Trajneri gjerman Hansi Flick ka humbur besimin te Ronald Araujo dhe ka kërkuar që klubi të shqyrtojë largimin e tij në afatin kalimtar të ardhshëm.

Sipas stafit teknik, qendërmbrojtësi uruguaian nuk ka arritur nivelin e pritur pas rikthimit në fushë, ndërsa mungesat e shpeshta dhe pasiguria në lojë kanë ndikuar negativisht në vlerësimin e tij.

Edhe pse presidenti Joan Laporta ishte i prirur të tregonte durim, qëndrimi i Flick dhe i drejtorit sportiv Deco është i prerë.

Brenda klubit konsiderohet se cikli i Araujos ka përfunduar dhe se largimi i tij është i nevojshëm për të liruar hapësirë financiare dhe për të rindërtuar repartin defensiv me profile më të besueshme.

Performancat e fundit të uruguaianit, veçanërisht në ndeshjet e rëndësishme si finalja e Superkupës ndaj Real Madridit, kanë forcuar dyshimet e trajnerit.

Flick vlerëson se lojtari nuk arriti të marrë rolin e liderit në mungesë të Inigo Martinez dhe nuk ofroi sigurinë e kërkuar në momente vendimtare.

Nga ana ekonomike, vlera e tregut e Araujos ka pësuar rënie të ndjeshme dhe një transferim i mundshëm vlerësohet rreth 25–30 milionë euro.

Deco beson se mbajtja e tij vetëm sa do të ulte më tej këtë vlerë, ndaj klubi është i hapur për oferta konkrete në verë.

Ndërkohë, Barcelona ka nisur kërkimet për një qendërmbrojtës modern, të shpejtë dhe me dalje të mirë të topit, në përputhje me kërkesat e Flick.

Largimi i Araujos shihet si hapi i parë i një ristrukturimi më të gjerë, me synimin për ta bërë skuadrën më konkurruese në arenën evropiane. /Telegrafi/

Presidenti i Barcelonës Joan Laporta, dhe legjenda e klubit, Deco, kanë pasur prej muajsh në shënjestër mesfushorin portugez Bernardo Silva, dhe tashmë duket se mund ta konkretizojnë transferimin.

Silva pritet të jetë përforcimi i parë i blaugranave për sezonin e ardhshëm, duke ardhur me statusin e lojtarit të lirë, pasi kontrata e tij me Manchester City përfundon në fund të sezonit.

Klubi katalanas po tenton të arrijë një marrëveshje në këtë afat kalimtar dimri, për të siguruar shërbimet e Silvës pa shpenzime të mëdha për transferimin.

Drejtuesit e klubit besojnë se momenti është i favorshëm: mesfushori nuk ka rinovuar kontratën, afati i kampionatit po afron dhe vullneti i lojtarit mund të jetë faktori vendimtar.

Laporta dhe Deco e kanë pasur Silvën në listën e objektivave prioritare për disa afate kalimtare, por më parë kushtet nuk kanë qenë të favorshme.

Tani situata ka ndryshuar: Man City është i vetëdijshëm se mund ta humbasë lojtarin pa përfituar asgjë, dhe Barcelona kërkon të parandalojë konkurrencën nga klubet e tjera evropiane.

Silva përputhet me profilin që kërkon stafi teknik: cilësi, përvojë në nivel të lartë dhe një kuptim të thellë të lojës, të përshtatshëm për La Ligën.

Klubi anglez nuk dëshiron të humbasë lojtarin falas, por nuk mund ta detyrojë atë të rinovojë kundër dëshirës së tij.

Për këtë arsye, Barcelona po eksploron një qasje të kujdesshme, duke tentuar të sigurojë marrëveshjen përpara verës dhe të ofrojë një destinacion tërheqës dhe konkurrues për Silvën.

Për blaugranat, ky transferim përfaqëson një mundësi strategjike.

Transferimi i Silvës falas do të forconte ekipin pa rrezikuar buxhetin, do të rrisë menjëherë konkurrencën në fushë dhe do të sjellë udhëheqje në një skuadër të re dhe ambicioze.

Bernardo Silva mund të vendosë fatin e tij para përfundimit të sezonit, dhe Barcelona synon të përfitojë nga kjo mundësi.

Nëse negociatat ecin sipas parashikimeve, portugezi mund të bëhet emri më i shquar i afatit kalimtar të ardhshëm, edhe përpara përfundimit të dimrit. /Telegrafi/

Drejtori sportiv i Barcelonës, Deco ka konfirmuar se Joao Cancelo pritet të bashkohet shumë shpejt me klubin katalunas.

Pas raportimeve se mbrojtësi portugez kishte rënë dakord për një huazim nga Al-Hilal të hënën, trajneri Hansi Flick kishte theksuar se marrëveshja ende nuk ishte mbyllur plotësisht. Megjithatë, deklaratat e fundit të Decos dhe presidentit Joan Laporta tregojnë se transferimi tashmë është në rrugën e duhur për t’u finalizuar.

Duke folur për mediat, Deco shpjegoi arsyet pse klubi vendosi të veprojë për Cancelon.

“Ne e nënshkruam Cancelon sepse është një lojtar që e rrit cilësinë e skuadrës. Në fund të fundit, ajo që ka rëndësi në afatin kalimtar të dimrit është përmirësimi. Të mbetesh i njëjti ose të përkeqësohesh nuk ka kuptim. Nuk është çështje vetëm e qendërmbrojtësve, Ronald do të rikthehet dhe trajneri e ka thënë tashmë se me të kemi një tjetër qendërmbrojtës”.

“Cancelo gjithashtu i jep mundësi Ericut të mos luajë si mbrojtës krahu, një pozicion që e ka mbuluar shpesh. Po ashtu, ai i jep mundësi Kounde të luajë në qendër në raste emergjente, duke na ofruar më shumë opsione se më parë”.

Deco shtoi gjithashtu se marrëveshja u lehtësua ndjeshëm nga disa rrethana specifike që lidhen me vetë lojtarin.

“Ai është një lojtar cilësor, i nivelit të lartë, dhe normalisht do të ishte një transferim shumë i vështirë për t’u realizuar, por pati disa rastësi të favorshme: ai nuk ishte i regjistruar, kishte një marrëveshje për t’u larguar dhe gjithmonë ka qenë i dashuruar me Barcelonën”.

“Kur të vijë, ai pranon një ulje page për shkak të tërheqjes që ka ky klub dhe sepse përshtatet me atë që ne mund të bëjmë. Siç thashë, në janar donim të rrisnim cilësinë”.

Një natë më parë, edhe presidenti Joan Laporta kishte folur për këtë marrëveshje, duke ia atribuar suksesin Decos.

“Ky është një tjetër sukses i Decos. Nënshkrimet në afatin kalimtar të dimrit nuk janë të lehta. Si lojtari ashtu edhe agjenti i tij, Jorge Mendes, bënë pjesën e tyre duke pranuar një ulje të konsiderueshme page. Hansi e ka dhënë miratimin e tij për këtë marrëveshje”./Telegrafi

Barcelona, nën drejtimin e trajnerit Hansi Flick dhe drejtorit sportiv Deco, ka përcaktuar prioritetet për afatin kalimtar të verës 2026, sipas La Vanguardia.

Prioriteti kryesor është afrimi i një mbrojtësi qendror, për shkak të problemeve të vazhdueshme me dëmtimet e Andreas Christensen dhe formës jo të qëndrueshme të Ronald Araujo.

Po ashtu, në plan është edhe zëvendësimi i Inigo Martinez, i cili u largua në drejtim të Al-Nassr.

Një tjetër fokus i rëndësishëm është përforcimi i repartit ofensiv. Pavarësisht paraqitjeve të mira të Raphinha dhe Lamine Yamal, klubi kërkon më shumë alternativa si në krahë, ashtu edhe në qendër të sulmit.

Marcus Rashford është një nga objektivat kryesorë, me Barcelonën që po shqyrton mundësinë e një transferimi të përhershëm prej rreth 30 milionë eurosh për sulmuesin anglez.

Në rast se Robert Lewandowski largohet, klubi katalanas do të synojë afrimin e një sulmuesi të nivelit të lartë për të ruajtur cilësinë e golave.

Strategjia e verës së Barcelonës parashikon një “mini-ristrukturim” të skuadrës, me synim rritjen e thellësisë së ekipit dhe konkurrueshmërisë për sezonin 2026-2027./Telegrafi/

Drejtori sportiv Deco ka mbyllur kategorikisht derën për një rikthim romantik të Lionel Messit te Barcelona, duke deklaruar se një mundësi e tillë “nuk u mor kurrë në konsideratë”, pavarësisht spekulimeve të vazhdueshme.

Në një intervistë për SER Catalunya, Deco pranoi ndikimin e përjetshëm të fituesit të tetë Topave të Artë te klubi dhe tha se është “normale” që tifozët ende thërrasin emrin e tij.

Megjithatë, ai theksoi se Messi është ende nën kontratë diku tjetër dhe se kjo çështje nuk diskutohet brenda klubit.

Ish-mesfushori portugez e përshkroi Messin si “lojtarin më të mirë në historinë e klubit”, por bëri të qartë se një marrëveshje afatshkurtër para Kupës së Botës 2026 nuk është në tryezë.

“Nuk u mor kurrë në konsideratë. Ai ka një kontratë dhe mund të japë ende diçka. Ai do të ketë ndikim përgjithmonë, por kjo nuk është diçka për të cilën flasim”.

“Për mua, ai është lojtari më i mirë në historinë e klubit. Është normale që të thirret emri i tij. Është e pamundur të mos kujtosh golat dhe lojën e Messit”, ka deklaruar Deco.

Tutje ai ka konfirmuar gjithashtu se së shpejti Barcelona do të rinovojë me Eric Garcian, një prej lojtarëve kryesor të Hansi Flick./Telegrafi/

Drejtori sportiv i Barcelonës, Deco, ka hedhur poshtë çdo mundësi për të sjellë përforcime gjatë afatit kalimtar të dimrit.

“Përforcime në janar? Është shumë e vështirë që të ndodhë diçka në tregun e dimrit. Nuk mendoj se kemi nevojë të marrim dikë me skuadrën që kemi aktualisht”, ka thënë Deco.

Së fundmi ishte raportuar se katalanasit po kërkonin një qendërmbrojtës të ri për muajin janar, por këto zëra janë shuar përfundimisht.

Trajneri Hansi Flick do të duhet të vazhdojë me eksperimentin e Gerard Martin në krahun e majtë të qendrës së mbrojtjes, përkrah Pau Cubarsit.

Martin ka shkëlqyer në këtë rol në dy ndeshjet e fundit, duke bindur stafin teknik.

Barcelona është goditur nga një numër i madh dëmtimesh këtë sezon, çka ka ndikuar edhe në luhatjet e formës.

Megjithatë, skuadra e Flick duket se po gjen ritmin, pasi ka parakaluar Real Madridin dhe ka marrë kryesimin në La Liga.

Pavarësisht mungesës së afrimeve në janar, një sulmues, një lojtar krahu i majtë dhe një qendërmbrojtës mbeten prioritetet kryesore të klubit për afatin kalimtar të verës. /Telegrafi/

Drejtori sportiv i Barcelonës, Deco, ka folur hapur për transferimin e Marcus Rashford nga Manchester United tek Barcelona, duke zbuluar prapaskenat e marrëveshjes dhe rëndësinë që sulmuesi anglez ka për projektin e klubit katalanas.

“Marcus është i lumtur me ne, ai është një futbollist fantastik. Në Manchester United mori përgjegjësi të mëdha shumë i ri, në një klub gjigant, ashtu si edhe Barcelona. Ai u përball edhe me ndryshimin e brezave te United, gjë që e bëri situatën më të vështirë”, ka thënë fillimisht Deco.

Sipas tij, vështirësitë e Manchester United në procesin e rindërtimit gjatë viteve të fundit kanë lënë ndikim edhe te Rashfordi.

“Nëse shikon United në pesë vitet e fundit, ata kanë pasur vështirësi në rindërtimin e ekipit për t’u bërë sërish të fortë. Marcus ka qenë aty gjatë gjithë kësaj periudhe, dhe kur je një lojtar kyç, presioni është i madh”.

Deco shtoi se Barcelona kishte kohë që kërkonte një profil si ai i Rashfordit.

“Ne po kërkonim një lojtar që mund të luante në të tre pozicionet e sulmit. Arritëm ta transferonim në formë huazimi falë dëshirës së tij për të ardhur te Barcelona. Ai priti gjatë, e dinte që ne po përballeshim me rregullat financiare, por tregoi durim. Jemi të lumtur që e kemi në ekip”, përfundoi Deco. /Telegrafi/

Deklarata e fundit e drejtorit sportiv të Barcelonës, Deco, tregon qartë qëndrimin realist të klubit katalanas për afatin e janarit – kujdes dhe racionalitet, më shumë sesa entuziazëm për ndryshime të mëdha.

Pas një vere të qetë dhe me lëvizje të kufizuara për shkak të problemeve financiare që vazhdojnë prej vitesh, Barcelona arriti të përforcohet vetëm me portierin Joan Garcia dhe të riun Rooney Bardghji, ndërsa Marcus Rashford u bashkua në formë huazimi, me opsion blerjeje në fund të sezonit. Këto lëvizje treguan se prioritet i klubit ishte ruajtja e stabilitetit financiar dhe jo shpenzimet e mëdha.

Në prag të afatit kalimtar të dimrit, tifozët dhe analistët kanë ngritur pyetjen nëse Barça do të jetë aktive në treg për të rregulluar ndonjë boshllëk në skuadër.

Megjithatë, Deco e bëri të qartë se çdo ndërhyrje do të ndodhë vetëm nëse paraqiten “rrethana të jashtëzakonshme”.

“Nëse gjërat ecin mirë dhe nuk ka surpriza, nuk do të ketë nevojë për ndryshime. Ne e dimë ku mund të përmirësohemi dhe çfarë na pret”, – deklaroi ai, duke theksuar se skuadra aktuale ka potencial për të konkurruar në të gjitha frontet, për sa kohë që mbetet e plotë dhe pa dëmtime.

Portugezi kujtoi edhe sfidat e sezonit të kaluar, kur mungesat në skuadër, veçanërisht në mesfushë, ndikuan dukshëm në performancat e ekipit.

“Kur dorëzohemi pak, vuajmë menjëherë. Duhet të kemi lojtarët më të mirë në dispozicion. Nuk po kërkoj justifikime, por kur nuk ke mjaftueshëm alternativa për zëvendësime, mesfusha jonë e ndjen menjëherë”, deklaroi ai.

Në thelb, mesazhi i Decos është i qartë: Barcelona nuk planifikon të bëjë ndryshime të mëdha në janar, përveç nëse ndodh diçka e paparashikuar – si ndonjë lëndim i rëndësishëm apo mundësi e jashtëzakonshme në treg. /Telegrafi/

Drejtori i Barcelonës, Deco, ka lënë mënjanë debatet rreth taktikave të Hansi Flick pas barazimit 3-3 në Champions League me Club Brugge, duke insistuar se “diskutimi mbi stilin është i parëndësishëm” dhe se skuadra duhet të mbështetet te “puna e palodhur dhe uniteti” për të kapërcyer vështirësitë aktuale.

Pavarësisht problemeve mbrojtëse të Barcelonës – shtatë gola të pësuar në katër ndeshje europiane, Deco bëri të qartë se klubi mbetet i qetë dhe i fokusuar.

“Çështja e diskutimit mbi stilin është e parëndësishme. Ne tashmë e dimë shumë mirë se ku mund të përmirësohemi dhe vështirësitë me të cilat përballemi”.

Drejtori sportiv tregoi rezistencën e sezonit të kaluar si provë se skuadra mund të rikuperojë përsëri rezultatet.

Deco dhe Hansi Flick

“Sezonin e kaluar gjithashtu kaluam momente të vështira dhe arritëm t’i kapërcejmë. Duke rikthyer lojtarët dhe duke rikuperuar formën tonë, duke qëndruar të bashkuar dhe duke punuar fort”.

“Kjo është ajo që duhet të bëjmë. Asgjë nuk mund të ndryshojë gjërat përveç punës së palodhur dhe përkushtimit”.

Seanca stërvitore u mbajt në Camp Nou, i cili është ende nën rinovim, për të familjarizuar skuadrën me shtëpinë e tyre të ardhshme.

Deco lavdëroi si transformimin e stadiumit, ashtu edhe përparimin e lojtarëve të rinj të La Masias, disa prej të cilëve ende nuk kanë luajtur një ndeshje zyrtare atje./Telegrafi/

Drejtori sportiv i Barcelonës, Deco, ka shpjeguar pse klubi vendosi të transferojë Roony Bardghji, pavarësisht rikuperimit të lojtarit nga një dëmtim serioz.

19-vjeçari, i cilësuar si “Messi suedez”, u afrua për të shtuar thellësi në skuadër pas Lamine Yamal, me Decon që krahasoi profilin e dy lojtarëve, duke theksuar se marrëveshja nuk ishte spontane, por pjesë e një procesi të gjatë vëzhgimi.

Duke folur në një intervistë të detajuar për Mundo Deportivo, drejtori sportiv konfirmoi se nënshkrimi me Bardghjin nuk ishte një vendim i nxituar.

“Roony ishte një lojtar që e kishim monitoruar prej kohësh. Ideja jonë nuk është të shkojmë në treg nëse tashmë kemi lojtarët brenda klubit. Por ne punojmë në bazë të analizës dhe jo emocioneve. Ramë dakord me trajnerin që na duhej një lojtar i ri për atë pozicion”.

“Kishim Dani Rodriguez për atë rol, por ai u dëmtua, dhe gjithsesi është një profil ndryshe nga Roony, i cili i ngjan më shumë me Lamine, pasi është lojtar që lidhet mirë me lojën”.

“E kishim ndjekur Roony edhe më parë, por ai u dëmtua dhe u rikthye në mars. Nuk kishte luajtur shumë, por ishte një lojtar me shumë talent dhe ishte një mundësi e mirë në treg”.

“E njihnim agjentin e tij, dhe siç dihet, kontrata e tij ishte drejt skadimit, kështu që marrëveshja ishte më e thjeshtë. Për më tepër, ai është vetëm 19 vjeç dhe ka shumë potencial”, ka thënë Deco./Telegrafi/

Drejtori sportiv i Barcelonës, Deco, ka zbuluar se gjatë afatit kalimtar të verës, Manchester City shprehu interes për mbrojtësin yll, Jules Kounde, por klubi katalanas refuzoi menjëherë çdo ofertë.

Në një intervistë për Mundo Deportivo, Deco konfirmoi se Man City pyeti nëse Kounde ishte i disponueshëm në treg, por Barcelona ia bëri të qartë se francezi nuk ishte për shitje.

“Manchester City na pyetën nëse Jules Kounde ishte në shitje… dhe përgjigjja ishte jo, nuk pati asnjë ofertë zyrtare apo negociata”, ka thënë Deco.

Kounde, i cili pritet të arrijë ndeshjen e tij të 150-të me Barcelonën në Ligën e Kampionëve kundër Paris Saint-Germain, ka qenë një lojtar kyç si në mbrojtje ashtu edhe në fazën sulmuese për katalanasit.

Ndryshe, Kounde u transferua te Barcelona nga Sevilla në verën e vitit 2022 për një shifër prej 50 milionë eurosh, teksa vlera e tij tani vlerësohet të jetë 65 milionë euro./Telegrafi/

Drejtori sportiv i Barcelonës, Deco, ka dhënë detaje lidhur me huazimin njësezonal të Marcus Rashford nga Manchester United, duke konfirmuar se kampionët në fuqi të La Ligës nuk do të detyrohen të paguajnë ndonjë penalizim nëse vendosin të mos e blejnë në mënyrë përhershme sulmuesin anglez verën e ardhshme.

United kanë futur një opsion blerjeje për Rashfordin në formë të mirë, por Barcelona duket se do të presë deri në fund të sezonit para se të marrë një vendim përfundimtar.

Në një intervistë për Mundo Deportivo, Deco hodhi poshtë thashethemet që Barca do të ishte e detyruar të paguante ndonjë penalizim nëse nuk do ta blinte Rashford përfundimisht.

“Ai është thjesht një huazim i thjeshtë, nuk ka asnjë penalizim, dhe nëse duam ta blejmë, kemi një opsion blerjeje. Është tepër herët për të folur për vendimet për sezonin e ardhshëm, por ajo që ka rëndësi është që jemi të kënaqur me të”.

“Ajo që mendonim se do të na sillte, ai po na e sjell. Është një lojtar i nivelit të lartë, shpërtheu shumë herët, më pas pati sezone të shkëlqyera te United, pastaj përjetoi vite më të komplikuara me ndryshime trajnerësh, dhe ndoshta pati vështirësi sepse atje kërkoheshin shumë gjëra prej tij”.

“Por jemi të kënaqur me të, kjo është gjëja më e rëndësishme. Nuk janë vendime për tani. Tani është koha të përqendrohemi te ndeshjet që vijnë. Një vendim do të merret, por nuk po diskutohet tani”.

Ai nuk dha shumë informacion për detajet e opsionit të blerjes.

“Nuk e di, shuma e blerjes nuk është shumë e lartë, por nuk duhet ta them unë gjithashtu, sepse ka një kontratë mes klubeve që duhet të diskutohet”, përfundoi ai./Telegrafi/

Drejtori sportiv i Barcelonës, Deco mohoi informacionin se klubi katalunas donte të nënshkruante me Nico Williams gjatë afatit kalimtar veror.

Saga e transferimit të Williams te Barcelona ka qenë njëra nga më të përfolurat gjatë afatit të fundit kalimtar.

Në muajin korrik, sulmuesi anësor e zgjati kontratën e tij me Athletic Bilbaon deri në vitin 2035, duke befasuar të gjithë.

Megjithatë, drejtori sportiv i Barcelonës, Deco, tashmë ka mohuar çdo interesim të klubit nga Camp Nou për lojtarin, duke thënë se agjenti i tij kërkonte transferimin.

“Ne kurrë nuk u përpoqëm ta nënshkruanim atë. Ishte agjenti i tij ai që na kontaktoi vazhdimisht, ne nuk po e ndiqnim. Është Athletic ai që duhet t'i bëjë pyetje agjentit të tij”.

“Ne as nuk po kërkonim një lojtar të profilit të tij gjatë verës", ka thënë drejtori sportiv i Barcelonës në një intervistë me Mundo Deportivo. /Telegrafi/

Më herët gjatë kësaj jave, Barcelona konfirmoi se Gavi do të mungojë për 4-5 muaj pas një operacioni në gjurin e djathtë. Kjo mungesë afatgjate e mesfushorit përbën një goditje të madhe për katalanasit, duke dobësuar një zonë ku tashmë ekzistonin shqetësime për thellësinë e skuadrës.

Para konfirmimit të lëndimit të Gavit, Barcelona kishte në dispozicion Pedri, Frenkie de Jong, Marc Casado dhe Marc Bernal si opsione në mesfushën mbrojtëse. Megjithatë, Bernal nuk konsiderohet ende gati për të startuar ndeshje, pasi po rikuperohet nga një mungesë afatgjatë e tij.

Kjo do të thotë se Hansi Flick ka në dispozicion vetëm Pedri, de Jong dhe Casado si fundor për një kalendar të ngjeshur ndeshjesh në javët e ardhshme, gjë që nuk është ideale. Si pasojë, është përfolur mundësia që Barcelona të kërkojë një zëvendësim të menjëhershëm për Gavin.

Gavi telegrafi.com

Sidoqoftë, sipas Marca, klubi nuk ka plane për të nënshkruar një zëvendësim. Sipas raportit, as klubi dhe as Flick nuk duan të nënshkruajnë thjesht për të nënshkruar, duke besuar gjithashtu se nuk ka kandidatë të mirë e të lirë në tregun e transferimeve.

Ndërkohë që klubi pret rikthimin e Bernal në formë optimale, Flick mund të konsiderojë Eric Garcia si një zgjidhje e përkohshme në mesfushën mbrojtëse. Mbrojtësi ka mbuluar këtë pozicion disa herë sezonin e kaluar, prandaj mund të përdoret përsëri, veçanërisht duke marrë parasysh se Jules Kounde ka rikuperuar vendin e tij në të djathtën e mbrojtjes, ndërsa Pau Cubarsi, Ronald Araujo dhe Andreas Christensen mund të mbulojnë qendrën e mbrojtjes.

Deco e Flick

Mbetet për t’u parë se si do të menaxhojë Flick këtë situatë në javët e ardhshme, por është e qartë se mungesa e Gavit për një periudhë të gjatë është një sfidë e konsiderueshme për Barcelonën. /Telegrafi/

Barcelona është vazhdimisht në një gjendje pasigurie në lidhje me planet e saj të transferimeve, duke pasur parasysh problemet e vazhdueshme me limitin e pagave.

Blaugranët shpresojnë që një rikthim në Camp Nou dhe qartësimi mbi qiranë e vendeve VIP prej 100 milionë eurosh do të ndihmojnë në zgjidhjen e kësaj çështjeje, por planifikimi për të ardhmen duhet të vazhdojë pavarësisht kësaj.

Është e qartë se kapaciteti i tyre për të shpenzuar, dhe në fakt për të regjistruar lojtarë, do të ketë një ndikim vendimtar në këto plane, por Drejtori i Futbollit, Deco, aktualisht po punon për të përforcuar dy pozicione për verën e vitit 2026. Blaugranët, përveç ndonjë dëmtimi serioz, nuk ka gjasa të jenë aktivë në janar.

Nuk është sekret që Barcelona ka të ngjarë të ketë një boshllëk në sulmin e saj sezonin e ardhshëm, si ai i Robert Lewandowskit. 37-vjeçarit i skadon kontrata verën e ardhshme dhe besohet se ky do të jetë viti i tij i fundit në klub, me Barçën që ngurron të investojë shuma të mëdha parash për një lojtar që mbush 38 vjeç gushtin e ardhshëm. Ndërsa Ferran Torres ka qenë mirë si zëvendësues, Lewa është i vetmi numër nëntë klasik.

Sipas The Athletic, ky është një nga fokuset kryesore të Deco për sezonin e ardhshëm, dhe vihet re se Presidenti Joan Laporta është një tifoz i madh i Julian Alvarez të Atletico Madrid.

Syri i tij për gol, shpejtësia e punës dhe aftësia për të luajtur në të gjithë fushën janë të gjitha përparësi në favor të tij, megjithëse çmimi i tij i mundshëm e bën të vështirë çdo marrëveshje.

Pasi një transferim për Jonathan Tah nuk u realizua dhe largimi surprizë i Inigo Martinez ndodhi, përparësia tjetër e Decos është qendra e mbrojtjes.

Qendërmbrojtësi i Sporting Lisbonës dhe reprezentuesi i Portugalisë, Goncalo Inacio, përmendet si një emër që u pëlqen, por vihet re se një transferim për lojtarët në të dyja pozicionet varet nga rrethanat dhe se si do të përparojë sezoni.

U raportua pothuajse unanimisht se Barcelona po kërkonte të nënshkruante një mbrojtës të djathtë deri në prill të këtij viti, si dhe një sulmues të krahut të majtë.

Ndërsa Marcus Rashford ka mbërritur, klubi vendosi pas formës së mirë në fund të sezonit nga Eric Garcia të përqendrojë financat e tyre në fusha të tjera. /Telegrafi/

Drejtori sportiv i Barcelonës, Deco, ka folur hapur për ambiciet e klubit katalanas në sezonin 2025-26, duke pranuar se rruga drejt suksesit në Ligën e Kampionëve është më e vështirë se kurrë.

Barcelona e nisi me hap pozitiv aventurën në kompeticionin më të rëndësishëm me një triumf 1:2 në udhëtim te Newcastle Utd.

Ndërkohë, Deco në një intervistë për gazetën braziliane Lance deklaroi se Liverpooli, Reali e PSG-ja janë rivalët kryesorë.

“Shumë skuadra janë përforcuar shumë mirë, si Liverpool që ka bërë disa afrime të rëndësishme, edhe Real Madridi po ashtu. Ekipet janë më të forta. Ne duhet të jemi shumë solidë nëse duam të synojmë finalen. PSG është një skuadër e jashtëzakonshme, kanë ndërtuar një grup të madh vitet e fundit, kanë bërë blerjet e duhura dhe kanë një trajner që më pëlqen shumë, kompetitiv dhe serioz. Ata janë ndër kandidatët kryesorë për të fituar Ligën e Kampionëve përsëri”.

Megjithatë, Deco theksoi se Barcelona duhet të ecë me hapa të vegjël.

“Është një ndeshje e mirë dhe tërheqëse, por për ne është më shumë një sfidë kualifikimi. Duhet të marrim ndeshjet me radhë. Nuk ka kuptim të ëndërrojmë për Ligën e Kampionëve nëse nuk kalojmë grupet. Objektivi ynë është kualifikimi”.

Portugezi komentoi edhe mbi ndryshimet në formatin e ri të Ligës së Kampionëve, duke e konsideruar më të drejtë sesa edicioni i kaluar.

“Sezonin e shkuar ishte e padrejtë me ndeshjet jashtë fushe. Për një periudhë u humb avantazhi i të qenit në ‘top 8’. Ne luajtëm thuajse të gjitha ndeshjet e kthimit jashtë, si çerekfinalen dhe gjysmëfinalen. Mendoj se ekipet më të mira duhet ta kenë këtë avantazh. Këtë vit e kanë rregulluar, gjithmonë ka vend për përmirësim, por modeli i ri më pëlqen”./Telegrafi/

Barcelona po përgatitet për një afat kalimtar ambicioz në verën e vitit 2026, me synimin për të afruar dy nga yjet kryesorë të Bayern Munich, Harry Kane dhe Dayot Upamecano.

Drejtori sportiv Deco, së bashku me trajnerin Hansi Flick, po punojnë mbi një plan që do të përforconte ndjeshëm si repartin ofensiv, ashtu edhe atë mbrojtës të skuadrës.

Kane është emri kryesor në listën e dëshirave për të zëvendësuar Robert Lewandowskin. Sulmuesi anglez ka shënuar mbi 35 gola që nga ardhja në Bundesligë dhe vlerësohet rreth 50 milionë euro.

Përvoja, efikasiteti dhe njohja që ka me stilin e Flick e bëjnë atë një objektiv të arsyeshëm dhe të nevojshëm për Barcelonën.

Në të njëjtën kohë, Barça po ndjek nga afër situatën e Upamecanos, i cili ka kontratë me Bayernin deri në vitin 2026.

Megjithëse klubi gjerman synon ta rinovojë, katalanasit shohin një mundësi për ta afruar mbrojtësin francez, i cili ofron shpejtësi, fuqi fizike dhe përvojë të konsiderueshme në nivelet më të larta të futbollit evropian.

Barcelona po synon të realizojë një marrëveshje të dyfishtë me Bayernin për Kane dhe Upamecano, një lëvizje që do të forconte si sulmin, ashtu edhe mbrojtjen e skuadrës.

Kane do të ishte pasardhësi i menjëhershëm i Lewandowskit, ndërsa Upamecano do të siguronte një mbrojtje të qëndrueshme për të ardhmen.

Strategjia ekonomike parashikon që kostoja e lartë e Kane të balancohet nga një transferim më i lirë të Upamecanos, ndërsa mosha e Kane dhe situata e kontratës së Upamecanos krijojnë një mundësi reale për transferimin, edhe pse Bayerni zakonisht nuk i lejon lehtë largimet e lojtarëve të tij kryesorë.

Në Camp Nou besojnë se ky nënshkrim i dyfishtë do të jetë baza për rindërtimin e ekipit dhe suksesin afatgjatë. /Telegrafi/

Barcelona po përpiqet të mbyllë planet e fundit për fundin e afatit kalimtar, me vetëm 10 ditë të mbetura deri në përfundimin e tij, ose deri në mbylljen e ngadaltë në rrethana ideale për klubin. Drejtori i Futbollit, Deco, ka ende disa çështje të pazgjidhura në tavolinë.

Blaugranët po përpiqen të rregullojnë situatën me lojtarët e lirë gjatë ditëve të mbetura të afatiti kalimtar, por me Wojciech Szczesny, Gerard Martin dhe Roony Bardghji ende të paregjistruar, mund të jenë të detyruar të marrin masa më drastike. Shpresa e klubit është që tre largime të vogla të rregullojnë limitin e pagave.

Sipas Sport, Deco ka drekur me presidentin Joan Laporta për të finalizuar planet e largimeve, duke diskutuar rinovimin e kontratës së Inaki Pena për 1-2 vite dhe dhënien e tij në huazim, me Como dhe Celta Vigo si destinacione të mundshme.

Ndërkohë, Barcelona po negocion një ndërprerje kontrate me Oriol Romeu, dhe mbrojtësi i djathtë Hector Fort pritet të largohet gjithashtu në huazim.

Tema kryesore mbetet Marc Casado, i cili mund të shitet për 30 milionë euro ose më shumë, çka do të lehtësonte presionin e limitit të pagave dhe do të ndihmonte rikthimin te rregulli “1:1” për janarin.

Megjithëse opsionet për një mbrojtës qendror shtesë qëndrojnë, me Decon po shqyrton ende mundësinë për një lëvizje të fundit.

Klubi është i kënaqur me afatin kalimtar, duke konsideruar se është forcuar me mbërritjen e Marcus Rashford dhe Joan Garcia, pavarësisht largimit të Inigo Martinez, edhe pse Hansi Flick ka shfaqur zhgënjim për vonesat në regjistrimin e lojtarëve. /Telegrafi/ 

The post Laporta, Deco dhe Flick finalizojnë planet e transferimeve për pjesën e mbetur të verës appeared first on Telegrafi.

Drejtori sportiv i Barcelonës, Deco, ka arritur të mbledhë rreth 75 milionë euro përmes shitjeve të lojtarëve, huazimeve dhe uljes së kostove të pagave. Ky është një hap vendimtar për t’iu përmbajtur rregulloreve të Fair Play Financiar të La Ligas.

Sipas mediave spanjolle, ky injektim financiar është jetik për rikthimin e klubit në rregullin e limitit të pagave 1:1, që do t’i lejonte Barcelonës të regjistrojë pesë lojtarë të rinj: Joan Garcia, Wojciech Szczesny, Marcus Rashford, Gerard Martin dhe Roony Bardghji.

Një pjesë e madhe e kursimeve erdhi nga largimi i Inigo Martinez drejt Al-Nassr, i cili uli faturën vjetore të pagave me 14 milionë euro, përfshirë pagat dhe komisionet e muajit korrik. Gjithashtu, huazimi i Ansu Fati te Monaco dhe transferimi i lirë i Clement Lenglet te Atletico Madrid kursyen nga 12 milionë euro secili.

Në anën tjetër, të ardhurat nga transferimet u udhëhoqën nga shitja e Pau Víctor te Braga për 12 milionë euro plus 3 milionë në bonuse.

Pasuan transferimi i Alex Valle te Como për 6 milionë euro dhe ai i Pablo Torre te Mallorca për 5 milionë euro. Ekipi rezervë gjithashtu kontribuoi me shitjet e Sergi Dominguez (1.5 milionë euro), Noah Darvich (1 milion euro) dhe kalimin e Eman Kospo te Fiorentina për 400 mijë euro.

Barcelona përfitoi edhe nga klauzolat e shitjes së disa ish-lojtarëve: Jean-Clair Todibo (8 milionë euro), Ludovit Reis (1.75 milionë), Ilaix Moriba (0.6 milionë), Ferran Jutgla (0.05 milionë) dhe Alex Collado (0.5 milionë), duke e çuar totalin në 74.8 milionë euro.

Klubi është ende në pritje të një vendimi nga Komisioni Mjekësor i La Ligas për dëmtimin e portierit Marc-Andre ter Stegen.

Nëse dëmtimi i tij do ta mbajë jashtë fushave për katër ose pesë muaj, Barcelona mund të përdorë 50% ose 80% të pagës së tij prej 16.67 milionë eurosh për të regjistruar Joan Garcian në ndeshjen hapëse të kampionatit këtë të shtunë kundër Mallorcas. /Telegrafi/ 

The post Barcelona siguron 75 milionë euro nga shitjet dhe kursimet, në garë me kohën për regjistrimin e lojtarëve appeared first on Telegrafi.

Barcelona po përgatitet për dy largime të tjera në ditët në vijim, ndërsa drejtori sportiv Deco po punon intensivisht për finalizimin e tyre nga kryeqyteti katalanas.

Sipas gazetarit Xavi Espinosa, këto lëvizje janë pjesë e riorganizimit të vazhdueshëm të skuadrës dhe përputhen me kërkesat e trajnerit Hansi Flick.

Lojtarët më pranë largimit janë Oriol Romeu dhe Inaki Pena, të cilët nuk janë në planet e trajnerit gjerman për sezonin 2025/26.

Deco ka qëndruar në Barcelonë për të menaxhuar këto operacione, ndërsa skuadra ndodhet në turneun aziatik, duke synuar të afrohet më shumë me rregullin financiar 1:1 të La Ligas.

Përveç këtyre dy emrave, klubi mbetet i hapur edhe për largime të tjera në varësi të tregut dhe ofertave që mund të vijnë.

Emra si Marc-Andre ter Stegen, Ronald Araujo dhe Andreas Christensen janë përfolur për një dalje të mundshme, edhe pse ende nuk ka asgjë konkrete.

Me Decon që ka kontroll të plotë mbi strategjinë sportive, ai po udhëheq procesin e rindërtimit të skuadrës për të garantuar një ekip më të ekuilibruar dhe financiarisht të qëndrueshëm. /Telegrafi/

The post Deco po punon për dy largimet e radhës nga Barcelona appeared first on Telegrafi.