Në një komunikim me gazetarët, pas mbledhjes së kreyesisë, kreu i PD Sali Berisha u pyet lidhur me protestën e 24 Janarit. Ai tha se Edi Rama po shkon drejt grahmave të fundit dhe është zëri popullor që do të bjerë mbi të, por u shpreh se ai vetë nuk merr pushtet me dhunë.
PRONONCIMI I KRYETARIT TË PD ME GAZETARËT:
Kemi diskutuar për protesta të cilat do të gjitha do të shqyrtohen dhe do vendosen në kohën e duhur.
Pyetje: Të tipit? Mund të na i shpjegoni pak më qartë?
Sali Berisha: Opozita ka vetëm protesta të llojeve nga më të ndryshmet. Pra, mesazhi ynë për narkoshtetin është: ik një minutë e më parë. Zemërimi popullor është i jashtëzakonshëm, i papërmbajtur. Dhe ne jemi të vendosur të shkojmë gjer në fund largimin e kësaj organizate kriminale që siç e patë ju dhe nga intervista e fundit e Arben Ahmetaj, që në 5 dosje nxori rreth 12 miliardë euro të amnistuar, të vjedhura nga qeveritarët, nga Edi Rama dhe anturazhi i tij dhe të amnistuara nga SPAK-u i partisë.
Pyetje: Zoti Berisha, a keni ju një thirrje ndaj protestuesve dhe në një formë ose në një tjetër, pritet që 24 janari t’i ngjajë 21 janarit?
Sali Berisha: 21 janari është vepër e Edi Ramës, e burracakut dhe frikacakut Edi Ramës. Sali Berisha nuk merr pushtet me dhunë. E ka deklaruar këtë me datën 12 dhjetor të vitit 1990. Konseguent në këtë linjë, ai e ka provuar. Natyrisht, Edi Rama po shkon drejt grahmave të fundit. Edi Rama është i pashpresë. Dhe zemërimi popullor do të bjerë mbi të.
Pyetje: Zoti Berisha, pse nuk po arrijnë të gjitha partitë opozitare që të mblidhen në një protestë të vetme? Po t’i shohim, të gjitha partitë opozitare denoncojnë dosjen Balluku, dosjen e Ashqit, por nuk po arrijnë që të kenë të jenë së bashku në një protestë.
Sali Berisha: Tani të marrim, të marrim kështu po. Dje ishte një forum, të themi një takim i gjerë, shumë i gjerë, i të gjitha forcave politike, personaliteteve të botës akademike, shoqërisë civile dhe mediave, personalitete me reputacion, të cilët janë të gatshëm ose janë të vendosur në betejën kundër të keqes që quhet Rilindja apo Edi Rama. Pra, ajo që patë ju dje, aty u mblodhën të gjithë ata të cilët janë të vendosur të luftojnë të keqen që quhet Edi Rama.
Pyetje: Por munguan, zoti Lapaj…
Sali Berisha: Prit një minutë. Mungoi Lapaj, i cili, të cilin unë e kam përgëzuar dhe e përgëzoj për protestën e tij të vazhdueshme para Këshillit të Ministrave. Për të tjerët, në qoftë se janë të vendosur të ose duan të luftojnë të keqen Rama, vendin e kanë të hapur. Pastaj vendimet i marrin vetë.
Pyetje: Zoti Berisha, do t’i vendosni ndonjë kuotë deputetëve ose njerëzve që kanë poste në Partinë Demokratike për të sjellë njerëz në protestë apo…
Sali Berisha: Njerëzit siç e pa, siç e patë ju, u mbush Tirana me njerëzit. Njerëzit i sjell këtu revolta e brendshme shpirtërore, urrejtja e pakufishme që kanë për Lubi Babukun, Edi Ramën, Lindat e tij, komplet siç është rasti i, se nuk është më pak ajo si quhej ajo, Sesilia e Maduros. Sesilia quhej ajo? Po. Po, më pak nuk është më pak. Edhe Linda e Surrelit, aty afër është, sepse dhe ajo i fut duart në tendera, në gjëra kështu, a kupton apo jo.
Pyetje: Zoti Berisha, a keni një skenar për protestën e 24 janarit apo është ende herët dhe takimet e mëtejshme do të përcaktojnë edhe se si do të zhvillohet kjo protestë? Pra a do të ketë një qëndrim të qytetarëve në shesh?
Sali Berisha: Nuk do të gjeni kurrë, kurrë një njeri transparent si unë. Në komunikatë, jo. Gjeni ju, ku i keni? Ku është, ku janë të tjerët? Pra unë çdo ditë u them ju atë që kam ndërmend të bëj, e ndonjëherë edhe gjëra që janë projekte. Kështu që, ose që do bëhen. Pra, në moment, unë do ju informoj ju për të gjitha gjërat.
Pyetje: Çfarë do të kërkohet me 24 janar, zoti Berisha?
Sali Berisha: Dorëheqja, dorëheqja, vetëm dorëheqja. Kjo është e gjithë puna. Shqipëria nuk do, nuk do më t’i shohë me, nuk do më t’i shohë me sy të ballit këta njerëz, a kupton. Nuk do, ka fituar urrejtje të madhe.
Kreu i PD Sali Berisha, në mbledhjen e kryesisë së kësaj force politike u ndal në situatën e krijuar nga përmbytjet në vend. Ndër të tjera Berisha tha se Kryeministri Rama ka gënjyer kur tha se në terren janë 6 mijë forca për të përballuar situatën.
“6 mijë forca, thoshte Edi Rama, janë në terren. Paturpësi e madhe. 6 mijë forca nuk ka në bordero ushtria. Nga i gjeti mbrojtja civile? Nga mashtrimet e Edi Ramës”, u shpre Berisha duke u ndalur ede në faktin e mosshpalljes së gjendjes së fatkeqësisë.
“Dhe cinizmi ekstrem, mbledh komitetin e emergjencës dhe nuk shpall gjendjen e fatkeqësisë natyrore dhe deklaron se kjo kërkesë e opozitës na përçan. Po si të përçan? Ti je i detyruar të kesh një ligj, je i detyruar të shpallësh gjendjen e emergjencës dhe kjo të detyron të krijosh fond emergjencash dhe t’i adresosh drejt qytetarëve.
Ndaj u them qytetarëve se çdo gjë që ka thënë dje ka qenë një tallje cinike. Po si mund të mos e shpallësh gjendjen e emergjencës kur edhe sot në Durrës janë 4 mijë banesa me ujë brenda. Dhe sa janë në Lezhë, në Mamurras, në Gjirokastër, në Fier, në Novoselë, etj. Dhe u mblodh, dëgjuan dokrrat, mashtrimet e njëri pas tjetrit të atyre dhe nuk përcaktoi… shpallja e gjendjes së fatkeqësisë natyrore është kushti i parë që qeveria të marrë hapat e tjerë për të adresuar problematikat e krijuara nga fatkeqësia natyrore. Dhe ky jo, ky i ka nga xhepi ato. Është kriminale kjo. Po të gjitha këto tregojnë edhe njëherë karakterin e këtij regjimi. Të gjitha këto dëshmojnë se çdo ditë në pushtet, ata janë një barrë e rëndë, e tmerrshme për shqiptarët kudo që janë.
Ndaj dhe është koha që PD të bëjë gjithçka për angazhimin maksimal në përmbushje të misionit të saj. Në të njëjtën kohë kur nuk jep asnjë ndihmë, nuk cakton fondin për gjithë këto zona të përmbytura, digjen 2 mijë biznese në mes të Tiranës.
Mijëra e mijëra qytetarë humbasin vendet e punës, humbasin bukën e gojës. Po qindra mijëra shqiptarë, që visheshin nga ai treg, për të mos thënë gjysma e shqiptarëve ose më shumë që visheshin nga ai treg, tani ai nk kanë mundësi të vishen, nuk kanë mundësi të blejnë rroba ashtu siç ishin. Dhe pse kjo? Se do ndërtohen kulla aty. Se mafia e betonit, mafia e kokainës, mafia e drogës i djeg ato për të ndërtuar kulla në atë shesh”, tha Berisha.
Erëra me intensitet uragani dhe stuhi të fuqishme kanë përfshirë Europën Veriore, duke shkaktuar 13 viktima, kaos në udhëtime, mbyllje shkollash dhe ndërprerje masive të energjisë elektrike për qindra mijëra banorë.
Anglia Veriore dhe Skocia ‘ngrin’ së ftohti
Në Mbretërinë e Bashkuar, stuhia Goretti goditi rëndë Cornëall-in dhe pjesë të Uellsit, me erëra që arritën deri në 160 km/orë. Rreth 50 fluturime u anuluan në aeroportin Heathroë, duke bllokuar mijëra pasagjerë.
Dhjetëra mijëra familje mbetën pa energji elektrike. Një burrë në të 50-at humbi jetën në qytetin Helston, pasi një pemë u rrëzua mbi karavanin e tij.
Agjencia kombëtare e motit Met Office paralajmëroi për rrezik nga bora dhe akulli në pjesën më të madhe të vendit, veçanërisht në Skoci dhe Anglinë Veriore.
Stuhia “Goretti” lë pa energji qindra mijëra familje në Francë
Në Francë, stuhia Goretti shkaktoi ndërprerje të energjisë për rreth 320 mijë familje, kryesisht në Normandinë Veriore. Të shtunën në mëngjes, sipas kompanisë Enedis, rreth 100 mijë banesa mbeteshin ende pa energji elektrike.
Në disa zona erërat arritën një shpejtësi deri në 216 km/orë, duke rrëzuar pemë dhe shkaktuar dëme në banesa. Shkollat mbetën të mbyllura në disa zona, ndërsa porte dhe rrugë u mbyllën përkohësisht.
Paralizohet transporti në Gjermani
Gjermania Veriore u përball me ndërprerje energjie, transporti dhe komunikimi për shkak të stuhisë Elli, e cila solli reshje të dendura bore dhe erëra të forta.
Shkollat u mbyllën në qytetet Hamburg dhe Bremen, ndërsa trafiku hekurudhor në distanca të gjata u pezullua. Operatorët njoftuan se disa linja do të rikthehen gradualisht, por lidhjet nga Hamburgu drejt Kopenhagës, Amsterdamit dhe Hanoverit mbeten të ndërprera.
Gjithashtu, disa fluturime u anuluan në aeroportin e Hamburgut dhe disa autostrada në Frankfurt u bllokuan.
Kaos në transportin ajror të Europës Qendrore dhe Lindore
Probleme serioze u raportuan edhe në disa vende të Europës Qendrore dhe Lindore. Trafiku ajror u ndërpre nga Çekia deri në Rusi, ku mbi 300 fluturime u anuluan në katër aeroportet që shërbejnë në Moskë.
Autoritetet meteorologjike anëembanë kontinentit kanë lëshuar paralajmërime për erëra “me forcë uragani” dhe reshje të dendura bore, duke u bërë thirrje qytetarëve të shmangin udhëtimet jo të domosdoshme./e.t
Dita e sotme është shumë e veçantë për skuadrën e Partizanit. Kjo pasi presidenti i klubit feston ditëlindjen.
Gaz Demi feston ditën e sotme 63 – vjetorin e tij të lindjen dhe në këtë ditë speciale urimet janë të shumta. Klubi i kuq nëpërmjet një postimi në rrjetet sociale i uron gëzuar ditëlindjen dhe sa më shumë suksese në krye të “demave”.
Një ditë e shënuar kjo për kryeqytetasit, të cilët siç dihet ditën e sotme do të luajnë në “Arenën e Demave” ndaj Burrelit, duel i vlefshëm për fazën e 1/8-ave të Kupës së Shqipërisë. Padiskutim që “dhurata” më e mirë për kreun e të kuqve do të ishte fitorja ndaj matjanëve.
“Presidenti Gazment Demi, sot feston ditëlindjen!
FK Partizani dhe gjithë familja e kuqe i uron kreut të 17-herë kampionëve të Shqipërisë edhe 100 vite të lumtura në jetë dhe Familje. Sa më shumë suksese në krye të FK Partizani”, shkruhet në postim./e.t
Last Updated on 10/01/2026 by EL
Serbia, e cila prej 14 vjetësh në dhomën e pritjes së BE sa i përket integrimit po parakalohet aktualisht nga vendet fqinje, Mali i Zi dhe Shqipëria në rrugën drejt Brukselit. Pritja e pafund me sa duket ka shtuar zhgënjimin e serbëve me Bashkimin Europian. Sondazhi i publikuar ditët e fundit në Beograd, tregon, se vetëm rreth një e treta e serbëve ende duan të bashkohen me BE-në.
Sondazhi i kryer nga organizata me seli në Beograd, Qendra për Politikë Bashkëkohore (CSP), arrin në përfundimin, se vetëm 36 përqind e popullsisë është në favor të anëtarësimit në BE. Madje mbështetja për BE po bie me shpejtësi. Rreth 15 vjet më parë, 70 përqind e serbëve ishin në favor të anëtarësimit, shifra pësoi rënie në vitet që pasuan, por i kalonte 50 përqind. Sipas CSP vërehet gjithashtu përqindje e ndjeshme në rritje e të anketuarve që e refuzojnë hapur anëtarësimin. Me 33 përqind, tani ata janë pothuajse aq sa ata që janë në favor.
Kush është përgjegjës për krizën e besimit?
Rezultatet e sondazhit kanë nxitur debate në Serbi, se kush është përgjegjës për krizën e besimit ndaj BE: një qeveri autoritare që nxit rregullisht ndjenja anti-perëndimore tek mediat e afërta me të? Apo shtetet anëtare të BE-së që e kanë bllokuar procesin e pranimit të Ballkanit Perëndimor për vite me radhë? Ekspertja serbe për çështjet europiane nga Beogradi, Bojana Selakovic, është e bindur, se të dyja palët kanë përgjegjësitë e tyre. “Qeveria e Aleksandar Vuçiçit nuk e ka braktisur zyrtarisht anëtarësimin në BE, por në realitet, anëtarësimi nuk ka qenë kurrë qëllimi i saj”, thotë Selakovic, koordinatore e platformës qytetare serbe “Konventa Kombëtare për Bashkimin Evropian”, cituar nga agjencia gjermane e lajmeve, kna. Selakovic shton, se edhe për BE-në, kjo pritje e pacaktuar dukej një status quo e pranueshme gjatë viteve.
Marrëdhënia e Serbisë me Brukselin ishte si një “martesë të hapur”, krahason Selakovic, në këtë kohë Vuçiçi krijoi lidhje të ngushta me Kinën dhe Rusinë. Ekspertja kritikon Brukselin, që shpesh i mbyllte sytë ndaj manipulimit të zgjedhjeve ose masave kundër shtypit dhe opozitës. Në këmbim, Beogradi siguronte një qetësi të tensionuar në rajon. Kritikët e BE ka kohë që qëndrimin e Brukselit e quajnë mbështetje për “stabilokracinë.”
Popullaritet më i madh tek rinia
Ende BE-ja është më e popullarizuar në mesin e të rinjve. Për eksperten Selakovic, “ata janë e vetmja gjeneratë që e percepton BE-në si një instrument natyror për mundësi jetësore: lëvizshmëri, kufij të hapur, arsim, qasje në tregun e punës dhe siguri ligjore.”. Prej më shumë se një viti, Serbia ka qenë në një gjendje të jashtëzakonshme politike. Pas katastrofës në stacionin e trenit të Novi Sadit më 1 nëntor 2024, në të cilën vdiqën 16 persona,u zhvilluan çdo javë protesta. Vuçiç ka njoftuar zgjedhje të parakohshme parlamentare për këtë vit, një nga shumë kërkesat e studentëve demonstrues.
Ishin protestat që e rikthyen më fort vëmendjen e BE nga qeveria e Serbisë për shkak të akuzave për dhunë kundër demonstruesve dhe gazetarëve. Diplomatët e Brukselit bëjnë presion për reforma, si në lidhje me sundimin e ligjit edhe për normalizimin e marrëdhënieve me Kosovën. Por sipas Selakovic kjo kthesë nga Brukseli vjen mjaft vonë: “Dëmi është bërë tashmë. Axhenda evropiane ka humbur besueshmërinë në Serbi, ndërsa qeveria ka qenë në gjendje të konsolidojë pushtetin e saj pa ndonjë kufizim real”, citon kna./DW
Last Updated on 10/01/2026 by EL
Kryesia e Partisë Demokratike gjatë mbledhjes që po zhvillohet ditën e sotme në selinë “blu” ka marrë vendimin se në datë 24 janar do të mbajë protestën e radhës kombëtare kundër qeverisë.
Ende nuk dihet se në cilën orë do të mbahet protesta e të shtunës së 24 janarit.
Kujtojmë që në daljen e tij për mediat, kryedemokrati Sali Berisha tha se protesta do të mbahej para datës 20 shkurt.
Kjo është protesta e dytë kombëtare në një kohë të shkurtër, pasi në datë 22 dhjetor mbajti tubimin para Kryeministrisë.
Ndërsa çdo të hënë në orën 18:00, Partia Demokratike po ashtu mban “foltoren” përpara Kryeministrisë./e.t
Last Updated on 10/01/2026 by EL
Një shkëndijë elektrike dyshohet se ishte shkaku fillestar i nisjes së zjarrit në tregun industrial tek ish-uzina Dinamo. Por, përhapja masive e tij në pak minuta dhe shkrumbimi i 3 kapanoneve ndodhi për shkak të mosplotësimit të kritereve të godinës për mbrojtjen nga zjarri.
Në inspektimin e kryer në 2025 ky objekt ishte gjobitur dhe i ishin lënë detyra, mosplotësimi i të cilave solli pasoja. “Nuk i plotësonte kriteret të ishte një treg. Dyqanet ndaheshin me llamarina. Instalimet elektrike nuk ishin hermetike”, u shpreh zjarrfikësi Arben Cara. Operacioni i fikjes së këtij zjarri të madh ishte një sfidë e vështirë për shkak të strukturës së objektit, por edhe të rrezikshmërisë që paraqisnin dyqanet që tregtonin gaz dhe parfume.
“Çatia ishte e njëjta dhe zjarri përhapej shpejt. Kishte rrezik për shpërthim sepse kishte dyqan me bombola dhe parfume që rrezikonin jetën e zjarrfikësve dhe njerëzve përreth”, shton Cara.
Për të shmangur situata të përmasave të tilla, sipas zjarrfikësit, bizneset duhet të kenë parasysh disa këshilla: “Të fikin energjinë elektrike kur mbyllin biznesin. Të bëjnë instalime elektrike cilësore. Kujdes nga cigarja”. Për shkrumbimin e mbi 50 bizneseve me një dëm të konsiderueshëm monetar, policia dhe prokuroria e Tiranës ka çelur një hetim, ku nga të dhënat e deri tanishme ngjarja po trajtohet si aksidentale./e.t
Last Updated on 10/01/2026 by EL
Reshjet intensive të shiut gjatë orëve të fundit kanë shkaktuar probleme serioze në disa qarqe të vendit, duke përfshirë Shkodrën, Durrësin, Lezhën, Gjirokastrën, Dibrën dhe Beratin. Sipas Ministrisë së Mbrojtjes, situata më problematike është regjistruar në zonat pranë lumenjve Drin, Kir, Bunë, Osum dhe Devoll, ku janë evidentuar përmbytje të tokave bujqësore, rrëshqitje dherash dhe vështirësi në qarkullimin rrugor.
Në Shkodër, përmbytje janë shënuar kryesisht në njësitë administrative Ana e Malit dhe Dajç, ndërsa strukturat e bashkisë dhe emergjencat civile ndodhen në terren, duke monitoruar situatën dhe duke marrë masa për mbrojtjen e jetës dhe pronës së qytetarëve. Hidrovoret punojnë me kapacitet të plotë dhe nivelet e ujit janë nën kuotat kritike.
Në Durrës janë verifikuar 5.477 banesa, prej të cilave 1.711 kanë pësuar dëme, ndërsa janë evakuuar 851 persona në zonat Sukth dhe Katund i Ri. Rreth 2.000 hektarë tokë bujqësore janë nën ujë, ndërsa vijon puna për vlerësimin e dëmeve.
Në Lezhë, niveli i ujit ka rënë përgjithësisht, me përjashtim të lumit Mat, që ka shënuar rritje për shkak të shkarkimeve nga HEC-et Shkopet dhe Qafë Mollë. Në Gjirokastër dhe Dibër po punohet për pastrimin e akseve rrugore dhe largimin e ujit nga objektet e banimit, ku janë regjistruar rrëshqitje dherash.
Në qarqet Berat dhe Elbasan, rritja e prurjeve të lumenjve ka sjellë përmbytje të sipërfaqeve bujqësore. Në terren janë angazhuar efektivë të Forcave të Armatosura, të cilët asistojnë në transportimin e banorëve dhe shpërndarjen e ndihmave, nën koordinimin e Agjencisë Kombëtare të Mbrojtjes Civile dhe Ministrisë së Mbrojtjes.
Autoritetet bëjnë thirrje banorëve të zonave të prekura të bashkëpunonë me strukturat në terren dhe të kontaktojnë autoritetet vendore për çdo nevojë, për të menaxhuar situatën sa më efektivisht.
NJOFTIMI
Si pasojë e reshjeve intensive të shiut të regjistruara gjatë orëve të fundit, në disa qarqe të vendit janë evidentuar problematika të lidhura me rritjen e prurjeve në disa lumenj, përmbytje të tokave bujqësore, rrëshqitje dherash si dhe vështirësi në qarkullimin rrugor.
Situata paraqitet më problematike në qarqet Shkodër, Durrës, Lezhë, Gjirokastër, Dibër dhe Berat, ndërsa në qarqet e tjera raportohen problematika të kufizuara ose situatë e qëndrueshme.
Në Qarkun Shkodër, rritja e niveleve të lumenjve Drin, Kir dhe Bunë ka shkaktuar përmbytje në territorin e Bashkisë Shkodër, kryesisht në njësitë administrative Ana e Malit dhe Dajç. Strukturat e bashkisë dhe të emergjencave civile ndodhen në terren dhe po monitorojnë në mënyrë të vazhdueshme situatën, duke evidentuar pikat me risk dhe duke marrë masa paraprake për mbrojtjen e jetës dhe pronës së qytetarëve. Hidrovoret po punojnë me kapacitet të plotë dhe nivelet e ujit janë nën kuotat kritike.
Në Qarkun Durrës janë verifikuar gjithsej 5 477 banesa, nga të cilat në 1 711 raste janë konstatuar dëme. Janë evakuuar 851 persona, kryesisht në zonat Sukth dhe Katund i Ri, ku rreth 2 000 hektarë tokë bujqësore janë nën prezencë uji. Vijon puna për konstatimin dhe vlerësimin e dëmeve.
Në Qarkun Lezhë, niveli i ujit ka shënuar rënie përgjithësisht në tokat bujqësore. Forcat në terren po punojnë për largimin e ujit nga disa banesa. Të gjithë hidrovorët kanë punuar me kapacitet të plotë, me përjashtim të atij të Gocajve, ku është evidentuar mungesë energjie elektrike. Niveli i lumit Drin vijon të jetë në ulje, ndërsa lumi Mat ka shënuar rritje për shkak të shkarkimeve nga HEC-et Shkopet dhe Qafë Mollë. Nuk raportohen probleme në akset rrugore.
Në qarqet Gjirokastër dhe Dibër po punohet për pastrimin e disa akseve rrugore, ku janë shënuar rrëshqitje dherash, si dhe për largimin e ujit nga disa objekte.
Në qarqet Berat dhe Elbasan, rritja e prurjeve të lumenjve Osum dhe Devoll ka sjellë përmbytje të sipërfaqeve bujqësore. Situata vijon të monitorohet në mënyrë të vazhdueshme nga strukturat përgjegjëse.
Në terren janë të angazhuar efektivë të Forcave të Armatosura, të cilët, nën koordinimin e Agjencisë Kombëtare të Mbrojtjes Civile dhe Ministrisë së Mbrojtjes, po asistojnë në transportimin e banorëve, shpërndarjen e ndihmave dhe mbështetjen e operacioneve emergjente, sipas nevojave të autoriteteve vendore.
U bëjmë thirrje banorëve të zonave të prekura të kontaktojnë autoritetet vendore për çdo nevojë dhe të bashkëpunojnë me strukturat në terren për menaxhimin sa më efektiv të situatës./e.t
Last Updated on 10/01/2026 by EL
Momente tensioni shpërthyen në Como në orët e para të pasdites, vetëm disa minuta para ndeshjes midis ekipit të Fabregas dhe Bolognas (15:00). Dy autobusë që transportonin tifozët miq mbërritën pranë stadiumit ‘Sinigaglia’ dhe rastësisht kaluan një bar të frekuentuar nga tifozët e Comos.
Pas këtij momenti pasoi një konfrontim i shkurtër, i cili u përshkallëzua në hedhjen e shisheve, shkopinjve dhe shkëmbimin e fyerjeve. Ndërhyrja e shpejtë e forcave të rendit parandaloi pasoja më serioze, duke rivendosur qetësinë brenda pak minutash. Si masë paraprake, disa rrugë u mbyllën përkohësisht dhe autobusët që transportonin tifozë të Bolognas u larguan nën shoqërimin e policisë./e.t
Last Updated on 10/01/2026 by EL
Rajoni i Korçës ka regjistruar reshje shiu në nivele të pazakonta gjatë muajve të fundit. Sipas Shërbimit Meteorologjik të Ushtrisë, në dy episodet e fundit me reshje intensive, përkatësisht gjatë 3-4 ditëve në nëntor 2024 dhe më 7 janar 2025, në këtë rajon kanë rënë gjithsej 494 mm shi.
Kjo sasi përbën rreth 70 për qind të mesatares vjetore të reshjeve, e cila është rreth 700 mm, dhe ka rënë brenda vetëm 4-5 ditëve. Sipas të njëjtave burime, Korça është rajoni ku është regjistruar sasia më e madhe e reshjeve krahasuar me të gjitha rajonet e tjera të vendit.
Si pasojë e këtyre reshjeve intensive, në Fushën e Maliqit janë përmbytur rreth 4 mijë hektarë tokë bujqësore. Përmbytjet kanë ardhur pas çarjes së lumenjve Dunavec dhe Devoll, të cilët nuk kanë mundur të përballojnë prurjet e shtuara të ujërave.
Lumi Devoll është çarë dy herë gjatë kësaj periudhe, duke nxjerrë në pah amortizimin e argjinaturave dhe nevojën për ndërhyrje të menjëhershme. Specialistët theksojnë se situata kërkon urgjentisht investime për mbrojtjen lumore, përmes ndërtimit të argjinaturave me rrjet gabioni, si zgjidhje afatgjatë për parandalimin e përmbytjeve./e.t
Parashikimet sugjerojnë se ngrohja globale mund të krijojë një shkurtore nga Azia drejt Amerikës së Veriut, si dhe rrugë të reja për tregti, transport – dhe sulm.
Gaby Hinsliff*
Edhe një javë tjetër, edhe një fenomen i çuditshëm moti për të cilin ndoshta s’keni dëgjuar kurrë. Nëse nuk është “bomba e motit” me erëra dhe borë ekstreme, për të cilën Britania po përgatitet ndërsa po shkruaj, janë raportimet në Guardian për drerët e Arktikut që po përballen me problemin e kundërt: moti jashtëzakonisht i ngrohtë sjell më shumë shi, i cili më pas ngrin dhe krijon një lloj bore që ata nuk e çajnë dot lehtë me thundrat për të arritur ushqimin. Në një habitat aq të ashpër sa Arktiku, ku mbijetesa varet nga përshtatja e imët, edhe ndryshimet e vogla në modelet e motit kanë pasoja që përhapen pafundësisht – dhe jo vetëm për drerët.
Prej dekadash, politikanët kanë paralajmëruar për luftërat klimatike që po vijnë – konflikte të nxitura nga thatësira, përmbytje, zjarre dhe stuhi, që i detyrojnë njerëzit të lëvizin ose i shtyjnë në konkurrencë me fqinjët për burime natyrore gjithnjë e më të pakta. Për këdo që e ka imagjinuar këtë skenar larg pragut të Evropës me klimë të butë – në shkretëtira të goditura nga thatësira ose në ishuj të Paqësorit që po fundosen ngadalë në det – bisedat këtë javë nga Shtëpia e Bardhë për marrjen e pronësisë së Groenlandës janë një zgjim i ashpër. Siç po u thotë kujtdo që është gati ta dëgjojë Admirali i Parë i Flotës britanike, gjenerali Sir Gwyn Jenkins, shkrirja e veriut për shkak të krizës klimatike ka kohë që ka ndezur një garë të egër në Arktikun që po shkrin, për burime, territor dhe akses strategjikisht jetik drejt Atlantikut. Për të kuptuar se si kjo kërcënon Evropën veriore, shikoni majën e globit, jo një hartë të sheshtë.
Deri në fillim të viteve 2040, parashikimet sugjerojnë se ngrohja globale mund t’i ketë bërë ujërat e ngrira rreth polit të veriut – oqeanin që ndan Rusinë nga Kanadaja dhe Groenlanda – pothuajse pa akull gjatë verës. Kjo hap potencialisht një shkurtore të re nga Azia drejt Amerikës së Veriut, jo rreth mesit të planetit, por mbi krye, duke krijuar rrugë të reja për tregti, transport, peshkim – dhe, më kërcënueshëm, për sulm.
Si pasojë, nga nën akullin që po shkrin po del një teatër i ri konflikti, dhe Kina, Rusia dhe SHBA po përfshihen gjithnjë e më shumë në një betejë për dominim. Ndërkohë, teksa temperaturat në rritje e kthejnë veriun e largët në një shah të autokratëve, territore aq fatkeqe sa të jenë pengesë në këtë rrugë – nga Groenlanda te Kanadaja e deri te arkipelagu norvegjez i Svalbardit, prej kohësh i lakmuar nga Rusia – rrezikojnë të shndërrohen në gurë shahu.
Pothuajse po aq të rrezikshme për këto vende sa kërcënimet që zbardh shkrirja e polit janë, në njëfarë mënyre, edhe mundësitë. Pse, për dreq, SHBA mendon se i duhet të aneksojë Groenlandën mike për të mbrojtur këtë kufi kritik arktik? Në fund të fundit, trupat amerikane janë të stacionuara në këtë territor autonom danez që nga Lufta e Dytë Botërore, dhe Danimarka e ka bërë të qartë se janë më se të mirëpritur të sjellin edhe më shumë. E vetmja përfitim që vjen realisht vetëm me pronësinë, interesantërisht, janë të drejtat mbi pasuritë nëntokësore që mund të çlirohen teksa ky vend i ngrirë ngrohet.
Groenlanda është një burim i rrallë ende i pashfrytëzuar jo vetëm i naftës dhe gazit, por edhe i mineraleve të tokës së rrallë, të përdorura për gjithçka, nga bateritë e makinave elektrike te procesorët e qendrave të të dhënave – po aq jetike për shpresat amerikane për të fituar një garë teknologjike me Kinën sa ishin goma nga Malaja apo pambuku nga India për ekonomitë koloniale të dikurshme. Edhe pse shpesh është gabim të kërkosh shumë logjikë në atë që duket si çmenduri presidenciale, në orbitën e Trumpit nuk mungojnë ideologë dhe “tech bros” të aftë t’ia lidhin të gjitha këto dhe t’ia shesin atij. Dhe, ndërsa nxjerrja minerare në Arktik mund të mos jetë ekonomikisht e vlefshme për shumë vite, ankesat e Trumpit këtë javë se Groenlanda është “plot me anije kineze dhe ruse kudo” sugjerojnë se dikush e ka bindur se nuk mund t’i lërë rivalët t’ia dalin përpara në një mundësi zhvillimi potencialisht shumë të vlefshme – një koncept që çdo ish-magnat i pasurive të paluajtshme e kupton. Në fund të fundit, në Ukrainë Trump kërkoi të drejta për nxjerrjen e mineraleve të tokës së rrallë në këmbim të garancive të sigurisë, dhe në Gaza ai përfytyroi ndërtimin e hoteleve mbi rrënojat e bombarduara: pse të mos nxirret një fitim i shpejtë nga katastrofa mjedisore?
Dhe ndërsa për britanikët e gjitha kjo duket si një epokë e re perandorie, për besnikët e MAGA-s ndoshta tingëllon si jehonë e një historie shumë amerikane: ajo e kolonëve që bënë pasurinë duke ndjekur karvanët drejt perëndimit, duke shtyrë kufijtë e kombit pa pushim, duke marrë tokat e popujve indigjenë dhe duke u mbajtur fort pas tyre përmes një përzierjeje brutale tregtie dhe dhune. Qëllimi nuk është të pushtohet Groenlanda, shpjegon sekretari amerikan i shtetit Marco Rubio, por ta blejnë, ose të paktën të marrin me qira akses ekskluziv ushtarak. Është tregues i shpejtësisë marramendëse me të cilën është shembur marrëdhënia e SHBA me aleatët e saj të dikurshëm – në pak më shumë se një vit – që kjo të synojë të jetë qetësuese: hej miq, thjesht duam t’ju shfrytëzojmë, jo t’ju vrasim!
Duke pasur parasysh vëmendjen famëkeqësisht të shkurtër të presidentit, është e vështirë të dihet çfarë fati e pret Groenlandën. Ndoshta ai thjesht do të mërzitet dhe do të kalojë te diçka tjetër, sidomos pasi të kenë mbaruar zgjedhjet afatmesme dhe të ketë më pak nevojë për dramë jashtë vendit për të shpërqendruar nga dështimet brenda. Ose ndoshta Shtëpia e Bardhë do të huazojë nga manuali i Putinit, duke shfrytëzuar dëshirën e groenlandezëve për pavarësi nga Danimarka për të nxitur një lloj trazire të brendshme që sot ndizet lehtësisht në epokën e rrjeteve sociale – përpara se SHBA të shfaqet si shpëtimtarja dashamirëse që hyn në skenë për t’i mbajtur të sigurt dhe për t’i bërë të pasur.
Por sidoqoftë, më mirë të mësohemi me idenë se ky është fillimi, jo fundi, i konflikteve që mund të vijnë teksa ngrohja globale ridizenjon hartat tona, shthur aleanca të vjetra dhe krijon rivalitete të reja vdekjeprurëse për tokë, ujë dhe burime natyrore.
Sigurisht që do të jetë më keq për ata që tashmë jetojnë në kufijtë e qëndrueshmërisë – në shkretëtira tepër të thata për të rritur çfarëdo gjëje, ose në qytete bregdetare që tashmë po luftojnë me rritjen e nivelit të detit, ose në vende shumë të varfra për t’u mbrojtur nga stuhitë gjithnjë e më të dhunshme – sesa për Evropën tonë me fat e klimë të butë. Dhe sigurisht që këto rreziqe mund të menaxhoheshin më mirë nga qeveri bashkëpunuese që e trajtojnë shkrirjen e veriut si një sfidë kolektive për njerëzimin, jo si një garë vdekjeprurëse për avantazh kombëtar.
Por në javën kur Trump njoftoi se SHBA do të tërhiqej nga një sërë nismash ndërkombëtare për klimën, kjo qartazi nuk është bota ku jetojmë. Kështu që, nëse asgjë tjetër, le të shërbejë Groenlanda e përballur me kaq shumë presion si një kujtesë se kriza klimatike do të ketë pasoja gjeopolitike që ende mezi kemi filluar t’i kuptojmë – dhe se çfarëdo që ende mund të bëjmë për të frenuar rritjen e temperaturave ose për të zbutur pasojat e tyre ka rëndësi. Madje, ose ndoshta sidomos, nëse ende nuk mund ta zhbëjmë dëmin që tashmë është bërë me kaq vullnet.
Gaby Hinsliff është kolumniste e Guardian-it/ Përgatiti për botim: L.Veizi
Interpol Tirana ka ekstraduar nga Gjermania një 51-vjeçar të shpallur në këkrim ndërkombëtar.
Ndaj tij rëndojnë akuzat për Ndihma për kalim të paligjshëm të kufijve” dhe “Largimi i të burgosurit nga vendi i qëndrimit”.
Njoftimi i Interpol
Interpol Tirana
Ekstradohet nga Gjermania një shtetas i dënuar me 6 vite burgim.
Si rezultat i koordinimit të veprimeve operacionale ndërmjet specialistëve të Drejtorisë së Interpol Tiranës dhe Interpol Wiesbaden/Gjermani, në vijim të operacionit ndërkombëtar të koduar “The Ëanted”, u finalizua ekstradimi nga Gjermania drejt vendit tonë i shtetasit shqiptar Sokol Ndreka, 51 vjeç.
Ky shtetas ishte i shpallur në kërkim ndërkombëtar, pasi Gjykata e Shkallës së Parë e Juridiksionit të Përgjithshëm Tiranë, në vitin 2024, e ka dënuar me 6 vite burgim për veprat penale “Ndihma për kalim të paligjshëm të kufijve” dhe “Largimi i të burgosurit nga vendi i qëndrimit”.
Përmbledhje e ngjarjes:
Më datë 31.10.2022, në rrugën dytësore Tiranë–Durrës, janë kapur në një automjet 15 shtetas të huaj (emigrantë të paligjshëm).
Nga hetimet ka rezultuar se shtetasi Sokol Ndreka ishte i përfshirë në aktivitetin e paligjshëm të trafikimit të emigrantëve.
Si rezultat i bashkëpunimit të Interpol Tiranës me Interpol Wiesbaden/Gjermani, u bë i mundur arrestimi i tij në Gjermani, duke u finalizuar me ekstradimin drejt vendit tonë./kb
Rreziku nga përmbytjet nuk ka ikur, pavarësisht se ka një reduktim të intensitetit të reshjeve. Sipas parashikimeve të Institutit të Gjeoshkencave, në qarqet Shkodër, Kukës, Dibër, Lezhë, Durrës, Tiranë, Elbasan, Fier, Vlorë dhe Gjirokastër mund të ketë vërshime të shpejta të lumenjve të vegjël malorë dhe rrëshqitje të dheut. Në zonat urbane në këto qarqe mund të shfaqen probleme me përmbytje të lokalizuara, në varësi të gjendjes së kanalizimeve.
Sipas llogaritjeve hidrologjike të IGJEO-s, si rezultat i reshjeve të rëna me intensitet të lartë, jo vetëm këtë të shtunë por edhe të dielën, pritet një rritje e prurjeve dhe niveleve në të gjithë lumenjtë. Rrezik të shtuar për përmbytje lokale, në vazhdim të ditës së shtunë dhe të diel, do të kenë lumenjtë Ishëm, Erzen, Mat dhe lumi Vjosa. Në lumenjtë Drin, Buna dhe Liqeni i Shkodrës do të ketë rritje të prurjeve dhe niveleve dhe rrezik të shtimit të sipërfaqeve të përmbytura në zonën e Nënshkodrës.
Sipas IGJEO-s, pasditën e së shtunës dhe të dielën, më 11 janar, priten reshje mesatare deri lokalisht intensive në qarqet Shkodër dhe Elbasan, ndërsa në qarqet e tjera priten reshje mesatare. Reshjet priten të shoqërohen me shtrëngata. Në Veri, Lindje dhe Juglindje, në lartësitë mbi 600 m nga niveli i detit, reshjet do të jenë në formë dëbore.
Zonat malore do të jenë në vlera negative, 0 deri -2°C, ndërsa vlerat maksimale do të shënohen në bregdet, duke u ngjitur deri në 10 gradë Celsius. Temperaturat e ulta pritet të sjellin probleme nga ngricat dhe të krijojnë vështirësi në transportin rrugor.
Kanë përfunduar 4 ndeshjet e para të vlefshme për raundin e 1/8-ave të Kupës së Shqipërisë. Në duelet e ditës së shtunë, u shënua një total prej 14 golash.
Dinamo fitoi 3-0 përballë Besës në “Arenën Kombëtare” të kryeqytetit alë golave të Berishës në pjesën e parë dhe më pas në 10 minutat e fundit saktësisht në të ‘80-n dhe ’90-n minutë, Bregu dhe Hekurani vulosin suksesin me dy gola të tjerë.
Me po të njëjtin rezultat ka fituar Partizani i Oltijon Kërnajës në “Arenën e Demave”, 3-0 kundër skuadrës së Burrelit. Human dhe Kontreras shënojnë në 45 minutat e para ndërkohë që për golin e tretë mendon Skuka në minutën e 85-të.
Bylis fitoi 3-2 ndaj ekipit të Laçit, në një ndeshje tepër emocionuese. 90 minutat e rregullta përfunduan 2-2, ndërsa ballshiotëve iu desh shtesa për golin e fitores.
Në ndeshjen tjetër, Tirana rigjen fitoren, këtë herë nëkupë, pasi mundi në shtesë korçarët e Skëndërbeut me shifrat 2-1. Mysloviç zhbllokoi ndeshjen në fundin e pjesës së parë ndërkjohë që në fund të takimit Janaqi barazoi për 1-1 duke e çuar në shtesë ndeshjen. Dhe në këtë pjesë të fundit është Etien Tare që në minutën e 16-të shënon dhe i jep fitoren bardhebluve.
Teksa Shqipëria po përjeton ditën e katërt radhazi me reshje intensive, përmbytje dhe bllokime infrastrukturore nga jugu në veri, kryeministri Edi Rama ka zgjedhur të publikojë pamje simbolike nga puna e borëpastrueseve dhe një mesazh urimi për “fundjavë të mbarë”. Ky komunikim optimist ka nxitur reagime dhe kritika, në një kohë kur mijëra qytetarë janë përballur me evakuime, humbje ekonomike dhe mungesë shërbimesh bazë.
Ndërsa qeveria këmbëngul se situata është “nën kontroll”, realiteti në terren tregon një panoramë krejt tjetër. Njerëz që ‘notojnë’ Bbrenda shtëpive të tyre nga permbytjet, rrugë të shkatërruara vetëm pak muaj pas përurimit me dajre e daulle nga Rama dhe Balluku, zona të izoluara dhe mungesë e energjisë elektrike. Dhe përballë kësa panorame Rama i uron njerezit për një fund javë të mbarë, pa marrë përsipër asnjë përgjegjesi për përmbytjen e Shqipërisë nga Kukësi në Gjirokastër.
The post Propaganda me buzëqeshje e Ramës dhe banorët e përmbytur në realitet appeared first on 27.
Kryesia e Partisë Demokratike ka vendosur që në datën 24 janar do të mbahet protesta e radhës kombëtare. Protesta kombëtare e thirrur nga Partia Demokratike pritet të zhvillohet si pjesë e aksionit opozitar, me qëllim kundërshtimin e qeverisë dhe denoncimin e situatës politike në vend.
Pak më herët, Kryedemokrati, Sali Berish theksoi gjatë fjalës së tij në mbledhje se e vetmja mënyrë për rrëzuar qeverinë e Edi Ramës janë protestat e vazhdueshme. Berisha theksoi se do të tregoheshin “naivë” nëse do të prisnin që kryeministri do të largohet nga ndërhyrja amerikane, duke shtuat se të vetmët që mund t’i tregojnë vendin e duhur janë qytetarët shqiptarë.
Më tej, Berisha u shpreh se alternativat e tjera janë iluzive dhe se qytetarët shqiptarë duhet të jenë në vijën e parë të reagimit kundër pushtetit, ndërsa vlerësoi si pozitive zhvillimet ndërkombëtare dhe qëndrimet kritike ndaj qeverisjes së Edi Ramës.
Sali Berisha:Opozita ka vetëm protesta të llojeve nga më të ndryshmet. Pra, mesazhi ynë për narkoshtetin është: ik një minutë e më parë. Zemërimi popullor është i jashtëzakonshëm, i papërmbajtur. Dhe ne jemi të vendosur të shkojmë gjer në fund largimin e kësaj organizate kriminale që siç e patë ju dhe nga intervista e fundit e Arben Ahmetaj, që në 5 dosje nxori rreth 12 miliardë euro të amnistuar, të vjedhura nga qeveritarët, nga Edi Rama dhe anturazhi i tij dhe të amnistuara nga SPAK-u i partisë.
Pyetje: Zoti Berisha, a keni ju një thirrje ndaj protestuesve dhe në një formë ose në një tjetër, pritet që 24 janari t’i ngjajë 21 janarit?
Sali Berisha:21 janari është vepër e Edi Ramës, e burracakut dhe frikacakut Edi Ramës. Sali Berisha nuk merr pushtet me dhunë. E ka deklaruar këtë me datën 12 dhjetor të vitit 1990. Konseguent në këtë linjë, ai e ka provuar. Natyrisht, Edi Rama po shkon drejt grahmave të fundit. Edi Rama është i pashpresë. Dhe zemërimi popullor do të bjerë mbi të.
Jorida Tabaku, deputete e Partisë Demokratike, ka vizituar një familje në zonën e Yzberishtit në Tiranë, vetëm pak minuta larg qendrës së kryeqytetit, duke sjellë në vëmendje realitetin e vështirë social dhe ekonomik me të cilin përballen mijëra familje shqiptare.
Gjatë vizitës, Tabaku u njoh nga afër me situatën e një familjeje me 8 fëmijë, ku ndihma ekonomike është ndërprerë dhe vetëm një anëtar i familjes është i punësuar. Sipas saj, ky rast nuk është përjashtim, por përfaqëson atë që ajo e cilësoi si “Shqipëria e shumicës”.
“Kjo është Shqipëria reale, jo ajo e propagandës, e tenderave dhe e koncesioneve milionëshe. Është Shqipëria e familjeve që jetojnë me vështirësi dhe që nuk mbrohen nga sistemi,” – u shpreh deputetja e PD-së.
Tabaku theksoi se ndihma ekonomike, në formën aktuale, është kthyer në një lëmoshë që nuk përballon rritjen e çmimeve dhe nuk garanton një jetë me dinjitet. Ajo nënvizoi se sistemi social dhe ekonomik nuk po funksionon për shumicën e qytetarëve, por është ndërtuar për të favorizuar pakicën, ndërsa familjet në nevojë lihen pas dore.
Sipas Tabakut, varfëria nuk është thjesht pasojë e rrethanave, por rezultat i një modeli të gabuar qeverisjeje, që nuk vendos në qendër familjen, punën dhe dinjitetin njerëzor.
Deputetja e Partisë Demokratike riafirmoi angazhimin e saj për të qenë pranë qytetarëve dhe për të punuar çdo ditë për politika që mbështesin familjet shqiptare, pavarësisht nëse ato jetojnë në qendër të Tiranës apo në zonat përreth. “Një shtet serioz matet nga mënyra se si trajton shumicën e tij, jo privilegjet e pakicës,” – theksoi ajo.
Reagimi i plotë:
E nisëm ditën me Marjon dhe Fredin në këtë familje, vetëm një kilometër larg qendrës së Tiranës.
Kjo familje është pasqyra më e qartë e realitetit që ka krijuar qeveria socialiste për familjet shqiptare.
Një familje me 8 fëmijë, me ndihmë ekonomike të ndërprerë, me vetëm një person të punësuar.
Kjo është Shqipëria e shumicës.
Shqipëria e shumicës nuk është ajo e tenderave dhe koncesioneve, as ajo e taksave 50 milionë euro dhe korrupsionit.
Kjo është mënyra se si jeton pjesa më e madhe e familjeve shqiptare, që kanë nevojë për ndihmë ekonomike.
Një ndihmë ekonomike që është kthyer në lëmoshë.
Një ndihmë që nuk është rritur prej vitesh, që nuk përballon rritjen e çmimeve dhe që e bën të pamundur një jetë me dinjitet.
Ky sistem ka prodhuar këto pasoja: varfëri.
Dhe është një fatkeqësi që sot varfëria është kthyer në temë të ditës.
Shpresoj shumë që ky realitet i trishtë të ndryshojë sa më shpejt.
Ne do të bëjmë të pamundurën. Do të punojmë çdo ditë për një arsye kryesore:
familjen shqiptare, dinjitetin, punën dhe mbi të gjitha jetesën me dinjitet për çdo familje shqiptare,
qoftë ato në qendër të Tiranës, qoftë ato vetëm pak kilometra më larg.
Deputeti Klevis Balliu ka reaguar në një postim publik, duke akuzuar qeverinë dhe kryeministrin Edi Rama se përmbytjet nuk janë pasojë e shiut, por e korrupsionit, vjedhjeve dhe ndërtimeve pa kriter që kanë bllokuar kanalet kulluese.
Balliu kërkon llogari për rrugët me kosto shumë të lartë që dëmtohen pas reshjeve të pakta, duke përmendur Qukës–Qafë Plloçë, Korçë–Ersekë, Unazën e Burrelit dhe rrugën e Tunelit të Llogarasë.
Në fund, ai dënon sulmet personale ndaj familjes së tij, duke theksuar se debati politik duhet të përqendrohet te përgjegjësia ndaj qytetarëve dhe jo te fyerjet.
Kryetari i Drenasit, Ramiz Lladrvoci, ka njoftuar se vërshimet kanë bllokuar sërish disa rrugë në këtë komune. Ai ka kërkuar nga qytetarët që të mos lëvizin pa arsye, dhe ka njoftuar edhe se, ekipet emergjente janë terren.
Kryetar i Drenasit, ka treguar se cilat rrugë janë të bllokuara si pasojë e vërshimeve.
Postimi:
Vërshimet bllokojnë sërish disa rrugë në Komunën e Drenasit
Aktualisht, nga vërshimet, janë të pakalueshme rrugët si vijon:
Drenas – Guri i Plakës,
Drenas – Kroi i Mbretit
Shtrubullovë – Korroticë e Ulët, dhe
Rruga nga Komorani 1 në drejtim të Komoranit 3.
Rruga nga Komorani për Skenderaj në drejtimin të Drenasit zhvillohet me vështirësi dhe ka kolona të gjata.
Qytetarë të nderuar,
Kërkojmë nga ju të mos lëvizni pa arsye, të respektoni shiritat e ndalimit të kalimit, shprehni solidaritet dhe nëse keni mundësi ndihmoni për të tejkaluar gjendjen.
Ekipet emergjente janë në terren dhe bashkë me Policinë e Kosovës dhe AME-në, po bëjnë të pamundurën për lehtësimin e gjendjes.
Sinjali – aty ku e vërteta flet para lajmit!
The post Lladrovci njofton se vërshimet kanë bllokuar disa rrugë në Drenas: Ekipet janë në terren, mos lëvizni pa arsye appeared first on Sinjali.
Login