Drejtoria për Siguri dhe Emergjenca e Kryeqytetit thotë se ka intervenuar për largimin e rrezikut në ndërtesat e banimit, si pasojë e rënies së pjesëve të fasadave dhe kulmeve, fillimisht në lagjen Dardania, por edhe në zona të tjera të qytetit.

Në njoftim thuhet se ekipet e tyre në bashkëpunim me shërbimet përkatëse, janë duke realizuar intervenime teknike të specializuara, me qëllim parandalimin e rrezikut për kalimtarët dhe banorët.

“Angazhimi ynë është i vazhdueshëm dhe i përqendruar në identifikimin e rreziqeve, largimin e elementeve të pasigurta nga objektet, dhe rritjen e sigurisë në hapësirat publike.

Siguria e qytetarëve mbetet prioritet absolut i Kryeqytetit. Drejtoria për Siguri dhe Emergjenca do të vazhdojë me monitorim aktiv dhe reagim të shpejtë në çdo rast ku paraqitet rrezik potencial”, thuhet në njoftim.

Tutje ftohen qytetarët që çdo shqetësim apo rrezik të mundshëm ta raportojnë përmes numrave emergjentë: 0800 122 44 ose 0800 122 33.

Ndryshe, komuna ka paralajmëruar se gjatë të dielës priten erëra të forta dhe u ka bërë apel qytetarëve që të kenë kujdes. /Telegrafi/

Komuna e Prishtinës thotë se bazuar në paralajmërimin e Institutit Hidrometeorologjik të Kosovës nga mëngjesi i ditës së diel, 25 janar 2026, pritet të ketë erëra të intensitetit mesatar deri të fortë, të cilat do të jenë më të theksuara në zonat lindore dhe ato kodrinoro-malore.

Në njoftim thuhet se shpejtësia e erës do të jetë e fortë në zona kodrinoro-malore, ndërsa mesatarisht e fortë në zona të ulëta.

Zona kodrinoro-malore: 11–14 m/s (erë e fortë)

Zona më të ulëta: 8–11 m/s (erë mesatarisht e fortë)

Sipas parashikimeve, erërat pritet të dobësohen nga mëngjesi i së hënës, 26 janar 2026.

Udhëzime dhe këshilla për qytetarët

Komuna e Prishtinës thekson tutje se pa krijuar panik, fton qytetarët të tregojnë kujdes të shtuar dhe përgatitje të thjeshtë, veçanërisht gjatë ditës së diel:

Siguroni ose largoni objektet e lehta në ballkone, oborre apo çati (vazo, reklama, panele të përkohshme).

Tregoni kujdes gjatë qarkullimit në zona me pemë të larta, tabela reklamuese apo objekte ndërtimore.

Shmangni qëndrimin e panevojshëm në hapësira të hapura gjatë intervaleve me erë më të fortë.

Drejtuesit e automjeteve, veçanërisht të mjeteve të larta, të lëvizin me kujdes të shtuar.

Nëse vëreni rrezik potencial (degë të rëna, objekte të lëvizshme, dëmtime), njoftoni shërbimet kompetente.

Në raste emergjente, qytetarët mund të kontaktojnë numrat: 0800 122 44 ose 0800 122 33.

Tutje thuhet se drejtoria për Siguri dhe Emergjenca e Kryeqytetit do të jetë në gatishmëri të vazhdueshme dhe do të informojë qytetarët nëse ka zhvillime të reja.

“Qëndroni të informuar, tregoni kujdes dhe bashkëpunim”, thuhet në njoftim. /Telegrafi/

Banorët e lagjes “Qendra” të Prishtinës, protestuan të mërkurën kundër ndërmarrjes “Prishtina Parking”, për shkak të, siç thanë, parkimit të pakontrolluar që po shkakton tollovi të vazhdueshme, bllokimeve disaorëshe të rrugëve, konflikteve mes banorëve, si edhe mungesës së gjobave dhe transparencës për lejet e parkimit rezidencial. Ata kërkuan zgjidhje urgjente, si parkim vetëm për rezidentët dhe vendosjen e një laure për ta shmangur kaosin në lagje.

Banor i kësaj lagjeje, Luan Dizdari, tha se banorët po përballen vazhdimisht me tollovi dhe bllokime disaorëshe, veçanërisht në zonën e tunelit, për shkak të parkimit të pakontrolluar.

“Nuk jemi aspak të kënaqur, bëhet tollovi gjithmonë, kemi problem,zakonisht te tuneli këtu, aty bllokohet, ka dy a tre orë duhet me i prit… Zoti na ruajt naj njeri smut me kon, bllokohesh…zgjedhja e vetme me hek Prishtina Parking prej këtu hiq, sepse këtu po parkohen edhe makina tjera që vin prej gjithkahit dhe shumica i kanë renë në fije, po i fusin ku nuk ka gjoba edhe bllokon… bejnë kishe policia e komunës, ata po japin diçka letra, herë vin herë nuk vin, veç bëhet tollovi mosvet…duhet me bë një rampë vetëm na këtu të lagjes tonë me u parku edhe s’ke me pas problem, me të vërtetë shumë herë më ka ndodh me thënë ec largoma kerrin se s’po mundem me dal”, theksoi Dizdari.

“Me kërkesën e qytetarëve është thirrë protesta lidhur me pakënaqësitë e Prishtina Parking, edhe këtu duke e falënderu Policinë e Kosovës se moti ka mujt me ndodh edhe naj vrasje, sepse ka konflikte të mëdha mbrenda lagjes, kemi pa kanqësi. Unë si përfaqësuese e kom kërku listën të cilën ata i kanë pajis qytetarët me leje si banor rezidencial, të njëjtit janë përgjigj që s’kanë drejtë me dhanë detaje sepse janë të dhëna konfidenciale, mirëpo kanë harru që unë jam përfaqësuese në komunitet edhe ndodh që kam të dhëna shumë më shumë se ata që janë në ndërmarrje, unë i kam të gjitha të dhënat e banorëve rezidencial dhe kam takimet e rregullta me qytetarët”, theksoi Hasani.

Ndërmarrja “Prishntina Parking” i menaxhon disa nga zonat e parkimit të komplekset banesore në kryeqytet.

Kryetari i Komunës së Prizrenit dhe njëherësh kryetar i Degës së PDK-së në këtë qytet, Shaqir Totaj, ka reaguar pas evidentimit të parregullsive gjatë procesit të rinumërimit të votave, duke e cilësuar situatën si cenim të drejtpërdrejtë të vullnetit të qytetarëve dhe të demokracisë zgjedhore.

Totaj ka deklaruar se është thellësisht i zhgënjyer me atë që ka dalë nga rinumërimi i votave në Prizren.

“Çdo tentim për tjetërësim të votës është cenim i drejtpërdrejtë i vullnetit të lirë të qytetarëve, i demokracisë zgjedhore dhe i vetë demokracisë së brendshme partiake”, ka thënë ai.

Ai ka paralajmëruar se, në cilësinë e kryetarit të degës së PDK-së në Prizren, do të kërkojë përgjegjësi dhe llogaridhënie të plotë për çdo shkelje të konstatuar.

“Çdo shkelje është përgjegjësi individuale dhe duhet trajtuar në përputhje me ligjin dhe rregulloret në fuqi. Kjo nuk është PDK-ja për të cilën kemi punuar dhe investuar me vite, dhe këto veprime nuk e përfaqësojnë frymën dhe vlerat tona”, ka theksuar Totaj.

Duke iu drejtuar qytetarëve, Totaj ka siguruar se Partia Demokratike e Kosovës do të mbrojë vullnetin e votuesit dhe procesin demokratik.

“PDK di dhe do ta mbrojë vullnetin e votuesit dhe demokracinë në Kosovë, duke vepruar me vendosmëri dhe përgjegjësi për të mirën e vendit dhe të ardhmes së tij”, ka deklaruar ai.

Në fund, Totaj ka shtuar se parregullsitë e shfaqura në procesin zgjedhor, sipas tij të pranishme në parti të ndryshme, kërkojnë një rivlerësim tërësor nga Komisioni Qendror i Zgjedhjeve dhe institucionet përkatëse.

“Kërkohet një menaxhim i kujdesshëm i procesit të numërimit në mënyrë që të ruhet deri në fund mbarëvajtja dhe paprekshmëria e zgjedhjeve”, ka përfunduar Totaj. /Telegrafi/

Situata me mbeturina në Komunën e Prishtinës po vazhdon të jetë e rëndë, pasi edhe në vitin e kaluar kishte probleme me grumbullimin e tyre.

Madje, kishte edhe dilema për qytetarët se a duhet paguar mbeturinat Kompanisë “Pastrimi” apo komunës.

Por, në marrëveshjen e arritur mes kompanisë dhe komunës, u mor vendim që qytetarët të paguanin faturat tek këta të fundit, raporton Telegrafi.

Mirëpo, edhe pas kësaj situate ka ankesa nga qytetarët që mbeturinat ka me javë që nuk mblidhen nga Kompania e Pastrimit, duke bërë që ato të kundërmojnë rëndë.

Grumbulli i tyre në masë të madhe nëpër lagje të ndryshe të kryeqytetit, ka shkaktuar edhe rrezik nga qentë endacak që në këtë kohë ngricash, është piketim i tyre për të gjetur ushqim.

Një zonë e rënduar mbetet edhe pjesa tek Muzeu i Kosovës, ku mbeturinat janë grumbulluar tash e disa ditë dhe vazhdojnë të sjellin probleme për qytetarët. /Telegrafi/

Vendimi i Kuvendit Komunal të Prishtinës për miratimin e Listës së Pronave Publike për dhënie në shfrytëzim për vitin 2026, është konstatuar i paligjshëm nga Minsitria e Administrimit të Pushtetit Lokal (MAPL).

Më 30.12.2025, Asambleja e Kryeqytetit, ka miratuar listën e veçantë të pronave të paluajtshme të komunës, të cilat planifikohen të jepen në shfrytëzim gjatë vitit 2026.

KALLXO.com, ka sigurar vendimin e MAPL-së në të cilin thuhet se Ministria më 31.12.2025 kishte pranuar për shqyrtim të detyrueshëm të ligjshmërisë vedimin për miratimin paraprak të pronave të paluajtshme të komunës.

Ndërkaq, të entjen, më 15.01.2026, MAPL ka vlerësuar se ky akt nuk është në pajtim me dispozitat ligjore në fuqi.

“Minsitria e Administrimit të Pushtetit Lokal, pas shqyrtimit të përmbajtjes së aktit të Komunës, vlerëson se akti i Komunës, nuk është në pajtim me dispozitat e legjislacionit në fuqi”- thuhet në vendimin e nxjerrë nga Ministria.

Sipas vendimit, në bazë të Ligjit për Dhënien në Shfrytëzim dhe Këmbimin e Pronës së Paluajtshme të Komunës, Komuna e Prishtinës duhet ta publikoj listën e përgjithshme të pronave të paluajshtme, si dhe listën e veçantë të pronave që planifikohen për dhënie në shfrytëzim për vitin vijues deri më 31 dhjetor, duke e arsytuar interesin publik dhe zhvillimin ekonomik të komunës.

Po ashtu, sipas MAPL-së, lista e pronave të paluajtshme për dhënie në shtrytëzim duhet të përmbajë të dhënat kadastrale të pronës, qëllimin, destinimin, datën e publikimit të njoftimit dhe përiudhën kohore për dhënie në shfrytëzim të pronës së paluajtshme.

“Andaj, bazuar në të lartcekurat, Kuvendi i Komunës së Prishtinës duhet të ndërmerr veprime dhe brenda afatit ligjor prej 30-të ditësh, të shqyrtoj dhe harmonizoj aktin me legjislacionin në fuqi”- theksohet tutje në përfundim të vendimit.

Në lidhje me këtë vendim, Kallxo.com ka adresuar pyetje edhe në Komunën e Prishtinës dhe është në pritje të përgjigjeve.

Votimi i këtij vendimi, në Asamblenë e Prishtinës u shoqërua me diskutime e përplasje lidhur me qartësinë e dokumentacionit dhe transparencën e qeverisjes komunale rreth përgatitjes së listës së veçantë të pronave të paluajtshme.

Nora Kelmendi nga Lëvizja Vetëvendosje, tha se lista e dorëzuar nga ekzekutivi nuk përmbush të gjitha kërkesat ligjore.

“Në dokumentacionin e dërguar mungon lista e përgjithshme e pronave të paluajtshme të komunës. Ne kemi vetëm një listë të veçantë, e cila në vetvete është e mangët. Sipas ligjit, Komuna është e obliguar të publikojë të dy listat”- tha Kelmendi.

Asamblisti tjetër nga kjo parti, Egzon Azemi shtoi kritika për ndikimin e grupeve të interesit.

“Grupet e interesit na e kanë marrë kryetarin në shtrytëzim, e po e marrin edhe cilëndo pronë në shtrytëzim. Kryetar, dëshmoje që nuk të kanë marrë në shfrytëzim këto grupe të interesit dhe që në vendimet që merren, nuk je vegël e tyre”- deklaroi Azemi.

Ndërsa, Besa Shahini nga PSD theksoi se mungesa e një regjistri të përgjithshëm e vështirëson monitorimin e pronave dhe inkasimin e të hyrave.

Sipas saj, ka keqmenaxhim të përmasave të mëdha të pronës publike në Kryeqytet dhe se dëmi që i është shkaktuar komunës është mbi 200 mijë euro. Ndërkaq, Drejtori i Pronës, Brahim Mehmetaj, tha se procesi është kryer sipas ligjit.

Lista e veçantë pronave publike të komunës në LINK.

Kryetari i Komunës së Prishtinës, Përparim Rama, së bashku me drejtorin e Arsimit, Samir Shahini, morën pjesë sot në shkollën “Xhemajl Mustafa” në një aktivitet të veçantë për prezantimin e një projekti që synon të rrisë sigurinë dhe përgatitjen e nxënësve dhe mësimdhënësve në botën digjitale.

Në aktivitet ishin të pranishëm edhe Ambasadorët e Finlandës dhe Suedisë, si dhe partnerët nga EEI.

Ky projekt ofron mësimdhënësve mjete dhe udhëzime praktike për: dallimin e informacionit të saktë nga dezinformimi, përdorimin e sigurt të internetit, zhvillimin e mendimit kritik tek të rinjtë.

“Kjo iniciativë do të ndihmojë që shkollat tona të jenë hapësira ku fëmijët mësojnë jo vetëm nga librat, por edhe si të mbrohen dhe të mendojnë në mënyrë të pavarur në epokën digjitale,” tha Kryetari Rama.

Drejtori i Arsimit, Samir Shahini, theksoi se projekti do të mbështesë mësimdhënësit për t’u ofruar nxënësve njohuri të domosdoshme për të naviguar në mënyrë të sigurt dhe të përgjegjshme në internet. /Telegrafi/

Kryetari i Kryeqytetit të Prishtinës, Përparim Rama, ka bërë të ditur se Prishtina dhe përfaqësues të komunitetit arbëresh janë dakorduar për krijimin e Shtëpisë Arbëreshe në Kryeqytet, një hapësirë që do t’i kushtohet ruajtjes dhe promovimit të trashëgimisë kulturore, historike dhe shpirtërore arbëreshe.

Këtë njoftim Rama e bëri përmes një postimi në Facebook, pas takimit me Zia Lucia, të cilën e cilësoi si figurë me peshë të veçantë kulturore.

“Sot, me zemër të hapur dhe me respekt të thellë, mirëprita Zia Lucia, një figurë që sjell me vete urtësi, traditë dhe shpirt arbëresh”, ka shkruar Rama.

Sipas tij, Shtëpia Arbëreshe në Prishtinë do të shërbejë si qendër ku do të bashkohen arti, kultura, vlerat shpirtërore dhe gastronomia arbëreshe.

“U dakorduam për një ëndërr të përbashkët: krijimin e Shtëpisë Arbëreshe në Prishtinë, një hapësirë ku historia nuk harrohet, por jeton”, theksoi ai.

Rama ka vlerësuar komunitetin arbëresh si një pasuri të gjallë kulturore, duke nënvizuar se Kryeqyteti e sheh si nder dhe përgjegjësi ruajtjen e kësaj trashëgimie.

“Arbëreshët nuk janë thjesht kujtesë e së shkuarës, por frymëzim për të ardhmen, shembull i rrallë i dashurisë për gjuhën, rrënjët dhe dinjitetin”, ka shtuar kryetari i Prishtinës.

Ai po ashtu ka theksuar se kjo shtëpi do të shërbejë si urë lidhëse mes brezave dhe kulturave.

“Kjo shtëpi do të jetë urë mes brezave, mes historisë dhe sotmes, mes shpirtit arbëresh dhe Kryeqytetit Prishtina që i mirëpret me krenari”, ka deklaruar Rama.

Në përmbyllje, kryetari i Kryeqytetit ka përcjellë një mesazh mikpritjeje dhe mirënjohjeje për komunitetin arbëresh, duke theksuar se Prishtina do të jetë gjithmonë shtëpia e tyre. /Telegrafi/

Komuna e Prishtinës njoftoi se nesër do të rifillojë procesi mësimor në të gjitha shkollat e kryeqytetit.

Procesi mësimor do të vazhdojë pa u shtyrë më shumë, pasi Komuna thotë se ka ndërhyrë dhe menaxhuar suksesshëm situatën pas reshjeve të shumta.

“Pas ndërhyrjeve dhe menaxhimit të suksesshëm të situatës pas reshjeve të shumta, njoftojmë se nesër rifillon procesi mësimor në të gjitha shkollat e Kryeqytetit. Falë angazhimit të ekipeve në terren dhe masave të marra, është siguruar ambient i sigurt për nxënësit dhe stafin arsimor. Urojmë nxënësve një rikthim të mbarë në shkollë”, thuhet në njoftimin e Komunës së Prishtinës.

Ndryshe, për shkak të vërshimeve, Komuna e Malishevës, përmes një njoftimi të ndarë, shtyu për dy ditë, përkatësisht për 14 janar nisjen e gjysmëvjetorit të dytë të shkollës.

Ndërkaq, drejtoria e Arsimit në Fushë-Kosovë tha se ka vendosur që ta shtyjë rinisjen e mësimit deri më 19 janar.

Ministria e Arsimit veçse ka shtyrë nisjen e gjysmëvjetorit të dytë për 12 janar, për shkak të dëmeve të shkaktuara nga vërshimet./Telegrafi/

Kryeqyteti i Prishtinës ka njoftuar qytetarët se gjatë ditëve në vijim pritet përkeqësim i kushteve atmosferike, i shoqëruar me temperatura të ulëta, ngrica dhe reshje bore.

Autoritetet komunale u kanë bërë thirrje qytetarëve për kujdes të shtuar gjatë qarkullimit, duke rekomanduar që lëvizjet të kufizohen vetëm në raste të domosdoshme, të përdoren pajisjet e detyrueshme të dimrit dhe të shmanget shpejtësia e lartë, me respektim të plotë të sinjalistikës rrugore.

Sa i përket transportit publik urban, Kryeqyteti ka paralajmëruar se për shkak të kushteve atmosferike mund të ketë vonesa në disa linja. Në zonat ku vlerësohet se qarkullimi nuk është i sigurt, transporti publik mund të pezullohet përkohësisht deri në përmirësimin e kushteve, ndërsa qytetarët do të njoftohen me kohë për çdo ndryshim.

Për çdo pengesë në qarkullim apo situatë që kërkon ndërhyrje, qytetarët mund të kontaktojnë Qendrën e Thirrjeve në numrat pa pagesë: 0800 122 33 dhe 0800 122 44.

Drejtoria për Siguri dhe Emergjenca në Komunën e Prishtinës ka njoftuar qytetarët për situatën e krijuar si pasojë e reshjeve të vazhdueshme, duke bërë apel për respektimin e masave të sigurisë.

“Sipas raportimeve tona, ekipet e Kryeqytetit kanë intervenuar deri tani në mbi 40 raste, në bashkëpunim të plotë me të gjitha strukturat relevante. Situata është nën monitorim të vazhdueshëm,” theksojnë nga Drejtoria.

Autoritetet paralajmërojnë se gjatë orëve në vijim, nëse intensiteti i reshjeve vazhdon, mund të paraqiten vështirësi shtesë, veçanërisht në zonat rurale të Prishtinës.

Në këtë kontekst, Drejtoria për Siguri dhe Emergjenca u bën thirrje qytetarëve:

• Të shmangin lëvizjet në zona të përmbytura dhe të mos kalojnë përmes ujërave të rrjedhshëm.
• Të mos parkojnë automjetet pranë përrenjve, lumenjve dhe nënkalimeve.
• Të sigurojnë bodrumet dhe hapësirat e ulëta të objekteve.
• Të raportojnë çdo situatë emergjente tek numrat zyrtarë të emergjencës.

“Drejtoria po koordinon të gjitha aktivitetet dhe menaxhimin e situatës në terren, në bashkëpunim me ekipet komunale dhe shërbimet përkatëse. Ju falënderojmë për bashkëpunimin dhe ju bëjmë thirrje për kujdes të shtuar,” shtojnë autoritetet.

Çdo situatë emergjente mund të raportohet në numrat e telefonit: 0800 122 33; 0800 122 44. /Telegrafi/

Një pjesë e rrugës në Veterrnik të Prishtinës është shembur, fillimisht duke u menduar se shkaku ishte reshjet e dendura që kanë kapluar Kosovën.

Telegrafi ka kontaktuar me Drejtorin për Siguri dhe Emergjenca në Komunën e Prishtinës, Lulzim Fushtica, i cili ka dhënë detaje mbi situatën.

“Shembja e dheut nuk ka ndodhur në rrugën kryesore, por në një rrugë dytësore. Na duhet të hapet edhe rast penal për shkak të rrezikimit të sigurisë publike”, tha Fushtica për Telegrafin.

Ai shtoi se shkaku është një operator privat që po kryen punime në atë zonë dhe nuk ka respektuar rregulloren.

“Inspektorët ia kanë ndërprerë realisht punën. Dje e kemi ndërprerë, e kemi mbyllë atë vendpunishte, i kemi vendosur shiritat”, tha ai.

“Inspektorët e ndërtimit do të marrin masa konform ligjit, domethënë do të pasojë dënimi për palën, në këtë rast për ndërtuesin”, shtoi Fushtica.

Drejtori për Siguri dhe Emergjenca paralajmëroi se, nëse vërtetohet se kompania nuk ka përmbushur kriteret, mund t’i revokohet edhe leja.

“Tutje, do të vazhdojmë edhe me procedura tjera. Nëse vërtetohet që nuk i ka përmbushur kushtet e ndërtimit, atëherë mund edhe t’i revokohet leja”, deklaroi ai.

Fushtica theksoi gjithashtu: “Është duke u ndërtuar një objekt banesor dhe aty ka pasur rrëshqitje të dheut, në gropën punuese”. /Telegrafi/

Drejtoria për Siguri dhe Emergjenca në Komunën e Prishtinës ka dalë me një paralajmërim për qytetarët, pas reshjeve të shumta të shiut të regjistruara gjatë 24 orëve të fundit në territorin e kryeqytetit.

Sipas të dhënave zyrtare nga Instituti Hidrometeorologjik i Kosovës, në Prishtinë janë regjistruar mbi 25 milimetra reshje shiu për metër katror, ndërsa parashikimet tregojnë se reshjet do të vazhdojnë edhe gjatë orëve dhe ditëve në vijim, me intensitet dhe intervale të ndryshme.

“Këto kushte atmosferike mund të shkaktojnë vështirësi në qarkullimin rrugor, mbingarkesë të sistemeve të kanalizimit dhe ujërave atmosferike, si dhe grumbullim të ujit në zona të caktuara urbane dhe nënkalime”, thuhet në njoftimin e Drejtorisë për Siguri dhe Emergjenca, raporton Telegrafi.

Po ashtu, sipas këtij paralajmërimi, ekziston rrezik i shtuar për rrëshqitje lokale të dheut në zonat më të ndjeshme të kryeqytetit.

Drejtoria u ka bërë thirrje qytetarëve që të tregojnë kujdes të shtuar gjatë lëvizjes, veçanërisht në zonat ku ka grumbullim të ujit, të shmangin kalimin nëpër nënkalime apo rrugë të përmbytura dhe të raportojnë me kohë çdo problem që mund të paraqesë rrezik për sigurinë publike.

“Institucionet përkatëse të Kryeqytetit janë në gatishmëri të shtuar për monitorimin e situatës dhe për ndërhyrje sipas nevojës,” thuhet më tej në njoftim.

Autoritetet u kanë rekomanduar qytetarëve që për informata të mëtejme të ndjekin njoftimet zyrtare dhe të respektojnë udhëzimet e institucioneve kompetente. /Telegrafi/

Kryetari i Komunës së Prishtinës, Përparim Rama, në një intervistë për RTV21 ka folur për projektet dhe ndryshimet që pritet të bëhen në kryeqytet gjatë vitit 2026.

Ai theksoi se Komuna po shqyrton masa të reja për menaxhimin e trafikut dhe qarkullimit të automjeteve, përfshirë edhe vendosjen e një pagese për hyrjen në qytet.

“Kush hyn me veturë në Prishtinë do ta paguajë 1 euro. Tash i kemi në përfundim këto ditë edhe emërimin, edhe finalizimin e projektit për unazën e brendshme. Jemi duke analizuar edhe mundësinë për një taksë për të gjitha automjetet që nuk janë të Prishtinës, pra për makinat që vijnë nga jashtë dhe hyjnë në Prishtinë.”, tha ndër tjera Rama.

Kryetari i Prishtinës, Përparim Rama, ka ftuar publikisht Lëvizjen Vetëvendosje, PDK-në, AAK-në dhe Lidhjen e Prishtinës për krijimin e një koalicioni të gjerë në nivel lokal, duke thënë se kryeqyteti ka projekte të gatshme dhe ka nevojë për bashkëpunim përballë sfidave të mëdha.

Në një intervistë për KosovaPress, Rama ka theksuar nevojën për bashkëpunim mes partive në nivel lokal në mënyrë që të çojnë përpara projektet. Vëmendje të veçantë i kushtoi nevojës për Policinë e kryeqytetit.

“Unë kam kërkuar publikisht po them që të bëjmë një koalicion të gjerë edhe këtu e ftoj edhe Lëvizjen Vetëvendosje, edhe Partinë Demokratike të Kosovës, edhe AAK-në, edhe Lidhjen e Prishtinës edhe të gjithë, sepse kemi një periudhë kohore katërvjeçare ku kemi sfida të mëdha që të përgatitemi për lojërat mesdhetare edhe mundemi po them me bërë shumë punë të mëdha. Kemi vizion, kemi mision, të gjitha projektet i kemi të gatshme, vetëm na duhet një koordinim i mirëfilltë, një bashkëpunim i mirëfilltë për me lulëzuar kryeqytetin. E nuk kam dyshim që do të mrijmë ta bëjmë një koalicion të gjerë. Nuk kemi bërë diskutime për detale”, ka thënë Rama.

2025-ta sipas Ramës ishte vit sfidues me bllokada nga niveli qendror për projekte dhe buxhet.

Një nga sfidat kryesore, sipas tij, ka qenë menaxhimi i projekteve infrastrukturore, sidomos ato që lidhen me zhvillimin e urbanizmit dhe përmirësimin e kushteve të jetesës.

Ndërkohë, për unazën e jashtme të kryeqytetit, Rama tha se duhet të zhbllokohet sa më shpejt pasi që ndihmon edhe për lojërat mesdhetare të 2030.

“Ka qenë një vit sfidues, kemi pasur bllokada të ndryshme, përkundër faktit që kemi pasur bllokada të projekteve, po ashtu të gjithë buxhetit. Mirëpo në fund, për fat të mirë, e kemi zhbllokuar buxhetin edhe kemi mundur me i kryer të gjitha obligimet tona financiare ndaj operatorëve.. Unaza e brendshme tashmë ka përfunduar dhe do të futet në përdorim këto ditët me radhë. Ndërsa unaza e jashtme duhet të fillojë sa më shpejt sepse e dimë që i kemi lojërat mesdhetare të vitit 2030, për të cilat duhet të bëhemi gati. Projekti më madhor i kryeqytetit është unaza e kryeqytetit. E dini që e kemi projektin gati tash e katër vite, po ka qenë edhe ai i bllokuar nga qeveria. Kemi pasur edhe kryeministrin që ka dhënë deklarata vetë që duhet ta zhbllokojmë procesin, duhet të fillojë brenda dy- tre muajsh që ta ndërtojmë unazën”, ka thënë Rama.

Një tjetër projekt i madh që është përmendur nga Rama, pas përfundimit të sheshit George Bush është ndërtimi i sheshit deri tek rrethi me flamur që do të lidhen me xhaminë e madhe që është në ndërtim. Ky projekt, sipas kryetarit Rama, ka për qëllim përmirësimin e cilësisë së ajrit, krijimin e hapësirave publike të sigurta dhe promovimin e aktiviteteve kulturore dhe sociale për të gjitha grupmoshat.

Sheshi George Bush që ka qenë i premtuar se do të përfundoj në nëntor të 2025, Rama ka thënë se ende është i bllokuar procesi dhe shpreson se mund të përfundojë brenda 12 muajsh nëse zhbllokohet brenda një muaji.

“Atë e kemi në plan dhe atë do ta vazhdojmë. Kjo është një proces i zhbllokimit të trafikut në kryeqytet, i përmirësimit të cilësisë së ajrit, i përmirësimit të jetës së njerëzve në kryeqytet, pra i krijimit të hapësirave publike që kërkojnë më shumë siguri edhe një krijimi të një teatri publik i ndërlidhur me ekspozita, gastronomi, muze, hapësira publike për të gjitha demografitë, prej fëmijëve deri tek të moshuarit. Sapo të përfundojë sheshi George Bush do të fillojmë edhe me fazën e dytë deri tek posta atje, deri tek xhamia e madhe tash që ndërtohet, sepse edhe kur të përfundon xhamia e madhe, ka me qenë një fluks i madh i qytetarëve jo vetëm nga Prishtina po nga e gjithë Kosova edhe i duhet patjetër që të ketë një vendosje të mirëfilltë urbane, në kontekst urban që kjo ndërlidhet edhe me sheshin të cilin e kemi propozuar... Nëse zhbllokohen proceset që unë jam shumë optimist që do t'i zhbllokojmë për ndoshta as për brenda dy- tre javësh apo një muaji, uroj që kjo të ndodhë. Atëherë, sheshi mundet me përfundu brenda 12 muajsh”, ka shtuar ai.

E për Spitalin e Prishtinës, që ka pasur të përfundojë në vitin 2023, Rama ka thënë se edhe pse kanë siguruar fonde prej 75 milionë euro nga qeveria e shtetit të Katarit, Ministria e Punëve të Brendshme nuk e ka dorëzuar projektin për të marrë këto fonde.

“E kemi parcelën e ndarë, e kemi projektin e përfunduar të cilin tash është nën menaxhim të Ministrisë të Punëve të Brendshme. Ne kemi kërkuar që të na japin këtë projekt sepse ne vetë kemi punuar me ekipet përkundër faktit që nuk ka qenë në menaxhim tonin, por në menaxhim të Ministrisë së Administratës e cila ka kaluar pastaj, se është një projekt prej vitit 2019, i cili ka mbetur në sirtarë si fizibilitet. Ne e kemi zhvilluar deri në arkitekturë detale edhe po ashtu kemi siguruar fonde nga qeveria e shtetit të Katarit, mirëpo ja që është refuzuar, domethënë nuk na e kanë dorëzuar projektin për me e dërguar atje që t'i marrim fondet, ende e kemi këtë mundësi... Puro politike, domethënë 75 milionë të cilët janë destinuar, se janë premtuar nga shteti i Katarit, kishin me qenë pare falë, grant. Po ja që ministri i kësaj ministrie ka vendosur që mos na e jep këtë projekt, mos ta dorëzojë projektin”, ka thënë Rama.

Një tjetër sektor ku Komuna e Prishtinës, sipas Ramës ka investuar shumë gjatë vitit 2025, është arsimi dhe kujdesi për fëmijët.

Rama ka theksuar se janë ndërtuar shkolla dhe çerdhe të reja, ndërkohë që ka vazhduar mbështetja për familjet me të ardhura të ulëta, përmes subvencioneve për regjistrimin e fëmijëve në çerdhe private.

“Ne kemi ndërtuar faktikisht katër çerdhe, kemi ndërtuar tre shkolla, tash i kemi po them në ndërtim e sipër edhe shtatë të tjera plus pesë shtesë. Pra ne vetëm se kemi ndërtuar një numër të madh të shkollave dhe çerdheve, më shumë se kurrë më parë. Nëse i bën bashkë më shumë se qeveria në të gjithë shtetin faktikisht. Janë tash edhe në proces e sipër edhe në bazë të planit zhvillimor komunal e kemi përcaktuar që 3.5 për qind të secilit zhvillim në kryeqytet i kthehen komunës për komunitet. Ne kemi edhe programin tjetër ku i kemi subvencionuar familjet të cilat kanë marrë 500 euro në muaj apo më pak, me subvencion 70 euro në muaj për fëmijët e tyre për me i çuar edhe nëpër çerdhe private nëse nuk munden me i çuar nëpër çerdhe publike”, është shprehur Rama.

Rama ka theksuar se për të siguruar një menaxhim më të mirë të sigurisë dhe një përgjigje më të shpejtë ndaj situatave emergjente, Prishtina ka nevojë për një forcë policore të pavarur, që do të menaxhohet direkt nga Komuna.

“Policia e Kryeqytetit është edhe sfida tjetër me radhë, e cila është ka qenë e bllokuar prej Ministrisë së Punëve të Brendshme. Pra kryeqytetit i duhet Policia e Kryeqytetit, i duhet direktivat e drejtpërdrejta prej kryetarit të kryeqytetit. Kjo nuk është pranuar, as nuk është lejuar prej Ministrisë së Punëve të Brendshme. Tash që përgatitemi për lojërat mesdhetare 2030, ne patjetër duhet ta kemi Policinë e Kryeqytetit”, ka thënë ai.

Rama ka folur edhe për trafikun urban të Prishtinës që do t’i shtohen edhe 100 autobusë të rijnë dhe dy tramvajë elektrikë që do të lidhin Fushë Kosovën me lagjen Bregu i Diellit deri në qershor të vitit 2026.

Kryetari i Prishtinës ka përmendur edhe TRIP-in, trafikun e ri të Prishtinës që ka ndërlidhur trafikun urban publik me sektorin privat me një biletë të ndërlidhur, ndërkohë do të shtohet edhe TRIM-i transporti i ri metropolitan që do të ndërlidhë komunat përreth si Obiliqin, Fushë Kosovën, Podujevën, Lipjanin, Graçanicën dhe Drenasin.

Për vitin 2026, Komuna e Prishtinës ka planifikuar një buxhet prej 151 milionë eurosh, që do të përdoret për projekte të rëndësishme, përfshirë ndërtimin e stadiumit të ri dhe arenës multifunksionale, si dhe përgatitjet për Lojërat Olimpike të vitit 2030. Ky investim ka për qëllim modernizimin e infrastrukturës dhe ngritjen e nivelit të jetesës për qytetarët e Prishtinës./KP/

Në kryeqytet sonte shënohet ndërrimi i viteve me një program festiv të organizuar nga Komuna e Prishtinës.

Sipas njoftimit zyrtar, aktivitetet festive nisin nga ora 18:00 dhe do të zgjasin deri pas mesnatës, duke ofruar muzikë live dhe performanca artistike për qytetarët që do të festojnë Vitin e Ri në shesh.

Qytetarët janë ftuar të marrin pjesë në numërimin tradicional për ndërrimin e viteve pak para mesnatës, i cili do të shoqërohet me shfaqje fishekzjarresh.

“Nën organizimin e Kryetarit të Kryeqytetit, Përparim Rama, kjo mbrëmje vjen si një festë për të gjithë qytetarët – me muzikë, gëzim dhe energji pozitive për ta nisur vitin e ri së bashku”, thuhet në njoftimin e Komunës.

Sipas agjendës së publikuar, programi përfshin nisjen e aktiviteteve me DJ nga ora 18:00, ndërsa nga ora 23:30 deri në 00:30 do të performojnë Jehona Lumi & Band. Pas mesnatës, në orën 00:40, skena do t’i takojë Dren Abazit dhe Zig Zag Orchestra.

Komuna e Prishtinës u ka uruar mirëseardhje të gjithë qytetarëve dhe ka ftuar ata që të bëhen pjesë e festës së ndërrimit të viteve në kryeqytet.

Me 31 vota për, 14 kundër dhe asnjë abstenim ka kaluar në kuvendin komunal të Prishtinës në një seancë të jashtëzakonshme, lista e veçantë për pronat e paluajtshme të dhëna në shfrytëzim për 2026, ani pse kishte diskutime të shumta rreth saj si mangësi si dokumentacion.

Drejtori i Pronës në komunën e Prishtinës, Brahim Mehmetaj tha se ky dokument është i rëndësishëm për zhvillim ekonomik, social dhe urban të komunës së Prishtinës, i cili sipas tij është hartuar në përputhje me legjislacionin në fuqi dhe parimin e transparencës së interesit publik dhe menaxhimit të pronës së kryeqytetit.

“Një dokument i rëndësisë së veçantë për zhvillim ekonomik, social dhe urban të komunës sonë. Kjo listë është hartuar në përputhje me legjislacionin në fuqi si dhe me parimin e transparencës, interesit publik dhe menaxhimit të pronës së kryeqytetit. Qëllimi kryesor është që pronat komunale të mos mbesin të pashfrytëzuara, por të vie në funksion të zhvillimit, krijimit të vendeve të reja të punës dhe rritjes së të hyrave për kryeqytetin. Pronat e përfshira në këtë listë janë analizuar me kujdes në aspektin juridik, urbanistik dhe ekonomik. Shfrytëzimi i tyre do të bëhet përmes procedurave të hapura, konkurruese dhe transparente duke garantuar ruajtjen e pronësisë dhe interesit publik”, tha Mehmetaj, raporton Kp.

Asamblistja nga Lëvizja Vetëvendosje, Nora Kelmendi kishte kritika për listën e veçantë e cila sipas saj është e mangët dhe gjithashtu ka nene të gabuara.

Në dokumentacionin e dërguar Kelmendi tha se mungon lista e përgjithshme e pronave të paluajtshme të komunës, e cila sipas ligjit duhet të dërgohet nga kryetari për miratim paraprak nga Kuvendi komunal.

“Kemi një listë siç po shihet problemi nuk është ideja e shfrytëzimit, por tek mënyra, procedura dhe mungesa e dokumentacionit të domosdoshëm ligjor. Në dokumentacionin e dërguar nga ekzekutivi përmes postës elektronike mungon lista e përgjithshme e pronave të paluajtshme të komunës, e cila sipas ligjit duhet të dërgohet nga kryetari për miratim paraprak nga kuvendi komunal. Para vetës kemi vetëm një listë të veçantë, e cila në vetvete është e mangët. Keni përshkruar edhe nene të gabuara që nuk po çuditem fare sepse edhe pas katër viteve ju ende bëni gabime të tilla amatereske”, tha Kelmendi.

Shefja e grupit të asamblistëve të PSD-së, Besa Shahini kishte pesë kërkesa për kryetarin e komunës, Përparim Rama si parakusht për të votuar listën e dërguar.

“Pesë kërkesa konkrete të cilat janë parakusht për të votuar këtë listë që e keni dërguar. E para është dhënia në qira ose shfrytëzimin e pronave publike, një arsyetim për ekonominë dhe qëllimin pse po i jepni këto prona. Kryetari është i obliguar të raportoj çdo gjashtë muaj për pronat që janë dhënë në shfrytëzim. E treta komuna e Prishtinës nuk e ka rregulloren që i kërkohet për dhënien në shfrytëzim në periudhë më pak se një vit. E katërta plani i veprimit për të adresuar komentet e auditorit dhe e pesta Prishtina e ka një problem shumë serioz me mbrojtjen e pronës publike çdo ditë zaptohen dhe është e pamundur për ta mbrojtur nëse refuzoni për ta ndërtuar regjistrin e përgjithshëm për të ditur se ku janë pronat publike të komunës”, shtoi Shahini.

Edhe Gëzim Sveçla nga LVV-ja tha se në një listë me 5 mijë e 288 prona pa kompletim të dokumentacionit, nuk dihet se kush është pronari, kush i shfrytëzon e as destinimi i tyre.

“Na sjell një listë me 5 mijë e 288 prona, në një seancë të jashtëzakonshme dhe me kërkua me votu të njëjtin pa kompletim të dokumentacionit paraprak nuk është në rregull. Asamblistët nuk janë makineri votash, nuk mundem me votu prona që nuk dihet kush është pronari, kush i shfrytëzon as cili është destinimi i tyre. Kjo mund të shërbej pastaj për shumë veprime tjera të jashtëligjshme, mund të ketë qytetarë qe këto prona tashmë i kanë në shfrytëzim dhe miratimi i një liste të tillë është një lloj shantazhi ndaj tyre”, tha Sveçla.

Jeta Rafuna nga LDK-ja ka kërkuar që ta votojnë këtë listë sepse sipas saj krijon mundësi për ekonomi, mbështetje e iniciativa lokale si dhe për rritjen e të hyrave vetanake të komunës.

“Lista që po shqyrtojmë sot janë rezultat i procesit funksional, me qëllim që këto prona të bien në funksion të interesit publik që të mos mbesin të pashfrytëzuara. Krijon mundësi për qëllim ekonomik, për mbështetjen e iniciativa lokale si dhe për rritjen e të hyrave vetanake të komunës, të cilat më pas kthehen në shërbime për qytetarët tanë. Miratimi i këtij vendimi sot i hap rrugë planifikimit me kohë për 2026 dhe siguron një proces të rregullt të barabartë dhe transparent”, shtoi Rafuna.

Drejtori i Mobilitetit, Donat Lushaku, ka njoftuar se sot po zhvillohet procesi i dezinfektimit të hapësirës në Nënkalimin te Xhamia e Llapit, në lagjen Kodra e Trimave, me përdorimin e mjeteve të parapara higjienike.

Sipas njoftimit, gjatë ditës së nesërme është planifikuar pastrimi gjeneral i nënkalimit me cisternë, me qëllim të përmirësimit të kushteve të higjienës dhe sigurisë për qytetarët.

Lushaku ka apeluar tek banorët që të tregojnë kujdes të shtuar gjatë lëvizjes në këtë hapësirë dhe, nëse është e mundur, të shmangin përdorimin e nënkalimit deri në përfundimin e plotë të punimeve të pastrimit.

Institucionet komunale kanë theksuar se këto veprime po ndërmerren në kuadër të mirëmbajtjes së rregullt të infrastrukturës urbane dhe për garantimin e një ambienti më të sigurt për këmbësorët. /Telegrafi/

Prokuroria Speciale e Republikës së Kosovës ka ngritur aktakuzë ndaj Sh.A., për veprën penale “Mosraportimi ose raportimi i rremë i pasurisë, i të ardhurave, i dhuratave, i dobisë tjetër materiale ose i detyrimeve financiare”.

Kjo u bë e ditur përmes një postimi në rrjetin social në Facebook nga faqja zyrtare e Sistemit Prokurorial.

Ndër të tjera në njoftim thuhet se i pandehuri akuzohet se, nga viti 2018 e në vazhdimësi deri në vitin 2022, në cilësinë e Kryetarit të Komunës së Prishtinës, me dashje ka paraqitur deklarata të pasakta të pasurisë, përkatësisht duke mos deklaruar deponimet në para të gatshme, të realizuara personalisht gjatë viteve përkatëse.

"Sipas aktakuzës, shuma e përgjithshme e mjeteve të padeklaruara arrin vlerën prej 172,600.00 euro. Rasti i është dërguar për shqyrtim Gjykatës Themelore në Prishtinë, Departamenti Special", thuhet në njoftim. /Telegrafi/

Kryetari i Kryeqytetit ka bërë të ditur se Komuna e Prishtinës po vazhdon bashkëpunimin me Bashkësinë Islame të Prishtinës dhe Shoqatën Bamirëse “Bereqeti”, në kuadër të përkujdesjes sociale për qytetarët, veçanërisht për të moshuarit.

Sipas tij, përmes një donacioni që përfshin mbështetje materiale për personat e moshuar, institucionet dhe organizatat partnere po dëshmojnë rëndësinë e solidaritetit dhe ndihmës reciproke, sidomos gjatë kësaj periudhe.

Kryetari ka falënderuar edhe Shtëpinë e të Moshuarve për bashkëpunimin dhe energjinë pozitive, duke theksuar se angazhimi i përbashkët e bën këtë partneritet edhe më të fuqishëm në shërbim të qytetarëve. /Telegrafi/