Erërat e forta që përfshinë Selanikun gjatë fundjavës shkaktuan dhjetëra probleme, duke vënë në gatishmëri shërbimet e emergjencës. Sipas Departamentit të Zjarrfikësve, nga mëngjesi i së dielës deri në orën 23:30 u regjistruan gjithsej 710 thirrje për ndihmë.
Prej tyre, 141 kishin të bënin me prerje ose largim pemësh në njësinë rajonale të Selanikut, ndërsa 55 thirrje të tjera u bënë për heqjen e objekteve të rrezikshme të rrëzuara nga era.
Të dhënat e meteo.gr tregojnë se shpejtësia maksimale e erës të dielën arriti në 108 km/orë në Selanik, ndërsa tetë nga vlerat më të larta të erës u regjistruan në zona të ndryshme të Maqedonisë Qendrore./KM
Nga nesër, do të ndryshojë vendndodhja e disa zyrave të aplikimit për dokumente biometrike në qytetin e Tiranës, konkretisht zyrave IdentiTek 5 dhe IdentiTek 8 & 9. Zyrat e reja do të funksionojnë pranë njësive administrative përkatëse.
Zyra IdentiTek 5, e cila ndodhet në Rrugën “Robert Shvarc”, në zonën e Komunës së Parisit, do të zhvendoset dhe do të ofrojë shërbimet pranë Njësisë Administrative Nr. 5, në zonën e Bllokut.
Ndërkohë, zyra IdentiTek 8 & 9, që operon në Rrugën e Barrikadave, do të ndahet si më poshtë:
• IdentiTek 8 do të funksionojë pranë Njësisë Administrative Nr. 8, në Rrugën e Dibrës;
•IdentiTek 9 do të funksionojë pranë Njësisë Administrative Nr. 9, në Bulevardin “Zogu I”.
Qytetarët që kanë kryer aplikime për karta identiteti pranë zyrave IdentiTek 8 & 9 deri më sot, do t’i tërheqin dokumentet e tyre pranë Njësisë Administrative Nr. 8.
Këto ndryshime kanë qëllim rritjen e aksesueshmërisë së shërbimeve të aplikimit për dokumente identifikimi, duke i afruar ato më pranë qytetarëve, në njësitë administrative përkatëse./KM
As një vit nuk është mbushur nga ardhja në detyrë e Donald Trump, por nga perspektiva e Brukselit, kjo kohë është një përjetësi. Valë tronditëse njëra pas tjetrës i kanë mbajtur europianët në ankth; çdo javë solli kërkesa të reja, akuza dhe më pas ndryshime rrënjësore. Tronditja e 4 dhjetorit ishte kulmi i ri i përkohshëm dhe ka të ngjarë të jetë më e zgjatura. Një tronditje që e godet në palcë Europën.
Strategjia e re e sigurisë kombëtare të SHBA-së mbarti disa surpriza për aleatët e saj. Kina nuk është më një rivale sistemike, por thjesht një konkurrente ekonomike. Rusia pranohet si një fuqi e madhe me një treg premtues, veçanërisht për lëndët e para. Dhe nëse lindin konflikte me presidentin e saj, Vladimir Putin, Donald Trump ofron shërbimet e tij si ndërmjetës. Po Koreja e Veriut? As që përmendet më. Gjatë mandatit të parë të Trump, Kim Jong-un ishte ende armiku numër një publik.
Vlerësim rrënues
Strategjia e re amerikane e sigurisë tregon ndarjen më radikale që ka ndodhur me evropianët. SHBA-të, vendi që çliroi Evropën nga terrori nazist gjerman më shumë se 80 vjet më parë me një kosto të madhe, më pas u bënë edhe fuqia mbrojtëse e kontinentit dhe, në veçanti, gjithmonë e mbështetën projektin e Bashkimit Evropian, tani janë armiku i tij. Paragrafët kushtuar BE-së lexohen si një aktakuzë. Ato paraqesin një pamje të një BE-je plotësisht të rrënuar në prag të kolapsit civilizues, të gërryer nga migrimi masiv, shtypja e opozitës, normat e ulëta të lindshmërisë dhe censura.
“Askush prej nesh nuk duhet të tronditet nga fjalët që thonë të tjerët për ne”, rekomandoi Presidentja e Komisionit Evropian, Ursula von der Leyen dhjetë ditë pasi u njoftua strategjia e re. Paragraf pas paragrafi, ajo i çmontoi deklaratat nga Uashingtoni. Evropa rezervon të drejtën për të nxjerrë ligjet e veta – refuzim ky i presionit amerikan për të lejuar kompanitë amerikane të teknologjisë të operojnë sa më lirshëm të jetë e mundur, të papenguara nga rregulloret evropiane.
Në Evropë, vazhdoi Presidentja e Komisionit, të gjithë mund të votojnë për “kë të duan”, pa presion apo manipulim të jashtëm. Kjo duhet të kuptohet pa dyshim. Por von der Leyen e bëri të qartë se çfarë rrezikohet: “liria për të jetuar siç duam”.
Një projekt kundër SHBA-së?
Që presidenti i Amerikës e përçmon thellësisht Bashkimin Evropian bëhet e qartë në një nga konferencat e tij të pafundme për shtyp. “BE-ja u themelua”, deklaroi Trump në samitin e NATO-s në Hagë këtë verë, “për të shkatërruar SHBA-në”.
Trump e shikon suficitin tregtar të evropianëve si një fyerje personale: “Ata nuk i duan makinat tona!” Tarifat drastike janë përgjigja e tij; BE-ja duhet të dobësohet. Dhe ai mbjell pasiguri duke vënë vazhdimisht në pikëpyetje angazhimin besnik ushtarak të SHBA tek aleanca e NATO-s.
Partnerë të rinj
Strategjia e sigurisë kombëtare e 4 dhjetorit e SHBA shkon edhe më tej. Aty pretendohet, se liria e shprehjes censurohet në BE dhe opozita shtypet. Kjo i referohet partive të krahut të djathtë dhe të ekstremit të djathtë në BE – të cilat duhet të forcohen. Kjo është arsyeja pse zëvendëspresidenti JD Vance nuk u takua me kancelarin gjerman në Konferencën e Sigurisë në Mynih në shkurt, por me Alice Weidel, drejtuesen e AfD-së.
“Rrjeti i partive të ekstremit të djathtë dhe konservatore të krahut të djathtë në Evropë, përfshirë lëvizjen MAGA, është bërë më i rrënjosur gjatë katër viteve të fundit”, shpjegon politologia gjermano-amerikane Cathryn Clüver Ashbrook në një intervistë me studion e ARD në Bruksel. Ajo shton se partitë, por edhe politikanët individualë, marrin mbështetje.
Për shembull, fondet nga Fondacioni Heritage shkuan për politikanin britanik të ekstremit të djathtë Nigel Farage. “Tani duhet ta presim këtë në kontekstin e Strategjisë së Sigurisë Kombëtare për Evropën kontinentale”, vëren Clüver Ashbrook. Partitë e krahut të djathtë në Evropë po mbështeten – në Hungari, ku ato janë tashmë në pushtet, dhe në vende si Gjermania, ku ato janë në opozitë.
Mbështetjes së drejtpërdrejtë për partitë politike i shtohet edhe rrjetëzimi nëpërmjet medias, përfshirë në Gjermani. Para zgjedhjeve federale në shkurt, Elon Musk vlerësoi AfD-në jo vetëm në platformën e tij X, por gazeta e përditshme Die Welt, në pronësi të shtëpisë botuese Springer, botoi gjithashtu mbështetjen e Musk për AfD-në si artikull i të ftuarit. Drejtori ekzekutiv i Springer, Matthias Döpfner, ndërhyri personalisht pas publikimit të strategjisë së re të sigurisë të Trump. Evropa duhet ta dëgjojë Trumpin, shkroi Döpfner në një editorial në Die Welt; asnjë fjalë kritike nuk gjendet në editorial./KM
Ylli i Milanit, Christian Pulisic, ka hedhur poshtë aludimet se ka nisur një lidhje me aktoren Sydney Sweeney.
Së fundmi, vërshuan lajme të bazuara në burime anonime se futbollisti ishte shumë i lumtur për romancën e re.
Megjithatë, duket se burimet e kanë pasur gabim sepse ai nuk ka folur për Sydney dhe kërkon që njerëzit të mos shpikin më histori për jetën e tij private.
“Duhet që burimet të mbajnë përgjegjësi, mund të ndikojnë në jetën e njerëzve”, shkroi Pulisic në një postim në rrjetet sociale.
Situata të tilla mund të shërbejnë si shpërqendrim për shumë futbollistë, por Pulisic u sigurua që mëngjesin e së dielës të shënonte golin e tij të 10-të për këtë sezon në ndeshjen e radhës së Milanit. Kjo bëri që ekipi i tij të renditej i pari në Seria A.
Nga ana tjetër, jeta personale e Sydney shpesh përflitet në mediat rozë dhe së fundmi ajo duket se ka një lidhje me producentin Scooter Braun.
Christian dhe Sydney mund të jenë një çift që fansat do ta donin, por mes tyre s’ka asgjë./KM
Për shekuj me radhë, Parisi nuk ka qenë thjesht një pikë në hartë, por një gjendje shpirtërore. Ai është endur në imagjinatën tonë përmes aromës së bukës së sapopjekur në agim, tingujve të një fizarmonike që përhapen përgjatë Senës dhe dritave që vallëzojnë mbi Kullën Eiffel si thërrime yjesh të rëna mbi qytet…
…Ne nuk udhëtojmë drejt tij për të vizituar një qytet, por për të takuar një premtim: atë të romancës së përjetshme dhe të një jete që duket sikur rrjedh në kornizat e një filmi të viteve ’60. Por çfarë ndodh kur perdet mbyllen, dritat zbehen dhe skena përpara nesh nuk është më ajo që kishim imagjinuar?
Paradoksi i qytetit të dritave
Parisi, simboli botëror i elegancës dhe artit të jetës, bart me vete një nga paradokset më të çuditshme të turizmit modern. “Sindroma e Parisit” nuk është një mit urban, por një gjendje reale psikologjike që godet vizitorët kur imazhi i tyre “i kristaltë” për qytetin thërrmohet sapo prekin tokën franceze.
Zhgënjimi që lindi nga Lindja
Termi u identifikua për herë të parë në vitet 1980 nga psikiatri japonez Hiroaki Ota. Ai vuri re se disa turistë japonezë, të rritur me një vizion idealist të Parisit si kulmi i mirësjelljes dhe estetikës, pësonin një thyerje të rëndë shpirtërore.
Në vend të fushave me livando apo buzëqeshjeve galante, ata ndesheshin me: Ritmin brutal urban të një metropoli të zhurmshëm që nuk ndalet për askënd.
Po aq turistët përballen dhe me barrierat kulturore, stilin e drejtpërdrejtë dhe ndonjëherë të ftohtë të shërbimit parizien. Ndërkohë që një zhgënjim vjen dhe nga papastërtia e zakonshme si dhe realiteti i një qyteti që, si çdo qytet tjetër, ku ka mbeturina, kaos dhe njerëz që nxitojnë.
Kur shpirti vuan, trupi reagon
Për këta udhëtarë, tronditja nuk është vetëm emocionale. Ajo shfaqet përmes simptomave fizike që ngjasojnë me një sulm paniku: marramendje, takikardi (rrahje të shpejta zemre), djersitje dhe halucinacione të lehta.
Në këtë mënyrë Ambasada e Japonisë në Paris ka pasur periudha kur i është dashur të mbajë një linjë emergjence 24-orëshe, e madje të riatdhesojë turistë nën mbikëqyrje mjekësore, pasi trauma e “zhgënjimit” ishte e papërballueshme.
Evolucioni i sindromës
Nëse dikur Parisi godiste përmes filmave, sot “fajtor” është Instagrami. Filtrat e ngrohtë dhe fotot e kuruara deri në detaj e kanë thelluar hendekun mes reales dhe virtuales.
Është interesante ta krahasojmë këtë me “Sindromën Stendhal” – që ndodh kryesisht në Firence, – ku turistët sëmuren nga bukuria e tepërt. Te Sindroma e Parisit, ndodh e kundërta: individi sëmuret nga mungesa e bukurisë së imagjinuar.
Si lindi “Sindroma Stendhal”
Emri i dedikohet shkrimtarit të famshëm francez të shekullit XIX, Stendhal që ishte dhe pseudonimi i Marie-Henri Beyle. Në vitin 1817, gjatë vizitës së tij në Firence, ai përjetoi diçka të jashtëzakonshme teksa vizitonte Bazilikën e Santa Croce-s, ku janë varrosur kolosë si Michelangelo, Galileo dhe Machiavelli. Në ditarin e tij të udhëtimit, ai shkroi: “Isha në një lloj ekstaze… rrahjet e zemrës sime u bënë të shpejta, jeta po rridhte brenda meje, ecja me frikë se mos rrëzohesha përtokë.”
Megjithëse përshkrimi i Stendhal-it daton që nga viti 1817, termi u shkencërua vetëm në vitin 1979 nga psikiatria italiane Graziella Magherini. Ajo vëzhgoi mbi 100 raste të ngjashme mes turistëve që vizitonin Firencen, të cilët pësonin kriza paniku ose konfuzion përballë kryeveprave të Rilindjes.
Bukuria e fshehur te papërsosmëria
Psikologët shpjegojnë se ky fenomen është një përzierje e lodhjes kronike (jet lag), pengesave gjuhësore dhe, mbi të gjitha, shembjes së një idhulli estetik. Megjithatë, kjo sindromë shërben si një leksion i vlefshëm për jetën.
Parisi real – ai me zëra të lartë nëpër kafene, me njerëz që grinden në metro dhe me lagje që nuk duken si kartolina – është shumë më interesant se versioni i tij i filtruar. Ai është një qytet që merr frymë, që gabon dhe që dashuron në mënyrë njerëzore, jo kinematografike.
Përfundimi: Sindroma e Parisit na mëson se udhëtimi i vërtetë nuk është gjetja e asaj që kemi parë në ekrane, por guximi për të parë qytetin (dhe botën) ashtu siç është: i papërsosur, i rrëmujshëm dhe pikërisht për këtë, i gjallë.
Mjetet e reja të inteligjencës artificiale po transformojnë mënyrën se si aplikojmë për punë. Platforma të specializuara ofrojnë analiza të përshkrimit të punës dhe krijojnë CV të personalizuara sipas kërkesave të kompanisë.
Rezultati? Kandidatët kanë më shumë mundësi të kalojnë filtrat automatizues dhe sistemet ATS (Applicant Tracking Systems), të cilat shpesh janë pengesa e parë. Kjo teknologji po bëhet veçanërisht e rëndësishme në sektorët ku aplikantët janë të shumtë dhe konkurrenca e lartë.
Megjithatë, ekspertët theksojnë se AI duhet përdorur si mjet ndihmës – jo zëvendësim i kreativitetit, profesionalizmit dhe prezantimit njerëzor në intervistë./KM
Ishin “Krishtlindjet më të ftohta në 15 vjet”, raportoi këto ditë faqja e internetit gjermane tagesschau.de lidhur me temperaturat jashtëzakonisht të ulëta në Gjermani gjatë festave.
Media gjermane thekson se “edhe pse për shumicën e gjermanëve ëndrra e një Krishtlindjeje të Bardhë nuk u realizua, i ftohti ishte i hidhur në të gjithë vendin dhe shumë rrugë ishin të mbuluara me akull”.
Sipas Shërbimit Meteorologjik Gjerman (DWD), Krishtlindjet e vitit 2025 ishin më të ftohtat që nga viti 2010. Konkretisht, tre ditët e Krishtlindjeve, 24 deri më 26 dhjetor, ishin, mesatarisht, më të ftohtat në Gjermani në 15 vjet, sipas DWD. Temperatura më e ulët u regjistrua natën e 26 dhjetorit me -12.1 gradë Celsius në Malet Harz – konkretisht në Harzgerode në shtetin federal të Saksonisë-Anhalt.
Raporti vëren: “Një Krishtlindje e bardhë u festua vetëm në shumë pak rajone në Gjermani. Në disa pjesë të Bavarisë, për shembull, reshjet shumë të lehta të dëborës në prag të Krishtlindjeve siguruan një peizazh të mbuluar lehtë me dëborë. Sasi të mëdha dëbore, megjithatë, ishin të pranishme vetëm në lartësi shumë të mëdha: 75 centimetra në Zugspitze (2,962 metra) dhe 80 centimetra në Nebelhorn (2,224 metra)”.
“Akulli, nga ana tjetër, shkaktoi shumë probleme në shumë pjesë të vendit, veçanërisht për shoferët, pasi dhjetëra aksidente ndodhën në Gjermaninë veriore për shkak të rrugëve të rrëshqitshme. Situata është e ngjashme në Berlin dhe Brandenburg, ndërsa shërbimet e autobusëve në Potsdam u pezulluan përkohësisht”, përfundon botimi.
Dhomat e urgjencës janë të mbipopulluara.
“Rëniet në trotuare dhe rrugë të rrëshqitshme kanë sjellë mbipopullim të dhomave të urgjencës së katër spitaleve në Berlin. Sipas deklaratave të spitalit, diagnozat më të shpeshta ishin thyerje kockash në krahë dhe këmbë, si dhe gërvishtje në kokë, të shkaktuara nga rëniet në rrugë dhe trotuare të akullta. Megjithatë, sallat e operacionit dhe njësitë e kujdesit intensiv janë gjithashtu plot. Të katër spitalet janë në prag të kapacitetit maksimal, ndërsa koha e pritjes për pacientët është rritur ndjeshëm.”
Nata e Vitit të Ri pa fishekzjarre?
“A po vjen ‘nata e frikës’? Debati mbi ndalimin e fishekzjarrëve në natën e Vitit të Ri” është titulli i një reportazhi nga rrjeti BR24, duke iu referuar debatit mbi fishekzjarrët e natës së Vitit të Ri që ka preokupuar Gjermaninë vitet e fundit.
Pak para fillimit të shitjeve të fishekzjarrëve për natën e Vitit të Ri, thirrjet për ndalimin e tyre po bëhen gjithnjë e më intensive.
“Fishekzjarrët privatë duhet të ndalohen plotësisht në Gjermani”, thotë Klaus Reinhard, President i Shoqatës Mjekësore Gjermane. Shfaqjet e organizuara të fishekzjarrëve në vende qendrore janë krejtësisht të pranueshme, por: “Përdorimi i pakontrolluar i fishekzjarrëve duhet të ndalohet”, shpjegoi Reinhard për RND, duke theksuar se “shpërthimet e fishekzjarrëve shkaktojnë shumë lëndime dhe djegie çdo vit, gjenerojnë ton mbeturina, ngarkojnë sistemin shëndetësor dhe mjedisin dhe përdoren kundër policisë dhe zjarrfikësve. Ato gjithashtu mund të shkaktojnë frikë edhe vdekjeprurëse tek refugjatët që kanë jetuar në zona lufte.” Aktivistët e të drejtave të kafshëve theksojnë gjithashtu se fishekzjarrët shpesh shkaktojnë frikë si tek kafshët e shoqërimit ashtu edhe tek ato në natyrë.
Presidenti i Shoqatës Mjekësore Gjermane u bëri thirrje ministrave të brendshëm që “më në fund” të mbrojnë popullsinë nga rreziqet e fishekzjarrëve privatë. Kjo, tha ai, “nuk ka të bëjë fare me një kulturë ndalimi”, por përkundrazi tregon “largpamësinë e një shoqërie të pjekur për t’u përmbajtur nga diçka e rrezikshme”. Ministri i Brendshëm Alexander Dobrid gjithashtu mbështet ndalimin.
Në anën tjetër është Christoph Krepl, Drejtor Ekzekutiv i Shoqatës Federale të Industrisë Piroteknike (BVPK), i cili argumenton se aksidentet serioze të lidhura me fishekzjarrët ndodhin “pothuajse ekskluzivisht për shkak të fishekzjarrëve të paligjshëm”, ndërsa fishekzjarrët e Vitit të Ri që janë të disponueshëm ligjërisht “testohen rigorozisht dhe kanë madhësi dhe efekt të kufizuar”./KM
Në zgjedhjet e parakohshme të 28 dhjetorit, Lëvizja Vetëvendosje e drejtuar nga Albin Kurti, bazuar në rezultat preliminare ka marrë 49.30% të votave ose 429.979 vota.
Kjo përkthet në 56 mandate deputetësh në Kuvendin e Kosovës. Kujtojmë se janë ende pa u numëruar votat e diasporës dhe votat me kusht.
Bazuar në rezultatet preliminare, PDK ka fituar 23 mandate deputeti, LDK 15 mandate deputeti, Lista Serbe 10 mandate, Pakicat joserbe 10 mandate dhe AAK 6 mandate deputeti.
Kreu i KQZ, Kreshnik Radoniqi ka njoftuar se ditën e sotme do të nisë numërimi i votave të kandidatëve dhe konfirmimi i votave për subjektet politike.
“Numërimi i votave për kandidatët dhe konfirmimi i atyre për subjektet politike do të fillojë nesër, në orën 12:00, pasi i gjithë materiali do të pranohet gjatë natës në qendrat e numërimit“, tha Radoniqi./K.M
Shtatë oficerë policie u plagosën në një përleshje me militantë të dyshuar të Shtetit Islamik ( ISIS ) herët këtë mëngjes në provincën veriperëndimore të Turqisë, Yalova, raportoi transmetuesi shtetëror TRT Haber.
Gjatë një bastisjeje, të dyshuarit në një banesë iu përgjigjën thirrjeve për dorëzim nga forcat e sigurisë me armë zjarri, duke çuar në një shkëmbim zjarri.
Operacioni, i cili mbështetet edhe nga policia e operacioneve speciale nga Bursa, vazhdon me masa sigurie që po merren në zonën përreth.
Ndërkohë, u raportua se oficerët e policisë që u dërguan në spital janë në gjendje të mirë shëndetësore./KM
Sot është disa e pestë ku qytetarët e Vlorës përballen me mungesën e furnizimit me ujë të pijshëm.
Ditën e djeshme revolta e banorëve kulmoi me protestën e organizuar në teatrin e qytetit, “Petro Mrko”.
Qytetarët e shumtë shkuan pikërisht aty pasi bashkia po organizon një festë të fundvitit në ambientet e teatrit për punonjësit e saj dhe kanë ndërprerë shfaqjen.
“Duam Ujë”, ishte thirrja e tyre. Ndërkohë që u tensionuan edhe me policinë që mbronte ambientet ku ishte mbledhur bashkia të festonte.
Ata kanë paralajmëruar se nuk do të heqin dorë, pasi po përballen më këtë situatë shqetësuese në prag të festave. Ata kanë paralajmëruar se nesër në orën 10:00 do të protestojnë para Bashkisë.
Ditën e djeshme Drejtori i Ujësjellësit, Ermal Murati ka bërë me dije se ende nuk është arritur të rregullohet defekti, ndërsa ka shtuar se po punohet për gjetjen e një rruge alternative për furnizimin e qytetarëve me ujë gjatë pasdites.
Kreu i Ujësjellësit Vlorë, Ermal Murati, thekson se për institucionet e rëndësisë së veçantë kanë siguruar zgjidhje alternative, ndërsa ndërhyrja për riparimin përfundimtar vijon./KM
Gjashtëmbëdhjetë persona kanë humbur jetën dhe tre të tjerë janë plagosur si pasojë e një zjarri që shpërtheu në një azil pleqsh në qytetin Manado, në ishullin indonezian të Sulawesi-t.
Lajmi u konfirmua sot për AFP-në nga punonjësi i shpëtimit, Jimmy Rotinsulu, i cili bëri të ditur se shumica e viktimave u gjetën brenda dhomave të tyre. Sipas tij, banorët e moshuar me shumë gjasa ndodheshin duke pushuar në dhomat e tyre të dielën në mbrëmje, në momentin kur shpërtheu zjarri.
Autoritetet arritën të evakuonin 12 persona, të gjithë të padëmtuar, të cilët më pas u dërguan për kontroll mjekësor në një spital lokal.
Pamjet e transmetuara nga televizioni lokal Metro TV treguan flakët që përfshinë godinën e azilit, ndërsa banorë të zonës ndihmonin ekipet e emergjencës në evakuimin e të moshuarve. Shkaqet e zjarrit mbeten ende të paqarta dhe autoritetet kanë nisur hetimet./KM
Të paktën 13 persona kanë humbur jetën dhe 98 të tjerë janë plagosur pas daljes nga shinat të Trenit Interoqeanik në rajonin e Isthmusit të Tehuantepec, në shtetin meksikan të Oaxacës. Bilanci i viktimave është përkeqësuar ndjeshëm në orët e fundit.
Lajmi u bë i ditur nga guvernatori i Oaxacës, Salomón Jara Cruz, përmes një mesazhi të publikuar në rrjetin social X. “Jemi thellësisht të trishtuar nga aksidenti hekurudhor që ndodhi pranë Nizandës, në komunën e Asunción Ixtaltepec, ku udhëtonin rreth 250 persona,” shkroi ai.
Sipas autoriteteve shtetërore, 139 persona janë jashtë rrezikut për jetën, 98 janë plagosur, ndërsa 36 prej tyre po marrin trajtim mjekësor. Qeveria e Shtetit të Oaxacës ka shprehur ngushëllimet më të thella për familjet e viktimave dhe ka garantuar mbështetje të plotë për të prekurit nga ky aksident tragjik.
Treni Interoqeanik lidh Gjirin e Meksikës me Oqeanin Paqësor dhe konsiderohet një infrastrukturë strategjike për transportin e pasagjerëve dhe mallrave në jug të vendit. Autoritetet kanë nisur hetimet për të zbardhur shkaqet e aksidentit./KM
Rezultatet e zgjedhjeve të parakohshme parlamentare tregojnë se Lëvizja Vetëvendosje mund të formojë qeverinë e ardhshme pa mbështetjen e partive opozitare. Me mbi 95% të votave të numëruara, LVV ka marrë rreth 50% të votave, që përkthehen në 55-56 deputetë dhe i nevojiten vetëm disa deputetë të pakicave jo-serbe për të siguruar shumicën.
Partia Demokratike e Kosovës ruan afro 20% të votave dhe pritet të ketë 23 deputetë, ndërsa Lidhja Demokratike e Kosovës bie në 14% dhe mund të humbasë rreth 5 deputetë nga 20 që kishte.
Ramush Haradinaj me 6% të votave mund të marrë 6 mandate, ndërsa Fatmir Limaj mbetet jashtë parlamentit, pasi nuk arriti pragun zgjedhor./ K.M
Një akt i vetëm mirësie më kujtoi se, pavarësisht kaq shumë provave për të kundërtën, engjëjt më të mirë të natyrës sonë nuk janë domosdoshmërisht të dënuar
Martin Kettle*
Ndoshta po kërkon arsye për të qenë më optimist në fund të një viti që ka qenë veçanërisht dëshpërues? Nëse është kështu, vazhdo leximin. Në nëntor, po udhëtoja me tren drejt Londrës. Kur zbrita nga treni dhe iu drejtova barrierës së biletave, kuptova se nuk e kisha portofolin. E dija që e kisha pasur kur hipa në tren. Fillova një kërkim të padenjë në xhepat e palltos, xhaketës dhe pantallonave, një skenë që do t’u kishte shkuar për shtat aftësive komike të Çarli Çaplinit ose Zhak Tatis. Por nuk kishte asnjë dyshim: disi kisha arritur ta lija portofolin në tren.
Një punonjës i sjellshëm i stacionit mori të dhënat dhe tha se do ta përcillte mesazhin përgjatë linjës. I lashë numrin e telefonit. Por ishte orë piku, më vuri në dukje ai, dhe shanset për ta marrë portofolin mbrapsht kishin shumë gjasa të ishin zhdukur bashkë me trenin që po largohej. Ndërkohë telefonova bankën dhe, pas disa përpjekjesh, arrita të bllokoja kartat. U ndjeva tmerrësisht budalla, i plakur dhe i turpëruar. Shkova të pija diçka me miqtë dhe u mëshirova vetveten.
Disa orë më vonë, hodha një sy në telefon. Mes email-eve ishte një nga një grua e quajtur Natalja. Ajo shpjegonte se e kishte gjetur portofolin tim në tren dhe se tashmë e kishte dorëzuar te shërbimi i sigurisë në zyrat e “Guardian”-it. Çdo gjë ishte e paprekur, përfshirë kartat dhe pak para cash. Ajo kishte vënë re lidhjen me “Guardian”-in falë kartës sime të Unionit Kombëtar të Gazetarëve dhe kishte marrë mundimin jo të vogël të shkonte vetë në zyrë për ta dorëzuar portofolin.
Një nga miqtë e mi ka zakon t’i pyesë njerëzit, në këto kohë të errëta politike, nëse mund të përmendin tri gjëra që duhet të na japin të gjithëve arsye për optimizëm. Mund ta provosh edhe ti, sepse është më e vështirë nga sa duket, por për mua, historia e mirësisë së Nataljas ofron një fillim qetësues. Më duket se Shekspiri duhet të ketë pasur parasysh një histori të tillë kur shkroi atë varg të bukur te “Tregtari i Venecias” për qiririn, rrezja e të cilit ndriçon si një vepër e mirë në një botë të keqe.
Në mënyrë inkurajuese, nuk jam i vetëm. Vetëm dy javë pasi mora portofolin mbrapsht, lexova një artikull nga gazetari i shkëlqyer i “Belfast Telegraph”, Sam Mekbrajd, i cili fillonte kështu: “Javën e kaluar isha gati të hipja në një autobus në qendër të Belfastit, kur kuptova se portofoli që mendoja se ishte në xhepin e pasmë nuk ishte aty, nuk ishte në çantë, nuk ishte në pallto – nuk ishte askund mbi mua.” Dhe po, e merr me mend vazhdimin. Pak më vonë, telefoni i Samit ra me lajmin se shoferi i autobusit e kishte dorëzuar portofolin, me paratë të paprekura.
Ndoshta përvoja e Mekbrajdit dhe e imja ishin thjesht një rastësi – dy gazetarë të ndarë nga Deti Irlandez që përjetuan të njëjtin fat të mirë në të njëjtën kohë. Ndoshta, nëse është kështu, ato ilustrojnë një version të teorisë thellësisht të diskutueshme të Rupert Sheldrake për shkakësinë formuese, ose të ashtuquajturën rezonancë morfike, sipas së cilës njerëzit në vende të ndryshme disi mësojnë të sillen ndryshe pa i nxitur askush dhe pa e orkestruar askush këtë sjellje.
Shpjegimi më i sigurt, megjithatë, është thjesht se ka më shumë Natalja sesa mund të mendosh. Ndoshta shumë më tepër. Nuk po them se, nëse humb portofolin, mund të të garantoj një qytetar të vëmendshëm e të ndershëm që do të sigurojë kthimin e tij. Siç thoshte Shekspiri, ne jetojmë në një botë të keqe. Por jam i gatshëm të them se shanset për të ndeshur mirësinë e të panjohurve, ashtu siç më ndodhi mua, janë dukshëm më të larta sesa errësira e pandërprerë e pamjes tepër të zakonshme të Britanisë në vitin 2025 mund të të bëjë të besosh.
Nuk ka si t’i shpëtosh faktit që mediat – tradicionale dhe sociale njësoj – janë motorë të pagjumë të pesimizmit tonë kolektiv refleks. Ne jetojmë në një vend ku dështimi, rreziku dhe rrezikshmëria konsiderohen gjithnjë të pranishme dhe në rritje. Mediat tona raportojnë pa pushim raste të tmerrshme mizorie, shfrytëzimi, lakmie dhe zemërimi. Si rezultat, askujt në profesionin tim nuk do t’i shkonte ndër mend se historia e portofolit tim ia vlente të ndahej me publikun, përveçse ndoshta në Krishtlindje.
Sigurisht, në pamjen e gjerë të gjërave, historia e portofolit tim ishte e parëndësishme. Por pesimizmi refleks është një problem i madh për shoqëritë moderne, jo një i vogël. Ja një shembull më i gjerë se si funksionon ai. Kur Endi Bërnëm ishte ministër i Shëndetësisë në qeverinë e Gordon Braun-it, ai ftoi një grup prej nesh në Uajt-holl për të ndarë disa sondazhe të brendshme që po e shqetësonin qeverinë. Sondazhet tregonin se pritshmëritë e publikut ndaj Shërbimit Kombëtar Shëndetësor po binin, kryesisht të nxitura nga raportimet e përsëritura për kriza në shëndetësi. Në të njëjtën kohë, përvojat personale të publikut me NHS-in, si edhe ato të të afërmve të tyre më të ngushtë, mbeteshin pothuajse njëzëri shumë të mira.
Më kujtohet se isha skeptik ndaj këtyre gjetjeve. Edhe atëherë njihja shumë histori të këqija nga NHS-i, si edhe disa të mira. Por pyetjet që Bërnëm ngriti në dritën e grupeve fokusuese të ministrisë mbetën të vlefshme. Si ta kapërcejmë bindjen e publikut se NHS-i në nivel makro ishte në rënie dhe se ata vetë thjesht kishin qenë me fat? Si t’i bëjmë njerëzit të kuptojnë se përvojat e tyre të mira personale nuk ishin një rastësi e rrallë, dhe të kenë besim se NHS-i – ose dhjetëra forma të tjera të së mirës së përbashkët – mund të funksionojnë për të gjithë?
Në thelb, kjo është e njëjta mundësi që ngrihet nga akti i vetëm i mirësisë së Nataljas. Mund ta shprehësh në mënyra të ndryshme. Ndoshta të gjithë ne, dhe veçanërisht mediat dhe politikanët tanë, jemi shumë të shpejtë për të besuar më të keqen. Ndoshta normat tona shoqërore dhe morale janë më të ndershme dhe më të qëndrueshme sesa supozojmë. Ndoshta jetojmë në një vend më të mirë nga sa mendojmë. Ndoshta duhet të jemi më pak të zemëruar.
Nëse edhe një pjesë e kësaj është e vërtetë, pyetjet që pasojnë nga ndershmëria e Nataljas janë të tilla si këto: si mund të shkojmë përtej bindjes, të ushqyer nga kaq shumë ekzagjerime politike dhe mediatike, se të gjithë jetojmë në një shkretëtirë ulëritëse të mungesës së qytetarisë, keqsjelljes dhe paaftësisë, nga e cila streha jonë e vetme është ose frika, ose shtypja? Çfarë mund të bëjmë për ta ndihmuar veten të shohim se përvojat individuale të mirësisë, mirësjelljes dhe ndershmërisë nuk janë oaze të rastësishme fati të mirë në një shkretëtirë ligësie të përgjithshme?
Përgjigjet, padyshim, nuk janë të lehta. Por ato ekzistojnë dhe ia vlen të kultivohen. Mirësia e Nataljas më kujtoi se, pavarësisht kaq shumë provave për të kundërtën, engjëjt më të mirë të natyrës sonë nuk janë domosdoshmërisht të vdekur apo të dënuar. Ende ka plot gjëra në shoqërinë tonë që funksionojnë mirë, pikërisht ashtu siç do të donim të funksiononin.
Kreu i “Shqipëria Bëhet”, Adriatik Lapaj ka reaguar pas rezultateve paraprake të zgjedhjeve në Kosovë.
Lëvizja Vetëvendosje dhe kryeministri Albin Kurti po shkojnë drejt fitores, me 49, 74 % ose 424, 874 vota.
Në reagimin e tij Lapaj ka uruar Kosovën për procesin demokratik.
“Urime Kosovë! U ka lezet demokracia! Turp e faqe zezë që në Shqipëri ende vidhet e deformohet vota. Hajdutët e lanë atdheun të mjeruar”, shkruan Lapaj në postimin e tij në Facebook./K.M
Lëvizja Vetëvendosje ka shënuar fitore të thellë në zgjedhjet e parakohshme parlamentare të 28 dhjetorit.
Ndërsa janë numëruar mbi 97% të votave, LVV ka marrë 49,72% të votave.
Komisioni Qendror i Zgjedhjeve ka publikuar rezultatet në faqen zyrtare;
LVV ka marrë 49,72% të votave, PDK 21,19%, LDK 13,74 % dhe AAK 5,74%.
Aleanca për Ardhmërinë e Kosovës AAK ka marrë në këto zgjedhje 5,73 % ose 48, 630 vota. Ndërsa Lista Srpska ka marrë sipas KQZ 3,86 %. Partia Nisma Socialdemokrate ka marrë 1,71 % ose 14, 545 vota./K.M
Ekspertë të mjekësisë së gjumit paralajmërojnë se mangësia e gjumit cilësor lidhet gjithnjë e më shumë me probleme të zemrës, shtim peshe, ulje të imunitetit dhe çekuilibra hormonalë. Nuk është vetëm sasia, por oraret e paqëndrueshme që dëmtojnë trupin.
Organizmi ynë funksionon me ritme biologjike të sakta; të quajtura ritme cirkadiane. Kur këto prishen, trupi prodhon më pak melatoninë dhe më shumë kortizol, hormon stresi. Ky kombinim e vë sistemin nervor dhe atë kardiovaskular nën presion të vazhdueshëm.
Specialistët këshillojnë të ruhet një orar fiks fjetjeje dhe zgjimi, sidomos para mesnatës, për të ripërtërirë mekanizmat natyralë të rikuperimit./KM
Interi reagoi menjëherë pas humbjes në Superkupë dhe e mbylli vitin 2025 në krye të renditjes, duke mundur Atalantën 1-0 në javën e 17-të të Serie A.
Skuadra e drejtuar nga Chivu ruajti vendin e parë me 36 pikë, duke iu përgjigjur fitoreve të rivalëve direktë.
Në pjesën e parë, Interi kontrolloi lojën dhe krijoi rastet më të mira, por pa gjetur golin. Atalanta u mbrojt kompakte dhe tentoi të godasë në kundërsulm. Në fraksionin e dytë, Luis Henrique dhe Barella shpërdoruan dy mundësi të pastra.
Goli vendimtar erdhi në minutën e 65-të, kur Lautaro shfrytëzoi një gabim të Gjimshiti pas asistit të Pio Espositos.
Në fund, Samardzic humbi shansin për barazim, ndërsa Interi administroi avantazhin deri në vërshëllimën finale./K.M
Nëpërmjet një postimi në Facebook, Ardit Bido ka njoftuar se situata në Vlorë është drejt normalizimit.
Ai nënvizon se pas më shumë se 72 orë punë intensive në terren, ka sinjale pozitive se avaria e rëndë në sistem mund të zgjidhet brenda ditës së sotme.
Reagimi i plotë:
Pas më shumë se 72 orësh pune intensive në terren, ka sinjale pozitive se avaria e rëndë në sistemin e furnizimit me ujë në Vlorë mund të zgjidhet brenda ditës së sotme.
Ka qenë një situatë e vështirë dhe e lodhshme për qytetarët. Shqetësimi i tyre është i drejtë dhe i kuptueshëm, pasi mungesa e ujit për disa ditë rresht nuk mund të jetë realiteti i një qyteti si Vlora.
Sipas informacioneve nga terreni, ndërhyrjet janë në fazën përfundimtare dhe po punohet për rikthimin gradual të furnizimit.
Është e domosdoshme që çdo zhvillim të komunikohet me transparencë dhe që kjo situatë të shërbejë si një mësim i qartë për të forcuar sistemin dhe për të parandaluar përsëritjen e rasteve të ngjashme në të ardhmen./K.M
Login
Të dhënat e meteo.gr tregojnë se shpejtësia maksimale e erës të dielën arriti në 108 km/orë në Selanik, ndërsa tetë nga vlerat më të larta të erës u regjistruan në zona të ndryshme të Maqedonisë Qendrore./KM