Presidentja e Komisionit Evropian, Ursula von der Leyen, këmbënguli të mërkurën se Bashkimi Evropian duhet të eliminojë barrierat ekonomike që e pengojnë atë të bëhet një gjigant global dhe të thellojë tregun e saj të brendshëm.

Zyrtarja e lartë dha këtë mesazh përpara nisjes së saj në një takim me liderët e BE-së, përfshirë presidentin e Francës, Emmanuel Macron, dhe kancelarin gjerman, Friedrich Merz, në një forum të drejtuesve të industrisë në Antwerp.

Ky takim mbahet në prag të samitit të së enjtes, ku vendet anëtare do të diskutojnë prioritetet e axhendës ekonomike të Evropës, duke përfshirë forcimin e tregut të vetëm dhe rritjen e pavarësisë dhe konkurrueshmërisë ekonomike të kontinentit.

“Konkurrenca nuk është vetëm themeli i prosperitetit, por edhe i sigurisë sonë dhe në fund të fundit, edhe i demokracive tona,” paralajmëroi Von der Leyen.

Një nga çështjet kyçe të identifikuara nga BE-ja është se kompanitë evropiane përballen me vështirësi aksesi në kapital për zgjerim, ndryshe nga homologët e tyre amerikanë. “Për ta trajtuar këtë, Plani A do të ishte të përparonim së bashku të 27 shtetet e bllokut, – tha Von der Leyen, – por nëse nuk mund të arrijmë një marrëveshje, BE-ja duhet të shqyrtojë bashkëpunimin e zgjeruar midis vendeve që dëshirojnë këtë.”

Ajo shtoi se Evropa duhet të rrisë konkurrueshmërinë duke rritur prodhimin brenda kontinentit dhe zgjeruar rrjetin e partnerëve të besueshëm, duke theksuar rëndësinë e nënshkrimit të marrëveshjeve tregtare.

Pas marrëveshjeve të fundit me bllokun e Amerikës së Jugut, Mercosur, dhe Indinë, Von der Leyen tha se të tjera janë në rrugë me Australinë, Tajlandën, Filipinet dhe Emiratet e Bashkuara Arabe. Një nga propozimet më të mëdha dhe më të debatuara për nxitjen e ekonomisë së BE-së është favorizimi i firmave evropiane ndaj rivalëve të huaj në fushat strategjike, të cilin Von der Leyen e mbështet fuqishëm.

Sinjali – aty ku e vërteta flet para lajmit!

/GazetaSinjali/

The post Von der Leyen: BE-ja duhet të shembë barrierat për t’u bërë gjigant ekonomik global appeared first on Sinjali.

Këshilli i Evropës, organizata kryesore e kontinentit për mbrojtjen e të drejtave të njeriut, ka njoftuar të mërkurën se ka rënë dakord t’ia heqë imunitetin diplomatik ish-sekretarit të tij të Përgjithshëm norvegjez, Thorbjoern Jagland, duke i hapur rrugë policisë për të hetuar lidhjet e tij të mundshme me Jeffrey Epstein.

Policia norvegjeze për krimet ekonomike ka nisur një hetim ndaj Jagland, ish-kryeministër dhe ish-ministër i Jashtëm, si dhe ish-kryetar i Komitetit të Çmimit Nobel për Paqen, nën dyshimin për korrupsion të rëndë.

Vendimi për ta hetuar Jagland, i cili ishte sekretar i Përgjithshëm i Këshillit të Evropës nga viti 2009 deri në 2019, u bazua në informacione të zbuluara nga dosje të reja të publikuara lidhur me Epstein, i dënuar për abuzim seksual në SHBA, i cili vdiq në burg në vitin 2019.

Avokati i Jagland, Anders Brosveet, ka thënë se vendimi për heqjen e imunitetit ishte i pritshëm dhe se klienti i tij do të bashkëpunojë me organet hetuese për të sqaruar të gjitha çështjet.

“Ai e merr këtë çështje shumë seriozisht, por dëshiron të theksojë se beson se nuk ekzistojnë rrethana që përbëjnë përgjegjësi penale”, ka thënë Brosveet në një deklaratë.

Për të zhvilluar hetimin policor, ishte e nevojshme heqja e imunitetit të Jagland, dhe ministria e Jashtme e Norvegjisë ka thënë se u kishte kërkuar 46 vendeve anëtare të Komitetit të Ministrave të Këshillit të Evropës ta miratonin këtë hap.

Jagland nuk është akuzuar zyrtarisht për ndonjë krim, por hetimi ndaj tij synon të zbulojë nëse ai ka marrë dhurata, apo hua në lidhje me pozicionin e tij, kanë bërë të ditur autoritetet.

“Nëse Jagland, si sekretar i Përgjithshëm i zgjedhur i Këshillit të Evropës, do të kishte marrë ryshfet, ai do të kishte shkelur besimin e veçantë që lidhet me detyrën e tij,” thuhet në një letër të policisë norvegjeze të datës 8 shkurt, drejtuar Këshillit për heqjen e imunitetit.

Publikimi i një sërë dosjesh të reja në SHBA ka zbuluar lidhje të reja të Epsteinit me politikanë, anëtarë të familjeve mbretërore dhe persona shumë të pasur në Evropë dhe Shtetet e Bashkuara.

Dosjet tregojnë, ndër të tjera, se në vitin 2014 Jagland dhe ndihmësit e Epsteinit kishin bërë plane të detajuara që Jagland, bashkëshortja e tij, dy fëmijët dhe e dashura e djalit të tij, të vizitonin Epstein në Palm Beach dhe në ishullin privat të tij në Karaibe.

Jagland, në atë kohë sekretar i Përgjithshëm i Këshillit të Evropës, ka mohuar se ka vizituar ndonjëherë ishullin privat të Epsteinit.

Sipas një emaili të vitit 2014, ai i kishte kërkuar ndihmë Epsteinit për financimin e një apartamenti në Oslo.

Emaile nga viti 2018 tregojnë se Epsteini i kishte kërkuar Jaglandit të organizonte një takim mes tij dhe ministrit të Jashtëm rus, Sergei Lavrov, duke thënë se kishte ide për t’ia paraqitur presidentit Vladimir Putin. Jagland kishte premtuar se do ta ngrinte çështjen me ndihmësin e Lavrovit.

Policia norvegjeze ka thënë të hënën se po heton gjithashtu dy diplomatë të profilit të lartë në një hetim tjetër për korrupsion të lidhur me Epsteinin, ndërsa princesha e kurorës së Norvegjisë ka kërkuar falje disa herë për miqësinë e saj me financierin e ndjerë.

Sinjali – aty ku e vërteta flet para lajmit!

/GazetaSinjali/

The post Këshilli i Evropës i heq imunitetin ish-sekretarit të Përgjithshëm, shkak dosja Epstein appeared first on Sinjali.

Parlamenti Evropian ka miratuar të martën ndryshime të rëndësishme në sistemin evropian të azilit që përfshijnë krijimin e një liste të përbashkët të vendeve të origjinës të konsideruara si të sigurta, në të gjithë BE-në.

Midis shteteve të përfshira në këtë listë është edhe Kosova.

Sipas rregullave të reja, vendet si Bangladeshi, Kolumbia, Egjipti, Kosova, India, Maroku dhe Tunizia do të quhen vende të sigurta të origjinës për qytetarët e tyre kur aplikojnë për azil në vendet e BE‑s.

Në praktikë, kjo do të thotë se shtetasit e Kosovës dhe vendeve të tjera që kërkojnë azil në BE mund të përjetojnë procedura të përshpejtuara.

Sipas rregullave të reja, barra e provës do të mbetet mbi aplikantin për të demonstruar se dispozita e vendit të sigurt nuk duhet të zbatohet në rastin e tij specifik, për shkak të një frike të bazuar mirë nga persekutimi ose rreziku i dëmtimit serioz nëse kthehet në vendin e tij të origjinës.

Vendet kandidate për në BE do të konsiderohen gjithashtu vende të sigurta origjine, përveç rasteve kur rrethanat përkatëse tregojnë ndryshe.

Rrethana të tilla përfshijnë dhunë pa dallim në kontekstin e një konflikti të armatosur, një shkallë të njohjes së azilit në të gjithë BE-në për shtetasit e tyre që tejkalon 20%, ose vendosjen e sanksioneve ekonomike në lidhje me veprimet që prekin të drejtat dhe liritë themelore.

Rregullat e reja do të hyjnë në fuqi pas miratimit përfundimtar nga Këshilli i BE‑së dhe pritet të fillojnë të zbatohen me ligj nga qershori 2026, në kuadër të reformave më të gjera të politikës së migracionit dhe azilit të BE‑së.

Sinjali – aty ku e vërteta flet para lajmit!

/GazetaSinjali/

The post Kosova përfshihet në listën e vendeve të sigurta të BE-së sipas rregullave të reja të azilit appeared first on Sinjali.

Komandanti i Forcës së Sigurisë së Kosovës, Bashkim Jashari, mori pjesë në takimin trelateral me Shefat e Shtabeve të Shqipërisë dhe Kroacisë.

Përmes një njoftimi, FSK-ja bëri të ditur se ky takim shënoi një hap të rëndësishëm në forcimin e bashkëpunimit rajonal dhe koordinimit strategjik në fushën e sigurisë dhe mbrojtjes.

“Gjeneral Jashari, Gjeneral Kingji dhe Gjeneral Kundid zhvilluan një diskutim të hapur dhe konstruktiv mbi sfidat aktuale të sigurisë, thellimin e bashkëpunimit ushtarak, rritjen e ndërveprueshmërisë dhe avancimin e kapaciteteve mbrojtëse në përputhje me standardet euroatlantike”, thuhet në njoftim.

Në njoftim theksohet gjithashtu se takimi konfirmoi përkushtimin e përbashkët për paqe, stabilitet dhe siguri të qëndrueshme në rajon. Po ashtu, ky takim potencoi gatishmërinë për të zgjeruar bashkëpunimin përmes trajnimeve dhe ushtrimeve të përbashkëta, shkëmbimit të përvojave dhe koordinimit strategjik.

“Kjo iniciativë trelaterale përfaqëson një shembull të partneritetit të fortë dhe vizionit të përbashkët për një rajon më të sigurt dhe më të qëndrueshëm”, përfundon njoftimi.

Sinjali – aty ku e vërteta flet para lajmit!

/GazetaSinjali/

The post Mbahet takimi trepalësh Shqipëri-Kosovë-Kroaci, FSK: U konfirmua përkushtimi për paqe, stabilitet e siguri appeared first on Sinjali.

Avokati i ish-presidentit Hashim Thaçi, Luka Misetiq, ka deklaruar se Prokuroria e Hagës është frikësuar ta pyesë dëshmitarin Bislim Zyrapi lidhur me rolin e Thaçit në operacionet ushtarake.

“ZPS-ja nuk e kontestoi dëshminë e tij kur pati mundësinë t’i bënte pyetje shtesë. Zyrapi iu tha se në fillim të nëntorit 1998, Thaçi drejtonte drejtorinë politike por nuk ka qenë i përfshirë në çështje ushtarake. E dimë se Zyrapi ka drejtuar operacionet nga tetori 1998, Zyrapi iu tha se Thaçi nuk ka pasur rol në operacionet ushtarake, e jo të ketë luajtur rol qendror. ZPS-ja tha se Zyrapi është dëshmitari bueshesëm, nuk e kontestuan dëshminë e tij, nuk duhet të vendosni peshë pretendimeve të ZPS-së se është besnik ndaj Thaçit, ZPS-ja nuk guxonte t’ia bënte pyetjet sepse kishte frikë për përgjigjen që do merrte. Nuk është e drejtë për dëshmitarin e as të akuzuarit”, tha Misetiq.

Gjithashtu, u theksua se nuk ka dëshmi që Thaçi ka hartuar komunikata politike të UÇK-së. Sipas mbrojtjes, ZPS ka cituar vetëm dy prova për të mbështetur këtë pretendim.

“Nuk ka asnjë informacion që Thaçi të ketë mbikëqyrur shpërndarjen e informacioneve të UÇK-së. Se ka pasur përfshirje në përgatitjen e deklaratave politike, asnjë dëshmitar nuk ka dhënë dëshmi për këtë lidhur me faktin që Thaçi të ketë hartuar komunikata politike. Në fakt, ZPS arrin të citojë vetëm dy prova për të mbështetur pretendimin e tyre që Thaçi ka pasur rol në përgatitjen e tyre”, tha ai.

Sinjali – aty ku e vërteta flet para lajmit!

/GazetaSinjali/

The post Avokati i Thaçit: S’ka asnjë informacion që Thaçi të ketë mbikëqyrur shpërndarjen e informacioneve të UÇK-së appeared first on Sinjali.

Mesfushori i përfaqësueses së Kosovës, Valon Berisha, ka gjetur skuadrën e tij të re. Të mërkurën, ai firmosi me klubin zviceran, Zurich.

Berisha së fundi ishte pjesë e LASK-ut në Austri, ndërsa me Zurichun ka nënshkruar një kontratë të vlefshme deri në fund të edicionit, me mundësi vazhdimi edhe për një vit tjetër.

Mesfushori ka regjistruar deri më tani 52 paraqitje me përfaqësuesen e Kosovës.

Sinjali – aty ku e vërteta flet para lajmit!

/GazetaSinjali/

The post Valon Berisha transferohet tek Zurich në Zvicër appeared first on Sinjali.

Pamjet e para nga sulmi tragjik në një shkollë të mesme në British Columbia, Kanada, janë shpërndarë, duke zbuluar skena dramatike pas ngjarjes që la 9 të vdekur dhe 25 të plagosur.

Deri tani, autoritetet kanadeze nuk kanë ofruar shumë informacione për autorin e sulmit, por mediat lokale raportojnë se një grua dyshohet të jetë përgjegjëse për këtë akt të dhunshëm.

Gjithashtu, pranë shkollës, në një apartament janë gjetur dy persona të tjerë të vdekur, dhe policia ka konfirmuar lidhjen e këtyre vrasjeve me ngjarjen kryesore në shkollë. Motivet e sulmit ende mbeten të panjohura, ndërsa autorja e krimit ka kryer vetëvrasje, sipas njoftimeve nga policia.

Në videot që janë shpërndarë në rrjetet sociale, shihen policë duke mbërritur në vendngjarje për të ndihmuar në evakuimin e nxënësve, ndërsa helikopterët fluturojnë mbi shkollë. Nxënësit, duke dalë nga shkolla me duar të ngritura lart, shoqërohen nga policë të armatosur dhe dërgohen në zonat më të sigurta.

VIDEO

Sinjali – aty ku e vërteta flet para lajmit!

/GazetaSinjali/

The post Publikohen pamjet pas sulmit vdekjeprurës në Kanada appeared first on Sinjali.

Mësimdhënësi që është përfshirë në një rast të dhunës në shkollën “Pavarësia” në Prishtinë është liruar, e ka konfirmuar kryeprokurori i Prokurorisë Themelore në Prishtinë, Zejnullah Gashi.

Ai tha se ndaj mësimdhënësit është propozuar një masë alternative, konkretisht lajmërim në stacion policor.

Gashi shtoi se nuk kanë hapur procedura ndaj nxënësit që shihet në video, për veprimet e tij para ngjarjes.

Ekskluzive | Sulm ndaj nxënësit në shkollën “Pavarësia”, mësimdhënësi përfundon në ndalim 48-orësh

Sinjali – aty ku e vërteta flet para lajmit!

/GazetaSinjali/

The post Lirohet nga arresti mësimdhënësi që ushtroi dhunë ndaj nxënësit në shkollën “Pavarësia” në Prishtinë appeared first on Sinjali.

Gjatë shqyrtimit të provave në procesin gjyqësor, është prezantuar një dokument që dëshmon se i akuzuari Naim Murseli kishte një borxh në vlerë prej 100 mijë eurosh Behgjet Pacollit.

Sipas përmbajtjes së dokumentit të paraqitur në seancë, kjo shumë rezulton të jetë pjesë e një marrëveshjeje financiare ndërmjet Murselit dhe Pacollit.

Në deklarimet e tij para trupit gjykues, Murseli ka pohuar se këtë borxh e ka kthyer, jo përmes një pagese të drejtpërdrejtë monetare, por “në forma të tjera”, siç i ka cilësuar ai.

Ai ka theksuar se bëhet fjalë për një marrëveshje private mes tij dhe Pacollit, e cila, sipas tij, nuk ka lidhje me interes apo përfitim të jashtëligjshëm, por është shlyer përmes formave të tjera të dakorduara mes palëve.

Sinjali – aty ku e vërteta flet para lajmit!

/GazetaSinjali/

The post “Borxhin e lava në një formë tjetër…”, Murseli i kishte borxh 100 mijë euro Behgjet Pacollit appeared first on Sinjali.

Nëntë persona janë vrarë dhe të paktën 25 të tjerë janë plagosur nga të shtënat me armë zjarri në një shkollë dhe një banesë aty pranë në komunitetin e vogël e të lidhur ngushtë të Tumbler Ridge, raporton Telegrafi.

Nga nëntë personat e vrarë, gjashtë u gjetën të vdekur në shkollën e mesme Tumbler Ridge, ndërsa i shtati vdiq gjatë rrugës për në spital. Dy persona të tjerë u gjetën të vdekur në një banesë aty pranë.

Sulmuesi i dyshuar u gjet gjithashtu i vdekur në shkollë, me një lëndim të vetëshkaktuar. Autoritetet kanë bërë të ditur se e dinë identitetin e saj, por ende nuk e kanë zbuluar publikisht. Një alarm për strehim i dërguar në telefonat e zonës e përshkroi të dyshuarën si “femër me fustan dhe flokë ngjyrë kafe”.

Të paktën dy persona të tjerë u dërguan në spital me lëndime serioze ose kërcënuese për jetën, ndërsa deri në 25 të tjerë po trajtoheshin për lëndime jo kërcënuese për jetën.

Njësitë policore kanë hequr bllokimin në shkollën e mesme dhe atë fillore aty pranë, megjithatë të dyja do të mbeten të mbyllura për pjesën e mbetur të javës.

Policia tha se ende nuk ka ndarë detaje mbi identitetin e të dyshuarës dhe nuk dihet lidhja e saj me shkollën. Gjithashtu, nuk ka konfirmim përfundimtar nëse sulmet në shkollë dhe në banesë janë të lidhura, megjithëse hetuesit besojnë se mund të ketë një lidhje midis tyre.

Detajet e viktimave, përfshirë identitetin dhe moshat e tyre, nuk janë publikuar ende. Autoritetet nuk kanë dhënë informacion nëse numri i viktimave mund të rritet, por kanë bërë të ditur se po vazhdonin kontrollin e banesave aty pranë pas të shtënave.

Sinjali – aty ku e vërteta flet para lajmit!

/GazetaSinjali/

The post Çka dihet deri më tani për sulmin vdekjeprurës në një shkollë në Kanada? appeared first on Sinjali.

TIRANË, 11 shkurt/ATSH/ Viti 2026 shënon 200-vjetorin e fotografisë, si dhe 10-vjetorin e Muzeut Kombëtar të Fotografisë “Marubi”.

Këtë përvjetor të dyfishtë, “Marubi” e konsideron jo vetëm si një akt përkujtimor formal, por një moment reflektimi mbi rolin e fotografisë si formë dijeje dhe mbi muzeun si institucion kritik, që ndërmjetëson marrëdhënien midis kujtesës, historisë dhe së tashmes.

Muzeu “Marubi” u themelua si një nevojë kulturore dhe etike: për të ruajtur, studiuar dhe aktivizuar arkivin fotografik të dinastisë Marubi dhe të fotografëve të tjerë të Shkodrës, një korpus imazhesh që artikulon, përmes dritës, transformimet shoqërore, politike dhe kulturore të një vendi.

Në themel të kësaj trashëgimie qëndron Pietro Marubbi, i cili solli fotografinë në Shqipëri jo vetëm si teknikë, por si mënyrë të re të të parit dhe të të kuptuarit të realitetit.

Hapja e muzeut shënoi kalimin nga arkivi i mbyllur drejt institucionit të hapur, nga ruajtja pasive drejt interpretimit kritik. “Marubi” eshte konceptuar nga studioja Casanova + Hernandez dhe eshte vendosur në ndërtesën historike të projektuar nga Kolë Idromeno.

Gjatë dhjetë viteve të para, muzeu ka kontribuar në riformulimin e mënyrës se si fotografia lexohet dhe kuptohet në Shqipëri. Përmes ekspozitave kuratoriale, ndërthurjes me praktikat bashkëkohore artistike, programeve edukative, botimeve dhe kërkimit shkencor, ai ka ndërtuar ura konceptuale mes arkivit dhe aktualitetit, mes historisë dhe kritikës së saj.

Në vitin 2017 muzeu u përzgjodh finalist për European Museum of the Year Award, ndërsa në vitin 2025 arkivi i negativëve, objekteve dhe dokumenteve të Pietro dhe Kel Marubit u shpall zyrtarisht pjesë e Regjistrit Ndërkombëtar “Memory of the World” nga UNESCO. /j.p/

The post “Marubi”, në 10-vjetorin e themelimit appeared first on Agjencia Telegrafike Shqiptare.

TIRANË, 11 shkurt/ATSH/ Në Shkodër u mbajt takimi trepalësh për bashkëpunim në fushën e mbrojtjes midis Shqipërisë, Kosovës dhe Kroacisë.

Shefi i Shtabit të Përgjithshëm të Forcave të Armatosura gjenerallejtënant, Arben Kingji kryeson takimin së bashku me shefin e Shtabit të Përgjithshëm të Forcave të Armatosura të Kroacisë dhe Komandantin e Forcës së Sigurisë së Kosovës.

Takimi ka në fokus thellimin e bashkëpunimit ushtarak përmes planeve konkrete.

“Qëllimi i këtij takimi është forcimi i angazhimit dhe bashkërendimit ushtarak, në përputhje me marrëveshjen trilaterale të mbrojtjes mes vendeve tona”, u shpreh gjenerallejtënant Kingji në një postim në rrjetet sociale ku solli momente nga takimi.

Kosova, Shqipëria dhe Kroacia në këtë mënyrë po konkretizojnë në praktikë bashkëpunimin në fushën e mbrojtjes për të cilin u dakordësuan kur ministrat e Mbrojtjes nënshkruan një deklaratë të përbashkët më 18 mars në Tiranë.

Në deklaratën që u nënshkrua nga ministri në detyrë i Mbrojtjes i Kosovës, Ejup Maqedonci, ai i Shqipërisë, Pirro Vengu, dhe i Kroacisë, Ivan Anushiq, u vendosën katër pika bashkëpunimi: Promovimi i kapaciteteve mbrojtëse dhe bashkëpunimi për industrinë përkatëse; Rritja e ndërveprueshmërisë nëpërmjet edukimit, trajnimeve dhe stërvitjeve; Kundërpërgjigja ndaj kërcënimeve hibride dhe rritja e qëndrueshmërisë; Ofrimi i mbështetjes së plotë për integrimin euroatlantik.

Në tekstin e deklaratës u tha se ky bashkëpunim është për të siguruar pozicionim të mirë për t’u bërë ballë kërcënimeve dhe për të arritur objektivat e mbrojtjes dhe sigurisë.

The post Mbahet takimi trepalësh Shqipëri-Kosovë-Kroaci për bashkëpunim në fushën e mbrojtjes appeared first on Agjencia Telegrafike Shqiptare.

TEHERAN, 11 shkurt /ATSH-ANSA/ – Si pjesë e negociatave me Shtetet e Bashkuara, Irani është gati të ofrojë garanci se nuk do të ndjekë përdorimin e armëve bërthamore dhe, në të njëjtën kohë, kërkon që pala tjetër të garantojë të drejtën e Iranit për teknologji bërthamore paqësore për prodhimin e energjisë elektrike.

Ministri i Jashtëm iranian, Abbas Araghchi, e deklaroi këtë në një intervistë me Russia Today, të raportuar nga agjencia e lajmeve IRNA, duke shtuar se garanci të tilla janë “të realizueshme dhe të arritshme” nëse ka vullnet të mirë nga të dyja palët.

“Ne ende nuk kemi besim të plotë tek amerikanët”, por nuk ka zgjidhje tjetër përveç një zgjidhjeje diplomatike”, shtoi ai.   /os/

 

The post TEHERAN – Irani: Gati të ofrojmë garanci vetëm për përdorim paqësor të energjisë bërthamore appeared first on Agjencia Telegrafike Shqiptare.

TEHERAN, 11 shkurt /ATSH-DPA/- Miliona njerëz në Iran dolën sot në rrugë me rastin e përvjetorit të Revolucionit Islamik të vitit 1979, raportuan mediat shtetërore.

Televizioni shtetëror tregoi mbështetës të qeverisë në rrugët kryesore në qendër të kryeqytetit, Teheran.

“Miliona iranianë morën pjesë në festimet në më shumë se 1 400 qytete dhe rreth 40 000 fshatra”, raportoi agjencia shtetërore e lajmeve IRNA.

Gjithashtu, u shfaqën pajisje ushtarake siç është tradicionale në festimet e përvjetorit, duke përfshirë lëshues kamionësh të lëvizshëm të raketave balistike.

Ministra dhe oficerë ushtarakë morën pjesë gjithashtu në festime.

Presidenti Masoud Pezeshkian bëri thirrje për unitet kombëtar.

“Sot, më shumë se kurrë, kemi nevojë për unitet përballë kërcënimeve, komploteve, zhvillimeve të gabuara ose dezinformatave që ndonjëherë mashtrojnë të rinjtë tanë”, tha ai në një fjalim.

“I kërkoj falje popullit fisnik për mangësitë që ekzistojnë”, shtoi Pezeshkian.

Dje në mbrëmje, mbështetësit e Republikës Islamike bërtitën “Allahu Ekber” (Zoti është më i madhi) mbi çatitë e metropolit të Teheranit. Shprehja u bë thirrja simbolike e revolucionit kundër sundimit të monarkut (Shahut) në vitin 1979.

Përvjetori i këtij viti është në hijen e shtypjes brutale të protestave masive në fillim të janarit.

“Vdekje diktatorit” jehoi gjithashtu një thirrje nga banesat, një referencë për udhëheqësin fetar të Iranit dhe kreun e shtetit, Ajatollah Ali Khamenei.

Mijëra të vrarë u raportuan në valën e fundit të protestave – e cila u shkaktua nga kriza e rëndë ekonomike në Iran.

Ndërsa fillimisht tregtarët dolën në rrugë, protestat u zhvilluan shpejt në një kryengritje mbarëkombëtare kundër sistemit të ashpër islamik të qeverisjes.

Natën e 8-9 janarit, forcat e sigurisë vranë gati 6 500 demonstrues, sipas hetimeve nga agjencia e lajmeve e Aktivistëve të të Drejtave të Njeriut në Iran (HRANA) me seli në SHBA.

Besohet se më shumë se 50 000 njerëz janë arrestuar.

Protestat tani janë qetësuar, por situata e vështirë ekonomike dhe rritjet ekstreme të çmimeve vazhdojnë të ndikojnë në jetën e përditshme të shumë familjeve.

Monedha kombëtare, riali – për shumë iranianë një matës i menjëhershëm i gjendjes së tyre financiare – ka rënë në nivele rekord që nga fillimi i vitit. //a.i/

The post IRAN – Miliona pjesëmarrës në përvjetorin e Revolucionit Islamik të vitit 1979 appeared first on Agjencia Telegrafike Shqiptare.

TIRANË, 11 shkurt /ATSh/ Ministrja për Punët e Brendshme, Albana Koçiu reagoi sot në lidhje me protestën e opozitës, ku theksoi sot se e drejta për të protestuar është e paprekshme, por dhuna është e pafalshme.

Në një deklaratë për mediet, Koçiu theksoi se kush sulmon uniformën e Policisë së Shtetit dhe tenton të destabilizojë rendin kushtetues, do të përballet me ligjin dhe se ndaj tyre nuk ka asnjë mburojë politike.

Koçiu u shpreh se “përpjekja e dështuar për të ardhur në pushtet duke goditur punonjësit e rendit, duke djegur institucionet, e për më tepër duke përdorur të miturit për të hedhur molotovë apo sende të forta mbi punonjësit e Policisë, që të mos ndiqen penalisht autorët e vërtetë, është një akt i turpshëm dhe i dënueshëm”.

Sipas saj, keqpërdorimi i të miturve për të kryer akte dhune është vepër penale, por është gjithashtu një shkelje e rëndë morale.

“E këtu një rol të posaçëm mund dhe duhet të luajnë institucionet, shoqëria civile dhe vetë familja, për t’i mbrojtur këta ta mitur nga përdorimi dhe instrumentalizimi me qëllime të errëta të politikës kriminale”, theksoi Koçiu.

Ministrja tha se është pikërisht kjo arsyeja, përse protestat e Partisë Demokratike janë braktisur masivisht nga qytetarët duke përfunduar tek një grusht militantësh, apo elementë të paguar për të krijuar skenarë imagjinarë të një revolte popullore.

“Kjo është e papranueshme”, tha ministrja e Brendshme.

E drejta për të protestuar, shtoi Koçiu, nuk është e drejtë për të dhunuar, për të shkatërruar, apo aq më pak, për të tentuar gjymtimin apo vrasjen e efektivëve të Policisë.

“Ndaj, Ministria e Punëve të Brendshme dhe Policia e Shtetit nuk do të qëndrojnë duarkryq. Autorët e këtyre akteve barbare do të ndëshkohen maksimalisht, sipas ligjit”, tha ajo.

Koçiu u bëri thirrje organeve të drejtësisë, t’i trajtojnë me përgjegjësinë maksimale dhe ligjore këto sulme barbare ndaj uniformës, pas të cilave qëndrojnë padyshim urdhëruesit e fshehur pas imunitetit, nën drejtimin e Sali Berishës; një dhunues përsëritës i sulmeve ndaj institucioneve dhe rendit kushtetues.

“Personat përgjegjës, duhet të kuptojnë se nuk kanë asnjë mburojë politike mbi kokën e tyre. Kush tenton të vrasë policin, kush tenton të djegë institucionet, nuk merr as çmimin si terroristi më i mirë, as mirënjohjen e partisë së tij, por shkon në burg dhe merr ndëshkimin e parashikuar nga ligji”, tha Koçiu.

Koçiu shprehu solidaritetin maksimal “për të gjithë punonjësit e policisë të plagosur, si dhe për të gjithë kolegët e tyre, që edhe një herë më shumë kryen me profesionalizëm detyrën, duke mos rënë pre e një strategjie të qartë terrori, përmes provokimit të përsëritur dhunës e të gjakderdhjes.

“Vetëpërmbajtja e forcave të rendit, në kushtet më ekstreme, është një garanci e jashtëzakonshme për të gjithë qytetarët e ndershëm, që pavarësisht bindjeve të tyre politike, janë të bashkuar në dëshirën për të mos parë dhunë e aq më pak, ripërsëritjen e ngjarjeve të mbrapshta përpara syve të tyre”, tha Koçiu.

Ministrja nënvizoi se nuk ka asnjë tërheqje përballë akteve kriminale, të një minorance të dhunshme me maska, që fshehin fytyrën, por nuk mbulojnë dot qëllimin e tyre.

“Do të jemi përherë në krah të punonjësve me uniformë, gazetarëve dhe njerëzve të medias në krye të detyrës, dhe të gjithë atyre, që e ushtrojnë të drejtën kushtetuese të tubimit, në respekt të ligjit dhe bashkëjetesës në një shoqëri demokratike”, tha ajo. /j.p/

 

The post Koçiu: Drejtësia t’i trajtojë me përgjegjësi sulmet barbare ndaj policisë, urdhëruesit fshihen pas imunitetit appeared first on Agjencia Telegrafike Shqiptare.