ROMË, 24 dhjetor /ATSH/- Në portin e Gioia Tauro në jug të Italisë është sekuestruar më shumë se 435 kilogramë kokainë e pastër, sipas “La Stampa”.

Një “pako” e bukur Krishtlindjesh u kap nga Guardia di Finanza (Policia Financiare Italiane), e cila sekuestroi një tjetër ngarkesë të konsiderueshme me kokainë që kalonte në portin e Gioia Tauro në prag të Krishtlindjeve.

Pakoja me 435 kilogramë kokainë të pastër, një nga ngarkesat më të mëdha të viteve të fundit, e fshehur në një ngarkesë prej afërsisht 1,000 qesesh me kikirikë të dërguara nga Amerika Latine dhe të destinuara, të paktën sipas dokumenteve tregtare që shoqëronin produktin, për në Evropën Lindore.

“Kjo është një goditje e rëndësishme ndaj të ardhurave të organizatave kriminale, pasi porti vazhdon të jetë një pikë “kyçe” për trafikimin ndërkombëtar të drogës në Evropë”, tha policia.

Nëse do të dilte në treg, kokaina e sekuestruar do t’u kishte sjellë organizatave kriminale mbi 70 milionë euro.

Sekuestrimi vjen në kuadër të inspektimeve të intensifikuara të fundvitit në një nga portet më të ngarkuara të Evropës dhe përbën një nga rastet më të bujshme vitet e fundit në Gioia Tauro. //a.i/

The post ITALI – Policia sekuestron 435 kilogramë kokainë të fshehur në qese me kikirikë appeared first on Agjencia Telegrafike Shqiptare.

NJU JORK, 24 dhjetor /ATSH/- Venezuela ka akuzuar Shtetet e Bashkuara të Amerikës për “zhvatje” në një seancë emergjente të Këshillit të Sigurimit të OKB-së në Nju Jork, sipas BBC.

“Kapja e dy cisternave të naftës venezueliane nga Uashingtoni ishte “më e keqe se pirateria”, tha ambasadori venezuelan në OKB.

Mbledhja emergjente e Këshillit të Sigurimit u thirr për të diskutuar sekuestrimin e anijeve cisternë, i cili u zhvillua në brigjet e Venezuelës në fillim të këtij muaji.

SHBA-ja ka thënë gjithashtu se po ndiqte një anije cisternë të tretë venezueliane.

Presidenti amerikan, Donald Trump ka akuzuar presidentin e Venezuelës, Nicolas Maduro, se drejton një kartel droge dhe se bandat kishin vepruar pa u ndëshkuar për një kohë shumë të gjatë.

Më 16 dhjetor, Trump urdhëroi një bllokadë detare të të gjitha cisternave të naftës të sanksionuara që hyjnë dhe dalin nga Venezuela.

Presidenti amerikan tha se SHBA-ja do ta mbante ose do ta shiste naftën bruto që ishte sekuestruar, si dhe vetë anijet.

SHBA-ja ka rritur praninë ushtarake në Detin Paqësor dhe Karaibe në muajt e fundit, duke dërguar 15 000 trupa dhe një sërë transportuesish aeroplanësh dhe anijesh luftarake në zonë.

Ky është dislokimi më i madh në rajon që kur SHBA-ja pushtoi Panamanë në vitin 1989, dhe qëllimi i deklaruar ishte të ndalonte rrjedhën e fentanilit dhe kokainës në SHBA.

SHBA-ja ka kryer sulme ndaj atyre që i quajnë anije venezueliane për kontrabandën e drogës, duke synuar më shumë se 20 anije dhe duke vrarë të paktën 100 persona.

Disa ekspertë thonë se sulmet mund të shkelin ligjet që rregullojnë konfliktin e armatosur.

I dërguari i Venezuelës në OKB tha se SHBA-ja po e nënshtron vendin e tij ndaj “shantazhit më të madh” në historinë e saj.

“Jemi në prani të një fuqie që vepron jashtë ligjit ndërkombëtar”, tha Samuel Moncada duke folur në takimin e Këshillit të Sigurimit të OKB-së.

Lidhur me sekuestrimin e naftës venezueliane nga SHBA-ja, ai e quajti atë një plaçkitje, grabitje dhe rikolonizim të Venezuelës.

“Qeveria e Shteteve të Bashkuara të Amerikës nuk ka juridiksion në Karaibe”, shtoi ai.

“Çfarë lidhje ka kjo me drogën?”, tha Moncada duke iu referuar industrisë së naftës venezueliane.

Në përgjigje, ambasadori i SHBA-së në OKB, Michael Waltz, i tha Këshillit të Sigurimit se SHBA-ja nuk e njihte Maduro si udhëheqësin legjitim të Venezuelës.

“Aftësia e Maduro për të shitur naftën e Venezuelës i mundëson pretendimet e tij mashtruese për pushtet dhe aktivitetet e tij narko-terroriste”, tha Waltz.

Gjatë një vizite në një panair tregtar në Karakas, presidenti Maduro tha se Këshilli i Sigurimit po i jepte mbështetje të madhe Venezuelës.

Rusia dhe Kina akuzuan SHBA-në për intimidim dhe agresion.

“SHBA-ja po shkatërron në mënyrë të paligjshme anijet civile në Detin e Karaibeve”, tha ambasadori rus në OKB, Vassily Nebenzia, në takimin e OKB-së.

“Veprimet e SHBA-së kundër anijeve venezueliane, janë një model për akte të ardhshme force kundër shteteve të Amerikës Latine”, shtoi ai.

Ndërkohë, i dërguari i Kinës në OKB, Sun Lei, i bëri thirrje SHBA-së që të ndalonte menjëherë veprimet dhe të shmangte përshkallëzimin e mëtejshëm të tensioneve. //a.i/

The post NJU JORK – Venezuela akuzon SHBA-në për “zhvatje” pas sekuestrimit të cisternave të naftës appeared first on Agjencia Telegrafike Shqiptare.

ROMË, 24 dhjetor /ATSH/- Këtë vit, Papa Leone XIV do të udhëheqë festimet e Krishtlindjeve në Vatikan për herë të parë. Por, traditat popullore të Krishtlindjeve në zemër të Kishës Katolike Romake mbeten të pandryshuara, sipas DW.

Kur fillojnë festimet?

Për katolikët, sezoni i Adventit (sezoni i parë i vitit kishtar, që çon në Krishtlindje dhe përfshin katër të dielat paraprirëse) filloi më 30 nëntor të këtij viti – dhe bashkë me të, edhe emocioni për Krishtlindje.

Në Vatikan, festimet fillojnë me ndezjen zyrtare të pemës së Krishtlindjeve dhe përurimin e skenës së Lindjes në Sheshin e Shën Pjetrit, të cilat të dyja u zhvilluan më 15 dhjetor të këtij viti.

Çfarë lloj peme Krishtlindjesh është vendosur në Vatikan?

Çdo vit një komunitet i kishës katolike i dhuron Vatikanit pemën e Krishtlindjes, gjë që konsiderohet si një nder i veçantë. Këtë herë u zgjodh një bredh nga provinca e Bolzanos në Tirolin e Jugut, i cili është 27 metra e lartë dhe peshon rreth tetë tonë.

“Shpresoj që kjo mrekulli para Krijimit të nxitet edhe nga pema jonë e Krishtlindjeve dhe se të frymëzojë reflektim”, tha peshkopi Ivo Muser i Bolcano-Bressanone tha në një intervistë.

Ai gjithashtu u bëri thirrje njerëzve të jenë të vëmendshëm, të respektueshëm dhe të gatshëm për të përqafuar stile jetese të qëndrueshme dhe modeste.

Nëse kjo është e mundur, duke marrë parasysh dekorimet luksoze dhe dritat festive që ndizen me ngjyra që ndryshojnë vazhdimisht, mbetet për t’u parë.

Për herë të pestë radhazi, pema e Krishtlindjeve është nga Italia. Deri më tani, janë dhuruar gjithsej katër pemë Krishtlindjesh nga vende në Gjermani, dhe në vitin 2028, Deggendorf në Bavari do të dhurojë pemën e pestë gjermane të Krishtlindjeve.

Festimet pompoze të Krishtlindjeve kanë ndodhur në Vatikan për të paktën 500 vjet, por tradita e vendosjes së një peme Krishtlindjesh në Sheshin e Shën Pjetrit filloi në vitin 1982 gjatë drejtimit të Papa Gjon Palit II.

Skena të Lindjes së Krishtit nga e gjithë bota

Skena e Lindjes së Krishtit u projektua dhe u krijua nga dioqeza e Nocera Inferiore-Sarno, e vendosur në provincën e Salernos në Kampania, Italia jugore.

Skena paraqet figura në madhësi reale dhe përfshin elementë arkitekturorë tipikë të rajonit përreth Nocerës.

Në përurimin e skenës së Lindjes së Krishtit, peshkopi Giuseppe Giudice e quajti atë “një mundësi të shkëlqyer për ungjillëzimin dhe rindërtimin e të gjithë rajonit”.

Ekspozita “100 Skena të Lindjes së Krishtit në Vatikan”, e mbajtur për herë të tetë, është gjithashtu në shfaqje nën kolonadën e majtë të Sheshit të Shën Pjetrit.

Ekspozita paraqet skena të lindjes së Krishtit të dizajnuara nga artistë nga 23 vende.

Edicioni i këtij viti është pjesë e serisë së ngjarjeve kulturore “Jubileu është Kulturë”.

Sipas “Vatican News”, ekspozita shërben si një shprehje mirënjohjeje për Vitin Jubilar të Shpresës 2025. //a.i/

The post Si festohen Krishtlindjet në Vatikan? appeared first on Agjencia Telegrafike Shqiptare.

MOSKË, 24 dhjetor /ATSH/- Rusia planifikon të ndërtojë një central në Hënë brenda dekadës së ardhshme – për të mbështetur ambiciet e saj dhe një bazë të përbashkët kërkimore me Kinën, ndërsa fuqitë e mëdha botërore intensifikojnë përpjekjet për të krijuar një prani afatgjatë në satelitin e vetëm natyror të Tokës, sipas “Reuters”.

Kompania shtetërore hapësinore e Rusisë, “Roscosmos”, tha këtë javë se synon të përfundojë ndërtimin e objektit të energjisë hënore deri në vitin 2036.

“Roscosmos” ka nënshkruar një kontratë me “Shoqatën Lavochkin”, një kompani e madhe ruse e hapësirës ajrore, për të realizuar projektin.

Ndërsa “Roscosmos” nuk e përshkroi në mënyrë të qartë objektin si bërthamor, tha se përpjekja përfshin “Rosatom”, kompaninë shtetërore bërthamore të Rusisë dhe “Institutin Kurchatov”, qendrën kryesore të kërkimit bërthamor të vendit.

“Roscosmos” tha se centrali do të furnizonte energji për programin hënor të Rusisë, duke përfshirë roverë robotikë, një observator shkencor dhe infrastrukturë për një Stacion të përbashkët Ndërkombëtar Kërkimor Hënor Ruso-Kinez.

Agjencia e përshkroi projektin si një zhvendosje nga misionet afatshkurtra drejt një pranie të përhershme shkencore në Hënë.

“Projekti është një hap i rëndësishëm drejt krijimit të një stacioni shkencor hënor që vepron vazhdimisht dhe kalon nga misionet e njëhershme në një program eksplorimi afatgjatë”, tha “Roscosmos” në një deklaratë.

Njoftimi vjen ndërsa Rusia kërkon të rikonfirmojë veten si një fuqi e madhe hapësinore pas një sërë pengesash.

Dikur një lidere globale në eksplorimin e hapësirës pas fluturimit historik të kozmonautit sovjetik Yuri Gagarin në vitin 1961, Rusia ka mbetur pas Shteteve të Bashkuara të Amerikës dhe, gjithnjë e më shumë, Kinës në dekadat e fundit.

Ambiciet e saj pësuan një goditje të madhe në gusht 2023 kur anija kozmike “Luna-25” pa pilot u rrëzua ndërsa përpiqej të ulej në Hënë.

Shefi i “Roscosmos”, Dmitry Bakanov, tha në qershor se vendosja e një centrali bërthamor në Hënë ishte një nga qëllimet strategjike të agjencisë, së bashku me eksplorimin e rinovuar të Venusit, i cili shpesh quhet “planeti motër” i Tokës.

Distanca e Hënës nga Toka – rreth 384,400 kilometra – dhe mjedisi i saj i ashpër e bëjnë gjenerimin e besueshëm të energjisë një sfidë qendrore për aktivitetin afatgjatë njerëzor ose robotik.

Energjia bërthamore është parë gjithnjë e më shumë nga agjencitë hapësinore si një zgjidhje praktike, veçanërisht në rajonet ku rrezet e diellit janë të kufizuara ose me ndërprerje.

Rusia nuk është e vetmja në ndjekjen e planeve të tilla. NASA njoftoi në gusht se synon të vendosë një reaktor bërthamor në Hënë deri në tremujorin e parë të vitit 2030.

Zyrtarët amerikanë e kanë cilësuar këtë përpjekje si pjesë të një konkurrence më të gjerë strategjike me Kinën.

“Jemi në një garë për në Hënë,” tha në atë kohë sekretari amerikan i Transportit, Sean Duffy.

“Dhe për të pasur një bazë në Hënë, na duhet energji. Energjia e qëndrueshme do të ishte gjithashtu thelbësore për misionet e ardhshme njerëzore në Mars”, shtoi ai.

Marrëveshjet ndërkombëtare ndalojnë vendosjen e armëve bërthamore në hapësirë, por lejojnë përdorimin e burimeve të energjisë bërthamore, me kusht që ato të përputhen me standardet e përcaktuara të sigurisë dhe rregullatore.

Interesi për Hënën është rritur ndërsa shkencëtarët dhe qeveritë shqyrtojnë burimet e saj të mundshme.

NASA vlerëson se sipërfaqja hënore mund të përmbajë deri në një milion ton metrikë helium-3, një izotop i rrallë në Tokë që mund të përdoret në teknologjitë e ardhshme të energjisë.

Studimet kanë identifikuar gjithashtu elementë të rrallë të tokës në Hënë, duke përfshirë skandiumin, itriumin dhe lantanidet, të cilat janë të rëndësishme për elektronikën moderne dhe prodhimin e avancuar.

Ndërsa konkurrenca përshpejtohet, analistët thonë se nxitja drejt infrastrukturës hënore mund të shënojë fillimin e një epoke të re rivaliteti gjeopolitik dhe ekonomik përtej Tokës. //a.i/

The post Rusia planifikon të ndërtojë central bërthamor në Hënë appeared first on Agjencia Telegrafike Shqiptare.

KIEV, 24 dhjetor /ATSH/- Draft-marrëveshja për t’i dhënë fund luftës ruso-ukrainase nuk parashikon heqjen e sanksioneve kundër Moskës nga Shtetet e Bashkuara të Amerikës, por Uashingtoni synon t’i heqë ato gradualisht pasi të mbarojë lufta, u tha sot gazetarëve, presidenti ukrainas Volodymyr Zelensky, sipas “Interfax Ukraine”.

“Ne nuk e shohim heqjen e sanksioneve në marrëveshjen midis Ukrainës dhe Shteteve të Bashkuara të Amerikës – por e kuptojmë se SHBA-ja do të lëvizi drejt heqjes sistematike të sanksioneve pasi të mbarojë lufta”, tha Zelensky.

“Dhe këtu pyetja është se sa të fortë mund të jenë evropianët”, shtoi ai.

“Sanksionet amerikane janë sanksione amerikane. Ka edhe sanksione evropiane. Ka sanksione nga vende të tjera në botë. Kjo është një histori shumëpalëshe për sanksionet dhe do të ishte mjaft e çuditshme nëse dikush premtonte diçka për të tjerët. Për më tepër, ne ende nuk e kuptojmë sa seriozisht rusët e marrin këtë apo atë dokument, deri në fund të luftës”, theksoi Zelensky.

Ai tha gjithashtu se Shtetet e Bashkuara të Amerikës duan të kenë një barazi të caktuar me Rusinë nëse i ofrojnë tregti të lirë Ukrainës, domethënë, po flasin për një marrëveshje të tregtisë së lirë me Ukrainën dhe Rusisë”, shtoi ai.

“Qëndrimi i Amerikës – meqenëse ky është një dokument katërpalësh – mbi tregtinë e lirë, nëse i ofrojnë tregti të lirë Ukrainës, ata duan të kenë një barazi të caktuar me rusët. Domethënë, ata po flasin për një marrëveshje të tregtisë së lirë me Ukrainën dhe një marrëveshje të tregtisë së lirë me Rusinë”, tha ai.

“Por, kjo është ajo që po thonë ata. Ne po flasim për veten tonë – për këtë mundësi të tregtisë së lirë midis Ukrainës dhe SHBA-së”, tha Zelensky, duke komentuar pikën e dhjetë të planit të paqes, e cila parashikon që pas përfundimit të marrëveshjes, Ukraina do të duhet të përshpejtojë procesin e përfundimit të marrëveshjes së tregtisë së lirë me Shtetet e Bashkuara të Amerikës. //a.i/

The post KIEV – Zelensky: SHBA do të heqë gradualisht sanksionet ndaj Moskës, pas përfundimit të luftës appeared first on Agjencia Telegrafike Shqiptare.

MOSKË, 24 dhjetor /ATSH/- Presidenti rus Vladimir Putin legalizoi me një dekret, këtë muaj – në mënyrë efektive – marrjen e pronave në territoret e pushtuara të Ukrainës, sipas “Kyiv Independent”.

Ligji i ri u lejon autoriteteve pushtuese të sekuestrojnë ambientet e banimit që tregojnë shenja të mungesës së pronarëve.

Në realitet, pronarët zakonisht janë larguar ose janë vrarë nga pushtimi rus në shkallë të plotë.

Në një veprim të mëtejshëm të projektuar për të forcuar kontrollin e Moskës mbi territoret ukrainase që i ka aneksuar në mënyrë të paligjshme dhe për të “rusifikuar” popullsinë që mbetet, dekreti i ri thotë gjithashtu, se prona që u përket ukrainasve pa dokumentacion “të vlefshëm” mund të konfiskohet.

Por, vërtetimi i pronësisë duhet të bëhet personalisht dhe dokumentet pranohen vetëm së bashku me një pasaportë ruse.

Petro Andriushchenko, kreu i Qendrës për Studimin e Pushtimit tha se ligji i ri legalizon zyrtarisht procesin, duke thënë se u jep autoriteteve të pushtimit fuqinë për të sekuestruar pronën e kujtdo sipas gjykimit të tyre, thjesht duke refuzuar të pranojnë dokumentet e pronësisë.

Ai shtoi se 5 000 apartamente janë marrë tashmë nga rusët në qytet, me numrin që rritet me 100-200 në javë.

Kush e merr pronën e sekuestruar?

Sipas ligjit, banesat e sekuestruara mund t’u rishpërndahen banorëve vendas që kanë humbur shtëpitë ose qiramarrësit e tyre.

Ai gjithashtu lejon përdorimin e këtyre pronave për të akomoduar zyrtarë të emëruar nga Rusia dhe stafin e administratës së pushtimit.

Andriushchenko deklaroi se pronat “pa pronar” fillimisht u ndahen forcave të sigurisë, të ndjekura nga punonjësit e sektorit publik. Të sapoardhurit nga Rusia gjithashtu po përfitojnë nga prona të tilla.

Disa raporte nga lëvizja e rezistencës “Yellow Ribbon”, një rrjet rezistence civile ukrainase aktive në zonat e pushtuara, thonë se ushtrisë ruse po i jepen gjithashtu prona të sekuestruara.

Yuliia Boklah, bashkë-drejtoreshë ekzekutive e “Helping to Leave”, një organizatë vullnetare që ndihmon personat që duan të largohen nga pushtimi rus, tha se ka raporte famëkeqe nga Mariupol, ku agjentët e pasurive të paluajtshme ruse shitën apartamente të banorëve vendas te rusët ‘me çmime të volitshme'”. //a.i/

The post RUSI – Putini lëshon dekret, tani mijëra ukrainas përballen me humbjen e shtëpive të tyre appeared first on Agjencia Telegrafike Shqiptare.

BUENOS AIRES, 24 dhjetor /ATSH-ANSA/- Në periudhën janar-nëntor 2025, Argjentina shënoi deficitin më të madh në sektorin e turizmit të regjistruar ndonjëherë që nga fillimi i monitorimit të kufijve, me një numër rekord qytetarësh që kanë dalë jashtë vendit, veçanërisht në Brazil.

Sipas të dhënave zyrtare, në 11 muajt e parë të vitit, 11,19 milionë banorë argjentinas udhëtuan jashtë vendit, ndërsa 4,78 milionë turistë hynë në vend, duke rezultuar në një bilanc negativ prej 6,41 milionë vizitorësh.

Sipas analistëve , kjo mund të ketë ndodhur nga mbiçmimi i fortë i monedhës vendase kundrejt dollarit dhe rritja paralele e kostos së jetesës, gjë që i bën pushimet jashtë vendit aktualisht më të lira për argjentinasit sesa në destinacionet turistike lokale.

Vendi që përfiton më shumë nga kjo situatë është Brazili fqinj, i cili u “pushtua” nga argjentinasit në vitin 2025.

Sipas të dhënave zyrtare nga Ministria e Turizmit e Brazilit, mbi 9 milionë vizitorë të huaj hynë në vend midis janarit dhe nëntorit, 3,1 milionë prej të cilëve ishin nga Argjentina, një rritje prej 82,1% krahasuar me të njëjtën periudhë në vitin 2024.

Përsa i përket bilancit tregtar, një studim i kryer nga Instituti Mbretëror i Studimeve Ekonomike vlerëson një bilanc negativ për Argjentinën midis 7 dhe 9 miliardë eurosh, një shifër e konsiderueshme duke marrë parasysh emergjencën financiare me të cilën përballet Departamenti i Thesarit në Argjentinë dhe nevojën për të grumbulluar rezerva për të përmbushur pagesat e borxhit të jashtëm. //a.i/

The post Argjentinasit preferojnë Brazilin, turizmi arrin nivelin më të ulët rekord appeared first on Agjencia Telegrafike Shqiptare.

BANGKOK, 24 dhjetor /ATSH-DPA/-  Tajlanda dhe Kamboxhia rifilluan sot bisedimet për një armëpushim të qëndrueshëm në konfliktin e tyre kufitar që shpërtheu sërish në fillim të këtij muaji, njoftuan të dyja palët.

“Një takim midis oficerëve të lartë ushtarakë u zhvillua në një pikë kontrolli kufitar në Provincën Chanthaburi në Tajlandën lindore dhe zgjati vetëm 35 minuta”, raportuan mediat.

Bisedimet, të cilat do të vazhdojnë për disa ditë, po shihen si hapi më i rëndësishëm nga të dyja palët deri më sot për të ndaluar armiqësitë – që nga fillimi i luftimeve të ripërtërira më shumë se dy javë më parë.

Sipas raportimeve, takimi i sotëm kishte për qëllim përgatitjen e terrenit për bisedime në nivel ministrash të Mbrojtjes ditën e shtunë. Ndërkohë, diskutimet brenda një komiteti të përbashkët për çështjet kufitare do të vazhdojnë në nivel sekretari shteti.

“Nëse këto bisedime çojnë në marrëveshje, do të zhvillohet edhe një takim në nivel ministrash”, u tha gazetarëve në Bangkok një zëdhënës i Ministrisë së Mbrojtjes së Tajlandës.

Një zëdhënëse e Ministrisë së Mbrojtjes së Kamboxhias tha se takimi i ministrave kishte për qëllim të gjente zgjidhje për rivendosjen e stabilitetit midis dy vendeve.

Luftime kanë shpërthyer në një numër pikash përgjatë kufirit prej rreth 800 kilometrash tajlandezo-kamboxhian.

Secila palë akuzon tjetrën për shënjestrimin e civilëve, me të dyja palët që i hedhin poshtë akuzat.

Konflikti buron nga një mosmarrëveshje dekadash mbi pretendimet territoriale. Qindra mijëra njerëz në të dyja anët e kufirit janë zhvendosur.

Luftimet shpërthyen në korrik, të ndjekura nga një armëpushim i rënë dakord pas disa ditësh.

Në nëntor, armëpushimi u pezullua pas një incidenti të ri në kufi, dhe që nga 7 dhjetori, situata është përkeqësuar pas një shkëmbimi zjarri ndërkufitar. //a.i/

The post FOKUS – Tajlanda dhe Kamboxhia bisedime për armëpushim në konfliktin kufitar appeared first on Agjencia Telegrafike Shqiptare.

BRUKSEL, 24 dhjetor /ATSH/-Bashkimi Evropian ka shpenzuar rreth 7% më pak për naftë dhe gaz nga Shtetet e Bashkuara të Amerikës gjatë katër muajve të fundit, pavarësisht angazhimit politik për të blerë 750 miliardë dollarë gaz amerikan deri në vitin 2028, sipas “Financial Times”.

Edhe pse BE-ja ka rritur vëllimet e gazit natyror të lëngshëm (LNG) të importuar nga SHBA-ja pas marrëveshjes tregtare të arritur me administratën Trump në gusht, rënia e çmimeve globale të energjisë ka ulur vlerën totale të importeve krahasuar me të njëjtën periudhë të një viti më parë.

Sipas vlerësimeve të konsulencës energjetike “Kpler”, importet europiane të LNG-së dhe naftës amerikane për periudhën shtator–dhjetor arritën në 29,6 miliardë dollarë.

Gillian Boccara, drejtoreshë e lartë në “Kpler”, tha se marrëveshja tregtare, e cila nuk është ligjërisht detyruese, nuk ka ndikuar realisht në rritjen e blerjeve të gazit amerikan.

Sipas saj, tregtia e mallrave energjetike udhëhiqet nga faktorë ekonomikë si kostot e transportit dhe marzhet, dhe jo nga premtime politike.

“Angazhimi për blerje është jorealist”, theksoi ajo, duke shtuar se shifrat thjesht nuk përputheshin me realitetin e tregut.

Në baza vjetore, importet e gazit amerikanga nga BE-ja arrijnë në 73,7 miliardë dollarë, shumë më pak se një e treta e shumës së nevojshme për të përmbushur objektivin prej 750 miliardë dollarësh për periudhën 2026–2028.

Produktet e energjisë bërthamore, përfshirë uraniumin, përbëjnë më pak se 1% të tregtisë energjetike BE–SHBA.

Edhe nëse BE do të zëvendësonte plotësisht gazin rus me LNG amerikan, ajo do të importonte rreth 29 miliardë dollarë në vit, ose vetëm 23% të vlerës së kërkuar nga marrëveshja, sipas “Argus Media”.

Për të arritur objektivin financiar, çmimet e gazit do të duhej të katërfishoheshin në 37,3 dollarë për milion BTU (njësi termike) deri në vitin 2028, një skenar që bie ndesh me pritshmëritë e tregut.

Aktualisht, kontratat për vitin 2028 tregtohen rreth 8,2 dollarë për MMBTU (njësi termike metrike), ndërsa çmimet e fundit të këtij niveli janë regjistruar vetëm gjatë krizës energjetike të vitit 2022, pas pushtimit rus të Ukrainës.

Ekspertët paralajmërojnë gjithashtu se mungesa e infrastrukturës, si kapacitetet e magazinimit dhe të rigazifikimit në Europë, apo kapacitetet eksportuese në SHBA, e bën pothuajse të pamundur një zgjerim të shpejtë të tregtisë energjetike mes dy palëve.

Sipas “Argus Media” – kompania e pavarur e inteligjencës së vlerësimeve të çmimeve për tregjet globale të energjisë dhe mallrave, duke përfshirë naftën, gazin, energjinë elektrike, metalet, bujqësinë dhe kimikate – BE-ja do të duhet të rrisë kapacitetet e saj të importit me mbi 50%, ndërsa SHBA-ja do të duhet të dyfishojë kapacitetet e eksportit, për të respektuar marrëveshjen.

Një ish-eurodeputet me përvojë të gjatë në politikat energjetike tha se marrëveshja duket më shumë si një strategji për të fituar kohë dhe për të shmangur një përplasje të drejtpërdrejtë tregtare me Shtëpinë e Bardhë, sesa si një plan ekonomik i realizueshëm.

Nga ana tjetër, Komisioni Europian deklaroi se ka blerë rreth 200 miliardë euro gaz amerikan gjatë 11 muajve të parë të vitit 2025, duke rritur ndjeshëm importet e LNG-së.

Komisioni pret të blejë 70 miliardë metra kub LNG amerikan në vitin 2025, nga 45 miliardë një vit më parë, dhe njoftoi nënshkrimin e të paktën nëntë kontratave afatgjata të reja këtë vit.

Megjithatë, mbetet e paqartë se sa nga këto marrëveshje përfshihen realisht në shifrat totale, të cilat përfshijnë edhe një kontratë polake prej 42 miliardë eurosh për ndërtimin e tre reaktorëve bërthamorë nga kompania amerikane “Westinghouse”. //a.i/

The post KOMENT – BE shpenzoi më pak naftë amerikane pas marrëveshjes tregtare prej 750 miliardë dollarësh me Trump appeared first on Agjencia Telegrafike Shqiptare.

TIRANË, 24 dhjetor /ATSH/- Në Britaninë e Madhe, jemi me fat që kemi afër Evropën. Nga gjeografia mahnitëse te kultura tërheqëse, kënaqësitë dhe sharmet e saj janë të famshme në mbarë botën. Nuk është çudi që Evropa përbën më shumë se gjysmën e të gjithë turizmit ndërkombëtar, shkruan Selene Nelson në një artikull të botuar në revistën britanike “Rest Less”.

Ndërsa vende si Franca, Spanja dhe Italia janë disa nga destinacionet më të njohura për t’u vizituar, ato nuk janë aspak më të lirat. Por ju mund të shijoni pushime po aq magjike në dhjetëra vende të tjera evropiane, dhe me kosto efektive!

Nga plazhet e kristalta të Shqipërisë te malet dhe liqenet vezulluese të Sllovenisë – për të mos përmendur shumë qytete dhe qyteza magjepsëse në të gjithë Evropën Lindore – ky kontinent është i mbushur me vende të bukura që presin të eksplorohen me një buxhet të kufizuar.

Udhëtimi mund të jetë i kushtueshëm, por nëse zgjidhni me kujdes destinacionin tuaj, mund të jetë më i përballueshëm nga sa mund të mendoni!

Ekzistojnë shumë vende të mrekullueshme, tërheqëse dhe me kosto efektive për t’u eksploruar – shumë prej të cilave janë pikërisht në Evropë.

Nëse ëndërroni pushime të paharrueshme dhe me çmime të përballueshme, ekspertët e udhëtimeve sugjerojnë 14 vendet më të lira për t’u vizituar në Evropë.

Shqipëria

E izoluar nga pjesa tjetër e kontinentit për pjesën më të madhe të shekullit XX, Shqipëria ka qenë prej kohësh një nga sekretet më të ruajtura të Evropës.

Por sot, dyert e Shqipërisë janë të hapura dhe nuk do të kalojë shumë kohë përpara se vendi të mbipopullohet nga turistët.

Bregdeti i saj i quajtur Riviera Shqiptare – është i mbushur me plazhe mahnitëse dhe ujëra të kristalta blu.

Vendpushimet më të njohura të plazhit janë, Dhërmiu dhe Ksamili, të cilat nuk janë prekur ende nga turizmi masiv. Si rezultat, akomodimi, ushqimi dhe udhëtimi mbeten mjaft të lira.

Në brendësi të vendit, do të gjeni male të larta, qytete fortesash, kështjella të rrënuara dhe rrënoja të panumërta të lashta greke dhe romake.

Pavarësisht nëse jeni – i apasionuar pas i historisë, një aventurier apo një adhurues i plazhit – ka diçka për të gjithë.

Kryeqyteti i gjallë, Tirana, është një bazë e shkëlqyer për të eksploruar pjesën tjetër të Shqipërisë dhe është një nga vendet më të përballueshme në Evropë për të ngrënë jashtë.

Revista britanike “Rest Less” rekomandon 14 vendet më të lira për t’u vizituar në Evropë;

Shqipëria, Mali i Zi, Portugalia, Malta, Republika Çeke, Greqia, Sllovakia, Bullgaria, Polonia, Rumania, Hungaria, Bosnjë-Hercegovina, Sllovenia, Estonia.  //a.i/

https://restless.co.uk/travel/the-cheapest-countries-to-visit-in-europe/

The post “Rest Less”: Shqipëria mes vendeve më mahnitëse evropiane për t’u vizituar appeared first on Agjencia Telegrafike Shqiptare.

TOKIO, 23 dhjetor /ATSH/- Kryeministrja japoneze, Sanae Takaichi u zotua sot se do të mbrojë ujërat territoriale japoneze mes tensioneve të vazhdueshme të Tokios me Pekinin për shkak të deklaratave të saj për Tajvanin.

“Mjedisi i sigurisë në zonat detare përreth Japonisë po bëhet gjithnjë e më i ashpër”, tha Takaichi, sipas një deklarate të lëshuar nga zyra e saj të martën.

“Ne mbajtëm këshillin ministror për forcimin e aftësive të sigurisë detare dhe konfirmuam angazhimin tonë, me qëllim që të mbrojmë me vendosmëri territorin dhe ujërat territoriale të Japonisë, për të forcuar aftësitë e anijeve të mëdha patrulluese, për të rritur koordinimin midis Rojës Bregdetare të Japonisë dhe Ministrisë së Mbrojtjes dhe Forcave të Vetëmbrojtjes, dhe për të përmirësuar mjedisin e punës dhe trajtimin e oficerëve të Rojës Bregdetare të Japonisë”, shtoi ajo.

Deklarata e saj erdhi pasi Tokio pretendoi në fillim të dhjetorit se avionët kinezë J-15 nga transportuesi “Liaoning” bllokuan radarin në dy avionë japonezë F-15 mbi det të hapur, në juglindje të ishullit kryesor të Okinawa-s.

Megjithatë, Kina tha se manovrat ishin profesionale, të sigurta, të përmbajtura dhe përtej çdo diskutimi, duke shtuar se ishte “praktikë e zakonshme” që avionët e transportuesve të ndiznin radarin gjatë stërvitjes.

Tensionet midis Kinës dhe Japonisë janë përshkallëzuar që nga 7 nëntori, kur Takaichi tha se një sulm kinez ndaj Tajvanit mund të përbënte ligjërisht një “situatë kërcënuese për mbijetesën”, duke i lejuar potencialisht Japonisë të ushtrojë të drejtën e vetëmbrojtjes kolektive. /a.i/

The post JAPONI – Takaichi zotohet të mbrojë ujërat territoriale mes tensioneve me Kinën appeared first on Agjencia Telegrafike Shqiptare.

PARIS, 23 dhjetor /ATSH-ANSA/- Groenlanda i përket popullit të saj dhe Danimarka është garantuesi i saj, tha sot presidenti francez, Emmanuel Macron në një reagim ndaj deklaratës së presidentit të SHBA-së, Donald Trump për të aneksuar territorin danez.

“Unë bashkohem me zërin e evropianëve në shprehjen e solidaritetit tonë të plotë”, shkroi presidenti francez në X.

Macron vizitoi në kryeqytetin, Nuuk në qershor për të konfirmuar mbështetjen e Francës për sovranitetin dhe integritetin territorial të Danimarkës dhe Groenlandës.

Presidenti amerikan, Donald Trump emëroi dje një të dërguar të posaçëm në Groenlandë, i cili menjëherë u zotua se do ta bënte territorin autonom danez pjesë të SHBA-së.

Që kur u kthye në Shtëpinë e Bardhë në janar 2025, Trump ka thënë vazhdimisht se SHBA-ja kishte nevojë për ishullin e pasur me burime Arktike për arsye sigurie duke refuzuar të përjashtonte përdorimin e forcës për ta siguruar atë.

Trump emëroi dje guvernatorin e Luizianës, Jeff Landry, si të dërguarin e posaçëm në Groenlandë.

Groenlanda, e vendosur midis Amerikës së Veriut dhe Evropës, është një vend strategjik në interes të SHBA-së, Kinës dhe Rusisë në Arktik, ndërsa gara për metalet e rralla nxehet dhe shkrirja e akullit e shkaktuar nga ngrohja globale po hap rrugë të reja transporti detar.

Vendndodhja e Groenlandës e vendos atë gjithashtu në rrugën më të shkurtër për raketat midis Rusisë dhe SHBA-së.

SHBA-ja ka bazën e saj ushtarake “Pituffik” në Groenlandë, një pjesë thelbësore e infrastrukturës së mbrojtjes nga raketat të Uashingtonit. Gjithashtu, ajo hapi një konsullatë në ishull në qershor 2020.

Vendosmëria e Trump për të marrë Groenlandën ka tronditur Danimarkën, një anëtare themeluese e NATO-s, e cila ka luftuar përkrah Amerikës në luftërat e saj në Afganistan dhe Irak.

Në janar, Danimarka njoftoi planin prej 2 miliardë dollarësh për të rritur praninë e saj ushtarake në rajonin e Arktikut. //a.i/

The post PARIS – Macron i drejtohet Trump: Groenlanda i përket popullit të saj appeared first on Agjencia Telegrafike Shqiptare.

UASHINGTON, 23 dhjetor /ATSH/- Administrata Trump tha sot se do të vendosë tarifa për importet kineze të gjysmëpërçuesve për shkak të ndjekjes “të paarsyeshme” të Pekinit për dominim në industrinë e çipave, por do ta vonojë veprimin deri në qershor 2027, sipas “Reuters”.

Norma e tarifës do të shpallet të paktën 30 ditë më parë, sipas dosjes, e cila vjen pas një hetimi 1-vjeçar ndaj importeve të çipave të Kinës në Shtetet e Bashkuara të Amerikës, të iniciuar nga administrata Biden.

“Synimi i Kinës ndaj industrisë së gjysmëpërçuesve për dominim është i paarsyeshëm dhe ngarkon ose kufizon tregtinë amerikane dhe për këtë arsye është i zbatueshëm”, tha përfaqësuesi i Departamentit Amerikan të Tregtisë në një njoftim.

Ky veprim përfaqëson përpjekjen e fundit të presidentit amerikan, Donald Trump për të ulur tensionet me Pekinin, i cili përballet me kufizimet e eksportit kinez të metaleve të rralla të tokës – mbi të cilat mbështeten kompanitë globale të teknologjisë dhe të cilat Kina i kontrollon.

Si pjesë e negociatave me Kinën për të vonuar këto kufizime, Trump shtyu rregullin për të kufizuar eksportet e teknologjisë amerikane – në njësitë e kompanive kineze që tashmë janë në listën e zezë.

Ka nisur gjithashtu një shqyrtim që mund të rezultojë në dërgesat e para në Kinë të çipave të dytë më të fuqishëm të kompanisë amerikane teknologjike “Nvidia”, pavarësisht shqetësimeve të mëdha nga mbështetësit e Kinës në Uashington, të cilët kanë frikë se çipat mund ta fuqizojnë ushtrinë e Kinës.

Industria e çipave është duke pritur rezultatin e një hetimi tjetër ndaj importeve të çipave – që mund të godasin mallrat kineze dhe të rezultojnë në tarifa për një gamë të gjerë teknologjish, por zyrtarët amerikanë po thonë privatisht se mund të mos i vendosin ato së shpejti. //a.i/

The post UASHINGTON – SHBA vonon tarifat për çipat kinezë deri në 2027-n appeared first on Agjencia Telegrafike Shqiptare.

TEHERAN, 23 dhjetor /ATSH-DPA/- Irani ka ndaluar furnizimet me gaz në Irak, njoftoi sot Ministria e Energjisë në Bagdad, një veprim që pritet të përkeqësojë ndjeshëm furnizimin me energji tashmë të brishtë të vendit.

Sipas agjencisë shtetërore të lajmeve irakiane INA, kjo do të thotë se rrjeti i gazit i vendit do të humbasë 4,000 deri në 4,500 megavat kapacitet gjenerimi.

Autoritetet iraniane informuan ministrinë në Bagdad për vendimin përmes një njoftimi me shkrim, duke përmendur si justifikim “rrethanat e paparashikueshme”.

Qeveria irakiane tha se ishte konsultuar me Ministrinë e Naftës për të zbatuar “masa alternative” për të minimizuar ndërprerjet në centrale.

Importet mbulojnë rreth një të tretën e konsumit kombëtar të energjisë elektrike në Irak.

Në vitet e fundit, Teherani ka ulur vazhdimisht furnizimet me gaz për të përmbushur kërkesën e brendshme, në rritje.

Shumica e eksporteve të naftës së Iranit aktualisht dërgohen në Kinë.

Pavarësisht se mban disa nga rezervat më të mëdha të naftës dhe gazit në botë, Irani po përballet me një krizë të rëndë energjetike.

Vëzhguesit ia atribuojnë krizën sanksioneve ndërkombëtare, mungesës së investimeve në infrastrukturë, korrupsionit dhe keqmenaxhimit afatgjatë.

Ndërkohë, Iraku vazhdon të vuajë nga mungesa e energjisë elektrike pas disa dekadash lufte dhe konflikti, me ndërprerje të shpeshta të energjisë elektrike, veçanërisht në verë.

Në vitin 2019, ashtu si në vitet e mëparshme, kjo çoi në protesta masive në të cilat u vranë qindra njerëz dhe u plagosën mijëra të tjerë.

Ndërprerja e furnizimeve me gaz iranian ka ngritur shqetësime se trazira të ngjashme mund të shpërthejnë sërish nëse mungesat e energjisë përkeqësohen në javët e ardhshme. //a.i/

The post TEHERAN – Irani ndalon furnizimet me gaz në Irak appeared first on Agjencia Telegrafike Shqiptare.

UASHINGTON, 23 dhjetor /ATSH-DPA/- Në periudhën korrik-shtator, ekonomia amerikane u rrit me një normë vjetore prej 4,3%, sipas të dhënave paraprake të qeverisë.

Shifra e tremujorit të tretë e raportuar nga Departamenti Amerikan i Tregtisë ishte shumë më e lartë se vlerësimi i ekonomistëve prej 3,3% dhe tejkaloi rritjen prej 3,8% të regjistruar në tremujorin e dytë.

Performanca më e fortë se sa pritej u nxit nga shpenzimet e larta të konsumatorëve gjatë verës, si dhe nga rritjet në eksporte dhe shpenzime qeveritare.

Publikimi i të dhënave u vonua për shkak të mbylljes 43-ditore te qeverisë që përfundoi më 12 nëntor.

“Pas kursit zigzag të gjysmës së parë të vitit, ka shumë indikacione të stabilizimit të ekonomisë amerikane”, tha Stephan Bales, ekspert në “KfW Research” të Gjermanisë.

Byroja zyrtare e Analizës Ekonomike tha se rritja e PBB-së reale në tremujorin e tretë pasqyroi rritjet në shpenzimet e konsumatorëve, eksportet dhe shpenzimet qeveritare që u kompensuan pjesërisht nga një rënie në investime.

“Tarifat janë përgjegjëse për shifrat e shkëlqyera ekonomike të SHBA-së që sapo u publikuan… dhe ato vetëm do të përmirësohen”, shkroi presidenti i SHBA-së,Donald Trump në “Social Truth” – duke pretenduar se politika e tij tarifore fshihej pas rezultatit pozitiv. //a.i/

The post SHBA – Ekonomia tejkalon pritshmëritë, rritet me 4,3% në tremujorin e tretë appeared first on Agjencia Telegrafike Shqiptare.

KIEV, 23 dhjetor /ATSH-DPA/- Ushtria ukrainase njoftoi sot se është tërhequr nga qyteti i Siverskut në rajonin lindor të Donetskut.

“Luftime të ashpra kanë vazhduar në zonën e Siverskut”, tha sot ne media sociale Shtabi i Përgjithshëm.

“Por, për të shpëtuar jetën e ushtarëve tanë dhe për të ruajtur forcën luftarake të njësive”, trupat ukrainase janë tërhequr”, thuhet në deklaratë.

Para se të fillonte pushtimi rus, Siversku kishte një popullsi prej pak më shumë se 10 000 banorësh.

Për një kohë të gjatë, vija e frontit në zonë konsiderohej relativisht e qëndrueshme, por kohët e fundit presioni nga sulmuesit rusë është intensifikuar.

Presidenti rus, Vladimir Putin njoftoi pushtimin e qytetit më pak se dy javë më parë gjatë një takimi të transmetuar pjesërisht me shefin e Shtabit të Përgjithshëm Valery Gerasimov. Kievi e mohoi këtë pretendim, në atë kohë.

Siversku konsiderohet strategjikisht i rëndësishëm pasi është pjesë e një linje mbrojtjeje që mbron zonën e fundit të madhe urbane në rajonin e Donbasit – të kontrolluar nga forcat ukrainase.

Pas marrjes së kontrollit të Siverskut, sulmuesit rusë tani mund të avancojnë drejt qyteteve të Slovianskut dhe Kramatorskut.

Ukraina ka qenë duke u mbrojtur nga pushtimi rus në shkallë të plotë – që nga shkurti i vitit 2022 me ndihmën masive të aleatëve perëndimorë. //a.i/

The post FOKUS – Kievi konfirmon tërheqjen e trupave nga Siversku në rajonin e Donetskut appeared first on Agjencia Telegrafike Shqiptare.

UASHINGTON, 23 dhjetor /ATSH/- Presidenti i SHBA-së, Donald Trump tha sot se kishte biseduar me presidentët e Kazakistanit dhe Uzbekistanit dhe se i kishte ftuar të dy udhëheqësit në samitin e G20 vitin e ardhshëm në Miami, Florida, sipas “Reuters”.

“Diskutuam rëndësinë e sjelljes së paqes në konfliktet e vazhdueshme dhe rritjen e tregtisë dhe bashkëpunimit midis kombeve tona”, tha Trump në një postim në “Truth Social”, duke iu referuar dy bisedave telefonike të tij me presidentin e Kazakistanit, Kassym-Jomart Tokayev dhe presidentin e Uzbekistanit, Shavkat Mirziyoyev.

“Shtetet e Bashkuara të Amerikës do të presin Samitin e G20 vitin e ardhshëm dhe do t’u bëjnë ftesa të dy udhëheqësve që të bashkohen me ne si të ftuar”, tha ai.

Ndërsa asnjëri vend nuk është pjesë e G20, është e zakonshme që organizatori i samitit të ftojë shtetet jo-anëtare të marrin pjesë në diskutime.

Muajin e kaluar, Tokayev dhe Mirziyoyev udhëtuan në Uashington për diskutime së bashku me udhëheqës nga Kirgistani, Taxhikistani dhe Turkmenistani.

Vëmendja në rritje e administratës amerikane në Azinë Qendrore lidhet me burimet e bollshme minerale të rajonit, veçanërisht ndërsa SHBA-ja kërkon të sigurojë metale të rralla tokësore që janë thelbësore për aplikimet e teknologjisë së lartë, duke përfshirë telefonat inteligjentë, automjetet elektrike dhe avionët ushtarakë. //a.i/

The post SHBA – Trump fton liderët e Kazakistanit dhe Uzbekistanit në samitin e G20 vitin e ardhshëm appeared first on Agjencia Telegrafike Shqiptare.

LONDËR, 23 dhjetor /ATSH/- Policia britanike tha sot se komediani, Russell Brand është akuzuar për dy krime të tjera seksuale, një akuzë të re për përdhunim dhe një tjetër për ngacmim seksual, sipas “Reuters”.

Akuzat e reja lidhen me dy gra që pasuan pesë akuza të ngritura në prill që përfshinin katër gra të tjera: dy akuza për përdhunim, një për ngacmim të pahijshëm dhe dy për ngacmime seksuale.

Brand, 50 vjeç, do të paraqitet në Gjykatën e Magjistraturës në Westminster më 20 janar në lidhje me akuzat e reja.

Një gjyq për akuzat e mëparshme është planifikuar në Gjykatën “Southwark Crown” më 16 qershor. //a.i/

The post KINEMA – Komediani Russell Brand akuzohet për dy krime të tjera seksuale appeared first on Agjencia Telegrafike Shqiptare.

BRUKSEL, 23 dhjetor /ATSH-DPA/- Komisioni Evropian ka miratuar një ndryshim në Udhëzimet e Ndihmës Shtetërore të Sistemit të Tregtimit të Emetimeve të BE-së (ETS), duke u lejuar vendeve anëtare të ofrojnë më shumë mbështetje financiare për një gamë më të gjerë industrish që kërkojnë shumë energji.

KE do të lejojë që industritë më intensive në energji të marrin kompensim për të kompensuar kostot e përmbushjes së rregullave të BE-së për emetimet, ndërsa kërkon të parandalojë kompanitë nga zhvendosja e operacioneve jashtë bllokut.

Nën presionin e industrive dhe disa vendeve anëtare, Bashkimi Evropian ka ndërmarrë hapa të gjerë për të lehtësuar barrën e legjislacionit që synon të trajtojë ndryshimet klimatike për të siguruar që kompanitë evropiane të mbeten konkurruese.

Qëllimi është të forcohet konkurrueshmëria e industrisë së BE-së, të parandalohen kompanitë nga zhvendosja e prodhimit jashtë BE-së (e njohur si “rrjedhje karboni”) dhe të nxitet dekarbonizimi.

“Sektorët që do të marrin mbështetje, si industritë e çelikut dhe kimike, do të jenë gjithashtu të kualifikuar për të marrë më shumë ndihmë shtetërore”, njoftoi sot komisioni në Bruksel.

Në mënyrë specifike, i ashtuquajturi kompensim i çmimit të energjisë elektrike do të zgjerohet. Kjo do t’i lehtësojë në mënyrë indirekte kompanitë nga kostot e tregtimit të emetimeve të CO2.

Komisioni tha se rritjet e çmimeve paraqesin rrezikun që industritë me intensitet të lartë energjie të zhvendosin prodhimin e tyre në vende jashtë BE-së që kanë kufizime më të ulëta të emetimeve.

Ekziston gjithashtu frika se importet që janë më të dëmshme për klimën do të zëvendësojnë produktet e BE-së, të cilat komisioni thotë se “çojnë në më pak aktivitet ekonomik në BE dhe nuk ulin emetimet e gazrave serrë në nivel global”.

Në përgjigje të rritjes së çmimit të certifikatave të gazrave serrë, industri të tjera si qeramika, qelqi dhe bateritë tani do të jenë gjithashtu të kualifikuara për mbështetje.

Për industritë ekzistuese, subvencioni maksimal do të rritet gjithashtu nga 75% në 80% të kostove indirekte të energjisë elektrike.

Në të njëjtën kohë, përfituesit e mëdhenj të ndihmës duhet të investojnë një pjesë të parave në projekte që kontribuojnë në uljen e kostove të sistemit të energjisë elektrike. //a.i/

The post BRUKSEL – BE mbështetje financiare për industritë që kërkojnë shumë energji appeared first on Agjencia Telegrafike Shqiptare.

UASHINGTON, 23 dhjetor /ATSH/- Presidenti i SHBA-së, Donald Trump tha se do të ishte e mençur që presidenti i Venezuelës, Nicolas Maduro, të largohej nga pushteti dhe se Shtetet e Bashkuara të Amerikës mund ta mbanin ose ta shisnin naftën që kishin konfiskuar në brigjet e Venezuelës në javët e fundit, sipas “Reuters”.

Presioni i Trump ndaj Maduro ka përfshirë një prani ushtarake të shtuar në rajon dhe më shumë se dy duzina sulme ushtarake ndaj anijeve që dyshohet se trafikojnë drogë në Oqeanin Paqësor dhe Detin e Karaibeve pranë kombit të Amerikës së Jugut.

Të paktën 100 persona janë vrarë në këto sulme.

“Mendoj se do të ishte e zgjuar nga ana e Maduro, nëse e bënte këtë,” u tha Trump gazetarëve në resortin e tij Mar-a-Lago në Palm Beach, Florida, kur u pyet nëse qëllimi i tij ishte të detyronte presidentin e Venezuelës të largohej nga pushteti.

“Nëse ai luan ashpër, do të jetë hera e fundit që ai do të jetë në gjendje të luajë ashpër”, shtoi ai.

Trump konfirmoi gjithashtu se Shtetet e Bashkuara të Amerikës po ndiqnin një anije cisternë të sanksionuar gjatë fundjavës.

Shumë media amerikane raportuan të dielën se Roja Bregdetare e SHBA-së “është në ndjekje aktive” të anijes cisternë “Bella 1” në ujërat ndërkombëtare pranë brigjeve të Venezuelës, ndërsa ajo ishte në rrugën drejt Venezuelës për të ngarkuar naftë.

“New York Times” raportoi dje se anija cisternë ishte arratisur në Oqeanin Atlantik.

Nëse kapet, kjo do të shënonte anijen cisternë të tretë të kapur me sukses nga SHBA-ja pranë Venezuelës në më pak se dy javë.

Javën e kaluar, Trump urdhëroi një “bllokim të plotë dhe total” të të gjitha anijeve cisternë të sanksionuara që hyjnë ose dalin nga Venezuela, duke e shpallur qeverinë e Maduro një organizatë të huaj terroriste.

Pentagoni ka vendosur rreth një duzinë anijesh luftarake, përfshirë “USS Gerald R. Ford”, një aeroplanmbajtëse e madhe, dhe rreth 15,000 trupa në Detin e Karaibeve – i cili ndan një pjesë të konsiderueshme të vijës bregdetare me Venezuelën.

Rajoni nuk ka parë një prani kaq masive ushtarake amerikane për të paktën tre dekada.//a.i/

The post SHBA – Trump thirrje Maduro të largohet me dëshirë nga pushteti appeared first on Agjencia Telegrafike Shqiptare.