Futbolli shqiptar jashtë trojeve shqiptare nuk luhet vetëm në stadiumet e mëdha. Në Zvicër dhe Gjermani, qindra futbollistë shqiptarë e kosovarë vazhdojnë të mbajnë gjallë pasionin për futbollin përmes klubeve që janë krijuar nga komunitetet shqiptare dhe që, në shumë raste, tashmë janë bërë pjesë e rëndësishme e futbollit lokal.

Nga nivelet e larta të futbollit amator zviceran, deri te ligat rajonale dhe Kreisliga në Gjermani, këto skuadra nuk janë thjesht vende ku luhet futboll. Për shumë prej tyre, klubi është edhe një pikë takimi për komunitetin, një mënyrë për të ruajtur identitetin dhe një mundësi për t’u dhënë të rinjve një rrugë përmes sportit.

Në mesin e shumë skuadrave, disa prej tyre kanë arritur të ngjiten në nivele mjaft interesante dhe meritojnë vëmendje të veçantë.

Zvicra – një rrjet i madh i klubeve shqiptare

Zvicra është një prej vendeve evropiane ku prania e klubeve shqiptare në futboll është veçanërisht e madhe. Në strukturat e futbollit zviceran gjenden skuadra shqiptare në 1. Liga, 2. Liga Interregional, 2. Liga, 3. Liga dhe nivele edhe më të ulëta.

FC Kosova Zurich – në 1. Liga

Një prej emrave më të mëdhenj është FC Kosova Zürich. Klubi është themeluar në vitin 1994 dhe tashmë është pjesë e 1. Liga, një prej niveleve më të rëndësishme të futbollit zviceran jashtë futbollit profesionist. Në sezonin 2026/27, skuadra është pjesë e Grupit 3 dhe vazhdon të përfaqësojë komunitetin shqiptar në Zürich në një nivel mjaft konkurrues.

Fakti që FC Kosova është në këtë kategori tregon se disa prej këtyre klubeve kanë kaluar prej të qenit ekipe komunitare në organizime sportive serioze.

FC Prishtina Bern – klub me traditë dhe shumë ekipe

Në Bernë, një tjetër emër që bie në sy është FC Prishtina Bern. Klubi është themeluar në vitin 1990 dhe ka një strukturë të madhe, me 19 ekipe të regjistruara. Për sezonin 2026/27, skuadra e parë është pjesë e 1. Ligës.

Ky është një prej shembujve më të mirë se si një klub shqiptar mund të ndërtojë një organizim që shkon shumë përtej ekipit të parë, duke përfshirë edhe grupmosha të ndryshme.

FC Besa Biel/Bienne – nga 1. Liga në 2. Liga Interregional

FC Besa Biel/Bienne është një tjetër histori interesante. Pas sezonit të kaluar në 1. Liga Classic, ku e mbylli kampionatin me ndeshjen e fundit ndaj Munsingenit, për sezonin 2026/27 klubi është në 2. Liga Interregional, Grupi 2.

Besa vazhdon të jetë një prej emrave të njohur të futbollit shqiptar në Zvicër dhe tashmë ka nisur një kapitull të ri në nivelin e dytë ndër-rajonal.

FC Iliria Solothurn – një klub me histori që nga viti 1968

Një prej klubeve më të vjetra shqiptare në Zvicër është FC Iliria Solothurn. Klubi është themeluar në vitin 1968 dhe ka një histori prej më shumë se gjysmë shekulli.

Për sezonin 2026/27, Iliria luan në 2. Liga. Madje, klubi ka bërë edhe një ndryshim në stolin e skuadrës së parë, duke emëruar Burim Raimin trajner të ri për sezonin e ri. Në javët e para të sezonit, sulmuesi i Ilirisë, Fitim Sadriji, dhe më pas Bleron Dakaj, kanë qenë ndër golashënuesit më të spikatur të ekipit.

KF Dardania St. Gallen – një tjetër emër i fortë

Në St. Gallen, KF Dardania është një prej klubeve shqiptare më interesante. Klubi është themeluar në vitin 1980 dhe ka një strukturë të madhe, me 16 ekipe.

Skuadra e parë luan në 2. Liga Interregional, ndërsa në fillim të sezonit 2026/27 Dardania ka marrë edhe rezultate interesante, përfshirë një fitore 4-3 ndaj FC Wil 1900.

Pra, nuk bëhet fjalë vetëm për një klub me emër shqiptar, por për një organizim që prej dekadash është pjesë e futbollit të St. Gallenit.

FC Besa St. Gallen – një tjetër klub me bazë të fortë shqiptare

Po në St. Gallen është edhe FC Besa, i themeluar në vitin 1992. Klubi ka 13 ekipe dhe skuadra e parë garon në 3. Liga. Në fillim të sezonit të ri, Besa arriti edhe fitore në kuadër të fazës së Kupës së Zvicrës, duke mposhtur FC Diepoldsau-Schmitter me rezultat 3-2.

FC Dardania Lausanne – një klub që nuk ndalet së rrituri

Në pjesën frankofone të Zvicrës, FC Dardania Lausanne është një prej emrave më të rëndësishëm. Klubi është themeluar në vitin 1950 dhe ka një strukturë me 12 ekipe.

Skuadra e parë ka garuar në 2. Liga Interregional dhe klubi ka ekipe edhe në nivele të tjera, përfshirë 4. Ligën dhe grupmoshat e reja.

Kjo është një tjetër dëshmi se klubet shqiptare në Zvicër nuk funksionojnë vetëm si ekipe të të rriturve, por po ndërtojnë edhe baza të rëndësishme për gjeneratat e reja.

FC Dardania Basel

Në Basel, FC Dardania është një tjetër klub që meriton vëmendje. I themeluar në vitin 1993, klubi ka 13 ekipe dhe për sezonin 2026/27 skuadra e parë është pjesë e 3. Ligës. Në ndeshjet përgatitore para sezonit, Dardania mori fitore ndaj SV Weil 1910, SC Binningen dhe FC Allschwil.

Në këtë rajon, klubi shqiptar po përballet me një numër të madh skuadrash lokale dhe vazhdon të jetë pjesë aktive e futbollit të Bazelit.

Gjermani – shqiptarët deri në nivelet më të ulëta

Në Gjermani panorama është edhe më e gjerë. Për shkak të strukturës së madhe të futbollit amator, klubet shqiptare gjenden nga Bezirksliga dhe Landesliga deri në Kreisliga B, C e D.

K.F. Sharri Dortmund – ndër klubet më interesante

Në Dortmund, K.F. Sharri është një prej emrave që bie më së shumti në sy. Skuadra e parë garon në Bezirksliga, ndërsa klubi ka edhe ekip të dytë dhe grupmosha të reja.

Për sezonin 2026/27, Sharri është pjesë e Bezirksligës dhe në kalendar ka përballje me skuadra si FC Sarajevo-Bosna, SVF Herringen, SG Gahmen dhe SC Osmanlispor Dortmund.

Është pikërisht ky nivel i futbollit gjerman ku një klub komunitar mund të ndërtojë një histori shumë interesante dhe të synojë gradualisht ngjitjen në nivele më të larta.

FC Kosova Munchen – shqiptarët në garë për nivele më të larta

Në Mynih, FC Kosova ka kaluar një periudhë interesante. Klubi përfundoi sezonin 2025/26 në vendin e parë në Kreisliga 2 dhe për sezonin 2026/27 është pjesë e Bezirksligës së Oberbayern Sud.

Pra, është një prej shembujve konkretë se si një klub me bazë shqiptaro-kosovare mund të ngjitet në sistemin e futbollit gjerman.

FC Kosova Dusseldorf – në Landesliga

Në Nordrhein-Westfalen, FC Kosova Düsseldorf garon në Landesliga, Grupi 2, një nivel dukshëm më i lartë se shumica e klubeve shqiptare që luajnë në Kreisliga. Për sezonin 2026/27, klubi është gjithashtu pjesë e garave të Kupës së landit.

Ky është një tjetër klub që tregon se emri “Kosova” në futbollin gjerman nuk lidhet vetëm me ligat e ulëta.

FC Kosova Frankfurt – një klub me histori ngjitjesh

FC Kosova Frankfurt është themeluar në vitin 1978 dhe për sezonin 2026/27 luan në Gruppenliga. Klubi ka edhe ekip të dytë në Kreisliga B.

Interesant është fakti se ekipi i dytë përfundoi sezonin 2025/26 në vendin e parë dhe siguroi ngjitjen.

Albanischer FC KS – në Kreisoberliga Kassel

Në Kassel, Albanischer FC KS është një tjetër klub që ka arritur një nivel të respektueshëm në strukturën e futbollit gjerman.

Skuadra e parë garon në Kreisoberliga Kassel, ndërsa ekipi i dytë është në Kreisliga B. Klubi është themeluar në vitin 1990 dhe vazhdon të jetë aktiv me disa ekipe.

FC Albania Duisburg – një tjetër histori nga nivelet rajonale

Në Duisburg, FC Albania po zhvillon sezonin 2026/27 në Kreisliga A. Interesant është fakti se klubi e përfundoi sezonin e kaluar me një seri të mirë rezultatesh dhe tani është në garë në një kategori ku synimi është të vazhdojë ngjitjen.

FC Shqiponja Kaiserslautern

Në Kaiserslautern, FC Shqiponja është një shembull i mirë i ekipeve shqiptare që veprojnë në nivelet e ulëta të futbollit gjerman. Në sezonin e kaluar, skuadra e parë përfundoi e treta në B-Klasse me 43 pikë, duke shënuar 69 gola në kampionat.

Shqiponja Siegen – futbolli shqiptar edhe në Kreisliga D

Në rajonin e Siegenit, Albanischer Verein “Shqiponja” është edhe një dëshmi se sa poshtë në piramidën e futbollit gjerman shkon prania e klubeve shqiptare.

Klubi ka skuadër të parë dhe të dytë, ndërsa për sezonin 2026/27 ekipi i dytë është i regjistruar në Kreisliga D.

Federata e Futbollit Shqiptar në Gjermani ka plane të mëdha për të ardhmen

Federata e Futbollit Shqiptar në Gjermani përfaqëson mbi 40 klube shqiptare, ndërsa kanë plane të mëdha për të ardhmen.

Kryetari Afrim Osmanaj në një bisedë me Telegrafin ka shpjeguar se punojnë vazhdimisht për të krijuar aktivitete të përbashkëta, me synimin e vetëm që të krijojnë një urë mes gjeneratës së re, diasporës dhe trojeve tona.

“Në Gjermani ka një numër të madh klubesh shqiptare dhe sot Federata e Futbollit Shqiptar në Gjermani përfaqëson mbi 40 klube shqiptare, të shpërndara në qytete dhe rajone të ndryshme të Gjermanisë”.

“Klubet janë të organizuara në mënyrë të pavarur në kuadër të strukturave sportive lokale dhe marrin pjesë në garat e ndryshme të futbollit në Gjermani. Roli ynë si Federatë është që këto klube t’i bashkojmë, t’i përfaqësojmë dhe të krijojmë aktivitete të përbashkëta”.

“Një nga qëllimet tona kryesore është që klubet shqiptare të mos jenë vetëm ekipe që luajnë futboll, por të bëhen pjesë e një komuniteti të organizuar sportiv shqiptar në Gjermani. Përmes futbollit duam të krijojmë ura mes gjeneratës së re, diasporës dhe trojeve tona”.

Ai ndër të tjera shtoi se janë të lumtur me bashkëpunimin aktual me FFK-në, kurse objektiv është që kjo marrëdhënie të rritet edhe më shumë.

“Jemi shumë të kënaqur me bashkëpunimin me institucionet sportive të Kosovës, në veçanti me Federatën e Futbollit të Kosovës. Për ne është shumë e rëndësishme që futbolli në diasporë të ketë një lidhje të fortë me institucionet tona sportive në Kosovë”.

“Kemi pasur bashkëpunime dhe aktivitete të përbashkëta dhe dëshirojmë që kjo marrëdhënie të zhvillohet edhe më shumë. Edhe organizimi i aktiviteteve të diasporës në Gjermani, në bashkëpunim me institucionet e Kosovës, është një dëshmi se ekziston një vullnet i mirë për ta afruar diasporën me vendlindjen”.

“Ne besojmë se bashkëpunimi duhet të jetë afatgjatë dhe konkret, sidomos në zhvillimin e futbollit të të rinjve, trajnimin e trajnerëve dhe krijimin e mundësive që talentet shqiptare në Gjermani të kenë lidhje më të forta me futbollin në Kosovë”.

I pyetur për planet për të ardhmen, Osmanaj nënvizoi se prioriteti kryesor mbetet bashkimi i klubeve shqiptare në Gjermani

“Planet tona janë shumë ambicioze. Prioriteti i parë është organizimi dhe bashkimi i mëtejshëm i klubeve shqiptare në Gjermani. Dëshirojmë të krijojmë një strukturë sa më profesionale, me aktivitete të rregullta sportive, turne dhe gara kombëtare të komunitetit shqiptar në Gjermani”.

“Një fokus shumë i madh do të jetë te fëmijët dhe të rinjtë. Ne kemi një përgjegjësi që gjenerata e re shqiptare në Gjermani ta ruajë lidhjen me gjuhën, kulturën dhe identitetin shqiptar përmes sportit”.

“Gjithashtu, duam të investojmë më shumë në: Zhvillimin e futbollit të të rinjve, kualifikimin e trajnerëve, zbulimin dhe promovimin e talenteve shqiptare, organizimin e Kupës dhe aktiviteteve të tjera mbarëkombëtare, forcimin e bashkëpunimit me Kosovën, Shqipërinë dhe institucionet sportive në Gjermani, dhe mbi të gjitha, krijimin e një Federate që funksionon me profesionalizëm, transparencë dhe bashkëpunim”.

“Mesazhi im si kryetar është i qartë: Ne nuk duam vetëm të organizojmë ndeshje futbolli. Duam ta përdorim futbollin si një urë që bashkon shqiptarët në Gjermani dhe i lidh ata edhe më fort me Kosovën, Shqipërinë dhe trojet tona”. /Telegrafi/

Futbolli modern nuk është më vetëm çështje rezultatesh dhe trofesh. Klubet më të mëdha evropiane janë shndërruar në marka globale, me miliona tifozë në mbarë botën dhe me të ardhura të mëdha që vijnë nga popullariteti i tyre.

Një vlerësim i fundit për vitin 2026 ka zbuluar klubet me markat më të vlefshme në futboll, ndërsa krahasuar me vitin e kaluar ka pasur disa ndryshime interesante.

Në krye të listës për të dytin vit radhazi qëndron Real Madridi, marka e të cilit vlerësohet në 2.766 miliardë dollarë. Klubi madrilen ka shënuar rritje të ndjeshme nga viti i kaluar, kur vlera e markës së tij ishte 2.124 miliardë dollarë.

Në vendin e dytë është Barcelona me një vlerë prej 2.276 miliardë dollarësh. Edhe katalunasit kanë shënuar rritje të jashtëzakonshme, pasi vitin e kaluar marka e tyre vlerësohej në 1.191 miliardë dollarë.

Surpriza më e madhe në podium është Arsenali. Kampioni i Ligës Premier për sezonin 2025/26 është ngjitur në vendin e tretë, me vlerën e markës që ka arritur në 1.722 miliardë dollarë, nga 1.339 miliardë sa ishte një vit më parë.

Bayern Munich renditet në vendin e katërt me një vlerë prej 1.748 miliardë dollarësh, ndërsa Paris Saint-Germaini, pavarësisht se është kampioni në fuqi i Ligës së Kampionëve, është vetëm në vendin e pestë.

PSG-ja ka rritur vlerën e markës nga 1.518 miliardë në vitin 2025 në 1.734 miliardë dollarë në vitin 2026, por kjo nuk ka qenë e mjaftueshme për t’u futur në tre klubet e para.

Lista dominohet nga klubet angleze, pasi përveç Arsenalit aty janë edhe Manchester City, Liverpooli, Manchester Unitedi dhe Chelsea.

Dhjetëshen e plotë e mbyll Borussia Dortmundi, me një vlerë të markës prej 766 milionë dollarësh.

Një tjetër detaj interesant është mungesa totale e klubeve nga Serie A. Asnjë skuadër italiane nuk ka arritur të futet në mesin e 10 markave më të vlefshme të futbollit në botë për vitin 2026.

10 markat më të vlefshme të futbollit në vitin 2026

Real Madrid – 2.766 miliardë dollarë

Barcelona – 2.276 miliardë dollarë

Arsenal – 1.722 miliardë dollarë

Bayern Munich – 1.748 miliardë dollarë

PSG – 1.734 miliardë dollarë

Manchester City - 1.709 miliardë dollar%

Liverpool - 1.695 miliardë dollarë

Manchester United -1.695 miliardë dollarë

Chelsea - 1.101 miliardë dollarë

Borussia Dortmund – 766 milionë dollarë./Telegrafi/

Trajneri i Chelseat, Xabi Alonso, ka folur për të ardhmen e Enzo Fernandezit, mes interesimit të vazhdueshëm nga Manchester City.

Chelsea do ta nisë sezonin e ri në Ligën Premier më 24 gusht, në udhëtim te Fulham, ndërsa Fernandez pritet të jetë pjesë e planeve të Alonsos pavarësisht spekulimeve për të ardhmen e tij.

Trajneri spanjoll ka bërë të qartë se është i kënaqur me mesfushorin argjentinas dhe ka vlerësuar paraqitjet e tij në stërvitje.

“Enzo është lojtar i Chelseat. Ai është një lojtar i nivelit shumë të lartë. Po stërvitet shumë mirë. Jemi të kënaqur me të dhe ai po përgatitet për të hënën”.

Manchester City kishte mundësinë të përmbushte kërkesën prej 120 milionë funtesh të Chelseat për Fernandez, përpara afatit të raportuar të 14 gushtit, por kampioni anglez nuk bëri asnjë ofertë brenda kësaj date.

Situata mund të bëhet edhe më e komplikuar për Cityn, pasi Chelsea nuk ka ndërmend ta shesë aktivisht Fernandez. Për këtë arsye, nëse interesi konkretizohet në ditët e ardhshme, londinezët mund të kërkojnë një shumë edhe më të lartë për yllin e Argjentinës./Telegrafi/

Borussia Dortmund ka rikthyer interesimin për sulmuesin Fisnik Asllani dhe po konsideron të dërgojë një ofertë huazimi drejt Hoffenheimit me obligim blerje.

Gazeta e famshme gjermane “Bild” raporton se ylli i Kosovës është rikthyer prapë në ‘radarin’ e “Verdhëzinjve”, që po e shohin atë si pasuesi adekuat i Serhou Guirassyt.

Skenari më i mundur është tani huazimi, diçka që ka tentuar të bënte edhe Leipzigu. Asllani në anën tjetër është i gatshëm për të gjitha lëvizjet e mundshme dhe assesi s’do ta refuzonte Dortmundin.

“Një skenar i mundshëm, Dortmundi mund ta huazojë Asllanin me obligim blerje. Në këtë situatë, pagesa do të bëhej një vit më vonë”.

“Ky faktikisht ishte plani origjinal i Leipzigut. Vetë Asllani nuk është aspak kundër angazhimit te BVB-ja”.

Megjithatë për ta kompletuar këtë lëvizje, Dortmundi fillimisht duhet ta largojë Silvan, i cili po kërkohet nga skuadra spanjolle Real Betis.

Asllani javë më parë ishte afër kalimit te RB Leizigu, megjithatë marrëveshja thuhet se dështoi në fund shkaku që lojtari i Kosovës dështoi në testet mjekësore, por nuk ka asgjë të konfirmuar lidhur me këto raportime./Telegrafi/

Frenkie de Jong mund të largohet nga Barcelona në ditët e fundit të afatit kalimtar, pasi situata e mesfushorit holandez në klub është bërë gjithnjë e më e komplikuar.

Sipas “Diario Sport”, De Jong mund të marrë një ofertë konkrete për transferim në fazën e fundit të merkatos, ndërsa Juventusi është një prej klubeve që po monitoron situatën e tij.

Ardhja e Rodrit nga Manchester City ka ndryshuar ndjeshëm hierarkinë në mesfushën e Barcelonës. Me spanjollin që pritet të ketë një rol të rëndësishëm, De Jong mund të përballet me konkurrencë të madhe për një vend titullari.

29-vjeçari aktualisht po rikuperohet nga një lëndim në gju dhe rikthimi në formacionin bazë mund të jetë edhe më i vështirë për shkak të konkurrencës së shtuar.

Për më tepër, De Jong është kritikuar për vendimin për të luajtur i lënduar gjatë Kupës së Botës, si dhe për hezitimin e tij për t’iu nënshtruar një ndërhyrjeje kirurgjikale.

Holandezi kishte mohuar publikisht pretendimet se kishte refuzuar të luante në një ndeshje ndaj Atletico Madridit sezonin e kaluar, por tashmë ai është shndërruar në një figurë përçarëse te Barcelona.

Kjo u vu në pah edhe gjatë prezantimit të skuadrës në kuadër të trofeut “Joan Gamper”, ku një pjesë e tifozëve e pritën me vërshëllima dhe reagime negative.

Pavarësisht situatës së komplikuar, De Jong ka kontratë me Barcelonën deri në vitin 2029. Megjithatë, interesi i Juventusit mund ta bëjë të ardhmen e tij në “Camp Nou” një prej çështjeve më interesante në ditët e fundit të merkatos./Telegrafi/

Wayne Rooney beson se Manchester Unitedi do ta përfundojë sezonin në vendin e katërt në Ligën Premier, ndërsa ka paralajmëruar se Arsenali mund të “arratiset” me titullin e kampionit.

Ish-kapiteni i “Djajve të Kuq” ka thënë se do të ishte i kënaqur me një përfundim në top-katërsh, por ka insistuar se skuadra e Michael Carrick ka nevojë për edhe dy ose tre përforcime të tjera.

“Do ta pranoja vendin e katërt. Mendoj se ndoshta do të përfundojnë të katërtit, por ende mendoj se duhet të transferojnë edhe dy ose tre lojtarë”.

“Po shikoni Arsenalin dhe Manchester Cityn. Chelsea do të jetë shumë më i mirë këtë sezon, Tottenham gjithashtu do të jetë më i mirë. Pastaj është edhe Liverpooli. Kështu që do të jetë e vështirë”.

Rooney e sheh Arsenalin si favorit të madh për titullin dhe beson se skuadra londineze mund të krijojë një diferencë të madhe ndaj rivalëve.

“Arsenali ka potencialin të arratiset me titullin, por pas tyre mund të shohim shumë ndryshime. Mendoj se Manchester Unitedi do të përfundojë i katërti”.

“Michael Carrick bëri një punë fantastike për ta rikthyer Manchester Unitedin në Ligën e Kampionëve. Tani klubi duhet të qëndrojë aty”.

Megjithatë, Rooney e konsideron jorealiste që Unitedi të synojë titullin e Ligës Premier këtë sezon.

“Mendoj se është joreale të mendosh se do ta fitojnë Ligën Premier këtë vit. Nuk mendoj se do ta bëjnë”.

“Arsenali është favorit për ta fituar titullin, por a mund ta rrëmbejë Unitedi vendin e dytë nga Manchester City dhe të fillojë të ndërtojë sërish, për të synuar titullin sezonin e ardhshëm?”.

“Ne nuk e dimë se si do të jetë Manchester City pa Pep Guardiolën apo si do të ecë Liverpooli, por mendoj se ata do të jenë më të mirë. Chelsea patjetër do të jetë më i mirë, ashtu si edhe Tottenham”.

“Prandaj mendoj se ky sezon do të jetë më i vështirë dhe Unitedi duhet të sigurohet që të qëndrojë në zonën e top-katërshes dhe të jetë konkurrues”./Telegrafi/

Superkompjuteri ka bërë një tjetër parashikim të madh në Bundesliga, ku sërish Bayern Munichu do ta fitojë titullin kampion.

“Bavarezzët” që kanë një skuadër të fuqishme vlerësohen me plot 75.03 për qind gjase për ta mbrojtur epitetin e kampionit të Gjermanisë.

Borussia Dortmund sërish vlerësohet vetëm si nënkampion, me 9.11 për qind shanse për titull. Ndërsa, fatkeqësisht Hoffenheimi i tre shqiptarëve sërish nuk do të arrijë të hyjë në Ligën e Kampionëve.

Gjithnjë në bazë të këtij raportimi, Leverkuseni dhe Stuttgarti pritet ta përmbyllin top katërshen, atë para Leipzigut.

Ndërkohë, Koln dhe Schalke 04 parashikohen të bien në Bundesliga 2./Telegrafi/

Superkompjuteri i Opta-s e ka bërë parashikimin e fundit lidhur me sezonin e ri të La Liga-s.

Ky edicion pritet të jetë i jashtëzakonshëm, ku si Real Madridi ashtu edhe Barcelona janë forcuar dukshëm, derisa Atletico do të provojë të shkaktojë ndonjë befasi.

Në parashikimin e fundit, superkompjuteri ka vlerësuar se sërish për të tretin vit radhazi, Barcelona do ta ketë epitetin – kampion i Spanjës. Ata e kanë vlerësuar ekipin katalunas me 46.32 për qind si favorit.

Në anën tjetër, Reali pritet ta mbyllë si vend i dytë, ngase ka 32.88 për qind shanse për titull.

Atletico Madridi dhe Villarreali pritet ta sigurojnë Ligën e Kampionëve ndërsa dy klubet e sapo promovuara si Deportivo Alaves dhe Malaga pritet të rikthen në La Liga 2.

Tabela e plotë e La Ligas për edicionin e ri pritet të duket në këtë mënyrë:

Ndërkohë, edicioni i ri 2026/27 tashmë ka nisur, me Atleticon që shijoi fitoren e parë derisa Reali e Barcelona do t’ia bëjnë ‘sefte’ këtë vikend./Telegrafi/

Paris Saint-Germain sërish pritet ta fitojë titullin në Francë, kështu ka njoftuar superkompjuteri i Opta-s në parashikimin e fundit.

Si zakonisht, superkompjuteri ka bërë parashikimin e plot, me “Parisienët” që janë vlerësuar si kampion me 67.45 për qind shanse.

Pas tyre, renditet ekipi që i mposhti në Superkupën e Francës, Lens, por gjasat e tyre për titull janë vetëm 9.76 për qind.

Lille dhe Lyon pritet ta sigurojnë vendin në Ligën e Kampionëve, derisa Monaco e Marsielle mbesin vetëm për Ligën e Evropës.

Në anën tjetër, Le Mans dhe Angers parashikohen të bien në Ligue 2.

Renditja e plotë duket kështu./Telegrafi/

Ish-kapiteni i Kosovës U21 Milot Avdyli thotë se Celje është gati për ta bërë historinë dhe siguroi fazën e ligës të Ligës së Kampionëve.

Avdyli ishte i jashtëzakonshëm të mërkurën mbrëma për të shënuar një eurogol në barazimin e Celjes ndaj Slovan Bratislavës, kurse javën tjetër do ta kërkojnë avancimin tutje.

Pas supergolit që i siguroi Celjes një barazim të madh, ylli kosovar thotë se e tërë skuadra po bën çmos për ta realizuar ëndrrën.

“Mendoj se jemi pozicionuar mirë në fushë. Pasi shënoi Slovani, kemi marrë kontrollin e lojës dhe kemi shënuar në moment të mirë. Kam pasur shumë hapësirë për të gjuajtur dhe kam përfituar nga kjo”.

“Është sfiduese të luash në këtë stadium. Kundërshtari ka kualitet, tifozët janë të zhurmshëm, por mendoj se të gjithë treguam karakter së bashkua dhe besoj se do ta përsërisim këtë javën e ardhshme”.

“Nuk ka rëndësi se ku luaj, në cilin rol. Dua të ndihmoj ekipin dhe do të bëj gjithnjë më të mirën për të realizuar ëndrrën për kualifikim në Ligën e Kampionëve. Mendoj se jemi në rrugën e duhur për sukses”.

Ndër të tjera, Avdyli ende nuk është ftuar nga ekipi i parë i Kosovës, kësisoj nuk do të ishte befasi nëse Shqipëria përfiton nga situata për ta bindur të vishet “Kuq e Zi”./Telegrafi/

Lionel Messi ka shënuar golin e tij të parë që prej vdekjes së babait, Jorge Messit, duke arritur në kuotën e 922 golave në karrierën e tij.

Ylli argjentinas realizoi në barazimin 2-2 të Inter Miamit ndaj Philadelphia Union, në një ndeshje që pati një domethënie të veçantë për të.

Në minutën e 26-të, Messi krijoi hapësirën e nevojshme dhe goditi me të majtën, duke e dërguar topin në rrjetë. Menjëherë pas golit, ai ngriti gishtin drejt qiellit, duke i bërë një homazh prekës babait të tij të ndjerë.

Jorge Messi ndërroi jetë më 8 gusht në Rosario të Argjentinës, në moshën 68-vjeçare. Përveçse babai i Lionel Messit, Jorge ishte edhe agjenti i tij për shumë vite dhe një prej figurave më të rëndësishme në karrierën e futbollistit argjentinas.

Messi kishte folur më herët për lidhjen e veçantë me të atin, duke e përshkruar atë jo vetëm si babanë e tij, por edhe si mikun dhe agjentin e tij. Për këtë arsye, rikthimi në fushë pas humbjes së tij mori një kuptim edhe më emocional.

Messi kishte dhënë kontribut edhe në golin e parë të Inter Miamit, duke regjistruar një asistim, por skuadra e tij nuk arriti të marrë fitoren, pasi Philadelphia Union barazoi rezultatin 2-2.

Që prej transferimit te Inter Miami në vitin 2023, Messi ka vazhduar të regjistrojë shifra mbresëlënëse. Në 109 paraqitje në të gjitha garat, ai ka realizuar rreth 93 gola dhe ka dhënë 52 asistime.

Me klubin amerikan, 39-vjeçari ka fituar edhe trofe, përfshirë Leagues Cup në vitin 2023, MLS Supporters’ Shield në vitin 2024 dhe MLS Cup në vitin 2025./Telegrafi/

Jose Mourinho ka lavdëruar në superlativë Arda Gulerin, duke pranuar publikisht admirimin e madh që ka për mesfushorin e ri të Real Madridit.

Trajneri portugez foli për talentin turk gjatë një interviste në emisionin e njohur spanjoll “El Chiringuito”, ku zbuloi se është “i dashuruar” me mënyrën se si luan 21-vjeçari.

“Jam i dashuruar me Arda Gulerin si lojtar”.

Trajneri i Real Madridit beson se zhvillimi i Gulerit në fushë do të ndjekë një rrugëtim të ngjashëm me atë të një prej legjendave më të mëdha të klubit, Luka Modric.

“Mendoj se me të do të ndodhë e njëjta gjë si me Luka Modricin. Në fund, ai do të përfundojë duke luajtur si numër 8, si mesfushor qendror, dhe më vonë si numër 6, si mesfushor defensiv”.

Komentet e “Special One” kanë ngjallur entuziazëm të madh në Madrid, pasi tregojnë besimin e jashtëzakonshëm që trajneri portugez ka te Guler.

Turku ka fituar gjithnjë e më shumë rëndësi në skuadrën madrilene falë aftësisë për të luajtur në disa pozita dhe cilësive të tij teknike, ndërsa Mourinho duket se e sheh atë si një lojtar që mund të përshtatet dhe të evoluojë në role të ndryshme në mesfushë./Telegrafi/

Në Taranto të Italisë mbahet sot Asambleja e Përgjithshme Zgjedhore e Komitetit Ndërkombëtar të Lojërave Mesdhetare, një takim me rëndësi të veçantë edhe për Kosovën, e cila po përgatitet për organizimin e Lojërave Mesdhetare “Prishtina 2030”.

Në këtë asamble, ku pritet të zgjidhet presidenti i ri për mandatin e ardhshëm, Kosova do të jetë pjesë aktive e diskutimeve për të ardhmen e Lojërave Mesdhetare. Ministri në detyrë i Rinisë dhe Sportit, Blerim Gashani, pritet të raportojë për punën dhe përgatitjet që po bëhen në drejtim të organizimit të “Prishtina 2030”.

Raportimi i Gashanit para përfaqësuesve të komiteteve olimpike dhe drejtuesve të ICMG-së, vjen në një moment të rëndësishëm për Kosovën, e cila synon që përmes këtij organizimi të dëshmojë kapacitetet e saj për të mirëpritur një ngjarje të madhe ndërkombëtare sportive.

Për Kosovën, Asambleja e sotme paraqet gjithashtu një mundësi për të informuar drejtuesit e rinj të ICMG- së për progresin e bërë deri më tani dhe për hapat që pritet të ndërmerren në vitet e ardhshme në funksion të përgatitjes së Prishtinës për Lojërat Mesdhetare të vitit 2030./Telegrafi/

Harry Maguire ka deklaruar se në kampin e Manchester Unitedit ekziston besimi se skuadra mund të luftojë për titullin e Ligës Premier nën drejtimin e Michael Carrick këtë sezon.

Mbrojtësi anglez po hyn në sezonin e tij të tetë në “Old Trafford”, periudhë gjatë së cilës ka përjetuar më shumë momente të vështira sesa suksese.

33-vjeçari ka fituar vetëm dy trofe me Manchester Unitedin, Kupën EFL dhe FA Cup, ndërsa ka humbur edhe dy finale të Ligës së Evropës. Për më tepër, ai ka kaluar periudha të vështira sa i përket formës së tij.

Pas rikthimit te klubi në janar, pas largimit të Amorimit, asnjë skuadër në Ligën Premier nuk fitoi më shumë ndeshje se Manchester Unitedi i Carrickut, me 12 fitore. “Djajtë e Kuq” gjithashtu shënuan më shumë gola se çdo ekip tjetër gjatë kësaj periudhe, me 33 të tillë.

Kjo e ndihmoi Manchester Unitedin të përfundonte sezonin në vendin e tretë dhe të siguronte rikthimin në Ligën e Kampionëve. Megjithatë, Maguire beson se skuadra duhet të synojë edhe më lart në sezonin 2026/27.

“Duam të përmirësohemi në krahasim me sezonin e kaluar. Të gjithë duan ta fitojnë Ligën Premier, sigurisht që ky do të jetë synimi ynë. Këtë e kërkon ky klub”.

“Ne kemi besimin se mund të jemi shumë konkurrues dhe se mund ta mposhtim çdo kundërshtar në ditën tonë. Do të jetë një sezon emocionues”.

“Gjatë kohës sime në klub kemi pasur disa grupe shumë të bashkuara, por pa dyshim që ky është një prej grupeve më të afërta”.

“Kalimi i kohës së bashku dhe fitimi i ndeshjeve të futbollit i afron edhe më shumë ekipet”.

“Të humbësh finalen e Ligës së Evropës, të përfundosh në vendin e 15-të dhe më pas të ngjitesh në vendin e tretë duke e rikthyer klubin në Ligën e Kampionëve – ishte një sezon i mirë, por nuk mund të ndalemi këtu”./Telegrafi/

Atletico Madridi e ka nisur edicionin e ri të La Liga-s me fitore në shtëpi ndaj Malagas.

“Los Rijoblancos” triumfuan me rezultat 2-0, sfidë që deri vonë ishte tepër e baraspeshuar.

Në pjesën e parë pavarësisht disa rasteve, asnjëra nga klubet nuk arriti t’i finalizojë kësisoj skuadrat shkuan në pushim me rezultat 0-0.

Rodrigo Mendoza kishte një mundësi të mirë shënimi megjithatë Herrero me super pritje ia mohoi golin.

Sidoqoftë, ishte transferimi i ri Kang-in Lee që me një gol të bukur nga distanca e la portierin të shtangur për të kaluar Atleticon në epërsi (70’).

Ndërsa, fitoren e vulosi Alex Baena me një supergol nga gjuajtja e lirë (85’).

Atletico me këtë fitore i merr tre pikët e para në La Liga, ndërsa Malaga do të provojë në xhirot e ardhshme./Telegrafi/

Reprezentuesi i Belgjikës, Diego Moreira, është zyrtarisht lojtar i Milanit, pasi ka kompletuar transferimin nga Strasbourg.

Sulmuesi anësor 22-vjeçar ka nënshkruar kontratë me “Rossonerët” deri në vitin 2031, ndërsa kostoja totale e marrëveshjes raportohet të jetë rreth 65 milionë euro, përfshirë bonuset.

Operacioni është negociuar nga agjenti portugez Jorge Mendes, i cili gjatë kësaj vere kishte luajtur rol edhe në transferimin e sulmuesit Goncalo Ramos nga Paris Saint-Germain te Milani.

Megjithatë, ekzistojnë raportime të ndryshme sa i përket strukturës së saktë financiare të marrëveshjes.

Sipas “Sky Sport Italia”, Milani do t’i paguajë Strasbourgut 45 milionë euro si shumë fikse, ndërsa marrëveshja mund të shkojë deri në 65 milionë euro përmes bonuseve, disa prej të cilave janë më të vështira për t’u aktivizuar.

Moreira kishte qenë në negociata të avancuara edhe me RB Leipzig, por Milani ndërhyri dhe arriti marrëveshjen për transferimin e tij.

Belgu mbërriti në Itali të martën, ku iu nënshtrua testeve mjekësore, ndërsa kontratën me Milanin e ka nënshkruar vetëm këtë mbrëmje.

Moreira do ta bartë fanellën me numrin 22 te klubi italian./Telegrafi/

Sulmuesi Milot Avdyli po e dëshmon se është një ndër lojtarët që shpejtë Kosova duhet ta marrë për bazë.

Anësori këmbëshpejtë ka shënuar në play-offin e Ligës së Kampionëve ndaj Slovan Bratislavas.

Me një driblim të bukur, e pastaj një gjuajtje të fuqishme, Avdyli e la portierin vendas plotësisht të shtangur.

Për ta parë golin: VIDEO

Ndërkohë, kujtojmë Avdyli ka qenë kapiten i Kosovës U21, si dhe është një nga lojtarët që Shqipëria po provon ta bindë, për ta veshur fanellën “Kuq e Zi”./Telegrafi/

Milani mund të përfshihet në një operacion spektakolar me Manchester Cityn, pasi Jorge Mendes po përpiqet të ndërmjetësojë një marrëveshje shkëmbimi mes dy klubeve, raporton Sport Mediaset.

Sipas raportimit, ideja është që Rafael Leao të transferohet te Manchester City, së bashku me një shumë parash nga Milani, ndërsa në drejtim të “Rossonerëve” do të vinte qendërmbrojtësi portugez, Ruben Dias.

Milani prej kohësh po kërkon një zgjidhje për të ardhmen e Leao. Kontrata e sulmuesit portugez skadon në vitin 2028, ndërsa deri më tani nuk është shfaqur ndonjë klub i gatshëm të paguajë rreth 50 milionë euro plus bonuse për kartonin e tij.

Jorge Mendes ka pasur një rol të rëndësishëm në strategjinë e merkatos së Milanit këtë verë. Agjenti portugez ka qenë i përfshirë në disa operacione të klubit, përfshirë ardhjen e trajnerit Ruben Amorim, transferimin e sulmuesit Goncalo Ramos nga Paris Saint-Germain dhe së fundmi Diego Moreiras nga Strasbourg.

Mendes raportohet se ka kaluar tërë pasditen në selinë e Milanit, “Casa Milan”, ku mund të ketë diskutuar edhe për operacionin e mundshëm me Manchester Cityn.

Ideja e tij do të ishte që Leao të transferohej në Angli, ndërsa Milani të merrte Ruben Dias dhe një shumë parash në kuadër të marrëveshjes.

Dias, i cili mbushi 29 vjeç në maj, konsiderohet një përforcim i madh për repartin defensiv të Milanit. Klubi italian tashmë ka afruar Mario Gilan nga Lazio, por kërkon të shtojë edhe më shumë cilësi në mbrojtje për t’i dhënë Amorimit lojtarë të përshtatshëm për filozofinë e tij.

Ruben Dias është gjithashtu i lidhur me një transferim të mundshëm te Real Madridi gjatë kësaj vere, ndërsa Manchester City nuk ka dhënë sinjale të qarta se dëshiron ta shesë qendërmbrojtësin.

Portugezi iu bashkua Manchester Cityt nga Benfica në vitin 2020 për 71.6 milionë euro dhe aktualisht ka kontratë me klubin anglez deri në qershor të vitit 2029./Telegrafi/

Sulmuesi i Bayern Munichut, Harry Kane, ka folur për të ardhmen e tij dhe mundësinë e rikthimit në Ligën Premier, duke pranuar se dëshira për t’u kthyer në Angli nuk është më aq e madhe.

Kapiteni i Anglisë u largua nga Tottenham në verën e vitit 2023 për t’iu bashkuar Bayern Munichut për 100 milionë euro. Që nga transferimi në Gjermani, Kane është shndërruar në një prej lojtarëve kryesorë të gjigantit bavarez.

Megjithatë, ndryshe nga më parë, 33-vjeçari nuk është më i bindur se do të rikthehet në futbollin anglez.

“Kur u largova nga Tottenham në vitin 2023, sigurisht që mendoja se do të rikthehesha patjetër në Ligën Premier. Por ajo dëshirë nuk është më aq e fortë”.

“Jam jashtëzakonisht i lumtur këtu në Mynih. Kam zbuluar një botë krejtësisht tjetër të futbollit jashtë Anglisë dhe kjo më ka bërë ta vlerësoj edhe më shumë futbollin evropian”.

“Skuadra që kemi këtu, trajneri Vincent Kompany... Edhe familja ime është përshtatur shumë mirë këtu”.

“Gjëja më e rëndësishme është të jesh në vendin më të mirë të mundshëm. Kurrë mos thuaj kurrë, por tani jam i fokusuar te Bayerni dhe do të shohim se çfarë sjell e ardhmja”.

Kane ka krijuar një ndikim të madh që prej transferimit te Bayern Munichu dhe tashmë duket se është i hapur për ta vazhduar qëndrimin në Gjermani, pavarësisht interesimit të mundshëm nga klubet e Ligës Premier.

Deklaratat e tij vijnë në një moment kur emri i tij është lidhur edhe me Barcelonën, e cila po kërkon një sulmues të nivelit të lartë për të udhëhequr repartin ofensiv./Telegrafi/

Bernardo Silva ka deklaruar se të luash për Real Madridin “nuk është për të gjithë”, pasi mesfushori portugez u prezantua të mërkurën si përforcimi më i ri i 15 herë kampionëve të Evropës.

31-vjeçari iu bashkua Real Madridit nga Manchester City si lojtar i lirë, pasi kontrata e tij me klubin anglez skadoi gjatë kësaj vere.

Silva u shpreh krenar për transferimin te klubi më i suksesshëm në historinë e Ligës së Kampionëve, duke theksuar ndikimin që pati momenti kur pa trofetë e fituar nga madrilenët në Santiago Bernabeu.

“Kam luajtur disa herë në Bernabeu. Kur arrin aty dhe sheh 15 trofetë e Ligës së Kampionëve që shfaqen, është diçka shumë imponuese dhe fakti që i kam tani këtu është shumë i veçantë”.

“Të luash për një klub që ka 15 tituj të Ligës së Kampionëve nuk është për të gjithë. Jam shumë krenar dhe tani do të jap gjithçka për këtë klub”, deklaroi Silva për Real Madrid TV.

Silva do të ketë mundësinë të luajë nën drejtimin e Jose Mourinhos, i cili është rikthyer në stolin e Real Madridit.

Ndërkohë, ish-bashkëlojtari i Silvas te Manchester City, Rodri, iu bashkua Barcelonës të martën, pasi më herët ishte lidhur edhe me një transferim te Real Madridi.

Mourinho kishte konfirmuar se kishte biseduar me Rodrin gjatë verës dhe se Real Madridi i kishte bërë atij një ofertë të mirë.

“Kam folur me të disa herë dhe Real Madridi i bëri një ofertë shumë të mirë”.

“Rodri kishte dyshime... dhe dyshimet e Rodrit krijuan dyshime edhe tek unë”.

“Ai është një lojtar i jashtëzakonshëm dhe ishte shumë profesionist me ne. Nuk kam asgjë negative për të thënë. Por Real Madridi është një klub me një përmasë të tillë që nuk mund të ketë lojtarë që mendojnë dy herë për të”, kishte deklaruar Mourinho për emisionin televiziv spanjoll El Chiringuito./Telegrafi/