Gratë në Iran tani mund të marrin zyrtarisht një patentë për të ngarë një motoçikletë, raportojnë mediat lokale, duke i dhënë fund viteve të paqartësisë ligjore rreth motoçikletave me dy rrota dhe pas shtypjes së përgjakshme të qeverisë ndaj protestave kundër regjimit muajin e kaluar.

Ligji më parë nuk i ndalonte në mënyrë të qartë gratë të ngasin motoçikleta dhe skuterë, por në praktikë autoritetet refuzuan të lëshonin patentë. Për shkak të zonës gri ligjore, gratë janë mbajtur ligjërisht përgjegjëse për aksidentet edhe kur janë viktima.

Zëvendëspresidenti i Parë i Iranit, Mohammad Reza Aref, nënshkroi dje një rezolutë që synonte sqarimin e kodit të trafikut, i cili u miratua nga kabineti i Iranit në fund të janarit, raporton agjencia e lajmeve Ilna.

Rezoluta detyron policinë e trafikut të “ofrojë trajnim praktik për aplikantet femra, të organizojë një provim nën mbikëqyrjen e drejtpërdrejtë të policisë dhe t’u lëshojë grave patentë shoferi motoçikletash”, thotë Ilna.

Ky ndryshim vjen pas një vale protestash në të gjithë Iranin, që fillimisht u nxitën nga ankesat ekonomike, por që muajin e kaluar u shndërruan në demonstrata kombëtare antiqeveritare.

Teherani ka pranuar se më shumë se 3,000 vdekje ndodhën gjatë trazirave, duke këmbëngulur se shumica ishin anëtarë të forcave të sigurisë dhe kalimtarë. Grupet e të drejtave përmendin një numër më të lartë vdekjesh dhe thonë se shifra e vërtetë mund të jetë edhe më e lartë, në dhjetëra mijëra.

Që nga Revolucioni Islamik i Iranit në vitin 1979, gratë janë përballur me një sërë kufizimesh shoqërore, me kodet e veshjes që paraqesin një sfidë për ato që ngasin motoçikleta. Gratë duhet të mbulojnë flokët me shami në publik dhe të veshin rroba modeste dhe të gjera, por vitet e fundit shumë prej tyre i kanë sfiduar këto rregulla, me numrin e grave në motoçikleta që është rritur ndjeshëm në muajt e fundit.

Ky trend u përshpejtua pas vdekjes së Mahsa Amini, një gruaje të re iraniane të arrestuar për shkelje të dyshuar të kodit të veshjes në vitin 2022. Vdekja e saj shkaktoi protesta në të gjithë Iranin nga gratë që kërkonin liri më të mëdha.

Sinjali – aty ku e vërteta flet para lajmit!

/GazetaSinjali/

The post Gratë në Iran zyrtarisht mund të marrin patentë për motoçikletë appeared first on Sinjali.

Me ftesë nga Selia e Shenjtë, Kryeministri i Shqipërisë Edi Rama do të vizitojë Vatikanin dhe do të pritet në audiencë nga Papa Leoni XIV.

Kryeministri Edi Rama është nisur drejt Romës, ku do të zhvillojë një vizitë zyrtare në Vatikan, i shoqëruar nga bashkëshortja e tij znj.Linda Rama dhe delegacioni.

Kryeministri do të vizitojë Pallatin Apostolik të Vatikanit, ku do të pritet në oborrin “San Damaso”, nga Prefekti i Shtëpisë Papnore dhe Zotërinj të Shenjtërisë së Tij.

Pritja do t’i paraprijë audiencës që kryeministri Rama do të ketë me Papa Leonin XIV, në Bibliotekën Papnore të Pallatit Apostolik.

Më pas, vizita do të vijojë në Bazilikën e Shën Pjetrit, në mjediset e Stanza delle Lacrime, Cappella Paolina, Sala Reggia, Sistina dhe në altarin e Shën Gjon Palit II.

Në përfundim të qëndrimit të tyre në Vatikan, Kryeministri Rama dhe bashkëshortja e tij, do të vizitojnë vendvarrimin e Papa Françeskut në bazilikën Santa Maria Maggiore.

Pjesë e kësaj vizite do të jenë edhe disa takime të tjera mes të cilave takimi me Kardinalin Pietro Parolini, sekretar shteti i Vatikanit.

Sinjali – aty ku e vërteta flet para lajmit!

/GazetaSinjali/

The post Rama niset për në Vatikan, pritet të takohet me  Papa Leoni XIV appeared first on Sinjali.

Dy shtetas shqiptarë janë dënuar me nga 56 muaj burgim secili, pasi u shpallën fajtorë për një seri grabitjesh në Britani, ku kishin vënë në shënjestër shtatë prona, përfshirë edhe shtëpinë e futbollistit të njohur Scott Hogan, shkruan “Sky News”.

Sipas Gjykatës, Denis Puka (28 vjeç) dhe Erisjan Laska (29 vjeç), së bashku me një person të tretë ende të paidentifikuar, kishin organizuar një skemë të mirëplanifikuar grabitjesh, duke përdorur maska, mjete pune dhe radio komunikimi. Ata kishin marrë me qira një banesë përmes Airbnb në Warrington, të cilën e përdornin si bazë operimi.

Grabitjet u kryen në qershor të vitit të kaluar në zona të ndryshme të Cheshireit, duke lëvizur me një veturë me targa të rreme.

Mes pronave të shënjestruara ishte edhe shtëpia e futbollistit Scott Hogan, ish-lojtar i Aston Villas, Brentfordit dhe Birmingham Cityt, i cili aktualisht luan për MK Dons. Gjatë tentativës për grabitje, në shtëpi ndodheshin bashkëshortja e tij shtatzënë dhe vajza e mitur. Edhe pse nuk u vodh asgjë, Hogan deklaroi se ngjarja i kishte shkaktuar stres dhe pasiguri të madhe familjes së tij.

Në raste të tjera, të pandehurit hynë në disa banesa pa arritur të vjedhin, ndërsa grabitja e vetme e suksesshme ndodhi në një vilë në Northwich, ku pronarët ishin me pushime. Aty u vodhën ora luksoze të markave Breitling dhe Rolex, me vlerë rreth 9 mijë paund.

Të dy u arrestuan më vonë, pasi policia gjeti veturën e përdorur në grabitje, brenda së cilës u sekuestruan telefona, veshje, mjete për thyerje dhe targa të rreme.

Gjatë shpalljes së vendimit, gjykatësi Steven Everett e cilësoi rastin si një “komplot të sofistikuar dhe të mirëorganizuar”, duke theksuar se veprimet e tyre kishin shkaktuar pasoja të rënda për viktimat.

Sinjali – aty ku e vërteta flet para lajmit!

/GazetaSinjali/

The post Dy shtetas shqiptarë dënohen në Britani për grabitje, në shënjestër edhe shtëpia e ish-yllit të Aston Villas appeared first on Sinjali.

Prokuroria Themelore në Pejë, Departamenti i Përgjithshëm, ka ngritur aktakuzë ndaj personit fizik Sh.K. dhe personit juridik, kompanisë “Luani Transport”, për veprën penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”, sipas Kodit Penal të Republikës së Kosovës.

Sipas aktakuzës, më 7 korrik 2025, në fshatin Gorazhdevc, Komuna e Pejës, Sh.K., në cilësinë e pronarit të kompanisë, nuk ka ndërmarrë masat e nevojshme për siguri dhe shëndet në punë, duke mos krijuar kushte të sigurta për punëtorët.

“I pandehuri nuk ka ofruar trajnim për siguri në punë, nuk ka dhënë informacione për rreziqet në vendin e punës dhe as për përdorimin e duhur të makinerisë”, thuhet në aktakuzë.

Prokuroria thekson se, megjithëse viktima Sylë Ramadani, tani i ndjerë, kishte detyrë vetëm pastrimin, ai ka humbur jetën në vendin e punës si pasojë e kontaktit me gjeneratorin.

Po ashtu, aktakuzë është ngritur edhe ndaj kompanisë “Luani Transport”, e cila sipas Prokurorisë, nga pakujdesia dhe mosrespektimi i Ligjit për Sigurinë dhe Shëndetin në Punë, nuk ka vepruar në përputhje me dispozitat dhe rregullat teknike për masat e sigurisë në vendin e punës.

“Si pasojë e mosplotësimit të kushteve të punës sipas ligjit dhe në kundërshtim me nenin 6, paragrafi 1 i Ligjit për Sigurinë dhe Shëndetin në Punë, ka humbur jetën punëtori S.R”, thuhet në njoftimin e Prokurorisë.

Prokurori i shtetit i ka propozuar gjykatës që, përveç dënimit për veprën penale, të shqiptohet edhe dënimi plotësues “Ndalimi i ushtrimit të profesionit, veprimtarisë ose detyrës”, konkretisht ndalimi i ushtrimit të veprimtarisë së separacionit.

“Kjo për faktin se i pandehuri ka ushtruar veprimtarinë pa licencë dhe pa asnjë kriter të sigurisë në vendin e punës”, thuhet më tej në aktakuzë.

Rasti tashmë pritet të trajtohet nga gjykata kompetente.

Sinjali pati raportuar për këtë rast:

E rëndë në Pejë – ky është punëtori që vdiq pas goditjes nga rryma elektrike në Pejë

Sinjali – aty ku e vërteta flet para lajmit!

/GazetaSinjali/

The post Punëtori humbi jetën pas kontaktit me gjeneratorin, aktakuzë ndaj pronarit dhe kompanisë në Pejë appeared first on Sinjali.

Bashkëthemeluesi i Microsoft, Bill Gates, ka deklaruar se emaili i lidhur me Jeffrey Epstein ishte “i rremë”, duke mohuar çdo shkelje gjatë një interviste për një kanal australian të mërkurën.

Gates ka bërë të ditur se e kishte takuar Epsteinin në vitin 2011 dhe se në atë kohë ishte në dijeni për rrjetin e tij të gjerë të financuesve të mundshëm.

“Në retrospektivë, kjo ishte një rrugë pa krye dhe unë isha budalla që humba kohë. Isha një nga shumë njerëz që pendohen që e njohën ndonjëherë”, ka thënë ai.

Ai ka theksuar se “nuk kishte shkuar kurrë në ishull”, duke iu referuar ishullit privat të Epstein në Karaibe.

“Nuk kam takuar kurrë asnjë grua… sa më shumë që të dalë në dritë, aq më e qartë do të jetë se, megjithëse koha ishte një gabim, nuk kishte të bënte fare me atë lloj sjelljeje”, ka deklaruar Gates.

Jeffrey Epstein është vetëvrarë në një burg të New Yorkut në vitin 2019, ndërsa po priste gjyqin për abuzim seksual me dhjetëra vajza.

Sinjali – aty ku e vërteta flet para lajmit!

/GazetaSinjali/

The post Bill Gates mohon çdo shkelje në lidhje me Epsteinin: Nuk kam takuar kurrë asnjë grua… appeared first on Sinjali.

Tre persona janë arrestuar gjatë natës në Mitrovicën e Jugut, nën dyshimet për përfshirje në vepra penale që lidhen me narkotikë.

Sipas njoftimit të Policisë së Kosovës, arrestimet janë kryer më 04 shkurt 2026 nga njësitet policore të Stacionit Policor Jugu në Mitrovicë, në bashkëpunim me hetuesit e Drejtorisë për Hetimin e Trafikimit me Narkotikë (DHTN).

Të dyshuarit janë arrestuar në dy lokacione të ndryshme në Mitrovicë, ndërsa ndaj tyre dyshohet se kanë kryer veprën penale: “Blerje, posedim, shpërndarje dhe shitje e paautorizuar e narkotikëve, substancave psikotrope dhe analoge”.

Gjatë kontrollit policor, tek të dyshuarit janë gjetur dhe sekuestruar 47 qese me substancë të dyshuar narkotike, me peshë të përgjithshme prej 40.84 gram.

Me aktvendim të prokurorit kompetent, tre të dyshuarve u është caktuar masa e ndalimit policor, ndërsa hetimet lidhur me rastin janë duke vazhduar nga njësia përkatëse e DHTN-së.

Sinjali – aty ku e vërteta flet para lajmit!

/GazetaSinjali/

The post Arrestohen tre persona në Mitrovicë për shitblerje narkotikësh, iu gjetën 47 qese me drogë appeared first on Sinjali.

Gazeta prestigjioze gjermane, FAZ, duke iu referuar burimeve të veta, kanë raportuar se takimi i Presidentes së Kosovës, Vjosa Osmani me Presidentin e ShBA-së, Donald Trump, në Davos të Zvicrrës, u bë pa koordinim me Kryeministrin në detyrë Albin Kurti.

Madje, sipas gazetës, ishte Kryeministri i Shqipërisë, Edi Rama, ai që e ndihmoi Presidenten e Kosovës të arrijë deri te Trump.

“Osmani u shfaq krenare në Zvicër pranë presidentit amerikan dhe që atëherë flet për arritjen e madhe që është bërë vendi i saj anëtar themelues i këtij entiteti. Hapin e saj për këtë e bëri, sipas informacioneve jozyrtare nga Prishtina, pa u konsultuar me kryeministrin e Kosovës Albin Kurti. Përkundrazi, thuhet se ishte kryeministri i Shqipërisë Edi Rama ai që i hapi rrugën Osmanit te Trumpi. Rama ka qasje te familja e presidentit amerikan sepse i dha dhëndrit të Trumpit, Jared Kushner, kontratën për një projekt të madh imobiliar me vlerë miliarda në bregdetin e Mesdheut shqiptar. Kryeministri shqiptar nuk e duron Kurtin. Prandaj ai shfrytëzon çdo mundësi për ta forcuar Osmanin si konkurrente të Kurtit.” – shkruan FAZ.

Ndryshe, Kurti nuk e kishte lëshuar asnjë fjalë, e asnjë shkronjë në rrjete sociale për takimin Osmani – Trump, si dhe për faktin se Kosova u bë nënshkruese e “Bordit të Paqes”. Ai foli vetëm pasi u pyet nga gazetarët në Prishtinë, dhe atë krejt shkurt e zbehtë.

Sinjali – aty ku e vërteta flet para lajmit!

/GazetaSinjali/

The post FAZ: Osmani nënshkroi me Trump në Davos pa u konsultuar me Kurtin, me ndihmën e Edi Ramës appeared first on Sinjali.

Në zorrë, çdo ditë zhvillohet një proces kompleks – nuk shihet, nuk dëgjohet gjithmonë, por ndonjëherë ndihet. Gazrat, të cilat janë nënprodukte të tretjes, shërbejnë si lajmëtarë të rëndësishëm të sistemit tretës.

Në një moment të rritjes, gazrat ndahen në dy kategori: ose bëhen temë e sikletshme për të cilën heshtet, ose burim i pashtershëm shakash. Në moshën e rritur, humori shpesh zbehet, por ndjenja e parehatshme mbetet, veçanërisht kur gazrat janë të shpeshtë, të zhurmshëm ose me erë të pakëndshme.

Megjithatë, lirimi i gazrave është një dukuri fiziologjike universale. Pothuajse çdo njeri e përjeton çdo ditë. Për më tepër, gazrat nuk janë vetëm një nënprodukt i padëmshëm i tretjes, por edhe tregues potencial i shëndetit të sistemit tretës.

Çfarë tregon aroma e gazrave për shëndetin e zorrëve

Arsyeja pse disa gazra kalojnë pa u vënë re, ndërsa të tjerë ndihen shumë pakëndshëm, qëndron në përbërjen kimike.

– Shumica e gazrave janë pa erë, ndërsa aromat e pakëndshme vijnë nga sasi të vogla përbërësish që përmbajnë squfur dhe krijohen gjatë procesit të tretjes, shpjegon dr. Shaj Vishnumohan, doktor i shkencave të ushqyerjes dhe nutricionist në Perth, Australi.

Gjatë shpërbërjes së ushqimit, bakteret e zorrëve fermentojnë përbërësit e patretur dhe, si nënprodukt, lirojnë gazra. Aroma e gazrave mund të ndryshojë në varësi të ushqimit, por shumica e gazrave, si azoti, janë pa erë.

Ushqimet e pasura me squfur (mishi i kuq, peshku, vezët, lakra, brokoli, lakra e Brukselit dhe lulelakra) mund të shkaktojnë aroma që disa i përshkruajnë si “vezë të prishura”, për shkak të lirimit të hidrogjen-sulfidit.

– Ndryshimet e herëpashershme të erës konsiderohen normale. Por aromat e forta dhe të pazakonshme, veçanërisht kur shoqërohen me fryrje, kapsllëk ose diarre, mund të tregojnë çrregullime të tretjes ose çekuilibër të mikrobiomës, thotë Ava Safir, magjistre e shkencave dhe dietologe e licencuar në Nju Jork, SHBA.

Sipas saj, aromat e forta dhe afatgjata të gazrave mund të jenë shenjë e:

keqthithjes së karbohidrateve,

rritjes së tepërt të baktereve në zorrën e hollë (SIBO),

ose çrregullimeve të tjera të tretjes që kërkojnë vlerësim mjekësor.

Çfarë tregon zëri i gazrave për shëndetin e zorrëve

Fatkeqësisht, nuk është e mundur të parashikohet nëse gazrat do të kalojnë në heshtje apo do të jenë të zhurmshëm. Pavarësisht nga zëri, ai nuk lidhet drejtpërdrejt me shëndetin e zorrëve.

– Zëri që prodhojnë gazrat është kryesisht mekanik dhe varet nga sasia e gazit, shpejtësia e lëvizjes nëpër zorrë dhe tonusi i muskujve, shpjegon Ava Safir.

Gazrat e zhurmshëm nuk nënkuptojnë domosdoshmërisht problem; ato janë rezultat i kalimit të shpejtë dhe presionit, më shumë fizikë sesa biologji. Gazrat e qetë, por të vazhdueshëm, tregojnë fermentim më të ngadaltë. Vetëm kur zëri shoqërohet me dhimbje ose ngërçe, mund të jetë shenjë e një problemi.

Disa faktorë anatomikë mund ta bëjnë zërin më të theksuar: kapsllëku, tensioni i muskujve të dyshemesë pelvike dhe hemorroidet mund të ndryshojnë tonusin e muskujve rektalë dhe mënyrën e lirimit të gazrave.

Çfarë tregon shpeshtësia e gazrave për shëndetin e zorrëve

Mesatarisht, një i rritur prodhon rreth dy litra gazra në ditë, dhe është normale të lirohen gazra 15–25 herë në ditë. Lirimi shumë i shpeshtë mund të jetë arsye për vëmendje, ndërsa frenimi i gazrave çon në grumbullim më të madh në zorrë, gjë që mund të shkaktojë probleme serioze të tretjes.

– Lirimi i gazrave nga disa herë në ditë deri rreth 20 herë konsiderohet normal. Por nëse disa ditë mezi i vëreni, ndërsa ditë të tjera nuk mund t’i kontrolloni, kjo lidhet me ushqimin, thekson Ava Safir, duke iu referuar Everyday Health.

Gazrat e shpeshtë zakonisht shoqërojnë ushqimet e pasura me karbohidrate fermentuese, si fasulet, bishtajoret, alkoolët e sheqerit, ushqimet me FODMAP të larta, ose intoleranca ndaj laktozës ose fruktozës.

– Nëse rritni marrjen e fibrave, mos u shqetësoni; gazrat shtesë zakonisht janë të përkohshëm. Fryrja kthehet në normale brenda dy deri në gjashtë javësh pas rritjes së fibrave, shpjegon dr. Vishnumohan. Gazrat e vazhdueshëm, veçanërisht me diarre dhe humbje të pavullnetshme peshe, janë sinjal për konsultë mjekësore.

Si ndihen gazrat në bark

Simptomat ndryshojnë në varësi të dietës dhe gjendjes shëndetësore. Më të shpeshtat janë:

Gromësitja: lirimi i gazrave nga stomaku përmes gojës

Fryrja: ndjesi mbushjeje ose tensioni në bark

Flatulenca: lirimi i gazrave përmes anusit

Dhimbja: gazi i grumbulluar ose “i bllokuar” mund të shkaktojë dhimbje

Ndjesia në bark para dhe pas lirimit të gazrave mund të tregojë shumë për shëndetin e sistemit tretës. Pak parehati është normale, por dhimbja e fortë ose e zgjatur nuk duhet injoruar.

Ngërçet, dhimbja e fortë ose ndjesia e “bllokimit” mund të tregojnë:

tretje të ngadaltë,

kapsllëk,

ndjeshmëri të shtuar të zorrëve (hipersensitivitet visceral),

ose probleme me tretjen e disa karbohidrateve.

Kur gazrat janë arsye për shqetësim

Ekspertët paralajmërojnë për disa shenja që kërkojnë vlerësim mjekësor:

Gjak në jashtëqitje: i kuq ose i errët, kërkon kontroll urgjent

Simptoma që përkeqësohen vazhdimisht: fryrja, ngërçet ose gazrat që nuk zhduken mund të tregojnë çrregullime të rënda të tretjes

Dhimbje barku: gazrat nuk duhet të shkaktojnë dhimbje të forta; nëse ndodh, mund të jetë shenjë e SIBO-s ose intolerancave ushqimore

Humbje peshe pa arsye ose mungesë oreksi: mund të tregojë thithje të pamjaftueshme të lëndëve ushqyese

Ndryshime të pashpjeguara dhe të qëndrueshme: nëse nuk normalizohen pavarësisht rutinave të qëndrueshme, kërkojnë vlerësim mjekësor

Sinjali – aty ku e vërteta flet para lajmit!

/GazetaSinjali/

The post Gazrat: Çfarë tregojnë për shëndetin e sistemit tretës appeared first on Sinjali.

Në Abu Dabi takohen këtë të mërkurë përfaqësuesit e Ukrainës, Rusisë dhe Shteteve të Bashkuara, në raundin e dytë të takimit trilateral, që për herë të parë ka bërë bashkë Moskën dhe Kievin nën ndërmjetësimin e Uashingtonit.

Ky proces diplomatik synon një zgjidhje për luftën gati katërvjeçare, por atmosfera mbetet tejet e rënduar.

Raundi i dytë zhvillohet pas rifillimit të sulmeve masive ruse ndaj sektorit energjetik në Ukrainë të martën, ku mbi 500 dronë dhe raketa lanë Kievin pa ngrohje në temperatura -20 gradë. Ukraina u kundërpërgjigj mëngjesin e kësaj të mërkure me të njëjtën monedhë, duke goditur infrastrukturën në Belgorod të Rusisë dhe duke zhytur në errësirë pjesë të rëndësishme të këtij rajoni kufitar.

Pas këtij sulmi, presidenti ukrainas paralajmëroi rishikimin e qëndrimeve, por pa sqaruar për çfarë bëhet fjalë.

Në tryezë sot diskutohen pikat më të nxehta të planit amerikan: “ngrirja” e frontit aktual dhe garancitë e sigurisë. Pavarësisht optimizmit të Donald Trampit, negociatat kanë mbetur pezull te çështja e territorit, ku palët nuk heqin dorë nga kushtet e veta. Rusia kërkon tërheqjen e plotë të forcave ukrainase nga gjithë rajoni i Donbasit, ndërsa Kievi refuzon kategorikisht lëshimet territoriale.

Ukraina pranoi formulën që Shtetet e Bashkuara dhe vendet evropiane të jenë garantorë të sigurisë së vendit pas vendosjes së paqes në rast sulmi të Rusisë, përmes krijimit të një force të reagimit të shpejtë të këtyre vendeve, për të ndërhyrë në mbrojtje brenda të paktën 24 orëve.

Sinjali – aty ku e vërteta flet para lajmit!

/GazetaSinjali/

The post Rusia, Ukraina dhe SHBA-ja zhvillojnë takim sot në Abu Dabi appeared first on Sinjali.

Në Mitrovicë është vendosur një pllakë përkujtimore në nderim të viktimave të natës së tmerrit, që ndodhi më 26 vite më parë, në mes të 3 dhe 4 shkurtit të vitit 2000.

Kryetari i Komunës së Mitrovicës së Jugut, Faton Peci, ka deklaruar se vendosja e kësaj pllake ka për qëllim që të mos harrohet sakrifica dhe gjaku i derdhur i qytetarëve, edhe pas çlirimit të Kosovës dhe gjatë kohës kur në vend ishte i pranishëm KFOR-i.

Në ceremoninë e vendosjes së pllakës morën pjesë deputetë të zgjedhur të Kuvendit të Republikës së Kosovës dhe përfaqësues të ekzekutivit komunal. Peci tha se ky akt ka për qëllim shënimin e një date të rëndë historike, gjatë së cilës u vranë 10 qytetarë shqiptarë, u plagosën 25 të tjerë dhe rreth 12 mijë shqiptarë të pjesës veriore të Mitrovicës u dëbuan dhunshëm nga regjimi gjenocidal i Sllobodan Millosheviqit dhe pasuesit e tij.

“Ne sot, në pjesën e urës së re për këmbësorë, e cila kontribuon në paqe, stabilitet dhe lëvizje më të lirë në Mitrovicë, duam të përcjellim një mesazh të qartë: se normaliteti dhe liria në veri të Kosovës, fatkeqësisht, janë paguar me jetën e qytetarëve civilë të pafajshëm, përfshirë pleq dhe fëmijë”, ka deklaruar Peci.

Sinjali – aty ku e vërteta flet para lajmit!

/GazetaSinjali/

The post Përurohet pllaka përkujtimore për viktimat e ‘Natës së Tmerrit’ në Mitrovicë appeared first on Sinjali.

Autoriteti i Konkurrencës ka vendosur pezullimin e përkohshëm të Gresa Latifit, e cila ka shërbyer si inspektore hetuese në Divizionin e Marrëveshjeve të Ndaluara të Departamentit të Mbikëqyrjes së Tregut, raporton Gazeta Sinjali.

Vendimi hyn në fuqi nga 3 shkurt 2026 dhe do të zgjasë deri më 4 mars 2026.

Komisioni Disiplinor ka nisur procedurën pas një kërkese të Drejtorit të Përgjithshëm, Selajdin Beqa, për shkelje të rënda disiplinore.

Sipas vendimit që siguruar Sinjali, Komisioni ka vlerësuar se Latifi ka shfaqur sjellje të papërshtatshme dhe ka përdorur gjuhë dhe ton provokues e joprofesional në komunikimet zyrtare.

Ajo po ashtu akuzohet për insinuata ndaj autoritetit drejtues dhe vendimmarrjes institucionale, cenim të rendit administrativ dhe disiplinës në institucion, si dhe tejkalim të kompetencave funksionale dhe mosrespektim të hierarkisë.

Komisioni ka vlerësuar se vazhdimi i ushtrimit të detyrës nga Latifi ka penguar hetimin disiplinor, ndaj vendosi pezullimin përkohshëm deri në marrjen e vendimit përfundimtar.

Gresa Latifi ka qenë gjithashtu kandidate e Lëvizjes Vetëvendosje për Asamblenë Komunale të Prishtinës.

Sinjali – aty ku e vërteta flet para lajmit!

/GazetaSinjali/

The post Inspektorja Gresa Latifi, pezullohet për sjellje joprofesionale nga Autoriteti i Konkurrencës appeared first on Sinjali.

Gazeta Sinjali ka mësuar se 30 persona do të intervistohen lidhur me dyshimet për manipulime me vota në komunën e Deçanit dhe Junikut.

Ndërkohë, Prokuroria, përmes një komunikate për media, ka njoftuar se nga dita e sotme ka filluar procesi i intervistimit të komisionarëve lidhur me dyshimet për keqpërdorime gjatë procesit të numërimit të votave të kandidatëve të subjekteve politike, me qëllim të sqarimit dhe zbardhjes së plotë të të gjitha rrethanave të këtij rasti.

Autorizimi i parë për ndërmarrjen e veprimeve hetimore është lëshuar më 19 janar nga Kryeprokurorja e Prokurorisë Themelore në Pejë, Lumturije Vuçetaj, ndërsa veprimet e mëtejshme hetimore po ndërmerren me autorizimet e prokurorëve të caktuar nga Kryeprokurorja, në koordinim të ngushtë me Hetimet Rajonale të Policisë së Kosovës në Pejë.

Sinjali – aty ku e vërteta flet para lajmit!

/GazetaSinjali/

The post 30 persona do të intervistohen për manipulime me vota në Deçan e Junik appeared first on Sinjali.

Ish-i dërguari i Bashkimit Evropian për dialogun Kosovë – Serbi, Miroslav Lajçak, mund të humbasë titullin e nderit që i është dhënë nga Universiteti i Malit të Zi, pas zbulimeve mbi lidhjet e tij me abuzuesin seksual Jeffrey Epstein.

Sipas Radiotelevizionit të Malit të Zi, Universiteti po shqyrton ndryshime në rregulloret që rregullojnë jo vetëm dhënien, por edhe mundësinë e heqjes së titujve të nderit në rrethana të jashtëzakonshme, duke marrë si shembull rastin e Lajçakut.

Diplomati sllovak u nderua në vitin 2019 me titullin “Doktor Honoris Causa” nga rektori i atëhershëm i Universitetit, Danilo Nikoliq, ndërsa Lajçaku ishte ministër i Jashtëm i Sllovakisë. Universiteti e kishte nderuar atë për promovimin e vlerave të proceseve demokratike dhe tolerancës multikulturore, kontributin në zhvillimin e marrëdhënieve ndërkombëtare dhe forcimin e bashkëpunimit ndëruniversitar midis Malit të Zi dhe Sllovakisë.

Megjithatë, Lajçaku është përmendur në shënimet dhe dokumentet që lidhen me Jeffrey Epsteinin, duke sugjeruar se ai mund të ketë pasur marrëdhënie të afërta me abuzuesin. Lajçaku ka mohuar vazhdimisht çdo përfshirje në krimet e Epsteinit, duke deklaruar se nuk ka vizituar kurrë ishullin ku Epstein dhe bashkëpunëtorja kryesore, Ghislaine Maxwell, rekrutonin dhe abuzonin seksualisht me vajza të mitura.

Përballë këtyre aludimeve, Lajçaku vendosi të japë dorëheqje nga pozita e këshilltarit të kryeministrit sllovak Robert Fico, dorëheqje e cila u pranua, megjithëse Fico deklaroi se nuk beson se Lajçaku ka qenë i përfshirë në krime.

Nga viti 2020 deri në vitin 2025, Lajçaku shërbeu si i dërguar i posaçëm i Bashkimit Evropian për dialogun ndërmjet Serbisë dhe Kosovës.

Sinjali – aty ku e vërteta flet para lajmit!

/GazetaSinjali/

The post Pas aferës Epstein, Mali i Zi do t’ia heqë titullin e nderit Lajçakut appeared first on Sinjali.

Nëna e këngëtares së njohur shqiptare, Beatrix Ramosaj, është diagnostikuar me kancer dhe ka nisur tashmë trajtimin mjekësor.

Artistja e ka ndarë këtë moment të ndjeshëm me ndjekësit përmes një postimi prekës në InstaStory, ku ka shprehur forcën, dashurinë dhe mirënjohjen e saj ndaj së ëmës.

“Nuk jam aty për të ta mbajtur dorën tani, por po të mbaj me gjithë zemrën time, mami. Çdo frymëmarrje, çdo minutë”, shkruan Beatrix.

Ajo ka bërë të ditur se një tjetër hap i rëndësishëm i trajtimit është përfunduar me sukses, duke shprehur krenarinë për forcën e së ëmës.

“Një tjetër hap i madh u përfundua sot. Jam kaq krenare për forcën tënde, mama. Çdo ditë një hap më afër”, shton këngëtarja.

Beatrix gjithashtu falënderon të gjithë ata që po i qëndrojnë pranë familjes në këtë periudhë të vështirë:

“Mirënjohëse për çdo mesazh, çdo lutje, çdo fjalë të mirë. Faleminderit që na rrethoni me kaq shumë dritë”.

Në fund, ajo kërkon mirëkuptim për mungesën e përgjigjeve personale, duke theksuar se mbështetja e publikut është shumë e rëndësishme për të.

“Më falni nëse nuk mund t’u përgjigjem të gjithëve tani, por mbështetjen tuaj e mbaj me vete”, përfundon Beatrix Ramosaj.

Sinjali – aty ku e vërteta flet para lajmit!

/GazetaSinjali/

The post Beatrix Ramosaj flet për betejën e nënës së saj me kancerin: Po të mbaj me gjithë zemrën time appeared first on Sinjali.

Drejtori i Përgjithshëm i Policisë së Kosovës, Gazmend Hoxha, në prezantimin e punës vjetore të Policisë rajonale të Prishtinës, ka bërë të ditur se nga viti 2000 deri më sot në rrugët e Kosovës kanë humbur jetën mbi 3 mijë njerëz.

Ai ka theksuar se problemet që kanë shënuar rritje janë rastet me fatalitet në trafik, dhe jo vetëm në Prishtinë, por gjithandej Kosovës. Sipas tij, numri i personave të vdekur në trafik ka shënuar rritje, duke kaluar mbi 100 persona, krahasuar me 89 që ishin në vitin 2024.

“Kosova që nga viti 2000 deri më sot i ka humbur mbi 3,111 njerëz në trafik. Është një numër i madh i jetëve të humbura në trafik dhe një prej prioriteteve ka me qenë siguria në trafik. Por që këtë punë policia nuk mund ta bëjë e vetme, na duhet mbështetja e komunave, e Ministrisë së Infrastrukturës dhe e gjithë shoqërisë, sidomos te vetëdijesimi i njerëzve, pastaj deri te marrja e patentëshoferëve dhe kontrolli i shtuar në rrugë”, ka thënë Hoxha.

Ai ka numëruar disa nga faktorët që kanë ndikuar në rritjen e problemeve në trafik, duke përmendur numrin e madh të njerëzve që kanë vizituar Kosovën.

“Disa prej faktorëve që kanë ndikuar të kemi më shumë probleme në trafik gjatë vitit që shkoi ka qenë numri i madh i njerëzve që kanë qarkulluar në rrugët tona, dhe po ashtu numri i madh i njerëzve që kanë hyrë në kufijtë e Kosovës. Kemi pasur një rritje me miliona njerëz, rreth 2-3 milionë që kanë hyrë në territorin tonë. Po ashtu është rritur numri i veturave të regjistruara dhe i patentëshoferëve. Në vitin 2011, Kosova ka pasur rreth 400 mijë patentëshoferë, ndërsa sot i kemi 900 mijë”, tha Hoxha.

Ai ka vlerësuar se në Prishtinë ka pasur rënie të rasteve të vrasjeve, grabitjeve, vjedhjeve të rënda dhe të dhunës në familje.

Sinjali – aty ku e vërteta flet para lajmit!

/GazetaSinjali/

The post Shqetësuese: Mbi 3 mijë persona vdiqën në aksidente trafiku që nga viti 2000 në Kosovë appeared first on Sinjali.

Ushqimet shumë të përpunuara duhet të trajtohen më shumë si duhan sesa si ushqim, sugjeron një studim i ri.

Sipas një raporti të publikuar në revistën shkencore “Milbank Quarterly”, ushqimet ultra të përpunuara (UPF) kanë më shumë ngjashmëri me cigaret sesa me frutat apo perimet dhe kërkojnë rregullim shumë më të rreptë, ka raportuar “The Guardian”.

Studiues nga Harvard, Universiteti i Michiganit dhe Duke kanë theksuar se këto produkte janë krijuar qëllimisht për të nxitur varësi dhe konsum të tepruar, ashtu si duhani.

Në këtë kategori përfshihen pijet e gazuara, patatinat, biskotat dhe ushqimet e paketuara industrialisht, shpesh me ngjyrues dhe aromë artificiale.

Sipas studimit, si cigaret ashtu edhe ushqimet ultra të përpunuara janë dizajnuar për të vepruar shpejt në mekanizmat në tru dhe për ta rritur dëshirën për konsum të vazhdueshëm.

“Shumë ushqime ultra të përpunuara kanë më shumë karakteristika të përbashkëta me cigaret sesa me ushqimet minimale të përpunuara dhe për këtë arsye duhet të rregullohen në përputhje me rreziqet serioze që paraqesin për shëndetin publik”, thuhet në raport.

Profesoresha, Ashley Gearhardt, psikologe klinike dhe një nga autoret e studimit, ka thënë se pacientët e saj shpesh i krahasojnë këto ushqime me varësinë nga duhani.

“Ata më thonë: ‘Ndihem i varur nga këto ushqime. Dikur pija cigare, tani e kam të njëjtin zakon me pijet e gazuara dhe ëmbëlsirat. E di që po më dëmtojnë, dua të ndalem, por nuk mundem’”, ka shpjeguar ajo.

Autorët kritikojnë edhe mënyrën e marketingut të këtyre produkteve, duke thënë se etiketime si “pa sheqer” apo “me pak yndyrë” janë forma të marketingut, të ngjashme me filtrat e cigareve në vitet ‘50, që reklamohej se mbronin shëndetin, por në praktikë nuk kishin përfitime reale.

Studiuesit theksojnë se ndryshe nga duhani, ushqimi është i domosdoshëm për jetesë, gjë që e bën edhe më të vështirë shmangien e këtyre produkteve në mjedisin modern ushqimor.

Ata sugjerojnë që masat kundër ushqimeve shumë të përpunuara të ndjekin shembullin e rregullimit të duhanit, përfshirë kufizimin e marketingut, ndërhyrjet ligjore dhe rritjen e përgjegjësisë së industrisë ushqimore.

“Duhet të kalojmë nga fajësimi i individit, duhet ta mbajmë përgjegjëse industrinë”, thuhet në studim.

Megjithatë, disa ekspertë paralajmërojnë për krahasime të tepruara. 

Profesori Martin Warren nga Quadram Institute ka thënë se mbetet e paqartë nëse ushqimet ultra të përpunuara krijojnë vërtetë varësi në mënyrë biologjike si nikotina, apo nëse ato thjesht shfrytëzojnë zakonet, shijet dhe komoditetin.

Ndërkohë, doktori Githinji Gitahi nga Amref Health Africa paralajmëron se mungesa e rregullimit shtetëror, sidomos në vendet në zhvillim, po ushtron presion të madh mbi sistemet shëndetësore.

“Pa ndërhyrje publike kundër sëmundjeve kronike, rrezikojmë kolapsin e sistemeve shëndetësore”, ka thënë ai.

Sinjali – aty ku e vërteta flet para lajmit!

/GazetaSinjali/

The post Studimi sugjeron: Ushqimet e përpunuara duhet të trajtohen më shumë si cigare sesa si ushqim appeared first on Sinjali.

Tre persona janë arrestuar nga Prokuroria Speciale e Republikës së Kosovës nën dyshimin për krim të organizuar, raporton Gazeta Sinjali.

Të dyshuarit F.M., V.M. dhe A.D. po hetohen për veprat penale “Pjesëmarrja ose organizimi i grupit kriminal të organizuar”, në lidhje me veprat penale “Mashtrimi” dhe “Hyrjen në sistemet kompjuterike”, sipas nenit 327, paragrafi 2 të KPRK-së.

Sipas hetimeve që po zhvillohen në koordinim me Policinë e Kosovës, rasti ka edhe elemente ndërkombëtare. Të pandehurit dyshohet se nga viti 2021 e tutje, në bashkëkryerje me persona të tjerë, kanë paraqitur në mënyrë të rreme se punonin në banka.

Dyshimet përfshijnë mashtrimin, prezantimin e rremë, vjedhjen e identitetit dhe kredencialeve, si dhe shpëlarjen e parave me qëllim përfitimi të drejtpërdrejtë financiar.

Gjatë zbatimit të urdhërit të kontrollit janë sekuestruar prova materiale, përfshirë telefona, laptopë dhe para të gatshme në vlerë prej 11.756 euro, njofton sistemi prokurorial.

Sinjali – aty ku e vërteta flet para lajmit!

/GazetaSinjali/

The post U paraqitën si punëtorë bankash, tre të arrestuar për krim të organizuar në Prishtinë – sekuestrohen mbi 11 mijë euro appeared first on Sinjali.

Pas prishjes së koalicionit në Komunën e Mitrovicës, kryetari Faton Peci ka reaguar ndaj vendimit të Lidhjes Demokratike të Kosovës (LDK), e cila ka njoftuar daljen nga bashkëqeverisja me komunën që ai udhëheq.

Ai ka ironizuar reagimin e LDK-së duke thënë shkurt: “Me 3% nuk punon as iPhone-i”.

Ndërkohë LDK-ja, përmes një njoftimi të Degës së saj në Mitrovicë në Facebook, ka bërë të ditur se vendimi për dalje nga koalicioni erdhi për shkak të “mosrespektimit të marrëveshjes për bashkëqeverisje dhe shpërfilljes së propozimeve zyrtare të Degës së LDK-së”.

“Emërimi i Drejtorit të Drejtorisë për Kulturë, Rini dhe Sport, i realizuar në mënyrë të njëanshme dhe pa asnjë paralajmërim nga Kryetari Peci, është në kundërshtim të plotë me dakordimet paraprake si dhe me propozimet e miratuara nga organet e LDK-së në Mitrovicë. Për këtë arsye, sqarojmë se ky emërim nuk e përfaqëson LDK-në dhe as Degën e saj në Mitrovicë. Ky vendim është obligativ për të gjithë anëtarët e LDK-së në Mitrovicë, përfshirë edhe delegatët e LDK-së në Kuvendin Komunal të Mitrovicës”, thuhet në njoftim.

LDK në Mitrovicë largohet nga koalicioni me Pecin

Sinjali – aty ku e vërteta flet para lajmit!

/GazetaSinjali/

The post Koalicioni me LDK-në në Mitrovicë, Peci ‘godet’: Me 3% nuk punon as iPhone appeared first on Sinjali.

Të paktën 17 persona kanë humbur jetën në Gazë të mërkurën pas një sulmi izraelit, i cili, sipas ushtrisë izraelite, ishte kryer si përgjigje ndaj plagosjes së një ushtari të saj nga militantët palestinezë.

Mes të vrarëve janë shumica gra dhe fëmijë, raporton agjencia AP. Këto janë viktimat më të fundit palestineze që nga hyrja në fuqi e armëpushimit më 10 tetor 2025, i cili ka pësuar shkelje nga sulmet vdekjeprurëse izraelite.

Ministria e Shëndetësisë në Gazë bën të ditur se më shumë se 530 palestinezë janë vrarë nga sulmet izraelite që kur marrëveshja ka hyrë në fuqi.

Ndërmjetësit e armëpushimit kanë dënuar sulmet, ndërsa Hamasi i ka cilësuar ato si shkelje të marrëveshjes. Ushtria izraelite, megjithatë, thotë se po i përgjigjet sulmeve militante të Hamasit ose shkeljeve që kanë rrezikuar ushtarët e saj.

Që nga hyrja në fuqi e armëpushimit, të paktën tre ushtarë izraelitë kanë humbur jetën.

Sinjali – aty ku e vërteta flet para lajmit!

/GazetaSinjali/

The post Të paktën 17 të vdekur në Gazë pas sulmit izraelit, shumica e viktimave gra e fëmijë appeared first on Sinjali.

Lidhja Demokratike e Kosovës (LDK), Dega në Mitrovicë, ka njoftuar opinionin publik për daljen e saj nga koalicioni qeverisës në Komunën e Mitrovicës.

Sipas Gezim Plakollit, ky vendim ka ardhur pas veprimeve të njëanshme të kryetarit të komunës, sidomos pas emërimit të Drejtorit të Drejtorisë për Kulturë, Rini dhe Sport pa konsultim me LDK-në.

“Emërimi i Drejtorit të Drejtorisë për Kulturë, Rini dhe Sport, i realizuar në mënyrë të njëanshme dhe pa asnjë paralajmërim nga Kryetari Peci, është në kundërshtim të plotë me dakordimet paraprake si dhe me propozimet e miratuara nga organet e LDK-së në Mitrovicë. Për këtë arsye, sqarojmë se ky emërim nuk e përfaqëson LDK-në dhe as Degën e saj në Mitrovicë. Ky vendim është obligativ për të gjithë anëtarët e LDK-së në Mitrovicë, përfshirë edhe delegatët e LDK-së në Kuvendin Komunal të Mitrovicës”, ka thënë ai.

Sinjali – aty ku e vërteta flet para lajmit!

/GazetaSinjali/

The post LDK në Mitrovicë largohet nga koalicioni me Pecin appeared first on Sinjali.