Numri i abonentëve të internetit me linja fikse u rrit më tej gjatë 3-mujorit të tretë të vitit të kaluar.

Të dhënat e Autoritetit të Komunikimeve Elektronike dhe Postare (AKEP) tregojnë se numri i abonentëve në fund të muajit shtator 2025 arriti në rreth 710 mijë, në rritje me 2.4% krahasuar me tremujorin e mëparshëm dhe 7.1% krahasuar me të njëjtën periudhë të një viti më parë.

Tregu i internetit nga linjat fikse vazhdon të ndjekë një tendencë të qëndrueshme në rritje, duke ngushtuar pjesërisht prapambetjen në depërtimin e linjave fikse të komunikimit.

AKEP vlerëson se tashmë linjat e internetit fiks kanë depërtuar në më shumë se 92% të familjeve shqiptare. Sidoqoftë, ky raport duket të jetë tepër optimist për disa arsye. Kjo llogaritje mbështetet në numrin e përgjithshëm të abonentëve, ku përfshihen edhe bizneset. Deri më sot, AKEP nuk ofron statistike të diferencuara për numrin e abonentëve familjare dhe të atyre biznes.

Nga ana tjetër, sipas burimeve nga tregu, disa operatorë kanë tendencën të raportojnë shifra më të larta të abonentëve nga sa kanë në të vërtetë, kryesisht duke mos reflektuar në statistika abonentët që largohen drejt kompanive të tjera. Për këto arsye, depërtimi real i internetit në Shqipëri mund të jetë disi më i ulët nga sa tregojnë statistikat zyrtare.

Megjithatë, tregu në përgjithësi po shfaq rritje dhe konkurrencë të lartë, veçanërisht në qendrat e mëdha urbane, ku përqendrimi i popullsisë është më i madh. Operatorët e kanë rinovuar gradualisht infrastrukturën drejt teknologjive më të reja, të fibrës optike, që ka ndikuar në rritjen e shpejtësisë mesatare të lidhjes për përdoruesit.

Sipas të dhënave më të fundit, të vitit 2024, rreth 84% e pajtimtarëve kishin linja me shpejtësi më të madhe se 30 Mbps (megabit për sekondë), nga 69% që kishte qenë ky tregues në fund të vitit 2023. Ndërkohë, 42% e pajtimtarëve zotërojnë lidhje me shpejtësi mbi 100 Mbps, nga 28% që kishte qenë ky tregues për vitin 2023.

Gjithmonë duke iu referuar shifrave të 2024, rreth 69% e lidhjeve të internetit nga rrjetet fikse mbështeten në teknologjinë e fibrës optike.

Sipas të dhënave nga AKEP, në fund të tremujorit të tretë 2025, tregu kryesohej nga One Albania, që raportonte pothuajse 153 mijë abonentë në shërbimin e internetit me brez të gjerë, shifër që përbën 21.5% të numrit të përgjithshëm të abonentëve të tregut. One Albania megjithatë ka pësuar rënie në  numrin e abonentëve, me 1.3% më pak krahasuar me një vit më parë.

Vodafone Albania në fund të tremujorit të tretë raportonte rreth 151 mijë abonentë, në rritje të me 15.2% krahasuar me një vit më parë. Vodafone mban vendin e dytë në tregun e internetit fiks, me afërsisht 21.3% të numrit të përgjithshëm të abonentëve.

Kompanitë e tjera janë ende larg dy aktorëve mbizotërues në treg. E treta pozicionohet ASC (Tring), me 8.5% të numrit të abonentëve, e ndjekur nga Abissnet, me 6.4%, Digicom, me 5.3% dhe Nisatel, me 4.2%.

Në këtë treg veprojnë edhe një numër i konsiderueshëm operatorësh më të vegjël rajonale dhe lokalë, që, të marrë së bashku, sipas vlerësimeve të AKEP, zotërojnë afërsisht 33% të numrit të përgjithshëm të abonentëve.

Burimi: AKEP

The post Interneti fiks, numri i abonentëve ka arritur në më shumë se 710 mijë appeared first on Revista Monitor.

Nga Carlos Cuerpo*

Kur Bashkimi Europian nisi negociatat tregtare me bllokun tregtar të Amerikës së Jugut, Mercosur, në vitin 1999, bota ishte e mbushur me shpresë. Euro sapo kishte debutuar në tregjet globale; Polonia, Hungaria dhe Republika Çeke kishin dalë nga prapa Perdes së Hekurt dhe po i bashkoheshin NATO-s në një moment historik pas Luftës së Ftohtë; dhe një valë e re demokratizimi po përhapej nëpër kontinente.

Më shumë se një çerek shekulli më vonë, megjithatë, bota duket shumë më e pasigurt dhe më e rrezikshme. Luftërat tregtare, shtrëngimi ekonomik dhe ushtarak, si dhe një shpërfillje gjithnjë e më e madhe ndaj normave globale po gërryejnë rendin liberal që solli dekada prosperiteti dhe sigurie të përbashkët.

Në këtë sfond, nënshkrimi këtë javë në Asunción të Paraguait i një marrëveshjeje BE–Mercosur, e vonuar prej kohësh, dërgon një mesazh të qartë shprese: Europa do të qëndrojë e vendosur në mbrojtjen e sistemit tregtar dhe shumëpalësh të bazuar në rregulla, mbi të cilin është ndërtuar dhe prej të cilit kanë lulëzuar demokracia dhe tregtia e hapur.

Në një kohë kur “rregulli i më të fortit” duket se po rikthehet, Europa duhet të projektojë lidership global përmes vlerave dhe parimeve të saj, jo përmes forcës brutale. Bashkëpunimi dhe integrimi duhet të mbizotërojnë mbi kërcënimet dhe unilateralizmin. Kjo është e vetmja mënyrë për të krijuar prosperitet për të gjithë.

Marrëveshja me Argjentinën, Brazilin, Paraguain dhe Uruguain mishëron angazhimin e BE-së ndaj këtyre parimeve. Si marrëveshja më e madhe tregtare që BE-ja ka përfunduar ndonjëherë, ajo do të krijojë zonën më të madhe tregtare në botë, duke përfshirë gati një të katërtën e ekonomisë globale. Duke mbuluar një popullsi të kombinuar prej më shumë se 700 milionë banorësh, marrëveshja hap tregje të reja të gjera për bizneset në të dy anët e Atlantikut, tregje që kanë uri për qartësi dhe parashikueshmëri në mes të mjegullës së proteksionizmit dhe pasigurisë së tarifave që ndryshojnë vazhdimisht. Ajo gjithashtu e pozicionon Europën në mënyrë strategjike në një rajon me potencial të jashtëzakonshëm rritjeje. Eksportet europiane drejt Mercosur pritet të rriten me gati 70%, dhe kompanitë e BE-së mund të kursejnë rreth 4 miliardë euro në vit nga detyrimet doganore.

Ndryshe nga marrëveshjet tregtare të viteve 1990, kjo është një marrëveshje moderne me një shtrirje më të gjerë për të nxitur qëndrueshmëri të vërtetë ekonomike. Ajo përfshin angazhime të zbatueshme për klimën dhe punën, dhe do të hapë sektorë shërbimesh dhe tregje të prokurimeve publike, duke mbështetur krijimin e vendeve të punës me cilësi të lartë në financë, telekomunikacion dhe teknologji. Ajo gjithashtu forcon autonominë strategjike të Europës duke nxitur sisteme pagesash ndërkufitare dhe duke përforcuar rolin e euros në tregtinë ndërkombëtare dhe si monedhë rezervë.

Qasja ndaj mineraleve kritike si litiumi, kobalti dhe metalet e rralla, do të reduktojë varësitë e Europës dhe do të sigurojë zinxhirët e furnizimit për tranzicionin e gjelbër dhe atë dixhital. Me kërkesën globale për këto minerale që pritet të rritet katër deri në gjashtë herë deri në vitin 2040, marrëveshja i jep BE-së një avantazh konkurrues në sektorë që variojnë nga automjetet elektrike dhe energjia e rinovueshme deri te mbrojtja.

Marrëveshja është gjithashtu e balancuar. Ajo ofron masa mbrojtëse për fermerët europianë duke ruajtur standardet strikte të sigurisë ushqimore të BE-së dhe duke zbatuar kontrolle të tjera, ndërkohë që hap mundësi për sektorin europian agro-ushqimor lider në botë. Produkte spanjolle të regjistruara dhe të mbrojtura, si vaji i ullirit dhe vera, pritet të përfitojnë ndjeshëm nga akses më i mirë në tregjet e Amerikës së Jugut, dhe marrëveshja u jep europianëve akses më të mirë në mallra si soja, duke ndihmuar në diversifikimin e burimeve të furnizimit.

Më e rëndësishmja, marrëveshja riafirmon angazhimin e Europës për të rifituar zërin e saj në skenën botërore. Ndërsa të tjerët kthehen nga brenda, BE-ja po zgjeron rrjetin e aleatëve strategjikë, duke negociuar marrëveshje të reja ose të përditësuara tregtare me Indinë, Tajlandën dhe Malajzinë, ndër të tjera.

Me shumicën e shteteve anëtare të BE-së që u bashkuan për të kapërcyer rezistencën ndaj marrëveshjes me Mercosur, blloku ka treguar se mund të triumfojë mbi dallimet politike brenda dhe jashtë kufijve. Të tregosh një vendosmëri të tillë është një hap thelbësor që BE-ja të forcojë besueshmërinë dhe ndikimin e saj global. E njëjta vendosmëri do të ndihmojë në përshpejtimin e përpjekjeve për të shembur barrierat e brendshme tregtare dhe për të shfrytëzuar plotësisht tregun e përbashkët dhe popullsinë prej 450 milionë banorësh. Qasja me dy shtylla e Europës, zgjerimi i rrjetit të marrëveshjeve tregtare ndërsa thellohet integrimi i brendshëm, është formula fituese për konkurrueshmërinë.

Marrëveshja me Mercosur ka rëndësi edhe më të madhe sepse partneriteti shkon përtej ekonomisë ose logjikës thjesht transaksionale. Europa dhe Amerika Latine ndajnë vlera të rrënjosura thellë: demokracinë, shtetin e së drejtës dhe angazhimin ndaj shumëpalëshmërisë.

Spanja, një nga mbështetëset më të forta të marrëveshjes, e ilustron përfitimin nga lidhjet më të ngushta me rajonin. Ajo është investitori i dytë më i madh i huaj në Brazil, gjë që ka ndihmuar shumë kompani spanjolle në sektorë si telekomunikacioni, infrastruktura dhe energjia e pastër të shndërrohen në liderë globalë.

Prandaj, Spanja e shikon këtë marrëveshje si një trampolinë për angazhim më të thellë me Amerikën Latine, një angazhim i rrënjosur në lidhjet historike dhe kulturore që bashkojnë rajonet politikisht të larmishme. Marrëveshja është provë se dallimet mund të kapërcehen përmes bashkëpunimit. Nëse duam një botë më të sigurt dhe më të parashikueshme, na duhen më shumë marrëveshje si ato BE–Mercosur.

* Carlos Cuerpo është Ministër i Ekonomisë, Tregtisë dhe Biznesit i Spanjës.

Copyright: Project Syndicate, 2026.
www.project-syndicate.org

The post Marrëveshja BE–Mercosur i kthen parimet në praktikë appeared first on Revista Monitor.

Drejtoresha Ekzekutive e Autoritetit Shqiptar të Mbikëqyrjes Financiare (AMF), Adela Xhemali, mori pjesë si paneliste në forumin rajonal Euromoney në 13-14 Janar në Vjenë, ku diskutoi mbi progresin e Shqipërisë në përshtatjen e sektorit financiar jo-bankar me standardet e Bashkimit Evropian, në tryezën e rrumbullakët “Anëtarësimi i Shqipërisë në BE: A është gati sistemi financiar?”.

Gjatë diskutimeve të nivelit të lartë në kuadër të Forumit të 31-të të Europës Qendrore dhe Lindore, të organizuar nga Financial Times, zonja Xhemali theksoi rolin gjithnjë e më të rëndësishëm të sigurimeve, fondeve të investimeve, pensioneve private dhe tregjeve kapitale në mbështetje të rritjes së qëndrueshme ekonomike në Shqipëri.

Ajo prezantoi qasjen graduale dhe të strukturuar të AMF-së për implementimin e një kuadri mbikëqyrës të tipit Solvency II, duke nënvizuar se reformat e vazhdueshme, të mbështetura nga një roadmap (udhërrëfyesi) i Bankës Botërore, po forcojnë mbikëqyrjen bazuar në riskun, qeverisjen dhe qëndrueshmërinë e kapitalit.

“Këto reforma rrisin transparencën, parashikimin rregullator dhe besimin e investitorëve, duke mbështetur progresin e vazhdueshëm të Shqipërisë drejt anëtarësimit në Bashkimin Evropian,” theksoi zonja Xhemali.

The post Drejtoresha e AMF: Sektori financiar po mbështet rritjen e qëndrueshme ekonomike appeared first on Revista Monitor.

Pavarësisht pranisë së gjerë të varieteteve të huaja të rrushit, në Shqipëri mbizotërojnë ato autoktone në sipërfaqen e kultivuar me synim prodhimin e verës.

Një studim i posacëm për këtë sektor, i publikuar nga Ministria e Bujqësisë dhe Zhvillimit Rural, tregon se në kadastrën e vreshtave të menaxhuara nga Qendra për Transferimin e Teknologjisë Bujqësore të Fushë-Krujës, janë evidentuar në total 73 varietete hardhie, nga të cilat 51 varietete janë për prodhim vere dhe 22 me rrush tavoline apo përdorime për përpunim pije alkoolike.

“Nga varietetet e përshtatshme për prodhimin e verës, rezultojnë 17 varietete autoktone dhe 34 varietete të huaja (të regjistruara si varietete me origjinë të huaj). Referuar të dhënave të kadastrës sipërfaqja e vreshtave që përdoren për prodhimin e verës zënë në total rreth 91.3% të vreshtave.

Nga vreshtat për prodhim vere, varietetet autoktone zënë të 78.1% të sipërfaqes totale të vreshtave për prodhim vere.

Vetëm dy varietete, Shesh i zi dhe Shesh i bardhë, së bashku zënë 62.6% (përkatësisht 43.54% dhe 19.06%) të sipërfaqes së vreshtave për verë, ose 89.3% të sipërfaqes që zënë varietetet autoktone (62.14% Sheshi i zi dhe 27.19% Sheshi i bardhë)”, thuhet në studim.

Në studim nënvizohet se nga varietetet e huaja ai Merlot është i përhapur në të gjitha rrethet dhe zë sipërfaqen më të madhe, me 12.34% në raport me vreshtat për verë, i ndjekur nga Sangiovese 2.23%, Tokaj 2.08%, Vranac 1.81%, Kabërnet Sovinjon 1.51%, Riesling 1.49%, etj.

Raporti vlerëson se kantinat prodhojnë mesatarisht 57.5% të rrushit që përpunojnë në vreshtat e tyre, ndërsa 42.4% të rrushit e blejnë në zonën përreth kantinës.

Sa i takon zonës ku janë të përhapur, varietetet e rrushit rezulton se Sheshi i bardhë, është i përhapur në të gjithë vendin, por përqendrimin më të madh e ka në Qarqet e Fierit, Tiranës, Elbasanit, Beratit, Durrësit dhe Vlorës, ku janë mbi 60% e sipërfaqes. Qarku i Dibrës dhe i Kukësit renditen me sipërfaqet më të vogla përkatësisht 0.2 dhe 0.5%.

Edhe Sheshi i zi shtrihet në të gjitha Qarqet e vendit, ku Qarku i Fierit, Vlorës, Beratit, Tiranës, Elbasanit dhe Durrësit kanë rreth 80.8% të sipërfaqes, me përqendrimet në Bashkitë e Vlorës, Fierit, Beratit, Tiranës, Lushnjës, Durrësit, Roskovecit, Kurbinit dhe Mallakastrës, që kanë rreth 61 % të sipërfaqes totale që ka Sheshi i Zi.

Nga varietetet e huaja Merloti kultivohet në të gjitha qarqet e vendit, me dominim në Qarqet Gjirokastër, Durrës dhe Fier ku janë rreth 62% e sipërfaqes, (është më i përhapur në Bashkitë e Durrësit, Përmetit, Lushnjës dhe Vlorës ku janë rreth 45% e sipërfaqes).

Varieteti Kallmet është i përqendruar në Qarkun e Shkodrës (57%) dhe Lezhës (40%), me sipërfaqet më të mëdha në Bashkitë e Mirditës (33.3%), Shkodrës (31.7%) dhe Malësisë së Madhe (20.5%).

Varieteti Debinë e bardhë shtrihet në Qarkun e Gjirokastrës (91.3%) dhe të Korçës (8.7%) kurse varieteti Vlosh, shtrihet në Qarkun e Fierit (55%), Gjirokastrës (30.7%) dhe Vlorës (9.8%)./ N.Maho

The post Prodhimi i verës, studimi: 78% e sipërfaqes së vreshtave në vend me varietete autoktone appeared first on Revista Monitor.

Tranzicioni i gjelbër kërkon marrjen e një sërë masave nga ana e vendeve të ndryshme për të arritur objektivat e vendosur.

Por jo të gjithë vendet kanë mundësi që t’i përgjigjen me kapacitetin e nevojshëm njerëzor këtyre masave edhe për shkak të profileve arsimore dhe trajnimeve që duhet të ndiqen.

Konkretisht Shqipëria është një nga ato me pjesëmarrje të ulët në arsimin profesional që mund të shërbejë si një udhëheqës në këtë aspekt sa i takon nevojave për kapacitetin njerëzor.

Një raport i Fondacionit Europian të Trajnimeve analizon modelet e arsimore në të gjithë rajonin duke i parë në këndvështrimin e kapaciteteve që kanë këto sisteme kombëtare për t’iu përgjigjur tranzicionit të gjelbër dhe atij energjetik.

“Ndryshimet në nivelet e arritjes arsimore përcaktojnë si shkallën, ashtu edhe natyrën e zhvillimit të aftësive të nevojshme: vende si Shqipëria, ku pjesëmarrja në arsimin profesional mbetet relativisht e ulët, përballen me një nevojë urgjente për trajnim afatshkurtër, të orientuar drejt praktikës, për të mbështetur masa që kërkojnë shumë fuqi punëtore, siç janë ndërhyrjet për rritjen e eficiencës energjetike.

Në të kundërt, sistemet me pjesëmarrje më të lartë në arsimin e lartë, si Gjeorgjia ose Ukraina, duhet të japin përparësi rrugëve të konvertimit dhe specializimeve të aplikuara për t’iu përgjigjur roleve të reja teknike dhe menaxheriale në fushën e energjive të rinovueshme dhe integrimit të rrjeteve energjetike (Vakulchuk & Overland, 2024). Këto dallime strukturore nënvizojnë rëndësinë e përafrimit të strategjive të zhvillimit të aftësive me profilet e arritjeve arsimore, në mënyrë që tranzicioni të jetë njëkohësisht efektiv dhe gjithëpërfshirës” thuhet në raport.

I njëjti analizon edhe mënyrën sesi orientohen zgjidhjet për masat e tranzicionit të gjelbër të lidhur ngushë me ndryshimet klimatike. Një nga këto elementë është ajo e uljes së emetimeve të karbonit.

“Emetimet e karbonit në vendet partnere të ETF-së ndryshojnë ndjeshëm, duke reflektuar dallime të mëdha në përmasat e ekonomisë. Në përputhje me këto dallime, vendet ndryshojnë ndjeshëm edhe për sa i përket emetimeve të gazeve serrë (GHG).

Burimi më i madh i emetimeve është sektori i energjisë, me diferenca në peshën e tij në totalin e emetimeve (duke përjashtuar FOLU) që variojnë nga 93% në Turkmenistan deri në 62% në Shqipëri, me një mesatare prej 90.5%, e ndarë pothuajse në mënyrë të barabartë midis prodhimit dhe kërkesës për energji” thuhet në raport. Në këtë aspekt ajo që e favorizon Shqipërinë sa i takon emetimeve është fakti që prodhimi i energjisë është i mbështetur nga hidrocentralet çka e bën atë të pastër./N.Maho

The post Tranzicioni i gjelbër, raporti: Shqipëria ka nevojë për kapacitete njerëzore që të jetë efektive appeared first on Revista Monitor.

Inflacioni bazë e mbylli në rritje vitin 2025. Sipas informacionit të Bankës së Shqipërisë, për dhjetorin inflacioni bazë arriti nivelin 3.03%, nga 2.5% që kishte qenë një vit më parë.

Inflacioni bazë gjithashtu shënoi një rritje të lehtë edhe krahasuar me nivelin 2.98% të muajit nëntor.

Inflacioni bazë iu kthye rritjes për herë të parë që prej vitit 2022, duke dëshmuar presionet në rritje inflacioniste nga ekonomia e brendshme.

Nënshporta që mat inflacionin bazë llogaritet mbi një grup produktesh dhe shërbimesh që përbëjnë 69.6% të totalit të shportës së Indeksit të Çmimeve të Konsumit. Inflacioni bazë përjashton ato produkte që kanë luhatshmëri të lartë, si produktet ushqimore dhe ato energjetike dhe ka si qëllim kryesor ta zhveshë rritjen e përgjithshme të çmimeve nga lëvizjet me natyrë më afatshkurtër. Për këtë arsye, inflacioni bazë është një indikator i rëndësishëm për të kuptuar tendencat më afatgjata të çmimeve dhe ndaj monitorohet vazhdimisht nga Banka e Shqipërisë.

Paralelisht me inflacionin bazë, edhe inflacioni bazë neto gjatë vitit të kaluar u rrit në 3.47%, nga 2.21 që kishte qenë një vit më parë.

Inflacioni bazë neto përjashton më tej nga inflacioni edhe nëngrupet e ushqimeve të përpunuara (përfshirë bukën dhe drithërat) dhe matet mbi 44.6% të shoqërisë së IÇK-së.

Ndërkohë, inflacioni që përjashton të gjitha produktet ushqimore dhe energjetike në fund të 2025 ishte në nivelin 3.32%, nga 2.2% që kishte qenë një vit më parë.

Inflacioni zyrtar në Shqipëri, i matur për të gjithë shportën e mallrave të konsumit, e mbylli vitin 2025 në nivelin 2.3%, nga 2.1% që kishte qenë një vit më parë. Rritja më e kufizuar e inflacionit i detyrohet kryesisht nivelit të ulët të inflacionit të importuar. Por, ndërkohë, presionet inflacioniste më afatgjata që po gjenerohen nga ekonomia e brendshme janë dukshëm më të larta.

Në një prononcim për “Monitor, Banka e Shqipërisë vlerësonte në dhjetor se faktori kryesor i rritjes së inflacionit bazë dhe atij të brendshëm ka qenë përshpejtimi i çmimit të qirasë. Ndërkohë, rritja e disa prej çmimeve të shërbimeve të lidhura me turizmin është balancuar nga rënia e çmimeve të disa mallrave, pjesë e këtyre matjeve të inflacionit bazë e të brendshëm.

Aktualisht, sipas Bankës së Shqipërisë, rritja e qirasë përbën burimin kryesor të presioneve të brendshme inflacioniste, por në mungesë të rritjeve të përsëritura në të ardhmen, efekti i saj mbi inflacionin pritet të jetë i përkohshëm.

Këshilli Mbikëqyrës i Bankës së Shqipërisë në mbledhjen e fundit të vitit 2025 vërejti se balanca e përgjithshme e presioneve afatmesme po afrohet gradualisht drejt objektivit të inflacionit të Bankës së Shqipërisë. Inflacioni parashikohet të kthehet në objektivin prej 3%, gjatë tremujorit të dytë të vitit 2026./ E.Shehu

Burimi: BSH

The post Çmimet e produkteve jo ushqimore u rritën me 3% në 2025, më e larta në dy vjet appeared first on Revista Monitor.

Që nga nëntori i vitit 2025 dhe deri më tani serrat e Myzeqesë janë përmbytur tre herë, por së fundmi dëmet janë kolosale si për ekonominë lokale të fermerëve dhe për atë kombëtare nga mungesa e prodhimit. Ende pa u vlerësuar dëmet e nëntorit, serrat u rrafshuan për të tretën herë.

Mirlind Saraçi nga Fshati i Kosovë e Vogël në Lushnje ka pësuar rreth 150 mijë euro dëme nga përmbytja e tre hektarëve serrë dhe dëmtimi i prodhimit gati për treg këto ditë. Si ai qindra dhe mijëra fermerë në të gjithë vendin kanë pësuar dëme të mëdha, të nxitura më shumë nga mungesa e menaxhimit se sa nga reshjet.

Fermeri tha se këtë herë sipërfaqja e përmbytur është shumë e madhe dhe se shkak për rritjen e nivelit të ujit u bë hapja e portave të HEC-it të Banjës. Hapja e portave gjeti kanalet të mbyllura (si ne foton më poshtë ) thotë Mirlindi. Në zonën e tij ka 13 vite që nuk është vënë dorë në hapjen e kanaleve dhe kolektorëve kryesorë, teksa qindra milionë euro janë investuar në serra.

Për shkak të hapjes së portave uji ka përmbytur një ditë më parë dhe vijon sipërfaqe të reja që nuk ishin prekur nga reshjet.

Ekspertët llogarisin se deri dje sipërfaqja e përmbytur ka arritur në rreth 40 mijë hektarë dhe po zgjerohet.

Ai tha se ndërtimet pa leje mbi kanale dhe kolektorë të mëdhenj janë toleruar ndër vite, duke bllokuar rrjedhën natyrore të ujit dhe duke e bërë zonën veçanërisht të rrezikuar nga përmbytjet.

Sipas tyre, ky degradim i sistemit të kullimit e ka bërë territorin të ekspozuar ndaj reshjeve, ndërsa situata është përkeqësuar ndjeshëm nga menaxhimi i digave dhe hidrocentraleve. Fermerët pretendojnë se rezervuarët janë mbushur dhe më pas portat janë hapur për shkarkim, pa i lajmëruar më parë.

Projektet e hidrocentraleve me basen po ndikojnë në sigurinë energjitike të vendit, por sakaq kanë rritur ekspozimin e pjesës tjetër të vendit ndaj përmbytjes. Zona e Shkodrës është përmbytur historikisht nga hapja e portave të kaskadave mbi lumin Drin, por ndërkohë investime me kaskada janë bërë edhe në HEC-et e tjera te vendit dhe kryesisht në Devoll.

Gjithashtu dëme ka edhe në blegtori. Në Dimal të Beratit rreth zonave Banaj dhe Sheq, ka humbje te rezervave ushqimore ndërsa mijëra shpendë kanë ngordhur. Të gjitha zonat e përmbytura janë në emergjencë për ushqime për bagëtitë.

Të dhënat zyrtare tregojnë të INSTAT tregojnë se zonat e përmbytura kontribuojnë në 65 për qind të prodhimit të perimeve në vend dhe dominojnë pothuajse 80 për qind te eksporteve të prodhimeve të freskëta.

Përveç dëmit që është krijuar në ekonominë e fermerëve, dëmtimet e këtyre ditëve pritët të ndikojnë negativisht në çmimet e pakicës të prodhimeve bujqësore dhe gjithashtu të ndikojnë negativisht eksportet e këtij grupi.

Vitin e kaluar, eksportet e ushqimeve dhe pijeve ishin të vetmet që ruajtën ritmet e rritjes gjatë gjithë vitit, ndryshe nga grupet e tjera që janë në trend rënës dhe me luhatje prej gati dy vitesh./ B.Hoxha

The post Shkarkimet nga digat dhe kanalet e bllokuara, rritet sipërfaqja e serrave të përmbytura, kostot appeared first on Revista Monitor.

Yield-et e bonove 12-mujore të thesarit u rritën lehtë në ankandin e parë të këtij viti, por duke qëndruar në nivele relativisht të ulëta dhe ende poshtë normës bazë të interesit.

Sipas informacionit nga Banka e Shqipërisë, yield-i mesatar i ponderuar arriti në 2.47%, nga 2.44% që kishte qenë në ankandin e fundit të vitit 2025.

Nga 8.5 miliardë lekë që kishte qenë shuma e shpallur për financim nga Ministria e Financave, vlera totale e kërkesave në ankand arriti në 10.44 miliardë lekë. Por rata apo pjesa e pranuar e ofertave konkurruese ishte përsëri mjaft e ulët, në nivelin 3.11%.

Rritja e yield-eve, sadoqë shumë e lehta, ishte e para që prej mesit të vitit të kaluar.

Tremujori i parë i vitit është ka edhe përqendrimin më të larta të huamarrjes së qeverisë në tregun e brendshëm financiar. Për këtë arsye, në përgjithësi ndodh që yield-et të shënojnë një korrektim të lehtë në rritje krahasuar me nivelet e vitit paraardhës.

Sipas kalendarit të emetimeve të Ministrisë së Financave, për tremujorin e parë 2026 huamarrja e planifikuar do të ketë vlerën e 134 miliardë lekëve, në rritje me 1.1% krahasuar me të njëjtën periudhë të një viti më parë. Kjo shumë përbën më shumë se 35% e vlerës totale vjetore të emetimeve të parashikuara në tregun e brendshëm nga qeveria shqiptare.

Megjithatë, në tërësi për vitin 2026, vlera e përgjithshme e huamarrjes së re të parashikuar për t’u financuar në tregun e brendshëm është 45 miliardë lekë, vlerë kjo 10% më e ulët krahasuar me huamarrjen e parashikuar në buxhetin e vitit 2025.

Yield-et e ulëta të titujve qeveritarë dhe sidomos të instrumenteve afatshkurtra ndikojnë edhe koston e kredisë në Lekë për sektorin privat. Duke qenë se kreditë afatgjata në monedhën vendase në përgjithësi kuotohen mbështetur mbi ecurinë e bonove të thesarit, yield-et e ulëta të tyre ndikojnë edhe nivele të ulëta të normave të interesit të kredive.

Megjithatë, ecuria e yield-eve dhe normave të interesit gjatë vitit 2026 do të përcaktohet edhe kursi i politikës monetare që do të ndjekë Banka e Shqipërisë.

Inflacioni bazë erdhi në rritje gjatë vitit 2025, duke forcuar pritshmëritë e Bankës Qendrore për një kthim të inflacionit pranë objektivit prej 3% në pjesën e dytë të vitit 2026. Rritja e inflacionit mund të sjellë një korrektim në rritje të normës bazë të interesit, që sipas vlerësimeve teorike ndodhet poshtë nivelit të saj neutral. / E.Shehu

Burimi: BSH

The post Yield-et e bonove 12-mujore u rritën lehtë për herë të parë në shtatë muaj appeared first on Revista Monitor.

Investimet në prodhimin e energjisë nga impiantet fotovoltaikë janë rritur ndjeshëm viteve të fundit.

Të dhënat zyrtare të Entit Rregullator të Energjisë tregojnë se viti që lamë pas u mbyll me të paktën 71 të licencuar në prodhimin e energjisë nga impiante diellorë.

Më i fundit i licencuar është Spitalla Solar pjesë e Voltalias dhe investimi i dytë i kësaj kompanie në vendin tonë pas Karavastasë që ka nisur prodhimin nga fundi i vitit 2023. Pavarësisht se pjesa dërmuese e licencave janë marrë nga operatorë që kanë kapacitet të instaluar të ulët 2-10 MW janë të paktën 14 subjekte që kanë kapacitet të instaluar mes 20-140 MW.

Vetëm këta të fundit kanë një kapacitet të instaluar total prej 780MW ku një pjesë ka hyrë në prodhim ndërkohë që shumica janë në ndërtim e sipër.

Interesi për energjinë diellore mori nxitje pas miratimit të kuadrit ligjor por edhe nxitjes që iu bë përmes ankandeve fillimisht nga qeveria dhe më pas me projekt konkrete të privatëve të cilët panë rritje pas krizës së energjisë.

Ky interes vijon të mbetet konstant madje investitorë që tashmë kanë projekte të përfunduara siç është Karavasta Solar pjesë e Voltalia apo kompania InfoTelecom që ka edhe ajo projekte në fotovolatikë kanë nxitur bashkëpunime për marrjen e tokës në përdorim nga palë private.

Pak ditë më parë gjatë një aktiviteti për energjinë nga era, ku qeveria shqiptare dorëzoi autorizimin për kompaninë CWP që synon të ndërtojë një impiant eolik 600 MW në Tropojë, u dhanë edhe shifra konkrete lidhur me interesin për fotovolatikët. Ministria për Infrastrukturën dhe Energjinë Belinda Balluku tha se investimet private në këtë segment për investime të kryera apo në proces llogariten ne 2 miliardë euro.

“Gjatë këtyre viteve në tërësi në sektorin energjetik shqiptar janë angazhuar mbi 2 mld euro investime dhe sot kemi mbi 700 MW kapacitete të reja energjetike private fotovolatike në operim dhe 400 më kapacitete të shtuara vetëprodhues e kemi një portofol të ardhshëm që pritet ti çojë në 1500 MW me teknologji fotovolatike dhe eolike. Kemi mbi 1600 MW të reja depozituesve në fazë studimi dhe lehtësim financiar” do në nënvizonte Balluku. / N.Maho

The post Fotovoltaikët, numri i të licencuarave në prodhim arriti 71 në fund të 2025 appeared first on Revista Monitor.

Qeveria ka vendosur të krijojë një shoqëri aksionare me kapital 100 për qind shtetëror për ofrimin e shërbimeve të integruara të sterilizimit në të gjitha spitalet publike të vendit, në një kohë kur kontrata aktuale e sterilizimit me PPP vijon të jetë nën akuza për korrupsion dhe abuzim me fondet publike.

Vendimi për krijimin e “Operatorit të Shërbimeve të integruara të Sterilizimit” SHA, i botuar në Fletoren Zyrtare, parashikon një kapital fillestar prej 200 milionë lekësh nga buxheti i shtetit për vitin 2026 dhe transferimin pa pagesë të aseteve që i kalojnë shtetit pas përfundimit të kontratës koncesionare të nënshkruar në vitin 2015.

Krijimi i një shoqërie aksionare të veçantë për sterilizimin spitalor ka ngritur pikëpyetje serioze mbi arsyen pse një shërbim që historikisht ka qenë pjesë e rutinës bazë të spitaleve po nxirret jashtë tyre dhe po institucionalizohet si entitet më vete. Sterilizimi i instrumenteve kirurgjikale konsiderohet një funksion thelbësor i çdo spitali publik, i lidhur drejtpërdrejt me sigurinë e pacientit dhe praktikën mjekësore të përditshme, dhe për dekada është realizuar nga struktura të brendshme spitalore pa nevojën e një operatori të veçantë juridik.

Në shumicën e vendeve me sisteme të zhvilluara të kujdesit shëndetësor, sterilizimi është pjesë integrale e funksionit të spitalit vetë, dhe jo një shërbim i jashtëm me kontrata koncesionare apo operatorë të veçantë juridikë. Ky proces merret nën përgjegjësinë e Central Sterile Services Department (CSSD), i njohur edhe si Sterile Processing Department, brenda çdo spitali apo qendre shëndetësore. CSSD është një njësi funksionale brenda strukturës spitalore që merret me pastrimin, dezinfektimin, kontrollin, paketimin dhe sterilizimin e instrumenteve të ripërdorshme mjekësore dhe kirurgjikale për përdorim të mëtejshëm në sallat e operacionit apo njësi të tjera klinike. Ky model është përdorur gjerësisht në vende të Evropës, Amerikës së Veriut dhe Azi-Pacifik, dhe konsiderohet standard ndërkombëtar për sigurimin e sigurisë së pacientit dhe parandalimin e infeksioneve spitalore.

Por qeveria jonë do të aplikojë modele të komplikuara për shërbime dytësore në një kohë që spitale mungojnë barnat dhe terapitë inovative.

Sipas vendimit të fundit të qeverisë Shoqëria e re shtetërore do të marrë përsipër të gjithë zinxhirin e shërbimeve të sterilizimit, nga furnizimi me instrumente kirurgjikale sterile dhe materiale njëpërdorimëshe, deri te menaxhimi i Stacionit Qendror të Sterilizimit në QSUT, trajtimi i mbetjeve spitalore me rrezik biologjik dhe digjitalizimi i procesit. Të gjitha tarifat e këtyre shërbimeve do të arkëtohen nga vetë shoqëria, e cila do të financohet nga të ardhurat e saj dhe burime të tjera të ligjshme, duke ruajtur formalisht karakterin e shërbimit publik.

Mbetet e paqartë nëse ky hap përfaqëson një ndarje reale nga modeli i kritikuar i koncesioneve apo thjesht një riformatim institucional që nuk adreson përgjegjësitë për abuzimet e së shkuarës.

Vendimi mban firmën e kryeministrit Edi Rama dhe ngarkon Ministrinë e Shëndetësisë dhe Mirëqenies Sociale me zbatimin e tij, ndërsa injektimi i kapitalit fillestar do të kryhet menjëherë pas regjistrimit të shoqërisë në Qendrën Kombëtare të Biznesit.

Kontratat e sterilizimit të instrumenteve kirurgjikale dhe të dializës, të dyja të nënshkruara në vitin 2016 me afat dhjetëvjeçar, kanë qenë ndër më të kushtueshmet për buxhetin e shëndetësisë. Afati i tyre përfundon këtë vit.

Kontrata e sterilizimit, në veçanti, është shoqëruar me akuza për fryrje të kostove, pagesa të pajustifikuara dhe procedura të dyshimta prokurimi që kanë përfshirë edhe hetime nga SPAK.

Nga viti 2017 deri në vitin 2026 kosto reale për sterilizimin ka arritur mbi 15,3 miliardë lekë,, ose rreth 53% më shumë sesa ishte parashikuar në kontratën fillestare prej 10 miliardë lekësh.

The post Shteti merr sterilizimin, PPP kthehet në shoqëri publike, me kosto si private appeared first on Revista Monitor.

Kroacia po përgatitet për një transformim të rëndësishëm digjital, i cili pritet të riformësojë sistemin e saj tatimor dhe të reduktojë barrët administrative që prej vitesh rëndojnë mbi bizneset.

Ministri i Financave, Marko Primorac, e ka përshkruar digjitalizimin e Administratës Tatimore, futjen e Fiskalizimit 2.0 dhe krijimin e një Regjistri të Popullsisë, si hapa historikë drejt modernizimit të ekonomisë kroate.

Duke folur për sipërmarrësit e vegjël dhe të mesëm, Primorac theksoi se këto reforma synojnë uljen e burokracisë dhe rritjen e produktivitetit, raporton televizioni publik kroat HRT.

Shumë shpejt, deri në 80% e detyrimeve tatimore në Kroaci do të regjistrohen në mënyrë digjitale, duke shënuar një shkëputje vendimtare nga administrimi në letër, i cili prej kohësh ka qenë burim pakënaqësie për bizneset.

Një ndryshim brezash larg burokracisë

Sipas ministrit, kërkesat e tepruara administrative kanë qenë një pengesë madhore për sipërmarrësit, veçanërisht për bizneset e vogla.

“Kjo ishte një barrë shumë e madhe administrative dhe një vështirësi reale për shumë pronarë biznesesh”, tha Primorac.
“Me arkivimin digjital, faturat elektronike dhe kontabilitetin e automatizuar, po e transformojmë shoqërinë drejt një modeli që fokusohet te produktet me vlerë më të lartë të shtuar. Nuk është e thjeshtë, por këta hapa digjitalë përfaqësojnë ndryshime brezash”.

Reformat pritet të thjeshtojnë proceset, të reduktojnë gabimet dhe t’u japin bizneseve kohë që të përqendrohen te rritja dhe inovacioni, në vend të dokumentacionit dhe procedurave burokratike.

Mbështetje, por edhe shqetësime për penalitetet

Ndërsa përfaqësuesit e biznesit në përgjithësi e mbështesin digjitalizimin e Administratës Tatimore dhe Fiskalizimin 2.0, shqetësimet lidhen me mënyrën e zbatimit të reformës, veçanërisht në lidhje me penalitetet për mosrespektim.

Boris Antunović, president i Shoqatës së Ndërmarrjeve të Vogla dhe të Mesme pranë Unionit të Punëdhënësve Kroatë (HUP), paralajmëroi se jo të gjithë sipërmarrësit kanë aftësitë e nevojshme digjitale.

“Jo të gjithë pronarët e bizneseve janë të aftë në teknologjinë e informacionit. Ne po kërkojmë një periudhë tolerance, gjatë së cilës të jemi të sigurt se nuk do të penalizohemi për gabime të vogla”, tha ai për HRT.

Sipas Ligjit për Fiskalizimin, gjobat mund të arrijnë deri në 63,360 euro për çdo shkelje, duke shtuar shqetësimin te bizneset e vogla që po përshtaten me sistemin e ri.

Transparenca dhe lufta kundër ekonomisë informale

Pavarësisht këtyre shqetësimeve, shoqatat e punëdhënësve theksojnë se bizneset që operojnë në mënyrë transparente kanë pak arsye për t’u frikësuar.

Irena Weber, drejtoreshë e përgjithshme e HUP, vuri në dukje se ekonomia informale në Kroaci mbetet një problem serioz, i vlerësuar sipas disa llogaritjeve se përfaqëson deri në një të tretën e Prodhimit të Brendshëm Bruto.

“Kjo ul të ardhurat tatimore dhe krijon konkurrencë të pandershme”, – tha Weber. “Ne e mbështesim Fiskalizimin 2.0. Pagesat dixhitale janë provuar se reduktojnë ekonominë informale dhe kufizojnë transaksionet e paregjistruara”.

Thirrje për reforma më të gjera fiskale

Punëdhënësit argumentojnë gjithashtu se digjitalizimi, edhe pse i domosdoshëm, nuk është i mjaftueshëm. Ata theksojnë se kostot e punës në Kroaci mbeten ndër më të lartat në Bashkimin Europian.

Ngarkesa tatimore mbi të ardhurat nga puna vijon të jetë e lartë, ndërsa taksimi i pronës dhe i të ardhurave nga qiraja mbetet relativisht i ulët. Përfaqësuesit e biznesit bëjnë thirrje për ndryshime urgjente për të ribalancuar sistemin tatimor dhe për të përmirësuar konkurrueshmërinë.

Ndërsa Kroacia ecën drejt një ekonomie më digjitale dhe më transparente, suksesi i këtyre reformave do të varet jo vetëm nga teknologjia, por edhe nga zbatimi i kujdesshëm dhe dialogu i vazhdueshëm me komunitetin e biznesit.

The post Kroacia, drejt një transformimi të madh digjital appeared first on Revista Monitor.

Gjetjet përforcojnë paralajmërimet e politikëbërësve si Christine Lagarde, se tregu i brendshëm “ka qëndruar në vend”

Tregtia mes vendeve anëtare të Bashkimit Europian ka rënë për herë të parë pas gati një dekade, përjashtuar periudhën e pandemisë, tregojnë shifrat e Komisionit Europian, pavarësisht përpjekjeve për të ringjallur tregun e përbashkët përballë kërcënimeve ekonomike nga Kina dhe SHBA-ja.

Tregtia mes vendeve anëtare si pjesë e PBB-së së BE-së ra nga 23.5 për qind në vitin 2023 në 22 për qind në vitin 2024, sipas një raporti paraprak të raportit vjetor të bllokut për tregun e përbashkët.

Kjo është rënia e parë vjetore që prej vitit 2016, nëse përjashtohen efektet e mbylljeve nga Covid-19. Ndërkohë, koha që nevojitet për hartimin dhe miratimin e standardeve të përbashkëta të BE-së për mallrat është rritur nga 3.2 vjet në vitin 2023 në 4 vjet në vitin 2024.

Këto shifra theksojnë paralajmërimet e liderëve, përfshirë presidenten e Bankës Qendrore Europiane, Christine Lagarde, se tregu i brendshëm “ka qëndruar në vend”, pavarësisht rritjes së kërcënimeve si tarifat amerikane dhe forcimi i konkurrencës kineze.

“Tregu i Përbashkët është aseti ynë më i mirë për t’u përballur me presionet e jashtme dhe është koha të ndërtojmë mbi pikat e tij të forta”, thuhet në raport.

Ndërsa ka pasur përmirësime në disa fusha, si njohja në nivel të BE-së e kualifikimeve profesionale dhe përvetësimi i teknologjive dixhitale, raporti vëren një “përkeqësim të qartë” në fusha të tjera.

Pjesa e BE-së në investimet e huaja direkte ka rënë me 22 për qind gjatë pesë viteve të fundit, tregojnë të dhënat e raportit.

Rregullat ligjore kombëtare “të fragmentuara” “vazhdojnë ta bëjnë të ndërlikuar dhe të kushtueshëm krijimin dhe operimin e kompanive në të gjithë BE-në, pa asnjë përparim deri më sot”, paralajmëron raporti.

“Humbja e konkurrueshmërisë së Europës është kryesisht e vetëshkaktuar”, tha Francesca Stevens, sekretare e përgjithshme e shoqatës europiane të industrisë së paketimit, Europen. “Problemi nuk janë vetëm rregulloret komplekse dhe të rënda, por edhe një ndarje e rreme ideologjike mes konkurrueshmërisë dhe qëndrueshmërisë, besimi i gabuar se njëra mund të ekzistojë pa tjetrën.”

Zyrtarët kanë sugjeruar se rënia e tregtisë mes vendeve anëtare mund t’i atribuohet luhatjeve të çmimeve të produkteve energjetike pas pushtimit të plotë të Ukrainës nga Rusia.

Grupi lobues BusinessEurope paralajmëroi se kompanitë europiane “po e shohin gjithnjë e më tërheqëse eksportimin drejt tregjeve jashtë BE-së, sesa tregtinë brenda tregut të përbashkët”.

Integrimi më i mirë i tregut të përbashkët është shndërruar në një shtyllë kryesore të përpjekjeve të Brukselit për të përmirësuar ekonominë e BE-së, përballë tarifave amerikane dhe vendeve aziatike që nënçmojnë prodhuesit europianë, të cilët përballen me kosto më të larta të energjisë dhe punësimit.

Presidentja e Komisionit, Ursula von der Leyen, publikoi verën e kaluar një strategji për tregun e përbashkët. Një “udhërrëfyes”, që premton të përcaktojë se si blloku do të arrijë integrimin e plotë deri në vitin 2028, pritet të publikohet para shtatorit.

Komisioni ka publikuar të paktën tetë strategji për tregun e përbashkët që prej vitit 2003.

BQE-ja vlerëson se kostot e fshehura të përfshira në tregtinë e mallrave brenda BE-së janë të barasvlershme me një tarifë prej 65 për qind. Ky vlerësim rritet në 100 për qind për shërbimet. / FT

The post Tregtia mes vendeve anëtare të BE-së bie për herë të parë në një dekadë appeared first on Revista Monitor.

Departamenti i Drejtësisë ka hapur një hetim penal ndaj Jerome Powell dhe Rezervës Federale, duke përshkallëzuar ndjeshëm sulmet e administratës Trump ndaj bankës qendrore të SHBA-së.

Powell tha se Departamenti i Drejtësisë i kishte dorëzuar Fed-it të premten thirrje nga një juri e madhe, duke kërcënuar me një aktakuzë penale në lidhje me dëshminë e tij përpara Komitetit Bankar të Senatit në qershor të vitit të kaluar, për rinovimet e ndërtesave historike të zyrave të Fed-it në Uashington DC.

Zyra e prokurorit federal për Distriktin e Kolumbias ka hapur një hetim penal ndaj Powell lidhur me këtë projekt dhe nëse ai ka gënjyer Kongresin për përmasat e tij.

Aleatët e Trump e akuzuan për muaj të tërë vitin e kaluar Rezervën Federale për keqmenaxhimin e rinovimeve shumëmiliardëshe.

Në një deklaratë të ashpër, Powell argumentoi se ishte kërcënuar me akuza penale sepse Rezerva Federale kishte vendosur normat e interesit “mbështetur në vlerësimin tonë më të mirë se çfarë i shërben interesit publik, dhe jo duke ndjekur preferencat e presidentit”.

Trump e ka sulmuar vazhdimisht Powell-in dhe Fed-in për refuzimin për t’iu nënshtruar kërkesave të tij për ulje të shpejta të normave të interesit, duke nisur një fushatë agresive për të kufizuar pavarësinë e kahershme të bankës qendrore dhe për të ushtruar kontroll më të madh mbi vendimmarrjen e saj.

Administrata Trump ka vendosur tashmë një aleat të afërt të presidentit në bordin e fuqishëm të guvernatorëve të Fed-it dhe ka kërkuar shkarkimin e Lisa Cook, një guvernatore e emëruar nga Joe Biden, mbi akuza të pakonfirmuara për mashtrim me kredi hipotekore.

Hetimi i zyrës së prokurorit federal, që përfshin analizën e deklaratave publike të Powell-it dhe shqyrtimin e dokumenteve të shpenzimeve, u miratua në nëntor nga prokurorja Jeanine Pirro, raportoi New York Times, duke cituar zyrtarë të njohur me situatën.

Në një deklaratë të dielën në mbrëmje, Powell këmbënguli se kërcënimi ligjor “nuk lidhet” me dëshminë e tij të verës së kaluar apo me mbikëqyrjen e Kongresit ndaj Fed-it.

“Kjo ka të bëjë me faktin nëse Rezerva Federale do të jetë në gjendje të vazhdojë të përcaktojë normat e interesit mbi bazën e provave dhe kushteve ekonomike — apo nëse politika monetare do të diktohet nga presioni ose intimidimi politik,” tha ai.

“Kam shërbyer në Rezervën Federale nën katër administrata, si republikane ashtu edhe demokrate,” shtoi Powell. “Në çdo rast, i kam ushtruar detyrat e mia pa frikë apo favor politik, duke u përqendruar vetëm te mandati ynë për stabilitetin e çmimeve dhe punësimin maksimal.”

Guvernatorë nga 11 institucione nxjerrin deklaratë mbështetjeje për kryetarin e Fed nën presion

Krerët e bankave qendrore në nivel global thanë se “qëndrojnë në solidaritet të plotë” me Jay Powell, në një shfaqje të paprecedentë mbështetjeje, pasi autoritetet amerikane hapën një hetim penal ndaj kryetarit të Rezervës Federale.

Guvernatorë bankash qendrore nga 11 institucione, nxorën një deklaratë ku thuhet se ata “qëndrojnë në solidaritet të plotë me Sistemin e Rezervës Federale dhe kryetarin e tij, Jerome H. Powell”, i cili ka qenë objekt i sulmeve të përsëritura nga administrata Trump.

“Pavarësia e bankave qendrore është një gur themeli i stabilitetit të çmimeve, financiar dhe ekonomik, në interes të qytetarëve që ne u shërbejmë”, thuhet në deklaratë.

Mes nënshkruesve janë presidentja e Bankës Qendrore Europiane, Christine Lagarde, guvernatori i Bankës së Anglisë, Andrew Bailey, drejtuesi i Bankës së Kanadasë, Tiff Macklem, si dhe Pablo Hernández de Cos, drejtori i përgjithshëm i Bankës për Shlyerje Ndërkombëtare (BIS).

Lagarde nënshkroi në emër të BQE-së dhe gjithashtu në emër të 21 bankave qendrore kombëtare të Eurozonës.

Mandati i kryetarit të Fed përfundon në maj dhe ende nuk është shpallur një pasardhës nga administrata Trump. Megjithatë, Kevin Hassett, drejtor i Këshillit Kombëtar Ekonomik dhe aleat i Trump, si dhe Kevin Warsh, i cili më parë ka shërbyer në bordin e guvernatorëve të Fed, konsiderohen gjerësisht si favoritët kryesorë.

Trump po përballet me një reagim gjithnjë e më të fortë në Capitol Hill për shkak të hetimit të Departamentit të Drejtësisë, madje edhe nga brenda partisë së tij. Senatorë republikanë, përfshirë Thom Tillis nga Karolina e Veriut dhe Lisa Murkoëski nga Alaska, kanë shprehur publikisht shqetësime për rrezikun që i kanoset pavarësisë së Fed.

Financial Times raportoi të hënën se hetimi ka mobilizuar zyrtarët e Fed për t’u rezistuar sulmeve të Trump dhe se mund ta shtyjë kryetarin të qëndrojë si guvernator edhe në vitin 2028, sipas zyrtarëve.

John Williams, president i Fed të Nju Jorkut, mbrojti Powell duke e përshkruar atë si “një njeri me integritet të pametë”.

Ai paralajmëroi gjithashtu se historia ka treguar se, kur përpjekjet për të cënuar pavarësinë e bankave qendrore kanë pasur sukses, kjo ka çuar shpesh në “pasoja ekonomike shumë fatkeqe”.

Nënshkruesit e tjerë të letrës së së martës ishin drejtuesit e bankave qendrore të Suedisë, Danimarkës, Zvicrës, Koresë së Jugut, Australisë dhe Brazilit. François Villeroy de Galhau, drejtues i Banque de France, nënshkroi në cilësinë e tij si kryetar i bordit të BIS. / FT

Ish-kryetarë të FED dënojnë hetimin penal ndaj Jerome Powell

The post Hetim penal ndaj kreut të FED, krerët e bankave qendrore në mbështetje të Powell appeared first on Revista Monitor.

Games Workshop ka vendosur të ndalojë përdorimin e inteligjencës artificiale (IA) nga punonjësit e saj në krijimin e përmbajtjes dhe dizajnit, si pjesë e përpjekjeve për të mbrojtur pronësinë intelektuale të saj dhe për të ruajtur vlerën e krijuesve njerëzorë. Kompania, e njohur për lojërat dhe miniaturat “Warhammer”, deklaroi se, edhe pse disa menaxherë të lartë do të vazhdojnë të testojnë teknologjinë e IA-së, përdorimi i saj është i ndaluar në punët e zakonshme të dizajnit dhe konkurrencat e brendshme.

CEO-ja Kevin Rountree tha se udhëheqja nuk është entuziaste për IA-në dhe theksoi që kompania po ndjek një qasje shumë të kujdesshme. Në vend që të investojë në algoritme, Games Workshop ka zgjedhur të investojë në njerëz. Kompania ka shtuar numrin e artistëve, shkrimtarëve dhe skulptorëve, duke e parë këtë si një avantazh konkurrues afatgjatë. Mesazhi është i qartë: vlera e markës nuk qëndron vetëm te produkti, por te dora dhe mendja që e krijon atë.

Në thelb, kjo do të thotë se përdorimi i mjeteve ose asistentëve të IA-së për të krijuar skica, ilustrime ose modele për projektet zyrtare të firmës është i ndaluar, me qëllimin që puna krijuese të mbetet kryesisht e njerëzve dhe për të shmangur rrezikun e cenimit të pronës intelektuale.

Ky qëndrim e vendos Games Workshop në një debat më të gjerë që po zhvillohet globalisht mbi rolin e inteligjencës artificiale në industritë krijuese. Ndërsa disa kompani e shohin IA-në si një mënyrë për të ulur kostot dhe për të rritur shpejtësinë e prodhimit, të tjera, si Games Workshop, po e shohin atë si një sfidë për autenticitetin, identitetin dhe besueshmërinë afatgjatë të markës./ FT

The post Games Workshop ndalon përdorimin e IA-së në dizajnet e veta appeared first on Revista Monitor.

Inteligjenca artificiale (IA) po bëhet gjithnjë e më e pranishme në botën e biznesit, me gjithnjë e më shumë blerës që përdorin këtë teknologji për të orientuar blerjet e tyre. Por çfarë do të thotë kjo për të ardhmen e tregtisë?

Përhapja më e gjerë e IA po detyron një sërë sektorësh të kalojnë në një tranzicion të shpejtë, dhe blerjet nuk bëjnë përjashtim.

Një e katërta e konsumatorëve përdorën mjete blerjeje me inteligjencë artificiale gjeneruese në vitin 2025 dhe edhe 31% të tjerë planifikojnë t’i adoptojnë ato në të ardhmen.

Kjo sipas një raporti të ri nga kompania e transformimit të biznesit Capgemini, i bazuar në përgjigje të konsumatorëve në nivel global dhe intervista me drejtues të sektorit të shitjes me pakicë.

“Markat duhet të shkojnë përtej optimizimit për kërkimin dhe të kalojnë te optimizimi për përzgjedhjen”, tha Dreen Yang, zëvendëspresidente ekzekutive dhe drejtuese globale për produktet e konsumit dhe shitjen me pakicë në Capgemini. “Suksesi varet gjithnjë e më shumë i përzgjedhjes nga algoritmet, jo vetëm nga gjetja nga konsumatorët.”

Në praktikë, blerësit mund ta përdorin IA në mënyra të ndryshme, qoftë duke bërë blerje drejtpërdrejt përmes një chatbot-i, duke përdorur algoritme për këshilla, ose duke lejuar një asistent virtual të shpenzojë para në emër të tyre.

Vitin e kaluar, për shembull, OpenAI njoftoi se do t’u lejonte përdoruesve në SHBA të blinin produkte nga Etsy, Shopify dhe Walmart përmes ChatGPT.

Kompani të tjera, si Amazon, janë treguar më hezituese, duke bllokuar crawler-at e OpenAI dhe duke kufizuar kështu aksesin në listat e produkteve të saj.

Duke u përqendruar në ambiciet e veta për IA, Amazon shpreson të ruajë kontrollin mbi tregun e reklamimit në tregtinë elektronike.

Sipas Capgemini, 63% e konsumatorëve të anketuar duan që inteligjenca artificiale gjeneruese të ofrojë përmbajtje blerjeje hiper-të personalizuar, megjithëse shqetësimet rreth kësaj teknologjie mbeten.

Për shembull, 71% e të anketuarve thanë se ishin të shqetësuar për mënyrën se si IA gjeneruese përdor informacionin e tyre.

Dëshira për ndihmë njerëzore mbetet gjithashtu e fortë, me 66% të të anketuarve që vlerësojnë mbështetjen njerëzore në momentin e blerjes.

Kjo do të thotë se markat duhet të ofrojnë “një përzierje të balancuar mes komoditetit dixhital dhe mbështetjes njerëzore”, tha Capgemini.

Në veçanti, chatbot-ët e  ndihmës në faqet e kompanive, të menduar për të ofruar mbështetje të menjëhershme 24/7, rezultuan relativisht jopopullorë, duke kënaqur vetëm 57% të të anketuarve.

T’u bësh përshtypje robotëve

Sipas raportit, shitësit me pakicë duhet të përshtaten me epokën e re të blerjeve ose rrezikojnë të mbeten pas.

Për të përmirësuar shikueshmërinë dhe rekomandimin nga botët e IA, kompanitë duhet të ofrojnë të dhëna të lexueshme nga makinat, të përditësuara vazhdimisht dhe të pasuruara me atribute të produkteve. Kjo i mundëson teknologjisë të interpretojë, shfaqë dhe rekomandojë produkte në kohë reale.

Mjetet e IA kanë më shumë gjasa të rekomandojnë kompani që ofrojnë kontekst të detajuar rreth produkteve të tyre, pasi për botët është më e lehtë të kuptojnë se për kë është një artikull dhe pse është i përshtatshëm.

Burime të palëve të treta, si vlerësimet dhe komentet, kanë gjithashtu rëndësi, tha Capgemini, pasi ato ndikojnë në mënyrën se si modelet e mëdha gjuhësore përshkruajnë produktet ose markën.

Duke parë përpara, popullariteti i vazhdueshëm i blerjeve përmes chatbot-ëve varet, megjithatë, nga një sërë faktorësh. Një pyetje kyçe lidhet me oreksin e kompanive të IA për reklama.

Nëse asistentët e blerjeve mbushen me reklama, është e mundur që besimi i konsumatorëve te rekomandimet e tyre të bjerë.

Të përfshihesh në tranzicion

Kur bëhet fjalë për ofertat e veta të IA, është e rëndësishme që kompanitë ta përshtatin teknologjinë me preferencat e konsumatorëve, tha Capgemini.

Me fjalë të tjera, markat që dallohen janë ato që ofrojnë përvoja të larmishme blerjeje përmes një ndërfaqeje të vetme.

Disa përdorues pëlqejnë të eksplorojnë vetë, ndërsa të tjerë preferojnë rekomandime hap pas hapi, të dyja mund të përmbushen duke përdorur mjete IA.

Transparenca dhe kontrolli mbi këtë teknologji janë gjithashtu thelbësore, thuhet në raport. Shumica e blerësve duan të vendosin kufij të rreptë për asistentët dixhitalë, si kufij shpenzimesh, dhe 63% duan të miratojnë ose refuzojnë blerjet e nisura nga IA.

Një tjetër 67% duan që markat të etiketojnë reklamat dhe përmbajtjen e gjeneruar nga IA, duke nënvizuar dëshirën për kontroll njerëzor në çdo hap. / Euronews, Shqip.al

The post Një epokë e re e blerjeve me IA: Si zgjidhen markat nga algoritmet appeared first on Revista Monitor.

Tregtia e jashtme e Kosovës në vitin 2025 arriti nivele të larta – me 7 miliardë euro importe dhe 859 milionë euro eksporte. Shqipëria dhe Gjermania mbeten partnerët kryesorë tregtarë të vendit.

Tregtia e jashtme e Kosovës gjatë vitit 2025 ka arritur shifra të larta, me gjithsej 7 miliardë euro importe dhe 859 milionë euro eksporte, sipas të dhënave të Doganës së Kosovës të publikuara nga Instituti GAP.

Në anën e eksporteve, Kosova ka shitur mallra në vlerë prej 859 milionë eurosh, ku Shqipëria renditet si partnerja kryesore me 159 milionë euro.

Pas saj vjen Maqedonia e Veriut me 137 milionë euro, ndërsa Gjermania zë vendin e tretë me 102 milionë euro.

Në pesëshen e parë përfshihen edhe Zvicra me 95 milionë euro dhe Serbia me 61 milionë euro, ndërsa pjesa tjetër e dhjetëshes plotësohet nga Mali i Zi, Turqia, Italia, Shtetet e Bashkuara të Amerikës dhe Franca.

Këto të dhëna tregojnë se tregjet e rajonit, veçanërisht Shqipëria dhe Maqedonia e Veriut, mbeten destinacionet më të rëndësishme për produktet kosovare, ndërsa eksportet drejt Gjermanisë dhe Zvicrës po rriten me ritëm të qëndrueshëm.

Në anën tjetër, importet e Kosovës për vitin 2025 arritën në 7 miliardë euro, me Gjermaninë që këtë vit del në krye të listës me 1 miliard euro mallra të importuara.

Në vendin e dytë është Turqia me 929 milionë euro, e ndjekur nga Kina me 920 milionë euro.

Më pas vijnë Italia (368 milionë euro), Maqedonia e Veriut (350 milionë euro) dhe Shqipëria (286 milionë euro).

Në dhjetëshen e parë përfshihen gjithashtu Greqia, Polonia, Serbia dhe India, me vlera që variojnë nga 279 deri në 185 milionë euro.

Sipas analizës së Institutit GAP, struktura e partnerëve tregtarë mbetet e ngjashme me vitet e kaluara, por me disa ndryshime në renditje – ku Gjermania ka marrë pozitën e parë në importe, ndërsa Shqipëria vazhdon të kryesojë në eksporte.

Këto të dhëna pasqyrojnë varësinë e lartë të ekonomisë së Kosovës nga importet, por edhe rritjen graduale të eksporteve drejt vendeve të rajonit dhe Bashkimit Evropian.

Eksportet e Kosovës gjatë vitit 2025 arritën në gjithsej 859 milionë euro, duke shënuar një rritje të lehtë krahasuar me vitet paraprake.

Në krye të listës së partnerëve më të mëdhenj tregtarë të vendit renditet Shqipëria, me vlerë eksportesh prej 159 milionë eurosh, duke e ruajtur pozitën e parë nga viti 2024.

Eksportet – gjithsej 859 milionë €

Shqipëria – 159 mln €

Maqedonia e Veriut – 137 mln €

Gjermania – 102 mln €

Zvicra – 95 mln €

Serbia – 61 mln €

Mali i Zi – 56 mln €

Turqia – 33 mln €

Italia – 28 mln €

Shtetet e Bashkuara të Amerikës – 23 mln €

Franca – 20 mln €

Në anën tjetër, importet e Kosovës për vitin 2025 arritën në 7 miliardë euro, me Gjermaninë që këtë vit del në krye të listës me 1 miliard euro mallra të importuara.

Importet – gjithsej 7 miliardë €

Gjermania – 1 miliard €

Turqia – 929 mln €

Kina – 920 mln €

Italia – 368 mln €

Maqedonia e Veriut – 350 mln €

Shqipëria – 286 mln €

Greqia – 279 mln €

Polonia – 273 mln €

Serbia – 234 mln €

India – 185 mln €.

The post Shqipëria, destinacioni i parë i eksporteve të Kosovës appeared first on Revista Monitor.

Tre ish-drejtues të Rezervës Federale të SHBA-së kritikuan ashpër një hetim penal ndaj kryetarit aktual Jerome Powell, duke e përshkruar atë si një përpjekje për të cënuar pavarësinë e bankës qendrore.

Në një deklaratë, Janet Yellen, Ben Bernanke dhe Alan Greenspan, së bashku me 10 ish-zyrtarë të tjerë të shquar, u rreshtuan në mbështetje të Powell.

“Kështu bëhet politika monetare në vendet në zhvillim me institucione të dobëta, me pasoja jashtëzakonisht negative për inflacionin dhe funksionimin më të gjerë të ekonomive të tyre”, shkruan ish-zyrtarët.

“Kjo nuk ka vend në Shtetet e Bashkuara, forca më e madhe e të cilave është sundimi i ligjit, që është themeli i suksesit tonë ekonomik”, shtuan ata.

Veprimi i Departamentit të Drejtësisë (DoJ) vjen pas një viti sulmesh të pandërprera ndaj Powell nga presidenti i SHBA-së, Donald Trump.

Përveç kritikave ndaj vendimeve të Powell për normat e interesit, Trump ka ndërmarrë edhe sulme personale. Presidenti tha se nuk “dinte asgjë” për hetimin.

Hetimi i DoJ u bë publik për herë të parë nga vetë Powell në një deklaratë me video të paplanifikuar të dielën. Ai tha se Departamenti i Drejtësisë kishte kërcënuar me një padi penale për shkak të dëshmisë që ai kishte dhënë vitin e kaluar përpara një komisioni të Senatit, lidhur me rinovimet e ndërtesave të Rezervës Federale.

Powell e quajti hetimin “të paprecedent” dhe tha se besonte se ai buronte nga zemërimi i Trump që Fed nuk i kishte ulur normat e interesit më shpejt.

“Kërcënimi i ri nuk ka të bëjë me dëshminë time në qershorin e kaluar apo me rinovimin e ndërtesave të Rezervës Federale”, tha Powell. “Këto janë pretekste.”

Banka qendrore uli objektivin për normën e saj kryesore të kreditimit tri herë në gjysmën e dytë të vitit 2025, duke e çuar atë në një interval prej 3.50% deri në 3.75%, niveli më i ulët në tre vjet. Por Trump ka thënë vazhdimisht se banka qendrore nuk i ka ulur normat e interesit aq shumë sa ai do të donte.

Hetimi i DoJ “duhet parë në kontekstin më të gjerë të kërcënimeve të administratës dhe presionit të vazhdueshëm”, tha Powell në deklaratën e tij.

Dënimi publik i së hënës ndaj veprimit të DoJ është nënshkruar nga ish-zyrtarë federalë të emëruar si nga presidentë demokratë ashtu edhe republikanë.

Kur u pyet nga Fox News të hënën për pavarësinë e Fed, zëdhënësja e Shtëpisë së Bardhë, Karoline Leavitt, ia kaloi çështjen Departamentit të Drejtësisë.

“Jerome Powell ka provuar se nuk është i zoti në punën e tij”, tha Leavitt. “Sa i përket nëse është apo jo kriminel, kjo është një përgjigje që Departamenti i Drejtësisë do të duhet ta gjejë.”

Trump i ka bërë thirrje publikisht Powell që të ulë normat e interesit për të reduktuar kostot e larta të huamarrjes së qeverisë së SHBA-së dhe për ta bërë më të lehtë për amerikanët marrjen e kredive hipotekore dhe huave të tjera.

Vitin e kaluar, ai kaloi muaj të tërë duke sulmuar Powell në rrjetet sociale dhe në deklarata për gazetarët. Ai hodhi idenë e shkarkimit të Powell, por e braktisi shpejt, gjë që, sipas analistëve, do të trondiste tregjet financiare dhe do të nxiste një betejë ligjore.

Yellen, e cila shërbeu si kryetare e Fed për një vit gjatë mandatit të parë të Trump përpara se të zëvendësohej nga Powell, tha në komente të ndara se hetimi ishte “jashtëzakonisht frikësues”.

“Duke e njohur Powell aq mirë sa e njoh, shanset që ai të ketë gënjyer janë zero, ndaj besoj se po e ndjekin sepse duan postin e tij dhe duan ta largojnë.”

Ajo sugjeroi se investitorët duhet të jenë të shqetësuar për këtë zhvillim.

Trump pritet të emërojë dikë në javët në vijim për të zëvendësuar Powell, mandati i të cilit si kryetar i Fed përfundon në maj.

Por hetimi i Departamentit të Drejtësisë dhe reagimi i mëpasshëm mund të prishin procesin e konfirmimit.

Senatori i Karolinës së Veriut, Thom Tillis, një republikan dhe anëtar i Komisionit Bankar të Senatit, tha se do ta kundërshtonte emërimin nga Trump të pasardhësit të Powell, si dhe çdo kandidati tjetër për Bordin e Fed, derisa çështja të “zgjidhet plotësisht”.

Reagimi fillestar në tregjet amerikane të aksioneve ishte i zbehtë. Indeksi S&P 500 ishte afërsisht i pandryshuar në tregtimin e orëve të para të pasdites, një kontrast i dukshëm me vitin e kaluar, kur tregjet u tronditën nga kërcënimet e perceptuara ndaj pavarësisë së Fed.

Edhe tregjet globale u treguan “jashtëzakonisht rezistente” të hënën, tha Danni Hewson, drejtuese e analizës financiare në AJ Bell. Ajo vuri në dukje se, pavarësisht qetësisë së përgjithshme, aksionet financiare ranë, teksa investitorët peshuan efektet e një tavani të mundshëm prej 10% për normat e interesit të kartave të kreditit.

Sidoqoftë, analistët thanë se reagimi i tregjeve mund të përshkallëzohet nëse Trump do të arrinte të ndikonte politikën e Fed.

Edhe disa ligjvënës republikanë ngritën shqetësime për mënyrën se si hetimi i Departamentit të Drejtësisë mund të ndikojë punën e Fed.

Përfaqësuesi French Hill, kryetari republikan i Komisionit të Shërbimeve Financiare në Dhomën e Përfaqësuesve, tha në një deklaratë se hetimi po shkaktonte një “shpërqendrim të panevojshëm” dhe se mund të “cënonte aftësinë e kësaj administrate dhe atyre që do të vijnë për të marrë vendime të shëndosha të politikës monetare”.

Senatori Kevin Cramer, një republikan dhe anëtar i Komisionit Bankar të Senatit, e kritikoi Powell në një deklaratë, por shtoi: “Megjithatë, nuk besoj se ai është kriminel. Shpresoj që ky hetim penal të mund të mbyllet.” / BBC

The post Ish-kryetarë të FED dënojnë hetimin penal ndaj Jerome Powell appeared first on Revista Monitor.

Pas pezullimit të një procedure me fond limit 412 milionë lekë apo rreth 4.1 milionë euro e përbërë nga dy lote që parashikojnë shërbimin e gatimit dhe shpërndarjes së ushqimit për dy spitale në vend, Komisioni i Prokurimit Publik hoqi këtë masë.

Në dy vendime të ndara ku trajtohet secili lot, KPP njoftoi se nga ana e autoritetit kontraktor në këtë rast Operatori i Blerjeve të Përqendruara është bërë rivlerësimi i procedurës sipas udhëzimeve që janë dhënë më herët pas ankimimit të bërë në këtë institucion.

Më herët procedura e çelur në qershor dhe e mbyllur në shtator u ankimua nga një operator në KPP.

Ky i fundit në 19 dhjetor të vitit të shkuar kërkoi që autoriteti kontraktor të kryente rivlerësim të procedurës së prokurimit objekt ankimi, në përputhje me konstatimet e vendimit si dhe brenda 5 ditëve të vërë në dijeni Komisionin e Prokurimit Publik për zbatimin e vendimit, duke dokumentuar veprimet e kryer.

Tashmë autoriteti është lejuar të vijojë me hallkat e tjera të procedurës për nënshkrimin e kontratës me operatorin fitues.

Tenderi

Më herët referuar dokumenteve shërbimi i catering-ut për spitalet duhet të ofrohet me disa dieta specifike dhe gjatë 24 orëve të ditës.

“Ky shërbim është i domosdoshëm të zhvillohet në një format që siguron furnizimin e ushqimit 24 orë në ditë, 7 ditë në javë. Spitali Universitar Obstetrik-Gjinekologjik ‘Mbretëresha Geraldine’ ofron shërbime të vazhdueshme për pacientët, duke përfshirë repartet e urgjencës, lindjes, kirurgjisë dhe kujdesit intensiv, si dhe shërbime të tjera ku nevojat ushqimore janë specifike dhe kërkojnë përkujdesje të veçantë.

Ushqimi duhet të jetë i gatshëm në çdo moment të ditës dhe natës për të siguruar ushqim të përshtatshëm për pacientët në kushte emergjente apo të tjera specifike mjekësore,” thuhet në dokumente.

Dietat që duhet të ofrohen janë të paktën gjashtë: normale, hidrike B1 post-intervent, pa gluten, diabetike, hiponatrike dhe onkologjike. Për secilën dietë përcaktohet numri i racioneve mujore, i cili ndryshon nga një grup tek tjetri.

Në total, për 48 muaj, parashikohen 132,000 racione për dietën normale dhe 13,000 për dietat mjekësore, ndërsa dietat e tjera kanë numër më të vogël racionesh.

Për Spitalin e Traumës, numri i racioneve për dietën normale që dominon llogaritet në 108,000 për 48 muaj, me më pak për dietat e tjera sipas specifikimeve.

The post KPP heq pezullimin për tenderin 4.1 mln euro të ushqimit te Trauma dhe “Mbretëresha Geraldinë” appeared first on Revista Monitor.

Flet Anxhela Brahimaj, Menaxhere e Përgjithshme e EMANTE sh.p.k.

Në një industri ndërtimi që po transformohet nga teknologjia dhe kërkesat për efikasitet, EMANTE sh.p.k. po ndërton prej dy dekadash një model modern prodhimi dhe realizimi industrial, me ambicie që shkojnë përtej tregut vendas. Me fokus në panelet sanduiç, ndërtesat modulare dhe strukturat metalike, kompania ka krijuar një identitet të fortë si ofruese zgjidhjesh të shpejta, funksionale dhe të certifikuara për projekte industriale, logjistike dhe infrastrukturore.

Falë linjave të automatizuara të prodhimit dhe kontrollit rigoroz të cilësisë, EMANTE garanton produkte me performancë të lartë teknike, izolim termik dhe akustik superior dhe eficiencë energjetike – elementë kyç që e diferencojnë ndërtimin inovativ nga ai tradicional. Certifikimet ndërkombëtare CE dhe ISO, së bashku me laboratorin e brendshëm të testimit, përforcojnë besueshmërinë e markës “Made in Albania” në tregje konkurruese.

Portofoli i kompanisë po zgjerohet me shpejtësi drejt paneleve frigoriferike, sistemeve kundër zjarrit dhe strukturave për parqe fotovoltaike, një segment strategjik që reflekton orientimin e EMANTE drejt energjisë së rinovueshme. Strukturat ground mount për sistemet diellore, të realizuara me çelik Magnelis®, ofrojnë qëndrueshmëri afatgjatë, rezistencë ndaj korrozionit dhe fleksibilitet maksimal në terrene të ndryshme.

E udhëhequr nga një vizion modern menaxherial dhe filozofia “cilësi, shpejtësi dhe kapacitet”, EMANTE sh.p.k. po konsolidohet si një partner i besueshëm për projekte të personalizuara dhe si një emër gjithnjë e më prezent në tregjet europiane, aty ku standardet e larta dhe aftësia për të eksportuar bëjnë diferencën.

Anxhela Brahimaj, Menaxhere e Përgjithshme e EMANTE sh.p.k., ndan për “Monitor” pikëpamjen e saj mbi zhvillimin e kompanisë, dallimet mes ndërtimit inovativ dhe atij tradicional, sfidat e tregut, si edhe rrugëtimin e saj personal në një industri që vijon të dominohet kryesisht nga meshkujt.

Një kompani me fokus në prodhimin dhe ndërtimin modern

EMANTE sh.p.k. operon në treg prej rreth 20 vitesh, duke u pozicionuar kryesisht në sektorin e prodhimit industrial. Produkti kryesor i kompanisë janë panelet sanduiç, të përdorura gjerësisht në ndërtimin e kapanoneve industriale, zyrave, parqeve logjistike dhe strukturave të ndryshme funksionale.

Përveç paneleve sanduiç, kompania prodhon ndërtesa modulare, zona strehimi dhe struktura të ndryshme të përkohshme apo të përhershme, si dhe aksesorë metalikë për struktura të plota metalike. Një drejtim i rëndësishëm i zgjerimit të aktivitetit lidhet edhe me prodhimin e strukturave për bazamentet e parqeve fotovoltaike, në përputhje me rritjen e interesit për energjinë e rinovueshme.

Ndërtimi inovativ përballë atij tradicional

Ndërtimi inovativ diferencohet nga ai tradicional kryesisht përmes shpejtësisë së realizimit, efikasitetit dhe performancës teknike. Panelet sanduiç prodhohen dhe montohen në një kohë shumë më të shkurtër krahasuar me materialet tradicionale si tulla apo betoni, duke u kthyer në një zgjidhje optimale për projektet industriale dhe logjistike.

Një tjetër avantazh i rëndësishëm është izolimi termik dhe akustik, falë strukturës së paneleve me dy fletë çeliku dhe shkumë poliuretani në mes, çka rrit ndjeshëm komfortin dhe eficiencën energjetike të ndërtesave.

Teknologjia dhe kontrolli i cilësisë

EMANTE sh.p.k. ka investuar vazhdimisht në linja prodhimi të automatizuara, duke minimizuar ndërhyrjen njerëzore dhe duke garantuar standarde të larta saktësie. Përballë paragjykimeve që shpesh shoqërojnë produktet “Made in Albania”, kompania përgjigjet me kontroll rigoroz të cilësisë, përdorim të lëndëve të para të certifikuara dhe pajisje me certifikime ndërkombëtare, si CE dhe ISO. Një laborator i brendshëm monitoron çdo ditë produktin final përpara daljes në treg, duke siguruar që cilësia të jetë gjithmonë në nivelin e kërkuar. Cilësia është parimi ynë bazë dhe nuk negociohet.

Produktet më të kërkuara dhe zgjerimi drejt energjisë diellore

Krahas paneleve sanduiç, të cilat mbeten produkti kryesor i kompanisë, EMANTE sh.p.k. po shënon rritje të ndjeshme të kërkesës për panelet frigoriferike, të përdorura në ndërtimin e dhomave frigoriferike dhe objekteve të magazinimit ushqimor, si dhe për panelet kundër zjarrit, të cilat ofrojnë standarde më të larta sigurie strukturore. Një tjetër drejtim strategjik me rëndësi të veçantë është ai i energjisë së rinovueshme, ku kompania zhvillon dhe prodhon struktura tokësore për sisteme fotovoltaike (Ground Mount Photovoltaic Structures). Këto struktura realizohen duke përdorur çelik Magnelis®, një material inovativ i njohur për rezistencën e lartë ndaj korrozionit dhe jetëgjatësinë në kushte të vështira mjedisore.

Personalizimi dhe marrëdhënia me klientët

Një nga pikat dalluese të EMANTE sh.p.k. është personalizimi i plotë i produkteve, duke iu përshtatur kërkesave specifike të çdo klienti  që nga trashësia dhe ngjyrat e paneleve, deri te zgjidhjet teknike sipas projektit. Po aq i rëndësishëm konsiderohet edhe suporti pas shitjes, i cili shihet si pjesë integrale e shërbimit.

Rrugëtimi personal dhe vizion ndërkombëtar

E rritur në një familje ku puna dhe përkushtimi kanë qenë vlera themelore, Anxhela Brahimaj është formuar profesionalisht që herët brenda kompanisë familjare. Studimet për menaxhim ndërkombëtar në Vjenë dhe specializimi në marketing digjital kanë ndikuar në ndërtimin e një qasjeje moderne ndaj drejtimit të biznesit.

Filozofia e EMANTE sh.p.k. përmblidhet në tre fjalë: cilësi, shpejtësi dhe kapacitet – një kombinim që ka shërbyer si bazë për rritjen e qëndrueshme të kompanisë dhe për forcimin e konkurrueshmërisë në tregun global, në një industri ku aftësia për të eksportuar dhe për të respektuar standarde ndërkombëtare është vendimtare.

The post Inovacioni që po transformon ndërtimin drejt eksportit appeared first on Revista Monitor.

Viti 2025 është mbyllur me të paktën 28 njoftime për revokim lejesh minerare nga ana e Ministrisë së Infrastrukturës dhe Energjisë.

Pjesa më e madhe e tyre u lëshua gjatë shtatorit por ndërkohë edhe në fundvit me firmën e ministres janë lëshuar dy njoftime të reja për dy subjekte njëri në Bytyç Bashkia e Tropojës për shkak se subjekti nuk kishte respektuar pagesën e garancisë financiare për rehabilitimin.

Njoftimi tjetër lidhej me një arsye krejt të ndryshme ku sipas shkresës “është propozuar revokimi i Lejes Minerare për mineralin gur gëlqeror, në Objektin “Brataj”, Bashkia Selenicë, subjekti nuk ka filluar aktivitetin minerar brenda 180 ditëve nga hyrja në fuqi e lejes”.

Më herët në shtator MIE njoftoi revokimin në grup të 11 lejeve ku dominonte kryesisht mungesa e aktivitetit minerar për një kohë të konsiderueshme. Pra subjektet që janë mbajtës të këtyre lejeve minerare kanë pushuar aktivitetin në minierë për më shumë se një vit. Kjo në fakt është arsyeja dominuese në rastet e fundit.

Për disa raste të tjera duket se shkak është bërë mospërmbushja e planeve të investimit që kompanitë që kanë përfituar lejet kanë premtuar se do të bënin në këto miniera. Lejet minerare të revokuara së fundmi janë për miniera në Bulqizë, Kukës, Librazhd, Lezhë, Përrenjas.

Më herët gjatë këtij viti Ministria revokoi disa lejë për shkak se kompanitë nuk kishin bërë pagesat e garancisë financiare për rehabilitimin për vitin 2024.

Kjo pagesë sanksionohet me ligj dhe duhet të paguhet çdo vit nga ana e kompanive që zotërojnë një leje minerare mbi një zonë të caktuar. Kjo shumë parash që duhet të sigurohet nga kompania në mënyrë që të përdoret për të kthyer në gjendjen e mëparshme terrenin.

Më herët në një strategji të nxjerrë për konsultim lidhur me sektorin minerar qeveria ka vënë theksin tek nevoja për një Fond Kombëtar që ka në vëmendje minierat ku sidomos ato të vjetra mbeten jashtë mbulimit sa i takon rehabilitimit mjedisor.

“Kontrolli teknik dhe mbikëqyrja institucionale mbetet e fragmentuar, pa një Fond Kombëtar për rehabilitimin mjedisor, ndërsa operatorët zbatojnë detyrimet vetëm në kuadër të projekteve të reja, duke lënë zonat e vjetra të paprekura.

Plani i monitorimit të AKBN dhe MIE targeton vetëm minierat aktive, ndërsa ndotjet historike apo zonat me leje të revokuara mbeten jashtë mbulimit të plotë” thuhet në këtë strategji e cila parashikon edhe një seri masash që duhet të ndërmerren./ N.Maho

The post Revokimi i lejeve minerare, MIE mori masa për 28 subjekte gjatë 2025-ës appeared first on Revista Monitor.