TIRANË, 2 shkurt/ATSH-Maela Marini/ Mazhoranca do t’i drejtohet nesër Kuvendit me një kërkesë për ndryshimin e formulës së përfaqësimit në komisionin e posaçëm për reformën administrativo-territoriale me synimin për të garantuar një mekanizëm zhbllokues, në kushtet kur opozita nuk merr pjesë në punimet e komisionit.

Dita e sotme ishte afati i fundit që i ishte vendosur opozitës nga anëtarët e mazhorancës në këtë komision, për t’u bërë pjesë e mbledhjeve të këtij komisioni.

Në nisje të mbledhjes së sotme ku mungonin përfaqësuesit e opozitës në komision, bashkëkryetari i komisionit, Arbjan Mazniku bëri të ditur se mazhoranca do t’i kërkojë Kuvendit shtimin e një anëtari të PS-së në komision, si dhe kalimin e pozicionit të bashkëkryetarit që i përket PD-së në statusin e nënkryetarit të komisionit.

“I kemi kërkuar parlamentit javën që kaloi që të ndryshojmë formulën e komisionit, për të shtuar një anëtar në anën e mazhorancës që të kemi mekanizëm zhbllokues. Opozita do të ketë vendin e saj me 8 anëtarë në komision. Po ashtu kemi kërkuar që nga bashkëkryesi komisioni të ketë nënkryetar, që të fillojmë të punojmë për këtë proces”, tha Mazniku.

Mazniku kujtoi se kur komisioni u krijua me kërkesë të opozitës, pavarësisht përbërjes së parlamentit, u ra dakord duke pasur parasysh edhe rëndësinë e komisionit të kishte elementë bashkëkryesie dhe përfaqësim të barabartë në komision.

“Nisur nga fakti se kjo reformë ka rëndësi të madhe ne donim t’i jepnim gjithë mundësitë opozitës për të pasur pjesëmarrje dhe për t’i dhënë asaj garanci speciale edhe përtej praktikës më të mirë parlamentare europiane”, tha Mazniku.

Por aktualisht, sipas tij, mungesa e opozitës ka sjellë humbjen e dy muajve kohë për një reformë që është me ngut.

Duke sqaruar hapat e mëtejshëm që do të ndjekë komisioni, Mazniku theksoi se komisioni do të ndahet në tre grupe të mëdha dhe secili grup do të mbulojë katër qarqe.

Gjatë muajit shkurt, ai theksoi se anëtarët e komisionit bashkë me ekspertët do të dalin në terren për të zhvilluar konsultim publik.

Ndërsa në mars, sipas tij, do të zhvillohet faza e dytë e konsultimeve tematike. “Të gjitha këto diskutime do të mblidhen së bashku dhe në muajin prill-maj fillojmë procesin e hartimit formal të ligjit”, tha ai.

Duke folur për rëndësinë dhe nxitimin që ka ky proces, Manziku theksoi se kjo reformë duhet të përfshijë një diskutim tërësor, për të qenë më efikase dhe për t’i shërbyer më mirë shqiptarëve.

Një tjetër element me rëndësi, sipas tij, është edhe përgatitja e bashkive për të tërhequr fonde nga Bashkimi Europian dhe për t’i vendosur ato në shërbim të komunitetit.

“Kjo është sot mbledhja e katërt në të cilën opozita nuk vjen. Kemi humbur thuajse dy muaj kohë në një reformë shumë të rëndësishme, në një reform që është në ngut kohe. Siç e kemi shpjeguar, duke qenë se zgjedhjet e ardhshme vendore ndodhin në prill apo maj të vitit 2027 është shumë e rëndësishme që reforma territoriale të përmbyllet, siç janë dhe praktikat më të mira europiane rreth një vit para zgjedhjeve. Synimi ynë është që t’i qëndrojmë besnik këtij parimi; duhet të përmbyllim reformën territoriale deri në korrik të këtij viti”, tha Mazniku.

Mazniku tha se “hapat e punës do të jenë të ndarë në tre kapituj të mëdhenj. Kapitulli i parë që do të ndodhë që tashmë qysh në muajin shkurt, komisioni do të jetë i ndarë në 3 grupe të mëdha ku secili grup do të mbuloj katër qarqe. Do të synohet që gjatë muajit shkurt ky grup, me 1/4 e komisionit do të shkojnë bashkë me ekspertët që do t’i bashkohen grupit, bashkë me deputetët e zonës, të takojnë kryetarët e bashkive, anëtarët e këshillit bashkiak, bizneset, shoqërinë civile, ekspertët lokalë, për të diskutuar në të gjithë territorin në lidhje me problematikat, sfidat dhe nevojat që pushteti vendor ka përpara.

Kjo do të jetë faza e parë e konsultimit publik. Në muajin mars do të kemi fazën e dytë të konsultimeve, e cila do të jetë faza e konsultimeve tematike. Sërish, komisioni do të jetë i ndarë në tre grupime, njëri grup do të merret me territorin dhe qeverisjen, grupi i dytë do të merret me funksionet e pushtetit vendor dhe grupi i tretë do të merret me financimin e pushtetit vendor dhe secilin prej këtyre 3 grupeve do të ketë konsultime tematike në fushën e vet. Në muajin prill-maj do të fillojmë hartimin e procesit formal të ligjit dhe opsioneve specifike për reformën. Kur shprehem për rëndësinë dhe nxitimin që ky proces ka, është e rëndësishme që t’i shpjegojmë edhe publikut që një reformë e tillë, e cila ka nevojë për një konsultim shumë të madh publik, në të gjithë territorin nuk është një reformë që bëhet në zyrë, nuk është një reformë që bëhet vetëm nga anëtarët e komisionit, por është një reformë e cila duhet të përfshijë të gjitha institucionet lokale vendore dhe qendrore, një diskutim tërësor për mënyrën më të mirë sesi mund të suportohet pushteti vendor për të qenë më efikas, më efiçentë dhe për ti shërbyer më mirë qytetarëve”, tha ai.

Mazhoranca i ka kërkuar parlamentit që të ndryshojë mënyrën si është formuar komisioni, duke shtuar një anëtar dhe duke kaluar nga komision me bashkëkryesi në një komision standard parlamentar me kryetar dhe nënkryetar.

“Kjo  nuk do të thotë që opozita nuk është pjesë e komisionit. Opozita do të jetë gjithmonë e mirëpritur në komision, në të gjitha proceset, në të gjitha hapat, në të gjitha diskutimet. Do të ketë vendin e saj sistematik, 8 anëtarët e komisionit janë ata që janë. Kemi kërkuar gjithashtu që të ndryshojmë një element të dytë që nga bashkëkryesi, të kalojmë në një proces kryetar/ nënkryetar, siç janë komisionet standarde në mënyrë që të krijojmë një element të parlamentarizmit normal në këtë komision, por ndërkohë të fillojmë të punojmë për këtë proces”, theksoi Mazniku.

Komisioni i Posaçëm për Reformën Territoriale, foto: Andrin Hoxha

1 nga 5

/a.f/r.e/

The post Reforma territoriale, Mazniku: Komisioni me tre grupe, konsultime publike në qarqe appeared first on Agjencia Telegrafike Shqiptare.

TIRANË, 2 shkurt/ATSH-Maela Marini/ Komisioni për Çështjet Ligjore dhe Administratën Publike miratoi sot strukturën dhe organikën e pagave të punonjësve me kohë jo të plotë pune të Komisionit Qendror të Zgjedhjeve, për përpunimin e dokumentacionit zgjedhor.

Gjatë mbledhjes së sotme, drejtoresha e Përgjithshme e Administrimit Zgjedhor në KQZ, Jona Josifi bëri të ditur se bëhet fjalë për 47 punonjës me kohë të pjesshme.

Sipas saj, KQZ kërkon të angazhojë staf me kohë të pjesshme për dy proceset zgjedhore që u mbyllën gjatë vitit 2025, konkretisht për zgjedhjet për Kuvend të 11 majit dhe për zgjedhjet e pjesshme vendore.

“Punonjësit do të angazhohen për hapjen e kutive dhe administrimin e gjithë dokumentacionit zgjedhor, si dhe për arkivimin dhe administrimin e dokumentacionit zgjedhor ndër vite, në këtë rast do të duhet të përpunojmë dokumentacionin e viteve 2006, 2007 dhe 2008. Procesi i arkivimit është viti i tretë radhazi që realizohet ndërkohë që hapja e kutive është detyrim që buron nga Kodi Zgjedhor”, tha ajo.

Konkretisht Josifi bëri të ditur se 15 punonjës do të angazhohen për një periudhë 8-mujore për arkivimin, ndërkohë që procesi i hapjes së kutive të materialeve zgjedhore dhe asgjësimit të fletëve të votimit do të angazhojë 32 persona, kryesisht operatorë, punëtorë dhe specialistë logjistike.

Relatori i këtij projektvendimi, deputeti Ermal Pacaj mbështeti kërkesën e KQZ-së, ndërsa bëri të ditur se pjesa financiare do të përballohet me fondet e KQZ-së të vitit 2026.

Nga ana e tyre, deputetët e opozitës në komision shprehën shqetësimin mbi procedurat që ndiqen për asgjësimin e fletëve të votimit.

Në këtë kuadër, deputeti i PD-së Arjan Ndoja kërkoi sqarim se si veprohet me fletët e votimit në rastet kur subjektet zgjedhore kanë ankimuar çështjen në SPAK.

“Për subjektet që kanë bërë kallëzim në SPAK, nëse në rastin eventual vendoset që të rihapen kutitë dhe të numërohen, a e dëmton kjo vendimmarrje administrative  e asgjësimit të materialeve, procesin tjetër”, pyeti Ndoja.

Josifi sqaroi se procesi nuk dëmtohet sepse të gjitha kutitë që janë në hetime, KQZ ka detyrimin ligjor të mos i prekë. “Mbeten aty deri në përfundim të proceseve gjyqësore. Me çdo gjë tjetër për të cilën nuk ka një proces të hapur, ne vijojmë punën”, sqaroi ajo.

Komisioni i Ligjeve diskuton kërkesën e KQZ për shtim personeli - Foto: Andrin Hoxha

1 nga 10

/a.f/

The post Ligjet miratojnë kërkesën e KQZ-së për 47 punonjës me kohë të pjesshme appeared first on Agjencia Telegrafike Shqiptare.

TIRANË, 2 shkurt/ATSH-Maela Marini/ Kryetari i grupit parlamentar të Partisë Socialiste, Taulant Balla deklaroi sot se për shkak të agjendës së ngjeshur që dikton procesi i integrimit europian, seancat plenare në Kuvend do të jenë më të ngarkuara.

Gjatë një konference për shtyp nga kryesia e Kuvendit, Balla iu përgjigj pretendimeve të deputetëve të opozitës mbi seancat e zgjatura të Kuvendit.

“Raportuesi i Parlamentit Europian për Shqipërinë, Andreas Schieder deklaroi këtu në Tiranë se me këtë ritëm reformash Shqipëria i ka të gjitha shanset të anëtarësohet në BE brenda vitit 2029”, tha Balla.

Ndaj sipas tij, çdo deputet i Kuvendit, pavarësisht grupit parlamentar që i përket, duhet të kuptojë që është një mandat historik.

“Kjo legjislaturë është historike për sa i përket intensitetit të punës në Kuvend. Opozita ankohet përse Kuvendi ka seanca të gjata dhe duhet të punojmë deri vonë. Seanca të tilla të gjata do jenë më të shpeshta, ndoshta dhe me nevojën për të shtuar numrin e seancave plenare gjatë një jave. Viti 2026 do jetë një prej viteve parlamentare me intensitet më të madh, për shkak të numrit të madh të çështjeve”, sqaroi Balla.

/r.e/a.f/

The post Balla i përgjigjet opozitës: Integrimi europian dikton agjendë të ngjeshur në Kuvend appeared first on Agjencia Telegrafike Shqiptare.

TIRANË, 1 shkurt /ATSH-Maela Marini/ Konstitucionalistja Aurela Anastasi, anëtare e Akademisë së Shkencave, në një intervistë dhënë për Agjencinë Telegrafike Shqiptare (ATSH) deklaron se: “Shqipëria është shtet unitar dhe nuk e ka traditë senatin si dhomë e parlamentit, ndërkohë që propozimi për reduktimin në 100 deputetë duhet të analizohet, pasi nga pikëpamja kushtetuese lidhet veçanërisht me normën e përfaqësimit të popullit në organin më të lartë përfaqësues”.

E pyetur lidhur me propozimin për ndryshimin e Kushtetutës për reduktimin e numrit të deputetëve në Kuvend, konstitucionalistja Anastasi shprehet se së pari, ndryshimet kushtetuese duket të shërbejnë si moment për fuqizimin e demokracisë.

Në këtë drejtim, ajo nënvizoi rëndësinë e pjesëmarrjes qytetare përmes diskutimit dhe konsultimit publik për ndryshimet kushtetuese.

“Njoftimi i nismës për ndryshimin e Kushtetutës kërkon që shoqëria të përgatitet për të thënë fjalën e saj në kohën e duhur. Idetë e propozuara lidhen vetëm me një reformë parlamentare. Konkretisht, nga pikëpamja përmbajtjesore, kërkohet pakësimi i anëtarëve të Kuvendit, nga 140 anëtarë në 100 anëtarë si dhe krijimi i një senati, si dhomë e dytë e parlamentit. Nga pikëpamja e procesit, kemi vetëm dy të dhëna: krijimin e një komisioni që do të hartojë ndryshimet dhe kohëzgjatjen për miratimin e tyre, pikërisht, deri në fund të kësaj legjislature”, tha Anastasi.

Kohëzgjatja në të cilën realizohen ndryshimet kushtetuese, për Anastasin, është shumë e rëndësishme për procesin e konsultimit qytetar të amendamenteve.

Në këtë rast, sipas saj, “duket sikur ka kohë, por kjo kohë merr vlerë vetëm nëse nuk do të shpërdorohet”.

“Procesi për ndryshimet kushtetuese ka nevojë për një kodifikim më të mirë të rregullave për përgatitjen dhe miratimin e ndryshimeve. Ky është një detyrim i rëndësishëm kushtetues. Për më tepër, që nga viti 2016, Kushtetuta ka vendosur se për amendamentet e Kushtetutës, Gjykata Kushtetuese mund të kontrollojë respektimin e procedurës së parashikuar nga Kushtetuta. Deri tani, rregullat e procesit për amendamentet kushtetuese, përpos atyre të përcaktuara nga Kushtetuta e Republikës së Shqipërisë (neni 177), janë vendosur edhe nga Rregullorja e Kuvendit”, tha Anastasi.

Ajo theksoi se Rregullorja e Kuvendit ka nevojë për rishikim dhe plotësime që sigurojnë krijimin e komisionit përgatitor, pjesëmarrjen e grupeve të interesit dhe të shoqërisë civile, si dhe kohëzgjatjen e mjaftueshme për të diskutuar projektin me ta.

“Nuk mjafton vetëm rregulli për transmetimin e hapur në media të punimeve parlamentare për diskutimin e ndryshimeve kushtetuese. Në Rregullore nevojiten edhe rregulla për krijimin e komisionit përgatitor, dëgjimin e diskutimin e projektit me përfaqësues të grupeve të ndryshme shoqërore, etj. Për këtë ka nevojë të përcaktohen edhe afate efektive”, tha Anastasi, ndërsa vlerësoi se aktualisht afatet e përcaktuara në Rregullore janë mjaft të ngushta.

Në kuptimin e procesit kushtetues, Anastasi theksoi se “mjaft e rëndësishme mbetet edhe mbarëvajtja e referendumit”.

“Neni 177 i Kushtetutës ka parashikuar mundësinë për miratimin e ndryshimeve kushtetuese me referendum në dy raste. Së pari, Kuvendi mund të vendosë me dy të tretat e të gjithë anëtarëve të tij që projektamendamentet kushtetuese të votohen me referendum. Së dyti, amendamenti kushtetues i miratuar i nënshtrohet referendumit, kur këtë e kërkon një e pesta e të gjithë anëtarëve të Kuvendit”, tha ajo.

Nga ana tjetër, Anastasi theksoi se “dispozitat aktuale të Kodit Zgjedhor për referendumet janë shumë të mangëta dhe kanë nevojë të rishikohen”.

“Kjo kërkohet për të gjitha llojet e referendumeve, por veçanërisht për këto referendume. Mungesa e dispozitave ligjore mund të bëhet shkas për pakushtetutshmëri të procedurave në bazë të Kushtetutës. Nga ana tjetër, në lidhje me pjesëmarrjen qytetare në vendime kaq të rëndësishme për vendin, jemi shumë mbrapa në kohë. Kodifikimi i rregullave për procesin e amendimit kushtetues do t’i shërbente konsolidimit të demokracisë në Shqipëri, sidomos në kuadrin e pjesëmarrjes së drejtpërdrejtë popullore me referendum”, tha ajo.
Në lidhje me krijimin e komisionit për përgatitjen e ndryshimeve kushtetuese, Anastasi u shpreh se është e rëndësishme që ai të ketë një mandat të qartë, i cili t’u bëhet i ditur edhe qytetarëve.

“Punimet e tij duhet të jenë të hapura për publikun. Kjo kërkesë siguron jo vetëm legjitimitetin e ndryshimeve, por edhe përgjegjshmërinë politike në lidhje me qëllimin e ndryshimeve. Kushtetutshmërisht, qëllimi i ndryshimeve është shumë i rëndësishëm në rastin e amendamenteve. Nëse ka ardhur një “moment kushtetues” për ndryshime në ndërtimin e Kuvendit, kjo nuk do të thotë që nismëtarët apo komisioni të nxjerrin një produkt me ndryshime për të tjera qëllime”, tha Anastasi.

Për Anastasin, e drejta e qytetarëve për të mos u ndjerë të befasuar nga amendime të befta, sikurse ndodhi me ndryshimet kushtetuese në vitin 2008, është një e drejtë procedurale me rëndësi kushtetuese. “Gjykata Kushtetuese mund ta shqyrtojë këtë në kuadrin e procedurës së parashikuar nga Kushtetuta”, theksoi ajo.

Duke u ndalur te përmbajtja e propozimeve, Anastasi theksoi se “propozimi për të pakësuar numrin e deputetëve është vetëm një ide që ka nevojë të analizohet”.

“Nuk e kemi të qartë shkakun apo arsyen e këtij ndryshimi, i cili ka nevojë të shtjellohet. Nga pikëpamja kushtetuese, numri i anëtarëve të parlamentit, lidhet veçanërisht me normën e përfaqësimit të popullit në organin më të lartë përfaqësues. Ky është aspekti kryesor. Por mund të lidhet me cilësinë dhe efektivitetin e ndërtimit të brendshëm dhe të jashtëm të Kuvendit. Lidhja me nevojat financiare nuk është prioritare për ndryshimet”, shtoi ajo.

Ndërkohë, Anastasi theksoi se “ideja për krijimin e një senati si Dhoma e Dytë e Kuvendit të Shqipërisë, është diskutuar gjerësisht përgjatë procesit për Kushtetutën e vitit 1998”.
“Komisioni për hartimin e Kushtetutës si dhe ekspertë të Komisionit të Venecias kanë zhvilluar analiza dhe bisedime të vyera për këtë çështje. Një pjesë e tyre janë botuar edhe në përmbledhjen e diskutimeve për Kushtetutën në vitin 2006. Prandaj, një analizë mbi këtë propozim nuk ka përse të fillojë nga e para, por aty ku ka mbetur, për të parë nëse ka ndryshuar diçka nga ato rrethana që u diskutuan atëherë”, shtoi ajo.

Anastasi theksoi se “një senat në parlamentin e Shqipërisë nuk ka mbështetje as nga tradita, as nga forma e organizimit të Shqipërisë, e cila është një shtet unitar”.

Në përfundim, Anastasi theksoi se “procesi për diskutimin dhe konsultimin e propozimeve për amendamentet kushtetuese ka një rëndësi të veçantë kushtetuese”.

“Nga njëra anë, ai e bën më cilësor përmbajtjen e amendamentit dhe nga ana tjetër, e bën më të kuptueshëm dhe më të qartë për qytetarët, duke e rritur pjesëmarrjen e tyre në vendimmarrjen, mjaft e nevojshme për legjitimitetin e amendamenteve”, tha ajo.

Ndaj, Anastasi theksoi se një “moment kushtetues” për ndryshimin e Kushtetutës duhet konsideruar i lidhur ngushtë me “momentin kushtetues” për forcimin e demokracisë.

/r.e//a.g/

The post Anastasi për ATSH-në: Ndryshimet Kushtetuese, moment për fuqizimin e demokracisë appeared first on Agjencia Telegrafike Shqiptare.

TIRANË, 31 janar/ATSH/ Pylli i Fazanëve në Maliq konsiderohet si një nga destinancionet më tërheqëse në juglindje të vendit për turizëm gjithëstinor.

Kryeministri Edi Rama ndau sot pamje nga ky pyll, të cilin e cilësoi një nga atraksionet më të bukura të juglindjes së vendit.

“Ndërthur një ekosistem të pasur me mundësi të shkëlqyera për ekoturizëm, ky pyll ofron përvoja unike për të shijuar bukuritë e natyrë”, u shpreh Rama.

Ky pyll, me një sipërfaqe prej 50 ha, ndodhet vetëm 10 km larg qytetit të Korçës. Ai ka një peizazh fantastik dhe gëzon njëkohësisht edhe statusin e monumentit natyror.

Interesant është fakti që në këtë pyll gjen jo vetëm fazanët, simbolin e këtij monumenti, por edhe shumë kafshë të tjera.

Larmishmëria e pyllit me plepa, shelgje, blire, pisha dhe bredha bën interesante edhe ecjet në natyrë duke dalë nga rutina e ambienteve urbane.

Pylli i Fazanëve, i rijetësuar nga dora e njeriut, është kthyer në një nga destinacionet e rëndësishme të juglindjes së vendit me organizimet familjare e shoqërore jo vetëm nga banorë të kësaj zone, por tashmë edhe të turistëve vendas dhe të huaj.

/m.m/r.e/

The post Pylli i Fazanëve në Maliq, atraksion ekoturistik në juglindje të vendit appeared first on Agjencia Telegrafike Shqiptare.

TIRANË, 31 janar/ATSH/ Kryetari i Partisë Demokratike, Sali Berisha vlerësoi iniciativën e një grupi personalitetesh nga shoqëria civile, për të ndërmjetësuar krijimin e një fronti të gjerë opozitar kundër qeverisë.

Në një komunikim me qytetarët, Berisha informoi mbi takimin e djeshëm, ndërsa u shpreh se “bashkë me partitë e koalicionit parlamentar diskutuam dhe u dhamë mbështetjen”.

“Ata po vazhdojnë përpjekjet e tyre me forcat e tjera politike opozitare. Unë mendoj se në kuadrin e kësaj nisme, çdo njeri që ndjehet opozitar dhe që e nuk lejon veten të tradhtojë elektoratin që ka votuar kundër Edi Ramës, të tradhtojë elektoratin që gjen forca të shkëputet nga lidhje e të tjera, rreshtohet në këtë front”, shtoi Berisha.

Sipas kreut të PD-së, “ky nuk është front për të qeverisur së bashku, por është një front për të larguar së bashku një të keqe të madhe dhe për t’u hapur rrugën shqiptarëve për të votuar të lirë si qytetarë të lirë europianë”.

“Është jashtë çdo lloj logjike që kjo të mos jetë interes parësor i çdo force opozitare.
Por duhet të jesh opozitar që të përqafosh një ide të tillë. Dhe unë kam shpresë se ata që janë ose ndjehen opozitarë të vërtetë, do ta përqafojnë. Qoftë këto forca politike, qofshin këto organizata të shoqërisë civile, individë me peshë apo përfaqësues të grupit të interesit apo kauzave të drejta”, theksoi Berisha.

/m.m/a.f/

The post Berisha: Krijimi i frontit të gjerë opozitar, interes parësor i çdo force opozitare appeared first on Agjencia Telegrafike Shqiptare.

TIRANË, 31 janar/ATSH-Maela Marini/ Ministrja për Europën dhe Punët e Jashtme, Elisa Spiropali vlerësoi sot se viti 2026 është vendimtar për objektivin strategjik të mbylljes të procesit teknik të negociatave brenda vitit 2027.

Në fjalën e mbajtur në Forumi i Dialogut “Edhe disa hapa drejt BE-së” i organizuar sot në Vlorë, Spiropali vlerësoi se nuk është rastësi që flasim për Europën në në qytetin ku lindi shteti shqiptar.

“Ky është vendi ku historia jonë kombëtare dhe gjeografia jonë europiane takohen natyrshëm. Integrimi nuk është më vetëm një premtim, as një slogan, as vetëm një flamur. Është një proces që po zhvillohet me rezultate të prekshme dhe me përgjegjësi të përbashkëta”, tha Spiropali.

Kryediplomatja shqiptare theksoi se për një kohë të gjatë Shqipëria është parë si një vend që kërkon me ngulm të hyjë në BE.

“Sot Shqipëria është një vend që po përgatitet seriozisht për të qenë pjesë e tij dhe kjo është një diferencë thelbësore. Në vetëm 13 muaj, nga tetori 2024 deri në nëntor 2025, falë një vizioni të qartë pune të përditshme, përpjekjesh të përbashkëta dhe një koordinimi të vendosmërisë politike me aftësinë institucionale, kemi hapur së bashku me KE-në dhe vendet anëtare 33 kapitujt e negocimit”, shtoi Spiropali.

Gjatë muajve të fundit, Spiropali theksoi se është punuar më me ngulm për të arritur sa më parë piketat e ndërmjetve për themeloret.

“Pak ditë më parë, në parlamentin e Shqipërisë u miratua paketa e fundit legjislative duke i dhënë procesit peshën dhe seriozitetin që kërkon e meriton për avancimin sa më parë të fazës vijuese edhe më kërkuese edhe më sfiduese, atë të fillimit të mbylljes së kapitujve”, theksoi Spiropali.

Ministrja theksoi se Shqipëria ka ndërtuar kapacitetin për të ecur me ritmin e BE-së dhe besimin për ta merituar bashkimin me familjen tonë natyrale me Europën.

Reformat që janë ndërmarrë, sipas saj, “nuk janë të lehta, por janë reforma që prekin drejtësinë, administratën, luftën kundër korrupsionit, ekonominë dhe standardet”.

“Por këto reforma nuk janë bërë për të kaluar një provim europian, por sepse Shqipëria e ka nevojën dhe po ndërton jo pa sfida një shtet më të drejtë, ekonomi më të hapur e konkurruese”, tha Spiropali ndërsa shprehu bindjen se “sot mund të themi se integrimi nuk është vetëm aspiratë”.

1 nga 5

/a.f/

The post Spiropali: Viti 2026 vendimtar, avancojmë me fazën e re për mbylljen e negociatave me BE appeared first on Agjencia Telegrafike Shqiptare.

TIRANË, 31 janar/ATSH/ Kryetari i Partisë Demokratike, Sali Berisha deklaroi sot se Partia Demokratike ka në plan dhe projekt të gjitha format e mosbindjes civile dhe është në zbatimin e tyre.

Në një komunikim në rrjetet sociale, Berisha iu përgjigj një qytetari i cili e pyet nëse PD ka në në plan një grevë urie për një qasje më agresive se protestat.

“Kërkojmë nga qytetarët të bëjnë gjithçka për fitoren e kësaj beteje. Por kjo kërkon para së gjithash qartësi. Kërkon që çdo qytetar të kuptojë se kemi të bëjmë me një diktaturë autokratike, në të cilën të gjitha pushtetet janë të përqendruara në një dorë dhe institucionet përdoren për të shtypur pluralizmin”, tha ai.

Berisha theksoi se kemi vetëm një rrugë dhe kjo rrugë është protesta deri në përmbysjen e qeverisë.

Sipas tij, në 10 shkurt PD do të tregojë fuqinë dhe vendosmërinë e saj.

“Gjithçka varet nga kryengritja paqësore që nuk duhet të ndalet kurrë gjer në përmbysjen e Edi Ramës. Pikërisht në këtë kuadër, ne thirrëm protestën tjetër me datën 10 shkurt, ditën e martë, në mënyrë që të marrim dhe njëherë paralajmërimin më serioz për largimin e tyre nga pushteti”, tha Berisha.

Berisha foli po ashtu edhe mbi kërkesën e mbështetësve të PD-së që protesta të vijojë dhe të mos largohen nga sheshi pa realizimin e qëllimit.

“Kjo është një kërkesë jashtëzakonisht e drejtë dhe është rruga e vetme efikase për të larguar këtë regjim nga pushteti. Por kjo kërkon nga secili nga ne që të bindim gjithnjë e më shumë qytetarë se qëndrimi në shesh për aq kohë sa ta largojmë regjimin është rruga më e sigurt e fitores tonë. U garantoj se drejt asaj në mënyrë të pandalshme do të shkojmë”, tha ai.

Ai ftoi qytetarët që të shumëfishojnë forcat dhe të bashkohen në protestën e ardhshme.

Pyetjes së një qytetari se përse nuk organizohen protesta në të njëjtën kohë në 4-5 qytete të ndryshme, Berisha u shpreh se “ne do të përqendrohemi tërësisht në Tiranë”.

“Pasardhësit direkt të bllokmenëve nuk pyesin për Shqipërinë tjetër, përveç Tiranën e karrigeve. Më kujtohet si sot, kur Ramiz Aliaj thoshte se, Kavajën nuk e qeverisim ne, por ai gjithnjë kishte hallin e Tiranës. Ndaj dhe ne duhet të ua bëjmë ferr kësaj organizate kriminale, Tiranën. Kjo është arsyeja se pse ne përqendrohemi tërësisht në Tiranë”, tha Berisha.

Berisha theksoi se protesta e 24 janarit dha një mësim dhe protestat e fundit nuk kanë qenë pa rezultat.

“Kanë qenë më shumë rezultat. Imagjinoni një Shqipëri që nuk do protestonte përpara këtyre superskandaleve se si do turpërohej para botës, se çfarë mesazhi i trishtë, çfarë ofendimi do të ishte për shqiptarët. Kurse zëri i fuqishëm që u ngrit në bulevard dhe nuk ishte vetëm shëtitje, por dha mesazhin e duhur për shqiptarët dhe botën. Por, beteja me diktaturën nuk është një ndeshje futbolli. Kërkohet që secili opozitar të përgatitet për protestë të qëndrueshme. Të përgatitet për një kryengritje të pandërprerë paqësore për të realizuar qëllimin e vet”, tha Berisha.

/m.m/

The post Berisha: Më 10 shkurt, të gjitha format e mosbindjes civile appeared first on Agjencia Telegrafike Shqiptare.

TIRANË, 31 janar/ATSH/ Deputetja e Partisë Demokratike, Jorida Tabaku shprehu sot shqetësimin për pasojat e rënda ekonomike që po sjell zhvlerësimi i euros, duke e cilësuar situatën si një nga goditjet më serioze ndaj ekonomisë shqiptare dhe mirëqenies së qytetarëve.

Tabaku theksoi se euro ka prekur minimumet historike të kursit të këmbimit, ndërsa në vitet e fundit vlera e saj ka rënë me rreth 40%.

Sipas saj, ndonëse për shumë qytetarë kursi i këmbimit mund të duket si një koncept abstrakt, efektet e tij janë tashmë të prekshme në përditshmëri.

“Zhvlerësimi i euros po ndikon drejtpërdrejt në çmime, në eksporte, në punësim dhe në mbijetesën e bizneseve shqiptare. Çdo retorikë e qeverisë për nxitjen e eksporteve është e pavlefshme, për sa kohë ekonomia po goditet nga ky fenomen,” u shpreh Tabaku.

Sipas deputetes demokrate, dy sektorët kryesorë që po vuajnë më shumë janë prodhimi fason dhe bujqësia, sektorë që deri dje mbështeteshin te eksportet dhe sot po humbasin tregjet ndërkombëtare.

Ajo paralajmëroi se zhvlerësimi i euros po e bën të pamundur që produktet shqiptare të konkurrojnë jashtë vendit, duke reduktuar të ardhurat e fermerëve dhe duke rrezikuar vendet e punës në industrinë fason, ku punësohen rreth 175 mijë persona.

Tabaku e lidh drejtpërdrejt këtë situatë me kriminalizimin e ekonomisë dhe futjen e parave të pista, të cilat, sipas saj, po deformojnë tregun dhe po prodhojnë pasoja të pakthyeshme për ekonominë reale.

“Ky ndikim po shkon drejtpërdrejt në xhepin e qytetarëve dhe po sjell pasoja katastrofike. Nuk ka asnjë mekanizëm që ta rikuperojë dëmin që po i bëhet sot ekonomisë nga pastrimi i parave,” theksoi ajo.

Në përfundim, Tabaku nënvizoi se rënia e euros nuk është thjesht një tregues financiar, por rreziku real që po thellon varfërimin e shqiptarëve, po shkatërron prodhimin vendas dhe po minon të ardhmen ekonomike të vendit, në mungesë të një reagimi serioz nga qeveria.

/m.m/a.f/

The post Tabaku: Rënia e euros po varfëron shqiptarët dhe po shkatërron prodhimin vendas appeared first on Agjencia Telegrafike Shqiptare.

TIRANË, 31 janar/ATSH/ Punimet për ndërtimin e parkut rekreativ “Dua të luaj” në Elbasan po vijojnë, një investim që i shërben komunitetit, duke krijuar hapësira moderne për sport dhe argëtim, si dhe duke rritur cilësinë e jetës në qytet.

Kryeministri Edi Rama ndau sot në rrjetet sociale momente nga punimet në këtë kantier, një hapësirë moderne prej 22 mijë m², me fusha sportive, kënde lojërash dhe ambiente rekreative për fëmijë, familje dhe të moshuar.

Ky projekt po realizohet me mbështetjen e Fondit Shqiptar të Zhvillimit dhe synon krijimin e një hapësire moderne dhe funksionale rekreative, në shërbim të të gjitha grupmoshave.

Projekti parashikon ndërtimin e një hapësire prej 22 mijë m², e cila do të përfshijë fushë sportive, kënde lojërash për fëmijë, si dhe ambiente rekreative të gjelbra, të konceptuara për fëmijë, familje dhe të moshuar.

Ky investim është pjesë e vizionit për transformimin e hapësirave publike, promovimin e një stili jetese aktive dhe krijimin e mjediseve të sigurta, të aksesueshme dhe miqësore me mjedisin.

Ndërkohë bashkia Elbasan vijon angazhimin për t’i dhënë qytetit më shumë gjelbërim, hapësira rekreative dhe mundësi të reja për komunitetin.

/m.m/a.f/

The post Merr formë parku “Dua të luaj” në Elbasan, hapësira rekreative në shërbim të qytetarëve appeared first on Agjencia Telegrafike Shqiptare.

TIRANË, 30 janar/ATSH/ Drejtori i Përgjithshëm për të Drejtat e Njeriut dhe Sundimin e Ligjit në Këshillin e Europës, Gianluca Esposito e konsideroi mbipopullimin e burgjeve në Shqipëri sfidë, ndërsa tërhoqi vëmendjen mbi praktikat e paraburgimit.

Kryeministri Edi Rama ndau sot pjesë nga prononcimi i djeshëm i Espositos në Tiranë, ndërsa u shpreh se “arresti me burg pa gjyq si praktikë normale në Shqipëri, ka sjellë rezultatin skandaloz të një vendi europian me më shumë të paraburgosur se sa të burgosur, duke alarmuar Këshillin e Europës”.

Esposito u shpreh se mbipopullimi i burgjeve mbetet sfidë e madhe për administratën shqiptare të burgjeve.

“Këtë e thotë Komiteti ynë për Parandalimin e Torturës. Paraburgimi mund të justifikohet në një rast të caktuar vetëm nëse ekzistojnë tregues specifikë për një nevojë reale të interesit publik. Gjykata për të Drejtat e Njeriut vëren gjithashtu se ‘autoritetet gjyqësore kombëtare duhet të marrin në konsideratë marrjen e masave më pak dëmtuese sesa paraburgimin në fazën para nisjes së gjyqit, në varësi të rrethanave specifike të çështjes’”, shtoi ai.

Sipas tij “është përgjegjësi e autoriteteve gjyqësore kombëtare të sigurojnë që në një rast të caktuar paraburgimi i një personi të akuzuar të mos tejkalojë një afat të arsyeshëm”.

“Gjykata për të Drejtat e Njeriut thotë qartë se barra e provës në këto raste nuk duhet të përmbyset duke ia ngarkuar personit të ndaluar detyrimin për të provuar ekzistencën e arsyeve që justifikojnë lirimin e tij. Problemi kryesor i praktikës së paraburgimit në Shqipëri është përdorimi i tepruar dhe i paarsyetuar mjaftueshëm i kësaj mase veçanërisht në gjykatat e shkallës së parë dhe gjatë rishikimeve periodike”, theksoi Esposito.

/m.m/j.p/

The post Esposito: Përdorim i tepruar dhe i paarsyetuar i masës së paraburgimit në Shqipëri appeared first on Agjencia Telegrafike Shqiptare.

TIRANË, 30 janar/ATSH/ Ministri i Drejtësisë, Besfort Lamallari bëri të ditur sot se nga Amnistia Penale do të përfitojnë rreth 10 mijë shtetas shqiptarë.

Në një konferencë për mediet, Lamallari bëri të ditur se “338 të dënuar do të lirohen menjëherë ndërsa 980 të tjerë do të përfitojnë ulje dënimi.

“Amnistia penale është dërguar në Këshillin e Ministrave dhe do të kemi miratimin e aktit në mbledhjen e qeverisë dhe në vijim depozitimin në Kuvend. Është një kategori shumë e madhe që përfitojnë, nga shifrat paraprake, duke përfshirë dhe procedimet e vitit 2024, numri i përfituesve është i lartë, 10 mijë shtetas që përfitojnë. 338 përfitojnë lirim të menjëhershme, 980 që përfitojnë ulje dënimi”, tha ai.

Lamallari theksoi se në këtë kategori personash hyjnë grupe vulnerabël, duke përfshirë dhe gra dhe të mitur që përfitojnë nga ky akt human.

“Kjo tregon që jemi shoqëri që duhet të orientohet drejt parandalimit, rehabilitimit dhe t’i japim një mundësi të dytë dhe mbështetje personave që në momente të caktuara bien pre e zbatimit represiv të ligjit. Duhet të ndryshojmë qasje dhe mendësi. Arresti me burg duhet të jetë fjala e fundit”, tha Lamallari.

Ministri i Drejtësisë. Besfort Lamallari, foto: Florian Abazaj

1 nga 3

The post Amnistia Penale shkon në Qeveri, Lamallari: Përfitojnë 10 mijë shtetas, 338 lirim të menjëhershëm appeared first on Agjencia Telegrafike Shqiptare.

TIRANË, 30 janar/ATSH-Maela Marini/ Raportuesi i Parlamentit Europian për Shqipërinë, Andreas Schieder deklaroi sot se ka ardhur koha që kultura politike në Shqipëri të bëjë një hap përpara dhe të mos dramatizojë gjithçka me koktejle molotovi.

Në një konferencë për shtyp, Schieder u shpreh se aktorët politikë duhet të argumentojnë fort në skenën politike.

“Kjo vlen edhe për opozitën edhe për qeverinë. Mbi 90% e qytetarëve shqiptarë duan integrimin në BE. Kjo është gjëja më e mirë që mund t’i tregojë Shqipëria Europës, që është një vend i bashkuar dhe ka një qasje të bashkuar”, tha Schieder.

Schieder vlerësoi se aktualisht në Shqipëri ka unanimitet për disa çështje të politikës së jashtme, ndërsa theksoi se “do të donte shumë që unanimitet të ketë edhe për çështje të tilla europiane”.

Ndaj Schieder theksoi se nevojitet përmirësimi i kulturës politike.

“Në parlament ka hapësirë për deputetët e opozitës dhe të dhe mazhorancës të diskutojnë këto çështje. Pra, është demokraci normale ku ke mosdakordësi, por mos ta dramatizojmë situatën më shumë se sa duhet. Këtu mësova se situata është më pak dramatike se sa na duhet. Unë do të zgjidhja funksionimin normal të një demokracie”, shtoi ai. /j.p/

Raportuesi i PE për Shqipërinë, Andreas Schieder në Tiranë, foto: Andrin Hoxha

1 nga 8

The post Schieder: Kultura politike në Shqipëri duhet të bëjë hap përpara, jo me molotov por me argumente appeared first on Agjencia Telegrafike Shqiptare.

TIRANË, 30 janar/ATSH-Maela Marini/ Raportuesi i Parlamentit Europian për Shqipërinë, Andreas Schieder bëri thirrje sot që institucionet të mbështesin punën e Strukturës së Posaçme kundër Krimit të Organizuar dhe Korrupsionit.

Në një konferencë për shtyp, Schieder u pyet nga mediet mbi çështjen për heqjen e imunitetit të zv/kryeministres Belinda Balluku, njëherësh ministre e Infrastrukturës dhe Energjisë.

Në këtë drejtim, Schieder u shpreh se PE nuk komenton çështje juridike apo ligjore.

“Ky është edhe një standard i mirë europian por institucionet duhet të kryejnë punën e tyre. Në këtë rast SPAK duhet të bëjnë punën e tyre, me gjetjet e tyre dhe gjithçka që mendojnë se është e nevojshme në bazë të legjislacionit. Ne kemi thënë që të gjitha institucionet duhet të mbështesin punën e SPAK. Por PE nuk mund të ndërhyjë dhe të bëjë komente për ndonjë rast specifik”, tha ai.

Schieder shprehu bindjen se në Kuvend do të bëhen diskutimet e duhura dhe do të merren vendimet e duhura në bazë të Kushtetutës ose të rregullores. /j.p/

The post Schieder: Institucionet duhet të mbështesin punën e SPAK appeared first on Agjencia Telegrafike Shqiptare.

TIRANË, 30 janar/ATSH-Maela Marini/ Raportuesi i Parlamentit Europian për Shqipërinë, Andreas Schieder vlerësoi se Shqipëria ka pasur një ecuri madhore në negociatat për integrimin në Bashkimin Europian, por nevojitet zbatimi i legjislacionit.

Gjatë një konference për shtyp, Schieder u shpreh se nëse vlerësimi i Komisionit do të ecë mirë, në pranverë do të fillojnë të mbyllen kapitujt dhe Shqipëria do të vazhdojë të jetë pararojë për zgjerimin.

“Por nuk është vetëm çështja për miratimin e legjislacionit. Ideja e legjislacionit dhe miratimit të tij është t’i afrohemi standardeve europiane në zbatim dhe të kemi harmonizim më të mirë mes standardeve në Shqipëri dhe atyre në BE”, tha ai.

Schieder vlerësoi se Shqipëria ka vendosur që të jetë tejet e vetëdijshme dhe t’i përkushtohet reformave sidomos për luftën kundër krimit të organizuar.

“Që para 10 vitesh Shqipëria ka ndërmarrë hapin e paprecedentë për të bërë vetingun e gjyqtarëve. Kjo ka sjellë ndryshimin e perceptimit të publikut”, shtoi ai. /j.p/

The post Schieder: Në pranverë nis mbyllja e kapitujve të integrimit, kërkohet harmonizim i standardeve me BE-në appeared first on Agjencia Telegrafike Shqiptare.

TIRANE, 30 janar/ATSH/ Dy studio arkitekturore ndërkombëtare u shpallën fituese të Konkursit Ndërkombëtar për Shtëpinë e re të Fëmijëve dhe Kompleksin e ri të Inspektorateve Shtetërore.

Kryeministri Edi Rama ndau sot pamje nga projektet fituese të dy studiove prestigjioze nga Meksika, Taller Hector Barroso dhe Rojkind Arquitectos, të cilat morën pjesë në konkursin ndërkombëtar të organizuar nga Korporata Shqiptare e Investimeve.

Juria ndërkombëtare vlerësoi se edhe pse secili prej projekteve kishte tipare shumë të mira arkitekturore, asnjë prej tyre nuk ishin plotësisht i suksesshme në trajtimin e të dyja komponentëve, Shtëpisë së re të Fëmijëve dhe Kompleksit të ri të Inspektorateve Shtetërore.

Ndaj juria vendosi të shpallë fitues studion “Taller Hector Barroso” për projektin e kampusit të fëmijëve dhe studion “Rojkind Arquitevtos S.C” për kullat shumëfunksionëshe.

Juria vendosi që dy projektet të zhvillohen nën bashkërendimin e një zhvilluesi të vetëm, ndërsa hartoi edhe një grup rekomandimesh drejt fazës zbatuese.

Projektet fituese u përzgjodhën mes propozimeve me vlera të spikatura arkitekturore, urbane dhe mbi të gjitha sociale.

Ato janë pjesë e një vizioni më të gjerë për zhvillimin e infrastrukturës publike nëpërmjet partneritetit publik-privat. Këto projekte synojnë të krijojnë kushte moderne dhe dinjitoze, veçanërisht për fëmijët në nevojë, si dhe hapësira funksionale për administratën shtetërore.

/m.m/j.p/

The post Projektet fituese të Shtëpisë së Fëmijëve dhe Kompleksit të Inspektorateve Shtetërore appeared first on Agjencia Telegrafike Shqiptare.

TIRANË, 29 janar/ATSH/ Bashkëkryetari i komisionit të posaçëm të Reformës Administrativo-Territoriale, Arbjan Manziku u shpreh sot se procesi i reformës territoriale duhet të bazohet te parimet dhe cilësia e shërbimeve ndaj qytetarëve, dhe jo te hartat apo numrat.

I ftuar në një studio televizive, Manziku theksoi se reforma nuk ka ende një plan konkret, por është në fazë procesi.

Sipas tij, është me rëndësi konsultimi me qytetarët, veçanërisht ata të Paskuqanit, për një bashkim të mundshëm me bashkinë e Tiranës.

Ai kujtoi se reforma e vitit 2014 ishte një ndryshim epokal, por ende ka nevojë për përmirësime të mëtejshme.

“Ka pasur një tjetër komisioni para 4-5 vjetësh. Unë jam një nga njerëzit që jam pyetur në komision dhe kam dhënë mendim, dhe unë thashë që Kamza, Paskuqani dhe Vora të jenë pjesë e bashkisë së Tiranës. Në këtë rast është e rëndësishme të krijojmë reforma të qenësishme. Nuk kemi një plan, ne kemi një proces. Nuk kam një projektide as për numrat dhe hartat, unë e kam për parimet dhe reformat”, shtoi ai.

Mazniku theksoi se “kjo është një çështje që duhen pyetur më mirë qytetarët e Paskuqanit, nëse duan të bashkohen me Tiranën apo jo”.

“Të mbështetemi te parimi se sa mundësi kemi që t’u ofrojmë shërbime qytetarëve, qoftë në Paskuqan e zona të tjera. Rëndësi ka shërbimi sa më afër qytetarit. Reforma e 2014-ës është një ndryshim epokal, por ka akoma nevojë për ndryshime”, tha Mazniku.

/a.f/r.e/

The post Mazniku: Reforma territoriale duhet të bazohet te cilësia e shërbimeve për qytetarët appeared first on Agjencia Telegrafike Shqiptare.

TIRANË, 29 janar/ATSH-Maela Marini/ Bashkëkryetari i komisionit të posaçëm për Reformën Administrativo-Territoriale, Arbian Mazniku deklaroi sot se muaji korrik është afati i fundit për miratimin e reformës territoriale, ndaj nëse opozita nuk do të vijë në komision deri në 2 shkurt, do të ndryshohet formula e komisionit.

Gjatë një interviste në për “Abcnews”, Mazniku u shpreh se mazhoranca ka qenë në mënyrë sistemike jo vetëm e gatshme, por edhe me një plan shumë të ngjeshur pune drejt krijimit të reformës.

Për shkak të mungesës së opozitës në komision, Mazniku u shpreh se janë humbur dy muaj shumë të rëndësishëm.

Sipas tij në vitin 2027 janë zgjedhjet e ardhshme vendore dhe reforma territoriale, sipas rekomandimeve të Komisionit të Venecias duhet të mbyllet një vit para zgjedhjeve.

Mazniku sqaroi se kjo bëhet për t’i lënë kohë forcave politike dhe publikut për t’u mësuar me ndarjen e re territoriale.

Manziku theksoi se korriku i këtij viti është afati i fundit për të mbyllur reformën territoriale, në mënyrë që t’i jepet kohë njerëzve dhe bashkive të bëhen gati për sistemin e ri.

“Aktualisht kemi dy muaj vonesë. Ndërkohë duhet kuptuar se reforma territoriale lidhet me bashkitë dhe është jetike për të përfituar fonde nga BE për t’u fuqizuar dhe arritur nivelet e BE-së”, u shpreh Mazniku.

Edhe pse PS ka numrin e nevojshëm të votave në Kuvend për ta miratuar reformën, Mazniku theksoi se do të ishte ideale që kjo të bëhej me konsensus tërësor politik, pra me dakordësi totale prej 40 votash.

“Duhet të kemi mekanizmin e mirë për t’i ofruar shërbime njerëzve. Ne ramë dakord për barazi në komision dhe për bashkëkryesim me opozitën. Por opozita nuk ka ardhur në mbledhje dhe ne kemi humbur 2 muaj shumë të rëndësishëm me agjendë të ngjeshur pune”, tha Mazniku.

Në rast se opozita nuk do të paraqitet në komision ditën e hënë (2 shkurt), Mazniku theksoi se PS ka firmosur kërkesën për Kuvendin që të bëhet ndryshimi i formulës së përfaqësimit (9 me 8).

“Njëlloj si në komisionet e tjera parlamentare bashkëkryesia do të kalojë në pozicionin e nënkryetarit dhe do të futemi në proces pune. Opozita do të ketë vendin e saj në komision. Numri i tyre nuk preket, vendet e tyre nuk preken. Janë të mirëpritur të jenë pjesë e dëgjesave që do të zhvillohen në terren por procesi nuk ndalet, sepse ne jemi bllokuar pa filluar akoma”, tha Mazniku.

/a.f/r.e/

The post Reforma territoriale, Mazniku: Do ta mbyllim në korrik, opozitën e presim deri të hënën appeared first on Agjencia Telegrafike Shqiptare.

TIRANË, 29 janar/ATSH/ Kryetari i grupit parlamentar të Partisë Demokratike, Gazment Bardhi, deputetja dhe kryetarja e Komisionit për të Drejtat e Njeriut dhe Mjetet e Informimit Publik, Jorida Tabaku, si dhe deputeti i Partisë Demokratike, Ivi Kaso, zhvilluan sot një takim me Raportuesin për Shqipërinë në Parlamentin Europian, Andreas Schieder.

Gjatë takimit, përfaqësuesit e opozitës shprehën shqetësimin e tyre të thellë lidhur me situatën politike dhe institucionale në Shqipëri, duke vënë theksin te problematikat serioze që sipas tyre, “po minojnë funksionimin e shtetit të së drejtës dhe standardet demokratike”.

Një ndër çështjet kryesore të diskutuara ishte bllokimi i shqyrtimit të mandatit të zëvendëskryeministres dhe ministres së Infrastrukturës dhe Energjisë, Belinda Balluku.

Sipas deputetëve të PD-së, kjo çështje po mbahet peng në Këshillin e Mandateve përmes votave të shumicës socialiste, duke penguar rolin kushtetues të Kuvendit dhe duke ndërhyrë në proceset e pavarura të drejtësisë, përfshirë SPAK-un.

Gjithashtu, deputetët raportuan për “mbylljen sistematike të hapësirave për opozitën në Kuvendin e Shqipërisë”. Sipas tyre, “ndërprerja e fjalës së opozitës gjatë seancave plenare është kthyer në praktikë të zakonshme, ndërsa mekanizmat parlamentarë për kontrollin e qeverisë janë dobësuar ndjeshëm ose janë bërë jofunksionalë”.

Në këtë kontekst, përfaqësuesit e PD-së nënvizuan degradimin e rolit të Kuvendit, i cili sipas tyre po shndërrohet gjithnjë e më shumë në një institucion formal, pa debat real dhe pa respekt për pluralizmin politik.

Raportuesi për Shqipërinë në Parlamentin Europian, Andreas Schieder u informua në mënyrë të detajuar mbi këto zhvillime dhe u njoh me shqetësimet e opozitës lidhur me pasojat që këto praktika kanë për procesin e integrimit europian të vendit dhe për standardet demokratike që kërkon Bashkimi Europian.

Ne emër të Partisë Demokratike, deputetët konfirmuan angazhimin për mbrojtjen e demokracisë, funksionimin e institucioneve dhe respektimin e shtetit të së drejtës, si parakushte themelore për rrugën europiane të Shqipërisë.

/m.m/r.e/a.f/

The post Përfaqësuesit e PD-së takim me Schieder: Po mbyllen hapësirat e opozitës në Kuvend appeared first on Agjencia Telegrafike Shqiptare.

TIRANË, 29 janar/ATSh/ Kryetari i grupit parlamentar të Partisë Socialiste, Taulant Balla, u takua sot në Kuvend me Raportuesin e Parlamentit Europian për Shqipërinë, Andreas Schieder.

Gjatë takimit u diskutua mbi procesin e integrimit europian të Shqipërisë dhe përgatitjen e raportit vjetor për vendin tonë, i cili, pas miratimit në Komitetin e Politikës së Jashtme (AFET), do të votohet në seancën plenare të Parlamentit Europian.

Raportuesi Andreas Schieder, i cili po përgatit raportin vjetor për Shqipërinë, vlerësoi në debatin e fundit në Parlamentin Europian se Shqipëria mund të konsiderohet “favoriti kryesor” mes vendeve kandidate për anëtarësim në Bashkimin Europian.

Takimi u zhvillua në kuadër të dialogut të vazhdueshëm institucional mes autoriteteve shqiptare dhe përfaqësuesve të Bashkimit Europian për avancimin e mëtejshëm të procesit të integrimit.

/m.m/a.f/

The post Balla takon Raportuesin e PE-së për Shqipërinë, Schieder appeared first on Agjencia Telegrafike Shqiptare.