Sipas Diario AS, Paris Saint-Germain po shqyrton seriozisht mundësinë për t’i ofruar Luis Enrique një kontratë afatgjatë, madje të përshkruar si “kontratë të përjetshme”, ndërkohë që marrëveshja aktuale e trajnerit spanjoll skadon në qershor 2027.

Enrique ka hyrë tashmë në historinë e klubit parisien, pasi javën e kaluar udhëhoqi PSG-në drejt triumfit në Kupën Ndërkontinentale ndaj Flamengos.

Ky sukses kompletoi një rekord historik prej shtatë trofesh për gjigantët francezë gjatë këtij viti.

Edhe pse sezoni i tij i parë në stolin e PSG-së u konsiderua relativisht i zakonshëm, Enrique ngriti ndjeshëm nivelin në edicionin 2024/25, ku kulmi i arritjeve ishte fitimi i parë i Ligës së Kampionëve në historinë e klubit.

Ky triumf ka shënuar fillimin e një epoke të re në kryeqytetin francez, me PSG-në që tashmë shihet si një forcë dominuese në Evropë, falë një skuadre të ndërtuar mbi talente të rinj dhe premtues.

Drejtuesit e klubit janë të vendosur të vazhdojnë bashkëpunimin me ish-trajnerin e Barcelonës për një periudhë sa më të gjatë, duke e konsideruar atë figurë kyçe në projektin afatgjatë të PSG-së.

Pavarësisht problemeve me dëmtimet që kanë shoqëruar skuadrën këtë sezon, PSG mbetet një kandidate serioze për të fituar sërish Ligën e Kampionëve, duke konfirmuar statusin e saj si një nga klubet më të fuqishme në futbollin evropian. /Telegrafi/

Sulmuesi i Paris Saint-Germain, Ousmane Dembele dhe shoqëruesit e tij janë në konflikt me Luis Enriquen dhe stafin e trajnerëve për shkak të mungesës së lojëve si titullarë.

Fituesi i Topit të Artë 2025 është përballur me lëndime këtë sezon, të cilat e kanë bërë të vështirë të përsërisë formën e sezonit të kaluar.

Pasi u rikthye nga një dëmtim në pulpë, ai është shfaqur vetëm si zëvendësues dhe humbi ndeshjen kundër Metz për shkak të sëmundjes.

Ai gjithashtu u aktivizua nga stoli në fitoren e Kupës Ndërkontinentale kundër Flamengos më parë këtë sezon, gjatë së cilës problemet e tij dolën në pah edhe një herë.

Dembele thuhet se është i gatshëm të luajë si titullar në më shumë ndeshje për të rifituar formën e tij, ndërsa stafi i trajnerëve mendon se ylli i tyre ende nuk është në formë.

Kështu, sipas mediave franceze, Dembele dhe Enrique janë në një konflikt i cili pritet të zgjidhet shumë shpejtë, pasi nuk iu konvenon asnjërës palë. /Telegrafi/

Paris Saint-Germain ka hyrë edhe një herë në histori duke fituar trofeun e 57-të të klubit, pas triumfit në Kupën Ndërkontinentale, një sukses që konfirmon statusin e PSG-së si një nga klubet më të suksesshme të futbollit modern.

Në finalen e turneut, parisienët u përballën me brazilianët e Flamengos në një ndeshje spektakolare.

Koha e rregullt u mbyll në barazim 1-1, ndërsa fati i trofeut u vendos nga pika e penalltisë, ku PSG u tregua më i saktë duke fituar 2-1 dhe duke shtuar edhe një titull prestigjioz në arkivin e tij.

Ky triumf ka një peshë të veçantë historike, pasi përfaqëson trofeun e 57-të në historinë e Paris Saint-Germain.

Një shifër që dëshmon vazhdimësinë e suksesit të klubit ndër dekada dhe rritjen e jashtëzakonshme që prej vitit 2011, kur PSG u ble nga Qatar Sports Investments.

Që nga ajo periudhë, klubi ka fituar 39 trofe, duke u shndërruar në një superfuqi të futbollit evropian.

Suksesi në Kupën Ndërkontinentale kurorëzon gjithashtu një vit të jashtëzakonshëm për parisienët.

Viti 2025 rezultoi rekord për klubin, me PSG-në që arriti shifrën historike prej 50 fitoresh brenda një viti kalendarik, një arritje e paprecedentë në historinë e klubit.

Me trofeun e 57-të tashmë në duar, Paris Saint-Germain vazhdon të ndërtojë një trashëgimi të fuqishme fituesish, duke treguar ambicie të qarta për të zgjeruar edhe më tej koleksionin e trofeve në vitet që vijnë. /Telegrafi/

Luis Enrique u shpreh i mahnitur nga paraqitja e jashtëzakonshme e Matvey Safonov në serinë e penalltive të finales së Kupës Interkontinentale, ku Paris Saint-Germain triumfoi ndaj Flamengos, duke pranuar se nuk kishte parë kurrë më parë një portier të priste katër penallti radhazi.

“Jo, është hera e parë që shoh një portier të presë katër penallti”, deklaroi trajneri i PSG-së në konferencën për shtyp pas ndeshjes, pasi heroizmat e portierit rus i siguruan ekipit fitoren 2-1 me penallti, pas barazimit 1-1 në kohën e rregullt dhe shtesat.

Safonov ndali katër nga pesë goditjet e Flamengos, duke përmbysur gjithçka pavarësisht gabimeve nga pika e bardhë edhe nga ana e PSG-së, ndërsa Enrique u kujdes të theksonte rëndësinë e suksesit kolektiv.

“Jemi të lumtur që vazhdojmë të fitojmë trofe dhe e meritonim këtë fitore”, u shpreh ai.

Kur u pyet për konkurrencën në portë pas paraqitjes së shkëlqyer të Safonov, Enrique shmangu diskutimin.

“A mendoni vërtet se ky është momenti për të folur për këtë?. Tani është koha për të festuar këtë trofe, për të përgëzuar të gjithë, ata që luajtën dhe ata që nuk luajtën dhe për t’u gëzuar për tifozët tanë”.

“Ne duam të vazhdojmë të bëjmë histori. Por për momentin, thjesht duhet ta shijojmë këtë çast”, ka deklaruar Enrique./Telegrafi/

Paris Saint-Germain po përgatitet të transferojë sulmuesin gjerman Karim Adeyemi nga Borussia Dortmund, pas miratimit nga trajneri Luis Enrique.

23-vjeçari është një nga emrat më të kërkuar në treg për shpejtësinë, aftësinë për të krijuar diferencë dhe potencialin e madh për të ardhmen.

Karriera e tij në Dortmund është e qëndrueshme, por faktorë personalë, përfshirë dëshirën për një jetë në një qytet të madh evropian, po e shtyjnë drejt një kalimi.

Luis Enrique e sheh si një lojtar të ri, ambicioz dhe me perspektivë afatgjatë.

Borussia Dortmund kërkon 75 milionë euro për ta lënë të lirë, një shifër e lartë, por e pritshme për tregun aktual të futbollit.

PSG është e gatshme të nisë negociatat, duke mbështetur dëshirën e lojtarit për të ndërruar ambient dhe për të zhvilluar më tej karrierën e tij.

Mbërritja e Adeyemit në Paris pritet të sjellë thellësi dhe fleksibilitet në sulmin e PSG-së, duke i dhënë skuadrës mundësi të ndryshojë skemat taktike dhe të rrisë kërcënimin në hapësirat kundërshtarit.

Për lojtarin, ky transferim përbën një hap të rëndësishëm në karrierë, duke i ofruar mundësinë të luajë në një klub me ambicie të mëdha në Ligën e Kampionëve dhe në kampionatin francez.

Ndërsa Dortmund mbron investimin e tij dhe PSG përgatit strategjinë e rinovimit të sulmit, vendimi për të ardhmen e Adeyemit pritet të merret përmes negociatave intensive gjatë afatiti kalimtar verorë. /Telegrafi/

Paris Saint-Germain po shfaq interes serioz për sulmuesin e Real Madridit, Rodrygo Goes, me kërkesë direkte të trajnerit Luis Enrique.

Tekniku spanjoll e konsideron brazilianin si profil ideal për filozofinë e tij të lojës dhe për rotacionin ofensiv që synon të ndërtojë në Paris.

Ky transferim pritet të jetë një nga lëvizjet më të bujshme të afatit kalimtar së verës.

Luis Enrique vlerëson veçanërisht inteligjencën taktike, disiplinën dhe sakrificën e Rodrygos në fushë.

Aftësia e tij për të luajtur në të dy krahët e sulmit apo edhe si “fals nëntë” e bën atë një armë të rëndësishme për skemat e PSG-së.

Braziliani shihet si lojtar modern, i përqendruar te loja kolektive dhe jo te individualizmi.

Ndryshe nga emra të tjerë më mediatikë të Real Madridit, PSG ka vendosur të mos ndjekë pista si ajo e Vinicius Jr.

Luis Enrique preferon futbollistë që ruajnë ekuilibrin e grupit dhe shmangin tensionet jashtë fushe.

Për drejtuesit parisienë, Rodrygo garanton stabilitet, profesionalizëm dhe përputhje të plotë me kulturën e punës së klubit.

Versatiliteti i Rodrygos do t’i jepte PSG-së më shumë paparashikueshmëri në fazën sulmuese dhe fleksibilitet në tranzicionet ofensive.

Klubi francez po përgatit strategjinë financiare për të realizuar këtë operacion, ndërsa lojtari e sheh si mundësi të madhe drejtimin e një projekti ambicioz në Paris.

PSG pritet të nisë bisedimet zyrtare në momentin e duhur, me bindjen se projekti sportiv do ta joshë sulmuesin brazilian. /Telegrafi/

Franco Foda dhe Amir Rrahmani kanë dhënë votat e tij për çmimet “The Best FIFA 2025”, për “Lojtarin më të mirë”, “Trajnerin më të mirë” dhe “Portierin më të mirë”.

Osumane Dembélé u shpall “Futbollisti më i mirë”, Luis Enrique u shpall “Trajneri më i mirë”, ndërsa Gianluigi Donnarumma u shpall “Portieri më i mirë”.

Timonieri ynë, Franco Foda për “Lojtarin më të mirë”, i ka dhënë pikët maksimale, 5 pikë, sulmuesit të PSG-së, Ousmane Dembélé. Me 3 pikë është votuar Lamine Yamal, ndërsa një pikë ka shkuar për Harry Kane.

Sa i përket homologëve të tij, Foda me 5 pikë e ka vlerësuar Luis Enriquen. Hansi Flick ka marrë 3 pikë, ndërsa Mikel Arteta ka marrë 1 pikë.

Foda ka votuar edhe për “Portierin e Vitit”, ku Gianluigi Donnarumma ka marrë 5 pikë nga ai. Manuel Neuer ka marrë 3 pikë, ndërsa Thibaut Courtois ka marrë 1 pikë.

Edhe kapiteni i Kosovës, Amir Rrahmani, ka dhënë votat e tij për çmimet “The Best FIFA 2025”, për “Lojtarin më të mirë”, “Trajnerin më të mirë” dhe “Portierin më të mirë”.

Sa i përket votave për “Lojtarin më të mirë”, mbrojtësi i Napolit i ka dhënë 5 pikë Ousmane Dembélé, ndërsa 3 pikë kanë shkuar për Kylian Mbappé. Me 1 pikë është votuar Lamine Yamal.

Nga ana tjetër, për votat për “Trajnerin më të mirë”, Amir Rrahmani pikët maksimale (5) ia ka dhënë Luis Enriques. Për Hansi Flick kanë shkuar 3 pikë, ndërsa për Enzo Maresca ka shkuar 1 pikë.

Sa i përket çmimit për “Portierin e vitit”, Rrahmani me pikët maksimale e ka vlerësuar Thibaut Courtois. Gianluigi Donnarumma ka marrë 3 pikë, ndërsa Manuel Neuer ka marrë 1 pikë.

Sa i përket gazetarëve, këtë vit nga Kosova ka votuar gazetari i Telegrafit, Lavdim Pireva.

Në çmimet “The Best” u shpallën edhe fitues të tjerë, të cilët mund t’i gjeni këtu. /Telegrafi/

Luis Enrique është zgjedhur ‘Trajneri më i Mirë’ për meshkuj nga FIFA pas një kampanje historike me Paris Saint-Germain.

Tekniku spanjoll udhëhoqi gjigantët francezë drejt titullit të parë në Ligën e Kampionëve, të cilin e fituan në mënyrë spektakolare me një fitore 5-0 në finale ndaj Interit.

PSG gjithashtu dominoi në skenën vendase, duke fituar Ligue 1, Kupën e Francës dhe Superkupën e Francës.

Ekipi i Luis Enrique shkëlqeu edhe në arenën ndërkombëtare.

Megjithëse u mundën në finale të Kupës së Botës për Klube, PSG ofroi një seri performancash të shkëlqyera gjatë rrugës drejt ndeshjes finale, duke përfshirë fitore të jashtëzakonshme ndaj Bayern Munich dhe Real Madrid.

Arritjet kryesore:

Fitues i Ligës së Kampionëve 2024/25

Fitues i Ligue 1 2024/25

Fitues i Kupës së Francës 2024/25

Fitues i Superkupës së Francës 2024

Vend i dytë në Kupën e Botës për Klube 2025

U emërua ‘Trajneri i Vitit’ në Ligue 1 nga UNFP 2024/25

/Telegrafi/

Presidenti i Barcelonës, Joan Laporta, u paraqit sot në gjykatë për të dëshmuar në çështjen e shumëpërfolur Negreira, skandal që ka ngritur akuza ndaj klubit katalanas për korrupsion dhe pagesa të dyshimta ndaj Jose Maria Enriquez Negreira, ish-nënkryetar i Komitetit Teknik të Gjyqtarëve.

Gjatë dëshmisë së tij, Laporta mohoi kategorikisht çdo lidhje me Negreiran apo rrethin e tij të ngushtë.

“Në fakt, unë nuk e njoh as Negreiran dhe as këdo nga rrethi i tij. Nuk kam pasur kurrë asnjë lloj marrëdhënieje me ta. Ne kemi paguar për raporte, në asnjë rast për të favorizuar Barcelonën. Nuk kishim nevojë për favore”, ka thënë Laporta.

Ai shtoi se pagesat ishin trashëguar nga administrata e mëparshme dhe se bazoheshin në këshillën e drejtuesve sportivë të klubit.

“I trashëguam ato pagesa. Pyeta drejtuesit sportivë dhe ata na thanë të vazhdonim me raportet. Raportet e fazës së parë nuk i kemi sepse çdo pesë vjet asgjësohen. Kostoja e tyre nuk kishte pse të kalonte në kontrollin e bordit, ishte çështje shume”, deklaroi më tej ai.

Edhe ish-trajnerët e Barcelonës, Luis Enrique dhe Ernesto Valverde, dëshmuan përmes lidhjes me video, duke mohuar se kanë qenë të informuar apo të përfshirë në ndonjë marrëdhënie me Negreiran.

“Nuk kemi qenë të vetëdijshëm për raportet e arbitrimit nga Negreira”, kanë thënë ish-drejtuesit e stolit katalanas.

Dëshmitë pritet të kenë peshë të madhe në vijimin e procesit gjyqësor, i cili ka tronditur futbollin spanjoll dhe po ndiqet nga afër nga opinioni publik. /Telegrafi/

Mesfushori i PSG-së, Warren Zaire-Emery, ka pranuar se trajneri Luis Enrique nuk është lehtë i kënaqur dhe gjithmonë kërkon më të mirën nga skuadra, duke vlerësuar gjithashtu mbështetjen e tij të plotë për çdo lojtar.

“Kërkesa e Luis Enrique? Ai kurrë nuk është i kënaqur”, ka thënë fillimisht i riu francez.

Zaire-Emery vlerëson disiplinën dhe kërkesat e trajnerit Luis Enrique ndaj çdo lojtari, pavarësisht moshës apo përvojës.

“Vitinha është një nga më të mirët në botë, por ai vazhdon ta sfidojë dhe nuk e lejon të qetësohet. Edhe lojtarët me përvojë janë këtu për ne, por trajneri është prapa çdo lojtari, pavarësisht moshës”.

Ai shtoi gjithashtu:

“Një grup i lodhur? Luis Enrique na jep sa më shumë pushim që të jetë e mundur, në mënyrë që të pastrojmë mendjen”.

Mesfushori theksoi objektivin e skuadrës:

“Të gjithë ndajmë të njëjtin qëllim: të fitojmë Ligën e Kampionëve për herë të dytë dhe të arrijmë çdo trofe të mundshëm”. /Telegrafi/

Ayman Kari, i cili në vitin 2023 konsiderohej një nga 50 yjet e rinj të futbollit botëror dhe një nga premtimet e mëdha të futbollit francez, është zhdukur nga skena e futbollit.

Mesfushori 21-vjeçar, i cili ishte i huazuar nga PSG te Lorient midis viteve 2022 dhe 2024, u rikthye te Paris Saint-Germain në sezonin 2024/25 pa luajtur asnjë ndeshje.

Luis Enrique e përjashtoi Ayman Karin nga skuadra e parë e PSG-së sepse u paraqit në stërvitjet para-sezonale me peshë 8 deri në 10 kilogramë mbipeshë.

“Kjo seri ngjarjesh duket se e ka nxitur vendimin e lojtarit për t'i dhënë fund karrierës së tij. Që nga ai moment, të gjithë në klub e penduan. E kuptuam që kishte mbaruar", tha një anëtar i PSG-së për L'Equipe.

Ayman Kari me mbipeshë në stërvitje

Zhdukja nga futbolli e lojtarit premtues që ishte më i mirë se Joao Neves

Gazeta A Bola raporton se që nga vera e kaluar, pasi kontrata e tij me klubin parisien përfundoi, ai nuk është parë në publik.

Ndeshja e fundit zyrtare e Ayman Kari ishte më 24 prill 2024, në humbjen e Lorient kundër PSG-së.

Gazeta L'Equipe raporton se Ayman Kari ka vendosur të bëjë një pushim nga karriera e tij dhe pyetja që lind është nëse kjo pauzë do të jetë e përhershme.

Ayman Kari gjatë kohës te Lorient

"Është një vendim personal nga një i ri që nuk ndihet gati për botën e futbollit profesional", thotë një mik i ngushtë i Karit.

Një vëzhgues nga një klub i madh evropian, i konsultuar nga L'Equipe, thotë se "Ayman Kari kishte gjithçka. Ai ishte në thelb më i mirë se lojtarë si Joao Neves ose Warren Zaire-Emery".

“Por, futbolli luhet edhe me kokë. Kisha dëgjuar që, që në moshë të re, ai donte ta linte futbollin", zbuloi agjenti, i cili la të kuptohej se Ayman Kari gjithmonë kishte një reputacion për një stil jetese dhe një qëndrim të shkujdesur të papajtueshëm me futbollin profesional. /Telegrafi/

Marco Asensio, i cili iu bashkua Paris Saint-Germain në verën e vitit 2023 pas largimit nga Real Madridi dhe më pas kaloi një periudhë huazimi te Aston Villa përpara transferimit të tij të përhershëm te Fenerbahçe sezonin e kaluar, ka folur për herë të parë për situatën që e çoi drejt largimit nga Franca.

Në një intervistë për Marca, 29-vjeçari shpjegoi se gjithçka nisi kur trajneri Luis Enrique vendosi papritur të mos e përfshinte më në planet e tij, pa dhënë asnjë shpjegim.

“Sezoni kishte nisur mirë, pastaj papritur, një ditë, trajneri nuk më llogariste më. Unë doja të luaja dhe të shijoja futbollin, ndaj kërkova një zgjidhje”, ka thënë fillimisht Asensio.

Ai shtoi se nuk pati asnjë konflikt të fshehur dhe se nuk e mori personale situatën.

“Sinqerisht, për sa di unë, nuk ka ndodhur asgjë. Nuk dua ta marr personale. Luis Enrique është thjesht një njeri që sillet në këtë mënyrë”, përfundoi Asensio.

Ky reagim hedh dritë mbi arsyet e largimit të tij nga PSG dhe kalimin drejt një aventure të re në Turqi. /Telegrafi/

Liverpool pati një reagim befasueshëm të mirë pas largimit të Jurgen Klopp sezonin e kaluar, me Arne Slot që e udhëhoqi skuadrën drejt një triumfi të jashtëzakonshëm në Ligën Premier.

Që nga fundi i atij sezoni, fati i tyre ka pësuar rënie të ndjeshme.

Slot është duke u përballur me vështirësi për të përsëritur suksesin e vitit të kaluar dhe Liverpool aktualisht renditet në pozitën e 12-të, pasi ka humbur gjysmën e 12 ndeshjeve të luajtura në Ligën Premier.

Tashmë 11 pikë larg Arsenalit, që kryeson renditjen, humbja 4-1 ndaj PSV Eindhoven në Ligën e Kampionëve e ka vënë në qendër të kritikave të ardhmen e tij.

Ndërsa trajneri hollandez ende ka kohë për të shpëtuar pozitën e tij, nuk ka shumë dyshime se Liverpool po shqyrton alternativa.

Luis Enrique

Sipas The Sun, ish-trajneri i Barcelonës dhe Spanjës, Luis Enrique, është opsioni i preferuar për ta zëvendësuar atë.

Kjo, natyrisht, do të kërkonte largimin e tij nga Paris Saint-Germain, ku ka kontratë deri në vitin 2027, gjë që nuk do të jetë aspak e lehtë.

Nëse Slot largohet para fundit të sezonit, atëherë Jurgen Klopp mund të merret në konsideratë si zgjidhje e përkohshme deri në verë, me Liverpool që më pas do të synonte Luis Enrique si zgjidhje afatgjatë.

“Lucho”, në këtë pikë, i ka fituar të gjitha te PSG-ja dhe mund të mendojë se pas tre sezonesh nuk ka më asgjë për të arritur në Paris deri në fund të vitit./Telegrafi/

Një nga ndeshjet më tërheqëse të mbrëmjes në Ligën e Kampionëve u luajt mes Paris Saint-Germain dhe Tottenham në "Parc des Princes", përfunduar me fitoren 5-3 të PSG-së.

Për skuadrën parisiene shënuan Vitinha tre gola, ndërsa Fabian Ruiz dhe Willian Pacho kontribuuan me nga një gol secili.

Te Tottenham, dy gola shënoi Randal Kolo Muani, ndërsa Richarlison shënoi një herë. Me këtë fitore, PSG ngjitet në vendin e dytë në renditjen e Ligës së Kampionëve, ndërsa Tottenham renditet i 16-ti.

telegrafi.com

Gjatë minutave të para nuk pati gola, dhe transmetimi vuri re një detaj të pazakontë: trajneri i PSG-së, Luis Enrique, ndodhej në tribunë edhe pse nuk ishte i pezulluar.

Ai shpjegoi se preferon të ndjekë pjesën e parë të ndeshjes nga një pozicion më i lartë, me kufje në kokë dhe duke mbajtur lidhje të vazhdueshme me stolin rezervë. /Telegrafi/

Me tre golat e shënuar kundër Le Havre të shtunën mbrëma, Paris Saint-Germain ka arritur shifrën e 200 golave në Ligue 1 që nga ardhja e Luis Enriques, dhe këtë e ka bërë në vetëm 81 ndeshje.

Sipas statistikave të publikuara nga vetë klubi, kjo arritje është të paktën 41 gola më shumë se çdo trajner tjetër i PSG-së në kampionat për të njëjtën periudhë kohore.

Ky rekord tregon qartë për fuqinë sulmuese të parisienëve dhe për transformimin që Enrique i ka sjellë skuadrës, duke e shndërruar në një nga makineritë më produktive të golit në Evropë.

telegrafi.com

Pas 13 xhirove në Ligue 1, PSG është lider i kampionatit me 30 pikë, dy më shumë se Marseille.

Ndërkohë këtë edicion skuadra e Luis Enriques ka realizuar 27 gola në Ligue 1, por që nuk është sulmi më i mirë në kampionat, pasi atë e mbanë Marseille me 33 gola të shënuar. /Telegrafi/

Barcelona janë shumë të kënaqur me Hansi Flick në pankinë, por së shpejti do të duhet të fillojnë të mendojnë për jetën pas tij.

Ish-trajneri i Bayern Munich dhe Gjermanisë ka kontratë deri në vitin 2027 dhe pritet të tërhiqet nga futbolli në fund të sezonit 2026/2027.

Nëse kjo ndodh, Barcelona do të ishte nën presion për të siguruar një trajner që mund të përballojë trashëgiminë e ndikimit të Flick.

Megjithatë, një nga kandidatët potencialë është Luis Enrique, i cili pati një periudhë të shkëlqyer në krye të klubit mes viteve 2014 dhe 2017.

Luis Enrique udhëhoqi Paris Saint-Germain drejt titullit të tyre të parë në histori në Ligën e Kampionëve sezonin e kaluar dhe megjithëse firmosi një kontratë të re deri në vitin 2027 pak muaj më parë, tani është raportuar se ai mund të kthehet te Barcelona pas skadimit të kësaj marrëveshjeje.

Luis Enrique

Sipas Sport, gazetari Daniel Riolo ka deklaruar se Luis Enrique po mendon të rikthehet te Barcelona kur t’i përfundojë kontrata aktuale me PSG.

“Jam më kritik ndaj atyre që e kanë idhull sesa ndaj tij personalisht. Sinqerisht, nuk shoh te ai cilësitë njerëzore që pretendohet se ka. Ai është 100 për qind Barça. Është dikush që ndryshon skuadra vazhdimisht”, ka deklaruar Riolo.

Nëse Flick largohet në verën e vitit 2027, do të kishte shumë logjikë që Barcelona të synonte Luis Enrique si zëvendësuesin e tij, sidomos pasi ai do të ishte i lirë në atë periudhë./Telegrafi/

Trajneri i Paris Saint-Germain, Luis Enrique, mendon se nuk ka nxitim për nënshkrime të reja pas krizës në rritje të lëndimeve, duke këmbëngulur se ka besim te lojtarët e disponueshëm në skuadër.

Parisienët janë përballur me disa lëndime këtë sezon, kryesisht për shkak të sezonit të ngjeshur 2024/25, ku fituan tripletën.

Desire Doue, Ousmane Dembele dhe Achraf Hakimi kanë pësuar lëndime brenda një jave. Ata do të mungojnë për një kohë të gjatë.

Megjithatë, trajneri Enrique nuk i sheh si të domosdoshme transferimet e reja, edhe pse thekson se është i hapur për një gjë të tillë.

"Jemi gjithmonë të hapur për nënshkrime të reja, por nuk ka nxitim, nuk ka shqetësime”, ka thënë fillimisht Enrique.

“Po i shohim anët pozitive dhe negative. Nuk ka problem për momentin. Ka lëndime, por ky është rasti në çdo klub. Kemi besim te lojtarët në ekip", përfundoi trajneri spanjoll. /Telegrafi/

Trajneri i Paris Saint-Germain, Luis Enrique, ka folur para sfidës së madhe të Ligës së Kampionëve kundër Bayern Munich, duke dhënë detaje për gjendjen e skuadrës, rolin e kapitenit dhe rëndësinë e ndeshjes.

I pyetur për gjendjen e Ousmane Dembele, trajneri spanjoll u shpreh se lojtari është në formë të mirë, por skuadra nuk do të marrë asnjë rrezik të panevojshëm.

“Nuk marrim rreziqe me asnjë lojtar. Por Ousmane është në gjendje të mirë. Ka kryer të gjitha seancat stërvitore gjatë dy javëve të fundit dhe ka luajtur. Ai po përmirëson formën fizike. Do të luajë, natyrisht. Është gati për konkurrencë. Nesër do të vendosim për minutazhin e tij”.

Sa i përket çështjes së kapitenit, Luis Enrique theksoi rëndësinë e Marquinhos në grup.

“Kapitenin e zgjedhin vetë lojtarët. Por mendoj se Marquinhos e ka treguar vlerën e tij, e pamë të gjithë se si u festua pas fitores në Ligën e Kampionëve. Nuk ka dyshim për nivelin e tij, është një person i mrekullueshëm dhe një lider i vërtetë. Jam shumë i lumtur që e kam në skuadër dhe shpresoj të qëndrojë gjatë”.

Në lidhje me rëndësinë e përballjes ndaj Bayernit, trajneri i PSG-së ka thënë:

“Nuk është koha për të vlerësuar ekipin tonë. Duhet të kemi besim. Fitorja nesër është e rëndësishme, si për tre pikët ashtu edhe për pozicionin në grup, që është më i vështiri i kompeticionit. Duam të jemi konkurrues në çdo ndeshje dhe ta shijojmë këtë moment me tifozët tanë”.

Luis Enrique paralajmëroi se asnjëra skuadër nuk do të ndryshojë stilin e lojës.

“Bayern nuk do ta ndryshojë mënyrën e tyre të lojës. As ne. Ndoshta do të bëjmë edhe më shumë, pasi luajmë në shtëpi. Mendoj se mund të përballojmë presionin e tyre dhe t’u krijojmë probleme. Edhe ata janë të fortë. Do të jetë një ndeshje e ekuilibruar, ku detajet do të bëjnë diferencën. Kush i kontrollon më mirë, do të fitojë. Shpresoj që tifozët të kalojnë një mbrëmje fantastike”.

Në përfundim, trajneri i PSG-së nënvizoi rëndësinë e mbledhjes së pikëve që në fillim të fazës së grupeve.

“Të gjitha ndeshjet janë të rëndësishme. Kemi një kalendar shumë intensiv dhe të vështirë. Duhet të fitojmë pikët sa më shpejt të jetë e mundur. Këtë e bëmë në tre ndeshjet e para dhe duam ta përsërisim edhe nesër”, përfundoi Enrique. /Telegrafi/

Trajneri i Paris Saint-Germain, Luis Enrique ka thënë se nuk është një lajm i mirë lëndimi i yllit të ekipit, Desire Doue, i cili u detyrua të largohej me barelë nga fusha.

Doue u zëvendësua në minutën e 62-të nga Bradley Barcola pasi pësoi një dëmtim të vjetër në kofshë.

Pas vërshëllimës së fundit të barazimit 1-1 kundër Lorient, Enrique dha lajme shqetësuese për Doue.

Desire Doue largohet me barelë pas një dëmtimi kundër Lorient

"Doue? Nuk e di, nuk jam mjeku, por nuk është lajm i mirë", ka thënë fillimisht Enrique, i trishtuar që pa sulmuesin e tij të kthehej në spital vetëm disa javë pas rikthimit të tij.

"Nuk i pashë imazhet, ishte në anën tjetër të fushës", përfundoi trajneri spanjoll.

Ndryshe, Doue është një titullar i rregullt i PSG-së, duke mbuluar pozitën e sulmuesit anësor të djathtë, por herë pas here edhe si mesfushor sulmues. /Telegrafi/

Pas disa javësh mungesë për shkak të lëndimit, sulmuesi i Paris Saint-Germain, Ousmane Dembele, është rikthyer në dispozicion të trajnerit Luis Enrique.

Ai është përfshirë në listën e lojtarëve të grumbulluar për ndeshjen e fazës së grupeve të Ligës së Kampionëve kundër Bayer Leverkusen.

Në konferencën për shtyp para ndeshjes, trajneri Enrique foli për rikthimin e lojtarit, duke theksuar se më e rëndësishme është energjia që Dembele sjell në ekip sesa çmimet individuale.

“Nuk është Topi i Artë që po kthehet, është Ousmane Dembele, personi që sjell energjinë e tij në ekip. Topi i Artë, ai është kapitull i mbyllur”, ka thënë fillimisht Enrique.

Enrique u shpreh qartë se për të, fokusi është te skuadra dhe jo te trofetë personalë.

“Ne po punojmë për të fituar ndeshjen e tretë në Ligën e Kampionëve. Jam më i lumtur që kemi rikthyer njeriun dhe energjinë e tij, sesa Topin e Artë”, përfundoi ai.

Paris Saint-Germain do të synojë tashmë fitoren e tretë radhazi në këtë edicion të Ligës së Kampionëve. /Telegrafi/