“Shqipëria ndodhet në një spirale autoritarizmi kleptokratik nga e cila nuk mund të dalë pa një ndryshim politik të vërtetë”. Kështu u shpreh në Çdo kënd me Merita Haklajn në A2 CNN demokrati Genc Pollo, sipas të cilit, as SPAK-u, as media dhe as faktori ndërkombëtar nuk mund ta shpëtojnë vendin, nëse nuk ka një ndërgjegjësim shoqëror dhe një rotacion pushteti në rrugë kushtetuese.

“12 vitet e fundit janë një trajektore e trishtuar si e Partisë Demokratike në opozitë, po ashtu edhe e Shqipërisë drejt një autokracie kleptokratike dhe pavarësisht se Partia Demokratike në opozitë mund të mos ketë patur, forcën që kishte PS-ja në opozitë para se të vinte pushtet, apo PD-ja në 2004-n. Megjithatë mbetet shpresa e vetme e madhe që në këtë vend mund të ketë një ndryshim pozitiv. Me gjithë 101 kritikat shumë të pabazuara, disa me meritë që i bëjnë asaj pa një ndryshim politik në këtë vend, nuk mund të ketë një përmirësim, ose nuk mund të ketë një shpëtim nga regjimi autoritar kleptorokratik ku fatkeqësisht ndodhemi. Nuk do ta shpëtojë as SPAK-u, gjyqësori i cili mund ndihmojë, nuk do ta shpëtojë vetëm media e lirë, e cila ka një rol të madh po e vetme nuk ka ç’bën. Nuk mund ta shpëtojnë ndërkombëtarët apo pjesa e mirë e tyre të cilët kanë një rol të madh që mund ta luajnë nëse duan. Në qoftë se nuk ka një evoluim, një ndërgjegjësim shoqëror, rindërgjegjësim shoqëror dhe një ndryshim politik, nuk mund të ketë shpëtim”, deklaroi Pollo në A2 CNN.

Pollo vlerësoi veprimet e SPAK-ut për ekspozimin e aferave të korrupsionit, por theksoi se “spakizimi i politikës” është një shpresë e rreme.

“Gjyqësori përmes hetimit i ekspozon dhe merr masa për të larguar njerëzit, natyrisht me rezistencën nga Edi Rama që po shikojmë, por në qoftë se qoftë edhe dënohet një ministër apo një ministër edhe zëvendësohet me një ministër tjetër, madje dhe në rastin ekstrem sikur të largohet kryeministri dhe të zëvendësohet me një kryeministër tjetër, prapë ndryshimi normalizues nuk ndodh. Ndodh zgjatja e agonisë dhe kjo është një sfidë e madhe, është një sfidë e vështirë”, theksoi Pollo.

Sipas tij, sfida kryesore sot nuk është vetëm pushteti, por mpirja e ndërgjegjes shoqërore, mungesa e shpresës dhe emigrimi masiv, fenomene që, siç tha, nuk ekzistonin në këto përmasa në vitin 2005.

Duke folur për ndërkombëtarët, Pollo pranoi rolin historik pozitiv të BE-së dhe SHBA-së në tranzicion, por kritikoi qëndrimet e fundit të Brukselit dhe raste të përfaqësuesve diplomatikë që, sipas tij, kanë mbyllur sytë ndaj skandaleve. “Problemet tona duhet t’i zgjidhim vetë”, theksoi ai.

Lëvizja Vetëvendosje është dënuar me gjashtë mijë euro pasi Paneli Zgjedhor për Ankesa dhe Parashtresa ka konstatuar se kandidatë të saj për deputetë kanë shfrytëzuar institucionet publike për promovim elektoral gjatë fushatës për zgjedhjet e 28 dhjetorit.

Vendimi i PZAP-së u mor bazuar në ankesën e Lidhjes Demokratike të Kosovës.

Në vendim është konstatuar se Arbërie Nagavci, Hysen Durmishi, Arben Vitia, Albulena Haxhiu dhe Hajrulla Çeku kanë shfrytëzuar institucionet publike për fushatë.

“…znj.Nagavci ka përdorur zyrën e saj si ministre në detyrë në Ministrinë e Arsimit, Shkencës dhe Teknologjisë, z. Durmishi ka përdorur pasuri publike, konkretisht urën në Mitrovicë, ndërsa z. Vitia, znj. Haxhiu dhe z. Çeko kanë përdorur Aeroportin Ndërkombëtar të Prishtinës, si dhe në faqen zyrtare të këtij subjekti janë promovuar aktivitete në Qendrën Klinike Universitare të Kosovës”, thuhet në vendim të PZAP-së.

Sipas vendimit, me këto veprime është shkelur Kodi i Mirësjelljes për Subjektet Politike, Mbështetësit e tyre dhe Kandidatët.

VV-ja ka afat 15 ditë për ta paguar gjobën nga dita e plotfuqishmërisë së vendimit, ndaj të cilit kjo parti ka të drejtë të ankohet brenda 48 orëve nga momenti i marrjes së vendimit.

Sekretari i Përgjithshëm i Partisë Demokratike, Flamur Noka, është shprehur se projektligji amerikan “Western Balkans Democracy and Prosperity Act” parashikon krijimin e një nisme të gjerë kundër korrupsionit për vendet e Ballkanit Perëndimor, që sipas tij e synon ndërhyrje direkte në strukturat shtetërore.

Komentet Noka i bëri përmes një postimi në faqen e tij në Facebook, ku tha më tej se SHBA parashikon asistencë teknike direkte për Shqipërinë, me kusht që sipas tij, qeveria shqiptare të rishikojë strategjinë kombëtare kundër korrupsionit dhe të pranojë bashkëpunim të drejtpërdrejtë me programet amerikane.

Ai shtoi gjithashtu se ky ligj thekson qartë se korrupsioni politik duhet luftuar sidomos në gjyqësor, institucionet që administrojnë zgjedhjet dhe prokurimet publike.

Postimi i Nokës:

Projektligji amerikan “Western Balkans Democracy and Prosperity Act” parashikon krijimin e një nisme të gjerë kundër korrupsionit për vendet e Ballkanit Perëndimor, e cila synon ndërhyrje direkte në strukturat shtetërore.

#SHBA parashikon asistencë teknike direkte për Shqipërinë, me kusht që #qeveria #shqiptare të rishikojë strategjinë kombëtare kundër korrupsionit, të pranojë bashkëpunim të drejtpërdrejtë me programet amerikane.

Ligji thekson qartë se korrupsioni politik duhet luftuar sidomos në gjyqësor, institucionet që administrojnë zgjedhjet dhe prokurimet publike.

Babai i Salih Mustafës, ish-drejtues i UÇK është varrosur këtë të premte në Kosovë. Jahja Mustafa ndërroi jetë të enjten ndërsa djalit të tij, Salih Mustafës i është refuzuar kërkesa pjesëmarrje në varrim.

Mungesa e tij në varrimin e të atit ka rënduar edhe më shumë dhimbjen e familjes së tij, miqve dhe bashkëluftëtarëve. Kryetar i OVL- UÇK, Hysni Gucati gjatë fjalës së tij në ceremoninë e varrimit i kritikoi ashpër Dhomat e Specializuara në Hagë për mos dhënien e lejes së Mustafas që të takojë babain e tij.

“Unë e di që Cali mes dhimbjes do ta gjejë edhe forcën. Ne e dimë që kjo gjykatë është shumë e dëmshme për vendin, dhe ishte dashur që kjo gjykatë ta lejoj Calin që të vijë në vizitë humanitarë para 5 ditësh, ne kemi bërë kërkesë dhe mbrojtja e Calit ka bërë kërkesë që ta liroj Calin që të vijë të paktën ta vizitoj babanë sa ishte në spital gjallë dhe ndodhi e kundërta.
Sot nuk e liruan dhe unë kam menduar që të paktën sot do ta lirojnë në varrim, sepse Cali ishte i dënuar me verdikt 15 vite burg padrejtësisht, i dënuar me dëshmitar të rrejshëm dhe të falsifikuar. ….. Prej kësaj qeverie nuk presim asgjë kjo qeveri është për turpin e shqiptarëve që është në pushtet”, tha Gucati.

Mustafa po vuan dënimin me 15 vjet burg nga Dhomat e Specializuara në Hagë. Pas vdekjes së babait të tij, familjarë dhe bashkëluftëtarë kanë reaguar ashpër ndaj moslejimit të vizitës humanitare dhe pjesëmarrjes së tij në varrim, duke e cilësuar këtë si padrejtësi dhe mungesë ndjeshmërie humane.

Mustafa ka qenë komandant i një njësiti brenda Zonës Operative të Llapit të Ushtrisë Çlirimtare të Kosovës. Ai qe dënuar fillimisht në dhjetor të 2022-tës për krime lufte me 26 vjet burgim.
Në dhjetor të 2023-tës, Apeli i Speciales ia ka ulur dënimin në 22 vjet burgim, para se paneli i Gjykatës së Panelit t’ia shqiptonte atij një vit më vonë një dënim të njësuar prej 15 vjetësh burgim, duke e llogaritur kohën e kaluar në paraburgim.

Armando Iberhasaj, i dënuar me katër muaj burg për kultivim të lëndëve narkotike i ka shpëtuar deportimit nga Britania e Madhe në Shqipëri. Ai pretendoi se deportimi i tij do të shkelte të drejtat e tij për të krijuar një familje me partneren e tij.

Gjykatësja e imigracionit vendosi se deportimi do të ishte i ashpër për partneren e tij, e cila nuk ishte me origjinë shqiptare, nuk kishte udhëtuar më parë në Shqipëri dhe nuk e fliste gjuhën.

Gjykatësja tha: Të presësh që partnerja e Iberhasajt të zhvendoset me të në Shqipëri, do të shkaktonte pasoja të pajustifikueshme. Kjo për shkak se ajo nuk ka lidhje me Shqipërinë dhe ajo nuk e ka vizituar kurrë vendin e tij dhe as nuk ka jetuar vetë atje.

Vendimi për të lejuar Iberhasaj të qëndrojë në Mbretërinë e Bashkuar vjen pasi Shabana Mahmood, Sekretarja e Brendshme, propozoi kufizime në përdorimin e dispozitave për të drejtat familjare të Gjykatës Europiane për të Drejtat e Njeriut, duke argumentuar se kriminelët dhe emigrantët e paligjshëm nuk duhet të përfitojnë prej tyre.

Ervin Salianji vijon ta sfidojë Sali Berishën, pavarësisht se ky i fundit u shpreh ai kaloi vijën e kuqe dhe u vetëpërjashtua.

Ditën e shtunë, ish-deputeti do të jetë në Shkodër për t’u takuar me demokratët atje.

Takimi do të zhvillohet në hotel Rozafa, në orën 18:00. Më herët Salianji ka qenë edhe me demokratët në Elbasan dhe Durrës.

Në fund të nëntorit dhe dhjetorit të vitit 1991 tensionet politike ishin në kulm. PD kërkoi daljen nga qeveria e stabilitetit ndërsa në disa rrethe kishin nisur mësymjet ndaj ndërrmarrjeve shtetërore. Ish-kryeministri Ylli Bufi në rrëfimet e tij të botuara në librin “NË FILLIMET E TRANZICIONIT” të botuar nga Uet Press”, tregon debatet në mbledhjet e qeveris, por edhe takimin në zyrën e Presidentit të asaj kohe Ramiz Alia

Dorëheqja e Qeverisë së Stabilitetit

Pas tërheqjes së ministrave të saj prej PD, disa prej ministrave u mblodhën në zyrën time. Të gjithë ishin shumë të revoltuar nga veprimi i Berishës dhe sidomos nga fjalët që ai kishte thënë në konferencën për shtyp.

Ç’duhej bërë tani? E vetmja gjë mbetej që unë të paraqisja te Presidenti i Republikës dorëheqjen në emër të qeverisë. Dikush nga ministrat tha se qeveria duhet t’u shpjegojë shqiptarëve atë që kishte ndodhur. Fillimisht, ishte fjala për një konferencë shtypi nga qeveria, por pastaj u sugjerua të bëhej një mbledhje, ku të merrnin pjesë edhe kryetarët e partive. Në fillim, e kundërshtova këtë propozim, sepse mendoja se gjithçka ishte thënë me kryetarët e partive. U insistua se shqiptarët nuk i dinë të vërtetat e prishjes së qeverisë, prandaj duhet t’ua themi këto. Kështu, u vendos të bëhet ajo mbledhje. Ishte një vendim i nxituar, i marrë në peshën e emocioneve të momentit.

Në mbledhje u ripërsëritën të gjitha argumentet që ishin përdorur edhe në mbledhjen e mëparshme me kryetarët e partive. Mbledhja zgjati rreth 2-3 orë, por, për shkak se transmetimi në televizionin shqiptar nuk ishte online, bobinat e regjistruara shkonin me një vonesë rreth një orë për transmetim. Kështu, transmetimi i mbledhjes vazhdoi edhe pas mesit të natës, një gjë e pazakonshme deri në atë kohë. Ministrat dhe përfaqësuesit e partive ishin ulur jo në vendet e tyre të zakonshme. Mbledhja u zhvillua shumë e tensionuar. Pothuaj të gjithë folën kundër veprimit të Sali Berishës. Më i ashpër ishte sidomos ministri Emin Mysliu, që shprehu hapur parandjenjën e kaosit që do të krijohej në vend pas rënies së qeverisë. Servet Pëllumbi, në emër të Partisë Socialiste, dënoi veprimin e papërgjegjshëm të PD dhe të Sali Berishës, duke thënë:

“Nuk është PS që e shkakton këtë krizë. PS ka mbajtur kurdoherë qëndrime të qarta e tolerante, të argumentuara, gjakftohta, e bindur që në fillim për formulën e qeverisë së stabilitetit dhe vazhdimisht është përpjekur ta mbështesë atë… Përkundrazi kanë qenë disa forca të tjera, të cilat me lloj-lloj epitetesh: kriptokomunistë, enveristë, punistë, merimanga komuniste etj., që nuk ngurruan t’ përdorin edhe në këtë auditor të nderuar, duan të sensibilizojnë opinionin kundër PS.

Të gjitha këto kontradikta vihen re në pozicionin e PD, bile nuk do ta zgjeroja për të gjithë PD, por për deklaratën e zotit Berisha. Nga njëra anë, lavdërohet qeveria dhe ministrat veç e veç, përfshirë edhe ministrat e PS, nga ana tjetër, po në këtë deklaratë, qeveria quhet e dështuar. Këto pozicione kontradiktore shprehin një synim të vetëm: synimin që për këtë krizë ta hedhin fajin mbi PS”.

Në fjalën time në mbledhjen e qeverisë u përpoqa që, me përgjegjësi dhe shqetësim, të shpjegoja situatën tejet të vështirë politike dhe ekonomike dhe pasojat e rënda destabilizuese që do të sillte prishja e qeverisë. Një nga argumentet kryesore që u theksua për vazhdimin e punës së qeverisë ishte dhe sigurimi në vazhdimësi i ushqimit të popullit. E konsiderova detyrë dhe përgjegjësi nga ana ime që në mbledhjen e qeverisë ta paraqisja me saktësi dhe transparencë gjendjen ushqimore. Këtë bënë dhe të gjithë ministrat, me bindjen se prishja e qeverisë në atë situatë shumë të vështirë ishte një veprim me pasoja tepër të rënda. Në këtë kontekst ishte dhe shprehja se qeveria e re do të kishte një rezervë vetëm për 6 ditë bukë. S. Berisha u përpoq që kaosin dhe të gjitha shkatërrimet që ndodhën në disa rrethe të vendit që synonin të destabilizonin vendin t’i lidhte me panikun që kishin shkaktuar fjalët e mia.

Në të gjitha raportet zyrtare të kohës tregohet se ngjarjet shkatërrimtare, që ndodhën në Laç, në FushëArrëz, në Peqin, në Lushnjë, në Pogradec dhe në ndonjë vend tjetër, kanë ndodhur në periudhën e fushatës elektorale për zgjedhjet e 22 marsit. Këto veprime kanë filluar në 3.12.1991 në qytetin e Mamurrasit dhe kanë vazhduar në datat 4,5,6 dhe 7.12.1991 edhe në Thumanë, Laç, Milot dhe në zonat përreth tyre, përfshirë rrethin e Pukës.

Pra, këto veprime kanë filluar pikërisht një ditë para se S.Berisha të deklaronte në konferencën e tij të shtypit në datën 4.12.1991 dorëheqjen e ministrave të PD nga qeveria. Gjithashtu, ngjarjet e Fushë-Arrëzit nuk kanë ndodhur për shkak të fjalëve të mia në mbledhjen e qeverisë, sepse ato kishin filluar për motive të tjera më parë se të mbahej mbledhja e qeverisë.

Kështu, para se të ndodhte ngjarja e Fushë-Arrëzit, në rrethin e Pukës ishin vjedhur dhe shkatëruar mbi 50 magazina dhe dyqane të rrjetit të tregtisë në 29 fshatra të këtij rrethi. Vetë ngjarja e Fushë-Arrëzit ka qenë e organizuar më parë, përderisa qysh para një jave Komiteti Ekzekutiv i rrethit kishte informacion se do të hapnin dhe do të vidhnin pikërisht këto magazina të konfeksioneve në Fushë-Arrëz.

Të nesërmen, më datën 5 dhjetor, paradite, shkova te Presidenti i Republikës për t’i paraqitur atij dorëheqjen. Ai më kërkoi që këtë akt ta bëja pas takimit konsultativ që ai do të bënte përsëri me forcat politike, ku më ftoi të merrja pjesë edhe unë. E pranova propozimin e tij. Në takimin me Presidentin e Republikës, të zhvilluar në datat 5 dhe 6 dhjetor, morën pjesë përfaqësuesit e pesë partive politike pjesëtare të marrëveshjes politike të majit 1991, mbi bazën e së cilës u krijua Qeveria e Stabilitetit. Nga Partia Socialiste mori pjesë Servet Pëllumbi; nga Partia Demokratike, Sali Berisha; nga Partia Republikane, Sabri Godo; nga Partia Socialdemokrate, Skënder Gjinushi dhe nga Partia Agrare, Meno Gjoleka. Mora pjesë edhe unë, ende në detyrën e Kryetarit të Këshillit të Ministrave. Në këtë takim Presidenti i Republikës insistoi që partitë të arrinin në një mendim të përbashkët për krijimin e një qeverie të re, duke pasur parasysh vënien e interesave të larta të vendit mbi interesat partiakë.

Sali Berisha nuk pranoi që PD të ishte pjesë e asnjë lloj formule të qeverisë. Gjinushi dhe Gjoleka ishin më të hapur, ndërsa ra në sy që Godo mbështeste vend e pa vend Berishën për çdo gjë që ai thoshte. Berisha kërkoi që qeveria të formohej nga Partia Socialiste.

Por ky propozim nuk u pranua nga S. Pëllumbi. Kështu, iu hap rrugë formulës së krijimit të një qeverie teknike, e cila do të drejtonte administratën shtetërore deri në zgjedhjet e reja që do të mbaheshin në mars të vitit 1992. Në fund të takimit, Presidenti më kërkoi që qeveria e kryesuar prej meje të vazhdonte kryerjen e detyrave të saj deri në formimin e qeverisë së re. Pas përfundimit të këtij takimi, më 6 dhjetor, shkova në zyrën e Presidentit dhe i paraqita atij zyrtarisht dorëheqjen time dhe të gjithë qeverisë që kryesoja. Në tekstin e dorëheqjes theksoja se dorëheqja e qeverisë ishte e detyruar nga kriza qeveritare, që shkaktoi largimi i ministrave të Partisë Demokratik

Eksperti i ekonomisë Enio Civici ka analizuar rolin e turizmit në ekonominë shqiptare, duke theksuar se gjatë këtij viti ky sektor ka ndikuar drejtpërdrejt në zhvillimin e shërbimeve, ndërtimit dhe punësimit.

I ftuar në emisionin “Sheshi i Dollarit” në ABC News, Civici u ndal te ndikimi pozitiv i turizmit në rritjen ekonomike, ndërsa vuri në dukje se pesha e lartë e këtij sektori në ekonomi lidhet kryesisht me të ardhurat që vijnë nga jashtë dhe jo me prodhimin e brendshëm, duke e bërë të nevojshme një vështrim më të gjerë mbi qëndrueshmërinë afatgjatë të zhvillimit ekonomik.

“Edhe shërbimet, edhe ndërtimi edhe punësimi janë udhëhequr këtë vit vetëm nga një sektor që është turizmi. Sa mirë dhe i fuqishëm është ky sektor në këto momente dhe sa mirë i bën ekonomisë sonë, duke e ndihmuar dhe udhëhequr në rritje, është edhe një alarm i madh për të ardhmen.

Pra sektori që po na ushqen tani është edhe sektori më i paqëndrueshëm në gjithë historinë e ekonomisë botërore, sepse lidhet direkt me ngjarje që nuk kanë të bëjnë me të. Krahas lavdërimit të sektorit të turizmit si lokomotiva e të pestë nënsektorëve më të rëndësishëm, nga ana tjetër duhet të ngremë alarmin dhe të themi që një ekonomi kaq e dobët strukturalisht nuk mund të jetë kaq e varur vetëm nga sektor i cili nuk është i lidhur me prodhimin tonë të brendshëm, lidhet me të ardhurat që vijnë nga jashtë”, tha eksperti.

Kriza energjetike me të cilën po përballet Kosova ditët e fundit ka bërë që anëtarët e Komisionit Qendror të Zgjedhjeve të shfaqin shqetësim lidhur me furnizimin me energji elektrike në ditën e zgjedhjeve.

Në mbledhjen e këtij institucioni, anëtarët e KQZ-së kanë ngritur shqetësime serioze lidhur me rrezikun e mungesës së energjisë elektrike në disa qendra votimi. Sipas tyre, gjithsej 888 qendra votimi mund të përballen me mungesë të energjisë elektrike, prej të cilave 666 vlerësohen me rrezikshmëri të lartë.

Por ushtruesi i detyrës së kryeshefit të sekretariatit të KQZ-së ka thënë se KEDS-i në ditën e zgjedhjeve do të operojë me rreth 1,050 zyrtarë në terren dhe se bashkë me KOSTT-in ekziston një plan veprimi për menaxhimin e situatave të mundshme.

Kompania për Distribuimin e Energjisë Elektrike në Kosovë (KEDS) ka njoftuar se ka finalizuar planin operativ për furnizim të pandërprerë me energji elektrike gjatë zgjedhjeve të jashtëzakonshme parlamentare, të cilat do të mbahen të dielën, më 28 dhjetor, në të gjitha vendvotimet në vend.

Sipas njoftimit, pranë secilit nga 949 vendvotimet do të ketë ekipe në afërsi për intervenim të shpejtë në rast të ndonjë defekti, ndërsa do të funksionojë edhe një komision qendror teknik për monitorim dhe koordinim në kohë reale.

Prokuroria e Shtetit do të angazhojë rreth 100 prokurorë për mbrojtjen e votës.

Prokurori i Shtetit deklaron se ka bërë të gjitha përgatitjet e nevojshme për të garantuar integritetin e procesit zgjedhor.

Të dielën pritet të mbahen zgjedhjet e parakohshme në Kosovë pas rreth një viti bllokadë, ku VV dështoi të formojë qeverinë pas zgjedhjeve të 9 shkurtit.

Sekretari i Përgjithshëm i NATO-s, Mark Rutte, i tha agjencisë së lajmeve DPA se BE-ja do të dëmtonte vetëm veten nëse vendos të ndjekë rrugën e vet në fushën e sigurisë.

Sipas mediave të huaja, Rutte deklaroi të premten se anëtarët europianë të bllokut duhet të përmbushin kërkesat e Uashingtonit dhe të shpenzojnë më shumë për ushtritë e tyre.

Komentet Rutte i bëri teksa po i përgjigjej Manfred Weber, kreut të Partisë Popullore Evropiane (PPE), grupit më të madh në Parlamentin Evropian, i cili bëri thirrje që BE-ja të shndërrohet në një “NATO Evropiane” në fund të nëntorit.

Të premten, ai i kërkoi Brukselit të “veprojë me besim” dhe “të shkruajë strategjinë e vet të sigurisë”.

“Duhet të ndalojmë së formësuari politikën tonë nga dokumentet e Uashingtonit”, tha politikani gjerman. Kur u pyet nëse e ndan të njëjtin mendim, shefi i NATO-s tha se “ka më shumë sesa BE-ja” kur bëhet fjalë për NATO-n.

Meshkujve iu mësohet qysh në fëmijëri se duhet të jenë të fortë, të durojnë dhe të mos thyhen. Është një skript që përsëritet nga familja dhe përforcohet nga media, për t’u përthithur më pas në mënyrë të pavetëdijshme.

I ftuar në episodin e radhës të Apostrof Podcast, Dr. Marsid Sinai – mjek androlog dhe kirurg – shpjegon se kjo ide e “burrit të pathyeshëm” është miti i parë dhe më i dëmshëm që meshkujt bartin nga fëmijëria në burrëri. Miti i dytë, sipas tij ka të bëjë me lidhjen që shumica e meshkujve bëjnë mes përmasave të organit gjenital dhe potencës seksuale – një mit ky i përfocuar nga pornografia dhe krahasimet, që shpesh e kthejnë pasigurinë në shqetësim shnëndetësor edhe kur nuk është aspak një problem shëndetësor.

Miti i tretë, sipas Dr. Sinanit, është ideja se problemet tona janë të dukshme ndaj të tjerëve, kur në të vërtetë shumica e njerëzve janë tepër të zënë me problemet e tyre dhe trupat e tyre për të vërejtur ankthet tona.

Ai shton se shpesh, shumë meshkuj nuk vuajnë domosdoshmërisht sepse trupat e tyre kanë probleme shëndetësore, por për shkak të historive që iu janë treguar dhe besojnë në lidhje me atë se çfarë trupat e tyre duhet të jenë.

Katër alpinistë kanë humbur jetën pas një orteku në malet Vardousia në Fokida, në qendër të Greqisë. Tre nga alpinistët, të gjithë burra, ishin raportuar si të zhdukur të enjten vonë, teksa ndiqnin shtigje nga fshati Athanasios Diakos drejt majës Korakas, e cila arrin lartësinë 2,495 metra. Familjarët thanë për transmetuesin shtetëror ERT se përpjekjet për t’i kontaktuar me telefon dështuan, për shkak të mungesës së sinjalit.

Personi i katërt, një grua në të tridhjetat, besohet të jetë partnerja e njërit prej burrave. Autoritetet thanë se ajo nuk ishte raportuar si e zhdukur. Operacioni i kërkimit dhe i shpëtimit nisi herët të premten, duke përdorur dronë dhe qenie të trajnuara, përfshirë qentë. Shpëtimtarët gjetën trupat pranë gjurmëve të këmbëve, të lëna nga alpinistët gjatë ecjes.

Sipas burimeve të shërbimit të zjarrfikësve, dy nga alpinistët e zhdukur ishin me përvojë, por terreni malor ishte i vështirë dhe i rrezikshëm, veçanërisht në kushtet e motit të keq. Ekipi i shpëtimit shpresonte se alpinistët mund të kishin gjetur strehim nga kushtet ekstreme të motit. Autoritetet u njoftuan për herë të parë pak pas mesnatës të së premtes, kur një mik i alpinistëve raportoi humbjen e kontaktit me ta.

Ngjarja tragjike nënvizon rreziqet e larta të alpinizmit në kushte të këqija dhe rëndësinë e ndërhyrjes së shpejtë të ekipeve të shpëtimit.

Analisti politik Fatmir Merkoçi ka kritikuar ashpër qëndrimin e opozitës lidhur me çështjen e heqjes së imunitetit të zëvendëskryeministres Belinda Balluku.

Duke u ndalur te roli i Komisionit të Mandateve dhe zhvillimet e fundit në lidhje me heqjen e imunitetit të zv/kryeministres Belinda Balluku, Merkoçi argumentoi se opozita duhej të kishte një qëndrim më të qartë për këtë çështje.

Ai kritikoi gjithashtu formën e mobilizimit të opozitës, duke theksuar se aktiviteti i zhvilluar më 22 dhjetor nuk ishte protestë, por miting politik.

“Opozita bën miting, jo protestë. Protestën e bëjnë qytetarët. Ajo që organizoi opozita më 22 dhjetor ishte miting. Ju manipuloni popullin duke e thirrur në protestë dhe duke mos e lënë të protestojë vetë,” i tha ai Ndokës

Sipas Merkocit, protestat e organizuara nga opozita nuk kanë për qëllim rrëzimin e kryeministrit Edi Rama, por shërbejnë për të rikthyer peshën politike të Partisë Demokratike.

“Të gjitha këto nuk janë protesta për të rrëzuar Edi Ramën, por për t’u faktorizuar politikisht, sepse Partia Demokratike ka humbur kredon e saj politike,” përfundoi analisti.

Përgatitjet për zgjedhjet e jashtëzakonshme parlamentare që mbahen të dielën në Kosovë janë drejt përfundimit. KQZ ka certifikuar 1180 kandidatë për deputetë, ndërsa në garë janë 22 subjekte politike, 18 prej tyre janë parti politike, 3 koalicione, 2 iniciativa qytetare dhe një kandidat i pavarur.

Partitë kryesore politike po përmbyllin fushatat gjatë së cilave kanë prezantuar programet e tyre qeverisëse, ku si pika kyçe kanë vendosur ekonominë dhe punësimin. Koalicioni i drejtuar nga Lëvizja Vetëvendosje ka bërë fushatë mbi politikat ekonomike dhe sociale. Premtimet e saj përfshijnë rritje të pagave, subvencione shtetërore, mbështetje për pensionistët dhe studentët, si dhe masa për të frenuar rritjen e çmimeve. Kandidati i saj për kryeministër, Albin Kurti, ka publikuar edhe një listë të të ashtuquajturave vendime të para nëse fiton, të cilat përfshijnë një buxhet më të madh shtetëror, subvencione për energjinë elektrike dhe mbështetje për sektorin privat.

Partia Demokratike e Kosovës me kandidatin për kryeministër Bedri Hamza ka theksuar se dialogu me Serbinë dhe ruajtja e sovranitetit të Kosovës janë thelbësore për qasjen e saj politike. Partia e dytë më e madhe ka folur për zhvillimin ekonomik dhe mirëqenien sociale si shtylla të vizionit të saj qeverisës.

Edhe Lidhja Demokratike e Kosovës e ka përfshirë dialogun me Serbinë në platformën e saj qeverisëse. Fushata e kandidatit të LDK-së për kryeministër Lumir Abdixhiku është përqendruar tek punësimi.  Ndërsa Aleanca për Ardhmërinë e Kosovës e Ramush Haradinajt e ka vënë theksin tek siguria shtetërore, dialogu me Serbinë dhe zhvillimi ekonomik si pika kyçe të programit të saj. Sipas KQZ-së të drejtë vote më 28 dhjetor kanë 2 milionë e 76 mijë e 290 qytetarë.

Procesi zgjedhor brenda vendit do të zhvillohet në 948 qendra të votimit, me 2614 vendvotime. Qendra votimi do të ketë edhe jashtë Kosovës, ku votimi fizik organizohet në 16 ambasada dhe 13 konsullata në disa shtete të botës, ndërsa nga diaspora janë regjistruar për të votuar me postë rreth 76 mijë persona. Zgjedhjet e së dielës janë kyçe për të ardhmen e vendit, i cili kaloi rreth një vit në ngërç politik dhe pa institucione funksionale.

Tek dentisti, një pjesë e mirë e shqiptarëve shkojnë vetëm kur kanë dhimbje. Shëndeti oral nuk është pjesë e kontrolleve dhe pastrimeve periodike.

Kjo mungesë i çon jo rrallë herë drejt infeksioneve që lidhen me shumë sëmundje, që nga infeksionet në mishrat e dhëmbëve e deri te sëmundjet kardiovaskulare.

Ndërsa një pjesë tjetër nuk shkojnë jo nga padija, por për shkak të kostove të larta që kanë klinikat private.

“Problematika më e shpeshtë është kariesi ose dhëmbët e prishur. Pavarësisht se ka një rritje të ndërgjegjësimit për t’u kujdesur, një pjesë e mirë e popullatës nuk paraqitet për të adresuar problematikat”, tha Belisa Kaleci, drejtoreshë e Klinikës Stomatologjike Universitare.

Klinika Stomatologjike Universitare në QSUT ofron shërbime falas për qytetarët që nuk kanë mundësi financiare, ku pensionistët janë përfituesit më të mëdhenj.

“Ne ofrojmë shërbime për moshat 0–18 vjeç, për pensionistët, familjet në nevojë, për çdo qytetar të Shqipërisë dhe për të huaj rezidentë”, tha ajo.

Në këtë strukturë universitare, ekipi i stomatologëve aplikon protokolle sipas standardeve ndërkombëtare për një gamë të gjerë shërbimesh.

“Ne ofrojmë jo vetëm shërbime bazike, por edhe ndërhyrje kirurgjikale me lazer kirurgjikal. Së fundmi jemi pajisur edhe me skaner 3D”, nënvizoi Kaleci.

Shërbimet, një herë në javë, ofrohen edhe për fëmijët romë dhe egjiptianë, ndërsa për personat me aftësi të kufizuara janë falas. Klinika ofron mundësi të ushtrimit të profesionit edhe për studentët dhe specializantët.

Nga Ben Andoni

Ka shumë arsye pse e Majta shqiptare po dështon nga dita në ditë, por janë disa që kërcasin frikshëm në veshët e kujtdo. Dhe, kjo, jo vetëm në Shqipëri por edhe në Kosovë, ku për koincidence është po qeveri e Majtë (Të paktën deri më tani. Kosova mban zgjedhje më 28 Dhjetor), veçse tejet larg një marrëdhënie normale me njëra-tjetrën!! Si fillim, ishte kritike ajo e dhënë e pak kohëve më parë, kur sipas të dhënave të INSTAT që matnin të ardhurat dhe nivelin e jetesës në vitin 2023, Shqipëria regjistronte 42.1% të popullsisë që vuanin nga një formë e rëndë e varfërisë. Që po t’i referohej të dhënave të  Censusit 2023 sipas të cilit popullsia e vendit ishte 2.4 milionë banorë, atëherë kjo nxirrte se mbi 1 milion shqiptarë po përjetonin një nga format e varfërisë. Por, problemi është më i thellë dhe kjo lidhet me problematikat e mëdha që po shoqërojnë korrupsionin e qeverisë Rama dhe agjencive të ndryshme qeveritare, si edhe grupin e administratës që ka vënë dorë dhe ka shpërdoruar pasurinë publike. Për të mos marrë përsipër shqyrtimin e fjalorit të rëndë dhe mënyrën sesi përshkruhen njerëzit në shkëmbimet e tyre në platformat e mesazheve celulare. Të mendosh atëherë të vjen paradoksi në kokë, pasi kjo duhet të ishte e Majta që duhej të mendonte për njerëzit dhe t’u shërbente atyre. Dhe, Rama dhe njerëzit e tij, në përgjimet (nëse janë të vërteta) dalin dhe notojnë në një luks të paimagjinueshëm, krejt ndryshe nga patetizmi i tij\tyre publik për ndihmën dhe politikat sociale.

E vështirë situata dhe në Kosovë, por jo vetëm për politikat e jashtme, por më shumë për politikat e brendshme. Kur mendon se bizneset kosovare po shkojnë larg Kosovës, më së shumti në Shqipëri (ky mund të quhet edhe një lloj fati për bashkimin tonë); problemet me energjinë që po ia rëndojnë barrën qytetarit dhe biznesit ; atë që po shkreton Shqipërinë e Kosovën: largimin e njerëzve; problemet me arsimin (Kosova ka nivele shumë inferiore në vlerësimin e PISA) që nuk ndalen dhe mbi të gjitha varfërimin. E megjithatë në Kosovë vazhdon ngritja e Kultit të Individit. Së fundmi, ministri Faton Peci e teproi në këtë vazhdë, kur gjatë një tubimi në Mitrovicë sugjeroi që ura në këtë qytet të mbajë emrin e kryeministrit në detyrë Albin Kurti! Të mendosh vargani i personaliteteve në Mitrovicë është i pafundmë. Apo kur një këngëtare propozoi dhe përgatiti një këngë për kryetarin Kurti, që për fat u hodh poshtë nga vetë anëtarët e saj. Jo se në Shqipëri nuk bëhen, por të paktën këtu, Rama po i kënaqet vetes me pjesën vanitoze që është bërë pjesë dhe në shumë segmente të administratës së tij.

Për specialistët por edhe njerëzit që mund të apelojnë interesi publik është që të ketë mundësi e mendim më të madh për grupet e pensionistëve, apo për ato shtresa të vetmuara sepse me ndryshimet territoriale, demografike, sociale që kanë ndodhur në shoqëri, kemi komunitete të tëra që janë vulnerabël mes kategorive të ndryshme sociale, do sugjeronte mes të tjerave eksperti Xhepa. Specialistët sugjerojnë për instrumente ndërhyrje, por që në veshët e drejtuesve të së Majtës shqiptare në dy anët e kufirit nuk cingërrijnë. Për ta, sfida është mbajtja e pushtetit me çdo kusht. Po pse vallë e Majta shqiptare po e dëmton veten?! Kësaj pyetje i jepet vetëm një përgjigje: Nga panginja! (Javanews)

Ish kandidati për kryetar të Partisë Demokratike, Ibsen Elezi thotë se PD është bërë shërbyese e familjes së Sali Berishës.

Në një intervistë për “Tirana Live” në ABC News, Elezi u shpreh se PD e kanë braktisur mbi 200 mijë votues.

“Partia është kthyer në një ngrehinë të shkatërruar. Në vetvete ka një barrë të madhe. Fakti që këtu janë thyer të gjitha rregullat, mënyra se si funksionon. Nëse akuzojmë Ramën për autokraci, e njëjta është në PD. Thelbi i gjësë pse PD ka rënë, erdhi gradualisht shkatërrimi. Nuk e di si kanë kurajo t’i flasin për demokraci, anëtarëve të PD. I vjen shumë njerëzve keq. Të jesh i sigurt që pjesa më e madhe e demokratëve, janë në një situatë ku nuk e dijnë se si është zgjidhja. Nuk është çështje organizimi. Duhet të ketë frymë, dëshirë që njerëzit të mblidhen. Nuk ka frymë. PD e kanë braktisur mbi 200 mijë votues. PD është në rënie të vazhdueshme, nuk ka progres. Sali Berisha po e përdor për interesa të familjes së vet.”, theksoi ai.

Pas një procesi të plotë rikonstruksioni, Kinema “Republika”, një nga simbolet e qytetit të Shkodrës, hap sot dyert për publikun.

Lajmi është bërë i ditur nga Kryeministri Edi Rama, i cili përmes rrjeteve sociale ka ndarë pamjet e godinës së transformuar.

“Kinema ‘Republika’ në Shkodër është gati dhe sot nis shfaqja e filmave,”, shkruan kreu i qeverisë, duke theksuar se godina tashmë ofron standarde moderne.

Investimi ka prekur çdo qelizë të këtij institucioni. Ndërhyrja ka përfshirë fasadën e jashtme, duke i dhënë një pamje dinjitoze, si dhe ambientet e brendshme, të cilat janë kompletuar me infrastrukturë, arredim dhe teknologji të kohës për të garantuar cilësinë maksimale të projeksioneve.

Edhe Kryetari i Bashkisë Shkodër, Benet Beci, përshëndeti hapjen e kinemasë, duke e cilësuar këtë si rikthim të magjisë së filmit “në një ambient që shkëlqen sërish”.

Sipas Becit, ky transformim e vendos Kinema “Republikën” sërish në piedestalin e hapësirave kulturore që i takon qytetit të Shkodrës.

Ditët e fundit të muajit dhjetor janë shoqëruar me një fluks të lartë lëvizjesh në pikën e kalimit kufitar të Muriqanit.

Shumica e udhëtarëve janë emigrantë, të cilët po kthehen drejt vendlindjes së tyre në Shkodër për të festuar fundvitin pranë familjarëve dhe të afërmve.

Ndërkohë, gjatë ditës së sotme, për shkak të fundjavës, është regjistruar fluks i shtuar edhe në dalje të pikës së kalimit kufitar.

Bëhet fjalë kryesisht për qytetarë shkodranë që udhëtojnë drejt Malit të Zi për të kaluar fundjavën.

Sipas të dhënave zyrtare, në Muriqan me datë 25 Dhjetor janë përpunuar gjithsej 6 670 shtetas, nga të cilët 4 936 në hyrje të Republikës së Shqipërisë dhe 1 734 në dalje.Po ashtu, janë përpunuar 4 221 automjete, ku 1 742 prej tyre kanë hyrë në territorin shqiptar, ndërsa 679 kanë dalë nga vendi.

Nën emrat e koduar Kristi, Afrimi, Hasani, Rei dhe Astriti , agjentët e maskuar kërkuan të blejnë kokainë e hashash nga 22 shpërndarës droge në Tiranë, të cilët mbasi folën për cilësinë e saj dëgjuan fjalën Policia.

Detajet e fashikullit hetimor u lexuan në gjykatën penale gjatë masës së sigurisë ndaj shpërndarësve, që akuzohen se shisnin narkotikë në zona fikse të Tiranës.

Gjatë seancës me dyer të mbyllura, njëri nga shpërndarësit e drogës kërkoi mëshirë duke thënë se ishte kujdestari i nënës së verbër dhe vëllait të paralizuar.

Përpara se gjykata të shprehej, prokurori ndryshoi qëndrim për të dyshuarin dhe nga arrest në burg sugjeroi masë më të butë.

“Janë secili teke e tek nuk ka grup të strukturuar se ndryshe do ishin te SPAK, grupi i strukturuar kriminal. Të gjithë këta pothuajse janë për kokainë”, u shpreh avokati Selim Kryeziu.

Gjithmonë e më shumë policia po përdor edhe përdoruesit e drogës.

“Të gjithë dyshuarit e dyshuar janë persona të skeduar nga policia e shtetit dhe agjenda në mbulim, ka shkuar direkët te personat që ishte i njohur nga organet e policisë”, tha Selim Kryeziu.

Në burgje janë 124 përdorues droge, të arrestuar kryesisht gjatë tempujve, por shumë të tjerë janë edhe për krime si dhuna në familje dhe konfliktet fizike.

Megjithëse indikatorët tregojnë shumëfishim të përdoruesve të drogës, zyrtarisht nuk ekziston asnjë shifër e përafërt.