Kryeministri Edi Rama ka publikuar në Facebook një video, ku ka dhënë detaje nga mbledhja rreth 7-orëshe me të deleguarit politikë të Partisë Socialiste, kryetarët socialistë të komisioneve parlamentare dhe deputetë të PS-së, të zhvilluar këtë të diel në Pogradec.

Rama tha se takimi u zhvillua në kuadër të përgatitjeve për sezonin e ri politik, duke theksuar se diskutimet u përqendruan te dokumentet “Besa” dhe “Prania Besnike”, si dhe te një ekosistem i ri i komunikimit të qeverisë me qytetarët.

“Nga Pogradeci, aty ku Lasgushi gjente frymëzimet e veta, aty ku ne u përpoqëm të mblidhnim së bashku reflektimet e një periudhe pushimesh aktive, lidhur me sezonin e ri politik. Kemi diskutuar për Besën, kemi diskutuar për Praninë Besnike, ekosistemin e ri të komunikimit të qeverisë me qytetarin dhe për Pasqyrën Unike, Pasqyra Albania, ku qytetarët do të kenë të pranishme të gjitha institucionet”, tha Rama.

Kryeministri u ndal edhe te mënyra e re e trajtimit të kërkesave dhe problematikave të qytetarëve, duke e krahasuar atë me një “pako postale” që mund të ndiqet në kohë reale.

“Ambicia është që të arrijmë që çdo kërkesë, shqetësim apo hall i qytetarit të jetë një pako postale që ndiqet në kohë reale, nga dërguesi dhe nga ana tjetër shteti, qeveria, institucionet ndjekin përgjegjësitë dhe çdo shkelje afati shihet me lupë”, u shpreh Rama.

Ai theksoi se synimi është që qytetari të ketë një komunikim më të drejtpërdrejtë dhe transparent me administratën, ndërsa institucionet të jenë të detyruara të ndjekin dhe të zgjidhin në kohë kërkesat e qytetarëve.

Mbyllet pas 7 orësh mbledhja e Ramës me të deleguarit dhe kryetarët socialistë të komisioneve parlamentare, çfarë u diskutua në Pogradec

The post Rama zbardh mbledhjen 7-orëshe në Pogradec: Nga “Besa” te “Pasqyra Albania” (VIDEO) appeared first on Euronews Albania.

Pas rreth 7 orësh, ka përfunduar mbledhja e kryetarit të Partisë Socialiste, njëherësh kryeministrit Edi Rama, me 12 drejtuesit politikë të qarqeve të vendit, kryetarët socialistë të komisioneve parlamentare dhe disa deputetë të PS-së, e zhvilluar këtë të diel në Pogradec.

Gjatë takimit, fokusi kryesor ka qenë mënyra e re se si administrata publike duhet të paraqitet përpara qytetarit, ofrimi i shërbimeve në mënyrë efikase e të shpejtë, si dhe komunikimi i ri mes ministrave, deputetëve, kryetarëve të bashkive dhe drejtorëve rajonalë.

Burime brenda takimit bëjnë me dije se Rama është ndalur veçanërisht te problematika e arrogancës në administratë, duke kërkuar një ndryshim rrënjësor të sjelljes së administratës ndaj qytetarëve, veçanërisht në rastet kur problematikat e tyre nuk kanë marrë zgjidhje.

Në takim është diskutuar gjerësisht edhe dokumenti “Besa” dhe mënyrat për përmirësimin e tij, me synimin për të ofruar një alternativë qeverisëse më të mirë për qytetarët. Pjesëmarrësit kanë ndarë opinionet dhe reflektimet e tyre edhe mbi dokumentin “Prania Besnike”.

Një tjetër çështje e diskutuar ka qenë reforma administrativo-territoriale dhe shkrirja e disa bashkive. Mësohet se Rama u ka kërkuar drejtuesve politikë të bashkive që pritet të preken nga shkrirja t’u shpjegojnë qytetarëve se një proces i tillë do të sillte më shumë shërbime dhe në një kohë më të shpejtë.

Kryeministri u ka kërkuar gjithashtu drejtuesve politikë që të nisin të mendojnë për emrat që do të garojnë në zgjedhjet lokale të vitit 2027, duke kërkuar figura që janë më pranë komunitetit.

Sa i përket dokumentit “Besa”, Rama është shprehur se ai duhet t’u shpërndahet jo vetëm deputetëve, por edhe kryetarëve të bashkive dhe drejtuesve të partive përkatëse, në mënyrë që të gjithë të njihen me përmbajtjen e tij. Ai ka kërkuar gjithashtu nga drejtuesit politikë një prani më të madhe në komunitet.

Ndërsa kryetarëve të komisioneve parlamentare, Rama u ka kërkuar më tepër angazhim në media dhe më shumë kujdes në mënyrën se si ligjet dhe nismat përcillen te publiku.

Ndërkohë, ditën e nesërme pritet të raportojnë ministrat përkatës, të cilët do të paraqesin objektivat e vendosura më parë dhe atë çfarë është arritur deri më tani. Burime bëjnë me dije se pjesë e raportimit pritet të jenë edhe drejtues të agjencive të rëndësishme shtetërore, mes tyre edhe AKSHI.

Ndërkohë, në javën e parë të shtatorit pritet të thirret edhe Asambleja Kombëtare e Partisë Socialiste, ku pritet të diskutohen hapat e mëtejshëm të forcës politike në kuadër të objektivave të përcaktuara.

Dalin pamjet nga takimi i Ramës me të deleguarit politikë në Pogradec (VIDEO)

Rama zbardh mbledhjen 7-orëshe në Pogradec: Nga “Besa” te “Pasqyra Albania” (VIDEO)

The post Mbyllet pas 7 orësh mbledhja e Ramës me të deleguarit dhe kryetarët socialistë të komisioneve parlamentare, çfarë u diskutua në Pogradec appeared first on Euronews Albania.

Një 40-vjeçar nga Tirana, i identifikuar si Elvis Kosova, është arrestuar në flagrancë në Palasë, pasi dyshohet se ka dhunuar dhe kanosur me armë bashkëshorten e tij, në një vilë në një kompleks të zonës.

Policia njofton se ngjarja është raportuar rreth orës 13:40 të kësaj të diele, si një konflikti familjar ndërsa menjëherë në vendngjarje kanë shkuar shërbimet e Patrullës së Zonës si dhe forca shtesë të Stacionit të Policisë së Dhërmiut.

Gjatë ndërhyrjes në banesë, Policia ka gjetur dhe sekuestruar një armë zjarri, pistoletë.

Ndërkohë, gjatë kontrollit të banesës së 40-vjeçarit në Tiranë, me mbështetjen e Drejtorisë Vendore të Policisë Tiranë, janë gjetur dhe sekuestruar edhe dy pako me municion luftarak dhe dy krehra me fishekë.

“Nga verifikimet paraprake rezulton se shtetasi E. K. dyshohet se ka dhunuar dhe kanosur bashkëshorten e tij. Ndërhyrja e menjëhershme e shërbimeve të Policisë bëri të mundur neutralizimin e situatës dhe parandalimin e përshkallëzimit të mëtejshëm të konfliktit”, njofton policia.

The post Dhunoi dhe kanosi me armë bashkëshorten në Palasë, arrestohet 40-vjeçari nga Tirana appeared first on Euronews Albania.

Dy persona kanë humbur jetën dhe një tjetër është plagosur pasditen e kësaj të diele, pas disa të shtënave me armë zjarri në fshatin Mgull, në Dukagjin.

Viktimat janë identifikuar si Lekë Gjoni dhe Prelë Gjoni, babë e bir, ndërsa i plagosur ka mbetur L.B.

Forcat e Policisë janë nisur drejt vendit të ngjarjes, ndërsa rrethanat dhe shkaqet e incidentit mbeten ende të paqarta.

Policia pritet të japë më shumë detaje në vijim.

Njoftimi i policisë

“Rreth orës 17:20, në fshatin Mgull, Njësia Administrative Pult, Dukagjin, dyshohet se janë vrarë me armë zjarri shtetasit L. Gj. dhe P. Gj., babë e bir, si dhe është plagosur rëndë shtetasi L. B.

Forca të shumta të Policisë Vendore dhe të Forcës Kombëtare të Sigurisë, Njësia Shkodër, janë nisur drejt vendngjarjes.

Ndërkohë, është ngritur një grup i posaçëm hetimor, i cili po shkon në vendngjarje, për zbardhjen e plotë të rrethanave, dokumentimin ligjor të ngjarjes, si dhe identifikimin dhe kapjen e autorit/autorëve”, thuhet në njoftim.

The post Vriten me armë zjarri babë e bir në Dukagjin, policia niset drejt vendit të ngjarjes (EMRAT) appeared first on Euronews Albania.

Presidenti i SHBA-së, Donald Trump, ka ripërtërirë propozimin e tij mbi të ardhmen e Ngushticës së Hormuzit, pasi postoi në platformën Truth Social një hartë që e përshkruan rrugën ujore strategjike si “territor të ri amerikan”, megjithëse nuk komentoi mbi imazhin.

Kjo nuk është hera e parë që Trump ka publikuar të njëjtën hartë që nxjerr në pah Ngushticën e Hormuzit, pasi ai e kishte ndarë atë më 18 gusht.

Presidenti amerikan e paraqiti për herë të parë idenë e trajtimit të ngushticës si territor amerikan më 15 gusht.

“Pasi të përfundojmë mposhtjen e Iranit, i cili po pëson një disfatë shumë të rëndë, së shpejti do të njoftoj se Ngushtica e Hormuzit do të jetë tokë që i përket Shteteve të Bashkuara”, tha Trump në një tubim në Nju Jork.

Ngushtica e Hormuzit është një nga korridoret më të rëndësishme të transportit detar në botë; para shpërthimit të luftës, rreth një e pesta e eksporteve globale të naftës bruto dhe gazit natyror të lëngshëm kalonin nëpër të.

Ndërsa Irani këmbëngul se ka marrë kontrollin mbi ngushticën, Trump, nga ana e tij, pohon se Shtetet e Bashkuara janë ato që “kontrollojnë plotësisht” kalimin.

Teherani e ka mbajtur të mbyllur ngushticën që nga fillimi i luftës dhe mosmarrëveshja e tij me Uashingtonin vazhdon mbi kushtet për rihapjen e saj.

Në një zhvillim të lidhur me këtë, një raport zyrtar iranian më parë e përshkroi shtetin amerikan të Kalifornisë si “tokë të re që i përket Iranit”.

Zëvendësministri i Jashtëm iranian, Kazem Gharibabadi, gjithashtu iu bashkua reagimit ndaj vërejtjeve të Trump, duke shkruar: “Iluzionet e tij në lidhje me Ngushticën e Hormuzit do të korrigjohen së shpejti, ose ne do t’i korrigjojmë iluzionet e këtij njeriu iluzionist”.

The post Tensionet me Iranin, Trump paraqet hartën e Hormuzit si “territor të ri të SHBA-së” appeared first on Euronews Albania.

El Nino, fenomeni natyror klimatik që shkaktohet nga ngrohja e pazakontë e ujërave të Oqeanit Paqësor, mund të jetë më i fuqishmi i regjistruar në kohët moderne. Shërbimi Meteorologjik britanik paralajmëron se ndikimi i tij, i kombinuar me ndryshimet klimatike, mund ta bëjë vitin 2027 më të nxehtin në histori.

Fenomeni El Nino që po zhvillohet në Oqeanin Paqësor mund të jetë më i fuqishmi i regjistruar në kohët moderne, ka paralajmëruar Shërbimi Meteorologjik britanik.

Ky fenomen natyror rrit temperaturat globale dhe shton rrezikun e motit ekstrem në shumë pjesë të botës. I kombinuar me ndryshimet klimatike të shkaktuara nga aktiviteti njerëzor, ai mund ta bëjë vitin 2027 më të nxehtin në histori.

El Nino mund të sjellë gjithashtu një vjeshtë më të lagësht dhe me stuhi në Mbretërinë e Bashkuar dhe Evropën Veriperëndimore. Meteorologët britanikë thonë se nuk kanë parë më parë një sinjal kaq të fuqishëm të këtij fenomeni në parashikimet e tyre.

El Nino ndodh zakonisht çdo dy deri në shtatë vjet dhe mund të zgjasë rreth një vit. Ai krijohet kur erërat mbi Paqësor dobësohen ose ndryshojnë drejtim, duke lejuar që ujërat e ngrohta të zhvendosen drejt lindjes. Nxehtësia kalon më pas nga oqeani në atmosferë, duke rritur temperaturat dhe ndryshuar shpërndarjen e reshjeve. Aktualisht, temperatura e sipërfaqes së detit në një zonë kyçe të Paqësorit është mbi dy gradë më e lartë se normalja.

Në disa zona, ujërat në thellësinë 100 metra janë rreth tetë gradë më të ngrohta se zakonisht. Kjo rezervë e madhe nxehtësie mund ta fuqizojë edhe më shumë fenomenin gjatë muajve të ardhshëm.

Në të kaluarën, fenomene të tilla kanë dëmtuar prodhimin e kafesë, orizit dhe kakaos, duke shkaktuar rritje të çmimeve të ushqimeve. Organizata e Kombeve të Bashkuara për Ushqimin dhe Bujqësinë paralajmëron se dhjetëra milionë njerëz mund të përballen me pasiguri të rëndë ushqimore.

Sipas ekspertëve, nxehtësia e çliruar nga oqeanet mund ta bëjë vitin 2027 më të nxehtë se rekordi i vendosur në vitin 2024.

The post 2027 pritet të thyejë rekordin e temperaturave, fenomeni El Nino mund të jetë më i rrezikshëm appeared first on Euronews Albania.

Serenatat janë një nga traditat më të veçanta të fshatit Ziçisht, një pasuri kulturore që është ruajtur ndër vite dhe është përcjellë nga një brez te tjetri.

Tingujt e kitarës dhe këngët e dashurisë kanë qenë pjesë e jetës së këtij fshati, duke u kthyer në një simbol të identitetit dhe kujtesës së komunitetit.

Për banorët, ruajtja e serenatave do të thotë të mbash gjallë historinë dhe traditën e vendit. Edhe brezat e rinj po i rikthehen këtyre këngëve, duke dëshmuar se kjo kulturë vazhdon të ketë vend edhe sot.

Pikërisht për të promovuar këtë trashëgimi kulturore, u organizua një mbrëmje kushtuar serenatave të Ziçishtit. Muzika, tingujt e kitarave dhe performancat rikthyen atmosferën e dikurshme të netëve të serenatave, duke bashkuar banorët dhe të rinjtë e fshatit.

Në një kohë kur shumë prej traditave të vjetra rrezikojnë të harrohen, aktivitete të tilla synojnë t’u japin atyre një jetë të re dhe t’i përcjellin te brezat e ardhshëm.

The post Serenatat e Ziçishtit, tradita që i reziston kohës appeared first on Euronews Albania.

Gati gjysma e të rinjve përdorin TikTok-un për të gjetur ide për vendet ku do të kalojnë pushimet. Platforma online vlerësohet më e rëndësishme se këshillat e miqve për pushimet.

Brezi Z po udhëheq ndryshimin në mënyrën se si turistët zbulojnë, rezervojnë dhe ndajnë pushimet e tyre.

Videot e shkurtra në TikTok po ndikojnë gjithnjë e më shumë në përzgjedhjen e destinacioneve dhe aktiviteteve. Ky ndikim është veçanërisht i fortë te të rinjtë e lindur ndërmjet viteve 1997 dhe 2012. TUI Musement, një platformë që studion udhëtimet, analizoi ndikimin e rrjeteve sociale te turistët në Spanjë, Itali dhe Mbretërinë e Bashkuar.

Studimi tregoi se 48% e pjesëtarëve të brezit Z e përdorin TikTok-un si burim frymëzimi për udhëtimet. Sipas kompanisë, përmbajtja vizuale dhe videot e shkurtra po fitojnë më shumë ndikim te turistët. Më shumë se katër në dhjetë udhëtarë thanë se një postim viral i kishte shtyrë të rezervonin një udhëtim ose aktivitet. Ky ndikim ishte pak më i lartë te brezi i mijëvjeçarëve sesa te brezi Z.

Edhe krijuesit e përmbajtjes luajnë rol të rëndësishëm në vendimet që marrin turistët. Rreth 27% e të anketuarve thanë se kishin ndryshuar destinacionin pas rekomandimit të një influencuesi. Ndikimi i rrjeteve sociale vazhdon edhe pasi udhëtarët mbërrijnë në destinacion.

Më shumë se një e treta ndiejnë presion për t’i paraqitur pushimet më emocionuese në profilet e tyre. Pothuajse katër në dhjetë turistë kanë vizituar një atraksion kryesisht për të bërë fotografi ose video. Ndërkohë, shumë udhëtarë parapëlqejnë vendet e famshme në Instagram në vend të destinacioneve më pak të njohura.

The post “E pashë në TikTok”, 48% e të rinjve të brezit Z frymëzohen nga videot e shkurtra për udhëtimet appeared first on Euronews Albania.

Festa e Koranit rikthen në Pogradec traditën, gatimet dhe shijen e “mbretit të liqenit”, në një periudhë kur nis pasurimi i Ohrit me rasatë e rinj. Vetëm këtë vit pritet të hidhen rreth 2 milionë rasatë korani, ndërsa festa ka sjellë edhe muzikë e aktivitete për pushuesit.

Muajt gusht dhe shtator përkojnë me periudhën e pasurimit të Liqenit të Ohrit me rasatin e koranit. Për këtë arsye, kjo periudhë në Pogradec shoqërohet edhe me Festën e Koranit, një aktivitet që ndërthur traditën, kulinarinë dhe promovimin e një prej produkteve më të njohura të liqenit.

Edhe këtë vit, festa ka bërë bashkë kuzhinierë të zonës, të cilët kanë prezantuar për vizitorët gatime të ndryshme me koran, të përgatitura sipas recetave tradicionale të Pogradecit.

Sipas kuzhinierëve, “mbreti i liqenit” vijon të jetë një nga shijet më të kërkuara nga pushuesit dhe turistët që zgjedhin Pogradecin.

Për MasterChef-in shqiptar Arian Ceka, kulinaria pogradecare ka ardhur duke u përmirësuar në vitet e fundit.

Vetëm këtë vit, në Liqenin e Ohrit po hidhen rreth 2 milionë rasatë të rinj korani, në kuadër të procesit të ripopullimit të liqenit. Zëvendësministri i Bujqësisë, Arian Jaupllari, thotë se ky proces do të vijojë me synim rritjen e rezervave të koranit në liqen.

Festa e Koranit nuk është kufizuar vetëm te kulinaria. Mijëra pushues që kanë zgjedhur Pogradecin gjatë muajit gusht patën mundësi të shijojnë edhe një mbrëmje muzikore, me disa prej emrave më të njohur të muzikës së Kosovës.

The post Festa e Koranit, tradita që rikthehet çdo verë në Pogradec appeared first on Euronews Albania.

Të rinjtë po i drejtohen gjithnjë e më shumë informatikës, ndërsa kërkesa për profesionistë të teknologjisë rritet. Daniel Isufaj ka ndërtuar me shpenzimet e tij një robot inteligjent që monitoron kushtet atmosferike dhe synon ta përdorë në të ardhmen për eksplorimin e Liqenit të Ohrit.

Ky është Daniel Isufaj, një nga të rinjtë pogradecarë që ka zgjedhur të studiojë informatikë.

Degë të tilla po përzgjidhen gjithnjë e më shumë nga të rinjtë, edhe për shkak të kërkesës në tregun e punës dhe përdorimit të teknologjisë në shumë shërbime publike dhe private.

Pas përfundimit të studimeve, Danieli ka nisur të vërë në praktikë njohuritë e fituara. Me një buxhet personal, ai ka ndërtuar prototipin e parë të një roboti, i cili mund të kryejë disa funksione njëkohësisht, nga matja e temperaturës, lagështirës dhe intensitetit të dritës, deri te sinjalizimi i rasteve të zjarrit.

Sipas Danielit, pas disa përmirësimeve të mëtejshme, synimi është që roboti të mund të përdoret edhe për eksplorimin e Liqenit të Ohrit.

“ Tani jam fokusuar te krijimi i projekteve të internetit dhe robotikës. Kam krijuar një robot inteligjent me mikrokontrollues, pajisje më të njohura të kësaj fushe. Gjithashtu, kam përdorur sensorë të ndryshëm, duke i kombinuar dhe, si përfundim, kam nxjerrë një robot që ka aftësinë të lëvizë, të monitorojë kushtet atmosferike dhe të na japë një paraqitje të bukur, duke na shfaqur të gjitha matjet atmosferike. Roboti mat temperaturën, lagështirën, na shfaq pamje reale të asaj që mat nëpërmjet kamerës”, është shprehur Danieli.

Edhe pse sektori i teknologjisë ofron mundësi të shumta, një nga kërkesat më të zakonshme të punëdhënësve është eksperienca, duke e bërë më të vështirë hyrjen e të rinjve në tregun e punës. Kjo është një nga arsyet që, sipas Danielit, i shtyn shumë të rinj të mendojnë për të kërkuar mundësi jashtë vendit.

The post I riu nga Pogradeci: Ndërtoj robotë, dua një të ardhme në Shqipëri appeared first on Euronews Albania.

Shqiptarët po zgjedhin të ruajnë kursimet me monedhën vendase. Depozitat në lek u rritën me 13.5%, ndërsa ato në valutë me 10.5%, duke bërë që leku të zërë për herë të parë në një dekadë mbi 50% të totalit.

Zhvlerësimi i euros po shoqërohet me një ndryshim në vendimmarrjen e qytetarëve për sa u përket kursimeve të tyre. Të dhënat e fundit të Bankës së Shqipërisë tregojnë se depozitat në lek janë rritur ndjeshëm, ndërsa kanë rënë ato në euro.

Depozitat në lek u përshpejtuan në 13.5% vit mbi vit, në reflektim të ndërmjetësimit financiar më të thelluar në monedhën vendase nga ana e bankave, zgjerimit të ofertës monetare në lek, si dhe prirjes së vazhdueshme të agjentëve ekonomikë për t’i mbajtur ose investuar kursimet e tyre përmes sistemit bankar.

Nga ana tjetër, depozitat në valutë u rritën më ngadalë, në një ritëm vjetor prej 10.5%. Zgjerimi vjetor i depozitave në valutë është mbështetur nga kontributi më i lartë i depozitave të bizneseve, në linjë me rritjen e aktivitetit turistik dhe hyrjet e valutës në vend.

Prej më shumë se një viti, depozitat në lek po rriten më shpejt se ato në valutë, duke sjellë një zhvendosje në strukturën e depozitave, ku për herë të parë në dekadën e fundit, depozitat në lek zënë peshën më të madhe, rreth 50.1% të totalit.

The post Frika nga kursi, shqiptarët i kthejnë kursimet në lek appeared first on Euronews Albania.

Qoftë Zlatan Ibrahimovic, Gareth Bale apo Erling Haaland, futbolli ndër vite ka parë disa modele ikonike flokësh të mbledhura topuz.

Megjithatë, Haaland ka vendosur ta nisë sezonin e ri të Premier League me një pamje të re dhe shumë ndryshe.

Sulmuesi i Manchester City-t zbuloi në rrjetet sociale se kishte prerë flokët e tij të famshëm bjondë, duke postuar mbishkrimin: “Sezon i ri, model i ri.”

Haaland do të shpresojë që pamja e tij e re t’i sjellë edhe më shumë gola, teksa synon të shënojë golin e parë të sezonit, kur skuadra e Enzo Marescas përballet me Bournemouth në orën 14:00 sipas orës britanike të dielën.

Para se të priste flokët, Haaland bëri shaka duke treguar disa foto të modeleve të mëparshme të flokëve gjatë karrierës së tij, si edhe disa ide mjaft të dyshimta se si duhej të dukej modeli i ri.

Dukej nervoz teksa berberi preu tufën e parë të flokëve, por nuk kaloi shumë kohë dhe Haaland nisi të buzëqeshte për pamjen e tij të re.

Reagimet ishin të ndryshme kur 26-vjeçari bëri video-call me shokun e skuadrës te City, Jack Grealish, këngëtarin e Oasis, Noel Gallagher, dhe ish-trajnerin e Manchester City-t, Pep Guardiola.

Gallagher tha: Dukesh rreth 17 vjeç. Është bukur. Ndryshimi është i mirë.

Grealish dhe Guardiola të dy thanë se e “pëlqejnë” ndryshimin.

“Dukesh rreth 10 vjeç. Është për të qeshur. Nuk mund të ndaloj së shikuari pjesën e përparme të flokëve të tu. Më pëlqen shumë,” tha Grealish.

“S’ka mundësi. Je me fat që ke flokë. Do të doja t’i kisha. Më pëlqen,” tha Guardiola.

Para se të telefononte Ibrahimovic, Haaland bëri shaka duke thënë se ish-futbollisti i kombëtares suedeze i kishte thënë të mos i priste kurrë flokët e gjatë.

“Zlatani më tha: ‘Mos i prit kurrë flokët, sepse forca jote është te flokët.’ Jam pak nervoz. Dua një prerje shumë të shkurtër, si në ushtri.”

Por duket se Ibrahimovic nuk ishte aspak i impresionuar që Haaland nuk e kishte ndjekur këshillën e tij.

“Çfarë bëre? Humbi ndonjë bast apo çfarë? Më blloko dhe fshi numrin tim,” tha Ibrahimovic.

The post Në sezonin e ri Haaland vendos të presë flokët, ja pamja e tij e re appeared first on Euronews Albania.

Ministri i Jashtëm i Iranit e hodhi poshtë kërcënimin e sanksioneve të reja të SHBA-së si një shenjë dëshpërimi të dielën dhe tha se masat e reja të pritura nuk do të arrijnë ta mposhtin Teheranin.

Sekretari i Thesarit i SHBA-së, Scott Bessent, ka kërcënuar të vendosë ” sanksionet më të ashpra në histori ” ndaj Iranit.

Ekonomia e Iranit është tashmë nën presion të madh nga sanksionet ndërkombëtare, infrastruktura e saj është goditur vazhdimisht dhe mijëra njerëz janë vrarë në sulmet ajrore ndaj Republikës Islamike që kur SHBA-të dhe Izraeli nisën sulmet më 28 shkurt.

Por Teherani mbetet sfidues pas gati gjashtë muajsh lufte, ka sjellë transportin detar në një ndalesë praktike në Ngushticën e Hormuzit, duke refuzuar të lejojë anijet cisternë të paautorizuar të kalojnë nëpër një rrugë ujore që është jetike për dërgesat globale të naftës. Bllokada efektive e ngushticës ka rritur çmimet globale të naftës .

Duke përshkruar ato që ai i quajti “skenarë përsëritës”, Ministri i Jashtëm iranian Abbas Araqchi tha në një video të postuar në Telegram, se fakti që udhëheqësit amerikanë kanë hequr dorë nga operacionet ushtarake, për të sjellë të njëjtat plane të vjetra tregon se ata janë të dëshpëruar.

Ai tha se Uashingtoni duhet të flasë me Iranin për të gjetur “një zgjidhje të bazuar në drejtësi dhe nder”.

“Ne kurrë nuk kemi pasur frikë. Të gjitha veprimet e tyre, qofshin bllokada apo lëvizje të tjera ushtarake që kanë bërë, kanë dështuar, dhe kjo çështje e tyre e re do të dështojë gjithashtu”, tha ai.

Presidenti i SHBA-së, Donald Trump, ka paralajmëruar për pasoja ekonomike kundër çdo vendi që ofron “çdo lloj ndihme për Iranin” dhe Bessent ka kërkuar bashkëpunim me Uashingtonin nga Kina , e cila blen më shumë se 80% të naftës së dërguar nga Irani, sipas të dhënave të vitit 2025 nga firma analitike Kpler. Kina ka kërkuar diplomaci.

Irani tha se shefi i ushtrisë së Pakistanit, Asim Munir, do të vizitojë Teheranin të hënën si pjesë e përpjekjeve për të rivendosur paqen dhe sigurinë në rajon, por dha pak detaje.

Pakistani ka ndërmjetësuar në konflikt dhe një burim nga qeveria pakistaneze tha se Munir do të flasë për zhvillimet e fundit, përfshirë kërcënimin e SHBA-së për sanksione të reja. Ndërkohë, Trump tha të premten se Uashingtoni po vëzhgonte “çfarë po ndodh” me konfliktin.

“Ata do të donin shumë të bënin një marrëveshje, por sipas mendimit tim, nuk janë gati të bëjnë marrëveshjen e duhur”, tha Trump për Iranin.

Sulmet amerikane e kanë dobësuar rëndë ekonominë e Iranit dhe kanë shkatërruar forcat detare dhe ajrore të tij, por Teherani mban mjaftueshëm kapacitete raketore dhe dronësh për të penguar trafikun e cisternave të naftës dhe për të sulmuar rivalët rajonalë.

Kryetari i Parlamentit iranian, Mohammad Baqer Qalibaf, tha se Teherani kishte marrë “mesazhe të shumta” nga vendet fqinje në lidhje me krijimin e marrëveshjeve të reja rajonale të sigurisë dhe bashkëpunimit ekonomik.

Qalibaf nuk tha se për cilat vende po i referohej. Ai akuzoi SHBA-në se po rrezikon sigurinë e aleatëve të saj në rajon për hir të Izraelit, duke shtuar se një rend rajonal i pavarur dhe “i rritur në vend” do të sillte paqe dhe siguri.

Trump ende nuk ka arritur objektivat që vendosi në fillim të luftës, siç është çmontimi i programit bërthamor të Iranit, gjendja e të cilit mbetet e pasigurt duke qenë se inspektorët e OKB-së janë mbyllur që nga viti 2025, dhe krijimi i kushteve që iranianët të rrëzojnë sundimtarët e tyre klerikë.

Ndërsa Irani mbetet sfidues, Presidenti Masoud Pezeshkian ka bërë thirrje gjithashtu për një zgjidhje diplomatike.

“Do të ishte më mirë ta përfundonim luftën sot, kur jemi të fuqishëm dhe kemi dinjitet, dhe e gjithë bota e njeh fitoren tonë dhe thekson se Amerika, në kundërshtim me të gjitha rregulloret, sulmoi shkollat, spitalet dhe infrastrukturën tonë dhe është e urryer në botë”, e citoi atë të premten agjencia e lajmeve ISNA.

The post Irani: Sanksionet e reja të vendosura nga SHBA-ja e dëshpëruar do të dështojnë appeared first on Euronews Albania.

Këto janë pamjet nga takimi i Kryetarit të Partisë Socialiste, njëherësh kryeministër, Edi Rama, me të deleguarit politikë dhe kryetarët socialistë të komisioneve parlamentare, zhvilluar këtë të dielë në Pogradec.

Në pamjet e publikuara shfaqen momente nga diskutimet, ndarja e opinioneve dhe reflektimet e disa prej pjesëmarrësve mbi dokumentet “Besa” dhe “Prania Besnike”.

Burime bëjnë me dije se gjatë fjalës së tij, kryeministri Rama ka kërkuar që të lexohen dy dokumentet, “Besa” dhe “Prania Besnike”, ndërsa është diskutuar edhe për shkrirjen e bashkive.

Rama ka pyetur drejtuesit politikë të atyre bashkive që flitet për shkrirjen se përse ka patur një revoltë me Partinë Socialiste dhe t’u shpjegonin qytetarëve se kjo shkrirje do të sillte më shumë shërbime dhe më shpejt.

Rama mësohet gjithashtu se u ka kërkuar drejtuesve politikë që të fillojnë të mendojnë për emrat e zgjedhjeve lokale në 2027 duke u kërkuar emra dhe figura që janë më afër komunitetit.

Rama është ndalur tek dokumenti “Besa” ku është shprehur se ky dokument duhet t’u shpërndahet jo vetëm deputetëve por dhe kryetarëve të bashkive dhe kryetarëve të partive përkatëse që të gjithë të njihen me këtë dokument. Më tej, kryeminsitri u ka kërkuar drejtuesve politikë më tepër prani në komunitet.

Sa i përket kryetarëve të komisioneve parlamentare u ka kërkuar më tepër aktivizim në media dhe më tepër kujdes më menyrën se si përcillen ligjet drejt publikut.

Dy orë takim në Pogradec, Rama diskuton për “Besën” dhe “Praninë Besnike”

The post Dalin pamjet nga takimi i Ramës me të deleguarit politikë në Pogradec (VIDEO) appeared first on Euronews Albania.

Humanoidi kinez, i prodhuar nga Qendra e Pekinit për Robotikë Humanoide, vrapoi 100 metra në 9.39 sekonda në Lojërat Botërore të Robotëve Humanoide të shtunën, duke thyer rekordin botëror prej 9.58 sekondash të legjendës xhamajkane, të cilin ai e vendosi në Olympiastadion në Berlin në vitin 2009.

“Ky është një sukses jashtëzakonisht mbresëlënës”, shkruan organizatorët e lojërave të robotëve në Pekin në një postim në X, duke vënë në dukje se koha fituese e vitit të kaluar ishte 21.50 sekonda.

“Vetëm brenda 1 viti, robotët konkurrues janë bërë dy herë më të shpejtë. Kjo nxjerr në pah ritmin e përparimit si në treg, ashtu edhe konkretisht në robotikën kineze”, shtuan ata.

Lojërat Botërore të Robotëve Humanoide, të mbajtura në stadiumin “Ice Ribbon” të Pekinit, po bashkojnë 666 ekipe dhe 2,056 robotë nga 16 vende, të cilët garojnë në ngjarje të ndryshme, duke përfshirë atletikën, boksin, futbollin, ngritjen e peshave dhe gjimnastikën.

Pamjet video të robotëve janë shpërndarë gjerësisht në mediat sociale gjatë ditëve të fundit, veçanërisht klipet që tregojnë humanoidët duke u përplasur në dyshekë të mëdhenj dhe duke rënë ngadalë prapa në fund të garave.

Ndërsa klipet mjaft zbavitëse i kanë argëtuar shikuesit, organizatorët e lojërave thonë se njerëzit duhet të jenë të impresionuar.

Kina është mbështetur fort në industrinë e robotëve humanoide dhe investitorët duket se janë dakord.

Morgan Stanley Research ka vlerësuar se tregu i robotëve humanoidë ka të ngjarë të arrijë në 5 trilionë dollarë deri në vitin 2050, me më shumë se një miliard robotë potencialisht në përdorim deri atëherë.

Sipas një raporti të publikuar nga banka vitin e kaluar, Kina pritet të ketë rreth 302.3 milionë robotë humanoide në përdorim deri në vitin 2050.

The post Roboti humanoid kinez thyen rekordin botëror të Usain Bolt, vrapoi 100 metra për 9.39 sekonda appeared first on Euronews Albania.

Presidenti i Ukrainës, Volodymyr Zelenskyy, hodhi poshtë kategorikisht një thirrje nga ish-shefi i tij i mbrojtjes për ta dërguar vendin në kutitë e votimit.

“Unë besoj se gjatë një lufte si kjo, zgjedhjet në përgjithësi mbartin rreziqe të konsiderueshme”, u tha Zelenskyy gazetarëve.

Një votim “pikërisht tani do të ishte një cunami për shtetin, një që do ta shkatërronte Ukrainën”, tha presidenti ukrainas. Ai shtoi se strategjia e tij është të udhëheqë popullin e tij “deri në fund të luftës dhe të ruajë një shtet të pavarur dhe sovran”.

Komentet e tij vijnë pasi ish-ministri i Mbrojtjes, Mykhailo Fedorov, i shkarkuar nga roli i tij qeveritar në korrik pas një riorganizimi të diskutueshëm, bëri thirrje për zgjedhje në fillim të kësaj jave .

Organizimi i një votimi “në mënyrë të sigurt, legjitime dhe demokratike” në Ukrainë, me pjesëmarrjen e ushtarëve në vijën e frontit dhe qytetarëve që ikën në vende të tjera për t’i shpëtuar luftës, kërkon “kushte specifike”, vazhdoi Zelenskyy. Kjo është “e pamundur në kushtet aktuale, kur Putini refuzon të marrë në konsideratë ndonjë mundësi për një armëpushim”, argumentoi ai.

Fedorov është shfaqur si një rival i presidentit aktual. Në një video-adresim të martën, ai argumentoi se “njerëzit nuk mund të jetojnë pafundësisht në një shtet ku nuk e kuptojnë pse merren vendime të caktuara”.

Por apeli i tij është kritikuar si nga aleatët e Zelensky-t ashtu edhe nga anëtarët e opozitës: Zgjedhjet, të cilat janë pezulluar sipas ligjit ushtarak të Ukrainës, në fuqi që nga fillimi i pushtimit të plotë të Rusisë në vitin 2022, vetëm sa do të forconin pozicionin e Kremlinit dhe do të mbillnin përçarje.

Fedorov duket i palëkundur dhe e dyfishoi qëndrimin e tij në komentet për BBC të dielën , duke thënë se ka “të drejtë morale” për të ngritur temën e zgjedhjeve.

“Nëse nuk mund t’i ndaj idetë e mia dhe të jem i hapur për to me shoqërinë time, atëherë për çfarë po luftojmë?”, pyeti ai.

The post Zelenskyy kundër zgjedhjeve gjatë luftës: Do të ishin një cunami që do ta shkatërronin Ukrainën appeared first on Euronews Albania.

Një operacion antidrogë i organizuar nga Policia e Tiranës ka çuar në sekuestrimin e mbi 5 kilogramëve lëndë narkotike dhe arrestimin e dy personave, të cilët po lëviznin me një automjet tip “Mercedes-Benz” në zonën e Treshit në Tiranë.

Drejtori i Policisë së Tiranës, Oliger Torba, njoftoi se këtë të shtunë u organizua operacioni “Drejtimi”. ku u arrestuan dy shtetas, 51-vjeçari M.H dhe 41-vjeçari L.H., pasi dyshohet se do të transportonin lëndën narkotike nga zona e Treshit në Tiranë drejt zonës së Nish Tullës në Durrës.

Sipas tij, dy shtetasit u konstatuan në automjetin tip “Mercedes-Benz”, ndërsa gjatë kontrollit të mjetit shërbimet e Policisë evidentuan një çantë, në brendësi të së cilës kishte 7 pako me lëndë të dyshuar narkotike.

“Konkretisht, 4 pako me lëndë narkotike të llojit heroinë, me peshë 2 kilogramë e 123.6 gramë, si dhe 3 pako me lëndë narkotike të dyshuar kokainë, me peshë totale 3 kilogramë e 120.6 gramë”, tha Torba.

Në total, Policia sekuestroi 5 kilogramë e 244.2 gramë heroinë dhe kokainë ndërsa dy personat u shoqëruan në Drejtorinë e Policisë së Tiranës, ndërsa hetimet vijojnë për dokumentimin e plotë të rastit dhe identifikimin e personave të tjerë të përfshirë.

Deklarata e plotë Drejtorit të Policisë së Tiranës

“Mesditën e kësaj të shtune, falë punës operative të bërë nga ana e Seksionit për Hetimin e Narkotikëve në Drejtorinë Vendore të Policisë Tiranë, është organizuar dhe finalizuar operacioni policor i koduar “Drejtimi”, gjatë të cilit u parandalua dhe u godit një rast i tentativës për trafikim të drogave të forta, në sasi të konsiderueshme.

Në kuadër të operacionit u bë e mundur kapja dhe arrestimi në flagrancë i shtetasve:

• M.H, 51 vjeç, banues në Maminas, Durrës;
• L.H, 41 vjeç, lindur në Dibër dhe banues në Maminas, Durrës.

Nga ana e Seksionit për Hetimin e Narkotikëve u siguruan informacione në rrugë operative se dy shtetas do të transportonin një sasi të konsiderueshme lënde narkotike në zonën e “Treshit”, në afërsi të Nishtulla 3, në drejtim të Durrësit.

Mbi bazën e këtyre informacioneve, u organizua në një kohë shumë të shkurtër dhe u finalizua operacioni policor i koduar “Drejtimi”.

Gjatë operacionit, në rrugën “Kastriotët”, është konstatuar automjeti tip “Mercedes-Benz”, me dy shtetasit e dyshuar, të cilët po transportonin lëndën narkotike.

Shërbimet policore të Seksionit për Hetimin e Narkotikëve kanë ndërhyrë dhe kanë ndaluar automjetin e dyshuar.

Gjatë kontrollit të ushtruar në brendësi të automjetit, shërbimet e Policisë kanë evidentuar një çantë, në brendësi të së cilës kishte 7 pako me lëndë të dyshuar narkotike.

Konkretisht, 4 pako me lëndë narkotike të llojit heroinë, me peshë 2 kilogramë e 123.6 gramë, si dhe 3 pako me lëndë narkotike të dyshuar kokainë, me peshë totale 3 kilogramë e 120.6 gramë.

Gjithsej, 5 kilogramë e 244.2 gramë heroinë dhe kokainë.

Menjëherë është bërë shoqërimi i këtyre shtetasve në Drejtorinë Vendore të Policisë Tiranë, për veprime të mëtejshme procedurale, ku ka rezultuar se këta shtetas do ta transportonin lëndën narkotike në drejtim të Durrësit.

Veprimet vijojnë në bashkëpunim me Prokurorinë, për evidentimin e shtetasve të tjerë të implikuar në këtë veprimtari kriminale dhe, në këtë kuadër, nuk mund të bëjmë me dije detaje të tjera rreth operacionit.

Ky operacion është në vazhdën e operacioneve të njëpasnjëshme të zhvilluara nga strukturat vendore të Policisë Tiranë për goditjen e shitjes dhe trafikimit të lëndëve narkotike, ku jo më larg se një javë më parë u kapën edhe dy shtetas me 250 gramë kokainë, si dhe gjatë dy javëve të fundit janë finalizuar disa operacione për kapjen e personave në kërkim me rrezikshmëri dhe të atyre që qarkullojnë të armatosur, ku ishin të përfshirë edhe shtetas të huaj.

Gjithashtu, nisur nga një rast shumë i mprehtë, për një përplasje me armë të ftohta të rreth 28 të miturve, nga mosha 13 deri në 17 vjeç, falë marrjes në kohë të informacionit, angazhimit maksimal të Komisariatit të Policisë Nr. 6, si dhe të Forcave Operacionale dhe “Shqiponjave” të Drejtorisë Vendore të Policisë Tiranë, u bë e mundur që, për rreth 72 orë verifikime në rrjetet sociale, me anë të strukturave të Hetimit të Krimit Kibernetik në DVP Tiranë dhe informacioneve të shërbimeve në terren, të evidentoheshin dhe të parandalohej një ngjarje me pasoja fatale për jetën e të miturve.

Falënderoj të gjitha shërbimet policore për punën profesionale të bërë për parandalimin e këtij konflikti.

Njëkohësisht, përfitoj nga rasti t’u drejtohem prindërve që të bashkëpunojnë me inspektorët e Policisë në zona, me Patrullat e Përgjithshme që janë në terren, për çdo rast të dyshimtë që konstatojnë te fëmijët, me qëllim ndërhyrjen në kohë për të parandaluar ngjarje me rrezik për jetën.

Të nderuar qytetarë,

Drejtoria Vendore e Policisë Tiranë mbetet e angazhuar maksimalisht dhe ka të gjitha kapacitetet për të garantuar rendin dhe sigurinë, si dhe për të luftuar çdo paligjshmëri, por e vetme, pa ndihmën tuaj, ky mision i shenjtë do të ishte i cunguar. Ndaj, denonconi në kohë pranë strukturave të Policisë dhe në numrin 112 çdo rast të paligjshmërisë.

Na mbështesni dhe na besoni akoma më shumë dhe, së bashku, të garantojmë një ambient akoma dhe më të sigurt”, tha Torba.

The post Me 5 kg drogë në “Benz” drejt Durrësit, policia arreston dy persona në Tiranë appeared first on Euronews Albania.

Kryeministri kanadez Mark Carney ka kritikuar ashpër tarifat e reja të SHBA-së ndaj Kanadasë, duke thënë se ato ishin “janë të dizajnuara për të na dëmtuar dhe për të na përçarë”, pasi bisedimet midis Otavës dhe Uashingtonit u ndërprenë të premten.

Duke ndarë detaje të mëtejshme se pse Kanadaja u tërhoq nga ajo që ai e quajti një “marrëveshje të keqe”, Carney tha: Ne nuk mund ta pranojmë atë që ata kanë ofruar dhe nuk do të japim atë që ata kanë kërkuar.

Tarifat e reja prej 50% që prekin mallra kanadeze me vlerë rreth 20 miliardë dollarë hynë në fuqi të shtunën pasi të dy vendet nuk arritën të arrinin një marrëveshje për një marrëveshje tregtare, me të dyja palët që akuzuan njëra-tjetrën se po përpiqeshin të zbatonin ndryshime të minutës së fundit.

Në një deklaratë të premten, Carney i quajti ndryshimet e supozuara të vonuara në kushtet e marrëveshjes të propozuara nga SHBA-të “të padrejta” dhe “joekonomike” dhe tha se ato “vunë në pikëpyetje besueshmërinë e çdo marrëveshjeje”.

Ai paralajmëroi gjithashtu se Ottawa do të barazonte tarifat amerikane “dollar për dollar për të mbrojtur punëtorët dhe bizneset tona”.

“Përgjigja jonë do të përqendrohet në sektorë të tillë si çeliku, qumështi, pajisjet shtëpiake, pajisjet bujqësore, pulpa dhe letra, dhe elektronika”, tha Carney në një fjalim të shtunën.

Zyra e Përfaqësuesit të Tregtisë së Shteteve të Bashkuara e ka përshkruar atë si një “mundësi të humbur” për Kanadanë, e cila tha se po mbante një “hakmarrje të zgjatur” kundër SHBA-së.

“Pavarësisht ofertës së SHBA-së ndaj Kanadasë për të marrë trajtimin më të mirë të çdo eksportuesi të madh në tregun tonë, kërkesat e reja dhe tërheqjet nga angazhimet e tjera nga Kanadaja kanë përmbysur ekuilibrin e kujdesshëm të arritur në ditët e fundit”, shtoi ajo në një deklaratë të postuar në mediat sociale.

Ndërprerja e bisedimeve erdhi pavarësisht optimizmit të Presidentit të SHBA-së, Donald Trump, se një marrëveshje mund të arrihej. Trump kishte shtyrë datën fillestare të planifikuar të fillimit të tarifave nga e mërkura, ndërsa një marrëveshje dukej se po afrohej.

Trump, i cili ka sugjeruar vazhdimisht që Kanadaja duhet të bëhet “shteti i 51-të i SHBA-së”, tha herët të dielën se Ottawa dëshironte “përfitimet e të qenit shtet, pa qenë i tillë”.

“Ata gjithashtu u kanë ngarkuar fermerëve tanë të shkëlqyer, për shumë vite, shuma të mëdha tarifash. Mjaft më!!!”, shtoi ai.

Trump ka ndjekur një politikë agresive tarifore që nga kthimi i tij në Shtëpinë e Bardhë në janar 2025, duke rritur taksat mbi partnerët në të gjithë botën. Administrata argumenton se tarifat do të nxisin prodhimin amerikan dhe do të inkurajojnë rritjen e vendeve të punës në vend, ndërsa adresojnë ato që i sheh si norma të padrejta tregtare.

Megjithatë, kritikët thonë se rritja e detyrimeve po e bën jetën më të kushtueshme për konsumatorët dhe bizneset amerikane, ndërsa nxit pasiguri të përhapur midis kompanive që planifikojnë investime dhe zinxhirë furnizimi.

Pas dështimit të bisedimeve, Trump: Kanadaja kërkon “përfitimet” e të qenit pjesë e SHBA-së

The post Carney për tarifat e Trump: Janë të dizajnuara për të na dëmtuar dhe për të na përçarë appeared first on Euronews Albania.

Policët që po hetojnë rastin në Nea Smirni në Greqi, ku një 48-vjeçar me origjinë shqiptare vrau një 45-vjeçare, gjithashtu me origjinë shqiptare, dhe më pas vrau veten, po mbledhin të dhëna të reja. Ata përpiqen të rindërtojnë orët e fundit para krimit dhe të përcaktojnë marrëdhënien që ekzistonte mes dy personave.

Sipas informacioneve, 48-vjeçari ishte i martuar dhe kishte një fëmijë. Bashkëshortja e tij raportohet se u ka deklaruar autoriteteve se nuk dinte asgjë për marrëdhënien e tij me 45-vjeçaren.

Policia po shqyrton të dhënat që tregojnë se burri dhe gruaja kishin një marrëdhënie personale, por deri tani nuk është sqaruar plotësisht se çfarë lloj marrëdhënieje ishte, sa kishte zgjatur dhe sa e tensionuar ishte. Ky aspekt konsiderohet shumë i rëndësishëm për hetimin, pasi autoritetet po përpiqen të zbulojnë motivin që e çoi 48-vjeçarin drejt vrasjes.

Në kuadër të hetimit, policia po kryen një kontroll në banesën e 48-vjeçarit në Tavros, me qëllim gjetjen e provave që mund të ndihmojnë në sqarimin e marrëdhënies së tij me 45-vjeçaren, si dhe nëse krimi ishte përgatitur më parë.

Policët po kërkojnë, ndër të tjera, pajisje elektronike, dokumente dhe çdo provë tjetër që mund të ndihmojë në rindërtimin e lëvizjeve të tij të fundit dhe komunikimeve që ka pasur para se të shkonte në Nea Smirni.

Gjithashtu po kontrollohen telefonat celularë dhe aktivitetet online të të dy personave, për të zbuluar nëse para ngjarjes kishte pasur ndonjë konflikt, takim apo komunikim që mund të lidhet me atë që ndodhi më pas.

Ndërkohë, në gjendje shoku ndodhet nëna e 45-vjeçares, e cila u vra në orët e para të së dielës në Nea Smirni nga një 48-vjeçar. Burri i kishte zënë pritë jashtë pallatit ku ajo jetonte së bashku me vajzën e saj 16-vjeçare.

Nëna e moshuar e mësoi për vrasjen e së bijës pak kohë më parë, kur vajza tjetër e telefonoi dhe e njoftoi për vdekjen.

Duke iu përgjigjur pyetjeve të gazetarëve, nëna e 45-vjeçares përsëriste vazhdimisht: Nuk di asgjë, ndërsa sytë i mbusheshin me lot. Ajo tha gjithashtu se vajza e saj nuk i kishte treguar për ndonjë lidhje dashurie që mund të kishte pasur.

“Nuk di asgjë. Nuk më kishte thënë asgjë. Tani e mora vesh për vajzën time. Më telefonoi vajza tjetër pak më parë dhe ma tha. Nuk më kishte folur për lidhjen e saj. Me ish-bashkëshortin e saj ishin ndarë shumë kohë më parë”, tha gruaja me lot në sy dhe me zë të dridhur.

Sipas të dhënave të deritanishme, 48-vjeçari duket se kishte shkuar në rrugën Grigoriou Kydonion, nr. 3, dhe kishte pritur brenda makinës së tij që 45-vjeçarja të dilte nga pallati.

Në atë ndërtesë jetonte gruaja së bashku me vajzën e saj. Sipas asaj që kanë konstatuar autoritetet, burri e dinte se 45-vjeçarja ndodhej aty dhe i kishte zënë pritë.

Sapo e pa të dilte nga pallati, ai zbriti nga automjeti, iu afrua dhe e qëlloi me armë zjarri, një revolver.

Gruaja u qëllua në trup dhe, sipas informacioneve fillestare, ndoshta në fytyrë, duke rezultuar në rënien e saj të vdekur në hyrje të ndërtesës.

Menjëherë pas kësaj, 48-vjeçari e ktheu armën nga vetja dhe qëlloi veten në kokë, duke i dhënë fund jetës së tij. Pistoleta u gjet pranë trupit të tij dhe është në hetimin e policisë.

Një tjetër element që është vënë nën lupën e autoriteteve është prania e 48-vjeçarit në rrjetet sociale. Në fotografi që kishte publikuar vetë, ai shfaqej duke pozuar me armë në duar. Tani policia po heton nëse ndonjëra prej këtyre armëve lidhet me revolverin e përdorur në vrasje dhe në vetëvrasje.

Postimet përkatëse po shqyrtohen së bashku me provat e tjera. Deri tani, megjithatë, nuk është përcaktuar nëse arma e krimit shfaqej në ndonjërën prej fotografive.

Banorët e zonës kanë treguar se kanë dëgjuar të shtënat rreth orës 05:30 të mëngjesit.

“Fqinja tha se gjatë orëve të para të mëngjesit dëgjoi të shtënat. Unë e kam shtëpinë e prindërve këtu dhe dëgjova tre të shtëna rreth orës 5:30 të mëngjesit”, tha një grua që ndodhej në zonë, duke shtuar se nuk dëgjoi ndonjë automjet dhe as nuk vuri re ndonjë gjë tjetër.

Një tjetër banore përshkroi se kishte dëgjuar tre zhurma shumë të forta, me disa sekonda diferencë nga njëra-tjetra.

“Po flija, por nuk isha në gjumë të thellë në shtëpi. Papritur dëgjuam tre zhurma shumë të forta. Nuk e dinim nëse ishin të shtëna armësh apo jo, por ishin jashtëzakonisht të forta. Unë numërova tre. Nuk ishin njëra pas tjetrës pa ndërprerje; kishte një interval prej tre, katër apo pesë sekondash mes tyre”, tha ajo.

Ajo tregoi gjithashtu se pak më vonë u dëgjua sirena e një makine patrulle, ndërsa fillimisht nuk e kishte kuptuar se çfarë kishte ndodhur.

“Nuk e besova, as që më shkoi në mendje se mund të ishin të shtëna, por ishin”, përfundoi ajo.

Hetimin e ka marrë përsipër shërbimi përkatës i Drejtorisë për Luftimin e Krimit të Organizuar. Tashmë policët po përpiqen të zbardhin plotësisht marrëdhënien mes 48-vjeçarit dhe 45-vjeçares, të përcaktojnë se çfarë kishte ndodhur gjatë ditëve dhe orëve të fundit para ngjarjes dhe të zbulojnë motivin që çoi në vrasje.

E priti jashtë pallatit dhe e qëlloi për vdekje 45-vjeçaren, shqiptari në Greqi i jep fund dhe jetës së vet

The post Vrau veten dhe 45-vjeçaren shqiptare në Greqi, 48-vjeçari ishte i martuar dhe kishte fëmijë! Flet gruaja e tij appeared first on Euronews Albania.

Një zjarr ka rënë në një nga lokalet në zonën e Triportit, në Vlorë, duke rrezikuar përhapjen edhe në drejtim të Pyllit të Sodës.

Menjëherë pas marrjes së njoftimit, në vendngjarje kanë mbërritur mjetet zjarrfikëse, të cilat kanë nisur ndërhyrjen për të vënë flakët nën kontroll dhe për të parandaluar përhapjen e zjarrit në zonën pyjore.

Forcat zjarrfikëse vijojnë punën në terren për neutralizimin e vatrës dhe shmangien e çdo rreziku të mëtejshëm.

The post Përfshihet nga flakët një lokal në Triport, rrezikohet Pylli i Sodës në Vlorë (VIDEO) appeared first on Euronews Albania.