Qytetarët e Vlorës janë dyndur sot në dyert e Bashkisë së Vlorës duke protestuar pasi prej 4 ditësh qyteti nuk furnizohet me ujë. Në sheshin përpara bashkisë shihet një numër i konsiderueshëm qytetarësh, të cilët po përplasen me policinë duke tentuar të futen në ambientet e brendshme të bashkisë.

Në drejtim të efektivëve të policisë, qytetarët kanë hedhur letra higjienike ndërsa me bidonë në duar kërkojnë prezencën e kryetares së bashkisë, Brunilda Mersini.

Protestat kanë nisur që prej mbrëmjes së djeshme në dyert e teatrit “Petro Marku” ku bashkia kishte organizuar mbrëmje gala me rastin e festave të fundvitit. Qytetarët arritën të futeshin brenda duke ndaluar zhvillimin e koncertit të planifikuar e më pas tentuan bllokimin e bulevardit “Ismail Qemali”.

Ka qenë një defekt i shkaktuar në linjën kryesore të transmetimit që ka ndërprerë furnizimin me ujë. Konkretisht, defekti ka ndodhur në tubin kryesor që furnizon depot e qytetit, me diametër 1000 milimetra, çka ka bërë që Vlora të mbetet pa ujë. Kjo linjë është një investim i vitit 2009-2010. Po vijon puna nga ana e autoriteteve për të rregulluar avarinë, gjë për të cilën janë bërë prova, por të dyja kanë rezultuar të pasuksesshme.

Në dyert e Bashkisë së Vlorës qytetarët janë dyndur duke protestuar pasi prej 4 ditësh qyteti nuk furnizohet me ujë për shkak të një defekti në linjën kryesore. Njëri prej qytetarëve ka telefonuar kryebashkiaken Brunilda Mersini, e cila nuk ndodhet në bashki, por tha se është prezente tek ujësjellësi ku dhe ka ndodhur defekti.

Qytetari i është përgjigjur se ajo nuk ndodhet tek ujësjellësi pasi atje ka gazetarë, ndërsa i kërkon që të vijë dhe të bisedojë më qytetarët për problematikën e krijuar tashmë prej 4 ditësh. Më pas Brunilda Mersini u ka mbyllur telefonin.

Ndërron jetë një i dënuar në burgun e Shënkollit në Lezhë.

Sipas informacioneve 50- vjeçari rezulton i dënuar për dhunë në familje.

Viti 2025 u shënua nga një seri ngjarjesh që tronditën vendin tonë dhe lanë gjurmë të thella në jetën e shumë familjeve. Gjatë këtij viti, 39 persona humbën jetën në mënyra të ndryshme – disa si pasojë e konflikteve të vjetra, disa për hakmarrje, të tjerë për mosmarrëveshje banale ose tragjedi aksidentale. Secila vrasje përmban një histori të dhimbshme pas saj: plagë të hapura, zemra të thyera dhe komunitete të tronditura. Nga qytetet e mëdha deri te fshatrat më të vegjël, dhuna dhe krimi u bënë pjesë e përditshmërisë, duke nxjerrë në pah nevojën për ndërgjegjësim, drejtësi dhe siguri për të gjithë.

*Ramazan Mataj u ekzekutua në Shkodër në një atentat mafioz të ndodhur në zonën e Dragoçit, më 4 janar, teksa po kthehej me automjet drejt banesës së tij. 33-vjeçari u qëllua me breshëri arme zjarri të tipit kallashnikov, rreth një vit pasi ishte kthyer nga Belgjika në Shqipëri.
Sipas hetimeve, Ramazan Mataj kishte pasur për një kohë të gjatë një lidhje dashurie me një vajzë nga fshati i tij. Kjo marrëdhënie konsiderohej e ndaluar nga familja e së resë, e cila e kishte martuar atë dy herë. Dyshohet se të dyja martesat janë prishur pikërisht për shkak të kësaj historie dashurie, të cilën të rinjtë nuk e ndërprenë. Situata nuk u pranua nga vëllai i madh i vajzës, i cili në një rast kishte deklaruar se i kishte parë ata së bashku.
I ndikuar nga mllefi i grumbulluar, mentaliteti dhe rrethi shoqëror, si dhe nga fakti që motra e tij ishte dëbuar nga familja, Arjon Hasaj, 29 vjeç, dyshohet se thuri planin për të vrarë bashkëfshatarin e tij, Ramazan Matajn. Në lidhje me këtë ngjarje, në pranga ranë dy vëllezërit Arjon dhe Klisman Hasaj, ku ky i fundit dyshohet se ka ndihmuar Arjon Hasajn të fshehë armën e krimit, e përdorur për ekzekutimin e 33-vjeçarit.

*Një sipërfaqe toke që Bujar Nasufi u kishte shitur fqinjëve të tij, familjes Xhani, në zonën e Selitës, u shndërrua vite më vonë në shkak për një konflikt të ashpër, i cili u mbyll vetëm me vrasjen e tij. Mbrëmjen e 12 janarit, 56-vjeçari u ekzekutua teksa po hynte me automjet në oborrin e banesës, ku ndodhej edhe bashkëshortja e tij.
Tetë muaj pas ngjarjes, Policia e Tiranës arriti të zbardhë motivin e eliminimit dhe të identifikojë porositësit e atentatit, të cilët rezultuan të jenë vëllezërit Voltan dhe Jugert Xhani. Sipas hetimeve, trualli që Bujar Nasufi i kishte shitur familjes Xhani, ndonëse pagesat ishin kryer, nuk ishte kaluar kurrë në pronësi të tyre dhe vazhdonte të figuronte në dokumente në emër të 56-vjeçarit.
E njëjta sipërfaqe toke u përfshi më pas në projektin e Unazës së Madhe, çka solli procesin e dëmshpërblimit për pronarët. Për shkak se në dokumente pronar rezultonte Bujar Nasufi, shteti i kaloi atij shumën e dëmshpërblimit prej rreth 30 mijë eurosh. Megjithatë, pasi përfitoi paratë, 56-vjeçari nuk ia dorëzoi familjes Xhani, duke ndezur një konflikt që zgjati për disa vite.
Duke mos e pranuar këtë situatë dhe të nxitur nga përplasjet e vazhdueshme, vëllezërit Voltan dhe Jugert Xhani dyshohet se porositën një vrasës me pagesë për eliminimin e Bujar Nasufit.

*81-vjeçari Xhemal Meta u gjet i pajetë më 13 janar në fshatin Shëngjin i Vogël, në Tiranë. Sipas hetimeve, viktima u qëllua për vdekje me çekiç nga 64-vjeçari Isuf Hasa, i cili e goditi Metën në pjesën e pasme të kokës, duke i shkaktuar humbjen e jetës. Pas krimit, autori dyshohet se fshehu mjetin e përdorur, çekiçin, në banesën e vajzës së tij, ndërsa nga viktima mori edhe një shumë parash prej 200 mijë lekësh.
Pas arrestimit, Isuf Hasa deklaroi se kishte shkuar në shtëpinë e Xhemal Metës, ku kishin pirë kafe dhe më pas kishin pasur një debat. Sipas pretendimeve të tij, viktima e bullizonte dhe e ofendonte vazhdimisht, ndërsa gjithashtu kishte ngacmuar edhe bashkëshorten e tij, rrethana që, sipas autorit, çuan në përplasjen fatale.

*30-vjeçari Kristjan Marku u ekzekutua me armë zjarri të tipit pistoletë “Glock” përballë një karburanti, në afërsi të fshatit Novoselë. Nga të paktën 10 të shtëna të drejtuara ndaj tij, Marku u godit nga vetëm dy predha, të cilat rezultuan fatale. Në momentin e atentatit, viktima po udhëtonte nga Fieri drejt Vlorës me automjetin e tij tip “Passat”, me targa “AB 107 PN”, kur paralelisht me mjetin e tij, nga krahu i djathtë i pasagjerit, është afruar një automjet tip “Golf”, nga ku është qëlluar disa herë me pistoletë në drejtim të tij.
Kristjan Marku, i njohur edhe me identitetin Kristi Bardhi, ishte nga Mirdita dhe rezulton të jetë nipi i Martin Bardhit, i cili u vra në Rrëshen në shtator të vitit 2023. Sipas të dhënave hetimore, 30-vjeçari dyshohet se ka qenë i përfshirë edhe si autor në një ngjarje të mëparshme, atë të datës 26 mars 2023, rreth orës 19:00, në Rrëshen, ku pati të shtëna me armë zjarri në drejtim të Saimir Reçit.
Motivi i vrasjes së Kristjan Markut dyshohet të lidhet me sagën e hakmarrjes mes dy fiseve në Rrëshen të Mirditës, një konflikt i përgjakshëm i nisur prej rreth një dekade dhe që deri më tani ka sjellë të paktën shtatë viktima.
Në lidhje me këtë ngjarje, në pranga ka rënë vetëm një nga autorët e dyshuar, Erald Cenaj, ndërsa autorët e tjerë vijojnë të jenë në arrati. Nga hetimet aktive u arrit të dokumentohej se automjeti i përdorur nga autori apo autorët për ekzekutimin e Markut ishte siguruar nga 36-vjeçari Erald Cenaj, i lindur dhe banues në qytetin e Kukësit. Dyshohet se 36-vjeçari e kishte sjellë automjetin tip “Volkswagen Golf” nga jashtë vendit, pasi ai nuk rezulton i regjistruar në Shqipëri. Ndaj tij është ngritur akuza për “sigurim të kushteve dhe mjeteve për të kryer vrasje”.

*Më 16 janar, 34-vjeçari Flamur Kamberi vrau aksidentalisht kushëririn e tij, Vasil Kamberi, teksa ndodheshin në pyll. Ngjarja ndodhi gjatë një daljeje për gjueti, ku dy kushërinjtë ishin të shoqëruar nga tre persona të tjerë. Sipas hetimeve, Flamur Kamberi ka qëlluar aksidentalisht me armën e gjahut drejt 36-vjeçarit Vasil Kamberi, i cili, si pasojë e plagëve të marra, ndërroi jetë gjatë transportimit me helikopter për në spital.
Në vendin e ngjarjes, policia sekuestruar si prova materiale katër armë gjahu (çifte), dy gëzhoja, 22 copë fishekë dhe katër celularë, të cilat ndihmuan në dokumentimin e ngjarjes dhe hetimin e saj.

*Lulzim Visha u gjet i vrarë brenda automjetit të tij më 24 janar, i ekzekutuar me të paktën 12 plumba pistolete.
Si i dyshuar për përfshirje në këtë vrasje u arrestua Eduart Lami, por ndaj tij u ngritën vetëm akuzat për armëmbajtje pa leje, të cilat ai i shlyeu gjatë kohës së qëndrimit në paraburgim. Hetuesit nuk arritën të gjenin prova të tjera që ta lidhin Eduart Lamin me vrasjen e Vishës, dhe për këtë arsye gjykata urdhëroi lirimin e tij nga qelia.
Aktualisht, në kërkim vijon të jetë Ervis Lami, i cili konsiderohet si i dyshuari kryesor për vrasjen e postierit.

*Asim Gjoni, 37 vjeç, u qëllua për vdekje me thikë nga babai i tij, 74-vjeçari Hekuran Gjoni. Ngjarja ndodhi më 1 shkurt tek Kodra e Priftit, në rrugën “Ilia Shyti” në Tiranë, brenda banesës së familjes Gjoni.
Një ditë pas ngjarjes, policia e Tiranës arrestoi autorin e dyshuar. Gjatë deklarimeve të tij, Hekuran Gjoni pretendoi se djali e bullizonte vazhdimisht, duke e shtyrë drejt aktit të rëndë.

*Anila Ndoka, nënë e tre fëmijëve, u qëllua për vdekje me plumb në kokë nga burri me të cilin bashkëjetonte, 34-vjeçari Kol Manaj, 10 vite më i ri se ajo. Pas krimit, autori i dha fund jetës së tij po me plumb në kokë.
Ngjarja ndodhi rreth orës 11:15 në lagjen “Mark Lula”, e njohur ndryshe si zona e ish-fushës së druve, në Shkodër. Në brendësi të automjetit, policia sekuestruar pistoletën me të cilën Kol Manaj qëlloi partneren e tij dhe më pas veten.
Krimi tronditi opinionin publik, por mbi të gjitha familjarët dhe kolegët e Anilës. Ajo ishte divorcuar nga ish-bashkëshorti para tetë vitesh dhe kishte gjetur ‘shpresë’ në një lidhje tjetër, e cila fatkeqësisht përfundoi tragjikisht. Nga martesa e parë kishte tre fëmijë; më i vogli, 10 vjeç, jetonte me të dhe partnerin e saj, ndërsa dy fëmijët më të rritur qëndrojnë me babanë.
Sipas hetimeve, Anila së fundmi kishte tentuar t’i jepte fund bashkëjetesës me Kol Manajn, pasi ai ishte i papunë dhe luante bixhoz. Kjo tentative ndarje përfundoi në mënyrë tragjike, duke i kushtuar jetën.

*67-vjeçari Dod Mamli u gjet i vrarë me armë zjarri nga dy banorë të zonës mbrëmjen e 24 shkurtit, në fshatin Vilëz të Kurbinit. Ekspertiza mjeko-ligjore dhe veprimet në vendin e ngjarjes treguan se ai ishte qëlluar gjashtë herë, një prej plumbave e kishte prekur në kokë dhe dy të tjerët në gjoks.
Si autor i ngjarjes u arrestua Dashnor Tota, 53-vjeç, banues në të njëjtën zonë me viktimën. Në cilësinë e provës materiale, policia sekuestruar gjashtë gëzhoja dhe telefonin e viktimës.
Hetimet e kryera tregojnë se vrasja e Dod Mamlit ndodhi pas një konflikti për çështje pronësie, i cili përshkallëzoi deri në eliminimin e tij fizik.

*Rayyan Alwan, 24-vjeç, një shtetase palestineze, u gjet e vrarë me thikë më 27 shkurt në një shtëpi me qira në Tiranë. Autor i dyshuar i vrasjes është babai i saj, Fadi Alwan, me të cilin kishte mbërritur në Aeroportin e Rinasit më 19 shkurt, ndërsa ajo u vra tre ditë më pas. Trupi i pajetë i të resë u gjet disa ditë pas ngjarjes nga pronarja e banesës.
Fillimisht, raportimet e para treguan se bashkëshorti i vajzës kishte kryer krimin, por hetimet më të thelluara zbuluan se vrasësi ishte babai i saj. Rayyan Alwan, nënë e tre fëmijëve, ishte divorcuar dhe fëmijët jetonin në Liban me babanë e tyre. Ajo kishte nisur një jetë të re në Gjermani, dhe afrimi i saj me traditat perëndimore dyshohet se ka shkaktuar konflikte të vazhdueshme me familjen e saj, përfshirë prindërit dhe vëllezërit. Për këto shqetësime, vajza kishte bërë edhe denoncim në polici në Gjermani.
Hetuesit nuk përjashtojnë mundësinë që në planin për të vrarë vajzën të ketë qenë e përfshirë edhe nëna e saj, megjithatë deri më tani mungojnë prova bindëse për këtë pistë.

*Mengjesin e 27 shkurtit, 20-vjeçari Pavlin Preka u gjet pa shenja jete në oborrin e banesës së tij. Dhjetë muaj pas ngjarjes, policia arrestoi dy autorët e dyshuar, Klaudio Lisaj dhe Vasel Koçeku, të cilët akuzohen për veprat penale “Vrasja me paramendim”, e kryer në bashkëpunim, dhe “Mbajtja pa leje dhe prodhimi i armëve, armëve shpërthyese dhe municionit”.
Sipas raportimeve, ka qenë xhaxhai i viktimës që zbuloi i pari vrasjen e nipit. Ai kishte tentuar të kontaktonte Pavlin Prekën në telefon, por nuk mori përgjigje, dhe më pas shkoi në banesën e tij, ku e gjeti të vrarë në oborr. Xhaxhai deklaroi se Pavlin Preka nuk kishte pasur asnjë konflikt me njeri dhe se familja e tij ishte e thjeshtë, pa probleme të theksuara me komunitetin.
*
Gjovalin Prendi u ekzekutua më 17 prill të këtij viti në Pllanë të Lezhës. Ngjarja ndodhi rreth orës 20:00 brenda lokalit në pronësi të tij, i vendosur pranë rrugës nacionale Lezhë-Milot, në afërsi të Urës së Matit.
Sipas hetimeve paraprake, dyshohet se autorët ishin tre persona. Dy prej tyre zbritën nga makina dhe qëlluan 64-vjeçarin brenda lokalit. Pas vrasjes në Lezhë, në Tiranë ndodhi një tjetër atentat ku mbetën të plagosur katër persona, ndërsa hetuesit dyshojnë se të dy ngjarjet kriminale kanë lidhje me të njëjtën pistë.
Fillimisht, hetuesit menduan se atentatorët mund të kishin gabuar shënjestrën, dhe se objektiv i tyre i vërtetë mund të kishte qenë bashkëshortja e Roan Brahimit, pasi automjeti i saj ngjasonte me atë në të cilin ndodheshin dy djemtë e pronarit të Pelikan Security, shoku i tyre dhe shoferi i familjes.
**
Renato Hoxhaj, 58 vjeç, u ekzekutua me armë zjarri më 27 prill në lagjen “Hajro Çakërri” në Vlorë. Sipas të dhënave zyrtare, ai u qëllua me katër plumba dhe humbi jetën në vendngjarje, ndërsa hetimet tregojnë se në krim janë përdorur dy armë të ndryshme.
Autorët e dyshuar të ngjarjes janë rumuni Daniel Corneas, Kleanth Bylyku dhe Eris Mehmetaj, i fundit dyshohet se ka siguruar automjetin e përdorur për ekzekutimin. Grupi hetimor dyshon se vrasja e 58-vjeçarit është porositur nga Dubai, ku strehohen disa grupe kriminale, pasi ekziston dyshimi se viktima mund të ketë qenë informator për grupin kundërshtar.

*Më 2 maj, turisti amerikan Brendon Saporito vrau me thikë bashkëshorten e tij, Sandra Saporito, në një shtëpi me qira në zonën e Gjuhadolit në Shkodër. Çifti kishte marrë një banesë me qira në këtë lagje historike. Mëngjesin e të premtes, rreth orës 10:00, Brendon e qëlloi disa herë me thikë partneren në banesë, duke i marrë jetën.
Më 28 tetor, Brendon Saporito u gjet i vetëvarur në qelinë e paraburgimit.

*Gerald Bitri, 24-vjeç, humbi jetën tragjikisht më 3 maj pas një përplasjeje me armë zjarri. Ngjarja ndodhi pranë ish-Gjykatës së Kurbinit, ku disa të rinj u përfshinë në një shkëmbim zjarri të dhunshëm. Gjatë përleshjes, pesë persona morën plagë, përfshirë edhe një shitëse ambulante që ndodhej rastësisht në vendin e ngjarjes. Situata krijoi panik te banorët dhe kalimtarët e zonës, të cilët panë momentet e tensionuara dhe tentuan të largoheshin për t’u shpëtuar nga dhuna.
Pas plagëve të marra, Gerald Bitri u dërgua në Spitalin Universitar të Traumës në Tiranë në gjendje të rëndë shëndetësore, por ndërroi jetë një ditë më pas, duke lënë pas familjen dhe komunitetin e tronditur nga humbja e tij. Në lidhje me ngjarjen, policia arrestoi Klevis Ndrecën, 28-vjeç, dhe Daniel Gjeloshin, 27-vjeç, të dy të dyshuar për përfshirje në përplasje dhe shkaktim të plagëve.

*Reshit Sallahu, 34 vjeç, u vra me armë zjarri më 7 maj në Has, si pasojë e konflikteve për pronësinë dhe hakmarrjes. Autor i dyshuar i vrasjes është Ylber Jaku, i cili dyshohet se e priti viktimën disa metra larg shtëpisë së tij, teksa Reshit Sallahu po zbriste nga mjeti, dhe e qëlloi, duke i marrë jetën.
Sipas hetimeve, autori Jaku kishte ardhur nga Anglia me qëllim për të kryer krimin, ndërsa viktima ndodhej në qytetin e Kukësit dhe po kthehej me makinë kur u sulmua në pritë. Ngjarja dyshohet të ketë lidhje me një konflikt të mëparshëm, të raportuar më 6 maj, ku dy bashkëshortë përfunduan në spital pas një përleshjeje për çështje prone, teksa autoritetet kishin nisur hetimet për të dyja palët.

*Ermir Dedja, 29 vjeç, anëtar i grupit të njohur kriminal të Shijakut, Avdylajve, u vra pak pas mesnate më 20 maj në lagjen 18 të Durrësit. Ngjarja ndodhi pranë qendrës shëndetësore, teksa i riu po lëvizte në këmbë, i veshur me kostum sportiv.
Në lidhje me ngjarjen, në pranga ranë Erion Ndoni, 36-vjeç, dhe Klodian Berisha, 35-vjeç, pasi dyshohet se kishin kontrabanduar në Shqipëri automjetin që u përdor nga autorët, si dhe një automjet tjetër që do të përdorej për një tjetër ngjarje kriminale.
Sipas Prokurorisë, porositësi i vrasjes dyshohet të ketë qenë Astrit Avdylaj, në shenjë hakmarrjeje për tentativën për të vrarë nipin e tij. Në kërkim është shpallur 33-vjeçari Xhuljano Dyrmishi për sigurim të kushteve dhe mjeteve materiale për të kryer vrasjen, si dhe për kontrabandë të mallrave. Dy persona të tjerë, një shqiptar dhe një maroken, u shpallën gjithashtu në kërkim dy ditë pas ngjarjes, të akuzuar për sigurimin e kushteve për kryerjen e vrasjes.

*57-vjeçari Pjetër Kaza u gjet i vrarë me breshëri plumbash brenda oborrit të shtëpisë së tij në Tale të Lezhës. Sipas hetimeve, motivi kryesor dyshohet të jetë gjakmarrja, një konflikt që vazhdon prej dekadash.
Zanafilla e këtij zinxhiri vrasjesh lidhet me ekzekutimin e Ndue Kazës, ish-shef i krimeve në Rrëshen, i cili u vra më 7 janar 1994 në mes të qytetit. Autorët e dyshuar, vëllezërit Dod dhe Augustin Gjini, u arratisën menjëherë pas ngjarjes. Në vitin 1997, Martin Kaza, vëllai i Ndue Kazës, vrau për hakmarrje dy vëllezërit në Laç, ngjarje për të cilën u dënua me 22 vite burg.
Përplasja mes familjeve nuk u ndal pas kësaj. Më 28 prill të vitit 2024, në një lokal shqiptarësh në Bruksel, u vra Agustin Kaza, vëllai i Pjetër Kazës, i qëlluar për vdekje me armë zjarri në kokë dhe kraharor. Me vrasjen e Pjetër Kazës, ky konflikt ka shënuar tashmë viktimën e tretë brenda këtij zinxhiri të gjatë hakmarrjesh që zgjat mbi tre dekada.
Martin Kaza u arrestua në Londër dhe më pas u dënua, duke vuajtur burgimin pas ekstradimit më 2017. Por, sipas dosjes hetimore, vitin e kaluar në Belgjikë u ekzekutua me katër plumba edhe një herë Agustin Kaza, vëllai i Pjetër Kazës, duke lënë pistën kryesore të hetimit të mbetet gjakmarrja.

*23-vjeçari Renis Dobra u mbyt me litar mbrëmjen e 8 korrikut, pas një rrëmbimi të mëparshëm. Trupi i tij u gjet buzë lumit të Shkopetit, ndërsa makina e tij u hodh në ujë. Policia arriti të zbardhë ngjarjen pak ditë pas krimit, duke u bazuar në pamjet e kamerave të sigurisë, të cilat treguan makinat e marrë me qira nga tre vëllezërit Bushgjokaj nga Tropoja.
Në pranga ranë tre vëllezërit Aleksander, Kristi dhe Fatjon Bushgjokaj, si dhe Petrit Çakrri. Sipas hetimeve, Kristi dhe Aleksander Bushgjokaj, së bashku me vëllain e tyre Fatjon dhe Petrit Çakrri, akuzohen për rrëmbimin dhe mbytjen me litar të Renis Dobrës. Shkaku i krimit dyshohet të ketë qenë prishja e pazareve të drogës.
Bushgjokaj u arrestua në zonën e Astirit, ndërsa Çakrri u kap në Kukës. Për të kryer vrasjen, autorët kishin marrë me qira disa makina në Rinas dhe Yzberisht, duke ndryshuar automjetet çdo ditë për të paktën 72 orë, për të survejuar lëvizjet e Dobrës pa u zbuluar nga autoritetet. Për më tepër, ata tentuan të hiqnin GPS-in e automjeteve.
Policia arriti të identifikonte automjetet përmes pamjeve të kamerave dhe, duke gjurmuar GPS-in, dokumentoi të gjitha lëvizjet kriminale të autorëve. Vëllai më i vogël, Aleksander Bushgjokaj, dyshohet se nxori një nga vëllezërit në Kosovë pas kryerjes së krimit.

*Anesti Rama, 56 vjeç, u vra në banesën e tij nga vajza e tij, Emanilda Rama, 26 vjeçe, e cila e mbyti me një tel dhe më pas raportoi ngjarjen fillimisht si një vdekje aksidentale.
Hetimet zbuluan se viktima kishte pësuar dhunë serioze dhe ishte mbytur me tel, duke konfirmuar se ngjarja nuk kishte qenë aksidentale, siç ishte pretenduar fillimisht. Sipas policisë dhe Prokurorisë, në krim ishte i përfshirë edhe i dashuri 55-vjeçar i Emanildës, Çlirim Dogani, ndërsa bashkëshortja e viktimës, Valbona Rama, u arrestua gjithashtu për përpjekje për të ndihmuar në fshehjen e provave.
Të tre të dyshuarit u paraqitën para gjykatës, ku u caktua masa “arrest me burg” për vrasjen makabre të Anesti Ramës.
*
31-vjeçari Ilirjan Selmani vrau 52-vjeçaren Kozeta Teço, me të cilën kishte një lidhje intime prej tre vitesh. I riu e qëlloi viktimën me thikë dhe më pas i dogji shtëpinë ku ajo jetonte në lagjen nr.1 të Pogradecit, në përpjekje për të fshehur gjurmët e krimit.
Kamerat e sigurisë të një banese pranë pallatit ku ndodhi krimi e fiksuan Selmanin rreth orës 05:00 të mëngjesit të së hënës, teksa largohej nga banesa e 52-vjeçares dhe më pas i afrohej koshave të mbeturinave pranë shtëpisë së tij, rreth 2 km larg. Atje u gjetën peshqirë të gjakosur, që dyshohet të jenë përdorur gjatë ngjarjes.
Në dëshminë e tij përpara policisë, Ilirjan Selmani mohoi të ishte autor i vrasjes, por pranoi se ai kishte hedhur peshqirët e papastër nga shtëpia e bashkëjetueses së tij, duke pretenduar se i hodhi thjesht në kosh.

*Një vrasje me armë zjarri u regjistrua më 4 gusht në fshatin Paçram, Vau i Dejës. Viktimë mbeti Frrok Lleshaj, 65 vjeç, ish-efektiv i Policisë deri në vitin 1994.
Paraprakisht, dyshohet se vrasja e ish-policit lidhet me një hakmarrje të mundshme. Sipas dosjes hetimore dhe vendimit të gjykatës, Lleshaj kishte vrarë kushëririn e tij, Dodë Lleshaj, më shumë se dy dekada më parë. Për këtë krim, ai ishte dënuar me 25 vite burgim, të cilin e përfundoi vetëm dy vite më parë, duke u liruar në mesin e muajit prill 2023. Ngjarja duket se mund të jetë pasojë e këtij konflikti të vjetër familjar, që ka mbetur i pazgjidhur për dekada.

*Më 14 gusht, 14-vjeçari Erald Xhejo humbi jetën pas një goditjeje të vetme në zemër. Ngjarja ndodhi gjatë një konflikti në lokalin e fshatit Pirg, ku të miturit ishin takuar për t’u sqaruar, por autori kishte shkuar i armatosur me thikë. Pas kryerjes së krimit, autori, i cili gjithashtu mori disa dëmtime, tentoi të largohej me një automjet së bashku me 34-vjeçarin që ishte i pranishëm gjatë sherrit.
Babai dhe xhaxhai i të miturit akuzohen për veprime që pengojnë zbardhjen e së vërtetës, pasi kanë fshehur thikën e përdorur për krimin, duke e transportuar dhe më pas duke e larë atë. Ndaj autorit rëndon akuza e vrasjes me dashje dhe drejtim i automjetit në mënyrë të parregullt.
Katër të mitur të tjerë, të pranishëm në konflikt, akuzohen gjithashtu se kanë tentuar të pengojnë zbulimin e së vërtetës. Ndërkohë, 34-vjeçari Flori Çela, i cili tentoi të largohej me autorin, akuzohet për moskallëzim krimi.
Erald Xhejo ndërroi jetë në spital, ndërsa autori mori ndihmë mjekësore për dëmtimet që pësoi, por pa përdorur mjet prerës.

*Besmir Kumria, 32 vjeç, ishte kthyer në fshatin e tij, Kryekuq të Divjakës, për pushime, por ra pre e një sulmi brutal me thikë nga bashkëfshatari i tij, Xheison Toromeni, 25 vjeç. I riu, punëtor sezonal në Himarë, kishte planifikuar të emigronte në Gjermani, ku jeton fejuara e tij, por ëndrra e tij u ndërpre tragjikisht.
Ngjarja ndodhi pak pas mesnate, teksa Kumria ndodhej në lokal bashkë me miqtë e tij. Ai u godit disa herë me thikë, duke humbur jetën në vend. Sipas hetimeve, motivi i sulmit lidhet me konfliktet e vazhdueshme mes familjeve të tyre për një kanal vaditës në fshat. Toromeni ka deklaruar se, kur e pa Besmir Kumrinë, nuk mundi të përmbante zemërimin dhe hyri në lokal për ta goditur, në shenjë hakmarrjeje ndaj dhunimit të të atit të tij.

*61-vjeçari Piro Prroni u vra më 28 gusht pas një sherri për një parcelë kanabisi në fshatin Abat të Shalës, Shkodër. Autori i krimit, Ndoc Maçaj, i cili u vetëdorëzua në polici, rezulton të jetë kryeplaku i fshatit Abat dhe njëherazi kushëri i 61-vjeçarit.
Sipas dëshmisë së tij, Maçaj ka pranuar autorësinë e vrasjes, por pretendon se e ka kryer për vetëmbrojtje. Ai ka treguar se gjatë kontrolleve konstatoi 80 rrënjë kanabisi të kultivuara në tokën e tij, në zonën e njohur si “Pushime”, dhe në këtë moment u përball me kushëririn e tij. Debati mes tyre përfundoi tragjikisht me vrasjen e Piro Prronit.
*
Një atentat mafioz tronditi qytetin e Shkodrës mbrëmjen e 4 shtatorit, kur 34-vjeçari Kristian Kola u ekzekutua pranë “Kinema Republika”, ndërsa po pinte kafe në katin e parë të një hoteli. Ngjarja shkaktoi tmerr dhe panik tek kalimtarët dhe klientët e lokalit, duke bërë që shpejt policia të niste kontrolle intensive në zonë.
Dy persona të maskuar, të cilët lëviznin me motor, hapën zjarr ndaj Kolës, duke e lënë të vdekur në vend. Një person tjetër që ndodhej në të njëjtën tavolinë me viktimën fatmirësisht nuk u prek nga plumbat, por mbeti në gjendje shoku pas përplasjes së dhunshme.
Motivi i vrasjes mbetet ende i panjohur, pasi viktima nuk kishte konflikte të njohura apo precedentë penalë të rëndë, gjë që e bën ngjarjen edhe më misterioze dhe të frikshme për komunitetin lokal.

*Mengjesin e 8 shtatorit, Ragip Gila, 29-vjeç, i armatosur me një pistoletë dhe një armë tip “Scorpion” dhe i veshur me jelek antiplumb, hyri në një lokal në qendër të qytetit dhe qëlloi me breshëri ndaj tavolinës ku ishte ulur Erogen Brajoviç, i njohur si anëtar i fisit të Bajrave.
Për pasojë, Brajoviç mbeti i plagosur, ndërsa truproja i tij, Liridon Kraja, dhe Armando Pali humbën jetën në vend. Kamerierja 25-vjeçare Meri Kaceri u plagos aksidentalisht gjatë të shtënave, duke shtuar tragjedinë e ngjarjes.
Gila mbërriti para lokalit me motoçikletë dhe u largua duke grabitur një “BMW”, por arratia e tij përfundoi brenda ditës. Ai u kap pranë lumit Kir dhe pranoi se shënjestra e tij ishte vetëm Brajoviç. Hetuesit dyshojnë se atentati mund të ketë motive hakmarrjeje, duke marrë parasysh konfliktet e mëparshme mes fisit të Bajrave dhe fisit të Licit, në shtëpinë e të cilëve janë gjetur armë gjatë kontrolleve policore.

*51-vjeçari Valbon Marko Beqiri u vra paraditen e 24 shtatorit, ndërsa trupi i tij u gjet mbrëmjen e asaj dite nga nipi në banesë. Autori, Teilor Tivari, kishte shkuar në banesën ku qëndronte Beqiri për të blerë drogë. Mes tyre lindën mosmarrëveshje, dhe i riu e goditi disa herë me thikë, duke i shkaktuar vdekjen në vend.
Pas krimit, Tivari u arratis, i ndihmuar nga bashkëpunëtori i tij, Xhenis Dakoli, i cili e transportoi fillimisht me taksi dhe më pas e dërgoi në banesën e tij. Autori ka pretenduar se viktima kishte tentuar ta përdhunonte.
Ndaj Tivarit rëndon akuza e “vrasjes me dashje” dhe “mbajtjes pa leje të armëve të ftohta”, ndërsa ndaj bashkëpunëtorit Dakoli rëndojnë akuzat për “moskallëzim krimi” dhe përkrahje të autorit.

*Biznesmeni italian Edoardo Sarchi u qëllua për vdekje mesnatën e 27 shtatorit, në një ngjarje që për tre ditë mbeti e mbuluar me mister. Më 29 shtator, policia njoftoi se kishte identifikuar autorin e dyshuar dhe kishte shpallur në kërkim Kamber Sulçajn.
Ngjarja ndodhi teksa Sarchi ndodhej në shtëpinë e pushimit të mikut të tij, Eqerem Braçit, në fshatin Salari. Ata u nisën për të ndihmuar dy djemtë e Braçit, Gazmend dhe Daniel, të cilët kishin pësuar defekt me makinën gjatë një dalje për gjueti. Gjatë rrugës, ata u përballën me automjetin e drejtuar nga Sulçaj, i cili kishte ndezur dritat e gjata, duke penguar shikimin. Dyshohet se një debat fillestar i nxiti palët të dalin nga automjetet.
Sulçaj nuk ndali me kaq; duke i ndjekur, ai qëlloi me armë gjahu drejt makinave të ndaluara. Një plumb rikoshet nga asfalt, kap viktimën në arterien kryesore në këmbë dhe la të vdekur Edoardo Sarchin, i cili besohet të ishte fshehur pas makinës së tij.
Policia e identifikoi Sulçajn përmes pamjeve të kamerave të sigurisë në zonë. Pas vrasjes, ai u largua në një zonë të thellë malore midis fshatrave Nivicë dhe Bolenë. Automjeti i autorit dhe veshjet e asaj nate u gjetën të braktisura pranë një stani, ku gjithashtu u sekuestrua një çantë me dy dylbi (termik dhe me rreze infra), një elektrik dore dhe një mbajtëse arme.

*40-vjeçari Hajdar Ismajlgeci u gjet i vrarë me thikë mbrëmjen e 2 tetorit pranë shkollës “Azem Hajdari” në Babrru. Autori, Arlind Demushi, 38-vjeç, u arrestua pak orë më vonë në Durrës.
Gjatë arrestimit, autorit iu gjet një çantë me veshjet që kishte veshur gjatë kryerjes së krimit. Sipas hetimeve, Demushi ishte i dehur në momentin e ngjarjes dhe kishte qëndruar për 10 ditë në shtëpinë e viktimës, pasi të dy ishin miq të ngushtë. Natën e vrasjes, pas një debati telefonik, Demushi shkoi në banesën e Ismajlgecit për të marrë rrobat e tij.
Para hyrjes në shtëpi, mes tyre ndodhi një përleshje me duar, gjatë së cilës Demushi e goditi viktimën me thikë, duke i shkaktuar plagë fatale. Sipas deklarimeve të autorit, konflikti lindte nga fakti që viktima e akuzonte se kishte ofenduar bashkëshorten e tij.

*65-vjeçari Gjergj Tusha u gjet pa shenja jete mbrëmjen e 3 tetorit pranë hidrovorit në Tale, Lezhë. Ekspertiza mjeko-ligjore tregoi se plagët në trupin e tij nuk ishin shkaktuar nga armë zjarri, por nga një goditje e fortë, që i kishte sjellë thyerje të brinjëve dhe dëmtime të brendshme.
Sipas burimeve nga hetimet, në momentin kur dyshohet të ketë ndodhur ngjarja, viktima ndodhej në kullotë, duke u kujdesur për bagëtitë. Hetuesit kanë vënë në dukje se Gjergj Tusha ishte pajisur tre herë me urdhra mbrojtjeje nga i biri, i cili dyshohet se e dhunonte. Për shkak të historikut të tensionuar brenda familjes, hetuesit nuk përjashtojnë mundësinë e një krimi brenda familjes, megjithëse për këtë pistë ende nuk ka prova të mjaftueshme.

*58-vjeçari Isuf Jacaj mbeti viktimë e një atentati të mirëorganizuar mbrëmjen e 4 tetorit në qytetin bregdetar të Sarandës. Një mjet i pajisur me tritol u hodh në erë, ndërsa Jacaj, i cili ishte brenda automjetit, humbi jetën menjëherë pas shpërthimit.
Atentati ishte tipik mafioz: rreth 800 gram tritol ishin vendosur poshtë një automjeti tip Toyota, dhe shpërthimi u aktivizua në momentin që viktima u fut në makinë. Ngjarja ndodhi rreth orës 22:50 në lagjen numër 3, e njëjta zonë ku vetëm pak muaj më parë i biri i Isuf Jacajt, Klaus Jaçaj, ishte përfshirë në një ngjarje të ngjashme, kur mjeti i tij u hodh në erë me tritol.

*Më 6 tetor, gjyqtari Astrit Kalaja u qëllua me armë brenda sallës së gjyqit në Gjykatën e Apelit nga Elvis Shkambi, duke plagosur rëndë edhe babë e bir nga pala kundërshtare, Ragip dhe Ervis Kurti. Ngjarja tronditi mbarë komunitetin dhe ngriti alarmin për sigurinë brenda ambienteve gjyqësore.
Sipas hetimeve, Elvis Shkambi dhe xhaxhi i tij, Gjoni, po prisnin një vendim në një nga shumë çështjet gjyqësore që lidhen me konflikte pronësore të një sërë familjesh. Konflikti kishte zanafillën në vitet ’90, kur familja Shkambi kishte përfituar një pronë si ish-pronar, ndërsa strehimi i 31 familjeve të tjera në të njëjtën godinë shkaktoi tensione të vazhdueshme. Sagat e gjyqeve dhe mosmarrëveshjet e gjatë për pronësinë kanë zgjatur për tre dekada, duke u shndërruar në një rivalitet të trashëguar mes familjeve.

*Më 22 tetor, një ngjarje e rëndë me armë zjarri tronditi ambientin e jashtëm të një lokali në Manëz, ku mbetën të vrarë 33-vjeçari Flori Paluçi dhe 23-vjeçari Aranit Kurti. Ngjarja filloi pas një konflikti verbal mes 21-vjeçarit Daniel Pepa dhe kamarierit Alteo Pepa, kur Pepa kërkoi një kafe dhe iu tha se ekspresi ishte fikur. Pas debatit, ai u largua me automjet, por më pas u kthye bashkë me Aranit Kurtin dhe Ergi Kadiun.
Teksa përpjekeshin të hynin sërish në lokal, Flori Paluçi doli nga ambientet e jashtme dhe qëlloi me armë zjarri në tokë, duke shkaktuar tension dhe panik. Në këtë moment, Daniel Pepa qëlloi me armë në drejtim të Paluçit, i cili u plagos rëndë, ndërsa Aranit Kurti e goditi me grushte. Plumbat përfunduan tragjikisht: Aranit Kurti humbi jetën nga të shtënat e Paluçit, ndërsa Flori Paluçi u vra nga Daniel Pepa.
Ngjarja nxori në pah përplasjen e dhunshme mes të rinjve në këtë zonë dhe përfshirjen e disa personave të tjerë në konflikt, përfshirë edhe Erald Canin, i arrestuar më pas për moskallëzim krimi.

*Në Berat, një nga monumentet më të vizituar të trashëgimisë kulturore shqiptare, kalaja, u kthye në skenë krimi. Një banor i zonës, i papërfshirë në regjistrat zyrtarë dhe pa leje për të ofruar shërbime turistike me kalë, sulmoi për vdekje një vizitor nga Tirana, vetëm sepse ky i fundit kishte prekur kalin që ai përdorte për shëtitje.
Autor i ngjarjes është Kristo Mema, 63 vjeç, i njohur edhe si Kontandin Hoxha. Ai deklaroi për hetuesit se konflikti nisi pas një paralajmërimi që i bëri viktimës. Vrasja ndodhi në oborrin e kalasë, në prani të familjarëve të viktimës dhe turistëve të tjerë, duke tronditur mbarë komunitetin.
Mema nuk kishte leje për të operuar në zonën e kalasë, megjithëse ushtronte aktivitetin prej shumë vitesh. Ai kishte një histori kriminale të gjatë: në vitin 1993 kishte vrarë me thikë fqinjin e tij për motive banale. Pas krimit, ai u largua drejt Greqisë, ku ndryshoi identitetin dhe jetoi për 25 vjet, duke shmangur ndjekjen penale. Ai u kthye vetëm pasi ndjekja kishte përfunduar sipas ligjit, dhe tani u përfshi përsëri në një ngjarje të rëndë kriminale.

*Më 29 tetor, një konflikt mes kolegëve të një restoranti në Tiranë përfundoi tragjikisht me vdekjen e njërit prej tyre. Autori, 43-vjeçari Filip Shehu, punonte prej tre muajsh si ndihmës picier dhe ishte vartës i viktimës, Indrit Ismaillari. Shehu deklaroi se ndihej i fyer dhe i poshtëruar publikisht nga viktima dhe kolegët e tjerë, për një proshutë pice, dhe kjo e nxiti të vepronte në mënyrë ekstremisht të dhunshme.
Pamjet e kamerave të sigurisë tregojnë se Shehu mori një thikë kuzhine dhe goditi viktimën tre herë, një herë në qafë dhe dy herë në bark, duke i shkaktuar vdekjen e menjëhershme. Punonjësit e tjerë të restorantit thanë se Shehu ishte një person i mbyllur dhe i ftohtë në komunikim, që rrallë fliste me të tjerët, çka e bënte më të vështirë parashikimin e një reagimi kaq ekstrem.

*Më 29 nëntor, në Durrës, një ngjarje tragjike brenda familjes Kodheli përfundoi me vdekjen e Pjetër Kodhelit, baba i autorit. Autori, Marjan Kodheli, e qëlloi me thikë babanë e tij gjatë një konflikti familjar. Sipas deklarimeve të tij, marrëdhënia mes tyre ishte tensionuar për një kohë të gjatë, që nga kthimi i tij nga emigrimi, dhe grindjet e vazhdueshme kishin krijuar një klimë të rënduar në familje.
Ai tregoi se momenti kritik ndodhi gjatë një drekë familjare, ku humbi durimin dhe reagoi në mënyrë të papritur, duke marrë një thikë dhe duke e goditur babanë e tij.

*Gilmando Dani dhe miku i tij Muçi Shaljani u qëlluan me breshëri plumbash kallashnikovi sapo doli nga rrethimi i aeroportit. Nga një makinë dolën 3 persona më armë në dorë dhe bënë shosh me plumba makinën “Mercedez Benz” të bardhë që drejtohej nga Shaljani, i cili në shtator ishte bërë pjesë e AMP-së si agjent, në një procedurë në shkelje të ligjit. Atentatorët u larguan nga kasaphana që vetë krijuan, vetëm pasi u bindën se shënjestra Gilmando Dani ishte vrarë. Më tej dogjën makinën në fshatin Halil, bashkë me armët që terrorizuan aeroportin.

*Biznesmeni Mondi Mëhalla u ekzekutua me dy plumba në kokë dhe një në trup mbrëmjen e 30 nëntorit sapo kishte dalë nga një zyrë në karburantin në pronësi të tij “Xhaxhi Oil”, dhe hyri në makinë. Ai u qëllua në kokë me 2 plumba pistolete, duke i shkaktuar vdekjen e menjëhershme. Njëri nga autorët doli nga makina “Audi”, u afrua dhe qëlloi. Dy autorët u larguan më pas drejt Librazhdit, ku edhe dogjën automjetin në Mirakë, brenda të cilit u gjet e djegur pistoletën Beretta, të përdorur në krim.
Në burg për ngjarjen, qëndrojnë edhe ish-ortaku i Mëhallës, Xhino Ago, dhe banakieri i karburantit “Xhaxhi Oil”, Kujtim Pisha. Të dy dorëzuan deklarata nga familjarët e Mëhallës se nuk dyshojnë të jenë pjesë e krimit, por kjo nuk e bindi gjykatën.
Në kërkim vijojnë të jenë Armando Kola, Oklid Dalipi dhe Marselo Arani, të cilët ishin pjesë e grupit që morën makinën që u përdor në krim, “Audin”, që më pas u shkrumbua në fshatin Mirakë të Librazhdit.

Viti 2025 ka lënë pas një rrëmujë dhune dhe dhimbjeje që do të kujtohet gjatë. 39 jetë janë ndërprerë, secila me historinë dhe plagën e vet, duke lënë familje të shkatërruara dhe komunitete të tronditura. Këto ngjarje tregojnë se konflikti, mllefi dhe mosmarrëveshjet mund të kenë pasoja tragjike, dhe se shpesh, pas çdo krimi, qëndron një rrjet i ndërlikuar i marrëdhënieve dhe hakmarrjeve. Ndërsa hetimet vazhdojnë dhe drejtësia kërkohet, mbetet një mesazh i qartë për shoqërinë: dhuna është rruga më e shpejtë drejt shkatërrimit, ndërsa vlerat e respektit, dialogut dhe ndihmës reciproke janë mënyra e vetme për të parandaluar tragjeditë e radhës./Vanesa Rrahmani-Shenjat e krimit

Anëtarë të partisë fituese në zgjedhjet e jashtëzakonshme parlamentare të 28 dhjetorit, Lëvizjes Vetëvendosje (LVV), dolën në sheshet e Prishtinës për të festuar bashkë me kandidatin për kryeministër nga kjo parti, Albin Kurti. Festa që zgjati për disa orë, fillimisht pranë selisë së LVV-së dhe më pas në sheshet e kryeqytetit, kulmoi me fjalën e kandidatit për kryeministër të kësaj partie, Albin Kurtit, para qindra qytetarëve të tubuar.

Gjatë festës së këtij subjekti politik bashkë me përkrahës, u festua me flamuj kombëtar, fishekzjarre dhe brohoritma. Po ashtu një numër qytetarësh dolën për të festuar me vetura nëpër rrugë të kryeqytetit. LVV-ja doli partia më e madhe nga rezultatet preliminare të publikuara nga Komisioni Qendror i Zgjedhjeve (KQZ). Nga numërimi i mbi 99 për qind të kutive të votimit në zgjedhjet e jashtëzakonshme parlamentare në Kosovë, kjo parti ka marrë 49,31 për qind apo 429.861 vota.

Pas saj, në vendin e dytë është Partia Demokratike e Kosovës (PDK) me 21,01 për qind apo 183.183 vota. Në vendin e tretë është Lidhja Demokratike e Kosovës (LDK), e cila deri më tani ka marrë 13,59 për qind apo 118.490 vota, pasuar nga Aleanca për Ardhmërinë e Kosovës (AAK) me 5,68 për qind apo 49.571 vota.

Partitë e tjera, të cilat deri në fund të numërimit zyrtar të votave nuk arrijnë 5 për qind të votave, nuk do të mund ta kalojnë pragun për t’u përfaqësuar në Kuvendin e Kosovës. Nëse LVV-ja arrin 50 për qind apo më shumë vota deri në certifikimin e rezultateve, ajo mund ta formojë qeverinë e vetme, pa pasur nevojë për një koalicion pas-zgjedhor me ndonjë parti tjetër parlamentare.

Kosova sot mbajti zgjedhje të parakohshme parlamentare, pas krizës disamujore politike për të formuar një qeveri të re, ku në garë morën pjesë 24 subjekte politike, me 1.180 kandidatë për deputetë. Të drejtë vote kishin 2.076.290 prej të cilëve 1.999.204 votuan sot brenda vendit dhe 77.086 patën mundësi ta ushtrojnë të drejtën e votës në periudhën 12-27 dhjetor.

Gjashtëmbëdhjetë persona kanë humbur jetën dhe tre të tjerë janë plagosur si pasojë e një zjarri që shpërtheu në një azil pleqsh në qytetin Manado, në ishullin indonezian të Sulawesi-t.

Autoritetet arritën të evakuonin 12 persona, të gjithë të padëmtuar, të cilët më pas u dërguan për kontroll mjekësor në një spital lokal.

Pamjet e transmetuara nga televizioni lokal Metro TV treguan flakët që përfshinë godinën e azilit, ndërsa banorë të zonës ndihmonin ekipet e emergjencës në evakuimin e të moshuarve. Shkaqet e zjarrit mbeten ende të paqarta dhe autoritetet kanë nisur hetimet.

Lëvizja Vetëvendosje, ka shënuar një fitore të thellë në zgjedhjet parlamentare në Kosovë, sipas rezultateve paraprake. Me rreth 90% të votave të numëruara, subjekti politik i udhëhequr nga Albin Kurti ka marrë 50.8% të votave, duke i hapur rrugën një mandati të tretë qeverisës, raporton BBC.

Dy partitë kryesore opozitare, Partia Demokratike e Kosovës (PDK) dhe Lidhja Demokratike e Kosovës (LDK), janë renditur pas, me përkatësisht 20.98% dhe 13.89% të votave.

Vetëvendosje kishte fituar edhe zgjedhjet e mbajtura në shkurt, por pa arritur shumicën e nevojshme për të formuar qeverinë, ç`ka e la Kosovën pa institucione funksionale për disa muaj.

Ngërçi politik ngriti pikëpyetjen kryesore të këtyre zgjedhjeve të dyta brenda vitit, nëse votuesit do ta ndëshkonin Kurtin për bllokadën institucionale apo partitë opozitare që refuzuan bashkëqeverisjen me të. Rezultati duket se ka dhënë një përgjigje të qartë.

Edhe pse Vetëvendosje pritet të mos i ketë e vetme votat e mjaftueshme për të qeverisur pa partnerë, Kurti pritet të sigurojë mbështetje nga partitë e pakicave etnike, të cilat kanë të garantuara 20 nga 120 ulëset në Kuvend.

Kjo është fitorja e katërt radhazi e Vetëvendosjes në zgjedhjet parlamentare dhe shihet si një konfirmim politik pas dështimit për formimin e qeverisë pas zgjedhjeve të 9 shkurtit.

Kurti e cilësoi rezultatin si “fitoren më të madhe në historinë e vendit” dhe shprehu pritshmërinë që opozita këtë herë të bashkëpunojë.

Një sinjal i tillë erdhi edhe nga LDK-ja. Deputeti Arben Gashi deklaroi se, “kur votuesit flasin, rezultati nuk mund të injorohet”, duke bërë thirrje për reflektim dhe veprim të përgjegjshëm.

Në lojë janë interesa të mëdha. Për shkak të mungesës së një qeverie funksionale, Kosova ka humbur qindra milionë euro fonde nga Bashkimi Evropian.

Kurti ka përmendur gjithashtu marrëveshje të mundshme me Bankën Botërore, që do ta çonin shumën e investimeve mbi një miliard euro.

Një tjetër sfidë mbetet riparimi i marrëdhënieve me aleatët kryesorë ndërkombëtarë, BE-në dhe SHBA-në.

Politikat e Kurtit ndaj institucioneve që shërbejnë komunitetin serb në Kosovë kanë shkaktuar tensione, veçanërisht në veri të vendit.

Edhe pse BE-ja ka rënë dakord të heqë masat ndëshkuese të vendosura në vitin 2023, ajo pritet të kërkojë një qasje më pragmatike në dialogun e normalizimit me Serbinë, thuhet në shkrimin e BBC.

Komisioni Qendror i Zgjedhjeve të Kosovës ka publikuar përditësimin më të fundit të rezultateve në orën 07:24, ku janë numëruar 900,330 vota nga 1,999,204 gjithsej, ose 45.03% e votave, ndërsa përpunimi i vendvotimeve ka arritur në 99.26%.

Sipas këtij përditësimi, renditja e partive politike është si më poshtë:

-Lëvizja VETËVENDOSJE! kryeson bindshëm me 429,979 vota, që përbëjnë 49.30% të totalit të votave të numëruara.
-Partia Demokratike e Kosovës (PDK) renditet e dyta me 183,258 vota ose 21.01%.
-Lidhja Demokratike e Kosovës (LDK) mban vendin e tretë me 118,490 vota, që përfaqësojnë 13.59%.
-Aleanca për Ardhmërinë e Kosovës (AAK) ka siguruar 49,571 vota apo 5.68%.
-Lista Serbe (Srpska Lista) ka marrë 41,335 vota, që përkthehen në 4.74%.
-NISMA Socialdemokrate ka grumbulluar 14,973 vota, ose 1.72%.

Procesi i numërimit pritet të vazhdojë edhe në orët në vijim, ndërsa rezultatet përfundimtare do të konfirmohen pas përpunimit të plotë të të gjitha votave.

Gjashtëmbëdhjetë persona kanë humbur jetën dhe tre të tjerë janë plagosur si pasojë e një zjarri që përfshiu një shtëpi të moshuarish në qytetin Manado, në ishullin indonezian të Sulawesit. Lajmi u bë i ditur nga një përfaqësues i shërbimeve të emergjencës, Jimmy Rotinsulu.

Sipas tij, shumica e trupave të viktimave janë gjetur brenda dhomave të tyre, çka tregon se të moshuarit po pushonin mbrëmjen e së dielës, në momentin kur shpërtheu zjarri.

Autoritetet arritën të evakuojnë 12 persona, të cilët fatmirësisht nuk pësuan lëndime dhe u dërguan për kontroll në një spital lokal.

Pamjet e transmetuara nga televizioni lokal Metro TV treguan flakët që përfshinin tërësisht godinën e shtëpisë së të moshuarve, ndërsa shkaqet e zjarrit mbeten ende nën hetim.

Në zgjedhjet e parakohshme parlamentare të 28 dhjetorit në Kosovë, Lëvizja Vetëvendosje ka dalë partia e parë.

Sipas rezultateve të KQZ, LVV ka marrë 49.80 për qind të votave dhe, sipas projeksioneve fillestare të shpërndarjes së ulëseve në Kuvend, pritet t’i ketë 56 deputetë.

Këto projeksione janë bërë pa përfshirë votat e diasporës dhe janë të kushtëzuara deri në përmbylljen e procesit zgjedhor.

Partia Demokratike e Kosovës (PDK) renditet e dyta me 21.21 për qind të votave dhe pritet të sigurojë 23 ulëse në Kuvend.

Si forca e tretë politike, Lidhja Demokratike e Kosovës (LDK) ka marrë 13.76 për qind të votave, duke siguruar 15 deputetë.

Ndërkaq, Aleanca për Ardhmërinë e Kosovës (AAK) me 5.73 për qind të votave pritet të ketë 6 deputetë.

Shpërndarja e ulëseve bëhet sipas metodës D’Hondt, e cila është metodologjia standarde e përdorur në Kosovë.

Kuvendi i Kosovës ka gjithsej 120 ulëse, prej të cilave 100 janë ulëse të përgjithshme që ndahen mes subjekteve politike, ndërsa 20 janë ulëse të rezervuara për komunitetet jo-shumicë.

Takimi i shumëpritur mes presidentit të SHBA-së, Donald Trump dhe atij ukrainas, Volodymyr Zelensky në Florida përfundoi pa ndonjë përparim të rëndësishëm, dje në mbrëmje vonë, edhe pse të dy udhëheqësit përshëndetën përparimin drejt një marrëveshjeje paqeje Ukrainë-Rusi.

Në një konferencë për shtyp pas bisedimeve në rezidencën private të Trump në Mar-a-Lago, udhëheqësi amerikan tha se një marrëveshje “mund të jetë shumë afër” dhe mund të arrihet brenda “ndoshta disa javësh”.

Ndërkohë, Zelensky falënderoi Trump për një “diskutim vërtet të shkëlqyer” dhe tha se “ekipet e tyre do të takohen në javët e ardhshme për të finalizuar të gjitha çështjet e diskutuara”.

Për më tepër, Zelensky tha se Trump do të organizojë një samit me udhëheqësit evropianë në Uashington, me shumë mundësi në janar.

Dyshja zhvilloi bisedime me udhëheqësit evropianë para konferencës së tyre për shtyp.

Takimi në Mar-a-Lago erdhi si pjesë e përpjekjes së fundit diplomatike për t’i dhënë fund luftës së nisur nga Rusia në shkurt 2022.

Trump më parë tha se besonte se Zelensky dhe presidenti rus Vladimir Putin ishin “seriozë” për arritjen e paqes.

Presidenti amerikan shtoi se do ta telefononte përsëri Putinin pas takimit me Zelenskyn, pasi kishte zhvilluar një telefonatë me udhëheqësin rus më herët të dielën.

Zelensky ka kërkuar mbështetjen e Uashingtonit për një kornizë prej 20 pikash, pasi administrata Trump në fund të nëntorit zbuloi një propozim prej 28 pikash që shqetësoi Kievin dhe aleatët e tij duke përsëritur disa qëndrime ruse.

Kievi dhe partnerët evropianë kanë punuar që atëherë në planin alternativ, duke përfshirë edhe takimet e fundit në Berlin dhe Miami me zyrtarë të lartë të administratës Trump, ndërsa Uashingtoni ka zhvilluar gjithashtu bisedime të ndara me Moskën.

Rusia nuk është e përfshirë në bisedimet e Floridës dhe reagimet e Kremlinit ndaj negociatave kanë qenë të heshtura.

Pavarësisht se deklaroi gatishmërinë për të negociuar, Putin deri më tani ka mbajtur kërkesa maksimaliste, duke përfshirë pretendimet mbi zonën lindore të Donbasit të Ukrainës, të cilën Moska nuk e kontrollon plotësisht ushtarakisht.

Garanci sigurie

Ndërsa Trump është përpjekur t’i japë fund konfliktit përmes samiteve të nivelit të lartë, përfshirë pritjen e Putinit në Alaska në gusht, fokusi i përpjekjeve intensive diplomatike në javët e fundit ka qenë në zgjidhjen e një numri të pikave kyçe të ngërçit.

Këto përfshijnë garancitë perëndimore të sigurisë për Kievin në rast të sulmeve të përsëritura ruse, fatin e rajonit Donbas dhe kontrollin e termocentralit bërthamor të Zaporizhias, i cili është pushtuar nga forcat ruse që nga ditët e para të luftës.

Zelensky tha se ai dhe Trump diskutuan “të gjitha aspektet e kornizës së paqes”, duke përsëritur se plani i tij me 20 pika është “90% i dakordësuar”.

“Ne biem dakord që garancitë e sigurisë janë një moment kyç në arritjen e paqes së qëndrueshme”, tha udhëheqësi ukrainas.

Mbetet e paqartë se sa larg janë të gatshme të shkojnë fuqitë perëndimore në ofrimin e garancive për Kievin – dhe nëse Moska është e gatshme t’i pranojë ato.

Rusia këmbëngul se ”armëpushimi vetëm sa do ta zgjasë konfliktin”

Një pikë tjetër polemike është nëse palët ndërluftuese duhet të bien dakord për një armëpushim 60-ditor, një propozim i mbështetur nga Zelensky për t’u dhënë ukrainasve mundësinë të votojnë për një plan paqeje në një referendum.

Kremlini tha të dielën se Trump dhe Putin ranë dakord në telefonatën e tyre se një armëpushim i përkohshëm në Ukrainë vetëm sa do ta “zgjasë” konfliktin dhe do të “rrezikojë një rigjallërim të luftimeve”.

Moska ka thënë prej kohësh se dëshiron të shkojë menjëherë në një marrëveshje përfundimtare paqeje, duke anashkaluar një armëpushim paraprak.

Sipas rezultateve të fundit të publikuara nga KQZ-ja, LVV-ja e Albin Kurtit është rrugës për të formuar vetë ekzekutivin e ri të vendit.

Lëvizja Vetëvendosje ka kaluar 50 përqindëshin e votave të numëruara. NDIQNI REZULTATET LIVE

Aktualisht, ka 50.24 për qind apo 257.390 vota.

Qeveria shqiptare pritet të miratojë një amnisti penale. Nismën e ka komunikuar Ministri i Drejtësisë, Besfort Lamallari përmes një video-mesazhi, ku zbulon edhe detaje nga kategoritë që përfitojnë dhe sa është numri.

“Nga zbatimi i kësaj amnistie në vlerësimet paraprake të Drejtorisë së Përgjithshme të Burgjeve, rreth 380 persona do të përfitojnë lirim të menjëhershëm; dhe rreth 900 të tjerë përfitojnë ulje dënimi, ndërsa numri real i përfituesve është edhe më i lartë, duke përfshirë ata që përfitojnë nga pushimi i ndjekjes penale si dhe masat alternative”, thotë Ministri i Drejtësisë. Sipas tij në këto kategori përfituesish përfshihen të mitur, gra dhe persona të dënuar për vepra me rrezikshmëri të ulët shoqërore

Më tej Lamallari thekson edhe ata që nuk përfitojnë nga amnistia.

“Sigurisht që nga kjo amnisti nuk mund të përfitojnë ata që kanë kryer krime të rënda, korrupsion apo vepra me rrezikshmëri të lartë shoqërore. Kurrsesi jo subjekte që janë hetuar nga SPAK dhe gjykuar nga GJKKO.  Nuk ka amnisti selektive dhe as favorizime, por kritere ligjore të qarta dhe transparente. Kush e sheh amnistinë si dobësi, ngatërron ndëshkimin me drejtësinë”, shprehet Lamallari duke theksuar se kjo amnisti nuk është falje e shkeljes së ligjit, por një shans i dytë, i dhënë me përgjegjësi, për ata që mund dhe duhet të rikthehen në shoqëri dhe pranë familjeve të tyre.

“Ne besojmë në një drejtësi të drejtë, jo për statistikë dhe as në kurriz të të pamundurve, një drejtësi që nuk humbet kurrë humanizmin, dhe që në frymë dhe shpirt udhëhiqet nga standarde të panegociueshme demokratike europiane”, thotë ministri Lamallari.

Mesazhi

Të dashur qytetarë, në mbyllje të këtij viti, Qeveria Shqiptare ka ndërmarrë nismën për miratimin e një amnistie penale, një akt ligjor ky i bazuar te humanizmi, drejtësia sociale dhe standardet evropiane të drejtësisë.

Ky lajm i mirë për përfituesit direkt dhe për familjet e tyre është me siguri urimi më i mirë i këtij fundviti. Kjo amnisti që ne do të miratojmë nuk është kurrsesi një lëshim politik, por një politikë penale moderne.

Një shtet i fortë nuk ka nevojë të mbajë ne burg njerëz pa rrezikshmëri reale, por të investojë në rehabilitim dhe siguri afatgjatë. Drejtësia evropiane nuk matet me numrin e të burgosurve, por me parandalim, rehabilitim dhe uljen e përsëritjes së veprave penale.

Amnistia që ne do të miratojmë në Këshillin e Ministrave nuk është një vendim i rastësishëm. Ajo vjen pas një analize të detajuar të situatës në sistemin e drejtësisë penale, në bashkëpunim me organet përgjegjëse, dhe adreson një shqetësim madhor; përdorimin e lartë të masës së paraburgimit dhe nevojën për një qasje më proporcionale dhe më humane.

Sot, për fat të keq, në sistemin e burgjeve ndodhen rreth 5 mijë persona, nga të cilët një pjesë e konsiderueshme, konkretisht më shumë se gjysma e tyre janë të paraburgosur. Kjo situatë kërkon ndërhyrje të përgjegjshme dhe të mejëhershme, në përputhje me standardet dhe praktikat më të mira evropiane.

Paraburgimi i tepruar është një shqetësim persistent në sistemin tonë penitenciar, shqetësim i ngritur në mënyrë të përsëritur nga Këshilli i Europës si dhe nga partnerët tanë evropianë. Mbipopullimi në burgje nuk është forcë e shtetit, është dobësi e sistemit. Kjo amnisti e korrigjon në një farë mënyrë atë dobësi teksa ne kemi ende punë përpara për një politikë penale moderne që i përgjigjet stadit në të cilin Shqipëria është sot dhe nesër si vend anëtar i Bashkimit Europian.

Përmes kësaj amnistie qeveria po ndërmerr një tjetër akt parandalues dhe human, përpara se problemi të kthehet në krizë sistemike.

Më konkretisht, nga zbatimi i kësaj amnistie në vlerësimet paraprake të Drejtorisë së Përgjithshme të Burgjeve, rreth 380 persona do të përfitojnë lirim të menjëhershëm; dhe rreth 900 të tjerë përfitojnë ulje dënimi, ndërsa numri real i përfituesve është edhe më i lartë, duke përfshirë ata që përfitojnë nga pushimi i ndjekjes penale si dhe masat alternative.

Jam vecanërisht i lumtur që në këto kategori përfituesish përfshihen të mitur, gra dhe persona të dënuar për vepra me rrezikshmëri të ulët shoqërore.

Efekti është konkret dhe i menjëhershëm:

-popullimi në burgje ulet me gati 7%

-përmirësohen kushtet e trajtimit, sigurisë dhe rehabilitimit

-si dhe garantojmë më shumë respekt ndaj dinjitetit njerëzor

Sigurisht që nga kjo amnisti nuk mund të përfitojnë ata që kanë kryer krime të rënda, korrupsion apo vepra me rrezikshmëri të lartë shoqërore. Kurrsesi jo subjekte që janë hetuar nga SPAK dhe gjykuar nga GJKKO.  Nuk ka amnisti selektive dhe as favorizime, por kritere ligjore të qarta dhe transparente. Kush e sheh amnistinë si dobësi, ngatërron ndëshkimin me drejtësinë.

Kjo amnisti nuk është falje e shkeljes së ligjit, por një shans i dytë, i dhënë me përgjegjësi, për ata që mund dhe duhet të rikthehen në shoqëri dhe pranë familjeve të tyre. Ne besojmë në një drejtësi të drejtë, jo për statistikë dhe as në kurriz të të pamundurve, një drejtësi që nuk humbet kurrë humanizmin, dhe që në frymë dhe shpirt udhëhiqet nga standarde të panegociueshme demokratike. Faleminderit dhe gëzuar festat.

/tpz

Kandidati për kryeministër nga LVV-ja, Albin Kurti, ka bërë thirrje që komisionerët e vëzhguesit të ruajnë votat, tashmë kur ka përfunduar procesit i votimit dhe ka filluar numërimi.

“Vullneti i qytetarëve tashmë gjendet në kutitë e votimit. Ruajtja e këtij vullneti të shprehur është esencial për legjitimitetin dhe kredibilitetin e procesit zgjedhor. Aty e kemi përcaktimin për të ardhmen e vendit tonë dhe të institucioneve të tij. E për këtë gjë, mendjet, sytë dhe veshët tanë janë te ju komisionerë dhe vëzhgues. Keni detyrë tejet të rëndësishme saqë vendimtare”, ka thënë Kurti përmes një videoje të publikuar në rrjetin e tij social Facebook.

Është arrestuar në flagrancë shtetasi O. B., 31 vjeç, pasi shkaktoi një aksident me pasojë vdekjen në aksin rrugor “Qafë Thanë–Librazhd”.

Ngjarja ndodhi rreth orës 13:30, kur automjeti që ai drejtonte përplasi këmbësoren F. H., 64 vjeçe, e cila humbi jetën si pasojë e plagëve të marra.

“DVP Elbasan/Specialistët e Qarkullimit Rrugor arrestuan në flagrancë shtetasin O. B., 31 vjeç, për veprën penale “Shkelja e rregullave të qarkullimit rrugor”, me pasojë vdekjen. Sot, rreth orës 13:30, në aksin rrugor “Qafë Thanë–Librazhd”, automjeti që ai drejtonte ka përplasur shtetasen F. H., 64 vjeçe, këmbësore, e cila si pasojë ka humbur jetën.
Materialet procedurale do t’i referohen Prokurorisë për veprime të mëtejshme.”- njoftoi policia.

Në orën 19:00 ka përfunduar orari zyrtar i votimeve për zgjedhjet parlamentare në Kosovë

Ata që janë në qendrat e votimit kanë të drejtë ta përfundojnë votimin. Pjesëmarrja më e madhe është regjistruar në komunat në veri, të banuara me shumicë serbe.

Rreth dy milionë shtetas të Kosovës do të kenë mundësi të votojnë të dielën, në zgjedhjet e parakohshme parlamentare që u shpallën pasi legjislatura e dalë nga zgjedhjet e 9 shkurtit, nuk e miratoi asnjërin prej dy kabineteve qeveritare që u propozuan. Sipas të dhënave të Komisionin Qendror të Zgjedhjeve në Kosovë, deri në orën 19:00 kanë votuar 43.47% të qytetarëve.

Këshilli i Sigurimit i OKB-së do të thërrasë nesër një takim urgjent, pas njohjes së diskutueshme të Somalilandit si shtet i pavarur nga ana e Izraelit.

Përpara seancës, 21 vende me shumicë myslimane lëshuan një deklaratë të përbashkët duke paralajmëruar për pasoja serioze nga vendimi izraelit mbi paqen dhe sigurinë në Bririn e Afrikës dhe në rajonin më të gjerë të Detit të Kuq.

Somalilandi, një rajon me shumicë myslimane në Somalinë veriore me një popullsi prej disa milionësh, ka vepruar ”de facto” në mënyrë të pavarur për më shumë se tre dekada.

Të premten, Izraeli u bë vendi i parë në botë që njohu pavarësinë e territorit të shkëputur, por që u dënua nga qeveria somaleze dhe partnerët rajonalë.

Vendimi erdhi vetëm disa ditë para se Somalia të marrë presidencën e radhës të Këshillit të Sigurimit të OKB-së.

Deklarata e përbashkët, e publikuar nga Katari, përshkroi refuzimin e prerë të 21 vendeve për vendimin izraelit duke paralajmëruar se ai përbën një shkelje të rëndë të parimeve të së drejtës ndërkombëtare.

Ministri i jashtëm i Somalilandit, Abdirahman Dahir Adam, i tha transmetuesit izraelit ”Channel 12” se ky veprim nuk kishte të bënte fare me konfliktin në Gaza.

Sipas zyrës së kryeministrit izraelit Benjamin Netanyahu, njohja u bë “në frymën e Marrëveshjeve të Abrahamit”, të cilat panë disa vende arabe të njihnin zyrtarisht pavarësinë e Izraelit.

Gazeta ”Times of Israel” theksoi se Emiratet e Bashkuara Arabe, Bahreini dhe Maroku – të cilët iu bashkuan të gjithë Marrëveshjeve të Abrahamit – nuk ishin midis nënshkruesve të deklaratës së përbashkët mbi njohjen e Somalilandit.

Tuneli-autostradë ”Tianshan Shengli”, në provincën Xinjiang, është hapur për trafik dhe me 22,13 kilometrat e tij, është quajtur më i gjati në botë.

Tuneli kalon nëpër malet Tianshan, në rajonin autonom ujgur të Xinjiangut, duke e zvogëluar një udhëtim të rrezikshëm disaorësh malor në rreth 20 minuta.

Tuneli është një pjesë kyçe e Autostradës G0711 Urumqi-Yuli, e cila gjithashtu filloi të operojë të premten dhe që lidh qendrat urbane në Xinjiangun verior dhe jugor.

Me një shtrirje prej 2 500 kilometrash, malet Tianshan presin Xinjiang qendror, duke ndarë kryeqytetin provincial Urumqi, qytetin më të madh në veri, nga Korla, qyteti më i madh në jug.

Me hapjen e autostradës, koha e udhëtimit midis Urumqit dhe Korlës është reduktuar nga rreth shtatë orë në tri.

Autostrada, e ndërtuar gjatë pesë viteve, është 324,7 kilometra e gjatë dhe kërkoi një investim total prej 6,63 miliardë dollarësh.

Ndërtimi i tunelit u përball me sfida ekstreme, pasi, përveç gjatësisë së tij prej 22,13 kilometrash, ai arrin një thellësi maksimale prej 1 112 metrash, kalon 16 zona të çara gjeologjike dhe përballet me pesë sfida kryesore: stres të lartë në tokë, intensitet të lartë sizmik, kërkesa të rrepta mjedisore, të ftohtë ekstrem dhe lartësi të madhe.

Për t’iu përgjigjur këtyre sfidave, ndërtuesit kinezë kanë zbatuar zgjidhje inovative: ndërtimin e rrugëve hyrëse miqësore me mjedisin për të minimizuar ndikimin mjedisor dhe për të përmirësuar efikasitetin e transportit të materialeve; miratimin e një metode ndërtimi që reduktoi kohën e ndërtimit të tunelit kryesor me më shumë se një të katërtën dhe përdorimin e makinës së parë të Kinës për shpimin e tunelit me shkëmbinj të fortë nën presion.

Në Kosovë, këtë të dielë më 28 dhjetor, po mbahen zgjedhjet e parakohshme parlamentare, të dytat brenda këtij viti.

Ato u thirrën pasi për më shumë se 10 muajsh, pas zgjedhjeve të rregullta të 9 shkurtit, partitë politike nuk arritën të formojnë institucionet e reja të vendit.

Mbi 900 qendra votimi janë hapur në orën 07:00 të mëngjesit, megjithëse në disa raste ka pasur vonesa të vogla. Sipas Komisionit Qendror të Zgjedhjeve (KQZ), procesi zgjedhor po zhvillohet normalisht në të gjithë territorin e Kosovës, përfshirë edhe komunat në veri të banuara me shumicë serbe.

Deri në orën 11:00, pjesëmarrja në votime ka qenë pak mbi 8%. Rrjeti i organizatave “Demokracia në Veprim” (DnV) raporton se vonesa në hapjen e vendvotimeve ka pasur vetëm në rreth 3% të tyre. Vonesat më të theksuara janë shënuar në rajonin e Pejës, kryesisht për shkak të mungesës së komisionerëve.

Sipas DnV-së, vetëm në 2% të vendvotimeve ka pasur probleme me vendosjen e kabinave të votimit ose kamerave, ndërsa këto probleme kanë qenë më të theksuara në komunat me shumicë serbe. Kryetari i KQZ-së, Kreshnik Radoniçi, bëri të ditur se në 6 qendra votimi janë paraqitur probleme me energjinë elektrike, të cilat po trajtohen.

Në këto zgjedhje, të drejtë vote kanë 2 milionë e 76 mijë e 290 qytetarë, ndërsa janë gjithsej 2.614 vendvotime. Votimi për shtetasit e Kosovës që jetojnë jashtë vendit është zhvilluar një ditë më parë në ambasada dhe konsullata në 18 shtete.

Në garë janë 22 subjekte politike: 18 parti, 3 koalicione parazgjedhore, dy iniciativa qytetare dhe një kandidat i pavarur. KQZ ka certifikuar gjithsej 1 180 kandidatë për deputetë, prej të cilëve rreth 67% janë burra dhe 33 për qind gra.

Procesi zgjedhor po monitorohet nga rreth 8 600 vëzhgues vendorë dhe ndërkombëtarë, përfshirë edhe një delegacion nga Parlamenti Evropian. Gjithashtu, Institucioni i Avokatit të Popullit po vëzhgon zgjedhjet me fokus në respektimin e të drejtave të njeriut dhe standardeve demokratike.

Për mbarëvajtjen e procesit janë angazhuar qindra zyrtarë policorë dhe rreth 100 prokurorë, të cilët do të qëndrojnë në terren deri në përfundim të votimit, me qëllim parandalimin dhe trajtimin e çdo parregullsie eventuale.

Analistët politikë vlerësojnë se këto zgjedhje janë vendimtare për zgjidhjen e bllokadës institucionale dhe rikthimin e stabilitetit politik.

Edhe përfaqësuesit ndërkombëtarë, veçanërisht vendet e QUINT-it, kanë bërë thirrje që zgjedhjet të zhvillohen në mënyrë të lirë, të rregullt dhe demokratike, duke theksuar rëndësinë e tyre për të ardhmen evropiane të Kosovës./Marrë nga DW

Në ditën e zgjedhjeve të jashtëzakonshme parlamentare në Kosovë, ambasadori britanik në vend, Jonathan Hargraves, vizitoi vendvotimin në Shkollën Fillore „Sveti Sava“ në Mitrovicën e Veriut.

Në një bisedë të shkurtër për KoSSev, Hargraves tha se moti i ftohtë nuk duhet të pengojë qytetarët dhe shpreson që kjo të nxisë pjesëmarrje të lartë në votime. Ai shprehu besimin se qytetarët do të kenë mundësinë të votojnë për kandidatët që mendojnë se do t’i përfaqësojnë më mirë në të gjithë Kosovën.

Ambasadori njoftoi se gjatë ditës do të vizitojë edhe disa vende të tjera të votimit për të parë nga afër procesin zgjedhor. “Kam parë sa shumë përpjekje janë bërë që këto zgjedhje të kalojnë në mënyrë të qetë dhe të suksesshme. E di që votuesit nga e gjithë Kosova po përdorin të drejtën e tyre demokratike“, tha ai.

Megjithatë, Hargraves shtoi se deri tani ka vizituar vetëm një vendvotim dhe se do të jetë e nevojshme të shihet situata në të gjithë vendin për një pamje më të plotë të zhvillimeve.

Komisioni Qendror i Zgjedhjeve në Kosovë njoftoi se pjesëmarrja në zgjedhje deri në orën 13:00 ishte 17.84%.

Sipas të dhënave të publikuara në ueb-faqen e KQZ-së, Ranillugu kryeson me pjesëmarrjen më të lartë, 33.28%, ndërsa Leposaviçi ka pjesëmarrjen më të ulët, 1.57%.

Në kryeqytetin Prishtinë, deri në këtë orë votuan 21.51% e qytetarëve me të drejtë vote.

Kujtojmë që numërimi i votave për partitë politike do të nisë menjëherë pas mbylljes së vendvotimeve, dhe rezultatet e para pritet të publikohen para orës 20:00, ndërkaq numërimi i votave për kandidatët për deputetë do të bëhet në qendrat komunale të numërimit dhe do të nisë të hënën.