Andy Robertson ka zbuluar dëshirën e tij për të qëndruar te Liverpooli, por njëkohësisht ka pranuar se e ardhmja e tij mbetet e paqartë, për shkak të nevojës së madhe për më shumë minuta në fushë.

31-vjeçari është zhvendosur në një rol dytësor në Anfield këtë sezon, pas ardhjes së Milos Kerkez gjatë verës, duke nisur vetëm 11 ndeshje në të gjitha garat dhe vetëm katër në Ligën Premier.

Robertson ka qenë kryesisht i besueshëm sa herë që ka hyrë në formacion, madje në disa raste ka lënë përshtypje më të mira se Kerkez, por situata e tij për të ardhmen mbetet e hapur. Kontrata e reprezentuesit të Skocisë skadon këtë verë dhe ai ende nuk ka firmosur një marrëveshje të re me “The Reds”.

Robertson ka folur hapur për të ardhmen e tij në Liverpool, duke konfirmuar se ka pasur bisedime me klubin për një kontratë të re, por pa ndonjë vendim përfundimtar.

“Kemi pasur biseda që do të mbeten private; do ta shohim se çfarë do të ndodhë”.

“Më kanë mbetur edhe pesë muaj dhe duhet të shohim nëse ekziston opsioni për të qëndruar apo nëse ka mundësi për t’u larguar. Do të ulem me familjen time dhe do të vendosim”.

“Pas një vere stresuese, po përpiqem thjesht ta shijoj faktin që jam pjesë e këtij klubi dhe lojtar i Liverpoolit. Doja të kualifikohesha në Kupën e Botës dhe fatmirësisht ia dolëm. Tani duhet të shoh se çfarë duam unë dhe familja ime për të ardhmen”.

Ai shtoi gjithashtu se dëshiron të luajë sa më shumë sepse nuk i pëlqen të jetë në stol.

“Mund të përqendrohem te tetë vitet e gjysmë të fundit. Mendoj se Jurgen Klopp më la jashtë vetëm në një ndeshje dhe isha shumë i zemëruar. Unë jam një lojtar që dua të luaj”.

“Kam luajtur me lëndime. Kam luajtur edhe kur nuk kam qenë 100 për qind i gatshëm. Kam luajtur kur kam qenë vetëm 50, 40 apo 30 për qind i aftë për këtë klub dhe për kombëtaren. Gjithmonë dua të jem në fushë dhe të luaj, dhe tani kjo nuk po ndodh, prandaj kjo është ajo që ka ndryshuar”.

“Kam një rol tjetër këtë sezon, të cilin po e shijoj, por në fund të fundit, futbollistët duan të luajnë. Nëse dikush është i lumtur duke qëndruar në stol, atëherë nuk i përket asnjë klubi futbolli”./Telegrafi

Barcelona po monitoron mesfushorin ofensiv të Ajaxit, Rayane Bounida, si një objektiv afatgjatë për afatin kalimtar të verës 2026, sipas raportimeve nga AS.

Pas rikthimit të fundit të Joao Cancelos në formë huazimi, klubi katalanas nuk pritet të bëjë lëvizje të tjera në këtë afat kalimtar të janarit, por mbetet vigjilent ndaj talenteve në ngritje në të gjithë Evropë.

Mesfushori 19-vjeçar me origjinë belge-marokene ka tërhequr vëmendjen si të Barcelonës, ashtu edhe të Real Madridit, falë aftësive të tij teknike, krijimit të rasteve dhe fleksibilitetit në fazën ofensive.

Bounida ka zhvilluar 13 paraqitje zyrtare me Ajaxin këtë sezon, duke regjistruar pesë asistime, ndërsa ka impresionuar me qetësinë, vizionin dhe vendimmarrjen në zonën e fundit të fushës.

Produkt i futbollit të moshave në Belgjikë dhe me prejardhje marokene, ai ka marrë vlerësime edhe nga Jose Mourinho dhe konsiderohet si një nga talentet më premtuese që kanë dalë nga akademia e Ajaxit vitet e fundit.

Barcelona e sheh Bounidën si një përshtatje ideale për projektin e saj nën drejtimin e Hansi Flick, ndërsa situata e kontratës së tij po ndiqet nga afër, në një kohë kur interesi nga klubet e mëdha të Evropës vazhdon të rritet./Telegrafi

Sulmuesi Endrick ka folur hapur për vështirësitë e periudhës së tij të parë te Real Madridi, duke zbuluar se momenti më i vështirë për të ishte konfirmimi se do ta humbiste Kupën e Botës për Klube të FIFA-s, e cila u zhvillua në Shtetet e Bashkuara të Amerikës.

Sulmuesi i ri brazilian pësoi një lëndim në muskujt e pasmë të kofshës drejt fundit të sezonit të kaluar, i cili u përkeqësua gjatë seancave stërvitore para turneut.

Si pasojë, ai mbeti jashtë fushave për disa muaj dhe nuk arriti të marrë pjesë fare në këtë kompeticion. Në një intervistë së fundmi, Endrick u shpreh se ishte momenti më i rëndë i karrierës.

“Konfirmimi se do ta humbja Kupën e Botës për Klube në Shtetet e Bashkuara. Se nuk do të mund të luaja për disa muaj”.

“Është momenti kur e kupton se nuk do të mund të garosh. Humbjet janë të këqija, por janë pjesë e futbollit. Ne fitojmë dhe humbim. Të gjithë e bëjnë këtë. Pak janë ata që fitojnë trofe”.

“Askush nuk fiton gjatë gjithë kohës. Por lëndimet mund të të largojnë krejtësisht nga futbolli”, deklaroi ai.

Ndërkohë, Endrick po synon të gjejë formën sa më të mirë te Lyoni, me shpresën që të merr një ftesë nga Carlo Ancelotti për Kupën e Botës 2026./Telegrafi/

Raportimet nga Italia bëjnë të ditur se Juventusi ka arritur një marrëveshje paraprake për transferimin pa pagesë të Oscar Minguezas në qershor, por drejtori i klubit bardhezi, Marco Ottolini, ka qëndruar në Spanjë për të negociuar një kalim të mundshëm që në afatin e janarit me Celta Vigo.

Mbrojtësi i krahut nga Spanja pritet të bëhet lojtar i ri i Juventusit, qoftë gjatë verës, qoftë që në këtë afat kalimtar dimëror, në varësi të ecurisë së bisedimeve mes dy klubeve.

Sipas “Gazzetta dello Sport” dhe “Tuttosport”, bardhezinjtë kanë arritur marrëveshje personale me Minguezan për një kontratë katërvjeçare me vlerë 1 milion euro në sezon, pothuajse dyfish i pagës që ai përfiton aktualisht te Celta Vigo, e cila sillet rreth 600 mijë euro në vit.

Juventusi po ushtron tani presion për ta transferuar 26-vjeçarin që në janar, duke synuar një marrëveshje me kosto të reduktuar për klubin spanjoll, në mënyrë që të shmangë pritjen deri në verë.

Bisedimet mes Juventusit dhe Celta Vigos pritet të vazhdojnë në orët në vijim, ndërsa raportet nga Italia sugjerojnë se “Zonja e Vjetër” do të duhet të paguajë një shumë që varion nga 3 deri në 5 milionë euro për ta siguruar nënshkrimin e mbrojtësit gjatë afatit dimëror.

Mingueza ka regjistruar një gol dhe tri asistime në 22 paraqitje në të gjitha garat këtë sezon, ndërsa në nivel ndërkombëtar ka grumbulluar katër paraqitje me përfaqësuesen e Spanjës.

Mingueza thuhet se pëlqehet edhe nga Real Madridi, por aktualisht nuk ka asgjë konkrete./Telegrafi

Gerard Pique ka shfrytëzuar pa mëshirë rastin për ta tallur Real Madridin pas eliminimit tronditës nga Kupa e Mbretit, ku madrilenët u mposhtën nga skuadra e kategorisë së dytë, Albacete, të mërkurën mbrëma.

Real Madridi u nda nga ish-trajneri Xabi Alonso më herët gjatë javës dhe ia besoi drejtimin e skuadrës Alvaro Arbeloas, duke e lidhur ish-trajnerin e Castillas me një kontratë që zgjatet përtej fundit të sezonit, si shenjë e besimit ndaj ish-mbrojtësit të djathtë.

Megjithatë, ardhja e Arbeloas në stolin e skuadrës nuk solli ndryshim pozitiv. Mandati i tij nisi me një humbje 3-2 dhe me një eliminim të papritur nga Kupa e Mbretit në fazën e 1/8 së finales.

“Debutim i shkëlqyer për Madridin e ri”, u tall Pique gjatë një transmetimi në Twitch pas humbjes së rëndë të Real Madridit.

Statusi i Piques si legjendë e Barcelonës e shpjegon gatishmërinë e tij për të provokuar rivalët, por deklarata e tij nuk ndihmon aspak në zbutjen e tensioneve që kishin nisur qysh gjatë karrierave të tyre si lojtarë, në anët e kundërta të rivalitetit të “El Clasicos”.

Edhe pse rivaliteti mes Arbeloas dhe Piques, duke pasur parasysh trashëgiminë e tyre te Real Madridi dhe Barcelona, nuk është aspak befasues, përfaqësuesja e Spanjës për vite me radhë ka vuajtur një tension të pakëndshëm sa herë që lojtarët e dy klubeve rivale janë detyruar të bashkëpunojnë në arenën ndërkombëtare.

Në fakt, Arbeloa dhe Pique kanë luajtur së bashku 38 ndeshje me Spanjën, por kurrë nuk kanë pasur marrëdhënie të mira. Në vitin 2015, ish-mbrojtësi i Barcelonës u kritikua pasi deklaroi se Arbeloa “nuk është mik, thjesht një person që e njoh”.

Pas katër muajsh reflektimi, Arbeloa reagoi për La Galerna:

“Mund t’ia shpjegoja botës pse nuk jam mik me Piquen, por ndoshta nuk do t’i bënte mirë nëse do ta bëja këtë”.

“Është e vërtetë gjithashtu se unë e njoh familjen e tij dhe respekti që kam për ta, ai nuk e ka për timen. Familjet janë të rëndësishme. Dëgjojmë shumë budallallëqe dhe në një farë mënyre nuk të bëjnë përshtypje, por njerëzit e afërt vuajnë”./Telegrafi

Chelsea raportohet se ka arritur marrëveshje për ta ndërprerë para kohe huazimin e Facundo Buonanotte në “Stamford Bridge”, me mesfushorin e Brightonit që pritet ta kalojë gjysmën e dytë të sezonit te Leeds United.

Buonanotte iu bashkua Chelseat në formë huazimi njësezonal në ditën e fundit të afatit veror të transferimeve, me drejtuesit e klubit londinez që e shihnin argjentinasin si mbulim të përshtatshëm për Cole Palmer dhe si përforcimin e fundit ofensiv pas largimit të Nicolas Jackson te Bayern Munich.

Ky transferim u prit me habi të madhe nga shumë tifozë të Chelseat, duke pasur parasysh faktin se Buonanotte kishte rënë nga Liga Premier një sezon më parë gjatë huazimit të tij te Ipswich Town.

Dyshimet e tifozëve u vërtetuan shpejt. Buonanotte regjistroi vetëm një paraqitje në Liga Premier, në fillim të shtatorit, ndërsa u ul në bankën rezervë edhe në katër ndeshje të tjera. Në pjesën më të madhe të kohës, ai u detyrua të kënaqej me paraqitje në garat e kupave, edhe pse Palmer, lojtari që duhej ta zëvendësonte, ka vetëm nëntë ndeshje si titullar në Liga Premier këtë sezon.

Gazetari Fabrizio Romano bëri të ditur se Chelsea ka rënë dakord ta ndërpresë huazimin e Buonanottes, me Leeds United, që aktualisht ndodhet në vendin e 16-të, duke e marrë atë deri në fund të sezonit.

E ardhmja e Buonanottes në “Stamford Bridge” dukej e errët pothuajse menjëherë pas transferimit. Ai kishte deklaruar se futbolli në Ligën e Kampionëve të Evropës ishte arsyeja kryesore pse kishte zgjedhur Chelsean, por vetëm disa ditë më vonë u la jashtë listës së klubit për këtë kompeticion. Vetëm një lëndimi i Dário Essugo i hapi rrugë rikthimit të tij në skuadër.

Vendimi për ta ndërprerë huazimin ka shtuar edhe më shumë pakënaqësinë ndaj pronësisë dhe drejtuesve sportivë të Chelseat, me kritika të shumta që lidhen me mënyrën e diskutueshme të menaxhimit të transferimeve./Telegrafi

Karim Benzema i ka dhënë dy mesazhe të qarta presidentit të Real Madridit, Florentino Perez, gjatë takimit të tyre në Arabinë Saudite, ku të dy ishin të pranishëm në finalen e Superkupës së Spanjës.

Sipas raportimit të gazetarit Ramon Alvarez, sulmuesi francez e ka këshilluar kreun e klubit që të vazhdojë t’i besojë trajnerit Xabi Alonso dhe të përforcojë mesfushën e skuadrës.

Ish-kapiteni i Real Madridit, i cili aktualisht luan te Al-Ittihad, mbetet i lidhur ngushtë me klubin madrilen dhe është i informuar për situatën e brendshme. Ai thuhet se ka theksuar rëndësinë e mbështetjes së plotë për projektin e Xabi Alonsos në “Santiago Bernabeu”, veçanërisht pas një fillimi të vështirë sezoni.

Humbja 3-2 ndaj Barcelonës në finalen e Superkupës së Spanjës ka shtuar presionin mbi trajnerin spanjoll, megjithatë drejtuesit e klubit vazhdojnë ta mbështesin atë. Në këtë kontekst, ndërhyrja e Benzemas shihet si një sinjal i fortë besimi ndaj Alonsos dhe vizionit të tij.

Një tjetër pikë kyçe e këshillës së Benzemas lidhet me nevojën për të përforcuar mesfushën, repart që prej kohësh po diskutohet si një nga pikat më të ndjeshme të Real Madridit.

Balanca në mesfushë konsiderohet thelbësore për funksionimin e sistemit taktik të Xabi Alonsos, sidomos pas ndryshimeve të mëdha në këtë repart.

Edhe pse klubi nuk ka konfirmuar ende plane konkrete për transferime të menjëhershme, sugjerimi i Benzemas tregon ndikimin e vazhdueshëm të tij dhe shqetësimin për konkurrueshmërinë e Real Madridit në të ardhmen. Këshilla e një figure kaq të rëndësishme në historinë e klubit pritet të merret seriozisht nga drejtuesit madrilenë./Telegrafi

Problemet po shtohen dita-ditës te Manchester United. I eliminuar nga garat e kupave, në një pozitë të vështirë në Liga Premier dhe tashmë në kërkim të një trajneri të ri për ta zëvendësuar Ruben Amorim, klubi nga “Old Trafford” po kalon një periudhë tejet të trazuar dhe plot tension.

Largimi i teknikut portugez mund të sjellë pasoja të mëdha edhe në përbërjen e skuadrës. Sipas raportimeve të fundit nga Anglia, një nga lojtarët kyç të “Djajve të Kuq” po vë seriozisht në pikëpyetje të ardhmen e tij në klub. Bëhet fjalë për Bruno Fernandes.

Mesfushori portugez, i cili iu bashkua Manchester Unitedit në janar të vitit 2020 nga Sporting Lisbona për shumën prej 65 milionë eurosh, thuhet se po humbet durimin me situatën aktuale në klub. Mediat angleze raportojnë se ai ndjehet i zhgënjyer me drejtimin e klubit dhe mënyrën se si po menaxhohet kriza.

“Bruno ka humbur durimin dhe beson fuqishëm se pronarët e kanë zhgënjyer. Shkarkimi i Amorim nuk e ka ndihmuar aspak situatën”, raporton The Sun.

Në moshën 31-vjeçare, Bruno Fernandes mbetet një nga figurat kryesore të skuadrës. Këtë sezon ka zhvilluar 20 ndeshje në të gjitha garat, duke kontribuar me 5 gola dhe 9 asistime, por pavarësisht statistikave pozitive, frustrimi i tij me situatën sportive po rritet.

Sipas të njëjtave burime, kapiteni i Manchester Unitedit po mendon seriozisht një largim të mundshëm nga “Old Trafford” dhe mbylljen e ciklit të tij me klubin anglez.

Megjithatë, një largim në afatin e janarit nuk është aktualisht në tavolinë, pasi gjithçka pritet të varet edhe nga Botërori i ardhshëm që zhvillohet verën e ardhshme./Telegrafi

Ekipi ukrainas Polissya Zhytomyr duket se e ka kompletuar edhe transferimin e mbrojtësit Ilir Krasniqi.

Krasniqi do të ndjekë rrugët e Lindon Emërllahut për t’iu bashkuar skuadrës që po lufton për titullin kampion, pranë Shakhtarit dhe LNZ Cherkasyt të Muharrem Jasharit.

Njësoi siç bëri me Emërllahun, Polissya ka vepruar njëjtë edhe me Krasniqin, duke shtuar kurreshtjen mbi tifozët për afrimin më të fundit.

Sipas mediave ukrainase, 25-vjeçari gjatë javës së kaluar ka qenë tek klubi i ri – ku edhe ka kryer me sukses të gjitha testet mjekësore. Përpos kësaj, ai edhe u njoftua me bashkëlojtarët e rinj.

Polissya thuhet se pagoi rreth 2 milionë euro për të nënshkruar me kosovarin, i cili ka nënshkruar kontratë afatgjatë.

Përndryshe, Polissya aktualisht renditet në pozitën e tretë në tabelën e kampionatit ukrainas me 30 pikë, pesë më pak se liderët Cherkasy e Shakhtar./Telegrafi/

Juventusi është gati të intensifikojë bisedimet me Liverpoolin për një transferim të mundshëm të Federico Chiesas, me një ofertë zyrtare që pritet të paraqitet në orët në vijim.

Sipas raportimeve të “Tuttosport”, bardhezinjtë po përgatisin një propozim konkret për klubin nga Liga Premier, të vetëdijshëm se do t’u duhet të përmirësojnë kushtet për të përmbushur kërkesat financiare të Liverpoolit.

Struktura e marrëveshjes pritet të mbetet në formën e huazimit, por Juventusi po punon që opsioni i blerjes të shndërrohet në detyrim, me kushte të qarta të përcaktuara paraprakisht.

Ideja e klubit italian është që transferimi i përhershëm të aktivizohet në bazë të numrit të paraqitjeve të Chiesas, si një mekanizëm sigurie për të vlerësuar gjendjen e tij fizike dhe përshtatjen taktike pas rikthimit në një ambient që e njeh mirë, por që ka ndryshuar ndjeshëm që nga largimi i tij.

Negociatat mbeten të ndërlikuara për dy arsye kryesore. Së pari, Liverpooli nuk është i prirur ta lëshojë sulmuesin në këtë fazë të sezonit. Trajneri Arne Slot thuhet se i konsideron opsionet sulmuese të kufizuara, ndërsa klubi ka bërë të qarta pritshmëritë e tij financiare.

Së dyti, Juventusi po pret rikthimin e yllit të Liverpoolit, Mohamed Salah, nga Kupa e Kombeve të Afrikës. Egjipti ka arritur në gjysmëfinale, çka do të thotë se Salah nuk pritet të kthehet të paktën deri javën e ardhshme, një faktor që mund të jetë vendimtar për të ardhmen e Chiesas.

Paralelisht me bisedimet mes klubeve, Juventusi duhet të arrijë edhe një marrëveshje me vetë lojtarin për kushtet personale. Chiesa është i interesuar për një rikthim në Torino, gjë që mund ta lehtësojë procesin, por akordi për pagën ende nuk është arritur dhe mbetet një tjetër hap kyç në finalizimin e mundshëm të transferimit./Telegrafi

Fabian Ruiz, kontrata e të cilit me Paris Saint-Germain skadon në qershor të vitit 2027, mund të largohet nga Franca më herët sesa pritej. Edhe pse prej kohësh situata e tij është ndjekur nga klube si Atletico Madrid dhe Galatasaray, orët e fundit në garë është futur edhe Real Madridi.

“Los Blancos” po kalojnë një sezon të vështirë në repartin e mesfushës. Pas largimeve të Luka Modric dhe Toni Kroos, skuadra nuk ka arritur të gjejë zëvendësues të besueshëm që të kontrollojnë ritmin e lojës dhe të ofrojnë kreativitet.

Në Paris janë të vendosur të mos përsërisin gabimet e së kaluarës. Edhe pse mesfushorit spanjoll i mbetet ende mbi një vit kontratë, drejtuesit e PSG-së besojnë se ky është momenti ideal për të vepruar. Fabian Ruiz nuk është titullar i padiskutueshëm në planet e stafit teknik dhe vlera e tij në treg mbetet mjaft e lartë për të realizuar një shitje të rëndësishme.

Qëllimi i klubit francez është i qartë: Të arkëtojë një shumë të konsiderueshme përpara se rreziku i largimit pa pagesë të bëhet real. Skenari i hyrjes së lojtarit në vitin e fundit të kontratës pa rinovim është diçka që PSG dëshiron ta shmangë me çdo kusht, ndaj kontaktet me disa klube evropiane janë intensifikuar.

Në “Santiago Bernabeu” pranohet se tranzicioni në mesfushë nuk ka qenë aspak i lehtë. Largimi i dy figurave legjendare si Modric dhe Kroos ka lënë një boshllëk të madh, jo vetëm në aspektin teknik, por edhe në lidership.

As Tchouameni e as Camavinga nuk kanë marrë rolin e dirigjentit të lojës, ndërsa Valverde spikat më shumë për energjinë dhe forcën fizike sesa për organizimin e ritmit.

Në këtë kontekst, Fabian Ruiz shihet si një zgjidhje e menjëhershme. Në moshën 29-vjeçare, reprezentuesi i Spanjës ofron përvojë, qetësi me topin dhe aftësi të lartë për të thyer linjat kundërshtare me pasime vertikale.

Njohja e plotë e La Ligës është një tjetër avantazh i madh, që do ta lehtësonte përshtatjen e tij. Për Xabi Alonson, profili i tij përputhet në mënyrë ideale me idenë e rindërtimit të një mesfushe më të balancuar dhe dominuese.

Megjithatë, transferimi nuk pritet të jetë i lehtë. PSG është e vetëdijshme për interesimin e disa klubeve dhe nuk ka ndërmend ta lëshojë lojtarin për një shifër të ulët.

Sidoqoftë, pesha sportive e Real Madridit dhe mundësia për t’u rikthyer në qendër të vëmendjes në Spanjë mund të jenë faktorët vendimtarë që ta anojnë peshoren në favor të klubit madrilen, i cili e sheh Fabian Ruiz si një pjesë kyçe të projektit të ri në mesfushë./Telegrafi

Joe Cole ka vlerësuar se Chelsea humbi një mundësi të madhe duke mos tentuar ta transferonte Virgil van Dijk sezonin e kaluar, para se mbrojtësi holandez të rinovonte kontratën me Liverpoolin.

Van Dijk ka qenë pothuajse i pazëvendësueshëm në qendër të mbrojtjes së “Reds” që nga transferimi i tij nga Southampton në janar të vitit 2018.

Holandezi, i cili tani mban edhe shiritin e kapitenit, ka qenë një figurë kyçe në sukseset e Liverpoolit, duke ndihmuar klubin të fitojë dy tituj në Liga Premier si dhe Ligën e Kampionëve gjatë qëndrimit të tij në “Anfield”.

Edhe pse 34-vjeçari nuk dukej se e kishte seriozisht në mendje largimin nga Liverpooli, Joe Cole beson se Chelsea duhej ta kishte testuar situatën me një ofertë, për ta bindur mbrojtësin me përvojë që të transferohej në “Stamford Bridge”.

“Isha unë, do të kisha shkuar shumë fort pas Virgil van Dijk kur ai ishte drejt fundit të kontratës me Liverpoolin verën e kaluar”, ka deklaruar Cole për Paddy Power.

“Të duhet patjetër të kesh fitues me përvojë në skuadër”.

Cole foli edhe më gjerë për strategjinë e transferimeve të Chelseat, duke përmendur skuadra të tjera të mëdha evropiane.

“Do të shikoja skuadrën e PSG-së, që mendoj se është e fryrë. Lojtarë që e kuptojnë çfarë do të thotë të fitosh dhe çfarë kërkohet për të fituar”.

“Nuk besoj se Arsenali do të arrijë t’i mbajë të gjithë lojtarët, disa prej tyre do të jenë të disponueshëm në fund të sezonit”.

“Fatkeqësisht, lojtarët absolutisht më të mirë nuk do të vijnë te Chelsea, sepse nëse ata janë të lirë, atëherë Manchester City, Arsenali apo Liverpooli do të trokasin dhe ata do të shkojnë atje të parët”, përfundoi ai./Telegrafi

Mesfushori Besfort Zeneli e ka kërkuar largimin nga skuadra suedeze Elfsborg, pasi ka dëshirë të kalojë te Royale Union Saint-Gilloise në Belgjikë.

Zeneli që u largua nga Kosova për të përfaqësuar Suedinë publikisht ka shprehur gatishmëri që të luajë në një ligë tjetër, pasi tërë karrierën e ka kaluar te Elfsborg.

Në një intervistë për “FotbollDirekt”, Zeneli thotë se edhe verën e kaluar negocioi me klubin belg, por marrëveshja dështoi në fund.

“Nuk kam dëgjuar ndonjë gjë për çmime dhe nuk e di nëse është e vërtetë ose jo. Por, e di që kanë interesim që një kohë të gjatë”.

“Kishte disa bisedime edhe verën e kaluar, por nuk ndodhi. Tani, kam dëgjuar nga agjenti se ka interesim që kur sezoni përfundoi, prandaj jam në dijeni që një kohë”.

“Është vështirë të flitet për çmime, por ka shumë para në pyetje dhe jam i lumtur që përmenden këto vlera. Çmimet në futboll janë të çmendura”.

Ndër të tjera, ai konfirmoi se është i gatshëm për një aventurë larg kampionatit suedez.

“Asgjë nuk është e qartë, por kam pak ide për klubin. Siç po thoni, e kanë fituar ligën vitin e kaluar, po luajnë në Ligën e Kampionëve këtë vit dhe janë të parët në ligë. Është klub i mirë, nëse do të jetë hap i duhur ose jo mbetet për t’u parë, nëse e bëj hapin. Por, është klub i mirë”.

“Jam i gatshëm që në janar. Do të shohim nëse do të ndodhë ose jo, vështirë të thuhet. Ka disa javë të mbetura në afatin kalimtar, por ndihem gati dhe besoj se është koha që të lëvizi diku. Ndoshta është koha”.

Zeneli ndër të tjera shtoi se dëshiron një klub më të fortë në mënyrë edhe që të merr ftesë nga Suedia për play-offin e Kupës së Botës në mars.

“E kam dëshmuar kur jam zgjedhur edhe pse luaj te Elfsborgu. Por, nuk do të na lëndonte sikur të shkonim te një klub në ligën e parë dhe luan në Ligën e Kampionëve. Kemi një kualifikim të rëndësishëm në mars, në të cilin vërtetë dua të jem pjesë”./Telegrafi/

Manchester United po i afrohet emërimit të trajnerit të përkohshëm, me Michael Carrick që ka dalë në avantazh si kandidati kryesor pas përparimit të madh të arritur në bisedime gjatë 24 orëve të fundit.

Sipas Fabrizio Romano, takimi i fundit mes Carrick dhe drejtuesve të klubit ka qenë “shumë, shumë pozitiv”, sidomos në aspektin e taktikës, ideve, komunikimit dhe vizionit të përgjithshëm.

“Manchester United është gati ta emërojë trajnerin e ri të përkohshëm dhe gjatë 12 orëve të fundit mund të konfirmojmë se Michael Carrick ka bërë përparim të rëndësishëm në bisedimet me klubin”, ka deklaruar Romano.

“Në 24 orët e fundit, Michael Carrick është shndërruar në opsionin kryesor për postin e trajnerit të përkohshëm te Manchester United. Nga sa kuptoj, takimi mes United dhe Carrick ka qenë shumë pozitiv për sa i përket taktikës, ideve, komunikimit dhe qëllimit. Ndjesia ka qenë shumë e mirë”.

Carrick, i cili kishte një periudhë të suksesshme si trajner i përkohshëm në vitin 2021 me dy fitore në tri ndeshje pas largimit të Ole Gunnar Solskjaer, shihet si një figurë e njohur dhe e besuar, e aftë për t’i dhënë stabilitet të menjëhershëm skuadrës.

Hierarkia e Manchester Unitedit po kërkon një zgjidhje të shpejtë, në mes të spekulimeve të vazhdueshme që e lidhin Ole Gunnar Solskjaer sërish me këtë rol.

“Djajtë e Kuq” të cilët po kalojnë një periudhë të vështirë në Liga Premier, kanë nevojë për një dorë të sigurt për ta stabilizuar situatën dhe për të synuar një rikthim të fortë në garën për kualifikim në garat Evrope në pjesën e mbetur të sezonit./Telegrafi

Mesfushori Scott McTominay thotë se Napoli nuk dorëzohet pavarësisht mungesave të shumta.

Skocezi shkëlqeu në barazimin e Napolit ndaj Interit, ku shënoi dy herë për t’ia fituar një pikë “Neurazzurëve”.

Pas ndeshjes për “DAZN”, McTominay iu kujtoi analistëve se sa shumë mungesa kanë pasur, duke përmendur edhe kapitenin e Kosovës Amir Rrahmani që në fillimin e edicionit ishte i lënduar.

“Në fillimin e sezonit nuk e kishim as Anguissan, as Lukakun dhe as Rrahmanin. Tani s’e kemi De Bruynen dhe Neresin që janë të lënduar”.

“Nëse do të ishte Interi pa Martinez, Thuram, Barella, Calhangolu... do të ishte më vështirë”.

“Ne nuk dorëzohemi kurrë, gjithmonë japim më të mirën”, deklaroi ai.

Napoli ndërkohë renditet në pozitën e tretë pas 19 xhirove, ku ka mbledhur 39 pikë, katër më pak se lideri Inter./Telegrafi/

Trajneri i Real Madridit, Xabi Alonso ka zbuluar se Vinicius Junior ishte ai që kërkoi zëvendësim në minutat e fundit të finales së Superkupës së Spanjës.

Tekniku spanjoll befasoi shumëkënd në minutën e 82-të, kur vendosi ta largojë nga loja Vinicius Jr në stadiumin “Alinma Bank”. Braziliani kishte qenë lojtari më i rrezikshëm i “Los Blancos” në humbjen 3-2, duke shënuar golin e parë për skuadrën e tij në mënyrë spektakolare dhe duke krijuar vazhdimisht raste me shpejtësinë dhe depërtimet e tij nga krahu i majtë.

Me Real Madridin që po humbiste me një gol dhe fundi i ndeshjes që po afrohej, Vinicius Jr dukej lojtari më i mundshëm për të gjetur golin e barazimit ndaj Barcelonës. Megjithatë, ai u zëvendësua nga Franco Mastantuono, një vendim që la të habitur tifozët madrilenë anembanë botës.

“Viniciusi ishte shumë i mirë deri në fund. Ai kërkoi të dilte nga loja për shkak të lodhjes. Kishte shumë lagështi”.

“Ai ishte një kërcënim i vazhdueshëm, goli ishte spektakolar dhe i shkaktoi shumë probleme kundërshtarit në krahun e tij”, shtoi trajneri i Real Madridit.

Numri 7 i madrilenëve e fitoi qartë duelin me Jules Kounde gjatë gjithë ndeshjes, duke e kaluar vazhdimisht qendërmbrojtësin francez me shpejtësinë e tij. Vinicius Jr madje e turpëroi mbrojtësin e Barcelonës, në aksionin që i parapriu golit të tij individual mbresëlënës.

Ky realizim ishte kontributi i 16-të i Vinicius Jr me gol ose asist në 15 finale të zhvilluara me fanellën e Real Madridit, duke barazuar rekordin historik të klubit që mbahej nga Cristiano Ronaldo, Karim Benzema dhe Ferenc Puskas. Njëkohësisht, goli i dha fund edhe një serie prej 16 ndeshjesh pa shënuar për yllin brazilian./Telegrafi

Trajneri Xabi Alonso thotë se Superkupa e Spanjës është kompeticioni më i parëndësishëm i këtij sezoni.

Real Madridi pësoi humbje në finale nga Barcelona me rezultat 3-2, sfidë që ishte tepër e baraspeshuar dhe lehtësisht mund të shkonte në penallti, por madrilenët dështuan t’i konkretizojnë dy raste në fund.

“Humbja e finales? Ky kompeticioni është më i parëndësishmi i këtij sezoni”.

“Duhet ta urojmë Barcelonën. Ka qenë lojë e ngushtë. Kishim dy shanse për ta barazuar lojën. Duhet të këndellemi sa më parë që është e mundur. Ky është kompeticoni më i parëndësishëm që kemi”.

“Kur pranuam golin e tretë, isha 100 për qind i bindur se do të kemi raste për ta barazuar dhe e bëmë, por topi thjesht nuk hynte në rrjetë. Skuadra shfaqi dëshirë, por na mungoi preciziteti për të shkuar në penallti”, deklaroi ai.

Ndërkohë, e ardhmja e Alonsos mbetet e paqartë me bordin e Real Madridit që janë të zemëruar me trajnerin spanjoll dhe po konsiderojnë shkarkimin e mundshëm./Telegrafi

Tifozët e Real Madridit kanë shpërthyer në kritika të ashpra ndaj trajnerit Xabi Alonso pas humbjes së radhës ndaj Barcelonës.

“Los Blancos” u mposhtën sërish nga rivali i përjetshëm, me Barcelonën që doli fituese 3-2 pas një ndeshjeje shumë intensive dhe plot emocione gjatë 90 minutave.

Pas përfundimit të takimit, zemërimi i tifozëve madrilenë u drejtua pothuajse tërësisht në një adresë të vetme: Ajo e Xabi Alonsos.

Trajneri spanjoll u vu në qendër të kritikave për disa zëvendësime të pakuptueshme në pjesën e dytë, vendime që lanë të habitur një pjesë të madhe të mbështetësve të klubit.

Në një sezon me shumë luhatje dhe rezultate zhgënjyese, durimi i tifozëve duket se ka arritur kufirin. Reagimet në rrjetet sociale ishin të ashpra dhe të drejtpërdrejta.

“Shkarkojeni menjëherë”, “Xabi Alonso nuk është njeriu i duhur për Real Madridin”, “Mjaft më me eksperimente në ‘Clasico’”, ishin disa nga komentet më të përhapura mes tifozëve pas humbjes ndaj Barcelonës.

Presioni mbi Alonson pritet të rritet ndjeshëm në ditët në vijim, teksa Real Madridi vazhdon të vuajë kundër rivalit historik dhe rezultatet nuk përputhen me pritshmëritë e mëdha të klubit dhe tifozërisë.

Ndërkohë, Real Madridi do të vendosë gjatë ditëve të ardhshme për të ardhmen e teknikut spanjoll./Telegrafi

Interi dhe Napoli u ndanë në barazim 2-2 në një përballje të zjarrtë, të mbushur me raste, ritëm të lartë dhe tension deri në minutat e fundit.

Zikaltrit kaluan të parët në epërsi pas një aksioni të ndërtuar bukur. Marcus Thuram asistoi për Federico Dimarcon, i cili krijoi hapësirë për gjuajtje dhe dërgoi topin me një goditje të ulët që u përplas në shtyllën e djathtë përpara se të përfundonte në rrjetë, për rezultatin 1-0.

Napoli reagoi shpejt. Scott McTominay u lirua brenda zonës pas një pasimi të shkëlqyer të harkuar nga Eljif Elmas dhe me një goditje precize në këndin e poshtëm të majtë barazoi shifrat në 1-1.

Interi ushtroi presion dhe krijoi disa raste të rrezikshme. Marcus Thuram u ngrit mbi mbrojtësit dhe goditi fuqishëm me kokë drejt tavanit të portës, por portieri mysafir reagoi shkëlqyeshëm duke e ndalur topin dhe duke e dërguar në këndore.

Në anën tjetër, Rasmus Hojlund provoi nga jashtë zone për Napolin, por gjuajtja e tij kaloi shumë pranë shtyllës së djathtë. Edhe Alessandro Bastoni rrezikoi seriozisht me një volej të fortë nga jashtë zone, por topi përfundoi pak mbi traversë.

Momenti vendimtar për Interin erdhi pas rishikimit me VAR, kur gjyqtari akordoi penallti. Hakan Calhanoglu u tregua i saktë nga pika e bardhë, duke e dërguar topin pranë shtyllës së djathtë për rezultatin 2-1.

Napoli nuk u dorëzua dhe arriti të barazojë sërish. Scott McTominay realizoi golin e tij të dytë personal në ndeshje, pasi mori një pasim të saktë nga Noa Lang brenda zonës dhe me një finalizim të qetë e dërgoi topin në rrjetë për shifrat përfundimtare 2-2.

Interi kësisoj mbetet lider me 43 pikë, katër mbi Napolin që renditet në pozitën e tretë./Telegrafi

Pas një viti të mrekullueshëm te Club Brugge ku edhe kompletoi kalimin te AC Milani, mesfushori shqiptar Ardon Jashari e ka fituar edhe “Këpucën e Artë” në Belgjikë që i jepet lojtarit më të mirë të vitit.

Jashari mposhti ish-bashkëlojtarët e tij, Christos Tzolis dhe Hans Vanaken, të cilët konsideroheshin favoritët kryesorë para nisjes së votimit.

Ky çmim është veçanërisht i veçantë, pasi Jashari arriti të grumbullojë pikë vetëm në një raund votimi. Transferimi i tij veror te AC Milan e bëri të pamundur marrjen e votave të mëtejshme, por paraqitjet e tij në gjysmën e parë të vitit 2025 rezultuan vendimtare.

Pas atij lëndimi serioz, ky trofe ka një domethënie edhe më të madhe për Jasharin.

“Është një ndjenjë e pabesueshme. Për mua është një nder i madh ta fitoj këtë trofe. Pas gjashtë muajve të fundit, me lëndime dhe momente të vështira, kjo do të thotë jashtëzakonisht shumë”.

“Kam kaluar një periudhë të mrekullueshme në Belgjikë. Kur e shoh pas, nuk do ta harroj kurrë Belgjikën. Ajo është bërë vërtet një shtëpi e dytë për mua”.

Futbollisti që përfaqëson Zvicrën udhëtoi posaçërisht për të marrë çmimin. Pas një ndeshjeje kundër Fiorentinës, ai hipi pothuajse menjëherë në avion drejt Ostendës.

“Pata mezi 15 minuta pas ndeshjes. Këtu pata pesë minuta pushim dhe më pas dola direkt në skenë”.

Takimi me ish-bashkëlojtarët e tij e preku dukshëm Jasharin. Ai foli për një pritje shumë të ngrohtë dhe theksoi respektin dhe vlerësimin që ende ndjen për lojtarët dhe stafin e Club Brugge.

“Sapo të kem pak kohë, dua të bëj një festë të vogël atje”.

“Jam rritur si lojtar dhe si njeri. Ky trofe, ky vend dhe ky klub e bëjnë historinë time edhe më të veçantë”, nënvizoi ai./Telegrafi