Last Updated on 24/01/2026 by EL

Tensione në protestën e opozitës. Raportohet se janë hidhur molotovë drejt Kryeministrisë.

Molotovët janë hedhur menjëherë sapo mbaroi fjala e Sali Berishës.

Ky i fundit zgjodhi të kishtë një fjalim të shkurtër, ndërsa pohoi se opozita do të vijojë aksionin deri në shembjen e qeverisë./et

Last Updated on 24/01/2026 by EL

Nga Petro Koçi

Mblidhen rilindasit e Saliut, kokë më kokë, por nuk bëhen dot më shumë sesa një valë turme pëdëistësh — por kurrë një det qytetarësh. Kthimi pas i Shqipërisë për të rilindur Berishën dhe shpurën e tij të korruptuar nuk frymëzon dot një lëvizje politike gjithëpërfshirëse. Imazhi i tij ndjell vetëm dështim të garantuar. Dhe jo vetëm kaq.

Fabulat e herëpashershme të shpikura nga politika pëdëiste — si ato që e bëjnë Shqipërinë “Venezuelë”, Ramën “Maduro”, apo pretendimi se SHBA do të rrëzojë qeverinë shqiptare për t’ia dhuruar pushtetin Berishës — thërrmohen lehtësisht, dhe bashkë me to bien përtokë edhe kauzat disi më të drejta të opozitës, përfshirë edhe retorikën kundër korrupsionit.

Ndërkaq, edhe vetë retorika kundër korrupsionit nuk është e besueshme kur shqiptohet nga goja e opozitës. Sepse ata një ditë e shpallin SPAK-un organizatë kriminale, e ditën tjetër e duartrokasin. Sipas interesit: nëse ndiqet penalisht Berisha, drejtësia qenka e kapur; nëse ndiqet penalisht një ministër socialist, drejtësia qenka e drejtë dhe e pastër.

Shkurt, mund të themi se një opozitë e korruptuar nuk mund të luftojë korrupsionin. Përkundrazi, një opozitë e komprometuar dhe mekatare e ushqen dhe e mban gjallë korrupsionin.

Prandaj protestat e PD-së nuk ndjellin shpresë, por shërbejnë vetëm si mburojë për korrupsionin e Berishës dhe familjes së tij./et

Fatmir Mediu, në deklarata para nisjes së protestës së opozitës, deklaroi se Edi Rama nuk do të shkojë në Shtëpinë e Bardhë.

“Nuk besoj çdo marrëzi që thotë Edi Rama. Unë nuk mohoj mundësinë që Edi Rama të takojë Presidentin amerikan, sepse është kryeministri i vendit. Por, çështja është që çfarë diskutohet në Shtëpinë e Bardhë. Ka pasur vetëm dy vizita zyrtare në Shtëpinë e Bardhë dhe këto kanë qenë të zotit Sali Berisha kur ka qenë President. Dhe vizita më e rëndësishme amerikane në Shqipëri ka qenë ajo e Presidentit George Ë. Bush, po në takim me zotin Berisha”, tha Mediu.

Sipas tij, “çdo lloj personalizimi i marrëdhënies me SHBA-në është e ulët dhe e pavlerë për shqiptarët”./et

Last Updated on 24/01/2026 by EL

Ish-deputeti Ervin Salianji i është bashkuar protestës së PD para kryeministrisë pavarësisht përplasjeve me Sali Berishën dhe Flamur Nokën.

Salianji prej kohësh po zhvillon takime me demokratët në terren, ndërkohë që Berisha është shprehur mëse një herë se ai ka kaluar vijën e kuqe dhe është vetëpërjashtuar. Në të njëjtën linjë ka qenë edhe Flamur Noka. /et

Last Updated on 24/01/2026 by EL

Juristi Kreshnik Spahiu është shprehur se sfida më e madhe e kryedemokratit Sali Berisha është që të largojë Ervin Salianjin nga kandidimi në PD dhe Adriatik Lapajn nga protesta në bulevard.

Komentet Spahiu i bëri në një lidhje live për Report TV, ku shtoi se qëllimi i vërtetë i Berishës nuk është rrëzimi i qeverisë së kryeministrit Edi Rama.

Ai shtoi se Berisha gjatë gjithë jetës së tij politike ka ecur me një parim, që brenda PD-së të mos ketë kurrë zgjedhje të lira e të ndershme.

Spahiu i cilësoi të turpshme sulmet që Berisha dhe PD po i bëjnë ish-deputetit të Ervin Salianji, pas takimeve që ky i fundit po zhvillon me qytetarët në qytete të ndryshme të Shqipërisë.

“Sali Berisha ka një parim: ‘të bëjë zgjedhje kundërshtari, por ne zgjedhje të lira e të ndershme nuk bëjmë kurrë’. E gjithë kjo është për t’i paraprirë mos-bërjes së zgjedhjeve në PD, ose zgjedhjeve formale, duke larguar, mos e lejuar apo anatemuar rivalin e tij politikë. Pas 35 vitesh këta dalin, poshtërojnë, largojnë dhe dhunojnë Ervin Salianjin.

Pra sfidën më të madhe ky e ka që të rrëzojë Ervin Salianjin sesa të largojë Edi Ramën. Domethënë të largojë Adriatik Lapajn nga bulevardi dhe jo Edi Ramën. Të largojë Agronin nga marrëdhëniet me ndërkombëtarët dhe jo Edi Ramën. Dhe në thelbin e vet është duke mbajtur protagonizmin brenda opozitës”, tha Spahiu./et

Last Updated on 24/01/2026 by EL

Instituti i Gjeoshkencave lajmëron se disa qarqe të vendit do të jenë nën ndikimin e reshjeve të shiut. Shkodra pritet të ketë intensitet më të lartë të tyre, ndërsa në Kukës e Vlorë do të jenë të dobëta deri në mesatare dhe me shtrëngata.

IGJEUM njofton se reshjet mund të shkaktojnë rënie gurësh dhe përmbytje në disa zona urbane në Shkodër.

“Sot pasdite (e shtunë, dt. 24) në qarkun Shkodër priten reshje të dobëta deri lokalisht mesatare, ndërsa në qarqet e tjera priten reshje të dobëta. Nesër (e diel, dt. 25) priten reshje mesatare deri lokalisht intensive në qarkun Shkodër, ndërsa të dobëta deri lokalisht mesatare në qarqet Kukës dhe Vlorë të shoqëruara me shtrëngata. Në të gjitha qarqet e tjera priten reshje të dobëta.

Në veri në lartësitë mbi 900 m nga niveli i detit reshjet do të jenë në formë dëbore.

Shtrëngatat dhe intensiteti i lartë i reshjeve, mund të krijojnë probleme të ndryshme, si rënie gurësh e inertesh dhe vërshime të ujit në zonat urbane të lokalizuara, në varësi të sistemit të kanalizimeve në qarkun Shkodër.

Temperaturat minimale dhe maksimale të ajrit pritet të arrijnë:

në bregdet: 11 / 19 °C

në vendet e ulëta: 9 / 19 °C

në vendet malore: 2 / 12 °C

Sot pasdite (e shtunë, dt. 24) dhe nesër (e diel, dt. 25) era pritet të fryjë mesatare deri e fortë kryesisht në bregdet dhe në vendet malore”, thuhet në postimin në rrjetet sociale./et

Last Updated on 24/01/2026 by EL

Pavarësisht pamjes së regjisë qendrore të protestës së Berisha, këto pamje flasin më shumë se çdo koment.

Përveçse demokratëve, Berisha është i braktisur edhe nga shqiptarët.

Në shesh aktualisht janë vetëm një grup i vogël militantësh./et

Last Updated on 24/01/2026 by EL

Protesta e Partisë Demokratike ka detyruar sërish protestuesit e “Shqipëria Bëhet” të Adriatik Lapajt, të cilët kanë lënë vendin e tyre para kryeministrisë ku qëndrojnë prej javësh për t’u zhvendosur pak më tej.

Tashmë, Adriatik Lapaj dhe mbështetësit e tij janë vendosur në të njëjtin vend si në protestën e 22 dhjetorit, te parku përballë hotel “Rogner”.

Kujtojmë që pas disa ditësh, “Shqipëria Bëhet” do të mbajë protestën e saj kombëtare përpara kryeministrisë, të vendosur për në datën 31 janar, në orën 18:00./et

Presidenti turk Recep Tayyip Erdogan zhvilloi në Stamboll një takim me ministrat e Jashtëm të vendeve të Ballkanit, ku u diskutuan marrëdhëniet dypalëshe dhe çështjet rajonale.

Në kuadër të Platformës së Paqes në Ballkan, Erdogan theksoi rëndësinë e solidaritetit, sigurisë, energjisë dhe bashkëpunimit rajonal, duke bërë thirrje për veprim të përbashkët dhe nisma të fokusuara në paqe./mxh

Tre persona u arrestuan nga policia pasi akuzohen se fusnin lëndë narkotike brenda ambienteve të burgut të Elbasanit. Në pranga u vunë punonjësi i policisë, Ndriçim Kroi, i paraburgosuri Gerald Stamolla, dhe një grua, familjare e këtij të fundit, Esmeralda Komici.

Zbardhen detaje nga dosja në ngarkim të të tre të akuzuarve. Në dosje shpjegohet se si efektivi Ndriçim Kroj arrinte që të shpërndante lëndët narkotike brenda burgut. Për të kamufluar aktivitetin e tij të paligjshëm, ai punonte jashtë orarit të punës si shitës ambulant, ku shiste telefona të përdorur dhe sende të tjera me vlerë, ku edhe merrte porosi nga familjarët e të paraburgosurve.

Siç theksohet në dosje, ai ka arritur që t’u dërgonte drogë tëparaburgosurve Gerald Stamolla, Fatjon Pellumbi dhe Emiljano Dinja. Për të mos rënë në sy, këtë aktivitet ai e kryente gjatë turnit të tretë të shtunën apo të dielën, ku në burg personeli ishte i reduktuar.

“Punonjësi i policisë së burgjeve shtetasi Ndriçim Kroj i cili kryen shërbim në regjimin e brëndshëm në IEVP Elbasan merret me aktivitet të kundraligjshëm e konkretisht në futjen e lëndeve narkotike në regjimin e brëndshëm. Për të kamufluar aktivitetin e tij të kundraligjshëm Ndriçimi gjatë orëve që nuk është në punë është shitës ambulant në qytetin e Elbasanit dhe shet telefona të përdorur dhe sende të tjera me vlerë. Në vendin ku Ndriçimi është shitës ambulant merr porosi nga të afërmit e të paraburgosurve dhe jua sjell në IEVP Elbasanit. Në vijim të verifikimeve të kryera është marrë dhe administruar e dhëna se Ndricimi furnizon me lëndë narkotike të paraburgosurit Gerald Stamolla, Fatjon Pellumbi dhe Emiljano Dinja të cilët janë të akomoduar në IEVP Elbasan. Më pas shitja dhe shpërndarja e lëndës narkotike bëhet në regjimin e brendshëm nga të paraburgosurit e mësipërm. Është marrë dhe administruar informacioni se Ndricimi këtë veprimtari të kundraligjshme në futjen e lëndës narkotike në regjimin e brendshme e bën gjatë marrjes së shërbimit turni i tretë dhe ditën e shtunë dhe të djele ku në institucion nuk ka personel të administrates.”, thuhet në dosje.

Autoritetet kanë dokumentuar të paktën pesë episode ku efektivi Ndriçim Kroj kryen të njëjtin intenerar të dyshimtë. Në fillim shkonte te automjeti i tij, dhe më pas shkonte në sallën e informacionit për të vijuar më pas në regjimin e brendshëm, ku shpërndahej lënda narkotike.

“Në zyrën e SHKBB-s pranë IEVP Elbasan janë këqyrur pamjet filmike te dates 17.05.2025, 24.05.2025, 26.05.2025, 05.06.2025, dhe 14.06.2025 dhe në pesë episode të ndryshme vihet re që shtetasi Ndriçim Kroj ka të njëjtin intenerar lëvizjesh e konkretisht pasi mbaron instruktazhin largohet nga rreshtimi dhe shkon tek automjeti i tij tip ford me ngjyrë gri me targë AA 857 LE, futet brënda në makinë qëndron disa sekonda, bën disa lëvizje të dyshimta dhe më pas futet në sallen e informacionit për tu future në regjimin e brëndshëm.

Në një episode vihet re që Ndriçimi sapo hyn në sallën e informacionit vendos sendet personale, vesh shapkat dhe vrapon drejt automjetit të tij ku qëndron disa sekonda brenda dhe më pas hyn në sallën e informacionit dhe vendos celsin e makines së tij sipër skanerit pa e kontrolluar atë, dhe pasi kontrollohet vetë fizikisht merr celsin dhe e fut në xhep. Vihet re që sapo futet në sektor, hyn në dhomat e të paraburgosurve dhe qëndron disa sekonda dhe më pas del dhe bën lëvizje të pakontrolluara dhe të dyshimta.”, thuhet më tej në dosje./mxh

Të gjithë duam të ndihemi të dashur dhe të respektuar. Por respekti i vërtetë nuk vjen nga një version që u pëlqen të tjerëve. Ai ndërtohet kur je autentik/e, i/e qartë dhe në paqe me veten.

Po, do punë. Po, kërkon të heqësh dorë nga disa zakone që ndoshta i ke pasur për vite. Por shpërblimi? Një respekt që nuk është i përkohshëm.

Nëse kjo është ajo që kërkon për veten tënde, ndoshta duhet të heqësh dorë edhe nga këto zakone:

1. Thashethemet

Thashethemet mund të duken argëtuese në moment, por në fund dëmtojnë reputacionin tënd. Njerëzit nuk e respektojnë dikë që ndërton veten duke ulur të tjerët. Respekti vjen nga maturia dhe vetëkontrolli.

2. Premtimet që nuk i mban

Të thuash “po” dhe pastaj të zhdukesh është mënyra më e shpejtë për të humbur besimin. Nëse nuk je i/e sigurt që mund ta bësh diçka, thuaje hapur. Sinqeriteti respektohet gjithmonë më shumë sesa justifikimet.

3. Të thuash “po” kur mendon “jo”

Ky është problem klasik. Ti e bën për të mos zhgënjyer të tjerët, por përfundon duke tradhtuar veten. Kufijtë e shëndetshëm nuk të bëjnë egoist/e, por më të respektueshëm/me në sy të të tjerëve.

4. Justifikimet

Nuk ke pse të shpikësh arsye, je person i rritur. Nëse nuk do, thuaj që nuk do. Të qenit i/e qartë është një formë mirësie dhe njerëzit e ndiejnë.

5. Të kërkosh falje pa arsye

Të kërkosh falje për çdo gjë nuk të bën më të sjellshëm/me, por më pak autentik/e. Thuaj “më fal” vetëm kur e mendon vërtet. Atëherë fjalët e tua kanë peshë.

6. Të vësh gjithmonë të tjerët para vetes

Të jesh bujar/e është gjë e bukur, por të sakrifikosh veten pafund jo.

7. Të kërkosh vazhdimisht miratimin e të tjerëve

Njerëzit që respektohen më shumë janë ata që ecin sipas ritmit të tyre. Jo çdo mendim kërkon miratimin e të tjerëve, për të mos thënë asnjë mendim.

8. Të zbehësh dritën e të tjerëve

Xhelozia është njerëzore, por të ulësh dikë tjetër për t’u ndier më mirë vetë nuk është elegante. Njerëzit më të admirueshëm janë ata që i ngrejnë të tjerët lart.

9. Materializmi i tepruar

Sendet luksoze mund të tërheqin vëmendje, por jo respekt të vërtetë. Respekti ndërtohet mbi atë që je, jo mbi atë që ke./mxh

Mjekët gastrohepatologë dhe onkologë kanë ngritur alarmin për rritjen e rasteve me tumore të aparatit tretës, përfshirë stomakun, pankreasin, zorrën e trashë dhe ezofagun, madje edhe tek pacientët e rinj.

Profesor Myzafer Kaci renditi disa faktorë të jashtëm që ndikojnë në rritjen e këtyre tumoreve dhe kërkoi nga autoritetet krijimin e qendrave për depistimin e popullatës.

“Ushqimet, hormonet, rrezatimet ndikojnë shumë në rritjen e numrit të tumoreve. Por për fat të keq kapen vonë, sepse shqiptarët nuk kujdesen si duhet për shëndetin e tyre. I lutem autoriteteve të krijojnë disa qendra për depistim me fibroskopi apo kolonoskopi”, tha Prof. Myzafer Kaci.

Ai gjithashtu theksoi simptomat që duhet të nxisin vizitën tek mjeku, si gjaku në feçe ose një analizë fece, dhe rekomandoi fillimin e ekzaminimeve të aparatit tretës nga mosha 40 vjeç: “Ne po hasim tumore edhe tek të rinjtë, 20-30 vjeç, por masivisht fillojnë nga 40 deri në 70 vjeç, prandaj një fibro apo kolonoskopi pas moshës 40 vjeç është e domosdoshme.”

Një shqetësim i veçantë mbetet kujdesi në banesë për pacientët në fazat e fundit të sëmundjes.

“Duhet rritur kujdesi paliativ, pasi pacientët vijnë në mjekësinë interne dhe qëndrojnë 1–2 muaj në pavion. Duhet rritur kujdesi edhe në shtëpi”, u shpreh Dr. Bernard Progni.

Në një konferencë shkencore me pjesëmarrjen e mjekëve të njohur u diskutua jo vetëm rritja e numrit të rasteve dhe trajtimi i tyre, por edhe rëndësia e ndërgjegjësimit të qytetarëve për kujdesin shëndetësor./mxh

Presidenti i Ukrainës, Volodymyr Zelensky, ka deklaruar se delegacioni ukrainas ka paraqitur raportin e tij dhe se takimet e zhvilluara në Emiratet e Bashkuara Arabe kanë përfunduar.

Në një postim në platformën X, Zelensky theksoi se ky ishte formati i parë i tillë pas një periudhe të gjatë dhe se bisedimet u zhvilluan në një frymë konstruktive, me shumë diskutime mes palëve.

“Palët ranë dakord të raportojnë në kryeqytetet përkatëse dhe të koordinojnë hapat e mëtejshëm me udhëheqësit,” shkroi ai.

Sipas Zelenskyt, përfaqësuesit ushtarakë kanë identifikuar një listë çështjesh që mund të shërbejnë si bazë për një takim të ardhshëm. Ai shtoi se, nëse ekziston gatishmëri për të ecur përpara – gjë që Ukraina e ka shprehur – takime të tjera mund të mbahen, potencialisht që javën e ardhshme./mxh

Presidenti amerikan Donald Trump ka deklaruar se një armë e re sekrete, që ai e quan “Discombobulator” ishte thelbësore për operacionin që çoi në arrestimin e Nicolas Maduros.

Trump u mburr se arma misterioze “i bëri pajisjet armike të mos funksiononin” kur helikopterët amerikanë u futën në Karakas më 3 janar për të arrestuar Maduron dhe gruan e tij, Cilia Flores, me akuza federale për drogë dhe armë , operacion që përfundoi pa asnjë humbje jete nga ana e palës amerikane.

“Discombobulator, Nuk më lejohet të flas për të, megjithëse do të doja shumë”, tha Trump gjatë një interviste ekskluzive në Zyrën Ovale.

“Ata nuk arritën që të përdornin asnjë armë, asgjë prej tyre nuk ka funksionuar”, u shpreh ai.

Trump komentoi mbi armën kur u pyet për raportet e kësaj jave se administrata Biden bleu një armë me energji pulsuese që dyshohet se është lloji që shkakton “Sindromën e Havanës”.

Nuk dihet shumë për armën, por këto raportime pasuan rrëfime nga terreni nga Venezuela që përshkruanin se si personat e armatosur të Maduros u ulën në gjunjë, duke “rrjedhur gjak nga hunda” dhe duke vjellë gjak.

Një anëtar i ekipit të rojeve të Maduros tregoi se papritmas të gjitha sistemet e radarit janë fikur pa asnjë shpjegim.

“Gjëja tjetër që pamë ishin dronë, shumë dronë, që fluturonin mbi pozicionet tona. Nuk dinim si të reagonim”, tha ai, duke thënë se më pas u shfaqën helikopterë që transportonin rreth 20 trupa amerikane në zonë.

“Diskombobulatori” atëherë u drejtua drejtpërdrejt mbrojtësve të Maduros.
“Në një moment, ata lëshuan diçka; nuk di si ta përshkruaj. Ishte si një valë zanore shumë intensive. Papritmas ndjeva sikur koka ime po shpërthente nga brenda”, tha dëshmitari.

“Të gjithëve filloi të na rrjedhë gjak nga hunda. Disa po villnin gjak. Ne ramë përtokë, të paaftë për të lëvizur. As nuk mund të ngriheshim pas asaj arme sonike – apo çfarëdo që të ishte.”/mxh

Nicola Peltz Beckham ka qenë shpesh në qendër të vëmendjes mediatike shumë përpara se të martohej me Brooklyn Beckham. Aktorja amerikane, e lindur në një familje të pasur në Nju Jork, nisi karrierën e saj që në moshë shumë të re dhe u bë e njohur për publikun e gjerë falë rolit të saj në serialin Bates Motel në vitin 2013.

Jeta e saj sentimentale mori po aq vëmendje sa edhe karriera, veçanërisht kur ajo u lidh me emra të njohur nga bota e showbiz-it.

Anwar Hadid

Nicola Peltz dhe Anwar Hadid, vëllai i vogël i modeleve të famshme Gigi dhe Bella Hadid, nisën lidhjen e tyre rreth vitit 2016. Ata e konfirmuan publikisht romancën përmes postimeve në Instagram dhe intervistave, ku Nicola e përshkroi familjen Hadid si “të mrekullueshme”.

Çifti u nda në vitin 2018, por Nicola mbeti në marrëdhënie të mira me disa anëtarë të familjes Hadid. Gigi Hadid ishte e pranishme në dasmën e saj në vitin 2022, ndërsa Nicola dhe Bella Hadid më vonë bashkëpunuan në serialin The Beauty të Ryan Murphy. Megjithatë, jo të gjithë anëtarët e familjes Hadid ishin mbështetës. Motra e Anwar-it, Alana Hadid, komentoi në mënyrë kritike ndaj Nicola-s në rrjetet sociale gjatë dramës mes familjes Beckham dhe çiftit.

Paul Klein
Pas ndarjes nga Anwar Hadid, Nicola u lidh për pak kohë me Paul Klein, këngëtarin kryesor të grupit LANY. Marrëdhënia e tyre në vitin 2018 përfshiu edhe bashkëpunime artistike, pasi Nicola u shfaq në kopertinën e këngës “Thru These Tears”. Edhe pse lidhja ishte e shkurtër, të dy u ndanë në mënyrë miqësore. Nicola konfirmoi ndarjen në vitin 2019, duke i uruar Paul-it më të mirat.

Brooklyn Beckham
Nicola dhe Brooklyn Beckham u njohën për herë të parë në Coachella në vitin 2017, por romanca e tyre nisi zyrtarisht në tetor 2019, pas një takimi në festën e Halloween-it të Leonardo DiCaprio-s. Vetëm dy ditë më vonë, ata ndanë puthjen e parë.

Çifti e bëri lidhjen publike në janar 2020 dhe u fejua disa muaj më pas. Në prill të vitit 2022, ata u martuan në një ceremoni luksoze në rezidencën e familjes Peltz në Florida. Megjithatë, pas dasmës dolën në pah tensione të forta me familjen Beckham. Brooklyn ka deklaruar publikisht se bashkëshortja e tij është ndjerë e fyer dhe e përjashtuar nga disa anëtarë të familjes së tij, përfshirë edhe nënën, Victoria Beckham. Në vitin 2025, Nicola dhe Brooklyn rinovuan betimet martesore për të krijuar kujtime të reja, pa hijen e konflikteve familjare. Pavarësisht polemikave, çifti vazhdon të tregojë mbështetje të fortë për njëri-tjetrin aq sa Brooklyn ka bërë mbi 20 tatuazhe të dedikuara për Nicola-n./mxh

Skemat e mashtrimit, të ngjashme me firmat piramidale, janë rikthyer sërish në qytetin e Lezhës. Edhe pse një skemë e tillë mashtroi më herët qindra qytetarë dhe solli humbje të mëdha financiare, institucionet përgjegjëse nuk ndërmorën asnjë veprim konkret.

Nuk pati hetim të thelluar, nuk u identifikuan përgjegjësit dhe askush nuk u vu përpara drejtësisë, duke lënë të hapur terrenin për rikthimin e këtij fenomeni. Skema më e re “Ivuu” funksionon serish nëpërmjet aplikacionit “Telegram”, ku bëjnë pjesë rreth 260 pjesëmarrës nga e gjithë Shqipëria, me emrin e grupit “Apex Albanian Group”. Shumë qytetarë investuan rreth një vit më parë shuma të konsiderueshme parash, me premtimin se brenda dy javësh do të përfitonin dyfishin e investimit.

Kulmi i lojës “Xeux” u shënua gjatë verës së vitit 2025. Skema funksiononte në formë zinxhiri: çdo individ sillte persona të rinj dhe përfitonte komisione. Shumëfishimi i parave bëhej përmes të ashtuquajturave “sinjale”, që rrisnin buxhetin në një portofol elektronik, duke nxitur investime të tjera.

Për t’u bërë pjesë mjaftonte një investim prej 1–2 mijë eurosh, së bashku me kartën e identitetit, ndërsa komunikimi zhvillohej përmes aplikacionit “Telegram”.

Si pasojë, shumë persona humbën shuma të mëdha parash, ndërsa dyshohet se përfituesit ishin vetë organizatorët e skemës. Pjesëmarrësit tregojnë se u ishte premtuar se paratë mund të tërhiqeshin vetëm në Kosovë, në pika të ashtuquajtura të autorizuara. Në kushtet kur kjo skemë ka nisur sërish të qarkullojë në Lezhë, kërkohet reagim i menjëhershëm nga institucionet ligjzbatuese për të ndaluar përhapjen e saj dhe për të mbrojtur qytetarët nga humbje të tjera financiare./mxh

Last Updated on 24/01/2026 by Monika

Kryedemokrati Sali Berisha ka ndarë pasditen e sotme një thirrje pak orë para nisjes së protestës së opozitës.

Përmes një postimi në rrjetet sociale, Berisha shkruan se të rinjtë kanë shansin e madh, që nëpërmjet pjesëmarrjes së tyre në protestë të ngrihen në lartësinë e këtij misioni dhe të rikthejnë shpresën e besimin e shqiptarëve.

“I bëj thirrje të rinjve të ngriheni në lartësinë e këtij misioni. Sot ju keni shansin e madh të riktheni edhe njëherë shpresën, besimin, lirinë, të drejtat, të ardhmen tuaj dhe të shqiptarëve”,-shkruan Berisha./mxh

Medon Berisha po i afrohet rikthimit në fushë pas dëmtimit. Mesfushori shqiptar u pa sërish në stërvitje gjatë seancës së fundit të zhvilluar në qendrën sportive “Martignano”, ku vijon të ndjekë një program të personalizuar rikuperimi.

Ky zhvillim konsiderohet një sinjal pozitiv, pasi Berisha po bën hapa përpara drejt rikthimit të plotë. Stafi teknik po monitoron nga afër gjendjen e tij dhe ekziston optimizëm që ai të bashkohet me pjesën tjetër të grupit në ditët në vijim. Nëse progresi vazhdon sipas parashikimeve, mesfushori mund të jetë sërish në dispozicion për ndeshjen e radhës në transfertë.

Siç raporton “calcioleçe.it”, objektivi është që Berisha të jetë gati për udhëtimin drejt Piemontes, ku Leçe do të përballet me Torinon të dielën, më 1 shkurt. Një rikthim i tij do të ishte i rëndësishëm, duke pasur parasysh rolin që ai luan në mesin e fushës. Berisha u dëmtua gjatë fitores së fundit në shtëpi ndaj Pizës.

Që në fillim, dëmtimi u vlerësua serioz, ndërsa ekzaminimet e mëvonshme konfirmuan një këputje të gradës së dytë të muskulit ‘rectus femoris’ në kofshën e djathtë. Pas një periudhe rehabilitimi dhe pune të diferencuar, rikthimi i tij në aktivitet konkurrues duket tashmë gjithnjë e më afër.

Berisha u dëmtua në një moment shumë të mirë në aspektin personal duke qenë se shënoi gola pak para se të dëmtohej duke fituar edhe çmime si lojtari i ndeshjes./mxh

Policia spanjolle ka arrestuar Alexei Pustovarov, i konsideruar organizatori kryesor i ngarkesës prej 200 kilogramësh kokainë, e sekuestruar javën e kaluar në portin e Vigos.

Pustovarov ishte krahu i djathtë i Brian Charrington, i njohur si “narco i Wikipedia-s”, trafikant i njohur spanjoll që vdiq në korrik 2025 në Alicante.

Sipas autoriteteve, Pustovarov udhëtoi personalisht drejt Galicisë për të mbikëqyrur mbërritjen e drogës dhe vepronte në bashkëpunim me Mafian Shqiptare dhe një organizatë kriminale me bazë në zonën e O Salnés, Galici.

Operacioni u zhvillua në dy faza gjatë nëntë ditëve dhe u realizua nga Policia në bashkëpunim me Agjencinë Tatimore, duke çmontuar plotësisht organizatën kriminale që përdorte anije mallrash dhe kontenierë për të futur kokainë në Evropë përmes portit të Vigos.

Në total, tetë persona u arrestuan, ndërsa shtatë prej tyre janë dërguar në burg, të akuzuar për pjesëmarrje në organizatë kriminale dhe trafik droge. Organizata përdorte metodën e fshehjes së drogës brenda kontenierëve të anijeve tregtare, pa dijeninë e kompanive të transportit, për ta nxjerrë më pas në portin e destinacionit.

Më 12 janar, policia arrestoi pesë persona që kishin mbërritur një ditë para ankorimit të anijes për të marrë drogën. Dy prej tyre u kapën në një banesë të marrë me qira pranë Vigos, ndërsa tre të tjerë u arrestuan në një restorant të qytetit.

Në një vendndodhje privilegjuar në brigjet e Kanalit të Madh të Venecias, pallati historik Ca’ Dario shkëlqen mbi ujë që nga fundi i shekullit XV. Vetëm pak hapa larg koleksionit “Peggy Guggenheim”, ai përshkruhet si një perlë arkitekturore, por prej vitesh nuk gjen blerës. Arsyeja? Është cilësuar si “i mallkuar”, për shkak të vrasjeve, vetëvrasjeve dhe aksidenteve misterioze që lidhen me historinë e tij.

Ndërtesa mori emrin nga pronari i saj i parë, Giovanni Dario, një diplomat që u shpall hero pas nënshkrimit të një traktati paqeje me Perandorinë Osmane. Përgjatë shekujve, pallati ka strehuar aristokratë, tregtarë dhe madje edhe figura të elitës së muzikës rock britanike. Në vitin 1908 u pikturua nga Claude Monet gjatë udhëtimit të tij në Venecia dhe një vit më vonë u përmend nga Henry James në ditarin e tij të udhëtimeve “Italian Hours”.

Megjithatë, godina madhështore, me nëntë dhoma gjumi, tetë banjo dhe salla pritjeje të zbukuruara me afreske, ka rezultuar jashtëzakonisht e vështirë për t’u shitur, jo domosdoshmërisht për shkak të çmimit, i cili sipas burimeve arrin në rreth 17.024.900 euro.

Agjentët e pasurive të paluajtshme kanë pasur vështirësi të kapërcejnë reputacionin e saj si “pallati i mallkuar i Venecias”, për shkak të një sërë pronarësh dhe vizitorësh që gjetën një fund të parakohshëm, e në disa raste të dhunshëm, shkruan The Guardian.

Tashmë që është restauruar, përpjekjet për shitjen e tij janë rindezur, me Christie’s dhe Engel & Völkers që kanë marrë përsipër sfidën. Christie’s e përshkruan ndërtesën si një “perlë arkitekturore” me harqe gotike, llambadarë antikë Murano dhe një tarracë me lozhë, duke theksuar gjithashtu se ndodhet në një lagje “të qetë” të Venecias, larg turmave turistike.

Vrasje, vetëvrasje dhe aksidente

Ajo që nuk përmendet në fushatat promovuese janë historitë tragjike që kanë ushqyer legjendat lokale për mallkimin e pallatit. Sipas këtyre rrëfimeve, Ca’ Dario lidhet me të paktën shtatë vdekje, më e tmerrshmja prej të cilave ndodhi në vitin 1970, kur pronari i atëhershëm, konti Filippo Giordano Delle Lanze, u vra brenda mureve të pallatit nga partneri i tij, një marinar që u arratis në Londër dhe më vonë u vra edhe vetë.

Një vit më pas, prona u ble nga Kit Lambert, menaxheri i grupit The Who. Edhe pse ai pretendonte se nuk e shqetësonte fama e mallkimit, thuhet se u kishte thënë miqve se flinte diku tjetër për t’i shpëtuar “fantazmave”. Banorët vendas ia atribuuan mallkimit rënien e tij në varësinë nga droga, problemet financiare dhe vdekjen e tij në Londër në vitin 1981, pas një rënieje nga shkallët.

Në vitet 1980, pallati u ble nga italiani Raul Gardini, i cili u përfshi në një skandal të madh korrupsioni dhe kreu vetëvrasje në Milano në vitin 1993.

Legjendat thonë gjithashtu se pallati sjell fatkeqësi edhe për ata që thjesht i afrohen ose kalojnë pushime aty. Tenori i famshëm i operës, Mario Del Monaco, kishte planifikuar ta blinte pronën në vitin 1964, por ndryshoi mendje pas një aksidenti të rëndë automobilistik gjatë rrugës për ta vizituar. John Entwistle, basisti i The Who, vdiq në SHBA në vitin 2002, vetëm një javë pasi e kishte marrë pallatin me qira.

Pas kësaj, ndërtesa mbeti kryesisht e braktisur. Edhe pse tërhoqi interesin e disa blerësve potencialë të impresionuar nga arkitektura, mes tyre thuhet se ishte edhe Woody Allen, ata u dekurajuan nga “aura” e saj.

Në vitin 2006, godina u ble nga një kompani amerikane në emër të pronarit aktual, identiteti i të cilit nuk është bërë publik. Fakti që pallati ka mbetur bosh që atëherë, ka forcuar edhe më shumë thashethemet.

“Venecianëve u pëlqen të tregojnë histori”

Arnaldo Fusello, drejtor i përgjithshëm i Christie’s në Venecia, tha se venecianëve u pëlqen të tregojnë histori interesante, sidomos për turistët, “për shembull, gondolieri që kalon para pallatit”, siç u shpreh ai. Ai përmendi gjithashtu “qindra” banorë që kanë jetuar deri në moshë të thyer në pallat ndër shekuj, përfshirë edhe vetë Dario-n, i cili vdiq nga shkaqe natyrore në moshën 80-vjeçare.

Historiani venecian Davide Busato tha se thashethemet nisën në vitet 1970, por u përhapën gjerësisht pas vetëvrasjes së Gardini-t. “Venecianëve u pëlqen të tregojnë histori dhe është krejtësisht normale që t’i ekzagjerojnë ato”, tha ai, duke e krahasuar rastin me ishullin Poveglia, një ishull i braktisur në lagunën e Venecias, i famshëm për legjendat e fantazmave.

Sipas Busato-s, venecianët janë në përgjithësi realistë dhe zakonisht nuk ndikohen nga bestytnitë, “por u pëlqen të befasojnë njerëzit, sidomos ata që vijnë nga jashtë”.

Ai shtoi se Venecia është plot me ndërtesa historike ku kanë ndodhur vrasje dhe vetëvrasje dhe që sot funksionojnë si hotele luksoze.

Nga ana e tij, Fusello shprehet i bindur se pallati do ta kapërcejë famën e tij ogurzezë dhe do të shitet. Ai tha se deri tani ka pasur “interes të madh”, si nga italianë ashtu edhe nga të huaj. “Ky është një vend ku historia jeton”, u shpreh ai. “Dhe nëse doni të jetoni historinë, ky është shtëpia perfekte, me kusht që blerësi të angazhohet për ta mbajtur gjallë këtë pronë”./mxh