Sot PD ka njoftuar se do të zhvillohet një protestë, e cila për çudi do të zhvillohet te burgu i Durrësit, marrë shkas nga përmbytjet.
Sipas njoftimit thuhet se protesta do të zhvillohet rreth orës 16:30.
Fakti që të habit më shumë është se PD ka zgjedhur të protestojë për përmbytjet pikërisht para burgut të Durrësit ku ndodhet dhe kryebashkiaku Erion Veliaj.
Ndoshta po shkojnë të protestojnë te burgu i Durrësit se kanë hall të nxjerrin Veliajn për ta ndihmuar se në fakt PD, shumica e saj, elita ka patur një qasje goxha pozitive në mbështetje të kryebashkiakut të Tiranës.
Për diversion apo ajo kjo ka pak rëndësi.
Por jemi përballë faktit që sot në Durrës protestojnë para burgut ku ndodhet Veliaj ndoshta për të kërkuar kushte më të mira për kryebashkikaun e Tiranës ose të lirojnë mikun dhe ortakun e tyre.
Kujtojmë se SPAK ka ngritur 13 akuza për Veliaj dhe e ka dërguar dosjen e tij për gjykim, ndërsa nga ana tjetër kryebashkiaku përdor taktika të ndryshme për të mos u përballur me akuzat dhe provat para drejtësisë./K.M
Muaji i janarit njihet si periudha e rritjes së qarkullimit të gripit dhe virozave. Mjeku epidemiolog i ISHP-së, Artan Simaku thekson se situata mbetet brenda kufijve të aktivitetit stinor, normal dhe të pritshëm për këtë periudhë të vitit.
Simaku apelon tek qytetarët për vaksinimin kundër gripit, duke theksuar se kjo është mënyra kryesore e parandalimit për popullatën.
“Tashmë jemi në muajin Janar, vërehet rritje e qarkullimit të gripit krahasuar me javët paraardhëse. Vazhdojmë të mbetemi në kuadrin e aktivitetit sezonal ose stinor, normal, të zakonshëm dhe të pritshëm për stinën. Ajo që është e rëndësishme për popullatën është vaksinimi. Vaksinimi është mjeti kryesor i parandalimit. Asnjëherë nuk është vonë për vaksinimin. Të gjithë personat të cilët nuk janë vaksinuar ende dhe nuk e kanë kaluar gripin, duhet të paraqiten në qendrën shëndetësore të vendbanimit të tyre për t’u vaksinuar”,-tha mjeku Simaku./K.M
Kai Trump, mbesa 18 vjeçare e Donald Trumpit, ka tërhequr vëmendje të madhe pas paraqitjes në podcastin “Impaulsive” të Logan Paul. Ajo theksoi qartë se nuk dëshiron të ketë asnjë lidhje me politikën, duke e cilësuar atë si “një gjë të rrezikshme”, pavarësisht se vjen nga një familje shumë e njohur politike.
Kai, e cila është golfiste e suksesshme dhe këtë vit fillon studimet në Universitetin e Miamit, tha se mundohet të qëndrojë larg politikës dhe nuk e sheh veten si politikane në të ardhmen. Sipas saj shoqëria është bërë tepër e polarizuar dhe se zgjidhja qëndron te kompromisi dhe gjetja e mesatares mes palëve. Më tej ajo shtoi se rrjetet sociale kontribuojnë ndjeshëm në thellimin e ndarjeve ekstreme.
Deklaratat e saj u pritën shumë pozitivisht në internet, ku shumë e vlerësuan për pjekurinë dhe mënyrën e balancuar të të menduarit. Gjatë bisedës, ajo foli edhe për vështirësitë e jetës nën mbrojtjen e vazhdueshme të Shërbimit Sekret, veçanërisht në jetën private, duke përmendur situata të sikletshme gjatë takimeve romantike. Megjithatë, tha se po përpiqet të mësohet me këtë realitet, sidomos pasi gjyshi i saj u rikthye si president./K.M
Një 28-vjeçar është arrestuar nga policia në zonën e Fushë-Krujës pasi kanoste dhe përndiqte në rrjete sociale një 37-vjeçare.
Kjo e fundit ka bërë kallëzim në polici teksa deklaroi se i riu i kishte shkaktuar ankth dhe panik nga përndjekja e vazhdueshme online.
L. K., 28 vjeç tashmë u arrestua ndërsa ju sekuestruan dhe 2 celularë. Nga kontrolli në këto telefona u gjetën të aktivizuara llogari false në platformat “Instagram” dhe “TikTok”, të cilat i përdorte për të kanosur 37-vjeçaren.
“DVP Tiranë/Finalizohet operacioni i koduar “Insistimi”.
I shkaktoi ankth dhe panik, një 37-vjeçareje, duke e përndjekur dhe kanosur në rrjete sociale, nëpërmjet disa llogarive false, arrestohet 28-vjeçari.
Sekuestrohen 2 celularët në të cilët i arrestuari kishte aktivizuar llogaritë.
Si rezultat i administrimit të shpejtë të kallëzimit të një shtetaseje, se përndiqej dhe kanosej në rrjete sociale, veprime të cilat i kishin shkaktuar ankth dhe panik, specialistët e Sektorit për Hetimin e Krimeve Kibernetike, në bashkëpunim me shërbimet e Komisariatit të Policisë Krujë, në kuadër të operacionit “Insistimi”, mundësuan lokalizimin dhe vënien në pranga të autorit të dyshuar të rastit, shtetasit L. K., 28 vjeç, banues në fshatin Halilaj, Fushë Krujë.
Nga kontrollet në 2 celularët e tij, u gjetën të aktivizuara llogari false, në platformat “Instagram” dhe “TikTok”, nëpërmjet të cilave 28-vjeçari përndiqte dhe kanoste 37-vjeçaren.
Materialet procedurale iu referuan Prokurorisë së Tiranës, për veprime të mëtejshme”, njofton policia./K.M
Më 8 janar 1996, kryeqyteti i Zairesë – sot Republika Demokratike e Kongos, – Kinshasa, u përfshi nga një prej katastrofave ajrore më të rënda në historinë urbane të Afrikës. Një avion rus mallrash i tipit Antonov An-32, i operuar nga forca ajrore e Zairesë, u rrëzua menjëherë pas ngritjes nga aeroporti i qytetit, duke u përplasur mbi një treg të tejmbushur me njerëz, ku tregtarë dhe qytetarë kishin dalë për blerjet e përditshme. Bilanci ishte shkatërrues: 223 persona humbën jetën në tokë, ndërsa dy nga gjashtë anëtarët e ekuipazhit gjetën gjithashtu vdekjen.
Një ngritje që u shndërrua në makth
Avioni Antonov An-32, një aeroplan sovjetik i projektuar për transport mallrash dhe operacione në kushte të vështira, ishte nisur nga Aeroporti Ndërkombëtar Ndjili në Kinshasa. Sipas raportimeve zyrtare, avioni ishte i mbingarkuar, duke transportuar mallra dhe pajisje ushtarake, ndërsa ekuipazhi përbëhej nga pilotë rusë dhe ukrainas, një praktikë e zakonshme në Zairen e asaj kohe, e cila mbështetej fort te kontraktorë të huaj për operimin e flotës ajrore.
Vetëm pak çaste pas ngritjes, avioni humbi fuqinë në një nga motorët. Piloti tentoi të rikthente kontrollin dhe të kthehej drejt pistës, por në një lartësi shumë të ulët, aeroplani u bë i pakontrollueshëm. Ai u përplas drejtpërdrejt mbi zonën e tregut Masina, një nga zonat më të populluara dhe më të varfra të Kinshasës.
Ferr në mes të qytetit
Përplasja shkaktoi një shpërthim të menjëhershëm. Trupat e avionit, mbushur me karburant, u copëtuan mes tezgave të tregut, duke përfshirë gjithçka në flakë. Zjarri u përhap me shpejtësi mes ndërtesave të improvizuara dhe stendave prej druri e llamarine. Njerëzit që ndodheshin aty nuk patën asnjë mundësi shpëtimi.
Skenat që pasuan u përshkruan nga dëshmitarët si apokaliptike: trupa të pajetë në rrugë, mallra të djegura, britma dhe kaos i plotë. Shumë nga viktimat ishin gra dhe fëmijë, tregtarë të vegjël dhe klientë të rastësishëm, që nuk kishin asnjë lidhje me fluturimin fatkeq.
Shërbimet e emergjencës mbërritën me vonesë dhe me mjete minimale. Zjarri u shua pas orësh të tëra, ndërsa autoritetet u përballën me vështirësi të mëdha për identifikimin e viktimave, pasi shumë trupa ishin djegur plotësisht.
Bilanci dhe heshtja zyrtare
Sipas shifrave zyrtare, 223 persona humbën jetën në tokë, ndërsa dy anëtarë të ekuipazhit vdiqën nga plagët e marra. Katër pjesëtarë të tjerë të ekuipazhit arritën të mbijetojnë, disa prej tyre në gjendje të rëndë.
Megjithatë, organizata humanitare dhe burime të pavarura pohuan se numri real i viktimave mund të ketë qenë edhe më i lartë, duke qenë se shumë nga të vdekurit nuk ishin të regjistruar zyrtarisht dhe tregu ishte tej mase i mbipopulluar në momentin e aksidentit.
Qeveria e presidentit Mobutu Sese Seko reagoi me një deklaratë të shkurtër dhe shpalli një ditë zie, por nuk u zhvillua asnjë hetim i plotë dhe transparent. Ngjarja u harrua shpejt, e mbuluar nga censura, kaosi politik dhe shpërbërja graduale e regjimit të Mobutut, që vetëm një vit më vonë do të rrëzohej.
Një simbol i kolapsit shtetëror
Tragjedia e 8 janarit 1996 nuk ishte thjesht një aksident ajror. Ajo u bë simbol i kolapsit të shtetit zaireas: infrastrukturë e degraduar, standarde minimale sigurie, korrupsion sistemik dhe një indiferencë e thellë ndaj jetës së qytetarëve të zakonshëm.
Avionët e vjetër sovjetikë, të operuar nga ekuipazhe të huaja, fluturonin mbi qytete të tejpopulluara pa masa sigurie, ndërsa pasojat e gabimeve paguheshin gjithmonë nga më të varfrit.
Sot, më shumë se tri dekada më vonë, rrëzimi i Antonov An-32 mbi tregun e Kinshasës mbetet një nga tragjeditë ajrore më vdekjeprurëse për civilët në tokë, një kujtesë e dhimbshme se si dështimi i institucioneve dhe neglizhenca shtetërore mund të shndërrojnë një aksident teknik në një masakër njerëzore.
Sekretari i Përgjithshëm i Partisë Socialiste Blendi Klosi ka mbledhur në selinë rozë të gjithë drejtuesit politik të qarqeve.
Burime për gazetaren e Report Tv Raziela Myslimaj bëjnë me dije se pjesë e mbledhjes është dhe Sekretari Organizativ Damian Gjiknuri, ndërsa kryeministri Edi Rama nuk është i pranishëm.
Kjo mbledhje zhvillohet një ditë përpara takimit të thirrur nga kryeministri Edi Rama me ministrat e kabinetit të tij. Ndërkohë një javë më pas, Rama do të mbledhë në Pallatin e Brigadave Grupin Parlamentar të PS në nisje të sesionit të ri parlamentar, me qëllim për të koordinuar punën në Parlament./K.M
Dy persona janë shpallur në kërkim nga policia në Shkodër, në vijim të operacionit policor të koduar “Neonët”.
Këta persona kishin përshtatur banesën në lagjen “Ndoc Mazi”, për të kultivuar kanabis me pajisje elektrike që i furnizonin me lidhje të paligjshme të energjisë elektrike.
Ndërkaq, 2 punonjës të OSHEE janë proceduar penalisht për shpërdorim detyre dhe një shtetase tjetër, për moskallëzim krimi.
Policia ka sekuestruar 60 bimë kanabisi, 57 pajisje të ndryshme elektrike që shërbenin për kultivimin e tyre, 1 pistoletë sportive pneumatike, municion luftarak, 1 automjet dhe 4 celularë.
Njoftimi i policisë
Shkodër/Zbulohet një tjetër ambient i përshtatur për kultivimin e bimëve narkotike, me llamba.
Finalizohet operacioni policor i koduar “Neonët 6”. Shkon 10 numri i rasteve të kësaj veprimtarie kriminale, të goditura në kuadër të operacionit “Neonët”.
Shpallen në kërkim 2 shtetasit që dyshohet se kishin përshtatur banesën në lagjen “Ndoc Mazi”, për të kultivuar bimë narkotike me pajisje elektrike që i furnizonin me lidhje të paligjshme të energjisë elektrike.
Procedohen penalisht 2 punonjës të OSHEE-së, për shpërdorim detyre, dhe 1 shtetase tjetër, për moskallëzim krimi.
Sekuestrohen 60 bimë të dyshuara narkotike kanabis, 57 pajisje të ndryshme elektrike që shërbenin për kultivimin e tyre, 1 pistoletë sportive pneumatike, municion luftarak, 1 automjet dhe 4 celularë.
Në vijim të planit të masave për goditjen e kultivimit të bimëve narkotike në ambiente të mbyllura, bazuar edhe në informacionet e siguruara në rrugë operative, shërbimet e Komisariatit të Policisë Shkodër, në bashkëpunim me specialistët e Seksionit për Hetimin e Krimeve Ekonomiko-Financiare, kanë ushtruar kontrolle intensive në ambiente të mbyllura, me qëllim konstatimin dhe goditjen e rasteve të kultivimit të bimëve narkotike, me pajisje elektrike, tharjes dhe përpunimit të tyre për shitje.
Si rezultat, u finalizua operacioni policor i koduar “Neonët 6”.
Në kuadër të këtij operacioni u shpallën në kërkim shtetasi A. V., 35 vjeç, banues në Shkodër, dhe një 16-vjeçar, për veprën penale “Kultivimi i bimëve narkotike”, kryer në bashkëpunim.
Gjithashtu, u referuan materialet në Prokurori ku nisi procedimi penal për shtetasit:
-B. C., 33 vjeç dhe G. A., 63 vjeç, të dy banues në Shkodër, punonjës të OSHEE-së, për veprën penale “Shpërdorimi i detyrës”, kryer në bashkëpunim;
-E. H., 22 vjeçe, banuese në Pukë, për veprën penale “Moskallëzimi i krimit”.
Gjatë operacionit, shërbimet e Policisë kanë zbuluar një ambient (banesë) në lagjen “Ndoc Mazi”, që ishte përshtatur për kultivimin dhe tharjen e bimëve narkotike kanabis. Nga kontrollet në këtë ambient, u gjetën dhe u sekuestruan në cilësinë e provës materiale: 60 bimë të dyshuara narkotike kanabis, 57 pajisje të ndryshme elektrike që shërbenin për kultivimin e bimëve e tyre dhe 4 celularë.
Gjithashtu, nga kontrolli në banesën e shtetasit H. M., 49 vjeç, ngjitur me banesën ku kultivoheshin bimët narkotike, i cili është ndaluar më datë 11.12.2025, si i dyshuar për disa vepra penale, u gjetën 1 pistoletë sportive pneumatike pa numër, municion luftarak dhe 1 automjet, të cilat u sekuestruan në cilësinë e provës materiale.
Vijon puna intensive për kapjen e 2 shtetasve në kërkim dhe për dokumentimin e plotë të kësaj veprimtarie kriminale.
Materialet procedurale iu kaluan Prokurorisë së Shkodrës, për veprime të mëtejshme./K.M
Pas shumë aludimesh dhe pikëpyetjesh në rrjetet sociale, është hedhur më shumë dritë mbi personin që Benita ka përmendur gjatë qëndrimit të saj në Big Brother VIP Kosova.
Gjatë një bisede të sinqertë me Klodin dhe Elijonën, Benita ndau detaje nga një marrëdhënie që ka zgjatur rreth pesë vite. Ajo e përshkroi raportin si të rëndësishëm emocionalisht, por që aktualisht po kalon një fazë delikate dhe të pasigurt.
Banorja tregoi se partneri i saj ka qenë pranë saj që në fillimet, në kohën kur ajo nuk ishte figurë publike dhe pa asnjë ndërhyrje estetike. Megjithatë, ajo pranoi se vendimi për të hyrë në reality-show nuk është pritur mirë nga ai.
“Është artist edhe biznesmen,” u shpreh Benita, duke shtuar se ka frikë se sjellja dhe situatat brenda shtëpisë mund të kenë ndikuar negativisht në lidhjen e tyre. Ajo theksoi se nuk është e sigurt nëse ai po e pret ende jashtë.
Sipas burimeve të konfirmuara nga Prive By Liberta Spahiu, personi për të cilin bëhet fjalë është Endri, një emër i njohur për publikun shqiptar. Ai u bë shumë popullor rreth një dekade më parë, falë hiteve që shënuan sukses të madh sidomos tek adoleshentët e asaj kohe.
Pas largimit nga skena muzikore, Endri iu përkushtua biznesit, ndërsa së fundmi ka paralajmëruar edhe rikthimin e tij në muzikë. Pikërisht në këtë periudhë, historia me Benitën e ka rikthyer sërish në vëmendjen e publikut.
Burimet bëjnë me dije se marrëdhënia e çiftit ka pasur ulje-ngritje të shumta, veçanërisht gjatë vitit të fundit, kur kontaktet mes tyre janë rralluar./KM
Tanimë është zyrtare, Redon Xhixha është rikthyer pas tre vitesh te Tirana. Bardheblutë që po vuajnë këtë sezon në Superligë dhe mbajnë vendin e fundit, kanë prezantuar një nga goditjet më të bujshme të janarit.
Xhixha, 27-vjeçar, rigjen fanellën bardheblu tre vite pas largimit te Qarabag dhe përvojës te CR Belouizdad në Algjeri. Në 55 ndeshje me Tiranën në Superligë, Xhixha ka shënuar 32 gola dhe asistuar në shtatë raste./K.M
Administrata Trump do të tërhiqet nga dhjetëra organizata ndërkombëtare, përfshirë agjencinë e popullsisë së OKB-së dhe traktatin e OKB-së që përcakton negociatat ndërkombëtare për klimën, duke shënuar një tërheqje të mëtejshme të SHBA-ve, nga bashkëpunimi global.
Presidenti Donald Trump nënshkroi të mërkurën një urdhër ekzekutiv që pezullon mbështetjen e SHBA-së për 66 organizata, agjenci dhe komisione, pas shqyrtimit nga administrata e tij të pjesëmarrjes dhe financimit për të gjitha organizatat ndërkombëtare, përfshirë ato të lidhura me Kombet e Bashkuara, sipas një njoftimi të Shtëpisë së Bardhë.
Vendimi, përfshin agjenci, komisione dhe panele këshillimore të lidhura me OKB-në që përqendrohen në klimën, punën, migracionin dhe çështje të tjera, të cilat administrata Trump i ka kategorizuar si të orientuara drejt diversitetit dhe iniciativave të njohura me termin “woke”. Organizata të tjera në listë, jo pjesë e OKB-së, përfshijnë Partneritetin për Bashkëpunim Atlantik, Institutin Ndërkombëtar për Demokraci dhe Ndihmë Zgjedhore dhe Forumin Global Kundër Terrorizmit.
“Administrata Trump i ka konsideruar këto institucione si të tepërta në fushëveprimin e tyre, të keqmenaxhuara, të panevojshme, të shpërdoruara, të keqdrejtuara, të kapura nga interesat e aktorëve që avancojnë axhendat e tyre në kundërshtim me tonat, ose një kërcënim për sovranitetin, liritë dhe prosperitetin e përgjithshëm të kombit tonë”, tha Sekretari i Shtetit Marco Rubio në një deklaratë./K.M
Kryeministri Edi Rama përmes një postimi në rrjetet sociale, i ka kërkuar qytetarëve që gjatë këtyre ditëve me mot të keq të shmangin lëvizjet e panevojshme.
Rama shkruan se përdorimi i gomave dimërore është i detyrueshëm për automjetet që qarkullojnë në zonat malore apo ku është njoftuar për prezencë dëbore dhe ngricash.
Gjithashtu shefi i Ekzekutivit ka treguar qytetet, fshatrat dhe rrugët më problematike të vendit të prekura nga moti i keq, ku veçon zonat e prekura nga dëbora.
Postimi i Ramës:
Gjatë natës, të gjitha njësitë operative në terren, ekipet e bashkive, Emergjencat Civile lokale, Forcat e Armatosura, ekipet mjekësore dhe Policia kanë qenë në gatishmëri
SITUATA NË AKSET RRUGORE
Gjatë natës kanë vazhduar reshjet e shiut dhe ka filluar dëbora në të gjithë zonën veriore dhe juglindore të vendit
Reshje dëbore ka pasur:
Në Rajonin Verior
Bajram Curri-Valbonë, Ura Bujan-Qafë Morinë, Bujan-Qafe Morinë (doganë),Sopot-Kerrnaj,Qafe Mejdan -Tropojë-Buçaj Bulqizë, Qafë Bualli-Peshkopi, Peshkopi-Maqellarë, Hani i Hotit-Dogana Vermosh, Kukes-Shishtavec, Kukës-Bushtricë, Bajram Curri-Valbonë, Pukë-Fushë Arrëz, Bogë-Theth dhe Qafë Mali-Fushë Dukagjin.
Kontraktorët me mjete dhe punëtorë janë në terren pa ndërprerje 24/7 për të bërë pastrimin e akseve rrugore.
Shmangni lëvizjet jo të domosdoshme me automjetet tuaja.
Në këtë periudhë, zhvillimi i trafikut vetëm për udhëtime esenciale është i domosdoshëm për të garantuar sigurinë e të gjithëve dhe për të lehtësuar punën e ekipeve të mirëmbajtjes së rrugëve.
Përdorimi i gomave dimërore është i detyrueshëm për automjetet që qarkullojnë në zonat malore apo ku është njoftuar për prezencë dëbore dhe ngricash./K.M
Krimet ekonomike të Policisë së Kosovës, të udhëhequr nga Prokuroria Themelore në Prizren, janë duke realizuar një aksion në disa rajone të Kosovës.
Kryeprokurori i Prokurorisë Themelore në Prizren, Petrit Kryeziu, tha shkurt për Radion Evropa e Lirë se cak i këtij aksioni janë “mbi 40 të dyshuar, në pothuajse të gjitha rajonet e Kosovës”.
Betimi për Drejtësi – ueb-faqe e specializuar për fushën e sundimit të ligjit – duke u thirrur në burime raportoi se gjatë aksionit janë arrestuar disa persona në rajonet e Prizrenit, Prishtinës, Pejës, Gjilanit, Ferizajt, Mitrovicës dhe Gjakovës.
Në mesin e të arrestuarve, sipas Betimit për Drejtësi, janë Sami Mazreku, ish-drejtor i Byrosë Kosovare të Sigurimeve dhe ish-drejtori i Financave i kësaj byroje, Valon Berisha.
Raportohet se aksioni po zhvillohet lidhur me dyshimet për kryerjen e veprave penale: “keqpërdorim i besimit”, “keqpërdorim i autorizimeve në ekonomike”, “ndihmë në keqpërdorim të besimit” dhe “falsifikim të dokumentit”.
Në këtë aksion thuhet se janë përfshirë një numër i madh i prokurorëve dhe policëve./K.M
Një 45-vjeçar i shpallur në kërkim në korrik të vitit të kaluar është arrestuar nga Operacionalja e Durrësit.
Gjykata e Durrësit i ka caktuar 45-vjeçarit nga Shijaku masën arrest me burg për veprën penale “Prodhimi dhe shitja e narkotikëve”.
Gjatë operacionit të zhvilluar në korrik (2025) blutë gjetën dhe sekuestruan në banesën e të arrestuarit një sasi lënde narkotike kanabis.
“Në zbatim të planit të masave të hartuar për lokalizimin dhe kapjen e personave të shpallur në kërkim, si rezultat i kontrolleve të bazuara në informacione të siguruara në rrugë operative nga strukturat e DVP Durrës, Seksioni për Hetimin e Narkotikëve, në bashkëpunim me Forcën e Posaçme Operacionale pranë Drejtorisë Vendore të Policisë Durrës, zhvilluan dhe finalizuan me sukses operacionin policor të koduar “Masa”.
Si rezultat i operacionit u lokalizua dhe u vu në pranga shtetasi E. K., alias A. K., 45 vjeç, banues në Xhafzotaj, Shijak.
Ky shtetas ishte i shpallur në kërkim pasi Gjykata e Juridiksionit të Përgjithshëm Durrës, në korrik të vitit 2025, ka caktuar masën e sigurisë “arrest me burg”, për veprën penale “Prodhimi dhe shitja e narkotikëve”.
Në janar 2025, bazuar në informacionet e siguruara në rrugë operative për një shtetas që shiste lëndë narkotike, strukturat e DVP Durrës kanë ushtruar kontroll në banesën e këtij shtetasi, ku kanë sekuestruar një sasi lënde narkotike kanabis. Në momentin e kontrollit, ky shtetas nuk u gjet në banesë.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme./K.M
Gjashtë persona, përfshirë tre fëmijë të vegjël, anëtarë të një familjeje shqiptare, janë plagosur në një aksident të rëndë që ka ndodhur mëngjesin e 7 janarit në Liedermatte, afër Waldshut-Tingen në Gjermani, pranë kufirit me Zvicrën. Aksidenti ka përfshirë një kamion dhe makinën ku po udhëtonte familja shqiptare, e cila po kthehej nga Kosova, shkruajnë mediat gjermane.
Familja është nga fshati Ratkoc i Rahovecit dhe të aksidentuarit kanë pësuar lëndime të rënda. Fëmijët që ndodheshin në makinë janë të moshave nga 5 muajsh deri në 3 vjeç. Ata u transportuan me helikopterë shpëtimi, ndërsa shkalla e lëndimeve të tyre ende nuk është e qartë.
Sipas informacionit të dhënë nga policia, shkaku i aksidentit ende nuk është i qartë. Përplasja bëri që një nga pasagjerët të mbetej i bllokuar në makinë dhe të nevojitej ndërhyrja e zjarrfikësve. Aksidenti ndodhi pak para se familja të arrinte në vendin ku jeton.
Për këtë aksident, u aktivizuan disa helikopterë shpëtimi./K.M
“Stranger Things” është bërë një fenomen masiv me përfundimin e tij gjatë këtij sezoni Krishtlindjesh pas pesë sezonesh dhe pothuajse 10 vitesh ngjarje. Adhuruesit e serialit kanë parë të mirën të triumfojë mbi të keqen, dhe si humnera ashtu edhe Përmbysja janë mbyllur përgjithmonë pasi Vecna u mund nga grupi i miqve të guximshëm.
Misteri që do ta rrethojë gjithmonë serialin është nëse rrëfimi i fundit i Mike është i vërtetë dhe nëse Eleven arriti të shpëtojë veten, pasi ajo që shihet në fillim është se ajo u shpërbë së bashku me të përmbysurin. Ky mund të mos jetë rasti dhe mund të jetë një hologram falë shërbimit të fundit të motrës së saj Eight.
Ky dyshim, i cili do të mbetet gjithmonë midis fansave të serialit, midis të cilëve ka nga ata që zgjedhin të besojnë dhe nga ata që nuk e bëjnë këtë, mund të zgjidhet në një kapitull të fundit, të habitshëm dhe të shumëpritur, të panjoftuar askund, por teoritë e fansave flasin për një të tillë. Është një trend që është përhapur si zjarri në pyll dhe do të fliste për një këst të fundit, kapitullin e nëntë.
Kjo teori është quajtur “Porta e Konformitetit” dhe sugjeron se gjithçka mund të ndryshojë në një kthesë të fundit . Brenda kësaj teorie janë ata që thonë se biografitë e rrjeteve sociale të Netflix nuk kanë ndryshuar ende dhe ende tregojnë, në disa raste, ngjarje që nuk ndodhin në serial . Përveç kësaj, përdoruesit kanë raportuar se llogaria e tyre në Netflix ende i paralajmëron se ka një episod të fundit të serialit.
Jo vetëm kaq, por shumë po kërkojnë teori për të konfirmuar se ky mund të jetë rasti, siç është poza e vazhdueshme me duart e kapura në bel, aq karakteristike e Henrit dhe që gjatë episodeve të fundit e tregojnë pothuajse të gjithë personazhet, ose ekzistenca e objekteve që simulojnë ngjyrat e një fushe shahu, duke iu referuar faktit se Vecna mund të jetë duke luajtur me to.
Shkurt, ka një numër të pafund detajesh që fansat e serialit kanë vënë re, disa më të besueshme se të tjerat, por realiteti është se shumë tashmë po përgatiten për një fund alternativ, një kthesë të papritur që mund ta vendosë atë ndër serialet më të mira në histori. Megjithatë, asgjë nuk është konfirmuar, por nëse ndodh, duket se mund të ndodhë në ditët në vijim të janarit./KM
Në një nga sheshet e Zaragozës — qytet që shtrihet me krenari në verilindje të Spanjës — mbi të cilin kalimtari shkel pa shumë ceremoni, ngrihet një skulpturë me një titull brutal në sinqeritetin e vet: “La Mujer Que Nunca Hizo Nada”. Në shqip: “Gruaja që nuk bëri kurrë asgjë”…
…E realizuar në vitin 2001 nga skulptori José Luis Fernández, kjo vepër i ngjan një pasqyre që shoqëria, shpesh pa dashur, e vendos përballë vetes. Në atë pasqyrë reflektohet një ironi e hidhur: ajo që “nuk bën asgjë” është, në fakt, figura që mban mbi supe peshën e të gjithëve.
Arkitektura e një sllavërie të heshtur
Figura e gruas, me shpinën e përkulur nën peshën e një lavatriçeje, fshesës, kovave dhe gjithë arsenalit të punëve të shtëpisë, mban në duar edhe fëmijët e saj — simboli i pafajshëm i detyrimit më të rëndë dhe më të bukur njëkohësisht. Kjo skulpturë nuk ka nevojë për fjalë; ajo flet me një gjuhë që çdo njeri e kupton, por që pak kush ka guximin ta pranojë: puna e amvisës është një punë e padukshme, e papaguar, e pamatshme dhe jetike.
Prej dekadash, gratë që zgjedhin — ose detyrohen nga rrethanat — të qëndrojnë në shtëpi, janë përballur me etiketime të padrejta: “nuk bëjnë asgjë”, “janë vetëm në shtëpi”, “s’kanë karrierë”. Në fakt, ato mbajnë në këmbë një ekonomi të tërë të heshtur. Rritja e fëmijëve, kujdesi për të moshuarit, menaxhimi i kaosit të përditshëm — kjo është një infrastrukturë njerëzore që, po të paguhej sipas tarifave të tregut, do t’i falimentonte buxhetet tona familjare dhe shtetërore.
Psikologjia e “vdekjes sociale”
Titulli i kësaj vepre nuk është thjesht një përshkrim; është një ironi therëse ndaj shoqërisë sonë “produktiviste”. Nga pikëpamja social-psikologjike, kjo skulpturë përfaqëson miliona gra që sistemi ekonomik i ka klasifikuar si “pasive” vetëm sepse kontributi i tyre nuk u përkthye kurrë në kapital, tituj apo pushtet publik.
Në aspektin psikologjik, këtu flitet për “vdekjen sociale”. Të thuash që një person “nuk bëri asgjë”, ndërkohë që ai ka konsumuar jetën dhe mishin e vet duke u shërbyer të tjerëve, është një formë e egër e dhunës simbolike. Skulptura pasqyron lodhjen ekzistenciale të një brezi që e ka humbur “Unin” e tij brenda detyrave të “Tyre”. Pamja e saj e qetë, por e rënduar, tregon koston e tmerrshme psikologjike të mohimit të meritës.
“Gruaja që nuk bëri kurrë asgjë” është, në të vërtetë, personi që bëri gjithçka që ne të tjerët të kishim lirinë për të bërë diçka.
Një qortim që na përket të gjithëve
Skulptura e Zaragozës është më shumë se një vepër arti; është një qortim publik. Ajo na kujton se brenda mureve të shtëpive tona zhvillohet një punë kolosale që shpesh e marrim për të mirëqenë. Është një thirrje për t’i rikthyer dinjitetin rolit të amvisës dhe nënës, duke e parë atë për çfarë është në të vërtetë: themeli i shoqërisë.
Ndoshta prandaj kjo vepër ka bërë jehonë shumë përtej kufijve të Spanjës. Sepse secili prej nesh njeh një “grua që nuk bëri asgjë” — një nënë, një gjyshe, një motër apo bashkëshorten — që në heshtje mban mbi shpinë botën tonë të vogël.
Në këtë skulpturë, më shumë se në çdo deklaratë politike apo statistikë sociologjike, shfaqet e vërteta e tyre e madhe. Një e vërtetë që kemi tentuar ta anashkalojmë: Ato kanë bërë gjithçka. Dhe koha ka ardhur që këtë “gjithçka” ta pranojmë, ta nderojmë dhe ta paguajmë — të paktën me mirënjohje dhe dinjitet.
Reshjet e dendura të shiut që vijojnë prej disa ditësh kanë shkaktuar problematika të shumta edhe në zonat e Lushnjës dhe Divjakës, duke sjellë përmbytje të konsiderueshme të tokave bujqësore.
Lumi Seman ka dalë nga shtrati, duke përmbytur rreth 130 hektarë tokë bujqësore brenda argjinaturës në fshatrat Ngurrëz dhe Imshtë. Ndërkohë, lumi Shkumbin ndodhet pranë daljes nga shtrati, me disa hektarë tokë tashmë nën ujë.
Situata paraqitet problematike edhe në njësinë administrative Grabjan, Divjakë, si dhe në njësinë administrative Dushk, Lushnje, ku raportohen rreth 150 hektarë tokë e mbjellë e përmbytur.
Për të përballuar situatën, hidrovoret e Tërbufit, Karavastasë dhe Divjakës po punojnë me kapacitet të plotë, ndërkohë që reshjet e shiut vijojnë ende me intensitet mesatar. Autoritetet lokale janë në monitorim të vazhdueshëm të situatës dhe u bëjnë thirrje fermerëve të tregojnë kujdes dhe të ndjekin njoftimet zyrtare./K.M
Një ngjarje e rëndë ka ndodhur në Cavarzere të Italisë, ku një 43-vjeçar shqiptar tentoi të vrasë gruan e tij.
43-vjeçari donte t’i vinte flakën bashkëshortes me benzinë, por fatmirësisht ndërhyri djali i tyre 15-vjeçar, shkruajnë mediat italiane.
I mitur, duke parë se çfarë po ndodhte, fshehu çakmakun. Kështu arriti gruaja t’i thërriste karabinierët, të cilët, me të mbërritur, e gjetën 43-vjeçarin ende në shtëpi, i cili më pas u arrestua.
Incidenti ishte kulmi i një cikli të gjatë dhune. Pas 20 vitesh martesë dhe abuzimi, këtë herë gruaja arriti ta denonconte atë.
Shqiptari tanimë ndodhet në burgun e Venedikut dhe do të dalë para drejtësisë me akuzë e tentativës për vrasje./K.M
Britania e Madhe dhe Franca do të dërgojnë deri në 15 mijë ushtarë për të ndihmuar në mbrojtjen e Ukrainës në rast të një marrëveshjeje paqeje, shumë më pak se sa pritej, zbulon media britanike The Times.
Shefat ushtarakë të Mbretërisë së Bashkuar fillimisht kishin propozuar dërgimin e 10,000 trupave si pjesë e një force më të gjerë prej 64,000 trupash “koalicioni të vullnetshëm”, por kjo është konsideruar e paqëndrueshme brenda Ministrisë së Mbrojtjes duke pasur parasysh madhësinë aktuale të Ushtrisë Britanike.
Supozimi është se më pak se 7,500 ushtarë britanikë do të vendosen, zbuluan dy burime ushtarake, megjithëse kjo shifër pritet të jetë një sfidë edhe për Mbretërinë e Bashkuar, e cila ka vetëm rreth 71,000 personel të trajnuar në ushtrinë e rregullt.
Francezët janë i vetmi vend tjetër që është zotuar të dërgojë ushtarë në Ukrainë dhe pritet që ata të përbëjnë pjesën tjetër të vendosjes, e cila do të jetë në pjesën perëndimore relativisht të sigurt të vendit, larg vijës së frontit.
Disa burime sugjeruan se edhe një forcë totale prej 15,000 vetësh ishte optimiste. Gjermania është gati të vendosë forca afër Ukrainës, ndoshta në Poloni ose Rumani, shtoi një burim ushtarak për The Times.
Një burim diplomatik tha se skenarë të ndryshëm do të rezultonin në numra të ndryshëm, varësisht nga rezultati i negociatave të paqes. Presidenti Macron tha të martën se disa mijëra ushtarë francezë mund të vendosen në Ukrainë si një “forcë sigurie”. “Këto nuk janë forca që do të angazhohen në luftime”, i tha ai France 2.
Keir Starmer nuk ka zbuluar publikisht se sa ushtarë britanikë do të dërgohen. Ai nënshkroi një marrëveshje që forcat britanike të veprojnë në tokën ukrainase në “qendra ushtarake” të martën. Sipas planit, forcat britanike dhe franceze do të ndihmonin në trajnimin e ushtrisë ukrainase dhe do të mbikëqyrnin ndërtimin e “objekteve të mbrojtura” për të ruajtur armë dhe pajisje ushtarake që mund të përdoren për të mbështetur mbrojtjen e Ukrainës. Sipas një deklarate të nënshkruar nga anëtarët e koalicionit në Paris, SHBA-të do të udhëheqin monitorimin me teknologji të lartë të vijës së armëpushimit nëse arrihet një marrëveshje paqeje.
Figura të larta brenda Ministrisë së Mbrojtjes besojnë se Presidenti Putin nuk do të shkelte një marrëveshje armëpushimi të rënë dakord nga Presidenti Trump mes shqetësimeve se si do të hakmerrej presidenti amerikan..K.M
Endri Shabani në krye të Nismës dhe Adriatik Lapaj në krye të Shqipëria Bëhet u futën bashkë në zgjedhjet e 11 majit.
Sherri se kujt i takonte një mandat deputeti çoi në shkërmoqjen e kësaj aleance. Sot Endri Shabani është Avokat i Popullit me firmat e opozitës dhe votat e mazhorancës, ndërsa Lapaj vazhdon një protestë disa javore poshtë zyrës së Kryeministrit.
Por me të marrë detyrën e re, duket se Endri Shabani e ka hedhur pas krahëve përplasjen me Adriatik Lapajn duke i dalë në krah.
Një prej urdhrave të parë të firmosur si Avokat i Popullit, lidhet me të hetuarit e asaj çfarë ndodhi në protestën e fundit të Lapajt kur policia ndërhyri e u hoqi çadrën. Top Channel mësoi se Avokati i Popullit ka nisur një hetim të kësaj ngjarje nga ku Adriatik Lapaj, mbeti i lënduar dhe u dërgua në spital.
Besnik Deda një prej komisionerëve të Avokatit të Popullit, u pyet nga Top Channel, për këtë hetim, dërgoi këtë përgjigje përmes postës elektronike: “Në përmbushje të porosisë së lënë nga Avokati i Popullit, një grup i ekspertëve të institucionit ka nisur menjëherë hetim kryesisht për sjelljen e policisë, pas protestës së zhvilluar në datë 4 janar 2025 nga Partia “Shqipëria Bëhet” përpara Kryeministrisë, duke inspektuar ambientet e privimit të lirisë në Komisariatin e Policisë nr.1 dhe në Bllokun e Sigurisë, si dhe për të verifikuar gjendjen shëndetësore të protestuesve që ndodheshin të shtruar në Spitalin Universitar i Traumës, Tiranë”.
Besnik Deda komisioner i Avokatit të Popullit, thotë se hetimi I deritanishëm ka përfshinë të intervistuarin e të ndaluarve nga policia në Komisariatin e Policisë nr.1 Tiranë dhe në spital.
“Nga deklarimet e të dy palëve si të protestuesve dhe të punonjësit të policisë, u konstatua se nga policia e shtetit nuk ishin marrë masat për vendosjen e Ambulancave në vendngjarje. Ambulancat kanë ardhur me vonesë të theksuar dhe pasi janë lajmëruar nga policia, duke rënduar më tej gjendjen shëndetësore të të plagosurve. Punonjësi i policisë theksoi se, kishte thyer kaviljen në dy vende gjatë rrëzimit në mes të turmës, si pasojë e rrëmujës së krijuar në vendngjarje. Ndërkohë, do të operohej si pasojë e dëmtimit të pësuar. Edhe nga ana e punonjësit të policisë, u evidentua se ambulanca kishte ardhur rreth 40 minuta ose më shumë me vonesë. Kjo pritje e gjatë e kishte bërë që të humbte ndjenjat”.
Nga konkluzionet paraprake komsioneri Besnik Deda thotë se ka Policia e Shtetit, nuk ishin marrë masat për vendosjen e Ambulancave në vendngjarje.
Nuk rezultoi të ketë patur mbipopullim në ambientet e shoqërimit. Konstatohet se, ka patur shkelje të procedurës të rregullave kombëtare dhe ndërkombëtare Lidhur me mbarëvajtjen dhe sigurimin e protestës nga Policia e Shtetit, pasi nga ana e tyre nuk ka patur mjete të komunikimit masiv (megafon) me protestuesit për vetëpërmbajtje apo për shpërndarjen e tyre, por është ndërhyrë në mënyrë të menjëhershme nga ana e policisë./K.M
Login
