LONDËR, 26 qershor /ATSH/- Ky Botëror me 48 skuadra ka sjellë disa përballje intriguese dhe një sërë paraqitjesh mbresëlënëse, nga kombëtaret më pak të favorizuara, të cilat kanë arritur të marrin rezultate pozitive ndaj disa prej ekipeve më të forta në botë, shkruan BBC.

Kepi i Gjelbër, Curaçao, Gana dhe Afrika e Jugut – të renditura përkatësisht në vendet e 64-ërt, 81-të, 65-të dhe 54-ërt në renditjen botërore – kanë marrë pikë ndaj Spanjës (e 3-ta), Ekuadorit (i 29-ti), Anglisë (e 4-ta) dhe Koresë së Jugut (e 28-ta).

Por a janë këto surpriza thjesht rezultat i fatit, apo pas tyre fshihet një përgatitje taktike e menduar mirë?

Një analizë më e detajuar e ndeshjeve, tregon se këto rezultate nuk kanë ardhur rastësisht. Përkundrazi, ekipet që befasuan, kanë ndjekur disa modele të përbashkëta taktike.

Të mos biesh në kurthin e kundërshtarit

Barazimi 0-0 i Kepit të Gjelbër kundër Spanjës, ishte ndoshta surpriza më e madhe e turneut deri tani, por edhe një nga paraqitjet më të disiplinuara nga pikëpamja taktike.

Kombëtarja e tretë më e vogël në historinë e Kupës së Botës, neutralizoi Spanjën falë një organizimi mbrojtës në skemën 4-5-1.

Çelësi i suksesit ishte distanca shumë e vogël mes vijës së mesfushës dhe asaj të mbrojtjes, duke mos lënë hapësira për lojtarët spanjollë.

Përballë një blloku kaq kompakt, skuadrat që mbajnë gjatë topin zakonisht, zgjedhin ta rikthejnë lojën prapa, me shpresën se kundërshtari do të dalë përpara dhe do të krijojë hapësira.

Spanja veproi pikërisht kështu, duke e kthyer topin mbrapa për të tërhequr mesfushorët e Kepit të Gjelbër.

Por afrikanët nuk ranë në grackë. Ata ruajtën pozicionet dhe nuk e prishën strukturën mbrojtëse.

Edhe kur mbrojtësit spanjollë, avancuan me topin në këmbë, për të provokuar një reagim, lojtarët e Kepit të Gjelbër, vazhduan të ruanin qetësinë dhe lëvizën vetëm në momentin e duhur.

Si pasojë, Spanja pati shumë vështirësi të gjente lojtarë mes linjave. Zgjidhjet e vetme mbetën sulmet nga krahët ose pasimet e gjata mbi mbrojtjen.

Një skenar pothuajse identik, u pa edhe në mënyrën se si Gana, u mbrojt ndaj Anglisë.

Nën drejtimin e Thomas Tuchel, Anglia i kushton edhe më shumë rëndësi, tërheqjes së kundërshtarit duke qarkulluar topin në prapavijë, për të sulmuar më pas hapësirat që krijohen.

Gana ishte përgatitur për këtë. Jordan Ayew qëndroi afër portës kundërshtare, për të penguar Elliot Anderson, ndërsa pjesa tjetër e skuadrës u vendos në dy linja kompakte pranë zonës së saj, pa lënë hapësira mes mbrojtjes dhe mesfushës.

Refuzimi i Kepit të Gjelbër dhe Ganës për të ushtruar presion, në momentet kur kundërshtari përpiqej t’i nxirrte nga pozicionet, reflektohet edhe në statistikat.

Një tregues i quajtur PPDA (pasimet që kundërshtari lejohet të kryejë përpara një veprimi mbrojtës) mat intensitetin e presionit. Sa më i lartë të jetë ky numër, aq më pak agresiv ka qenë presioni.

Në barazimin ndaj Spanjës, PPDA-ja mesatare e Kepit të Gjelbër ishte 51,2, ndërsa ajo e Spanjës vetëm 5,9.

Në 15 minutat e para të ndeshjes Angli-Ganë, PPDA-ja e Ganës arriti në 62.

Me fjalë të tjera, të dyja skuadrat zgjodhën me vetëdije, një qasje pasive në mbrojtje.

Megjithatë, me kalimin e minutave, ato e rritën gradualisht intensitetin e presionit, duke tentuar të fitonin iniciativën dhe të shfrytëzonin rastet, në fund të takimit.

Mbulimi i gjithë gjerësisë së fushës

Për të kuptuar pse disa skuadra të vogla patën sukses, vlen të shihet edhe pse disa të tjera dështuan.

Humbja e Arabisë Saudite kundër Spanjës, nxori në pah, një problem të zakonshëm të ekipeve që mbrohen shumë pranë portës.

Në teori, një mbrojtje me pesë lojtarë, duhet të ofrojë më shumë siguri. Në praktikë, ndodhi e kundërta.

Lojtarët sauditë shpesh tërhiqeshin drejt mbajtësit të topit, duke humbur qartësinë në pozicionim.

Edhe mesfusha me katër lojtarë, zhvendosej më shumë seç duhej drejt anës, ku ndodhej topi, duke lënë të pambuluar krahun tjetër të fushës.

Spanja e kuptoi këtë dobësi dhe e ndryshonte vazhdimisht drejtimin e lojës, nga njëri krah në tjetrin.

Në këtë mënyrë, Lamine Yamal dhe Pedro Porro krijuan vazhdimisht situata dy kundër një, ndaj mbrojtësit të krahut të Arabisë Saudite. Pikërisht një mbingarkesë e tillë solli edhe golin e tretë të Spanjës.

Mesfushori i krahut, nuk arriti të rikthehej në kohë për të penguar Porron, ndërsa mbrojtësi i krahut nuk guxoi të dilte ndaj tij, sepse do të linte të lirë Yamalin.

Me kohën dhe hapësirën që kishte, Porro dërgoi një krosim në shtyllën e dytë, topi u devijua në qendër dhe Mikel Oyarzabal e shtyu lehtësisht në rrjetë.

E njëjta dobësi u pa edhe te Suedia në humbjen 5-1 kundër Holandës.

Skema 5-3-2 me vetëm tre mesfushorë, e bëri edhe më të vështirë, mbulimin e gjerësisë së fushës.

Holanda e mbajti të tërhequr mbrojtësin e majtë suedez, me anë të sulmuesit të krahut, ndërsa Denzel Dumfries përfitonte nga hapësirat për të depërtuar nga pas.

Suedia nuk arriti ta përballonte këtë situatë numerike dhe u përmirësua vetëm pasi kaloi në skemën 4-5-1, ashtu si Kepi i Gjelbër dhe Gana.

Provoko kundërshtarin dhe më pas godit shpejt

Nëse skuadrat më pak të favorizuara duan të marrin rezultate ndaj ekipeve të mëdha, nuk mjafton vetëm të mbrohen mirë. Ato duhet të jenë të rrezikshme edhe kur kanë topin.

Afrika e Jugut, për shembull, realizoi 14 goditje ndaj shtatë të Koresë së Jugut, edhe pse zotëroi vetëm 31% të topit.

Sekreti ishte mënyra se si e nxirrte topin nga mbrojtja. Në vend që portieri ta dërgonte menjëherë larg, skuadra niste aksionet me pasime të shkurtra, duke tërhequr presionin e kundërshtarëve dhe më pas, duke luajtur topa të gjatë e të saktë drejt zonave ku kishte hapësirë.

Kjo strategji u përdor edhe nga Kepi i Gjelbër dhe Iraku. Lojtarët vendoseshin larg njëri-tjetrit me qëllim që kundërshtarët, nëse dëshironin t’i pengonin individualisht, të detyroheshin të përshkonin distanca të mëdha.

Kjo krijonte kohën e nevojshme, për të gjetur mesfushorët dhe sulmuesit në hapësirë.

Natyrisht, kjo mënyrë loje mbart edhe rreziqe. Afrika e Jugut kundër Meksikës dhe Iraku kundër Norvegjisë pësuan gola pikërisht, duke tentuar të dilnin me top nga mbrojtja.

Megjithatë, të dyja skuadrat krijuan edhe shumë raste të mira dhe me pak më shumë saktësi në finalizim, historia e ndeshjeve mund të kishte qenë krejt tjetër.

Futbolli është një lojë kompromisesh

Kur Koreja e Jugut ushtroi presion të lartë, Afrika e Jugut nuk hoqi dorë nga filozofia e saj. Ajo vazhdoi të luante përpara me pasime më të sakta dhe, sapo kaloi mesfushën, sulmoi me shpejtësi, duke shënuar golin, që i siguroi kualifikimin në fazën tjetër.

Dhe, sigurisht, pak cilësi individuale

Të gjitha këto shembuj tregojnë se diferenca taktike mes kombëtareve është zvogëluar ndjeshëm, pavarësisht pozicionit të tyre në renditjen botërore.

Edhe skuadrat me lojtarë më pak cilësorë, mund t’u shkaktojnë probleme rivalëve më të fortë, nëse organizohen mirë dhe veprojnë si një grup i bashkuar.

Megjithatë, në këtë nivel duhet edhe pak fat dhe paraqitje të jashtëzakonshme individuale.

Në këtë Botëror, portieri 40-vjeçar Vozinha fitoi admirimin e tifozëve me pritjet spektakolare ndaj Spanjës.

Ndërkohë, portieri i Curaçaos, Eloy Room, barazoi rekordin e Kupës së Botës me 15 pritje në një ndeshje, duke ndihmuar vendin e tij të fitonte pikën e parë.

Taktikat mund t’i ndihmojnë kombëtaret më të vogla të ngushtojnë diferencën ndaj gjigantëve dhe t’i detyrojnë ata të luajnë sipas ritmit të tyre.

Por, atmosfera unike e Kupës së Botës duket se nxjerr gjithashtu në pah, te shumë futbollistë, një nivel performance, që ndoshta as vetë nuk e dinin se e zotëronin. //a.i/

The post BOTËRORI 2026 – Revolucioni i skuadrave “modeste”: Si po ndryshon harta e Kupës së Botës appeared first on Agjencia Telegrafike Shqiptare.

LONDËR, 23 qershor /ATSH/ – Citate “fake” në rrjete sociale. Intervista pas ndeshjes që shpërndahen si zjarr. Thashetheme që dalin jashtë kontrollit. Cristiano Ronaldo, në Botërorin e tij të gjashtë – që për shumëkënd është edhe i fundit – ka qenë i destinuar të pushtojë titujt e medieve, por ndoshta jo kaq herët dhe jo për arsyet që po shohim në këtë turne, shkruan BBC.

Gjithçka nisi me paraqitjen, jo në nivelin e zakonshëm të 41-vjeçarit, në barazimin 1–1 të Portugalisë ndaj DR Kongos në ndeshjen e parë të Botërorit.

Më pas, një intervistë rutinë e Joao Neves, pas ndeshjes u interpretua krejt ndryshe në rrjet, duke ndezur një valë reagimesh dhe duke futur kampin portugez në një lloj kaosi mediatik.

Neves nuk është i panjohur me situata të tilla të vështira para medieve. Në mars 2024, Benfica humbi 5–0 ndaj Porto. Dhe megjithëse ai kishte humbur nënën vetëm pak ditë më parë, 19-vjeçari atëherë u detyrua të dilte dhe të shpjegonte humbjen.

Në krahasim me atë natë të rëndë në “Dragão”, barazimi me DR Kongon dukej i vogël, por reagimet e tij pas ndeshjes u kthyen në qendër të debateve.

I pyetur për rolin e Ronaldos në skuadër, Neves u shpreh: “E dimë çfarë ka bërë Ronaldo për kombëtaren, por në këtë moment ai është njëri prej nesh. Një lojtar si gjithë të tjerët, që po përpiqet të ndihmojë skuadrën”.

Kaq mjaftoi që situata të shpërthente. Tifozët e Ronaldos mbushën rrjetet sociale me komente të ashpra ndaj Neves, Bruno Fernandes dhe të tjerëve, duke i akuzuar për mungesë respekti ndaj kapitenit.

Edhe sipas standardeve të një superylli global si Ronaldo, reagimi u konsiderua i pazakontë.

Analisti Vítor Pinto nga “Record” e përshkroi situatën si një shenjë të një ndarje të rrezikshme brenda kampit portugez.

Situata u përkeqësua edhe më shumë kur persona të afërt me Ronaldon u përfshinë në debat.

Partnerja e tij Georgina Rodríguez reagoi ndaj një citimi të rremë, të atribuuar në rrjete sociale, ndërsa motrat e tij shpërndanë postime që sugjeronin se ylli portugez po anashkalohej qëllimisht.

Edhe në media televizive portugeze, figura pranë Ronaldos cituan deklarata të pavërteta për ta mbrojtur.

Kjo situatë nuk mbeti në rrjet. Pati një përfshirje edhe të kampit të Portugalisë në Palm Beach, duke e bërë atmosferën edhe më të tensionuar.

Në konferenca për shtyp u ngrit shpesh pyetja: a është Portugalia e ndarë mes atyre që janë “pro Ronaldos” dhe atyre që nuk janë?

“Ky nuk duhet të ishte fare një debat”, u përgjigj Rúben Dias me një ton të prerë.

Ndërsa Diogo Dalot shtoi se nëse do të hynin në këtë lojë akuzash, skuadra nuk do të dilte kurrë prej saj.

Portugalia tani e di se vetëm një fitore bindëse ndaj Uzbekistanit mund të ulë tensionin – dhe idealisht, me Ronaldon që gjen rrugën drejt golit.

“Si një skuadër që sillet rreth një lojtari”

Ronaldo nuk ka shënuar në 10 ndeshje radhazi në turne të mëdha, një seri që vazhdon nga penalltia ndaj Ganës në Botërorin 2022.

Në ndeshjen ndaj DR Kongos, ai pati tre goditje drejt portës, më shumë se çdo lojtar tjetër, por pa sukses në kuadrat.

Analisti Luís Aguilar theksoi se debati rreth tij shpesh e zhvendos fokusin nga skuadra.

“Është sikur Portugalia po luan në ‘vendin e Ronaldos’, jo në një kompeticion normal. Sikur gjithçka duhet të funksionojë për të, edhe kur nuk është më lojtari më i mirë në fushë”, tha ai.

Edhe kritikat për rolin e tij në formacion po shtohen. Nën drejtimin e Roberto Martínez, Ronaldo është zëvendësuar vetëm një herë, para minutës së 60-të në 30 ndeshje si titullar, një tregues se ai vazhdon të trajtohet si figurë e paprekshme.

Disa analistë shkojnë më larg, duke thënë se problemi nuk është vetëm mungesa e golave, por edhe ndikimi në mënyrën si luan skuadra.

Sipas tyre, lojtarët shpesh kërkojnë t’ia pasojnë topin atij edhe kur ka opsione më të mira, duke ngadalësuar lojën e Portugalisë.

Megjithatë, brenda federatës dhe kampit portugez, askush nuk dëshiron ta kthejë këtë në një konflikt të hapur.

Portugalia, në fund të fundit, kërkon vetëm një gjë: qetësi – dhe gola që e rikthejnë Ronaldon në qendër të skenës për arsyet e duhura. //a.i/

The post BOTËRORI 2026 – Si të zgjidhësh një “problem” si Ronaldo? appeared first on Agjencia Telegrafike Shqiptare.

NJU JORK, 22 qershor /ATSH-DPA/ – Norvegjia synon të vazhdojë nisjen e shkëlqyer në Kupën e Botës 2026 dhe Erling Haaland është në krye të një grupi lojtarësh që kanë një motivim të veçantë në këtë turne.

Baballarët e Haaland, Alexander Sorloth dhe Kristian Thorstvedt ishin pjesë e kombëtares norvegjeze që u eliminua në fazën e grupeve të Kupës së Botës 1994, e cila gjithashtu u zhvillua në Shtetet e Bashkuara.

Tani, bijtë e Alf-Inge “Alfie” Haaland, Goran Sorloth dhe Erik Thorstvedt shpresojnë të arrijnë më larg, pas fitores bindëse 4-1 ndaj Irakut në ndeshjen e parë.

Norvegjia do të përballet sot me Senegalin dhe mund të sigurojë kualifikimin për në fazën me eliminim direkt.

Më pas, skandinavët do të mbyllin fazën e grupeve të premten kundër njërit prej favoritëve të turneut, Francës.

Kujtimet e vitit 1994 vazhdojnë të jenë të gjalla. Haaland u argëtua kur pa fotografi të babait të tij nga ai Botëror.

“Duket shumë i ri. Nuk e kam parë kurrë me flokë kaq të gjatë,” tha sulmuesi i Norvegjisë, i cili, ashtu si i ati, ka luajtur edhe për Manchester Cityn.

Megjithëse Haaland është ylli më i madh i skuadrës, Alexander Sorloth dhe Kristian Thorstvedt kanë gjithashtu një rol të rëndësishëm. Sulmuesi i Atletico Madridit, Sorloth, deklaroi së fundmi se është “thjesht fantastike” të luash në një Kupë Bote si babai i tij, duke shtuar se ai “më ka mësuar gjithçka që di për futbollin”.

Sorloth kujtoi se kujtimi i tij i parë nga një Kupë Bote është turneu i vitit 2002 në Japoni dhe Korenë e Jugut, kur familja ndodhej me pushime në Danimarkë. “Më kujtohet sa i emocionuar isha duke parë Kupën e Botës me babanë tim”, tha ai.

Brezi i vitit 2026 po ngjall entuziazëm të madh në Norvegji. Në ndeshjen kundër Senegalit në Nju Xhersey, skuadra do të ketë mbështetjen e princeshës trashëgimtare Ingrid Alexandra dhe princit Sverre Magnus, fëmijët e princit të kurorës Haakon dhe princeshës së kurorës Mette-Marit.

Ndërkohë, tradita e tifozëve norvegjezë për të imituar lëvizjet e vozitjes së anijeve vikinge është përhapur edhe në Parlamentin e Norvegjisë, ku deputetë nga të gjitha partitë politike e përdorën këtë gjest simbolik për të mbështetur kombëtaren para ndeshjes së radhës. /Ad.Ab./ a.jor.

The post BOTËRORI 2026 – Norvegjia ëndërron Kupën e Botës sipas parimit ”bëmë baba të të ngjaj” appeared first on Agjencia Telegrafike Shqiptare.

LOS ANXHELES, 21 qershor /ATSH-AA/ – Futbollistit iranian Mehdi Torabi i ka skaduar viza amerikane pas ndeshjes hapëse të ekipit kombëtar në Kupën e Botës, duke e lënë mesfushorin në pritje të një lejeje të re për t’iu bashkuar sërish skuadrës në SHBA, njoftoi organi i futbollit të Iranit.

Sipas Federatës së Futbollit të Iranit, vizat e lëshuara për anëtarët e ekipit kombëtar të Iranit në përgjithësi ishin të vlefshme për hyrje të shumëfishta, por viza e Torabit ishte lëshuar vetëm me një hyrje.

Federata tha se Torabi udhëtoi me ekipin në Los Anxheles për ndeshjen hapëse të Iranit kundër Zelandës së Re.

Megjithatë, pasi u largua nga SHBA-ja pas ndeshjes, viza e tij skadoi.

Autoritetet iraniane të futbollit kanë nisur procedurat për të siguruar vizë të re për lojtarin në mënyrë që ai t’i bashkohet sërish ekipit kombëtar për ndeshjet e ardhshme të Kupës së Botës.

Nuk u dha menjëherë asnjë afat kohor për lëshimin e vizës së re.

Ndeshja hapëse e Iranit kundër Zelandës së Re përfundoi 2-2./  a.jor.

The post BOTËRORI 2026 – Futbollistit iranian i skadon viza amerikane pas ndeshjes së parë në Kupën e Botës appeared first on Agjencia Telegrafike Shqiptare.

VJENË, 21 qershor /ATSH-DPA/ – Tifozët austriakë të futbollit po argëtohen me një skenar të pazakontë të krijuar nga inteligjenca artificiale, ku Austria shpallet kampione e Botërorit 2026 dhe vendi transformohet rrënjësisht në dekadat që pasojnë.

Në videon e realizuar nga kompania vjeneze “Sequence Five”, sulmuesi veteran Marko Arnautoviç paraqitet si president i Austrisë, ndërsa një statujë e David Alaba zë vendin e monumentit të kompozitorit të famshëm Johann Strauss në Vjenë.

Filmi, i krijuar me ndihmën e inteligjencës artificiale, paraqet një vizion imagjinar të Austrisë pas 30 vitesh, nëse kombëtarja do të arrinte surprizën e madhe duke fituar Kupën e Botës 2026.

Videoja u publikua pas ndeshjes hapëse të austriakëve në turne, ku ata mposhtën Jordaninë me rezultatin 3-1.

Një nga figurat kryesore të këtij skenari është Arnautoviç i cili shënoi ndaj Jordanisë dhe u bë golashënuesi më i moshuar i Austrisë në historinë e Kupës së Botës, në moshën 37-vjeçare.

Sulmuesi kishte bërë më herët shaka për një kandidim të mundshëm për president në një reklamë sponsorizuese, ide që filmi e çon në ekstrem.

Në videon futuriste, Alaba shfaqet i moshuar dhe kujton me emocion ditën e triumfit historik.

“Kur e kujtoj atë ditë, ende më dridhet trupi”, thotë mbrojtësi në rrëfimin e gjeneruar nga IA, duke nënvizuar ndikimin që do të kishte një sukses i tillë në identitetin kombëtar të Austrisë.

Edhe pse mbetet vetëm një fantazi teknologjike, filmi ka ngjallur buzëqeshje dhe optimizëm te tifozët austriakë, të cilët po shijojnë rikthimin e kombëtares së tyre në Kupën e Botës për herë të parë që nga viti 1998.

Për momentin, rruga drejt trofeut është ende shumë e gjatë, por imagjinata tashmë ka nisur të fluturojë./  /Ad.Ab./ a.jor.

The post BOTËRORI 2026 – IA nxjerr Austrinë kampione të botës? appeared first on Agjencia Telegrafike Shqiptare.

MEKSIKO SITI, 19 qershor /ATSH-AFP/ – Një personazh i pazakontë po tërheq vëmendjen e mijëra tifozëve gjatë Kupës së Botës 2026 në Meksikë.

Merlini, një rosë dyvjeçare e veshur me fanellën jeshile të kombëtares meksikane, është kthyer në një fenomen viral dhe një nga figurat më të dashura të turneut.

Gjithçka nisi kur pronarja e tij, Karla Ivette Gomez, u filmua duke ecur në rrugët e Meksiko Sitit me Merlinin pranë saj.

Videoja u shpërnda me shpejtësi në rrjetet sociale dhe brenda pak ditësh rosa fitoi famë kombëtare.

FIFA e ka quajtur madje ambasadoren e Meksikës, ndërsa kombëtarja publikoi një imazh simbolik ku Merlini fluturonte mbi stadiumin e Guadalajarës.

Fanella me numrin 12, simbol i tifozëve, është bërë marka e tij dalluese.

Popullariteti i Merlinit ka shkuar aq larg sa furra buke prodhojnë ëmbëlsira me figurën e saj, ndërsa televizione të ndryshme e ftojnë për ”analiza” të ndeshjeve.

Përgjigjja e saj ndaj pyetjeve sportive mbetet gjithmonë e njëjtë ”kuak, kuak, kuak”.

Në sheshin historik “Bellas Artes”, dhjetëra gazetarë dhe qindra kalimtarë mblidhen për ta parë nga afër.

Sapo mbërrin, njerëzit nxitojnë të bëjnë foto dhe video, duke e trajtuar si një yll të vërtetë.

“Nuk e imagjinuam kurrë se do të bëhej kaq e famshme”, thotë Karla Gomez.

Merlini ushqehet me fruta, perime, peshk dhe insekte, por pronarja pranon me humor se herë pas here rosa shijon edhe ndonjë taco meksikane.

Veterineri i ka thënë së fundmi se është pak mbi peshë, por kjo nuk duket se e pengon të vazhdojë turneun e tij të famës.

Historia e Merlinit të kujton traditën e kafshëve që bëhen simbole të Kupës së Botës, si oktapodi i famshëm Paul në vitin 2010.

Megjithatë, këtë herë është një rosë me fanellën e Meksikës që po fiton zemrat e tifozëve dhe po sjell një dozë humori e gëzimi në festën më të madhe të futbollit. /Ad.Ab./ a.jor.

The post BOTËRORI 2026 – Merlini, rosa që po shndërrohet në yllin e Kupës së Botës appeared first on Agjencia Telegrafike Shqiptare.

NJU JORK, 18 qershor /ATSH-AFP/- Pjesëmarrja e kombëtares së Haitit në Kupën e Botës 2026, për herë të parë që nga viti 1974, ka sjellë një valë entuziazmi dhe krenarie te komuniteti haitian në Nju Jork.

Për shumë emigrantë, të cilët prej muajsh përballen me pasiguri për shkak të politikave më të ashpra të emigracionit të administratës së presidentit Donald Trump, futbolli është bërë një arsye e rrallë për festë dhe bashkim.

Në lagjen e njohur si ”Little Haiti” në Brooklyn, banorët thonë se ngjyrat kuqezi të flamurit haitian do të zënë vendin e simboleve të ekipit të basketbollit “New York Knicks”, kampion i fundit i NBA-së.

Aktori haitian Vladimir Calixte tha se rikthimi në Botëror është një moment i veçantë për komunitetin dhe se mbështetja për ekipin kombëtar po ndihet kudo.

Komuniteti haitian në SHBA është përballur me sfida të shumta vitet e fundit.

Administrata e presidentit Trump ka pezulluar vizat turistike dhe të emigracionit për Haitin, ndërsa po kërkon edhe heqjen e statusit të mbrojtjes së përkohshme për qindra mijëra haitianë që jetojnë në Shtetet e Bashkuara.

Në këtë klimë pasigurie, suksesi i ekipit kombëtar ka krijuar një ndjenjë uniteti dhe shprese.

Artistja haitiane me bazë në Brooklyn, Lyne Lucien, e cila ka bashkëpunuar me “FOX Sports” dhe FIFA-n, tha se kombëtarja pasqyron vetë diasporën haitiane, pasi shumë prej futbollistëve janë rritur jashtë vendit.

Sipas saj, Haiti shtrihet shumë përtej kufijve të ishullit dhe komuniteti vazhdon të mbetet i bashkuar pavarësisht se ndodhet në vende të ndryshme të botës.

Megjithatë, atmosfera festive është zbehur disi nga frika se agjentët e shërbimit amerikan të emigracionit mund të jenë të pranishëm në stadiume gjatë Botërorit.

Shumë emigrantë, madje edhe ata me dokumente të rregullta ose me shtetësi amerikane, ndihen të pasigurt për të marrë pjesë në ndeshje.

Pas humbjes në ndeshjen e parë ndaj kombçtares së Skocisë, Haiti do të përballet nesër  me Brazilin.

Shumë haitianë e konsiderojnë Brazilin si një simbol të futbollit botëror, por këtë herë zemrat e tyre do të jenë plotësisht me kombëtaren e Haitit, e cila po shkruan një kapitull historik për vendin dhe diasporën e saj./ /Ad.Ab./ a.jor.

The post KOMENT – Rikthimi i Haitit në Botëror ngjall krenari komunitare në Nju Jork appeared first on Agjencia Telegrafike Shqiptare.

HUSTON, 18 qershor /ATSH-DPA/ – Një tifoz i Gjermanisë ka nisur procedura ligjore pasi një foto e manipuluar me inteligjencë artificiale, ku ai paraqitej si Adolf Hitler në tribunat e Botërorit 2026, u përhap masivisht në rrjetet sociale.

Jan Weitzel, nga qyteti Alsfeld, tha për transmetuesin publik gjerman “Hessischer Rundfunk” se mbeti i tronditur kur mësoi se imazhi i rremë po qarkullonte gjerësisht pas fitores 7-1 të Gjermanisë ndaj Curaçao në Houston.

Edhe pse ai vetë nuk identifikohet qartë në foto, djali i tij shihet qartë në imazhin e manipuluar.

Një postim në rrjetin social X, që pretendonte se tregonte tifozë gjermanë duke festuar golin me penallti të Kai Havertz pranë një figure që ngjante me Hitlerin, mblodhi mbi një milion shikime.

Sipas ekipit të verifikimit të fakteve të dpa-së, përmbajtja ishte krijuar me mjete të inteligjencës artificiale të zhvilluara nga Open AI.

Gjithashtu qarkulluan video të rreme që pretendonin se tifozët gjermanë po bënin përshëndetjen naziste.

Weitzel deklaroi se ka raportuar rastin te autoritetet në Gjermani dhe në Shtetet e Bashkuara, ndërsa familjarë dhe miq të tij kanë bërë gjithashtu kallëzime.

Ai tha se ka pasur kontakte edhe me Zyrën Federale të Hetimit  (FBI), ndërsa autori i dyshuar besohet të jetë nga SHBA-ja.

Pavarësisht incidentit, Weitzel nuk dëshiron që ngjarja t’ia prishë përvojën në Botëror. Ai ka konfirmuar se do të udhëtojë me djalin e tij në Toronto për të ndjekur ndeshjen e radhës së Gjermanisë kundër Bregut të Fildishtë, duke theksuar se nuk do të lejojë që kjo situatë t’ua zbehë emocionet e turneut./  /Ad.Ab./ a.jor.

The post BOTËRORI 2026 – Tifozi gjerman padit autorët e fotos virale me Hitlerin, e krijuar nga IA appeared first on Agjencia Telegrafike Shqiptare.

DYSELDORF, 17 qershor /ATSH-DPA/ – Ish-sulmuesi i Gjermanisë, Lukas Podolski ka deklaruar se nuk është më i gatshëm të zgjohet në mes të natës për të ndjekur ndeshjet e Kupës së Botës, përveç rasteve kur luan kombëtarja gjermane në fazat vendimtare të turneut.

Fituesi i Botërorit 2014 tha për “Sport1” se turneu i zgjeruar që po zhvillohet në SHBA, Meksikë dhe Kanada nuk ka të njëjtin prestigj si kompeticionet e mëparshme të zhvilluara në atë rajon. Për shkak të diferencës kohore, shumë ndeshje do të luhen gjatë natës sipas orës evropiane.

“Për këtë jam jashtë”, u shpreh Podolski.

“Arsyeja e vetme pse ngrihesha natën ishte për të parë Chicago Bulls ose Mike Tyson. E mbaj mend ende nga fëmijëria ime”, tha ai.

Podolski, 41-vjeç,  shtoi se do të bënte një përjashtim vetëm nëse kombëtarja gjermane  do të luante në fazën me eliminim direkt dhe ndeshja do të niste në orët e para të mëngjesit.

“Atëherë sigurisht që do ta shikoja”,  tha ai.

Megjithatë, Podolski theksoi se nuk dëshiron më ta organizojë jetën e tij rreth futbollit.

“Kam familje, jemi me pushime dhe fëmijët e mi kanë qëndruar pa mua për një kohë të gjatë kohët e fundit. Tani fokusi im janë fëmijët, jo futbolli”, deklaroi ish-sulmuesi.

Podolski, i cili zhvilloi 130 ndeshje me Gjermaninë dhe shënoi 49 gola, i dha fund karrierës muajin e kaluar te Gornik Zabrze në vendin e tij të lindjes, Poloni.

Gjatë karrierës ai luajti edhe për klube të mëdha si “FC Bayern Munich”, “Arsenal F.C.” dhe “Galatasaray S.K”./  /Ad.Ab./ a.jor.

The post BOTËRORI 2026 – Podolski: Nuk zgjohem më natën për ndeshjet e futbollit appeared first on Agjencia Telegrafike Shqiptare.

DALLAS, 17 qershor /ATSH/ – Kur Luka Modriç luajti për herë të parë kundër Anglisë në tetor të vitit 2006, bota e futbollit ishte krejt ndryshe.

Tony Blair ishte ende kryeministër i Britanisë së Madhe, Italia sapo ishte shpallur kampione bote, ndërsa rrjetet sociale sapo po lindnin.

Në stadiumin “Maksimir” të Zagrebit, Kroacia fitoi 2-0 ndaj Anglisë në një ndeshje që mbeti e famshme për autogolin komik të portierit Paul Robinson pas një pasimi të Gary Neville, sipas “The Guardian”.

Modriç, atëherë vetëm 21 vjeç, luajti të gjithë takimin dhe ishte në fillimet e një karriere që do të hynte në histori.

Ajo fitore shënoi nisjen e një epoke të jashtëzakonshme për Kroacinë. Në vitet që pasuan, Modriç u shndërrua në figurën qendrore të kombëtares, duke mbijetuar përmes brezave të ndryshëm lojtarësh dhe trajnerësh. Ai u bë simboli i mentalitetit luftarak të kroatëve, një lider që nuk pranonte dorëzimin edhe në momentet më të vështira.

Anglia ka qenë një kundërshtar i rëndësishëm në këtë histori. Një vit pas triumfit në Zagreb, Kroacia i shkaktoi anglezëve një tjetër goditje të dhimbshme në “Wembley”, duke i mundur 3-2 dhe duke i lënë jashtë Euro 2008. Edhe pse kroatët e kishin siguruar tashmë kualifikimin, ata luajtën me krenari dhe fituan, duke ndërtuar një vetëbesim që do t’i shoqëronte në vitet e ardhshme.

Megjithatë, Kroacia e asaj kohe ende nuk kishte fituar plotësisht karakterin që sot lidhet me Modriçin. Në Euro 2008, pasi dominuan fazën e grupeve, kroatët u eliminuan në mënyrë dramatike nga Turqia në çerekfinale. Modriç humbi një penallti dhe skuadra nuk arriti të përballonte goditjen psikologjike. Pikërisht nga ato zhgënjime nisi formimi i liderit që do të frymëzonte kombin në dekadën e ardhshme.

Momenti më i madh kundër Anglisë erdhi në gjysmëfinalen e Kupës së Botës 2018 në Moskë. Pasi anglezët kaluan në avantazh të hershëm, Kroacia reagoi dhe fitoi 2-1 pas kohës shtesë, duke siguruar finalen e parë botërore në historinë e saj. Modriç nuk ishte protagonisti kryesor i asaj ndeshjeje, por ishte zemra e ekipit dhe figura që mbante bashkuar një skuadër të etur për histori.

Tani, gati 20 vjet pas përballjes së parë me Anglinë, Modriç përgatitet për një tjetër duel.

Në moshën 40-vjeçare, ai pritet të regjistrojë paraqitjen e tij të 199-të me fanellën kroate. Edhe pse nuk ka më energjinë e viteve të arta, përvoja, inteligjenca dhe personaliteti i tij vazhdojnë të jenë armët më të forta të Kroacisë.

Shumë besojnë se Kupa e Botës 2026 mund të jetë akti i fundit i karrierës ndërkombëtare të legjendës kroate. Anglia mbetet favorite falë ritmit, fuqisë fizike dhe brezit të ri të talentuar. Por historia ka treguar se Luka Modriç ka ditur t’u prishë planet anglezëve më shumë se një herë. Për këtë arsye, askush nuk guxon ta përjashtojë mundësinë që mjeshtri kroat të realizojë edhe një “vallëzim të fundit” të paharrueshëm kundër “Tre Luanëve”. /Ad.Ab./  a.jor.

The post BOTËRORI 2026 – Modriç makthi i Anglisë prej dy dekadash appeared first on Agjencia Telegrafike Shqiptare.

NJU MEKSIKO, 17 qershoor /ATSH/ – Ka një aspekt që në këto ditët e para të Kupës së Botës po shkakton shumë debat në Shtetet e Bashkuara dhe jo vetëm: pushimet e reja të detyrueshme për hidratim (hydration break), të vendosura për herë të parë në këtë edicion të Botërorit, shkruan lfattoquotidiano.it.

Zyrtarisht ato shërbejnë për të mbrojtur shëndetin e lojtarëve, por shumë njerëz kanë vënë në dukje se përfaqësojnë mbi të gjitha një mundësi të madhe tregtare.

Arsyeja?

Zgjasin tre minuta dhe televizionet e shfrytëzojnë këtë kohë për të transmetuar reklama që vlejnë miliona e miliona dollarë.

Michael Johnson, analist i S&P Global, ka deklaruar – siç raporton La Gazzetta dello Sport – se çdo hapësirë reklamuese “mund të arrijë çmime të ngjashme me ato të Super Bowl-it, mes 7 dhe 9 milionë dollarëve”.

Polemika shpërtheu gjatë ndeshjes hapëse mes Meksikës dhe Afrikës së Jugut.

Në minutën e 24-t të lojës, me një temperaturë rreth 23 gradë Celsius në Mexico City (një temperaturë normale për verën meksikane), arbitri ndaloi takimin për t’u dhënë mundësi futbollistëve të pinin ujë.

Një ndërprerje prej tre minutash që, në transmetimet televizive amerikane, u shndërrua menjëherë në një bllok reklamash kushtuar sponsorëve të turneut.

Sipas disa gazetarëve ndërkombëtarë, problemi nuk është vetë ekzistenca e këtyre pushimeve në kushte klimatike ekstreme, por vendimi i FIFA-s për t’i bërë ato të detyrueshme në të gjitha 104 ndeshjet e Kupës së Botës, edhe kur temperaturat nuk janë realisht aq të larta.

Një zgjedhje e paprecedentë që – siç argumenton edhe gazeta The Independent – ndërpret ritmin e lojës dhe u ofron transmetuesve televizivë hapësira të reja reklamuese.

Efekti u ndje menjëherë në stadiumin Azteca. Pas një fillimi intensiv, me ritëm të lartë dhe mjaft argëtues, ndalesa e papritur e theu rrjedhën e ndeshjes.

Tifozët linin vendet e tyre për disa minuta, muzika me volum të lartë ndërpriste atmosferën konkurruese që ishte krijuar deri në atë moment dhe ekranet gjigante shfaqnin përmbajtje argëtuese në pritje të rifillimit të lojës.

Pikërisht për këtë arsye shumë njerëz në botën e futbollit mendojnë se këto pushime kanë kuptim vetëm kur temperaturat janë veçanërisht të larta.

Mes tyre është edhe trajneri i kombëtares së Shteteve të Bashkuara, Mauricio Pochettino, i cili ka deklaruar se i konsideron të panevojshme kur kushtet klimatike janë normale: “Nuk më pëlqejnë. Më pëlqejnë vetëm në kushte ekstreme”.

Në të njëjtën linjë është shprehur edhe trajneri i Francës, Didier Deschamps: “E ndryshon plotësisht futbollin. Ndoshta një skuadër po luan shumë mirë dhe tre minuta mjaftojnë për t’i prishur ritmin”.

Madje ka edhe nga ata që kanë vendosur t’i “bojkotojnë” këto pushime.

Gazetari Alejandro Berry i Telemundo-s (televizion në gjuhën spanjolle në SHBA) iu drejtua shikuesve me këto fjalë: “Ne nuk transmetojmë reklama gjatë pushimit për hidratim. Bashkohuni me ne për të shijuar futbollin pa ndërprerje”.

Edhe Carli Lloyd, ish-kampione e futbollit, nuk i kurseu kritikat: “E urrej”. Natyrisht, i referohej ndërprerjes së lojës.

Sipas analizës së publikuar nga The Independent, pas vendimit të FIFA-s qëndrojnë kryesisht arsye ekonomike.

Këto pushime e shndërrojnë çdo ndeshje në një lloj eventi të ndarë në katër segmente, në stilin e basketbollit, ku mes time-out-eve dhe katër periodave ndërprerjet janë të shumta.

Kjo rrit ndjeshëm numrin e hapësirave reklamuese në dispozicion. Duke pasur parasysh se Botërori 2026 parashikon një numër rekord ndeshjesh, vlera tregtare e këtyre ndërprerjeve mund të arrijë shifra gjigante për transmetuesit dhe sponsorët.

Kjo çështje futet në një debat më të gjerë mbi komercializimin në rritje të futbollit. Kupa e Botës në Amerikën e Veriut është tashmë më fitimprurësja në histori dhe, sipas FIFA-s, pritet të gjenerojë të ardhura mbi 10 miliardë paund. Për këtë arsye debati ka shumë gjasa të vazhdojë edhe pas përfundimit të turneut.

Nëse sistemi i “hydration break” do të konfirmohet edhe në të ardhmen, pushimet për hidratim mund të bëhen një element i përhershëm në ngjarjet më të mëdha ndërkombëtare sportive.

Edhe pse – siç shkruan The Independent – “nuk është e qartë pse dikujt do t’i duheshin tre minuta për të pirë një gllënjkë ujë”.   /os/

The post BOTËROR2026 – Pushimet për hidratimin e lojtarëve: shëndet për ta apo biznes milionash nga reklamat? appeared first on Agjencia Telegrafike Shqiptare.

NJU JORK, 16 qershor /ATSH-AFP/ – Senegali po përgatitet për pjesëmarrjen e tij në Kupën e Botës 2026 me ambicie të mëdha, megjithëse ekipi do të përballet me një mungesë të rëndësishme; tifozët e tij nuk do të mund ta mbështesin në stadiume.

Autoritetet amerikane kanë refuzuar dhënien e vizave për shumë mbështetës senegalezë, si pasojë e rregullave të rrepta të emigracionit që zbatohen nga një prej vendeve organizatore të turneut.

Sekretari i përgjithshëm i Federatës senegalese të Futbollit, Abdoulaye Sow, e quajti “të pakëndshme” situatën, por theksoi se vendi i tij duhet të respektojë ligjet amerikane.

Ai pranoi se mungesa e tifozëve do të jetë një pengesë, pasi Senegali tradicionalisht ka pasur mbështetje të madhe në kompeticionet ndërkombëtare.

Ndeshja e parë e Senegalit do të zhvillohet  sot kundër France në Nju Xhersi, ndërsa më pas do të përballet me Norvegjinë.

Edhe pse tifozët zyrtarë nuk do të jenë të pranishëm, drejtuesit e ekipit shpresojnë se komunitetet afrikane dhe senegaleze që jetojnë në SHBA do të krijojnë një atmosferë mbështetëse.

Kjo është paraqitja e katërt e Senegalit në një Kupë Bote. Arritja më e madhe e kombëtares mbetet çerekfinalja e vitit 2002, ndërsa në edicionin e fundit në Katar skuadra arriti deri në fazën e 1/8-ave. Për këtë arsye, Senegali konsiderohet një nga ekipet që mund të surprizojnë edhe këtë vit.

Skuadra vazhdon të udhëhiqet nga ylli Sadio Mane dhe renditet e 16-ta në botë.

Megjithatë, muajt e fundit janë shoqëruar me polemika pas finales së Kupës së Afrikës, ku Senegali fitoi ndaj Marokut, por më pas iu hoq titulli nga Konfederata Afrikane e Futbollit për shkak të incidenteve gjatë ndeshjes.

Federata senegaleze e ka apeluar vendimin në Gjykatën of Arbitrazhit dhe pret vendimin përfundimtar.

Sipas Sow, për sa kohë çështja është ende në shqyrtim, Senegali e konsideron veten kampion të Afrikës.

Megjithatë, prioriteti i ekipit mbetet Kupa e Botës, ku synon të dëshmojë vlerat e tij pavarësisht vështirësive jashtë fushës. /Ad.Ab./

The post BOTËRORI 2026 – Tifozët senegalezë nuk lejohen të udhëtojnë drejt SHBA-së appeared first on Agjencia Telegrafike Shqiptare.

NJU JORK, 15 qershor /ATSH-AFP/ – Tifozët që po ndjekin ndeshjet e para të Kupës së Botës 2026 në Shtetet e Bashkuara të Amerikës mund të habiten kur të shohin emra të panjohur stadiumesh.

Kjo sepse FIFA ka zbatuar politikën e saj të njohur si “stadiumi i pastër” , e cila ndalon shfaqjen e markave të kompanive që nuk janë sponsorë zyrtarë të turneut.

Si rezultat, stadiumi i njohur zakonisht si “SoFi Stadium” do të quhet gjatë turneut “Los Angeles Stadium”.

Në mënyrë të ngjashme, “MetLife Stadium” do të quhet “New York New Jersey Stadium”, ndërsa “NRG Stadium” do të njihet si “Houston Stadium”.

Këto ndryshime nuk i kanë pëlqyer sponsorëve, të cilët kanë paguar qindra miliona dollarë për të siguruar të drejtat e emërtimit të stadiumeve.

Megjithatë, ekspertët e marketingut sportiv theksojnë se kompanitë kishin pak mundësi për ta shmangur këtë situatë për shkak të rregullave të FIFA-s.

Sipas FIFA-s, emrat zyrtarë të stadiumeve për Kupën e Botës 2026 janë përshtatur me emrat e qyteteve pritëse dhe mund të ndryshojnë nga emërtimet që përdoren zakonisht në nivel lokal.

Një përjashtim është “BC Place në Kanada”, i cili nuk preket nga kjo rregullore. Ndërkohë, në “Mercedes-Benz Stadium”, FIFA ka lejuar që logoja gjigante e prodhuesit të makinave “Mercedes-Benz” të mbetet e dukshme, pasi mbulimi i saj do të rrezikonte dëmtimin e strukturës së çatisë.

Në Seattle, kompania “Lumen” zgjodhi ta trajtonte situatën me humor.

Ajo publikoi një video ku drejtuesit e saj kërkonin në stadium çdo gjurmë të logos së kompanisë për ta hequr, ndërsa në mënyrë ironike logoja shfaqej vazhdimisht në ekran.

Politika e “stadiumeve të pastra” nuk do të përfundojë me Botërorin.

Stadiumi “SoFi” do të duhet të heqë sërish markën e sponsorit edhe në vitin 2028, kur do të presë ceremoninë e hapjes dhe aktivitete të tjera të rëndësishme të Lojërave Olimpike 2028 në  Los Anxheles. /Ad.Ab./

The post BOTËRORI 2026 – Stadiumet humbasin “përkohësisht” emrat e sponsorëve appeared first on Agjencia Telegrafike Shqiptare.

LAJPCIG, 13 qershor /ATSH-DPA/ – Trajneri  i Haitit, Sebastien Migne, e sheh me optimizëm aventurën e madhe të vendit të tij në Kupën e Botës, pavarësisht vështirësive të shumta që shoqërojnë kombin ishullor të trazuar nga krizat.

“Sigurisht që është një grup i fortë. Por, nëse e shohim nga ana pozitive, do të jemi në qendër të vëmendjes dhe ky është një shpërblim i madh për djemtë”, tha ai.

Ndeshjet kundër Skocisë, Brazilit dhe Marokut  janë një arritje jo vetëm për lojtarët, por për të gjithë popullin haitian, i cili jeton dhe merr frymë me futbollin.

Mesfushori Jean-Ricner Bellegarde kujton se kualifikimi solli gëzim në vend për disa ditë.

“Kur u kualifikuam, vendi ishte i lumtur për një ose dy ditë. Ndoshta mund ta bëjmë sërish këtë,” tha ai.

Bellegarde, që luan për “Wolverhampton Wanderers F.C” në Angli., ka një të përbashkët me trajnerin e tij: asnjëri nuk ka qenë ndonjëherë në Haiti.

“Është e pamundur sepse është shumë e rrezikshme”, tha Migne.

Ai shpjegoi se zakonisht jeton në vendet ku punon, por në Haiti kjo nuk është e mundur, pasi fluturimet ndërkombëtare drejt vendit janë ndërprerë.

Edhe stadiumi kombëtar në Port-au-Prince është mbyllur që nga shkurti i vitit 2024.

Zona përreth stadiumit, ashtu si rreth 90 për qind e kryeqytetit, kontrollohet nga bandat kriminale.

Dhuna, korrupsioni, uria dhe paqëndrueshmëria politike kanë shndërruar jetën e 12 milionë banorëve të Haitit në një sfidë të përditshme.

Megjithatë, futbolli vazhdon të ofrojë një dritë shprese.

“Sidomos për të rinjtë që rriten në Haiti në këto rrethana, futbolli u jep besim,” tha Bellegarde. Për shkak të situatës së sigurisë, ndeshjet kualifikuese si vendas u luajtën në Curaçao, shpesh para vetëm 500 tifozëve.

Edhe në Kupën e Botës pritet një situatë e ngjashme.

Për shkak të kufizimeve të hyrjes në SHBA, haitianët pa vizë nuk mund të udhëtojnë drejt vendit organizator. Për më tepër, çmimet e biletave dhe kostot e udhëtimit janë jashtë mundësive për shumicën e tyre.

Kështu, pjesa më e madhe e tifozëve do ta ndjekë paraqitjen e dytë historike të Haitit në Kupën e Botës, pas vitit 1974, vetëm nga ekranet televizive.

Krahas Bellegarde, figurat kryesore të ekipit janë mbrojtësi Johny Placide dhe sulmuesi Duckens Nazon.

Ky i fundit ka shënuar 44 gola në 78 ndeshje me kombëtaren.

Në skuadër bën pjesë edhe portieri Josue Duverger, i cili luan për klubin gjerman “Cosmos Koblenz”.

Nën drejtimin e Migne, Haiti ka fituar disiplinë, unitet dhe vetëbesim, duke grumbulluar mesatarisht 1.83 pikë për ndeshje në 24 takime.

Trajneri 53-vjeçar mbetet realist për shanset e ekipit.

“Në një ndeshje të vetme mund të ndodhë gjithçka. Ne duam të shkruajmë një kapitull të ri në histori me këta lojtarë”, tha ai.

Pesëdhjetë e dy vjet më parë, Haiti humbi të tre ndeshjet e Kupës së Botës në Gjermaninë Perëndimore kundër Italisë, Polonisë dhe Argjentinës, me golaverazh 2-14.

Megjithatë, legjenda Emmanuel Sanon hyri në histori me dy golat e tij. Me 100 paraqitje dhe 47 gola, ai mbetet rekordmeni i kombëtares.

Nazon është vetëm tre gola larg këtij rekordi.

Rrugëtimi i tij drejt Kupës së Botës ishte po aq dramatik sa historia e vendit që përfaqëson. Sulmuesi i “Esteghlal F.C”. ndodhej në Iran kur nisën sulmet ajrore amerikano-izraelite kundër vendit.

“Në avion na thanë të zbrisnim sepse lufta sapo kishte filluar”, kujton Nazon.

Më vonë, sipas tij, një raketë goditi vetëm rreth 100 metra larg vendit ku ndodhej. Ai u largua me makinë dhe arriti të dalë nga Irani përmes Azerbajxhanit pas një udhëtimi 20-orësh.

Përvoja e ka bërë edhe më të vendosur.

“Nuk kemi frikë nga askush. Jemi modestë, por krenarë sepse jemi haitianë”, tha Nazon.

“Dua të shënoj një gol në Kupën e Botës. Nuk ka rëndësi kundër kujt”, shtoi ai./ /Ad.Ab./ a.jor.

The post BOTËRORI 2026 – Dhunë, uri dhe mërgim: rruga e vështirë e Haitit drejt Kupës së Botës appeared first on Agjencia Telegrafike Shqiptare.

TIRANË, 12 qershor /ATSH/- Kupa e Botës për Meshkuj 2026 po afron me shpejtësi, me 48 skuadra që do të garojnë në 104 ndeshje përgjatë 39 ditëve, në tre shtete të Amerikës së Veriut, në një garë gjigante, për t’u shpallur kampione të botës, sipas “NBC Sports”.

Ky do të jetë turneu më i madh në historinë e futbollit, i organizuar nga Kanadaja, Meksika dhe Shtetet e Bashkuara të Amerikës, dhe pritshmëritë janë në maja!

Maratonë futbolli, deri në 12 orë lojë në ditë

Tifozët do të përjetojnë një spektakël të jashtëzakonshëm, gati 12 orë futboll çdo ditë gjatë fazës së grupeve.

Në dy ditët e para, zhvillohen nga dy ndeshje në ditë, me Meksikën, Kanadanë dhe SHBA-në, që shfaqen për herë të parë në arenën e tyre.

Por, më pas, nga 13 deri më 27 qershor, çdo ditë do të ketë të paktën katër ndeshje, të shpërndara nga mesdita deri pas mesnate.

Edhe më intensiv bëhet gjithçka nga 24 deri më 27 qershor, kur do të zhvillohen gjashtë ndeshje në ditë, me tre orare të ndryshme dhe dy takime që luhen paralelisht.

Në total, 72 ndeshje të fazës së grupeve do të dominojnë pjesën më të madhe të qershorit.

Skuadrat pritëse nën presion, por në formë të mirë

Tre vendet organizatore po përballen me presion të madh, por deri tani po duken të përgatitura.

Kanadaja, nën drejtimin e Jesse Marsch, po vjen me paraqitje solide në miqësore dhe duket gati për debutimin historik në Botërorin 2026 në terrenin e saj.

Gjendja fizike e Alphonso Davies mbetet një shqetësim, ndërsa dëmtimi i Marcelo Flores ka qenë një goditje e rëndë.

Megjithatë, Jonathan David, Cyle Larin dhe Tajon Buchanan pritet të jenë vendimtarë në një grup të konsideruar i përballueshëm.

Meksika vjen me besim të rritur pas fitores 5–1 ndaj Serbisë në miqësoren e fundit.

Edhe pse vitet e fundit kanë qenë të vështira, ekipi i Javier Aguirre është optimist për një grup të favorshëm dhe do të mbështetet te atmosfera elektrizuese në Meksiko Siti dhe Guadalajara.

Ndërkohë, SHBA-ja nën drejtimin e Mauricio Pochettino-s vjen pas paraqitjeve inkurajuese kundër Senegallit dhe Gjermanisë.

Sistemi taktik 3-4-2-1 po funksionon mirë dhe skuadra duket e aftë, të përfundojë në dy vendet e para të Grupit D, nëse shmang dëmtimet kryesore.

Yjet në forma të ndryshme, debatet nuk mungojnë

Emrat e mëdhenj të futbollit botëror vijnë në këtë turne në forma të ndryshme sportive.

Cristiano Ronaldo, tashmë 41 vjeç, vazhdon të shihet si favorit për Portugalinë, por gjithnjë e më shumë diskutohet roli i tij si zëvendësues i rëndësishëm, ndërsa Bruno Fernandes është në formën e tij më të mirë.

Kylian Mbappé kërkon rikthimin pas një periudhe të vështirë te Real Madridi, por mbetet sulmuesi kryesor francez dhe një nga favoritët për Këpucën e Artë.

Lionel Messi, që do të mbushë 39 vjeç gjatë turneut, synon të udhëheqë Argjentinën drejt një tjetër trofeu historik dhe i mungojnë vetëm katër gola, për të vendosur rekordin absolut të golashënuesit më të mirë në historinë e Botërorit.

Harry Kane vjen në formë të jashtëzakonshme pas një sezoni rekord me Bayern Munich dhe pritet të jetë lojtari kryesor i Anglisë.

Ndërkohë, Lamine Yamal i Spanjës dhe Raphinha i Brazilit po konsiderohen si lojtarë vendimtarë, ndërsa Neymar mund të jetë surpriza e fundit nga pankina, nëse rikuperohet plotësisht.

Vapa, një armik i fshehtë i turneut

Temperaturat e larta dhe lagështia në Amerikën e Veriut pritet të ndikojnë ndjeshëm në performancën e skuadrave.

Disa ekipe si Anglia kanë përdorur metoda të veçanta stërvitjeje, për t’u përshtatur me nxehtësinë, ndërsa të tjera kanë qëndruar në vendet e tyre, deri në momentin e fundit për t’u përgatitur sa më mirë.

Ekspertët paralajmërojnë se faza e grupeve mund të sjellë surpriza të mëdha, pasi shumë skuadra mund të vuajnë nga lodhja dhe kushtet ekstreme.

Kandidatët surprizë dhe “dark horse-ët”

Skocia, Norvegjia, Bregu i Fildishtë, Ekuadori dhe Senegali përmenden si skuadra që mund të befasojnë.

Edhe Portugalia, Belgjika dhe Holanda konsiderohen në formë të mirë dhe me potencial për të shkuar larg.

Ndërkohë, kombëtare si Uzbekistani, Haiti, Curaçao dhe Kepi i Gjelbër mund të sjellin rezultate surprizë, edhe pse kualifikimi në fazën me eliminim direkt, mbetet një sfidë e madhe.

Historia e Botërorit në Amerikën e Veriut kujton surprizat e mëdha të vitit 1994, kur Suedia dhe Bullgaria arritën deri në gjysmëfinale.

Dhe shumë besojnë se edhe këtë herë, mund të ketë një ose disa “histori Hirushesh”.

Një Botëror i pazakontë, i madh, intensiv dhe plot surpriza po vjen – dhe futbolli botëror po përgatitet për verën më intensive në histori. / /a.i/

The post BOTËRORI 2026 – Turneu më i madh në histori, 48 skuadra, 104 ndeshje pushtojnë qershorin appeared first on Agjencia Telegrafike Shqiptare.

TIRANË, 12 qershor /ATSH/- Për herë të parë në historinë e Kupës së Botës, finalja e Botërorit 2026 do të shoqërohet me një spektakël muzikor gjatë pushimit mes dy pjesëve, në një format të ngjashëm me shfaqjen e famshme të Super Bowl-it, sipas medias amerikane “TIME”.

Finalja do të zhvillohet më 19 korrik në stadiumin “MetLife” të Nju Xhersit dhe pritet të ndiqet nga një audiencë rekord globale.

FIFA synon që eventi të shërbejë jo vetëm si kulmi i turneut, por edhe si një platformë për promovimin e fondit arsimor “Fondi i FIFA-s për Edukimin Global të Qytetarëve”.

Presidenti i FIFA-s, Gianni Infantino e ka cilësuar shfaqjen, si një moment historik për Kupën e Botës dhe një spektakël të denjë për ngjarjen më të madhe sportive në botë.

Programi artistik është kuruar nga Chris Martin, ndërsa në skenë do të ngjiten emra të njohur të muzikës botërore.

Mes tyre spikat Shakira, e cila rikthehet edhe një herë, në një event madhor të futbollit pas suksesit të hit-it “Waka Waka” në Botërorin 2010.

Këngëtarja kolumbiane do të interpretojë së bashku me Burna Boy, me të cilin ka realizuar himnin zyrtare të këtij Botërori, “Dai Dai”.

Në spektakël do të marrin pjesë gjithashtu grupi koreano-jugor BTS, legjenda e muzikës pop Madonna dhe trupa e vallëzimit “Ghetto Kids” nga Uganda.

Të ardhurat e krijuara nga himni zyrtar dhe aktivitetet e lidhura me spektaklin do të mbështesin programet arsimore dhe projektet e futbollit për fëmijët, në më shumë se 200 vende të botës.

FIFA dhe organizata “Global Citizen” synojnë të mbledhin 100 milionë dollarë për këtë nismë.

Organizatorët kanë lënë të kuptohet, se gjatë mbrëmjes do të ketë edhe surpriza të tjera, ndërsa nuk është konfirmuar ende nëse vetë Chris Martin do të ngjitet në skenë gjatë finales së madhe të Botërorit 2026. //a.i/

The post BOTËRORI 2026 – Shakira dhe BTS në finale, FIFA sjell për herë të parë spektakël muzikor appeared first on Agjencia Telegrafike Shqiptare.

MEKSIKO SITI, 12 qershor /ATSH/- Ndeshja hapëse e Kupës së Botës 2026 mes Meksikës dhe Afrikës së Jugut nuk u dallua aq shumë për cilësinë e futbollit, sa për dramat dhe incidentet në fushë. Në fund, vendësit e Meksikës fituan me rezultatin 2-0, duke marrë tri pikët e para në turne, sipas “TheWorldCUp.com”

Megjithatë, ajo që do të mbahet mend më shumë nga kjo përballje është numri i pazakontë i kartonëve të kuq të dhënë në pjesën e dytë të takimit. Gjyqtari brazilian Wilton Pereira Sampaio përjashtoi nga loja dy futbollistë të Afrikës së Jugut, Sphephelo Sithole dhe Themba Zwane, si dhe mbrojtësin meksikan César Montes.

Tre kartonë të kuq në një ndeshje hapëse përbëjnë një rekord të ri në historinë e Kupave të Botës. Statistika bëhet edhe më e jashtëzakonshme po të kihet parasysh se në dy edicionet e mëparshme, në vitet 2018 dhe 2022, u dhanë gjithsej vetëm katër kartonë të kuq.

Megjithatë, rekordi absolut për numrin më të madh të përjashtimeve në një ndeshje të Kupës së Botës mbetet ende i pathyer. Ai i përket sfidës së famshme të njohur si “Beteja e Nurembergut”, gjatë Kupës së Botës 2006, kur katër lojtarë u përjashtuan në ndeshjen e fazës së 1/8-ave mes Portugalisë dhe Holandës. /Ad.Ab./

The post BOTËRORI 2026 – Tre kartonë të kuq vendosin rekord që në ndeshjen e parë appeared first on Agjencia Telegrafike Shqiptare.

MEKSIKO SITI, 11 qershor /ATSH – Ka një moment, para se të fillojë gjithçka, kur sporti pushon së qeni një garë dhe bëhet një emocion kolektiv. Kjo do të ndodhë sonte, me ceremoninë e parë të hapjes së Kupës së Botës FIFA 2026, e cila do të mund të ndiqet e plotë në DAZN, së bashku me të gjitha 104 ndeshjet e turneut.

Kupa e Botës 2026, ceremonia e hapjes

Ceremonia e hapjes do të jetë në qendër të episodit të parë të “Times Square – World Cup Time”, programit të mbrëmjes në DAZN, i cili do të nisë jashtëzakonisht sot me një lidhje ekskluzive në orën 18:30.

Kanadaja fton Michael Bublé, Alanis Morissette dhe Alessia Cara

Një ditë më vonë do të jetë radha e Kanadasë, me Toronton gati të përjetojë një moment historik: ndeshjen e parë në shtëpi të kombëtares kanadeze në një Kupë Bote për meshkuj.

Për këtë rast, ceremonia do të ketë një kast artistësh të jashtëzakonshëm: Michael Bublé, Alanis Morissette, Alessia Cara, Jessie Reyez, William Prince, Elyanna, Vegedream, Nora Fatehi dhe DJ Sanjoy.

Një përzierje që përfshin pop-in, soul-in, kantautorët, ndikimet ndërkombëtare dhe muzikën dance, për të treguar historinë e një vendi muzikor, multikulturor dhe gjithnjë e më të rëndësishëm në skenën globale.

Spektakli në Shtetet e Bashkuara: Katy Perry, Anitta, LISA, Future dhe Rema

Ceremonia amerikane premton të jetë më spektakolarja. Në Los Anxhelos, qyteti simbol i industrisë globale të argëtimit, do të ngjiten në skenë Katy Perry, Ava Max, Future, Anitta, LISA, Rema dhe Tyla.

Një listë artistësh e menduar për t’i folur të gjithë botës: pop i renditjeve më të mira, rap, K-pop, afrobeats dhe ritme latine.

Një zgjedhje që konfirmon objektivin e Kupës së Botës 2026: të jetë shumë më tepër se një turne futbolli, duke u shndërruar në një ngjarje të madhe kulturore që bashkon sportin, muzikën dhe spektaklin.

Kupa e Botës 2026: kur fillon dhe kur përfundon turneu

Finalja është planifikuar për të dielën, më 19 korrik, në zonën New York/New Jersey.
Kjo do të jetë edicioni i 23-të i turneut, por edhe i pari me 48 kombëtare pjesëmarrëse.

Ndeshjet do të zhvillohen në Kanada, Meksikë dhe Shtetet e Bashkuara, në 16 qytete pritëse.

HalfTime Show në finalen e Kupës së Botës

Me tre ceremoni hapjeje dhe një listë artistësh që shkon nga Katy Perry te J Balvin, nga Michael Bublé te Alanis Morissette, nga Anitta te LISA, Kupa e Botës 2026 duket e vendosur të ngrejë edhe më lart nivelin e spektaklit.

Futbolli mbetet zemra e ngjarjes, sigurisht. Por rreth topit të futbollit do të ngrihet një skenë gjigante, e menduar për të tërhequr audienca të ndryshme, breza të ndryshëm dhe komunitete muzikore nga e gjithë bota.

Aq sa këtë vit, për herë të parë, finalja e turneut do të ketë një HalfTime Show të vërtetë, në stilin e ngjarjeve më të mëdha sportive amerikane.

Një muaj me ndeshje, emocione dhe hite muzikore: numërimi mbrapsht për Kupën e Botës 2026 ka nisur zyrtarisht.  /os/

The post FUTBOLL – Botërori 2026 nis me spektakël, yjet e muzikës pushtojnë ceremonitë e hapjes appeared first on Agjencia Telegrafike Shqiptare.

MEKSIKO SITI, 11 qershor /ATSH/ – Kupa e Botës 2026 nis sot në Meksikë duke shënuar fillimin e turneut më të madh në historinë e futbollit.

Për herë të parë, kampionati organizohet nga tre vende, SHBA-ja, Kanadaja dhe Meksika dhe përfshin 48 kombëtare, një zgjerim i rëndësishëm krahasuar me formatin e mëparshëm me 32 ekipe, sipas Reuters.

Ndeshja hapëse do të zhvillohet në stadiumin legjendar “Azteca” të Meksiko Siti, ku Meksika do të përballet me Afrikën e Jugut në Grupin A.

Ky stadium hyn në histori si arena e parë që pret ndeshje të Kupës së Botës në tre edicione të ndryshme.

FIFA ka vendosur të organizojë për herë të parë tre ceremoni hapëse të ndara, nga një në secilin prej vendeve organizatore, për të pasqyruar karakterin unik të këtij Botërori.

Ceremonia e parë do të mbahet sot në Meksikë dhe do të shoqërohet me performanca artistike dhe elemente të kulturës vendase.

Ceremoni të ngjashme do të zhvillohen më pas në Toronto dhe Los Anxheles para ndeshjeve të para të Kanadasë dhe SHBA-së.

Turneu do të zgjasë deri më 19 korrik dhe do të përfshijë gjithsej 104 ndeshje, një rekord i ri për Kupën e Botës.

Takimet do të luhen në 16 qytete të Amerikës së Veriut.

Botërori sjell gjithashtu disa ndryshime në rregullore, me FIFA-n që synon të reduktojë vonesat gjatë lojës dhe të përmirësojë ritmin e ndeshjeve.

Ndryshimet përfshijnë masa më të ashpra ndaj humbjes së qëllimshme të kohës dhe zgjerim të rasteve kur mund të ndërhyjë sistemi VAR.

Argjentina hyn në turne si kampione në fuqi, ndërsa Brazili, Franca, Anglia, Gjermania dhe Spanja konsiderohen ndër favoritët kryesorë për trofeun.

Vëmendja e tifozëve është përqendruar edhe te disa prej yjeve më të mëdhenj të futbollit botëror, të cilët mund të luajnë Kupën e tyre të fundit të Botës.

Me formatin e ri, pjesëmarrjen rekord dhe organizimin në tre shtete, Botërori 2026 pritet të jetë një nga ngjarjet sportive më të ndjekura dhe më fitimprurëse në historinë e futbollit botëror./  /Ad.Ab./ a.jor.

The post KOMENT – Botërori 2026 festa më e madhe e futbollit në botë appeared first on Agjencia Telegrafike Shqiptare.

LONDËR, 14 maj /ATSH-DPA/ – Superyjet botërore Madonna, Shakira dhe grupi koreano-jugor, BTS do të jenë artistët kryesorë të shfaqjes së parë muzikore në pushimin e finales së Kupës së Botës 2026.

Lideri i grupit “Coldplay”, Chris Martin, i cili zbuloi listën e artistëve përmes një videoje në rrjetet sociale me personazhe të “Sesame Street” dhe “Muppets”, do të jetë kuratori i këtij spektakli historik.

Finalja e Kupës së Botës është planifikuar të zhvillohet më 19 korrik në “MetLife Stadium” në Nju Xhersi.

Presidenti i FIFA-s, Gianni Infantino, i cili publikoi detajet e aktivitetit edhe në Instagram, kishte njoftuar planet për këtë shfaqje që në mars të vitit të kaluar.

Ky organizim mund të bëjë që pushimi i finales të zgjasë më shumë se 15 minutat tradicionale.

Shfaqja do të organizohet në mbështetje të fondit “FIFA Global Citizen Education Fund”, një nismë që synon të mbledhë 100 milionë dollarë për të zgjeruar aksesin në arsim dhe futboll për fëmijët në mbarë botën.

Shfaqjet muzikore në pushimin e ndeshjeve janë bërë një element i rëndësishëm i eventeve sportive në Shtetet e Bashkuara të Amerikës veçanërisht gjatë “Super Bowl”.

Madonna ishte artistja kryesore e spektaklit të “Super Bowl” në vitin 2012, ndërsa Shakira performoi së bashku me Jennifer Lopez në edicionin e vitit 2020.

Vitin e kaluar, FIFA organizoi një shfaqje të ngjashme në pushimin e finales së FIFA Club World Cup në “MetLife Stadium”, ku ”Chelsea F.C.” mposhti ”Paris Saint-Germain F.C.” me rezultatin 3-0.

Kupa e Botës 2026, edicioni më i madh në histori me pjesëmarrjen e 48 kombëtareve, nis më 11 qershor dhe do të organizohet në Shtetet e Bashkuara, Kanada dhe Meksikë./ /Ad.Ab./  a.jor.

The post BOTËRORI 2026 – Madonna, Shakira dhe BTS në finalen në “Metlife Stadium” appeared first on Agjencia Telegrafike Shqiptare.