Chelsea është finalisti i dytë i FA Cup, pasi në gjysmëfinale triumfoi ndaj Leeds Utd.

Pas disa rezultateve negative, “Blutë” u kthyen te fitorja pas triumfit 1-0.

Leeds Utd e nisi më fuqishëm për të rrezikuar përmes Breneden Aaranson, por që Sanchez me super pritje ia mohoi golin.

Ishte Enzo Fernandes që shënoi nga afërsia me kokë për ta zhbllokuar epërsinë pas asistimit të Pedro Netos (23’).

Leeds tentoi të kthehet në lojë, duke rrezikuar edhe përmes Anton Stach, mirëpo sërish Sanchez ishte në vendin e duhur (47’).

Chelsea pastaj u fokusua në mbrojtje dhe deri në fund arritën ta ruajnë rezultatin për ta regjistruar fitoren.

Kësisoj, Chelsea shkon në finale – aty ku po e pret Manchester City, e cila të shtunën eliminoi Southamptonin./Telegrafi/

Manchester City i është afruar edhe një tjetër trofeu, pra FA Cup. Skuadra e Pep Guardiolas fitoi me përmbysje ndaj Southampton për ta siguruar finalen e madhe.

“Qytetarët” ishin në disavantazh prej 0-1, megjithatë shënoi dy herë brenda katër minutave për 2-1.

Man City ishte larg skuadër më dominuese pavarësisht që pushoi disa nga lojtarët kryesorë, për të krijuar raste të shumta, ku iu mungoi finalizimi.

Southampton megjithatë i befasoi të gjithë kur Finn Azaz mori një pasim të bukur dhe me një goditje të saktë, e la portierin plotësisht të shtangur (79’).

Sidoqoftë, gëzimi i Southampton zgjati vetëm katër minuta. Jeremy Doku me një goditje, që u devijua nga mbrojtësi dhe përfundoi brenda portës së Peretz e barazoi rezultatin (83’).

Kurse, pesë minuta më vonë Nico me një supergol nga distanca u përkujdes për ta përmbysur rezultatin (88’).

Kësisoj, Man City kualifikohet në finalen e FA Cupit që zhvillohet më 16 maj, ndërsa aty do ta presë fituesin e gjysmëfinales tjetër Chelsea – Leeds Utd./Telegrafi/

Chelsea do të përballet me rivalin e madh Leeds United, ndërsa Manchester City do të luajë kundër Southampton nga Championship në gjysmëfinalet e FA Cup që do të zhvillohen në “Wembley Stadium” më vonë këtë muaj.

Një seri çerekfinalesh emocionuese çoi drejt këtij “final four” interesant. Chelsea pritej të triumfonte dhe ashtu ndodhi, duke shkatërruar Port Vale në “Stamford Bridge” të shtunën, por pak kush e kishte parashikuar eliminimin surprizë të Arsenalit nga Southampton.

Kryesuesit e Liga Premier u mposhtën me meritë nga skuadra e Championship në jug të Anglisë, duke shtuar kështu zhgënjimin pas humbjes bindëse në finalen e Carabao Cup para pushimit ndërkombëtar.

Pikërisht Manchester City ishte autor i atij triumfi në “Wembley” dhe tani synon të vazhdojë suksesin në stadiumin kombëtar të Anglisë, pasi dominoi Liverpoolin në çerekfinale.

Skuadra e Pep Guardiola shënoi katër gola në më pak se 20 minuta rreth pjesës së dytë në “Etihad Stadium”, duke lënë Liverpoolin me pikëpyetje serioze për forcën mendore dhe shpirtin luftarak.

Ndërkohë, West Ham dhe Leeds dhuruan një nga çerekfinalet më dramatike. Leeds ishte në avantazh 2-0 në “London Stadium” deri në kohën shtesë, por pësoi dy gola brenda katër minutash, duke lejuar vendasit të çonin ndeshjen në vazhdime.

West Ham pati edhe një gol të anuluar për pozicion jashtë loje, ndërsa portieri Alphonse Areola u dëmtua pak para penalltive. Zëvendësuesi i tij 20-vjeçar, Finlay Herrick, bëri debutimin dhe priti penalltinë e parë të Joel Piroe nga Leeds.

Megjithatë, drama nuk përfundoi aty, pasi Leeds u rikthye dhe fitoi serinë e penalltive me rezultatin 4-2./Telegrafi/

Trajneri Mikel Arteta mori përgjegjësinë për eliminimin surprizë të Arsenalit nga çerekfinalja e FA Cup kundër Southampton, por tha se të gjithë në klub duhet të reflektojnë para fazës vendimtare të sezonit.

Arsenali ishte në garë për një katërfish historik vetëm dy javë më parë, por tani lufta e tyre për trofe është reduktuar në dy, pas humbjes 2-1 të së shtunës në “St. Mary’s”.

Kjo ishte hera e parë që Arsenali eliminohet nga FA Cup nga një ekip i një kategorie më të ulët që nga sezoni 2021/22, kur humbi ndaj Nottingham Forest në raundin e tretë, ndërsa tani ka pësuar dy humbje radhazi në të gjitha garat për herë të parë këtë sezon.

Megjithatë, Arteta mbrojti mentalitetin e lojtarëve të tij në konferencën për shtyp pas ndeshjes.

"Unë i dua lojtarët e mi. Ajo që kanë bërë për nëntë muaj, mënyra se si po sakrifikojnë trupin e tyre për gjithçka, disa prej tyre ndoshta as nuk duhej të ishin sot këtu”.

“Do t’i mbroj më shumë se kurrë. Nëse dikush duhet të marrë përgjegjësi, jam unë – kemi periudhën më të bukur të sezonit përpara dhe tani është momenti”.

“Në një sezon gjithmonë ka momente – zakonisht dy ose tre. Ky është momenti i parë që po përballemi me një nivel të caktuar vështirësie, dhe ne e quajmë vështirësi kur jemi në çerekfinale të Ligës së Kampionëve dhe në krye të ligës”.

“Është një periudhë e vështirë – besoj se është kështu – ka shumë të tjera edhe më të vështira. Prandaj, ngrihuni, merrni përgjegjësi dhe jepni maksimumin siç kemi bërë gjatë gjithë sezonit”, deklaroi ai.

Arsenali do të udhëtojë te Sporting CP për ndeshjen e parë të çerekfinales së Ligës së Kampionëve të martën, ndërsa të shtunën do të rikthehet në garën për titullin e Ligës Premier me ndeshjen në shtëpi kundër Bournemouth./Telegrafi/

Arsenali është përshëndetur edhe me trofeun e FA Cup, pas humbjes në çerekfinale nga Southampton.

Trajneri Mikel Arteta i pushoi shumicën e lojtarëve kryesorë, vendim që mesa duket rezultoi i gabuar, për të pësuar humbje me rezultat 2-1.

Arsenali e nisi më mirë ku krijoi disa raste të bukura, me Martin Odegaard që ishte afër të shënonte.

Sidoqoftë, ishte Ross Stewart që pas një harkimi të bukur e finalizoi për mrekulli për ta zhbllokuar rezultatin (35’).

Arsenali u rikthye në lojë falë Victor Gyokeres që u asistua nga Kai Havertz (68’).

Sidoqoftë, krejt në fund Southampton e arriti fitoren e madhe përmes Shea Charles, për ta bërë befasinë e vikendit (85’).

Kësisoj, Southampton avancon në gjysmëfinale ndërsa Arsenalit i mbetet të luftojë për titullin në Ligën Premier si dhe trofeun e Ligës së Kampionëve./Telegrafi/

Chelsea ka shënuar fitore shumë të thellë në shtëpi ndaj Port Vale për t’u kualifikuar në gjysmëfinale të FA Cupit.

Jorrel Hato pas vetëm dy minutave lojë zhbllokoi rezultatin për t’i dhënë epërsinë vendasve.

Ndërsa ishte Joao Pedro që dyfishoi epërsinë pas asistimit të bukur të Pedro Netos (25’).

Situata veçse u përkeqësua kur Jordan Lawerence-Gabriel shënoi një autogol duke e devijuar goditjen e vendasve (42’).

Chelsea ishte edhe më e mirë në pjesën e dytë, ku Tosin Adarabioyo shënoi me kokë një gol fantastik për rezultatin 4-0 (57’).

Për golin e pestë pastaj u përkujdes Andrey Santos, i cili u gjend në vendin e duhur pas një topi të kthyer (69’).

Talenti Estevao po ashtu e gjeti rrugën drejtë golit, pavarësisht që fillimisht iu anulua goli për pozitë jashtë loje (85’).

Kurse, për epilogun përfundimtar 7-0 u sigurua Alejandro Garnacho duke realizuar nga pika e bardhë (90+2’)./Telegrafi/

Manchester City ka shënuar fitore të thellë me rezultat 4-0 në shtëpi ndaj Liverpoolit në kuadër të çerekfinaleve të FA Cup.

Ndeshja filloi me tension të lartë dhe raste të pastra për të dy ekipet. Në minutën e 15-të, Mohamed Salah arriti të gjejë hapësirën brenda zonës, por përpjekja e tij u ndal nga një mbrojtës i Cityt.

Pak më vonë, në minutën e 27-të, Hugo Ekitike humbi një rast të pastër për Liverpoolin duke e dërguar topin ngushtë mbi traversë.

Ndeshja u hap plotësisht në minutën e 37-të, kur Virgil Van Dijk bëri një ndërhyrje të gabuar dhe gjyqtari Michael Oliver akordoi penallti për Cityn.

Erling Haaland nuk gaboi, duke e dërguar topin në këndin e poshtëm të djathtë të portës, për të shënuar 1-0.

Vetëm pesë minuta më vonë, në minutën e 42-të, Haaland dyfishoi avantazhin me një kokë nga një pasim i kujdesshëm i Antoine Semenyo për rezultatin 2-0.

Pas pushimit, City nuk e ulën ritmin. Në minutën e 50-të, Semenyo shënoi golin e tij personal, duke e çuar rezultatin në 3-0.

Vetëm shtatë minuta më vonë, Haaland vulosi ndeshjen me golin e tij të tretë personal, duke shfrytëzuar një pasim të saktë brenda zonës dhe duke e futur topin nën traversë për rezultatin 4-0.

‘Të Kuqtë’ patën mundësinë të shënojnë ‘golin e nderit’ në minutën e 64-të, por Salah dështoi të realizojë nga penalltia./Telegrafi/

Manchester City dhe Liverpooli kanë konfirmuar formacionet e tyre për ndeshjen e sotme të çerekfinales së FA Cup në ‘Etihad Stadium’, që nis me fillim nga ora 13:45.

Skuadra e Pep Guardiolës synon të bëhet ekipi i parë në historinë e turneut që arrin tetë gjysmëfinale radhazi në FA Cup.

Megjithatë, ata do të duhet të mposhtin një Liverpool që ka pasur vështirësi këtë sezon, dhe Arne Slot mund ta shohë FA Cup si mundësinë më të mirë për të fituar një trofe këtë vit.

Guardiola ka bërë një ndryshim në formacionin titullar që mposhti Arsenal në finalen e Carabao Cup.

Në formacionin titullar ai ka aktivizuar Marc Guehin, ndërsa Nathan Ake kalon në stol për ndeshjen e sotme.

Në anën tjetër te Liverpooli po ashtu janë aktivizuar emra si Van Dijk, Salah, Szoboszlai, Wirtz dhe Ekitike.

Formacionet zyrtare:

Man City: Trafford, Nunes, Khusanov, Guehi, O’Reilly, Rodri, Silva, Semenyo, Cherki, Doku, Haaland.

Liverpool: Mamardashvili, Kerkez, Van Dijk, Konate, Gomez, Jones, Gravenberch, Wirtz, Szoboszlai, Salah, Ekitike.

/Telegrafi/

Sunderlandi përgatitet për ndeshjen e ardhshme të Ligës Premier ndaj Brightonit të shtunën, pas eliminimit të papritur nga Port Vale në Kupën FA.

Granit Xhaka, kapiteni i Sunderlandit, nuk ishte në formacionin startues gjatë këtij takimi, një vendim që ka shkaktuar diskutime mes tifozëve dhe analistëve.

Trajneri i Sunderlandit, Regis Le Bris, ka sqaruar se vendimi ishte i menduar për të ruajtur gjendjen fizike të Xhakës për ndeshjet e mbetura të Ligës Premier.

“Duhet ta menaxhojmë ngarkesën e Xhakës”, ka thënë Le Bris në një konferencë për shtyp, duke theksuar se objektivi kryesor i klubit mbetet mbijetesa dhe performanca në ligën elitare angleze.

Le Bris ka theksuar rëndësinë e Xhakës në dinamikën e skuadrës.

“Premier Liga është prioriteti ynë i parë, 100 %. Është thelbësore të menaxhojmë Granitin. Ekipi funksionon më mirë me të, por patëm tre ndeshje brenda një jave”.

“Nuk deshëm ta rrezikonim deri në fund, sepse ai mund të ndryshojë ritmin e lojës. Për të ardhmen e Sunderlandit, na duhet Graniti në formë të mirë”.

Vendimi për të kursyer Xhakën vjen pas një eliminimi zhgënjyes nga Kupa FA, që mund të jetë një goditje për skuadrën, por Le Bris duket se fokusohet tek qëllimet afatgjata të klubit.

Sunderlandi ka ende nëntë ndeshje për të luajtur në Ligën Premier këtë sezon, dhe çdo pikë ka rëndësi për qëndrimin në elitën e futbollit anglez. /Telegrafi/

Edicioni 2025/26 i FA Cup ka dhuruar tashmë shumë emocione dhe surpriza, dhe duket se faza e çerekfinaleve do të sjellë edhe momente të paharrueshme.

Në raundin e tretë, Crystal Palace u eliminua nga Macclesfield, një skuadër jashtë ligave të larta, duke shkaktuar një nga surprizat më të mëdha në historinë e këtij turneu.

Në raundin e katërt pati shumë drama, ku mungesa e VAR-i solli gabime në favor të Aston Villas, por Newcastle United arriti të rikuperojë dhe të fitojë 3-1.

Në raundin e pestë, Sunderland humbi 1-0 ndaj Port Vale, pavarësisht se klubi nga Liga Premier ndodhet 57 pozicione më lart në piramidën e futbollit anglez.

Derbi padyshim, është përballja mes Manchester City dhe Liverpool, ndërsa Arsenal do të përballet me Southampton.

Chelsea e ka më lehtë me Port Valen, ndërsa West Ham dhe Brentford, ku fituesi do të ndeshet me Leeds United.

Tani, tetë skuadrat e mbetura do të zhvillojnë çerekfinalet gjatë fundjavës së 4 dhe 5 prillit 2026.

Ndeshjet çerekfinale

Southampton – Arsenal

Chelsea – Port Vale

Manchester City – Liverpool

West Ham/Brentford – Leeds United

/Telegrafi/

Trajneri i Manchester City, Pep Guardiola, ishte i tërbuar me vendimet e gjyqtarit gjatë ndeshjes së FA Cup kundër Newcastle United. Ai madje mori edhe një karton të verdhë pas një debati të ashpër për një ndërhyrje ndaj Jeremy Doku.

Pas ndeshjes, Guardiola u ankua për atë që e cilësoi si mungesë konsistence në vendimet e arbitrimit.

“Nuk ka të bëjë me një penallti apo jo, ndodhi. Ka gjithmonë situata që është e vështirë për mua t’i kuptoj, sepse faulli ndaj Jeremy-t është shumë i qartë, kështu që nuk do të hesht”, tha Guardiola për TNT Sports.

Ai shtoi se situata të tilla kanë ndodhur shumë herë dhe se vendime të caktuara mbeten të pakuptueshme për të.

“Mund të bësh një gabim, penallti ose jo. Por mënyra si ndodh aksioni është e qartë. Kur Jeremy kalon Kieran Trippier me driblim drejt portës dhe tërhiqet nga prapa, zakonisht është faull – përveç këtu”, u shpreh trajneri spanjoll.

Guardiola ironizoi edhe kartonin e verdhë të marrë, duke thënë: “Kemi të gjitha rekordet në këtë vend. Madje edhe trajnerin me më shumë kartonë të verdhë, kështu që jam shumë krenar për këtë.”

Ky ishte kartoni i gjashtë i verdhë për Guardiolën këtë sezon, që do të thotë se ai do të pezullohet për ndeshjen e Ligës Premier kundër West Ham United dhe për çerekfinalen e FA Cup.

Megjithatë, pezullimi nuk do të ndikojë në praninë e tij në finalen e EFL Cup, e cila zhvillohet më 22 mars. /Telegrafi/

Pas Premier League, një tjetër garë e fortë projektohet për trofeun e dytë për nga rëndësia futbollin anglez.

Bëhet fjalë për FA Cup, ose Kupën e Federatës, turneu më i vjetër i futbollit në botë, ku të gjithë favoritët kanë siguruar kualifikimin për në fazën çerefinale.

Të fundit ishin Arsenal, Manchester City dhe Chelsea.

“Topçinjtë” e Londrës duket se nuk kanë ndërmend të falin asgjë në këtë sezon.

Pasi kryesojnë Premier dhe deri tani kanë bërë një paraqitje spektakolare në Champions, të besuarit e Arteta ui kualifikimin në raundin tjetër të FA Cup, pasi mundën në tansfertë 2-1 Mansfield.

Madurke shënoi golin e epërsisë për londinezët në pjesën e parë, ndërsa pas pushimit, vendasit barazuan shifrat me Evans. Por shpresat e tyre për një suprizë të madhe u shuan nga Eze, që në minutën e 66 shënoi golin e fitores dhe të kualifikimit për Arsenal.

Ashtu si në kampionat edhe Manchester City vijon ndjekjen në këtë turne të Kupës së Federatës.

Po në transfertë, por ndaj një rivali shumë të fortë si Njukasëll, skuadra e Guardiola fitoi me rezultatin 3-1.

Madje , “Cityzens” përmbysën epërsinë e shpejetë të vendasve të sigluar nga Barnes.

Savinjo barazoi shifrat në pjesën e parë, ndërsa pas pushimit, Marmoush shënoi dy golat e tjerë për Manchester City, që merr biletën për në çerekfinalet e turneut.

Mes favoritëve, një vend fiton edhe Chelsea.

Blutë e Londrës kaluan me shumë vështirësi dhe vetëm pas kohës shtesë 4-2 Ërexham.

Më parë në çerekfinalet e FA Cup ishte kualifikuar edhe Liverpool.

Manchester City ka siguruar kualifikimin në çerekfinale të FA Cup pasi mposhti Neëcastle United me rezultat 3-1 në ndeshjen e fazës së 1/8-ës.

Takimi nisi më mirë për vendasit, të cilët kaluan në epërsi në minutën e 18-të. Sandro Tonali dha një pasim të shkëlqyer për Harvey Barnes, i cili depërtoi në zonë dhe realizoi një goditje të fuqishme në këndin e sipërm të portës për rezultatin 1-0.

Megjithatë, reagimi i mysafirëve nuk vonoi shumë. Në minutën e 39-të, Savinho mori një pasim perfekt në thellësi, doli i vetëm përballë portierit dhe shënoi me një goditje të ulët për të barazuar rezultatin në 1-1, rezultat me të cilin përfundoi pjesa e parë.

Në pjesën e dytë, Manchester City mori kontrollin e lojës. Në minutën e 47-të, Matheus Nunes shërbeu bukur për Omar Marmoush, i cili brenda zonës ishte i pambuluar dhe realizoi për përmbysjen 2-1.

City vazhdoi të ushtrojë presion dhe në minutën e 65-të vulosi fitoren. Sërish protagonisti ishte Omar Marmoush, i cili këtë herë goditi nga distanca, duke e dërguar topin në këndin e sipërm të majtë të portës për rezultatin përfundimtar 301, pas asistimit të Matheus Nunes.

Me këtë fitore, Manchester City siguron një vend në çerekfinalet e FA Cup, ndërsa Neëcastle eliminohet nga gara./Telegrafi/

Liverpooli ka shënuar fitore bindëse në udhëtim te Wolvesi për t’u kualifikuar në 1/8 e finales për FA Cup.

“Reds” zhvilluan një paraqitje fantastike për të triumfuar me rezultat 1-3.

Andy Robertson pas asistimit të Curtis jones shënoi për të kaluar “Reds” në epërsi (51’).

Ndërsa, vetëm dy minuta më vonë ai asistoi për Mohamed Salah, i cili dyfishoi epërsinë (53’).

Ndërkohë, fitoren e Liverpoolit dhe njëkohësisht kualifikimin e siguroi Curtis Jones pas asistimit të Gravenberch (74’).

E tëra që bëri Wolves ishte goli i nderit falë Hwang Hee-Chan (90+1’).

Liverpooli kësisoj siguron kualifikimin në 1/8 e finales dhe kundërshtarin do ta mësojë pas hedhjes së shortit./Telegrafi/

Futbollistët e Chelsea janë përballur me kritika të ashpra në rrjetet sociale pasi një video u bë virale, duke treguar disa prej lojtarëve teksa injorojnë një grup fëmijësh të Hull City para ndeshjes së FA Cup.

Pamjet, të publikuara fillimisht nga faqja zyrtare e klubit në platformën X, tregojnë kapitenin Reece James duke udhëhequr skuadrën drejt zhveshtores së mysafirëve në stadiumin MKM.

Pas tij shihen edhe lojtarë si Tosin Adarabioyo, Liam Delap, Robert Sanchez, Andrey Santos, Estevao Willian dhe Joao Pedro.

Në video shihet qartë se asnjëri prej tyre nuk ndalet apo përshëndet fëmijët, të cilët qëndrojnë të emocionuar pranë tunelit. Në një moment, Delap duket sikur po afrohet drejt tyre, por më pas i injoron për të përqafuar një punonjëse të klubit vendas.

“I dashur Chelsea – mësoji fëmijët-burra që paguhen shumë që të paktën t’i përshëndesin fëmijët ndërsa kalojnë dhe të zhvillojnë një personalitet”, shkroi një tifoz në përgjigje.

Edhe pse Chelsea fitoi bindshëm 4-0 – me tre gola nga Pedro Neto dhe një tjetër nga Estevao – reagimi në internet ka qenë negativ. Shumë tifozë e cilësuan sjelljen si “të turpshme” dhe kërkuan që klubi të ftojë maskotat për një vizitë në qendrën stërvitore si formë kërkim-faljeje.

Rasti rikthen në vëmendje incidente të ngjashme në të kaluarën. Dy vite më parë, Chelsea u kritikua kur një maskotë u la vetëm në fushë para ndeshjes ndaj Liverpool FC në Anfield. Ndërsa së fundmi, edhe lojtarët e Newcastle United u përballën me kritika për një situatë të ngjashme.

Ngjarja ka hapur debat mbi përgjegjësinë e futbollistëve profesionistë si modele për fëmijët dhe tifozët e rinj. /Telegrafi/

Noni Madueke mendon se tifozët e Arsenali kanë çdo të drejtë të jenë të entuziazmuar për pjesën e mbetur të sezonit, pasi skuadra mbajti gjallë shpresat për katër trofe me fitoren 4-0 ndaj Wigan Athletic në FA Cup.

Madueke hapi serinë e golave teksa Arsenali kaloi në epërsi prej katër golash brenda 27 minutave të para të dielën, duke u bërë skuadra e parë nga Liga Premier që shënon katër gola brenda gjysmë ore në një ndeshje të FA Cup.

Skuadra e drejtuar nga Mikel Arteta mbetet në garë për të fituar të katër trofetë madhorë të disponueshëm në sezonin 2025-26. I pyetur nëse tifozët duhet të entuziazmohen, Madueke u shpreh për TNT Sports:

“Mendoj se kanë çdo të drejtë të jenë të entuziazmuar”.

“Ne po punojmë shumë për të ofruar nivelin që duhet të kemi me paraqitjet tona tani”.

“Ky është fokusi ynë kryesor dhe mendoj se është emocionuese, por duhet të vazhdojmë të bëjmë gjërat e duhura çdo ditë”.

Pasi asistoi edhe për Martinellin, Eze u bë lojtari i parë i Arsenalit që jep dy asistime në një ndeshje të FA Cup në “Emirates Stadium” që nga Hector Bellerin kundër Sunderland në janar 2016.

Eze ishte kritikuar pas paraqitjes kundër Brentfordit në ndeshjen e fundit, por Madueke u shpreh i lumtur që bashkëlojtari i tij rikujtoi cilësitë që zotëron.

“Ai ishte i jashtëzakonshëm sot. Ai kontrolloi gjithçka nga mesi i fushës dhe pati dorë në të gjithë golat. Jam shumë i lumtur për të”./Telegrafi

Arsenali ka siguruar “biletën” për në fazën tjetër të FA Cup, me një fitore të thellë ndaj Wigan.

“Topçinjtë” fituan me rezultat 4-0, sfidë ku të gjitha golat i shënuan në pjesën e parë për ta siguruar kualifikimin.

Noni Madueke shënoi një gol të bukur pas asistimit të Eze për të zhbllokuar epërsinë (11’).

Shtatë minuta më vonë, Eze asistoi për Gabriel Martinellin që dyfishoi epërsinë (18’).

Hunt pastaj shënoi një autogol në përpjekje për ta larguar topin nga një goditje e skuadrës londineze (23’).

Kurse, fitoren e vulosi Gabriel Jesus pas asistimit të Norgaard (27’).

Kësisoj, Arsenali iu bashkohet skuadrave favorite në fazën tjetër të FA Cup, kurse kundërshtarin për raundin tjetër do ta mësojë pas hedhjes së shortit./Telegrafi

Liverpooli gjithashtu e ka prerë biletën për në fazën tjetër të FA Cup, me një fitore bindëse ndaj Brightonit.

“Reds” shkëlqyen pavarësisht që pushuan disa nga lojtarët kryesorë, për të triumfuar me rezultat 3-0.

Curtis Jones me një finalizim të saktë pas asistimit të Milos Kerkez zhbllokoi rezultatin për të kaluar Liverpoolin në epërsi (42’).

Ndërsa, ishte Dominik Szoboszlai që shënoi një supergol për ta dyfishuar epërsinë (56’).

Kurse, fitoren e vulosi Mohamed Salah nga pika e bardhë pasi Van Hecke shkaktoi penallti, duke goditur kundërshtarin në këmbë (68’).

Liverpooli kësisoj iu bashkohet skuadrave tjera favorite për këtë trofe në fazën tjetër, ndërsa kundërshtarin do ta mësojë për tërheqjes së shortit./Telegrafi

Manchester City ka shënuar fitore komode në shtëpi ndaj Salfordit për ta siguruar avancimin në fazën tjetër të FA Cup.

“Qytetarët” triumfuan me rezultat 2-0 ndaj Salfordit, sfidë që e dominuan plotësisht.

Dorrington në përpjekje për ta larguar topin e dërgoi brenda rrjetës kësisoj City mori epërsinë pas vetëm gjashtë minutave lojë.

Tutje, mysafirët arritën të mbrohen për mrekulli deri në minutën e 81-të, kur në skenë doli Marc Guehi që shënoi me kokë për ta vulosur fitoren (81’).

Kësisoj City avancon në fazën tjetër ndërsa kundërshtarin do ta mësojë pas hedhjes së shortit./Telegrafi

Tensionet kanë arritur kulmin në zyrat e klubit nga Merseyside, ku duket se durimi i bordit më në fund ka shteruar këtë javë. Liverpooli ka marrë një vendim drastik në lidhje me të ardhmen e menjëhershme të Arne Slot pas rezultateve të paqëndrueshme të kohëve të fundit.

Slot ka marrë një mesazh të qartë: lufta për titullin e ligës vendase është lënë në plan të dytë për drejtuesit e lartë. Fokusi tani është vetëm në fitimin e Ligës së Kampionëve ose Kupës FA për të shpëtuar punën e tij.

Liverpooli nuk është i gatshëm të pranojë një tjetër sezon pa trofe prestigjiozë, veçanërisht pas shpenzimeve të konsiderueshme financiare të bëra në afatin e fundit të transferimeve. Investimet masive tani e detyrojnë trajnerin holandez të japë rezultate të prekshme para se të përfundojë sezoni aktual.

Menaxhmenti i klubit nga Anfield bëri një shpenzim historik për të sjellë yje si Florian Wirtz dhe Alexander Isak. Këta emra, së bashku me Hugo Ekitike, Jeremie Frimpong dhe Milos Kerkez, i rritën pritjet e tifozëve në nivele të papara.

Slot nuk ka arritur t’i komponojë këta yje për të konkurruar me qëndrueshmërinë e nevojshme në Ligën Premier, e cila është gjithmonë kërkuese. Mungesa e rrjedhshmërisë në lojën e tyre kolektive ka ngritur dyshime të arsyeshme rreth aftësisë së trajnerit për të udhëhequr këtë projekt ambicioz.

Liverpooli aktualisht ndodhet në vendin e gjashtë në tabelën e ligës me 42 pikë deri tani me një diferencë prej dy pikësh ndaj Chelseat dhe tri pikësh ndaj Manchester Unitedit, duke ndezur kambanat e alarmit brenda klubit.

Mungesa e kualifikimit në garën më të madhe evropiane për klube do të ishte një katastrofë financiare që klubi nuk është i gatshëm ta lejojë.

Nëse Slot nuk siguron të paktën një kupë, largimi i tij në qershor është i pashmangshëm. Hierarkia e Liverpulit tashmë e ka në mendje pasardhësin e tij ideal për të ndryshuar fatin e një skuadre me kaq shumë potencial.

Xabi Alonso duket të jetë kandidati i përbashkët për të marrë drejtimin e projektit sportiv nëse shkarkimi miratohet. Spanjolli është i preferuari sentimental dhe profesional i një baze tifozësh që mezi presin të shohin një nga idhujt e tyre në fushën teknike.

Liverpooli e di se nuk ka vend për gabime për trajnerin aktual në raundet e mbetura të eliminimit direkt. Çdo ndeshje e Kupës FA dhe Ligës së Kampionëve do të trajtohet si një finale për punën e tij. /Telegrafi/