Ish-sulmuesi i Chelsea-t dhe kapiteni i Spanjës, Alvaro Morata, raportohet se është larguar nga shtëpia ku jetonte me bashkëshorten Alice Campello dhe katër fëmijët e tyre, vetëm pak ditë pasi ajo mohoi publikisht zërat për një tradhëti të tijën me një mike të saj.
Sipas revistës spanjolle Hola, përpjekja e çiftit për të shpëtuar martesën ka dështuar, pavarësisht ribashkimit të tyre në fillim të vitit të kaluar. Morata dhe Campello, të cilët u ndanë pas triumfit të Spanjës në Euro 2024, kishin njoftuar anulimin e divorcit në janar, duke dhënë shpresë për një fillim të ri.
Megjithatë, burime pranë çiftit bëjnë me dije se ata kanë jetuar të ndarë prej disa javësh, ndërsa Morata është zhvendosur në një tjetër banesë në një nga zonat më ekskluzive të Milanos.
Pavarësisht ndarjes fizike, thuhet se marrëdhënia mes tyre mbetet korrekte dhe e qetë, kryesisht për hir të fëmijëve: Alessandro, Leonardo dhe Edoardo (binjakë), si dhe vajzës Bella.
As Morata dhe as Campello nuk kanë reaguar zyrtarisht ndaj raportimeve.
Vetëm pak ditë më parë, Campello doli publikisht në mbrojtje të Elena Sirigu, eksperte e menaxhimit sportiv, pasi media spanjolle aludoi për një lidhje mes saj dhe Moratës. Influencerja italiane i hodhi poshtë kategorikisht akuzat, duke e quajtur Sirigu një mike të vjetër familjare dhe duke dënuar etiketimin e saj si “shkatërruese familjeje”.
“Nuk meriton këtë ekspozim dhe këto akuza që lënë plagë të thella personale dhe profesionale,” shkroi Campello, duke shtuar se Sirigu është një person serioz me vlera.
Më herët, Campello kishte deklaruar se huazimi i Moratës te Galatasaray sezonin e kaluar kishte ndihmuar në shpëtimin e martesës së tyre dhe se ndarja e parë kishte qenë “gabimi më i madh i jetës sonë”.
Në planin sportiv, Morata po kalon një periudhë të vështirë. Pas një tentative për t’u transferuar te Getafe, ai përfundoi me një huazim te Como, ku ende nuk ka shënuar në 15 paraqitje. Sulmuesi ka folur hapur për betejën e tij me depresionin, duke pranuar se abuzimet dhe kritikat e vazhdueshme e kanë thyer mendërisht.
Madje, ai zbuloi se kishte menduar të simulonte një dëmtim për të shmangur pjesëmarrjen në Euro 2024, turne që Spanja e fitoi nën kapiteninë e tij.
Ndërsa jeta profesionale dhe ajo personale e Moratës mbeten në trazira, e ardhmja e martesës së tij me Alice Campello duket më e pasigurt se kurrë./mxh
Presidenti ukrainas, Volodymyr Zelensky hodhi poshtë sot raportet se Rusia dëshiron të përdorë asetet e ngrira amerikane për rindërtimin e saj, duke e quajtur idenë “absurde” dhe duke përsëritur se të gjitha fondet e ngrira ruse duhej të përdoreshin për të rindërtuar Ukrainën.
Duke folur me gazetarët e “Kyiv Post” nëpërmjet një aplikacioni mesazhesh, Zelensky u pyet mbi deklaratën e fundit të presidentit rus, Vladimir Putin – i cili kishte shprehur gatishmërinë për të përdorur asete të ngrira amerikane me vlerë rreth 5 miliardë dollarë në – për projekte rindërtimi, përfshirë rajonin e Kurskut të Rusisë.
“Ne me siguri do të luftojmë për përdorimin e të gjitha aseteve të ngrira ruse – dhe kjo është absolutisht e drejtë”, tha Zelensky.
“Rusia është agresorja. Kjo njihet nga e gjithë bota. Ata e filluan këtë luftë dhe për këtë arsye Ukraina duhet të rikuperohet nga pasojat e agresionit rus”, tha ai.
Zelensky tha se Kievi e kishte ngritur vazhdimisht çështjen me zyrtarët amerikanë, duke përfshirë edhe asetet e ngrira amerikane me vlerë rreth 5 miliardë dollarë – duke këmbëngulur se ato duhej të përdoreshin për rindërtimin e Ukrainës dhe jo të Rusisë.
“Ne u kemi thënë amerikanëve shumë herë se presim që këto fonde të përdoren për rindërtimin e Ukrainës, sepse Ukraina është vendi që vuajti”, tha ai.
Vlera totale e aseteve sovrane ruse të bllokuara në të gjithë botën është rreth 290 miliardë euro (339 miliardë dollarë), shumica e të cilave mbahen në një numër të vogël juridiksionesh të BE-së dhe G7, sipas bankës qendrore të Ukrainës.
Presidenti tha se qëndrimi i Moskës dukej i palogjikshëm, duke vënë në dukje se asetet ishin ngrirë pikërisht për shkak të pushtimit të Rusisë./mxh
Nëse jeni romantke të dëshpëruara që mezi prisni histori dashurie dhe ëndrra të papërmbushura, duhet t’i falënderoni komeditë romantike të viteve ’90.
Ato ku çdo vajzë ka një takim të lezetshëm dhe rastësor me mashkullin e ëndrrave të saj (edhe nëse nuk e ka kuptuar ende!), marrëdhënia e tyre zhvillohet me shpejtësinë e dritës, dhe pastaj, pas një gjesti totalisht dramatik, kuptojnë që janë perfekt për njëri-tjetrin dhe jetojnë të lumtur përgjithmonë… në botën e filmave.
Po, skenari është i thjeshtë, i parashikueshëm dhe pothuajse i pamundur në jetën e vërtetë, por është po aq i magjishëm.
Vitet ’90 ishin dekada e artë për rom-com-et, dhe shumë nga filmat më ikonë të këtij zhaneri dolën atëherë: “Clueless”, “Pretty Woman”, “Sleepless in Seattle”, për të përmendur vetëm disa prej tyre.
Julia Roberts, Meg Ryan dhe “mbretëresha” të tjera të rom-com-it që ishin gjithmonë në ekran, duket sikur nuk kishin kohë tjetër përveçse të dashuroheshin me kolegun e tyre të ëndrrave.
1. One Fine Day (1996)
Nëse nuk e keni parë Michelle Pfeiffer dhe George Clooney në kulmin e tyre të rom-com-it të viteve ’90, duhet ta shihni menjëherë. Filmi tregon një ditë të jashtëzakonshme në jetën e dy prindërve beqarë në New York, të cilët detyrohen të bashkëpunojnë dhe shpejt zbulojnë një kimi të padiskutueshme mes njëri-tjetrit.
2. Groundhog Day (1993)
Kur një meteorolog cinik dërgohet për të raportuar festimet vjetore të Groundhog Day në Punxsutawney, ai gjendet duke përjetuar të njëjtën ditë pa fund. Një film mbi dashurinë, rritjen personale dhe shanset e dyta që mund të ndryshojnë gjithçka.
3. Father of the Bride (1991)
Steve Martin dhe Diane Keaton luajnë si çifti i martuar George dhe Nina, të cilët përpiqen të organizojnë dasmën e vajzës së tyre, e cila sapo kthehet nga studimet jashtë vendit, i surprizon me lajmin se është fejuar. Ata përpiqen të jenë të qetë, por le të themi që gjërat bëhen pak dramatike ndërsa përpiqen t’i japin vajzës së tyre 22-vjeçare, Annie, dasmën që ajo dëshiron.
4. The Parent Trap (1998)
Ky film klasik është një kombinim mes rom-com dhe filmit për marrëdhënien mes motrash. Dy binjake që nuk e kanë takuar kurrë njëra-tjetrën gjenden papritur në të njëjtin kamp veror dhe vendosin të bëjnë planin për të ribashkuar prindërit e divorcuar.
5. Can’t Hardly Wait (1998)
Kush nuk do të donte një rom-com të lezetshëm adoleshentësh? Kur një klasë maturantësh organizon një festë të madhe për mbylljen e vitit, duket se të gjithë kanë një mision: të bëjnë atë që nuk patën guxim të bëjnë gjatë katër viteve të fundit.
6. Love Potion No. 9 (1992)
Kur një kimist, Paul, dështon në dashuri, viziton Madame Ruth, e cila i jep një pije magjike dashurie. Ai dhe bashkëpunëtori i tij, Farrow, vendosin ta provojnë dhe shpejt bëhen të parezistueshëm për të gjithë. Por nga kush tërhiqen më shumë ata të dy? Ndoshta njëri-tjetri?
7. Sliding Doors (1998)
Nëse keni vrarë ndonjëherë mendjen se si do të ishte jeta juaj nëse do të kishit bërë qoftë edhe një veprim të vogël ndryshe, ky film është një domosdoshmëri. Ai ndjek dy rrjedha të mundshme, shumë të ndryshme, të jetës së një gruaje: njëra ku arrin trenin dhe tjetra ku e humb. Një film që ju bën të vendosni gjithçka në pikëpyetje… dhe të ndjeni keqardhje.
8. Clueless (1995)
Ugh! Si mund të mos jetë ky në krye të listës? Cher Horowitz ka qenë frymëzim për shumë vajza teksa përpiqej të navigonte jetën e shkollës së mesme dhe t’i bënte një transformim total vajzës së re në shkollë, Tai-t. Fakt interesant për adhurueset e Jane Austen: filmi është bazuar në romanin “Emma”.
9. Four Weddings and a Funeral (1994)
Këtu Hugh Grant fitoi famën e tij në rom-com. Ai është protagonisti në këtë film, që flet për një grup shoqëror që përballen me dy nga ngjarjet më të pashmangshme të jetës: martesa dhe vdekja.
10. The Wedding Singer (1998)
Shumë rom-com-e janë më të ngarkuara me dashuri sesa me humor, por jo ky. Adam Sandler do t’ju bëjë të qeshni dhe qani njëkohësisht. Ai luan një këngëtar dasmash që braktiset në altarin e tij; më pas, fillon të dashurohet me shoqen e re, Julia (Drew Barrymore).
11. There’s Something About Mary (1998)
Ky film bëri bujë kur doli, dhe për një arsye të mirë: është njëkohësisht humoristik dhe i ëmbël. Ted, 29 vjeç, punëson një person që të gjejë dashurinë e tij të gjimnazit, Mary, por investigatori përfundon duke u dashuruar vetë me të, dhe shpejt zbulon se nuk është i vetmi që po e ndjek Mary-n.
12. As Good as It Gets (1998)
Ky është filmi i fundit rom-com që ka fituar çmimet Oscar për Aktorin dhe Aktoren më të Mirë. Një shkrimtar i mërzitur me OCD në New York bie në dashuri me kamerieren, e vetmja që e duron sjelljen e tij.
13. Jerry Maguire (1996)
Një opsion i mirë nëse po përpiqeni të bindni një person që s’i pëlqen rom-com-et të shikojë këtë film bashkë me ju. Tom Cruise luan një agjent sportiv që jep dorëheqjen nga puna për të hapur agjencinë e tij. E vetmja kolege që e ndjek është Dorothy, një nënë e re 26-vjeçare, luajtur nga Renée Zellweger. Ata fillojnë të dashurohen, por rruga nuk është e lehtë.
14. The Best Man (1999)
Ky film ka gjithçka: romancë, komedi dhe dramë. Kur një kopje e librit të papublikuar të Harper Stewart mbi aventurat e tij dashurore të mëparshme shpërndahet përpara se të bëhet shoqëruesi i dhëndrit, ai përpiqet ta mbajë sekret, duke u frikësuar se do të dalin sekretet mbi të dhe nusen e dasmës.
15. How Stella Got Her Groove Back (1998)
Stella, 40 vjeç, pranon të shkojë në një udhëtim në Xhamajka me shoqen e saj, Delilah. Aty takon Winston Shakespeare, 20 vjet më të ri. Por mosha është vetëm një numër dhe ata fillojnë një romancë së bashku.
16. Runaway Bride (1999)
Pothuaj një dekadë pas “Pretty Woman”, Julia Roberts dhe Richard Gere bashkohen sërish me regjisorin Garry Marshall për historinë e një vajze, një djali dhe shumë dasmave. Filmi nuk është aq magjik sa “Pretty Woman”, por gjithmonë ka diçka speciale t’i shohësh këta dy aktorë si një çift çmendurisht të dashuruar.
17. Notting Hill (1999)
Roberts pati një vit të jashtëzakonshëm në 1999-n, me “Runaway Bride” dhe “Notting Hill”. Ky i fundit është më ikonik për shkak të kimisë mes saj dhe Hugh Grant, dhe shumica mund ta dinë se përse: për shkak të momentit të famshëm ku ajo i thotë “Jam vetëm një vajzë, duke qëndruar përpara një djali, duke i kërkuar që të më dojë.”
18. You’ve Got Mail (1999)
Meg Ryan dhe Tom Hanks na tregojnë një histori të ëmbël dashurie. Qyteti i New York-ut është pothuajse personazh i tretë. Dhe skena e fundit në Riverside Park? Lot pa pushim.
19. She’s All That (1999)
Ka shumë argumente për ta konsideruar këtë rom-com të shkollës së mesme si film përkufizues i viteve ’90. Ky film ka gjithçka: transformimin e plotë të “vajzvs së shëmtuar”, Usher, Rachael Leigh Cook duke zbritur shkallët, Paul Walker (RIP) dhe skenën më të çmendur të kërcimit në historinë e kinemasë.
20. 10 Things I Hate About You (1999)
Nëse “She’s All That” nuk është rom-com-i i pakundërshtueshëm i viteve ’90, atëherë ky duhet të jetë. Një përshtatje e “The Taming of the Shrew”, me Joseph Gordon-Levitt, Julia Stiles dhe Heath Ledger.
21. My Best Friend’s Wedding (1997)
A është Julia Roberts mbretëresha e rom-com-eve? Po, padyshim. Aftësia e saj për të balancuar romancën dhe komedinë në mënyra të reja dhe të ndryshme është fantastike. Në duart e dikujt tjetër, ky film mund të dukej i çuditshëm: vajza prish dasmën e shokut të ngushtë sepse papritmas kupton se e do?! Vetëm Julia Roberts mund ta bëjë këtë dhe prapë të pëlqehet nga të gjithë./mxh
Kjo javë ka qenë e gjitha mbi dramën e familjes Beckham. Lidhur me të ka komentuar edhe motra e ish-it të Nicola Peltz, Alana Hadid, në një postim të publikuar nga faqja Saint Hoax në Instagram.
“Të përfundosh një rrëfim prej tetë paragrafësh mbi konfliktet familjare me ‘gjithçka që duam është privatësia’ na mjafton për ta kuptuar gjithë situatën”, shkruante një ndjekës dhe Alana ishte në të njëjtën mendje me të.
“Po pra, dhe ajo vajza nuk kërkon aspak privatësi, ka dhjetë vjet që përpiqet të bëhet e famshme,” u shpreh ajo.
Reagimi i saj vjen ndaj një postimi ku shfaqej Victoria, David-i dhe Brooklyn krah Nicola-s. Teksa komentoheshin dy prej deklaratave të Brooklyn-it, konflikti i tij me familjen u krahasua me përplasjen që ndodhi në familjen mbretërore disa vite më parë.
“Konflikti i familjes Beckham është pjesa e dytë e historisë së Meghan dhe Harry-t.”
“Brooklyn Peltz Beckham thotë se nuk dëshiron të pajtohet me familjarët.”
“Brooklyn Beckham thotë se mamaja e tij, Victoria, i vodhi vallëzimin e parë me Nicola-n gjatë dasmës.”
Nicola Peltz dhe vëllai i Alana-s, Anwar Hadid, kanë qenë në një lidhje 2-vjeçare disa vite më parë. Nuk e dimë nëse ka ende ndonjë hatërmbetje nga e shkuara, por mund të themi me siguri se pavarësisht deklaratave mjaft të detajuara të Brooklyn-it, jo të gjithë qëndrojnë në anën e bashkëshortes së tij./mxh
Për të paraprirë efektin boomerang të fluksit të turistëve vite më parë, qeveria i ndryshoi pritshmëritë e turizmit nga sasia në cilësi.
Dhe kështu rezulton edhe në raportet e INSTAT për 2025, teksa rritja e numrit të turistëve ishte e lehtë, ndërsa më e ulët se në vitin 2023.
Rreth 12.5 milionë të huaj e vizituan vendin një vit më parë, 6.6% më shumë se në 2024.
Me një gjeografi të përqendruar kryesisht nga rajoni dhe Evropa Jugore, Shqipërinë e vizituan më shumë shqiptarë të Kosovës, italianë, gjermanë, nga Mbretëria e Bashkuar, Franca etj. Ndërsa si qëllim kryesor kishin pushimet, nuk munguan as turistët tranzit, që e përdorin Shqipërinë për të udhëtuar drejt vendeve të tjera.
Pak më shumë turistë, por kjo nuk u përkthye rrjedhimisht në më shumë të ardhura.
Marketimet e forta në rrjetet sociale për Shqipërinë si një destinacion me larmishmëri bukurish natyrore, ushqime të mira, çmime të lira, sollën edhe tipologjinë e turistëve që na vizituan.
Operatorët turistikë e argumentojnë këtë me ndryshimin e tipologjisë së turistit në low cost, që gjatë vitit 2025 karakterizohej nga të rinj aventurierë, që pushonin duke shpenzuar sa më pak.
Rreth 12.4 milionë të huaj hynë në vend, por shqiptarët rritën daljet në 8.6 milionë gjatë gjithë vitit për pushime, udhëtime mjekësore e biznesi etj., drejt vendeve të BE-së dhe më tej.
Ekspertët parashikojnë se turizmi këtë vit nuk pret surpriza, por do të vazhdojë me një ecuri të njëjtë me vitin 2025.
Ndërsa si problem ngrenë të njëjtat kushte me të cilat u përballën të gjithë në verë: çmime të larta, mungesë uji, ndërprerje energjie, djegie mbeturinash në pikun e sezonit dhe një infrastrukturë rrugore të dëmtuar.
Pritshmëritë për një turizëm elitar janë shumë larg dhe shpresat e bizneseve mbeten te turistët low cost, të organizuar dhe individualë./mxh
Pas komenteve të Presidentit Donald Trump se trupat e NATO-s qëndruan larg vijave të frontit në Afganistan, Shtëpia e Bardhë ka dalë me një deklaratë zyrtare.
“Presidenti Trump ka të drejtë: kontributet e Amerikës në NATO janë më të mëdha se ato të vendeve të tjera. Përmbushja e premtimit prej 5% të shpenzimeve nga aleatët po ndihmon Evropën të marrë përgjegjësi më të madhe për mbrojtjen e saj,” thuhet në deklaratë.
Sipas BBC, SHBA-të shpenzojnë më shumë për mbrojtje sesa çdo anëtar tjetër i NATO-s, duke përbërë rreth 62% të shpenzimeve totale të aleancës në vitin 2025.
Trump ka inkurajuar aleatët të rrisin shpenzimet për mbrojtje, me një objektiv afatgjatë që ata të arrijnë 5% të PBB-së së tyre deri në vitin 2035. Aktualisht, asnjë vend anëtar nuk ka arritur këtë nivel. Polonia, që shpenzon më shumë për mbrojtje në raport me PBB-në, ka shpenzuar pak më pak se 4.5% në vitin 2025, ndërsa SHBA-të rreth 3.22%./mxh
Princi Harry, i cili ka shërbyer në Afganistan, ka nxjerrë një deklaratë në përgjigje të komenteve të Trump mbi NATO-n.
Harry përmendi shërbimin e tij në Afganistan dhe sakrificat e ushtarëve atje në përgjigjen e tij ndaj Donald Trump, i cili kishte deklaruar se forcat e NATO-s në vend ishin “pak prapa vijave të frontit”.
Deklarata e presidentit amerikan shkaktoi reagime nga politikanët në Britani, si dhe nga veteranët dhe familjet e ushtarëve të rënë.
“Në vitin 2001, NATO aktivizoi Nenit 5 për herë të parë dhe të vetme në historinë e saj. Kjo do të thoshte se çdo vend aleat ishte i detyruar të qëndronte pranë Shteteve të Bashkuara në Afganistan, në kërkim të sigurisë sonë të përbashkët. Aleatët iu përgjigjën kësaj thirrjeje”.
“Unë kam shërbyer atje. Kam bërë miq për jetën atje. Dhe kam humbur miq atje. Vetëm Mbretëria e Bashkuar pati 457 ushtarë të vrarë. Mijëra jetë u ndryshuan përgjithmonë. Nënat dhe baballarët varrosën bij e bija. Fëmijët mbetën pa prindër. Familjet mbajnë koston. Këto sakrifica meritojnë të flitet për to me të vërtetë dhe me respekt, ndërsa të gjithë mbetemi të bashkuar dhe të përkushtuar ndaj mbrojtjes së diplomacisë dhe paqes.”/mxh
Dymbëdhjetë shtete amerikane kanë shpallur gjendjen e jashtëzakonshme – përpara mbërritjes së asaj që mund të jetë një nga stuhitë më të rënda dimërore në vitet e fundit, raportoi sot media amerikane.
E shoqëruar nga reshje të dendura dëbore dhe erëra të akullta, stuhia do të përhapet në një distancë prej rreth 3,000 kilometrash nga Nju Meksiko në jugperëndim deri në Maine në verilindje gjatë fundjavës, paralajmëroi shërbimi meteorologjik.
Linjat ajrore kanë anuluar tashmë qindra fluturime si masë paraprake, sipas raportimeve të medias.
Shumë shkolla anuluan sot mësimin – si masë paraprake.
Ekzistojnë gjithashtu frikëra për ndërprerje të energjisë elektrike, për shkak të rënies së pemëve ose shkëputjes se linjave të energjisë si rezultat i peshës se akullit.
Paralajmërimet e motit ose këshillat speciale janë në fuqi për rreth 160 milionë njerëz.
Guvernatorja e Nju Jorkut, Kathy Hochul paralajmëroi se i ftohti mund të jetë “absolutisht vdekjeprurës”.
Në disa pjesë të Minesotës dhe Dakotës së Veriut, temperaturat mund të bien në minus 45 gradë Celsius, sipas shërbimit meteorologjik.
Presidenti amerikan, Donald Trump e përdori të ftohtin ekstrem për t’u dhënë një tjetër goditje ekspertëve të klimës./mxh
Kryeministri britanik Keir Starmer ka reaguar ashpër ndaj deklaratës së Presidentit të SHBA-së, Donald Trump, i cili kishte sugjeruar se trupat e NATO-s qëndronin larg vijave të frontit gjatë luftës në Afganistan.
Starmer e cilësoi këtë koment si “ofendues dhe sinqerisht të neveritshëm”, duke shtuar se ishte e qartë se ky veprim kishte shkaktuar dhimbje tek familjarët e ushtarëve të vrarë ose të plagosur në luftë.
Në një deklaratë për mediat, Starmer u shpreh: “Komentet e Presidentit Trump janë ofenduese dhe të neveritshme. Nuk është për t’u habitur që ato kanë shkaktuar kaq shumë dhimbje për ata që humbën të dashurit e tyre në luftë. Po të kisha bërë një koment të tillë, sigurisht do të kërkoja falje.”
Këto fjalë vijnë pas një interviste që Trump dha për Fox News, ku ai përsëriti një nga pikëpamjet e tij më të përhapura, duke thënë se NATO nuk ishte një aleat i besueshëm për SHBA-në, veçanërisht gjatë operacioneve ushtarake në Afganistan.
Trump theksoi: “Ne kurrë nuk kishim nevojë për ta. Ata thanë se do të dërgonin disa trupa, por ata qëndruan larg vijave të frontit.”
Këto komente të Presidentit Trump kanë nxitur një valë kritikash nga politikanët dhe veteranët britanikë, që theksuan se gjatë misionit të NATO-s në Afganistan, 457 ushtarë britanikë humbën jetën. Po ashtu, u përmend edhe fakti se Trump shmangu shërbimin ushtarak gjatë luftës në Vietnam.
Kryeministri Starmer, si pjesë e një homazhi për ata që humbën jetën gjatë luftës, ka nderuar kujtimin e ushtarëve britanikë, duke e cilësuar si një mision të rëndësishëm për sigurinë globale dhe për mbështetje të partnerëve ndërkombëtarë./mxh
Javën e ardhshme do të dalin në treg biletat për ndeshjen e parë të play-off-it të Shqipërisë përballë Polonisë që do të luhet më 26 mars në stadiumin Narodowy të Varshavës.
Një stadium me kapacitet prej 58.000 vendesh që për këtë ndeshje në cdo faqe që shet bileta apo prenoton on-line tregohet me shenjën, intere shumë i lartë.
Pavarësisht reklamimeve të ndryshme, biletat për këtë ndeshje nuk kanë dalë ende në shitje as për pjesën e tifozerisë vendase as për ato të sektorit mik, ku do të jenë tifozët kuqezi. Sipas rregullores për sektorit mik do të jenë në dispozicion vetëm 5% e kapacitetit të stadiumit, apo thënë ndryshe, 2900 bileta ndërkohë që 55100 do të jenë në dispozicion të tifozerisë vendase.
Edhe pse e përcakton rregullorja, në delegacionin e dërguar në Varshavë dje mes takimeve dhe bisedimeve për logjistikën dhe lokacionet ku do të qëndrojë ekipi, do të kërkohet edhe një favor që lidhet me shtimin e përqindjes, rreth 10%, për tifozerinë shqiptare për këtë eveniment që për ne mbetet historik. Sa i përket çmimeve të biletave ende nuk janë zyrtare por në ndeshjet e së shkuarës për të ndjekur Poloninë në një eveniment kualifikues, bileta më e lirë kushtonte 55 euro në pjesën e tribunave anësore, 42 në qoshet e stadiumit dhe fushës, 26 euro pas portave, ndërkohë që tribunat qëndrore dhe ato VIP janë disi më shtrenjtë./et
Ish-ministri i Drejtësisë Ylli Manjani ka shpërthyer ndaj ndryshimeve në Kodin Penal, teksa tashmë parkimi dysh i automjeteve ka qenë i ndëshkuar me gjobë por tashmë do të kthehet në një vepër penale të dënueshme me burg.
Manjani shkruan se një ndryshim i tillë në Kodin Penal është përtej llogjikës dhe parkimi dysh nuk mund të jetë vepër penale.
“Ore, si do e ndalojë ndjekja penale që merr vite të tëra ndalimin e parkimit dysh?! A jeni në terezi apo jo?! Parkimi i gabuar dhe çlirimi i rrugës janë çështje emergjence. Prandaj është krijuar policia”, thekson Manjani në postimin e tij.
Ndërsa në fund, juristin shton se duhen ndryshime në Kodin Penal, por mos të ngarkohet akoma më shumë me vepra penale të pallogjikshme dhe të paefektshme.
Postimi i plotë i Manjanit:
Parkimi dysh nuk mund të jetë vepër penale!!!
Mos ja q* robt llogjikës!
Ore, si do e ndalojë ndjekja penale që merr vite të tëra ndalimin e parkimit dysh?! A jeni në terezi apo jo?! Parkimi i gabuar dhe çlirimi i rrugës janë çështje emergjence. Prandaj është krijuar policia.
Po për çfarë na duhet policia rrugore, karroatreci, karkaleci e ku e di unë se çfarë ka tjetër?!
Cili është qëllimi në fund të fundit, të dënohen njerëz apo të lirohet trafiku i bllokiar nga parkimi dysh?!
Si e liron trafikun prokurori e gjykatësi mor aman?!
Dmth polici çon shoferin në ndjekje penale dhe makinën e lë prap në parling dysh?!!!
Trafiku rrugor është detyrë administrative e policisë rrugore ore, ejjjjj! Një karroatrec vlen më shumë se çdo ndjekje penale.
Kot fare!
Ua ua ua ua…
E pabesueshme!
E mendova shaka këtë llogjikë, por duan ta bëjnë pjesë të Kodit Penal..!!!
****
Absolutisht është abuzim llogjik ideja e ngatërrimit të juridiksionit penal mbi parkimin në rrugë.
Në vend ta çlirojmë Kodin nga penalizimi i shkeljeve të tjera administrative e ngarkojmë akoma më shumë me vepra penale të pallogjikshme dhe të paefektshme.
Një aksident ka ndodhur në hyrje të Beratit, në vendin e quajtur “Rruga e Re”. Mësohet se dy automjete janë përplasur me njëra tjetrën.
Si pasojë e aksidentit janë plagosur lehtë çifti i bashkëshortëve. Të plagosurit janë transportuar drejt Spitalit Rajonal Berat, për të marrë mjekim shëndetësor.
Në vendngjarje kanë shkuar forcat e policisë që po kryejnë edhe këqyrjen e vendit të aksidentit, për të përcaktuar dinamikën dhe shkaqet e tij./mxh
Prindërit e dekurajuar nga ditët e shumta të sëmundjes së fëmijëve të tyre gjatë vitit të parë të shkollës së fëmijëve, do të jenë të lumtur të dinë se fëmijët që ndjekin shkollën e fëmijëve kanë një mikrobiotë shumë më të pasur me lloje bakteriale sesa ata që nuk e ndjekin, falë ndërveprimeve dhe shkëmbimeve të vazhdueshme (të spërkatura me mukus dhe pështymë ) me bashkëmoshatarët e tyre.
Sipas një studimi të Universitetit të Trentos të botuar në revistën Nature , vetëm pas një muaji në çerdhe, një pjesë e konsiderueshme e baktereve të zorrëve të fëmijëve rrjedhin nga ato të shokëve të klasës. Pas katër muajsh, foshnjat ndajnë 15-20% të specieve të baktereve të zorrëve me shokët e klasës , një pjesë më e madhe e mikrobiotës sesa ajo e fituar nga anëtarët e familjes pas lindjes.
Një ndotje shumë e shpejtë
Mendohet se mikrobiota e të porsalindurve fillon të formohet gjatë lindjes , falë kontributit të baktereve të nënës, dhe më pas pasurohet nga lloje bakteriale nga anëtarët e ngushtë të familjes. Për të kuptuar se çfarë ndodh më vonë, me ndërveprimet e para jashtë familjes me bashkëmoshatarët, një grup mikrobiologësh të udhëhequr nga Nicola Segata analizuan mostrat e jashtëqitjes nga 43 foshnje, me një moshë mesatare prej 10 muajsh në fillim të studimit, si dhe ato nga 10 anëtarë të stafit të çerdhes dhe shumë anëtarë të familjes së foshnjave, duke përfshirë nënat, baballarët, vëllezërit e motrat dhe kafshët shtëpiake.
Mbledhja filloi ditën e parë të shkollës së fëmijëve, për të kapur momentin e ndjeshmërisë më të madhe ndaj kontaminimit, duke pasur parasysh se sistemet imunitare të fëmijëve ishin ende të papjekura, dhe vazhdoi çdo javë deri në festat e Krishtlindjeve (por për një grup të vogël fëmijësh deri në korrik).
Udhëtim vajtje-ardhje
Diversiteti i mikrobiotës së fëmijëve u pasurua vetëm pas muajit të parë dhe vazhdoi ta bënte këtë gjatë gjithë vitit shkollor. Mjedisi shtëpiak sigurisht që ndikoi në kontributin e secilit fëmijë në këto “shkëmbime”: ata që kishin vëllezër e motra në përgjithësi merrnin më shumë mikroorganizma prej tyre sesa nga prindërit e tyre dhe kishin një mikrobiotë më të pasur – prandaj, ata kishin tendencë të merrnin më pak lloje bakteriale nga shokët e klasës.
Tek fëmijët me qen dhe mace në shtëpi, janë vërejtur raste të shkëmbimit të mikroorganizmave të zorrëve me kafshët, ndërveprime që nuk u shfaqën tek të rriturit – sikur të kishte kontakte më intime midis fëmijëve të vegjël dhe katërkëmbëshëve.
Një fakt kurioz është se fëmijët në çerdhe ndonjëherë kanë vepruar si ndërmjetës për shkëmbimin e baktereve midis prindërve të tyre përkatës .
Një simbiont i zorrëve njerëzore, bakteri “miqësor” Akkermansia muciniphila , kaloi nga nëna te foshnja e saj, nga foshnja te shoku i folesë dhe nga foshnja te të dy prindërit. Ky udhëtim mund të na ndihmojë të kuptojmë më mirë jo vetëm ndikimet në mikrobiotë, por edhe përhapjen e patogjenëve midis familjes dhe botës së jashtme.
Le të ripopullojmë!
Një efekt pozitiv i këtij ndërveprimi shoqëror u shfaq kur disa prej fëmijëve iu desh të merrnin antibiotikë . Trajtimi uli në mënyrë drastike diversitetin e mikrobiotës së tyre, por kontakti me bashkëmoshatarët e tyre lejoi që mjedisi i zorrëve të ripopullohej me shpejtësi me specie të dobishme.
Sipas studiuesve, ndikimet afatgjata shëndetësore të këtij pasurimi të hershëm janë të paqarta; por fakti që shumica e llojeve bakteriale të fituara ishin ende të pranishme një vit pas ditës së parë të shkollës tek shumica e fëmijëve në studimin pasues sugjeron që këto lloje mund të mbeten të vendosura në moshë madhore . Një kujtesë e atyre ditëve të hershme të kaluara mes miqve./et
Ekspertët zbulojnë si temperatura e ujit, sapuni dhe mënyra e tharjes ndikojnë drejtpërdrejt në lëkurë
Duart e thata pas larjes shfaqen kryesisht sepse nga lëkura largohen vajrat natyrale që e mbrojnë atë. Përdorimi i ujit të vakët dhe i sapunit hidratues e zvogëlon tharjen e lëkurës, ndërsa edhe mënyra se si thahen duart ndikon ndjeshëm në gjendjen e saj.
Larja e rregullt e duarve është një nga masat më efektive për mbrojtje nga infeksione të ndryshme. Megjithatë, ekspozimi i shpeshtë ndaj ujit dhe sapunëve e dëmton barrierën natyrale mbrojtëse të lëkurës, gjë që çon në tharje, çarje dhe ndjesi parehatie.
Dermatologia dr. Melisa Piliang shpjegon pse lëkura e duarve thahet, çfarë ndryshimesh ndodhin gjatë larjes dhe cilat masa ndihmojnë në ruajtjen e butësisë dhe shëndetit të saj.
Pse thahen duart pas larjes
Irritimi dhe tharja e lëkurës së duarve pas larjes janë problem i shpeshtë. Shkaku më i zakonshëm është largimi i vajrave natyrale dhe lagështisë nga sipërfaqja e lëkurës gjatë procesit të larjes, çka dëmton barrierën e saj mbrojtëse, shkruan Cleveland Clinic.
Në tharjen e lëkurës së duarve ndikojnë disa faktorë:
• Sapuni: Shumica e sapunëve për larjen e duarve janë të formuluar për të larguar papastërtitë, bakteret dhe yndyrën. Edhe pse kjo është e domosdoshme për higjienën, njëkohësisht çon në largimin e lipideve natyrale të lëkurës, duke e bërë atë të thatë dhe më pak elastike. Disa produkte përmbajnë përbërës agresivë, si natrium-lauril-sulfati, që e përkeqësojnë më tej tharjen.
• Temperatura e ujit: Larja e duarve me ujë shumë të ngrohtë ose të nxehtë përshpejton humbjen e lagështisë nga lëkura. Temperatura e lartë mund të dëmtojë barrierën lipidike, shtresën mbrojtëse që ndodhet në sipërfaqe të lëkurës dhe ruan lagështinë. Ndryshe nga kjo, uji i vakët ose i ftohtë ka ndikim shumë më të vogël në dëmtimin e saj.
• Larja e shpeshtë e duarve: Larja e shpeshtë, veçanërisht pa hidratim të mëvonshëm, mund të çojë në tharje kronike. Ky problem është veçanërisht i theksuar te punonjësit shëndetësorë dhe te personat që, për shkak të profesionit, duhet të ruajnë vazhdimisht higjienën e duarve.
• Sëmundjet e lëkurës: Personat me sëmundje të lëkurës, si ekzema ose psoriaza, janë më të prirur ndaj tharjes dhe irritimit të lëkurës së duarve. Tek ata, larja e duarve me sapunë të caktuar ose në temperatura më të larta mund të përkeqësojë simptomat, ndaj shpesh rekomandohet përdorimi i mjeteve të buta për larje dhe preparateve hidratuese të formuluara posaçërisht.
A është dezinfektuesi i duarve më pak agresiv për lëkurën?
Shpesh dëgjohet se dezinfektuesit e duarve janë një alternativë më e butë krahasuar me larjen me sapun dhe ujë. Megjithatë, kjo nuk është plotësisht e saktë.
– Edhe pse përdorimi i tyre nuk nënkupton kontakt me ujë të nxehtë ose sapunë, dezinfektuesit e duarve nuk janë zëvendësim i përshtatshëm për larjen klasike. Për më tepër, për shkak të përmbajtjes së lartë të alkoolit, ata mund ta thajnë dhe irritojnë edhe më shumë lëkurën, shpjegon dr. Piliang, shefe e Departamentit të Dermatologjisë në Cleveland Clinic.
Për të zvogëluar efektet negative të dezinfektuesve dhe për të ruajtur funksionin mbrojtës të lëkurës, rekomandohen këto masa:
• Aplikimi i kremit hidratues pasi dezinfektuesi të jetë tharë plotësisht.
• Kufizimi i përdorimit të dezinfektuesve vetëm në situata kur sapuni dhe uji nuk janë të disponueshëm.
• Larja e duarve me sapun dhe ujë kur ato janë dukshëm të ndotura.
Pesë këshilla për parandalimin dhe kujdesin ndaj lëkurës së thatë të duarve për shkak të larjes së shpeshtë
Lëkura e thatë e duarve është një shqetësim i përditshëm, sidomos kur larja e shpeshtë është e domosdoshme. Megjithatë, ekzistojnë mënyra efektive për të zvogëluar irritimin dhe për të lehtësuar tharjen, pa cenuar higjienën.
Pesë rekomandimet e mëposhtme mund të ndihmojnë në minimizimin e efekteve negative mbi lëkurën.
1. Shmangia e ujit të nxehtë
Edhe pse nuk është e nevojshme përdorimi i ujit të ftohtë, larja e duarve me ujë të nxehtë i than dhe i irriton ato edhe më shumë.
– Përpiquni ta ulni temperaturën e ujit gjatë larjes së duarve, madje edhe gjatë dushit, për të shmangur tharjen dhe irritimin. Uji i nxehtë largon vajrat e shëndetshëm nga lëkura, thekson dr. Piliang.
I njëjti parim vlen edhe për aktivitete të tjera higjienike, si larja e enëve. Ndryshe nga uji i nxehtë, uji i vakët mund të jetë pikërisht ajo që i nevojitet lëkurës për të shmangur tharjen.
2. Zgjedhja e sapunit hidratues
Disa sapunë përmbajnë përbërës hidratues që janë më të butë për lëkurën dhe ndihmojnë në parandalimin e tharjes.
– Është më mirë të përdoret sapun hidratues dhe duart të shpëlahen mirë pas larjes – këshillon dr. Piliang, duke rekomanduar që gjatë zgjedhjes së sapunit të butë të kihet parasysh prania e këtyre përbërësve: gjalpa shea, jojoba, ceramidet, acidi hialuronik.
3. Hidratimi i lëkurës pas larjes
Aplikimi i kremit hidratues menjëherë pas larjes është një nga mënyrat më efektive për ruajtjen e butësisë dhe elasticitetit të lëkurës së duarve.
– Pas larjes rekomandohet përdorimi i losioneve ose kremrave që ndihmojnë në mbajtjen e lagështisë në lëkurë. Duhet t’u jepet përparësi preparateve pa aromë, pasi ka më pak gjasa të shkaktojnë irritim shtesë, rekomandon dr. Piliang.
4. Përdorimi i balsameve ose pomadave
Te personat e prirur ndaj lëkurës shumë të thatë, losionet shpesh nuk janë të mjaftueshme. Në këto raste rekomandohet përdorimi i formulimeve më të trasha, si kremra të pasur, balsame ose pomada. Këto preparate kanë fuqi më të madhe okluzive, përthithen më ngadalë dhe e mbajnë lagështinë më gjatë në lëkurë, duke ndihmuar në rigjenerimin dhe mbrojtjen e saj.
5. Dorëza mbrojtëse dhe kujdes shtesë
Për të zvogëluar ekspozimin e panevojshëm të lëkurës së duarve ndaj ujit dhe mjeteve pastruese, rekomandohet përdorimi i dorëzave mbrojtëse gjatë larjes së enëve ose kryerjes së punëve shtëpiake, sidomos te personat me lëkurë shumë të thatë.
– Për më tepër, përdorimi i lagështuesit të ajrit gjatë natës mund të rrisë lagështinë e ambientit, gjë që ndikon pozitivisht në gjendjen e lëkurës. Kjo qasje ndihmon në ruajtjen e shëndetit të lëkurës së duarve gjatë gjithë ditës dhe e zvogëlon ndjeshmërinë e saj ndaj larjes së shpeshtë, këshillon dr. Piliang.
Tharja e butë e duarve – truku që parandalon tharjen e lëkurës
Mënyra e tharjes së duarve pas larjes mund të ndikojë ndjeshëm në gjendjen e lëkurës. Te shumica e njerëzve, impulsi i parë pas larjes është tharja e plotë e duarve, deri në pikën e fundit të ujit. Por, në fakt, është më mirë të lihen duart paksa të lagështa pas larjes, në mënyrë që lagështia të “mbyllet” në lëkurë para aplikimit të kremit.
– Fërkimi i fortë dhe tharja e plotë e lëkurës kontribuojnë në humbjen e lagështisë së mbetur. Në vend të kësaj, rekomandohet tharja e butë me peshqir, duke e lënë lëkurën pak të lagësht. Kurdo që është e mundur, tharja e duarve në ajër është një avantazh shtesë. Kjo qasje e zvogëlon irritimin mekanik dhe ndihmon në ruajtjen e lagështisë natyrale të lëkurës, thotë dr. Piliang.
Balanci mes higjienës dhe kujdesit për lëkurën
Nuk duhet harruar se larja e rregullt dhe e kujdesshme e duarve mbetet një nga masat më të rëndësishme për mbrojtje nga mikrobet dhe bakteret, si dhe për parandalimin e përhapjes së sëmundjeve. Megjithatë, larja e shpeshtë mund të çojë në tharjen e lëkurës.
Për të ruajtur butësinë e duarve, rekomandohet:
ulja e temperaturës së ujit,
përdorimi i sapunit të butë ose hidratues,
aplikimi i rregullt i një kremi hidratues cilësor
Në rast të tharjes së theksuar, çarjeve ose dhimbjes pas larjes, rekomandohet konsultimi me dermatologun ose një profesionist tjetër shëndetësor. /et
Gjermania u bë blerësi më i madh në botë i kafesë nga Brazili në vitin 2025, duke tejkaluar Shtetet e Bashkuara, të cilat ranë në vendin e dytë pas vendosjes së tarifave të larta të importit.
Gjermania importoi 5.4 milionë qese 60 kilogramëshe kafe braziliane vitin e kaluar, duke përbërë 13.5% të totalit të eksporteve të Brazilit, tha shoqata braziliane e eksportuesve të kafesë Cecafé.
SHBA-të, tradicionalisht klienti më i madh i kafesë në Brazil, ranë në vendin e dytë me importe prej 5.3 milionë qesesh, 33% më pak se një vit më parë.
Cecafé tha se rënia u nxit kryesisht nga tarifat e përkohshme deri në 50% të vendosura nga presidenti i SHBA-së, Donald Trump, shkruajnë mediat e huaja.
Drejtori i Cecafé, Márcio Ferreira, bëri të ditur se dërgesat në SHBA ranë me 55% gjatë periudhës nga fillimi i gushtit deri në fund të nëntorit, kur u vendosën tarifa të larta për të gjitha varietetet e kafesë braziliane.
Trump vendosi tarifat për një gamë të gjerë produktesh ushqimore braziliane në përgjigje të procedurave penale kundër ish-presidentit brazilian Jair Bolsonaro, një aleat politik i presidentit amerikan.
Bolsonaro është dënuar që atëherë dhe po vuan një dënim me burg prej më shumë se 27 vitesh për përpjekje për grusht shteti.
Ndërsa çmimet e ushqimeve në SHBA u rritën, Trump i tërhoqi kryesisht tarifat në nëntor.
Brazili thuhet se eksportoi gjithsej 40 milionë qese kafeje vitin e kaluar, rreth 20% më pak se një vit më parë.
Pavarësisht vëllimit më të ulët, të ardhurat nga eksporti u rritën me 24% në një rekord prej 15.5 miliardë dollarësh.
Ferreira tha se dërgesat më të dobëta pasqyruan gjithashtu rezerva më të ulëta pas eksporteve rekord një vit më parë dhe humbjeve të lidhura me motin, duke shtuar se çmimet më të forta globale e kompensuan më shumë se rënien.
Brazili është i vetmi vend prodhues që eksporton kafe në më shumë se 120 vende dhe përbën mbi një të tretën e tregut global.
Pas Gjermanisë dhe SHBA-së, blerësit kryesorë përfshijnë Italinë, Japoninë dhe Belgjikën. /et
Kompania e njohur e aseteve digjitale, Strategy, ka blerë mbi dy miliardë dollarë Bitcoin, duke befasuar tregun, megjithëse çmimi i kriptomonedhës ka rënë ndjeshëm gjatë vitit të fundit.
Sipas CEO-së, Michael Saylor, blerja e re është pjesë e strategjisë afatgjatë të kompanisë për të rritur zotërimet e saj në Bitcoin.
Aktualisht, Strategy zotëron rreth 709 mijë Bitcoin, që përfaqëson rreth 3 për qind të furnizimit global – shumë më tepër se çdo kompani tjetër publike.
Analistët vlerësojnë se kompania po shfrytëzon rënien e tregut dhe pritshmëritë për miratimin e Clarity Act, një ligj kyç për kriptovalutat, që mund të favorizojë investimet në këtë hapësirë.
“Strategy është oportunist në blerjet e tij, duke përfituar nga mundësitë kur çmimet bien”, tha analisti Mark Palmer.
Kjo lëvizje tregon një dallim të madh mes Strategy dhe konkurrentëve të saj, si Mara Holdings dhe Bitmine, të cilët zotërojnë shumë më pak kriptovaluta.
Ekspertët e tregut parashikojnë se pozicioni i fortë i Strategy mund t’i japë avantazh gjatë periudhave të vështira të tregut. /et
Juventus do të luajë kundër Napolit të dielën në orën 18:00, në një ndeshje e cila është e vlefshme për javën e 22-të të Seria A. Ashtu siç e do tradita, para dueleve të dy trajnerët si Luciano Spalleti po ashtu edhe Antonio Conte japin konferencat e tyre për shtyp, gjë e cila nuk ndodhi.
Nga deklaratat e dhëna prej të dyja palëve, trajnerët tregojnë gjendjen në të cilën ndodhet skuadra si dhe pritshmëritë përballë rivalëe. Një detaj i cili do të mungojë për duelin e së dielës pasi të 2 kanë zgjedhur heshtjen.
Një heshjte e cila jep dhe “ankth” pasi dihet se Sfida mes Juventus dhe Napolit është një garë mes vendit të 3-të dhe atij të 5-të. Por më shumë se gjendjes aktuale ka dhe shije “nostalgjike” pasi Conte rikthehet përballë klubit ku ka qenë lojtar dhe trajner fitues titujsh, ndërsa Spalletti vjen si ish-fitues i Scudettos me Napolin.
Nga ana tjetër, Spalletti ishte parashikuar të dilte para gazetarëve rreth orës 16:00 sipas kohës lokale të premten, por konferenca e tij për shtyp u anulua rreth dy orë para se të niste.
Sipas medias “La Gazzetta dello Sport”, kjo nuk është hera e parë këtë sezon që Conte apo Spalletti shmangin konferencat për shtyp, por rasti i kësaj ndeshjeje konsiderohet veçanërisht i çuditshëm, duke marrë parasysh rëndësinë dhe konkurrencën e “frikshme” mes 2 ekipeve./et
Flota amerikane po i afrohet Gjirit Persik dhe po shtohen diskutimet për një përshkallëzim ushtarak kundër Iranit. Presidenti amerikan Donald Trump ka dhënë sinjale të paqarta, duke thënë vetëm se “do të shohim nëse do të na duhet ta përdorim”.
Trump është i kujdesshëm ndaj ndryshimit të regjimeve, duke iu referuar përvojave të kaluara të SHBA-ve. Ai ka kujtuar rastin e Irakut në vitin 2003, kur u rrëzua regjimi, por më pas u shfaq ISIS.
Sipas tij, një skenar i ngjashëm në Iran do të ishte një gabim i madh. Për këtë arsye, pavarësisht presionit nga disa media amerikane, Trump ende nuk ka marrë një vendim përfundimtar.
Ndërkohë, në Lindjen e Mesme po ndodhin ndryshime të mëdha. SHBA-të kanë ulur rolin e Izraelit dhe kanë lënë më shumë hapësirë për Arabinë Saudite dhe Turqinë.
Turqia dhe Arabia Saudite e kanë shfrytëzuar këtë situatë. Në Siri, forcat kurde janë dobësuar dhe kanë humbur territore. Qeveria siriane ka rimarrë kontrollin e shumicës së vendit.
Në rajonin e Gjirit, Emiratet e Bashkuara Arabe kanë humbur ndikim. Arabia Saudite ka larguar forcat emiratase nga Jemeni dhe nga disa territore të tjera.
Edhe në Sudan dhe Libi, aleatët e Emirateve janë nën presion.
Në tërësi, ndikimi i Iranit në rajon është dobësuar ndjeshëm, ndërsa po formohet një bosht i ri mes Turqisë, Arabisë Saudite, Egjiptit dhe Sirisë. Këto zhvillime nuk përkojnë me interesat e Izraelit.
Kryetari i Këshillit Kombëtar Shqiptar, Enkel Rexhepi, njoftoi se ka marrë sot një ftesë nga gjykata lidhur me vendosjen e flamurit kombëtar shqiptar në institucionin zyrtar të shqiptarëve në Luginën e Preshevës.
Në një postim në rrjetin social Facebook, Rexhepi theksoi se kjo është një dëshmi e presionit institucional ndaj shqiptarëve në Preshevë.
“Flamuri trajtohet si shkelje, ndërsa diskriminimi si politikë shtetërore. Nuk do të tërhiqemi. Dinjiteti nuk gjykohet”, shkruan ai.
Rexhepi riafirmoi vendosmërinë për të mbrojtur të drejtat dhe dinjitetin e komunitetit shqiptar në rajon, pavarësisht sfidave institucionale./et
Login
