Agjencia e Ushqimit dhe Veterinarisë (AUV) ka ndërmarrë dy veprime të rëndësishme për mbrojtjen e shëndetit të konsumatorëve, duke asgjësuar një sasi të madhe mishi pule dhe duke njoftuar për prani të një substance të dëmshme në një produkt kafeje.
Sipas njoftimit zyrtar të AUV-së, në kuadër të kontrollit zyrtar dhe me kërkesë të kompanisë APETIT Sh.p.k. nga Vushtrria, në një ngarkesë të mishit të pulës të importuar nga Polonia është konstatuar prania e bakterit Salmonella spp.
“Menjëherë pas konstatimit të këtij rasti, sasia e përgjithshme prej 19,200 kilogramë mish pule është asgjësuar në përputhje të plotë me procedurat ligjore në fuqi dhe standardet e sigurisë ushqimore,” thuhet në njoftimin e AUV-së.
Agjencia bën të ditur se vazhdon monitorimin e tregut me vëmendje të shtuar dhe bashkëpunon ngushtë me institucionet vendore dhe ndërkombëtare, si dhe me operatorët ekonomikë që merren me importin e mishit, me qëllim të parandalimit të rasteve të ngjashme.
Ndërkohë, AUV ka njoftuar edhe për një rast tjetër përmes Sistemit të Alarmimit të Shpejtë për Ushqim dhe Ushqim për Kafshë (RASFF). Sipas këtij sistemi, është pranuar njoftimi nr. 2025.10458 për prani të nivelit të lartë të Acrylamide në produktin kafe e bluar “Caffe Monaco” 400 gr, me origjinë nga Kosova dhe eksportues DEVOLLI Corporation.
“AUV, në bashkëpunim me institucionet përkatëse, po ndërmerr veprimet e nevojshme në përputhje me legjislacionin në fuqi,” thekson Agjencia.
AUV rithekson përkushtimin e saj për garantimin e sigurisë ushqimore dhe ofrimin e produkteve që janë në përputhje me standardet evropiane, duke theksuar se mbrojtja e shëndetit të konsumatorëve mbetet prioritet kryesor. /Telegrafi/
Në natën e ndërrimit të moteve në Klinikën Emergjente pranë Qendrës Klinike Universitare të Kosovës kanë kërkuar trajtim 55 qytetarë për shkak të lëndimeve që kanë marr nga përdorimi i mjeteve piroteknike. Dy prej këtyre pacientëve u lënduan nga plumbat qorr.
Nga kjo Klinik për KosovaPress thonë se gjendja e mbrëmshme në Emergjencë ka qenë alarmante dhe se të gjitha lëndimet kanë qenë serioze, madje dy pacientë i janë nënshtruar ndërhyrjeve kirurgjike.
Specialisti i Mjekësisë Emergjente në Klinikën e Emergjencës në QKUK, Ejup Govori deklaroi se tashmë shumica e pacientëve janë liruar pas trajtimit mjekësor, por tregoi se dy pacientë për shkak të lëndimeve që kanë marr në regjionin e barkut është dashur të operohen.
Govori tha se pacientët që u operuan i takojnë moshën rreth 40 vjeç.
“Një pjesë e madhe janë liruar pas trajtimit nga kirurgët plastik dhe ortopedët, disa janë pranuar nëpër reparte kryesisht në ortopedi dhe dy prej tyre janë hyrë në sallë të operimit për shkak të lëndimeve në pjesën e abdomenit (barkut)…..Kanë qenë më moshë të shtyrë faktikisht moshë mesatare 40 vjeç...këto dy rastet që kanë hyrë në operacion se kanë pas lëndime serioze në bark që ka prekur zorrët”, tha ai.
31 dhjetorin dhe fillimin e 1 janarit 2025 teksa e konsideron si situatë sfiduese p[r Klinik[n Emergjente, Govori tha se si pasojë e lëndimeve nga përdorimi i mjeteve piroteknike lëndimet kanë qenë serioze.
Specialisti i emergjencës në QKUK deklaroi se krahasuar me vitin e kaluar në festën e ndërrimit të moteve mbrëmë është rritur shumë numri i pacientëve që kërkuan trajtim.
“Moshat kanë qenë të ndryshme prej fëmijëve, prej 10,12, 14 vjeçar moshën më të rritur20-25 e deri në moshë me thanë mestarë 40-të... Pjesa dërrmuese jo e konsiderueshme, pjesa dërrmuese kanë qenë me fatalitet domethënë me lëndime serioze të gjymtyrëve kryesisht të shuplakave të duarve me amputime të gishtërinjve , me lëndime serioze të këtyre regjioneve.. Gjatë kësaj nate ka qenë numër jashtëzakonisht i madh për ndryshim nga viti e kaluara... Numri ka qenë jashtëzakonisht i madh më kujtohet nga 2005-2004 atëherë ka pas shumë raste andaj ka qenë edhe ky vit. Herën e kaluar diku kanë qenë 8-10 raste më së shumit 15 raste ama këtë vit ka qenë gjendje alarmante”, deklaroi Govori.
Specialisti i Mjekësisë Emergjente, Ejup Govori bëri thirrje që të ndalohet përdorimi dhe importimi i mjeteve piroteknike.
“Jashtëzakonisht një gjendje për keqardhje, se si është e mundur ky popull festën me kthye ne tragjedi... Çdo herë po përsëritet e njëjta gjë herë me raste më pak, e herë me raste më shumë që të apeloni që këto mjete piroteknike të ndalohen” ,deklaroi specialisti i mjekësisë emergjente.
Mbrëmë deri rreth orës 02:00 pas mesnatës si pasojë e lëndimeve nga mjetet piroteknike u raportuar të lënduar 35 persona./KP/
Me pikëllim të madh u bë i ditur lajmi për ndarjen nga jeta të ish-Kryetarit të Kuvendit të Kosovës. Nexhat Daci, një figurë e shquar institucionale dhe akademike në vend.
Figura e tij është përkujtuar nga shumë personalitete të jetës politike dhe publike të Kosovës.
Ish-presidentja Atifete Jahjaga ka shkruar se kontributi i Dacit do të kujtohet përherë.
“Lajm i hidhur vdekja e ish-Kryetarit të Kuvendit të Kosovës, z. Nexhat Daci. Kontributi i tij për institucionet dhe jetën publike në Kosovë do të kujtohet përherë. Në këto momente të rënda, i shpreh ngushëllimet më të sinqerta familjes, miqve dhe bashkëpunëtorëve të tij. I lehtë i qoftë dheu i Kosovës”, ka shkruar Jahjaga.
Për vdekjen e Nexhat Dacit, ka reaguar edhe kryetari i PDK-së, Bedri Hamza i cili shprehu ngushëllimet e tij duke theksuar rolin e Dacit në zhvillimin institucional.
“Ndarja nga jeta e Nexhat Dacit është një humbje e madhe për Kosovën. Ai ishte institucionalist dhe akademik i përkushtuar, që kontribuoi shumë në jetën publike, duke besuar në rendin kushtetues, dialogun institucional dhe dijen si udhërrëfyes të shoqërisë. Trashëgimia e akademik Nexhat Dacit është pjesë e pandashme e themeleve të shtetndërtimit të Kosovës”, u shpreh Hamza.
Kryetari i Lidhjes Demokratike të Kosovës, Lumir Abdixhiku i shprehi gjithashtu ngushëllime familjes Daci dhe gjithë miqëve e bashkëpunëtorëve me rastin e ndarjes nga jeta të Akademik Nexhat Daci.
“Me dhimbje të thellë mora lajmin për ndarjen nga jeta të ish-Kryetarit të Kuvendit të Republikës së Kosovës, akademikut dhe profesorit Nexhat Daci.Akademik Daci ishte një figurë e veçantë e jetës sonë publike dhe akademike, që me dije të thellë, integritet dhe përkushtim i shërbeu vendit si Kryetar Kuvendi, deputet, akademik dhe drejtues i institucioneve shkencore. Veprimtaria e tij la gjurmë të pashlyeshme në ndërtimin e institucioneve demokratike dhe në zhvillimin e mendimit shkencor në Kosovë", ka shkruar Abdixhiku.
Reagim ka pasur edhe nga ish-presidenti i Behgjet Pacolli, i cili ndau një kujtim personal me akademikun Nexhat Daci.
“Kur u njoha me të për herë të parë, fjalët e tij, porosia dhe qetësia me të cilën i shprehu, u ngulitën përgjithmonë në kujtesën time dhe u shndërruan në një obligim moral për mua. Ai më tha: ‘Zotni Pacolli, do të doja shumë që kjo ndërtesë të marrë një frymë të re — hapësira moderne, dinjitoze, që të përfaqësojnë të ardhmen e Kosovës.’ Për të kam pasur gjithmonë një respekt të veçantë. U prehtë në paqe”, u shpreh Pacolli.
Edhe kryetari i Nisma Socialdemokrate, Fatmir Limaj ka reaguar pas vdekjes së akademikut Nexhat Daci.
“Nexhat Daci ishte njeri i dijes dhe i parimit, institucionalist i bindur dhe shërbyes i përgjegjshëm i shtetit. Ai i qëndroi besnik idesë së institucioneve, dialogut dhe rendit kushtetues, duke dhënë një kontribut të çmuar në ndërtimin e demokracisë parlamentare dhe të themeleve të shtetit tonë. Gjurmët e tij në jetën institucionale të Kosovës mbeten të pashlyeshme”, u shpreh Limaj.
Ndër të tjerët, liderët politikë shprehën mirënjohje dhe dhimbje për humbjen e një njeriu që kishte një rol vendimtar në jetën publike dhe institucionale të vendit. /Telegrafi/
Kryetari i komunës së Prishtinës, Përparim Rama është befasuar nga rezultati i Lidhjes Demokratike të Kosovës gjatë zgjedhjeve të parakohshme të 28 dhjetorit, e cila mori 52 mijë vota më pak nëse krahasohen me dy palë zgjedhje parlamentare të mbajtura këtë vit.
Sipas rezultateve preliminare të Komisionit Qendror të Zgjedhjeve, Lidhja Demokratike e Kosovës ka 13.57 përqind apo 119 mijë e 201 vota, një rënie e madhe në krahasim me zgjedhjet e 9 shkurtit ku ka pasur 18.27 përqind, apo pesë ulëse më pak në Kuvendin e Kosovës.
Në intervistën për KosovaPress, Rama thotë se LDK dhe partitë opozitare duhet të reflektojnë dhe të rishikojnë arsyen pse ka ndodhur kjo rënie e tyre, të kenë një program i cili u mundëson ringritjen sepse sipas tij duhet të ketë një opozitë të fortë.
Derisa kryetari aktual i LDK-së, Lumir Abdixhiku në një konferencë për media nuk ka përjashtuar mundësinë e dorëheqjes, Rama ka mohuar se synon drejtimin e partisë.
Rama ka shtuar se LDK-ja ka njerëz të cilën mund ta kryejnë këtë detyrë nëse Abdixhiku vendos të largohet nga pozita.
“Nuk është e vërtetë, unë jam kryetar i kryeqytetit e kam një mandat katër vjeçar, ky është fokusi im, të transformoj kryeqytetin, kjo është vota e qytetarëve dhe unë do të jem këtu për kryeqytetin për të mirën e gjithë vendit. LDK-ja ka njerëz përbrenda partisë të cilët munden me kry këtë detyrë nëse po them, kryetari i tanishëm vendos që të lëshojë udhë dikujt tjetër... Nuk jam i interesuar, nuk kam interes... Dashnia ime është që t'iu ndihmoj të gjithë qytetarëve të kryeqytetit përtej ngjyrosjeve partiake dhe normal që do t'i ndihmoj kushdo që ka nevojë për ndihmë”, thotë ai.
Për raportet me lidershipin aktual të LDK-së, Rama thotë se ka ndihmuar atë në zgjedhjet lokale dhe në mënyrë të njëjtë ka ndihmuar në zgjedhjet nacionale të 9 shkurtit dhe 28 dhjetorit, ani pse thekson se nuk është anëtaë i LDK-së.
“Kam raporte të mira me të gjithë sepse po them edhe Lidhja Demokratike më ka ndihmuar gjatë procesit të zgjedhjeve lokale. Unë po ashtu i kam ndihmuar edhe në shkurt edhe tash Lidhjes Demokratike, pra është një bashkëpunim i mirëfilltë, i shëndoshë ku edhe Lidhja Demokratike mendon përtej partisë, ka ftuar njerëz si unë që nuk jam anëtar i Lidhjes Demokratike dhe kemi punuar mirë për me çuar proceset e kryeqytetit përpara. Të njëjtën kohë po them edhe unë, përkundër faktit që nuk jam anëtar, i kam ndihmuar ose jam munduar me i ndihmu partisë së Lidhjes Demokratike të Kosovës që të ecë përpara sepse kanë me të vërtetë një program të mirëfilltë në të gjitha sferat. Edhe po ashtu e kemi pasur një kontratë prej 1.5 miliardësh për kryeqytetin në rast se e kishim pasur në qeverisje Lidhjen Demokratike”, ka thënë Rama.
I pari i Prishtinës uron për qeverisjen e re që të jetë më bashkëpunuese e jo siç thotë ai, bllokuese e sabotuese.
“Ishte me të vërtetë befasuese, por përkundër faktit po them, çdo gjë ka shkuar në rregull edhe kjo tregon që kemi një ngritje ashtu shoqërore të vlerave demokratike në të gjithë Kosovën, që është një çështje super pozitive dhe uroj çfarëdo qeverisje që të ketë, që të jetë pro bashkëpunimit, jobllokuese, sabotuese. Nuk na duhet kjo mendësia bllokuese, sabotuese, duhet të bashkëpunojmë me njëri-tjetrin për të ngritur vlerat tona të përbashkëta për vendin tonë. Prandaj edhe partitë opozitare duhet të reflektojnë edhe me e ditë pse ka ndodhur ajo, e të kenë një program i cili ju mundëson ringritjen dhe ju mundëson një opozitë të mirëfilltë sepse duhet të ketë një opozitë të fortë. Pozita me një opozitë të fortë e çon vendin përpara më mirë e më shpejt”, ka thënë Rama.
Zgjedhjet e 28 dhjetorit sipas rezultateve preliminare të KQZ-së, i ka fituar Lëvizja Vetëvendosje me në krye Albin Kurtin me 49.34 përqind apo 433 mijë e 394 vota. /KP/
Kryeministri në detyrë i Kosovës, Albin Kurti, ka shprehur ngushëllimet e tij pas lajmit për vdekjen e Nexhat Dacit, ish-Kryetarit të Kuvendit dhe ish-Kryetarit të Akademisë së Shkencave dhe Arteve të Kosovës.
Në një deklaratë, Kurti tha se Daci do të mbetet një emër me rëndësi në shtetndërtimin e Kosovës.
“Ngushëllime familjes Daci, kolegëve të tij profesorë dhe akademikë, si dhe bashkëpunëtorëve të tij. Nexhat Daci do të mbetet një emër me rëndësi në historinë e shtetndërtimit të Republikës së Kosovës”, shkroi Kurti.
Kryeministri në detyrë ka shtuar se kontributi i Dacit do të kujtohet gjithmonë.
“Kontributi i tij në arsimin, shkencën dhe shtetndërtimin e Kosovës do të kujtohet gjithmonë. Lamtumirë një akademiku dhe politikanit të shquar”, u shpreh Kurti.
Kurti theksoi se Nexhat Daci, i cili shërbeu si kryetar i Kuvendit të Kosovës dhe si udhëheqës i Akademisë së Shkencave dhe Arteve të Kosovës, do të mbahet mend për rolin e tij të rëndësishëm në politikën dhe arsimin e vendit. /Telegrafi/
Para ndërrimit të motmoteve, kryetari i Prishtinës, Perparim Rama së bashku me bashkëshorten Kristalen, Tigrin dhe Drejtorin për Siguri dhe Emergjenca në Kryeqytet, vizituan Policinë e Kosovës.
Gjatë vizitës, Rama vlerësoi profesionalizmin, përkushtimin dhe përgjegjësinë e lartë të punonjësve policorë, të cilët çdo ditë kontribuojnë në ruajtjen e sigurisë, rendit publik dhe besimit qytetar.
“Policia e Kosovës përfaqëson shtyllën themelore të sigurisë dhe rendit publik. Me respekt dhe mirënjohje të thellë, vlerësojmë punën e palodhshme, guximin dhe sakrificën e zyrtarëve policorë, të cilët me integritet dhe dinjitet kontribuojnë në ruajtjen e paqes dhe stabilitetit,” tha Rama.
Ai gjithashtu shtoi se angazhimi i vazhdueshëm i policisë mbetet i çmuar dhe i domosdoshëm për funksionimin e një shoqërie të sigurt dhe demokratike.
Në përfundim të vizitës, Perparim Rama uroi qytetarët për një vit të ri të lumtur dhe të shëndetshëm. /Telegrafi/
Presidentja Vjosa Osmani ka reaguar pas ndarjes nga jeta të ish-kryeparlamentarit dhe akademikut Nexhat Daci, duke shprehur pikëllimin e saj dhe ngushëllimet për familjen dhe bashkëpunëtorët e tij.
"Akademik Daci ishte një personalitet i rrallë, i cili bashkoi dijen shkencore, përkushtimin akademik dhe angazhimin institucional, duke lënë gjurmë të pashlyeshme si Kryetar i Kuvendit, deputet, akademik dhe udhëheqës i institucioneve shkencore të vendit”, thuhet në reagimin e Osmanit.
Presidentja shtoi se Daci ishte bashkëpunëtor i afërt i presidentit historik Ibrahim Rugova.
"Akademik Nexhat Daci u angazhua fuqishëm në shërbim të kauzës për liri dhe pavarësi, si bashkëpunëtor i afërt i Presidentit historik, Dr. Ibrahim Rugova. Me dije, maturi dhe vizion, ai dha një kontribut të çmuar në vendosjen e themeleve të forta të shtetit të Kosovës", ka theksuar Osmani.
Presidentja përfundoi reagimin me ngushëllime për të gjithë ata që e njohën.
"Në këto çaste të rënda, shpreh ngushëllimet më të sinqerta për familjen Daci, miqtë, bashkëpunëtorët dhe të gjithë ata që patën fatin ta njohin dhe të punojnë me të. I përhershëm qoftë kujtimi për Akademik Nexhat Dacin!". /Telegrafi/
Një incident është raportuar më 31 dhjetor 2025, rreth orës 15:28, në fshatin Llapushnik, ku një mashkull kosovar ka njoftuar policinë se një person kishte vënë zjarr qëllimisht në një pjesë të sektorit të pijeve brenda një marketi.
Njësitë policore kanë dalë menjëherë në vendin e ngjarjes për të menaxhuar situatën dhe për të kryer veprimet e nevojshme hetimore.
Lidhur me rastin, në stacion policor është shoqëruar një i dyshuar i mitur, shtetas i Holandës.
Pas konsultimit me prokurorin kompetent, rasti është cilësuar dhe është vendosur që lënda të procedohet në procedurë të rregullt.
Hetimet lidhur me këtë rast janë duke vazhduar. /Telegrafi/
Nexhat Daci, ishte një figurë e shquar në jetën akademike dhe politike të Kosovës.
Ai lindi në Tërnoc të Bujanocit dhe kreu shkollimin fillor dhe të mesëm në vendlindje dhe në Leskovc (1960). Studimet e larta për kimi i përfundoi në Fakultetin e Shkencave Matematike-Natyrore të Universitetit të Beogradit (1966), ku mbaroi edhe studimet pasuniversitare (1968), dhe më pas kreu një kurs pasuniversitar në Liezh, Belgjikë (1970).
Tezën e doktoratës e mbrojti në Universitetin e Zagrebit (1973), ndërsa studimet e pasdoktoratës i vazhdoi në Universitetin e Bradfordit, Angli (1974).
Nga viti 1966 e tutje, Daci zhvilloi një karrierë të gjatë akademike në Universitetin e Prishtinës, ku u zgjodh asistent, më pas ligjërues, profesor inordinar dhe në vitin 1984 mori titullin profesor ordinar.
Ai ka bërë udhëtime studimore në shumë vende të botës dhe ka qenë anëtar i institucioneve ndërkombëtare, përfshirë Shoqatën e Kimistëve Amerikanë (1985) dhe Akademinë Europiane për Çështje të Mjedisit (1987).
Në vitin 1994 u zgjodh anëtar korrespondent i Akademisë së Shkencave dhe Arteve të Kosovës (ASHAK), ndërsa në vitin 1996 u bë anëtar i rregullt, më pas sekretar i përgjithshëm dhe kryetar i ASHAK (1999–2002). Në vitin 2014 u bë anëtar i Akademisë Europiane të Shkencave dhe të Arteve (ALLEA).
Veprimtaria shkencore e Dacit përfshinte studime mbi strukturën e substancës organike dhe inorganike të qymyrit të Kosovës, analizën e hirit nga termocentralet, mbrojtjen e mjedisit dhe trajtimin e ndotësve të ujërave urbane dhe industriale.
Ai ishte autor i teksteve universitare dhe monografive, si “Kimia organike” dhe “Struktura e substancave organike të qymyrit të Kosovës”, si dhe bashkautor i studimeve ndërkombëtare mbi kiminë për mbrojtjen e mjedisit.
Në jetën politike, Nexhat Daci ishte deputet i Parlamentit të Kosovës (2001–2011), kryetar i Kuvendit të Kosovës (2001–2006) dhe përkohësisht President në detyrë pas vdekjes së Ibrahim Rugovës (2006). Në vitin 2007 themeloi Lidhjen Demokratike të Dardanisë dhe u bë kryetar i saj, duke lënë gjurmë në skenën politike të vendit. /Telegrafi/
Ka ndërruar jetë akademiku Nexhat Daci, i cili ka shërbyer si Kryetar i Kuvendit të Kosovës dhe përkohësisht si President në detyrë pas vdekjes së Ibrahim Rugovës në vitin 2006.
Lajmin e ka bërë të ditur kryetari në detyrë i Kuvendit ,Dimal Basha.
"Me pikëllim të thellë mora lajmin për ndarjen nga jeta të ish-Kryetarit të Kuvendit të Kosovës, akademik Nexhat Daci, një figurë të shquar të jetës politike dhe publike të vendit tonë.Në emrin tim personal dhe në emër të Kuvendit të Republikës së Kosovës, i shpreh ngushëllimet më të sinqerta familjes Daci, miqve, kolegëve dhe bashkëpunëtorëve të tij", ka shkruar Basha.
Basha ka shtuar se gjatë viteve të shërbimit të tij në krye të Kuvendit të Kosovës, ai la gjurmë të pashlyeshme në historinë e demokracisë parlamentare të vendit tonë.
"Me vizion, maturi dhe përkushtim, z. Daci kontribuoi në ndërtimin e institucioneve demokratike, në forcimin e Kuvendit si zë i qytetarëve dhe në avancimin e proceseve politike në prag të shtetësisë së Kosovës.Trashëgimia e tij politike mbetet pjesë e historisë së Kuvendit dhe e përpjekjeve tona për shtetndërtim.U prehtë në paqe", u shpreh Basha.
Daci ishte gjithashtu themelues i Lidhjes Demokratike të Dardanisë dhe ka mbajtur një rol të rëndësishëm në politikën kosovare edhe pas përfundimit të mandatit si kryeparlamentar.
Aktiviteti i tij politik ka lënë gjurmë në zhvillimin institucional dhe parlamentar të vendit. /Telegrafi/
Tre persona kanë humbur jetën si pasojë e një aksidenti të rëndë rrugor të ndodhur në orët e para të mëngjesit të sotëm në aksin nacional Gjirokastër-Tepelenë, në zonën e Bypass-it.
Sipas të dhënave paraprake, përplasja ka ndodhur rreth orës 03:18 mes dy automjeteve që lëviznin në këtë segment rrugor.
Mjetet drejtoheshin nga dy të rinj, 25 dhe 24 vjeç, të dy banues në Tepelenë.
Përplasja rezultoi fatale për të dy drejtuesit e automjeteve, si edhe për një pasagjer 27-vjeçar që udhëtonte në njërin prej mjeteve.
Ndërkohë, një vajzë 19-vjeçare ka mbetur e plagosur dhe është dërguar me urgjencë në Spitalin e Traumës, ku po merr ndihmën mjekësore.
Në vendngjarje ndodhen shërbimet e policisë dhe grupi hetimor, të cilët po punojnë për të sqaruar rrethanat dhe shkaqet e aksidentit.
Si pasojë, qarkullimi i automjeteve në këtë aks është zhvilluar me vështirësi për disa orë./euronews/
Procesi i numërimit të votave në zgjedhjet e fundit në Kosovë, i ndërprerë dje në orën 12:00, do të vazhdojë sot, nga ora 16:00.
Sipas të dhënave të Komisionit Qendror të Zgjedhjeve (KQZ), deri tani janë numëruar mbi 78% e votave nga 2,009 vendvotime.
Rezultatet e deritanishme tregojnë se Lëvizja Vetëvendosje (LVV) ka fituar gati 334 mijë vota, duke ruajtur një përqindje prej 48.48%.
Partia Demokratike e Kosovës (PDK) qëndron tek 21.72% me 150 mijë vota, ndërsa Lidhja Demokratike e Kosovës (LDK) ka arritur mbi 87 mijë vota, afërsisht 13%.
Aleanca për Ardhmërinë e Kosovës (AAK) ka siguruar mbi 38 mijë vota, ose 5.61%, duke siguruar praninë në Kuvend, ndërsa NISMA mbetet me rreth 12 mijë vota (1.68%), jashtë pragut për të hyrë në Kuvend.
Nga komunitetet, Lista Serbe konfirmon 9 deputetë me mbi 40 mijë vota, ndërsa partia e Nenad Rashiq ka siguruar një deputet. Përfaqësuesja boshnjake, Duda Balje, mbetet jashtë Kuvendit.
Numërimi do të vazhdojë sot në 11 komuna: Prishtinë, Pejë, Prizren, Podujevë, Mitrovicë e Jugut, Gjakovë, Malishevë, Lipjan, Gjilan, Ferizaj dhe Suharekë.
Në Qendrën e Numërimit dhe Rezultateve, shërbimi votues i KQZ-së ka vazhduar të përgatisë paketat e supozuara me fletëvotime nga votimi jashtë Kosovës dhe përmes postës. Nga totali prej 58 mijë votuesve të regjistruar për të votuar jashtë vendit, disa pako tashmë janë pranuar, ndërsa numërimi i tyre pritet të fillojë gjatë kësaj jave.
Po ashtu, pritet të numërohen edhe mbi 9,900 vota me kusht, votat e 2,860 votuesve me nevoja të veçanta dhe mbi 16 mijë vota nga vendvotimet në konsullata dhe ambasada në shtete të ndryshme të botës.
Numërimi përfundimtar i votave do të përcaktojë shpërndarjen përfundimtare të deputetëve në Kuvendin e Kosovës./Telegrafi/
Një rast i hetimit të vdekjes është raportuar më 31 dhjetor 2025 në qytetin e Gjilanit, ku një mashkull kosovar është gjetur pa shenja jete në shtëpinë e tij.
Sipas njoftimit, në vendin e ngjarjes kanë dalë njësitë policore si dhe ekipi mjekësor emergjent, i cili ka konstatuar vdekjen e viktimës. Një dëshmitar ka deklaruar se viktima jetonte i vetëm.
Me urdhër të prokurorit kompetent, trupi i pajetë është dërguar në Institutin e Mjekësisë Ligjore (IML) për obduksion, me qëllim të sqarimit të rrethanave të vdekjes.
Rasti është duke u trajtuar nga organet kompetente./Telegrafi/
Ndonëse është obligim, megjithatë janë rreth 100 zyrtarë publikë të cilët nuk kanë deklaruar pasurinë e tyre në Agjencinë e Parandalimit për Korrupsion, e ndaj të cilëve iu janë dhënë edhe gjoba.
Një rritje e lehtë vlerësohet të jetë bërë edhe për rastet e konfliktit të interesit.
Nga këta zyrtarë, Drejtori i Agjencisë për Parandalimin e Korrupsionit, Yll Buleshkaj në një intervistë për Agjencinë e Lajmeve Ekonomia Online, tregon se 15 prej tyre nuk i kanë paguar gjobat dhe ndaj të cilëve është dorëzuar kallëzim penal në Prokurorinë e Shtetit.
“Ne tashmë jemi në një nivel të qëndrueshëm të deklarimit të pasurisë. Kemi pasur një rritje mjaft të madhe të atyre që janë të obliguar për deklarim. Vitin e kaluar kemi pasur përgjigje më të mirë, ndërsa këtë vit kemi pasur përgjigje më të dobët. Ka pasur rreth 100 persona që nuk e kanë deklaruar pasurinë dhe, fatkeqësisht për ta, të gjithë kanë pranuar gjoba, ndërsa shumica prej tyre i kanë paguar. Ata që nuk i kanë paguar janë tashmë në proces të mbledhjes së gjobave përmes punëdhënësve të tyre. Një numër prej 15 zyrtarësh janë vonuar më shumë se 15 ditë dhe ne kemi dorëzuar kallëzime penale në Prokurorinë e Shtetit. Ata do të përballen me prokurorinë për shkak të vonesave në deklarim. Jemi tashmë në fazën finale të verifikimit të pasurisë për këtë vit", tha Buleshkaj.
Buleshkaj shtoi se zyrtarët publikë e dinë se ky vit ka qenë viti me numrin më të madh të zyrtarëve që kanë pranuar komente nga ne – mbi 1.000 prej tyre kanë pranuar komente nga agjencia dhe janë kërkuar shpjegime shtesë.
"Kjo na është mundësuar nga zhvillimi i metodologjisë që e kemi bërë me Këshillin e Evropës. Metodologjia e verifikimit është më e avancuar dhe, rrjedhimisht, kemi gjetur më shumë mospërputhje dhe kemi kërkuar më shumë shpjegime. Nuk mund të flas për rezultatin final dhe për numrin e rasteve që mund të dërgohen si kallëzime penale apo informata në polici apo prokurori, por këtë vit me siguri zyrtarët publikë e kanë ndier më afër punën e agjencisë”, tha Buleshkaj.
APK gjatë 2025-ës vlerësojnë të kenë pasë një rritje prej 50 për qind nga viti paraprak sa i përket sinjalizimit të konfliktit të interesit.
“Agjencia për Parandalimin e Korrupsionit ka zhvilluar mjaft aktivitete, të cilat kanë pasur për synim parandalimin e korrupsionit. Kemi zhvilluar aktivitete me zyrtarë publikë, sepse kemi vërejtur se ka nevojë të flitet me ta dhe të ngritet vetëdija e tyre, sidomos për atë se çfarë është konflikti i interesit, si mund të përdoret mekanizmi i sinjalizimit, por edhe për rëndësinë e planit të integritetit në kryerjen e punëve të institucioneve dhe në ruajtjen e integritetit të tyre. Ne besojmë se këtë vit kemi qenë më mirë se vitin e kaluar; rrjedhimisht janë pranuar dhe raportuar më shumë shkelje, të cilat janë identifikuar në secilin proces.
Kemi pasur rritje të raportimeve në secilën fushë tonën, duke filluar nga sinjalizimet, të cilat janë rritur për 50% në raport me vitin paraprak. Po ashtu, këtë vit kemi pasur raportime më kualitative sa i përket sinjalizimit të vërtetë të konfliktit të interesit, si dhe nga palët e jashtme, të cilat kanë identifikuar pasuri të zyrtarëve publikë që nuk janë deklaruar. Rrjedhimisht, besojmë se ka qenë një vit më i mirë se viti paraprak dhe shpresojmë që viti i ardhshëm të jetë edhe më i mirë”, tha ai.
APK dërëzoi 130 kallëzime penale por jo të gjitha kanë të bëjnë më deklarim të pasurisë. Buleshkaj gjatë intervistës tregoi se ka të bëjë edhe me rastet që lidhen me konflikt interesi të zyrtarëve publikë.
“Këtë vit kemi dorëzuar mbi 130 kallëzime penale. Jo të gjitha kanë qenë të lidhura me deklarimin e pasurisë; kemi pasur një numër të caktuar edhe për konfliktin e interesit. Rreth pesë raste kanë qenë të lidhura me vendimmarrjen në konflikt interesi të zyrtarëve publikë, qoftë duke qenë pjesë e paneleve të rekrutimit, qoftë për përfshirje në punësim pas lirimit nga funksioni publik, pasi ekziston ndalesë dyvjeçare për të marrë punë nga punëdhënësi tek i cili është ushtruar funksioni drejtues. Po ashtu, kemi pasur kallëzime penale për konflikt interesi në procedurat e vlerësimit të tenderëve të ndryshëm. Kemi rritje, sepse më herët numri i kallëzimeve penale për këto procedura ka qenë pothuajse zero, ndërsa këtë vit kemi verifikuar më shumë”, tha ai.
Mirëpo Buleshkaj ka nënvizuar se shumica dërmuese e kallëzimeve penale për deklarim të pasurisë janë hedhur poshtë nga prokuroria.
Këtu janë dy fusha të ndryshme. Nëse flasim për kallëzimet penale që kanë të bëjnë me deklarimin e pasurisë, ato nuk janë trajtuar siç duhet. Shumica dërrmuese e tyre janë hedhur poshtë nga prokuroria, duke u thirrur në një vendim të kundërligjshëm, sipas nesh, të Gjykatës Supreme, i marrë vitin e kaluar. Ndërsa për fushat e tjera, ka pasur trajtim adekuat”, shtoi Buleshkaj.
Ndërsa për rastet me konflikt interesi, Drejtori i departamentit për parandalimin e konflikt interesi në APK, Esad Ejupi për Ekonomia Online thotë se mënyra më e mirë për t’i parandaluar ato, është nëse raportohen në kohë.
“Numri i rasteve me konflikt interesi, fatmirësisht, nuk është rritur shumë, por adresimet në agjenci janë shtuar, dhe kjo na gëzon, pasi na mundëson t’i parandalojmë rastet. Sa më shumë që ka adresime në agjenci për parandalimin e konfliktit të interesit, aq më shumë ato parandalohen. Ne vazhdojmë me strategjinë që kemi, e cila është forcimi i autoriteteve përgjegjëse në institucione, sepse mënyra më e mirë për parandalimin e konfliktit të interesit është që situatat e konfliktit të interesit të deklarohen me kohë dhe të parandalohen në burim, siç themi ne. Në këtë mënyrë, dëmet janë më të vogla, nuk ka vendimmarrje me konflikt interesi dhe nuk ka pasoja juridike", u shpreh Buleshkaj, duke shtuar se fokusi është që t’i forcojmë autoritetet përgjegjëse nëpër institucionet publike.
"Përfshirja është në të gjitha fushat, sepse konflikti i interesit lidhet me vendimmarrjen, dhe vendimmarrje ka në të gjitha institucionet publike. Tash për tash nuk kam numra të saktë se ku ka më shumë e ku më pak raste, mirëpo përgjithësisht të gjitha institucionet kanë situata që lidhen me konfliktin e interesit dhe i adresojnë ato tek ne”, tha ai.
Për mundësinë e ushtrimit të presionit nga faktor të jashtëm për mos trajtim të rasteve. Ejupi potencoi se për sa kohë që ushtron detyrën një gjë e tillë nuk ka ndodhur.
“Jam prej vitesh në agjenci dhe, as personalisht e as institucionalisht, nuk di që kemi pasur presion nga jashtë. Në këtë aspekt gëzojmë besim, i cili është rritur, ndërsa presion nuk ka pasur”, shtoi ai./EO/
Policia e Kosovës ka zbatuar një plan operativ me masa të shtuara sigurie gjatë festës së ndërrimit të mot-moteve, me qëllim të garantimit të rendit publik dhe sigurisë së qytetarëve në mbarë vendin.
Sipas njoftimit zyrtar, Policia ka rritur prezencën në lokacione ku pritej përqendrim më i madh i qytetarëve, ndërsa “është paraparë shtimi i masave të sigurisë dhe prezencës policore në lokacione apo ambiente ku pritej të ketë përqendrim, festime apo prezencë më të madhe të qytetarëve gjatë festës”.
Në kuadër të këtij plani operativ, Policia ka pasur fokus të veçantë edhe në trafikun rrugor, pikat e kalimit kufitar dhe aeroportin ndërkombëtar.
“Është paraparë kujdes i shtuar në mbikëqyrjen dhe kontrollin në trafikun rrugor, menaxhimin e Pikave të Kalimeve Kufitare përfshirë aeroportin ndërkombëtar dhe brezit kufitar në përgjithësi”, thuhet në njoftim.
Bazuar në raportimet nga Drejtoritë Rajonale Policore, nata e Vitit të Ri ka kaluar me disa incidente të izoluara.
Policia njofton se “janë raportuar incidente me lëndime trupore si pasojë e përdorimit të pakujdesshëm të mjeteve piro-teknike, raste të lëndimeve të lehta nga armë zjarri dhe dëme materiale si pasojë e përdorimit të pakujdesshëm të mjeteve piroteknike (zjarre)”.
Tutje, Policia e Kosovës thekson se të gjitha rastet e raportuara janë dhe do të trajtohen në koordinim me prokuroritë kompetente.
“Policia i ka iniciuar dhe do të vazhdojë t’i trajtojë të gjitha ato raste qofshin vepra penale apo incidente tjera dhe rastet në koordinim me prokurorit kompetente do të përcillen te organet e drejtësisë”.
Në fund të njoftimit, Policia e Kosovës ka uruar qytetarët për Vitin e Ri, duke shprehur mirënjohje për bashkëpunimin e treguar.
“Gëzuar Vitin e Ri 2026, qoftë ky vit i suksesshëm për ju, shëndet, paqe e siguri! Ju falënderojmë për bashkëpunimin dhe besimin e treguar ndaj nesh”, thuhet në njoftim. /Telegrafi/
Një rast i dyshuar i keqpërdorimit të detyrës zyrtare është raportuar më 31 dhjetor 2025 në Spitalin e Gjilanit, konkretisht në repartin e oftalmologjisë.
Sipas raportimit, 185 doza ampula, të cilat ishin duke u ruajtur në frigorifer, janë dëmtuar, ndërsa dyshohet se stafi përgjegjës ka dështuar t’i ruajë ato sipas normave të lejuara.
Si pasojë, është shkaktuar një dëm material që vlerësohet rreth 20.000 euro.
Lidhur me rastin është informuar prokurori kompetent, i cili ka bërë cilësimin e veprës penale.
Rasti është duke u hetuar nga autoritetet përkatëse për të sqaruar përgjegjësinë dhe rrethanat e ngjarjes. /Telegrafi/
Një rast i rëndë është raportuar më 31 dhjetor 2025 në Fushë Kosovë, ku rreth orës 05:30 një grua ka kërkuar ndihmë mjekësore pas një ngjarjeje të dyshuar si dhunim seksual.
Sipas deklarimit të viktimës, asaj fillimisht i janë dhënë alkool dhe substanca narkotike, ndërsa më pas është dhunuar në një motel nga dy persona meshkuj të panjohur. Tutje, viktima ka deklaruar se është futur me forcë në një veturë dhe më pas është lënë në rrugë.
Lidhur me rastin janë njoftuar njësitë policore, ndërsa me vendim të prokurorit kompetent, viktima është dërguar në Institutin e Mjekësisë Ligjore (IML) për ekzaminime të mëtejme.
Rasti është duke u hetuar dhe autoritetet po punojnë për identifikimin dhe arrestimin e personave të dyshuar. /Telegrafi/
Në prag të ndërrimit të motmoteve, kryetari në detyrë i Kuvendit të Kosovës, Dimal Basha, ka vizituar disa prej institucioneve jetike që kujdesen për sigurinë dhe rendin në vend.
Sipas njoftimit, vizita e tij ka nisur në Kazermën e FSK-së “Skënderbeu”, ku është pritur nga Nënkoloneli Basri Topalli. Më pas, Basha ka vazhduar në Stacionin e Policisë në Ferizaj, ku është mirëpritur nga Kapiteni Ismet Dervishi.
Kreu i Kuvendit ka qëndruar edhe në Njësitin për Zjarrfikje dhe Shpëtim në Ferizaj, ku ka takuar Drejtorin e Agjencisë së Menaxhimit të Emergjencave, Genc Metaj. Vizitat janë përmbyllur në Pikën Kufitare në Han të Elezit, ku Basha është takuar me Drejtorin e Policisë Kufitare në Jug, Rexhep Sijarina, Shefin e Ndërrimit Afrim Halili, si dhe me oficerët doganorë, në krye me Udhëheqësin e Ndërrimit, Faton Piraj.
Gjatë këtyre takimeve, kryetari Basha në emër të Kuvendit të Republikës së Kosovës shprehu respektin, vlerësimin dhe mirënjohjen për të gjithë shërbyesit publikë që edhe në orët festive mbeten në krye të detyrës, duke garantuar sigurinë, rendin dhe qetësinë në vendin tonë.
Po ashtu, ai i ka uruar për profesionalizmin dhe kontributin e tyre, duke theksuar se bëhet fjalë për një “kontribut të pazëvendësueshëm për Republikën e Kosovës”, ndërsa u ka uruar Vitin e Ri, “punë të mbarë dhe suksese të shumta”. /Telegrafi/
Një rast i vjedhjes së rëndë është raportuar më 31 dhjetor 2025 në fshatin Korroticë e Epërme, ku persona të panjohur kanë depërtuar me forcë në objektin e Ibër Lepencit.
Sipas ankuesit, meshkuj kosovar, të dyshuarit kanë thyer derën e objektit dhe kanë dëmtuar trafon që vë në funksion pompat e ujit.
Përveç dëmtimit të pajisjes, ata kanë vjedhur edhe kabllot elektrike si dhe vajin e trafos, duke shkaktuar dëme materiale që vlerësohen rreth 15.000 euro.
Në vendin e ngjarjes kanë dalë njësitë përkatëse policore, ndërsa rasti është duke u hetuar nga organet kompetente.
Ende nuk ka të dyshuar apo persona të arrestuar lidhur me këtë rast. /Telegrafi/
Kryeministri i Shqipërisë, Edi Rama, ka ndarë një mesazh urimi në ditën e parë të vitit 2026, duke bërë të ditur se dy vajza janë bebet e para të lindura këtë vit në vend.
Përmes një postimi në rrjetet sociale, Rama njoftoi se njëra nga vajzat ka ardhur në jetë në maternitetin “Mbretëresha Geraldinë”, ndërsa tjetra në maternitetin “Koço Gliozheni”.
“Mirë se erdhët. Dy vajza janë bebet e para të lindura në 2026, njëra në maternitetin ‘Mbretëresha Geraldinë’ dhe tjetra në ‘Koço Gliozheni’”, ka shkruar kryeministri.
Postimi i Ramës është shoqëruar me urime dhe reagime të shumta nga qytetarët, të cilët i kanë uruar shëndet foshnjave dhe familjeve të tyre./Telegrafi/
Login
