VLORË- Në zonën e Lungomares, një pronar i një lokali është dhunuar nga tre persona të paidentifikuar.

Sipas informacioneve paraprake, pronari i një lokali (bar-restorant/piceri) është goditur fizikisht nga tre persona, duke pësuar dëmtime dhe duke përfunduar në spital për ndihmë mjekësore.

Ngjarja ka ndodhur në një zonë shumë të frekuentuar nga qytetarë dhe turistë, çka ka shkaktuar panik dhe reagim të menjëhershëm. Kanë qenë familjarët dhe qytetarët e pranishëm ata që kanë njoftuar policinë.

Në vendngjarje kanë mbërritur menjëherë forcat e rendit, të cilat kanë nisur veprimet për zbardhjen e plotë të ngjarjes. Autorët janë larguar me shpejtësi, ndërsa policia po punon për identifikimin dhe kapjen e tyre. Ndërkohë, grupi hetimor po sekuestron pamjet e kamerave të sigurisë në zonë dhe në ambientin e lokalit për të hedhur dritë mbi rrethanat e kësaj ngjarjeje.

Një plagosje me mjet preres ka ndodhur rreth orës 13:30 në afërsi të Spitalit Rajonal të Vlorës. Një 33-vjeçar është qëlluar dy herë me mjet prerës (thikë).

I plagosuri ndodhet në ambientet e kirurgjisë në spital, ku po merr ndihmën mjekësore.

Ndërkohë, policia vijon punën për mbledhjen e provave dhe zbardhjen e rrethanave të ngjarjes.

Përkujtohet në Vlorë 29-vjetori i tragjedisë së Otrantos.
Familjarë të viktimave, qytetarë, përfaqësues të pushtetit vendor dhe qendror kujtuan një prej tragjedive më të rënda, atë të Otrantos.
81 karrige u lanë bosh si një simbol për ata që humbën jetën dhe buqeta me lule u hodhën në det.
Kjo tragjedi, thonë familjarët e viktimave, është krijuar me dashje dhe se vendimi i Gjykatës Italiane ka qenë i padrejtë.
Kryetarja e bashkisë Vlorë e cilësoi këtë si një moment reflektimi, ndërsa Ministrja e Shtetit për Marrëdhëniet me Parlamentin tha se ajo çfarë mund të bëhet sot është të garantohet që tragjedi të tilla të mos përsëriten.
Më 28 mars 1997, anija shqiptare me 142 persona në bord u përmbys nga anija italiane Sibila në kanalin e Otrantos, ku humbën jetën 81 persona, të cilët shpresonin se do të krijonin një jetë më të mirë në Itali pas trazirave në vendin tonë.

Një aksident i rëndë ndodhi mbrëmjen e së dielës në Drashovicë të Vlorës, ku mbetën të vdekur 3 persona.

ABC News është rikthyer në vendin ku ndodhi ngjarja, teksa nga pamjet shihet se pjesë e automjeteve kanë “fluturuar”, disa metra larg.

Viktima të aksidentit në Drashovicë mbetën shoferët Adi Alushaj 30 vjeç dhe Esat Brahimaj 40 vjeç dhe pasagjeri Andrea Begaj.

Sipas informacioneve nga policia, dyshohet se një nga mjetet, tip “Ford”, ka qenë duke levizur në mes të rrugës, dhe me shpejtësi duke krijuar rrezik të menjëhershëm për qarkullimin.

Ndërkohë, mjeti tjetër dyshohet se ka qenë duke lëvizur me shpejtësi mbi normat e lejuara, rreth 110–120 km/h, në një segment ku kufizimi është 80 km/h.

Kombinimi i pozicionimit të gabuar në rrugë dhe tejkalimit të shpejtësisë dyshohet të ketë qenë shkaku sipas policisë në përplasjen fatale./abcnews.al

Rëndohet bilanci nga aksidenti i rëndë që ndodhi në Drashovicë të Vlorë, mbrëmjen e së dielës.

Ka ndërruar jetë edhe personi i tretë, i cili ndodhej në gjendje të rëndë për jetën, Andrea Begaj.

Dy automjete u përplasën kokë më kokë, duke lënë dy viktima në vendngjarje, shoferët Adi Alushaj 30 vjeç dhe Esat Brahimaj 40 vjeç.

Vetëm dy orë më pas, edhe i plagosuri nuk arriti t’i mbijetojë plagëve, duke e çuar në tre numrin e viktimave nga ky aksident i rëndë./abcnews.al

Një aksident i rëndë rrugor në aksin Vlorë–Kotë, në zonën e fshatit Drashovicë, përgjatë rrugës së lumit të Vlorës.

Sipas informacioneve paraprake, në aksident janë përfshirë dy automjete. Nga përplasja e fortë, të dy drejtuesit e mjeteve Adi Alushaj 30 vjeç dhe Esat Brahimaj 40 vjeç  kanë humbur jetën në vendngjarje.

Ndërkohë, pasagjeri i cili ndodhet në gjendje të rëndë Andrea Begaj është transportuar në spital në gjendje të rëndë shëndetësore.

Forcat e policisë dhe grupi hetimor ndodhen në vendngjarje dhe po punojnë për zbardhjen e plotë të shkaqeve dhe rrethanave të aksidentit./abcnews.al

Sekuestrohet municion luftarak dhe tritol. Arrestohet në flagrancë poseduesi i tyre. Në vijim të goditjeve të pandërprera ndaj veprimtarive kriminale, si dhe mbi bazën e informacioneve të siguruara në rrugë operative, specialistët e Seksionit për Hetimin e Krimeve në Komisariatin e Policisë Vlorë goditën një rast të mbajtjes pa leje të municionit luftarak dhe lëndëve plasëse.

Gjatë kontrollit të ushtruar në banesën e shtetasit A. C., shërbimet e Policisë gjetën dhe sekuestruan, në cilësinë e provës materiale, 158 fishekë luftarakë dhe 1 kallëp lënde plasëse, të dyshuar si tritol.

Në përfundim të veprimeve procedurale, u arrestua në flagrancë shtetasi A. C., 35 vjeç, banues në Vlorë, për veprën penale “Mbajtja pa leje dhe prodhimi i armëve, armëve shpërthyese dhe municionit”.

Materialet procedurale i kaluan Prokurorisë pranë Gjykatës së Shkallës së Parë Vlorë, për veprime të mëtejshme.

Hodhi inerte në trotuar duke ndotur ambientin dhe duke penguar lëvizjen e lirë të këmbësorëve, procedohet penalisht 33-vjeçari.

Ndëshkohet gjithashtu me masë administrative 20.000 lekë nga Policia Bashkiake Vlorë.

Strukturat e Policisë në Vlorë, gjatë monitorimit të territorit me qëllim garantimin e rendit dhe sigurisë, si dhe për parandalimin dhe goditjen e paligjshmërive, kanë evidentuar dhe goditur një rast të ndotjes së mjedisit dhe bllokimit të lëvizjes së lirë të këmbësorëve.

Si rezultat i veprimeve të shpejta dhe verifikimeve në terren, u procedua penalisht shtetasi A. A., 33 vjeç, banues në Vlorë.

Ky shtetas, pasi kishte kryer punime rikonstruktive në banesën e tij, kishte hedhur inertet në trotuar, duke cenuar sigurinë dhe qarkullimin e lirë të qytetarëve, si dhe duke ndotur mjedisin.

Materialet iu referuan Prokurorisë pranë Gjykatës së Juridiksionit të Përgjithshëm Vlorë, për veprën penale “Menaxhimi i mbetjeve”, parashikuar nga neni 201/a i Kodit Penal.

Paralelisht me veprimet procedurale të kryera nga Policia e Vlorës, këtij shtetasi, nga Policia Bashkiake Vlorë, në zbatim të legjislacionit në fuqi për mbrojtjen e mjedisit urban, iu vendos masa administrative 20.000 lekë.

Policia e Vlorës apelon për qytetarët që të mbrojnë mjedisin dhe të denoncojnë në numrin 112 çdo paligjshmëri që konstatojnë.

VLORË- Krahas qindra besimtarëve vendas, në faljen e namazit të Fitër Bajramit në Vlorë kanë marrë pjesë edhe shumë qytetarë të huaj, të cilët jetojnë dhe punojnë në këtë qytet.

Të ardhur nga vende si Egjipti, Bangladeshi dhe shtete të tjera, ata kanë përcjellë mesazhe të forta paqeje, harmonie dhe begatie për të gjithë botën në këtë ditë të shenjtë.

Në prononcimet e tyre, ata theksuan rëndësinë e bashkëjetesës, respektit dhe solidaritetit mes njerëzve, pavarësisht kombësisë./abcnews.al

Përfundon mes tensionit ndeshja në Vlorë mes Flamurtarit dhe Elbasanit.

Përplasjet në distancë nuk munguan mes tifozërive gjatë ndeshjes. Edhe në fund të saj, nuk munguan përplasjet në hollin e stadiumit, fillimisht mes lojtarëve dhe më pas edhe një pjesë e tifozërive të të dyja skuadrave.

Të angazhuara për këtë ndeshje ishin forca të shumta të policisë.

Sa i takon ndeshjes, ajo u mbyll 1-2 për Elbasanin. Policia ndërhyri duke qetësuar situatën, ndërsa edhe jashtë tij largoi tifozët./abcnews.al

 

View this post on Instagram

 

A post shared by ABC News Albania (@abcnewsal)

Një 43-vjeçar është arrestuar nga policia pasi ushtroi dhunë fizike ndaj një punonjësi të policisë Bashkiake.

Ngjarja ka ndodhur në Vlorë, në lagjen “15 Tetori” për shkak të vendosjes së një mase administrative ndaj automjetit të tij për parkim të gabuar.

Ky shtetas ka ushtruar dhunë fizike ndaj punonjësit të Policisë Bashkiake Vlorë, 28 vjeç, banues në Vlorë.

Materialet procedurale iu referuan Prokurorisë Vlorë për veprën penale “Goditje për shkak të detyrës”.

Raffaella Maschione, murgesha nga Napoli me 10 vjet përvojë, ndodhet në Babicë e Madhe prej pesë muajsh për të shërbyer fëmijët dhe komunitetin lokal. Ajo zhvillon aktivitetet sportive, por edhe praktike në kuzhinë me fëmijët si përgatitjen e picave dhe ëmbëlsirave, duke u mësuar respektin, bashkëpunimin dhe aftësi praktike. Maschione është gjithashtu infermiere dhe mbështet komunitetin në rastet e nevojës, duke bashkëpunuar me mjekun lokal dhe spitalin e Vlorës.

Pjesë nga intervista

Raffaella Maschione: Jam Raffaella Maschione. Vij nga Napoli dhe jam këtu vetëm prej 5 muajsh.

Artur Nura: 5 muaj, por sa kohë keni qe jeni bere murgeshë?

Raffaella Maschione: Eh, 10 vjet.

Artur Nura: Ku keni shërbyer më parë?

Raffaella Maschione: Fillimisht në Assisi për 3 vjet, pastaj në Bari për 4 vjet, dhe në provincën e Salernos dhe, pranë shenjtërores së Pompeit për 3 vjet të tjera.

Artur Nura: Pse ju sollën në Shqipëri, në Babica e Madhe?

Raffaella Maschione: Më kërkuan të isha e gatshme të shërbeja këtë tokë dhe fëmijët e kësaj toke, dhe thashë menjëherë po. Kam qenë këtu rreth 14 vjet më parë, kur isha ende vajzë, këtu me motrat, dhe u dashurova me këtë realitet. Ka qenë gjithmonë dëshira ime të kthehesha.

Artur Nura: Jeni e kënaqur me këtë jetë në këto 6 muaj?

Raffaella Maschione: Shumë, shumë e kënaqur.

Artur Nura: Pashe kur vinin fëmijët, të përqafonin; ishte një dashuri shumë e veçantë. Pse?

Raffaella Maschione: Unë jam me ta çdo ditë. Jam trajnerja e tyre e volejbollit, kryesisht me vajzat, por edhe me djemtë, sepse unë kam luajtur futboll dhe ka një lidhje shumë të bukur. Përmes sportit ndërtohen lidhje të rëndësishme: mësohet respekti për rregullat dhe për shokun me të cilin luan. Mësohet të inkurajosh personin pranë teje. Sporti është një mënyrë për të transmetuar vlera të miqësisë, përulësisë dhe guximit, dhe përpiqemi të rrisim fëmijët.

Artur Nura: Pse kemi zgjedhur këtë vend për intervistën?

Raffaella Maschione: Sepse këtu organizojmë laboratorin e kuzhinës. Çfarë bëjnë vajzat dhe djemtë? Kënaqen shumë një herë në javë duke punuar me brumë. Gatuhen pica, biskota, torta që mund t’i marrin në shtëpi dhe t’i tregojnë familjarëve. Është një mënyrë për të mësuar, për të kujdesur shtëpinë dhe gjërat, por edhe për t’u argëtuar: t’i ndotësh pak duart me brume është gjithmonë argëtuese.

Artur Nura: Në këto 6 muaj, keni krijuar miqësi me babiciotët, babiciotet e tjerë?

Raffaella Maschione: Mamat që sjellin fëmijët flasin pak me ne. Unë flas pak shqip, po mësoj. Baballarët janë më të zënë, vijnë kryesisht kur organizojmë festa ose shfaqje, siç ishte ajo e Krishtlindjes më 23 dhjetor. Kemi menyra per te njehur realitetin ketu. Pastaj Unë jam edhe infermiere, kështu që jam në dispozicion të komunitetit kur ka nevojë.

Artur Nura: Kur dikush ka nevojë për ju në fshat, ju thërrasin?

Raffaella Maschione: Po.

Artur Nura: Dhe nëse është një rast më i rëndë, i dërgoni në Vlorë?

Raffaella Maschione: Sigurisht, gjithmonë. Dërgimi është tek mjeku i ambulancës së fshatit ose spitali i Vlorës. Përpiqemi të punojmë në rrjet: për një të moshuar të shtrirë, për ndonjë trajtim apo djegie. Për gjithçka tjetër jemi gjithmonë në kontakt me komunitetin.

Valeria Parraccino, koordinatore e projekteve të bashkëpunimit ndërkombëtar të OJQ-së italiane Celi, tha se ndodhet në Vlorë që nga viti 2018 dhe drejton projekte si Acqua Nostra për menaxhimin e ujërave të zeza dhe të bardha dhe “Vita Vjosa” për zhvillimin e qëndrueshëm turistik të lumit Vjosa.

Ajo theksoi se projekti i financuar nga BE-ja dhe PPNEA fokusohet në mbrojtjen e habitateve natyrore dhe forcimin e kapaciteteve të OJQ-ve lokale. Parraccino u shpreh se ndihet si në shtëpi në Vlorë dhe ka gjetur mikpritje dhe bashkëpunim të mirë nga institucionet dhe komuniteti lokal.

Pjesë nga intervista

Valeria Parraccino: Unë jam Valeria Parraccino, koordinatore e projekteve të bashkëpunimit ndërkombëtar të Celi në Shqipëri. Celi është një OJQ italiane me seli në Milano që ka aktivitete në disa vende, ndër të cilat edhe Shqipëria. Unë jam përgjegjëse për të gjitha projektet e OJQ-së këtu.

Jam në Vlorë që nga viti 2018. Kam qëndruar deri në vitin 2021, pastaj pata një ndërprerje të shkurtër dhe jam rikthyer sërish që nga fillimi i vitit 2024.

Artur Nura: Projekti që po zbatoni ka të bëjë me sistemin e ujërave të zeza dhe të bardha në Vlorë, apo jo?

Valeria Parraccino:  Po, ndër projektet e ndryshme që Celi po zbaton, kemi një projekt së bashku me Bashkinë e Milanos, Bashkinë e Vlorës dhe menaxherët e ujësjellësit të dy qyteteve, i cili quhet “Aqua Nostra”. Ai financohet nga Agjencia Italiane për Bashkëpunim për Zhvillim, pra nga Ministria e Punëve të Jashtme dhe Bashkëpunimit Ndërkombëtar e Italisë. Projekti synon të mbështesë realitetet lokale në përmirësimin e menaxhimit të integruar të burimeve ujore, si të ujërave të zeza ashtu edhe të ujërave të bardha.

Artur Nura: Por ky nuk është i vetmi projekt që realizoni, apo jo? Keni bërë ose po bëni projekte të tjera?

Valeria Parraccino: Kemi bërë dhe po bëjmë projekte të tjera. Në veçanti, aktualisht kemi aktiv një projekt, gjithashtu të financuar nga Agjencia Italiane për Bashkëpunim për Zhvillim, në lumin Vjosa. Projekti quhet “Vita Viosa” dhe zbatohet nga OJQ të tjera dhe institucione lokale për mbrojtjen dhe zhvillimin e qëndrueshëm turistik të lumit, sidomos tani që është shpallur Park Kombëtar. Projekti mbështet gjithashtu institucionet lokale të krijuara për menaxhimin e parkut, duke synuar të pajtojë aspektin turistik me atë mjedisor.

Kemi edhe një projekt tjetër në zonën e Vlorës, të financuar nga Delegacioni i Bashkimit Evropian në Tiranë, pra me fonde të BE-së. Është një projekt që po e zbatojmë me një OJQ mjedisore të quajtur PPNEA, e njohur për punën në mbrojtjen e mjedisit dhe biodiversitetit. Projekti fokusohet në forcimin e kapaciteteve të OJQ-ve që veprojnë në Vlorë dhe përfshin gjithashtu ndërhyrje konkrete për mbrojtjen dhe restaurimin e habitateve natyrore në zonat e mbrojtura të Pish Poro-Nartës dhe Karaburun-Sazanit.

Artur Nura: Pas gjithë kësaj kohe që jetoni dhe punoni këtu, a ndiheni si në shtëpi? Si e keni përjetuar këtë eksperiencë?

Valeria Parraccino: Po, ndihem si në shtëpi. Në Vlorë kam gjetur një shtëpi të dytë. Bashkëpunimi si me kolegët e zyrës së Celi-t, ashtu edhe me institucionet lokale, ka qenë gjithmonë pozitiv. Jemi ndier shumë të mirëpritur dhe, edhe për shkak të gjuhës, sidomos në Vlorë kemi shpesh mundësinë të komunikojmë drejtpërdrejt në italisht.

Gjithmonë kemi gjetur mikpritje dhe bashkëpunim për idetë projektuale që kemi propozuar ndër vite, pavarësisht kufizimeve që ndonjëherë mund të ekzistojnë për shkak të nevojave të ndryshme mes projekteve dhe institucioneve. Në përgjithësi, kemi pasur gjithmonë një pritje shumë të mirë.

Bashkia e Milanos po realizon në Vlorë projektin Acqua Nostra, pjesë e një programi të financuar nga Ministria e Punëve të Jashtme Italiane, për të ndihmuar në menaxhimin e burimeve ujore dhe shkëmbimin e kompetencave teknike.

Projekti përfshin monitorimin e ujërave të zeza dhe të bardha përmes dronëve dhe satelitëve, vizita në terren dhe trajnime, duke ofruar modele suksesi nga Milano që mund të adaptohen sipas realitetit lokal. Gianfranco Commodaro theksoi se ekspertët italianë janë aty për të kuptuar situatën aktuale dhe për të propozuar praktika të mira, ndërsa vendimet për zbatimin final i takojnë autoriteteve lokale.

Pjesë nga intervista

Artur Nura: Pse në Vlorë?

Gianfranco Commodaro: Sepse Bashkia e Milanos prej shumë vitesh operon në Vlorë dhe në qytete të tjera të Shqipërisë në kuadër të programeve të bashkëpunimit ndërkombëtar, të financuara nga Ministria e Punëve të Jashtme italiane përmes Agjencisë Italiane të Bashkëpunimit.

Artur Nura: Në çfarë konsiston ky projekt?

Gianfranco Commodaro: Ky projekt, që quhet “Acqua Nostra”, konsiston në shkëmbimin e kompetencave mes Bashkisë së Milanos dhe partnerëve të sistemit territorial milanez, në këtë rast edhe ARPA Lombardia, MM S.p.A. dhe partnerë të tjerë të territorit, të gjithë të përfshirë në aktivitetet e sistemit Itali, pra brenda një strategjie të përbashkët.

Projekti parashikon asistencë teknike dhe shkëmbim kompetencash mbi menaxhimin e burimeve ujore: kanalizimet, ujin e pijshëm, trajtimin e ujërave të ndotura, si dhe përdorimin e satelitëve dhe dronëve për monitorimin e territorit.

Është një shkëmbim kompetencash dhe një proces krahasimi: ka një pjesë trajnimi, një pjesë vizitash në terren dhe gjithashtu vizita në Milano, ku synohet të transmetohen disa kompetenca. Nga ana tjetër, si në të gjitha projektet e bashkëpunimit, mësohet gjithmonë diçka.

Artur Nura: Pra, po ndiqni hap pas hapi sistemin e ujërave të zeza dhe të bardha në Vlorë?

Gianfranco Commodaro: Po, në këtë rast po ndjekim sistemin e ujërave të zeza dhe të bardha. UKT po na tregon situatën aktuale, të cilën ne nuk e njohim. Duke analizuar situatën, ne paraqesim disa raste suksesi nga Milano që mund të ripërsëriten, tërësisht ose pjesërisht, në varësi të realitetit të Vlorës.

Ne nuk e njohim drejtpërdrejt realitetin e Vlorës: ata po na e tregojnë, dhe pikërisht për këtë jemi këtu. Si rrjedhojë, ne propozojmë dhe ndajmë praktika të mira mbi mënyrën se si në Milano menaxhohet ky shërbim.

Si në të gjitha projektet e bashkëpunimit, ajo që funksionon në Milano nuk zbatohet automatikisht këtu. Megjithatë, ekzistojnë modele ndërhyrjeje që, në varësi të realitetit shqiptar — qoftë në Vlorë, Tiranë apo qytete të tjera — mund të ofrojnë ide apo teknika për t’u zbatuar këtu. Më pas do të jetë kompetencë e bashkisë, e UKT-së apo e aktorëve lokalë përgjegjës në territorin shqiptar të vendosin si të veprojnë.

Artur Nura: A është bashkëpunimi italian i pranishëm drejtpërdrejt në këtë projekt apo delegon kompetencat te institucione të tjera?

Gianfranco Commodaro: Bashkëpunimi italian është i pranishëm në Shqipëri prej shumë vitesh.

Artur Nura: E kam fjalën konkretisht për këtë projekt.

Gianfranco Commodaro: Ky projekt quhet “Acqua Nostra” dhe është pjesë e një financimi të Ministrisë së Punëve të Jashtme të Bashkëpunimit Italian nga viti i kaluar. Në këtë rast, Bashkia e Milanos është institucioni udhëheqës dhe për tre vitet e ardhshme do të operojë përmes këtyre shkëmbimeve të kompetencave.

Një banesë private katërkatëshe është përfshirë nga flakët gjatë natës në zonën e Ujit të Ftohtë në Vlorë. Zjarri ka rënë në katin e dytë, në kuzhinë.

Ngjarja është regjistruar rreth orës 01:30. Sipas dyshimeve të para, mësohet se shkak i zjarrit ka qenë një shkëndijë elektrike.

Në vendngjarje kanë mbërritur menjëherë forcat zjarrfikëse, të cilat kanë bërë të mundur shuarjen e flakëve.

Fatmirësisht nuk ka pasur persona të lënduar, por vetëm dëme materiale të shkaktuara në dy dhoma të banesës.

Tentoi të vidhte një furgon në Vlorë , arrestohet në flagrancë 23-vjeçari nga Kosova.

Gjatë kontrollit fizik iu gjet një armë e ftohtë (thikë), e cila u sekuestrua në cilësinë e provës materiale.

Si rezultat i reagimit të shpejtë dhe punës së pandërprerë për parandalimin dhe zbardhjen e rasteve të vjedhjes, si dhe për kapjen e autorëve të tyre, specialistët e Seksionit për Hetimin e Krimeve në Komisariatin e Policisë Vlorë bënë të mundur arrestimin në flagrancë të shtetasit G. P., 23 vjeç, banues në Pejë, Kosovë.

Ky shtetas u kap më datë 10.03.2026 , rreth orëve të para të mengjesit, në lagjen “24 Maji”, në momentin që po tentonte të vidhte një automjet tip furgon. Ndërhyrja e menjëhershme e shërbimeve të Policisë bëri të mundur kapjen e tij në flagrancë dhe parandalimin e vjedhjes.

Gjatë kontrollit personal, shërbimet e Policisë i gjetën dhe sekuestruan në cilësinë e provës materiale një mjet prerës (thikë).

Nga veprimet hetimore të kryera rezulton se i njëjti shtetas dyshohet të jetë autor edhe i një vjedhjeje tjetër, të ndodhur më datë 06.03.2026, ku është marrë një shumë parash në një lokal në lagjen “10 Korriku”, në qytetin e Vlorës.

Policia vijon punën për dokumentimin e plotë të kësaj ngjarjeje dhe për verifikimin e përfshirjes së këtij shtetasi edhe në raste të tjera vjedhjeje.

Materialet procedurale iu referuan Prokurorisë Vlorë për veprat penale “Vjedhja” dhe “Mbajtja pa leje e armëve të ftohta”.

VLORË- Një e moshuar 85-vjeçare është shpëtuar nga punonjësit e zjarrfikëses pasi ndodhej e vetme në banesën e saj dhe nuk mund të lëvizte.

E moshuara ishte rrëzuar në banesë dhe kërkonte ndihmë, por nuk ishte në gjendje të ngrihej apo të hapte derën e jashtme.

Për shkak të derës së blinduar dhe pamundësisë së 85-vjeçares për ta hapur atë, punonjësit e zjarrfikëses u detyruan të ndërhyjnë nga tarraca e pallatit. Ata zbritën në ballkonin e banesës ku jetonte e moshuara dhe më pas arritën të hapnin derën për të hyrë brenda.

Pas ndërhyrjes, zjarrfikësit i dhanë ndihmën e parë dhe e transportuan 85-vjeçaren në ambientet e Spitalit Rajonal të Vlorës ./abcnews.al/

VLORË- Detaje të reja nga aksioni në Vlorë me urdhër të SPAK. ABC News mëson se është zbardhur vrasja e Gentian Qarrit.

Autoritetet kanë lëshuar disa urdhër-arreste në lidhje me këtë ngjarje.

Urdhër arresti është lëshuar për Inez Hajrullën dhe Ervis Matodashajn, të cilët nuk janë gjetur ende.

Gjithashtu, është lëshuar urdhër arresti për Flodian Plakun, i njohur ndryshe si “Pole Qorri”, për të cilin është vendosur edhe një masë e re sigurie për trafik droge.

Urdhër arresti është lëshuar edhe për një person të arrestuar më herët në Janinë të Greqisë, si dhe për dy persona të arrestuar më parë në Itali.

Në mesin e personave për të cilët është lëshuar urdhër arresti është edhe një ish-efektiv policie.

Sipas hetimeve, në dosje përfshihen gjithashtu edhe disa episode të trafikut të lëndëve narkotike./abcnews.al/

VLORË- Një aksion i befasishëm i forcave speciale është zhvilluar në zonën e Ujit të Ftohtë në Vlorë. Aksioni është zhvilluar me urdhër të SPAK.

Operacioni është realizuar nga efektivët e RENEA-s, dhe FNSH të cilët kanë ndërhyrë në terren në kuadër të një kontrolli të gjerë sigurie.

Sipas informacioneve paraprake, në aksion janë angazhuar rreth 40 efektivë të forcave speciale dhe rreth 10 mjete, përfshirë edhe mjete të blinduara.

Operacioni është monitoruar edhe nga ajri përmes përdorimit të një droni, i cili ka kontrolluar zonën për të ndihmuar në koordinimin e veprimeve në terren.

Deri më tani nuk ka një njoftim zyrtar për objektivin e operacionit apo nëse ka persona të shoqëruar, ndërsa pritet që Policia e Shtetit të japë më shumë detaje në vijim për aksionin e zhvilluar në këtë zonë./abcnews.al/

Një turiste e huaj ka rënë pre e një grabitjeje në zonën e Lungomares në Vlorë.

Sipas informacioneve paraprake nga policia, një person i cili tashmë është identifikuar i ka marrë me forcë varësen e floririt nga qafa turistes dhe më pas është larguar me vrap nga vendngjarja.

Menjëherë pas njoftimit, shërbimet e Policisë kanë mbërritur në zonë dhe kanë nisur kontrollin e territorit për kapjen e autorit.

Ndërkohë, po punohet për arrestimin e të riut dhe dokumentimin e plotë të ngjarjes.