E ardhmja e Jean-Philippe Mateta është kthyer në një mister të vërtetë në orët e fundit të merkatos.

Edhe pse sulmuesi i Crystal Palace dukej shumë pranë Milanit, operacioni ka ndalur për shkak të dyshimeve mbi gjendjen fizike të lojtarit.

Stafi mjekësor i kuqezinjve ka udhëtuar drejt Londrës për të vlerësuar gjurin e francezit, pasi raportimet e fundit tregojnë se ai mund të ketë nevojë për një ndërhyrje kirurgjikale.

Ky hezitim i Milanit ka rikthyer në garë Juventusin.

Bardhezinjtë janë në kërkim të një sulmuesi dhe për këtë janë gati të tejkalojnë ofertën e Milanit, e cila ishte 30 milionë euro.

Edhe pse agjenti i lojtarit ndodhet në Milano, gjithçka mbetet e hapur deri në momentin e fundit të merkatos.

Befasi në Arabinë Saudite! Cristiano Ronaldo është i vendosur që të mungojë në ndeshjen e radhës së Al Nassr, e planifikuar për këtë të hënë kundër Al-Riyadh, e vlefshme për javën e 20-të të kampionatit saudit.

Motivi nuk ka të bëjë me gjendjen fizike të lojtarit, duke marrë në konsideratë duelin kundër kampionëve të Al Ittihad, të drejtuar nga Sergio Conceiçao, që do të zhvillohet të premten e ardhshme.

Gazeta sportive portugeze “A Bola” raporton se arsyeja, ndryshe nga sa ishte raportuar fillimisht nga shtypi saudit, nuk ka të bëjë aspak me gjendjen fizike të sulmuesit portugez.

Ronaldo është i pakënaqur me menaxhimin që Fondi Publik i Investimeve i Arabisë Saudite po ndjek në klubin që ai përfaqëson prej tre vitesh. Kjo ka të bëjë veçanërisht me diferencimin në trajtim që po u bëhet rivalëve të Al Hilal të Simone Inzaghit, të cilët gjithashtu menaxhohen nga i njëjti fond.

Ronaldo ankohet për një “mungesë investimesh” te Al Nassr.

Trajneri Jorge Jesus nuk ka marrë përforcimet që ka kërkuar dhe prova për këtë është fakti se i vetmi lojtar i afruar në këtë merkato dimërore ka qenë Haydeer Abdulkareem, një mesfushor irakian 21-vjeçar.

Shqipëria ka përgatitje nën nivelin bazë dhe shumë më pas rajonit në përshtatjen e sistemit të saj arsimor dhe tregut të punës me tranzicionin e gjelbër.

Fondacioni Europian për Trajnimet që kujdeset për kapitalin njerëzor jashtë BE-së e vlerësoi Shqipërinë negativisht në përgatitjen e forcës punëtore për ekonominë e gjelbër.

Tranzicioni me karbon të ulët po riformëson ekonomitë në të gjithë fqinjët e BE-së dhe Azinë Qendrore. Ndërsa sistemet e energjisë ndryshojnë, industritë po përshtaten dhe komunitetet po përjetojnë ndryshime të thella në punë.

Raporti i Fondacionit Europian të Trajnimit “Fuqizimi i Tranzicionit të Drejtë në Fqinjët e BE-së dhe Azinë Qendrore” për 25 vende, mes tyre edhe Ballkani Perëndimor, vlerëson se Shqipëria nuk është as në fazat e para të përgatitjes dhe në këtë mënyrë rrezikon t’i lërë punëtorët dhe komunitetet të papërgatitura për tranzicionin.

Shqipëria rezulton pozitivisht vetëm në dy kriteret e para, që lidhen me njohjen e përgjithshme të ndikimeve sociale dhe të punësimit nga ndryshimet klimatike dhe me përmendjen e nevojave të reja apo në ndryshim të fuqisë punëtore për shkak të tranzicionit të gjelbër.

Dokumentet strategjike shqiptare e pranojnë në parim se tranzicioni klimatik ka pasoja sociale dhe kërkon përshtatje të tregut të punës, por nuk ka asnjë planifikim dhe zbatim praktik.

Në pothuajse të gjitha kriteret e tjera, Shqipëria vlerësohet negativisht. Analiza tregon se Shqipëria nuk i referohet nevojës për rikualifikim apo përmirësim aftësish të punëtorëve në sektorët që preken nga tranzicioni i gjelbër, nuk e trajton rolin e arsimit dhe zhvillimit të aftësive si instrument për parashikimin e nevojave të tregut të punës dhe nuk identifikon grupe specifike që kanë nevojë për mbështetje të synuar, si të rinjtë, gratë, migrantët apo personat me aftësi të kufizuara.

Tranzicioni i gjelbër në dokumentet shqiptare konceptohet kryesisht si një proces mjedisor dhe teknik, jo si një transformim socio-ekonomik.

Gjithashtu Shqipëria nuk parashikon as buxhete konkrete apo angazhime financiare për investime në aftësi dhe trajnime në kuadër të tranzicionit të gjelbër, as role të qarta institucionale për ministritë apo agjencitë përgjegjëse. ETF vë në dukje se nuk ka një arkitekturë politike dhe institucionale që ta lidhë tranzicionin klimatik me zhvillimin e kapitalit njerëzor.

Në krahasim me vende si Mali i Zi, Maqedonia e Veriut apo Serbia, që shfaqin më shumë elemente pozitive ose pjesërisht të përfshira, Shqipëria del si një nga vendet më pak të përgatitura në aspektin social të tranzicionit të gjelbër./Monitor

Ish-deputeti Ervin Salianji vijon turin e takimeve të tij me demokratët në të gjithë vendin, në kuadër të komunikimit të drejtpërdrejtë me strukturat dhe mbështetësit e Partisë Demokratike.

Këtë herë, Salianji ka njoftuar në rrjetet sociale se do të zhvillojë një takim në qytetin e Fierit, ku fton gjithë demokratët e zones në një bisedë të hapur. Takimi synon të shërbejë si një hapësirë dialogu mbi situatën politike dhe sfidat aktuale të opozitës dhe veçanërisht Partisë Demokratike.

Aktiviteti do të mbahet të martën, më 3 shkurt, në orën 17:00, në Kinoteatrin e Fierit.

Më poshtë postimi i plotë i Salianjit në rrjetet sociale:

Nesër shihemi në Fier, tek Kinoteatri i qytetit, ora 17:00!
Ta bëjmë Partinë Demokratike fituese. Kjo është arsyeja e takimeve me demokratët në çdo qytet.
Ju pres për të ndarë ide, shqetësime dhe vizionin për Partinë Demokratike.
Shihemi nesër!

Performanca e dobët në punë, ka sjellë shkarkimin nga detyra të Ina Bellos, drejtoreshës së Drejtorisë Rajonale të Tatimeve në Durrës. Ky vendim lidhet me performancën e dobët në drejtimin e institucionit dhe me mosrealizimin e objektivave të vendosura nga administrata qendrore tatimore.

Drejtoria Rajonale e Tatimeve në Durrës konsiderohet një nga strukturat më të rëndësishme në vend, për shkak të volumit të lartë të aktivitetit ekonomik dhe peshës që ka në mbledhjen e të ardhurave buxhetore.

Pikërisht për këtë arsye, çdo problem në drejtimin e saj reflektohet drejtpërdrejt në rezultatet financiare dhe në funksionimin e administratës tatimore në terren.

Sipas burimeve, gjatë periudhës së drejtimit të Ina Bellos janë konstatuar mangësi në arritjen e treguesve të performancës, në menaxhimin e burimeve njerëzore dhe në eficiencën e kontrolleve tatimore. Këto elemente kanë çuar në vlerësimin se drejtoria nuk ka funksionuar në nivelin e pritshëm.

Largimi i saj vjen në një kohë kur administrata tatimore është nën presion për të rritur të ardhurat, për të luftuar informalitetin dhe për të garantuar trajtim të barabartë për biznesin. Në këtë kontekst, ndryshimet në drejtimin e strukturave rajonale shihen si pjesë e një procesi më të gjerë riorganizimi dhe rritjeje të kontrollit mbi performancën e drejtuesve.

Burimet thanë se Ina Bello u katapultua si drejtoreshë Tatimesh në Durrës, pasi u keqpërdor për të goditur biznese të caktuara. Bello iu shërbeu eprorëve të saj, duke keqpërdorur funksionin si inspektore në Tatimet e Tiranës dhe për këtë keqpërdorje u shpërblye me postin e drejtoreshës së Tatimeve në Durrës.

Por, mesa duket, shërbimi dhe keqpërdorja nuk ishin të mjaftueshme për t’i garantuar asaj jetëgjatësi në këtë detyrë.

Kryetari i Partisë Demokratike, Sali Berisha, në mbyllje të fjalës së tij para grupit parlamentar ditën e sotme (2 shkurt), tha se misioni i opozitës me protesta do vazhdojë deri në rrëzimin e diktaturës së instaluar nga Edi Rama dhe deri në rikthimin e votës së lirë.

Teksa akuzoi mazhorancën dhe qeverinë për skandalet e panumërta, përfshi dy më të mëdhatë me zv/kryeministren Belinda Balluku dhe AKSHI, ai shtoi se “e gjithë Evropa dhe Bota po pret protestën tonë”.

“E gjithë Evropa pret protestën tonë. E gjithë bota pret protestën tonë. I kanë përcjellë protestat me interesin maksimal, ndaj edhe ne do vazhdojmë misionin, misionin e përmbysjes së kësaj diktature dhe rikthimit të votës së lirë të shqiptarëve”, u shpreh kreu i selisë blu gjatë mbledhjes.

Opozita sot bojkotoi Reformën Territoriale, teksa mazhoranca ka paralajmëruar se do prishi parimin e paritetit në seancën e nesërme të Kuvendit, ku pritet të marrë shumicën.

Berisha tha se Ergys Agasi i Policisë është Ilir Proda, i zgjedhur nga krimi i organizuar dhe përfaqësues i tyre.

Ai foli për “kryengritje paqësore”, ndërsa nxiti drejtësinë për hetime të thelluara dhe veprime më të forta.Berisha theksoi rëndësinë e komunikimit të drejtpërdrejtë me qytetarët përmes bisedave, sqarimeve dhe debateve, duke akuzuar qeverinë për përdorim të propagandës. Berisha e cilësoi këtë propagandë si “toksike”, ndërsa mediat që, sipas tij, mbështesin qeverinë, i akuzoi për “glorifikim të skajshëm”.

“Duhet t’i kundërvihemi propagandës në takime me qytetarët dhe të denoncojmë propagandën e turpshme të mediave që paguhen nga qeveria”, tha Berisha, duke kërkuar mobilizim maksimal të strukturave të PD-së në ditët në vijim.

Kryetari i Partisë Demokratike, Sali Berisha theksoi se dosja në ngarkim të zëvendës kryeministres dhe ministres së Infrastrukturës dhe Energjisë Belinda Balluku, ka vetëm një zgjidhje, dorëheqjen e Edi Ramës.

Në mbledhjen e Grupit Parlamentar të PD-së, Berisha e cilësoi Ramën si  “arkitektin” e sistemit të korrupsionit në vend, por sipas tij, sikurse në diktaturë, drejtësia nuk mund t’u afrohet për ta hetuar.

“Java fillon në kushtet e një diktature në të cilën de facto Edi Rama ka asgjësuar drejtësinë, ka asgjësuar institucionin e akuzës për faktin e vetëm sepse nga ky institucion, një prokuror guxoi të hetojë dosjen e tij. Çdo orë, çdo ditë që kalon për çdo shqiptar bëhet e qartë se dosja Balluku është dosja Rama.

Dhe se dosja Balluku ka vetëm një zgjidhje, dorëheqjen e Ramës. Dhe ajo që është pozitive, është se këtë e ka kuptuar çdo shqiptar. Unë e vlerësoj shumë punën që keni bërë ju me zgjedhësit, përpjekjet tuaja, takimet e rëndësishme dhe përpjekjet serioze, por u garantoj se zemërimi i qytetarëve po shkon në përmasa të papërmbajtura. Ka një revoltë të brendshme shpirtërore tek njerëzit e thjeshtë, të cilët e shohin se edhe ajo shpresë që kishin tek drejtësia për ndëshkimin e korrupsionit, u shua.

Ata kuptuan se shkaku, autori, arkitekti i sistemit të korrupsionit në Shqipëri e ka emrin Edi Rama. Ata kuptuan se njëlloj si në një diktaturë, drejtësia nuk mund t’i afrohet atij.
Qytetarët po e kuptojnë, dhe e kanë kuptuar, se vjedhja e pasurive të tyre dhe fondeve publike për Edi Ramën është një normalitet. E konsideron veten si padron të tyre. Javën e kaluar Edi Rama u damkos në këshillin e Evropës.

Para asaj audience në të cilën përfaqësohen të gjitha parlamentet e Evropës, vendeve anëtare të BE, NATO-s e vendeve të tjera, mund t’u pohoj me garanci të plotë se balozi i zi, personazhi më i zi, në këtë sesion ishte Edi Rama.”, u shpreh Berisha.

Seanca paraprake gjyqësore për çështjen që lidhet me kryebashkiakun e Tiranës, Erion Veliaj është shoqëruar me debate.

Gjatë seancës, avokatja e caktuar kryesisht, Valentina Teodoresku, ka kërkuar sërish kohë për t’u njohur me aktet e dosjes, duke argumentuar se nuk ka pasur mundësi të plotë për shqyrtimin e materialeve proceduriale.

Nga ana tjetër, avokati i Veliajt, Artan Gjermeni, ka kërkuar që gjykata të marrë një vendim të qartë lidhur me atë se kush duhet të paraqesë konkluzionet përfundimtare,  avokatja kryesisht apo avokati i zgjedhur më herët nga vetë Veliaj.

Gjermeni ka theksuar se, ndonëse mandati i tij është revokuar nga klienti, ai mbetet i detyruar procedurialisht të paraqitet në gjykatë deri në momentin që avokatja kryesisht të marrë zyrtarisht funksionet.

Pas debateve mes palëve, prokuroria ka kërkuar që procesi të vijojë me dhënien e konkluzioneve përfundimtare. Në këtë moment, avokati Artan Gjermeni është larguar nga salla e gjyqit.

Pas daljes së Gjermenit nga ambientet e gjykatës, është larguar edhe kryebashkiaku Erion Veliaj, i cili ka kërkuar përjashtimin e trupit gjykues, si edhe të avokates kryesisht, Valentia Teodoresku.

Policia italiane ka çmontuar një tjetër grup të trafikut të drogës i përbërë nga ekstrakomunitarë dhe që dyshohet se drejtohej nga shqiptarë.

Një ngarkesë prej 70 kilogramësh hashash të cilësisë së mirë dhe 75 mijë euro cash u sekuestruan, ndërsa në pranga ranë 2 persona; një shqiptar dhe një rumun.

Aktiviteti organizohej kryesisht në banesa dhe në një garazh të kthyer në laborator, ku bëhej përpunimi i saj.

Policia tha se aksioni u shtri kryesisht në Bergamo, por edhe në zonat e Milanos, i nisur prej 26 janarit, ku u krye një tjetër goditje me sasi kanabisi dhe valutë të konsiderueshme të sekuestruar, si dhe 2 shqiptarë të prangosur si përgjegjës.

Një kontroll rutinë u shndërrua në një sekuestrim të madh të shtunën pasdite në zonën Fulvio Testi të Milanos. Oficerët e Stacionit të Policisë Greco Turro ndaluan dy të rinj, një 21-vjeçar dhe një 26-vjeçar me precedentë kriminalë, në Via Giolli, të cilët po drejtonin një makinë me gomë të shpuar. Sjellja e dy burrave dhe disa mospërputhje në shpjegimet e tyre i shtynë oficerët të hetonin më tej.

Një tërmet ka goditur sot brigjet e Greqisë perëndimore, po për fat të mirë pa raportime për të lënduar apo viktima.

Lëkundjet sizmike u regjistruan pranë Kalavryta dhe ishin me magnitudë 3.6 Rihter. Autoritetet thanë se tërmeti ra në orën 12:35 me atë lokale me kishte një thellësi fokale prej 15 km.

Konkretisht, sipas analizës së Institutit Gjeodinamik, tërmeti me magnitudë 3.6 Rihter u përqendrua 9 kilometra në veriperëndim të qytetit të Kalavryta dhe pati një thellësi fokale prej 15.8 km.

Tërmeti u ndje edhe në zona të tjera të Akaisë. Nuk janë raportuar dëme materiale apo të lënduar nga tërmeti.

SPAK ka kaluar për gjykim çështjen e Rexhë Byberajt, kryetari i bashkisë Tropojë. Byberaj dyshohet se ka shpërdoruar më shumë se një herë detyrën, ai do të përballet me togat e Gjykatës së Posaçme.

Kreu i Grupit Parlamentar Taulant Balla në një prononcim për media ka deklaruar se në rast se demokratët nuk reflektojnë dhe nuk marrin pjesë në mbledhjen e Komisionit të Posaçëm të Reformës Territoriale që mbahet ditën e sotme, në seancën e radhës në Kuvend, që mbahet nesër, do të ndërmerren mekanizma për të zhbllokuar situatën.

Kjo nënkupton ndryshimin e përbërjes së komisionit të posaçëm, ku PS do të ketë një anëtar më shumë.

 

Balla: Nuk jam natyra e njerëzve që bëjnë ultimatume por kam bërë një kërkesë për grupin e PD që të reflektojnë për detyrimin për të zbatuar vendimin e Kuvendit për ngritjen e komisionit për Territorialen. Kemi rënë dakord kemi ngritur një komision nën parimin e bashkëdrejtimit dhe barazisë. Çdo shkresë kërkon dy firma nga bashkë kryetarët. 3 muaj që nga ngritja e komisionit, deputetët e PD nuk lejohen nga lidershipi të marrin pjesë në mbledhje.
Besoj që sot në mbledhjen e komisionit jo vetëm deputetët e opozitës të jenë prezent por edhe të marrin detyra që nesër në seancën e Kuvendit të mos jemi të detyruar të vendosim mekanizmat zhbllokues të situatës. Shpresoj në reflektim, por nëse nuk ka dhe Shqipëria është e detyruar të marrë një Reformë të zgjeruar Zgjedhore.

Kryetari i Grupit Parlamentar të PS, Taulant Balla përsëriti qëndrimin se derisa Gjykata Kushtetuese të dalë me një vendim për Ballukun, nuk do të mblidhet Këshilli i Mandateve.

Balla deklaroi se Kuvendi është palë në Gjykatën Kushtetuese dhe nuk mund të mbajnë një qëndrim pa folur ky institucion i drejtësisë.

“Po rikujtoj një diskutim që kemi bërë në Këshillin e Mandateve që kam 100% të drejtë. Sa kohë kuvendi është palë në Gjykatën Kushtetuese në këtë çështje duhet të presë vendimin e GJK. Në vlerësimin tim ky është qëndrimi”, tha Balla për çështjen Balluku.

Partia Socialiste mbledh sot, 2 shkurt, grupin parlamentar. Ky takim vjen një ditë para seancës plenare ku janë përfshirë një sërë projektligjesh, edhe ato për të cilat u kërkua anulimi në seancën e fundit.

Nuk dihet nëse do të jetë i pranishëm kryeministri Edi Rama.

Sa i përket seancës plenare ajo do të zhvillohet ditën e nesërme dhe jo të enjten siç ndodh tradicionalisht pasi një pjesë e madhe e ligjvënësve do të udhëtojnë drejt Shteteve të Bashkuara të Amerikës për t’iu bashkuar mëngjesit të lutjeve.

Gjithsesi sa i përket politikës, të tjera zhvillime ka sot. Pritet që në orën 13:00 të mblidhet Komisioni i Posaçëm i Reformës Territoriale, ku Partia Socialiste do të vendosë në provë gatishmërinë e opozitës për të bashkëpunuar.

Nga ana tjetër, duhet nënvizuar që Kuvendi e ka vendosur në rendin e ditës për seancën plenare të ditës së nesërme ndryshimin e formulës së funksionimit të komisioneve të posaçme.

Në rast se opozita nuk do të paraqitet ditën e sotme në Komisionin e Reformës Territoriale, atëherë ditën e nesërme Partia Socialiste parashikon që të miratojë ndryshimet që i japin asaj shumicën e anëtarësisë dhe rrjedhimisht mundësinë për t’i zhvilluar vetëm të gjitha ndryshimet që mund të bëhen në vijimësi.

Kryetari i Partisë Demokratike, Sali Berisha në një deklaratë për mediat, pasi daljes nga SPAK ku u paraqit në zbatim të masës së sigurisë komentoi vendimin e KLGJ, që nuk pranoi të shqyrtonte çështjen e Irena Gjokës.

Berisha teksa i lexoi me emra anëtarët e KLGJ që votuan të mos pranojnë kërkesën për nisjen e procedurave për gjyqtaren e posaçme Irena Gjoka, i konsideroi ata më kriminelë sesa Irena Gjoka.

“KLGJ me votat e Yllka Rupës, Ridvan Hados, Markelian Koça, Emona Muçi, Klodian Kurushi dhe kreut të tij Ilir Rusi me 6 vota vendosën mos pranimin e nisjes së procedurave për verifikimin dhe shpalljen e papajtueshmërisë së mandatit me famozen Irena Gjoka. Këta janë me kriminelë se vetë Irena, këta janë turpi i zyrtarit. Janë skllevër të këtij regjimi dhe të Edi Ramës”, u shpreh Berisha.

Po ashtu ai denoncoi se Irena Gjoka është e përfshirë në dosjen e Ergys Agasit, ku sipas tij ajo ka hyre e ka dalë në zyrën e tij.

“Sa për dijeni Irena me 5 mbiemra është një shoqe në shpirt me Lindën e Surrelit, përvecse këshilltare e Ergys Agasit. Besoj i keni parë videot në dosjet e Ergys Agasit, sesi serbezja hyn dhe del në zyrën mafioze të Agasit”, deklaroi ndër të tjera Berisha.

Gjithashtu, Berisha tregoi për gazetarët se çfarë pa kur u fut në zyrat e SPAK për të firmosur “detyrimin e paraqitjes”:

“Aty ishte Altin Troplini, i cili ishte ulur me tre personazhe, me Elvis Docin, Altin Hajrin dhe Irenën me 5 mbiemra. SI avokat i tyre po i bënte shpjegim për çështje. Ndodhej ish xhelati Arben Kraja që po numëronte para me Oltion Bistrin. Aty ishin të dy. Këto pashë unë sot”.

Qeveria e kryeministrit francez, Sébastien Lecornu përballet sot  me dy mocione mosbesimi, pasi ai e kaloi buxhetin në Asamblenë Kombëtare pa një votim përfundimtar.

Deputetët e Asamblesë Kombëtare pritet të nisin pasditen e sotmes një debat mbi tërheqjen ose jo të besimit ndaj kabineti të qendrës së majt

Nuk pritet rënia e qeverisë.

Lecornu ka siguruar mbështetjen e socialistëve përmes disa koncesioneve në buxhet.

Nëse qeveria i mbijeton mocioneve të mosbesimit në parlament, buxheti i vitit 2026 konsiderohet i miratuar.

Mocionet e mosbesimit janë kërkuar, nga njëra anë, nga nacionalistët e djathtë të Marine Le Pen, dhe nga ana tjetër nga e majta, të Gjelbrit dhe komunistët.

Përpjekja e tyre për të rrëzuar qeverinë vjen si reagim ndaj faktit që Lecornu e kaloi buxhetin e këtij viti duke përdorur një nen të posaçëm të kushtetutës, pa votim përfundimtar, pas një përpjekjeje të pasuksesshme për kompromis.

Lecornu dhe qeveria e tij kanë mbijetuar tashmë katër mocione mosbesimi javët e fundit, të cilat lidhen me pjesë të buxhetit.

Fakti që Franca, e cila ka një nivel të lartë borxhi, po arrin më në fund të miratojë një buxhet pas një bllokimi politik, pritet të mirëpritet nga bizneset dhe nga partnerët e BE-së, si Gjermania.

Kjo u jep kompanive qartësi për investime dhe punësime, ndërsa edhe sektori publik mund të rifillojë investimet.

Perspektiva që Franca të përballet me problemet e saj të borxhit shihet gjithashtu si një sinjal pozitiv për Bashkimin Evropian.

Shatërvani i Trevit, një nga simbolet më të njohura të Romës dhe një ndalesë e domosdoshme për çdo turist, nuk do të jetë më plotësisht falas për t’u vizituar nga afër.

Duke nisur nga e hëna, 2 shkurt, autoritetet italiane do të aplikojnë një biletë prej 2 eurosh për aksesin pranë monumentit, me qëllim menaxhimin e fluksit të madh të vizitorëve.

Vendimi vjen në një kohë kur Roma, ashtu si Venecia dhe Firence, po përballet me rekorde vizitorësh, duke shkaktuar mbipopullim, rrugë të bllokuara dhe vështirësi për banorët vendas.

Olympique Marseille po jeton ditë tensionesh. Në fillim ishte eliminimi në Ligën e Kampioneve me zërat për largimin e trajnerit De Zerbi, më pas barazimi në kampionat që e largon skuadrën marsejeze nga kreu dhe tani stuhia e polemikave e krijuar për një sherr të mundshëm në stërvitje mes Kondogbia dhe Vermeeren dhe sjelljen e trajnerit italian.

Ky i fundit është përballur ashpër me Amir Murillo, me këtë të fundit i cilësuar përgjegjës për disa gabime të tij që sollën edhe golat e pësuar nga Olympique Marseille në javët e fundit

Sipas asaj që publikohet në median franceze, De Zerbi e transferoi mbrojtësin panamez tek skuadra rezervë dhe i ka kërkuar të largohet nga skuadra brenda kësaj të hënë. Një kërkesë që trajneri ua bëri edhe ‘më të pakënaqurve’ duke iu thënë që t’iu drejtohen agjentëve të tyre për të kërkuar një destinacion të ri.

Kur duhet edhe 1 javë nga zhvillimi Klasikes me Paris Saint Germain, klima e Olympique Marseille është shumë e tendosur dhe këtë të hënë është në program një takim mes grupimeve të tifozëve, drejtuesve të klubut, futbollistëve dhe vetë trajerit De Zerbi, për një moment konfrontimi për të sqatuar tensionet e fundit dhe për t’u përpjekur që të niset gjithçka nga e para.

Vau i Dejës/Vihet në pranga 1 shtetas i shpallur në kërkim në kuadër të operacionit të koduar “Neonët 5”.

Akuzohet si bashkëpuntor për përshtatjen e 2 ambienteve (banesa) për kultivimin e bimëve narkotike, me llamba, në fshatin Barbullush, vihet në pranga 46-vjeçari.

Nga këto 2 ambiente, disa javë më parë, u sekuestruan 583 bimë narkotike kanabis, rreth 7.5 kg kanabis dhe 307 pajisje elektrike që shërbejnë për kultivimin e bimëve narkotike.

Specialistët e Seksionit për Hetimin e Krimeve të Komisariatit të Policisë Vau i Dejës ndaluan shtetasin Gj. G., 46 vjeç, banues në fshatin Barbullush, i shpallur në kërkim në kuadër të operacionit të koduar “Neonët 5”.
Gjykata e Shkallës së Parë e Juridiksionit të Përgjithshëm Shkodër i ka caktuar atij, masën e sigurisë “Arrest në burg”, për veprat penale “Kultivimi i bimëve narkotike”, “Prodhimi dhe shitja e narkotikëve” dhe “Vjedhja e energjisë elektrike ose impulseve telefonike”, të kryera në bashkëpunim.

Vijon puna për kapjen e shtetasve të tjerë të shpallur në kërkim.

Materialet procedurale iu referuan Prokurorisë së Shkodrës, për veprime të mëtejshme.