Të ftuar këtë të enjte në “Mirmbrëma Yje” të Arbana Osmanit ishin jo një, por 4 nga vajzat më të njohura të ekranit, blogeret të njohura dhe për pjesëmarrjen e tyre në Big Brother 1 dhe 2 Beniada Nishani, Jori Delli, Sarah Berisha dhe Dea Michel Hoxha.

Teksa biseda u ndal tek blogerja dhe modelja Beniada Nishani e cila foli hapur dhe për eksperiencën e saj televizive pranë Televizionit Publik Shqiptar si moderatore dhe kritikat që ka marrë si një person “jo adapt” për këtë vend pune duke qenë se nuk fliste një gjuhë shqipe të pastër.

Gjatë bisedës, Arbana Osmani theksoi se Beniada është zakonisht shumë e kujdesshme në mënyrën se si shprehet në intervista, por pas sulmeve të fundit ka zgjedhur të jetë edhe më korrekte dhe më e matur duke shtuar se ka pasur disa zëra kritikë që kanë vënë në dyshim praninë e saj në ekran për shkak të mënyrës së të folurit në shqip.

Dea Michele Hoxha doli në mbrojtje të Beniadës, duke theksuar se pikërisht ky stil i të folurit, i ndikuar nga jeta e saj në Itali, ishte arsyeja pse ajo fitoi dashurinë e publikut shqiptar. Sipas Deas, Beniada ishte pjesë e një formati argëtues dhe jo një emisioni politik apo informativ, ndaj autenticiteti i saj ishte një vlerë dhe jo një pengesë.

Arbana Osmani: Unë mendoj që Beniada përgjithësisht është e kujdesshme në intervista se si shprehet, por mesa vë re unë tani edhe nga fakti që është sulmuar së fundmi po përpiqet që të jetë akoma më korrekte.
Dea Michel: Beni është sulmuar, pse?
Arbana Osmani: Për ta sqaruar për Dean dhe ata që po na ndjekin që ndoshta nuk janë familjar me situatën. Beniada ka punuar në Televizionin Shqiptar, për sa kohë?
Beniada Nishani: E vërtetë, nga janari deri në korrik.
Arbana Osmani: Dhe ka pasur disa zëra, jo një por disa që kanë menduar që kjo nuk është një zgjedhje e duhur dhe ai nuk është një pozicion i merituar nga një vajzë e cila nuk flet mirë akoma gjuhën shqipe se di duhet punoj në një televizion.
Dea Michel: A mund të ngre një kundërargument për këtë se tani u kujtova dhe e kam parë. Beniada i fitoi zemrat e publikut shqiptar si një vajzë që kishte jetuar në Itali dhe pikërisht aty e kishte lezetin tek fakti që i miksonte ndonjëherë ca fjalë dhe njerëzit e adhuronin këtë gjë. Ndonjëherë njerëzit e adhuronin këtë gjë. Ndonjëherë njerëzit për atë gjënë që të duan më shumë më pas kthehen dhe të sulmojnë dhe është shumë e çuditshme. Në fund të ditës Beniada nuk është se bënte një emision për politikë dhe lajme të rënda. Ishte diçka entertaiment dhe me këtë njeriu duhet të argëtohet. Dhe Beniada është një njeri argëtues, prandaj dhe flasin për të.

Në fjalën e saj, Beniada Nishani falënderoi publikisht gazetaren dhe moderatoren Ilda Lumani, nën drejtimin e së cilës ka punuar në RTSH:

“Ka qenë një emision shumë i bukur nën drejtimin e Ilda Lumanit. Dua ta falënderoj publikisht sepse ajo ka besuar shumë tek figura ime. Falë Ildës kam bërë një rrugëtim të mrekullueshëm, jam rritur dhe jam pjekur. Nuk ka njerëz perfektë dhe ndoshta fakti që nuk e flas ende shqipen ashtu siç duhet ta flasë një moderator është ajo që më bën të veçantë.”/mxh

Last Updated on 16/01/2026 by EL

Policia e Durrësit ka bërë me dije se është vënë në pranga ish drejtori i burgut të Durrësit Indrit Cerloj. Gjykata e Shkallës së Parë e Juridiksionit të Përgjithshëm Durrës, me vendimin nr. 19/1, datë 15.01.2026, i ka caktuar masën e sigurisë “Arrest në burg”, për veprën penale “Shpërdorimi i detyrës”.

Gjithashtu, me të njëjtin vendim, kjo gjykatë ka caktuar masën e sigurisë “Arrest në shtëpi” për shtetasen Y. S., 66 vjeçe, banuese në Durrës, doktoreshë në IEVP Durrës, për veprën penale “Shpërdorimi i detyrës”.

“Lokalizohet, kapet dhe vihet në pranga ish-drejtori i IEVP Durrës. Ekzekutohet masa e sigurisë edhe për doktoreshën e IEVP Durrës.

Specialistët e Seksionit për Hetimin e Krimeve Ekonomike dhe Financiare, në bashkëpunim me Seksionin për Mbështetjen Operacionale në Drejtorinë Vendore të Policisë Durrës, bënë të mundur lokalizimin dhe kapjen e shtetasit I. C., 48 vjeç, banues në Durrës, ish-drejtor i IEVP Durrës.

Për këtë shtetas, Gjykata e Shkallës së Parë e Juridiksionit të Përgjithshëm Durrës, me vendimin nr. 19/1, datë 15.01.2026, ka caktuar masën e sigurisë “Arrest në burg”, për veprën penale “Shpërdorimi i detyrës”.

Gjithashtu, me të njëjtin vendim, kjo gjykatë ka caktuar masën e sigurisë “Arrest në shtëpi” për shtetasen Y. S., 66 vjeçe, banuese në Durrës, doktoreshë në IEVP Durrës, për veprën penale “Shpërdorimi i detyrës”.

Materialet do t’i kalojnë Prokurorisë së Juridiksionit të Përgjithshëm Durrës, për veprime të mëtejshme”, njofton policia./et

Last Updated on 16/01/2026 by EL

Pas një aksidenti të rëndë në aksin Maqellarë-Peshkopi, 4 persona kanë mbetur të plagosur.

Raportohet se mes tyre, një çift bashkëshortësh është vendosur të transportohet me helicopter drejt Tiranës për mjekim më të specializuar.

Ata janë identifikuar si Kujtim dhe Vera Lika, konkretisht 68 dhe 66 vjeç.

Njoftimi i policisë:

Rreth orës 15:40, në aksin rrugor Peshkopi–Maqellarë, pranë fshatit Dovalan, janë përplasur dy automjete, me drejtues shtetasit K.L. 68 vjeç, dhe N.J., 57 vjeç.

Si pasojë e përplasjes, kanë mbetur të lënduar dy drejtuesit dhe dy bashëshortet e tyre shtetaset H.J., 55 vjeçe,  dhe V.L., 66 vjeçe.

Shtetasi K.L., dhe bashkëshortja e tij shtetasja V.L., u transportuan me helikopter drejt Tiranës, për ndihmë më të specializuar mjekësore.

Grupi hetimor ndodhet në vendngjarje dhe po kryen veprimet e nevojshme për sqarimin e plotë të rrethanave të aksidentit./et

Kronikë – TV Klan

Fëmijët në Ukrainë rrezikojnë hipotermi për shkak të temperaturave të acarta, ndërsa stoqet emergjente të gjeneratorëve elektrikë po shterojnë pas sulmeve ruse ndaj infrastrukturës energjetike, njoftuan agjenci ndërkombëtare ndihme të premten, më 16 janar.

Agjencia e Kombeve të Bashkuara për fëmijët, UNICEF, tha se po përballet me një garë kundër kohës për të rivendosur shërbimet e ujit dhe ngrohjes, të cilat janë dëmtuar rëndë nga sulmet me raketa dhe dronë, teksa afrohet përvjetori i katërt i pushtimit rus të Ukrainës.

“Fëmijët dhe familjet janë në një gjendje të vazhdueshme mbijetese,” tha për gazetarët në Gjenevë Munir Mammadzade, përfaqësues i UNICEF për Ukrainën.

Ai theksoi se njerëzit po përpiqeshin të mbroheshin nga sulmet ndaj ndërtesave të larta, ndërsa temperaturat gjatë natës bien deri rreth minus 18 gradë Celsius.

Presidenti Volodymyr Zelenskiy njoftoi të mërkurën, më 14 janar, se do të shpallë gjendje emergjente në sektorin e energjisë, ndërsa ministri i Energjisë, Denys Shmyhal, tha të premten se Ukraina ka rezerva karburanti për më shumë se 20 ditë.

Kievi dhe rajonet pranë vijës së frontit po përballen me kushtet më të vështira, me mijëra shtëpi në kryeqytet, si dhe në Dnipropetrovsk, Kharkiv, Odesa dhe qytetet e frontit, të mbetura pa elektricitet ose ngrohje për ditë me radhë.

“Pa ngrohje, njerëzit janë në rrezik të lartë për hipotermi, ngrica dhe sëmundje të frymëmarrjes,” tha Jaime Wah, zëvendësdrejtor i Delegacionit në Kiev për Federatën Ndërkombëtare të Kryqit të Kuq dhe Gjysmëhënës së Kuqe, duke shtuar se ndërprerjet e paparashikueshme të energjisë po pengojnë furnizimin me ujë dhe shërbimet shëndetësore./mxh

Last Updated on 16/01/2026 by EL

Nga Fejzo Subashi

Ekziston një shtresë , e cila për fat të keq nuk është e vogël, në shoqërinë tonë që nuk prodhon vlerë, nuk krijon dije, nuk ndërton institucione, por ka një “aftësi” të jashtëzakonshme: aftësinë për të shkatërruar të aftin.
Kjo shtresë është kanceri i shoqërisë sonë, i cili jo pak nga pak por me shpejtësinë e dritës po shkatërron Vendin.
I paafti nuk ngjitet sepse është i zoti. Ai ngjitet sepse di të kapë postin, të neutralizojë profesionistin, të zhdukë akademikun dhe të zëvendësojë cilësinë me mediokritet. Ai nuk konkurron, ai eliminon. Ai nuk përballet, ai intrigon. Ai nuk ndërton, ai uzurpon.
Kjo shtresë ka një instinkt të frikshëm: kap çdo karrige, çdo zyrë, çdo institucion, dhe aty ku hyn, gjëja e parë që bën është, jo vetëm që të respektoj dhe të pyes, por të largojë të aftin. Sepse i afti është rrezik. Dija është kërcënim. Profesionalizmi është armik.
Kështu, i paafti jo vetëm që i zë vendin profesionistit, por ia shkatërron edhe dinjitetin. E ul, e përbalt, e diskrediton, derisa ta detyrojë të largohet vetë. Dhe kjo është vrasja më e pastër morale që mund t’i bëhet një shoqërie.
Sot kjo shtresë nuk është më në hije. Është në kryesisht në krye të institucioneve shtetërore, pse jo dhe private. I paafti drejton sektorë që nuk i kupton, merr vendime për fusha ku nuk ka as formim, as përvojë, as përgjegjësi. I paafti sot i jep mend akademikut, i shpjegon ligjin juristit dhe ekonominë ekonomistit.
Dikur nuk e kuptoja paralajmërimin e profesorëve të mi:
“Mos ki frikë nga ai që di më shumë se ti; ki frikë nga ai që nuk di asgjë, por ka pushtet mbi ty.”
Sot kjo nuk është më këshillë, por është një realitet brutal.
Paaftësia sot nuk është thjesht e toleruar. Ajo është shpërblyer, promovuar dhe mbrojtur. Dhe më tragjikja: po i besohet pushtet edhe nga ata që duhet të jenë mbrojtës të ligjit, të interesit publik dhe të demokracisë. Kur ligjvënia dhe përfaqësimi bien në duart e mediokritetit, atëherë shteti shndërrohet në karikaturë.
Sot janë zhvlerësuar dija, formimi, përkushtimi dhe puna. Sot të vjen turp të kesh titull akademik, sikur të kesh mësuar të ishte faj. Ndërsa injoranca shitet si “zgjuarsi”, servilizmi si “aftësi” dhe paaftësia si “menaxhim”.
Unë nuk ndihem keq pse nuk jam i pasur. Nuk ndihem keq pse nuk kam poste apo privilegje. Ndihem keq sepse kam sakrifikuar për të mësuar, për t’u formuar, për të qenë profesionist dhe sot kjo duket si gabim në një shoqëri që e ndëshkon dijen dhe e shpërblen mosdijen.
Por problemi nuk jam unë. As mijëra të tjerë si unë.
Problemi është vendi.
Një vend që prej më shumë se tridhjetë vitesh jo vetëm që nuk ecën përpara, por po shkon pas. Një vend ku cilësia në drejtim, art, administrim dhe mendim publik ka rënë në nivele alarmante. Një vend ku sot është e vështirë të krahasosh drejtuesit aktualë jo me idealen, por thjesht me ata të djeshëm.
Kur paaftësia sundon, shoqëria nuk stagnon ajo kalbet.
Dhe kur kanceri bëhet sistem, shpresa bëhet viktima e radhës.
Tiranë më 16.01.2026.

Last Updated on 16/01/2026 by EL

Deputeti i Partisë Demokratike, Belind Këlliçi, ka komentuar zhvillimet e fundit në drejtësi, duke u ndalur te puna e SPAK dhe qëndrimi i mazhorancës ndaj hetimeve.

Këlliçi theksoi se Partia Demokratike mbështet plotësisht drejtësinë dhe kërkon që hetimet të zhvillohen me ritme të shpejta, pasi sipas tij dëmi ndaj financave publike po vijon çdo ditë. “PD mbështet drejtësinë dhe kërkon që hetimet të ecin me shpejtësi, sepse paratë po vidhen çdo ditë”, u shpreh ai.

Deputeti demokrat akuzoi mazhorancën dhe kryeministrin Edi Rama se po pengon qëllimisht veprimet e drejtësisë, duke refuzuar prej rreth një muaji mbledhjen të Këshillit të Mandateve. Sipas Këlliçit, kjo po bëhet për të bllokuar ekzekutimin e arrestimit ndaj zëvendëskryeministres Belinda Balluku, për të cilën SPAK ka kërkuar masa ligjore.

Ai rikujtoi edhe deklaratat e mëparshme të kryeministrit Edi Rama, i cili sipas tij ka pretenduar se qeveria nuk pengon drejtësinë. “Është i njëjti kryeministër që ka thënë se sa herë ka kërkesë nga organi i akuzës, ne i përgjigjemi dhe nuk e pengojmë drejtësinë, ndërsa sot po e mban peng prej një muaji largimin e Ballukut”, deklaroi Këlliçi.

Sipas deputetit të PD-së, kjo situatë tregon një standard të dyfishtë të mazhorancës dhe përbën një pengesë serioze për funksionimin e shtetit të së drejtës dhe besimin e qytetarëve te drejtësia../ET

Last Updated on 16/01/2026 by EL

Ish-deputeti i Partisë Demokratike, Dashnor Sula, ka zbuluar se ka pasur një telefonatë direkte me kryeministrin Edi Rama, të cilën e cilësoi si vlerësuese dhe civile.

Sipas Sulës, kryeministri e ka kontaktuar personalisht, duke i shprehur respekt për integritetin dhe dinjitetin e tij gjatë rreth 20 viteve në politikë. “Më ka thënë se respekton dinjitetin dhe integritetin tim si një njeri i papërfolur dhe më ka ftuar të kontribuoj për shtetin shqiptar aty ku e mendoj vetë”, deklaroi ish-deputeti.

Ai theksoi se përgjigjja e tij ka qenë e sinqertë dhe refuzuese. “I thashë që nuk jam gati”, u shpreh Sula, duke sqaruar se telefonata ka ndodhur në muajt gusht ose shtator, para nisjes së sesionit parlamentar. Sipas tij, ai ka zgjedhur të vijojë angazhimet e veta personale dhe profesionale, pa pranuar asnjë ofertë në atë moment.

Sula tregoi gjithashtu se e ka falënderuar Ramën për vlerësimin, pavarësisht përballjeve dhe debateve politike që kanë pasur ndër vite. Ai e cilësoi këtë gjest si shenjë civilizimi politik. “Tregon vlerë dhe kurajë kur kryeministri shqiptar vlerëson një kundërshtar politik për karakterin dhe e fton të kontribuojë në institucionet e shtetit”, tha Sula.

Ish-deputeti nënvizoi se, pavarësisht ftesës, ai nuk ka pranuar asnjë rol institucional, duke hedhur poshtë zërat për emërime apo angazhime të tij në strukturat e qeverisë./ET

Kremlini ka përshëndetur të premten sinjalet që, sipas tij, vijnë nga Italia, Franca dhe Gjermania për rifillimin e dialogut me Rusinë mbi luftën në Ukrainë, duke i cilësuar ato si një “ndryshim të rëndësishëm” që përputhet me qëndrimin e Moskës për mënyrën se si duhet të zhvillohet situata.

Zëdhënësi i Kremlinit, Dmitry Peskov, deklaroi se disa vende evropiane po tregojnë gatishmëri për të rihapur kanalet e komunikimit me Rusinë, ndërsa theksoi se Mbretëria e Bashkuar mbetet jashtë këtij qëndrimi.

Ministrja e Jashtme britanike, Yvette Cooper, ka bërë të ditur se Londra nuk mendon se ka ardhur momenti për një riangazhim me Moskën. Në një deklaratë për mediat, ajo u shpreh se nuk ka parë asnjë provë që Rusia synon paqe në Ukrainë.

“Sa i përket Britanisë, po, Britania vazhdon të mbajë një qëndrim radikal,” tha Peskov, duke komentuar dallimet mes qëndrimeve evropiane ndaj Rusisë.

Zëdhënësi i Kremlinit bëri të ditur gjithashtu se Rusia ka një dialog të vazhdueshëm me Shtetet e Bashkuara lidhur me përpjekjet për arritjen e një marrëveshjeje paqeje në Ukrainë, por se një dialog i tillë nuk ekziston aktualisht me qeveritë evropiane./mxh

Këngëtarja dhe producentja britanike PinkPantheress ka publikuar të enjten, më 15 janar, videoklipin e këngës së saj “Stateside”, në bashkëpunim me këngëtaren suedeze Zara Larsson.

Videoklipi hapet me një kalimtar që zbulon një manekin të PinkPantheress në vitrinën e një dyqani të stiluar sipas estetikës së albumit “Fancy That”. Papritur, manekini merr jetë dhe shpërthen në performancë, përpara se të zbulohet se Zara Larsson është shkaktarja e gjithë kaosit. Videoklipi është realizuar nga regjisorja Charlotte Rutherford, e njohur për bashkëpunimet e saj me emra të mëdhenj të muzikës pop si Charli XCX, Katy Perry dhe Little Mix.

Kënga “Stateside” u publikua fillimisht në prill të vitit 2025, ndërsa versioni remix me Zara Larsson doli në tetor 2025 si pjesë e albumit “Fancy Some More?”, një projekt me remikse të albumit të saj “Fancy That”. Në këtë album marrin pjesë edhe artistë të njohur ndërkombëtarë si Anitta, Kylie Minogue dhe grupi koreano-jugor i K-pop-it, SEVENTEEN.

PinkPantheress, emri i vërtetë i së cilës është Victoria Walker, njihet për hitet e saj “Boy’s a Liar Pt. 2” në bashkëpunim me reperen Ice Spice, si edhe këngët “Illegal” dhe “Nice to Meet You” me Central Cee.

Artistja është nominuar në çmimet Grammy 2026 për Albumin më të Mirë Dance/Electronic me “Fancy That” dhe për Regjistrimin më të Mirë Dance Pop me këngën “Illegal”.

Edhe Zara Larsson është pjesë e nominimeve të Grammy 2026, e nominuar për Regjistrimin më të Mirë Dance Pop me këngën e saj “Midnight Sun”./mxh

Last Updated on 16/01/2026 by EL

Një aksident i rëndë rrugor ka ndodhur pak minuta më parë në rrugën nacionale Maqellarë–Peshkopi, në afërsi të rrugës së Tërpces. Dy automjete janë përplasur kokë më kokë, duke shkaktuar plagosjen e katër personave.

Të plagosurit janë transportuar me urgjencë në Spitalin e Peshkopisë, ku po marrin ndihmën mjekësore. Burime nga spitali bëjnë me dije se dy prej të plagosurve do të transportohen me helikopter drejt Tiranës, për shkak të gjendjes së rënduar shëndetësore.

Në vendngjarje ndodhen forcat e Policisë, të cilat po punojnë për zbardhjen e shkaqeve dhe rrethanave të aksidentit, ndërsa qarkullimi i mjeteve ka qenë përkohësisht i bllokuar./ET

Last Updated on 16/01/2026 by EL

Policia e Korçës ka nisur procedim penal në gjendje të lirë ndaj babait të Martin Çeços, i cili kërcënoi publikisht me vetëgjyqësi dhe hakmarrje tre autorët e dyshuar të vrasjes së të birit, ngjarje e ndodhur tre vite më parë.

Sipas njoftimit zyrtar, nën hetim është marrë Nevzat Çeço, 70 vjeç, banues në fshatin Kolanec të bashkisë Maliq. Procedimi penal u referua nga shërbimet e Komisariatit të Policisë Maliq për veprën penale “kanosja serioze për hakmarrje ose për gjakmarrje”.

Ngjarja lidhet me reagimin e të moshuarit një ditë më parë, më 15 janar, pas vendimit të Gjykatës së Apelit Tiranë, e cila ndryshoi masën e sigurisë për tre autorët e dyshuar të vrasjes së Martin Çeços, nga “arrest në burg” në “arrest shtëpiak”. Pas këtij vendimi, 70-vjeçari u shpreh publikisht se do të hakmerrej ndaj tyre duke i djegur me benzinë dhe se më pas do të vetëflijohej, duke deklaruar se nuk mund ta pranonte lirimin e tyre.

Policia bën me dije se kërcënimet janë bërë në një video të publikuar në rrjetet sociale, ku Nevzat Çeço ka kanosur për jetën autorët e dyshuar të vrasjes së djalit të tij, ngjarje e ndodhur në qershor të vitit 2022./et

Last Updated on 16/01/2026 by EL

Kryeministri Edi Rama ka reaguar pas artikullit të publikuar nga media greke Protothema, ku batutat e shkëmbyera në konferencën e një dite më parë në Abu Dhabi me moderator grekun John Defterios, u trajtuan si ironi dhe ofendime për të dhe Greqinë.

Rama e cilëson median Protothema si media nacionaliste që i shërben “ndonjë politikani të lodhur grek” dhe se nuk ka asgjë tjetër në atë artikull përveç se deformim të kontekstit humoristik të batutave të shkëmbyera në atë panel.

“Jam i mahnitur nga reagimi i disa mediave në Athinë e i ndonjë politikani të lodhur grek lidhur me tonet e mia aspak tendencioze, po me humor miqësor gjatë bashkëbisedimit me gazetarin e nderuar John Defterios në panelin e organizuar gjatë Samitit të Zhvillimit të Qëndrueshëm në Abu Dhabi!

Është e pabesueshme që një fjali e thënë me humor, të shkëputet totalisht nga konteksti e të kthehet në polemikë publike me pathos nacionalist, gjë që fatkeqësisht në Athinën mediatike ndodh shpesh!

Por i siguroj të gjithë të shqetësuarit e të lënduarit, se nuk kam as më të voglin dyshim që Platoni dhe Aristoteli janë filozofë grekë dhe që Greqia e Lashtë është shtrati i qytetërimit europian; që kultura greke meriton vetëm admirim, jo vetëm për filozofët e lashtësisë po edhe për poetët, shkrimtarët, kineastët e muzikën që i ka dhënë njerëzimit; që Greqia është një vend për të cilin unë ushqej ndjenjat më pozitive, që populli grek është për mua një fqinj i pazëvendësueshëm e vëlla i patjetërsueshëm i popullit shqiptar dhe që për kryeministrin e Greqisë ushqej një respekt të veçantë!

U kuptuam? Shpresoj po.

Por ama mos më kërkojë askush ndër të shqetësuarit dhe të lënduarit me humorin tim, që kush shkruan e flet greqisht me pathosin nacionalist të të larpërmendurve, të më duket si pasardhës i Platonit dhe Aristotelit!

Kaq”, shkruan Rama./et

Last Updated on 16/01/2026 by EL

Siguria e institucioneve penitenciare dhe korrektuese mbetet një nga sfidat më të mëdha për shtetet europiane. Pavarësisht mureve të larta, kamerave dhe stafit të trajnuar, viti 2023 tregoi se sistemet e burgjeve nuk janë të paprekshme. Një numër i konsiderueshëm të burgosurish arriti të largoheshin, shpesh gjatë transferimeve, lejeve apo edhe nga burgjet me siguri të lartë, duke nxitur pyetje mbi funksionimin, organizimin dhe mbikëqyrjen e institucioneve penitenciare.

Në Francë, shifrat ishin më të larta se kudo tjetër: 1,201 të burgosur u arratisën gjatë vitit. Shumë raste ndodhën gjatë lejeve dhe transferimeve, duke treguar se edhe procedurat që supozohet të jenë të sigurta mund të kenë dobësi.

Në veri të kontinentit, Zvicra regjistroi 371 raste arratisjesh, Suedia 156 dhe Austria 150. Edhe këto shifra, ndonëse më të ulëta se në Francë, tregojnë se as sistemet më të disiplinuara nuk janë imunë ndaj sfidave. Në vendet nordike dhe në Zvicër, ku teknologjia dhe standardet e mbikëqyrjes janë më të avancuara, mungesa e stafit dhe presioni mbi burimet njerëzore shpesh krijojnë vrima në sistem.

Në Europën Jugore, Italia dhe Spanja u përballën me probleme të ngjashme. Italia regjistroi 102 arratisje, ndërsa Spanja 68, shumica nga administrata shtetërore. Burgjet në këto vende përballen me mbipopullim, staf të rraskapitur dhe mungesë investimesh në infrastrukturë, duke e bërë më të lehtë për disa të burgosur të gjejnë rrugë daljeje.

Edhe vendet më të vogla të Europës nuk mbetën jashtë fenomenit. Luksemburgu raportoi 29 arratisje, Danimarka 28, Belgjika 22 dhe Norvegjia 19. Këto shifra tregojnë se sfida e sigurimit të burgjeve nuk lidhet vetëm me madhësinë ose fuqinë ekonomike të një vendi, por edhe me organizimin e brendshëm dhe kulturën e menaxhimit të burgjeve.

Në Ballkan, arratisjet ishin më të pakta në numër, por jo më pak të ndjeshme. Maqedonia e Veriut regjistroi 33 raste, Bosnje dhe Hercegovina 11, dhe Serbia, Greqia dhe Kroacia nga 3 secila.

Vendet si Portugalia (9 raste), Irlanda dhe Rumania (nga 6 secila), Sllovenia (5), si dhe Letonia, Armenia dhe Moldavia (nga një ose dy raste) tregojnë se fenomeni është i përhapur në të gjithë kontinentin. Praktikisht askush nuk ishte i përjashtuar.

Rreziku për shoqërinë
Një aspekt që shqetëson autoritetet dhe qytetarët është se shumë nga të burgosurit që arratisen kanë precedentë penal. Shumë janë dënuar për vepra të rënda, përfshirë vjedhje të dhunshme, sulme, trafik droge apo krime të tjera që lidhen me sigurinë publike. Kjo e bën fenomenin më shqetësues: të arratisurit nuk janë vetëm të lirë, por edhe potencialisht të rrezikshëm. Ekspertët e sigurisë theksojnë se monitorimi i tyre pas arratisjes është i vështirë, dhe mungesa e koordinimit ndërkombëtar mund të lejojë që individët me precedentë të lëvizin shpejt mes shteteve, duke rritur rrezikun për komunitetin.

Arratisjet e vitit 2023 nuk janë thjesht statistika. Ato nxjerrin në pah dobësitë strukturore të sistemeve penitenciare dhe nevojën për reforma të qëndrueshme. Fenomeni reflekton presionin mbi stafin, mbipopullimin, procedurat e ndjekura gjatë transferimeve dhe lejeve, si dhe nevojën për koordinim më të madh ndërkombëtar.

Ekspertët e sigurisë dhe analistët e sistemit penal shohin në këto raste një mundësi për të rishikuar standardet dhe praktikat e mbikëqyrjes, duke përmirësuar infrastrukturën, rritur trajnimin e stafit dhe integruar teknologji që mund të parandalojnë arratisjet. Shqipëria për fatin e saj të mirë nuk pati asnjë arratisje përgjatë 2023, por fillim i këtij vitit shijoi arratisjen më të bujshme, atë të Altin Ndocajt./Fjala.al

Policia njoftoi mesditën e kësaj të premteje, 16 janar, se shkak për aksidentin e rëndë të ndodhur mbrëmjen e së enjtes te Ura e Dajlanit në Durrës ishte gjendja e dehur e shoferit 26-vjeçar. Për këtë arsye është ndaj tij vendosur arrestimi në flagrancë. Ai ndodhet aktualisht në spital, jashtë rrezikut për jetën.

Po ashtu, policia thotë se dy këmbësorët të cilët mbetën të plagosur, pasi kanë marrë ndihmën e nevojshme mjekësore, kanë lënë spitalin. Kujtojmë se nga aksidenti i rëndë, humbi tragjikisht jetën një vajzë 18-vjeçare.

“…Në përfundim të këtyre veprimeve, u bë arrestimi në flagrancë i drejtuesit të automjetit në të cilin ishte pasagjere shtetasja V. G., shtetasi A. Xh., 26 vjeç, për veprat penale “Shkelja e rregullave të qarkullimit rrugor”, me pasojë vdekjen, dhe “Drejtimi i automjeteve në mënyrë të parregullt”. Nga hetimet rezultoi se 26-vjeçari ka humbur kontrollin mbi automjetin që drejtonte në gjendje të dehur, dhe si pasojë, automjeti është përplasur me barrierat anësore të urës dhe ka rënë nga ajo. 26-vjeçari vijon të jetë në kujdesin e mjekëve, aktualisht jashtë rrezikut për jetën, ndërsa 2 këmbësorët e dëmtuar kanë marrë asistencën mjekësore të nevojshme dhe janë larguar në banesa”, tha policia e Durrësit në një njoftim për media.
Aksidenti ndodhi rreth orës 22:15, të së enjtes. 26-vjeçari dhe viktima udhëtonin me një makinë BMW, dyshohet me shpejtësi tej normave të lejuara. Ata u përplasën fillimisht me trafikndarësen e më pas makina ra nga ura duke përfunduar në një dyqan lulesh, duke plagosur rojen dhe një tjetër person./kb

Last Updated on 16/01/2026 by EL

Refuzimi i grumbullimit të qumështit të kontaminuar me aflatoksinë nga kompania përpunuese Lufra ka hapur një debat të fortë publik, të artikuluar së fundmi edhe nga deputeti Erjon Braçe, lidhur me vështirësitë që po përjetojnë blegtorët e zonës së Myzeqesë për të shitur prodhimin e tyre. Ndërsa shqetësimi i fermerëve është real dhe i prekshëm ekonomikisht, nga këndvështrimi i sigurisë ushqimore ky veprim përbën një sinjal pozitiv për konsumatorin dhe për standardet e tregut.

Një pjesë e mediave ranë pre e dezinformimit dhe shtrembërimit të informacionit, në disa raste edhe dashakeq, duke theksuar se “deputeti Braçe po akuzonte kompaninë për qumësht me aflatoksinë.”

Por, në fakt, sipas informacioneve të bëra publike, Lufra, në rolin e saj si grumbulluese dhe përpunuese, ka refuzuar të marrë qumësht nga disa ferma pas kryerjes së analizave laboratorike që kanë konstatuar nivele të papranueshme të aflatoksinës. Aflatoksina është një ndotës i rrezikshëm, i lidhur kryesisht me ushqimin e kafshëve dhe kushtet e ruajtjes së tij, dhe prania e saj mbi normat e lejuara përbën rrezik serioz për shëndetin e njeriut. Në këtë kuptim, vendimi për të mos e futur këtë lëndë të parë në zinxhirin e prodhimit nuk është një zgjedhje tregtare arbitrare, por një detyrim ligjor dhe etik.

Nga perspektiva e konsumatorit, ky është një lajm i mirë. Refuzimi i qumështit të kontaminuar do të thotë se produktet që dalin në treg nën markën e kompanisë nuk komprometojnë sigurinë ushqimore dhe nuk transferojnë rrezikun nga ferma te tryeza e qytetarëve. Në një treg ku besimi te cilësia dhe origjina e ushqimit është thelbësor, ky standard veprimi përforcon idenë se siguria e produktit duhet të jetë prioritet absolut, edhe kur kjo sjell kosto apo tensione me furnitorët.

Debati i ngritur nga deputeti Braçe, mbi burimin alternativ të qumështit që përdorin fabrikat, përfshirë aludimet për importe apo avantazhe fiskale, përbën një çështje tjetër, që kërkon transparencë dhe analizë të veçantë nga autoritetet dhe nga vetë industria. Megjithatë, ai debat nuk e zhbën thelbin e situatës konkrete: një përpunues që refuzon lëndë të parë të kontaminuar po vepron në përputhje me interesin publik dhe me standardet e sigurisë ushqimore.

Sfida reale mbetet gjetja e një zgjidhjeje strukturore për blegtorët, të cilët përballen me humbje të menjëhershme kur prodhimi i tyre nuk përmbush kriteret. Kjo kërkon ndërhyrje në hallkat e tjera të zinxhirit, nga kontrolli i ushqimit të bagëtive, te mbështetja teknike dhe financiare për fermerët, por jo kompromis me cilësinë e qumështit që përfundon në treg. Në këtë ekuilibër mes mbrojtjes së prodhuesit dhe mbrojtjes së konsumatorit, rasti i Lufrës tregon se siguria e produktit duhet të mbetet vija e kuqe që nuk kalohet.

Last Updated on 16/01/2026 by EL

Presidenti Bajram Begaj ka liruar nga detyra Komandantin e Forcës Detare, Nënadmiral Adnand Dëfrim Agastra. Në vend të tij, Kreu i Shtetit emëroi Kundëradmiral Arsen Burhan Mullaj.

Begaj ka dhënë edhe disa grada madhore. Për Kolonel Razije Kadri Mehmeti u dha grada madhore “Gjeneral Brigade”.

Ndërkaq, e njëjta gradë madhore u dha për Kolonel Fatmir Sadri Neziraj dhe Kolonel Edmond Abaz Voci.

“Njoftim për media

Tiranë, më 16 janar 2026

Presidenti i Republikës Sh.T.Z. Bajram Begaj, me Dekret nr. 25, datë 16.1.2026, dekretoi sot lirimin e Nënadmiral Adnand Dëfrim Agastra nga detyra e Komandantit të Forcës Detare.

Presidenti i Republikës Sh.T.Z. Bajram Begaj, me Dekret nr. 26, datë 16.1.2026, dekretoi sot emërimin e Kundëradmiral Arsen Burhan Mullaj në detyrën e Komandantit të Forcës Detare.

Presidenti i Republikës Sh.T.Z. Bajram Begaj, me Dekret nr. 27, datë 16.1.2026, dekretoi sot dhënien e gradës madhore “Gjeneral Brigade” për Kolonel Razije Kadri Mehmeti, me detyrë “Drejtor” në Drejtorinë e Bashkëpunimit Civilo-Ushtarak J-9 në Shtabin e Përgjithshëm të Forcave të Armatosura.

Presidenti i Republikës Sh.T.Z. Bajram Begaj, me Dekret nr. 28, datë 16.1.2026, dekretoi sot dhënien e gradës madhore “Gjeneral Brigade” për Kolonel Fatmir Sadri Neziraj, me detyrë “Drejtor” në Drejtorinë e Operacioneve dhe Stërvitjes J-3/7 në Shtabin e Përgjithshëm të Forcave të Armatosura.

Presidenti i Republikës Sh.T.Z. Bajram Begaj, me Dekret nr. 29, datë 16.1.2026, dekretoi sot dhënien e gradës madhore “Gjeneral Brigade” për Kolonel Edmond Abaz Voci, me detyrë “Komandant i Qendrës së Kontroll Raportimit” në Forcën Ajrore.”, thuhet në njoftimin e presidencës./et

Last Updated on 16/01/2026 by EL

Qëndrimi i artikuluar sot nga Kryeministri Edi Rama për peshën dhe vështirësinë e dy viteve të ardhshme në funksion të anëtarësimit të Shqipërisë në Bashkimin Europian nuk është thjesht një mesazh politik për administratën dhe grupin parlamentar të shumicës. Ai është, në thelb, një paralajmërim për një ndryshim të thellë qasjeje në mënyrën se si vendi prodhon, kontrollon dhe vendos standarde, veçanërisht në sektorë kritikë si siguria ushqimore.

Rama e tha qartë se procesi i negociatave nuk është vetëm teknik, por një barrë e madhe detyrimesh që kërkon qartësi, disiplinë dhe vendimmarrje të fortë. “Shqipëria po përgatitet të hyjë në një treg prej 450 milionë konsumatorësh, ku nuk ka vend për improvizim, tolerancë selektive apo standarde të dyfishta”. Në këtë kuadër, paralajmërimi se vendi është ende larg kritereve të BE-së për sigurinë ushqimore duhet lexuar si një alarm serioz, jo si retorikë politike. Në skenarin më ekstrem të përshkruar prej Kryeministrit, dështimi për të përmbushur këto kritere do të nënkuptonte jo vetëm pamundësinë për të eksportuar, por edhe rrezikun që produkte vendase të mos lejohen të qarkullojnë as në tregun e brendshëm.

Pikërisht në këtë kontekst, rasti i kompanisë Lufra nuk është një episod i shkëputur, por një ilustrim konkret i asaj që do të thotë, në praktikë, standard europian. Refuzimi i grumbullimit të qumështit të kontaminuar me aflatoksinë ka shkaktuar reagime të forta publike, të artikuluara edhe nga deputeti Erjon Braçe, duke vënë në fokus vështirësitë reale ekonomike të blegtorëve të Myzeqesë. Ky shqetësim është i kuptueshëm dhe nuk duhet minimizuar, por ai nuk mund të zgjidhet duke relativizuar sigurinë ushqimore. Ekofin.al disponon rezultatet e analizave ku qumështi i mbledhur nga fermerët ka rezultuar me nivele shumë të larta aflatoksine.

Përtej zhurmës mediatike dhe keqinterpretimit të qëllimshëm apo të pavullnetshëm të deklaratave, faktet janë të thjeshta: analiza laboratorike kanë konstatuar nivele të papranueshme të aflatoksinës, një ndotës serioz që buron kryesisht nga ushqimi i kafshëve dhe mënyra e ruajtjes së tij. Në këto kushte, refuzimi i qumështit nuk është as një manovër tregtare dhe as një akt arbitrar ndaj fermerëve, por një detyrim ligjor dhe etik ndaj konsumatorit. Lejimi i futjes së kësaj lënde të parë në zinxhirin e prodhimit do të nënkuptonte transferimin e rrezikut shëndetësor nga ferma te tryeza e qytetarëve, një praktikë e papranueshme në çdo treg që synon standardet e BE-së.

Nga këndvështrimi i konsumatorit, ky është një lajm i mirë. Ai tregon se, të paktën në këtë hallkë të zinxhirit, po zbatohet parimi se siguria e produktit është mbi çdo interes tjetër. Ky është pikërisht standardi që Bashkimi Europian kërkon dhe që Kryeministri sot e përshkroi si të panegociueshëm: nuk ka më hapësirë për “të falur” në emër të vazhdimësisë së aktivitetit ekonomik, nëse kjo bie ndesh me shëndetin publik.

Debati i ngritur për burimet alternative të qumështit, për importet apo për trajtimet fiskale të industrisë, është legjitim dhe kërkon transparencë të plotë nga autoritetet dhe nga vetë përpunuesit. Por ai nuk e ndryshon thelbin e çështjes: një produkt i kontaminuar nuk mund dhe nuk duhet të hyjë në treg. Sfida reale për shtetin është gjetja e zgjidhjeve strukturore për fermerët, që të mos mbeten të ekspozuar ndaj humbjeve sa herë që prodhimi i tyre dështon në standarde. Kjo do të thotë kontroll më i fortë i ushqimit të bagëtive, asistencë teknike, mbështetje financiare dhe edukim për standardet, jo ulje të vijës së kuqe të sigurisë ushqimore.

Nëse fjalët e Ramës për dhjetë vitet që “kalojnë shpejt” dhe për mungesën e luksit për të diskutuar pas negociatave merren seriozisht, atëherë rasti i Lufrës duhet parë si një provë gjenerale e Shqipërisë për BE-në. Integrimi nuk do të vijë nga deklaratat, por nga vendime konkrete që tregojnë se standardi mbrohet edhe kur është i dhimbshëm ekonomikisht. Në këtë sens, siguria ushqimore nuk është thjesht një kapitull negociatash, por testi më i drejtpërdrejtë i gatishmërisë së vendit për t’u bërë pjesë e Europës. /et

Kombëtarja, para se të luajë play-off për Botërorin 2026, do të njohë kundërshtarët për Ligën e Kombeve 2026–2027.

Shorti do të hidhet më 12 shkurt, ditën kur do të mbahet edhe Kongresi i zakonshëm i UEFA-s në Bruksel.

Shqipëria është në Ligën C.

Takimet e fazës së grupeve do të zhvillohen nga muaji shtator deri në nëntor.

Kuqezinjtë pritet të jenë kokë grupi, ndërsa Liga e Kombeve në këtë sezon vlen edhe si një mundësi më shumë për t’u kualifikuar në Euro 2028.

Ndeshjet e Kombëtares do t’i ndiqni si zakonisht në TV Klan./kb

Kreu i Partisë Demokratike, Sali Berisha, ka mbajtur këtë të premte, 16 janar, konferencë me gazetarët nga selia blu.

Berisha u ndal tek hakërimi i materialeve të Prokurorisë së Posaçme, duke marrë për bazë një mesazh i ardhur tek kryedemokrati lidhur me “skemën e hakërimit”.

“Përshëndetje doktor, një informacion të veçantë tek dosja e hakërimit të sistemit të SPAK-ut. Hakëruesi përmend emrin e Ramës si personi që mund të ketë urdhëruar hakërimin.

Pjesë nga dosja: Me datë 12 shkurt 2025, ora 21:17, Arnold Rrokaj, i dërgoi Zambak Gjonit një foto që duket sifaqe interneti, e cila mund të aksesohen sistemet e SPAK-ut. Më pas, ai dërgon një sms me përmbajtjen ‘a mos e hapsha dot’. Më pas Arnold Rrokaj i dërgon sms Gjokajt se do t’i shkruajë Ramës ‘që hajt t’i bëjmë robt’”, lexon Berisha denoncimin./kb

Kryetari i parlamentit Niko Peleshi, në fjalën e tij përpara deputetëve të Partisë Socialiste, tha se Kuvendi do të ketë standard europian.

Peleshi u shpreh se Shqipëria ka pasur avancim rekord drejt integrimit europian. Sipas tij, objektivi i shpallur tashmë nga vendi është mbyllja e të gjitha kapitujve të BE-së brenda vitit 2027.

“Kuvendi do të ketë standard europian. Unë si kryetar i Kuvendit do të vazhdoj të përmbush detyrën që më keni besuar, duke pasur parasysh standardin etik. Integrimi europian duhet të jetë tek standardet tona. Shqipëria shënoi rekord për hapjen e negociatave për në BE. Objektiv tani ngelet mbyllja e negociatave, brenda 2027. Kemi shënuar rekord në avancimin e negociatave me BE-në.

Kuvendi përbushi detyrimet që ka ndaj partnerëve të saj. Kuvendi ka pasur gjithashtu bashkëpunim edhe me institucionet e pavarura. Zgjodhëm Avokatin e popullit dhe drejtues të disa institucioneve të pavarura. Buxheti 2026 kishte një rritje 11 përqind për institucionet e pavarura. Edhe buxheti për drejtësinë u rrit. Ligjet do të përmirësohen, për të qenë më pranë standardeve të BE-së”, tha Peleshi.

Më tej, Peleshi deklaroi se inteligjenca artificiale do të përdoret nga parlamenti, për të lehtësuar punët.  /kb