Nga Gazeta ‘Si’– Ndërsa përfundonte ceremonia e varrimit të Udhëheqësit Suprem Ajatollah Ali Khamenei, i vrarë në valën e parë të sulmeve ajrore amerikano-izraelite në shkurt, nga jugu i Iranit u ngritën tinguj të fortë bombardimesh.

Por, përmes ritualeve të varrimit dhe sulmeve të reja ajrore, një institucion shtetëror nuk ndaloi kurrë ritmin: shtyllat e ekzekutimit. Demonstruesit e arrestuar së fundmi në rrugë dhe të burgosurit politikë të mbajtur për vite me radhë po ekzekutohen me ritëm të shpejtë.

Strategjia e Shteteve të Bashkuara dhe Izraelit në Iran duket se ka supozuar se një luftë konsumimi, së bashku me kërcënimet dramatike të presidentit amerikan Donald Trump, do të ndryshonte mënyrën se si Republika Islamike trajton popullin e saj ose botën, ose do të nxiste një masë kritike iranianësh në rrugë për të rrëzuar regjimin. Mujt që nga shkurti kanë zbuluar mangësitë në këtë vlerësim.

Udhëheqësi i parë suprem i Republikës Islamike, Ajatollah Ruhollah Khomeini, ndërtoi tërë sistemin mbi një doktrinë të thjeshtë, brutale dhe të pathyeshme: Çdo veprim kundër regjimit ose aparatit shtetëror duhet të ndëshkohet me dënimin më të ashpër të mundshëm—pa asnjë mëshirë.

Zyrtarët lejohen të bëjnë gjithçka që duhet për të ruajtur sistemin, edhe nëse kjo do të thotë të shkelin parimet themelore fetare të regjimit.

Khomeini predikoi për vite me radhë mbikëqyrjen klerikale mbi shtetin para Revolucionit Iranian të vitit 1979. Por ishte pasi u bë Udhëheqësi i Lartë që u zbulua vërtetë shtrirja e plotë e kësaj doktrine. Në janar 1988, në një letër drejtuar atëherë presidentit Khamenei, ai shpalli se interesat e shtetit islamik kishin përparësi mbi të gjitha parimet “sekondare” të Islamit, përfshirë lutjen, agjërimin dhe haxhin në Mekë. Kjo version i zgjeruar i teorisë u bë i njohur si “kujdestaria absolute e juristit”.

Me fjalë të tjera, e ngulitur në themelet e Republikës Islamike është një doktrinë që lejon shtypjen totale të popullsisë dhe mobilizimin e plotë të burimeve shtetërore në emër të ruajtjes së sistemit. Pavarësisht se cili ajatollah mban pushtetin ose kush përbën rrethin e tij të brendshëm, doktrina mbetet e njëjtë.

Prandaj gjenerata e tretë e udhëheqjes, e sapo fuqizuar, nuk do të sillet ndryshe nga paraardhësit e saj. Kjo përfshin përdorimin e Gjykatave Revolucionare—të cilat në origjinë ishin të destinuara të merrnin në trajtim vetëm çështje të caktuara, si akuzat për spiunazh—si një tribunal që jep dënime me vdekje për këdo që shpreh edhe kundërshtimin më të vogël ndaj status quosë.

Ndërsa të pandehurit përballen me akuza të rënda, ata gjykohen pa asnjë avokat mbrojtës të pavarur.

Irani po rrisë ekzekutimet shumë para se të fillonte lufta. Amnesty International regjistroi të paktën 2,159 ekzekutime në vitin 2025, më shumë se dyfish i numrit të vitit të mëparshëm.

Lufta nuk i ndaloi autoritetet iraniane nga kjo fushatë. Pa u ndalur as nga bombardimet e as nga Viti i Ri Persik, aparati i shtypjes iraniane ka kryer të paktën 40 ekzekutime për akuza me motive politike që nga shkurt 2026.

Për më tepër, pas armëpushimit të 27 marsit, Organizata për të Drejtat e Njeriut në Iran dokumentoi një rritje të theksuar të ekzekutimeve nga muaji i mëparshëm, me të paktën 101 ekzekutime që u kryen në qershor. Pavarësisht luftës, Irani ka kryer të paktën 413 ekzekutime këtë vit—dhe nuk ka plane për të ndryshuar kursin.

Aktualisht, dihet se më shumë se 70 protestues janë në qeli vdekjeje në një burg të vetëm në Isfahan, ndërsa të paktën 26 prej tyre janë transferuar tashmë në izolim para ekzekutimit të afërt. Siç vuri në dukje drejtori i Iran Human Rights, “numri i vërtetë i dënimeve me vdekje të dhëna në mbarë vendin është shumë më i lartë se sa ishte vlerësuar më parë.”

Kjo na çon te supozimi amerikan-izraelit se populli i Iranit do të ngrihet kundër regjimit. Ndërsa shtypja ekstreme e pengon mosmarrëveshjen, ajo gjithashtu mund të nxisë rezistencën, veçanërisht kur kombinohet me vështirësi të zgjatura ekonomike dhe presion të fortë social.

Në Iran, edhe ata që kanë dëshiruar një ndryshim me kuptim brenda regjimit, në vend të zëvendësimit të tij, janë zhgënjyer vazhdimisht.

Frustrimi popullor dukej se po arrinte kulmin para se të fillonin sulmet amerikano-izraelite, kur dhjetëra mijëra iranianë dolën në rrugë. Besnik doktrinës së Khomeinit, ata u përballën me një masakër.

Qeveria e Iranit ka pranuar 3,117 vdekje protestuesish. HRANA, një shoqatë shtypi e themeluar nga avokatët iranianë të të drejtave të njeriut, e çon numrin e vdekjeve të konfirmuara mbi 6 mijë , megjithatë disa vlerësojnë se është shumë më i lartë: 17 mijë ose madje36,500.

Pak pasi iranianët përjetuan këtë shtypje brutale, bombat amerikane dhe izraelite filluan të bien. Trump duket se shpresonte se kjo do ta transformonte protestën në revolucion, por pas gjithë atij derdhje gjaku, shoqëria iraniane qëndroi në shtëpi.

Fantazma e fragmentimit territorial të Iranit, e përforcuar nga propaganda, shkaktoi një alarm të tillë sa që entuziazmi për ndryshimin e regjimit u zëvendësua, praktikisht brenda natës, nga përçarje të thella shoqërore dhe mosmarrëveshje midis iranianëve, brenda dhe jashtë vendit. Ndjenja e pasigurisë dhe e huajësisë që rezultoi bëri që shumë njerëz të lidhen më shumë me sistemin që më parë kishin dashur ta largonin.

Kjo frikë nga fragmentimi duhet të kuptohet jo si një dobësi psikologjike, por si një reagim racional ndaj zgjedhjes midis të keqes dhe më të keqes. Kjo dilemë mbështet efikasitetin e doktrinës themelore të Republikës Islamike. Kostot e status quosë janë të larta, por iranianët kanë përfunduar se kostot e kolapsit dhe fragmentimit do të ishin edhe më të larta.

Duhet të jetë e qartë tashmë se një luftë konsumimi nuk është thjesht e pamjaftueshme për të rrëzuar Republikën Islamike; ajo në fakt po forcon perspektivat e regjimit për mbijetesë.

Larg se t’i detyrojë udhëheqësit e Iranit të çmontojnë mekanizmat më mizorë të shtypjes, çdo raund i ri sulmesh u sjell atyre ushqim të freskët: arrestime të reja, dënime të reja dhe ekzekutime të reja.

The post Pse Irani nuk do të ndryshojë appeared first on Gazeta Si.

Zgjedhjet e parakohshme parlamentare në Serbi do të mbahen në muajin tetor ose në fillim të nëntorit, dhe ato do të jenë të ndara nga zgjedhjet presidenciale.

Në një konferencë për shtyp me kryeministrin e Republikës Çeke, Andrej Babiš, Presidenti i Serbisë, Aleksandër Vuçiç tha se do ta mbaje fjalën e dhënë qytetarëve.

“Vitin e kaluar ju thashë se zgjedhjet e parakohshme parlamentare do të mbaheshin deri në fund të vitit 2026 dhe po e mbaj fjalën time ndaj popullit serb për t’u dhënë qytetarëve mundësinë për të shprehur vullnetin e tyre të lirë. Pra, para fundit të vitit, me siguri do të kemi zgjedhje parlamentare dhe pak më vonë do të zhvillohen edhe zgjedhjet presidenciale”, ka thënë Vuçiç.

Në fund të muajit qershor, Vuçiç u tha përkrahësve të partisë së tij se do të jepte dorëheqjen nga posti i kreut të shtetit për të kandiduar si kryeministër në zgjedhjet e parakohshme parlamentare.

Synimi i Vuçiç është që të sigurojë një mandat të ri qeverisës për partinë e tij, ndërsa vendi është në protesta prej më shumë se një viti.

Ato nisën në vitin 2024, pas shembjes së strehës së stacionit hekurudhor të Novi Sadit, ku humbën jetën 16 persona. Tragjedia nxiti një pakënaqësi të madhe popullore, me akuza për korrupsion, mungesë transparence dhe dobësim të shtetit të së drejtës.

Ndërsa këtë të premte, kryeparlamentarja Ana Bërnabiç tha se të hënën  e 27 korrikut do të përcaktohet seanca e jashtëzakonshme për votëbesimin e qeverisë. Ndryshe parlamenti shpërndahet dhe vendi shkon drejt kutive të votimit.

The post Serbia, në zgjedhje të parakohshme/ Vuçiç shpall datën e votimit appeared first on Gazeta Si.

Kryeministri në detyrë, Albin Kurti, pas dekretimit të dorëheqjeve të prokurorëve serbë, ka kërkuar që edhe çështja e dorëheqjes së gjyqtarëve serbë të marrë një epilog të ngjashëm me atë të prokurorëve serbë.

“Sot, teksa pritëm që Këshilli Gjyqësor i Kosovës të vepronte njësoj, kuptuam se mbledhja dështoi në mungesë të kuorumit. Presim që në mbledhjen e radhës të marrë një epilog të tillë edhe kjo çështje”, deklaroi Kurti.

Ai shtoi se braktisja e organizuar dhe politikisht e motivuar nga pjesëtarë të komunitetit serb në fund të vitit 2022 ishte pikënisje e një serie veprimesh sabotuese ndaj shtetit.

“Qysh atëherë e kemi thënë dhe u kemi bërë thirrje të gjithë serbëve në institucione: ‘Mos i braktisni ato’, ‘mos jepni dorëheqje’, ‘mos shkoni’. Por nuk ju kemi thënë dhe as nuk kemi të drejtë t’ju themi: ‘Kthehuni’. Kishim të drejtë politike t’ju themi ‘mos shkoni’, por nuk kemi të drejtë kushtetuese dhe ligjore t’ju themi këtë. Largimi i tyre ka qenë akt politik, individual, ndonëse i organizuar”.

Dorëheqjet e gjyqtarëve dhe prokurorëve serbë nga institucionet e drejtësisë në veri të Kosovës ndodhën në nëntor të vitit 2022, në kuadër të largimit kolektiv të përfaqësuesve serbë nga institucionet e Kosovës.

Ky vendim erdhi pas mosmarrëveshjeve rreth zbatimit të vendimit për targat e automjeteve dhe u cilësua nga institucionet e Kosovës si një veprim i organizuar dhe i motivuar politikisht.

Pas një periudhe jashtë sistemit të drejtësisë, disa gjyqtarë serbë kërkuan tërheqjen e dorëheqjeve dhe rikthimin në pozitat e tyre të mëparshme. Kjo çështje iu dërgua për shqyrtim Këshillit Gjyqësor të Kosovës, i cili duhet të vendosë për kërkesat e tyre.

Ndërkohë, dorëheqjet e prokurorëve serbë tashmë kanë kaluar në një fazë tjetër, pasi Këshilli Prokurorial i Kosovës i kishte trajtuar kërkesat e tyre për rikthim, ndërsa më pas dekretimi i dorëheqjeve u bë nga ushtruesja e detyrës së presidentes, Albulena Haxhiu.

Zyra e Bashkimit Evropian në Prishtinë të enjten ka kërkuar nga të gjithë faktorët politikë në vend që të shmangin çdo lloj ndërhyrjeje në KGJK gjatë procesit të trajtimit të kërkesës së gjyqtarëve të dorëhequr serbë për t’u rikthyer në funksionet e tyre të mëparshme në institucionet e drejtësisë në veri të vendit.

The post Kurti kërkon që rasti i gjyqtarëve serbë të përfundojë si ai i prokurorëve appeared first on Gazeta Si.

Drejtori i Policisë së Fierit, Erion Ahmeti, ka konfirmuar se 35-vjeçari Refit Buzi ka kryer vetëvrasje brenda makinës ku qëndronte prej disa orësh i ngujuar.

Ai ekzekutoi me armë ish-vjehrrin, Kosta Plaka, plagosi ish-vjehrrën B.P dhe në fund mori për disa orë peng ish-partneren.

Kjo e fundit fatmirësisht u lëshua prej tij dhe aktualisht ndodhet në spitalin e Fierit, nën kujdesin e mjekëve. Autori i dyshuar i krimit, pas disa orësh përpjekjeje nuk pranoi dorëzimin te Policia dhe RENEA, dhe ndërmoi aktit të rëndë.

Ish-çifti kishin jetuar sëbashku për një periudhë në Tiranë, atje ku e reja studionte për infermieri.

Ndërkohë, prindërit e autorit 35-vjeçar kanë hedhur akuza ndaj familjes së ish-bashkëjetueses së tij, duke pretenduar se konflikti mes palëve nisi për shkak të një shume parash.

Sipas tyre, 35-vjeçari kishte dërguar para nga Anglia gjatë kohës që ata jetonin bashkë dhe pas ndarjes kishte kërkuar kthimin e tyre, por kërkesa e tij nuk ishte pranuar.

Siç ata thonë, mosmarrëveshje financiare ka qenë në qendër të përplasjes mes dy familjeve.

The post Negociatat nuk dhanë rezultat, kryen vetëvrasje 35-vjeçari Refit Buzi appeared first on Gazeta Si.

Nga Gazeta ‘Si’- Kryeministri Edi Rama ka prezantuar dokumentin strategjik të quajtur “Besa”, të cilin e cilësoi si një udhërrëfyes për ndryshimin e qasjes së qeverisë në mandatin e katërt.

Gjatë mbledhjes së Grupit Parlamentar të Partisë Socialiste, Rama tha se zgjodhi këtë emër pasi, sipas tij, asnjë fjalë tjetër nuk e përshkruan më mirë nevojën që qytetarët të mos ndihen më të padëgjuar, të painformuar apo të përjashtuar nga vendimmarrja.

“E kam titulluar me një emër të vjetër dhe shumë të madh: Besa. Nuk gjeta asnjë fjalë që ta thotë më qartë që vendimet të mos përjetohen më si prerje në besë, të mos ndihen si të padëgjuar, të painformuar, të papërfillur”, tha Rama.

Sipas kryeministrit, dokumenti synon të shërbejë si bazë për një ndryshim në marrëdhënien mes qeverisë dhe qytetarëve, duke vendosur në qendër besimin dhe komunikimin.

Rama tha se beteja e re politike nuk është mes qeverisë dhe qytetarëve, por mes atyre që kërkojnë një Shqipëri më të drejtë dhe të besueshme dhe atyre që, sipas tij, duan një vend të përçarë dhe pa besim te institucionet.

“Vija e re ndarëse e kësaj epoke nuk kalon mes atyre që dolën apo nuk dolën në protestë, por mes atyre që e duan Shqipërinë më të mirë edhe për ta, edhe me ta”, u shpreh kryeministri.

Ai e lidhi këtë qasje edhe me protestat e fundit, të cilat i ka quajtur “Bulevardi i Flamingove”, duke thënë se ato duhet të shërbejnë si një test për demokracinë dhe si një mundësi për të kthyer kritikën në ndryshim.

Rama solli si shembull rastin e një fermeri nga Lushnja, i cili, sipas tij, ishte përballur me arrogancë nga administrata, duke theksuar se raste të tilla janë “prova dhe sprova” për qeverisjen.

“Arbri nga Lushnja nuk është problemi ynë. Arbri nga Lushnja është prova dhe sprova e asaj që kemi me vete si bartës të besimit që kemi marrë me 83 mandate”, tha Rama.

Çfarë u tha tjetër?

Kryeministri Edi Rama ka zhvilluar një mbledhje me Grupin Parlamentar të Partisë Socialiste dhe qeverinë në Pallatin e Brigadave, ku ka prezantuar dy dokumente që, sipas tij, lidhen me drejtimin e mandatit të katërt qeverisës.

Rama deklaroi se dokumentet janë rezultat i një reflektimi të tij dhe se do të jenë të hapura për diskutim, ndryshime dhe përmirësime.

“Kam sjellë sot me vete dhe dy dokumente. Janë dy dokumente që mishërojnë reflektimin tim përpara pasqyrës së bulevardit të flamingove dhe janë të hapura për t’u lexuar, ndryshuar që ta përmbushin sa më mirë qëllimin e tyre”, tha Rama.

Sipas kryeministrit, dokumenti i parë është një strategji për ndryshimet që duhet të sjellë mandati i katërt në qeverisje, ndërsa dokumenti i dytë lidhet me mënyrën sesi Partia Socialiste duhet të mbështesë këtë proces.

“I pari është dokument strategjik për kthesën që duhet të garantojë mandati i katërt në qeverisje. I dyti është një aneks sesi PS duhet ta mbështesë kthesën e mandatit të katërt”, u shpreh Rama.

Kreu i socialistëve deklaroi se protesta e zhvilluar në qershor para Kryeministrisë përfaqëson një pikë kthese për mënyrën e qeverisjes, duke theksuar se qytetarët nuk gjykojnë më vetëm mbi investimet, por mbi pritshmëritë dhe përvojën e tyre të përditshme.

Në fjalën e mbajtur gjatë mbledhjes së grupit parlamentar të Partisë Socialiste dhe qeverisë, Rama tha se “Bulevardi i flamingove” nuk duhet parë thjesht si një protestë, por si një pasqyrë që shoqëria i ka vendosur përballë qeverisë.

“Mësimi i parë është që faktet tona nuk mjaftojnë më. Njerëzit nuk jetojnë më me kënaqësinë e asaj që është ndërtuar, por me pritshmëri që rriten më shpejt sesa mundësia jonë për t’iu përgjigjur. Nuk mjafton më ta qeverisim të tashmen me investime, por në harmoni me përvojën e përditshme të qytetarit”, u shpreh Rama.

Sipas tij, Shqipëria ka hyrë në një fazë të re zhvillimi, ku qytetarët nuk krahasojnë më realitetin me të kaluarën, por kërkojnë standarde gjithnjë e më të larta.

“Unë pashë mbylljen e një epoke dhe fillimin e një tjetre. Epoka e mbyllur është ajo e mungesave. Epoka e hapur është epoka e pritshmërive, ku rruga e re është standard, jo fitore. Çdo shërbim merret i mirëqenë dhe asnjë mungesë nuk tolerohet. Deviza e kësaj epoke është: ‘Ka edhe më mirë’”, tha kryeministri.

Rama u ndal edhe te perceptimi i protestuesve, duke theksuar se ata nuk duhen konsideruar “mosmirënjohës”, por si qytetarë që matin qeverinë me standarde të reja.

“Ju nuk jeni mosmirënjohës, por matësit e rinj të standardeve tona. Shqipëria e re që kemi ndërtuar nuk jeton më me hijen e së kaluarës. Kjo është perspektiva e re që duhet të kuptojmë të parët ne që qeverisim”, deklaroi ai.

Sipas kryeministrit, mesazhi i protestave është se qeverisja duhet të përshtatet me pritshmëritë në rritje të qytetarëve dhe jo vetëm me arritjet infrastrukturore apo treguesit ekonomikë.

Rama deklaroi po ashtu se ligji për zonat e mbrojtura do të rishikohet dhe do të harmonizohet plotësisht me direktivat e Bashkimit Evropian, duke theksuar se asnjë ndryshim nuk do të miratohet pa dakordësimin e Komisionit Evropian.

Gjatë fjalës së mbajtur në mbledhjen e Grupit Parlamentar të Partisë Socialiste dhe qeverisë, Rama u ndal te debatet që kanë shoqëruar këtë ligj, duke thënë se ai është përdorur si argument në protestat e fundit dhe në diskutimet në nivel evropian.

“Ligji për zonat e mbrojtura, që përdoret si benzinë për zjarrin e protestës, përfshirë edhe nga eurodeputetë, do të skanohet nen për nen për ta përputhur 100% me direktivat e Bashkimit Evropian. Nuk kalon asgjë pa miratimin e Komisionit”, u shpreh Rama.

The post Rama jep ‘Besën’ e mandatit të katërt appeared first on Gazeta Si.

Nga Gazeta ‘Si’- Rastet e diabetit të tipit 2 po rriten ndjeshëm tek të rinjtë, sidomos në Mbretërinë e Bashkuar, një prirje që ekspertët e Imperial College London e lidhin kryesisht me rritjen e obezitetit pas pandemisë së Covid-19.

Analiza e të dhënave të NHS për periudhën 2011–2024 tregon se, megjithëse shumica e rasteve të reja vazhdojnë të diagnostikohen tek të moshuarit, sëmundja po shtohet me ritme të shpejta tek personat nën moshën 40 vjeç, veçanërisht tek gratë e grupmoshës 20–29 vjeç.

Diabeti i tipit 2 është një sëmundje serioze që mund të çojë në komplikacione të rënda, si infarkti dhe goditja në tru.

Kur shfaqet në moshë të re, ai priret të jetë më agresiv, duke rritur rrezikun për dëmtime afatgjata të organeve dhe ulje të jetëgjatësisë.

Sipas vlerësimeve të NHS England, rreth 12 mijë persona nën moshën 30 vjeç jetojnë aktualisht me diabet të tipit 2. Në total, rreth 90% e 6 milionë personave me diabet në Britani vuajnë nga kjo formë e sëmundjes.

Studiuesit vunë re gjithashtu se indeksi i masës trupore (BMI) në momentin e diagnostikimit është rritur më shpejt tek të rinjtë sesa tek grupmoshat më të mëdha, duke forcuar lidhjen mes obezitetit dhe diabetit.

Të dhënat tregojnë se, mes viteve 2019 dhe 2025, rastet e reja të obezitetit u rritën me 16% tek personat 20–29 vjeç dhe me gati 20% tek grupmosha 30–39 vjeç, ndërsa ranë tek të rriturit 60–79 vjeç.

“Besojmë se obeziteti i rëndë që shfaqet më herët tek të rinjtë po rrit rrezikun për diabet të tipit 2 dhe po ul moshën e diagnostikimit. Kjo është shumë shqetësuese për shkak të pasojave të rënda shëndetësore që sjell diabeti me fillim të hershëm,” tha drejtuesja e studimit, Dr. Shivani Misra.

Ajo theksoi se rritja e rasteve nuk kufizohet më vetëm tek grupet etnike që tradicionalisht konsideroheshin me rrezik më të lartë, por po vihet re gjithnjë e më shumë edhe në popullsinë e bardhë.

Simptomat më të zakonshme të diabetit të tipit 2 janë lodhja e vazhdueshme, urinimi më i shpeshtë se zakonisht dhe etja e vazhdueshme.

Ekspertët theksojnë se diagnostikimi i hershëm është thelbësor për të parandaluar dëmtimet afatgjata. Në disa raste, diabeti i tipit 2 mund të vihet në remision përmes një diete të shëndetshme, humbjes së peshës dhe aktivitetit fizik, ndërsa trajtime të reja kundër obezitetit, si medikamentet me bazë GLP-1, mund të ndihmojnë në uljen e rrezikut.

The post Gjithnjë e më shumë gra në të 20-at po diagnostikohen me diabet të tipit 2 appeared first on Gazeta Si.

Nga Gazeta ‘Si’- Reklamat online të bazuara në profilizimin e përdoruesve mund të ndalohen në Shqipëri. Kjo është një nga risitë e projektligjit “Për shërbimet digjitale”, i cili është aktualisht në konsultim publik.

Sipas draftit, platformat online nuk do të lejohen t’u shfaqin përdoruesve reklama të personalizuara në bazë të aktivitetit, interesave apo sjelljes së tyre në internet. Çdo reklamë duhet të identifikohet qartë si e tillë dhe të tregojë se kush e ka porositur dhe financuar atë.

Përdoruesit do të kenë gjithashtu të drejtën të shohin pse u është shfaqur një reklamë e caktuar, cilët faktorë janë përdorur për ta përzgjedhur dhe, kur është e mundur, të ndryshojnë këto parametra.

Për platformat dhe motorët shumë të mëdhenj të kërkimit, projektligji kërkon krijimin e një regjistri publik të reklamave, ku do të publikohen të dhëna si reklama, financuesi, periudha e publikimit, kriteret e targetimit dhe numri i përdoruesve që e kanë parë, pa përfshirë të dhëna personale.

Një tjetër risi është krijimi i organeve të pavarura për zgjidhjen jashtëgjyqësore të mosmarrëveshjeve mes përdoruesve dhe platformave online. Këto organe do të shqyrtojnë ankesat për heqjen e përmbajtjes, mbylljen e llogarive apo vendime të tjera të platformave, ndërsa do të certifikohen nga AKEP.

Projektligji parashikon edhe masa të forta ndëshkuese për shkelësit. Për mosrespektimin e detyrimeve, gjobat mund të arrijnë deri në 6% të xhiros vjetore globale të ofruesit të shërbimit, ndërsa për mosdhënie informacioni ose pengim të kontrolleve mund të vendosen gjoba deri në 1% të xhiros. Për çdo ditë vonesë në zbatimin e detyrimeve, mund të aplikohen edhe penalitete ditore deri në 5% të të ardhurave mesatare ditore të kompanisë.

The post Projektligji i ri/ Ndalohen reklamat e personalizuara online appeared first on Gazeta Si.

Një skulpturë gjigante hot dog-u është rikthyer në Times Square në Nju Jork, ndërsa artistët zbuluan ‘Hot Dog: pjata e dytë’, një instalacion 20 metrash.

Krijuar nga artistët e Bruklinit, Jen Catron dhe Paul Outlaë, skulptura është një version i ri i instalacionit të tyre të mëparshëm ‘Hot Dog in the City’.

Artistët thonë se Times Square ishte vendi ideal për shkak të aktivitetit të vazhdueshëm dhe përzierjes së njerëzve, të cilën e shohin si një pasqyrim të shoqërisë amerikane.

The post Skulptura gjigante hot dog rikthehet në New York Times Square appeared first on Gazeta Si.

Në Firence është nënshkruar një marrëveshje për lançimin e projektit “Discover – Out of the shell”, qendra e parë e specializuar në Itali kushtuar varësisë nga mediat sociale dhe përdorimit të vetëdijshëm të teknologjisë digjitale.

Iniciativa, e promovuar nga ASL Toscana centro, Qyteti i Firences dhe kooperativa Retesviluppo, është përpjekja e parë e Italisë për të trajtuar fenomenin e varësisë nga bota digjitale, e cila prek kryesisht të rinjtë dhe ka pasoja sociale dhe kulturore.

“Teknologjitë digjitale janë pjesë e jetës së përditshme të të rinjve dhe përfaqësojnë një mundësi të jashtëzakonshme. Pikërisht për këtë arsye kemi detyrën t’i mbështesim ata në përdorimin gjithnjë e më të vetëdijshëm të këtyre mjeteve, duke i ndihmuar ata të gjejnë një ekuilibër midis kohës së kaluar në internet dhe kohës së kushtuar marrëdhënieve, sportit, kulturës dhe përvojave të përbashkëta”, shpjegon Këshilltarja për Politikat Rinore Letizia Perini, një nga promotorët kryesorë të qendrës.

Rregullat dhe kufizimet në Evropë

Debati mbi këtë çështje është i gjerë në të gjithë botën dhe ditët e fundit, në Evropë janë miratuar zgjidhje të ndryshme. Vendi i parë që miratoi legjislacion të rreptë kundër platformave ishte Australia, e cila kërkon që ofruesit të verifikojnë moshën e përdoruesve. Masa vlen jo vetëm për rrjetet sociale si Instagram, TikTok ose Facebook, por edhe për disa lloje shërbimesh online.

Duke ndjekur shembullin e Australisë, Franca të martën u bë vendi i parë evropian që futi një ndalim të mediave sociale për personat nën 15 vjeç, i cili do të hyjë në fuqi që në shtator.

Iniciativa të ngjashme po përhapen në të gjithë Evropën, pasi Presidentja e Komisionit Evropian, Ursula von der Leyen, mbështeti futjen e masave për të mbrojtur të miturit në internet, duke u mbështetur në të dhëna që nxjerrin në pah rreziqet për të rinjtë.

Më 15 korrik, Mbretëria e Bashkuar njoftoi planet për të futur një shtetrrethim të mediave sociale gjatë natës për 16 dhe 17-vjeçarët, megjithëse masa është kritikuar si joefektive.

Vende të tjera evropiane, përfshirë Greqinë, Slloveninë, Suedinë dhe Spanjën, po planifikojnë kufizime në përdorimin e mediave sociale nga personat nën 16 dhe 14 vjeç.

Italia përqendrohet në parandalim

Italia ende nuk ka futur zgjidhje të ngjashme me ato të miratuara në vendet e tjera të BE-së. Projekti Discover, i cili do të jetë funksional pas verës, synon të veprojë në drejtim të parandalimit të abuzimit dhe keqpërdorimit të ekraneve dhe platformave, duke promovuar njëkohësisht përdorimin e vetëdijshëm.

“Ne nuk do të vendosim thjesht ndalime, por një qasje inovative të bazuar në dy shtylla: shkëputje të udhëhequr dhe promovim të përdorimit të vetëdijshëm të teknologjisë, për t’i kthyer të rinjtë nga konsumatorë pasivë në protagonistë aktivë të kohës së tyre. Qendra Discover synon të jetë një qendër e hapur për komunitetin lokal, për të analizuar fenomenin, për të nisur ndërhyrje dhe punë praktike dhe për të trajnuar komunitetin arsimor, duke rindërtuar strukturën shoqërore që izolimi digjital rrezikon ta shkatërrojë”, thotë Presidentja e ReteSviluppo, Ester Macrì.

Qendra do të mirëpresë të rinj të moshës 10 deri në 25 vjeç dhe do të drejtohet nga Retesviluppo, e cila ka një dekadë përvojë në shkolla, me një ekip punonjësish, bashkëpunëtorësh dhe vullnetarësh. Shërbimet e ofruara do të përfshijnë programe udhëzimi, një tavolinë dëgjimi dhe aktivitete, duke u përqendruar si në edukimin mediatik ashtu edhe në përmirësimin e ndërveprimit shoqëror përmes lojërave në tavolinë, aktiviteteve manuale dhe punës në grup.

The post Italia hap qendrën e parë për varësinë digjitale appeared first on Gazeta Si.

GLP-1, të përdorur kryesisht për të trajtuar diabetin e tipit 2 dhe obezitetin, shoqërohen me një rrezik dukshëm më të lartë të rënies së flokëve sesa ilaçet e tjera për diabetin, sipas një studimi të ri të botuar në The BMJ.

Edhe pse rrallë, disa njerëz që e marrin kanë raportuar rënie flokësh. Studimi i ri konfirmon rrezikun e ulët të rënies së flokëve, me autorët që argumentojnë se kjo mund të ndihmojë në marrjen e vendimeve më të informuara.

Është e rëndësishme të theksohet se rastet më të vëzhguara të rënies së flokëve të lidhura me GPL-1 ishin të kthyeshme, pasi folikulat e flokëve mbetën të paprekura, thanë autorët.

“Edhe pse rreziku absolut i alopecisë së regjistruar klinikisht e lidhur me përdorimin e agonistëve të receptorit GLP-1 është i ulët, lidhja e vëzhguar mund të ndikojë ende në respektimin e udhëzimeve dhe vendimet e pacientëve për të filluar ose vazhduar terapinë”, shkruan autorët.

Studiuesit analizuan të dhënat elektronike të pacientëve që merrnin ilaçe për diabetin e tipit 2, duke përfshirë GLP-1 dhe dy ilaçe të tjera alternative për diabetin: frenuesit SGLT-2 dhe frenuesit DPP-4. Krahasuar me frenuesit SGLT-2, GLP-1 ishte i lidhur me një rrezik 37% më të lartë të alopecisë; krahasuar me frenuesit DPP-4, rreziku ishte 68% më i lartë.

Medikamentet GLP-1 u zhvilluan fillimisht për të trajtuar diabetin e tipit 2, por përdorimi i tyre është zgjeruar në disa indikacione të tjera, duke përfshirë humbjen e peshës, uljen e rrezikut kardiovaskular dhe apnenë obstruktive të gjumit.

Ato funksionojnë duke imituar peptidin-1 të ngjashëm me glukagonin, një hormon i prodhuar në zorrë pas ngrënies. Ato aktivizojnë receptorët në pankreas për të stimuluar sekretimin e insulinës dhe në tru për të ndihmuar në rregullimin e oreksit.

Autorët theksojnë se humbja e shpejtë e peshës dhe marrja e reduktuar e kalorive janë shkaktarë të mirënjohur të rënies së flokëve.

Ndryshimet hormonale gjithashtu mund të luajnë një rol, vunë re ata, megjithëse nevojiten studime të mëtejshme për të sqaruar mekanizmat themelorë. Kufizimi kalorik mund të kontribuojë më tej në stresin fiziologjik dhe mangësitë në mikronutrientë si hekuri, zinku dhe biotina, të cilat mund të prishin ciklin e rritjes së flokëve.

Ndërsa rënia e flokëve zakonisht nuk rezulton në dëmtim fizik, ajo mund të ketë pasoja të rëndësishme psikosociale, duke ndikuar në vetëvlerësimin, cilësinë e jetës dhe respektimin e trajtimit, shtuan autorët.

Autorët arrijnë në përfundimin se nevojiten kërkime të mëtejshme për të sqaruar lidhjet mekanike midis terapisë GLP-1, humbjes së peshës dhe rënies së flokëve, si dhe për të identifikuar pacientët që mund të jenë në rrezik më të madh.

The post Studimi zbulon se GLP-1 për humbje peshe lidhen me rrezik “të ulët”, por real të rënies së flokëve appeared first on Gazeta Si.

Nga Gazeta ‘Si’- Presidenti i SHBA, Donald Trump, ka deklaruar se kompanitë e inteligjencës artificiale duhet të mbulojnë koston e ndërtimit të infrastrukturës energjetike të nevojshme për qendrat e reja të të dhënave.

Ai u bëri thirrje komuniteteve lokale t’i mbështesin këto projekte, duke i cilësuar si thelbësore për ruajtjen e lidershipit teknologjik të SHBA.

Duke folur në selinë e Agjencisë për Mbrojtjen e Mjedisit (EPA) në Washington, Trump tha se më shumë se 220 kompani të shërbimeve publike, kompani teknologjike dhe qeveri shtetërore kanë nënshkruar një zotim për mbrojtjen e konsumatorëve që nga prezantimi i tij në fillim të këtij viti, ndërsa tarifat e energjisë elektrike për 80 për qind të energjisë së shpërndarë në SHBA tashmë mbulohen nga ky plan.

“Këto kompani po shpenzojnë shuma të jashtëzakonshme parash për komunitetet lokale”, tha Trump.

Ai pretendoi se vende të huaja po përpiqen të ngadalësojnë zgjerimin e infrastrukturës amerikane të inteligjencës artificiale përmes “propagandës” dhe fushatave të marrëdhënieve me publikun, me qëllim dekurajimin e mbështetjes lokale për qendrat e të dhënave.

“Nëse nuk e bëjmë këtë, do të mbetemi prapa. Duhet t’i bindni komunitetet tuaja se sa të mira janë këto projekte. Nuk mund t’i luftoni. Duhet t’i përqafoni”, tha Trump.

Trump i përshkroi komunitetet që mirëpresin qendrat e të dhënave si “komunitete të zgjuara”, duke theksuar se këto objekte sjellin “një numër të jashtëzakonshëm vendesh pune me shumë pak ndikim real në jetën e përditshme”.

The post Trump: Kompanitë e AI-së duhet të mbulojnë kostot e energjisë për qendrat e të dhënave appeared first on Gazeta Si.

Nga Gazeta ‘Si’– Shtetet e Bashkuara kanë shpallur një regjim të ri tarifash doganore për dhjetëra vende në mbarë botën, në prag të skadimit të tarifës së përgjithshme prej 10%, e cila ishte vendosur si masë e përkohshme.

Këto masa, me vlefshmëri 150-ditore, u miratuan nga administrata e presidentit Donald Trump pasi Gjykata e Lartë rrëzoi pjesën më të madhe të tarifave shtesë të vendosura pas rikthimit të tij në Shtëpinë e Bardhë.

Tarifat kanë hyrë në fuqi që nga ora 06:00 e mëngjesit e kësaj të premteje, më 24 korrik, do të variojnë nga 10% deri në 12.5% dhe do të prekin 60 partnerë tregtarë, përfshirë disa vende europiane.

Sipas Zyrës së Përfaqësuesit të SHBA-të për Tregtinë (USTR), ato do të mbulojnë rreth 99.4% të tregtisë amerikane.

Akuzat për punë të detyruar dhe gjoba ndaj Google

Administrata amerikane argumenton se tarifat do të zbatohen ndaj vendeve që, sipas saj, nuk kanë luftuar në mënyrë të mjaftueshme përdorimin e punës së detyruar në zinxhirët e furnizimit që lidhen me tregtinë me SHBA-të.

“Ky është veprimi më i madh ndërkombëtar i ndërmarrë ndonjëherë nga Shtetet e Bashkuara, madje nga çdo vend, në mbrojtje të të drejtave të punëtorëve”, deklaroi një zyrtar i lartë i administratës Trump.

Ai sqaroi gjithashtu se tarifat e reja nuk do t’u shtohen tarifave ekzistuese për çelikun dhe aluminin, të vendosura vitin e kaluar për arsye të sigurisë kombëtare.

Ndërkohë, Përfaqësuesi Amerikan për Tregtinë, Jamieson Greer, paralajmëroi se gjoba prej 890 milionë eurosh që Bashkimi Evropian i vendosi Google më 23 korrik mund të rrezikojë marrëveshjen mes SHBA-ve dhe BE-së për tarifat doganore, duke dëmtuar edhe marrëdhëniet transatlantike.

Reagimi i Bashkimit Europian

Pas reagimit të ashpër të zëvendëspresidentes së Komisionit Evropian, Kaja Kallas, e cila i cilësoi akuzat si “të pabazuara”, Komisioni Evropian mbajti një qëndrim më të moderuar.

Brukseli deklaroi se “merr në dijeni vendimin” dhe theksoi se janë rikthyer përjashtimet tarifore për disa produkte evropiane, si tapa e lisit, diamantet, avionët dhe pjesët e tyre, barnat gjenerike dhe përbërësit aktivë farmaceutikë.

Sipas Komisionit, kjo është në përputhje me angazhimet tarifore të dakorduara në deklaratën e përbashkët BE–SHBA dhe krijon kushte pozitive për negociata të mëtejshme mbi përjashtime të reja dhe bashkëpunim në fusha si lëndët e para kritike, siguria ekonomike, inteligjenca artificiale dhe teknologjitë digjitale.

Hetimi për produktet e prodhuara me punë të detyruar

Tarifat burojnë nga një hetim i nisur në mars nga USTR për të verifikuar nëse partnerët tregtarë të SHBA-së kanë eliminuar nga zinxhirët e furnizimit produktet e prodhuara me punë të detyruar.

Greer deklaroi për CNN se objektivi është t’i jepet fund tregtisë së produkteve të tilla.

“Nëse lejon importin e mallrave të prodhuara me punë të detyruar, krijon konkurrencë të padrejtë ndaj prodhuesve të tu. Ne duam që të gjitha vendet të kenë të njëjtat mekanizma mbrojtës”, tha ai.

Cilat vende preken?

Vendet që, sipas SHBA-së, kanë legjislacion të paplotë për këtë çështje do t’i nënshtrohen tarifës 10% për një pjesë të eksporteve drejt tregut amerikan. Në këtë grup bëjnë pjesë: Bashkimi Evropian, Kanadaja, India, Mbretëria e Bashkuar, Meksika.

Rreth 40 vende të tjera, mes tyre Kina, Japonia, Zvicra dhe Koreja e Jugut, do të përballen me tarifën më të lartë prej 12.5%.

Nga masat përjashtohen energjia dhe lëndët e para që nuk prodhohen në SHBA.

Pas njoftimit, Bursa e Tokios u hap me rënie të fortë. Indeksi Nikkei humbi rreth 3% në tregtimet e para, ndërsa Topix ra me 1.2%, të udhëhequr nga aksionet e teknologjisë, gjysmëpërçuesve dhe inteligjencës artificiale.

SHBA: Tregu amerikan si mjet presioni

Një zyrtar amerikan shpjegoi se administrata Trump e konsideron aksesin në tregun amerikan si një instrument negociues për arritjen e objektivave tregtarë.

Për të shmangur sfidat ligjore, tarifat janë mbështetur në të njëjtën bazë ligjore që përdoret për tarifat ndaj çelikut, aluminit, bakrit, drurit dhe automjeteve, të cilat nuk u prekën nga vendimi i Gjykatës së Lartë.

Paralelisht vazhdojnë edhe hetime të tjera tregtare, përfshirë ato mbi kapacitetin industrial, që përfshijnë edhe Bashkimin Evropian.

Masat ndaj Kanadasë dhe Brazilit

Paketa e re vjen pas masave të fundit kundër Brazilit dhe Kanadasë.

Brazili tashmë përballet me tarifa 25% për pothuajse gjysmën e eksporteve drejt SHBA-ve. Ndërsa Kanadaja do t’i nënshtrohet tarifave shtesë prej 50% duke filluar nga muaji i ardhshëm.

Në të dy rastet, tarifat zbatohen vetëm për kategori të caktuara produktesh dhe jo për të gjitha importet.

Reagimet ndërkombëtare

Brazili e quajti vendimin “krejtësisht arbitrar dhe të pajustifikuar”. Qeveria e presidentit Luiz Inácio Lula da Silva deklaroi se SHBA po manipulon çështjen e të drejtave të njeriut për të justifikuar politika proteksioniste dhe njoftoi se do ta çojë çështjen në Organizatën Botërore të Tregtisë (OBT).

Australia reagoi gjithashtu, duke i cilësuar tarifat “të pajustifikuara” dhe në kundërshtim me marrëveshjen e tregtisë së lirë mes dy vendeve.

Meksika tha se falë përjashtimeve të parashikuara nga marrëveshja tregtare USMCA, rreth 85% e eksporteve të saj drejt SHBA-ve do të vazhdojnë të hyjnë pa tarifa. Ministri i Ekonomisë, Marcelo Ebrard sqaroi se tarifat e reja thjesht zëvendësojnë ato që skadojnë, pa ndryshuar barrën reale doganore për Meksikën.

Japonia shprehu keqardhje për vendimin amerikan, duke deklaruar se industria japoneze vepron sipas standardeve ndërkombëtare dhe se tarifat po vendosen vetëm sepse vendi nuk ka një ndalim të përgjithshëm për importin e produkteve të prodhuara me punë të detyruar.

Zelanda e Re dënoi ashpër vendimin. Kryeministri Christopher Luxon e cilësoi atë “jashtëzakonisht zhgënjyes”, duke theksuar se hetimi amerikan nuk ka paraqitur prova bindëse për akuzat mbi përdorimin e punës së detyruar.

“Tarifat nuk janë zgjidhja. Ato vetëm rrisin kostot dhe pasigurinë për bizneset”, deklaroi ai.

The post SHBA godet 60 vende me tarifa të reja appeared first on Gazeta Si.

Nga Gazeta ‘Si’- Gjykata Administrative ka vendosur të mos marrë në shqyrtim në themel padinë e kryetarit të Bashkisë së Tiranës, Erion Veliaj, lidhur me emërimin e Ols Dados si prokuror.

Në vendimin e saj, Gjykata arsyeton se Veliaj nuk ka interes të drejtpërdrejtë në këtë proces, por vetëm interes të tërthortë, ndaj nuk legjitimohet si palë paditëse.

Gjykata ka rrëzuar gjithashtu kërkesat për t’u bërë pjesë e procesit si palë të treta nga ish-prokurori Tom Deda dhe shoqata “Asociacioni për Media e Drejtësi”.

Pas vendimit, avokati i Veliajt, Plarent Ndreca, e cilësoi vendimin të pritshëm, por deklaroi se çështja do të vijojë në Apel. Sipas tij, emërimi i Ols Dados nuk është bërë në mënyrë të ligjshme dhe sistemi i drejtësisë nuk tregoi aftësi për të korrigjuar problematikat.

“Do të shkojmë në Apel sapo të kemi vendimin e zbardhur. Do ta fitojmë këtë çështje”, deklaroi Ndreca.

Gjatë seancës, Veliaj kishte pretenduar se emërimi i Dados përbënte një problem për sistemin e drejtësisë, duke kërkuar që gjykata të rikthente besimin te institucionet.

Ndërkohë, mbrojtja e Ols Dados argumentoi se Veliaj nuk kishte asnjë interes juridik të drejtpërdrejtë dhe se pranimi i një padie të tillë do të krijonte precedent për ndërhyrje në vendimmarrjet institucionale.

Kërkesa e Tom Dedës

Gjatë procesit, ish-prokurori Tom Deda kërkoi të bëhej palë e tretë në gjykim, duke pretenduar se largimi i tij nga detyra kishte lidhje me emërimin e Ols Dados.

Deda deklaroi se periudha e shkarkimit të tij dhe emërimit të Dados përkonin në kohë dhe pretendoi se largimi i tij kishte krijuar vendin për një tjetër emërim.

Gjykata e pyeti Dedën për interesin e tij të drejtpërdrejtë në proces, ndërsa ai u shpreh se në rast të ndryshimit të situatës juridike të Dados do të kërkonte dëmshpërblim.

Edhe kjo kërkesë u rrëzua nga gjykata.

Debati për emërimin e Dados

Në seancë, Veliaj dhe avokati i tij ngritën pretendime lidhur me kriteret e emërimit të Ols Dados, ndërsa mbrojtja e prokurorit kundërshtoi këto pretendime, duke deklaruar se nëse ka ankesa për veprimtarinë e tij, ato duhet të ndiqen përmes rrugëve ligjore përkatëse.

Gjatë seancës, Veliaj ka kundërshtuar mënyrën e trajtimit të çështjes, duke pretenduar se po krijohet një pabarazi mes palëve.

“Është evidente që po krijohet asimetri. Një pale po i shtohet interesi publik, ndërkohë që të paditurve të tjerë po i largohen”, është shprehur Veliaj.

Ai ka deklaruar se ekzistojnë dy mundësi: ose Këshilli i Lartë i Prokurorisë nuk respekton këtë gjykatë, ose ka arritur në përfundimin se Ols Dado nuk është prokuror.

Veliaj ka përmendur edhe vendime të Gjykatës Kushtetuese, duke pretenduar se mandati i kryetarit të bashkisë nuk mund të trajtohet si “plaçkë”. Sipas tij, gjykata duhet të rikthejë besimin te drejtësia.

“Dikush ka veshur uniformën e shtetit dhe më ka rrëmbyer”, ka deklaruar Veliaj, duke kërkuar pranimin e kërkesës së shoqatës “Asociacioni për Media e Drejtësi” për t’u bërë palë në proces.

Përfaqësuesit e shoqatës kanë argumentuar se çështja ka interes publik dhe lidhet me integritetin e sistemit të drejtësisë. Ata kanë pretenduar se përfshirja e Ols Dados në hetimin e ngjarjeve të 21 janarit 2011 është një element që lidhet me kriteret dhe rrethanat e emërimit të tij si prokuror.

Nga ana tjetër, avokati i Ols Dados ka kërkuar rrëzimin e kërkesës së shoqatës për ndërhyrje kryesore në gjykim. Ai ka argumentuar se çështja lidhet me një akt administrativ individual dhe se provat e paraqitura nga shoqata ishin vetëm njoftime procedurale nga gjykata.

Procesi pritet të vijojë në një fazë tjetër pas vendimit të Gjykatës Administrative, ndërsa pala e Veliajt ka paralajmëruar ankimin në Gjykatën Administrative të Apelit.

The post Administrativja rrëzon padinë e Veliajt ndaj Dados appeared first on Gazeta Si.

Një ngjarje e rëndë me një viktimë dhe një të plagosur ka ndodhur mëngjesin e kësaj të premteje në fshatin Vidhisht, në Roskovec.

Një 35-vjeçar dyshohet se ka vrarë me armë gjahu ish-vjehrrin e tij, 58 vjeç, si dhe ka plagosur ish-vjehrrën, e cila ndodhet në spital nën kujdesin e mjekëve.

Pas krimit, autori i dyshuar është larguar nga vendngjarja me automjet, së bashku me ish-bashkëshorten e tij të cilën e mori peng, duke marrë me vete edhe armën e gjahut.

Një familjar i viktimës ka thënë për mediat se familjes së vajzës nuk pëlqente lidhja e tyre dhe nuk e pranonin.

“Ai ka qenë në arrest shtëpie. Ish-dhëndri ka pasur problemet e tij. Ndihemi shumë keq. Gocën e ka marrë me vete. Familja e vajzës e kishte denoncuar edhe më pare”, u shpreh një nga kushërinjt e viktimës. Ndërkohë vëllai i viktimës ka thënë se autori i ka kërcënuar se do i vriste të gjithë. 

“Na thoshte hajdeni se do ju vras të gjithëve. Ai është arrestuar 3 herë më parë e tani ishte arrest shtëpie”, thotë ai.

The post Vrasja e 58-vjeçarit në Roskovec, flet vëllai i viktimës: Autori është arrestuar tri herë appeared first on Gazeta Si.

Një ngjarje e rëndë ka ndodhur mëngjesin e kësaj të premteje në fshatin Vidhisht, në Roskovec.

Sipas Policisë, një 35-vjeçar dyshohet se ka vrarë me armë gjahu ish-vjehrrin e tij, 58 vjeç, si dhe ka plagosur ish-vjehrrën, e cila ndodhet në spital nën kujdesin e mjekëve.

Pas krimit, autori i dyshuar është larguar nga vendngjarja me automjet, së bashku me ish-bashkëshorten e tij të cilën e mori peng, duke marrë me vete edhe armën e gjahut.

The post Roskovec/ 35-vjeçari vret ish-vjehrrin e tij dhe plagos ish-vjehrrën. Merr peng ish-gruan appeared first on Gazeta Si.

Mjetet e vogla lundruese dhe ato të peshkimit nuk do të lejohen të dalin në det të hapur nga pasditja e së premtes, pasi Kapitenerit e e Porteve Vlorë dhe Sarandë kanë vendosur kufizime për shkak të përkeqësimit të motit në det.

Sipas njoftimit të autoriteteve portuale, ndalimi do të jetë në fuqi nga ora 14:00 e datës 24 korrik deri në orën 06:00 të 25 korrikut dhe prek mjetet dhe skafet që operojnë jashtë gjirit të Vlorës, si edhe në zonat, Dhërmi-Himarë Borsh dhe Ksamil.

Parashikimet flasin për erë në drejtimin very-veriperëndim me forcë deri në 6-7 ballë, ose 15–25 metra në sekondë, ndërsa dallgët pritet të arrijnë lartësinë nga 1.5 deri në 3.5 metra.

Për mjetet e vogla që lundrojnë brenda gjirit të Vlorës nuk ka ndalim, por Kapiteneria u kërkon drejtuesve të tregojnë kujdes të shtuar për shkak të kushteve të vështira në det.

Njëkohësisht, subjekteve që ushtrojnë aktivitet detar u është kërkuar të marrin masat e nevojshme, të sigurojnë mjetet në port dhe të mbajnë në gatishmëri ekuipazhet.

Ndërkohë, anijet e transportit ndërkombëtar detar do të vijojnë lundrimin normalisht sipas itinerareve të planifikuara.

Sipas Kapitenerisë së Portit Vlorë, kushtet në det pritet të përmirësohen pas orës 06:00 të së shtunës, 25 korrik.

Parashikuesit europianë të motit kanë ngritur nivelin e rrezikut për Italinë juglindore, Detin Jon dhe zonat përreth, për shkak të mundësisë për breshër të madh deri shumë të madh, erëra shkatërruese, reshje intensive, si edhe tornado të izoluara, veçanërisht në zonat bregdetare.

Sipas parashikimit, gjatë mbrëmjes dhe natës pritet që një sistem i fuqishëm stuhish të zhvillohet mbi Italinë Qendrore dhe Adriatik, për t’u zhvendosur më pas drejt jugut. Ky sistem pritet të prekë rajonin e Pulias dhe më pas brigjet lindore të Detit Jon, duke përfshirë edhe brigjet jugperëndimore të Shqipërisë dhe perëndimin e Greqisë.

The post Të premten pritet moti i keq, ndalohet dalja në det e mjeteve lundruese në Vlorë e Sarandë appeared first on Gazeta Si.

Nga Gazeta ‘Si’- Teksa Bashkimi Europian po i kërkon me ngulm qeverisë shqiptare shfuqizimin e ligjit për investimet strategjike dhe atë për zonat e mbrojtura, duke kushtëzuar madje edhe anëtarësimin e vendit në BE me këto dy ndërhyrje ligjore, Edi Rama duket se e ka ndarë mendjen të vazhdojë në të kundërt.

Përmes dy vendimeve të posacme të miratuara një ditë më parë, qeveria ka përshpejtuar tjetërsimin e pronës publike përmes ligjit famëkeq të investimeve strategjike duke parashikuar shprehimisht edhe privatizimin e zonave të mbrojtura.

Vendimi i qeverise

“Kur pasuritë shtetërore përfshihen në zona me përparësi zhvillimin e turizmit apo në zona të mbrojtura mjedisore, propozimi i kontratës me tarifë simbolike 1 euro/kontrata, pranë Këshillit të Ministrave, bëhet me bashkëpropozim ndërmjet institucionit që ushtron të drejtën e përfaqësuesit të pronarit të pronës shtetërore dhe institucionit që ushtron veprimtarinë shtetërore përgjegjëse për këto zona, në përputhje me legjislacionin në fuqi,” thuhet në vendimin e qeverisë të miratuar një ditë më parë.

Zonat e mbrojtura drejt privatizimit

Por pasi i marrin zonat e mbrojtura përmes qirasë simbolike 1 euro, investitorët strategjikë tashmë do të kenë të drejtën e blerjes totale të tyre me proccedurë të përshpejtuar, pothuajse menjëherë nga nënshkrimi i kontratës së qirasë.

“Në kontratat e qirasë ose të enfiteozës, të lidhura për pasuri me sipërfaqe trualli mbi 500 (pesëqind) m², kur subjekti qiramarrës ose enfiteozëmarrës ka realizuar investime, në përputhje me planin e biznesit dhe në masën mbi 150 për qind të vlerës së truallit…..i lind e drejta të njoftojë ministrinë përgjegjëse për ekonominë, shoqëruar me një raport vlerësimi nga një ekspert vlerësues dhe auditues ligjor i pavarur. Në rast se konfirmohet përmbushja e nivelit të investimit në masën mbi 150 për qind të vlerës së truallit dhe subjekti qiramarrës/enfiteozëmarrës ka respektuar të gjitha kushtet e kontratës, i lind e drejta për të hyrë në procedurë privatizimi me të drejtë parablerjeje të objektit të kontratës së qirasë/enfiteozës,” thuhet në vendimin e një dite më parë.

Por për atë që kanë realizuar investime në masën mbi 750 për qind të vlerës së pronës, e drejta e privatizimit lind mënjeherë.

Në kontratat e qirasë ose të enfiteozës të lidhura për pasuri me sipërfaqe trualli mbi 500 m2, në rastet kur subjekti qiramarrës ose enfiteozëmarrës ka kryer investime në përputhje me planbiznesin, në masën mbi 750 për qind të vlerës së truallit, si dhe kur subjekti ka respektuar të gjitha kushtet e kontratës, i lind e drejta të njoftojë ministrinë përgjegjëse për ekonominë, shoqëruar me një raport vlerësimi nga një ekspert vlerësues dhe auditues ligjor i pavarur, edhe pa u përmbushur afati prej 3 (tre) vitesh i kontratës,” thuhet në VKM.

E drejta e parablerjes

Ndryshimet e fundit në vendimet e qeverisë që përcaktojnë kriteret dhe proccedurat e privatizimit apo dhënies me qira të pronave shtetërore, përveccse përshpejtojnë proccesin e privatizimit dhe zgjerojnë kategoritë e pronave publike që tjetërsohen, konfirmojnë se qeveria nuk ka ndër mend të tërhiqet nga ligji për zonat e mbrojtura.

Këto ndryshime vijnë pikërisht në kushtet qytetarët po protestojnë prej gati dy muajsh në shesh, pikërisht kundër grabitjes së pronave publike dhe në kohën kur Bashkimi Europian e ka kushtëzuar anëtarësimin e vendit në BE me shfuqizimin e këtyre dy ligjeve./Kapital

The post Qeveria i hap rrugën privatizimit të zonave të mbrojtura! appeared first on Gazeta Si.

Është rikthyer në qendër të vëmendjes rasti i sulmuesit të Shteteve të Bashkuara, Folarin Balogun, pezullimi i të cilit u anulua pas një kartoni të kuq, duke i hapur rrugën aktivizimit të tij në fazën e 1/8-ave.

Federata Norvegjeze e Futbollit ka bërë të ditur se do t’i drejtohet FIFA-s me një ankesë zyrtare, duke kërkuar sqarime dhe një hetim të plotë mbi procedurën që çoi në ndryshimin e vendimit.

Presidentja e federatës, Lise Klaveness, ka paralajmëruar se raste të tilla mund të krijojnë precedentë të rrezikshëm dhe të ndikojnë në besimin ndaj institucioneve sportive ndërkombëtare.

Sipas pretendimeve të publikuara, presidenti amerikan Donald Trump kishte kontaktuar presidentin e FIFA-s, Gianni Infantino, për të diskutuar kartonin e kuq të Balogun, të cilin e konsideronte një vendim të padrejtë.

Pikërisht ky pretendim ka rikthyer debatin mbi kufirin mes politikës dhe sportit, si dhe mbi pavarësinë e vendimmarrjes në institucionet e futbollit.

Balogun u ndëshkua me karton të kuq në përballjen ndaj Bosnjë-Hercegovinës, por më pas, masa disiplinore ndaj tij u anulua.

The post FIFA nën presion pas çështjes Balogun appeared first on Gazeta Si.

Në Komisariatin e Policisë Lushnjë, është paraqitur bashkë me 2 familjarë të saj, një 27 vjeçe me probleme të shëndetit mendor, e cila ka kallëzuar në prani të psikologut, se më datë 22.07.2026, një person kishte kryer marrëdhënie seksuale me dhunë me të.

Menjëherë pas kallëzimit, Policia shpalli në kërkim  S. M., 42 vjeç, banues në Lushnjë, i dyshuar për veprën penale “Marëdhënie seksuale ose homoseksuale me persona të pazotë për t’u mbrojtur”.

Gjithashtu, në vijim të veprimeve, u arrestua në flagrancë D. Y., 32 vjeç, vëllai i 27-vjeçares, pasi gjatë kohës që motra e tij po kallëzonte në ambientet e Komisariatit, dyshohet se ka djegur me lëndë djegëse, automjetin e nënës së 42-vjeçarit, autorit të dyshuar.

The post Dyshohet se ka abuzuar me 27-vjeçaren me probleme të shëndetit mendor, shpallet në kërkim 42-vjeçari appeared first on Gazeta Si.

Një pushues shqiptar ka humbur jetën sot në plazhin e Orikumit, me dyshimet e një infarkti.

Sipas informacioneve paraprake, 75-vjeçari nga Tirana kishte shkuar për pushime së bashku me familjen e tij në Orikum. Rreth orës 11:30, sapo ka hyrë në det, ai është ndier keq , ku dhe ka humbur ndjenjat.

Kanë qenë pushuesit dhe familjarët e tij që e kanë nxjerrë menjëherë në breg dhe kanë kërkuar ndihmë. Në vendngjarje ka mbërritur ambulanca e Orikumit, ndërsa personeli mjekësor ka kryer manovrat e reanimimit, por pa mundur ta rikthejë në jetë.

The post Kishte shkuar për pushime në Orikum, humb jetën në plazh 75-vjeçari appeared first on Gazeta Si.