Detajet të reja në lidhje për arratisjen e të dënuarit Altin Ndoci nga Spitali i Durrësit ku kishte shkuar për ndihmë mjekësore.

Sipas grupit hetimor besohet se Ndoci fshihet në Tiranë, ndërsa ai u prit nga një person me automjetin tip “Audi” jashtë ambienteve të spitalit.

Kjo pasi, makina me të cilin udhëtonin dy personat është parë nga kamerat e sigurisë në autostradën Tiranë-Durrës, duke kaluar Vorën.

Policia e Durrësit është njoftuar me vonesë për ngjarjen, duke ngritur dyshime se mund të ketë persona të implikuar në radhët e punonjësve të Burgjeve./mxh

Shqipëria është vendi i parë në Rajon, i pesti në Europë dhe i shtati në botë për çmimin më të lartë të naftës.

Në pikat e karburanteve një litër naftë kushton mesatarisht 170 lekë, me kursin aktual të këmbimit 2.09 dollarë.

Në Ballkanin Perëndimor, në vendin e dytë renditet Serbia me një litër naftë që shitet për rreth 1.92 dollarë në pikat e karburanteve. Krahasuar me Bosnje-Hercegovinën, Maqedoninë e Veriut apo Kosovën, lënda djegëse në Shqipëri kushton gati 2-fish më shumë.

“Krahasuar me Kosovën, Maqedoninë apo Malin e Zi ka shumë diferencë. Jemi shumë më të shtrenjtë”, janë shprehur disa drejtues automjetesh.

Në Evropë, çmim më të shtrenjtë të naftës e ka Zvicra, Lihtenshtejni, Danimarka dhe Islanda. Shqipëria, e renditur e pesta ndërkohë le pas shtete si Irlanda apo Monako e njerëzve më të pasur të botës. Në botë është Hong-Kongu shteti me çmimin më të lartë për një litër naftë, mbi 3.56 dollarë.

“Na ka ikur truri. Janë rritur çmimet. Nuk është e këndshme po… Shumë të shtrenjta në krahasim me rrogat që marrim”, thanë disa drejtues automjetesh.

Çdo litër naftë që shitet në pikat e karburanteve është e përbërë nga çmimi me të cilin lënda djegëse blihet në bursa dhe taksat e tarifat që aplikohen nga qeveria. Në bursë, çmimi i naftës së papërpunuar ka rënë në 689 dollarë për ton, nga 750 që ishte një muaj më parë. Po ashtu, dollari vijon të zhvlerësohet. Çmimet e karburanteve rrjedhimisht do duhej të ishin më të lira.

“I bëjmë thirrje kryeministrit të hapi rafineritë që të ulet çmimi. Janë çmimet më të larta në vitet e fundit”, u shprehën disa drejtues automjetesh, përcjell A2 CNN.

Shqipëria importoi vitin e shkuar më shumë karburant se kurrë më parë. Të dhënat nga Ministria e Financave tregojnë se në harkun e muajve janar-nëntor u blenë nga jashtë mbi 671 mijë tonë karburant./mxh

Erëra të forta, borë dhe temperatura të ulëta kanë goditur pjesë të mëdha të Europës Perëndimore pas mbërritjes së Stuhisë Goretti. Ekspertët e motit dhanë paralajmërime serioze në disa vende.

Në Anglinë Jugperëndimore, zyrtarët dhanë një paralajmërim të rrallë për erën, me shpejtësi deri në 160 kilometra në orë dhe kushte të rrezikshme pranë detit.

Në Francë, erërat e forta shkaktuan ndërprerje të energjisë elektrike dhe shumë shtëpi humbën energjinë elektrike.

Në Gjermaninë veriore, bora e madhe dhe era shkaktuan probleme të mëdha. Disa zona kishin deri në 20 centimetra borë, gjë që pezulloi mësimin në shkolla.

Autoritetet u kërkuan njerëzve të shmangnin udhëtimet sepse rrugët dhe shtigjet u bënë të pasigurta. Punëtorët përdorën shumë borëpastruese dhe shpërndanë kripë për t’i bërë rrugët më të sigurta.

Shërbimet hekurudhore në Gjermaninë veriore operonin më rrallë dhe aeroportet paralajmëruan për vonesa dhe anulime./mxh

Pavlin Preka ishte 19-vjeç kur u vra në banesën e tij, më 26 Shkurt 2025, në fshatin Guci e Re në Shkodër.

Ai ishte i dashuruar marrëzisht pas një vajze, 13-vjeç për të cilën kërkonte miratimin e familjes së saj që të martoheshin.

Këtë të martë u zbuluan detaje nga emisioni “Në Shënjestër” nga dosja hetimore ku sipas informacioneve nga njerëzit e afërt të viktimës, gjatë kontrollit të parë në vendngjarje, në afërsi të trupit të viktimës, u gjendën 6 gëzhoja arme zjarri pistoletë model 9 mm.

Nga këqyrja e parë e vendit të ngjarjes, 19-vjeçari ishte qëlluar me disa plumbe pistolete nga afër, më të hyrë në banesën e tij. Gjë që la të kuptohet nga ekspertët kriminalistë, se ai ishte ruajtur deri në mbërritjen e tij në banesë. Ose dikush kishte informuar me saktësi qitësi për lëvizjet e viktimës dhe faktin që ai kishte marrë rrugën për në shtëpinë e tij. Por për grupin hetues vrasja e këtij të riu kishte një motiv të paqartë.

Kjo për faktin se ai nuk ishte skeduar dhe nuk kishte një të shkuar apo të tashme kriminale. Madje nuk njihej në zonë as si kontingjent që merrej me kultivimin e lëndëve narkotike. I pari që u pyet në lidhje me krimin ishte xhaxhai i viktimës.

Nikollë Preka, i cili kishte banesën ngjitur me atë të vëllait të tij, ku aktualisht jetonte Pavlini. Aty ku ndërsa dëgjoi krismat, vrapoi i pari për të parë se çfarë kishte ndodhur. Dhe ku gjeti të vrarë në pragun e derës, nipin e tij.

“Familjarët e Pavlinit jetojnë në fshatin Gjuraj-Plan, në njësinë Administrative Pult, Bashkia Shkodër. Unë e kam ngjitur banesën me atë të Pavlinit. Kur shkova për të parë se kush është në banesë, unë pashë që dera ishte hapur. Aty pashë Pavlinin të shtrirë në tokë”, ka deklaruar në polici xhaxhai i viktimës.
Por edhe pse iu kërkua të hiqte dorë nga vajza që dashuronte, Pavlin Preka nga sa kuptohet, jo vetëm nuk e bëri një gjë të tillë, por kishte ndërtuar në kokë edhe plane se si ta bënte të vetën përgjithmonë. Kjo edhe kundra dëshirës së familjes së saj.

Ndoshta me bindjen se koha do të ishte ilaçi më i mirë dhe situatat do të vinin dhe do të normalizoheshin, pasi ai ta kishte bërë fakt të kryer lidhjen e tij me vajzën.

Por aq shumë ishte fiksuar Pavlini pas kësaj vajze, sa kishte shkuar deri aty sa të bënte tatuazh edhe emrin e saj në qafë. Gjë që e dinin edhe shokët e tij. Midis tyre edhe kushërinjtë e vajzës, me të cilët ai shoqërohej.

“Nga ajo që unë di është se Pavlini ka dashur një vajzë, me emrin ‘A*****’, të cilës nuk ia di mbiemrin, por që Pavlini ia kishte bërë emrin tatuazh në qafë. Mesa mbaj mend, Pavlini më kishte thënë se këtë vajzë e kishte parë në Dukagjin, kjo pasi edhe familja e tij ka një shtëpi atje, por jetojnë në Shkodër. Pavlini më ka thënë gjithashtu se kësaj vajze i ka kërkuar dorën te shtëpia e saj, por nuk ia kanë dhënë. Ajo që dua të them është se një ditë bashkë me Pavlinin dhe një shokun e tij që e thërrasin Flori, por që mbiemrin nuk ia mbaj mend, ishim te një shtëpi që familja ime ka në fshatin Gimaj në Dukagjin. Gjatë kohës që ishim aty Pavlini më tha ‘Ma lër këtë shtëpinë 2-3 ditë pasi do ta marr atë vajzën, dhe të vi të rri te shtëpia jote’. Por unë ia preva shkurt dhe i thashë që nuk ta lë”, -thuhet në dëshminë nga Edilion Tërthorja.
Por çmenduria e Pavlinit, nuk kishte ndërmend të ndalej këtu. Pasi siç thotë një nga shokët me të cilët ai shoqërohej, ai po kërkonte një banesë ku të qëndronte me vajzën, pasi ta kishte rrëmbyer. Dhe këtë plan nuk e kishte aspak sekret. Por e shprehte edhe në prani të kushërinjve të vajzës, me të cilët ndante përditshmërinë./mxh

Deputeti i Partisë Demokratike, Belind Këlliçi ka folur për thirrjen e tij në SPAK. I ftuar në emisionin A Krasta Show , Këlliçi është shprehur se pasi i janë futur hetimit të ekonomisë familjare të Berishës, kanë përfunduar duke hetuar financimin e Kuvendit të Rithemelimit.

Sipas Këlliçit thirrja e tij në SPAK është periferike dhe s’ka asnjë vlerë. Deputeti deklaroi se për të hequr vëmendjen nga Rama u krijua një lajm që ishte flluskë sapuni.

“Portalet e financuar nga mazhoranca e kanë mbajtur për 24 orë. Kanë hetuar Berishën për veprimatrinë ekonomike familjare, kanë përfunduar duke hetuar për financimin e kuvendit të Rithemelimit, kuvendit që shpëtoi opozitën.
Kemi proceduar me procedura ligjore. Është dëshpërimi për të bërë pis opozitën dhe PD. Nuk më shqetëson është perfierike ska asnjë vlerë.
Për të hequr vëmendjen nga Rama u krijua një lajm që ishte një flluskë sapuni”, tha Këlliçi./mxh

Gazetari Artan Hoxha ka folur për arratisjen e Altin Ndocit. I ftuar në emisionin “Now” me Erla Mëhillin gazetari ka deklaruar se sistemi është i kalbur.

Ai theksoi se kjo ngjarje nuk është e rastësishme e ka studiuar mirë dhe ka ruajtur momentin. Ai nënvizoi se Altin Ndoci duke qenë një person me rrezikshmëri të lartë nuk duhet të ishte në burgun e Durrësit.

Hoxha nuk kurseu as ironitë duke thënë se Ilir Metës i heqin tavolinën e ping pongut ndërsa të rrezikshmit i lënë në atë burg.

“Në atë ambient ka qenë dikush tjetër. Nga 5 policië dy kanë ikur te burgu kanë çuar personin tjetër.
Ai ka goditur një nga policët dhe ia ka futur vrapit ka dalë në oborr. Polici kur ka qëlluar ka bërë rikoshet dhe ka rrezikuar persona të tjerë aty. Ai është përplasur te shkallët e hyrjes së infektivit. Siguria sigurohet nga policia e burgjeve. Kjo nuk është një ngjarje e rastësishme, ai e ka studiuar dhe ka ruajtur momentin. Ne kemi një sistem të kalbur sigurie. Nuk është më problemi e ka fajin polici. Sistemi është i kalbur. Nuk duhet të ishte në atë burg. Ai nuk ka siguri për atë person. I heqim Ilir Metës tavolinën e ping pongut dhe lëmë këta i mbajmë te burgu i Durrësit”, tha Hoxha./mxh

Një e katërta e vendeve në botën në zhvillim janë më të varfra se sa ishin në vitin 2019, para pandemisë së Covid-it, ka zbuluar Banka Botërore.

Organizata me seli në Washington tha se një grup i madh vendesh me të ardhura të ulëta, shumë prej tyre në Afrikën Sub-Sahariane, kanë pësuar një tronditje negative gjatë gjashtë viteve deri në fund të vitit të kaluar.

The Guardian shkruan Banka tha se rritja globale ka “ngadalësuar” që prej pandemisë, dhe ritmi aktual është “i pamjaftueshëm për të ulur varfërinë ekstreme dhe për të krijuar vende pune aty ku nevoja është më e madhe”.

Rritja ekonomike në tregjet në zhvillim dhe ekonomitë në zhvillim pritet të ngadalësohet nga 4.2% vitin e kaluar në 4% vitin e ardhshëm, sipas raportit.

Banka tha se rritja ekonomike globale po rezulton “më e qëndrueshme se sa pritej”, veçanërisht pas performancës më të mirë se parashikimet e ekonomisë amerikane vitin e kaluar, por progresi pritet të jetë i kufizuar në vitin 2026, ndërsa ekonomitë e zhvilluara dhe ato në zhvillim po hasin vështirësi.

Ekonomia e SHBA-ve vlerësohet të ketë shënuar rritje prej 2.1% në vitin 2025 dhe 2.2% në vitin 2026, pas përmirësimeve prej 0.7 dhe 0.6 pikë përqindje nga parashikimi i fundit i bankës në qershor. Studimi i bankës tregoi se zona e euros mbeti prapa, me rritje vetëm 0.9% në 2025 dhe në rrugë për të arritur 1.2% në 2026.

Rritja globale pritet të mbetet kryesisht e qëndrueshme gjatë dy viteve të ardhshme, duke u ulur nga 2.7% në vitin 2025 në 2.6% në vitin 2026, përpara se të rikthehet në 2.7% në vitin 2027, një rishikim i lehtë në rritje krahasuar me parashikimin e qershorit.

Shumë prej një në katër vendet në zhvillim, ku të ardhurat mesatare janë më të ulëta se në vitin 2019, kanë përjetuar luftëra dhe uria, tha raporti, gjë që ka vonuar rimëkëmbjen e tyre nga pandemia. Rritjet e fundit ekonomike nuk kanë qenë të mjaftueshme për të kompensuar rënien e mëparshme.

Indermit Gill, kryeekonomisti i Bankës, tha: “Këto trende nuk mund të shpjegohen vetëm me fatkeqësi. Në shumë vende në zhvillim, ato pasqyrojnë gabime të shmangshme në politika.”

Gill tha se vendet në zhvillim duhet të ndjekin rregulla strikte buxhetore për të siguruar bazën e rritjes së qëndrueshme. Ai shtoi se formula është e ngjashme për të gjitha vendet që duan të rriten më shpejt.

“Për të shmangur stanjacionin dhe papunësinë, qeveritë në ekonomitë në zhvillim dhe ato të avancuara duhet të liberalizojnë fuqishëm investimet private dhe tregtinë, të kufizojnë konsumin publik dhe të investojnë në teknologji të reja dhe arsim,” tha ai.

Gill theksoi se ekonomia globale ka treguar qëndrueshmëri, por nuk ka arritur të nxisë rritjen në nivele që do të krijonin vende pune për të rinjtë, veçanërisht për 1.2 miliardë nën moshën 16 vjeç që pritet të hyjnë në tregun e punës në dekadën e ardhshme.

“Me çdo vit që kalon, ekonomia globale është bërë më pak e aftë për të gjeneruar rritje dhe duket më e qëndrueshme ndaj pasigurive politike. Por dinamizmi ekonomik dhe qëndrueshmëria nuk mund të ndahen për shumë gjatë pa dëmtuar financat publike dhe tregjet e kreditit. Në vitet e ardhshme, ekonomia botërore pritet të rritet më ngadalë se në vitet e vështira ’90, ndërsa mban nivele rekord të borxhit publik dhe privat.”, shtoi Gill.

Banka Botërore pret që Kina të rritet me 4.4% këtë vit dhe 4.2% vitin e ardhshëm. Këto shifra përfaqësojnë një përmirësim krahasuar me vlerësimin e qershorit të vitit të kaluar, por gjithsesi mbeten rritjet më të ulëta në 35 vite dhe nën objektivin e Partisë Komuniste prej 5%.

Pekini është nën presion që nga pranvera e kaluar, kur Donald Trump rriti tarifat mbi importet kineze. Kina gjithashtu po përballet me sfidën e plakjes së shpejtë të popullsisë dhe pasojat e bumit spekulativ të tregut të pasurive të paluajtshme.

Banka tha se Kina rezultoi më e fortë se sa pritej, pasi shpenzimet e mëdha të qeverisë rritën konsumin e brendshëm dhe shitjet e eksporteve u mbështetën nga ridrejtimi i mallrave drejt tregjeve jo-amerikane./mxh

Një grup vendesh europiane kanë thirrur ambasadorët iranianë për të dënuar dhunën e shtetit ndaj protestave që vazhdojnë në Iran.

Franca thirri sot ambasadorin iranian në Paris për të dënuar, sipas ministrit të Jashtëm Jean-Noël Barrot, “dhunën shtetërore që është ushtruar pa dallim ndaj protestuesve paqësorë”.

Për Barrot, shtypja e protestave që tronditën Iranin nga 28 dhjetori 2025 është “e papranueshme, e padurueshme dhe çnjerëzore”.

“Ky dënim është komunikuar tashmë ministrit iranian të Jashtëm dhe do ta përsëris tek ambasadori iranian në Francë, të cilin e thirra sot”, deklaroi ai, duke shtuar se “nuk mund të ketë pandëshkueshmëri për ata që drejtojnë armët kundër protestuesve paqësorë”.

Edhe vende të tjera europiane, përfshirë Spanjën, Holandën, Finlandën, Portugalin dhe Belgjikën, njoftuan sot se ministritë e tyre të Jashtme kanë thirrur përfaqësuesit e Republikës Islamike të Iranit për të shprehur shqetësimin mbi dhunën kundër protestuesve.

Gjermania publikoi në X: “Veprimet barbare të regjimit iranian kundër popullit të tij janë tronditëse. Ne i bëjmë thirrje Iranit të ndalojë dhunën ndaj qytetarëve dhe të respektojë të drejtat e tyre. Ambasadori iranian u thirr sot në Ministrinë e Jashtme.”

Edhe ministri i Jashtëm i Italisë, Antonio Tajani, deklaroi se ka thirrur ambasadorin iranian, sipas agjencisë Reuters.

Portugalia gjithashtu thirri sot ambasadorin iranian në Lisbonë për t’i bërë të ditur “dënimin e ashpër” ndaj “shtypjes së dhunshme të protestave” kundër regjimit të Teheranit.

“Po ashtu, në kuadër të koordinimit europian, Portugalia është gati të rrisë sanksionet ndaj Iranit”, njoftoi ministria e Jashtme në llogarinë e saj në X. Lisbonë kërkoi gjithashtu që të respektohen të drejtat e qytetarëve iranianë.

Ministri i Jashtëm Paulo Rangel tha se ka thirrur përfaqësuesin e diplomacisë iraniane “për t’i komunikuar me zë të fortë dënimin e ashpër, i përsëritur në ditët e fundit, për shtypjen e dhunshme të protestave”.

Ministrja e Jashtme e Britanisë, Yvette Cooper, kritikoi sot udhëheqjen e Iranit për “vrasjet e tmerrshme dhe të dhunshme” të protestuesve, duke thënë se Britania ka thirrur ambasadorin iranian për të theksuar seriozitetin e situatës.

“Mbretëria e Bashkuar dënon me fuqinë më të madhe vrasjet e tmerrshme të protestuesve iranianë dhe kërkon nga autoritetet iraniane të respektojnë të drejtat dhe liritë themelore të qytetarëve të tyre”, deklaroi Cooper në Dhomën e Komunave.

Ajo shtoi se nënsekretari i Jashtëm për Lindjen e Mesme ka thirrur ambasadorin iranian në Mbretërinë e Bashkuar për të theksuar “seriozitetin e këtyre çasteve dhe për të kërkuar që Irani të përgjigjet ndaj raporteve të tmerrshme që marrim”, të cilat flasin për “mijëra vdekje”.

Cooper u tha ligjvënësve se Britania do të paraqesë një projektligj për zbatimin e sanksioneve të reja dhe masave sektoriale kundër Iranit./mxh

E mbani mend aktorin e vogël dhe të lezetshëm në serialin Aşk-ı Memnu i njohur në rolin e tij si Bulenti e më pas si Dündar Bey në serialin historik të suksesshëm Ertuğrul, sot pas kaq shumë vitesh Batuhan Karacakaya duket krejt ndryshe dhe më i rritur se kurrë.

28-vjeçari po jeton një histori të bukur dashurie me partneren e tij, Sinem Akar një studente 22-vjeçare e cila është rritur larg kamerave dhe famës.

Së fundmi Batuhan Karacakaya e ka surprizuar atë me një festë romantike për ditëlindjen e saj./MXH

Prokurorët e Koresë së Jugut kanë kërkuar dënimin me vdekje për ish-presidentin Yoon Suk Yeol, i cili është në gjyq për kryengritje mbi shpalljen e gjendjes së jashtëzakonshme në vitin 2024, në një përpjekje të dyshuar për të qëndruar në pushtet.

Në argumentet përmbyllëse në Gjykatën e Qarkut Qendror të Seulit të martën, prokurori special e përshkroi Yoon, 65 vjeç, si “udhëheqësin e një kryengritjeje”, duke përmendur një hetim që thuhet se gjeti prova se ai kishte hartuar një skemë, që daton që nga viti 2023, për të marrë kontrollin e funksioneve shtetërore.

Yoon i ka mohuar akuzat, duke këmbëngulur se ishte brenda kompetencave të tij si president për të shpallur gjendjen ushtarake, duke përmendur një bllokim legjislativ dhe një “rebelim” të supozuar që po komplotohej nga forcat pro-Penianit brenda opozitës politike.

Ligji i emergjencës ushtarake i shpallur në dhjetor 2024 shkaktoi protesta të menjëhershme publike dhe u rrëzua nga parlamenti brenda një dite.

Deklarata surprizë – përdorimi i parë i ligjit ushtarak në Korenë e Jugut që nga viti 1980 – e zhyti vendin në një krizë kushtetuese, pasi qindra trupa të armatosura u mobilizuan për një kohë të shkurtër dhe u dërguan në institucionet kryesore shtetërore, përfshirë Asamblenë Kombëtare, me sa duket për të paracaktuar autoritetin parlamentar dhe për të bllokuar mbledhjen e ligjvënësve. Kundërshtarët e denoncuan dekretin si një tejkalim të rrezikshëm të pushtetit ekzekutiv dhe Asambleja Kombëtare votoi shpejt unanimisht për të rrëzuar urdhrin, duke e detyruar Yoon ta hiqte atë pas afërsisht gjashtë orësh.

Ky veprim shkaktoi protesta të mëdha dhe thirrje për dorëheqje nga udhëheqësit e opozitës, si dhe kaos politik që përfundimisht kulmoi me një fushatë të suksesshme shkarkimi më vonë atë muaj./mxh

Interi nuk do të ketë në dispozicion Hakan Çalhanoglu për të paktën katër ndeshjet e ardhshme.

Mesfushori turk u zëvendësua në minutën e 87-të të sfidës kundër Napolit për shkak të një shqetësimi në pulpën e majtë.

Vizitat mjekësore të kryera përjashtuan dëmtime serioze. Megjithatë, stafi mjekësor ka rekomanduar kujdes maksimal dhe pushim të detyruar.

Çalhanoglu nuk do të aktivizohet ndaj Lecces, Udineses dhe Arsenalit. Gjendja e tij do të rivlerësohet në ditët në vijim.

Rikthimi më i mundshëm pritet në fund të janarit. Alternativë mbetet edhe ndeshja e fillimit të shkurtit./mxh

Ambasada e Shteteve të Bashkuara në Prishtinë bëri të ditur se është e gatshme të forcojë partneritetin me Qeverinë e ardhshme të Kosovës dhe të rifillojë Dialogun Strategjik mes dy vendeve.Megjithatë, në një përgjigje për Radion Evropa e Lirë, Ambasada theksoi se realizimi i këtij synimi do të kërkojë veprime nga Qeveria e Kosovës, të cilat “çojnë përpara agjendën e përbashkët për paqe dhe stabilitet rajonal”, si dhe “prosperitetin e ndërsjellë ekonomik”.

Këto qëndrime u shprehën në përgjigje të pyetjes se si Shtetet e Bashkuara planifikojnë bashkëpunimin me Qeverinë e ardhshme të Kosovës, që pritet të formohet pas zgjedhjeve të parakohshme parlamentare të 28 dhjetorit.

Në këto zgjedhje, Lëvizja Vetëvendosje e kryeministrit në detyrë, Albin Kurti, fitoi mbi 51 për qind të votave.Partia deklaroi se synon formimin e shpejtë të institucioneve të reja.Numërimi i votave përfundoi më 9 janar, por procesi zgjedhor ende nuk është mbyllur zyrtarisht, për shkak të afateve ligjore për ankesa dhe certifikimin e rezultateve.Kurti dhe Lëvizja Vetëvendosje kanë udhëhequr Qeverinë e Kosovës edhe gjatë periudhës 2021-2025.

Viti i kaluar ka shkuar kryesisht me Qeveri në detyrë, pasi Kurti – ndonëse i ka fituar zgjedhjet e 9 shkurtit 2025 – nuk ka arritur të formojë Qeverinë e re, çfarë ka çuar në shpërndarjen e Kuvendit dhe zgjedhje të parakohshme.

Gjatë mandatit të mëparshëm, Qeveria e tij është përballur shpesh me kritika nga partnerët ndërkombëtarë, veçanërisht për shkak të veprimeve që janë cilësuar si të pakoordinuara dhe të njëanshme.

Nga mbyllja e shumicës së institucioneve serbe në Kosovë deri te heqja e dinarit serb nga përdorimi, këto veprime janë parë si të dëmshme për komunitetin serb dhe si faktor që ka rritur tensionet në veri të vendit.Kritikat kanë shkuar deri në atë pikë sa është folur edhe për lëkundje të marrëdhënieve ndërmjet Kosovës dhe Shteteve të Bashkuara.

Megjithatë, Kurti ka insistuar vazhdimisht se SHBA-ja mbetet partneri kryesor i Kosovës, ndonëse ka pranuar se ekzistojnë dallime në qasje për disa çështje.

Vitin e kaluar, Shtetet e Bashkuara kanë marrë një nga masat më të ashpra ndaj Kosovës, duke pezulluar Dialogun Strategjik mes dy vendeve – një mekanizëm i krijuar për thellimin e marrëdhënieve dypalëshe.

Uashingtoni e ka lidhur këtë vendim me veprimet e Qeverisë në detyrë të Kosovës, derisa vendi është përballur me bllokadë institucionale, dhe me rritjen e tensioneve, por Qeveria e Kosovës i ka hedhur poshtë kritikat./mxh

Hormonet, gjenetika dhe ndjeshmëria e veçantë e skalpit ballor luajnë rol kyç në këtë proces

Rënia e flokëve është një shqetësim i shpeshtë si te meshkujt ashtu edhe te gratë, por ajo që bie më shumë në sy është fakti se te shumë persona flokët fillojnë të rrallohen pikërisht në pjesën e përparme të kokës, përgjatë vijës së ballit. Studimet shkencore tregojnë se kjo nuk ndodh rastësisht, por si rezultat i një kombinimi faktorësh biologjikë dhe hormonalë.

Hormonet dhe roli i DHT-së

Sipas American Academy of Dermatology, shkaku kryesor i rënies së flokëve në pjesën e përparme është ndjeshmëria e folikulave ndaj dihidrotestosteronit (DHT), një derivat i testosteronit. Ky hormon shkurton ciklin e rritjes së flokut, zvogëlon gradualisht folikulën dhe çon në prodhimin e flokëve gjithnjë e më të hollë, derisa rritja ndalon plotësisht. Ky proces njihet si alopecia androgjenetike, forma më e zakonshme e rënies së flokëve.

Pse preket më shumë zona ballore?

Studime të publikuara në Journal of Investigative Dermatology tregojnë se zona e përparme dhe ajo e sipërme e kokës kanë densitet më të lartë receptorësh për androgjenë dhe ndjeshmëri gjenetike më të madhe ndaj DHT-së. Në të kundërt, pjesa e pasme e kokës zakonisht ruan flokët, sepse folikulat aty janë më rezistente, fakt që shfrytëzohet edhe në transplantet e flokëve.

Qarkullimi i gjakut dhe inflamacioni i heshtur

Sipas British Journal of Dermatology, në zonën ballore shpesh vërehet qarkullim më i dobët mikrovaskular dhe prani e inflamacionit kronik të lehtë. Këta faktorë përkeqësojnë furnizimin e folikulës me oksigjen dhe lëndë ushqyese, duke e përshpejtuar rënien e flokëve.

Stresi – një përshpejtues i nënvlerësuar

Hulumtimet tregojnë se kortizoli, hormoni i stresit, ndikon drejtpërdrejt në ciklin e rritjes së flokëve. Zona ballore, për shkak të ndjeshmërisë së saj hormonale, reagon më shpejt ndaj stresit kronik, duke e bërë rënien e flokëve më të dukshme pikërisht aty.

Faktorë shtesë, veçanërisht te gratë

Sipas Endocrine Reviews, te gratë rënia e flokëve në pjesën e përparme shpesh lidhet edhe me çrregullime të tiroides, sindromën e vezoreve policistike (PCOS), mungesë hekuri dhe ferritine, mungesë të vitaminës D, si dhe ndryshime hormonale pas lindjes ose gjatë menopauzës. Në këto raste, rënia mund të jetë më difuze, por zakonisht fillon nga vija e ballit.

Çfarë ndihmon vërtet dhe çfarë është mit?

Ekspertët theksojnë se rënia e flokëve në pjesën e përparme nuk është vetëm çështje estetike, por një proces biologjik që kërkon qasje të bazuar në prova shkencore.

 Çfarë funksionon realisht

• Diagnostikimi i hershëm dermatologjik
• Trajtimet e provuara klinikisht, si minoksidili topikal, sipas rekomandimit mjekësor
• Balancimi hormonal në rastet me çrregullime të dokumentuara
• Korrigjimi i mungesave ushqyese (hekuri, ferritina, vitamina D)
• Menaxhimi i stresit kronik dhe përmirësimi i stilit të jetesës

 Çfarë nuk ka bazë shkencore

• Vajrat apo preparatet “mrekulli” që premtojnë ndalje të plotë të rënies hormonale
• Shampot që pretendojnë rigjenerim të folikulave të vdekura
• Masazhet që supozohet se neutralizojnë efektin e DHT-së
• Suplementet e përdorura pa analiza paraprake dhe pa indikacion mjekësor

Ekspertët sqarojnë se asnjë trajtim kozmetik nuk mund ta ndalë plotësisht rënien hormonale të flokëve, por ndërhyrja e hershme dhe e saktë mund ta ngadalësojë ndjeshëm procesin dhe të ruajë flokët ekzistues.

Shënim editorial

Ky artikull ka karakter informues dhe nuk zëvendëson këshillën mjekësore. Për vlerësim dhe trajtim të personalizuar, rekomandohet konsultë me dermatolog ose mjek specialist. /ET

Shelby ka zbuluar Super Snake të vitit 2026 – Mustang-u më i fuqishëm në linjën e tij.

Bazuar në platformën aktuale Mustang S650, Super Snake prodhon mbi 830 kuaj fuqi nga motori i tij V8 5.0 litra me sistemin opsional të superkompresorit.

Prodhimi standard i Super Snake mbetet i pandryshuar nga një Mustang GT standard me 480 kuaj fuqi.

Super Snake gjithashtu vjen me një sistem ftohjeje të përmirësuar, një sistem shkarkimi Borla, sistem pezullimi Shelby dhe frena Shelby të përmirësuara.

Super Snake është i disponueshëm ose me ndërrues manual me gjashtë shpejtësi ose me ndërrues automatik me 10 shpejtësi si në konfigurimin kupe ashtu edhe në atë kabriolet.

Makinat e pajisura me ndërrues manual marrin një levë ndërrimi me distancë të shkurtër.

Shelby gjithashtu shton bulonat e rrotave të forcuara dhe të zgjatura dhe fellne magnezi të farkëtuara 20 inç.

Përveç përmirësimeve të sistemit të fuqisë dhe pezullimit, Super Snake gjithashtu merr një pamje të veçantë që është më agresive se çdo Mustang.

Në pjesën e pasme, Super Snake ka një difuzor të ri të pasmë prej fibre karboni dhe një spoiler të pasmë me dy krahë.

Modelet Fastback marrin një krah të epokës së fibër karboni, ndërsa çdo makinë është në dispozicion me vija dhe logo Super Snake. Shelby gjithashtu do të errësojë xhamat tuaj nëse shteti juaj e lejon.

Brenda, Super Snake përmban qilima dyshemeje të qëndisur nga Shelby, pllaka pragu të dyerve dhe mbështetëse ulësesh të qëndisura.

Ai gjithashtu vjen me një pllakë të serializuar në panelin e kontrollit, dhe modelet e pajisura me manual vijnë me një top të ndërrimit të marsheve Shelby.

Super Snake i vitit 2026 fillon nga 175,885 dollarë. Kjo përfshin Mustang GT Premium Fastback bazë me Performance Pack, shkarkim aktiv, pezullim MagneRide, disqe të kuq të frenave dhe sistem audio B&O.

Makina vjen me një garanci trevjeçare prej 36,000 miljesh, përveç garancisë së sistemit të fuqisë Ford.

Mustang GT standard, me 480 kuaj fuqi, fillon nga 48,555 dollarë, duke përfshirë tarifën e destinacionit prej 1,995 dollarësh.

Mustang Dark Horse me 500 kuaj fuqi kushton 66,075 dollarë për fillim, ndërsa Mustang GTD kushton mbi 300,000 dollarë.

Prodhimi ka filluar tashmë, sipas Shelby. Kompania me seli në Las Vegas do të prodhojë vetëm 300 Super Snakes për Shtetet e Bashkuara. /ET

Kryeministri i Groenlandës, Jens-Frederik Nielsen, ka deklaruar qartë se territori arktik nuk është për shitje dhe nuk dëshiron të bëhet pjesë e Shteteve të Bashkuara. Duke folur pas kryeministres daneze Mette Frederiksen, Nielsen theksoi se nëse Groenlanda do të duhej të zgjidhte, “do të zgjidhte Danimarkën mbi SHBA-të.”

“Një gjë duhet të jetë e qartë për të gjithë. Groenlanda nuk dëshiron të zotërohet nga SHBA-të, nuk dëshiron të qeveriset nga SHBA-të, nuk dëshiron të bëhet pjesë e SHBA-ve. Ne zgjedhim Groenlandën që njohim sot, e cila është pjesë e Mbretërisë së Danimarkës.”, tha Nielsen këtë të martë, citon The Guardian.

Ndërkohë, një zyrtar i qeverisë daneze ka konfirmuar se Danimarka i ka ofruar mbështetje SHBA-ve në kapjen e një cisterne nafte që shkelte sanksionet amerikane. Zyrtari, i cili foli në kushte anonimiteti, nuk dha detaje mbi natyrën e mbështetjes.

Ky informacion vjen në një kohë kur tensionet mes aleatëve të NATO-s janë rritur, pasi presidenti Donald Trump ka rinovuar thirrjet për marrjen e Groenlandës nën kontrollin amerikan.

Sekretari i Përgjithshëm i NATO-s, Mark Rutte, u pyet disa herë nga eurodeputetë danezë mbi retorikën e SHBA-ve për Groenlandën. Ai refuzoi të komentonte drejtpërdrejt, duke theksuar se roli i tij është të zgjidhë çështjet brenda aleancës dhe jo të ndërhyjë publikisht në debatet mes aleatëve.

Rutte kujtoi se Trump kishte ngritur çështjen e sigurisë në arktik që gjatë mandatit të tij të parë, duke paralajmëruar për rritjen e aktivitetit rus dhe kinez në rajon. Ai nënvizoi se NATO është e bashkuar për mbrojtjen e Arktikut dhe se diskutimet për hapat e ardhshëm do të vazhdojnë në javët e ardhshme.

Po ashtu, Rutte pranoi se Danimarka ka rritur ndjeshëm investimet në mbrojtje, duke i konsideruar ato të domosdoshme jo vetëm për sigurinë e saj kombëtare, por edhe për sigurinë e NATO-s në tërësi. Ai theksoi se Groenlanda mbetet një prioritet i veçantë për aleancën, duke e cilësuar si pjesë kritike të rajonit të Arktikut./mxh

Eksperti i mirësjelljes William Hanson ka dhënë përgjigje për pyetjen se cila shtet, sipas tij, ka sjelljen më të mirë në botë

Bontoni është një nga ato kategori shoqërore që varen shumë nga vendi, kultura dhe konteksti. Ajo që në një vend konsiderohet shenjë respekti, në një tjetër mund të perceptohet si e pasjellshme apo edhe fyese. Për shembull, në Shtetet e Bashkuara të Amerikës, lënia e bakshishit në restorante është pothuajse e detyrueshme dhe mungesa e tij shpesh interpretohet si shenjë pakënaqësie ose mungese mirësjelljeje.

Nga ana tjetër, në Japoni, bakshishi është i padëshirueshëm dhe mund të shihet si fyerje, sepse sugjeron se punonjësi nuk paguhet mjaftueshëm ose se po përpiqeni të “blini” shërbim më të mirë. Në kulturën japoneze, shërbimi cilësor merret si i mirëqenë dhe nuk lidhet me shpërblim financiar shtesë.

A ekziston një vend me “sjelljen më të mirë”?

Nëse etiketa është kaq subjektive, a ekziston vërtet një vend që mund të shpallet si ai me sjelljen “më të mirë”? Sipas William Hanson, një prej ekspertëve më të njohur botërorë të etikës, përgjigjja është: po. Hanson është autor librash për etiketën dhe një figurë e njohur në rrjetet sociale, ku rregullat e sjelljes së mirë i përshtat kohës moderne, nga mënyra e saktë e sjelljes në tryezë, deri te si të largoheni me takt nga një takim katastrofik në Tinder, transmeton Telegrafi.

Në një intervistë për LADBible, ai zbuloi se cilin vend e konsideron si shembull absolut kur bëhet fjalë për sjelljen.

“Besoj se duhet të them Japoninë. Japonezët janë jashtëzakonisht të sjellshëm dhe plot respekt”, tha Hanson.

Megjithatë, Japonia nuk është e vetmja në listën e tij. “Edhe Singapori është jashtëzakonisht i sjellshëm”, shtoi ai. “Në fakt, ndoshta asnjë vend perëndimor nuk është përgjigjja e saktë për këtë pyetje, gjë që nga perspektiva e Perëndimit është disi e trishtueshme.”

Në Japoni, etika është thellësisht e rrënjosur

Në Japoni, etika është e ndërthurur thellë me gjuhën dhe kulturën e përditshme. Ekzistojnë forma të ndryshme përshëndetjeje dhe mënyra shprehjeje në varësi të statusit shoqëror të bashkëbiseduesit; ndryshe u drejtoheni eprorëve, të moshuarve, kolegëve apo miqve.

Në fund, etika shpesh varet edhe nga situata. Shumica e njerëzve, në mënyrë instinktive, e ndryshojnë mënyrën e të folurit dhe sjelljen në varësi të faktit nëse ndodhen mes familjarëve, miqve apo partnerëve të biznesit. Prandaj, pyetja “kush ka sjelljen më të mirë” ndoshta nuk ka një përgjigje të vetme. Megjithatë, sipas mendimit të ekspertëve, kulturat që theksojnë respektin, konsideratën dhe ndërgjegjësimin për tjetrin, si ajo japoneze, renditen pa dyshim shumë lart në këtë shkallë.

Në vazhdim, shikoni videon ku William Hanson u përgjigjet disa pyetjeve për bontonin:

/et

Modelja e njohur Gigi Hadid ka surprizuar ndjekësit me një transformim të guximshëm në pamjen e saj. Ajo ka hequr dorë nga flokët bjonde, duke zgjedhur një stil krejtësisht të ri: një prerje të shkurtër bob në ngjyrë të zezë intensive.

Ndryshimi u prezantua përmes një postimi në Instagram, i publikuar nga stilisti i saj i flokëve, Dimitris Giannetos. Në fotot e shpërndara më 8 janar, Hadid shfaqet pothuajse e panjohshme, me flokë të shkurtër, ngjyrë të errët dhe grim të theksuar, që i japin një pamje më dramatike dhe misterioze.

Stilisti e shoqëroi postimin me mbishkrimin “Mini bob i zi mat”, duke shtuar se bëhet fjalë për një prerje dhe ngjyrë të re flokësh për Gigi Hadid, ndryshim që ka ngjallur menjëherë reagime dhe komente të shumta në rrjet./mxh

Për gati dy dekada, romanca e herëpashershme e Al Pacinos me kolegen e tij Diane Keaton ishte intensive, e ndërlikuar dhe, në fund, e paqëndrueshme

Kur në vitin 1971, Diane Keaton mbërriti në sheshxhirimin e filmit The Godfather, ajo ishte vetëm 25 vjeçe. Luante rolin e Kay Adams, të dashurës dhe më vonë bashkëshortes së Michael Corleone-s, të cilin e interpretonte Al Pacino – atëherë një aktor relativisht i panjohur, për të cilin regjisori Francis Ford Coppola kishte luftuar fort që ta përzgjidhte, pavarësisht kundërshtimit të studios.

Kimia mes tyre ishte e menjëhershme.

“Isha marrëzisht e dashuruar me të”, do të pranonte më vonë Diane.
“Ishte sharmant, jashtëzakonisht qesharak, fliste pa pushim. Kishte diçka tek ai si një jetim i humbur, si një shkencëtar i çmendur. Dhe oh… ishte i mrekullueshëm!”

Deri në vitin 1974, gjatë xhirimeve të The Godfather Part II, ata u bënë çift. Ajo që pasoi ishte një lidhje gati 20-vjeçare, me ndërprerje, e mbushur me pasion, tension dhe emocione të forta, por që nuk mundi të mbijetonte si marrëdhënie e qëndrueshme.

Që në fillim, një dallim thelbësor i ndante. Diane dëshironte përkushtim. Martesë. Jetë të përbashkët. Al, i formësuar nga një fëmijëri e thyer dhe frikërat e tij të brendshme, nuk ishte në gjendje t’ia jepte këtë. Vite më vonë, ajo i vendosi një ultimatum. Edhe atëherë, ai nuk arriti të angazhohej.

Ata e ndërprenë përfundimisht lidhjen rreth vitit 1990, pas përfundimit të xhirimeve të The Godfather Part III. Asnjëri prej tyre nuk u martua kurrë. Diane adoptoi dy fëmijë si nënë beqare në të pesëdhjetat. Al pati fëmijë me partnere të tjera, por mbeti beqar. Megjithatë, pavarësisht ndarjes, diçka mes tyre mbeti gjallë.

Në vitin 2017, Diane Keaton u nderua me çmimin për arritje jetësore nga American Film Institute. Al Pacino, i cili rrallë fliste publikisht për jetën private, doli në skenën e Dolby Theatre. Ai kujtoi se si ajo i kishte thënë dikur, para një interviste:

“Çfarëdo që të bësh, mos thuaj se je artist.”

Pastaj, duke e parë në publik, tha:
“Ti je artiste, Di. Je një artiste e madhe. Të dua. Përgjithmonë.”

Në sallë ra heshtje.

Historia e tyre nuk ishte kurrë një përrallë. Ishte reale – intensive, transformuese dhe, në fund, e pamundur për t’u shndërruar në martesë. Por ajo u kthye në diçka tjetër: një lidhje që as dekadat nuk arritën ta fshijnë.

Më 11 tetor 2025, Diane Keaton ndërroi jetë në moshën 79-vjeçare. Al Pacino ndodhej në Paris për xhirime kur mori lajmin. Ai publikoi një deklaratë që përmbledhte gjithçka që kishte qenë historia e tyre:

“Diane ishte partnerja ime, mikja ime, dikush që më solli gëzim dhe që, në shumë momente, ndikoi në drejtimin e jetës sime. Edhe pse kanë kaluar më shumë se 30 vjet që kur ishim bashkë, kujtimet kanë mbetur të gjalla, dhe me vdekjen e saj u rikthyen me një forcë që është njëkohësisht e dhimbshme dhe prekëse.”

Ai shtoi:

“Ajo jetoi pa kufij dhe gjithçka që prekte mbante energjinë e saj të pagabueshme. Ajo mund të fluturonte dhe në zemrën time, gjithmonë do të fluturojë.”

Burime pranë Pacinos u thanë gazetarëve se ai tani pendohet që nuk i propozoi kurrë martesë. “Duke parë pas, Al pranon se dashuria e jetës së tij ishte Diane.”

Historia e tyre na mëson diçka që shumica e rrëfimeve romantike nuk e bëjnë: jo çdo lidhje e thellë përfundon me martesë. Jo çdo person që ta ndryshon jetën mund të ecë pranë teje përgjithmonë. Disa marrëdhënie shndërrohen në diçka tjetër – miqësi, admirim të ndërsjellë ose thjesht kujtim, pa e humbur kurrë domethënien.

Pesëdhjetë e tre vjet pas takimit të tyre në sheshxhirimin e The Godfather, homazhi i Al Pacinos dëshmoi atë që e tregoi gjithë historia e tyre: disa dashuri, edhe kur transformohen, nuk zbehen kurrë, ato zgjasin në heshtje dhe na formësojnë përgjithmonë. /ET

Afrimiteti mes Dolces dhe Lim Hotit ka tërhequr vëmendjen gjatë dy ditëve të fundit brenda shtëpisë së “Big Brother”, duke nxitur menjëherë komente dhe spekulime nga publiku.

Dyshja janë parë vazhdimisht pranë njëri-tjetrit, duke kërcyer bashkë dhe duke shkëmbyer biseda të afërta, çka ka bërë që raporti i tyre të komentohet gjerësisht si brenda ashtu edhe jashtë shtëpisë. Momenti që i vuri vulën këtyre afrimeve ishte pas spektaklit të së hënës, kur Dolce dhe Limi u panë duke shkëmbyer një puthje në buzë, pamje që u përhapën me shpejtësi në rrjet.

Situata ka ngjallur edhe më shumë interes për faktin se Limi është futur vetëm prej pak ditësh në shtëpinë më të famshme. Ai njihet gjithashtu si ish-partneri i Alba Pollozhanit, për të cilën ka deklaruar se lidhja e tyre ka përfunduar prej muajsh.

Alba sakaq e ka bërë të qartë se zemra e saj i përket vetëm një personi: Limit. Ajo është shprehur kategorike se nuk ka interes për asnjë mashkull tjetër brenda shtëpisë, duke e cilësuar lidhjen me Limin si të vetmen dhe të pazëvendësueshme.

“Vetëm një dashuri kam në jetë dhe ai është Limi. Nuk dua të njoh asnjë mashkull tjetër. Nëse jo me Limin, atëherë më mirë të jem vetëm sesa me dikë që nuk e dua”, deklaroi Alba me vendosmëri.

Kjo deklaratë e fortë solli menjëherë reagimin e Labit, i cili u përpoq ta bindte se jeta është e gjatë dhe se nuk duhet të mbyllë dyert për të ardhmen.

“Nuk është e drejtë ajo që po thua. Jeta vazhdon dhe ti mund të gjesh dikë tjetër”, iu drejtua ai./mxh