Karim Benzema i ka dhënë dy mesazhe të qarta presidentit të Real Madridit, Florentino Perez, gjatë takimit të tyre në Arabinë Saudite, ku të dy ishin të pranishëm në finalen e Superkupës së Spanjës.
Sipas raportimit të gazetarit Ramon Alvarez, sulmuesi francez e ka këshilluar kreun e klubit që të vazhdojë t’i besojë trajnerit Xabi Alonso dhe të përforcojë mesfushën e skuadrës.
Ish-kapiteni i Real Madridit, i cili aktualisht luan te Al-Ittihad, mbetet i lidhur ngushtë me klubin madrilen dhe është i informuar për situatën e brendshme. Ai thuhet se ka theksuar rëndësinë e mbështetjes së plotë për projektin e Xabi Alonsos në “Santiago Bernabeu”, veçanërisht pas një fillimi të vështirë sezoni.
Humbja 3-2 ndaj Barcelonës në finalen e Superkupës së Spanjës ka shtuar presionin mbi trajnerin spanjoll, megjithatë drejtuesit e klubit vazhdojnë ta mbështesin atë. Në këtë kontekst, ndërhyrja e Benzemas shihet si një sinjal i fortë besimi ndaj Alonsos dhe vizionit të tij.
Një tjetër pikë kyçe e këshillës së Benzemas lidhet me nevojën për të përforcuar mesfushën, repart që prej kohësh po diskutohet si një nga pikat më të ndjeshme të Real Madridit.
Balanca në mesfushë konsiderohet thelbësore për funksionimin e sistemit taktik të Xabi Alonsos, sidomos pas ndryshimeve të mëdha në këtë repart.
Edhe pse klubi nuk ka konfirmuar ende plane konkrete për transferime të menjëhershme, sugjerimi i Benzemas tregon ndikimin e vazhdueshëm të tij dhe shqetësimin për konkurrueshmërinë e Real Madridit në të ardhmen. Këshilla e një figure kaq të rëndësishme në historinë e klubit pritet të merret seriozisht nga drejtuesit madrilenë./Telegrafi
Trajneri i Atletico Madridit, Diego Simeone, ka kërkuar publikisht ndjesë ndaj Vinicius Jr dhe presidentit të Real Madridit, Florentino Perez, pas sjelljes së tij gjatë gjysmëfinales së Superkupës së Spanjës mes dy skuadrave.
Duke folur për mediat përpara ndeshjes së Atletico Madridit në Kupën e Mbretit ndaj Deportivo La Coruna, Simeone iu rikthye incidentit në të cilin u pa duke provokuar Vinicius Jr nga zona teknike.
Trajneri argjentinas i ishte referuar fishkëllimave që braziliani ka marrë në “Santiago Bernabeu”, duke sugjeruar gjithashtu se Florentino Perez do ta shkarkonte atë në fund të sezonit.
“Florentino do të të shkarkojë, mbaje mend çfarë po të them”, u dëgjua Simeone duke thënë gjatë ndeshjes.
Këto komente shkaktuan reagim të ashpër nga Vinicius Jr dhe trajneri i Real Madridit, Xabi Alonso, ndërsa klubi madrilen e konsideroi sjelljen e Simeones si tejkalim të kufijve.
Pas reflektimit mbi situatën, Simeone doli me një deklaratë publike, duke pranuar gabimin e tij dhe duke kërkuar ndjesë.
“Dua t’i kërkoj ndjesë zotit Florentino dhe zotit Vinicius për incidentin që panë. Ishte e gabuar nga ana ime të vendosja veten në atë pozicion dhe e pranoj se kam gabuar”, u shpreh Simeone.
Megjithatë, trajneri i Atletico Madridit sqaroi se deklarata e tij ishte thjesht një ndjesë, pa shkuar deri te kërkimi i faljes.
“Kërkoj ndjesë, por nuk kërkoj falje. Nuk kam asgjë më tepër për të shtuar”, përfundoi Simeone. /Telegrafi/
Sulmuesi i Real Madridit, Vinicius Junior, ka kontratë edhe për 18 muaj të tjerë me klubin madrilen dhe aktualisht ka pak shenja se kjo çështje do të zgjidhet shpejt. Megjithatë, ende ekzistojnë faktorë që i afrojnë të dyja palët në negociata.
Sulmuesi brazilian raportohet se kishte rënë dakord për kushtet e një kontrate të re gjatë pranverës, por në qershor agjenti i tij rriti kërkesat ndaj Real Madridit.
Kërkesa kryesore është që Vinicius të përfitojë të njëjtin nivel page si Kylian Mbappé, duke përfshirë edhe bonuset që i paguhen sulmuesit francez, diçka për të cilën Real Madridi nuk ka ndërmend të pajtohet.
Pavarësisht që të dyja palët po qëndrojnë fort në pozicionet e tyre, presidenti i Real Madridit, Florentino Perez, vazhdon të jetë i vendosur për ta mbajtur Viniciusin në klub.
Javën e kaluar u raportua se për herë të parë lojtari po e konsideronte largimin, pas pritjes armiqësore që kishte marrë nga tifozët në “Santiago Bernabeu”.
Sipas RadioMarca, Perez nuk dëshiron “në asnjë rrethanë” që Vinicius të largohet nga klubi. Edhe pse në treg ka lojtarë të krahasueshëm, thuhet se nuk ka asnjë që është qartësisht më i mirë se braziliani.
Po ashtu, theksohet se nuk do të ishte aspak e pazakontë që Vinicius ta rinovojë kontratën në muajt në vijim.
Megjithatë, raportimet më të fundit sugjerojnë se bisedimet do të shtyhen deri në verën e ardhshme dhe mund të zhvillohen pas Kupës së Botës.
Duke pasur parasysh rënien e formës gjatë vitit të fundit, Vinicius tani ndodhet nën presion gjithnjë e më të madh për të dëshmuar se e meriton kontratën që i është ofruar, e lëre më një marrëveshje të ngjashme me atë të Mbappes./Telegrafi/
Duke folur në darkën e Krishtlindjeve të Barcelonës, presidenti Joan Laporta i ka dhënë një paralajmërim të prerë Real Madridit dhe presidentit të tyre Florentino Perez pas akuzave të tyre të fundit kundër klubit katalanas në lidhje me skandalin Negreira.
Rasti Negreira është duke shkuar drejt fundit tashmë pasi janë duke u mbajtur seancat e fundit gjyqësore para vendimit, por akuzat e Real Madridit drejt Barcelonës nuk janë ndalur, duke bërë drejtuesit katalunas të reagojnë.
“Ne të gjithë e dimë se në çdo veprim sportiv, shoqëror, institucional dhe madje edhe ekonomik, ne lëmë gjurmën tonë, si një klub i respektuar, i njohur, i admiruar dhe i dashur”, ka thënë fillimisht Laporta.
“Gjithashtu duhet të them se kjo staturë që kemi gjeneron një zili që nuk pritet mirë nga ata që, përmes taktikave të fshehta, shpërfillin të gjitha kodet e sjelljes, si etike ashtu edhe morale, dhe jo vetëm në sport, dua të them në përgjithësi”.
“Mendoj se e dini se kujt po i referohem, ata që janë arkitektët e fushatave të vazhdueshme për të diskredituar stemën dhe thelbin tonë, dhe ne nuk do ta lejojmë këtë".
“Këta janë ata që e ngatërrojnë pushtetin me despotizmin, jo me despotizmin e iluminuar, këta janë ata që praktikojnë cinizëm dhe arrogancë të tepruar, këta janë ata që kanë një monstruozitet televiziv që vetëm vjell gënjeshtra dhe helmon vazhdimisht dhe përgjithmonë ajrin”.
“Këtyre njerëzve, u them se Barça është përsëri e fortë, si në fushë ashtu edhe jashtë saj, dhe ndërsa ata shkatërrojnë dhe përpiqen të fshijnë ose shtrembërojnë historinë, nuk do të kenë sukses”.
“Ne po ndërtojmë, dhe po ndërtojmë një skenë të shkëlqyer në historinë e Barcelonës që do të arrijë përsëri lavdinë dhe do të bëjë histori, dhe kjo është falë jush, në thelb", përfundoi presidenti i Barcelonës. /Telegrafi/
Itziar Gonzales De Arriba, një nutricioniste sportive e respektuar me kualifikime mbresëlënëse, iu bashkua Real Madridit rreth një vit më parë.
Klubi e punësoi atë në kulmin e krizës së dëmtimeve muskulore, ndërsa referencat e saj përfshinin emra si Dani Carvajal dhe Rodrygo – lojtarë që, sipas saj, nën drejtimin e saj kishin lënë pas problemet fizike.
Ajo që në fillim dukej si një bashkëpunim perfekt, u shndërrua shpejt në një makth. Pas muajsh heshtjeje dhe një përplasjeje të hapur ligjore me klubin, Itziar vendosi të tregojë versionin e saj të ngjarjeve, të cilin e përshkruan si “ferr në Shtëpinë e Bardhë”, shkruan MARCA.
Ftesa e presidentit dhe pritja armiqësore
Gonzalez pretendon se mbërriti në klub me ftesë personale të presidentit Florentino Pérez.
“Për aq sa di unë, presidenti i kërkoi shërbimit mjekësor që të vija në sezonin 2021/22. Për shkak të përvojave të këqija me ekipe të tjera, refuzova fillimisht, por ata këmbëngulën”, kujton ajo.
Në atë sezon, ajo punoi vetëm me Carvajal dhe Rodrygo, por në tetor 2024 klubi e kontaktoi sërish.
“Pranova sepse më thanë se ishte kërkesë personale e presidentit dhe se ai do të sigurohej që mjekët të më respektonin dhe të më linin të punoja”, shpjegon Itziar.
Megjithatë, pritja ishte gjithçka tjetër veçse miqësore, sidomos nga stafi mjekësor i klubit.
“Që nga minuta e parë, shërbimi mjekësor krijoi një mjedis armiqësor. Ditën e parë më thanë se isha aty për tekat e presidentit dhe se do ta manipulonin atë për të më shkarkuar. Nuk më prezantuan, nuk më përshëndetën dhe nuk flisnin me mua”, pretendon ajo.
Situata u përkeqësua shpejt, madje duke e akuzuar për vjedhje.
“Brenda javës së parë, më akuzuan për vjedhje të suplementeve dietike. Arrita të provoja se nuk isha fajtore, por frika më pushtoi dhe që nga ajo ditë fillova të komunikoja gjithçka vetëm me shkrim”, deklaroi ajo De Arriba.
Sabotim në çdo hap
Sipas saj, Florentino Pérez kishte një vizion të qartë për rolin e saj, madje edhe kishte biseduar.
“Presidenti erdhi personalisht dhe më shpjegoi çfarë donte që unë të bëja: të zbatoja metodën time, të isha përgjegjëse për ushqyerjen, menutë e udhëtimeve dhe suplementet për të gjithë ekipin”, thotë González.
Por zbatimi i këtij plani, sipas saj, u sabotua vazhdimisht nga stafi mjekësor i klubit.
“Më krijonin probleme të vazhdueshme: vendosnin në bufe ushqime që nuk i rekomandoja, kamerierja u thoshte lojtarëve të mos më dëgjonin, shefi i kuzhinës përgatiste çfarë të donte – madje edhe ëmbëlsira para ndeshjes”, tregon ajo.
Ajo shton se mjekët u thoshin lojtarëve të mos ndiqnin udhëzimet e saj dhe të mos i jepnin informacion për gjendjen fizike.
“Talleshin me mua, qeshnin në grupet e WhatsApp-it dhe u thoshin lojtarëve t’i bënin gjërat ndryshe nga ajo që thosha unë”, tregon ajo.
Pavarësisht pengesave, disa lojtarë që ndoqën programin e saj filluan të ndienin përmirësime të dukshme.
“Njëri ndaloi së ndieri dhimbje, një tjetër nuk kishte më ngërçe, një i tretë thoshte se nuk lodhej kurrë. Disa thanë se mund të vazhdonin të luanin edhe pas minutës së 90-të”, tregon ajo.
Sipas Itziarit, ky reagim pozitiv ishte pika e kthesës.
“Fakti që lojtarët po e lidhnin gjendjen e tyre me dietën time krijoi një urrejtje të padurueshme ndaj meje nga shërbimi mjekësor. Trembëdhjetë ditë pas nënshkrimit të kontratës kërkova ta ndërprisja, por më thanë të prisja sepse lojtarët dhe presidenti më donin”, nënvizon ajo.
Tensionet arritën kulmin pas ndeshjes kundër Atalantës në dhjetor 2024, kur metodat e saj u përdorën më gjerësisht.
“Komentet në dhomën e zhveshjes ishin shumë pozitive dhe stafi mjekësor nuk e përballoi dot këtë”, thotë ajo.
Pas ndeshjes kundër Gironës në shkurt 2025, situata shpërtheu.
“Pashë presidentin Pérez të vinte tek unë shumë i zemëruar për gënjeshtrat që i kishin thënë për mua. Për mua, aty mbaroi gjithçka”.
Sipas saj, më pas iu ndalua kontakti me lojtarët, hyrja në ndeshje dhe në fund edhe hyrja në qendrën stërvitore Valdebebas.
“Më thanë se ishte për sigurinë time dhe se do të hapej një hetim i brendshëm. Më detyruan të punoja nga shtëpia, edhe pse shërbimi mjekësor nuk zbatonte asgjë nga udhëzimet e mia”, tregon e mërzitur.
Më në fund, drejtori i burimeve njerëzore e njoftoi për përfundimin e bashkëpunimit.
“Më falënderuan për punën, pranuan se kishin dështuar me mjekët dhe më paguan pjesën e mbetur të kontratës. E vetmja gjë që kërkova ishte që presidenti dhe lojtarët të dinin të vërtetën dhe të mohoheshin gënjeshtrat për mua. Më thanë se kjo nuk ishte e mundur”, tregon ajo.
Padi për të vërtetën
Pavarësisht paralajmërimeve, Itziar González vendosi të ngrejë padi ndaj klubit më të madh në botë.
“Edhe pse më këshilluan të mos e bëja, duke më thënë se nuk kisha asnjë shans dhe se kjo do të ma shkatërronte jetën, vendosa të shkoj në gjykatë. Nuk më intereson fitorja apo humbja, dua vetëm që e vërteta të dalë në dritë”
“Të gjithë më thanë se Real Madridi ka fuqi të madhe dhe se do të më shkatërronin reputacionin. Ende kam ankthe çdo natë. Dua ta mbyll këtë kapitull dhe ndiej se nuk mund ta bëj pa treguar historinë time”, e mbyll rrëfimin e saj De Arriba. /Telegrafi/
Javier Tebas u shfaq në podkastin e Marc Vidal , Mission 2050, për të diskutuar të gjitha çështjet që ndikojnë në La Liga: luftën kundër mashtrimit audiovizual, të drejtat televizive, çmimin e futbollit, rastin Negreira, Superligën, marrëdhënien e tij me Real Madridin e shumë gjëra tjera.
Ditëve të fundit është ri-aktualizuar ‘lufta’ mes Real Madridit dhe drejtuesve të La Ligës shkaku i gjyqtarëve, të cilët klubi mbretëror i akuzon.
Një temë tjetër ku palët ‘luftojnë’ mes vete është “Rasti Negreira”, ku është e përfshirë Barcelona dhe Real Madridi kërkon që ata të dënohen.
Për këtë rast dhe akuzat e presidentit të Real Madridit, Florentino Perez, është pyetur së fundmi Tebas, i cili ka thënë se i pari i Los Blancos nuk di asgjë rreth kësaj çështje.
“Presidenti i Real Madridit është plotësisht i painformuar për të gjithë këtë situatë. Ai tha se për shkak se Laporta u mor në pyetje dhe La Liga bëri një pyetje gjatë radhës së tyre. Por sigurisht, ata prej nesh që janë avokatë të specializuar në marrjen në pyetje penale e dinë që gjyqtari bën pyetje i pari, pastaj prokurori publik, pastaj pala e parë që paraqitet, pastaj tjetra dhe pastaj tjetra”, ka thënë fillimisht Tebas.
“Ne ishim pala e tretë që u paraqit, prokurori bëri 19 pyetje. Ai tashmë kishte mjaft për të thënë. Pastaj një arbitër bëri dy pyetje dhe ne bëmë një. Nuk kishin mbetur më pyetje dhe personi i fundit që bëri ishte avokati i Real Madridit”.
“Pse ishte ai i fundit që bëri pyetje? Sepse ai ishte i fundit që u paraqit, gjë që i mori dy muaj. Sepse në atë kohë Barcelona ishte një aleat për shkak të Superligës dhe kishte dyshime për t'u paraqitur. Tani që ata janë larguar nga Superliga, ata po sillen si kampionë”.
“Por për më tepër, dymbëdhjetë pyetjet që ai bëri ishin përgjigjur tashmë nga Luis Enrique dhe Valverde në pyetjet e mëparshme. Është e gjitha një farsë, një gabim”, përfundoi i pari i La Ligës. /Telegrafi/
Pasi presidenti i Real Madridit, Florentino Perez, shfrytëzoi mesazhin e tij të Krishtlindjes për ta rikthyer vëmendjen te çështja Negreira dhe Barcelona, homologu i tij Joan Laporta ka pritur më pak se 24 orë për t’u kundërpërgjigjur.
Vetë Laporta ishte të premten në gjykatë për të dhënë dëshminë e tij, teksa gjigantët katalanas po përballen me akuza për korrupsion.
Dëshmia e Laportës u publikua të martën dhe u zbulua se ai kishte deklaruar se nuk ishte takuar kurrë me Jose Maria Enriquez Negreira, ish-nënkryetarin e CTA-së dhe personin për të cilin Barcelona akuzohet se ka tentuar të ushtrojë ndikim.
Perez e kishte cilësuar këtë si “skandalin më të madh në historinë e futbollit” dhe kishte kërkuar ndëshkim.
Duke folur me rastin e mbërritjes në Guadalajara përpara përballjes së Barcelonës në Kupën e Mbretit, Laporta iu përgjigj Perezit.
“Obsesioni ‘barcelonist’ po përkeqësohet dhe shoh se ka zënë rrënjë në zemrat e tifozëve të Madridit. Asgjë më shumë për të thënë”.
“Ne nuk kemi asgjë më shumë për të shtuar; kemi ardhur këtu për të luajtur futboll dhe për të dhënë një shfaqje të bukur”, ka deklaruar Laporta për Sport.
Kreu i Barcelonës ia atribuoi komentet e Perezit vështirësive aktuale të ‘Los Blancos’.
“Gjërat po na shkojnë mirë sepse ata janë më të shqetësuar për ne sesa duhet. Ata vazhdojnë ta zvarrisin çështjen Negreira për të justifikuar diçka që nuk po u funksionon”.
Laporta vuri gjithashtu në dukje një fakt që është përmendur nga shumëkush në Spanjë: qasja e Real Madridit ndaj çështjes Negreira ka ndryshuar që nga momenti kur Barcelona u tërhoq nga projekti i Superligës, i cili i bashkonte dy gjigantët e El Clasicos.
Gjatë fjalimit të tij në Asamblenë e Përgjithshme në vitin 2024, Perez e kaloi lehtë çështjen Negreira, duke theksuar se “klube si Real Madridi dhe Barcelona duhet ta ndihmojnë njëri-tjetrin”./Telegrafi/
Shoqata e Spanjolle e Gjyqtarëve i është përgjigjur deklaratave të bëra nga presidenti i Real Madridit, Florentino Perez, në lidhje me korrupsionin midis gjyqtarëve.
Më parë, duke folur për hetimin e "rastit Negreira", Perez tha se Real Madridi ka mbetur i vetëm në luftën kundër korrupsionit.
"Është plotësisht e pakuptueshme pse autoritetet e kanë lënë Real Madridin vetëm në këtë luftë. Si mund ta harrojmë skandalin më të madh në historinë e futbollit? Si mund të sillen në këtë mënyrë RFEF dhe La Liga ?", ka thënë Perez.
Presidenti i Real Madridit kritikoi gjithashtu gjyqtarin Pablo Gonzalez Fuertes, i cili ishte përgjegjës për VAR në ndeshjen e La Ligës kundër Alaves.
"Ai kërcënoi të ndërmerrte veprime kundër Real Madridit në prag të finales së Kupës. Dhe tani ata nuk po japin penalizime për faullet ndaj Vinicius dhe Rodrygo", shtoi i pari i Los Blancos.
Këto komente të Perez kanë bërë që Shoqata Spanjolle e Gjyqtarëve të Futbollit të reagoj me anë të një komunikate.
"Shoqata Spanjolle e Gjyqtarëve të Futbollit nuk pajtohet me deklaratat e fundit publike të bëra nga presidenti i Real Madridit, Florentino Perez, duke pasur parasysh dëmin serioz që deklarata të tilla i shkaktojnë reputacionit të komunitetit të gjyqtarëve dhe futbollit spanjoll”.
“Komuniteti spanjoll i gjyqtarëve vepron në mënyrë të pavarur, në mënyrë strikte dhe profesionale, dhe nuk është pjesë e ndonjë skeme apo bashkëpunimi në interes të klubeve apo zyrtarëve”.
“Në të ashtuquajturin “rasti Negreira”, asnjë gjyqtar nuk është mbajtur përgjegjës gjatë gjithë hetimit. Ne nuk mund të pajtohemi me akuzat për korrupsion kundër gjyqtarëve. Akuzat e përgjithësuara kundër gjyqtarëve shkaktojnë dëme të panevojshme në reputacionin e profesionistëve që kryejnë detyrat e tyre nën presion maksimal dhe shqyrtim të vazhdueshëm publik, dhe dëmtojnë integritetin e vetë garës”.
🚨 Official Statement from the Spanish Football Referees' Association:
"The Spanish Football Referees' Association expresses its rejection of the public statements issued by the president of Real Madrid Club, due to the severe damage they represent to the reputation of the… pic.twitter.com/ZWFlQLqQnP — Madrid Universal (@MadridUniversal) December 16, 2025
“Ne e kuptojmë që ndarja e drejtësisë nuk mund të përdoret si justifikim për rezultatet sportive. Në futboll, ti fiton dhe humb në fushë".
“AESAF shpreh mbështetjen e saj për Pablo Gonzalez Fuertes dhe të gjithë gjyqtarët në Spanjë, puna profesionale dhe personale e të cilëve meriton respektin e organizatave dhe shoqërisë. Ne hedhim poshtë çdo përpjekje për të personalizuar sulmet ose për të diskredituar publikisht gjyqtarët pa justifikim”.
“Duam të deklarojmë se akuzat për kërcënime të bëra në konferencën për shtyp për finalen e Kupës së Spanjës 2024/25 janë të pavërteta dhe, të paktën, një gënjeshtër”, tha organizata në një deklaratë. /Telegrafi/
Real Madridi arriti të mposhtë Alavesin me rezultatin 2-1, por kjo fitore nuk ishte aspak e bindshme, dhe Xabi Alonso ende nuk mund të ketë qetësi.
Ende ka diskutime për një shkarkim të mundshëm të Xabi Alonsos, trajnerit që u emërua në stolin e Real Madridit këtë verë.
Sipas El Nacional, Kylian Mbappe e mbështet fuqishëm Alonson dhe dëshiron që ai të vazhdojë drejtimin e ekipit, duke vlerësuar stilin dhe udhëheqjen e tij.
Nëse do të ndodhë një ndarje me Xabi Alonson, Mbappe ka bërë të qartë për klubin preferencën e tij për një zëvendësues – bashkëkombësin e tij, Zinedine Zidane.
Megjithatë, rikthimi i “Zizu” në stolin e Real Madridit duket i vështirë, pasi ai ka një marrëveshje verbale për të marrë drejtimin e kombëtares franceze pas Kupës së Botës 2026.
Florentino Perez ka një trajner të preferuar, Jurgen Klopp, por Mbappe ka bërë të qartë në diskutime private se nuk dëshiron të punojë me gjermanin.
Ky qëndrim i lojtarit spanjoll i citon burimet nga El Nacional, duke treguar tensionin mes dëshirës së klubit dhe preferencave të yllit francez.
Në këtë situatë, Real Madrid duhet të balancojë midis vendimeve të klubit dhe dëshirës së Mbappé, lojtarit kryesor që po mban ekipin këtë sezon. /Telegrafi/
Bisedimet e bllokuara për rinovimin e kontratës mes Real Madridit dhe Vinicius Junior raportohet se po shkojnë drejt një përfundimi, me klubin madrilen që ka vendosur zgjatjen e marrëveshjes së lojtarit me fanellën numër 7 si prioritet absolut dhe urgjent.
Sulmuesi brazilian, kontrata aktuale e të cilit skadon në qershor të vitit 2027, është në negociata me “Los Blancos” që nga janari. Megjithatë, përparimi ka qenë minimal, pasi palët nuk kanë gjetur gjuhë të përbashkët për çështjen e pagës. Vinicius Junior raportohet se po kërkon rreth 30 milionë euro në sezon, një shifër që ka shkaktuar ngërç në negociata.
Situata u komplikua edhe më shumë kur anësori vendosi t’i ngrijë përkohësisht bisedimet për shkak të përkeqësimit të marrëdhënies së tij me trajnerin aktual, Xabi Alonso. Sipas raportimeve, Vinicius i ka bërë të qartë presidentit Florentino Perez se rinovimi i kontratës nuk është opsioni më i mirë për të, për aq kohë sa marrëdhëniet e tij me trajnerin mbeten të tensionuara.
Megjithatë, ky ngërç pritet të marrë fund së shpejti. Sipas “AS”, Real Madridi është i bindur se do ta rinovojë kontratën e Vinicius Junior dhe nuk ka më ndërmend të “lejojë kohën të kalojë” pa siguruar të ardhmen e yllit të tij ofensiv.
Dialogu mes presidentit të klubit dhe lojtarit përshkruhet si i vazhdueshëm, me të dyja palët që kanë diskutuar rëndësinë e garantimit të së ardhmes së Vinicius Junior me fanellën e bardhë. Brenda klubit ekziston bindja se një marrëveshje e re mund të shihet “në horizont” në një të ardhme jo shumë të largët.
Edhe nëse Real Madridi arrin të finalizojë rinovimin me Vinicius Junior, drejtuesit kanë ende disa vendime të rëndësishme për të marrë në lidhje me skuadrën aktuale. Në radhë të parë janë David Alaba dhe Antonio Rüdiger, kontratat e të cilëve përfundojnë në fund të sezonit dhe për shkak të shqetësimeve të vazhdueshme me lëndimet, ka gjasa që të mos marrin oferta për zgjatje.
Po ashtu, klubi duhet të vendosë për të ardhmen e Ferland Mendy, një tjetër mbrojtës që ka kaluar më shumë kohë i dëmtuar sesa në fushë. Francezi ka kontratë deri në qershor 2027, njësoj si Dani Ceballos dhe Fran García.
Me Real Madridin që është aktiv në treg për një mesfushor defensiv dhe një qendërmbrojtës, drejtuesit do të duhet të rishikojnë me kujdes situatën e disa lojtarëve që aktualisht nuk janë në planet kryesore të Xabi Alonsos.
Pavarësisht gjithë këtyre çështjeve, sigurimi i firmës së Vinicius Junior, idealisht pa e ngarkuar klubin me një pagë historike, mbetet objektivi kryesor për 15-herë kampionët e Evropës./Telegrafi
Real Madridi po përjeton tension të lartë pas humbjes surprizë ndaj Celtas, një rezultat që ka tronditur klubin dhe ka vënë në dyshim të ardhmen e trajnerit Xabi Alonso.
Me ekipin në rënie forme dhe me presionin në rritje, drejtuesit po analizojnë alternativa serioze për stolin, dhe mes tyre ka dalë në skenë emri i Joachim Low, një dëshirë e vjetër e Florentino Perezit.
Situata e Xabi Alonsos është bërë kritike pas pesë rezultateve të dobëta në shtatë ndeshjet e fundit, ndërsa avantazhi ndaj Barcelonës është shkurtuar ndjeshëm.
Një mbledhje urgjente në Bernabeu ka konfirmuar shqetësimin brenda klubit, dhe përballja e ardhshme në Ligën e Kampionëve ndaj Manchester Cityt pritet të vendosë fatin e trajnerit aktual.
Në këtë klimë pasigurie, Joachim Low shihet si një kandidaturë e papritur, por e fortë.
Ish-trajneri i Gjermanisë vlerësohet për aftësinë në menaxhimin e grupit, disiplinën taktike dhe autoritetin e qetë, elementë që Real Madridit i mungojnë në këto momente tensioni.
Përvoja e tij ndërkombëtare dhe stili i balancuar e bëjnë një opsion tërheqës për drejtuesit madrilenë.
Ai shihet si zgjedhje më teknike dhe e matur, larg emrave bombastikë, por me potencial për të rikthyer qartësinë dhe disiplinën në ekip.
Nëse Xabi Alonso nuk bind në ndeshjen vendimtare kundër Manchester Cityt, Joachim Low mund të kalojë nga një ide spekulative në një opsion real për stolin madrilen, duke shënuar kështu nisjen e një epoke të re të mundshme në drejtimin e Real Madridit. /Telegrafi/
Xabi Alonso po përjeton momentin më të vështirë që nga ardhja e tij në stolin e Real Madridit.
Alonso, i cilësuar fillimisht si figura qendrore e projektit të ri madrilen, ndodhet tani nën presion të madh për shkak të kritikave të brendshme dhe rënies së besimit brenda skuadrës.
Performanca e fundit e ekipit ka thelluar dyshimet dhe ka tronditur pozitën e tij në klub.
Situata është bërë kaq delikate sa një humbje ndaj Manchester City në Ligën e Kampionëve mund të shënojë fundin e aventurës së tij në Madrid.
Florentino Perez, i zhgënjyer nga disa vendime dhe nga humbja e autoritetit të trajnerit, e ka bërë të qartë se nuk toleron më një tjetër dështim evropian.
Ndeshja e radhës është kthyer në një ultimatum për të ardhmen e Alonsos.
Edhe pse Real Madridi fitoi El Clasicon, ai takim shënoi një pikë kthese negative për trajnerin.
Reagimi i Vinicius pas zëvendësimit ekspozoi dobësitë e Alonsos përpara gjithë opinionit publik.
Mungesa e një qëndrimi të fortë nga trajneri u interpretua si shenjë dobësie, duke hapur rrugën për dyshime të thella mbi aftësinë e tij për të menaxhuar një dhomë zhveshjeje kaq të vështirë.
Që nga ajo ndeshje, atmosfera në ekip është tensionuar dukshëm. Disa lojtarë besojnë se Alonso e ka humbur kontrollin e grupit, ndërsa të tjerë mendojnë se mesazhi i tij nuk ka më efekt.
Vendimet taktike, rotacionet dhe menaxhimi i egove kanë krijuar një klimë të rënduar që reflektohet edhe në fushë, duke e lënë trajnerin gjithnjë e më të ekspozuar.
Në krye të klubit, Florentino Perez po vlerëson me kujdes çdo hap.
Besimi i tij tek Alonso është venitur ndjeshëm dhe incidenti me Vinicius është parë si provë e qartë e humbjes së autoritetit.
Për këtë arsye, dueli me Man City pritet të jetë vendimtar: vetëm një rezultat pozitiv mund të ndryshojë dinamikën aktuale dhe ta mbajë trajnerin në stol.
Në të kundërt, largimi i tij duket i pashmangshëm. /Telegrafi/
Te Real Madridi po zhvillohet një krizë e plotë në stol dhe shkarkimi i Xabi Alonsos duket çështje ditësh.
Florentino Perez ka tentuar një lëvizje të papritur duke i ofruar Zinedine Zidane një rikthim të përkohshëm deri në fund të sezonit, por francezi e ka refuzuar pasi thuhet se ka një marrëveshje verbale për të marrë drejtimin e Kombëtares së Francës pas Botërorit 2026.
Pakënaqësia me Alonson është rritur ndjeshëm pas humbjes së fundit, ndërsa drejtuesit e akuzojnë për mungesë autoriteti në dhomën e zhveshjes, tolerim ndaj yjeve dhe ulje të intensitetit në përgatitjet taktike.
Florentino Perez raportohet të jetë shumë i zhgënjyer, por nuk deshi të prishte moralin e ekipit para ndeshjes së Ligës të Kampionëve kundër Manchester Cityt.
Edhe Jurgen Klopp është hequr nga lista, pasi nuk është i gatshëm të marrë drejtimin e Real Madridit.
Me të dy alternativat e mëdha jashtë loje, klubi është drejtuar nga opsioni më i realizueshëm: Alvaro Arbeloa.
Trajneri i akademisë pritet të marrë detyrën e trajnerit të parë si zgjidhje e përkohshme menjëherë pas largimit të Alonsos.
Sipas burimeve nga klubi, drejtuesit po përgatisin edhe një ristrukturim të thellë të skuadrës për muajt e ardhshëm.
Disa lojtarë të rëndësishëm që nuk kanë bindur këtë sezon mund të largohen, ndërsa Real Madrid synon të rikthejë disiplinën, intensitetin dhe identitetin kompetitiv që thuhet se janë dobësuar nën drejtimin e Xabi Alonsos.
Real Madridi po hyn në një fazë delikate, ku çdo vendim do të ndikojë drejtpërdrejt në garën për trofetë. /Telegrafi/
Në javët e fundit ka pasur tensione të shtuara në nivel institucional mes Barcelonës dhe Real Madridit, të shkaktuara nga deklaratat e presidentëve të të dy klubeve.
Florentino Perez pretendoi se katalanasit historikisht janë favorizuar nga gjyqtarët, gjë që çoi Joan Laportën të deklaronte se ai dhe klubi madrilen vuajnë nga obsesioni ndaj Barcelonës.
Laporta tani ka tentuar ta lërë këtë çështje pas krahëve. Gjatë një aktiviteti të La Vanguardia të enjten, ai foli për Perez, për të cilin shprehu shumë respekt.
“Ai është një njeri i qetë dhe inteligjent. Tani ai shpreh opinionet e tij; në mandatin tim të parë unë isha më luftarak, megjithëse tani ai ka çështje kundër Tebas, kundër UEFA-s”.
“Kam dëgjuar që nuk do të mund të regjistronim lojtarë, por më pas CSD na dha të drejtë në rastin e regjistrimit të Olmos”.
“Sigurisht që ai është më afër atyre që drejtojnë në Spanjë, ashtu si ne këtu në Kataloni për shkak të afërsisë. Ai mbron interesat e tij, siç bëjmë edhe ne”.
Megjithatë, Laporta deklaroi gjithashtu se Perez dhe Real Madridi janë të fiksuar me presidentin e La Liga-s, Javier Tebas, i cili kohët e fundit ka qenë nën kritika.
“Ai është një njeri i fjalës, ka njohuri të gjera. Unë nuk u besoj atyre që duan ta largojnë. Ne e dimë që marrëdhënia që kemi ndërtuar me të është e mire”.
“Janë nga Real Madridi ata që duan ta shkarkojnë. Shoh që ekziston një obsesion nga ‘Shtëpia e Bardhë’”, ka deklaruar Laporta./Telegrafi/
Real Madridi as nuk i është përgjigjur presidentit të Barcelonës, Joan Laporta, dhe kritikave të tij ndaj klubit dhe presidentit të tyre, Florentino Perez, dhe as nuk ka ndërmend ta bëjë këtë.
Florentino Perez foli tashmë aty ku duhej të fliste: në Asamble dhe çështja do të mbetet atje.
Pas fjalimit të Perezit, presidenti i Barcelonës, Laporta pati kritika dhe goditi me disa fjalë rivalin e urryer
“Fjalët e Florentino Perezit tregojnë për barcelonistët që vuajnë nga Real Madridi. Një formë e veçantë obsesioni”.
“Duket se duhet të flasin për Barçën për të justifikuar, nuk e di çfarë”, deklaroi Laporta.
Duket sikur lufta e ftohtë midis Barcelonës dhe Real Madridit është rikthyer.
Megjithatë, sipas mediumit Cope, Real Madridi as nuk i është përgjigjur presidentit të Barcelonës dhe kritikave të tij ndaj klubit dhe presidentit të tyre, dhe as nuk ka ndërmend ta bëjë këtë. /Telegrafi/
Presidenti miliarder i Real Madridit, Florentino Pérez, është një nga 10 personat më të pasur në Spanjë.
Ai jo vetëm drejton një nga klubet më të suksesshme të futbollit në botë, por udhëheq edhe një korporatë të madhe ndërtimi, me një pasuri neto të vlerësuar rreth 3,4 miliardë dollarë amerikanë (rreth 3,2 miliardë euro).
Pérez mban rekord si presidenti më i suksesshëm në historinë e Real Madridit, me shtatë tituj të Ligës së Kampionëve gjatë dy mandateve të tij (2000–2006 dhe 2009–sot).
Në janar 2025, ai u rizgjodh për një mandat të ri që do të zgjasë deri në vitin 2029.
Ai është gjithashtu kryetar i ACS, një kompani e specializuar në ndërtime banesore dhe jo-rezidenciale, infrastrukturë transporti, shërbime mjedisore, shërbime industriale dhe logjistikë. ACS u themelua në vitin 1983 dhe Pérez u bë president i saj në vitin 1997.
Nuk ka burime të sigurta dhe të përditësuara që saktësojnë “paganë vjetore” të Florentino Pérez si president i Real Madridit. Disa raporte vlerësojnë se ai paguhej rreth 3,5 milionë euro në vit, por kjo nuk është konfirmuar nga klubi.
Në anën tjetër, Real Madridi, është në pronësi tërësisht të tifozëve. Klubi është një makinë fitimi, duke gjeneruar mbi 1 miliard dollarë (rreth 940 milionë euro) të ardhura vjetore, ndërsa në katër vitet e fundit klubi ka shënuar dy tituj të Ligës së Kampionëve dhe dy trofe të La Ligës, me shpenzime minimale në tregun e transferimeve. /Telegrafi/
Superliga e Evropës ka nisur procedurat për një padinë shumëmiliardëshe kundër UEFA-s, si pjesë e kërkesës së saj për dëmshpërblim.
Shuma totale e kërkuar nga klubet, përfshirë Real Madridin dhe kompaninë A22, tejkalon 4.5 miliardë euro, me kërkesën e Real Madridit që është më e madhja.
Florentino Pérez e konfirmoi këtë hap gjatë Asamblesë së Përgjithshme të klubit të Madridit, ndërsa një ditë më vonë A22 publikoi një deklaratë zyrtare për të shpjeguar arsyet e padisë.
Sipas A22 Sports Management, më 21 nëntor 2025, u nisën procedurat detyrueshme MASC, sipas legjislacionit spanjoll, përpara fillimit të një procesi ligjor kundër UEFA-s, duke kërkuar kompensim për dëmet e shkaktuara nga abuzimi i supozuar i UEFA-s me pozicionin e saj dominues si operator monopolist i garave ndërkufitare të futbollit të klubeve.
Florentino Perez rikujtoi vendimin e Gjykatës së Drejtësisë së Bashkimit Evropian më 21 dhjetor 2023, sipas të cilit UEFA kishte shfrytëzuar pozicionin e saj monopolist duke penguar hyrjen e organizatorëve të jashtëm si A22 në treg.
Megjithatë, UEFA vazhdon të ruajë rregulloret dhe praktikat që bien ndesh me vendimet e tre gjykatave evropiane, duke përfshirë rregulla të reja të vendosura në vitin 2024. Kjo ka çuar në pretendime të konsiderueshme për dëmshpërblim nga klubet dhe A22.
Deklarata gjithashtu përmend negociatat që u zhvilluan gjatë vitit 2025 mes A22 dhe UEFA-s për shtatë muaj, për të arritur një marrëveshje gjithëpërfshirëse mbi Ligën e Bashkuar, por pa sukses.
Propozimet e A22 përfshinin një format të përmirësuar, qeverisje moderne dhe përdorimin e platformës së transmetimit Unify për tifozët, por pa arritur ndonjë marrëveshje.
🚨 La Superliga reclamará a la UEFA entre 4.500 y 5.000 millones por daños y perjuicios.
A22 Sports Management ha iniciado los trámites previos a la interposición de una demanda además de pedir el reconocimiento de la competición.https://t.co/ra6YIxxDgf — Teledeporte (@teledeporte) November 24, 2025
Si pasojë, hapi i ardhshëm është kërkimi i kompensimit për dëmet e shkaktuara nga sjellja e UEFA-s, që vlerësohet në miliarda euro. /Telegrafi/
Florentino Perez e ka konfirmuar zyrtarisht në Asamblenë e Delegatëve të Real Madridit se marrëdhënia speciale me Barcelonën ka marrë fund.
Fjalimi i presidentit madrilen ishte i ashpër dhe i drejtuar për të treguar distancimin e plotë të klubit nga klubi katalanas dhe disa institucione sportive.
Joan Laporta kishte njoftuar më parë ndryshimin, duke treguar distancim të dukshëm, ndërsa Perez e vulosi këtë vendim me fjalimin e tij të fortë, shkruan gazeta spanjolle AS.
Perez i kushtoi vëmendje veçanërisht “Rastit Negreiro”, duke denoncuar pagesat e Barcelonës për ish-nënkryetarin e Komitetit Teknik të Gjyqtarëve, José María Enríquez Negreira.
Sipas tij, Barcelona ka paguar rreth 8.4 milionë euro për kompanitë e lidhura me Negreira, midis viteve 2001 dhe 2018.
“Nuk është normale që Barcelona i ka paguar zëvendëspresidentit të gjyqtarëve më shumë se 8 milionë euro për 17 vjet, pavarësisht arsyes”, tha Pérez.
Ai shtoi se Negreira mbante një “pozicion kyç në hierarkinë e gjyqtarëve” dhe se periudha përkon me sukseset sportive më të mëdha të Barcelonës.
Florentino Perez e theksoi se klubi mbretëror nuk i ka borxh askujt dhe nuk do të varet nga asnjë institucion.
“Tani Real Madridi synon pavarësi të plotë dhe absolute”, deklaroi presidenti, duke treguar një epokë të re dhe një qëndrim të vendosur për të ardhmen. /Telegrafi/
Karim Benzema mund të jetë gati për një rikthim sensacional në futbollin evropian, por ai ka një kusht kyç para se të pranojë një lëvizje të tillë.
Sulmuesi francez konsiderohet gjerësisht si një nga qendërsulmuesit më të mirë të shekullit 21.
Pas pesë vitesh në ekipin e parë të Lyonit, ai iu bashkua gjigantëve spanjollë të Real Madridit, ku fitoi 25 trofe, përfshirë pesë tituj të Ligës së Kampionëve.
Sezoni i tij më i mirë erdhi në 2021/2022, kur shënoi 44 gola në 46 ndeshje duke udhëhequr Real Madridin drejt triumfit në Ligën e Kampionëve dhe La Liga.
Ai kaloi një vit tjetër në Spanjë përpara se të transferohej te kampionët arabë të Al-Ittihad në vitin 2023, ku nënshkroi një kontratë trevjeçare.
Me këtë marrëveshje që skadon në qershor 2026, spekulimet kanë filluar të rriten mbi lëvizjen e radhës në karrierën e Benzemas.
Karim Benzema
Në një intervistë të fundit për mediumin spanjoll AS, ai zbuloi se një rikthim në futbollin evropian mbetet një mundësi.
“Është e vërtetë që kam oferta nga Evropa. Duhet t’i shqyrtoj të gjitha, të zgjedh me mençuri dhe të shoh ku ndihem rehat, pa harruar që ndihem mirë këtu dhe marr përkrahje nga të gjithë. Por do të shohim”.
Megjithëse një rikthim te Real Madrid mund të jetë skenari i ëndrrave, Benzema shpjegoi se një gjë e tillë do të ndodhte vetëm nëse presidenti i klubit, Florentino Perez, do ta dëshironte këtë.
“Nëse Florentino është ende aty, mund të ndodhë, mund të ndodhë. Unë flas me të dhe është e mundur. Unë jam tifoz i Real Madridit. E ndiej në shpirt”.
“Madridi është ende qyteti im, ndihem si tifoz i Real Madridit dhe si madrilen. Do të shohim çfarë do të ndodhë”, ka thënë francezi./Telegrafi/
Florentino Perez ka ndërmarrë hapa për të riformësuar të ardhmen financiare të Real Madridit, duke u përgatitur të shesë një pjesë prej 10 për qind përmes një shoqërie të sapokrijuar komerciale, pasi tashmë ka siguruar 360 milionë euro nga fitimet e lidhura me Bernabeun.
Presidenti paraqiti planin për anëtarët e klubit, duke theksuar se kjo do të na mbrojë si institucion dhe do t’i lejojë Madridit të sigurojë fonde pa u shndërruar në një shoqëri sportive aksionare.
Sipas El Periodico, presidenti i Madridit, Perez, ka nisur një nga ndryshimet më të mëdha korporative në historinë moderne të klubit, duke shpalosur planet për të shitur rreth 10 për qind të një entiteti të ri komercial me qëllim sigurimin e investimeve të reja.
Ky hap vjen pas marrëveshjes së mëparshme të klubit, në të cilën ata shitën 20 për qind të fitimeve të ardhshme të Santiago Bernabeut tek Sixth Street dhe Legends për 360 milionë euro, një manovër financiare e cilësuar gjerësisht si “leva” e parë e Madridit.
Perez shpjegoi propozimin e ri për anëtarët e Real Madridit, duke theksuar nevojën për të modernizuar strukturën organizative të klubit duke ruajtur njëkohësisht modelin tradicional të pronësisë nga anëtarët.
Santiago Bernabeu
“Klubi ynë duhet të ketë një strukturë organizative që na mbron si institucion dhe gjithashtu na mbron të gjithëve ne si pronarë të Real Madridit”.
“Në këtë drejtim, konfirmoj se do t’i paraqesim kësaj Asambleje një propozim për riorganizimin korporativ të klubit që siguron të ardhmen tonë, na mbron nga kërcënimet me të cilat përballemi dhe, mbi të gjitha, garanton që anëtarët të mbeten pronarët e vërtetë të klubit dhe të aktiveve të tij financiare”, ka thënë Perez.
Ky qasje e mbron Real Madridin nga shndërrimi në një shoqëri sportive aksionare, një transformim që do të rriste ndikimin në dëm të pushtetit historik të anëtarëve./Telegrafi/
Login
