Gary McAllister beson se Mohamed Salah po kalon një “vit paqëndrueshmërie” në Anfield, duke theksuar largimin e Trent Alexander-Arnold si shkakun kryesor të rënies së formës së egjiptianit.

Megjithatë, ish-mesfushori i Liverpoolit këmbëngul se 33-vjeçari ka ende shumë për të ofruar në nivelin më të lartë dhe e ka nxitur atë të refuzojë interesimin nga Liga Profesionale Saudite.

Duke folur për OLBG, McAllister theksoi se kimia taktike unike mes dyshes ishte për vite me radhë motori i sulmit të Liverpoolit.

Me Alexander-Arnold që nuk ndodhet më në Anfield për të dërguar pasime precize në hapësira, loja e Salahut ka pësuar në mënyrë të pashmangshme.

“Gjithashtu mendoj se humbja e Trent Alexander-Arnold ka qenë një faktor i madh për Mo, sepse kombinimet që ata kishin në krahun e djathtë, qoftë kur Mo hynte nga brenda dhe Trent ngjitej lart e gjerë, ato kombinime të vogla tashmë kanë zhdukur”, u shpreh McAllister.

“Ata e njihnin lojën e njëri-tjetrit në mënyrë perfekte. Sa herë që Mo kërkonte të shpërthente pas mbrojtjes dhe të depërtonte mes linjave, Trent ishte lojtari që gjente pasimin. Mo ka vuajtur nga largimi i Trent dhe ky ka qenë thjesht një vit paqëndrueshmërie”.

Ndërtimi i një partneriteti të ri kërkon kohë, dhe “viti i paqëndrueshmërisë” që po përjeton Salah është një produkt i natyrshëm i kësaj periudhe tranzicioni.

Dinamika e re kërkon që anësori të përshtasë lëvizjet dhe kohëzgjatjen e vrapimeve, po aq sa mbrojtësit e rinj të krahut duhet të mësojnë nuancat se kur të mbivendosen apo të depërtojnë nga brenda.

“Kjo nuk do të thotë se Connor Bradley nuk mund ta furnizojë Mohamed Salahun apo se Frimpong nuk mund të vijë dhe të ndërtojë një marrëdhënie të tillë, por kjo kërkon kohë, sepse Trent dhe Mo kishin një lidhje të veçantë”, përfundoi ai./Telegrafi/

Situata e Trent Alexander-Arnold te Real Madridi po merr një kthesë të papritur dhe vetëm pak muaj pas ardhjes së tij, anglezi mund të kërkojë një rrugë të re.

Adaptimi i mbrojtësit të djathtë te klubi i bardhë nuk ka qenë siç pritej. Me më pak minuta se sa ishte parashikuar dhe i shoqëruar nga disa probleme fizike, koha e tij në Madrid nuk ka shkëlqyer siç pritej, gjë që ka bërë që drejtuesit e klubit të rishikojnë të ardhmen e tij.

Trajneri i Manchester City, Pep Guardiola, ka ndjekur me vëmendje situatën e Alexander-Arnold dhe i ka shprehur drejtuesve të qytetarëve interesin e tij për ta transferuar.

I vetëdijshëm për talentin dhe fleksibilitetin e lojtarit, trajneri katalanas e sheh atë si një pjesë kyçe për sistemin e tij, veçanërisht në krahun e djathtë.

Interesi i skuadrës angleze, e konsideruar si një nga klubet më të mëdha evropiane, ka ringjallur mundësinë e rikthimit të lojtarit britanik në Ligën Premier.

Kur Trent Alexander-Arnold la Liverpoolin për t’iu bashkuar Real Madridit në verën e vitit 2025, shumëkush mendoi se ardhja e tij do të ishte një nga transferimet më të mëdha për klubin e bardhë. Megjithatë, adaptimi i mbrojtësit ka qenë sfidues.

Edhe pse ka luajtur disa minuta dhe ka treguar shkëndija cilësie, ndikimi i tij nuk ka përmbushur pritshmëritë për një lojtar me kalibrin dhe përvojën e tij.

Situata e Alexander-Arnold nuk ka kaluar pa u vënë re nga Manchester City. Pep Guardiola, gjithmonë i vëmendshëm ndaj talenteve më të mirë në dispozicion, ka shfaqur interes të madh për mbrojtësin anglez.

Me largimin e disa lojtarëve në krahun e djathtë, City e sheh Alexander-Arnold si një opsion ideal për të forcuar atë pozicion, duke ofruar jo vetëm cilësi defensive, por edhe aftësi të mëdha sulmuese dhe në shpërndarjen e topit, duke u përshtatur në mënyrë të përkryer me stilin e lojës së Guardiolës.

Ideja e rikthimit në Angli dhe bashkimi me Guardiolën te Manchester City i duket tërheqëse Trent Alexander-Arnold, pas zhgënjimit të përjetuar në Madrid./Telegrafi/

Afati kalimtar i verës është i përgatitur për një ndryshim të paparë sizmik në Bundesligë pas zbulimit të ambicieve të klubit gjerman. Bayern Munich ka hartuar një strategji financiare prej 200 milionë eurosh për të sjellë Yan Diomande, Trent Alexander-Arnold dhe Nico Schlotterbeck.

Ky investim masiv synon t’i japë Vincent Kompanyt mjetet që i nevojiten për të dominuar si në kampionatin vendas ashtu edhe në Ligën e Kampionëve. Prioriteti i klubit është të rigjallërojë pozicionet kyçe dhe të sigurojë lojtarë me përvojë ndërkombëtare të nivelit të lartë.

Bayern Munich e kupton se afati aktual i transferimeve kërkon vendime të guximshme për të ruajtur dominimin e saj kundër rritjes së rivalëve të rinj evropianë. Prandaj, drejtuesit sportiv kanë identifikuar tre profile specifike që adresojnë boshllëqet aktuale në skuadër.

Në sulm, klubi bavarez i ka vënë syrin talentit elektrizues Yan Diomande, talenti i ri nga Bregu i Fildishtë. Vetëm 19 vjeç, anësori ka shkëlqyer te RB Leipzig falë driblimit dhe shpejtësisë së tij marramendëse.

Klubi i Mynihut është i përgatitur të ofrojë 100 milionë euro për të siguruar nënshkrimin e tij të menjëhershëm. Ata besojnë se Diomande është lojtari perfekt për të konkurruar dhe për rotacion në krahë me figura si Luis Diaz dhe Micheal Olise.

Ky veprim jo vetëm që do ta forconte sulmin, por edhe do ta dobësonte një rival të drejtpërdrejtë, duke siguruar një të ardhme të ndritur për sulmin. Ylli afrikan, me kontratë deri në vitin 2030, është i etur të bëjë transferimin në Allianz Arena këtë verë.

Për pozicionin e mbrojtësit të djathtë, emri që gjeneron më shumë konsensus është Trent Alexander-Arnold, i cili po kalon një kohë të vështirë në Spanjë. Pas largimit të Xabi Alonsos nga stoli i Real Madridit, mbrojtësi anglez ka humbur statusin e tij të paprekshëm.

Paraqitjet e paqëndrueshme dhe dëmtimet e përsëritura kanë dëmtuar besimin e Alexander-Arnold në Santiago Bernabeu. Klubi gjerman po ofron 50 milionë euro për ta rikthyer mbrojtësin e krahut në formën e tij më të mirë. Kompany vlerëson kreativitetin dhe vizionin e tij, cilësi që përshtaten në mënyrë të përkryer me stilin e tij të lojës të bazuar në posedim të topit.

Njëkohësisht, zona mbrojtëse qendrore kërkon vëmendje urgjente duke pasur parasysh dyshimet rreth së ardhmes së Dayot Upamecanos. Këtu hyn në lojë Nico Schlotterbeck, lojtari aktual i Borussia Dortmund, kontrata e të cilit skadon në vitin 2027.

Afrimi i fundit të kontratës së tij e detyron klubin nga Westfalia të negociojë një transferim këtë verë. Bayern Munich planifikon të shpenzojë edhe 50 milionë euro për të siguruar ardhjen e Nico Schlotterbeck në zemër të mbrojtjes së tyre.

Profili i tij si qendërmbrojtës gjerman, i fortë dhe me shpërndarje të topit, është absolutisht sipas pëlqimit të menaxhmentit teknik. /Telegrafi/

Disa ndërmjetës tashmë kanë kontaktuar me Manchester City për të vlerësuar një mundësi të ardhjeje të Trent Alexander-Arnold.

Mbrojtësi i djathtë ende nuk ka arritur të konsolidohet te Real Madrid.

Deri më tani, Alexander-Arnold ka grumbulluar vetëm 497 minuta me fanellën e Los Blancos.

Lojtari 27-vjeçar ka patur probleme të shumta me lëndimet dhe ka marrë pjesë vetëm në 11 ndeshje zyrtare, prej të cilave ka startuar si titullar në shtatë.

Megjithëse klubi madrilen beson se është çështje kohe para se anglezi të rikuperojë formën dhe të bëhet një element i rëndësishëm i skuadrës, situata e tij e ndërlikuar ka nxitur spekulime në media mbi një mundësi largimi në fund të sezonit.

Hapat e parë drejt Ligës Premier

Sipas raportimeve të fundit nga TEAMtalk, kanë nisur kontaktet e para midis përfaqësuesve të Alexander-Arnold dhe Manchester City, një nga skuadrat kryesore të Ligës Premier.

“Ndërmjetësit kanë nisur procedurat përkatëse dhe kanë zhvilluar bisedime me Manchester City, i cili po kërkon një mbrojtës të djathtë për afatin kalimtar të verës. Megjithatë, nuk ka pasur ende asnjë ofertë zyrtare, ndërsa kampioni i Ligës Premier po e vlerëson situatën me kujdes”, raporton portali.

Sipas mediave britanike, transferimi i anglezit në ‘Etihad Stadium’ nuk do të jetë i thjeshtë dhe as i lirë.

Operacioni mund të realizohet vetëm nëse lojtari shfaq dëshirë reale për të ndryshuar ambient dhe City ofron një ofertë të konsiderueshme, të cilën Real Madrid nuk mund ta refuzojë.

Kjo mbetet një çështje për t’u ndjekur gjatë muajve të ardhshëm. /Telegrafi/

Manchester City po ndjek me vëmendje zhvillimet rreth të ardhmes së Trent Alexander-Arnold te Real Madridi, teksa pasiguria mbi rolin e tij në “Santiago Bernabeu” po rritet, raporton TEAMtalk.

Mbrojtësi i djathtë 27-vjeçar ka nisur vetëm pesë ndeshje në La Liga që nga transferimi i bujshëm veror nga Liverpooli, duke mos arritur ende ndikimin e menjëhershëm që pritej pas nënshkrimit të kontratës pesëvjeçare deri në vitin 2029.

Pakënaqësia prapa skenave ka shtyrë ndërmjetësit të hapin bisedime eksploruese me Manchester Cityn, i cili po vlerëson aktivisht opsionet për krahun e djathtë të mbrojtjes përpara një merkatoje verore intensive.

Edhe pse ende nuk ka pasur një ofertë zyrtare, City e sheh Alexander-Arnold si një përforcim potencialisht transformues për repartin defensivë.

Kontrata afatgjatë me Real Madridin do të kërkonte një tarifë të konsiderueshme transferimi dhe një paketë të lartë page, por “Cityzens” mbeten ndër klubet e pakta që kanë kapacitetin financiar për të përmbushur këto kushte.

Gjatë periudhës së tij te Liverpooli, Alexander-Arnold regjistroi 23 gola dhe 92 asistime në 354 paraqitje, duke fituar tetë trofe madhorë.

Ambicia e Cityt është konfirmuar edhe nga drejtori i ri sportiv, Hugo Viana, i cili ka vepruar me vendosmëri në afatin e janarit me afrimet e Marc Guehi dhe Antoine Semenyo, duke sinjalizuar lëvizje të guximshme në verë./Telegrafi/

Lojtarët e Real Madridit dominojnë listën e lojtarëve më të paguar në La Liga, sipas të dhënave të Transfermarkt, dhe këtë e bëri të ditur gazetari i njohur, Fabrizio Romano, në rrjetet sociale.

Sipas këtyre të dhënave, pagën më të lartë bruto vjetore e merr Kylian Mbappe, i cili fiton 31.3 milionë euro.

Vinicius Junior vjen pas me 25 milionë euro, pastaj David Alaba me 22.5 milionë euro, dhe mesfushori anglez, Jude Bellingham, është gjithashtu i katërti me një pagë vjetore bruto prej 20.8 milionë eurosh.

Portieri i Atletico Madridit, Jan Oblak, plotëson pesëshen e parë me të ardhura prej 20.8 milionë eurosh.

Pas kësaj vjen dyshja e Barcelonës, Robert Lewandowski, i cili fiton njësoj si Bellingham dhe Oblak, dhe Frenkie de Jong me 19 milionë euro.

Më pas vijnë Nico Williams, Raphinha, Federico Valverde, Rodrygo Goes, Lamine Yamal dhe Trent Arnold-Alexandar, të cilët fitojnë nga 16.7 milionë euro.

Marc-Andre Ter Stegen dhe Jules Kounde përfundojnë listën e 15 lojtarëve më të paguar me një pagë bruto vjetore prej 15.6 milionë eurosh. /Telegrafi/

Alvaro Arbeloa u bë trajner i Real Madridit pasi Xabi Alonso u shkarkua dhe tani pyetja është se sa gjatë do të qëndrojë në krye.

Sigurisht, gjithmonë ekziston mundësia që gjërat të mos shkojnë mirë për Arbeloan, dhe që Perez ta falënderojë atë herët, dhe të sjellë një trajner të ri para fundit të sezonit.

Ka shumë lojtarë që nuk janë të kënaqur me statusin e tyre te Real Madridi, dhe njëri prej tyre është mbrojtësi i djathtë Alexander-Arnold.

Sipas mediave spanjolle, anglezi zhvilloi një takim me trajnerin e ri të Real Madridit, gjatë të cilit u theksua se Alexander-Arnold ishte "në prag të kolapsit".

Ai mbërriti te Real Madrid nga Liverpooli në fillim të sezonit, por ky veprim ishte qartësisht i gabuar në karrierën e tij.

“Fiton ose largohesh”, Thierry Henry komenton shkarkimin e Xabi Alonsos dhe shpjegon arsyen pse Reali nuk ka durim

Që nga momenti që mbërriti në Santiago Bernabeu, ishte e qartë se anglezi nuk po luante mirë. Ai po luante dobët dhe lëndimet ishin gjithashtu në rritje.

Alonso, njeriu që e solli atë, është shkarkuar dhe Arbeloa duket se nuk sheh të ardhme për të në kryeqytetin spanjoll.

Sipas El Nacional, Arbeloa i tha atij drejtpërdrejt dhe qartë se nuk ishte pjesë e planeve të tij dhe se mund të largohej nga klubi këtë janar.

Gjithçka ndodhi në një takim ku Arbeloa thuhet se ishte shumë i qartë, i ndershëm dhe i drejtpërdrejtë me Alexander-Arnold.

Superkompjuteri i Opta-s parashikon shanset e skuadrave që kalojnë tutje dhe fituesin e Ligës së Kampionëve

Arsyeja janë "dobësitë mbrojtëse" që u dolën në disa ndeshje, dhe besohet se ai ka nevojë për një mjedis më pak kërkues në të cilin do të rifitojë vetëbesimin, si dhe minutat e lojës.

Dy klube janë të interesuara të sjellin anglezin i cili tashmë është lidhur me Bayern Munich, përkatësisht Newcastle dhe Manchester United.

Është e qartë se anglezi do të preferonte të kthehej në atdheun e tij, por mbetet për t’u parë nëse do ta “tradhtonte” Liverpoolin dhe tifozët e tij deri në atë masë sa të nënshkruante për një klub tjetër. /Telegrafi/

Trent Alexander-Arnold po kalon një nga momentet më të ndërlikuara të karrierës së tij.

Alexander-Arnold i ardhur te Real Madridi me pritshmëri shumë të larta dhe si një transferim strategjik, nuk ka arritur të gjejë rolin dhe rëndësinë e premtuar në projektin sportiv të klubit.

Situata aktuale ka krijuar pakënaqësi të dukshme te lojtari, i cili ndjen se pritshmëritë e tij nuk janë përmbushur.

Pavarësisht cilësive dhe reputacionit të ndërtuar ndër vite, Alexander-Arnold nuk ka arritur të konsolidohet si titullar i padiskutueshëm.

Problemet fizike dhe konkurrenca e brendshme kanë ndikuar në minutazhin e tij, ndërsa ndikimi në lojë ka qenë më i kufizuar nga sa pritej.

Në rrethin e lojtarit flitet për zhgënjim dhe mungesë harmonie me projektin aktual të Real Madridit.

Në këtë kontekst, afati kalimtar i verës po merr formë dhe Bundesliga po shfaqet si një opsion serioz.

Bayern Munich po ndjek nga afër situatën dhe e vlerëson shumë profilin e anglezit, duke e parë atë si një përforcim ideal për krahun e djathtë të mbrojtjes.

Klubi bavarez beson se stili i lojës në Gjermani mund të nxjerrë në pah aftësitë e tij teknike dhe ndikimin ofensiv.

Edhe Real Madridi është i vetëdijshëm për situatën dhe nuk përjashton mundësinë e një largimi, nëse pakënaqësia vazhdon dhe mbërrin një ofertë bindëse.

Mbajtja e një lojtari të pakënaqur nuk shihet si zgjidhje afatgjatë, ndërsa një transferim mund të ndihmojë në rregullimin e balancave në skuadër dhe shmangien e tensioneve të panevojshme.

Alexander-Arnold merr një ofertë të paimagjinueshme për t’u larguar nga Real Madridi

Muajt e ardhshëm do të jenë vendimtarë për të ardhmen e Alexander-Arnold.

Lojtari po shqyrton me kujdes hapin e radhës, duke kërkuar një ambient ku të ndihet i vlerësuar dhe protagonist.

Nëse transferimi te Bayern Munich realizohet, do të ishte një nga lëvizjet më befasuese të afatit kalimtar veror dhe një pikë kthese në karrierën e tij. /Telegrafi/

Largimi i papritur i Xabi Alonsos nga Real Madridi ka zënë lojtarët në befasi, pasi ata e mësuan lajmin nga deklarata zyrtare e klubit dhe jo nga një komunikim i brendshëm.

Kylian Mbappé ishte i pari që reagoi, duke i dhënë lamtumirën publikisht trajnerit. “Ishte e shkurtër, por ishte kënaqësi të luaja për ty dhe të mësoja prej teje. Faleminderit që më dhe besim që nga dita e parë. Do të të kujtoj si një trajner me ide të qarta dhe një kuptim të thellë të futbollit. Fat të mbarë në kapitullin tënd të ri”, shkroi francezi në Instagram.

Gjatë gjithë pasdites së së hënës, mesazhe mbështetëse kanë vërshuar nga lojtarët e tjerë të ekipit.

Vinícius Júnior, Trent Alexander-Arnold dhe Mastantuono janë të vetmit që nuk kanë publikuar mesazhe deri tani.

Endrick, i huazuar te Olympique Lyonnais, nuk ishte më nën komandën e tij, ndërsa Jude Bellingham ishte i fundit që tha disa fjalë respekti për trajnerin.

Largimi i Alonsos konfirmon sfidat e brendshme që trajneri ka pasur me lojtarët dhe klubin, megjithatë mbështetja e lojtarëve të tij të afërt tregon lidhjen e fortë që krijoi gjatë kohës së tij te Real Madridi. /Telegrafi/

Largimi i Xabi Alonsos nga Real Madridi i zuri lojtarët në befasi, pasi e mësuan këtë përmes deklaratës zyrtare të klubit të hënën pasdite.

Kylian Mbappe ishte i pari që reagoi dhe i dha lamtumirën publikisht trajnerit, ndërsa pas tij pasuan edhe lojtarë tjerë si Arda Guler, Rodrygo Goes, Raul Asencio, Federico Valverde, Fran Garcia, Antonio Rudiger, Alvaro Carreras.

Kapiteni Dani Carvajal shkurtimisht tha “Faleminderit për gjithçka, shef”, ndërsa postime më të ndjera patën yje tjerë si Dean Huijsen dhe David Alaba.

Megjithatë, deri në orët e vona dhe mëngjesin e sotëm pati edhe plotë shtatë lojtarë që janë aktualisht në skuadër dhe nuk kanë reaguar për largimin e Alonsos.

Xabi Alonso u shkarkua pas një debati me tre lojtarë kyç të ekipit

Vinicius Jr, Eder Militao, Trent Alexander-Arnold, Ferland Mendy, Jude Bellingham, Brahim Diaz (i cili është plotësisht i përqendruar në Kupën e Kombeve të Afrikës me Marokun) dhe Franco Mastantuono ishin të vetmit që nuk kanë dhënë ende lamtumirën publikisht për trajnerin spanjoll.

As Endrick nuk e ka bërë këtë, por braziliani, i huazuar te Olympique Lyonnais, nuk është më nën komandën e Xabit. /Telegrafi/

Sipas raportimeve të “Fichajes”, trajneri i ri i Chelseas Rosenior ka kërkuar huazimin për gjashtë muaj të yllit së Real Madridit, Trent Alexander-Arnold.

Mbrojtësi i krahut të djathtë iu bashkua Real Madridit vetëm këtë sezon, pasi u largua nga Liverpool si lojtar i lirë, por fillimi i aventurës së tij në Spanjë është penguar nga lëndimet dhe konkurrenca e fortë për një vend titullari.

Megjithatë, ka disa pengesa serioze për një lëvizje të tillë. Dani Carvajal mbetet zgjedhja e parë në krahun e djathtë të mbrojtjes, ndërsa Federico Valverde ka impresionuar vazhdimisht sa herë që është aktivizuar në atë rol.

Për më tepër, Chelsea duket se është e mbipopulluar në atë pozicion, me Reece James, Malo Gusto dhe Josh Acheampong që garojnë për minuta, çka e bën edhe më pak të mundshme një skenar të tillë.

Kështu, edhe pse thashethemi shton dozën e intriguese në tregun e transferimeve, ai duket më tepër spekulativ sesa konkret. Megjithatë, në futbollin modern, surprizat nuk përjashtohen kurrë plotësisht.

Në kohët e fundit, edhe Manchester United është përmendur si një klub i interesuar për ish-yllin e Liverpoolit, por këto zëra nuk kanë arritur të marrin hov serioz.

Sidoqoftë, gjithçka tregon se Trent Alexander-Arnold është i gatshëm të luftojë për vendin e tij te Real Madridi. Edhe pse ekziston pasiguri për shkak të mungesës së minutave në fushë, është e pamundur që ai të largohet gjatë afatit kalimtar të janarit./Telegrafi

Trent Alexander-Arnold mund t’i ofrohet një rrugëdalje nga Real Madridi, pasi raportohet se dy klube të Ligës Premier po rivalizojnë për shërbimet e tij.

Mbrojtësi 27-vjeçar u largua verën e kaluar nga klubi i fëmijërisë së tij, Liverpool, ku kishte kaluar gjithë karrierën deri në atë moment, një vendim që ndau opinionin e tifozëve të “Të Kuqve”.

Sezoni i parë i Alexander-Arnold te Real Madridi ka qenë me ulje-ngritje. Ai ka zhvilluar vetëm 11 paraqitje në të gjitha kompeticionet dhe në fillim të dhjetorit pësoi një dëmtim në muskujt e kofshës, i cili e ka lënë jashtë fushave për disa muaj.

Me hapjen e merkatos së janarit, kanë nisur spekulimet mbi të ardhmen e tij. Sipas mediumit spanjoll Fichajes, Reali po shqyrton mundësinë e shitjes së ish-mbrojtësit të Liverpoolit, ndërsa disa klube angleze janë të interesuara për ta rikthyer Alexander-Arnold në Angli gjatë verës.

Një nga klubet e përmendura në artikull është Newcastle United, që aktualisht renditet në vendin e dhjetë në Ligën Premier.

Opsioni tjetër, më kontrovers, është Manchester United, rival i përbetuar i Liverpoolit, i cili ndodhet në vendin e gjashtë në renditje, dy pikë pas skuadrës së Arne Slot, me të cilën Alexander-Arnold fitoi titullin e Ligës Premier sezonin e kaluar.

Raportohet se si Newcastle ashtu edhe Manchester United po shqyrtojnë oferta rreth 40 milionë euro për Alexander-Arnold, por këto shifra konsiderohen “të pamjaftueshme” për ta bindur Real Madridin të heqë dorë nga lojtari, me klubin spanjoll që thuhet se “nuk ka asnjë qëllim ta lërë të largohet”.

Kontrata e Trent Alexander-Arnold me Real Madridin është e vlefshme deri në verën e vitit 2031./Telegrafi/

Mbrojtësi i djathtë i Real Madridit, Trent Alexander-Arnold mund të rikthehet në Ligën Premier më shpejt sesa që ishte menduar, por jo te Liverpooli.

Sipas mediumit të afërt me klubin mbretëror, DefensaCentral, Alexander-Arnold, mund të largohet nga Los Blancos në afatin kalimtar të verës 2026.

Anglezi 27-vjeçar nuk është ambientuar ende plotësisht në klubin e tij të ri, kështu që e ardhmja e tij mbetet e pasigurt.

Manchester City, Manchester United dhe Newcastle United thuhet se mund të ofrojnë deri në 40 milionë euro për të blerë Trentin në verën e vitit 2026.

Nga ana e tij, Alexander-Arnold nuk dëshiron të largohet nga Real Madridi dhe klubi nuk është ende gati të shqyrtojë ofertat në tavolinë.

Të gjithë në ekip besojnë te Alexander-Arnold dhe mendojnë se ai duhet të luajë më shumë ndeshje për t'u përshtatur me klubin e tij të ri.

Mbrojtësi iu bashkua Real Madridit në verën e vitit 2025 si lojtar i lirë. Këtë sezon, ai ka dhënë një asistim në 11 ndeshje në nivel klubesh. /Telegrafi/

Ylli i Real Madridit, Trent Alexander-Arnold u është drejtuar tifozëve me një mesazh inkurajues në rrjetet sociale të premten, vetëm pak orë pasi u konfirmua se do të mungojë për një periudhë të gjatë për shkak të një lëndimi të ri.

Mbrojtësi anglez ishte titullar në ndeshjen e mesjavës ndaj Athletic Bilbaos në La Liga, ku shkëlqeu gjatë pjesës së parë dhe regjistroi edhe asistimin e tij të parë në futbollin spanjoll. Por sapo nisi pjesa e dytë, gjithçka mori kthesë negative.

Alexander-Arnold u ndal papritur duke ndier shqetësime fizike dhe Xabi Alonso e zëvendësoi menjëherë. Testet mjekësore të kryera të enjten konfirmuan një lëndim muskulor, që pritet ta mbajë larg fushave për një periudhë të zgjatur.

Megjithatë, pas një 48-orëshi të vështirë, anglezi ka vendosur t’i qetësojë tifozët e Real Madridit me një reagim të drejtpërdrejtë në Instagramin e tij.

"Jam i shkatërruar nga ky lëndim. Koha kur ndodhi më dhemb shumë, por do të punoj fort të kthehem më i fortë dhe më i mirë! Shihemi në vitin 2026, madridistë”, shkroi ai.

Ndërkohë, ende nuk dihet saktësisht se kur do të rikthehet Alexander-Arnold si dhe ka synim të gjejë formën për të marrë ftesë për Kupën e Botës 2026./Telegrafi/

Trent Alexander-Arnold pritet të mungojë rreth dy muaj pas një dëmtimi muskulor, ndërsa Real Madridi ka dhënë diagnozë përfundimtare për lëndimin e fundit.

Trent Alexander-Arnold ka pësuar një dëmtim muskulor në pjesën e përparme të këmbës së majtë, një lëndim që pritet ta mbajë jashtë fushave për afërsisht dy muaj.

Mbrojtësi anglez u detyrua të largohej nga loja në minutën e 55-të të fitores 3-0 të Real Madrid ndaj Athletic Bilbao të mërkurën në mbrëmje, pasi duket se pësoi një tjetër dëmtim, këtë herë në kyçin e këmbës së djathtë.

Ai u rrëzua në fushë duke mbajtur kyçin, pasi u shkel nga Alejandro Rego.

Alexander-Arnold ishte duke zhvilluar një nga paraqitjet e tij më mbresëlënëse me fanellën e Madridit, duke asistuar me një pasim të jashtëzakonshëm golin hapës të Kylian Mbappes.

Ndërkohë, Real Madridi ka publikuar një diagnozë zyrtare për lëndimin e pësuar në ndeshjen e së mërkurës, duke lënë të qartë shkallën e plotë të tij.

"Pas testeve të kryera sot te lojtari ynë Trent Alexander-Arnold nga Shërbimet Mjekësore të Real Madridit, atij i është diagnostikuar një dëmtim muskulor në rectus femoris të kuadricepsit të majtë. Rikuperimi i tij do të monitorohet", shkruan në njoftimin e Los Blancos. /Telegrafi/

Trajneri i Liverpoolit, Arne Slot, ka folur me emocione pas fitores 1-0 ndaj Real Madridit në ndeshjen e Ligës së Kampionëve të së martës mbrëma.

Pas përfundimit, Slot u pa duke përqafuar Trent Alexander-Arnold dhe më pas shpjegoi gjestin e tij ndaj ish-mbrojtësit të Liverpoolit.

“Vetëm pak çaste më pas, e përqafova. Nuk e di saktësisht çfarë i thashë, ndoshta asgjë të veçantë”, ka thënë Slot.

“Por sa herë që ta takoj, do ta përqafoj ose do të flas me të, sepse ai ka qenë shumë i veçantë për mua, si lojtar dhe si njeri”, përfundoi trajneri.

Ky gjest tregon respektin e madh që trajneri holandez ruan për Alexander-Arnold, një prej figurave më të dashura për tifozët e Liverpoolit. /Telegrafi/

Liverpooli më në fund e theu ngërçin në minutën e 60-të të ndeshjes ndaj Real Madridit, kur Alexis Mac Allister shënoi me kokë pas një goditjeje të saktë dënimi nga Dominik Szoboszlai.

Harkimi preciz i Szoboszlait gjetën mesfushorin argjentinas në zonë, i cili reagoi në mënyrën më të mirë të mundshme – me një goditje të pastër me kokë që kaloi përtej portierit Thibaut Courtois, duke i dhënë epërsinë “Reds”.

Pas golit, Mac Allister festoi me një gjest simbolik, duke rikrijuar festën e Trent Alexander-Arnold, që këtë herë e drejtoi me humor drejt bankinës së Real Madridit, aty ku Trent ishte ulur.

Kamerat kapën edhe reagimin e Alexander-Arnold, i cili ishte në bankë në ato momente dhe u fut vetëm në minutat e fundit.

Goli ishte një moment që solli buzëqeshje në “Anfield” dhe vulosi një fitore të rëndësishme për Liverpoolin në Ligën e Kampionëve. /Telegrafi/

Ylli i Real Madrid, Trent Alexander-Arnold, vendosi t’i japë fund një periudhe gati dydekadëshe në Angli këtë verë, aty ku u rrit si tifoz i Liverpoolit dhe fitoi çdo trofe të mundshëm me klubin e fëmijërisë së tij.

Pas refuzimit për të rinovuar kontratën mes interesimit nga Real Madrid, mbrojtësi anglez hyri në muajin e fundit të marrëveshjes së tij me “Të Kuqtë” dhe Los Blancos arritën një marrëveshje prej vetëm 10 milionë eurosh për transferimin e tij.

Megjithatë, largimi i tij nuk u prit mirë nga të gjithë. Vendimi i Alexander-Arnold ndau opinionin në Liverpool, ku ai u përball me fishkëllima dhe kritika të ashpra në muajt e fundit si lojtar i klubit.

Në prag të përballjes së sotme në Ligën e Kampionëve mes Liverpool-t dhe Real Madrid, një murale e Alexander-Arnoldit, pikturuar pas triumfit të Liverpool në Ligën Premier, është shkatërruar.

Muralja mbante mbishkrimin: "Jam thjesht një djalë i zakonshëm nga Liverpooli, ëndrra e të cilit është bërë realitet", por të martën në mëngjes u pa e mbuluar me bojë të bardhë, ndërsa tani dikush ka shtuar edhe fjalët: "Lamtumirë mi".

Në konferencën për shtyp para ndeshjes, trajneri i Liverpoolit, Arne Slot, u shpreh se, ndonëse nuk mund të flasë në emër të tifozëve, ai do ta mirëpriste ngrohtësisht Alexander-Arnoldin, duke theksuar se ka vetëm kujtime pozitive për të gjatë kohës së tij në “Anfield”.

Nga ana tjetër, trajneri i Real Madrid, Xabi Alonso, që në të kaluarën ka bërë të njëjtin kalim si lojtar, pranoi se rasti i Alexander-Arnold është më i veçantë, pasi ai është rritur në Liverpool.

Sidoqoftë, Alonso tha se edhe për të ndeshja do të kishte ngarkesë emocionale, por i bëri thirrje lojtarit të tij “ta shijojë momentin”./Telegrafi/

Mbrojtësi i djathtë i Real Madrid, Trent Alexander-Arnold është rikthyer në skuadër, por ende nuk është plotësisht i gatshëm fizikisht dhe ka shumë pak gjasa të jetë titullar kundër Liverpoolit në “Anfield”.

27-vjeçari pësoi një lëndim në muskujt e pasmë të kofshës gjatë ndeshjes kundër Marseille më 16 shtator. Ai ishte në stol në fitoren 4–0 ndaj Valencias të shtunën, ashtu si edhe në “El Clasico” fundjavën e kaluar, por nuk mori minuta loje.

Sipas raportimeve të “The Athletic”, burime pranë klubit konfirmojnë se Alexander-Arnold ende nuk ka arritur formën e plotë.

E marta shënon javën e shtatë nga një plan rikuperimi tetë-javor, që do të thotë se rikthimi i tij i plotë është shumë afër, por ende jo i sigurt.

Trent Alexander-Arnold

Meqë Alexander-Arnold ka pak gjasa të jetë gati për të startuar në "Anfield" dhe Dani Carvajal vazhdon të jetë jashtë për shkak dëmtimi, Federico Valverde pritet të vazhdojë të mbulojë krahun e djathtë të mbrojtjes.

Uruguaiani ka shkëlqyer në këtë rol në pesë ndeshjet e fundit, duke treguar formë të jashtëzakonshme si në aspektin mbrojtës ashtu edhe në atë ofensiv.

“Të gjithë po e shohim nivelin e ti. Ai ka shpirtin e një mesfushori, por është shumë i fortë në mbrojtje. Po përmirësohet nga ndeshja në ndeshje – është një lojtar i plotë”./Telegrafi

Mbrojtësi Trent Alexander-Arnold ka folur hapur për përballjen e ardhshme të Real Madridit me ish-klubin e tij, Liverpoolin, në Ligën e Kampionëve.

Anglezi u largua nga “Reds” si agjent i lirë në verë për t’iu bashkuar “Galaktikëve”, kurse dy gjigantët evropianë do të përballen në “Anfield” të martën mbrëma.

“Ishte e qartë që do të ndodhte. Që në momentin kur doli shorti, të gjithë e dinin se do të vinte kjo ndeshje – ishte si e shkruar”.

“Do të jetë një ndeshje shumë e vështirë, sidomos për shkak të atmosferës dhe pritjes që do të na bëhet”.

Kur u pyet nëse do të festonte në rast se do të shënonte kundër Liverpoolit, ai u përgjigj: “Nëse do të shënoja, nuk do të festoja. Jo”.

Alexander-Arnold theksoi gjithashtu se pavarësisht rezultateve të fundit, Liverpool mbetet një skuadër e madhe.

“Edhe pse nuk kanë pasur rezultatet më të mira së fundmi, ata janë ende një ekip i madh dhe askush këtu nuk mendon se do të jetë një ndeshje e lehtë”.

Sa i përket pritjes që mund të marrë nga tifozët e Liverpoolit, shtoi se gjithnjë do ta mbështet skuadrën angleze.

“Çfarëdo mënyre të më presin, është zgjedhja e tyre. Unë do ta dua gjithmonë klubin, do të jem gjithmonë tifoz i Liverpoolit. Jam përjetësisht mirënjohës për mundësitë që më dhanë dhe për gjithçka që arritëm bashkë – ato kujtime do të më shoqërojnë gjithë jetën. Nuk ka rëndësi si do të më presin, ndjenjat e mia ndaj klubit nuk do të ndryshojnë kurrë”./Telegrafi