Periudha testuese e implementimit të sistemit “Safe City” ka ulur për 20 për qind numrin e aksidenteve dhe për 37 për qind numrin e të lënduarve nga aksidentet në trafik. Të dhënat sipas autoriteteve i referohen territorit të Shkupit, dhe krahasimi është bërë me dhjetorin e vitit të kaluar. Kryeministri, Hristijan Mickoski nënvizoi se sistemi po jep rezultate, pasi për dallim prej dhjetorit të 2024-tës ku kishte 5 viktima, në dhjetor të 2025 numri i viktimave ishte zero.

“Në Shkup, në muajin dhjetor 2024 për shkak të aksidenteve në trafik, jetën e humbën 5 persona, ndërsa këtë vit asnjë… Ose numri i përgjithshëm i personave që jetën e tyre e humbën si rezultat i aksidenteve në trafik në 2024-tën është 142 persona, ndërsa në vitin 2025 është 131. Me ulje dramatike të numrit në dhjetor, kjo nënkupton se edhe në qytetet ku është ky lloj sistemi, qytetarët vosizin me kujdes, por njësoj edhe në autostrada ku tashmë ka të instaluara pajisje të tilla”, deklaroi Hristijan Mickoki, Kryeministër.

Toshkovski tha se deputetët duhet t’i kenë parasysh këto statistika dhe pret që të gjithë 120 të votojnë ligjin për kundërvajtje, në mënyrë që sistemi “Safe City” të hyjë në fuqi plotësisht më 1 shkurt.

“Nëse qytetarët tregojnë rezultate të tilla në drejtim pozitiv vetëm në korniza të periudhës testuese unë jam i sigurt se deputetët do ta kenë këtë parasysh, që këtë lloj të sistemit të mençur, duhet ta implementojmë ashtu siç duhet, jo vetëm në korniza të testimit. Pres nga të gjithë 120 deputetët në korniza të kuvendit të votojnë pozitivisht, të kalojë ligji për kundërvajtje, sepse vetëm ai është me dy të tretat e votave, të tjerat kanë përfunduar”, tha Hristijan Mickoki, Kryeministër.

Sistemi Safe City duhej të hynte në fuqi nga sot, por i njëjti u prolongua për më 1 shkurt. Muajin e kaluar filloi periudha testuese e sistemit, ku qytetarët e Shkupit, kanë filluar të marrin sms porosi me vërejtje për shkelje të konstatuara nga kamerat e mençura. Por, implementimi mbetet peng i ligjit për kundërvajtje në trafik, për të cilin nevojiten dy të tretat e votave në Kuvend. Ndërsa përveç ligjit për kundërvajtje ka mbetur edhe Kodi Penal, për të cilin nevojitet shumicë e thjeshtë. /Alsat.mk

SHKUP, 29 dhjetor /ATSH/ – Jeta në Turqi është bërë politikisht shumë e vështirë, por edhe tepër e shtrenjtë për një familje, prandaj për mua ishte më e lehtë të shpërngulesha këtu dhe të kërkoja shtetësi maqedonase”, shpjegon 28-vjeçari Benk Bingjul.

Ai prej disa muajsh punon si menaxher në një kafene në Shkup, e cila është në pronësi të biznesmenëve turq.

Kanë kaluar tashmë dy vjet qëkurse ai u shpërngul nga Antalia në Shkup me bashkëshorten e tij maqedonase. Për këtë arsye ka marrë leje qëndrimi, ndërsa para një muaji bëri kërkesë për shtetësi maqedonase. Ai thotë se i mungon qyteti i lindjes për shkak të jetës pranë detit dhe plazhit, por këtu jeta është më e lirë.

“Për shembull, në shitore, një blerje e zakonshme për shtëpi: perime, vezë, mish, qumësht, edhe nëse blen minimalisht, duhet të paguash rreth 280–300 euro. Ndërsa me këto para në Shkup mund ta mbushësh makinën e vjetër plotësisht: bagazhin, sediljen e përparme dhe të pasmen. Në Turqi kjo është e pamundur”, thotë Bingjul.

Ai nuk e flet mirë gjuhën maqedonase, por thotë se ushtron me bashkëshorten e tij. Një nga kushtet që, sipas ligjit maqedonas, duhet të plotësojë është dhënia e provimit për njohjen e gjuhës maqedonase.

“E kuptoj disi maqedonishten, di të lexoj me alfabet latin, por jo me cirilik. Këtë duhet ta mësoj”, thotë ai.

Megjithatë, ky kusht nuk vlen për ata që dëshmojnë se kanë prejardhje maqedonase.

Vala e kërkesave të turqve për shtetësi maqedonase

Përveç njerëzve si Bingjul, të cilët kërkojnë shtetësi maqedonase për shkak të martesës me shtetase maqedonase, gjithsej 10.500 qytetarë turq kanë kërkuar shtetësi maqedonase gjatë katër vjetëve të fundit mbi bazën e prejardhjes maqedonase, tregojnë të dhënat që REL-i i ka marrë nga Ministria e Punëve të Brendshme (MPB).

Sipas MPB-së, këta janë shtetas të Turqisë që duhet të dëshmojnë në institucionet maqedonase se janë mërgimtarë nga ky vend dhe se kanë prejardhje etnike maqedonase.

Në përgjigjen për REL-in, MPB-ja thekson se arsyeja e rritjes së numrit të kërkesave për shtetësi maqedonase lidhet me ndryshimet e fundit ligjore.

“Ndryshimet ligjore të vitit 2021 kontribuuan në një rritje enorme të numrit të kërkesave për fitimin e shtetësisë maqedonase nga mërgimtarët që jetojnë në Republikën e Turqisë”, tha MPB-ja.

Përkufizimi i ri i “mërgimtarit” në Ligjin për Shtetësinë

Bëhet fjalë për ndryshime në Ligjin për Shtetësinë të propozuara nga qeveria e atëhershme e udhëhequr nga koalicioni LSDM dhe BDI.

Ministri i atëhershëm i Punëve të Brendshme, Oliver Spasovski, propozoi në Kuvend ndryshime në ligj me të cilat përcaktohet se kush konsiderohet mërgimtar.

Sipas ligjit, mërgimtari dhe pasardhësi i tij i gjeneratës së parë mund të fitojnë shtetësi maqedonase pa jetuar në vend, pa e njohur mjaftueshëm gjuhën maqedonase dhe pa hequr dorë nga shtetësia e mëparshme – rregull që vlen për shtetasit e huaj.

“Mërgimtar, në kuptim të këtij ligji, konsiderohet qytetar i Republikës së Maqedonisë së Veriut që është shpërngulur nga Republika e Maqedonisë së Veriut në një shtet tjetër, pa marrë parasysh gjininë, racën, ngjyrën e lëkurës, prejardhjen kombëtare dhe shoqërore, bindjet politike dhe fetare, si dhe statusin pasuror dhe shoqëror”, thuhet në Ligjin për Shtetësinë.

Mbi 4.000 kompani të themeluara me kapital turk

Sipas të dhënave që REL-i ka marrë nga Dhoma Ekonomike Maqedonaso-Turke (MATTO), për vitin 2024 numri i kompanive të regjistruara me kapital turk nga persona juridikë dhe fizikë arrin në 4.132.

Sipas tyre, interesi i biznesit buron nga marrëdhëniet e afërta maqedonaso-turke.

“Ato bazohen në lidhjen e përbashkët historike nga periudha osmane, numrin e konsiderueshëm të mërgimtarëve nga këto troje në Republikën e Turqisë, si dhe lidhjet familjare dhe kulturore ekzistuese mes qytetarëve të të dyja vendeve. Për më tepër, Republika e Maqedonisë së Veriut paraqet një portë strategjike drejt tregjeve të vendeve anëtare të Bashkimit Evropian për kompanitë nga Republika e Turqisë, gjë që rrit atraktivitetin e saj si destinacion investimesh”, thuhet në përgjigjen e MATTO-s, shkruan REL.   /os/.

The post KOMENT – Pse po rritet numri i turqve që kërkojnë shtetësi në Maqedoninë e Veriut? appeared first on Agjencia Telegrafike Shqiptare.

Ministri i Brendshëm, Pançe Toshkovski, theksoi sot se respektimi i rregullave të trafikut është përmirësuar ndjeshëm që nga fillimi i projektit "Safe City", gjë që u reflektua në një ulje drastike të paralajmërimeve dhe konkretisht në një ulje të numrit të personave të lënduar.

Ministri shpjegoi pse sistemi informon me një shpejtësi prej 50 km/orë, dhe jo me 57 km/orë.

"Qëllimi ynë është të ngasim brenda limitit të lejuar të shpejtësisë. Me një shpejtësi prej 30 km/orë, nga 10 persona të lënduar, dy vdesin, me një shpejtësi prej 50 km/orë, nga 10 persona të lënduar, tetë vdesin, sipas statistikave botërore. Prandaj, dua të përsëris se nëse respektojmë ligjet, shpëtojmë jetë", theksoi Toshkovski.

Ai njoftoi se sistemi së shpejti do të përshtatet dhe opinioni do të informohet për fillimin e gjobave për shkeljet.
"Së shpejti do ta informojmë opinioni se kur do të fillojmë të ofrojmë informacion në lidhje me gjobat, ekskluzivisht për shkeljet që do t'i nënshtrohen sanksioneve", shtoi Ministri./Telegrafi/

Zëvendësministri i Punëve të Brendëshme, Astrit Iseni, për Lajm Tv paralajmroi zgjerimin dhe modernizimin e sistemit të kamerave të sigurisë, me synim që çdo rrugicë në Shkup të mbulohet me kamera, ndërsa më pas, ky sistem të shtrihet në të gjithë territorin e Republikës së Maqedonisë së Veriut.

Sipas planit të MPB-së, Iseni tha që deri nga mesi i vitit 2026, kamerat e reja pritet të vendosen në të gjithë vendin, duke mos u kufizuar vetëm në qytetet e mëdha.

“Në Shkup do të mundohemi që çdo rrugicë të ketë kamerë. Përveç kësaj, aktualisht po planifikojmë modernizimin e kamerave, pasi me ato që kemi tani nuk mund t`i shohim të gjitha veprat penale apo shkeljet që kryhen. Për momentin, nga kamerat mund të marrim vetëm disa informacione, siç janë tejkalimi i shpejtësisë, parkimi i parregullt apo kalimi në semafor të kuq. Ne, si ministri, mundohemi ta zhvillojmë më tej këtë sistem dhe kapacitetet njerëzore kompetente, dhe normalisht do të përpiqemi që brenda vitit të ardhshëm, 2026, diku nga gjysma e vitit, këto kamera të vendosen në të gjithë shtetin e Republikës së Maqedonisë së Veriut, dhe të mos mbeten vetëm në qytetet e mëdha”, tha Iseni.

Peco Trajkoski nga OJQ thotë se ekziston një "frikë" midis autoriteteve të Maqedonisë se dërgimi i trupave në Ukrainë do të thoshte "marrje anësie".

"Në komunikimin publik, Ministria e Mbrojtjes e lidh vendimin me një qëndrim parimor se Maqedonia "gjithmonë ka qenë për paqe dhe siguri" dhe se siguria e qytetarëve është një përparësi, prandaj ushtarët e Maqedonisë nuk do të dërgohen në Ukrainë. Nëse e lexojmë vendimin "nën sipërfaqe", arsyet zakonisht janë më praktike sesa ideologjike.

Së pari, për ushtritë e vogla, çdo vendosje e re do të thotë një zgjedhje që do të sakrifikohet në vend ose në misionet/detyrimet ekzistuese, dhe një mision në Ukrainë do të mbartte rrezik më të lartë, logjistikë më të madhe dhe potencialisht rregulla më të vështira angazhimi", tha për "Lokalno" Peco Trajkoski nga OJQ-ja - Qendra për Kërkime dhe Analiza Strategjike pas qëndrimit të përsëritur të ministrit të Mbrojtjes, Vllado Misajlovski, se Maqedonia nuk do të dërgojë ushtarët e saj në një mision të mundshëm paqeruajtës në Ukrainë.

Ministria e Mbrojtjes: Maqedonia nuk do të dërgojë ushtarët e saj në një mision në Ukrainë

Sipas Trajkovskit, më e rëndësishmja, në një periudhë kaq të trazuar, qeveritë shpesh nuk duan të dalin përpara vijës së partnerit më të fortë, në këtë rast Shteteve të Bashkuara.

"Analizat vendase dhe të huaja sugjerojnë se pozicionimi zyrtar ka një element përputhjeje me administratën e re amerikane dhe një fokus në prioritete "më të sigurta" në vend të një vendosjeje të rrezikshme në Ukrainë", thekson Trajkoski.

Analisti vlerëson se ekziston njëfarë “frike” midis autoriteteve të vendit se dërgimi i trupave do të thoshte “marrje anësie”, por, siç thotë ai, nuk duhet të jetë “frikë” në një kuptim dramatik, por më tepër kujdes strategjik./Telegrafi/

Maqedonia nuk do të dërgojë ushtarët e saj në një mision në Ukrainë, si pjesë e një rezultati të mundshëm të bisedimeve të paqes midis SHBA-së, Ukrainës dhe Rusisë, thonë nga Ministria e Mbrojtjes të Maqedonisë së Veriut.

Kjo përgjigje vjen pasi disa vende evropiane kanë shprehur gatishmërinë e tyre për të dërguar ushtarët e tyre në Ukrainë për të ndihmuar në ruajtjen e paqes dhe për t'u përgjigjur në rast se Rusia shkel një marrëveshje të mundshme paqeje. Një njoftim i ngjashëm erdhi nga Sllovenia, megjithëse kryeministri i saj Robert Golob kërkoi që kjo të jetë vetëm si një mision i përbashkët nën një mandat të Kombeve të Bashkuara.

Nga Ministria e Mbrojtjes për "Lokalno" thonë ministri Vllado Misajlovski ka përcjellë mesazhin e Maqedonisë shumë herë në lidhje me luftën në Ukrainë, si në takimet e ministrave të mbrojtjes të NATO-s ashtu edhe në takimet dypalëshe, se është e nevojshme të vendoset paqja sa më shpejt të jetë e mundur që do t'i japë fund vuajtjeve të popullit ukrainas dhe të miratohet një zgjidhje e qëndrueshme e përhershme që do të rivendosë sigurinë në të gjithë kontinentin evropian.

Përveç kësaj, në disa raste, Ministria e Mbrojtjes duke u përgjigjur në pyetet gazetareske thanë se ushtarët e Maqedonisë nuk do të dërgoheshin në Ukrainë.

"Theksojmë se Maqedonia gjithmonë ka qenë për paqe dhe siguri. Gjatë historisë, kemi treguar se gjithmonë kemi një qëndrim parimor dhe se siguria e çdo qytetari të vendit është gjithmonë përparësia jon", thonë nga Ministria e Mbrojtjes së RMV-së./Telegrafi/

Ministri i Punëve të Brendshme, Pançe Toshkovski tha se deri në muajin qershor-korrik, pret që sistemi "Safe City" të zbatohet në gjithë territorin e Maqedonisë së Veriut.

"Shpresoj që deri në qershor-korrik të vitit të ardhshëm do ta zbatojmë “Qytetin e sigurt” në të gjithë territorin e vendit, dhe jam i sigurt se deri në fund të vitit 2026 do ta zbatojmë në çdo qytet si një sistem inteligjent. Qytetarët e Maqedonisë meritojnë të zbatojnë një zgjidhje inteligjente në Tetovë, Shkup, por edhe në Berovë, Dellçevë, Strugë dhe Ohër që duhet të ndjekë strategjinë evropiane “zero viktima”, domethënë atë strategji që deri në vitin 2050 të mos kemi viktima njerëzore si rezultat i mosrespektimit të rregullave të komunikacionit", tha Toshkovski.

Ai kujtoi se periudha e testimit për regjistrimin e kundërvajtjeve nga sistemi “Qytet i Sigurt” është e vlefshme deri më 1 shkurt të vitit të ardhshëm.

Sipas Toshkovskit, kjo është vetëm një pjesë e hapave të cilët duhet të ndërmerren, por edhe në këtë periudhë të shkurtër kohore, në kuadër të periudhës së testimit, informacionet fillestare janë se me të vërtetë qytetarët e Maqedonisë së Veriut sillen ndryshe kur drejtojnë automjet se sa më parë.

“Dhe jam shumë i kënaqur që numri i aksidenteve rrugore me lëndime të rënda trupore dhe numri i përgjithshëm i aksidenteve rrugore, aty ku po e zbatojmë këtë projekt, është duke u zvogëluar. Kjo është shumë e rëndësishme. Qëllimi i parë dhe më i madh, do të thoja qëllimi i fundit i zbatimit të këtij sistemi, është të shpëtojmë të paktën një jetë njerëzore më shumë se më parë. Pra, rezultatet që duhet të ofrojë ‘Qyteti i sigurt’ janë vërtet shumë të shkëlqyera”, theksoi ministri Toshkovski.

Shtoi se askush nuk do të përjashtohet nga “Qyteti i sigurt”, përveç automjeteve të policisë të cilat ndërmarrin veprime, ndihma mjekësore urgjente dhe automjetet e njësiteve zjarrfikëse. Gjatë kësaj e përmendi shembullin e tij personal kur ka marrë vërejtje për kundërvajtje të kryer në komunikacion dhe këtë e bërë publike.

Kamerat “Qytet i Sigurt” të instaluara në udhëkryqet e Shkupit regjistrojnë automatikisht shkeljet e trafikut duke filluar nga 1 dhjetori. Ishte planifikuar që gjobat të fillojnë të zbatohen nga 1 janar 2026, mirëpo kjo është shtyrë për në 1 shkurt 2026.

Komisioni parlamentar i mbrojtjes hodhi poshtë 3 amendamente lidhur me propozim ligjin për siguri në trafik.

Një prej amendamenteve i referohej rrezikimit të privatësisë dhe të dhënave personale, nga sistemi “Safe City” me çka opozita pretendon se duhet të sigurohet që të dhënat të përdoren ekskluzivisht për procedurën e shkeljes dhe të fshihen pas përfundimit të procedurës.

Dy amendamentet e tjera kishin të bëjnë me ndryshim e kufirit të tolerancës për substancat narkotike, me arsyetimin se ka persona që përdorin barëra të rënda. Ndërsa amendamenti i tretë kishte të bëjë me tolerancën e matjes së shpejtësisë.

Por të gjitha këto u hodhën poshtë. Në të njëjtën seancë u hodh poshtë edhe amendamenti i Oliver Spasovskit që kishte të bëjë me ligjin e policisë.

Ministri i Punëve të Brendshme, Pançe Toshkovski, është i kënaqur me periudhën testuese të projektit “Safe City”.

Ai tha se qytetarët tashmë e kanë ngadalësuar vozitjen dhe se është ulur numri i aksidenteve në trafik.

“Periudha testuese tregon se Maqedonia ka kapacitet të jetë një vend normal. Qytetarët treguan se edhe gjatë një periudhe testuese, kur zbatohet një zgjidhje e re, e kuptuan atë dhe e ngadalësuan vozitjen brenda qytetit kryesor. Ata treguan se mund të sillen ndryshe dhe se tani janë evropianë të vërtetë. Janë ulur numrat e aksidenteve të trafikut në territorin e Qytetit të Shkupit, veçanërisht rastet me lëndime të rënda trupore,” deklaroi Toshkovski.

Kujtojmë se dhjetori dhe janari janë faza paralajmëruese për shkeljen në trafik që regjistrohen nga sistemi "Safe City", ndërsa gjobat do të fillojnë nga muaji shkurt.

Regjistrimi i shkeljeve të trafikut përmes sistemit “Qytet i Sigurt” do të fillojë të funksionojë nga 1 shkurt, një muaj më vonë nga data e paralajmëruar më herët, 1 janari.

Lajmin e konfirmoi për TV 21 ndihmës-zëvendësministër i MPB-së, Muhamet Ismaili, i cili bëri të ditur se përveç Shkupit, Kumanovës dhe Tetovës, ky sistem në funksion do të jetë edhe në Korridorin 8 dhe 10. Sipas njoftimeve të institucioneve kompetente, ky prolongim i afatit vjen për shkak të nevojës për kontrolle të tjera teknike dhe harmonizim të procedurave juridike.

“Nga 01.02.2026 do të vihet në funksion të plotë sistemi SafeCity në Shkup, Kumanovë dhe Tetovë, si dhe Korridori 10 dhe 8, ndërsa në qytetet e tjera është parashikuar të fillojë brenda vitit 2026”, tha Muhamet Ismaili.

Nga Ministria e Punëve të Brendshme njoftuan se po shqyrtohet mundësia e njëfarë tolerance në lidhje me shpejtësinë.
“Pra, ne duhet t’i respektojmë shpejtësitë e lëvizjes, 50 km/h për zonat urbane do të thotë 50 km/h për zonat urbane. Sigurisht, edhe ne do të kemi kujdes po ashtu si të gjitha qytetet evropiane ku ata kanë shtuar parametrat e tyre të caktuar, që të ketë tolerancë, edhe te ne do të ndodhë kjo tolerancë”, deklaroi Sasho Topalovski.

Sistemi “Qytet i Sigurt” do të funksionojë me kamera fikse që do të regjistrojnë kundërvajtje në komunikacion, si tejkalimi i shpejtësisë, kalimi në semafor të kuq, automjetet e paregjistruara, dhe do të plotësohet me automjete të specializuara policore që do të detektojnë parkimin e parregullt dhe kundërvajtjet e tjera. Qëllimi i këtij sistemi është që deri në vitin 2030 të zvogëlohet dhe të përgjysmohet numri i aksidenteve në trafik. /tv21

MPB, në përgjigje të një pyetjeje, nëse sistemi “Qytet i Sigurt” po testohet dhe kur do të jetë zyrtarisht funksional, tha se regjistrimi i shkeljeve të trafikut përmes këtij sistemi do të fillojë të funksionojë nga 1 shkurti, dhe jo nga 1 janari, siç ishte njoftuar fillimisht.
“Një qytet i sigurt do të fillojë të funksionojë nga 1 shkurti 2026 në territorin e Shkupit, Tetovës dhe Kumanovës, si dhe përgjatë korridoreve 8 dhe 10”, thanë nga Ministria e Brendshme.

Pas periudhës së provës dhe paralajmërimeve që mbërrijnë në mesazhe SMS, sistemi “Qytet i Sigurt”, filloi, autoritetet morën në konsideratë shtyrjen e datës së fillimit kur, në vend të paralajmërimeve, do të fillojnë të dërgohen gjoba për tejkalim shpejtësie dhe kalim të semaforit të kuq.

Kjo sinjalizon se Ministria e Brendshme ka nevojë për më shumë kohë për të testuar dhe kalibruar sistemin, ekipi i së cilës testoi sistemin dhe zbuloi disa mospërputhje.

Përveç vonesës, përfaqësuesit e Ministrisë së Brendshme njoftuan ditët e fundit se po shqyrtojnë edhe njëfarë tolerance në lidhje me shpejtësinë, domethënë, të mos penalizohen shoferët që ngasin 52 ose 53 kilometra në orë në një zonë urbane.

Drejtori i Shërbimit për Punë të Përgjithshme dhe të Përbashkëta (SHPPP) i Qeverisë, Ivica Tomovski, njofton se targat e reja të kuqe për automjetet zyrtare u testuan përmes sistemit "Safe City" para futjes së tyre, pas së cilës filloi përpunimi i tyre.

Tomovski për "Sitel" thotë se kanë vënë re një problem, mesazhet për shkeljet e regjistruara nga sistemi i kamerave “Safe City” po arrijnë te kompanitë e lizingut nga të cilat Qeveria bleu automjetet, prandaj disa nga gjobat kalojnë përmes tyre te SHPPP.

“Vlerësoj se personi që ka kryer shkeljen duhet të paguajë, jo kompania”, tha ai, duke njoftuar se ndryshimet ligjore janë të mundshme.

Lidhur me futjen e mundshme të një sistemi GPS për gjurmimin satelitor në automjetet zyrtare, Tomovski tha se do të presin për të parë nëse do të jetë e nevojshme, pasi të analizojnë rezultatet e “Safe City”./Telegrafi/

Zëvendësministri i MPB-së, Astrit Iseni në emisionin “Debat në Shenja”, tha se e përgëzon projektin “Safe City”.

Ai tha se ata kanë planifikuar në fillimi që periudha testuese të jetë një muaj, por sipas gjitha gjasave kjo periudhë testuese do të zgjasë edhe një muaj shtesë.

“Dhe, planifikojmë që diku të fillojë implementimin me 1 shkurt 2026. Ambiciet e MPB-së, janë që ky sistem i Safe City të shtrihet në të gjithë territorin e RMV-së dhe njashtu mendojmë se ky sistem duhet të shtrihet në çdo rrugë, çdo rrugicë që këtë siguri ta ndjejë çdo qytetarë”, deklaroi Iseni.

Ai tha se qëllimi nuk është vetëm vendosja e kamerave por edhe përpunimi i asaj që regjistrohet çdo vepër penale që regjistrohet.

Kamerat e sistemit “Safe City” e regjistruan “rekorderin” në ngasje me shpejtësi, 231 km/h, në unazën e Shkupit më 1 dhjetor, zbuloi shefja e Sektorit për Çështje të Komunikacionit në Ministrinë e Punëve të Brendshme, Maja Arsovska Manov për Telma.

Sipas saj, të dhënat e marra vetëm për tre ditë nga lëshimi testues i sistemit e konfirmojnë nevojën për vendosjen në funksion të këtij sistemi, me qëllim rritjen e sigurisë në komunikacion.

Për rikujtim, sistemi “Qyteti i Sigurt”, në periudhën e parë të testimit, për 24 orë më 1 dhjetor ka regjistruar 110 mijë kundërvajtje, ndërsa sipas informacioneve të MPB-së, më 2 dhjetor janë regjistruar gjithsej 50.652 kundërvajtje, që paraqet përgjysmim të numrit të shkeljeve të regjistruara. Prej tyre, 48.861 janë kundërvajtje për shpejtësi, 1.366 për semafor të kuq dhe 425 për automjete të paregjistruara.

Më së shumti – 4.300 kundërvajtje për tejkalim të shpejtësisë janë regjistruar në dalje të Shkupit drejt Tetovës, si dhe në bulevardin “Nikolla Karev” – 3.000 kundërvajtje.

Shefja e Sektorit për punë të komunikacionit në MPB, Maja Arsovska-Manov, njoftoi se sistemi “Safe City” tashmë funksionon në gjithë territorin e Qytetit të Shkupit dhe shumë shpejt do të zgjerohet edhe në tjera qytete.

“Është aktivizuar sistemi elektronik për detektimin e shkeljeve në komunikacion. Deri në fund të muajit planifikojmë që i njëjti sistem të vihet në funksion edhe në Kumanovë dhe Tetovë, ndërsa nga viti i ardhshëm do të implementohet në gjithë territorin e shtetit”, deklaroi Arsovska-Manov.

Ajo shtoi se për momentin nuk ka statistika të plota, pasi çdo ditë arrijnë paraqitje nga qytetarët dhe ekipet dalin menjëherë për të rregulluar defektet e kamerave.

“Është ende herët të kalkulojmë. Duhet kohë që të kemi analiza të sakta dhe të shohim efektet e sistemit”, theksoi Arsovska-Manov.

Aleanca për Shqiptarët ka reaguar pas fillimit të funksionimit të sistemit"Safe City", pasi njoftimet nga MPB po vijnë vetëm në gjuhën maqedone e jo dhe në gjuhën shqipe.

"Pas lëshimit në përdorim të projektit “Safe City” në Shkup, Tetovë dhe Kumanovë kanë nisur edhe SMS porositë e para për qytetarët me paralajmërime. Edhe pse këtë projekt mund ta vlerësojmë si një hap drejt sigurisë në komunikacion, është e pafalshme që SMS porositë të lëshohen pa gjuhën shqipe. Dhe le ta themi qartë: kjo nuk është hera e parë që institucionet e shtetit e shpërfillin gjuhën shqipe. Ky problem është i përsëritur dhe tashmë i qëllimshëm", thanë nga Aleanca për Shqiptarët.

ASH ka kritikuar dhe koalicionin VLEN në qeveri për mosreagim.

"VLEN-i, që mban pozitën e zëvendësministrit të Punëve të Brendshme, duhet të përgjigjet: çfarë funksioni real ushtron në këtë dikaster? A është aty për të garantuar të drejtat e qytetarëve shqiptarë, apo shërben vetëm si dekor politik, pa asnjë ndikim të vërtetë brenda strukturave të VMRO-së?'Safe City’ pa gjuhën shqipe, VLEN-i si dekor në Qeveri sërish hesht Nëse VLEN-i pretendon se përfaqëson shqiptarët në institucionet shtetërore, atëherë pse hesht përballë një shkeljeje kaq elementare dhe të përsëritur? Pse nuk reagoi për faktin se edhe ky projekt, ashtu si shumë herë më parë, injoron detyrimin ligjor për përdorimin e gjuhës shqipe? Sepse nëse një zëvendësministër nuk arrin të sigurojë as zbatimin bazik të gjuhës shqipe të ministrisë që ai përfaqëson, atëherë roli i tij nuk është përfaqësim – është nënshtrim", thonë nga ASH-ja.

SHKUP, 22 nëntor /ATSH-MIA/ – Presidentja maqedonase, Gordana Siljanovska-Davkova, me rastin e 22 Nëntorit, Ditës së Alfabetit të Gjuhës Shqipe, uroi bashkëqytetarët e saj shqiptarë, me respekt të veçantë për 22 Nëntorin – një festë që përfaqëson një simbol të fortë të përpjekjes arsimore, pjekurisë kulturore dhe përvojës historike të popullit shqiptar.

“117 vjet më parë, alfabeti i unifikuar filloi udhëtimin e tij që nga Kongresi i Manastirit, si kodi më i rëndësishëm i komunikimit të një populli, në mënyrë që sot të kujtojmë se gjuha dhe shkrimi janë vlera themelore që formësojnë identitetin kolektiv dhe forcojnë lidhjen shpirtërore midis brezave”, tha ajo.

”Respekti për gjuhën dhe shkrimin e çdo bashkësie forcon kohezionin shoqëror dhe bashkon shoqërinë multietnike maqedonase. Gjuha shqipe është pjesë e mozaikut madhështor të diversitetit që është një investim në të ardhmen e atdheut tonë të përbashkët”, theksoi Siljanovska-Davkova.

”Në këtë festë shprehim mirënjohjen tonë për kontributin tuaj të vazhdueshëm në zhvillimin e arsimit dhe kulturës në jetën shoqërore, gjë që pasuron komunitetin tonë.
Urime Ditën e Alfabetit të Gjuhës Shqipe. Të vazhdojmë ta ndërtojmë vendin së bashku në frymën e respektit, barazisë dhe unitetit”, përfundon presidentja maqedonase, Gordana Siljanovska-Davkova./ /os/

The post MV – Siljanovska-Davkova: Gjuha shqipe pjesë e mozaikut madhështor të diversitetit appeared first on Agjencia Telegrafike Shqiptare.

Pres që në dhjetor të zgjedhim kontraktor për ndërtimin e autostradave Shkup – Bllacë dhe Kërçovë – Bukojçan. Nëse kushtet atmosferike e lejojnë, puna do të fillojë menjëherë, nëse jo, puna do të fillojë në pranverë, thotë zëvendëskryeministri dhe ministri i Transportit, Aleksandar Nikolloski, duke folur për dinamikën e ndërtimit të autostradave në Korridorin 8.

“Afati për dorëzimin e ofertave ka mbaruar, janë dorëzuar shumë oferta, për shkak të sekretit të procedurës nuk mund ta them numrin, por është mjaft i madh. Ka oferta serioze dhe të paktën tre prej tyre janë në kuadër të buxhetit për Shkup – Bllacë, ndërsa ka edhe tre oferta për autostradën Kërçovë – Bukojçan. Është shumë e rëndësishme për Shkup – Bllacë që arritëm ta kthejmë projektin në normalitet. Ajo që trashëguam ishin 27 milionë euro për kilometër, për të cilën mendoj se të gjithë do të bien dakord se është e paqëndrueshme. Tani e kemi kthyer brenda çmimit të rënë dakord me BERZH-in, ku kemi një kredi prej 166 milionë eurosh dhe një grant prej 30 milionë eurosh, që përfshin edhe ekzekutimin e punimeve ndërtimore, mbikëqyrjen dhe asistencën teknike për NPRRSH -in. Pres që në gjysmën e parë të dhjetorit të zgjedh një kontraktor dhe varësisht nga kushtet e motit, t’i vë në funksion, ndërsa afati i fundit atje është 2,5 vjet”, tha Nikolloski në intervistën në “TV Alsat”.

Zëvendëskryeministri paralajmëroi se po punohet në një projekt për rindërtimin e unazës së Shkupit, ndërsa punë intensive po zhvillohet edhe në autostradat e tjera në Korridorin 8.

“Po punojmë në një projekt për rindërtimin dhe rehabilitimin e plotë të unazës së Shkupit, e cila shkon nga Haraçina drejt Gjorçe Petrovit. Po punojmë në autostradën e re Tetovë-Gostivar, dinamika po shkon shkëlqyeshëm. Atje patëm probleme të caktuara me prishjen e ndërtesave të caktuara, por edhe kjo po zgjidhet, toka po shpronësohet. Po punojmë edhe në Strazhën e famshme Gostivar-Bukojçan, një projekt që është një krenari personale për mua, sepse është një projekt inxhinierik mjaft i vështirë dhe i ndërlikuar. Nga 33 km e të gjithë itinerarit, 17 km e para janë kryer. Puna do të fillojë në anën e Bukojçanit në pranverë dhe kjo do të jetë autostrada e parë që do të bashkohet përgjysmë”, theksoi zëvendëskryeministri Nikolloski.

Ai gjithashtu njoftoi se në gjysmën e parë të dhjetorit do të lëshohen për qarkullim pjesët e reja të autostradës Kërçovë-Ohër.

Agjencia për Kadastër të Patundshmërive njoftoi se ka marrë nota të larta dhe pozitive për punën e saj në raportin e fundit të Komisionit Evropian për përparimin e vendit në rrugën drejt Bashkimit Evropian.

Raporti, siç thuhet në kumtesë, ndër të tjera thotë se Drejtoria Kadastrale ka prezantuar shërbime të reja dixhitale për publikun, të cilat kanë ulur numrin e çështjeve të pazgjidhura me 20 përqind krahasuar me vitin 2024 dhe kanë ulur numrin total të çështjeve të pranuara për 10 përqind.

“Regjistrimi i tokës dhe patundshmërive ka përfunduar, ndërsa skanimi me lazer është zbatuar në nivel kombëtar, përcjell kadastri pjesën e Raportit të KE-së.

Drejtori i Agjencisë për Kadastër së Patundshmërive, Ivan Zhivkovski, theksoi në një deklaratë me shkrim se “ky vlerësim është një konfirmim i qasjes serioze, të përgjegjshme dhe efektive ndaj punës së institucionit”.

“Ky është një tregues i qartë se Agjencia për Kadastër po lëviz në drejtimin e duhur. Ne kemi dëshmuar se me punë të përkushtuar, rregull dhe profesionalizëm, mund të arrihen rezultate konkrete. Ende kemi shumë detyrime përpara, por ky vlerësim është një nxitje për të vazhduar me intensitet edhe më të madh”, tha drejtori Zhivkovski.

GYUESHEVO, 6 nëntor /ATSH-BTA/ – Zëvendëskryeministri dhe ministri i Transportit dhe Komunikacionit i Bullgarisë, Grozdan Karadjov dhe zëvendëskryeministri dhe ministri i Transportit i Maqedonisë së Veriut, Aleksandar Nikoloski nënshkruan sot një marrëveshje për përgatitjen, ndërtimin dhe funksionimin e një tuneli hekurudhor ndërkufitar midis dy vendeve.

Në ceremoni morën pjesë përfaqësues të Komisionit Evropian, misioneve diplomatike të vendeve anëtare të BE-së dhe NATO-s në Bullgari si dhe përfaqësues të Bankës Evropiane të Investimeve, Bankës Evropiane për Rindërtim dhe Zhvillim dhe Bankës Botërore.

Nikoloski tha se ishte i kënaqur që pa një hap tjetër drejt lidhjes së qyteteve të Sofjes dhe Shkupit nëpërmjet një hekurudhe, pasi ky korridor ka një rëndësi të konsiderueshme strategjike, ekonomike dhe gjeopolitike për Ballkanin dhe për Evropën në tërësi.

Ai theksoi se seksioni prej 31 kilometrash midis Kumanovës dhe Beljakovcës në Republikën e Maqedonisë së Veriut tashmë është përfunduar.

“Duke nënshkruar këtë marrëveshje, ne po ringjallim një ide 138-vjeçare nga planifikimi i hekurudhës së parë ballkanike dhe nisja e lidhjes midis Sofjes dhe Shkupit”, deklaroi Kardjov.

Ministri shprehu mirënjohjen e tij për partnerët ndërkombëtarë dhe institucionet financiare, për ambasadorët e vendeve anëtare të BE-së dhe NATO-s për rinovimin e projektit.

Tuneli ndërkufitar është një element kyç i korridorit të transportit Ballkani Perëndimor-Mesdheu Lindor dhe Korridorit strategjik VIII.

Zbatimi i tij do të sigurojë lidhjen hekurudhore që mungon midis Bullgarisë dhe Republikës së Maqedonisë së Veriut dhe do të përmirësojë aksesin në transport midis Detit të Zi dhe Adriatikut.

Gjatësia e planifikuar e tunelit është rreth 2,4 kilometra, gjysma e të cilit ndodhet në Bullgari.

Ndërtimi i tij pritet të mbështesë zhvillimin ekonomik të rajonit dhe të forcojë integrimin e rrjeteve të transportit në nivel BE-je dhe NATO-je./  a.jor.

The post FOKUS – Bullgaria dhe MV nënshkruajnë marrëveshjen për tunelin hekurudhor ndërkufitar appeared first on Agjencia Telegrafike Shqiptare.