palët do të ishin përfshirë në një betejë të plotë tregtare, ku BE-ja dhe Mbretëria e Bashkuar do të kishin përputhur tarifat e kërcënuara.

Trump javën e kaluar hoqi dorë nga kërcënimi për tarifa gjatë një fjalimi në Davos, Zvicër. Por studimi nxjerr në pah dilemat me të cilat përballen udhëheqësit europianë për mënyrën se si të reagojnë në përplasjet me Trump, si dhe sfidën për të ruajtur një front të bashkuar kundër SHBA-së, në një situatë ku ekzistojnë stimuj që vendet individuale të përmbahen nga hakmarrja.

Mbretëria e Bashkuar ishte ndër vendet që Trump kërcënoi me tarifa deri në 25%, por kryeministri britanik, Sir Keir Starmer, sinjalizoi se vendi i tij nuk do të hakmerrej, duke argumentuar se “një luftë tregtare nuk është në interesin e askujt”.

Modelimi i Aston tregoi se, nëse lufta tarifore e lidhur me Groenlandën do të ishte përshkallëzuar në 25% dhe Mbretëria e Bashkuar do të ishte hakmarrë në të njëjtën mënyrë, ajo do të kishte pësuar një goditje ekonomike dy herë më të madhe sesa nëse do ta kishte përthithur goditjen, pavarësisht ndikimit të konsiderueshëm mbi eksportet britanike drejt SHBA-së.

Studimi zbuloi gjithashtu se nuk do të kishte qenë në interesin ekonomik të Mbretërisë së Bashkuar të bashkohej me ndonjë hakmarrje të BE-së. Mbretëria e Bashkuar do të kishte pësuar një goditje në PBB për frymë sa gjysma e asaj që do të përballej BE-ja, nëse kjo e fundit do të vendoste tarifa 25% ndaj SHBA-së.

Pavarësisht tërheqjes së Trump pas premtimit për një marrëveshje për zgjerimin e bazave sovrane amerikane në Groenlandë, kërcënimi i luftërave tregtare mbetet.

Presidenti amerikan këtë javë kërcënoi Korenë e Jugut me tarifa 25% për “mosrespektim” të marrëveshjeve të arritura me Uashingtonin vitin e kaluar. Si BE-ja, ashtu edhe Mbretëria e Bashkuar, vijojnë të negociojnë me administratën Trump për elemente të marrëveshjeve të tyre për armëpushim tarifor, të arritura vitin e kaluar.

Studimi i Aston përfundoi se, ndonëse Europa do të humbiste në një skenar hakmarrjeje të plotë ndaj SHBA-së, ajo gjithsesi mund t’i shkaktonte disa dëme Amerikës përmes masave të synuara.

Duke pasur parasysh rrezikun e efekteve anësore më të gjera, BE-ja kishte përgatitur një paketë të kalibruar me kujdes tarifash hakmarrëse mbi importe amerikane me vlerë 93 miliardë euro, përfshirë avionë Boeing, makina, bourbon dhe sojë, në rast se Trump do të kishte vendosur tarifat e lidhura me Groenlandën.

Studimi tregonte se Europa do të duhej ta zgjeronte hakmarrjen edhe te shërbimet amerikane, si teknologjia dhe financat, ku Europa është një treg kyç, për ta goditur realisht Amerikën.

William Bain, drejtues i politikave tregtare në Dhomat Britanike të Tregtisë, tha se studimi tregonte qartë se përshkallëzimi i tarifave ishte një “lojë me rezultat negativ për të gjithë” dhe theksoi nevojën për të diversifikuar marrëdhëniet tregtare të Mbretërisë së Bashkuar.

“Mbretëria e Bashkuar mund të jetë fleksibile në tregti dhe duhet të ndjekë marrëveshje të mëtejshme me tregje kyçe. Ne gjithashtu duhet të shtojmë kompetenca të reja për sigurinë ekonomike në arsenalin tonë, në mënyrë që të negociojmë nga një pozicion force në çdo mosmarrëveshje tregtare në të ardhmen.” / FT

The post Europa dhe Mbretëria e Bashkuar do të humbisnin më shumë se SHBA në një luftë tregtare appeared first on Revista Monitor.