Kryetari i Komunës së Obiliqit, Halil Thaçi, ka njoftuar se ka nënshkruar vendimin për mbështetje financiare mujore për familjet strehuese që kujdesen për fëmijët pa përkujdesje prindërore.

Në një postim në Facebook, Thaçi ka bërë të ditur se kjo mbështetje do të jetë në vlerë prej 350 euro në muaj për secilën familje strehuese në komunë.

“Sot kam nënshkruar vendimin që familjet strehuese në Komunën e Obiliqit, ato që hapin derën dhe zemrën për fëmijët pa përkujdesje prindërore, të mbështeten me 350 euro në muaj”, ka shkruar ai.

Kryetari i Obiliqit ka theksuar se kujdesi ndaj fëmijëve pa përkujdesje prindërore është obligim institucional dhe jo akt bamirësie. “Kujdesi për fëmijët nuk është bamirësi, por përgjegjësi institucionale”, ka deklaruar Thaçi.

Ai ka siguruar se Komuna e Obiliqit do të vazhdojë të mbështesë familjet që kontribuojnë në mirëqenien sociale dhe në ndërtimin e një shoqërie më të përgjegjshme.

“Komuna do të jetë pranë atyre që bëjnë më shumë për shoqërinë”, ka përfunduar kryetari Thaçi. /Telegrafi/

Komuna e Obiliqit ka miratuar vendimin për emërimin e komisionit për verifikimin e dëmeve të shkaktuara gjatë vërshimeve të fundit, të cilat kanë ndodhur në javën e parë dhe të dytë të muajit janar 2026.

Sipas vendimit, Komisioni do të ketë këtë përbërje: Arif Plana është emëruar kryetar i Komisionit, ndërsa anëtarë janë Naim Qerkezi, Muhamet Ismaili, Zejnullah Krasniqi dhe Naim Graiçevci.

Komisioni do të angazhohet në verifikimin e dëmeve të evidentuara në terren dhe, pas përfundimit të punës, do të përpilojë një raport me shkrim, përmes të cilit do ta njoftojë Kryetarin e Komunës lidhur me gjetjet dhe vlerësimin e dëmeve.

Ky hap synon krijimin e një pasqyre të saktë të dëmeve të shkaktuara nga vërshimet, në mënyrë që të merren masat e nevojshme institucionale për trajtimin e tyre. /Telegrafi/

Komuna e Obiliqit ka njoftuar se rruga Siboc–Palaj–Obiliq aktualisht është e kalueshme për qarkullimin e automjeteve.

Sipas njoftimit zyrtar të komunës, ekipet përkatëse ndodhen në terren dhe po e monitorojnë situatën në mënyrë të vazhdueshme, për të garantuar sigurinë e qarkullimit.

“Rruga Siboc–Palaj–Obiliq është e kalueshme për automjete, ndërsa ekipet janë në terren dhe situata po përcillet vazhdimisht”, thuhet në njoftimin e Komunës së Obiliqit.

Nga komuna u bëhet thirrje qytetarëve që të vozisin me kujdes dhe të respektojnë sinjalistikën rrugore, ndërsa për çdo ndryshim eventual, autoritetet komunale kanë paralajmëruar se do të njoftojnë me kohë. /Telegrafi/

Ndërmarrja Publike Lokale “Kastrioti” në Obiliq ka njoftuar se ekipet e saj kanë qenë të angazhuara në terren edhe gjatë ditëve me kushte të rënda atmosferike dhe gjatë fundjavës, duke realizuar disa intervenime në funksion të sigurisë dhe shërbimeve publike.

Sipas njoftimit, gjatë ditës së djeshme janë hapur pusetat dhe janë vendosur pengesa në rrugët e përmbytura nga uji, me qëllim të rritjes së sigurisë për qytetarët dhe pjesëmarrësit në trafik.

Po ashtu, gjatë ditës së sotme, me kërkesë të Komunës së Obiliqit, punëtorët e NPL “Kastrioti” kanë kryer pastrimin e trotuareve dhe shesheve nga bora, për të lehtësuar qarkullimin e këmbësorëve.

Në kuadër të angazhimeve, ndërmarrja ka bërë të ditur se është realizuar edhe përgatitja e lëndëve djegëse në shkollat e komunës, në mënyrë që procesi mësimor të nisë në kushte të përshtatshme ngrohjeje.

Nga NPL “Kastrioti” theksojnë se ekipet do të vazhdojnë të jenë në gatishmëri për përmbushjen e obligimeve, sipas nevojave dhe kërkesave të institucioneve komunale. /Telegrafi/

Komuna e Obiliqit ka njoftuar qytetarët se, si pasojë e reshjeve intensive të borës dhe temperaturave të ulëta, të gjitha rrugët në territorin e komunës janë të ngrira dhe të rrëshqitshme, duke vështirësuar ndjeshëm qarkullimin e automjeteve.

“Në territorin e komunës sonë, për shkak të reshjeve intensive të borës dhe temperaturave të ulëta, rrugët janë të ngrira dhe të rrëshqitshme, çka po e vështirëson qarkullimin”, thuhet në njoftimin e komunës.

Autoritetet komunale u kanë bërë thirrje qytetarëve që të shmangin lëvizjet e panevojshme, të përdorin pajisje dimërore dhe të tregojnë kujdes të shtuar gjatë qarkullimit.

Sipas njoftimit, ekipet kompetente komunale janë në terren dhe po punojnë në pastrimin e rrugëve, si dhe në trajtimin e tyre me materiale kundër ngrirjes.

“Ekipet janë në terren dhe po ndërhyjnë vazhdimisht për pastrimin dhe trajtimin e rrugëve”, thuhet më tej.

Komuna ka bërë të ditur se për çdo emergjencë apo problem, qytetarët mund të kontaktojnë Policinë e Kosovës ose zyrtarët përgjegjës të shërbimeve komunale.

Në njoftim janë publikuar edhe kontaktet direkte të zyrtarëve komunalë: Valon Svirca, Drejtor i DSHPE-së (044 990 239), Sami Haziri, Shef i Emergjencave (044 402 842) dhe Hamit Mjeku, Shef i Shërbimeve Publike (044 770 775). /Telegrafi/

Komuna e Obiliqit ka njoftuar qytetarët për situatën e vështirë në rrugën që lidh fshatin Graboc i Epërm me Drenasin, për shkak të daljes nga shtrati të lumit Drenica në segmentin rrugor Guri i Plakës.

“Rruga është e pakalueshme dhe qarkullimi është i rrezikuar”, thuhet në njoftimin e komunës, ku qytetarët ftohen të përdorin rrugë alternative deri në përmirësimin e gjendjes.

Institucionet përkatëse janë në terren dhe po e monitorojnë situatën, duke ndërmarrë të gjitha masat për të mbajtur nën kontroll rrezikun për qytetarët.

“Luten qytetarët të shfrytëzojnë rrugë alternative deri në përmirësimin e gjendjes”, theksohet në njoftim.

Komuna falënderon qytetarët për mirëkuptimin dhe bashkëpunimin në këtë situatë. /Telegrafi/

Nënkryetari i Komunës së Obiliqit, Berat Gashi, së bashku me Drejtorin e Shërbimeve Publike, Valon Svirca, dhe Drejtorin e Mjedisit, Rinor Kurteshi, kanë dalë në terren për të vlerësuar nga afër rastet e evidentuara në disa zona të komunës.

Sipas njoftimit të Komunës së Obiliqit, pas inspektimit në terren janë ndërmarrë intervenime konkrete me qëllim të eliminimit të problemeve në prona të caktuara, duke synuar përmirësimin e gjendjes mjedisore dhe rritjen e nivelit të sigurisë për qytetarët.

“Pas vizitës në terren, janë ndërmarrë intervenime konkrete për eliminimin e problemeve në prona, duke synuar përmirësimin e mjedisit dhe rritjen e sigurisë për qytetarët”, thuhet në reagimin e komunës.

Po ashtu, nga Komuna e Obiliqit është bërë e ditur se institucionet komunale mbeten të përkushtuara për trajtimin e çdo shqetësimi të qytetarëve.

“Komuna mbetet e përkushtuar që çdo shqetësim i qytetarëve të trajtohet me seriozitet dhe të gjendet zgjidhje në kohë”, theksohet në njoftim. /Telegrafi/

Drejtoresha e Drejtorisë së Arsimit në Komunën e Obiliqit, Sevdije Berisha Krasniqi, së bashku me drejtorin e Drejtorisë së Inspekcionit, Arif Pllana, kanë realizuar vizita inspektuese në disa shkolla të territorit të kësaj komune.

Gjatë vizitave, drejtuesit komunalë kanë parë nga afër kushtet në të cilat zhvillohet procesi mësimor, duke identifikuar nevojat për ndërhyrje me qëllim të përmirësimit të infrastrukturës shkollore dhe krijimit të një ambienti më të sigurt dhe më të përshtatshëm për nxënësit.

Nga Komuna e Obiliqit është bërë e ditur se këto vizita janë pjesë e angazhimeve të vazhdueshme për rritjen e cilësisë së arsimit dhe adresimin e problematikave që ndikojnë në mbarëvajtjen e procesit edukativo-arsimor. /Telegrafi/

Kandidati për deputet nga LVV, Glauk Konjufca ishte në konakun e familjes Grajqevci, nga të cilët u prit ngrohtësisht.

Ai tha se vullneti dhe angazhimi për zhvillim e mirëqenie, do të vazhdojë edhe në qeverisjen e ardhshme të Lëvizjes Vetëvendosje, për çka sipas tij mbështetja qytetare është e qartë.

Ndërsa në Obiliq, bashkë me kryetarin Halil Thaqi, takoi vullnetarët e angazhuar atje.

Konjufca e cilësoi angazhimin e tyre vullnetar, si shtyllë të fitores së 28 dhjetorit.

Bashkë me ta ai bisedoi për politikat qeverisëse për rininë, si dhe për synimet e së ardhmes.

Konjufca ishte edhe në Bardhosh, ku tha se rruga e nisur tashmë, do të fuqizohet duke mos lëshuar pe e duke mbështetur numrin 116.

Lidhja Demokratike e Kosovës ka nisur sot tubimin e parë në qytetin e Obiliqit.

Nga këtu, kandidati për kryeministër, Lumir Abdixhiku u premtoi atyre 5 miliardë euro investime në infrastrukturë, energji, ujë, hekurudha, sport e po ashtu edhe në kulturë, si dhe central të ri me gaz për pavarësi energjetike.

“5 miliardë euro investime në infrastrukturë, energji, ujë, hekurudha, sport dhe kulturë. Centrali i ri me gaz për pavarësi energjetike. Rrugë që lidhin rajonet. Projekte që hapin vende pune”, tha Abdixhiku gjatë tubimit.

Abdixhiku theksoi se LDK beson që zhvillimi ekonomik nuk mund të vijë duke sakrifikuar shëndetin e njerëzve dhe se energjia nuk mund të prodhohet pa standarde mjedisore.

“Nuk mund të ekzistojë pa përgjegjësi sociale. Dhe se Obiliqi nuk mund të mbetet zonë flijimi për rehati politike. Prandaj programi ynë parasheh investime serioze në energji të pastër, në modernizim të kapaciteteve ekzistuese dhe në mbrojtje reale të mjedisit”, deklaroi Abdixhiku.

Lidhja Demokratike e Kosovës ka njoftuar përmes një postimi në Facebook se sot do të zhvillojë takime publike në Obiliq, Fushë Kosovë dhe Prishtinë Dega 2.

“Kryetari i LDK-së dhe kandidati ynë për kryeministër, Lumir Abdixhiku, vjen për t’ju folur drejtpërdrejt për vizionin e tij për një Kosovë më të fortë, më të drejtë dhe plot shpresë”, shkruan LDK.

"Në kuadër të këtyre takimeve, partia do të prezantojë programin qeverisës dhe kandidatët nga këto degë, të cilët sipas njoftimit janë “të njohur, të përkushtuar dhe të gatshëm të punojnë për qytetarët me ndershmëri dhe përgjegjësi”.

Partia fton qytetarët, familjarët, miqtë dhe aktivistët që të marrin pjesë në këto takime për të dëgjuar vizionin e LDK-së dhe për të dhënë mbështetjen e tyre për të ardhmen e Kosovës.

“Zgjidh shpresën! Le të jemi bashkë për Kosovën, për ndryshimin që e presim!”, përfundon postimi.

Drejtori i Shërbimeve Publike dhe Emergjencave në Komunën e Obiliqit, Valon Svirca, ka inspektuar sonte nga afër punimet e pastrimit të rrugëve në disa zona të qytetit.

Vizita u realizua në rrugën “Hasan Prishtina”, në afërsi të TC Kosova A, si dhe në rrugën “Çlirimi” në Mazgit, ku është e angazhuar kompania përgjegjëse për mirëmbajtjen dhe pastrimin e hapësirave publike.

Gjatë inspektimit, drejtori Svirca u informua për dinamikën e punës dhe angazhimin e punëtorëve në terren, duke theksuar rëndësinë e vazhdimit të punës me intensitet të shtuar për të garantuar një mjedis më të pastër dhe më të sigurt për qytetarët.

Ai falënderoi kompaninë dhe punëtorët për përkushtimin e treguar, duke theksuar se Drejtoria e Shërbimeve Publike dhe Emergjencave do të vazhdojë monitorimin e rregullt të punimeve në terren. /Telegrafi/

KRU Prishtina ka njoftuar se për shkak të dëmtimit të një gypi të ujit me diametër Ø200, i shkaktuar gjatë punimeve nga Korporata Energjetike e Kosovës (KEK), është ndërprerë furnizimi me ujë të pijshëm në disa zona të Komunës së Obiliqit.

Sipas njoftimit, pa furnizim me ujë kanë mbetur lagjja te Hekurudha në Obiliq, si dhe fshatrat Plemetin dhe Hamidi.

Nga KRU Prishtina bëhet e ditur se ndërprerja do të zgjasë deri në sanimin e plotë të dëmit, ndërsa ekipet përkatëse janë duke punuar për rregullimin e prishjes dhe rikthimin e furnizimit sa më parë.

Ndërmarrja u ka bërë thirrje konsumatorëve për mirëkuptim deri në normalizimin e situatës. /Telegrafi/

Kryetari i Komunës së Obiliqit, Halil Thaçi, së bashku me nënkryetarin Berat Gashi dhe drejtorin e Drejtorisë së Infrastrukturës Lokale, Naim Shalaku, kanë inspektuar nga afër punimet e realizuara në rrugën “Hasan Prishtina”.

Gjatë inspektimit, kryetari Thaçi ka adresuar vërejtje ndaj operatorit ekonomik përgjegjës për zbatimin e projektit, veçanërisht lidhur me cilësinë e punimeve në rrugë dhe në shtigjet e biçikletave.

Ai ka kërkuar përmirësimin e menjëhershëm të punimeve dhe respektimin e plotë të standardeve teknike të parapara me kontratë.

Thaçi theksoi se Komuna e Obiliqit do të vazhdojë mbikëqyrjen e rregullt të projekteve infrastrukturore, me qëllim që investimet publike të realizohen në mënyrë cilësore dhe në shërbim të drejtpërdrejtë të qytetarëve.

Komuna mbetet e përkushtuar që projektet infrastrukturore të zbatohen në përputhje me standardet profesionale dhe nevojat e komunitetit. /Telegrafi/

Ndërmarrja Publike Lokale “Kastrioti” ka njoftuar se pastrimi i mbeturinave nga shportat e vogla publike po realizohet rregullisht nga punëtorët e operativës.

Megjithatë, nga kjo ndërmarrje u është bërë apel qytetarëve që këto shporta të përdoren vetëm për hedhjen e mbeturinave të vogla dhe të shmanget deponimi i mbeturinave të mëdha apo sasisë së tepërt të mbetjeve.

Sipas NPL “Kastrioti”, respektimi i këtij rregulli ndihmon në ruajtjen e pastërtisë së hapësirave publike dhe në funksionimin efikas të shërbimeve të pastrimit.

Nga ndërmarrja bëjnë thirrje për bashkëpunim të qytetarëve, duke theksuar se kontributi i përbashkët është kyç për krijimin e një mjedisi më të pastër dhe më të shëndetshëm për të gjithë. /Telegrafi/

Në orën 13:43 është raportuar një rast i dyshuar i dëmtimit të varrezave nga persona ende të panjohur.

Sipas informatave fillestare, janë dëmtuar pllaka e një varri si dhe vazot e dy varreve të tjera.

Njësitë përkatëse policore kanë dalë në vendin e ngjarjes dhe kanë ndërmarrë veprimet e nevojshme hetimore.

Lidhur me rastin është njoftuar prokurori kompetent, ndërsa hetimet janë duke vazhduar nga njësitë relevante policore. /Telegrafi/

Policia e Kosovës ka arrestuar një person për armëmbajtje pa leje dhe prezantim të rremë.

Rasti ka ndodhur në Mazgit të Obiliqit, të premten në ora 18:20.

“Është arrestuar i dyshuari mashkull kosovar, për shkak se derisa kishte qenë duke e drejtuar veturën me targa vendore ishte ndaluar nga njësiti policor dhe gjatë kontrollit i kanë gjet dhe konfiskuar një pistoletë me tetë copë fishekë. I dyshuari ishte prezantuar si person zyrtar- pjesëtarë i FSK-së, por është verifikuar dhe ka rezultuar se i njëjti nuk është pjesëtarë i FSK-së”, thuhet në raport.

I njëjti pas intervistimit me urdhër të prokurorit është liruar në procedurë të rregullt. /Telegrafi/

Komuna e Obiliqit ka njoftuar qytetarët se nga sot, 12 dhjetor, deri më 26 dhjetor 2025, do të zhvillohen punimet në rrugën “Idriz Sallova”.

Për shkak të këtyre punimeve, rruga do të jetë e mbyllur për qarkullim gjatë orarit të punës.

Në segmentet e tjera të rrugës do të vendosen ura metalike për qarkullimin e automjeteve me kapacitet deri në 20 ton, si dhe ura të dedikuara për këmbësorët, me qëllim të lehtësimit të lëvizjes gjatë fazës së intervenimeve.

Komuna u bën thirrje qytetarëve që gjatë kësaj periudhe të shfrytëzojnë rrugët alternative dhe t’i respektojnë udhëzimet në terren.

Zyra për Informim falënderon qytetarët për mirëkuptimin dhe bashkëpunimin. /Telegrafi/

Atmosfera festive ka filluar të marrë formë në Obiliq, ku ekipet e operativës së komunës kanë nisur dekorimin e hapësirave publike për festat e fundvitit.

Punëtorët po punojnë me përkushtim për vendosjen e bredhit dhe elementeve të tjera dekorative që pritet t’i japin qytetit një pamje të ngrohtë dhe të gjallë gjatë muajit dhjetor.

Sipas komunës, punimet do të vazhdojnë edhe në ditët në vijim, derisa të gjitha rrugët, sheshet dhe hapësirat kryesore të marrin ndriçimin dhe atmosferën e festave.

Qëllimi është që qyteti të reflektojë dritë, harmoni dhe frymë bashkimi për të gjithë banorët gjatë sezonit të festave.

Dekorimi i qytetit pritet të përfundojë brenda afateve të planifikuara, në mënyrë që vizitorët dhe qytetarët e Obiliqit ta shijojnë sa më herët atmosferën e fundvitit. /Telegrafi/

Pastrimi i mbeturinave në qytetin e Obiliqit vazhdon çdo ditë nga punëtorët e NPL "Kastrioti", të cilët përkujdesen për ruajtjen e pastërtisë dhe rregullsisë së rrugëve, shesheve dhe lagjeve të ndryshme.

Pavarësisht kushteve atmosferike dhe sfidave të punës, punëtorët e operativës kryejnë detyrat e tyre me përkushtim dhe përgjegjësi, duke kontribuar në mirëqenien dhe shëndetin e qytetarëve.

Ky angazhim i përditshëm tregon përkushtimin e NPL "Kastrioti" për një ambient të pastër dhe të rregullt për të gjithë banorët e Obiliqit. /Telegrafi/