Ish deputeti demokrat, Edmond Spaho thotë se protesta është e gabuar dhe e stisur nga grupe brenda e jashtë vendit.

Në një intervistë për “NewsHour” në ABC News, Spaho u shpreh se qëllimi është që Shqipëria të sabotohet për investime të tilla si në Zvërnec dhe të dëmtohet procesi europian.

Sipas Spahos, nuk mund të ketë qeveri tranzitore kur në 2027 pritet të përfundojë mbyllja e të gjitha grupkapitujve.

“Për mua është protesta më e gabuar. Kjo është një protestë e stisur, e nisur nga grupe brenda dhe jashtë vendit, që të sabotojnë investimin në Zvërnec. Vendet rrotull nesh, kanë me dhjetëra resorte të tilla. Dhe së dyti, për të dëmtuar procesin europian të Shqipërisë. Ose anëtarësohet këtë radhë, ose nuk anëtarësohet më. Të kërkosh që deri në fund të 2027 të kemi qeveri tranzitore, të zgjedhur me short në Facebook, do të thotë t’i vësh kryqin integrimit në BE”, theksoi ai./abcnews.al

TIRANË- Analisti Skënder Minxhozi, i ftuar në emisionin “Real Story” në ABC News, ka komentuar protestën që vijon prej më shumë se 40 ditësh, duke thënë se sipas tij ajo është shoqëruar me një retorikë patriotike që nuk përputhet me thelbin e saj.

Sipas tij, slogani “Albania is not for sale”, i lidhur me kundërshtimin ndaj projekteve turistike, është zgjeruar në një narrativë më të gjerë patriotike, që sipas tij krijon një perceptim të gabuar.

Minxhozi theksoi se protesta, sipas tij, lidhet më shumë me një çështje të qeverisjes dhe pushtetit politik sesa me çështje kombëtare.

Duke folur për përfshirjen e shqiptarëve nga rajoni në protestë, Minxhozi tha se çështjet e qeverisjes së Shqipërisë duhet të vendosen nga qytetarët që jetojnë dhe votojnë në këtë shtet.

Në fund, ai bëri dallimin mes gjuhës dhe politikës, duke theksuar se gjuha është një element bashkues për shqiptarët, ndërsa qeverisja është një çështje që lidhet me territorin dhe institucionet e shtetit shqiptar.

“U parashtruan disa situata që nuk ngjajnë mes tyre, personat vijnë nga drejtime shumë të ndryshme. Ata me kombësi shqiptare por me shtetësi tjetër mendoj janë diçka tjetër nga europarlamentarët. Është krijuar një tymnajë e madhe me nota patriotike dhe mbarë kombëtare, ajo parulla që duhet analizuar në kontekstin shqiptar ‘Albania is not for sale’ që ka të bëjë me këto lloj resortesh, por kur kjo zgjerohet me shqiptarët e rajonit dhe ata e marrin si një sipërmarrje patriotike që të vish në Tiranë se po na marrin tokën, po na vjedhin të huajt, etj dhe akte të tilla ku sublimohet qenia shqiptare dhe ku duhet të mblidhemi të gjithë, se po na ikën atdheu, mendoj se është një tymnajë dhe një propagandë që ka një qëllim shumë më pak fisnik dhe më banal se ambalazhi me të cilin është i veshur.

Nëse je një person me kombësi shqiptare por nuk banon në Shqipëri, pra nëse nuk banon në një shtet, nuk paguan taksa dhe nuk ke të drejtë vote në një shtet, nuk mendoj se ke të drejtë të futesh në lojën e pushtetit të atij shteti. Nuk po shitet Shqipëria. Asnjë prej kërkesave në protestë nuk ka të bëjë me shtetformimin në optikën më patriotike dhe më klasike që kemi ne, por ka të bëjë me organizimin e shtetit shqiptar dhe më së shumti me një çështje pushteti brenda Shqipërisë politike.

Kërkohet të rrëzohet një qeveri që nuk konsiderohet e mirë nga një pjesë e popullit. Ç’punë ka një banor i Gostivarit, i Pejës, të vij në Tiranë dhe të thotë: qeveria Rama nuk më pëlqen. Gjuha nuk ka parti, është një tipar që na bashkon të gjithëve. Në Shqipëri, protesta luhet për një çështje pushteti, një çështje qeverisjeje. Nuk është për një gjë kaq sublime dhe madhore dhe përbashkuese siç është gjuha. Qeveria Rama nuk i identifikon sot shqiptarët, gjuha Po. Qeveria Rama e ka territorin shumë të përcaktuar”, tha ai.

TIRANË- Zëvendësministri i Brendshëm, Xhemal Qefalia, i ftuar në emisionin “News Line” në ABC News, foli për protestat e zhvilluara ditët e fundit, procesin e integrimit evropian dhe shqetësimet që lidhen me ndikimin e mundshëm në turizëm.

Qefalia u shpreh se e drejta e protestës dhe liria e fjalës janë të garantuara në një shtet demokratik, ndërsa theksoi se protestat nuk ndikojnë në rrugën që Shqipëria po ndjek drejt Bashkimit Evropian.

Duke folur për sulmet ndaj bizneseve dhe sipërmarrjeve, zëvendësministri tha se nëse një gjë e tillë do të provohej  se sulmi është i koordinuara, do të ishte shqetësuese për imazhin e vendit dhe sektorin e turizmit.

Më tej, Qefalia theksoi se Shqipëria ndodhet në një garë me vendet e rajonit për të tërhequr sa më shumë turistë, duke përmendur edhe zhvillimin e infrastrukturës ajrore.

Sipas zëvendësministrit, u takon organeve shtetërore që të përcaktojnë nëse ka pasur sulme të organizuara dhe të koordinuara. Ai shtoi se protesta nisi fillimisht si një shqetësim për mbrojtjen e mjedisit në Zvërnec, por sipas tij, në të janë përfshirë edhe elementë që synojnë përfitime politike.

“E drejta e protestës dhe liria e fjalës janë të garantuara në një shtet demokratik. Është më se normale që në një vend demokratik të ketë protesta dhe të ketë mospajtime. Protestat kanë nisur prej më shumë se 40 ditësh, por ato nuk ndikojnë aspak në rrugën që po ndjek Shqipëria drejt Bashkimit Evropian. Nëse do të rezultojë se ka pasur një sulm të organizuar nga persona që kanë abuzuar për të ulur imazhin e një resorti apo të një sipërmarrjeje, kjo është shqetësuese, pasi ndikon edhe te turizmi.

Shqipëria tashmë është një vend atraktiv dhe të huajt vijnë për të pushuar. Ata informohen edhe përmes vlerësimeve (reviews), por kjo mbetet për t’u hetuar në mënyrë të plotë”, theksoi ai. Ka vende që ia duan të mirën Shqipërisë, por ka edhe vende të tjera, të cilave nuk u intereson zhvillimi i saj.

Ekziston edhe një garë me vendet e rajonit për të tërhequr sa më shumë turistë. Aeroporti i Rinasit është shndërruar në një qendër të rëndësishme, duke lënë pas edhe aeroportet e vendeve të rajonit. Janë organet shtetërore ato që do të përcaktojnë nëse ka pasur sulme të organizuara dhe të koordinuara. Protesta nisi si një pakënaqësi për mbrojtjen e mjedisit në Zvërnec. Në protestë ka elementë që duan të përfitojnë politikisht.”, tha ndër të tjera, zv.ministri i Brendshëm/abcnews.al 

Gjykata e Apelit me Juridiksion të Përgjithshëm liron nga burgu një prej rojeve private të arrestuara për dhunën e ushtruar gjatë përplasjes me qytetarët protestues në Zvërnec më 31 maj.

Për Gazmend Vathin, i cili u la në burg nga Gjykata e Vlorës, Apeli zbuti masën në arrest shtëpie, ndërsa për Artur Granin u la në fuqi arresti në burg.

Ndërkohë, prej orës 14:00 po shqyrtohet ankimi i pronarit të Major Security, Geraldo Biba.

Gjatë përplasjeve, një qytetar u tërhoq zvarrë, ndërsa situata solli shkarkimin nga detyra të kryepolicit të Vlorës, Elidon Çela, dhe më pas vendi u përfshi në një valë protestash që vijojnë edhe sot./abcnews.al

Në kryeqytet po mbahet protesta e 43 e qytetarëve.

Protestuesit u mblodhën fillimisht në sheshin “Skënderbej” e më pas u zhvendosën drejt bulevardit “Dëshmorët e Kombit”, para godinës së kryeministrisë.

Këti janë pamjet reale të protestës, të siguruara nga ABC News, në orën 19:55.

Pamjet që shihni më poshtë janë të protestës, të fiksuara nga ekipi i ABC News, në orën 21:00 të kësaj të diele./abcnews.al

Kryeministri Edi Rama deklaroi se qeveria po dëgjon shqetësimet e protestuesve paqësore.

Përmes një komunikimi në rrjetet sociale, Rama tha se tufa sorrash dhe laraskash e kanë akuzuar se po sulmon njerëzit që kanë dalë në protestë.

Por kreu i qeverisë nënvizoi se ai e ka bërë dallimin e ditës së flamingos me natën e korbit dhe sorrës.

“Angazhohen tufa sorrash dhe laraskash se po më akuzojnë mua se po sulmoj popullin që paska dalë në shesh, se po shaj rininë që qenka zgjuar e me radhë. Absolutisht, jo. Unë e kam bërë dallimin e ditës së flamingos me natën e korbit dhe sorrës. Nuk kam paragjykuar ata qytetarë që dolën të protestojnë paqësisht, se duan një mjedis më të mbrojtur. Nuk mund t’i paragjykoj njerëzit që duan shtet më të drejtë në tërësinë e vet. Shoqëria kërkon gjithmonë e më shumë. Po dëgjojmë me shumë vëmendje, një grup i mbledhur enkas po mban çdo shënim. Hap pas hapi, do t’i komunikojmë me njerëz të zakonshëm e të ndershëm të këtij vendi”, theksoi ai./abcnews.al

TIRANË- Në kryeqytet po mbahet protesta e 42 e qytetarëve.

Protestuesit u mblodhën fillimisht në sheshin “Skënderbej” e më pas u zhvendosën drejt bulevardit “Dëshmorët e Kombit”, para godinës së kryeministrisë.

Këto janë pamjet reale të protestës, të siguruara nga ABC News, në orën 19:30.

Pamjet që shihni më poshtë janë të protestës, të fiksuara nga ekipi i ABC News, në orën 20:40 minuta të kësaj të shtune.

Pjesëmarrja reale në orën 21:00:

/abcnews.al

U mbajt në Tiranë protesta e 41 qytetarëve. Protestuesit u mblodhën në nisje në sheshin “Skënderbej” e më pas u zhvendosën drejt Kryeministrisë.

Këto janë pamjet reale të protestës, të siguruara nga ABC News, të orës 19:50.

ABC News sjell pamjet minute pas minute të protestës, video më poshtë përcjell situatën në Bulevardin Dëshmorët e Kombit, në orën 20:10.

Videoja më poshtë përcjell ecurinë e tubimit në Bulevardin “Dëshmorët e Kombit”, duke pasqyruar zhvillimet deri në orën 20:50.

Videoja më poshtë përcjell ecurinë e tubimit në Bulevardin “Dëshmorët e Kombit”, duke pasqyruar zhvillimet deri në orën 22:00.

U mbajt në Tiranë protesta e 40 qytetarëve. Protestuesit u mblodhën në nisje në sheshin “Skënderbej” e më pas u zhvendosën drejt Kryeministrisë.

Këto janë pamjet reale të protestës, të siguruara nga ABC News, të orës 19:50.

Kjo është pamja përpara Kryeministrisë në orën 20:30 e protestuesve.

Ndërsa tani shikojmë protestuesit në orën 21:30.

Në vazhdim pati edhe një marshim në rrugët e kryeqytetit./abcnews.al

Në Tiranë u zhvillua protesta e 38 qytetarëve. Protestuesit u mblodhën fillimisht në sheshin “Skënderbej” e më pas u zhvendosën drejt Kryeministrisë.

ABC News ka siguruar pamjet reale të protestës, ku shihet se rreth orës 19:00 kishte një numër shumë të pakët protestuesish.

Kjo është pamja përpara Kryeministrisë në orën 21:20 e protestuesve.

Në vijim pati edhe një marshim në rrugët e kryeqytetit.

Vijojnë hetimet për tubimin e zhvilluar më 4 korrik 2026 pranë Komisariatit të Policisë Nr. 3 në Tiranë.

Policia e Shtetit njofton se, në kuadër të veprimeve hetimore të kryera në bashkëpunim me Prokurorinë, është arrestuar një person, janë proceduar penalisht shtatë të tjerë dhe janë shpallur në kërkim katër persona të dyshuar për përfshirje në aktet e dhunshme.

Sipas Policisë, gjatë protestës u ushtrua dhunë ndaj punonjësve të Policisë dhe godinës së Komisariatit. Si rezultat i hetimeve janë identifikuar gjithsej 12 persona të dyshuar të përfshirë në këto veprime.
Në vijim të procedurave:
• është ndaluar me iniciativë shtetasi 33 vjeç;
• janë proceduar penalisht në gjendje të lirë shtetasit me iniciale K.M., V.K., E.L., Sh.B., V.D., E.N. dhe B.K.;
• janë shpallur në kërkim katër shtetas, identiteti i të cilëve nuk është bërë publik për shkak të vijimit të hetimeve.
Policia bën me dije se grupi hetimor po vijon punën për identifikimin e personave të tjerë që mund të jenë përfshirë në aktet e dhunshme dhe për vënien e tyre përpara përgjegjësisë ligjore.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë për veprat penale: “Thirrje publike për veprime të dhunshme”, “Shkatërrimi i pronës”, “Goditja për shkak të detyrës”, “Kundërshtimi i punonjësit të Policisë”, “Mosbindja ndaj urdhrit të ligjshëm të punonjësit të Policisë”, “Prishja e rendit dhe e qetësisë publike”, “Organizimi dhe pjesëmarrja në grumbullime dhe manifestime të paligjshme” dhe “Pengimi i qarkullimit të mjeteve të transportit”.

Qëndrim Kryeziu nga Qëndrim Kryeziu ka hedhur akuza të ashpra ndaj kryeministrit Albin Kurti, duke e akuzuar për politika që, sipas tij, dëmtojnë bizneset dhe ekonominë e Kosovës.

Në një intervistë për “Balkan Update” në ABC News, Kryeziu deklaroi se qeveria po bllokon qëllimisht sektorin privat dhe po favorizon produktet serbe.

Ai ngriti gjithashtu akuza të rënda ndaj Kurtit për lidhje me Serbinë dhe Iranin, si edhe për përfshirje në organizimin e protestave në Tiranë. Kryeziu tha se këto veprime, sipas tij, kanë izoluar Kosovën ekonomikisht dhe po dëmtojnë interesat e vendit. Deklaratat e tij nuk u shoqëruan me prova për të mbështetur këto pretendime.

“Qeveria Kurti nuk është hera e parë që po u bën bllokada të bizneseve të vendit tonë. Qeveria Kurti u ka shpallur luftë të gjitha bizneseve në vendin tonë. Të gjitha vijnë direkte nga Serbia. Ne kemi një kryeministër që është kryekëput njeri i Serbisë. Po mbyll një nga fabrikat më të mëdha, vetëm e vetëm që Kosova të furnizohet me produkte serbe.

Albin Kurti është direkte dorë e Irani dhe nuk kas sesi ai të distancohet nga protestat që organizon në Tiranë. Qëllimi i tij është për të shkatërruar shqiptarinë, është njëri i paguar nga Irani. Kosovën e ka shkatërruar edhe për ekonominë, prej 6 vitesh ne jemi të distancuar nga ekonomia ndërkombëtare. Ai është përbetuar që të shkatërrojë Kosovën. Ai është direkte organizator i të gjitha protestave në Tiranë. Protesta ndërkombëtare e paralajmëruar më 4 korrik, ishte kundër Pavarësisë së SHBA. Kosova nuk ka përse të përfshihet në protestat në Shqipëri”, tha Kryeziu.

Nga “flamingo” në “arkivol”. Ministri i Shtetit për Pushtetin Vendor Ervin Demo ka komentuar protestën, e cila sipas tij ka pësuar një “metamorfozë” në simbolikën e saj, duke iu referuar figurave dhe mesazheve të përcjella gjatë saj ditëve të fundit.

Për kërkesat e tyre, Demo tha se ato konsiderohen të qenësishme dhe po shqyrtohen nga qeveria.

“Vetë protesta në 36 ditë ka pësuar një metamorfozë shumë interesante sepse zgjodhi simbolet për të komunikuar disa mesazhe, ku i pari ishte flamingo. Pas 36 ditësh, nga flamingo na u shfaq një arkivol. Ky është një rrugëtim interesant. Nëpërmjet vdekjes s’mund të perceptohet zhvillim. Duket sikur flamingot kanë shtegtuar nga bulevardi. Detyra jonë është që flamingot të ndihen si në shtëpinë e tyre kudo. Referuar kërkesave, jemi duke marrë në shqyrtim të gjitha kërkesat që janë të qenësishme. Mendoj që kjo protestë sjell energji dhe karburant të shtuar sa u përket reformave. Do ta kemi vëmendjen e duhur që jo thjesht t’i dëgjojmë e lexojmë, por edhe të flasim me këdo që është i prirur drejt një komunikimi që ofron produkt real”, tha Demo.

Ministri Demo u ndal edhe te reforma territoriale. Ai tha se java në vijim pritet të jetë vendimtare për vijimësinë e saj.

Sa i përket situatës së zjarreve, Demo tha se infrastruktura e emergjencave do të përmirësohet falë një fondi prej 20 milionë eurosh, ndërsa bonusi i zjarrfikësve do të përfshijë mbështetje për të gjithë ata që luftojnë me zjarret.

““20 mln euro do të jenë të fokusuara në logjistikë sa u përket infrastrukturës së emergjencave. Kemi financim prej 10 mln eurosh që do të jetë i fokusuar në një program të ri për përmirësimin e transportit urban, i cili problematikat po i nxjerr më shumë në pah. Besoj do të jetë edhe përgjigje e ankesave që ne hasim”, theksoi ai.

Analisti Martin Leka në një intervistë në “News Line” në ABC News, komentoi zhvillimet pas protestës në vend, duke deklaruar se aktet e dhunës që pasuan tubimin kanë dëmtuar mesazhin e protestës dhe janë dënuar edhe nga përfaqësues ndërkombëtarë.

Duke iu referuar reagimit të përfaqësuesit të Ambasadës së Gjermanisë në Tiranë, Karl Bergner, Leka tha se deklarata përbën një sinjal të qartë se partnerët ndërkombëtarë nuk mbështesin përdorimin e dhunës në protesta.

Sipas tij, protesta kishte mundësinë të zhvillohej në mënyrë qytetare, por organizatorët nuk arritën ta ruanin këtë standard. Ai u shpreh se, në momentin kur nisën aktet e dhunshme, protesta humbi misionin dhe fokusin e saj.

Leka kritikoi gjithashtu simbolikat dhe incidentet që, sipas tij, shoqëruan protestën, duke theksuar se pushteti nuk merret përmes dhunës, por përmes procesit zgjedhor.

“Numërimi bëhet vetëm në kutitë e votimit”, u shpreh ai, duke shtuar se pjesa më e madhe e pjesëmarrësve në protestë ishin mbështetës të Sali Berishës.

Ai shtoi se, pavarësisht protestave apo akteve të dhunshme, një qeveri nuk largohet nga pushteti në këtë mënyrë.

“Sinjali i parë që vjen nga ndërkombëtarët. Protesta degjenerojë në dhunë në akte force. Ajo deklaratë e ambasadorit gjerman është sipari i një fortune ndërkombëtare ndaj të gjithë atyre, jo vetëm që janë pjesëmarrës drejtpërdrejtë në aktet e dhunës, por edhe atyre që i ideojnë dhe përkrahin. Është sinjali që ndërkombëtarët nuk do përkrahin aktet e dhunës.. Protesta kishte shansin të ishte protestë qytetarë, por ideatorët grupi nismëtar nuk arriti dot të mbante atë shkallë të lartë qytetarie. Por nuk mund të presësh protestë qytetare nga haxhiqamilët që e përkrahin apo sponsorizojnë një protestë të tillë. Mendoj që e ka ezauruar pjesën e qytetarisë së vet. Në këtë konglomeratin e madh të pjesëtarëve që bëjnë marshime dhe kanë një fjalor me tre fjalë, nuk mund të ketë protestë paqësore me arkivol. Protesta e ka mbyllur misionin që në momentin kur nisën aktet e dhunës. Degjenerojë në ide me arkivole në bulevard, apo lincimin e këngëtarëve apo artistëve. Nuk mund të lincosh dikë, pushteti nuk mund të merret me dhunë, me fjalime, apo duke numëruar sa njerëz ke në Bulevard. Numërimi bëhet vetëm në kutitë e votimit. Ata që dalin në bulevard janë një konglomerat ku pjesën më të madhe e zënë mbështetësit e Sali Berisha”, tha Leka.

Gjithashtu ai theksoi se Berisha ishte ai që nxiti dhunën.

“Nuk e kuptoj përse kërkojnë ndihmë nga jashtë. Nga Kosova apo Maqedonia e Veriut. Një shqiptar i Maqedonisë, një intelektual, Kim Mehmeti bashkë me Fatos Lubonjës. Se çfarë ka të ngjashëm Fatos Lubonja me Kim Mehmetin, apo me enturazhin e një llumi që flet për çfarëdo , vetëm për demokraci nuk flet. Dalëngadalë do formatohet grupi i famshëm i zjarrit. Kushdo duhet ta dijë, se edhe me akte dhunë, apo sado protesta të bëhen, qeveria nuk ikën nëse nuk do të ikë vetë”, u shpreh ai.

/abcnews.al/

Shuplaka gjermane nuk kurseu as këtë herë veprimet e dhunshme në protestën e bulevardit, të cilat u dënuan si nga përfaqësuesi i selisë diplomatike të Berlinit në Tiranë, pasi sipas tij, bien ndesh me vlerat e unionit.

“Mbeshtesim çdo aktivitet të shoqërisë civile që është në përputhje me BE, por protestat e dhunshme sigurisht që nuk janë në përputhje me këtë. Çështja se kush ka faj është një diskutim që vazhdon dhe është I mirëpritur sepse kjo është vlera e Bashkimit europian”, tha Bergner.

Diplomati gjerman ka rikonfirmuar gjithashtu mbështetjen e Berlinit zyrtar për procesin e integrimit europian të Shqipërisë, duke vlerësuar angazhimin e qytetarëve dhe institucioneve në këtë drejtim.

“Jemi shumë të lumtur që populli shqiptar është kaq shumë në favor të anëtarësimit në BE. Ne po e mbështesim këtë proces të anëtarësimit sa më shumë që mundemi nga ana teknike, por gjithashtu duhet t’u japim merita të gjithë atyre që përpiqen të zbatojnë vlerat e Bashkimit Evropian në përditshmëri, si në administratë ashtu edhe duke qëndruar për shtetin e së drejtës apo çështje të tjera në procesin e integrimit”, u shpreh ai.

Deklaratat e ambasadorit gjerman u bënë nga Kolonja, ku mori pjesë në ceremoninë përkujtimore për 83-vjetorin e masakrës së Borovës.

Në 1943, në fshatin Borovë të Kolonjës, një divizion gjerman kreu një nga masakrat më të rënda ndaj popullsisë civile, duke djegur fshatin dhe duke vrarë 107 banorë të pafajshëm, mes tyre shumë gra e fëmijë./abcnews.al

Qytetarët kanë vijuar protestën e tyre për të 35-ën ditë radhazi përpara godinës së Kryeministria, në shenjë kundërshtimi ndaj projektit të investimit në zonën e Zvërnecit.

Për herë të dytë në protestë, kanë marrë pjesë edhe njerëz nga diaspora.

Në videon më poshtë që sjell ABC News, mund të shihet pjesëmarrja në protestën e kësaj të shtune në kryeqytet krahasuar me atë të datës 20 qershor.

https://www.instagram.com/reel/DaY1Z_lE5Om/?igsh=YWgwaHg5cGRhcGhn

ABC News solli gjithashtu pamjet me dron nga protesta, ku u upa pjesëmarrja e qytetarëve, nga ura e Lanës, te dera e Kryeministrisë përgjatë bulevardit kryesor në orën 20:45.

Gjithashtu më herët ABC News solli pamjet me dron, ku u pasqyrua pjesëmarrja e qytetarëve në fillimin e protestës./abcnews.al

Analisti Frrok Çupi, në një intervistë për emisionin “Ora e Fundit” në ABC News, ka komentuar protestën e fundit, duke e cilësuar atë si një tubim “pa objekt”.

Sipas Çupit, protestuesit nuk janë të vetëdijshëm për qëllimin e tyre dhe, siç u shpreh ai, “janë të ngarkuar me urrejtje” dhe po përdoren për interesa të tjera.

“Njerëzit që dalin në Bulevard nuk e dinë sa të shëmtuar janë bërë. Ata nuk e dinë se po bëjnë luftën e një tjetri. Kjo është një luftë që nuk bëhet në Shqipëri”, u shpreh ai.

Më tej, Çupi deklaroi se protestat, sipas tij, ndikohen nga faktorë të jashtëm, duke përmendur Rusinë dhe Iranin, si dhe kryeministrin e Kosovës, Albin Kurti.

“Njerëzit që dalin në Bulevard nuk e dinë sa të shëmtuar janë bërë. Njerëzit janë ngarkuar me urrejtje dhe ata që kanë dalë në protestë nuk e dinë se çfarë po bëjnë. Ata nuk e dinë se po bëjnë luftën e një tjetri. Kjo është një luftë që nuk bëhet në Shqipëri. Janë të përdorur dhe po luajnë një lojë kukullash. Lajmi sot ishte kur SHBA tha, se Shqipëria ka paguar më shumë se sa duhet dhe është më shumë dinjitoze në NATO se sa duhet. Ata që i tërheqin pas hunde ndalin njëri pas tjetrit. Sot doli Rusia, Irani është gjatë gjithë kohës, Albin Kurti po ashtu, port ë gjitha këto janë në kontrollin e superfuqive”, tha më tej Çupi.

Ai shtoi gjithashtu se, sipas tij, disa zhvillime ndërkombëtare ndikojnë në mënyrën se si formësohen këto protesta në Shqipëri. Gjithashtu ai tha se kanë për synim që të ndalojnë ardhjen e investitorëve të huaj në Shqipëri. Protesta ka hyrë në perversitet është kthyer në perverse.

“I dëgjuam ato folësit atje duke thënë këtij populli duhet t’i bësh nënën. Kjo nuk është qytetari. Qytetarë që nuk bëjnë asnjë punë, por vetëm shohin shefa të tyre…Protesta ka hyrë në perversitet ka vdekur morali”, tha ai.

/abcnews.al/

E mbetur jashtë sheshit dhe skenës politike, PD po tenton të futet me të gjitha mënyrat në protestën e bulevardit. Pasi Sali Berisha importoi aktivisten Julinda Emirin, nga bulevardi në krye të Këshillit Kombëtar demokrat, një sërë figurash të tjera me poste janë shfaqur në protestë, duke folur në emër të qytetarëve.

Një prej tyre, Xhulia Xhekaj, ish kandidate për deputete të PD në vitin 2025, në listën e hapur të Tiranës, së fundmi e zgjedhur anëtare e Këshillit Kombëtar demokrat. Ajo shfaqet paradite në PD, e pasdite në protestë si qytetare e thjeshtë.

Në protesën e dhunshme para parlamentit, Ministri i Brendshëm, Besfort Lamallari denoncoi një tjetër eksponent të PD. Preng Lala, drejtues i PD për Mamurrasin, ishte në ballë të protestuesve që plagosën 9 policë.

Eda Grimçi, kryetare e degës nr 9 në Tiranë, së fundmi e zgjedhur në Kryesinë e re të PD, u konfrontua me ministrin e Turizmit, Blendi Gonxhja në dalje të parlamentit duke i përmendur kërkesat e qytetarëve.

Jo vetem kaq… Figura të larta në PD, si Belind Këlliçi, Ilir Alimehmeti apo deputetë të tjerë si Gjin Gjoni kanë marrë pjesë në protestën në bulevard, kurse Jorida Tabaku marshon bashkë me qytetarët, madje kërkon bashkë me ta para komisariatit edhe lirimin e protestuesve të dhunshëm.

Të gjitha këto, në direktivën e qartë të Sali Berishës, i cili u ka bërë thirrje demokratëve të marrin pjesë në protestë. Por në mënyrë tërthorazi. Kur vjen puna te përballja me protestuesit, në parlament, para godinës ku protestuesit kërkojnë llogari, deputetët demokratë bojkotojnë seancën. Është ajo që di Sali berisha të bëjë më mirë, hidh gurin, fshih dorën./abcnews.al

Nga Frrok Çupi

Këta që para ca ditësh, ruanin flamengot, janë kthyer jo në barinj, por në hiena. Duan të hanë njeriun, gurin, këmbën e policit, makinën, deputetin… cilindo që i vjen se bën pak kërcitje.

Urrejtje e shëmtuar.

Urrejtja është ‘gia’ e shëmtuar, por kjo pse është kaq më e shëmtuar?

Ndoshta ngaqë lindi në një terren të papërshtatshëm, jo në terren urrejtjeje. Madje lindi mbi boshllëk. Mashtruan veten mbi flamengot dhe mbi mashtrimin ndërtuan urrejtje larg flamengove. Madje edhe larg Vlorës, larg Shqipërisë, deri në kontinentin tjetër.

Mbi keqinformimin ngrihet urrejtje më e madhe se mbi viktimën reale. Kësaj po i ruhet bota e qytetëruar. Keqinformimi është vala e re e armës bërthamore mbi botë. Ne e pësuam, si vend i vogël, sepse u rritëm, u zmadhuam, u bëmë dikush në krah të Amerikës dhe Europës.

Vallë si mbiu kjo valë në Tiranë?

Si në një ‘plaza de toros’ toreadorësh.

Nëse ‘barinjtë e flamengove’ nuk do të ishin vendosur nga Zvërneci në bulevardin e madh të Tiranës, ndoshta nuk do të kishte shpërthyer kjo urrejtje e shëmtuar. Ka një arsye. Arsyeja është se në vendin ku u përqendruan, në oborrin e selisë së qeverisë, aty ndodhen katër varre. Katër protestues i ka vrarë qeveria e shefit të ‘barinjve’ të flamengove. Aty u ndezën gjakrat. Kam nisur të vesoj mbi vakëfet që turbullojnë trurin e njerëzve. U ndjenë frikë kur shkelën mbi varret e kolegëve të tyre protestues, o pësuan ‘shok’, dhe u ndjenë vetë viktima, o u ndjenë si autorë krimi në vendin e krimit. Kjo e nxiti gjithë atë urrejtje të shëmtuar që po shikojmë.

Ose lindi nga histeria e mbrojtjes.

Që ka shumë histeri mes tyre, duket e ndihet deri afër mesnatës. Por është histeri e mbrojtjes, sipas vetë Sigmund Frojd. Njerëzit e dhunës janë të shpërblyer nga dikush; por kanë frikë se do të zbulohen. Kanë frikë edhe pse një pjesë e tyre janë nga ata që kanë futur duart në xhepat e tjetrit. Janë edhe grup i korruptuar keqas, për shkak se po paguhen si mercenarë në dëm të interesave të vendit dhe se shkelin çdo ditë disa ligje të shtetit. Personazhi i Frojdit sa herë dëgjonte në televizion se u kapën disa para të falsifikuara, tërbohej dhe griste çdo letër që gjente përpara. Edhe letrat i dukeshin para të falsifikuara.

Në ngasje për urrejtje i futi ideologjia dhe propaganda?

Ideologjia që erdhi nga republika Islamike dhe ideologjia e vjetër e urrejtjes naziste antisemintiste, preku edhe vendin tonë. Por preku fillimisht njerëzit më të dobët, ose me ‘sëmundje mushkërish’. Rusia priste rastin për investimin që kishte bërë.

Ideologjia:

Prej kohësh vendi mbante dhjetëra celula terroriste të Al Qaeda

Fondacioni iranian Saadi Shirazi dhe Firdeusi, dhe botimet ‘Perla’, kishin dekada që ishin instaluar në vendin tonë, deri në universitetet e Tiranës. Nga universiteti vijnë disa ‘studentë’ dhe ‘pedagogë’ të grumbullimit të precipituar në dhunë dhe urrejtje.

Nga Kosova, qeveria atje, ka angazhuar tipa që kanë lidhje me islamizmin politik të praktikuar nga vetë Kurti. Kërcënimi që u bëjnë mediave dhe televizioneve ka arsye ‘fshehjen mes turmave’.

Urrejtja e tyre buron nga ndjenja e frikës dhe përvoja e dhimbshme:

Një bari malësor, shumë i kuruar, ka marrë tufën e dhive dhe e solli në bulevard. Policia e lejoji duke shkelur ligjet. Ai kishte një përvojë të dhimbshme me dhitë në mal. Donte të ndërtonte fermë si ‘pasanikët’ e tjerë, por nuk ia doli dot. O dhitë, o kostumin popullor të kuruar ashtu. Nuk ishte për atë punë, prandaj edhe i tha mendja ‘dhitë në bulevard’. U shkarkua nga përgjegjësia.

Edhe një ‘gjyshe’ nga Londra që ishte burgosur për ‘abuzim mbi fëmijët’ erdhi në turmën e urrejtjes dhe bënte si e mirë duke synuar fëmijë. Një trafikant droge i shpallur në Europë, erdhi të fshihej nga frika, dhe dëshmoi urrejtje.

Frika i shtyu më shumë drejt urrejtjes. Janë sulur kundër Edi Ramës, kryeministër, po për shkak të frikës. Ata kanë frikë shtetin dhe shtetin e shikojnë të projektuar te Edi Rama. Dy ‘Goxhaj’ kanë premtuar para ‘ditës së ferrit’ se do ta vrasin Edi Ramën. Njëri e kishte caktuar datën 2 korrik, me mënyrën siç është vrarë Gadafi i Libisë. Tjetri nuk ka caktuar datë, sepse s’mund të caktojë ndonjë gjë. Ka qenë ushtar në UÇK, thotë, por nuk është e vërtetë. Megjithatë i projektohet në sy çasti duke vrarë njerëz.

Frika e bën të urrejë njerëzit që e rrethojnë.

Kjo urrejtje e shëmtuar erdhi në një ‘kohë të mirë’, në kohën kur shteti dhe njeriu i këtij vendi mund ta kontrollojnë.

Qytetarët protestojnë për 32 ditë me radhë përpara Kryeministrisë, kundër investimit në Zvërnec.

ABC News sjell pamjet me dron të pjesëmarrjes në bulevardin “Dëshmorët e Kombit”, në orën 20:00.

Pamjet tregojnë pjesëmarrjen e qytetarëve këtë të mërkurë.