Komuna e Drenasit ka bërë apel për kujdes të shtuar nga qytetarët gjatë ditëve me temperatura të larta dhe thatësi të madhe, pas regjistrimit të disa vatrave të zjarrit në territorin e kësaj komune.
Sipas njoftimit të Komunës së Drenasit, ekipet e Njësisë së Zjarrfikjes dhe Shpëtimit kanë intervenuar vazhdimisht në terren për lokalizimin dhe shuarjen e zjarreve.
“Ekipet e Njësisë së Zjarrfikjes dhe Shpëtimit kanë intervenuar pa ndërprerje dhe vazhdojnë të jenë në terren për lokalizimin dhe shuarjen e zjarreve, duke rrezikuar jetën e tyre për mbrojtjen e qytetarëve, pronës dhe mjedisit”, thuhet në njoftimin e Komunës.
Komuna u ka bërë thirrje qytetarëve që të shmangin çdo veprim që mund të shkaktojë zjarre, veçanërisht ndezjen e zjarreve në ambiente të hapura, djegien e hamulloreve, barit të thatë, mbeturinave apo mbetjeve bujqësore.
Po ashtu, qytetarëve u është kërkuar që të mos hedhin cigare të ndezura në natyrë, përgjatë rrugëve apo në sipërfaqe me bimësi të thatë, si dhe të mos lënë pa mbikëqyrje burime të zjarrit.
“Çdo pakujdesi, sado e vogël, mund të shkaktojë pasoja të rënda për jetën e njerëzve, pronën, tokat bujqësore, pyjet dhe mjedisin. Parandalimi është përgjegjësi e secilit prej nesh”, ka theksuar Komuna.
Në rast të vërejtjes së zjarreve apo rrezikut për përhapjen e tyre, qytetarët janë ftuar që të njoftojnë menjëherë shërbimet emergjente dhe autoritetet përkatëse, pasi reagimi i shpejtë mund të parandalojë dëme më të mëdha.
Komuna e Drenasit ka shprehur mirënjohje për zjarrfikësit, Policinë e Kosovës, institucionet përkatëse dhe qytetarët që po kontribuojnë në përballimin e situatës me zjarret. /Telegrafi/
Komuna e Drenasit ka njoftuar qytetarët për urdhëresën më të re të Ministrisë së Mjedisit dhe Planifikimit hapësinor, e cila përbën marrjen e masave urgjente të kujdesit gjatë sezonës së verës për menaxhimin e mbeturinave.
Urdhëresa e re iu drejtohet të gjitha komunave të Republikës së Kosovës, institucioneve qendrore dhe lokale, spitaleve dhe institucioneve shëndetësore, ndërmarrjeve publike, infrastrukturës ujore dhe të gjitha subjekteve afariste private në cilësinë e poseduesve dhe gjeneruesve të mbeturinave.
Sipas Urdhëresës, ndalohet rreptësisht grumbullimi i mbeturinave urbane në lokacione që rrezikojnë shëndetin publik, posaçërisht pranë institucioneve edukative; në parqe, përfshirë terrenet sportive dhe këndet e lojërave; në rrugët kryesore dhe zonat me frekuentim të lartë të kalimtarëve; si dhe pranë bizneseve ushqimore dhe objekteve të gastronomisë.
Autoritetet përgjegjëse duhet të ndërmarrin masat e nevojshme për eliminimin e ekspozimit të mbeturinave në zona me rrezikshmëri të lartë.
Komunat dhe ndërmarrjet menaxhuese obligohen të vendosin një sistem të ndarë për grumbullimin e mbeturinave nga bizneset e gastronomisë dhe marketet, me qëllim parandalimin e stërmbushjes së kontejnerëve të përbashkët të dedikuar për banorët, sepse ka filluar zbatimi i masave ndëshkuese.
Inspektorati Qendror i MMPH-së, në bashkëpunim me atë Komunal, autorizohet që pas kalimit të afati kohor brenda 7 ditëve nga dita e pranimit të kësaj urdhërese, të dorëzojnë në Ministrinë e Mjedisit dhe Planifikimit Hapësinor planin dhe provat e masave të marra emergjente./Telegrafi/
Drejtoria për Bujqësi dhe Zhvillim Rural e Komunës së Drenasit ka nxjerrë aktvendim për përcaktimin e çmimit orientues të shërbimeve të korrje-shirjeve të drithërave të bardha në territorin e komunës.
Sipas këtij aktvendimi, çmimi orientues për shërbimet e korrje-shirjeve të grurit, elbit, tërshërës dhe thekrës është caktuar në 140 euro për hektar, ndërsa çmimi përfundimtar do të përcaktohet me marrëveshje ndërmjet fermerëve dhe autokombajnerëve.
Në aktvendim theksohet se pajisjet dhe makineritë bujqësore duhet të jenë në gjendje të rregullt teknike, me qëllim të uljes së humbjeve gjatë procesit të korrje-shirjes, si dhe të jenë të pajisura me mjetet e nevojshme për parandalimin dhe shuarjen e zjarreve.
"Me këtë aktvendim, çmimi orientues është caktuar në 140 euro për hektar, ndërsa çmimi përfundimtar i shërbimit përcaktohet me marrëveshje ndërmjet fermerëve dhe autokombajnerëve", thuhet në njoftim.
Autoritetet komunale kanë bërë të ditur se zbatimi i aktvendimit do të mbikëqyret nga Drejtoria e Bujqësisë dhe Zhvillimit Rural, në bashkëpunim me Drejtorinë e Inspeksionit dhe Drejtorinë e Shërbimeve Publike.
"Autokombajnat duhet të jenë në gjendje të mirë teknike, me qëllim të minimizimit të humbjeve gjatë korrje-shirjes, si dhe të pajisen me mjetet e nevojshme për parandalimin dhe shuarjen e zjarreve, në përputhje me kërkesat e përcaktuara", theksohet më tej në aktvendim.
Po ashtu, është bërë e ditur se për moszbatimin e dispozitave të aktvendimit do të ndërmerren masat përkatëse nga organet kompetente komunale. /Telegrafi/
Komuna e Drenasit ka reaguar në Facebook lidhur me debatet e fundit për urën në Shtrubullovë, duke thënë se është e obliguar të sqarojë opinionin publik “me fakte dhe dokumente”, ndërsa ka mohuar pretendimet se institucioni është në pritje të dorëzimit të dokumentacionit teknik.
Sipas Komunës, që nga muaji shkurt është marrë “intensivisht” me këtë çështje, duke adresuar fillimisht kërkesën për mbështetje financiare në Komisionin Parlamentar përkatës, para miratimit të Buxhetit të Republikës së Kosovës, me qëllim që projekti të përfshihej në planifikimet buxhetore.
“Kërkesa për mbështetje financiare për ndërtimin e urës fillimisht është adresuar në muajin shkurt në Komisionin Parlamentar përkatës, para miratimit të Buxhetit të Republikës së Kosovës”, thuhet në reagim.
Komuna ka bërë të ditur se në muajin mars kërkesa është dërguar edhe në Ministrinë e Infrastrukturës, së bashku me projektin, paramasën dhe parallogarinë.
“Më pas, kërkesa në muajin mars është dërguar edhe në Ministrinë e Infrastrukturës, së bashku me projektin, paramasën dhe parallogarinë”, thuhet më tej.
Në reagim, Komuna pretendon se pavarësisht kërkesave të vazhdueshme, përgjigjet e pranuara nga ministria kanë qenë se nuk ekziston kod buxhetor dhe se nuk ka mundësi financiare për ta financuar projektin.
“Përkundër kërkesave tona të vazhdueshme, përgjigjet e pranuara nga Ministria kanë qenë se nuk ekziston kod buxhetor dhe as mundësi financiare për financimin e këtij projekti”, thuhet në reagim.
Komuna ka deklaruar se pas këtyre përgjigjeve, kryetari Ramiz Lladrovci në seancë të Kuvendit Komunal ka propozuar krijimin e një kodi të ri buxhetor, përmes rialokimit të mjeteve nga projekte të tjera kapitale për ndërtimin e urës. Sipas saj, vetëm pas këtij propozimi, ministri ka njoftuar publikisht se Ministria do ta marrë përsipër financimin e projektit.
“Vetëm pas kësaj, ministri përmes një deklarimi publik në Facebook njoftoi se Ministria do ta marrë përsipër financimin e projektit”, thuhet në reagim.
Komuna ka theksuar se pretendimet se është në pritje të dokumentacionit teknik “nuk qëndrojnë”, duke thënë se projekti, paramasa dhe parallogaria janë dorëzuar që në shkurt, ndërsa dokumentet janë ridërguar edhe një herë “për hir të transparencës dhe përshpejtimit të procedurave”.
“Pretendimet se Komuna është në pritje të dorëzimit të dokumentacionit teknik nuk qëndrojnë… i kemi ridërguar edhe një herë të gjitha dokumentet e kërkuara”, thuhet më tej.
Në fund, Komuna e Drenasit ka thënë se e mirëpret çdo gatishmëri për financimin e projektit, por ka vlerësuar se është e padrejtë të krijohet përshtypja se procesi ka nisur tani, pasi, sipas saj, pas tij qëndrojnë muaj pune dhe angazhim institucional.
“Është e padrejtë të krijohet përshtypja se ky proces ka filluar tani, kur në fakt pas tij qëndrojnë muaj të tërë pune, kërkesa zyrtare dhe angazhim institucional nga Komuna e Drenasit”, përfundon reagimi. /Telegrafi/
Komuna e Drenasit ka njoftuar se ka vazhduar procesin e lirimit të hapësirave publike në Komoran, duke bërë të ditur se sot ka nisur rrënimi i një objekti në rrugën “Anton Çeta”, pasi një pjesë e tij, sipas komunës, ndodhej në hapësirë publike.
Në njoftimin e komunës thuhet se veprimet janë ndërmarrë në kuadër të procedurave ligjore për lirimin e hapësirave publike, ndërsa procesi po zhvillohet përmes Drejtorisë së Inspekcionit.
“Komuna e Drenasit, përkatësisht Drejtoria e Inspekcionit, sot në rr. Anton Çeta në Komoran ka filluar rrënimin e një objekti, një pjesë e të cilit ndodhej në hapësirë publike”, thuhet në njoftim.
Komuna ka bërë të ditur se punimet kanë nisur me bashkëpunimin e pronarit dhe se rrënimi po bëhet vetëm në pjesën që, sipas njoftimit, kishte zënë hapësirën publike.
“Me bashkëpunimin e pronarit, sot kanë nisur punimet për rrënimin e pjesës së objektit që kishte zënë hapësirën publike, duke mundësuar lirimin e kësaj hapësire dhe përgatitjen e saj për asfaltimin e rrugës në atë pjesë”, thuhet më tej.
Sipas komunës, procesi i lirimit të hapësirave publike do të vazhdojë edhe në ditët në vijim, me synimin që të krijohet një mjedis më i rregullt dhe më i sigurt për qytetarët.
“Komuna do të vazhdojë edhe në ditët në vijim me zbatimin e procedurave ligjore për lirimin e hapësirave publike, me qëllim të krijimit të një mjedisi më të rregullt, më funksional dhe më të sigurt për të gjithë qytetarët”, përfundon njoftimi. /Telegrafi/
Ministri i Sportit dhe Rinisë, Blerim Gashani, ka vizituar Drenasin, ku është pritur nga kryetari i komunës, Ramiz Lladrovci.
Gjatë takimit, sipas tij, është diskutuar për zhvillimin e sportit në këtë komunë, me theks të veçantë në disa projekte dhe disiplina sportive.
“Gjatë takimit, diskutuam për zhvillimin e sportit në komunë. Në veçanti, përveç futbollit, u ndalëm te shigjetaria, një disiplinë për të cilën Komuna e Drenasit do të jetë nikoqire në kuadër të Lojërave Mesdhetare 2030, si dhe te projekti për ndërtimin e pishinës gjysmë-olimpike”, ka deklaruar Gashani.
Ai ka bërë të ditur se në takim është diskutuar edhe për fuqizimin e rinisë dhe krijimin e më shumë hapësirave për angazhimin e tyre.
“Një vëmendje e veçantë iu kushtua fuqizimit të rinisë dhe krijimit të më shumë hapësirave dhe mundësive për angazhimin e tyre aktiv”, ka theksuar ai.
Ministri ka nënvizuar rëndësinë e investimeve të vazhdueshme në infrastrukturën sportive dhe bashkëpunimin ndërinstitucional.
“Theksova rëndësinë e investimeve të vazhdueshme në infrastrukturën sportive, duke vlerësuar bashkëpunimin ndërinstitucional si një faktor kyç për krijimin e kushteve më të mira për sportistët dhe komunitetin lokal”, është shprehur Gashani.
Në përmbyllje të vizitës, ai së bashku me kryetarin Lladrovci kanë vizituar stadiumin e qytetit.
“Në përmbyllje të vizitës, së bashku me Kryetarin, vizituam Stadiumin e Qytetit Rexhep Rexhepi në Drenas për të parë nga afër ecurinë e punimeve”, ka shtuar ai. /Telegrafi/
Kryetari i Komunës së Drenasit, Ramiz Lladrovci, ka nënshkruar një marrëveshje bashkëpunimi me organizatën Islamic Relief Worldwide – Zyra në Kosovë, për mbështetjen e fermerëve lokalë me pajisje bujqësore, në vlerë mbi 110 mijë euro.
Marrëveshja është nënshkruar me drejtorin e kësaj organizate, Dr. Mohamed Soliman, dhe parasheh realizimin e një projekti në sektorin e bujqësisë, i cili synon rritjen e kapaciteteve prodhuese dhe përmirësimin e kushteve të punës për fermerët e komunës.
Sipas detajeve të marrëveshjes, vlera totale e projektit është 110,873.40 euro, prej të cilave 61,350 euro, apo 55 për qind, do të financohen nga Islamic Relief, ndërsa 49,523.40 euro, apo 45 për qind, nga Komuna e Drenasit.
Përfitues të projektit do të jenë fermerët e komunës, ndërsa zbatimi i tij do të bëhet në bashkëpunim me Drejtorinë për Bujqësi dhe Zhvillim Rural.
Po ashtu, marrëveshja parasheh edhe pjesëmarrjen e fermerëve përfitues me 30 për qind të vlerës së komponentës përfituese, pas publikimit të listës së përfituesve.
Nga Komuna e Drenasit bëjnë të ditur se përmes këtij projekti synohet fuqizimi i sektorit bujqësor përmes një modeli bashkëpunimi ndërmjet donatorit, institucionit lokal dhe vetë fermerëve, me qëllim zhvillimin e qëndrueshëm të bujqësisë në këtë komunë. /Telegrafi/
Debati për ndërtimin e stadiumit kombëtar të futbollit në Kosovë vazhdon të mbetet një nga temat më të diskutuara në vend, duke përfshirë institucione, federata dhe opinionin publik.
Kërkesa në rritje për kapacitete më të mëdha dhe standarde ndërkombëtare, sidomos në prag të organizimit të Lojërave Mesdhetare 2030, ka shtuar presionin për një vendim sa më të shpejtë dhe të qartë për lokacionin e këtij projekti madhor.
Në këtë kontekst, kryetari i Komunës së Drenasit, Ramiz Lladrovci, duke folur për KosovaPress rreth kësaj çështje, ka deklaruar se ka informacione jozyrtare lidhur me vendndodhjen e mundshme të stadiumit, duke theksuar se vendimi final ende nuk është marrë dhe se procesi është në fazë vlerësimi nga institucionet përgjegjëse.
Ai ka bërë të ditur se sipas informatave që posedon, një nga opsionet që po qarkullon është ndërtimi i stadiumit në afërsi të Prishtina Mall, megjithatë ka shprehur rezerva për këtë ide dhe ka paralajmëruar për implikimet ligjore në rast të keqpërdorimeve të mundshme.
“Unë kam informata jo zyrtare që do të bëhet prapa Prishtina Mall, në Graçanicë, në qoftë se dikush e dërgon për biznese të veta tek Prishtina Mall, ka për të pasur shumë probleme me ligjin sepse atje prona kushton bajagi shtrenjtë”, ka thënë fillimisht Lladrovci.
“Kam informacione jo zyrtare thash që nuk e besoj por si informacion ka dalë që i ka pasur kërkesat. Me sa kam informacion unë qeveria ose ministria e ka caktuar një komision i cili ka për ta bërë vlerësimin dhe ka për të vendosur, e që është nga Komiteti Olimpik, që është nga federata dhe nga ministria”.
“Ne në kuadër të Lojërave Mesdhetare është dashtë me qenë dhe ka qenë i paraparë edhe stadiumi, e kemi një nënshkrim me ministrin paraprak që e kemi bërë dhe që e kemi në memorandum të nënshkruar për tu ndërtuar stadiumi sa më shpejtë. Unë dhe gjithë infrastrukturën që e kam sa i përket Lojërave Mesdhetare, unë kam vënë dispozicion dhe jam i gatshëm me e bë çdo ndërhyrje që do të kërkojnë nga ky komitet t’i themi ose nga ky komision i përcaktuar për këtë çështje”, përfundoi kryetari i Drenasit.
Së fundi, ministri i Ministrisë për Rini dhe Sport, Blerim Gashani, në një intervistë në “SportCast” të KosovaPressit, pranoi se momentalisht, Drenasi mbetet si lokacioni më i mundshëm për nisjen e ndërtimit të stadiumit të ri.
Kujtojmë se Kosova do të jetë organizatore e Lojërave Mesdhetare në vitin 2030 dhe ndërtimi i një stadiumi të ri është premtuar për këtë ngjarje, andaj, me afrimin e afateve për këtë ngjarje, pritet që institucionet përgjegjëse të intensifikojnë procesin dhe të dalin me një vendim përfundimtar që do të përcaktojë një nga projektet më të rëndësishme sportive në vend.
Qendra Kryesore e Mjekësisë Familjare QKMF "Dr Hafir Shala" është pajisur me një shtrat modern për lindje dhe një inkubator transportues për foshnje, përmes një donacioni që synon përmirësimin e shërbimeve shëndetësore për nënat dhe të porsalindurit në komunën e Drenasit.
Sipas Komunës së Drenasit, pajisjet e reja pritet të ndikojnë drejtpërdrejt në rritjen e cilësisë dhe sigurisë së kujdesit shëndetësor për pacientët në këtë institucion.
Donatorët u pritën nga nënkryetari i komunës, Arben Shala, drejtoresha e Shëndetësisë, Klatrina Qerkinaj, drejtori i QKMF-së, Ismet Bogiqi, si dhe nga stafi i institucionit shëndetësor, të cilët shprehën mirënjohje për kontributin në përmirësimin e shërbimeve për qytetarët.
Ky donacion është mundësuar nga Action for Mothers and Children përmes menaxherit Fitim Sadiku, si dhe nga Cycle of Kosovo Children, e përfaqësuar nga Agim Bilalli, organizata që kanë kontribuar vazhdimisht në përmirësimin e shëndetit të nënave dhe fëmijëve.
Në emër të komunës, nënkryetari Shala ka falënderuar donatorët për mbështetjen e ofruar.
“Mbështetje të tilla përbëjnë një dëshmi të qartë të bashkëpunimit të suksesshëm ndërmjet institucioneve publike dhe organizatave që kanë në fokus mirëqenien dhe shëndetin e qytetarëve”, ka theksuar ai. /Telegrafi/
Komuna e Drenas ka njoftuar qytetarët se, pas vërshimeve të fundit, është siguruar një dehumidifikues ajri për tharjen e hapësirave të prekura nga lagështia.
Sipas njoftimit, pajisja është vënë në dispozicion nga Kryqi i Kuq i Kosovës – dega në Drenas, dhe mund të merret çdo ditë pune në zyrat e kësaj dege.
Shfrytëzimi i dehumidifikuesit është pa pagesë dhe mund të përdoret për aq kohë sa është e nevojshme, në varësi të gjendjes së objekteve të dëmtuara.
Autoritetet lokale kanë ftuar të gjithë qytetarët që kanë pësuar dëme nga lagështia që të paraqiten dhe ta shfrytëzojnë këtë mundësi në funksion të rikthimit të kushteve normale në banesat e tyre. /Telegrafi/
Komuna e Drenasit ka përfituar një ndërmarrje publike, duke u larguar kështu nga operatorët privat.
“EKO Drenasi” Sh.A, do të ofrojë mirëmbajtjen e hapësirave dhe ndërtesave publike.
“Nga njësia përkatëse është bërë e ditur se kushtet janë plotësuar dhe kjo ndërmarrje do të bëjë mirëmbajtjen e hapësirave publike dhe shërbime të tjera komunale”, tha ministrja Artane Rizvanolli.
Kështu, në mbledhjen e Qeverisë u miratua themelimi i kompanisë komunale “EKO Drenasi”. /Telegrafi/
Komuna e Drenasit ka njoftuar bletarët se, bazuar në Ligjin mbi Bletarinë nr. 02/L-111, janë të obliguar të raportojnë numrin dhe vendin e vendosjes së shoqërive të bletëve deri më 30 prill të çdo viti kalendarik.
Sipas njoftimit, obligimi vlen për të gjithë personat fizikë dhe juridikë që merren me bletari, të cilët duhet të paraqiten në Drejtorinë Komunale për Bujqësi dhe Zhvillim Rural për t’u regjistruar në regjistrin zyrtar të bletarëve.
Nga komuna kanë theksuar se regjistrimi është i domosdoshëm për zbatimin e dispozitave ligjore dhe për krijimin e bazës së të dhënave për sektorin e bletarisë, ndërsa bletarët janë ftuar të respektojnë afatin e përcaktuar. /Telegrafi/
Komuna e Drenasit ka përfunduar instalimin e sistemeve fotovoltaike në dy shkolla të mesme, në kuadër të investimeve për promovimin e energjisë së pastër dhe të qëndrueshme.
Sipas njoftimit zyrtar, panelet diellore janë instaluar në Shkollën e Mesme “Gjergj Kastrioti – Skënderbeu”, me kapacitet prej 14.26 kWp, si dhe në Shkollën e Mesme “Fehmi Lladrovci”, me kapacitet prej 17.36 kWp.
Këto investime janë realizuar në bashkëpunim me Fondacionet e Shoqërisë së Hapur – Ballkani Perëndimor (OSF-WB), bazuar në Memorandumin e Bashkëpunimit për Avancimin e Tranzicionit të Energjisë Komunale, të nënshkruar më herët ndërmjet palëve.
Nga Komuna e Drenasit bëhet e ditur se ky projekt synon prodhimin e energjisë së pastër, uljen e kostove të energjisë elektrike dhe promovimin e qëndrueshmërisë mjedisore në institucionet arsimore.
Po ashtu, theksohet se Komuna e Drenasit mbetet e përkushtuar në zbatimin e projekteve që ndikojnë drejtpërdrejt në mirëqenien e qytetarëve dhe në mbrojtjen e mjedisit. /Telegrafi/
Vërshimet e muajit janar 2026 shkaktuan dëme të konsiderueshme materiale në disa komuna të Kosovës, duke prekur dhjetëra familje dhe biznese. Megjithëse komunat formuan komisione dhe krijuan platforma për raportimin e dëmeve, këto aplikime, sikurse edhe në vitet e kaluara, rrezikojnë të mbesin vetëm dokumentacion në letër, për shkak të mungesës së kodit buxhetor dhe fondeve për kompensim.
Komunat më të prekura nga vërshimet e fillimit të këtij viti ishin Drenasi, Malisheva, Rahoveci, Skenderaj, Gjakova dhe Mitrovica, ndërsa në disa komuna të tjera situata u përballua më lehtë.
Si ishte situata në të kaluarën?
Problemi i kompensimit të dëmeve nga fatkeqësitë natyrore vazhdon që nga viti 2016. Familjet dhe bizneset e prekura ndër vite nuk janë kompensuar plotësisht, pasi nuk ekziston një rregullore e qartë që u mundëson komunave realizimin e pagesave, përveç rasteve kur Ministria e Financave ndan mjete specifike për këtë qëllim, pasi mungon "Fondi i Emergjencave".
Në një përgjigje për Telegrafin, drejtori i Asociacionit të Komunave të Kosovës, Sazan Ibrahimi, shpjegoi arsyet pse pagesat për dëmet nuk janë realizuar plotësisht.
“Arsyet kryesore janë disa dhe kryesisht lidhen me kufizimet ligjore dhe financiare me të cilat përballen komunat, ato nuk kanë një fond të veçantë emergjent për kompensimin e dëmeve nga fatkeqësitë natyrore dhe nuk kanë mjete të mjaftueshme për situata të tilla të jashtëzakonshme”, tha ai.
Sipas Ibrahimit, ligji aktual nuk u jep komunave mundësi për pagesa të drejtpërdrejta për kompensimin e dëmeve.
“Ligji aktual nuk ua mundëson komunave që të bëjnë pagesa të drejtpërdrejta për kompensim të dëmeve. Procedurat e vlerësimit të dëmeve janë të ndërlikuara dhe kërkojnë komisione profesionale, raporte zyrtare dhe verifikime të shumta, gjë që e zgjat procesin”, theksoi ai.
Ibrahimi shtoi se kompetencat kryesore dhe mekanizmat financiarë për menaxhimin e fatkeqësive natyrore janë të përqendruara në nivelin qendror.
“Pjesa më e madhe e kompetencave dhe mekanizmave financiarë për menaxhimin e fatkeqësive natyrore janë të përqendruara në nivelin qendror, ndërsa komunat nuk kanë instrumente të mjaftueshme për të reaguar financiarisht”, potencoi drejtori i AKK-së.
Ai bëri të ditur se Asociacioni i Komunave të Kosovës është duke lobuar në Qeveri dhe Kuvendin e Kosovës për krijimin e një Fondi Kombëtar Emergjent për Komuna.
“Asociacioni i Komunave të Kosovës është duke ndërmarrë disa hapa konkretë. Ne vazhdimisht po lobojmë pranë Qeverisë dhe Kuvendit për krijimin e një Fondi Kombëtar Emergjent për Komuna, i cili do të mundësonte reagim të shpejtë financiar në raste fatkeqësish natyrore”, tha Ibrahimi.
Ai shtoi se AKK po kërkon edhe ndryshime ligjore që komunave t’u jepet bazë më e qartë juridike për kompensimin e dëmeve dhe për menaxhimin e situatave emergjente.
“Po punojmë me komunat për ngritjen e kapaciteteve të tyre profesionale sa i përket menaxhimit më të lehtë të situatave emergjente”, deklaroi ai.
Sipas Ibrahimit, për të shmangur mbetjen pa përkrahje të qytetarëve dhe bizneseve, është e domosdoshme një qasje e koordinuar ndërmjet nivelit qendror dhe atij lokal.
“AKK ka propozuar që në kuadër të buxhetit të shtetit të parashihet një linjë e veçantë për mbështetjen e komunave të prekura nga vërshimet, në mënyrë që qytetarët dhe bizneset të mos mbeten pa përkrahje. Qëndrimi ynë është i qartë: komunat nuk mund të përballojnë pasojat financiare të fatkeqësive natyrore. Prandaj nevojitet një qasje e koordinuar ndërmjet nivelit qendror dhe lokal, me mekanizma të qëndrueshëm financiarë dhe ligjorë”, përfundoi ai.
Çfarë thonë komunat?
Ndërkaq, drejtori i Shërbimeve Publike dhe Emergjencës në Komunën e Drenasit, Nexhmedin Gruda, bëri të ditur për Telegrafin se aktualisht janë duke u përgatitur raportet përfundimtare për vërshimet e fundit, të cilat më pas do të procedohen në Kuvendin Komunal.
Foto: Nexhmedin Gruda/ Drejtor i Drejtorisë së Shërbimeve Publike dhe Emergjencë, Komuna e Drenasit
“Në bazë të kompetencave të DShPE-së, kemi këto të dhëna për gjendjen aktuale të pagesave për dëmet nga vërshimet për vitet e fundit. Aktualisht, Komisioni për Vlerësimin e Dëmeve nga Fatkeqësitë Natyrore dhe fatkeqësitë e tjera është në fazën e përgatitjes së raportit përfundimtar lidhur me vërshimet e ndodhura nga data 6 deri më 11 janar. Pas përfundimit të raportit, i njëjti do të procedohet për miratim në seancën e ardhshme të Kuvendit Komunal dhe më pas do t’i dërgohet Komisionit Qeveritar për Vlerësimin e Dëmeve, me qëllim të procesimit për pagesë”, tha Gruda.
Ai theksoi se, pavarësisht aplikimeve me kohë nga qytetarët dhe bizneset, kompensimi nuk ka qenë i mundur për shkak të mungesës së fondit emergjent.
“Komuna e Drenasit nuk ka fond emergjent dhe, për shkak të kufizimeve buxhetore, nuk ka mundësi të realizojë pagesa të kësaj natyre”, bëri të ditur Gruda.
Sipas tij, Komuna e Drenasit ka realizuar pagesa të pjesshme për dëmet nga vërshimet në vitet 2016, 2021 dhe 2023.
“Në bazë të raporteve të komisioneve të vlerësimit për vitet 2016, 2021 dhe 2023, disponojmë këto të dhëna. Për dëmet e shkaktuara në vitin 2016 është realizuar një pagesë e pjesshme”, deklaroi ai.
Sipas të dhënave të prezantuara, dëmet e vitit 2016 përfshijnë: biznese 44,990.00 euro, ekonomi familjare 5,198.00 euro, infrastrukturë 71,320.00 euro dhe bujqësi 48,387.00 euro.
Ndërsa për vitin 2021, dëmet e raportuara janë: biznese 479,517.00 euro, ekonomi familjare 217,643.20 euro, infrastrukturë 1,705,000.00 euro dhe bujqësi 6,738.20 euro.
Dëmet e shkaktuara në vitin 2016, 2021 dhe 2024 në Komunën e Drenasit
Për vitin 2024, sipas Grudës, janë realizuar pagesa për dëme në ndërtim në vlerë 52,510.68 euro dhe në bujqësi 162,794.19 euro.
Nga Komuna e Rahovecit, drejtori i Drejtorisë për Mbrojtje dhe Shpëtim, Irfan Berisha, tha për Telegrafin se dëmet nga vërshimet janë kompensuar vetëm pjesërisht.
“Në vitin 2022, dëmet në bujqësi dhe ekonomi familjare janë kompensuar, ndërsa dëmet në biznese jo”, tha Berisha.
Ai shtoi se për vitet 2023 dhe 2024 raportet janë dërguar në komisionin qendror, por ende nuk ka pasur kompensim.
Foto: Irfan Berisha, Drejtori i Drejtorisë për Mbrojtje dhe Shpëtim, Komuna e Drenasit
“Dëmet e shkaktuara nga vërshimet e datës 5, 6 dhe 7 janar 2026, raporti ka kaluar dhe është votuar në Kuvendin Komunal në janar 2026. Sipas procedurave, janë duke u kompletuar dosjet dhe shumë shpejt do të dorëzohen në komisionin qendror për kompensim të dëmeve”, deklaroi Berisha.
Ai përfundoi duke theksuar se qytetarët duhet të kompensohen për dëmet e shkaktuara nga vërshimet dhe fatkeqësitë e tjera.
Ndërkohë, zyrtari për media në Komunën e Malishevës, Artan Paçarizi, bëri të ditur se dëmet nga vërshimet nuk po kompensohen në tërësi për shkak të mungesës së kodit buxhetor.
“Ka pasur raste kur janë përkrahur në ndonjë situatë të caktuar, por kur ka vërshime masive jo, sepse nuk ka fond emergjent. Edhe po të ketë buxhet, nuk ka kod buxhetor. Në rastet e vërshimeve, dëmet nuk janë kompensuar”, tha ai.
Sipas Paçarizit, dëmet nga vërshimet e viteve 2016, 2021 dhe 2026, që kanë qenë të përmasave të mëdha, nuk janë kompensuar asnjëherë.
Foto: Artan Paçarizi, zyrtar për media në Komunën e Malishevës
“Problemi është i njëjtë ndër vite: pa fond emergjent, pa kod buxhetor dhe me buxhet të limituar, nuk mund të kompensohen qytetarët apo bizneset nga dëmet e vërshimeve”, u shpreh ai.
Paçarizi theksoi se përgjegjësia për kompensim i takon nivelit qendror.
“Për kompensim nuk ka ndarje buxhetore. Është detyrë dhe përgjegjësi direkte e Qeverisë, përmes ministrive dhe sektorëve përkatës, që t’i realizojë këto pagesa”, përfundoi ai.
Në lidhje me këto ankesa të komunave, Telegrafi ka kontaktuar edhe Ministrinë e Financave, por deri në momentin e publikimit të këtij artikulli, nuk ka pranuar përgjigje. /Telegrafi/
Komuna e Drenasit, në kuadër të Javës së Ndërgjegjësimit për Kancerin e Qafës së Mitrës dhe në bashkëpunim me Institutin Kombëtar të Shëndetësisë Publike të Kosovës, do të organizojë një ligjëratë informuese dhe edukuese me qëllim të rritjes së vetëdijes për parandalimin, zbulimin e hershëm dhe kujdesin për shëndetin e gruas.
Ligjërata do të mbahet më 2 shkurt 2026, duke filluar nga ora 13:00, në sallën e Qendrës Kryesore të Mjekësisë Familjare në Drenas, kati i tretë. Ajo do të ligjërohet nga Dr. Afrodita Sejda.
Nga Komuna e Drenasit bëhet e ditur se kanceri i qafës së mitrës është një nga sëmundjet që mund të parandalohet dhe të trajtohet me sukses, nëse zbulohet në fazat e hershme.
Me këtë rast, ftohen të gjitha gratë dhe vajzat që të marrin pjesë në ligjëratë dhe të informohen për rëndësinë e kontrolleve të rregullta, përfshirë Pap testin dhe testimin për HPV, faktorët e rrezikut, vaksinimin, si dhe mënyrat e parandalimit dhe kujdesit për shëndetin.
Autoritetet komunale theksojnë se kujdesi për shëndetin e gruas mbetet prioritet dhe inkurajojnë pjesëmarrjen sa më të gjerë në këtë aktivitet ndërgjegjësues. /Telegrafi/
Drejtoria për Urbanizëm dhe Mbrojtje të Mjedisit në Komunën e Drenasit ka njoftuar se është zgjatur afati për paraqitjen e kërkesave për legalizimin e objekteve të ndërtuara pa leje ndërtimore.
Sipas njoftimit, vendimi është marrë në mbështetje të një vendimi të Ministrisë së Planifikimit Hapësinor dhe Infrastrukturës, me të cilin afati për dorëzimin e aplikacioneve për procesin e legalizimit është zgjatur për dymbëdhjetë muaj.
Me këtë vendim, qytetarëve të Komunës së Drenasit u mundësohet vazhdimi i paraqitjes së kërkesave për trajtimin administrativ të objekteve të ndërtuara pa leje, brenda periudhës së re të përcaktuar.
Aplikimet për legalizim bëhen pranë Drejtorisë për Urbanizëm dhe Mbrojtje të Mjedisit në Komunën e Drenasit, në përputhje me procedurat dhe dokumentacionin e paraparë me legjislacionin në fuqi.
Nga komuna u bëhet thirrje të gjithë qytetarëve që i plotësojnë kushtet ligjore që ta shfrytëzojnë këtë mundësi dhe të aplikojnë brenda afatit të caktuar. /Telegrafi/
Ministria e Ekonomisë ka njoftuar se Thirrja Publike për Skemën e Granteve për Energji të Pastër është e hapur dhe do të vazhdojë deri më 31 janar 2026.
Sipas udhëzimeve të Ministrisë, aplikuesit mund të kërkojnë subvencion për sisteme baterish për ruajtjen e energjisë elektrike, përfshirë edhe ata që tashmë posedojnë sisteme solare fotovoltaike ekzistuese, si pasues të njëhsorit apo si prosumatorë.
Subvencionimi përcaktohet sipas kapacitetit të instaluar të baterive dhe konfigurimit teknik të dorëzuar në aplikim, pa kufizim të drejtpërdrejtë të kapacitetit (kWh), por brenda vlerës maksimale të mbështetjes financiare të përcaktuar në thirrje.
Për të ndihmuar aplikuesit, Ministria e Ekonomisë ka përgatitur dokumentin “Përgjigje për pyetjet më të shpeshta në lidhje me grant skemën për energji të pastër”, i cili përmban sqarime të detajuara mbi kriteret dhe procedurat e aplikimit.
Komuna e Drenasit i bën thirrje qytetarëve dhe subjekteve private të shfrytëzojnë këtë mundësi për investime në energji të pastër dhe të qëndrueshme, duke përmirësuar efikasitetin energjetik dhe duke kontribuar në mbrojtjen e ambientit.
Afati i fundit për aplikim: 31 janar 2026. /Telegrafi/
Komuna e Drenasit ka bërë të ditur se Ministria e Bujqësisë, Pylltarisë dhe Zhvillimit Rural, përmes Agjencisë për Zhvillimin e Bujqësisë (AZHB), do të vazhdojë të mbështesë sektorin e blegtorisë dhe bujqësisë përmes pagesave direkte për vitin 2025.
Si pjesë e këtij programi, mbështetja jepet për këto aktivitete dhe kultura bujqësore: pagesa direkte për qumësht, therjet e raportuara të gjedhit, viçat për majmëri, zogjtë për majmëri (brojlerët) dhe akuakulturë.
Afati i aplikimit fillon më 19 janar 2026 dhe mbaron më 18 shkurt 2026, ora 16:00.
Ky program synon përkrahjen e fermerëve dhe zhvillimin e qëndrueshëm të sektorit bujqësor në komunën e Drenasit, duke përmirësuar rendimentin dhe sigurinë e prodhimeve bujqësore dhe blegtorale. /Telegrafi/
Komuna e Drenasit ka bërë të ditur se po merr masa për trajtimin e dëmtimeve të shkaktuara nga vërshimet e fundit në rrugët regjionale.
Sipas njoftimit, çështja është adresuar si kërkesë emergjente tek Departamenti i Rrugëve në kuadër të Ministrisë së Mjedisit, Planifikimit Hapësinor dhe Infrastrukturës.
“Problemi i dëmtimeve në rrugët regjionale është trajtuar zyrtarisht dhe kemi bashkëpunuar ngushtë me Stacionin Policor në Drenas. Kërkesa është shoqëruar me raportime dhe fotografi nga terreni, të cilat pasqyrojnë gjendjen aktuale dhe rrezikun për sigurinë në komunikacion”, thuhet në njoftimin e komunës.
Komuna e Drenasit ka bërë të ditur gjithashtu se po ndjek nga afër të gjitha zhvillimet dhe do të vazhdojë koordinimin me institucionet përgjegjëse për të siguruar ndërhyrje të shpejtë dhe qarkullim të rregullt për qytetarët.
“Do të vazhdojmë të punojmë ngushtë me institucionet përgjegjëse me qëllim që qarkullimi i qytetarëve të jetë sa më i sigurt dhe i pandërprerë. Ju falënderojmë për mirëkuptimin”, u shprehën nga Komuna e Drenasit. /Telegrafi/
Për shkak të kushteve të vështira atmosferike dhe dëmeve nga përmbytjet e reshjet e fundit, disa komuna në vend kanë vendosur të shtyjnë rifillimin e procesit mësimor për gjysmëvjetorin e dytë të vitit shkollor 2025/2026.
Komuna e Malishevës, ajo e Drenasit dhe e Fushë Kosovës janë komunat që kanë marrë vendim për shtyrje të nisjes së procesit mësimorë.
Komuna e Malishevës ka vendosur që procesi mësimor të shtyhet deri më 14 janar 2026 për shkak të reshjeve dhe përmbytjeve që kanë krijuar vështirësi në terren dhe kanë dëmtuar infrastrukturën e rrugëve.
Edhe ajo e Drenasit ka shtyrë fillimin e mësimit deri të mërkurën, duke qenë një nga komunat që po përballet me pasojat e motit të keq dhe dëmtime të infrastrukturës së shkollave dhe rrugëve.
Kurse komuna e Fushë Kosovës ka njoftuar që fillimi i gjysmëvjetorit të dytë në të gjitha shkollat do të jetë më 19 janar 2026, pasi kushtet aktuale përfshirë vështirësitë në qarkullim dhe problemet me ngrohjen nuk lejojnë zhvillimin normal të procesit mësimor.
E për dallim nga këto komuna në komunat tjera procesi mësimor do të nis sot.
Komuna e Prishtinës bëri të ditur se nga nesër mësimi do të mbahet në të gjitha shkollat, pasi janë krijuar kushtet e nevojshme për sigurinë e nxënësve dhe stafit arsimor.
Në anën tjetër, kryetari i SBASHK-ut, Rrhaman Jasharaj ka kërkuar që fillimi i gjysmëvjetorit të dytë të shtyhet edhe për disa ditë në nivel vendi, duke theksuar se temperaturat e ulëta dhe kushtet jo të përshtatshme në disa shkolla paraqesin rrezik për shëndetin e nxënësve dhe stafit arsimor.
Gjysmëvjetori i dytë i mësimit ishte planifikuar të fillonte më 8 janar.
Por, pas vërshimeve në fillimjavë, Ministria e Arsimit e shtyu nisjen për 12 janar.
Kosova ka një javë që po përballet me vërshime të mëdha, sidomos në disa komuna, ku lumenjtë kanë dalë nga shtretërit. /Telegrafi/
Login
