Moska dhe Kievi akuzuan njëri-tjetrin për sulme ajrore gjatë natës, ndërsa presidenti amerikan Donald Trump do të presë homologun e tij ukrainas Volodymyr Zelensky në Florida për të diskutuar planin e paqes me 20 pika për t’i dhënë fund luftës Rusi-Ukrainë.

Ministria e Mbrojtjes e Rusisë pretendoi në një deklaratë se mbrojtja e saj ajrore rrëzoi 25 dronë ukrainas, 12 prej të cilëve u rrëzuan mbi rajonin Samara, pranë kufirit me Kazakistanin fqinj.

Sekretari i Shtypit i Agjencisë Federale Ruse të Transportit Ajror, Artem Korenyako, tha gjatë natës se ishin vendosur kufizime të përkohshme për mbërritjet dhe nisjet e aeroplanëve në aeroportin ndërkombëtar të Samarës.

Kufizimet më vonë u hoqën.

Autoritetet lokale në Samara dhe rajonet e tjera të përmendura në deklaratën ruse, përkatësisht Belgorod, Kursk, Saratov, Volgograd dhe Rostov, nuk raportuan viktima ose dëme në infrastrukturë.

Më shumë se 300 fluturime janë vonuar ose anuluar në aeroportet Vnukovo dhe Sheremetyevo të Moskës.

Ndërkohë, Forcat Ajrore të Ukrainës pretenduan se mbrojtja ajrore e vendit rrëzoi 30 nga 48 dronë të llojeve të ndryshme të lëshuar nga Rusia.

Shërbimi Shtetëror i Emergjencave i Ukrainës raportoi një zjarr në një ndërtesë banimi dhe dëme në një ndërtesë liceu në qytetin jugor të Odesës si pasojë e një sulmi gjatë natës, por pa të vrarë ose të lënduar.

Guvernatori i Odesës, Oleh Kiper, specifikoi se zjarri u shkaktua nga një dron që goditi çatinë e një ndërtese banimi me dy kate.

“Informacioni mbi viktimat po sqarohet. Shërbimet përkatëse po punojnë në vendngjarje”, shtoi Kiper.

Raportimet vijnë ndërsa Trump do të presë Zelenskyn në rezidencën e tij Mar-a-Lago në Palm Beach, Florida, më vonë sot, për të diskutuar planin e paqes të propozuar nga SHBA-ja për konfliktin që po zgjat pothuajse katër vjet dhe garancitë e sigurisë.

Presidenti ukrainas mbërriti në SHBA të shtunën pas një vizite në Kanada, ku Otava njoftoi një paketë të re ndihme ekonomike për Kievin.

Ndërsa një plan me 28 pika, i bërë publik në nëntor, u propozua fillimisht nga pala amerikane për të dhënë fund konfliktit, diskutimet e mëtejshme kanë çuar në hartimin e një kuadri të rafinuar me 20 pika. /AA/

Gjatë podcastit “Shëndeti në rend të parë”, e mbështetur nga United Hospital drejtori i Klinikës Emergjente në Qendrën Klinike Universitare të Kosovës (QKUK), Naser Syla ka bërë të ditur se numri i pacientëve që kërkojnë ndihmë në këtë klinikë po shënon rritje të vazhdueshme.

Sipas tij, vetëm gjatë këtij viti Klinika Emergjente ka trajtuar 99 mijë e 17 pacientë, ndërsa deri në fund të vitit pritet që ky numër ta kalojë shifrën prej 100 mijë pacientësh, çka, sipas Sylës, është jashtë çdo kontrolli.

“Çdo klinikë në fund të vitit i nxjerr statistikat e veta. Në Klinikën e Emergjencës i kemi pas 99,017 pacientë dhe ky numër do ta kalojë edhe 100 mijë deri në fund të vitit. Kjo është jashtë çdo kontrolli dhe shumë shqetësuese”, ka deklaruar Syla.

Ai ka theksuar se ndryshe nga vendet evropiane, ku numri i rasteve të referuara në nivelin terciar po bie nga viti në vit, në Kosovë po ndodh e kundërta.

Sipas tij, niveli terciar përveç trajtimit profesional, duhet të ketë rol edukativ dhe të fokusohet në përgatitjen e kuadrove të reja mjekësore, si specializantë dhe studentë.

“Te ne numri i pacientëve është në rritje të vazhdueshme, gjë që tregon mbingarkesë të sistemit shëndetësor”, ka shtuar ai.

Syla ka bërë të ditur se rritje është shënuar edhe në numrin e aksidenteve të komunikacionit.

"Mes jetës dhe vdekjes na ndan një fije e hollë", mjeku i Emergjencës Naser Syla në podcastin "Shëndeti në rend të parë"

Gjatë këtij viti janë regjistruar 7 mijë e 207 raste, krahasuar me 6 mijë e 894 raste sa ishin vitin e kaluar.

Po ashtu, në rritje është edhe numri i pacientëve që kërkojnë ndihmë emergjente për sëmundje kardiovaskulare, si dhe numri i të plagosurve.

Siç tha Syla këtë vit janë trajtuar 111 të plagosur, ndërsa vitin e kaluar ky numër ishte 101.

Një tjetër shqetësim serioz, sipas drejtorit të Klinikës Emergjente, është rritja e rasteve të tentim-vetëvrasjeve.

“Edhe për numrin e personave që kanë tentuar vetëvrasje janë diku 450 raste në krahasim me vitin e aluar që ka qenë 402 raste”, ka thënë Syla.

Për më shumë shikoni të plotë podcastin “Shëndeti në rend të parë”:

- YouTube www.youtube.com

Kryetari i Kuvendit të Republikës së Kosovës, Dimal Basha, ka shfrytëzuar sot të drejtën e votës në kuadër të Zgjedhjeve Parlamentare, duke votuar në shkollën fillore “Tefik Çanga” në Ferizaj.

Pas votimit, kryeparlamentari Basha e cilësoi ditën e zgjedhjeve si festë të demokracisë, duke theksuar rëndësinë e pjesëmarrjes qytetare në procesin zgjedhor.

Ai falënderoi të gjithë akterët institucionalë për organizimin dhe mbarëvajtjen e procesit.

“Zgjedhjet janë ditë feste për demokracinë, ku qytetarët e shprehin vullnetin e tyre përmes votës. Falënderoj të gjithë akterët për organizimin e procesit zgjedhor dhe bëj thirrje për një pjesëmarrje sa më të lartë, që së bashku të vendosim për të ardhmen tonë”, ka deklaruar Basha. /Telegrafi/

Askush deri më tani nuk e ka përkufizuar saktësisht mënyrën e lojës që e bën Edon Zhegrovën kaq të veçantë në botën e futbollit.

Sipas prestigjiozes italiane La Gazzetta dello Sport, sekreti i dallimit të tij qëndron te mënyra se si ai e prek topin – një detaj i vogël, por vendimtar, që e veçon nga të tjerët.

Zhegrova është i njohur për teknikën e tij jashtëzakonisht të lartë, për kontrollin e topit në hapësira të ngushta dhe për aftësinë për ta mposhtur kundërshtarin me një lëvizje të vetme. Pikërisht kjo mënyrë loje ka bërë që trajneri i Juventusit, Luciano Spalletti, t’i vendosë atij një nofkë të veçantë, të lidhur drejtpërdrejt me stilin e tij unik në fushë.

“Kam lindur me këtë aftësi”, ka thënë Zhegrova pas ndeshjes ndaj Pisan, duke folur për talentin e tij natyral. “Trajneri më quajti ‘Zeppetta’. E falënderoj që më dha këtë emër”.

“Zeppetta” është një term italian jo fort i zakonshëm në terminologjinë e futbollit, por që lidhet ngushtë me driblimet karakteristike të Zhegrovës, me lëvizjet e shpejta dhe të paparashikueshme që thyejnë linjat mbrojtëse dhe krijojnë epërsi numerike.

Spalletti e ka cilësuar vazhdimisht Zhegrovën si një lojtar vendimtar, një futbollist që mund ta ndryshojë rrjedhën e ndeshjes me një veprim të vetëm.

Dhe pikërisht kjo “Zeppetta”, kjo mënyrë e veçantë e të prekurit të topit, është ajo që po e shndërron Edon Zhegrovën në një nga emrat më interesantë dhe më të respektuar në futbollin italian. /Telegrafi/

Kryetari i Nismës Socialdemokrate, Fatmir Limaj, ka bërë thirrje për pjesëmarrje sa më të gjerë të qytetarëve në Zgjedhjet Parlamentare, duke theksuar rëndësinë e votës për të ardhmen e vendit.

Pas përfundimit të votimit të tij, Limaj deklaroi se dita e sotme përfaqëson një moment kyç për forcimin e institucioneve dhe funksionalitetin e shtetit.

Ai vlerësoi se vendimi i qytetarëve nëpërmjet votës është përcaktues për drejtimin zhvillimor të Kosovës.

“Sot, secili qytetar ka mundësinë që përmes votës së lirë t’i japë shpresë dhe perspektivë zhvillimit të shtetit të Kosovës”, u shpreh Limaj.

Deri në ora 13:00, 11.07 për qind e qytetarëve kanë ushtruar të drejtën për të votuar. /Telegrafi/

Ndërkohë që Mal Retkoceri vijon rrugëtimin e tij në shtëpinë e Big Brother VIP Albania, jashtë vëmendja është përqendruar te tensionet familjare që po rikthehen në publik.

Pas vendimit të Malit për të mos komunikuar me të atin në ekran, babai i tij ka dalë sërish në media, duke dhënë një rrëfim të drejtpërdrejtë dhe me tone të ashpra, ku në qendër vendos ish-bashkëshorten e tij, këngëtaren Violetë Kukaj.

Ai shprehet se largësia me fëmijët nuk ka ardhur rastësisht, por është ndikuar ndër vite nga raporti i tyre me nënën.

Screenshot/YouTube

Deklaratat e babait të Malit:
Mësuesin nuk e ka të mirë, nanën e vet. Nana ka ndikuar shumë te fëmijët. Mali, pavarësisht gjithçkaje, është djalë i talentuar dhe i ka ngjarë babës. Kam tentuar të komunikoj me ta përmes disa personave të njohur, personaliteteve nga Shqipëria dhe Kosova. Fillimisht me Violetën, pasi ajo nuk donte as të më fliste në telefon dhe as të më takonte. Unë e kam bërë yll. Kur e kam marrë për nuse, ajo kishte vetëm një këngë të incizuar. Unë ia kam incizuar mbi 300 këngë, me ajkën e Kosovës dhe Shqipërisë. E mora nuse me një këngë dhe e bëra mbretëreshë.

Shtatë vite pa u parë, Mali refuzon të takojë babain: shans të dytë u jepet njerëzve që gabojnë dhe mësojnë nga gabimet

Në fjalën e tij, ai thekson se ka bërë përpjekje të vazhdueshme për afrimin me fëmijët, madje edhe përmes ndërmjetësuesve publikë, por sipas tij, këto tentativa nuk kanë dhënë rezultat.

Ai ndalet edhe te karriera e Violetë Kukajt, duke pretenduar se ka qenë vetë ai shtysa kryesore e suksesit të saj artistik, ndërsa thekson se ajo u trajtua me respekt dhe mbështetje gjatë martesës së tyre.

Pavarësisht gjuhës së ashpër dhe akuzave, babai i Malit e mbyll mesazhin me një thirrje për dialog dhe ribashkim, duke shprehur gatishmërinë për të folur në çdo moment.

Ndërkohë, brenda shtëpisë së BBVA, Mali ka zgjedhur të mbajë një qëndrim të rezervuar, duke pranuar dhimbjen personale, por duke refuzuar ta kthejë historinë familjare në spektakël televiziv. /Telegrafi/

- YouTube www.youtube.com

Një incident është shënuar sot në qendrën e votimit në shkollën “Mustafa Bakija” në Prizren, ku një qytetar i moshuar ka shqyer fletëvotimin gjatë procesit të votimit.

Sipas Policisë, qytetari ka reaguar në shenjë revolte pasi komisioni zgjedhor nuk e ka lejuar ta ndihmojë bashkëshorten e tij gjatë votimit.

Rastin e ka konfirmuar për Telegrafin zëdhënësi i Policisë së Kosovës për rajonin e Prizrenit, Shaqir Bytyqi, i cili bëri të ditur se Policia ka ndërhyrë menjëherë në vendin e ngjarjes.

“Policia ka shoqëruar qytetarin në stacion policor, ku është duke u intervistuar. Në konsultim me prokurorin e shtetit do të ndërmerren veprimet e nevojshme ligjore,” ka deklaruar Bytyqi për Telegrafin.

Policia ka bërë të ditur se situata në qendrën e votimit është qetësuar dhe procesi zgjedhor po vazhdon normalisht. /Telegrafi/

Milani është rikthyer te fitoret, pasi ka mposhtur Hellas Veronën me rezultat të pastër 3-0.

Ka qenë një ndeshje e dominuar nga Kuqezinjtë nga minuta e parë deri te e fundit, derisa goli i parë u shënua në minutën e 45+1.

Adrien Rabiot asistoi te Christian Pulisic i cili nga afërsia shënoi për 1-0.

Pjesa e dytë nisi furishëm për Rossonerët, të cilët në minutën e 48-të ngritën epërsinë në 2-0 me golin e realizuar nga Christopher Nkunku nga penalltia.

Vetëm pesë minuta më vonë, ylli francez Nkunku shënoi për 3-0 duke dërguar topin në rrjetë nga afërsia.

Deri në fund të ndeshjes, Milani menaxhoi mirë epërsinë e thellë dhe mori fitore me plot meritë.

Me këtë fitore Milani rikthehet në krye të Serie A me 35 pikë, dy më shumë se Interi që ka një ndeshje më pak të zhvilluar. /Telegrafi/

Më 27.12.2025 në orën 22:50 në Gostivar, oficerët e Stacionit Policor të Gostivarit e privuan nga liria A.K. (43) nga Gostivari për shkak të dyshimit të bazuar se ka kryer vepër penale "prodhim, posedim, ndërmjetësim dhe tregtim i paautorizuar me armë ose eksplozivë" sipas nenit 396 të Kodit Penal.

"Gjatë kontrollit të automjetit të tij të pasagjerëve "BMW" me targa të Gostivarit, në bagazhin e automjetit të tij u gjetën dhe u sekuestruan 9095 copë mjete të ndryshme piroteknike", njoftojnë nga MPB.

Ai është ndaluar në stacionin policor dhe pas dokumentimit të rastit, kundër tij do të ngrihen akuza përkatëse.

Një kamerë në një vendvotim në Fakultetin Juridik në Prishtinë, dyshohet të mos ketë qenë aktive nga mëngjesi.

Ekipi i IKD-së që po qëndron në terren për të monitoruar mbarëvajtjen e procesit zgjedhor, mëson se vetëm pas orës 13:00 është vërejtur nga komisionerët që kjo kamerë nuk ka qenë aktive, raporton Betimi për Drejtësi.

Problemi dyshohet të ketë qenë shkaku i mungesë së energjisë elektrike në disa priza. /Telegrafi/

Presidenti ukrainas Volodymyr Zelensky ka theksuar se tani janë disa nga ditët diplomatike më aktive të vitit dhe "shumë gjëra mund të vendosen para Vitit të Ri".

Ai shtoi gjithashtu se brenda një jave, Rusia nisi më shumë se 2,100 dronë, rreth 800 bomba dhe 94 raketa, transmeton Telegrafi.

"Ekipet tona të riparimit, punonjësit e energjisë dhe ndihmësit e parë të Shërbimit Shtetëror të Emergjencave të Ukrainës po punojnë fjalë për fjalë 24/7 për të mbrojtur jetët dhe për të rivendosur furnizimin me energji elektrike.

“Por është po aq e rëndësishme që sanksionet kundër Rusisë të funksionojnë, që të gjitha format e presionit politik për agresionin e saj të zbatohen, që Ukraina të marrë raketa mbrojtëse ajrore dhe që të gjithë të finalizojmë formatet e hapave që do t'i japin fund kësaj lufte dhe do të garantojnë sigurinë", shtoi lideri ukrainas.

Ndryshe Zelensky pritet të takohet sot me presidentin amerikan Donald Trump, me të cilin shpreson të diskutojë çështjen për t’i dhënë fund luftës së përgjakshme. /Telegrafi/

Lojtarët e Aston Villas po përjetojnë sezonin më të mirë dhe më impresionues në futbollin evropian këtë vit.

Të shtunën mbrëma, skuadra nga Birminghami arriti të përsërisë një rekord historik të klubit, i cili kishte mbetur i paprekur që nga viti 1914.

Aston Villa triumfoi me rezultat 2-1 ndaj Chelseat në zemër të Londrës, një fitore që e fut plotësisht në garën për titullin e Liga Premier, vetëm tri pikë larg liderëve të Arsenalit.

Kjo ishte fitorja e 11-të radhazi për “Luanët e Birminghamit” në të gjitha garat, një arritje që klubi nuk kishte qenë në gjendje ta përsëriste për plot 111 vjet. Ajo që dikur ishte arritur në fillim të shekullit të kaluar, tani është bërë realitet brenda vetëm dy muajve të fundit.

Gjatë kësaj serie të jashtëzakonshme, Aston Villa ka mposhtur një varg kundërshtarësh të fortë, duke përfshirë: Maccabi Tel Aviv, Bournemouth, Leeds, Young Boys, Wolverhampton, Brighton, Arsenal, Basel, West Ham, Manchester United dhe së fundi Chelsean.

Edhe pse bëhet fjalë për një klub historik, shtatë herë kampion i Anglisë dhe fitues i Ligës së Kampionëve në vitin 1982 – rezultatet e këtij sezoni janë vërtet sensacionale.

Askush nuk e kishte parashikuar që në gjysmën e sezonit Aston Villa do të ishte vetëm tri pikë larg kreut dhe do t’i linte pas vetes disa nga gjigantët e futbollit anglez.

Arkitekti kryesor i këtij suksesi të madh është Unai Emery, trajneri spanjoll me përvojë të jashtëzakonshme, i cili edhe një herë po dëshmon se është një specialist i nivelit më të lartë në ndërtimin e skuadrave konkurruese. /Telegrafi/

Që nga ora 12:00, vendkalimi kufitar Evzoni (Bogorodica) është i mbyllur, njofton LAMM.

Në rrugët e mbetura shtetërore, trafiku zhvillohet pa probleme, me rrugë kryesisht të thata.

Intensiteti i trafikut në rrugët jashtë zonave urbane është mesatar, dhe nuk ka vonesa më të gjata në vendkalimet kufitare në anën maqedonase për hyrje dhe dalje nga vendi.

Nga 15 nëntori 2025, është në fuqi detyrimi ligjor për posedim të detyrueshëm të pajisjeve dimërore në automjete, pavarësisht nga kushtet aktuale të motit. Detyrimi do të zgjasë deri më 15 mars 2026.

Për më shumë informacion, shoferët mund të vizitojnë faqen zyrtare të LAMM.

Që nga hapja e vendvotimeve në orën 07:00, sipas vëzhguesve të Demokracisë në Veprim (DnV) procesi i votimit në të gjithë vendin po rrjedh në mënyrë të qetë.

Sipas njoftimit bëhet e ditur se deri në orën 12:00, të drejtën për të votuar e kanë shfrytëzuar rreth 13.7% e qytetarëve (margjina e gabimit +/- 0,35%). Prishtina dhe Ferizaj kanë regjistruar daljen më të madhe deri tani, 15%.

Tutje thuhet se në komunat me shumicë serbe, në veri të vendit, dalja në votime është raportuar të jetë mbi 22% që është gati dyfish më e lartë sesa mesatarja e përgjithshme e daljes në nivel vendi.

“Në këto zgjedhje, të drejtë vote kanë 1,999,204 qytetarë, ose 28,260 më shumë se në zgjedhjet parlamentare të 9 shkurtit, 2025. Rikujtojmë se dalja e votuesve në periudhën e njejtë kohore në zgjedhjet parlamentare të 9 shkurtit ishte 14.5%”, thuhet në njoftim.

Në njoftim thuhet se KQZ edhe për këto zgjedhje është përpjekur t’a informojë secilin votues për ndryshimin e Qendrës së Votimit dhe poashtu ka ofruar mundësi që përmes platformës elektronike (linkut të posaçëm) secili votues të mund të verifikojë vendovotimin ku është caktuar të votojë, megjithatë nga terreni po raportohet se ka mjaft ankesa në këtë drejtim.

Sipas vëzhguesve të DnV-së është raportuar se deri në orën 12:00, vështirësi për t’a gjetur emrin në Listë, rrjedhimisht për t’a identifikuar vendvotimin adekuat është raportuar në 50% të vendvotimeve, por që numri i rasteve ka qenë i vogël, deri në 10 raste të tilla.

“Por ka pasur edhe vendvotime (1,6%) ku një numër i konsiderueshëm i votuesve (deri në 30 votues) nuk e kanë gjetur emrin e tyre në Listë. Prijnë komunat: Prishtinë dhe Pejë. Ka pasur disa raste kur votuesit janë ankuar që dikush tjetër është nënshkruar në emër të tyre në Listën e Votuesve dhe atë në 1.4% të vendvotimeve”.

DnV rekomandon qytetarët që para se të nisen për të votuar të verifikojnë Qendrën e tyre të Votimit përmes linkut qv.kqz-ks.org dhe në këtë mënyrë t’i shmangin pakënaqësitë dhe vonesat.

Në anën tjetër, votimi me kusht është duke u mundësuar në vetëm një qendër votimi në secilën nga 38 komunat.

Në njoftim thuhet se sipas rregullave të reja të KQZ-së, nëse një votues nuk posedon dokument që e dëshmon paaftësinë e tij për të votuar në mënyrë të pavarur (vërtetim mjekësor ose të ngjashëm), nuk do t’i lejohet të votojë me asistencë.

“Shtrëngimi i rregullave për votim me asistencë vjen si rezultat i faktit që ky fenomen ka qenë shumë i shprehur në të gjitha proceset zgjedhore të kaluara dhe është keqpërdorur për të imponuar apo deformuar vullnetin e lirë të qytetarëve. Në zgjedhjet e 9 shkurtit, sipas DnV-së, 6% e të gjithë qytetarëve kanë votuar duke u asistuar nga një person tjetër. Dy të tretat e tyre kanë qenë gra, ndërsa në 35% të vendvotimeve janë hasur raste të izoluara ku edhe votues të rinj në moshë kanë kërkuar të votojnë me asistencë”.

Ndërkaq, deri në mesditë, komisionerët në 61% të vendvotimeve janë duke e zbatuar rregullën dhe janë duke kërkuar dokumentet për të lejuar votimin me asistencë. Për më tepër, në 35% të vendvotimeve, edhe pse votuesit kanë kërkuar të votojnë me asistencë, nuk janë lejuar të votojnë në mungesë të dokumentave mjekësore.

“Deri në orën 12:00, nga numri i deritanishëm i qytetarëve që kanë votuar, vetëm 1% prej tyre kanë votuar me asistencë. Poashtu, në 5% të vendvotimeve kemi hasur në raste të izoluara (deri në 4 raste) ku votues të rinj në moshë kanë kërkuar të votojnë me asistencë. Si trend i përgjithshëm, votimi me asistencë po evidentohet në Libër, por nuk kanë munguar edhe rastet kur votimi me asistencë nuk është zhvilluar konform rregullave, dhe kjo ka ndodhur në 5% të vendvotimeve, ku deri në 10 raste nuk janë evidentuar fare në Librin e Votimit”.

Rikujtojmë se një asistues ka të drejtë të ndihmojë vetëm një votues, ndërsa komisionerët ose vëzhguesit e akredituar e kanë të ndaluar rreptësisht të ofrojnë çfarëdo asistence në votim.

Ka pasur disa raste të izoluara kur më shumë se një votues ka qëndruar prapa kabinës së votimit, dhe atë si fenomen në 11% të vendvotimeve.

Ndërsa, sa i përket votimit me dokumente të pavlefshme DnV ka gjetur se në 16% të vendvotimeve ka pasur deri në 4 raste të identifikimit me dokumente të skaduara, përkundër rregullave që nuk lejojnë votimin me dokumente me afat të skaduar.

Sipas tyre ky fenomen është më i shprehur në rajonin e Prizrenit.

“Deri në orën 12:00, në 4% të vendvotimeve ka pasur raste të izoluara kur votuesit janë identifikuar me dokumente jo valide, siç mund të jenë dokumentet e shteteve të tjera, ose ato të lëshuara nga UNMIK-u”.

E sa i përket fotografimit të votës, thuhet se: “Ndonëse fenomen në përmasa të vogla, cenimi i fshehtësisë së votës i manifestuar përmes fotografimit të votës po vazhdon të shfaqet edhe në këto zgjedhje. Fotografimi i votës dhe bërja e saj publike supozohet se ndërlidhet me cenimin e fshehtësisë së votës apo blerjes së saj, por edhe frikësimin e votuesit dhe shtrembërimin e vullnetit të tij. Deri në orën 12:00, raste të fotografimit të votës janë 13. Deri në mesditë nuk është evidentuar ndonjë incident serioz”. /Telegrafi/

Ushtruesi i Detyrës së Kryeprokurorit të Shtetit, Agron Qalaj, vizitoi sot dhomën operative për monitorimin e procesit zgjedhor, e cila funksionon në kuadër të Zyrës së Kryeprokurorit të Shtetit.

Gjatë vizitës, ai u prit nga Koordinatorja Nacionale për Zgjedhje, prokurorja Laura Pula e cila e informoi për nga afër lidhur me funksionimin, angazhimet dhe rolin e dhomës operative në mbikëqyrjen e procesit zgjedhor.

U.D. Kryeprokurori Qalaj u njoh me punën që po zhvillohet në këtë dhomë, e cila ka për qëllim mbrojtjen e votës së lirë të qytetarëve dhe garantimin e integritetit të procesit zgjedhor.

"Ai falënderoi dhe inkurajoi koordinatoren Pula dhe të gjithë stafin për përkushtimin dhe angazhimin e tyre profesional gjatë këtij procesi të rëndësishëm demokratik", thuhet në njoftim.

Në fund të vizitës, Qalaj theksoi rëndësinë e bashkëpunimit institucional dhe reagimit të shpejtë ndaj çdo parregullsie të mundshme, me qëllim të sigurimit të zgjedhjeve të lira, të ndershme dhe transparente. /Telegrafi/

Pjesëtarët e Ministrisë së Punëve të Brendshme të Serbisë, Sektori i Situatave të Emergjencave, pasi zbatuan masat e sigurisë, transportuan një bombë ajrore të prodhimit amerikan të mbetur nga Lufta e Dytë Botërore, e cila u gjet në një kantier ndërtimi në "Beograd mbi Ujë", në poligonin e stërvitjes ushtarake Pasulanske Livade, ku do të shkatërrohet.

Sipas Ministrisë së Punëve të Brendshme, bomba është një model AN-M44, me një masë totale prej afërsisht 470 kilogramësh, me një ngarkesë shpërthyese prej afërsisht 250 kilogramësh, e cila u përdor gjatë bombardimeve të aleatëve të pozicioneve gjermane gjatë çlirimit të Beogradit në vitin 1944, transmeton Telegrafi.

Largimi dhe transporti u kryen nga anëtarët e Ekipit të Specializuar për Mbrojtje nga Municionet e Pashpërthyera të Sektorit të Situatave të Emergjencës me mbështetjen e oficerëve të policisë dhe shërbimit mjekësor të Sektorit të Situatave të Emergjencës.

Kjo nuk është hera e parë që në Serbi gjenden bomba dhe mjete tjera shpërthyese që datojnë nga Lufta e Dytë Botërore.

Madje shpesh ato janë gjetur nëpër zona që tashmë janë të banuara dhe është nevojitur evakuimi i lagjeve të tëra për t’u larguar pa ndonjë problem. /Telegrafi/

Ardhja e Luciano Spallettit ka ndryshuar ndjeshëm dinamikën te Juventusi, dhe tani klubi po shqyrton jo vetëm rinovimin e kontratës së trajnerit, por edhe opsione të tjera për të forcuar skuadrën.

Juventusi i Torinos kishte nevojë të kthente formën e dobët në fazat e hershme të sezonit, dhe ardhja e Spallettit pati një efekt të menjëhershëm. Për këtë arsye, drejtuesit po konsiderojnë vazhdimin e bashkëpunimit me trajnerin italian.

Megjithatë, skuadra ka nevojë edhe për një shtytje të re në aspektin e lojtarëve. Sipas La Gazzetta dello Sport, Juventusi po punon në disa fronte dhe ka listuar shtatë objektiva kryesore për afatin kalimtar të ardhshëm.

Objektivi kryesor i klubit për të forcuar skuadrën është portieri 24-vjeçar grek, Christos Mandas nga Lazio, i cili mund të vijë në Torino nëse Mattia Perin largohet. Për mbrojtjen, janë në konsideratë Radu Dragusin (23, Tottenham) dhe Brooke Norton-Cuffy (Genoa).

Megjithatë, dëshira më e madhe e Juventusit për t’u përforcuar muajin e ardhshëm është në mesfushë. Klubit i interesojnë Davide Frattesi (26, Inter Milan), Pierre-Emile Hojbjerg (30, Olympique de Marseille), Sandro Tonali (25, Newcastle United) dhe Axel Tóth (20, Ferencvaros).

Me këto lëvizje, Juventusi synon të ndërtojë një skuadër konkurruese, duke kombinuar përvojën me talentin e ri, dhe të jetë i përgatitur për sfidat kryesore të sezonit. /Telegrafi/

Kur i afrohesh oborrit të bukur të shtëpisë së Viktor Shelvinskit, mezi mund ta besosh se ai shërben si strehë për qindra zogj të të gjitha llojeve.

Por shpejt, porta e hyrjes ia hap rrugën një kopshti të gjerë të mbushur me zogj me forma dhe madhësi të ndryshme, ku jetojnë lejlekë, bufa, fazanë e papagaj.

Shelvinsky, një veteriner 48-vjeçar, ka ndërtuar qendrën e rehabilitimit Free Wings (Vilni Kryla) rreth shtëpisë së tij në periferi të Lvivit.

Ai kujdeset për afërsisht 470 zogj — disa të gjetur të plagosur në natyrë dhe të tjerë të besuar në kujdesin e Shelvinskyt nga pronarët e tyre për shkak të rrethanave të luftës.

Streha e mirëmbajtur, e mbushur me cicërima të gjalla dhe shkurre të gjelbra — madje edhe në motin e zymtë të dhjetorit — qëndron si një dëshmi e njerëzimit në Ukrainën e kohës së luftës.

Shelvinsky jeton me gruan e tij, Yuliia, dhe djalin e tyre të vogël, Zhenia.

Dyshja praktikisht drejton vetë rezervatin e zogjve — të vendosur në Kozhychi, një fshat i vogël në Ukrainën perëndimore, disa kilometra në perëndim të Lvivit — me pak ndihmë nga prindërit e Viktorit.

Çifti u takua nëpërmjet një zogu. Në muajin e parë të pushtimit në shkallë të plotë, Yuliia gjeti një qukapik në kopshtin e shtëpisë së saj në Oblastin e Kievit. Ai nuk mundi të fluturonte pasi u përplas me kokë në dritaren e saj.

Të gjente një veteriner që i njeh mirë zogjtë ishte e vështirë në javët e para kaotike të luftës së përgjithshme. Kërkimi i saj për këshilla në internet e çoi te Viktori.

Bëhet e ditur se streha “Free Wings”, e themeluar nga Shelvinsky 29 vjet më parë, është shtëpia e 63 specieve të ndryshme, nga kafshët shtëpiake ekzotike te zogjtë që gjenden zakonisht në pyjet dhe malet e Ukrainës.

Disa zogj vinin nga rajonet në vijën e frontit; pronarët ose kalimtarët i dërgojnë kur munden, në raste të tjera, Viktori dhe Julia organizojnë transportin e tyre.

Shumë kafshë kanë fraktura kockash dhe lëndime në kokë.

Shumica lirohen përsëri në natyrë pasi kujdesen për to deri në rikuperimin e shëndetit të tyre, ndërsa të tjerat qëndrojnë aty praktikisht përgjithmonë.

Disa lëndime janë pasojë e drejtpërdrejtë e luftës. Shelvinsky tregon një buf që ia solli një ushtar nga sektori verior i Sumyt i frontit.

Ushtarët e gjetën zogun me një krah të lënduar pasi u ngatërrua në një rrjetë anti-dron — një situatë jo aq e rrallë këto ditë, vëren Shelvinsky.

Por jo të gjithë zogjtë u dërguan në strehë me plagë fizike.

“Nuk ka rëndësi nëse ka ndonjë lëndim”, tha Shelvinsky.

Si shembull, Shelvinsky prezanton Conorin, një papagall mashkull i cili ndan një kafaz me shoqëruesen e tij femër, Varvarën.

Conori, siç shpjegon veterineri, i përkiste një oficeri ushtarak 50-vjeçar, prandaj zogu ndonjëherë përdor terminologji ushtarake si "plus-plus" — një version ukrainas i "roger that" që përdoret gjatë bisedave në radio.

Pasi pronari u vra në një sulm me dron rus në Dnipro, Conor ra në depresion të rëndë, sipas Shelvinskyt.

Gruaja e pronarit e gjeti veten të paaftë të kujdesej për zogun, i cili ende fliste me zërin e ushtarit të vrarë.

Conor ndërroi duar disa herë përpara se të përfundonte në strehën e Free Wings, ku gjendja e tij

Ndryshe, verën e kaluar Shelvinsky ndërtoi rrugën për ta bërë strehën më të arritshme për vizitorët e saj, shumë prej të cilëve janë veteranë, përfshirë ata në karrige me rrota ose që përdorin proteza pasi kanë humbur gjymtyrë në luftë.

Vizitorë të tjerë gjatë vitit përfshijnë studentë, veterinerë, artistë dhe familje me fëmijë.

Me shpërthimin e pushtimit në shkallë të plotë , vendi u bë një shtëpi e përkohshme për refugjatët që iknin nga armiqësitë, të cilët dërguan zogjtë, qentë dhe macet e tyre.

Strehimi dhe ushqyerja e kafshëve gjatë kohës së luftës është një betejë e vështirë.

Shelvinsky shpjegon se vetëm papagallët konsumojnë rreth 300 kilogramë ushqim në muaj.

Vullnetarë të huaj dhe ukrainas dhurojnë ushqim për qendrën e rehabilitimit, përfshirë UAnimals , një OJQ e themeluar në vitin 2016 që tani përqendrohet në shpëtimin e kafshëve nga rajonet e vijës së frontit.

Herë të tjera, vizitorët dërgojnë diçka për të ndihmuar. /Telegrafi/

Kylie Minogue ka festuar arritjen historike të këngës së saj të parë të Krishtlindjeve që renditet në vendin e parë në Mbretërinë e Bashkuar pas 37 vitesh karrierë si këngëtare.

Ylli australian, 57 vjeçe, ndau gëzimin me fansat në Instagram duke pozuar e veshur me një kostum të Babagjyshit, xhaketë të kuqe prej kadifeje me zbukurime të bardha dhe rrip të zi që nxirrte në pah figurën e saj.

Ajo e kompletoi pamjen me geta të kuqe e të bardha dhe çizme të zeza deri në gju, shkruan DailyMail.

Para një peme të Krishtlindjeve dhe një dyshemeje të mbuluar me dëborë të rreme, Kylie i uroi fansave: “Gëzuar Krishtlindjet të dashuruar, shpresoj se po kaloni një kohë të mrekullueshme dhe ju dërgoj shumë dashuri”.

Ajo shtoi edhe: “Gëzuar Krishtlindjet dhe festat e lumtura të gjithëve! Ju dërgoj gjithë dashurinë”.

Kënga e saj “XMAS” siguroi vendin e parë, duke shënuar suksesin e saj të tetë në top listat dhe duke u bërë kënga e parë Amazon Music Original që arrin numrin 1 në Listat Zyrtare të Krishtlindjeve.

Kjo arritje historike vjen pas 37 vitesh që Kylie kishte renditur për herë të fundit në vendin e parë të Krishtlindjeve me “I Should Be So Lucky” në 1987. /Telegrafi/

I njëjti grup hakerash iranianë që hynë në telefonin e ish-kryeministrit Naftali Bennett javën e kaluar, pretendojnë se kanë arritur të depërtojnë në telefonin e shefit të stafit të kryeministrit Benjamin Netanyahu, Tzachi Braverman.

Hakerat Handala thonë se do të publikojnë sot informacione të reja që e lidhin Braverman me skandalin e Katargate, transmeton Telegrafi.

Zyra e kryeministrit i tha The Times of Israel se "nuk është gjetur asnjë shkelje dhe se çështja po hetohet".

Dy nga këshilltarët e Netanyahut dyshohet se kanë punuar në emër të Katarit për firmën PR Perception të kryesuar nga Yisrael Einhorn, ish-menaxheri i fushatës së Netanyahut, ndërsa ishte i punësuar nga kryeministri.

Në një intervistë të transmetuar javën e kaluar, një nga këshilltarët, Eli Feldstein, tha se Braverman ishte i përfshirë në një skandal të veçantë, por të lidhur me të, që përfshinte rrjedhjen e informacionit të klasifikuar në tabloidin gjerman Bild si pjesë e një skeme të dyshuar për të ndikuar në opinionin publik dhe për të lehtësuar presionin mbi Jerusalemin për të arritur një marrëveshje me Hamasin.

Feldstein, i cili ka pranuar se ka publikuar informacionin, pretendoi se Braverman mësoi për një hetim sekret të IDF-së mbi këtë publikim dhe e siguroi se hetimi mund të anulohej, megjithëse shefi i shtabit e kërcënoi gjithashtu nëse ai do t'ua tregonte hetuesve.

Braverman pritet të bëhet ambasadori i Izraelit në Mbretërinë e Bashkuar, por akuzat kanë kërcënuar ta pengojnë emërimin. Si Braverman ashtu edhe Netanyahu mohojnë çdo përfshirje në skandale. /Telegrafi/