Ushtarët gjermanë nga Komanda Rajonale Lindje (RC-E) e KFOR, po vazhdojnë patrullimet e rregullta në disa komuna në veriun e Kosovës, në kuadër të zonës së tyre të përgjegjësisë.

Përmes këtyre aktiviteteve, personeli i KFOR-it ruan vetëdijen situacionale dhe kontribuon në stabilitetin e përgjithshëm në rajon, duke reflektuar përkushtimin e vazhdueshëm të KFOR-it për garantimin e një mjedisi të sigurt dhe të qetë për të gjithë qytetarët e Kosovës.

KFOR vazhdon zbatimin e mandatit të saj, për të kontribuar në një mjedis të sigurt dhe të qetë për të gjithë njerëzit që jetojnë në Kosovë, si dhe për të garantuar lirinë e lëvizjes.

Në ushtrimin e detyrave të saj, KFOR bashkëpunon ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX), secili në përputhje me rolin e tij si reagues i sigurisë./Telegrafi/

Në mesditën e 29 janarit të vitit 2001 në veri të Mitrovicës u hodhën dy granate dore, ku si pasojë kishte mbetur i vrarë 15 vjeçari, Gazmend Ibrahimi dhe ishte plagosur vëllai i tij, Armendi.

25 vite më vonë familjarët e Gazmend Ibrahimi, rrëfejnë për KosovaPress, se si sulmit i priu tensioni i vazhdueshëm mes serbëve dhe shqiptarëve për largimin e këtyre të fundit nga shtëpitë e tyre. Ata treguan se gjatë kësaj periudhe vetëm kishin filluar të bëjnë roje në këtë zonë.

Gazmendi nga familjarët kujtohet si një djalë i qet dhe me një vullnet të madh për jetën, ndërsa dëshira e tij e vetme ishte që gjithmonë të jetonte në vendlindje.

Disa ditë para rastit serbët e kishin larguar një familje shqiptare me forcë nga shtëpia në pjesën e epërme të rrugës, çka i shtyu banorët të organizohen dhe të bëjnë roje natë pas nate, nga frika e përshkallëzimit dhe tentimeve të tjera për dëbime.

“Kjo ka ndodhur më 29 janar...Kjo kishte ndodhur disa ditë më herët, disa serbë, një familje, e kanë larguar prej një pjesë më lart të rrugës, aty ku ka ndodhur ngjarja, veç një pjesë më lart e kanë larguar prej shtëpisë. Edhe këta banorët e lagjes filluan të organizohen, bënin roje për mos me ardh prapë deri tek largimi i familjes, sepse ata tentonin çdoherë të na largojnë prej lagjes, prej shtëpive, dhe kështu bënin roje çdo natë për mos me ardh prapë të ndonjë ekses, të ndonjë largimi të ndonjë familjeje. Kështu që deri më datën 29, kur ndodhi rasti, roje kanë bërë mirë, por serbët kanë qenë të organizuar dhe me numër të madh; një rrugë më lart kanë kaluar kjo masë e madhe dhe i kanë hedhur dy granata dore. Gazmendi është vrarë, janë plagosur edhe shumë, shumë banorë të lagjes, po ashtu edhe vëllai i Gazmendit, Armendi, ka qenë i plagosur në mesin e tyre”- tha Ibrahimi.

Familja e mori lajmin pak çaste pas shpërthimeve, pasi kishte dëgjuar granatat, por pa e ditur saktësisht çfarë kishte ndodhur, pasi në atë moment ndodheshin në shtëpi, në të njëjtën lagje ku ndodhi rasti.

“Po e kemi marrë vesh se e kemi dëgjuar edhe granatat kur janë hedhur, por s’kemi ditur saktë, se unë kam qenë në shtëpi këtu, në lagjen bash në atë vendin ku ka ndodhur, edhe kemi marrë vesh prej fqinjëve këtu. Na kanë lajmëruar në spital, mirëpo ka ndërruar jetë, edhe e kemi marrë vesh menjëherë. Lajmi i vështirë, por duhet me u pajtu, ka ndodhur kjo”– tha Agim Ibrahimi.

Ai thotë se pas djegies së shtëpive, familja nuk kishte ku të kthehej dhe për rreth tetë muaj qëndroi te miqtë, derisa rregulluan një dhomë të vogël dhe u kthyen në lagje.

“Po ka qenë dëshira me u kthyer në shtëpi, mirëpo shtëpitë, si shumica në Kosovë që kanë qenë të djegura, nuk kemi pas ku të kthehemi këtu. Mirëpo kemi qëndruar te miqtë, te dajtë e Gazmendit, rreth 8 muaj. Afro 8 muaj më vonë kam ardhur dhe e kam meremetuar, u ka bërë një dhomë të vogël aty tek një shtëpi e vogël, e kam rregulluar sa me u kthyer, dhe jemi kthyer këtu për të banuar. Me kalimin e kohës kështu ka vazhduar, derisa kemi filluar edhe ndërtimin e shtëpisë. Por vullnetin më të madh e ka pasur i ndjeri Gazmendi shumë për jetë, dhe ne të gjithë kemi qenë të vendosur të mbetemi këtu, mos me u larguar prej këtu. Në Shqipëri kemi qenë deri kur kanë filluar me u kthyer, kur kanë hyrë forcat e NATO-s, dhe ne jemi kthyer pas disa ditëve”- deklaroi Agim Brahimi babai i Gazmend Ibrahimit.

Agim Ibrahimi përfundon rrëfimin duke treguar se Gazmendi gjithmonë dëshironte të kthehej në shtëpi. Ai kishte një dashuri të madhe për jetën, ishte i hapur, i vendosur dhe me vullnet të fortë për gjithçka, veçanërisht për të qëndruar në vendlindjen e tij.

“Po shumë ka pasur fjalë, thoshte çdoherë: “Po, po kthehemi në shtëpi.” Ai çdo ditë vinte; ne kemi banuar në Tavnik. Ai shpesh vinte, e kishte shoqërinë e tij, dhe ne thoshim: “Jo, s’duam me u kthyer, jo s’duam me u kthyer.” Por ktheheshim, ktheheshim, dhe gjithmonë kishte vullnet për t’u kthyer këtu, ku ka jetuar dhe ku ka lindur. Gazi ka qenë shumë, shumë fëmijë, e ka dashur jetën, ka qenë i hapur dhe e ka dashur jetën shumë, shumë, shumë, e ka dashur gjithçka, ka pasur vullnet për jetën dhe për gjithçka“- ka përfunduar ai.

Me 29 janar 2001, nga hedhja e një granate u vra 15-vjeçari Gazmend Ibrahimi, ndërsa u plagos vëllai i tij, Armend Ibrahimi. Sot shënohen 25 vjet nga kjo humbje.

Policia e Kosovës ka realizuar një aksion në veri, ku gjatë kontrollit në një shtëpi të braktisur në lagjen Bërxhane, Mitrovicë Veriore, u gjetën dhe u sekuestruan armë, municion dhe mjete të tjera ilegale.

Sipas njoftimit të Drejtoria Rajonale të Policisë në Mitrovicë Veri, gjatë aksionit janë gjetur mes të tjerash:

Karikatorë të zbrazët për armë të gjata dhe bajonet;

Shishe plastike me saqme, kapsula për fishekë dhe sasi baruti;

Minë kundër këmbësorik me detonator;

Pjesë për mbushje fisheku, targa të automjeteve të ish-Milicisë;

Fishekë të armës së gjuetisë dhe të kalibrave të ndryshëm;

Pajisje ushtarake dhe veshje, përfshirë xhaketa dhe doreza ushtarake, si dhe këmisha të Policisë së Serbisë.

Për shkak të materialit të rrezikshëm eksploziv, në vendngjarje ka ndërhyrë Njësia për Trajtimin e Mjeteve Eksplozive (NJTME), e cila ka larguar sasinë e barutit, fishekët e kalibrave 12.7 mm dhe 20 mm, si dhe minën me detonator.

Rasti është raportuar tek Prokurori i Shtetit, i cili ka udhëzuar inicimin e procedurave për veprën penale “Mbajtje në pronësi, kontroll ose posedim të paautorizuar të armëve”. Aktualisht nuk ka persona të arrestuar, ndërsa hetimet vazhdojnë.

Policia e Kosovës ka falënderuar qytetarët për bashkëpunimin dhe ka ftuar që çdo informacion që mund të ndihmojë në ruajtjen e rendit dhe sigurisë publike të raportohet në numrin emergjent 192.

Rrjeti Telegram, një platformë me prezencë të madhe në komunitetin serb, u mbush me mesazhe urrejtjeje vetëm pak minuta pasi u publikua në një medium lokal në zonën veriore të vendit lajmi se “policia kishte rrahur disa të rinj”, i cili më vonë doli të ishte sajesë.

Prokuroria Speciale e Kosovës, për një kohë të gjatë, ka hetuar grupe nacionaliste që veprojnë në veriun e Kosovës, si grupe të rrezikshme që indoktrinojnë të rinjtë për të zhvilluar aktivitete kriminale.

Me vendim të Qeverisë së Kosovës, dy organizata në këtë zonë janë shpallur terroriste, ndërsa platformat e rrjeteve sociale, si Telegrami, janë evidentuar si hapësira ku mesazhe nacionaliste të dhunës, kryesisht me përmbajtje hakmarrëse, shpërndahen në vazhdimësi.

Më 13 janar 2026, një medium lokal publikoi një intervistë me Sasha Bllazhiq. Ai pretendonte se djali i tij ishte sulmuar nga policia në njërën nga pikat e kontrollit policor.

E njohur si pika e Urës së Bistricës, pika e kontrollit të Policisë u vendos në këtë lokacion gjatë vitit 2021, në kohën kur në këtë zonë kishte barrikada.

Autoritetet e Kosovës asokohe e arsyetuan vendosjen e kësaj pike me nevojën për shtim të kontrolleve kundër kontrabandës, ndërsa aktivistë politikë lokalë e kishin kritikuar vendosjen e saj.

Ndërkohë në rrjetet sociale, sidomos në Telegram, grupet e ekstremit të djathtë kryesisht të orientimit nacionalist kanë shpërndarë mijëra mesazhe përmes të cilave pretendohej se në këtë zonë qytetarët torturohen dhe ndëshkohen në baza etnike.

Mbrëmjen e 13 janarit, qytetarët që ndjekin mediat në gjuhën serbe u rinjoftuan se në këtë pikë kishte sërish “dhunë ndaj disa të rinjve”.

E kritikuar në vazhdimësi në rrjetet sociale, Policia e Kosovës ka vendosur kamera të sigurisë në secilin cep të pikës së kontrollit, ndërsa përdorë edhe kamera të trupit për policët që zhvillojnë kontrollet.

“Siç ka treguar Vukashini, ai polici me maskë ia ka marrë telefonin, e ka hequr stikerin, ia ka hedhur Vukashinit në fytyrë dhe fëmijën tim me fanelë me mëngë të shkurta e kanë dërguar te shtylla e betonit, e kanë kapur për dore dhe e kanë tërhequr deri aty. Aty e kanë kontrolluar dhe shqelmuar. Ia kanë hedhur dokumentet në veturë dhe i kanë thënë se mund të vazhdojë rrugën”- kishte pretenduar Sasha Bllazhiq- babai i viktimës.

Ai e kishte dhënë intervistën para derës së spitalit ku djali i tij po merrte trajtim mjekësor.

Një pamje e tillë e viktimizimit u përdor tutje për të nxitur një reagim të shpejtë në rrjetin Telegram ku dhjetëra mesazhe vërshuan me thirrjet se “ushtria serbe do të kthehet në Kosovë” dhe serbët do mbrohen vetëm kur ushtria serbe të jetë në Kosovë.

Të nxitura nga grupet ento-nacionaliste, platformat online në vazhdimësi kanë synuar kontestimin e autoriteteve ligjore në Kosovë.

Por, pak orë më vonë situata u qartësua. Një grup hetimor do zbardhte pamjet e kamerave të sigurisë, ndërsa denoncimi do të ndryshonte kahun.

I riu Vukshin Bllazhiq- nga viktima do kthehej në të pandehur. Pamjet nga kamerat e sigurisë do tregonin se ai nuk ishte rrahur nga policia.

“Në rregull. Nderimet e mia. Të them të drejtën tani u zgjova. E kam parë mesazhin, u konsultova me avokatin tim. Avokati më tha që të mos jap deklaratë për gazetarët tanë. E pyeta për median tuaj, [por] më tha të mos jap asnjë deklaratë në mënyrë që të mos i shkaktoj problem vetes, meqë gjykimi është në vazhdim. Kaq mund t’ju them”- theksoi Bllazhiq kur pyetet për rrjedhën e ngjarjes.

Bllazhiq ishte paraqitur për t’u trajtuar në spitalin e Mitrovicës së Veriut dhe i ati kishte dhënë intervistën para derës së spitalit. Hetimet ende nuk e kanë zbardhur në tërësi se ku ishte lënduar Bllazhiq, por ato e zbardhën se ai nuk u lëndua nga policia.

“Menjëherë pasi është lajmëruar nga spitali, zyrtarët policorë kanë shkuar aty, mirëpo i njëjti nuk ka dashur të flas me zyrtarët policorë. Më pas është thirrur Inspektorati Policor i Kosovës, dhe me urdhër të prokurorit kujdestar është arritur të intervistohet pala i cili po ashtu ka pretenduar se është keqtrajtuar nga zyrtarët policorë. Dhe, ne menjëherë kemi filluar me hetimet”- thotë Veton Elshani, zëvendësdrejtor i Policisë për Mitrovicën e Veriut.

Rregullat ligjore në Kosovë kërkojnë që në rastet kur policët dyshohet se kanë kryer një vepër penale i tërë institucioni përjashtohet nga hetimi.

Një mekanizëm i veçantë hetimi është ngritur për të hetuar veprimet e kundërligjshme të policisë. Në vend ky institucion njihet si Inspektorati Policor i Kosovës.

Bardhyl Haxhimustafa, udhëheqës i Departamentit të Hetimeve në IPK, thekson se hetuesit kanë dalë në vendin e ngjarjes dhe kanë filluar me hetimet qysh atë natë kur është lajmëruar rasti.

“Ne jemi thirr nga Policia e Kosovës, se një ankues ka pretendime se ka pësuar lëndime nga zyrtarët policorë. Ne e kemi intervistuar fillimisht aty dhe e kemi vet për vendin dhe kohën kur dhe ku ka ndodh. Më pas, me urdhër të prokurorit kemi shkuar në nënstacionin e pikës tek Ura e Bistricës dhe kemi tërhequr kamerat e sigurisë në të cilat shihet ndryshe ngjarja dhe jo ashtu qysh e thotë ankuesi” – thekson Haxhimustafa.

Prokurori Muharrem Prekazi, i cili ishte marr me trajtimin e këtij rasti thotë se prokuroria ka dhënë autorizime të shpejta për trajtimin e këtij pretendimi, por kamerat e sigurisë dëshmuan të kundërtën.

“Pasi kam kuptuar se behët fjalë për një ndalim tek ura e Bistricës, unë kam kërkuar të sigurohen pamjet e kamerave të sigurisë dhe kam urdhëruar intervistimin e të dyshuarit dhe ballafaqimin e tij me pamje. Kemi kërkuar nga ai që të gjendet momenti ku është sulmuar – në cilin vend – sepse ai është e vërtetë që ka pas disa plagë, mirëpo të njëjtat nuk i ka nga dhuna policore. Por, kjo është çështje që jemi duke e hetuar se ku i ka marr ato”- theksoi Prekazi.

Ankuesi Vukashin Bllazhiq, për dy ditë nuk ka pranuar të ri-intervistohet nga hetuesit e IPK-së, duke pretenduar se është i tronditur nga keqtrajtimi i zyrtarëve policorë. Dy ditë më pas, ai në prezencën e avokatit të tij u intervistua nga hetuesit e IPK. Edhe këtu, ai pretendoi se plagët që i kishte në trup i ka marr nga zyrtarët policorë

Siç përshkruhet në dosjen e lëndës, Bllazhiq kishte pas disa plagë në regjionin e qafës, kraharorit dhe disa pjesë tjera të trupit, mirëpo askund nuk shihej se ato plagë janë shkaktuar nga zyrtarët policorë. Me këtë rast, hetuesit e IPK marrin urdhër nga prokurori që ta ballafaqojnë me pamje dhe ta pyesin atë se si u keqtrajtua nga zyrtarët policorë.

“Unë kam urdhëruar hetuesit e IPK ta ballafaqojnë me pamje e kamerave të sigurisë dhe i njëjti i gjendur para kësaj situate e ka pranuar fajësinë, dhe ka kërkuar falje, mirëpo ai do t’i bartë pasojat ligjore, sepse kam urdhëruar që ndaj tij të ngritët një kallëzim për deklarim të rremë. I njëjti tashmë ka ardhur nga IPK-ja në Prokuroi dhe është duke u trajtuar”- thekson prokurori Muharrem Prekazi.

Bardhyl Haxhimustafa, udhëheqës i Departamentit të Hetimeve në IPK, ka shtuar se ankuesi i këtij rasti ka kërkuar falje për deklarimin e tij.

“Kur i ka pa pamjet e kamerave të sigurisë, ai ka kërkuar falje për deklarimin e tij, mirëpo nuk ka deklaruar asgjë rreth motivit se çka e shtyu atë të pretendoi se u sulmua nga zyrtarët policorë. Ai ka pranuar fajësinë dhe do përballet me ndëshkimet për lajmërim të rremë”- thotë Haxhimustafa.

Ai është pyetur gjithashtu për deklarimin e babait të tij në media se a mund të thotë diçka rreth deklaratës që e ka dhënë për KosovaOnline?

“Avokati na ka thënë edhe mua edhe babait që të mos japim kurrfarë informata”- theksoi Bllazhiq.

Ne video incizimin e kamerave të sigurisë që e ka siguruar emisioni KallxoPernime shihen pamjet e një kontrolli rutinë që Policia e Kosovës e bënë në bazë të planeve operative në tërë territorin e Kosovës.

Një i tillë kishte ndodhur edhe mesnatën e 13 janarit në vendin e quajtur tek ura e Bistricës, në qytetin e Leposaviqit. Aty policia po ndalonte për kontrolle rutinore veturat që kalonin andej. Me këtë rast ndalohet edhe një veturë e markës Audi. Pamjet e kamerave të sigurisë qartësojnë se në veturë gjendeshin tre persona.

Një zyrtar policor fillon të flas me shoferin e veturës dhe pasi ia kërkon dokumentet, i kërkon që ta hap edhe bagazhin. Aty, policia nuk gjen asgjë të dyshimtë dhe pasi kontrollohet vetura, shoferi dhe dy pasagjeret në veturë kontrollohen nga zyrtarët policorë. Edhe në kontrollet trupore nuk gjendet diçka e ndaluar dhe në fund, pas diku 7 minutash kohë vetura largohet nga pika e kontrollit të policisë.

Shoferi i kësaj veture më pas kishte pretenduar se ishte sulmuar nga zyrtarët policorë, por pas përfundimit të hetimeve ndaj tij u ngrit kallëzim penal për deklarim të rremë. Ai kishte disa plagë në trup, për të cilat nuk u vërtetua se ishin shkaktuar nga zyrtarët e Policisë së Kosovës, ashtu siç kishte pretenduar ai./KALLXO.

Ish-deputeti serb, Dragan Shormaz, ka reaguar pas aksionit të Policisë së Kosovës në veri të vendit, ku për herë të dytë brenda një dite janë gjetur dhe sekuestruar armë, municion dhe eksploziv në komunën e Zubin Potokut.

Shormaz ka deklaruar se presidenti i Serbisë, Aleksandar Vuçiq, po ndjek një politikë të rrezikshme ndaj Shteteve të Bashkuara të Amerikës dhe NATO-s, e cila, sipas tij, po dëmton drejtpërdrejt interesat e serbëve në Kosovë.

Sipas tij, veprimet e Vuçiqit po i largojnë serbët nga integrimi institucional.

Ai ka theksuar se serbët në Kosovë nuk do të duhej të kishin votuar për Listën Serbe dhe se qytetarët serbë, sipas tij, do të duhej t’i kishin kthyer shpinën regjimit në Beograd.

Sekuestrimi i 160 kg eksplozivi në Zubin Potok, prodhim i një kompanie serbe të lidhur me pushtetin

Reagimi i Shormazit vjen pasi Policia e Kosovës ka njoftuar se gjatë kryerjes së detyrave të rregullta policore në rajonin e veriut ka pranuar informacione për praninë e armëve dhe eksplozivit në një shtëpi të braktisur në fshatin Jagnjenicë të komunës së Zubin Potokut.

Gjatë kontrollit, njësitë policore kanë gjetur dhe sekuestruar një pushkë të tipit M48, 244 fishekë të kalibrave të ndryshëm, dy karikatorë të zbrazët, si dhe një sasi eksplozivi.

Në vendin e ngjarjes kanë intervenuar edhe njësitë për Trajtimin e Eksplozivit (EOD), të cilat kanë larguar eksplozivin në mënyrë të sigurt.

Policia e Kosovës ka bërë të ditur se të gjitha veprimet janë ndërmarrë në koordinim të plotë me Prokurorin e Shtetit, i cili ka udhëzuar inicimin e rastit për veprën penale “mbajtje në pronësi, kontroll ose posedim të paautorizuar të armëve”./Telegrafi.

Shefi i misionit të EULEX-it në Kosovë, Giovanni Pietro Barbano deklaron se situata e sigurisë në veri të vendit është e qetë dhe stabile, megjithatë konsideron që ka ende sfida dhe “nxitës të mundshëm për tensione”.

Autoritetet vendore, ai thotë se duhet t’i adresojnë këto dhe të zgjidhen përmes dialogut. Në intervistën për KosovaPress, Barbano thotë se ani pse nuk ka më mandat ekzekutiv, roli i EULEX-it në rast të tensioneve është i reaguesit të dytë të sigurisë.

Ai flet edhe për manipulimin me vota në zgjedhjet e fundit, sundimin e ligjit dhe nëse po arrin Kosova të luftojë korrupsionin.

Nga zgjedhjet lokale të 12 tetorit ka ndryshuar udhëheqësia në komunat veriore. Atje udhëheq Lista Serbe, e cila gëzon mbështetjen nga Beogradi zyrtar.

Shefi i misionit të EULEX-it në Kosovë, Giovanni Pietro Barbano tregon nëse mund të ketë ndikim kjo në situatën e sigurisë në veri.

“Situata e sigurisë në Kosovë në periudhën e fundit mund të konsiderohet e qetë dhe stabile. Ne e shohim pozitivisht kthimin e kryetarëve serbë të Kosovës në detyrë pas zgjedhjeve lokale dhe hapjen e kanaleve të komunikimit mes tyre dhe Policisë së Kosovës. Sigurisht që ka ende sfida dhe nxitës të mundshëm për tensione, por përmes dialogut dhe mbështetjes së institucioneve evropiane, besojmë se ato mund të adresohen në mënyrë paqësore....

Ka ende sfida që duhet adresuar, sidomos në integrimin e plotë të komuniteteve pakicë dhe garantimin e të drejtave të tyre brenda sistemit të Kosovës. Kjo kërkon rregullore, marrëveshje dhe diskutime që mund të zgjidhen vetëm përmes dialogut”, deklaron Barbano.

Në rast të tensioneve dhe përshkallëzimit të situatës në veri, Barbano tregon se cili është roli i EULEX-it.

“Roli ynë është ai i reaguesit të dytë të sigurisë. Nëse, shpresojmë jo, ndodhin trazira serioze civile dhe Policia e Kosovës kërkon ndihmë, ne mund të dislokohemi për ruajtjen e rendit publik dhe kontrollin e turmave. Por kjo është masa e fundit; më parë përdorim mjete dialogu, ndërmjetësimi dhe negocimi”, shprehet ai.

Në anën tjetër, në gjithë Kosovën po vazhdon rinumërimi i votave për kandidatët për deputetë, pasi është vërtetuar që ka pasur manipulim të votave.

Madje, të premten në Prizren është zhvilluar një aksion nga Prokuroria Themelore, ku janë ndaluar 109 persona.

Barbano thotë për KosovaPress se “është për të ardhur keq”, që ka pasur raste të tilla të keqpërdorimeve.

“Sa u përket zhvillimeve pas zgjedhjeve të fundit, nuk do të komentoja shumë në këtë fushë, pasi nuk është pjesë e mandatit tonë dhe ka institucione të tjera përgjegjëse. Megjithatë, një vërejtje e vetme është se është shumë pozitive që institucionet e Kosovës kanë qenë në gjendje t’i identifikojnë vetë mangësitë dhe t’i adresojnë ato. Kjo dëshmon se sistemi demokratik është i qëndrueshëm.

Është për të ardhur keq që kjo ka ndodhur, por, siç e kam theksuar gjatë takimit tim me koordinatoren nacionale të Prokurorisë së Shtetit, znj. Laura Pula, fakti që është zbuluar dhe po trajtohet në nivelin e duhur është një zhvillim shumë pozitiv. Përgjegjësia për trajtimin e këtyre çështjeve u takon plotësisht autoriteteve të prokurorisë dhe Komisionit Qendror të Zgjedhjeve”, thotë ai.

Më 28 dhjetor janë mbajtur zgjedhjet e parakohshme, për çka Barbano thotë se po ndjekin me vëmendje këto zhvillime dhe se presin formim sa më të shpejt të institucioneve.

“Së pari, ne presim që konstituimi i kuvendit të bëhet shpejt dhe pa pengesa, në përputhje me udhëzimet e Gjykatës Kushtetuese për zgjidhjen e disa çështjeve, dhe që një qeveri funksionale të formohet sa më parë. Natyrisht, ekzistojnë disa sfida që lidhen me rinumërimin e votave, si dhe me afatet e shkurtra para zgjedhjes së presidentit. Prandaj, ne po i ndjekim me vëmendje këto zhvillime, pasi zgjidhja e tyre është thelbësore për ndërtimin e institucioneve dhe të kornizës ligjore për të ardhmen.......

Nga qeveria dhe institucionet e reja, përfshirë Kuvendin e ri, ne presim që pozitat drejtuese që për një kohë të gjatë janë mbajtur me ushtrues detyre të plotësohen me menaxherë të rregullt, në mënyrë që të sigurohet një vizion afatgjatë për projektet dhe nevojat në vazhdim”, thekson ndër tjera ai.

Misioni i Bashkimit Evropian për Sundim të Ligjit në Kosovë nuk ka mandat ekzekutiv në Kosovë që nga viti 2018. Tani, Barbano thotë se qëllim kryesor kanë monitorimin e të gjithë zinxhirit të drejtësisë.

Zbatimi i ligjit në Kosovë, sipas tij, shpesh has në sfida për arsye siç i përmend ai “procedurale dhe ndërhyrjeve të papërshtatshme”. Këto sfida, Barbano thotë se janë cekur qartazi edhe në raportin e vitit të kaluar për monitorimin e drejtësisë.

“Sistemi i drejtësisë në Kosovë mbështetet në një kornizë ligjore shumë të zhvilluar dhe të avancuar, të frymëzuar nga standardet më të larta në Evropë dhe në botë. Megjithatë, ekziston një dallim ndërmjet kornizës ligjore dhe zbatimit të saj, i cili herë pas here rezulton sfidues për arsye strukturore, procedurale, për shkak të ndërhyrjeve të papërshtatshme apo faktorëve të tjerë”, thotë ndër tjera Barbano.

Ndër tjera, Barbano në intervistën për KosovaPress, tregon nëse ka pasur rritje të rasteve që kërkojnë ndërhyrjen e EULEX-it.

“Edhe pse nuk kemi më funksion ekzekutiv, veçanërisht në fushën e sigurisë, ne ende kemi rolin e reaguesit të dytë të sigurisë, i cili aktivizohet vetëm me kërkesë të shprehur nga Policia e Kosovës. Ky rol kërkon edhe aftësinë për të pasur vetëdije për situatën dhe për të identifikuar tensione të mundshme në terren. Për këtë arsye, kemi prani të njësive tona policore, kryesisht në veri, por edhe në pjesë të tjera të Kosovës kur është e nevojshme, përmes patrullimeve vëzhguese.

Ne trajnohemi vazhdimisht me Policinë e Kosovës dhe KFOR-in për të garantuar ndërveprueshmëri dhe bashkëpunim në raste nevoje. Gjatë zgjedhjeve lokale kemi dislokuar edhe njësinë rezervë policore, por fatmirësisht nuk pati nevojë për ndërhyrje, pasi zgjedhjet u zhvilluan qetë dhe pa incidente serioze”, shprehet ai.

Shefi i EULEX-it në Kosovë, po ashtu përmend edhe vonesat në gjykim në rastet e profilit të lartë.

“Gjatë këtij monitorimi kemi identifikuar disa mangësi, përfshirë kapacitetin për trajtimin e rasteve të profilit të lartë, kohëzgjatjen e proceseve gjyqësore, rigjykimet e shpeshta, trajtimin e korrupsionit, drejtësinë për të mitur dhe dhunën në familje. Po ashtu, kemi monitoruar kapacitetin e policisë për të garantuar llogaridhënie në raste të trajtimit të keq, si dhe mënyrën se si rregulloret për gjuhën e urrejtjes zbatohen dhe interpretohen në raport me lirinë e shprehjes”, deklaron Barbano./KP/

Vendimi i kryetarit aktual të Komunës së Zveçanit, Dragisha Millovi, për ndërprerjen e kontratave të dy zyrtarëve komunalë po cilësohet i kundërligjshëm. Ish-kryetari i komunës, Ilir Peci, thotë se arsyet e përmendura në vendim nuk qëndrojnë dhe se procedura është zhvilluar në kundërshtim me ligjin.

Ish-kryetari i Komunës së Zveçanit, Ilir Peci, ka thënë për KosovaPress se kryetari aktual javën e kaluar ua ka ndërprerë kontratat dy zyrtarëve komunalë, ndonëse ata ishin të punësuar me afat të pacaktuar.

Ai theksoi se arsyet e përmendura në vendim, mungesa e vlerësimit, trajnimeve dhe buxhetit, nuk qëndrojnë dhe nuk përbëjnë bazë ligjore për largimin e tyre nga puna.

“Javën e kaluar, kryetari i tanishëm ka marrë vendim dhe ua ka ndërprerë kontratat, vendimet e përgjithshme që i kanë pasur zyrtarët komunalë. Gjatë kohës sime si kryetar, ata janë punësuar me afat të pacaktuar, mirëpo pas gjashtë muajsh është dashur t’u vazhdohet emërimi, ndërsa tani u është ndërprerë kontrata me tri pika të përmendura në vendim. Këto tri pika nuk kanë të bëjnë me largimin e dy zyrtarëve. Pika e parë ka qenë se nuk është bërë vlerësimi i duhur i tyre, ndërkohë që vlerësimi është bërë sa kam qenë unë kryetar i komunës. Për momentin nuk ka pasur kush ta bëjë vlerësimin, pasi nuk ka pasur shefa sektorësh e as drejtorë, pra nuk ka pasur persona përgjegjës për vlerësim. As kryetari i komunës nuk ka thirrur ndonjë takim për të parë se çfarë pune kanë kryer këta zyrtarë gjatë gjashtë muajve. Pika e dytë është se gjoja nuk kanë kryer seminare të mjaftueshme, por seminaret nuk mund t’i kërkojnë vetë zyrtarët. Ato caktohen nga zyra e kryetarit dhe stafi i tij. Pika e tretë është se komuna e Zveçanit nuk ka buxhet, çka nuk qëndron. Çdo komunë, kur hap një vend pune, e parasheh buxhetin për tërë periudhën, sidomos kur kontratat janë me afat të pacaktuar dhe jo për gjashtë muaj apo një vit. Pra, këto tri pika nuk qëndrojnë asnjëra”, thekson Peci.

Peci tha se është njoftuar nga dy zyrtarët e larguar dhe se qëndron në mbështetje të tyre, duke theksuar se drejtësia duhet të respektohet në rastin e tyre.

“Jam lajmëruar menjëherë nga disa zyrtarë të komunës, konkretisht nga këta dy zyrtarë që janë larguar nga puna. Unë, si asamblist dhe i vetmi shqiptar në Komunën e Zveçanit, jam në mbështetje të tyre dhe në mbështetje të së drejtës”- ka deklaruar Peci

Ai ka thënë se vendimi për ndërprerjen e kontratave është i kundërligjshëm dhe tash po ndiqet në rrugë ligjore nga Këshilli dhe Gjykata.

“Në një takim kam marrë pjesë me kryetarin e tanishëm të Zveçanit dhe dy zyrtarët. I kam sqaruar se, bazuar në këto pika, bëhet fjalë për shkelje ligjore dhe se vendimi nuk është i drejtë. Megjithatë, ai është kryetar dhe e ka marrë vendimin. Tani, Këshilli apo Gjykata janë instancat ku po ndiqen të gjitha rrugët ligjore”- ka thenw Ilir Peci

Vedat Musa, i larguar nga puna në Komunën e Zveçanit, ka thënë për KosovaPress se arsyet e përmendura nga kryetari aktual Dragisha Milloviq janë skandaloze.

Musa ka shtuar se, duke qenë me akt-emërim, paga e tij duhet të sigurohet deri në daljen në pension.

“Arsyet e përmendura në vendimin për shkarkimin tim nga pozita që kam pasur, nga kryetari i tanishëm Dragisha Milloviq, janë skandaloze. E para, se komuna nuk ka buxhet të mjaftueshëm për të paguar asistentë administrativë. E dyta, se nuk ka raport vlerësimi nga drejtori apo kryetari i komunës për periudhën pesëmujore sa ka qenë kryetar Ilir Peci. Unë e di dhe e kam me vete vendimin për vlerësimin që më është bërë për periudhën pesëmujore. Po ashtu, kur shteti hap konkurs për një pozitë të caktuar, buxheti sigurohet për atë pozitë. Unë jam me akt-emërim dhe përderisa je me akt-emërim, paga të sigurohet deri në pension“- tha Musa

Ai ka thënë se po përgatitet një ankesë në Këshillin e Pavarur dhe është i bindur se vendimi do të kthehet në favorin e tyre, pasi nuk kanë kryer asnjë shkelje.

Musa shtoi se kryetari i tanishëm i ka ftuar në takim vetëm pasi kishte marrë vendimin për ndërprerjen e kontratës, pa ditur se kush ishte dhe çfarë pune kryente, çka sipas tij e bën vendimin për shkarkimin të papërshtatshëm.

“Në Këshillin e Pavarur jemi duke përgatitur ankesën për ta dorëzuar dhe jam i bindur se vendimi do të kthehet në favorin tonë, pasi nuk kemi bërë asnjë shkelje, qoftë edhe më të voglën. Nuk e di në çfarë baze është mbështetur kryetari, sepse thuhet se nuk ka vlerësim nga drejtori, ndërkohë që unë kam qenë pa drejtor, pa mbikëqyrës të drejtpërdrejtë dhe pa shef. Kryetari na ka ftuar në takim vetëm pasi kishte marrë vendimin për ndërprerjen e kontratës. Paramendojeni, ai e kishte marrë vendimin për shkëputjen e kontratës së punës dhe më pas më pyeste si e kam emrin dhe në cilën drejtori punoj. Kjo tregon se ai nuk e ka pasur idenë se kush jam dhe çfarë pune bëj, e jo më të marrë vendim për shkarkimin tim nga puna”- përfundoi ai.

Rasti i ndërprerjes së kontratave të dy zyrtarëve në Komunën e Zveçanit ka ngritur dyshime për shkelje ligjore dhe keqmenaxhim, sipas ish-kryetarit Ilir Peci dhe të larguarit Vedat Musa.

KosovaPress ka dërguar pyetje në Komunën e Zveçanit për sqarime lidhur me këtë vendim, por deri në momentin e publikimit nuk ka marrë asnjë përgjigje. /Telegrafi/

Ushtarët letonezë nga Komanda Rajonale e KFOR-it të udhëhequr nga NATO (RC-E) po zhvillojnë patrulla të rregullta në veri të Kosovës dhe përgjatë Vijës Kufitare Administrative (ABL).

Sipas njoftimit zyrtar, patrullimet kryhen në mënyrë të paanshme dhe të vazhdueshme, duke synuar rritjen e ndërgjegjësimit situativ dhe mbështetjen e stabilitetit në zonë.

“Në këtë mënyrë, ata kontribuojnë në sigurimin e një ambienti të sigurt për të gjithë qytetarët në Kosovë”, thekson njoftimi i KFOR-it.

Patrullimet e tilla konsiderohen thelbësore për të ruajtur një prani të dukshme ushtarake dhe për të mbështetur sigurinë përgjatë fushës së përgjegjësisë së RC-E.

Në Liqenin e Ujmanit, është shënuar festa ortodokse e Bogojavlenjes përmes manifestimit tradicional të notimit për Kryqin.

Në këtë aktivitet, mbi 300 qytetarë serbë u hodhën në ujërat e ftohta të liqenit, pavarësisht temperaturave të ulëta, për të tentuar ta kapin kryqin, duke shënuar kështu një numër rekord pjesëmarrësish.

Manifestimi ka tërhequr një numër të madh të pjesëmarrësve dhe shikuesve, ndërsa gjatë organizimit janë vërejtur edhe flamuj me përmbajtje provokuese, përfshirë simbole shtetërore të Federatës Ruse.

Po ashtu janë parë të veshura bluza me fytyrat e terroristëve të Banjskës.

Kisha Ortodokse Serbe ka dalë me një deklaratë publike, duke bërë të ditur se për arsye sigurie dhe për shkak të kushteve të motit, nuk ka marrë përsipër përgjegjësinë për organizimin e kësaj ngjarjeje, ndonëse manifestimi është mbajtur sipas traditës së viteve të kaluara.

Të pranishëm gjatë kësaj feste kanë qenë edhe zyrtarë të Policisë së Kosovës, të cilët kanë monitoruar situatën dhe janë angazhuar për mbarëvajtjen e rendit dhe sigurisë publike gjatë gjithë kohëzgjatjes së aktivitetit.

Notimi për Kryqin në Liqenin e Ujmanit organizohet tradicionalisht që nga viti 2011 dhe zhvillohet në një distancë simbolike prej 33 metrash nga bregu, distancë kjo që përfaqëson vitet e jetës së Jezu Krishtit.

Sipas traditës, pjesëmarrësi që arrin i pari te kryqi shpërblehet duke e marrë atë si simbol të besimit dhe festës së Bogojavlenjes, raporton KP.

`

Gjykata Themelore në Prishtinë ka refuzuar propozimet e mbrojtjes për dëgjimin e 9 dëshmitarëve të propozuar nga avokatja Jovana Filipoviq, duke vlerësuar se as pretendimet e Prokurorisë Speciale të Republikës së Kosovës (PSRK) nuk tregojnë se i pandehuri ka pasur rol të drejtpërdrejtë gjatë datave kritike të përshkruara në parashtrimin e mbrojtjes.

Gjykata theksoi se dëshmitarët e propozuar nuk do të ndryshonin vlerësimin mbi fajësinë ose pafajësinë e të pandehurit, i cili sipas aktakuzës akuzohet vetëm për rol ndihmues brenda grupit të akuzuar.

Po ashtu, u refuzuan edhe propozimet e mbrojtjes për nxjerrjen e ekspertizës për krahasimin e uniformave, pasi gjykata vlerësoi se një vlerësim i tillë mund të bëhet direkt nga përmbajtja e fotografive. Në lidhje me pyetjen nëse arma ishte snajper apo pushkë gjuetie, gjykata tha se kjo nuk ka relevancë për të përcaktuar përfshirjen e Dushan Maksimoviq në grupin terrorist.

Kryetari i trupit gjykues, Ngadhënjim Arrni, deklaroi se arsyetimi më i detajuar mbi bazën ligjore dhe arsyeshmërinë e refuzimit të këtyre propozimeve do të përfshihet gjatë përpilimit të aktgjykimit.

Gjithsesi, propozimi i avokates Jovana Filipoviq për dëgjimin e dëshmitarit Millosh Radosajlleviq mbetet i validuar dhe do të mbahet, ashtu siç ishte miratuar paraprakisht nga kjo gjykatë.

Rasti “Banjska”, sërish dy të akuzuarit nuk deklarohen e njëri thotë se nuk është fajtor

(Përditësuar 10.41) Sot ka nisur vazhdimi i gjykimit në rastin “Banjska” në Gjykatën Themelore në Prishtinë, pas ndryshimit të trupit gjykues.

Rasti që më herët udhëhiqej nga gjyqtari Arben Hoti, tash drejtohet nga gjyqtari Ngadhënjim Arrni si kryetar i trupit gjykues, me anëtarë Rrahman Beqiri dhe Donikë Shala, pas avancimit të Hotit në Gjykatën e Apelit.

Në seancë ishte i pranishëm dëshmitari Millosh Radosajlleviq, i propozuar nga mbrojtja për të dhënë deklarimin e tij. Kryetari Arrni njoftoi se për momentin nuk ka mundësi kohore për të vazhduar me dëshminë, për shkak të ndryshimit të trupit gjykues, raporton “Betimi për Drejtësi”.

Gjithashtu u konstatua se aktakuza e Prokurorisë Speciale të Republikës së Kosovës (PSRK) është lexuar dhe pranuar nga të gjitha palët, pasi mbrojtja dhe prokuroria hoqën dorë nga leximi zyrtar.

Blagoje Spasojeviq dhe Vladimir Toliq thanë se nuk dëshirojnë të deklarohen.

Ndërsa, Dushan Maksimoviq tha se nuk është fajtor për akuzën që ngarkohet.

Avokati Millosh Deleviq, theksoi se aktakuza duhet të përqendrohet në veprimet konkrete të Vladimir Toliq.

Prokurori Naim Abazi tha se shqyrtimi duhet të fillojë rishtazi dhe provat të lexohen për të vazhduar nga faza e mëparshme. Avokatët e të akuzuarve dhe të pandehurit ranë dakord, duke thënë se kjo shmang vonesa dhe siguron efikasitet të procedurës.

Lidhur me propozimin për dëgjimin e nëntë dëshmitarëve të ri nga ana e mbrojtjes, pas analizimit të shkresave, Prokuroria ka kundërshtuar këtë propozim.

Sipas prokurorisë, propozimi i tillë ka mungesë të relevancës dhe individualizimin konkret të provës që janë propozuar.

Prokuroria konsideron se dëshmitarët e propozuar nuk rezultojnë të tregojnë për atë se çfarë ka ndodhur në Bansjkë.

“Dëshmitarët e propozuar synojnë të ndërtojnë një narrativë të përgjithshme të mbrojtjes apo alibi kolektive a ndonjë vlerë të re provuese dhe që është krejtësisht në kundërshtim me provat materiale dhe personale që i kemi dorëzuar në këtë shqyrtim gjyqësor”, ka thënë prokurori Abazi.

Avokatja Jovana Filipoviq kërkoi që dëshmitarja Dragana Antonijeviq të ftohet sërish, pasi ka punuar me Maksimoviq dhe mund të japë informacione, por gjykata konstaton se nuk është arritur ta sigurojë prezencën e saj. Deklarata e saj është konsideruar e lexuar për të mos zvarritur procesin, ndërsa gjykata do të bëjë një përpjekje të re në të ardhmen.

Prokurori njoftoi se nga shqyrtimi i mëparshëm më 17 prill 2025 nuk ka ndryshime në situatën e të akuzuarve, por do të dorëzohen prova të reja materiale me shkrim.

Përfaqësuesi i palës së dëmtuar, avokati Arianit Koci dhe palët e dëmtuara nuk kanë pasur çfarë të shtojnë, ndërsa avokatët e të akuzuarve mbeten pas fjalës hyrëse.

Gjykata Themelore në Prishtinë pas propozimit të prokurorit special Naim Abazi që gjykimi të vazhhdojë në mungesë, i ishte drejtuar Gjykatës Supreme për të kërkuar opinion nëse në rastin “Banjska” mund të aplikohet gjykimi në mungesë. Por, Supremja, pas shqyrtimit të kërkesës “për dhënie të mendimit juridik përkitazi me nenin 303 par.7 të Kodit Procedurës Penale në rastin “Banjska”, kishte sqaruar se nuk jep mendime juridike për dilemat që ka shkalla e parë gjatë procedimit të rastit.

Kështu, Gjykata Themelore në Prishtinë ka marrë vendim, me të cilin ka refuzuar propozimin që gjykimi për 42 të akuzuarit tjerë (41 persona fizikë dhe një person juridik) të akuzuar për sulmin terrorist në “Banjskë” të vazhdojë në mungesë. Gjykata po ashtu kishte bërë të ditur që për këta të pandehur është lëshuar letërreshtim ndërkombëtar dhe pritet ndalimi dhe ekstradimi i tyre për zhvillimin e procedurës ndaj tyre.

Seanca e shqyrtimit gjyqësor ndaj të tre akuzuarve në rastin “Banjska”: Vladimir Toliq, Dushan Maksimoviq dhe Blagoje Spasojeviq, u mbajt më 17 prill 2025, në të cilën tre të akuzuarit u deklaruan të pafajshëm. Ndërsa, prokurori special Naim Abazi, mbrojtja e të akuzuarve dhe pala e dëmtuar, kanë dhënë fjalën hyrëse.

Edhe në shqyrtimin fillestar të mbajtur më 9 tetor 2024, tre të pandehurit janë deklaruar të pafajshëm.

Ndryshe, Gjykata Themelore në Prishtinë – Departamenti Special, me aktvendimin e 6 dhjetorit 2024, i kishte refuzuar si të pabazuara kërkesat për hudhje të aktakuzës dhe kundërshtimet ndaj provave, të paraqitura nga mbrojtësit e të akuzuarve të lartpëmendur kundër aktakuzës së Prokurorisë Speciale të Republikës së Kosovës.

Kurse, Gjykata e Apelit më 13 mars 2025 njoftoi se ka marrë vendim, me të cilin e ka vërtetuar aktvendimin e Gjykatës Themelore në Prishtinë me të cilën u konfirmua aktakuza ndaj të akuzuarve në rastin “Bajska”.

Deri tani, të arrestuar dhe nën masën e paraburgimit për këtë rast janë: Blagoje Spasojeviq, Vladimir Toliq dhe Dushan Maksimoviq, për të cilët është veçuar procedura penale.

Aktakuza e Prokurorisë Speciale ngarkon 44 persona fizikë dhe një person juridik “RAD D.O.O”. Listës së të akuzuarve i prin Milan Radoiçiq.

Prokuroria Speciale e Republikës së Kosovës (PSRK) më 11 shtator 2024 ka ngritur aktakuzë kundër Milan Radoiçiqit dhe 44 të tjerëve për sulmin terrorist të 24 shtatorit 2023 në Banjskë të Zveçanit. Të akuzuarit ngarkohen se përmes përdorimit të dhunës me armatim të rëndë, tentuan ta shkëpusin pjesën veriore të territorit të Republikës së Kosovës e t’ia bashkojnë Republikës së Serbisë, me ç’rast si rezultat i dhunës së përdorur ka mbetur i vdekur zyrtari policor Afrim Bunjaku e u rrezikua jeta e zyrtarëve tjerë policorë dhe popullatës civile. Aktakuzën e plotë mund ta gjeni: KËTU.

Në Bajsnkë të Zveçanit, në orët e hershme të 24 shtatorit 2023, ishte vrarë rreshteri Afrim Bunjaku si dhe ishin plagosur dy të tjerë. Pastaj, të vrarë kishin mbetur edhe tre sulmues, kurse të tjerët ishin larguar pasi ishin strehuar për disa orë në Manastirin e Bajnskës. Milan Radoiçiq e kishte marrë përsipër përgjegjësinë për sulmin terrorist. /BetimipërDrejtësisë/

Procesi i votimit në komunat veriore deri në këto momente ka kaluar pa incidente, derisa janë ndaluar hyrjet ilegale nga Serbia për të votuar.

Veton Elshani, zëvendësdrejtor i rajonit të veriut i ka thënë KosovaPress-it, se që nga orët e hershme të mëngjesit, kur është bërë hapja e vendvotimeve në veri të vendit, nuk kemi iniciuar asnjë rast për hetim deri në këtë moment.

“Kemi pasur disa raste të verifikimeve të ndryshme që i kemi bërë, si në Zubin Potok, Leposaviq, Soçanicë dhe në qytete të tjera, mirëpo nuk kemi ndonjë rast për ta theksuar. Jemi në kontakt të vazhdueshëm me KQZ-në dhe me Prokurorinë e Shtetit”, tha ai, derisa ka treguar për masat që kanë marrë për të mos hyrë ilegalisht nga Serbia për të votuar.

“Më herët, gjatë zgjedhjeve të kaluara, kemi pasur informacione se njerëzit po vinin përmes rrugëve ilegale, konkretisht nga ura e Bërnjakut, kalonin tek ne dhe më pas vazhdonin në veri të vendit. Këtë e kemi ndaluar edhe atëherë, por e kemi ndaluar edhe tani paraprakisht. Kjo ka qenë arsyeja pse janë marrë këto masa. Po ashtu, kemi pasur koordinim me Policinë Kufitare, pasi aty janë edhe barkat, si dhe me KFOR-in. Nuk kemi pasur raste për të ndaluar dikë, pasi ata persona janë kthyer nga ajo rrugë”, tha ai.

Elshani komentoi edhe votimin e organizuar të Listës Serbe.

“Në orët e mëngjesit kemi pasur edhe një votim të organizuar, të ashtuquajtur, nga sheshi “Car Lazari” e më pas drejt qendrave të votimit. Kjo ka ndodhur edhe në komunat e tjera të veriut të vendit dhe ka qenë një praktikë e përsëritur edhe herëve të kaluara. Për këtë e kemi njoftuar KQZ-në dhe Prokurorinë e Shtetit, por nuk kemi pasur rast për të hapur”, tha ai.

Ai shtoi se ekziston një plan i përgjithshëm në nivel të Kosovës lidhur me zgjedhjet që po mbahen sot dhe se ata janë pjesë e atij plani, por me disa specifika për shkak se janë zonë kufitare me Serbinë.

Ai shtoi se në veri ka shumë rrugë ilegale dhe të gjitha janë të mbuluara nga ana e Policisë Kufitare, ndërsa dje edhe nga njësitë e KFOR-it, në kuadër të bashkëpunimit të përbashkët që kemi.

Sipas tij, deri tani nuk ka ndodhur asnjë incident në veri. /kp/

Eksperti i sigurisë, Agim Musliu, ka deklaruar se Lista Serbe ka shkelur hapur Rregulloren Zgjedhore Nr. 07/2024 gjatë ditës së votimit, duke vepruar në kundërshtim me rregullat e heshtjes zgjedhore.

Sipas Musliut, pas një fushate të ashpër kundër partive të tjera që përfaqësojnë komunitetin serb, e cila sipas tij është zhvilluar nën ndikimin e drejtpërdrejtë të Serbisë dhe strukturave të lidhura me Milan Radojçiqin, sot në Mitrovicën e Veriut po vërehen shkelje serioze të ligjit zgjedhor.

Ai ka theksuar se Rregullorja Zgjedhore Nr. 07/2024, konkretisht Neni 8, përcakton qartë veprimet e ndaluara gjatë heshtjes zgjedhore.

Sipas këtij neni, nga momenti i hapjes së qendrave të votimit deri në mbylljen e tyre, subjekteve politike dhe përfaqësuesve të tyre u ndalohet mbajtja e takimeve me qëllim fushate apo grumbullimi i zyrtarëve dhe simpatizantëve në afërsi të qendrave të votimit.

“Lista Serbe po fton simpatizantët që të grumbullohen para zyrave të saj në Mitrovicën e Veriut dhe në komuna të tjera, pikërisht në ditën kur kanë filluar votimet dhe kur heshtja zgjedhore është zyrtarisht në fuqi”, ka deklaruar Musliu.

Sipas tij, këto veprime përbëjnë shkelje të drejtpërdrejtë të rregullores zgjedhore dhe kërkojnë reagim institucional.

Ai ka bërë thirrje që institucionet relevante, përfshirë Komisionin Qendror të Zgjedhjeve, Prokurorinë e Shtetit dhe Policinë e Kosovës, të ndërmarrin masa ligjore ndaj këtyre shkeljeve.

Musliu ka rikujtuar gjithashtu se Lista Serbe edhe gjatë fushatës zgjedhore është ndëshkuar financiarisht, duke u dënuar me 30 mijë euro, pas një ankese të paraqitur nga një subjekt tjetër politik serb në veri të vendit për shkelje të ligjit. /Telegrafi/

Në orët e pasditës të së martës, Policia e Kosovës ka regjistruar dy raste të kontrabandës në komunën e Leposaviqit, konkretisht në fshatrat Zernovshek dhe Gnjezhdane.

Lajmin e konfirmoi Veton Elshani, zëvëndësdrejtor i Drejtorisë Rajonale Mitrovicë-Veri të Policisë së Kosovës.

Ai bëri të ditur se gjatë aksioneve janë identifikuar pije alkoolike dhe joalkoolike, si dhe mbi 20 mijë euro ‘cash’.

Sipas Elshanit, rasti i parë është trajtuar nga Policia Kufitare, ndërsa i dyti nga Policia e Rendit.

“Pijet alkoolike dhe tri automjete janë konfiskuar, ndërsa tek rasti i Policisë së Rendit Publik një person pas intervistimit është liruar në procedurë të rregullt,” tha ai.

Policia vazhdon hetimet për zbardhjen e plotë të të dy rasteve dhe theksuan rëndësinë e bashkëpunimit të qytetarëve për parandalimin e kontrabandës në zonat e veriut./Telegrafi.

Përkundër rreth 500 dorëheqjeve të zyrtarëve nga komuniteti serb, numri i përgjithshëm i pjesëtarëve të forcave të rendit në katër komunat në veri, sipas Policisë së Kosovës, është pothuajse i njëjtë me atë të para dorëheqjeve. Vetëm në Mitrovicë të Veriut, Zvecan, Zubin Potok e Leposaviq, nëpërmjet konkurseve janë punësuar rreth 150 policë të rinj serbë. Ekspertë të sigurisë thonë se për të mos lejuar ndikime nga Serbia, punësimet e pjesëtarëve nga komuniteti serb, sikur edhe të tjerëve, duhet të bëhen vetëm me konkurs.

Tre vjet më parë, duke zbatuar urdhra politik, në formë të organizuar rreth 500 zyrtarë policorë nga komuniteti serb në veri zhveshën uniformat me flamurin e shtetit të Kosovës.

Menjëherë, për të mos lejuar vakum ishin angazhuar me zyrtarë policorë shqiptar dhe të komuniteteve tjera, por edhe serbë nga komunat tjera që u risistemuan në Mitrovicë të Veriut, Zveçan, Leposaviq dhe Zubin Potok.

Pasi tha se numri i përgjithshëm i policëve të angazhuar në këtë pjesë të vendit është pothuajse i njëjtë me atë të para dorëheqjeve, në një përgjigje për TV Dukagjini, Policia tregoi se vetëm në veri “përmes konkurseve të rregullta janë punësuar rreth 150 zyrtarë të rinj nga komuniteti serb”

“Nga Nëntori i vitit 2022 e deri më tani përmes konkurseve të rregullta janë punësuar rreth 150 zyrtarë të rinj nga komuniteti Serb, të angazhuar në pjesën veriore të vendit”, thuhet në njoftimin nga Policia e Kosovës

Por, numri i serbëve që u bënë pjesë e Policisë në tërë Kosovën, pas Nëntorit 2022, është më i madh.

“Që prej dorëheqjeve kolektive të policëve serbë në veri të Kosovës në Nëntor të vitit 2022, 208 policë, kadetë të rinj nga komuniteti serb i janë bashkuar Policisë së Kosovës”, ka deklaruar Albin Kurti, kryeministër në detyrë

Koloneli në pension Refki Morina thotë se dorëheqjet ishin politike dhe të parevokueshme, ndërkaq shpjegoi se rregullativa nuk lejon kthimin e askujt dhe “se punësimi në Policinë e Kosovës mund të bëhet vetëm nëpërmjet konkursit, duke verifikuar të kaluarën penale”.

“Më parë kanë punësuar njerëz edhe të Rojave të Urës në Policinë e Kosovës, por ata në një mënyrë ose një tjetër më shumë kanë punuar për Serbinë sesa për shtetin e Kosovës, andaj një gjë e tillë nuk mund të ndodhë në Policinë e Kosovës. Është konkursi i rregullt. Në konkursin e rregullt kanë të drejtë të paraqiten të gjitha nacionalitet, shqiptarë, serbë, romë, të gjitha nacionalitetet që jetojnë në Kosovë”, ka thënë Refki Morina, kolonel në pension i Policisë së Kosovës.

Edhe pse Serbia mund të përpiqet të përdorë marrëveshjen e ratifikuar në Kuvend më 2013, për integrimin e strukturave paralele, eksperti Drizan Shala tha se, për të mos lejuar ndikime nga jashtë, nuk duhet lejuar kthimin e ish-zyrtarëve.

“Ne do të duhej të analizojmë mangësitë e asaj marrëveshje, do të duhej ta atakojmë në formën juridike për t’ia pamundësuar që këto struktura që kishin dhënë dorëheqje dhe kishin sabotuar institucionet e Republikës së Kosovës mos të kenë fare mundësi që të kthehen në sistemin e sigurisë së Republikës së Kosovës… Të shpallet konkurs i ri duke inkorporuar qytetarë të ri të komunitetit serb në kuadër strukturave të sigurisë për të minimizuar mundësinë e influencimit, mundësinë e sabotazhit dhe mundësinë e spiunazhit brenda strukturave të sigurisë në Republikën e Kosovës”, ka thënë Drizan Shala, ekspert i Sigurisë.

Ish-policët dhe ish-zyrtarë tjerë shtetëror nga komuniteti serbë ishin dorëhequr në bashkërendim me Listën Serbe, e cila kishte tërhequr kryetarët nga radhët e saj në katër komunat në veri, duke thënë se vendimi për largim nga institucionet do të zbatohet deri në formimin e asociacionit të komunave me shumicë serbe./Tv Dukagjini/

- YouTube youtu.be

Policia e Kosovës ka ndërhyrë sot në palestrën sportive në Mitrovicën e Veriut, duke ndaluar zyrtarët komunalë që të largojnë karriget me ngjyra që simbolizojnë qytetin e Mitrovicës dhe t’i zëvendësojnë ato me karrige që përfaqësojnë flamurin e Serbisë.

Sipas KosovaPress, nga brenda palestrës sportive është siguruar një fotografi ku shihen zyrtarë të Policisë së Kosovës të pranishëm në ambientet e objektit.

Në pamjet e siguruara nga salla e sportit është parë edhe Igor Simiq, përfaqësues i Listës Serbe.

Ekipi i KosovaPress ndodhet në vendin e ngjarjes dhe po i përcjell nga afër zhvillimet, ndërsa publiku do të informohet në kohë reale për çdo të re lidhur me këtë rast.

Deri në këto momente, Policia e Kosovës nuk ka dhënë detaje zyrtare lidhur me arsyet e ndërhyrjes apo rrethanat që kanë çuar në këtë situatë.

Për tri javë radhazi, vetura të tipeve të ndryshme, kamionë e automjete të vogla janë xhiruar deri sa kalojnë përgjatë një rruge e cila është skaj Banjskës.

Në Zubin Potok, ekipi arriti që të identifikojë disa prej veturave të cilat përdornin rrugë ilegale për të transportuar mallra të ndryshme nga Serbia për në Kosovë.

Rruga që shihet edhe në pamjet e transmetuara në emisionin e Kallxo Pernime më 14.12.2025, është vështirë e kalueshme, sidomos në periudhat kur ka të reshura bore e shiu.

Grupe të cilat konsiderohen të rrezikshme janë duke vazhduar sërish të mbajnë primatin e kontrabandimit në pjesën e veriut të vendit.

Pjesëtarë të grupeve janë kapur herë pas here nga Policia e Kosovës duke kryer veprimtari ilegale.

Pamjet të cilat i kemi transmetuar sonte, tregojnë edhe kohën, veturat, rrugën të cilën përshkojnë veturat të ndryshme skaj Banjskës, mes Leposaviqit e Zubin Potokut.

Në zonën të cilën ekipi i Kallxo Pernime ka hulumtuar për disa javë, i cili njihet si “Junak” një zonë malore po përdorej për të kontrabanduar mallra nga Serbia në Kosovë. Kontrabanda kryesisht bëhej me gjëra ushqimore e tekstil.

Kamerat e ekipit të vendosura për të mbikëqyrur rrugën që do të përdorej, filmoi edhe automjete të ndryshme të cilat kalonin përgjatë rrugës drejtë Serbisë dhe më pas të njëjtat shiheshin duke u kthyer në Kosovë.

Madje në disa raste, kamerat kanë filmuar edhe kolona të makinave të ndryshme jo vetëm një apo dy të tilla. Madje në gjithë xhirimet që ka ekipi i Kallxo Pernime, nata e cila pati më së shumti qarkullim të kontrabandës ishte ajo e një nate para se të betoheshin kryetarët e komunave në veri të vendit.

Kontrabanduesit e dyshuar përdornin natën si kohë e cila u mundësonte atyre të dalin më lehtë dhe pa u identifikuar në Serbi dhe të ktheheshin të mbushur me mallra ilegale pa dokumentacion në Kosovë.

Koha në të cilën kishte më së shumti qarkullim ishte 20:00 – 22:00.

Më 27 nëntor 2025, kamerat e ekipit kapen pamjet e para të veturave që shfrytëzonin rrugën e vështirë për të kaluar ilegalisht në Serbi për kontrabandë.

Rruga në të cilën po kalonin kontrabandistët ishte duke u punuar nga kompani të kontraktuara nga institucionet në Kosovë.

Por, ndonëse ishte duke u punuar, rruga kohë pas kohe bëhej vështirë e kalueshme për makina të cilat nuk kanë fuqi të ngjiten deri në majën e saj, aty ku edhe ekipi kishte vendosur kamerat.

Pamjet që ka siguruar KALLXO të javëve të kaluara, i ka dërguar edhe në Policinë e Kosovës. Hulumtimi të cilin realizoi ekipi rezultoi me arrestime mbrëmjen e 11 dhjetorit 2025. Gjashtë persona u arrestuan nën dyshimin për kontrabandë me mallra në zonën ku ekipi i kishte vendosur kamerat.

Në lidhje me këtë situatë, zëvendësdejtori rajonal në veri, Veton Elshani tha se kryesisht kontrabandistët përdornin mjete të ndryshme të vogla e të mëdha për të bartur mallra kryesisht ushqim e tekstil.

“Bartet sa nxë ai mjet transportues. Nëse është kamionetë bart gjëra ushqimor. Nëse haset ndonjë xhip i madh me një kepet të madh, bagazh atëherë është kryesisht me barna dhe ushqim. Por nëse krahasojmë vitin 2022 qarkullimi është më i vogël”- tha Elshani.

Ai shtoi se kontrabandistët shikojnë cilat rrugë janë më të lehta dhe të qarkullueshme, bëjnë vëzhgimin pastaj zhvillojnë kontrabandën.

“Kemi pasur mjaft raste kur ne i kemi ndaluar këta persona, por nuk do të thot që është ndaluar përgjithmonë. Ka ende gjëra ushqimore, barna, mish, gjëra të shtrenjta”- shton tutje Elshani.

Sipas tij, përveç dy pikave zyrtare kufitare ajo në Bërnjak e Jarinje, në pjesën e veriut të vendit janë identifikuar 64 rrugë ilegale në të kaluarën, shtatë prej tyre të cilat janë të asfaltuara e të tjerat të qarkullueshme.

Në anën tjetër personat të cilët janë arrestuar nga policia për kontrabandë janë kryesisht me të kaluar kriminale.

“Kemi njerëz që i njohim si pjesë të grupit. Ka pasur persona që kanë qenë në burg, në paraburgim, kanë dalë i kemi nxënë prapë të njëjtit. Mbrëmë i kemi ndalu disa persona, dy prej tyre janë largu. Kemi sekuestruar edhe mallra e tekstil. Automjetet janë sekuestruar”- shton tutje Elshani.

“Shumica janë me të kaluar … sepse janë përsëritës të veprimtarisë penale”- thotë Elshani.

Elshani përfundon duke thënë se policia po vazhdon mbikëqyrjen e sigurisë por nuk mohon se mund të ketë edhe kryerje të veprimtarisë penale prej personave të ndryshëm.

“Forma ka ndryshuar e kontrabandës. Rrugët ekzistojnë dhe për këtë arsye duhet me qenë në mbikëqyrje vazhdimisht. Rrugët ende përdoren, por ne jemi në kontroll të kufirit jo 100 %. Kurrë nuk është 100 %, mirëpo mundohemi të jemi çdo kund. Deri më tani kemi qenë mjaftë të suksesshëm, por nuk do të thot që ne do të ndalemi në punën tonë- e as kriminelët në rrugën e tyre”- shtoi ai.

Kryeministri në detyrë i Kosovës, Albin Kurti, ka deklaruar se operacionet e ndërmarra në pjesën veriore të vendit kanë qenë tërësisht ligjore, parimore dhe të domosdoshme për mbrojtjen e integritetit territorial dhe sovranitetit të Republikës së Kosovës.

Ai ka vënë theks të veçantë te roli i institucioneve të sigurisë, duke thënë se organet e rendit dhe inteligjencës kanë kryer “punë të shkëlqyeshme”, duke garantuar zbatimin e sundimit të ligjit në zonat e prekura.

Sipas Kurtit, rezultatet e arritura janë të prekshme dhe të rëndësishme për shtetin.

“Janë mbyllur 29 nga 37 rrugët ilegale, janë eliminuar strukturat paralele të Serbisë, janë larguar kriminelët e mëdhenj dhe është vendosur rend dhe ligj në 16% të territorit,” tha ai.

Kryeministri në detyrë shtoi se, megjithëse operacionet nuk janë nisur me llogaritjen nëse “ia vlen barra qiranë”, sot mund të thuhet se veprimet kanë qenë të justifikuara dhe të domosdoshme.

“Pavarësisht kritikave, ajo që Kosova ka fituar si shtet është shumë më e madhe dhe më e vlefshme sesa çdo gjë tjetër,” theksoi Kurti gjatë intervistës në Kanal10./Telegrafi.

Ambasadori i Bashkimit Evropian në Kosovë, Avio Orav, mirëpriti sot dorëzimin e qetë të pushtetit lokal në katër komunat veriore, gjatë një takimi që mbajti në Zveçan me kryetarët e rinj të komunave.

Ai theksoi rëndësinë e respektimit të ligjit dhe procesit demokratik në përputhje me Kushtetutën e Kosovës.

Ambasadori Orav gjithashtu nënvizoi nevojën për një bashkëpunim konstruktiv midis autoriteteve qendrore dhe lokale.

“Mbështetja e BE-së për komunitetet jo-shumicë është e palëkundur, dhe bashkëpunimi konstruktiv midis autoriteteve lokale dhe qendrore është thelbësor për stabilitetin dhe zhvillimin e qëndrueshëm,” tha Orav./Telegrafi/

Politikani serb Nikolla Sanduloviq ka reaguar pas betimit të kryetarëve të komunave me shumicë serbe, duke theksuar se ata kanë pranuar institucionet dhe ligjet e shtetit të pavarur të Kosovës.

Sipas tij, të gjithë dhjetë kryetarët e komunave serbe në Kosovë, në të cilat u rizgjedhin nën presionin e Listës Serbe dhe në një atmosferë frike e shantazhi, kanë dhënë betimin e tyre ndaj shtetit të Kosovës, me himnin e Kosovës dhe para figurës së Presidentes së Kosovës Vjosa Osmani.

Sanduloviq thekson gjithashtu se dokumentet u dhanë në dy gjuhë, “në serbisht dhe shqip, që të mos kishte pretendime më pas se dikush po mbron gjuhën, zakonet dhe kulturën serbe në Kosovë".

Në postimin e tij, politikani serb ngre një pyetje retorike për ata që nuk e pranojnë pavarësinë e Kosovës.

“Çfarë tjetër është e paqartë në konkluzionin se Kosova është shtet i pavarur dhe se serbët në autoritetet e tyre komunale e njohin si të tillë?”, ka shkruar ai.

Gjithashtu, Sanduloviq kritikon politikanët serbë jashtë Kosovës duke shtuar se “Çfarë pastaj doni nga Serbia, Mali i Zi, Maqedonia, Kroacia dhe Bosnja e Hercegovina? Heshtje aty… ashtu siç ju është drejtuar tashmë shefi juaj Aleksandar Vuçiq”.

Sipas Sanduloviqit, fakti që kryetarët e komunave serbe kanë dhënë betimin e tyre dhe janë angazhuar të respektojnë ligjet e Kosovës është një provë e qartë se institucionet lokale serbe funksionojnë brenda strukturave të shtetit të pavarur./Telegrafi/

Bashkimi Evropian (BE) në Kosovë përshëndeti zhvillimin pa probleme të ceremonisë së betimit për kryetarët e rinj dhe përbërjet e reja të kuvendeve komunale në katër komunat e veriut të Kosovës.

Ky moment është parë si një “hap i rëndësishëm drejt angazhimit konstruktiv në të ardhmen”.

“Sot kuvendet komunale dhe kryetarët e komunave morën detyrën në 20 komuna të 🇽🇰 pas zgjedhjeve lokale gjithëpërfshirëse. BE-ja në Kosovë mirëpret dorëzimin pa probleme të qeverisjes komunale, duke përfshirë edhe 4 komunat veriore. Ky është një hap i rëndësishëm drejt angazhimit konstruktiv në të ardhmen”, thuhet në postim. /Telegrafi/