Finalja e Finalissima 2025 tani ka një datë. UEFA dhe CONMEBOL kanë njoftuar zyrtarisht vendin dhe datën e ndeshjes midis Spanjës dhe Argjentinës, përkatësisht kampionëve në fuqi të Evropës dhe Amerikës së Jugut.

Ndeshja do të luhet në stadiumin Lusail në Doha të Katar, më 27 mars në orën 19:00, me orën tonë lokale.

Kjo do të jetë hera e parë që kombëtarja spanjolle do të garojë për këtë titull, i cili është mbajtur tre herë. Dy edicionet e para, në vitin 1985 dhe 1993, ishin Kupa Artemio Franchi, e fituar përkatësisht nga Franca dhe Argjentina.

Gara rifilloi në vitin 2022 me një ndeshje midis Argjentinës dhe Italisë në Londër, të cilën Argjentina e fitoi, duke siguruar dy nga tre titujt e deritashëm.

Spanja do të mbërrijë në ndeshjen kundër skuadrës së Lionel Scalonit jo vetëm si kampione në fuqi e Evropës, por edhe aktualisht duke zënë vendin e parë në renditjen e FIFA-s, përpara ekipit të Amerikës së Jugut.

Ndeshja e fundit zyrtare midis dy ekipeve daton në mars të vitit 2018, kur ato u përballën me njëra-tjetrën në një ndeshje miqësore në Madrid, të cilën Spanja e fitoi 6-1. /Telegrafi/

Mesfushori argjentinas, Franco Mastantuono po shqyrton një huazim gjashtëmujor nga Real Madridi për të rritur shanset për Kupën e Botës 2026.

Sipas mediumit El Nacional, ylli argjentinas Franco Mastantuono po e konsideron seriozisht një largim afatshkurtër nga Real Madridi gjatë gjysmës së dytë të sezonit.

Mesfushori i ri synon të sigurojë minuta të rregullta loje, me qëllim që të mbetet pjesë e planeve të trajnerit Lionel Scaloni për Kombëtaren e Argjentinës dhe të rrisë gjasat për pjesëmarrje në Kupën e Botës 2026.

Burime pranë lojtarit bëjnë të ditur se opsioni i huazimit për gjashtë muaj po shihet si një hap strategjik, i orientuar drejt zhvillimit personal dhe konkurrencës në nivel të lartë.

Ky vendim nuk lidhet me mungesë besimi te e ardhmja e tij në “Santiago Bernabeu”, pasi Mastantuono vazhdon të shihet si një investim afatgjatë i Real Madridit. /Telegrafi/

Drejtësia argjentinase po i vë në lëvizje të gjitha forcat për rastin e presidentit të Federatës Argjentinase të Futbollit (AFA), Claudio “Chiqui” Tapia.

Gjykatësi Federal, Daniel Rafecas urdhëroi bastisje të reja në një komunitet të rrethuar në Pilar, ku një pronë luksoze e regjistruar në emër të Real Central SRL, e lidhur me Luciano Pantano dhe Ana Lucia Conte, të dyshuar si persona të lidhur me presidentin e AFA-s, është nën hetim. Të dyve u ndalohet të largohen nga vendi.

Operacioni është përveç atyre të kryera në më shumë se pesëmbëdhjetë klube dhe një zyrë në qendër të Buenos Airesit, të gjitha pjesë e hetimit që kërkon të sqarojë akumulimin e pasurisë së Tapias dhe bashkëpunëtorëve të tij.

Gjithashtu nën hetim janë arkëtari Pablo Toviggino, i identifikuar si një banor i mundshëm i rezidencës, dhe firma financiare Sur Finanzas, e akuzuar për operim me kredi për klubet në kushte abuzive.

Çështja ka shkuar tashmë përtej botës së futbollit. Gjykatat duan të dinë nëse ka pasur pasurim të paligjshëm dhe përdorim të personave të famshëm, ndërsa FIFA po vëzhgon nga afër për të shmangur çdo ndërhyrje të mundshme politike që mund ta përjashtojë Argjentinën nga Kupa e Botës 2026 në Shtetet e Bashkuara, Kanada dhe Meksikë, shpjegon gazeta prestigjioze La Nación.

Dhe mes skandalit, kampionët në fuqi të botës po ecin me kujdes. Lionel Scaloni është i pasigurt nëse do të luajë në finale kundër Spanjës në mars në Finalissima, një tjetër shenjë e atmosferës së tensionuar që aktualisht rrethon AFA-n. /Telegrafi/

Lionel Messi, sulmuesi i Inter Miamit dhe i kombëtares së Argjentinës, ka pranuar se nuk është në gjendje të zgjedhë një sezon të vetëm si më të mirin e karrierës së tij, edhe pse pranoi se viti 2012 ka një vend të veçantë.

Në deklaratën e tij, Messi nënvizoi se vlerësimi i performancës nuk mund të reduktohet vetëm në statistika apo rekorde personale.

“Nuk e di, është e vështirë, varet nga mënyra si e sheh. Nuk më pëlqejnë statistikat; sot gjithçka lidhet me to”.

“Më pëlqen të jem shumë i përfshirë në lojë. Ka pasur vite kur kemi fituar gjithçka: arritja në finalen e Copa America me kombëtaren, fitimi i Ligës së Kampionëve me Barcelonën”.

“Është e vështirë. Në vitin 2012 shënova rreth 91 gola. Nuk luaj për këtë, kurrë nuk më ka interesuar”.

“Nuk e kisha në mendje të jepja një asist vetëm për të thyer një rekord apo për të kaluar dikë tjetër”.

“Është e vështirë të zgjedhësh një vit; fatmirësisht kam pasur shumë vite shumë të mira”, ka deklaruar Messi.

Së fundmi, tetë herë fituesi i Topit të Artë u shpall fitues i MLS me Inter Miamin, që ishte njëkohësisht titulli i parë i kampionatit në histori të klubit amerikan./Telegrafi/

Kombëtarja e Argjentinës do të luftojë për të mbrojtur titullin e Kupës së Botës në vitin 2026 që do të zhvillohet në Shtetet e Bashkuara, Meksikë dhe Kanada. Edhe pse kapiteni Lionel Messi nuk e ka konfirmuar ende nëse do të luajë në kampionatin botëror, ai ka zbuluar favoritët e tij për të fituar trofeun.

Pas shortit për grupet e Kupës së Botës 2026, ku do të marrin pjesë 48 ekipe për herë të parë, kanë filluar analizat dhe parashikimet rreth fituesit të mundshëm.

Ylli i Inter Miamit ndau gjithashtu mendimin e tij, i cili, përveç Argjentinës, për të cilën tha se do të "luftojë" për të mbrojtur titullin, ka edhe kandidatë të tjerë.

Messi: Synojmë ta fitojmë përsëri Kupën e Botës

“Ka skuadra shumë të mira. Spanja, Franca, Anglia, Brazili, të cilat gjithashtu nuk kanë qenë kampionë për një kohë të gjatë, duan ta fitojnë turneun", ka thwnw fillimisht Messi në një intervistë së fundmi me ESPN.

"Gjermania, e cila gjithmonë ka dashur ta mposhtë Argjentinën, tani e dëshiron atë edhe më shumë pas Kupës së Botës së fundit. Do të jetë shumë e vështirë, por nuk kam dyshim se ata do të luftojnë për titullin”, përfundoi ylli argjentinas.

Në Kupën e parë të Botës me 48 ekipe, ekipet u ndanë në 12 grupe me nga katër ekipe. Dy ekipet e para nga secili grup avancojnë në fazën eliminatore, të cilave iu bashkohen edhe tetë ekipet më të mira të vendeve të treta. /Telegrafi/

Legjenda e Argjentinës, Gabriel Batistuta, beson se Lautaro Martinez i Interit dhe Julian Alvarez i Atletico Madridit mund të luajnë së bashku për kombëtaren Albiceleste në Kupën e Botës 2026, por njëri prej tyre do të duhet të ndryshojë stilin e lojës që partneriteti të funksionojë.

Kombëtarja e Argjentinës ka pasur gjithmonë sulmues të kalibrit botëror dhe njësoj është situata edhe tani me yje si Lautaro dhe Alvarez, të cilët janë partner të Lionel Messit.

Kështu, trajneri Lionel Scaloni mund të ketë kokëdhimbje se cilin ta zgjedh si titullar, por një ide ia ka thënë edhe njëri nga sulmuesit më të mirë në histori të kësaj kombëtare, Batistuta.

“I dua të dy. Është një problem i mirë për Scalonin. Nuk e di se si do ta bëjë zgjedhjen. Të dy luajnë, shënojnë gola, bëjnë presion, e mbajnë topin dhe e pasojnë. Nuk shoh ndonjë ndryshim”, ka thënë fillimisht Batistuta.

“Për më tepër, të dy janë liderë për ekipet e tyre përkatëse dhe, vetë, mund ta vënë në telashe mbrojtjen kundërshtare”.

“Ndoshta mund të luajnë së bashku, por duhet t'u kërkohet. Nga jashtë, duket kështu”.

“Por në këto raste, njëri duhet të sakrifikojë më shumë se tjetri, duke u detyruar të largohet nga zona e tij e rehatisë dhe të luajë për tjetrin, por nga jashtë, duket se ata mund të luajnë së bashku", përfundoi legjenda argjentinase. /Telegrafi/

Sot (e premte) në Uashington të SHBA-ve u hodh shorti për Kupën e Botës, që për herë të parë do të mbahet në tri shtete – SHBA, Kanada dhe Meksikë.

Lionel Messi me Argjentinën dhe Cristiano Ronaldo me Portugalinë duket se janë në rrugë drejt një përballjeje të mundshme në çerekfinalet e Kupës së Botës 2026, e cila do të zhvillohet në Kansas City në korrikun e ardhshëm.

Ronaldo ishte pezulluar automatikisht për tre ndeshje pas një kartoni të kuq në një takim kualifikues kundër Irlandës, por Gianni Infantino dhe FIFA morën një vendim të debatueshëm duke shtyrë dy nga tre ndeshjet e pezullimit.

Kjo bën që kapiteni i Portugalisë të jetë i gatshëm të luajë menjëherë në Grupin K, ku portugezët janë favoritë për të dalë të parët ndaj Kolumbisë, debutuesve Uzbekistan dhe njërit prej fituesve të ‘play-off’-it mes Xhamajkës, Kaledonisë së Re dhe Republikës Demokratike të Kongos.

Nëse Portugalia e fiton grupin, ata do të përballen me një skuadër të vendit të tretë në fazën e 1/32-ve më 3 korrik në Kansas City.

Ndërkohë, Argjentina u shortua në Grupin J së bashku me Algjerinë, Austrinë dhe Jordaninë.

Kampionët në fuqi janë favoritë të qartë për të dalë të parët dhe kështu do të kishin përballë vendin e dytë të Grupit H (Spanjë, Kepi i Gjelbër, Arabia Saudite dhe Uruguai).

Albicelestët do të duhet gjithashtu të fitojnë ndeshjen e tyre të 1/16-ve në Atlanta më 7 korrik për të siguruar një vend në çerekfinale.

Ky turne shënon Kupën e Botës së gjashtë radhazi ku do të marrin pjesë si Messi ashtu edhe Ronaldo dhe meqë të dy janë në vitet e fundit të karrierave të tyre legjendare, kjo mund të jetë hera e fundit që dy ikonat mund të përballen në një ndeshje të Botërorit./Telegrafi/

Superkompjuteri i Optas ka publikuar parashikimin e tij të detajuar për kombëtaren që ka më shumë gjasa të ngrejë trofeun e Kupës së Botës 2026.

Në krye të renditjes qëndron Spanja, të cilës Opta i jep 17% shanse për të fituar. Kampionët e Europës konsiderohen ekipi më i balancuar i momentit, me një mesfushë të jashtëzakonshme dhe një repart sulmues që garanton cilësi të lartë.

Pas tyre renditet Franca, me 14.1% shanse. Me Kylian Mbappe të gatshëm për një tjetër Botëror madhështor dhe me një brez të artë lojtarësh, “Gjelat” pritet të jenë sërish protagonistë deri në fazat finale të turneut.

Anglia vjen menjëherë pas Francës me 11.8% shanse, duke marrë një vlerësim të lartë falë brezit të ri të talentuar dhe besimit të madh në punën e Thomas Tuchel.

Opta sugjeron se “Tre Luanët” mund të jenë më në fund gati ta thyejnë mallkimin 60-vjeçar dhe të tentojnë titullin e dytë botëror.

Vetëm më pas vjen Argjentina, me 8.7% shanse. Edhe pse Lionel Messi vazhdon të mbetet në qendër të magjisë albiceleste dhe skuadra e Scalonit dominoi kualifikimet e Amerikës së Jugut, statistikat nuk i vendosin kampionët e botës në mesin e favoritëve kryesorë.

Gjermania, me 7.1% shanse, shihet si një kandidat i rrezikshëm, por jo ndër favoritët kryesorë, për shkak të luhatjeve të shfaqura vitet e fundit.

Portugalia e Cristiano Ronaldos, në Botërorin e tij të fundit, vlerësohet me 6.6% mundësi për të synuar lavdinë e madhe.

Një tjetër surprizë në renditje është Brazili. Edhe me Carlo Ancelottin në stol dhe lojtarë të nivelit të lartë, ata marrin vetëm 5.6% shanse — një tregues i formës së dobët në turnetë e fundit dhe vështirësive për të rikthyer dominimin historik.

Holanda, e cila ka qenë gjithmonë pranë por kurrë në majë të botës, vlerësohet me 5.2% shanse. Ndërkohë, Norvegjia falë Erling Haaland siguron 2.3%, ndërsa Kolumbia e Luis Díaz renditet e dhjeta me 2%.

Opta përmend edhe një detaj interesant: ekipet që vijnë nga ‘play-off’-et, kryesisht për shkak të mundësisë së pranisë së Italisë, kanë 3.7% shanse për të triumfuar në Amerikën e Veriut./Telegrafi/

Ylli i Argjentinës, Lionel Messi, ka reflektuar mbi vështirësitë e mbajtjes së titullit kampion bote dhe presionin që sjell kjo sfidë.

“Besoj se kemi një skuadër shumë të fortë dhe do të përpiqemi ta fitojmë sërish Botërorin. Por në këtë kompeticion, momentet më të vogla mund të të eliminojnë”, ka thënë fillimisht Messi.

Ai theksoi se në Kupën e Botës çdo detaj ka peshë, nga një top që përfundon në shtyllë deri te penallti të cilat mund të ndryshojnë fatin e një ndeshjeje.

“Edhe pse fituam me penallti në finalen e vitit 2022, ndaj Holandës dhe Francës ishim skuadra më e mirë, megjithatë ndeshjet përfunduan te penalltitë. Emiliano Martinez ishte vendimtar, por një seri penalltish mund të të penalizojë në çdo moment”.

Messi shtoi se triumfi i vitit 2022 hoqi një barrë të madhe nga shpatullat e ekipit, duke u lejuar të luajnë më lirshëm, por pa e garantuar suksesin.

“Është jashtëzakonisht e vështirë të fitosh një Botëror. Sidoqoftë, jam i bindur për vendosmërinë e skuadrës sonë. Tani luajmë pa peshën e asaj që na mungonte prej vitesh, por kjo nuk do të thotë se fitorja vjen lehtë. Të gjithë duan të mposhtin kampionët e botës”, përfundoi ylli i Argjentinës. /Telegrafi/

Në dhjetor të vitit 2012, Lionel Messi arriti një prej rekordeve më të jashtëzakonshme në historinë e futbollit: golin e tij të 91-të brenda një viti kalendarik me Barcelonën.

Megjithatë, kur u pyet nëse viti 2012 ishte më i miri i karrierës së tij, Messi reagoi me buzëqeshje dhe një përgjigje të matur, larg çdo krahasimi të thatë me statistika.

“Nuk e di, është e vështirë — varet si e sheh. Nuk më pëlqejnë statistikat; sot çdo gjë sillet rreth tyre”.

“Mua më pëlqen të jem shumë i përfshirë në lojë. Ka pasur vite kur kemi fituar gjithçka: të arrish në finalen e Kupës së Amerikës me kombëtaren, të fitosh Ligën e Kampionëve me Barcelonën”.

“Është e vështirë. Në vitin 2012 shënova rreth 91 gola. Nuk luaj për këtë, kurrë nuk më ka interesuar”.

“Nuk e kam pasur kurrë në mendje të jap një asist vetëm për të thyer një rekord apo për të kaluar dikë tjetër. Është e vështirë të zgjedhësh një vit; për fat të mirë kam pasur shumë vite shumë të mira”, ka shtuar Messi.

Edhe sot, rekordi i 91 golave të vitit 2012 mbetet një nga arritjet më të pabesueshme në futbollin modern, por për Messin, ai është vetëm një pjesë e një karriere të jashtëzakonshme.

Messi është i fokusuar të qëndrojë në formë te Inter Miami për t’u përgatitur për Kupën e Botës 2026./Telegrafi/

Pas publikimit të një videoje të vjetër nga periudha kur ishte pjesë e Argjentinës U20, Lionel Messi ka folur hapur për rolin vendimtar që ka pasur familja në karrierën e tij, sidomos gjatë momenteve më të vështira me kombëtaren dhe presionit të madh të opinionit publik në vendlindje.

Ai është ndalur te mbështetja e pakushtëzuar që ka marrë gjithmonë nga njerëzit e tij më të afërt.

“Për mua, familja është gjithçka, gjëja më e rëndësishme”.

“Ata kanë qenë gjithmonë pranë meje. Ka pasur momente të vështira. Me kombëtaren kemi vuajtur shumë. Ata vuajnë më shumë se ne”.

“Te Barcelona fitonim gjithçka, pastaj kthehesha te kombëtarja, nuk shkonin gjërat mirë, dhe njerëzit më ofendonin; thoshin se nuk e ndjej fanellën, se nuk duhet të luaja më. Familja ime qëndronte në Argjentinë dhe i shikonte të gjitha emisionet sportive — e di si jemi. Prindërit dhe vëllezërit e motrat e mia e kaluan shumë rëndë”.

Lionel Messi

"Kam pasur fatin ta kem gjithmonë familjen time. Jemi shumë të lidhur. Po njësoj edhe me familjen e Antonelës. Më pëlqen t’i kem të gjithë afër, sepse në fund, kjo është ajo që ka më shumë rëndësi".

Fjalët e Messit rikthejnë në vëmendje periudhat kur ylli argjentinas përjetoi kritikat më të mëdha të karrierës, pavarësisht se me Barcelonën kishte fituar gjithçka dhe kishte ndërtuar një trashëgimi të pakrahasueshme në futbollin e Evrope.

Messi u zhvillua te La Masia, akademia e famshme e Barcelonës, duke u bërë më pas kapiten dhe lojtari më i madh në historinë e klubit, me më shumë gola, asistime, paraqitje dhe trofe sesa çdo lojtar tjetër në historinë blaugrana.

Pas mbylljes së epokës së tij në Camp Nou dhe një periudhe te PSG, Messi aktualisht luan për Inter Miami në MLS, duke mbetur figurë qendrore e projektit të klubit amerikan./Telegrafi/

Ish-futbollisti holandez, Wesley Sneijder, ka zgjedhur së fundmi favoritët më të mëdhenj për Kupën e Botës 2026.

Kupa e Botës 2026 zhvillohet nga 11 qershori deri më 19 korrik 2026 dhe tashmë Sneijder ka zbuluar disa nga favoritët e tij në një intervistë me gazetën spanjolle Marca.

"Nëse duhet të zgjedh katër skuadra për gjysmëfinalet, ato janë Portugalia, Spanja, Franca dhe Brazili. Konkurrenca është shumë më e fortë. Të gjithë janë aty, do të jetë çmenduri”, ka thënë fillimisht Sneijder.

“Anglia gjithashtu ka një skuadër të jashtëzakonshme, njësoj si Holanda. Ndoshta Gjermania do të rikthehet në rrugën e duhur, kush e di?".

Superkompjuteri përcakton favoritin kryesor për të fituar titullin e kampionit botëror

Sneijder bëri 134 paraqitje për ekipin kombëtar holandez, duke shënuar 31 gola dhe duke fituar medaljen e argjendtë në Kupën e Botës 2010 në Afrikën e Jugut dhe medaljen e bronztë katër vjet më vonë në Brazil.

"Të luaja finalen e Kupës së Botës kundër Spanjës ishte e pabesueshme. Ishte një ndeshje shumë e ngushtë. Ne mund të kishim fituar, por për fat të keq ata fituan".

Si kujtesë, Spanja mposhti Holandën 1-0 me një gol të Andres Iniesta në minutën e 116-të.

"Nëse Robben do të kishte shënuar shansin e shkëlqyer që pati, do të kishte përfunduar 1-0 për ne. Në ndeshje të tilla duhet pak fat", përfundoi ish-ylli holandez.

Ndryshe, si lojtar Sneijder luajti për Ajax, Real Madrid, Inter, Galatasaray, Nice dhe Al-Gharafa gjatë karrierës së tij. Ai fitoi 19 trofe klubesh, njëri prej të cilëve ishte Liga e Kampionëve me Interin. /Telegrafi/

Kombëtarja e Spanjës shihet si pretendente kryesore për të fituar Kupën e Botës FIFA 2026, që do të zhvillohet në SHBA, Kanada dhe Meksikë, me Kosovën që po ashtu ka gjasa të jetë pjesë e eventit madhor.

Dardanët luajnë në gjysmëfinalen e play-offit, ndaj Sllovenisë, ndërsa nëse kalon tutje, Kosova do të përballet me fituesin e ndeshjes Turqi -Rumani.

Ti kthehemi superkompjuterit të platformës statistikore Opta Sport, i cili e sheh “La Roja” me 17% shanse për të triumfuar në turneun që nis pas verës së ardhshme.

Spanja, kampione aktuale e Evropës, është në një ecuri të jashtëzakonshme prej 31 ndeshjesh pa humbje (25 fitore dhe 6 barazime).

Humbja e fundit daton në mars të vitit 2023 kundër Skocisë, një dëshmi e forcës së skuadrës së drejtuar nga përzgjedhësi De la Fuente.

Franca ndjek pas, Anglia në vendin e tretë

Pretendentja e dytë sipas modelit statistikor është Franca, me 14.1% shanse. “Gjelat”, nënkampionë të botës në vitin 2022, kanë zhvilluar 175 ndeshje nën drejtimin e Didier Deschamps dhe fituan Kupën e Botës 2018 dhe Ligën e Kombeve 2021. Pjesë e skuadrës është edhe fituesi aktual i Topit të Artë, Ousmane Dembele.

E treta në renditje është Anglia me 11.8% shanse. Që nga ardhja e gjermanit Thomas Tuchel, anglezët kanë fituar nëntë nga dhjetë ndeshje, duke rikthyer besimin se mund të luftojnë seriozisht për titull.

Skuadra e parë jashtë Evropës në listë është Argjentina, kampione në fuqi e botës, me 8.7% shanse. Pas saj vijnë: Gjermania, Portugalia dhe Brazili.

Një Kampionat Botëror historik

Kupa e Botës 2026 do të jetë e veçantë për disa arsye. Për herë të parë do të marrin pjesë 48 kombëtare, ndërsa po ashtu për herë të parë organizohet në tre shtete njëkohësisht dhe do të mbahet nga 11 qershori deri më 19 korrik 2026.

Shorti zyrtar i fazës së grupeve do të hidhet më 5 dhjetor në Uashington, çka pritet të konfirmojë rrugën e secilës kombëtare drejt trofeut më prestigjioz në futbollin botëror. /Telegrafi/

Chelsea mesfushori Enzo Fernandez ka zbuluar se një nga ambiciet më të mëdha të tij personale në futboll është që një ditë të trashëgojë shiritin e kapitenit te Kombëtarja e Argjentinës, pas periudhës së Lionel Messit.

Në një deklaratë për “GiveMeSport”, Fernandez theksoi se kjo ëndërr ka qenë gjithmonë pjesë e objektivave të tij, por vendimi i takon stafit teknik.

“Në nivel personal, sigurisht që ëndërroj të jem kapiten i Argjentinës, por ai vendim nuk varet nga unë”.

Ai shtoi se përzgjedhja e kapitenit është përgjegjësi ekskluzive e trajnerëve dhe se ai është i gatshëm të presë momentin e duhur.

“Është në dorën e stafit teknik. Natyrisht që ëndërroj të jem kapiten i Argjentinës. Nuk e di kur mund të ndodhë. Koha do ta tregojë dhe vendimin e merr stafi teknik. Pa dyshim është një nga ëndrrat e mia dhe do të ishte nder i madh ta mbaj shiritin”.

Fernandez tashmë ka mbajtur shiritin e kapitenit te Chelsea në disa ndeshje, gjë që tregon se ai e sheh veten si një lider brenda skuadrës.

Megjithatë, në kampin e Argjentinës nuk mungon konkurrenca. Lojtarë të rëndësishëm si Cristian Romero dhe Emiliano Martinez shihen gjithashtu si kandidatë seriozë për të pasuar Messin në këtë rol./Telegrafi

Debati i përjetshëm mes Cristiano Ronaldos dhe Lionel Messit nuk njeh kufij, as edhe tani kur të dy janë drejt fundit të karrierës së tyre.

Çdo veprim i tyre në fushë vazhdon të analizohen në detaje nga ekspertët dhe tifozët. Pikërisht këtë ka bërë edhe gazetari i njohur britanik Piers Morgan, i cili ka dalë hapur në mbrojtje të mikut të tij Cristiano Ronaldo.

Ronaldo u përjashtua me karton të kuq gjatë fitores 2-0 të Portugalisë ndaj Irlandës – kartoni i tij i parë i kuq në karrierën me kombëtaren – pas një goditjeje me bërryl ndaj një mbrojtësi. Përjashtimi jo vetëm që e largoi nga ndeshja, por i rrezikon edhe pjesëmarrjen në duelin e ardhshëm të rëndësishëm ndaj Armenisë, madje edhe një pezullim për Kupën e Botës.

Menjëherë pas incidentit, Piers Morgan reagoi në rrjetet sociale duke krahasuar faullin e Ronaldos me një episod të Lionel Messit te Inter Miami. Ai postoi një video ku Messi shtyn një lojtar kundërshtar, duke shkruar: “Kur Messi bëri të njëjtën gjë së fundmi, nuk u mor asnjë masë”.

Ky koment ndezi debate të shumta në rrjet, pasi shumë përdorues e cilësuan krahasimin “të pakuptimtë”, duke thënë se Morgan po e mbron Ronaldon vetëm nga simpatia personale dhe miqësia që ka me të.

Pse Piers Morgan e mbron aq shumë Ronaldon?

Morgan është i njohur për deklarata të drejtpërdrejta dhe intervista ekskluzive me personalitete të mëdha. Ai gëzon një raport të veçantë me CR7, aq sa Ronaldo i ka dhënë atij disa nga intervistat më të komentuara të karrierës. Gazetari britanik është gjithashtu tifoz i deklaruar i Ronaldos dhe shpesh e mbron publikisht në rrjetet sociale.

Së fundmi, Morgan rikujtoi një nga intervistat e tij me Ronaldon, ku portugezi deklaronte se e konsideron veten “më të mirin në histori” dhe se nuk ka obsesion me fitimin e Kupës së Botës.

Ndërsa debati mes Ronaldos dhe Messit vazhdon, reagimi i Morgan ka shtuar edhe një herë tensionet mes tifozëve të dy legjendave. E vërteta është se çdo lëvizje e tyre, qoftë e mirë apo e keqe, mbetet temë e nxehtë në botën e futbollit. /Telegrafi/

Kapiteni i Interit, Lautaro Martinez, është tani golashënuesi i katërt më i mirë i të gjitha kohërave për ekipin kombëtar të Argjentinës, pas golit të tij gjatë fitores 2-0 ndaj Angolës në Luanda të premten në mbrëmje.

Lautaro hapi serinë e golave për kombëtaren e tij me një gjuajtje të parë me të djathtën brenda zonës pak para se të mbyllej pjesa e parë.

Ai gjithashtu dha një asistim për Lionel Messin, i cili shënoi golin e dytë të Argjentinës në fund të pjesës së dytë.

Ky ishte goli i 36-të i Lautaros për kombin e tij, që do të thotë se ai e ka tejkaluar Hernan Crespon me 35 gola në listën e golashënuesve më të mirë të të gjitha kohërave të Argjentinës.

‘El Toro’ aktualisht renditet në vendin e katërt në atë listë, pas Sergio Agueros me 41 gola, Gabriel Batistutës me 55 gola dhe Messit të lartpërmendur me 115 gola.

Lautaro tani ka shënuar tre gola dhe ka dhënë dy asistime në tre ndeshjet e tij miqësore për Argjentinën këtë sezon, duke konfirmuar formën e lartë.

Kjo i shton një total prej tetë golash dhe dy asistimesh nga 14 paraqitje në nivel klubesh këtë sezon. Katër gola dhe dy asistime kanë ardhur në Serie A, me katër gola shtesë nga tre paraqitje në Ligën e Kampionëve deri më tani. /Telegrafi/

Argjentina e ka fituar miqësoren ndaj Angolës, sfidë ku shkëlqeu kapiteni Lionel Messi.

Ashtu siç pritej, Argjentina ishte shumë herë më e mirë për të triumfuar me rezultat 0-2.

Lautaro Martinez pasi mori një asistim të bukur nga Leo Messi e zhbllokoi rezultatin (42’).

Ndërsa, dyshja bashkëpunuan sërish veçse kësaj radhe ndryshuan vendet. Pra, Martinez asistoi kurse nga afërsia shënoi Messi për ta vulosur fitoren (82’).

Argjentina ndërkohë në muajin mars do ta zhvillojë “La Finalissima” kundër Spanjës./Telegrafi/

Rivaliteti historik midis Cristiano Ronaldos dhe Lionel Messit për titullin e GOAT-it të futbollit ka mbetur temë diskutimi për vite me radhë.

Por nëse i krahasojmë të dy legjendat në moshën 38-vjeçare, sa gola ka shënuar secili dhe kush është përpara?

Disa tifozë krahasojnë Lionelin dhe Cristianon për personalitetin e tyre në fushë dhe jashtë saj, por për të tjerët, statistikat janë gjithçka: gola, ndeshje, asistime, minuta të luajtura.

Kur Cristiano Ronaldo ishte 38 vjeç, ai kishte arritur të shënonte 57 gola. Sot, në moshën 40-vjeçare, sulmuesi i Al Nassr ka një total prej 953 golash në karrierë.

Ndërkohë, Lionel Messi mbushi 38 vjeç më 24 qershor 2025. Për të barazuar numrin e golave të Ronaldos në këtë moshë, kapiteni argjentinas duhet të shënojë 32 gola të tjerë për t’u barazuar dhe 33 gola për ta tejkaluar, pasi aktualisht ka shënuar 25 gola në këtë fazë të karrierës. Në total, numri 10 i Inter Miamit ka regjistruar 894 gola, duke qenë vetëm 6 gola larg shifrës 900 në karrierën e tij.

Lionel mund të shfrytëzojë ndeshjen e radhës me Kombëtaren e Argjentinës: një miqësore kundër Angolës, e cila zhvillohet të premten, më 14 nëntor, në stadiumin 11 de Noviembre në Luanda, që ka kapacitet rreth 45,000 spektatorë.

Kjo do të jetë paraqitja e fundit e ekipit të Lionel Scalonit deri në vitin 2026. /Telegrafi/

Cristiano Ronaldo e ka konfirmuar përfundimisht: Kupa e Botës 2026 do të jetë turneu i tij i fundit ndërkombëtar.

Kapiteni i Portugalisë, në një intervistë për CNN, deklaroi se në moshën 41-vjeçare do të mbyllë pjesëmarrjet e tij në garën më prestigjioze të futbollit botëror, e cila do të zhvillohet në SHBA, Kanada dhe Meksikë nga 11 qershori deri më 19 korrik 2026.

“Patjetër, po. Do të jem 41 vjeç dhe mendoj se ky do të jetë momenti i duhur për të përfunduar garën time të madhe”, deklaroi Ronaldo me sinqeritet, duke emocionuar miliona fansa në mbarë botën.

Ky njoftim shënon fundin e një epoke të artë, por gjithashtu ringjall rivalitetin e përjetshëm me Lionel Messin, duke rikthyer pyetjen që ka ndarë botën e futbollit për më shumë se një dekadë: kush është më i madhi?

Ronaldo dhe Messi

Statistikat që ndajnë dy legjendat

Cristiano Ronaldo ka zhvilluar 225 ndeshje me Portugalinë, duke shënuar 143 gola, më shumë se çdo futbollist tjetër në historinë e futbollit ndërkombëtar. Ai mban rekordin për më shumë gola në kualifikime të Euro 2024 dhe të Kupës së Botës (nga 41 secila), si dhe 14 gola në vetë Kampionatin Evropian.

Nga ana tjetër, Lionel Messi ka luajtur 195 ndeshje për Argjentinën, duke realizuar 114 gola – gjithashtu rekord absolut për vendin e tij, përpara Gabriel Batistutës (54) dhe Sergio Agüeros (42).

Në arenën e Kupës së Botës, bilanci anon lehtë në favor të argjentinasit: Messi ka shënuar 13 gola, ndërsa Ronaldo 8 gola. Megjithatë, portugezi është i vetmi lojtar në histori që ka shënuar në pesë Kupa Bote të ndryshme (2006, 2010, 2014, 2018, 2022).

Një epilog i denjë për një rivalitet epik

Në moshën 40 dhe 38 vjeç, Ronaldo dhe Messi po përgatiten për një turne që mund të jetë labirinti i fundit i dy ikonave që ndryshuan futbollin modern.

Kupa e Botës 2026 pritet të mos jetë thjesht një garë për trofe, por një ndarje e madhe emocionale mes dy legjendave që frymëzuan breza të tërë tifozësh në çdo cep të globit.

Për herë të fundit, futbolli botëror do të ketë fatin të shohë “CR7” dhe “La Pulga” në të njëjtin turne – një duel që nuk përsëritet më. /Telegrafi/

Ekipi i futbollit të Argjentinës do të dobësohet ndjeshëm në një ndeshje miqësore kundër Angolës më 14 nëntor dhe arsyeja është mjaft e pazakontë.

Konkretisht, ekipi kombëtar argjentinas i futbollit është mbledhur në Elche të Spanjës, ku do të stërvitet deri të enjten, kur do të udhëtojë për në Angolë.

Edhe pse stërviten me shokët e tyre të ekipit, Julian Alvarez, Giuliano Simeone dhe Nahuel Molina, të gjithë nga Atletico Madrid, nuk do të udhëtojnë për në Angolë sepse nuk e kanë marrë vaksinën kundër etheve të verdha në kohë, e cila është e detyrueshme për të hyrë në Angolë.

Trajneri argjentinas Lionel Scaloni do të duhet të gjejë zgjidhje në krahun e djathtë dhe në krye të sulmit për duelin kundër Angolës, dhe përveç të treve, nuk do të jetë në gjendje të luajë Enzo Fernandez, i cili është i lënduar.

Ndeshja miqësore midis Angolës dhe Argjentinës do të luhet të premten, duke filluar nga ora 17:00. /Telegrafi/