TEL AVIV, 5 prill /ATSH/- Kryeministri izraelit, Benjamin Netanyahu pritet të vizitojë të hënën Shtëpinë e Bardhë për të diskutuar tarifat gjithëpërfshirëse të shpallura së fundmi me presidentin e SHBA-së, Donald Trump, thanë sot zyrtarët izraelitë dhe një zyrtar i Shtëpisë së Bardhë, sipas “Reuters”

Ky do të jetë udhëtimi i katërt i Netanyahut në Uashington që nga fillimi i luftës në Gazë dhe i dyti që kur Trump mori detyrën në janar.

Vizita do ta bënte gjithashtu Netanyahun liderin e parë të huaj që negocioi personalisht me Trump mbi politikën e re gjithëpërfshirëse të tarifave të presidentit amerikan, e cila përfshinte një tarifë 17% për mallrat izraelite.

Zyra e Netanyahut nuk e ka konfirmuar vizitën, por një zyrtar i Shtëpisë së Bardhë dhe tre zyrtarë izraelitë konfirmuan udhëtimin për “Reuters”.

“Ftesa e papritur e Trump erdhi gjatë një telefonatë të enjten me Netanyahun, i cili aktualisht ndidhet në një vizitë në Hungari, ku lideri izraelit diskutoi çështjen e tarifave”, sipas zyrtarëve izraelitë që folën në kushte anonimiteti.

Faqja e lajmeve “Axios” raportoi fillimisht, udhëtimin e planifikuar, duke thënë se të dy udhëheqësit kishte të ngjarë të diskutonin edhe luftën në Gazë dhe krizën bërthamore të Iranit.

Ndërkohë, zëdhënësja e Departamentit Amerikan të Shtetit, Tammy Bruce tha dje se sekretari amerikan i Shtetit Marco Rubio kishte folur me Netanyahun për të theksuar mbështetjen e SHBA-së për Izraelin.

“Ata diskutuan situatën në Gazë dhe vendosmërinë e administratës për të liruar pengjet në Gazë dhe tarifat e shpallura së fundmi”, tha Bruce.

“Trump bisedoi gjithashtu me përfaqësues nga Izraeli, India dhe Vietnami për të negociuar marrëveshjen tregtare duke synuar lehtësimin e tarifave të propozuara për ato vende përpara se taksat të hynin në fuqi javën e ardhshme”, raportoi CNN. //a.i/

The post TEL AVIV – Netanyahu do të takohet me Trump në Uashington në përpjekje për të ndryshuar tarifat appeared first on Agjencia Telegrafike Shqiptare.

BERLIN, 3 prill /ATSH-DPA/- Kancelari gjerman Olaf Scholz tha sot se ai nuk mund ta imagjinonte ekzekutimin e një urdhërarresti kundër kryeministrit izraelit, Benjamin Netanyahu gjatë një vizite të tij në Gjermani.

Deklarata e Scholz erdhi si përgjigje ndaj pyetjeve të një gazetari pas mbërritjes së Netanyahut në Budapest – udhëtimi i tij i parë në Evropë – që kur Gjykata Ndërkombëtare Penale (ICC) lëshoi ​​urdhërarrestin në nëntor lidhur me veprimet e qeverisë izraelite në Gazë.

Hungaria njoftoi sot planet për t’u tërhequr nga vendimi i ICC-së, me qendër në qytetin holandez të Hagës.

Në një konferencë për shtyp në Berlin së bashku me mbretin e Jordanisë, Abdullah II, Scholz tha se qeveria gjermane e kishte bërë të qartë qëndrimin e saj lidhur me arrestimin e Netanyahut.

“Nuk mund ta imagjinoj se do të ketë një arrestim në Gjermani”, tha kancelari gjerman në largim.

Vendimi i Hungarisë, megjithatë u kritikua nga ministrja e Jashtme gjermane, Annalena Baerbock.

Përpara një samiti të NATO-s në Bruksel, Baerbock tha se ishte një ditë e keqe për të drejtën penale ndërkombëtare.

“Në Evropë, askush nuk është mbi ligjin dhe kjo vlen për të gjitha fushat e ligjit”, shtoi ajo.

Pasardhësi i supozuar i Scholz – lideri konservator Friedrich Merz, ka thënë tashmë se po kërkon mënyra për të pritur Netanyahun në Berlin pa shkelur ligjin ndërkombëtar.

Traktati themelues i ICC-së, i njohur si Statuti i Romës, kërkon që shtetet anëtare të zbatojnë urdhrat e gjykatës.

Si shtete anëtare të gjykatës, Hungarisë dhe Gjermanisë u kërkohet zyrtarisht të arrestojnë Netanyahun nëse ai hyn në territorin e tyre. //a.i/

The post BERLIN – Scholz: Nuk mund ta imagjinojë Netanyahun të arrestohet në Gjermani appeared first on Agjencia Telegrafike Shqiptare.

BUDAPEST, 3 prill /ATSH-DPA/ – Ndërkohë që kryeministri izraelit, Benjamin Netanyahu, i cili përballet me një urdhërarresti nga Gjykata Ndërkombëtare Penale (ICC), mbërriti sot në Budapest, Hungaria tha se synon të tërhiqet nga gjykata e sipërcituar.

Ministri hungarez i Shtetit, Gergely Gulyás deklaroi se vendi synon të tërhiqet nga gjykata.

Njoftimi erdhi menjëherë pasi Netanyahu mbërriti në Budapest për udhëtimin e tij të parë në Evropë që nga lëshimi i urdhrit të arrestit të ICC në nëntor.

Gjykata akuzon liderin izraelit për krime kundër njerëzimit dhe krime lufte gjatë luftës së Gazës.

Gulyás tha se ”qeveria hungareze synon të fillojë procesin e tërheqjes nga gjykata”.

Ai shtoi se vendi po vepron në përputhje me kushtetutën dhe ligjin ndërkombëtar.

Kryeministri hungarez Viktor Orbán e kishte injoruar tashmë mandatin e gjykatës kur i bëri ftesën liderit izraelit.

Orbán e ka bërë të qartë se ai nuk ndihet i detyruar nga kërkesat e ICC për anëtarët e saj, veçanërisht pas lëshimit të urdhërarrestit ndërkombëtar kundër Netanyahut./   /os/

The post FOKUS – Hungaria planifikon të tërhiqet nga ICC-ja, ndërsa Netanyahu viziton vendin appeared first on Agjencia Telegrafike Shqiptare.

TEL AVIV, 2 prill /ATSH/- Izraeli planifikon të krijojë një korridor tjetër sigurie që ndan Rripin e Gazës, tha sot kryeministri izraelit, Benjamin Netanyahu.

“Ne po pushtojmë korridorin Morag”, tha ai në një adresë video.

Morag dikur ishte një vendbanim izraelit në jug të territorit palestinez. Sipas medieve izraelite, itinerari do të ndante qytetin e Rafahut nga qyteti i Khan Younis.

Ministri izraelit i Mbrojtjes, Israel Katz njoftoi më herët pushtimin e zonave të gjera që do të bëhen “zona sigurie” izraelite.

Netanyahu tha se ndarja e Rripit të Gazës rrit presionin mbi Hamasin derisa grupi islamik palestinez të lirojë pengjet e mbetura.

Ushtria izraelite tashmë kontrollon një pjesë të madhe të të ashtuquajturit Korridori Netzarim, një rrugë e rëndësishme strategjike që ndan brezin bregdetar në një gjysmë veriore dhe jugore.

“Sonte ne kemi ndërruar një ingranazh në Rripin e Gazës. Forcat e armatosura izraelite po kapin zona, po sulmojnë terroristët”, tha Netanyahu. //a.i/

The post TEL AVIV – Netanyahu: Izraeli të krijojë korridor të ri sigurie në të gjithë Gazën appeared first on Agjencia Telegrafike Shqiptare.

TEL AVIV, 31 Mars /ATSH-ANSA/ – Kryeministri i Izraelit, Benjamin Netanyahu ka zgjedhur ish-komandantin e marinës Eli Sharvit si drejtorin e ardhshëm të shërbimit të sigurisë së brendshme të Izraelit (Shin Bet), theksoi zyra e tij.

“Pas kryerjes së bisedimeve të gjera me shtatë kandidatë të kualifikuar, kryeministri Benjamin Netanyahu ka vendosur të emërojë ish-komandantin e Marinës Admiral (në rezervë) Eli Sharvit si drejtorin e ardhshëm të Shin Bet”, thuhet në deklaratë.

Në fillim të marsit, Gjykata e Lartë pezulloi shkarkimin e shefit aktual të Shin Bet, Ronen Bar, në pritje të dëgjimit të apelimeve kundër vendimit të qeverisë. /os/

The post TEL AVIV – Netanyahu, emëron kreun e ri të Shin Bet appeared first on Agjencia Telegrafike Shqiptare.

TEL AVIV, 21 shkurt /ATSH-DPA/ – Kryeministri izraelit Benjamin Netanyahu ka urdhëruar një operacion intensiv kundër qendrave të terrorit në Bregun Perëndimor, pasi të paktën tre autobusë bosh shpërthyen në Tel Aviv të enjten në mbrëmje në atë që policia e quajti një “sulm të dyshuar terrorist”.

Zyra e Netanyahut deklaroi kryeministri urdhëroi ushtrinë izraelite të kryente operacionin në Bregun Perëndimor dhe urdhëroi policinë dhe forcat e sigurisë “të rrisin aktivitetin parandalues ​​kundër sulmeve të mëtejshme në qytetet izraelite”.

”Pas tentativës për bombardim masiv të autobusit, kryeministri Benjamin Netanyahu sapo ka përfunduar një vlerësim sigurie me ministrin e Mbrojtjes, Shefin e Shtabit të IDF, Drejtorin e ISA-së dhe Inspektorin e Përgjithshëm të Policisë së Izraelit”, shtoi zyra e Netanyahut.

Të enjten në mbrëmje, të paktën tre autobusë bosh shpërthyen në një periferi jugore të Tel Aviv.

Sipas raportimeve të para nuk ka pasur të plagosur./   /os/

The post TEL AVIV – Netanyahu urdhëron operacionin kundër qendrave të terrorizmit në Bregun Perëndimor appeared first on Agjencia Telegrafike Shqiptare.

TEL AVIV, 16 shkurt /ATSH-DPA/ – Sekretari amerikan i Shtetit, Marco Rubio u takua sot në Jerusalem me kryeministrin izraelit, Benjamin Netanyahu për të diskutuar vazhdimin e marrëveshjes së armëpushimit midis Izraelit dhe grupit islamik palestinez Hamas.

Disa orë para mbërritjes së Rubios, tre pengje të tjerë izraelitë u liruan nga Rripi i Gazës.

Sipas burimeve, 14 pengje shtesë, tetë prej të cilëve janë të vdekur, pritet të lirohen gjatë dy javëve të ardhshme si pjesë e fazës së parë të marrëveshjes.

Të tjerë të rrëmbyer të gjallë pritet të lirohen në një fazë të dytë, por nëse kjo fazë e dytë do të zbatohet në të vërtetë mbetet e pasigurt.

Para udhëtimit të tij, Rubio u kishte kërkuar shteteve arabe që të propozonin idetë e tyre për të ardhmen e Rripit të Gazës, pasi plani i presidentit të SHBA Donald Trump për rivendosjen e përhershme të rreth dy milionë banorëve në vendet arabe shkaktoi bujë.

Trump parashikon që Rripi i shkatërruar i Gazës të shndërrohet nën kontrollin e SHBA-së në një “rivierë të Lindjes së Mesme”.

Pas vizitës në Izrael, Rubio planifikon të udhëtojë në Arabinë Saudite dhe Emiratet e Bashkuara Arabe./  a.jor.

The post TEL AVIV – Takim Rubio-Netanyahu për armëpushimin në Gaza appeared first on Agjencia Telegrafike Shqiptare.

TEL AVIV, 11 shkurt /ATSH-DPA/ – Kryeministri izraelit, Benjamin Netanyahu ka kërcënuar të rifillojë sulmet në Gaza nëse Hamasi nuk liron pengjet deri të shtunën duke rritur frikën se një armëpushim i brishtë prej tre javësh është në prag të shpërbërjes.

“Nëse Hamasi nuk i kthen pengjet tona deri të shtunën në mesditë, armëpushimi do të ndërpritet dhe IDF-ja do t’i kthehet luftimeve intensive derisa Hamasi të mposhtet përfundimisht”, tha ai pas një takimi të kabinetit të sigurisë.

Netanyahu nuk tha se sa pengje do të duhej të liroheshin për të shmangur rifillimin e luftës.

Ai tha se urdhëroi ushtrinë të “grumbullojë forcat brenda dhe rreth Rripit të Gazës” për t’u përgatitur për luftime.

Izraeli dhe Hamasi janë aktualisht në mes të një faze fillestare gjashtëjavore të armëpushimit.

Së bashku me një pauzë në luftime, ai parashikon lirimin e 33 pengjeve izraelitë në këmbim të 1 900 të burgosurve palestinezë.

Grupi islamik palestinez të hënën akuzoi Izraelin për shkelje të kushteve të marrëveshjes dhe tha se lirimi i planifikuar i tre pengjeve të tjera izraelite, i planifikuar për këtë të shtunë, ishte shtyrë për një kohë të pacaktuar.

Hamasi akuzoi Izraelin për vonimin e kthimit të banorëve të zhvendosur të Gazës duke vrarë palestinezët në sulmet e vazhdueshme dhe duke penguar hyrjen e nevojave humanitare.

Edhe presidenti amerikan Donald Trump i dha një ultimatum Hamasit.
Ai tha se nëse “të gjithë pengjet” nuk lirohen deri në mesditën e së shtunës, atëherë armëpushimi do të përfundojë dhe “i gjithë ferri do të shpërthejë”.

Netanyahu tha sot se ai “e mirëpriti” kërcënimin e Trump./ /os/

The post TEL AVIV – Netanyahu: Nëse pengjet nuk lirohen deri të shtunën, atëherë do të rifillojmë sulmet në Gaza appeared first on Agjencia Telegrafike Shqiptare.

UASHINGTON, 9 shkurt /ATSH-AFP/- Kryeministri izraelit Benjamin Netanyahu ka përshëndetur planin e kritikuar gjerësisht të presidentit amerikan Donald Trump për të larguar palestinezët nga Rripi i Gazës i goditur nga lufta, duke thënë se Izraeli është i gatshëm të “bëjë punën”.

Në një intervistë për “Fox News” të transmetuar dje në mbrëmje, ndërsa kryeministri po përfundonte një vizitë në Uashington, Netanyahu mbrojti propozimin e Trump, i cili ka ngjallur shqetësim në të gjithë Lindjen e Mesme dhe në botë.

“Unë mendoj se propozimi i presidentit Trump është ideja e parë e re ndër vite dhe ka potencialin të ndryshojë gjithçka në Gazë”, tha Netanyahu, duke shtuar se ai përfaqëson një “qasje korrekte” për të ardhmen e territorit palestinez.

“Ajo që Trump po thotë: ‘Unë dua të hap portën dhe t’u jap atyre një mundësi për t’u zhvendosur përkohësisht, ndërsa ne e rindërtojmë vendin fizikisht’”, tha Netanyahu.

Izraeli pushtoi Rripin e Gazës në vitin 1967 dhe dislokoi një prani ushtarake në territor deri në vitin 2005, kur kolonët dhe trupat e tij u tërhoqën.

Më pas, ai vendosi një bllokadë gjymtuese në territorin e sunduar nga Hamasi dhe e vendosi atë nën rrethim pas fillimit të luftës në tetor 2023.

Izraeli dhe grupet e armatosura në Gazë kanë luftuar disa luftëra në vitet e fundit, por kinflikti i fundit – i shkaktuar nga sulmi i paprecedentë i Hamasit në Izrael në vitin 2023 – ka qenë më vdekjeprurës dhe më shkatërrues.

Për palestinezët, çdo përpjekje për t’i detyruar ata të largohen nga Gaza do të ngjallte kujtime të errëta të asaj që bota arabe e quan “Nakba”, ose katastrofë – zhvendosjen masive të palestinezëve gjatë krijimit të Izraelit në 1948.

“Të gjithë e përshkruajnë Gazën si burgun më të madh të hapur në botë”, tha Netanyahu.

“Nxirreni popullatën jashtë, lejojini të largohen. Jo dëbim me forcë, jo spastrim etnik – nxjerrja e njerëzve nga ajo që të gjitha këto vende dhe të gjithë këta dashamirës thonë se është një burg i hapur. Pse po i mbani në burg?”, shtoi ai. //a.i/

The post SHBA – Netanyahu: Të gatshëm ‘të bëjmë punën’ për të zbatuar planin e Trump për Gazën appeared first on Agjencia Telegrafike Shqiptare.

UASHINGTON, 4 shkurt /ATSH-DPA/ – Kriza në Lindjen e Mesme do të kryesojë sot agjendën e bisedimeve, kur kryeministri izraelit Benjamin Netanyahu do të bëhet lideri i parë i huaj që takohet me presidentin e SHBA-së, Donald Trump pasi ky i fundit mori drejtimin e Shtëpisë së Bardhë për një mandat të dytë.

Netanyahu mbërriti në Uashington të dielën.

“Ky është një takim i rëndësishëm që forcon aleancën e thellë midis Izraelit dhe Shteteve të Bashkuara dhe do të përmirësojë bashkëpunimin tonë”, shkroi ambasadori i Izraelit në OKB, Danny Danon në X.

Marrëdhëniet mes dy vendeve janë acaruar kohët e fundit për shkak të veprimeve të ushtrisë izraelite në Rripin e Gazës dhe Libanit, si dhe kritikave nga paraardhësi i Trump, Joe Biden.

Trump është më pak kritik ndaj veprimeve të ushtrisë izraelite sesa Biden.

Takimi mes dy politikanëve synon edhe përgatitjen e raundit të ardhshëm të negociatave mes Izraelit dhe Hamasit islamik palestinez për vazhdimin e armëpushimit në Gaza.

Netanyahu do të takohet gjithashtu me Steve Witkoff, të dërguarin special të SHBA-së për Lindjen e Mesme.

Witkoff ndihmoi në ndërmjetësimin e pengjeve aktuale izraelite për marrëveshjen e të burgosurve palestinezë në proces.

Sipas raporteve të medias, Trump dhe Netanyahu po kërkojnë gjithashtu të bëjnë përparim drejt një marrëveshjeje për normalizimin e marrëdhënieve midis Izraelit dhe Arabisë Saudite./  a.jor.

The post SHBA – Kriza në Lindjen e Mesme kryeson agjendën e takimit Trump-Netanyahu appeared first on Agjencia Telegrafike Shqiptare.

UASHINGTON, 27 janar /ATSH-ANSA/ – Kryeministri izraelit Benjamin Netanyahu planifikon të takohet me presidentin e SHBA-së, Donald Trump në Shtëpinë e Bardhë javën e ardhshme, raportoi uebfaqja izraelite Walla News.

Vizita e Shtëpisë së Bardhë do të ishte e para e një lideri të huaj në Uashington që kur Trump u kthye në detyrë javën e kaluar.

Zyrtarët izraelitë dhe amerikanë kanë thënë se sipas planit Netanyahu do të mbërrijë më 3 shkurt dhe të largohet më 5 shkurt.

Data e saktë e takimit mes Netanyahu dhe Trump ende nuk është caktuar.   /os/

The post TEL AVIV – Walla News: Netanyahu do të vizitojë Shtëpinë e Bardhë javën e ardhshme appeared first on Agjencia Telegrafike Shqiptare.

TEL AVIV, 23 janar /ATSH-DPA/- Kryeministri izraelit Benjamin Netanyahu tha sot se Elon Musk po “njolloset në mënyrë të rreme”, pasi miliarderi i teknologjisë bëri gjeste – që të kujtonin përshëndetjen naziste.

Netanyahu doli në mbrojtje të Musk – në një postim në X, duke e quajtur atë “një mik të madh të Izraelit”.

“Ai vizitoi Izraelin pas masakrës së 7 tetorit, në të cilën terroristët e Hamasit kryen mizorinë më të keqe kundër popullit hebre që nga Holokausti”, shkroi Netanyahu.

“Ai që atëherë ka mbështetur vazhdimisht të drejtën e Izraelit për të mbrojtur veten kundër terroristëve gjenocidalë dhe regjimeve që kërkojnë të asgjësojnë shtetin e vetëm hebre”, shtoi ai.

Gjestet e Musk, u panë të hënën gjatë ceremonisë së betimit të presidentit amerikan, Donald Trump.

Gjestet e tij bënë bujë në internet dhe në media, ku shumë njerëz e krahasuan atë me përshëndetjet e përdorura nga nazistët dhe fashistët.

Postimi i Netanyahut erdhi si një përgjigje ndaj komentit të Musk sot në platformën e tij X.

“Të majtët radikalë janë vërtet të mërzitur që iu desh të merrnin kohë nga dita e tyre -duke lavdëruar Hamasin për të më quajtur nazist”, shkroi Musk në X.

Në një koment të mëparshëm në X, Musk e hodhi poshtë krahasimin me Adolf Hitlerin duke e quajtur atë si “shumë të lodhur”. //a.i/

The post IZRAEL – Netanyahu mbron Musk mes polemikave për përshëndetjen e tij të ngjashme me nazistët appeared first on Agjencia Telegrafike Shqiptare.

LONDËR, 21 janar /ATSH-DPA/- Kryeministri britanik Keir Starmer është nën presion të lartë nga Benjamin Netanyahu për shkak të pezullimit të eksporteve të armëve në Izrael – ndërsa armëpushimi me Hamasin ka hyrë në ditën e tretë.

Qeveria britanike ka pezulluar rreth 30 licensa të eksportit të armëve për pajisjet e përdorur në Gazë nga Forcat e Mbrojtjes së Izraelit (IDF).

Në kohën kur u mor vendimi në shtator të vitit të kaluar, pati shqetësime për respektimin e të drejtave të njeriut nga Izraeli gjatë konfliktit.

Sipas bisedës telefonike sot mes dy kryeministrave, Netanyahu ka ngritur çështjen e licensave të eksportit të armëve në Izrael që janë ngrirë në Britaninë e Madhe.

“Kryeministri Starmer tha se është duke u bërë një vlerësim i çështjes”, sipas një deklarate të Ministrisë së Jashtme izraelite.

Diskutimi i tyre nuk përfshiu referencë për licensat e pezulluara të armëve. Starmer ka ofruar falënderimet e tij personale për punën e bërë nga qeveria izraelite për të siguruar lirimin e pengjeve, përfshirë britaniken, Emily Damari.

Starmer tha se ishte jetike të sigurohej që ndihma humanitare mund të lejohej pandërprerje në Gazë – për të mbështetur palestinezët që kanë nevojë dëshpërimisht për të.

“Britania e Madhe është e gatshme të bëjë gjithçka që mundet për të mbështetur një proces politik, i cili gjithashtu do të çojë në një shtet të qëndrueshëm dhe sovran palestinez”, tha Starmer.

Izraeli ka nisur ndërkohë një operacion ushtarak në territorin tjetër palestinez, Bregun Perëndimor.

“Sulmi kundër militantëve në Jenin thuhet se ka shkaktuar vdekjen e të paktën tetë personave dhe plagosjen e 35 të tjerëve”, sipas Ministrisë palestineze të Shëndetësisë.//a.i/

The post BM – Starmer nën presion për shkak të pezullimit të eksporteve të armëve në Izrael appeared first on Agjencia Telegrafike Shqiptare.

JERUSALEM, 23 dhjetor /ATSH-AFP/- Kryeministri izraelit Benjamin Netanyahu u tha sot ligjvënësve se ishte bërë progres në negociatat për lirimin e pengjeve të mbajtura në Gazë.

Fjalimi i tij në parlament vjen dy ditë pasi tre grupe militante palestineze thanë në një deklaratë të përbashkët të rrallë – se një marrëveshje për armëpushim në luftën e Gazës dhe shkëmbimin e të burgosurve ishte “më afër se kurrë”.

Ditët e fundit, negociatat indirekte midis Izraelit dhe Hamasit të ndërmjetësuara nga Katari, Egjipti dhe SHBA-ja u zhvilluan në Doha – duke ringjallur shpresat për një marrëveshje, më shumë se 14 muaj pas luftës në Gazë.

“Gjithçka që po bëjmë nuk mund të zbulohet. Ne po ndërmarrim veprime për t’i rikthyer ata. Ka pasur progres dhe ne nuk do të ndalojmë së vepruari derisa t’i kthejmë të gjithë në shtëpi”, tha Netanyahu në parlament.

Të shtunën, Hamasi, Xhihadi Islamik dhe Fronti Popullor i majtë për Çlirimin e Palestinës thanë në një deklaratë të përbashkët se ishte bërë progres për të arritur një marrëveshje armëpushimi.

“Mundësia e arritjes së një marrëveshjeje është më afër se kurrë, me kusht që armiku të ndalojë vendosjen e kushteve të reja”, thanë të tre grupet pasi zhvilluan bisedimet në Kajro, një ditë më parë.

Gjatë sulmit të paprecedentë të Hamasit ndaj Izraelit më 7 tetor 2023, u rrëmbyen 251 persona, nga të cilët 96 mbeten peng në Gazë – përfshirë 34 presona të tjerë të deklaruar të vdekur nga ushtria. //a.i./

The post IZRAEL – Netanyahu: Ka patur progres në marrëveshjen për lirimin e pengjeve në Gazë appeared first on Agjencia Telegrafike Shqiptare.

TEL AVIV, 16 dhjetor /ATSH-DPA/- Kryeministri izraelit, Benjamin Netanyahu tha dje se kishte diskutuar situatën në Siri me presidentin e sapozgjedhur të SHBA-së, Donald Trump, duke rikonfirmuar synimet paqësore të Izraelit në rajon.

“Ne nuk kemi asnjë interes për një konflikt me Sirinë”, tha Netanyahu në një deklaratë.

“Ne do të përcaktojmë politikën izraelite në lidhje me Sirinë sipas realitetit në terren”, tha Netanyahu.

Ai gjithashtu iu referua Sirisë si një “shtet armik aktiv” për disa dekada, duke vënë në dukje se ajo kishte sulmuar vazhdimisht Izraelin dhe kishte lejuar të tjerët të vepronin kundër vendit.

“Ai e lejoi Iranin të armatoste Hezbollahun përmes territorit të tij”, shtoi Netanyahu.

“Për të siguruar që kjo të mos përsëritet kurrë, ne kemi ndërmarrë një sërë veprimesh intensive ditët e fundit”.

Izraeli ka rritur aktivitetin ushtarak në Siri që nga përmbysja e presidentit sirian Bashar al-Assad, një javë më parë.

Ajo ka kryer sulme ajrore në objektiva ushtarakë dhe ka vendosur trupa në një zonë tampon në anën siriane të Lartësive Golan, përtej vijës së armëpushimit.

Zona është nën mbikëqyrjen e OKB-së në përputhje me një marrëveshje armëpushimi të vitit 1974 midis dy vendeve. Izraeli tani planifikon të zgjerojë vendbanimet në zonë, duke tërhequr dënimin nga kombet arabe.

Netanyahu diskutoi gjithashtu me Trump përpjekjet e vazhdueshme për të siguruar lirimin e pengjeve izraelitë të mbajtur nga Hamasi pas masakrës së 7 tetorit 2023.

“Ne do të vazhdojmë të veprojmë pa pushim për të kthyer në shtëpi të gjithë pengjet tanë, të gjallët dhe të vdekurit”, tha Netanyahu.

Sipas burimeve izraelite, rreth 100 pengje, përfshirë trupa të pajetë, mbahen ende nga Hamasi.//a.i/

The post TEL AVIV – Netanyahu dhe Trump diskutojnë situatën në Siri appeared first on Agjencia Telegrafike Shqiptare.

TEL AVIV, 10 dhjetor /ATSH-DPA/ – Kryeministri izraelit Benjamin Netanyahu tha se vendi i tij po ndryshonte faqen e Lindjes së Mesme, pas përmbysjes së sundimtarit sirian Bashar al-Assad.

Duke folur në një konferencë shtypi dje në mbrëmje, Netanyahu tha se Izraeli po i mund armiqtë e tij “hap pas hapi” në atë që ai e quajti një “luftë ekzistenciale që na është imponuar”.

Netanyahu iu referua regjimit të al-Asadit si një “element qendror i boshtit të së keqes të Iranit”, duke akuzuar Sirinë për nxitje të urrejtjes kundër Izraelit, sulme gjatë Luftës së Yom Kippur të vitit 1973 dhe lehtësimin e një “furnizimi armësh” midis Iranit dhe milicisë së Hezbollahut në Liban.

Ai tha se rënia e regjimit të al-Asadit ishte një “rezultat i drejtpërdrejtë” i veprimeve ushtarake të Izraelit kundër Iranit dhe milicive të mbështetura nga Irani në rajon, të cilat përfshijnë Hamasin në Gaza dhe Hezbollahun në Liban.

Megjithatë, ai vuri në dukje se “boshti i së keqes” i Iranit nuk është zhdukur ende.

Ai tha se Izraeli po “ndryshon faqen e Lindjes së Mesme” dhe se “shteti i Izraelit po vendos pozicionin e tij si një qendër fuqie në rajonin tonë, siç nuk ka qenë për dekada të tëra”.

Sipas aktivistëve, Izraeli ka kryer sulme të rënda në Siri që nga përmbysja e al-Asadit, të dielën./ a.jor.

The post TEL AVIV – Netanyahu: Izraeli po i ndryshon faqen Lindjes së Mesme appeared first on Agjencia Telegrafike Shqiptare.

TEL AVIV, 8 dhjetor /ATSH-DPA/- Kryeministri izraelit, Benjamin Netanyahu tha se fundi i sundimit të Bashar al-Assad në Siri do të thotë një mundësi e rëndësishme si dhe rreziqe për Izraelin.

Netanyahu tha se Izraeli ishte i interesuar për “marrëdhëniet fqinjësore” me Sirinë, por gjithashtu kishte nevojë të sigurohej që asnjë forcë armiqësore të mos futej pranë kufirit të Izraelit.

Gjatë një vizite në Lartësitë Golan, të pushtuara nga Izraeli, i shoqëruar nga ministri i Mbrojtjes, Israel Katz, Netanyahu tha se kjo “ditë historike” për Lindjen e Mesme ishte një rezultat i drejtpërdrejtë i veprimit të fuqishëm izraelit kundër Hezbollahut dhe Iranit.

“Kjo ka shkaktuar një “reaksion zinxhir” në Lindjen e Mesme”, tha Netanyahu.

Ai kujtoi trajtimin e shumë viktimave të luftës siriane në spitalet izraelite.

Netanyahu tha se Izraeli po ofronte ndihmë për të gjithë ata që ishin të interesuar për paqen me Izraelin. //a.i/

The post TEL AVIV – Netanyahu: Rënia e al-Asaad, një ditë historike për Lindjen e Mesme appeared first on Agjencia Telegrafike Shqiptare.

TEL AVIV, 27 nëntor /ATSH-AFP/- Izraeli i tha sot Gjykatës Penale Ndërkombëtare se do të apelonte kundër urdhërarresteve për kryeministrin Benjamin Netanyahu dhe ish-ministrin e tij të Mbrojtjes, Yoav Gallant.

“Ai gjithashtu i kërkoi gjykatës të pezullonte urdhërarrestet për Netanyahun dhe Gallant në pritje të rezultatit të apelit”, tha zyra e kryeministrit izraelit në një deklaratë.

ICC lëshoi ​​urdhërarrestet për Netanyahun dhe Gallant javën e kaluar – për dyshime për krime kundër njerëzimit dhe krime lufte në luftën e Izraelit kundër Hamasit në Gazë – pas sulmit të grupit militant palestinez më 7 tetor 2023.

Kryeministri izraelit akuzoi gjykatën për antisemitizëm dhe u zotua se nuk do të pengohej nga mbrojtja e Izraelit.

“Shteti i Izraelit sfidon juridiksionin e Gjykatës Ndërkombëtare Penale (ICC) dhe legjitimitetin e urdhërarrestit të lëshuar”, tha zyra e Netanyahut.

“Nëse gjykata e refuzon këtë kërkesë, ajo do t’u tregojë miqve të Izraelit në SHBA dhe në mbarë botën – se sa e njëanshme është Gjykata Ndërkombëtare Penale kundër Shtetit të Izraelit”, thuhet në deklaratë.

ICC nuk bëri një koment të drejtpërdrejtë mbi apelin e Izraelit.

ICC lëshoi ​​gjithashtu një urdhërarresti për shefin ushtarak të Hamasit, Mohammed Deif.

Izraeli tha në fillim të gushtit se kishte vrarë Deif – në një sulm ajror në jug të Gazës në korrik, por Hamasi nuk e ka konfirmuar vdekjen e tij. //a.i/

The post TEL AVIV – Izraeli apelon kundër urdhërarrestit të Netanyahut appeared first on Agjencia Telegrafike Shqiptare.

LONDËR, 27 nëntor /ATSH-DPA/- Britania e Madhe do të respektojë procesin e përcaktuar sipas legjislacionit vendas kur bëhet fjalë për urdhërarrestin e Gjykatës Penale Ndërkombëtare për Benjamin Netanyahu, tha sot Downing Street, pasi Franca sugjeroi se mund të mos e zbatonte atë.

Ministria e Jashtme franceze tha se kryeministri izraelit përfiton nga imuniteti pasi Izraeli nuk është anëtar i gjykatës.

“Kur bëhet fjalë për gjykimin e ICC-së, siç kemi thënë më parë, ne nuk do të komentojmë për raste specifike, por ne kemi një proces ligjor të brendshëm në BM – që pason Aktin ICC të vitit 2001 që përfshin konsiderata të ndryshme si pjesë e atij procesi, duke përfshirë imunitetet”, tha zëdhënësi zyrtar i kryeministrit britanik Keir Starmer.

“Dhe pikërisht kjo është arsyeja pse ne nuk do të parandalojmë procesin ligjor vendas – i cili nuk është përdorur më parë në BM – pasi një i paditur i ICC-së nuk ka udhëtuar kurrë në BM”, shtoi ai.

“Ne respektojmë procesin që është përcaktuar në legjislacionin tonë vendas”, tha zëdhënësi.

Kryeministri francez, Michel Barnier tha këtë javë se Franca do t’i respektonte me rigorozitet detyrimet e saj sipas ligjit ndërkombëtar, një qëndrim i përsëritur nga ministri i Jashtëm francez.

Por, në një deklaratë të mëvonshme me shkrim, Ministria e Jashtme franceze argumentoi se Netanyahu përfiton nga imuniteti – pasi Izraeli nuk është anëtar i gjykatës.

Ministria franceze tha se kjo do të merrej në konsideratë nëse ICC-ja do t’i kërkonte Francës arrestimin dhe dorëzimin e tij.

Gjykata Ndërkombëtare Penale lëshoi ​​urdhërarrestet, javën e kaluar për Netanyahun, ish-ministrin e tij të Mbrojtjes dhe shefin ushtarak të Hamasit – duke i akuzuar ata për krime kundër njerëzimit në lidhje me luftën 13-mujore në Gazë. //a.i/

The post LONDËR – BM: Do të respektojmë procesin ligjor për urdhërarrestin e Netanyahut appeared first on Agjencia Telegrafike Shqiptare.

ROMË, 26 nëntor /ATSH-AFP/- Ministrat e Jashtëm të G7 thanë sot se do të respektonin detyrimet e tyre përkatëse lidhur me urdhërarrestin e kryeministrit izraelit Benjamin Netanyahu – të lëshuar nga Gjykata Penale Ndërkombëtare (ICC).

Grupi i Shtatë vendeve të industrializuara bashkon Britaninë e Madhe, Kanadanë, Gjermaninë, Francën, Japoninë, Italinë mikpritëse dhe Shtetet e Bashkuara të Amerikës.

“Ne përsërisim angazhimin tonë ndaj të Drejtës Ndërkombëtare Humanitare dhe do të respektojmë detyrimet tona përkatëse”, thanë ministrat në një deklaratë të përbashkët të lëshuar pas dy ditësh bisedimesh pranë Romës.

ICC lëshoi ​​një urdhërarresti për Netanyahun javën e kaluar, duke shkaktuar zemërim nga Izraeli dhe aleatët e tij – duke përfshirë SHBA-në, e cila nuk është anëtare e ICC-së dhe ka refuzuar juridiksionin e saj.

Të gjitha vendet e tjera të G7 janë anëtarë të ICC-së – që do të thotë se ata do të duhet të arrestojnë Netanyahun nëse ai udhëton në territorin e tyre.

ICC lëshoi ​​gjithashtu urdhërarrest për ish-ministrin e Mbrojtjes të Netanyahut dhe për shefin ushtarak të Hamasit, Mohammed Deif – për të cilin Izraeli pretendon se u vra në një sulm ajror në Gazë në korrik. Hamasi nuk e ka konfirmuar vdekjen e tij.

Gjithashtu, ministrat e Jashtëm theksuan se nuk mund të kishte ekuivalencë midis grupit terrorist Hamas dhe Shtetit të Izraelit.

“Në ushtrimin e të drejtës së tij për të mbrojtur veten, Izraeli duhet të përmbushë plotësisht detyrimet e tij sipas ligjit ndërkombëtar në të gjitha rrethanat, duke përfshirë të Drejtën Ndërkombëtare Humanitare”, thuhet në deklaratë.

ICC me qendër në Hagë tha se urdhërarrestet për Netanyahun dhe ish-ministrin e tij ishin për krime kundër njerëzimit dhe krime lufte të kryera nga 8 tetori 2023 deri më 20 maj 2024. //a.i/

The post ITALI – G7: Të respektohen detyrimet përkatëse lidhur me urdhërarrestin e Netanyahut appeared first on Agjencia Telegrafike Shqiptare.