Pas refuzimit të Mal Retkocerit për ta takuar gjatë spektaklit të djeshëm të “Big Brother VIP Albania”, babai i tij ka folur për mikrofonin e “Fan Club” menjëherë pas daljes nga studio, duke bërë deklarata të forta publike.

Ai ka hedhur akuza direkte ndaj ish-bashkëshortes së tij, këngëtares së njohur nga Kosova, Violetë Kukaj, duke pretenduar se është ajo që nuk lejon ribashkimin e tij me djalin. Sipas tij, dëshira për t’u afruar dhe për të qenë pjesë e familjes ekziston, por pengesa kryesore mbetet ish-gruaja.

“Unë jam i gatshëm të bashkohem me familjen, por ajo nuk dëshiron”, u shpreh ai, duke shtuar se Malin nuk e lejojnë të takohet me të. I pyetur për mesazhin që kishte për të birin, ai tha shkurt: “Ktheu jetës së mbarë, realitet, mbarësisë, rehatllëkut”.

Deklaratat u bënë edhe më të forta kur ai foli për marrëdhënien me ish-bashkëshorten në aspektin profesional. Sipas tij, ai ka qenë personi që e ka ndihmuar Violetë Kukajn të ndërtojë karrierën e saj muzikore.

“Unë e kam bërë yll. Kur e kam marrë për nuse, ajo kishte vetëm një këngë të incizuar. Unë ia kam incizuar mbi 300 këngë, me ajkën e Kosovës dhe Shqipërisë”, deklaroi ai, duke shtuar gjithashtu se ajo vinte nga një familje me kushte të vështira ekonomike para martesës së tyre.

Këto deklarata vijnë në vazhdën e situatës së tensionuar familjare që u bë publike gjatë spektaklit, pas vendimit të Mal Retkocerit për të mos e realizuar takimin me babanë e tij para kamerave. Deri tani, nga ana e Violetë Kukaj nuk ka pasur një reagim publik lidhur me akuzat e bëra./mxh

Tottenham u rikthye te fitorja në Premier League duke mposhtur minimalisht Crystal Palace në javën e 18-të të kampionatit.

Goli i vetëm i takimit u shënua nga Gray në minutën e 42-të të pjesës së parë. Me këtë rezultat, Tottenham është ngjitur në vendin e 11-të të renditjes me gjithsej 25 pikë të grumbulluara. Crystal Palace mbetet në vendin e nëntë me 26 pikë, pavarësisht kësaj humbjeje në fushën e tyre.

Sunderland barazoi 1-1 me skuadrën e Leeds në ndeshjen e zhvilluar në shtëpi. Ky ishte barazimi i dytë radhazi për ekipin e Sunderland, pjesë e të cilit është edhe mesfushori Granit Xhaka.

Sunderland aktualisht pozicionohet në vendin e shtatë me 28 pikë, ndërsa Leeds ndodhet në vendin e 16-të me 20 pikë./mxh

Atë që nuk mundi dot të bëjë ditën e shtunë në Slalomin gjigant në Semmering të Austrisë, Lara Colturi arrin ta bëjë këtë të dielë teksa i shtoi një tjetër podium karrierës së saj në këtë sezon, këtë radhë në Slalomin Special.Skiatorja kuqezi bëri një garë të shkëlqyer në këtë disiplinë duke u renditur në vendin e tretë me kohën 1 minutë 49 sekonda e 32 të qintat. Më mirë se ajo bënë vetëm Mikaela Shiffrin dhe Camille Rast që u pozicionuan në dy vendet e para.

Në zbritjen e parë, Lara Colturi ishte në kufijtë e perfektes teksa e mbylli këtë fraksion në vendin e dytë me kohën 54.79 sekonda, vetëm 9 të qindtat më shumë se Camille Rast duke lënë pas edhe mbretëreshën e këtij sporti, Mikaela Shiffrin. Edhe në zbritjen e dytë Lara Colturi bëri një paraqitje shumë të mirë teksa shënoi kohën e 5 më të mirë me 54.79 sekonda për të siguruar vendin e tretë në këtë garë pas përfundimit të të dyja zbritjeve.

Vendi i tretë në garën e Slalomit special në garën e Semmering i jep Lara Colturit 60 pikë të tjera për klasifikimin e Kupës së Botës. 19 vjecarja shkon në kuotën e 362 pikëve dhe ngjitet në vendin e 7 të klasifikimit, ndërkohë që në krye vazhdon të jetë Mikaela Shiffrin me 698 pikë, e ndjekur nga Camille Rast me 503 pikë në vendin e dytë, ndërkohe që në vendin e tretë është Alice Robinson me 484 pikë./mxh

Adriana Kalaja, një nga kandidatet për Avokatin e Popullit, ka njoftuar se ditën e nesërme do të depozitojë në Gjykatën Kushtetuese kërkesën për shpallje të pavlefshme dhe antikushtetuese të zgjedhjes së Avokatit të popullit.

Me anë të një postimi në Facebook, Kalaja ka njoftuar se po ashtu ka kërkuar pezullimin e efekteve juridike të këtij procesi, që sipas saj është antikushtetues dhe antiligjor, deri kur vendimi i Gjykatës Kushtetuese, të botohet në Fletoren Zyrtare.

“Të Nderuar Miq dhe Mbështetës.

Duke uruar të jeni shumë mirë, si dhe duke ju falënderuar për gjithë mbështetjen pa kushte dhe të pakufishme që më keni dhënë lidhur me kandidaturën time për postin kushtetues të Avokatit të Popullit, Ju bëj me dije se nesër, më datë 29.12.2025, depozitoj në Gjykatën Kushtetuese, kërkesën time me objekt:

– Konstatimin e antikushtetutshmërisë dhe pavlefshmërisë, së zgjedhjes së Avokatit të Popullit, nga Kuvendi i Shqipërisë më datë 11 dhjetor 2025.

Po kështu, kam kërkuar edhe pezullimin e efekteve juridike të këtij procesi antikushtetues dhe antiligjor, deri kur vendimi i Gjykatës Kushtetuese, të botohet në Fletoren Zyrtare.

Për më shumë detaje, më ndiqni nesër në ora 10.00, në deklaratë për media nga Gjykata Kushtetuese.

Kush është hapi i rradhës? Së shpejti……”, shkruan Kalaja./mxh

Fermerët grekë duket se janë të vendosur të përshkallëzojnë luftën e tyre, pasi do të vendosin për lëvizjet e tyre të ardhshme me tubime të njëpasnjëshme në bllokada.

Mediat greke shkruajnë se të hënë në orën 12:00, qarkullimi për në Athinë do të mbyllet për një kohë të pacaktuar në bllokadën kryesore të Malgarit. Bllokimi është planifikuar gjithashtu në kryqëzimin e Kalcedonës për tre orë në pasdite. Si pjesë e protestave, fermerët po mbyllin edhe zyrën doganore Evzone.

Megjithatë, ura ajrore në Nikea, Larisa do të mbyllet sot, me fermerët që përgatisin propozimet e tyre për takimin në bllokadën kryesore. Mbikalimi u hap për trafik të mërkurën, duke lehtësuar ndjeshëm kalimin e automjeteve. Megjithatë, që nga sot, fermerët kanë vendosur që ajo të rihapet, ndërsa do të mbyllet përsëri në natën e Vitit të Ri.

Të hënën, fermerët theksojnë se do të mbyllin rrugët anashkaluese, ndërsa do të hapen përsëri për t’i lehtësuar ato.

Ditën e Vitit të Ri, qytetarët do të lëvizin lirshëm si në Krishtlindje, pasi siç raporton transmetuesi publik ERT, mbikalimi është i hapur dhe automjetet që devijohen nga kryqëzimi i Platikambos që lëvizin nga Selaniku në Athinë, nëpërmjet Rrugës së Vjetër Kombëtare do të rihyjnë në autostradë në kryqëzimin e Kileer./mxh

Last Updated on 28/12/2025 by Monika

Nga Klevis Bakillari

Edhe një vit tjetër deri në Tomorricë?
Pyetja që rëndon si faj politik mbi PS dhe një emergjencë infrastrukturore e vonuar.
Tomorrica nuk është thjeshtë një krahinë e harruar në hartën administrative të Shqipërisë. Është truall historie, sakrifice dhe identiteti, një hapësirë ku natyra dhe shpirti shqiptar janë lidhur në mënyrë organike me malin e shenjtë të Tomorrit. E megjithatë, sot Tomorrica gjendet shumë e izoluar, shumë e braktisur dhe dhumë e përdorur politikisht vetëm në fushata!
Në qendër të këtij realiteti qëndron sigurisht vetëm Partia Socialiste.
Është e papranueshme që një zonë me këtë peshë historike dhe simbolike të trajtohet sot si një fund rruge, pa rrugë.
Ka potenciale natyrore dhe shpirtërore të pashfrytëzuara.
Mali i Tomorrit nuk është vetëm një destinacion turistik. Ai është simbol shpirtëror, mitologjik dhe fetar, i njohur ndër breza dhe komunitete. Tomorrica ka peizazhe alpine unike,
burime ujore,tradita kulturore e mikpritëse,potencial për turizëm malor, fetar dhe ekologjik.
Por pa rrugë, asnjë potencial nuk zhvillohet. Turizmi nuk ecën mbi lutje politike, por mbi asfalt, ura dhe lidhje funksionale.
Emergjenca infrastrukturore: rrugë që nuk vijnë kurrë!
Lidhja rrugore:
Tomorricë – Gramsh
Tomorricë – Moglicë
nuk është luks. Është domosdoshmëri jetike.
Çdo vit që kalon pa këto investime është një vit i humbur, një premtim i thyer dhe një përgjegjësi politike e pambajtur e Deputetëve jo vetëm të Skraparit, por edhe të Qarkut Berat.
Tomorrica ka nevojë për avokat politik, jo për menaxher pritjeje.
Edhe një vit tjetër deri në Tomorricë?
Kjo pyetje nuk është retorike. Është akuzë morale dhe politike. Sa vite të tjera do të presë Tomorrica? Sa banorë të tjerë do të largohen? Sa mundësi do të humbasin?
Tomorrica nuk kërkon lëmoshë. Kërkon drejtësi!Kujtesë!
Nëse nuk veprohet sot, nesër nuk do të ketë më kë të lidhësh me rrugë.

Me pankarta në duar ku shkruhej “Duam ujë” dhe “Vlora do ujë”, si dhe me thirrje “Poshtë qeveria”, përfaqësues të së djathtës dhe qytetarë mbështetës u mblodhën dhe marshuan drejt skenës së Teatrit “Petro Marko” në Vlorë, ku ishte planifikuar të mbahej mbrëmjen e sotme Gala e festave të fundvitit.

Protesta tensionoi situatën në zonë, duke detyruar organizatorët të ndërpresin aktivitetin. Artistët u larguan nga skena për arsye sigurie, ndërsa eventi u anulua./mxh

b5ec9fc1-bf1c-4b7e-ba80-37ac0c518543

Negociatorët amerikanë zhvilluan të shtunën takime në Florida me zyrtarë rusë, në kuadër të një iniciative të re të administratës së Donald Trump për të çuar përpara përpjekjet drejt përfundimit të luftës në Ukrainë.

Takimet, të mbajtura në Majami, vijnë vetëm një ditë pas kontakteve që Shtetet e Bashkuara patën me përfaqësues të Ukrainës dhe vendeve evropiane, si pjesë e një plani paqeje që ka krijuar pritshmëri të kujdesshme për uljen e tensioneve në konfliktin e nisur me pushtimin rus në shkurt të vitit 2022.

I dërguari special i presidentit rus Vladimir Putin, Kirill Dmitriev, mbërriti në Majami për bisedime me të dërguarin amerikan Steve Witkoff dhe Jared Kushner, dhëndrin e Donald Trump. Sekretari amerikan i Shtetit dhe këshilltari për sigurinë kombëtare, Marco Rubio, ka lënë të hapur mundësinë e përfshirjes në një pjesë të këtyre takimeve.

Takime të ngjashme janë zhvilluar edhe më herët në klubin e golfit të Witkoff në Hallandale Beach, pranë Majamit. Zyrtarë amerikanë, ukrainas dhe evropianë kanë raportuar progres gjatë javës, veçanërisht sa i përket garancive të sigurisë për Kievin, megjithatë mbetet e paqartë nëse këto kushte do të pranohen nga Moska. Një burim rus theksoi se nuk parashikohet takim mes Dmitriev dhe negociatorëve ukrainas./mxh

Sulmuesi i Al Nassr, Cristiano Ronaldo u vlerësua si “Lojtari më i Mirë” i Lindjes së Mesme në Globe Soccer Awards 2025.

Ylli portugez mori çmimin në një mbrëmje gala në Dubai, ku morën pjesë futbollistë, presidentë klubesh dhe figura globale të sportit.

Duke folur në skenë pasi mori çmimin, Ronaldo tha se se është i motivuar, pavarësisht se ku luan.

“Fokusi im do të vazhdojë të jetë në shënimin e golave, fitimin e më shumë trofeve dhe tek arritjet personale”, tha Ronaldo.

Çmimi i Ronaldos vjen në mes të një sezoni në të cilin ai ka vazhduar të luajë një rol kyç në kampionatin arab me Al Nassr./mxh

Ka përfunduar procesi i votimit për zgjedhjeve parakohshme parlamentare të Kosovës.

Në daljen e exit poll-eve të para, ai që kryeson është Albin Kurti me Vetëvendosjen me 44.1% që përkthehet në 49 deputetë.

Në vendin e dytë është PDK me 23.9% që përkthehet në 27 deputetë ndërsa e treta është LDK-ja me 16.1% që do të thotë 18 deputetë.
Exit Poll-i i parë (Klan Kosova)

LVV 44.1%- 49 deputetë
PDK 23.9%- 27 deputetë
LDK 16.1%- 18 deputetë
AAK 5.8%- 6 deputetë
Nisma 1.1%- 0 deputetë
Të tjera 9%- 20 deputetë/mxh

A janë Dua Lipa dhe Callum Turner apo Jennifer Lopez dhe Ben Affleck në vitin 2002? Fotot e fundit të çiftit të famshëm nga pushimet në Meksikë kanë rikthyer menjëherë në kujtesë një nga momentet më ikonike të kulturës pop.

Në imazhet e publikuara së fundmi, Callum Turner shihet duke i vendosur krem dielli Dua Lipës, në një skenë që ngjan thuajse identike me momentin e famshëm të Ben Affleck dhe Jennifer Lopez në videoklipin “Jenny from the Block”. Një déjà vu i pastër për fansat e pop-it dhe të showbiz-it.

Gjatë pushimeve luksoze në Meksikë këngëtarja me origjinë shqiptare shfaqet e shtrirë, duke shijuar rrezet e diellit me një bikini minimal me print leopard ndërsa aktori 35-vjeçar i serialit Masters of the Air kujdeset për të, larg çdo kompleksi dhe vëmendjeje mediatike. Turner kishte zgjedhur një palë pantallona të zeza plazhi, ndërsa momenti i tyre intim u kap nga paparacët.

Krahasimi me videoklipin e vitit 2002 nuk është i rastësishëm: në atë kohë, Ben Affleck u bë simbol i një romance të ndjekur nga paparacët, një temë që ishte edhe thelbi i klipit të Lopez. Ironikisht, sot historia duket se po përsëritet me një tjetër çift superstarësh.

Dua Lipa dhe Callum Turner nisën lidhjen e tyre në fillim të vitit 2024, pasi u panë së bashku në premierën e serialit Masters of the Air. Ata e bënë lidhjen publike në Instagram në korrik të atij viti dhe debutuan si çift në tapetin e kuq të Met Gala 2025.
Në qershor 2025, këngëtarja e hitit “Don’t Start Now” konfirmoi zyrtarisht fejesën e tyre, pas muajsh spekulimesh për unazën me diamant që mbante në dorën e majtë. “Po, jemi të fejuar. Është shumë emocionuese,” u shpreh ajo për British Vogue.

Ndërkohë, fotot nga plazhet e Meksikës tregojnë qartë se mes Duas dhe Callumit, romanca është në kulmin e saj dhe interneti nuk po ngopet duke i krahasuar me Bennifer-in legjendar./mxh

Franca dhe bota e artit janë në zi pas ndarjes nga jeta të aktores legjendare franceze Brigitte Bardot, e cila u shua në moshën 91-vjeçare. Lajmi u konfirmua të dielën nga fondacioni i saj, ndërsa shkaku i vdekjes nuk është bërë ende i ditur.

Presidenti francez Emmanuel Macron reagoi menjëherë me një mesazh në rrjetin social “X”, ku e cilësoi Bardot si një “legjendë të shekullit”.

“Filmat e saj, zëri i saj, fama e saj verbuese, inicialet e saj, dhimbjet e saj, pasioni bujar për kafshët, fytyra që u bë Marianne – Brigitte Bardot mishëroi një jetë lirie. Një ekzistencë franceze, një rrezatim universal. Na preku të gjithëve. Ne vajtojmë një legjendë të shekullit,” shkroi Macron.

Brigitte Bardot u bë ikonë ndërkombëtare në moshë shumë të re, pas rolit të saj në filmin “And God Created Woman”, ku vallëzimi i saj zbathur dhe energjia e lirë tronditën kinemanë e kohës dhe thyen tabu të forta morale.

Vetëm 21 vjeçe, ajo skandalizoi censurën dhe magjepsi publikun me interpretimin e saj të guximshëm në filmin e vitit 1956, të realizuar nga bashkëshorti i saj i atëhershëm, regjisori Roger Vadim. Roli shënoi një kthesë të madhe nga imazhi tradicional i heroinave të përmbajtura të asaj periudhe./mxh

Të paktën tre persona kanë humbur jetën dhe mbi 40 të tjerë janë plagosur, pasi protestat në qytetin Latakia të Sirisë u përshkallëzuan në dhunë dhe të shtëna me armë.

Sipas zyrës mediatike të provincës Latakia, incidenti ndodhi gjatë një tubimi masiv të komunitetit alavit, i cili u zhvillua në Sheshin Azhari, në zemër të qytetit.

Mijëra protestues u mblodhën për të kërkuar një sistem politik të decentralizuar në Siri, si dhe lirimin e mijëra të burgosurve alavitë. Rreth dy orë pas nisjes së protestës, u dëgjuan të shtëna armësh nga një vend i paidentifikuar, çka shkaktoi panik dhe kaos mes turmës.

Forcat e sigurisë që ndodheshin në zonë hapën zjarr në ajër për të shpërndarë protestuesit, ndërsa demonstruesit u panë duke transportuar të plagosurit në këmbë, larg sheshit.

Në një deklaratë me shkrim për mediat, autoritetet lokale konfirmuan se tre persona u vranë dhe mbi 40 u plagosën, pa sqaruar nëse viktimat ishin të gjitha në Latakia apo edhe në qytete të tjera ku po zhvilloheshin protesta të ngjashme.

Tubimi ishte thirrur nga kreu i Këshillit Suprem Islamik Alavit, Ghazal Ghazal, ndërsa protestuesit brohorisnin slogane si “Duam federalizëm” dhe “Populli sirian është një”.

Një nga demonstruesit deklaroi për Reuters se protestuesit kishin dalë për të kërkuar dinjitet dhe të drejtën për të jetuar, duke kërkuar një sistem federal të ngjashëm me atë të vendeve të mëdha perëndimore.

Siria vijon të përballet me tensione të forta sektare që prej rrëzimit nga pushteti të Bashar al-Assadit vitin e kaluar, lider që i përkiste komunitetit alavit. Që prej atëherë, vendi drejtohet nga një qeveri e udhëhequr nga shumica sunite.

Vetëm në muajin mars, më shumë se një mijë alavitë u vranë pas një kryengritjeje të dështuar nga besnikë të Assadit, ndërsa javën e kaluar tetë persona humbën jetën nga një shpërthim në një xhami alavite në qytetin Homs.

Situata në Siri mbetet e brishtë, ndërsa frika nga përshkallëzimi i dhunës sektare vazhdon të rritet./mxh

Udhëheqësi i Koresë së Veriut, Kim Jong Un, ka nënvizuar atë që e përshkroi si “gjak, jetë dhe vdekje” të përbashkët midis Phenianit dhe Moskës në luftën në Ukrainë, ndërsa i dërgoi urime të Vitit të Ri Presidentit rus Vladimir Putin.

Në një mesazh të botuar të shtunën nga Agjencia Qendrore Koreane e Lajmeve (KCNA), Kim tha se viti 2025 përfaqëson një vit vërtet domethënës për marrëdhëniet midis Koresë së Veriut dhe Rusisë, duke deklaruar se aleanca dypalëshe ishte konsoliduar duke ndarë gjak, jetë dhe vdekje në të njëjtën llogore.

Mesazhi vjen në mes të thellimit të bashkëpunimit ushtarak midis dy vendeve gjatë pushtimit të vazhdueshëm të Ukrainës nga Rusia, i cili po i afrohet vitit të katërt.

Sipas agjencive të inteligjencës së Koresë së Jugut dhe Perëndimit, Pheniani ka dërguar mijëra trupa për të luftuar përkrah forcave ruse. Koreja e Veriut konfirmoi në prill se kishte vendosur trupa në mbështetje të fushatës ushtarake të Rusisë në Ukrainë dhe pranoi se ushtarët e Koresë së Veriut ishin vrarë në luftime.

Më herët këtë muaj, Pheniani pranoi gjithashtu se dërgoi trupa për të pastruar minat në rajonin Kursk të Rusisë në gusht 2025. Kim tha se të paktën nëntë ushtarë nga një regjiment inxhinierik u vranë gjatë vendosjes 120-ditore, duke folur më 12 dhjetor gjatë një ceremonie që shënonte kthimin e njësisë në shtëpi.

Mesazhi i Vitit të Ri i Kim-it drejtuar Putinit u dërgua një ditë pasi ai urdhëroi zyrtarët të intensifikojnë prodhimin e raketave, sipas mediave shtetërore.

Koreja e Veriut ka rritur ndjeshëm testimet e raketave në vitet e fundit. Analistët thonë se këto teste synojnë përmirësimin e aftësive të goditjeve precize, duke sfiduar Shtetet e Bashkuara dhe Korenë e Jugut dhe duke testuar sistemet e armëve para eksportit të mundshëm.

Përveç vendosjes së trupave, Pheniani ka dërguar predha artilerie, raketa dhe sisteme raketash me rreze të gjatë veprimi në Rusi. Analistët kanë thënë se, në këmbim, Moska po i ofron Koresë së Veriut ndihmë financiare, teknologji ushtarake dhe furnizime me ushqim dhe energji./mxh

Valencia CF është në zi. Të shtunën, klubi spanjoll njoftoi në rrjetet e tij sociale zhdukjen e Fernando Martin, trajnerit të ekipit rezervë të femrave.

Në moshën 44 vjeç, ai ishte me pushime me familjen e tij në Indonezi dhe është midis katër personave të raportuar të zhdukur pasi një anije turistike u fundos pranë ishullit Padar, në lindje të Balit, siç raportohet nga gazeta Marca.

Sipas mediave lokale, varka u përmbys të premten në mbrëmje, me shumë mundësi për shkak të detit të trazuar. Shtatë nga njëmbëdhjetë pasagjerët u shpëtuan, por Martini dhe tre nga fëmijët e tij ende mungojnë.

Ndërsa kërkimet vazhdojnë në Indonezi, lojtarët e Valencias CF i bënë homazhe trajnerit dhe familjes së tij duke mbajtur një minutë heshtje pas kthimit nga stërvitja./mxh

Vazhdon puna për riparimin e defektit në linjën 1000 e cila furnizon qytetin e Vlorës.

Punonjësit e ujësjellësit të Vlorës po punojnë edhe përgjatë mbrëmjes për të vënë në punë linjën kryesore të qytetit.

Është gjetur për momentin një zgjidhje provizore, e cila nuk është e përhershme: po bëhet zëvendësimi i pjesës së dëmtuar. Gjithsesi, duhet investim për zgjidhje afatgjatë.

Pas festive të fundvitit pritet të ketë një tjetër ndërhyrje.

Ndërkohë, qyteti me ujë pritet të furnizohet gjatë të dielës./mxh

Moderatorja dhe producentja Orinda Huta ka folur pa dorashka për prapaskenat e festivaleve muzikore në Shqipëri, duke hedhur dritë mbi një realitet që, sipas saj, rrallëherë thuhet publikisht: koston e lartë financiare dhe rraskapitjen emocionale që shoqëron pjesëmarrjen e artistëve.

E ftuar në emisionin “Andale”, Orinda u ndal te shpenzimet e konsiderueshme që kërkon vetëm realizimi i një kënge, duke theksuar se investimi shpesh shkon përtej asaj që publiku imagjinon.

“Vetëm kënga shkon deri në 5 mijë euro, pa përfshirë veshjen apo elementë të tjerë. Harxhon shumë dhe në fund merr edhe energji negative. Normalisht vjen momenti që pyet veten: pse duhet t’i bëj unë këto?”, u shpreh ajo.

Por, sipas saj, pesha nuk është vetëm ekonomike. Moderatorja theksoi se klima brenda festivaleve dhe marrëdhëniet që krijohen aty shpesh janë të ngarkuara, gjë që e bën procesin edhe më të lodhshëm për artistët dhe figurat publike.

“Përveç shpenzimeve, përballesh edhe me energji jo të mira, dhe në një moment ndalesh e thua: pse duhet të lodhem kaq shumë?”, shtoi Huta.

Deklaratat e saj kanë nxitur diskutime mbi mënyrën se si konceptohen dhe organizohen festivalet muzikore në vend, duke hapur debate për mbështetjen reale që u jepet artistëve dhe për raportin mes sakrificave që ata bëjnë dhe vlerës që marrin në këmbim./mxh

Johan Kortes pritet të prezantohet te Tirana në vazhdim, pasi së fundmi mbylli eksperiencën te Liberia.

26-vjeçari është treguar aktiv në rrjetet sociale. Në një nga postimet e fundit nxori në shitje një telefon të markës “Iphone”.

“Shitet Iphone 15 pro Max, bateria në 86%, shumë komod”, shkruan mbrojtësi që pritet të bashkohet te Tirana. Ky rast është i pazakontë, por megjithatë ka edhe raste të tjera. Ben Azubel që dikur luante te Partizani bënte të njëjtën gjë.

Te Tirana do të japë kontribut nga muaji janar. Kortes luan pikërisht në qendër të mbrojtjes./mxh

Viti 2026 do të jetë veçanërisht krijues dhe i guximshëm për sa i përket trendeve të buzëkuqit që do të dominojnë.

Nëse jeni adhurues i buzëkuqit të kuq apo preferoni nuanca më tokësore në buzë, hidhini një sy trendeve të mëposhtme që do t’ju japin buzë për t’u puthur!

Tonet e manaferrës

Ngjyrat e manaferrës do të jenë kudo në vitin e ri, imagjinoni kumbull të errët, të kuqe të thellë dhe bordo që do t’i japin një prekje vampireske grimit tuaj. Trendi është qartësisht i frymëzuar nga filmat Wednesday dhe Frankenstein që na fituan në vitin 2025, por edhe nga sfilatat e modës SS26 të shtëpive të modës Prabal Gurung dhe Proenza Schouler, ku nuancat më të zbehta dominuan pamjet e buzëve. Për t’i dhënë një efekt më bukur buzëve tuaja, mund të aplikoni një shkëlqyes buzësh në një ton të ngjashëm me atë të buzëkuqit tuaj ose edhe transparent mbi buzëkuq.

Ndikime nga vitet ’90-të

Vitet ’90 ndikuan shumë në trendet e modës dhe bukurisë në vitin 2025, ndërsa në vitin e ri ky ndikim vjen duke u kombinuar me vitet ’00. Kjo përkthehet në lapsa buzësh në nuanca gri-kafe ose të ndryshme kafe, të cilët përsosin formën e buzëve dhe japin vëllim. Do të shohim gjithashtu shumë shkëlqyes buzësh në nuanca kafe.

Ngjyrë buzësh të turbullta

Buzët e turbullta, domethënë buzët që duken sikur sapo janë puthur dhe buzëkuqi është lëvizur, do të jenë një trend i madh në vitin 2026. Të frymëzuara nga grimi japonez dhe korean, ato do t’ju japin pamje më natyrale dhe të thjeshta të buzëve. Për të marrë trendin, sigurohuni që buzët tuaja të jenë super të hidratuara. Prandaj, sigurohuni që të aplikoni balsam buzësh çdo ditë për t’i ushqyer dhe hidratuar, në këtë mënyrë buzëkuqi do të “rrëshqasë” më mirë dhe do të keni një rezultat më të njëtrajtshëm./mxh

Presidenti i Ukrainës, Volodymyr Zelensky bëri një ndalesë në Kanada këtë të shtunë, në rrugën e tij drejt një takimi me Presidentin e SHBA-së, Donald Trump, të caktuar për të dielën në Florida.

Zelensky u takua në Halifax me kryeministrin kanadez Mark Carney, i cili tha se sulmi i fundit rus nënvizoi nevojën për të qëndruar pranë Ukrainës.

“Ne kemi kushtet e një paqeje të drejtë dhe të qëndrueshme, por kjo kërkon një Rusi të gatshme, dhe barbarizmi që pamë gjatë natës… tregon se sa e rëndësishme është që ne të qëndrojmë pranë Ukrainës”,-tha Carney në një deklaratë.
Kjo e shtunë nuk kaloi pa sule, teksa Rusia gjithashtu pretendoi përparime të reja në terren me kapjen e dy qyteteve në pika të ndryshme përgjatë vijave të frontit.

Zelensky tha se sulmi rus tregoi se Moska nuk kishte ndërmend t’i jepte fund pushtimit që nisi në shkurt 2022 dhe i cili ka vrarë dhjetëra mijëra njerëz.

Rusia ka akuzuar Ukrainën dhe mbështetësit e saj europianë se po përpiqen të shkatërrojnë një plan të mëparshëm të ndërmjetësuar nga SHBA-ja për të ndaluar luftimet.

Duke shtuar presionin në fushën e betejës, Rusia njoftoi të shtunën se kishte pushtuar dy qytete të tjera në Ukrainën lindore, Myrnograd dhe Guliaipole./mxh