Nga Leonard Veizi

Ka një paradoks të çuditshëm te ditëlindjet. Kur je fëmijë, mezi pret të rritesh. Të duket sikur fëmijëria është një dhomë ku ke mbetur mbyllur dhe bota e të rriturve është matanë derës, duke të pritur. Numëron vitet jo sepse ke frikë prej tyre, por sepse mezi pret t’i mbërrish.

Pastaj rritesh. Dhe një ditë, pa e kuptuar se kur ka ndodhur, urimi “Edhe 100!” nuk të tingëllon më si premtim. Të kujton se edhe një vit tjetër ka ikur.

Në fëmijëri koha është një dëshirë që nuk e vlerësojmë sa duhet. Në pleqëri bëhet llogari.

Kur je i vogël, një vit të duket shumë i gjatë. Dhjetë vjet janë pothuajse një jetë tjetër. Të duket se ke përpara një pafundësi për të dashuruar, për të udhëtuar, për të gabuar, për të filluar nga e para.

Dhe pikërisht atëherë bëjmë gabimin më të madh: e marrim kohën si diçka që na përket. Mendojmë se kemi kohë. Për projektin që shtymë. Për librin që do ta shkruajmë një ditë. Për udhëtimin që do ta bëjmë kur të kemi më shumë para. Për dikë që do t’i telefonojmë të nesërmen. Për jetën që, në mendjen tonë, do të fillojë diku më vonë.

Por “më vonë” është një nga mashtrimet më të mëdha të jetës.

Në mesin e jetës kemi ndoshta më shumë projekte se kurrë. Kemi më shumë qartësi për atë që duam dhe ndoshta edhe mjetet për ta realizuar. E megjithatë vazhdojmë të besojmë se koha është e bollshme. Tridhjetë vjeç mendon se të dyzetat janë larg. Dyzet vjeç mendon se të pesëdhjetat janë ende përpara. Derisa një ditë shikon pas dhe kupton se një pjesë e madhe e rrugës tashmë është bërë.

Koha nuk ndryshon. Ndryshon mënyra se si e shohim.

Një vit për një dhjetëvjeçar është një e dhjeta e jetës së tij. Për një pesëdhjetëvjeçar është një e pesëdhjeta. Prandaj vitet e fëmijërisë duken të gjata, ndërsa vitet e moshës së rritur rrëshqasin njëri pas tjetrit. Në fillim numërojmë vitet që kemi përpara. Më vonë fillojmë të numërojmë ato që kemi lënë pas.

Dhe aty lind ankthi i vërtetë: jo frika nga mosha, por frika se mos nuk kemi kohë të mjaftueshme. Sepse trupi plaket, por ëndrrat nuk plaken me të njëjtin ritëm.

Kjo është ndoshta padrejtësia më e madhe. Në moshën kur ke më shumë energji, nuk ke gjithmonë qartësinë se çfarë të bësh me të. Në moshën kur ke më shumë përvojë dhe njohuri, koha bëhet më e çmuar.

Papritur e kupton se nuk mund t’i bësh të gjitha. Nuk mund të lexosh të gjithë librat, të shohësh të gjitha vendet, të realizosh çdo projekt që ke imagjinuar. Secili prej nesh është i dënuar të zgjedhë.

Dhe ndoshta pjekuria fillon pikërisht aty: kur kupton se jeta nuk është vetëm ajo që do të arrish të bësh, por edhe ajo që duhet të pranosh se nuk do ta bësh dot.

Ditëlindja është një lloj pasqyre. Të detyron të shohësh fytyrën tënde, por edhe rrugën pas teje. Njerëzit që kanë qenë pjesë e saj, ata që kanë ikur, ata që kanë mbetur. Dhe mes dy urimeve dhe një qiriu të ndezur, të vjen pyetja e thjeshtë: A do të kem kohë të bëj atë që ende dua?

Ndoshta nuk ka përgjigje. Por ka një mundësi që mund t’ia japim vetes: të mos presim.

Sepse koha nuk ngadalësohet ngaqë kemi ende ëndrra. Nuk ndalet sepse kemi një projekt të papërfunduar. Dhe mbi të gjitha, nuk pyet nëse jemi gati. Ajo thjesht kalon.

Ditëlindja është vetëm mënyra që kemi shpikur për t’i vënë një shenjë këtij kalimi. Prandaj ndoshta duhet ta shohim ndryshe. Jo si një vit më shumë që na është marrë, por si një vit që na është dhënë.

Kur je fëmijë dëshiron që koha të ecë më shpejt. Kur rritesh do që të ecë më ngadalë. Kur plakesh kupton se nuk e ke pasur kurrë në dorë ta komandosh.

E vetmja gjë që mund të bësh është të vendosësh çfarë do të bësh me orët që të kanë mbetur. Sepse problemi nuk është se jeta është shumë e shkurtër. Problemi është se për një kohë të gjatë sillemi sikur do të jetë gjithmonë aty.

Zëvendëskancelari dhe Ministri i Financave gjermane, Lars Klingbeil i bëri thirrje Presidentit të SHBA-së Donald Trump të përfundojë luftën “e papërgjegjshme” me Iranin, përpara udhëtimit të tij në SHBA javën e ardhshme për të marrë pjesë në samitin e G20.

“Ky është mesazhi më i rëndësishëm, edhe për SHBA-në: përfundoni këtë luftë”, tha Klingbeil. Ai madje fajësoi Trump për çmimet e larta të karburantit.

“Donald Trump është përgjegjës për luftën e papërgjegjshme që filloi në Iran. Këto janë pasojat që shohim në stacionet e benzinës”, tha ai.

Të hënën dhe të martën, ministrat e financave nga vendet anëtare të G20 do të takohen në Asheville, Karolina e Veriut, përpara samitit në Miami në dhjetor.

Lars Klingbeil përsëriti gjithashtu propozimin e tij për një taksë mbi fitimet e tepërta të kompanive të naftës në nivel evropian, duke nënvizuar se kompanitë po grumbullojnë për shkak të situatës gjeopolitike. “Ato po mbushin xhepat e tyre! Kjo duhet të ndalet”, tha ai.

Çështja është në axhendën e takimit të ministrave të financave të BE-së, i cili do të mbahet më 19 shtator në Dublin./MXH

Trabzonspor po kalon një moment të vështirë pas humbjes ndaj Ferencvaros dhe eliminimit nga Europa League. Rezultati i ndeshjes ka sjellë pasoja në kampin e klubit turk, duke vënë në qendër të vëmendjes të ardhmen e trajnerit Fatih Tekke.

Në përfundim të takimit, trajneri deklaroi dorëheqjen nga drejtimi i Trabzonspor. Vendimi i teknikut erdhi menjëherë pas ndeshjes dhe lidhej me situatën e krijuar pas eliminimit nga kompeticioni europian.

Megjithatë, për momentin, Fatih Tekke nuk do të largohet nga pankina. Drejtuesit e Trabzonspor kanë vendosur të mos e pranojnë dorëheqjen e trajnerit dhe kanë konfirmuar publikisht vazhdimin e bashkëpunimit me të.

Në komunikimin e klubit bëhet e qartë se kërkesa e Teke për t’u larguar është shqyrtuar nga drejtuesit, por vendimi përfundimtar ka qenë që ai të vazhdojë punën në krye të ekipit. Kështu, ndryshimi në pankinë nuk do të ndodhë menjëherë, pavarësisht situatës së krijuar pas humbjes ndaj Ferencvarosh.

Fatih Tekke do të vazhdojë të jetë trajneri i Trabzonspor dhe do të drejtojë ekipin në ndeshjen e ardhshme të kampionatit kundër Amedspor.

Për Trabzonspor, kjo do të jetë ndeshja e parë pas eliminimit nga Europa League dhe pas zhvillimeve që kanë përfshirë trajnerin. Në pankinë do të jetë sërish Fatih Tekke, ndërsa në skuadër pritet të jetë edhe Salah, i cili iu bashkua klubit turk vetëm pak javë më parë për të qenë pjesë e projektit të ri.

Situata e krijuar ka bërë që vëmendja të përqendrohet tashmë te e ardhmja e skuadrës në kampionat. Trabzonspor ka zgjedhur të vazhdojë me të njëjtin trajner, duke mos pranuar dorëheqjen dhe duke i besuar atij drejtimin e ekipit në ndeshjen ndaj Amedspor.

Vendimi i drejtuesve nënkupton se për momentin nuk do të ketë ndryshime në stafin teknik. Megjithatë, rezultatet e ndeshjeve të ardhshme mund të kenë ndikim në zhvillimet e mëtejshme.

Përballja me Amedspor do të shënojë rikthimin e Trabzonspor në fushë pas eliminimit europian, me Fatih Tekke që do të vazhdojë të drejtojë skuadrën dhe Salah që mbetet pjesë e projektit të ri të klubit turk./MXH

Ushtria izraelite (IDF) njoftoi sot se ka vrarë një anëtar të lartë të Hamasit dhe dy militantë të tjerë, në një sulm ajror në qytetin e Jeninit, në Bregun Perëndimor.

Sipas ushtrisë izraelite dhe shërbimit të brendshëm të sigurisë “Shin Bet”, anëtari i Hamasit ishte i përfshirë në financimin dhe organizimin e sulmeve kundër civilëve izraelitë.

Ai dyshohet se ishte gjithashtu përgjegjës për aktivitetet e organizatës islamiste Hamas, në kampin e refugjatëve në Jenin.

Ushtria izraelite tha se në makinën ku ndodheshin personat e vrarë u gjetën armë.

Fillimisht, ushtria nuk dha detaje për identitetin e dy personave të tjerë që ndodheshin me anëtarin e Hamasit.

Vitin e kaluar, ushtria izraelite zhvilloi një operacion të gjerë ushtarak kundër militantëve palestinezë në Jenin dhe në dy kampe të tjera refugjatësh në Bregun Perëndimor.

Në operacion u vranë shumë persona, ndërsa dhjetëra mijëra palestinezë u detyruan të largoheshin nga shtëpitë e tyre.

Operacioni shkaktoi gjithashtu dëme të mëdha materiale.

Sipas ushtrisë izraelite, gjatë këtij operacioni u shkatërrua ajo që ajo e quajti “rrjeti terrorist i Jeninit”.

Situata në Bregun Perëndimor të pushtuar është përkeqësuar më tej që prej sulmit të Hamasit në Izrael më 7 tetor 2023 dhe luftës që pasoi në Gaza.

Sipas Ministrisë palestineze të Shëndetësisë, që prej atëherë më shumë se 1,100 palestinezë janë vrarë në Bregun Perëndimor, gjatë operacioneve ushtarake izraelite, përleshjeve të armatosura dhe sulmeve palestineze.

Ndërkohë, dhuna e ushtruar nga kolonët radikalë izraelitë ndaj palestinezëve është rritur ndjeshëm. /MXH

Administrata Amerikane e Ushqimit dhe Barnave (FDA) ka miratuar një ilaç të ri për kancerin metastatik të pankreasit, duke hapur një kapitull të ri në trajtimin e një prej formave më agresive të sëmundjes.

Ilaçi, i zhvilluar nga kompania Revolution Medicines dhe i tregtuar me emrin Rasonque (daraxonrasib), merret një herë në ditë në formë tablete. Miratimi u dha më 26 gusht dhe vlen për pacientët me adenokarcinomë metastatike të pankreasit që kanë marrë të paktën një trajtim sistemik më parë ose që nuk janë kandidatë për kimioterapi të kombinuar.

Rezultatet: mbijetesa u dyfishua

Miratimi i FDA-së bazohet në rezultatet e studimit klinik të fazës së tretë RASolute 302, ku morën pjesë 500 pacientë me kancer metastatik të pankreasit.

Sipas të dhënave të studimit, pacientët që morën Rasonque kishin një mbijetesë mesatare prej 13.2 muajsh, krahasuar me 6.7 muaj për ata që trajtoheshin me kimioterapi standarde. Ilaçi uli gjithashtu rrezikun e vdekjes me rreth 60%.

Rasonque synon proteinat e familjes RAS, të cilat luajnë një rol të rëndësishëm në rritjen dhe përhapjen e qelizave tumorale. Për dekada, RAS është konsideruar një objektiv veçanërisht i vështirë për trajtimin me barna.

Një alternativë e re për pacientëtPër pacientët me kancer metastatik të pankreasit, mundësitë e trajtimit kanë qenë historikisht të kufizuara. Për këtë arsye, rezultatet e Rasonque janë përshëndetur nga specialistët si një zhvillim i rëndësishëm në onkologji.

Ilaçi kishte qenë i disponueshëm edhe para miratimit përmes një programi të aksesit të zgjeruar, ku më shumë se 2 mijë pacientë kishin mundur ta merrnin trajtimin.

Sa kushton trajtimi?

Revolution Medicines ka njoftuar se çmimi i Rasonque në SHBA është 39,800 dollarë për një furnizim 30-ditor. Kompania thotë se pacientët me sigurime private që plotësojnë kriteret mund të përfitojnë nga programe asistence për bashkëpagesat.

Miratimi i ilaçit u bë përmes një procedure të përshpejtuar të FDA-së, duke e bërë atë të disponueshëm disa muaj më herët se afati i zakonshëm i shqyrtimit.

Ekspertët e shohin Rasonque si një nga zhvillimet më premtuese të viteve të fundit për pacientët me kancer të avancuar të pankreasit, megjithëse ilaçi nuk konsiderohet kurë, por një trajtim që mund të zgjasë ndjeshëm jetën dhe të ofrojë një alternativë të re terapeutike./mxh

Moska mohon t’i ketë dhënë ultimatum Uashingtonit për mbështetjen amerikane ndaj sulmeve ukrainase në territorin rus.

Ministri i Jashtëm rus, Sergei Lavrov, gjatë një interviste, deklaroi se Kremlini vetëm ka kërkuar sqarime nga Departamenti amerikan i Shtetit, pas raportimeve në mediat perëndimore për financime, armë dhe inteligjencë për Ukrainën.

“Jo, nga ana jonë nuk ka pasur ultimatume. Ne thjesht bëmë një pyetje. Sa herë që shfaqet një informacion i tillë në mediat perëndimore, ne e përcjellim përmes kanaleve diplomatike te Departamenti amerikan i Shtetit dhe kërkojmë të konfirmohet nëse është i vërtetë”, tha Lavrov.

Lavrov thotë se kjo është bërë tre ose katër herë gjatë muajve të fundit. Por, sipas tij, Uashingtoni nuk ka dhënë asnjë përgjigje për këto kërkesa.

Ministri i Jashtëm rus, foli edhe për rolin e Britanisë së Madhe në konfliktin në Ukrainë, duke e cilësuar atë si jashtëzakonisht negative.

“Roli i Britanisë është jashtëzakonisht negativ. Kështu është edhe kur bëhet fjalë për Rusinë. Ky është rasti edhe kur bëhet fjalë për shumicën e të tjerëve, nuk do të thoja partnerë, por përkundrazi “bashkëudhëtarë” të Britanisë, sepse ajo nuk ka pasur kurrë aleatë të përhershëm”, shtoi ai.

Deklaratat vijnë pas vendimit britanik për ti dhënë Ukrainës akses në teknologji të klasifikuar për prodhimin e raketave me rreze të gjatë Storm Shadow./mxh

Kur bëhesh prind, këshillat vijnë nga çdo drejtim. Dikush të tregon si duhet të flejë bebi, dikush tjetër çfarë nuk duhet të bësh “kurrë”, ndërsa një tjetër ka formulën perfekte për çdo problem që mund të të dalë përpara. Gjithë kjo zhurmë mund të të bëjë edhe më konfuz se më parë.

Prandaj një pyetje e thjeshtë e postuar në Threads u kthye në një nga ato diskutime që ia vlen t’i lexosh deri në fund: “Baballarë, cila është këshilla më e mirë dhe më e pazakontë që do t’i jepnit një babai të ri?” shkroi dikush.

Postimi mori pothuajse 2,000 përgjigje dhe, mes humorit, historive personale dhe këshillave praktike, doli një listë e sinqertë.

Një nga mesazhet që u përsërit më shumë ishte: nuk ke pse të jesh gjithmonë i fortë. Një baba e formuloi kështu: “Burrave u thuhet që të jenë të fortë, por kjo nuk do të thotë të jenë stoikë.” Prindërimi mund të jetë rraskapitës, emocional dhe ndonjëherë dërrmues, ndaj të pranosh se ke nevojë për ndihmë, një pushim apo thjesht të flasësh me dikë nuk të bën më pak baba.

Një tjetër këshillë shumë e sinqertë ishte të ulësh pak pritshmëritë, sidomos gjatë vitit të parë. Foshnjat janë më rezistente nga sa duken dhe nuk ka nevojë që çdo gjë të bëhet në mënyrë perfekte. Sigurisht, siguria mbetet prioritet, por prindërimi nuk është një test ku çdo gabim i vogël do të thotë se ke dështuar.

Disa nga komentet më të bukura kishin të bënin me partneren. Një baba shkroi thjesht: “Bëji foto mamit me bebin. Shumë.” Sepse shpesh nënat përfundojnë me mijëra foto të fëmijës dhe partnerit, por shumë pak ku janë vetë në kornizë. Edhe nëse në atë moment ajo mendon se duket e lodhur apo nuk është “gati për foto”, vite më vonë ato imazhe do të kenë një vlerë krejt tjetër.

Po kaq e drejtpërdrejtë ishte edhe një tjetër këshillë: mos pyet vazhdimisht “çfarë mund të bëj?”. Shiko çfarë duhet bërë dhe bëje. Nëse ka enë për të larë, laji. Nëse rrobat duhen futur në lavatriçe, futi. Nëse bebi duhet ndërruar, ndërroje. Sepse edhe të mendosh, të organizosh dhe të delegosh është punë më vete.

Një baba me gjashtë fëmijë e përmblodhi këtë ide edhe më shkurt: “Ndërro sa më shumë pelena që mundesh.” Një tjetër shtoi se, sidomos në periudhën pas lindjes, nëse ti je i lodhur, ka shumë gjasa që partnerja jote të jetë edhe më e lodhur. Prandaj kujdesi nuk duhet të fokusohet vetëm te bebi, por edhe te nëna: gatuaj, pastro, sigurohu që të ketë ujë, ushqim dhe pak kohë për veten. Dhe, siç tha dikush me humor, mos ia ndërprit dushin nëse nuk është *absolutisht* e nevojshme.

Një tjetër temë që doli shpesh ishte marrëdhënia mes çiftit. Netët pa gjumë, lodhja dhe gjithë ndryshimi që sjell një bebe mund ta bëjnë shumë të lehtë që partnerët të kthehen kundër njëri-tjetrit. Këshilla ishte të kujtoni se jeni në të njëjtën skuadër. Flisni qartë, thoni kur jeni të rraskapitur, kur keni nevojë për ndihmë dhe kur diçka nuk po funksionon, në vend që të prisni që tjetri ta kuptojë vetë.

Edhe lidhja me bebin nuk është gjithmonë si në filma. Një nga baballarët theksoi se është në rregull nëse nuk ndien menjëherë atë dashurinë e madhe dhe të menjëhershme për të cilën flasin të gjithë. Për disa prindër, ajo lidhje ndërtohet gradualisht, mes ushqyerjeve, netëve pa gjumë, ndërrimit të pelenave dhe të atyre momenteve të vogla të përditshme.

Sigurisht, pati edhe këshilla praktike, nga ato që kupton vlerën vetëm pasi të bëhesh prind. Për shembull: mbaj gjithmonë rroba rezervë. Aksidentet me pelenat mund të ndodhin kudo dhe, herë pas here, rrobat rezervë mund t’i duhen jo vetëm bebit, por edhe ty.

Një tjetër ide që mori vëmendje ishte mënyra e përgatitjes së krevatit: vendos një mbrojtëse dysheku, një çarçaf, pastaj një tjetër mbrojtëse dhe një tjetër çarçaf. Nëse ndodh një aksident gjatë natës, heq shtresën e parë dhe ke menjëherë një krevat gati. Në orën 3 të mëngjesit, ky mund të duket si shpikja më e mirë në botë.

Dikush sugjeroi edhe një dritë të vogël që kapet te karroca për shëtitjet e natës, ndërsa një tjetër paralajmëroi se sapo të mendosh se bebi “nuk di ende të rrokulliset”, ka shumë mundësi që pikërisht atë ditë të vendosë të të surprizojë. Me pak fjalë, mos e lër në krevat, divan apo sipërfaqe të ngritura vetëm sepse deri dje nuk lëvizte.

Një këshillë tjetër ishte të hapësh një adresë emaili për fëmijën dhe, gjatë viteve, t’i dërgosh foto, kujtime dhe histori të vogla, për t’ia dhënë kur të rritet. Është një ide shumë e bukur, me kusht që aksesi dhe privatësia të ruhen mirë.

Disa nga komentet më të mira kishin më pak lidhje me “truke” dhe më shumë me mënyrën si e sheh fëmijën. Një baba shkroi: “Vajza jote nuk po të vështirëson ty ditën; ajo vetë po kalon një moment të vështirë.” Një bebe apo një fëmijë i vogël që qan, bërtet apo shpërthen nuk po përpiqet domosdoshmërisht të të manipulojë; thjesht nuk di ende si të përballojë atë që po ndien.

Kishte edhe një këshillë tjetër po aq të rëndësishme: edhe baballarët mund të kenë vështirësi emocionale pas ardhjes së një fëmije. Ankthi, stresi, ndjesia e shkëputjes apo depresioni pas lindjes nuk janë përvoja që prekin vetëm nënat. Nëse diçka nuk ndihet siç duhet, të kërkosh ndihmë është pjesë e kujdesit për familjen, jo shenjë dobësie.

Mes gjithë këshillave serioze, sigurisht nuk mungoi as humori. Një baba paralajmëroi të mos ia tregosh shumë herët fëmijës videon e dasmës, sepse mund të fillojë të qajë ngaqë nuk ishte i ftuar. Një tjetër rekomandoi syze dielli për bebe jo sepse janë domosdoshmëri, por thjesht sepse “duken shumë cool”.

Kjo ishte e veçanta e gjithë diskutimit: askush nuk po përpiqej të shiste formulën e prindit perfekt. Baballarët po flisnin për gjërat që i kishin mësuar duke gabuar, duke qenë pa gjumë, duke qeshur me situata absurde dhe duke u përpjekur të ishin pak më të mirë ditën tjetër.

Një nga komentet e fundit e përmblidhte bukur gjithë këtë. Gjatë 90 ditëve të para, kujdesu fort për nënën dhe bebin. Kërko ndihmë kur ke mundësi, sigurohu që partnerja të ushqehet dhe të pushojë sa të mundet dhe thuaji shpesh se po bën një punë të mirë.

Nuk ke nevojë të jesh prindi perfekt. Mjafton të jesh aty./mxh

Disa njerëz i përjetojnë gjërat më fort se të tjerët. Një koment i vogël u rri në mendje gjatë, një bisedë analizohet disa herë pasi ka mbaruar dhe emocionet mund të jenë më të forta se sa duken nga jashtë.

Shpesh, këta njerëz rriten duke dëgjuar fraza si “je shumë e ndjeshme”, “po e ekzagjeron” ose “i merr gjërat shumë personale”. Por psikiatrja Sasha Hamdani thotë se kjo ndjeshmëri nuk duhet parë automatikisht si dobësi.

Sipas saj, njerëzit që ndiejnë dhe përpunojnë emocionet më thellë mund të kenë një sistem nervor më reaktiv dhe të jenë shumë perceptues ndaj asaj që ndodh rreth tyre. Kjo mund t’i lodhë, sidomoë kur nuk dinë mënyra për t’i menaxhuar emocionet. Pikërisht për këtë arsye, Hamdani rekomandon një zakon shumë të thjeshtë: mbajtjen e një ditari.

Pse pikërisht ditar?

Sipas psikiatres, ditari i jep emocionit një vend ku të “shkojë” përpara se ai të kthehet në një mesazh të nxituar, një debat, një spirale mendimesh apo një tërheqje të plotë nga situata. Me fjalë të tjera, krijon pak distancë mes asaj që ndien dhe mënyrës si reagon.

Kjo pauzë mund të jetë e dobishme për njerëzit që e analizojnë tepër një bisedë, mendojnë gjatë nëse dikush është mërzitur me ta ose reagojnë fort ndaj refuzimit dhe kritikës.

Shkrimi ndihmon edhe për të dalluar sjellje që në moment mund të mos i shohësh. Çfarë të prek më shumë? Çfarë të aktivizon emocionalisht? Për çfarë ke nevojë realisht në atë situatë? Dhe, ndoshta më e rëndësishmja, çfarë historie po të tregon mendja jote për situatën që sapo ndodhi?

Kur këto gjëra i sheh të shkruara, bëhet më e lehtë t’i ndash faktet nga interpretimet.

Qëllimi nuk është të bëhesh “më pak e ndjeshme”

Hamdani thekson se ideja nuk është të shtypësh emocionet apo të përpiqesh të bëhesh një person që “nuk e vret mendjen”. Përkundrazi, qëllimi është të mësosh si ta rregullosh përjetimin e emocionit pa mohuar ndjeshmërinë.

Në praktikë, kjo do të thotë të ndalosh për një moment, të emërtosh atë që po ndodh, të kontrollosh faktet dhe më pas të zgjedhësh reagimin tënd, në vend që emocioni ta zgjedhë për ty.

Pra, nëse ke kaluar vite duke dëgjuar se je “shumë e ndjeshme”, zgjidhja nuk është të ndiesh më pak, por të gjesh një mënyrë më të mirë për t’i përpunuar të gjitha ato që ndien./mxh

Dolly Parton ishte unike në çdo aspekt dhe, mesa duket, kishte menduar edhe për një surprizë që do të zbulohej shumë vite më vonë. Legjenda e muzikës country regjistroi në vitin 2015 një këngë të titulluar “My Place in History”, por vendosi që ajo të mos publikohej menjëherë.

Kënga u mbyll në një kapsulë kohore, të njohur si “Dream Box”, një kuti druri që ndodhet në resortin DreamMore, pranë parkut të saj të famshëm Dollywood. Kutia është planifikuar të hapet më 19 janar 2046, pikërisht në ditën kur Dolly Parton do të kishte festuar 100-vjetorin e lindjes.

Në një shënim të vendosur pranë kutisë thuhet se ajo përmban dëshirat dhe kujtimet e Dolly-t për të ardhmen. Brenda saj ndodhet edhe kënga, e cila ishte menduar të ishte publikimi i fundit muzikor i artistes. Deri në hapjen e kutisë në vitin 2046, vetëm Dolly e dinte melodinë dhe përmbajtjen e saj.

Vetë këngëtarja kishte folur për këtë projekt në një intervistë në “The Kelly Clarkson Show” në vitin 2022. Me humorin që e karakterizonte, ajo kishte thënë se do të donte ta dëgjonte sërish këngën, sepse sipas saj ishte “një këngë vërtet e mirë”.

Por Dolly kishte edhe një shqetësim: nëse regjistrimi do të mund të dëgjohej ende kur kutia të hapej.

“Nuk e di se e kujt ishte kjo ide e mallkuar”, u shpreh ajo asokohe, duke iu referuar mundësisë që regjistrimi të ishte dëmtuar deri atëherë.

Tani, pas ndarjes së saj nga jeta në moshën 80-vjeçare, kjo këngë e fshehur merr një kuptim edhe më të veçantë. Publiku do të duhet të presë deri në vitin 2046 për të zbuluar një pjesë të fundit të muzikës që Dolly Parton vendosi ta ruante për të ardhmen./mxh

Në Shqipëri po ndërtohet më shumë se në vitin e kaluar. Instituti i Statistikave raporton për 782 leje të reja të miratuara nga pushteti vendor në gjashtëmujorin e parë të vitit gati 28% më shumë se vjet, kur 61 bashkitë e vendit kishin miratuar në total 610 leje ndërtimi.

Rritja e numrit të lejeve është shoqëruar edhe me zgjerim të sipërfaqes së re të ndërtimit. Lejet e miratuara zënë rreth 684 mijë metra katrorë, nga 613 mijë metra katrorë një vit më parë. Por pavarësisht rritjes së numrit të lejeve dhe sipërfaqes, vlera e përafërt e ndërtimeve të reja ka shënuar rënie. Në janar–qershor 2026, u përllogaritën 30.2 miliardë lekë, nga 32.2 miliardë lekë në të njëjtën periudhë të vitit të kaluar, një ulje prej 2 miliardë lekësh, ose rreth 6.2%.

Pra, gjashtëmujori i parë i 2026 tregon më shumë leje dhe më shumë sipërfaqe ndërtimi, por një vlerë më të ulët të investimeve të parashikuara. Ky raport i INSTAT nuk ka të përfshira lejet e ndërtimit që japin institucionet e tjera si KKT, për kullat e mëdha apo për resortet, që kanë sipërfaqe më të madhe ndërtimore por dhe vlerë më të lartë investimi.

Ndërtimet e reja janë burimi kryesor i të ardhurave për pushtetin vendor. Sipas të dhënave të Ministrisë së Financave gjysma e parë e viti u mbyll me 18.3 miliardë lekë të ardhura nga ‘taksa e ndikimit në infrastrukturë nga ndërtimet e reja’, me rritje prej 12.2 miliardë lekë krahasuar me vitin 2025.

Bashkia e Tiranës është në krye me vlerën më të madhe të të ardhurave nga kjo taksë me 12.4 miliardë lekë në 6 muaj, ndjekur nga Bashkia Himarë me 1.2 miliardë lekë, më pas është Durrësi me 841 milionë dhe më tej Kavaja me 620 milionë lekë të ardhura nga taksa e ndikimit në infrastrukturë./mxh

LEJET E MIRATUARA NGA BASHKITË

Pas zhbllokimit zyrtar të merkatos nga FIFA, Skënderbeu ka realizuar dy përforcime të rëndësishme brenda Së njëjtës ditë.

Afrimi i parë është mbrojtësi i djathtë Reild Kurti, i cili vjen pas përvojës së tij me Korabin në Kategorinë e Parë. 23-vjeçari ka një të kaluar me përfaqësueset e moshave, ku ka mbajtur edhe fanellën e Shqipërisë U-21.

Goditja tjetër e juglindorëve është sulmuesi 20-vjeçar Dechan Rayan Moussavou. Lojtari i ri është pjesë e kombëtares së Kongos dhe kjo do të jetë eksperienca e tij e parë në futbollin shqiptar.

Të dy futbollistët janë federuar me sukses dhe do të jenë menjëherë në dispozicion të stafit teknik. Kurti dhe Moussavou pritet të jenë gati për të zbritur në fushë që në duelin e së hënës kundër Dinamos./mxh

Britney Spears ka ndarë një tjetër rrëfim të sinqertë për periudhën e vështirë të jetës së saj, duke treguar se sa e rëndë ishte për të të përballej me njerëzit dhe të performonte gjatë viteve kur ishte nën kujdestari ligjore.

Në një video të publikuar në Instagram më 27 gusht, këngëtarja 44-vjeçare foli për ndryshimet që ka pësuar ndër vite dhe për mënyrën se si dikur e kishte jashtëzakonisht të vështirë të qëndronte përballë turmave.

Spears kujtoi ditët e para të karrierës, kur takimet me fansat i shkaktonin ankth të fortë. Ajo tha se, nëse duhej të takonte më shumë se 10 persona, fillonte të dridhej dhe i shfaqeshin vështirësi në frymëmarrje.

Sipas saj, babai i saj, Jamie Spears, i cili kishte një rol kryesor në kujdestarinë ligjore që zgjati rreth 13 vite, e detyronte të merrte pjesë në takime me rreth 70 persona. Për këngëtaren, këto situata ishin aq të vështira sa ajo pretendon se filloi të ndihej e shkëputur emocionalisht nga vetja.

“Kur punoja me Felicia në fillimet e karrierës sime, më zinte astma dhe filloja të dridhesha nëse duhej të takoja më shumë se 10 persona. Ajo mund ta shihte në sytë e mi sa e frikësuar isha”, tregoi Spears.

Ajo shtoi se presioni për të përballuar turma shumë më të mëdha e bëri të ndihej “si një robot” dhe se kjo ndikoi në mënyrën se si lidhej me njerëzit.

“Më humbi ndjeshmëria e shpirtit tim dhe kjo më dhembte vërtet. Ndihesha si një robot, si një makinë”, u shpreh ajo.

Spears pranoi gjithashtu se, pavarësisht imazhit të saj si një artiste e sigurt në skenë, në jetën reale ka qenë gjithmonë një person shumë i ndjeshëm dhe i turpshëm.

“Më mungon lidhja e vërtetë që dikur kisha me njerëzit. Në fshehtësi kam qenë gjithmonë shumë e ndjeshme dhe jashtëzakonisht e turpshme”, shkroi këngëtarja.

Duke reflektuar mbi të kaluarën, Spears tha se ndihet krenare që arriti t’i japë fund një periudhe që, sipas saj, e kishte detyruar të jetonte dhe të sillej në mënyra që nuk i dëshironte.

“Falë Zotit që mbaroi”, përfundoi ajo./mxh

Aryna Sabalenka ka sjellë një tjetër element luksi në US Open, duke u shfaqur në fushë me një koleksion bizhuterish të dekoruara me gurë të çmuar dhe gjysmë të çmuar.

Tenistja bjelloruse, e cila edhe në Roland Garros kishte tërhequr vëmendjen me bizhuteri me vlerë rreth 140 mijë euro, këtë herë zgjodhi setin “Prisma”, një bashkëpunim me shtëpinë e bizhuterive Material Good.

Seti u pa gjatë ndeshjes së dysheve të përziera, ku Sabalenka garoi së bashku me Novak Djokovic. Vathët, gjerdani dhe byzylyku përmbajnë në total 127 karat gurë të ndryshëm, mes tyre safirë, turmalina dhe granatë, të kombinuar në forma dhe ngjyra të ndryshme.

Veçantia e koleksionit qëndron edhe te dizajni i gjerdanit. Pjesët ku vendosen gurët janë të hapura, duke i lejuar ata të lëvizin gjatë përdorimit. Sipas Material Good, ideja është ndërtuar mbi lëvizjet energjike dhe dinamike të Sabalenkës gjatë një ndeshjeje tenisi.

“Prisma” përbëhet pikërisht nga tri pjesët që zgjodhi numri 1 i botës për paraqitjen e saj: vathët, gjerdani dhe byzylyku. Vlera e tyre nuk është bërë publike, pasi artikujt shiten vetëm me kërkesë.

Pas ndeshjes, Sabalenka vazhdoi të promovonte bashkëpunimin duke vizituar dyqanin e Material Good në Manhattan, ku u prezantua zyrtarisht koleksioni. Edhe gjatë këtij eventi, ajo mbajti të njëjtat bizhuteri.

“Bizhuteritë janë një mënyrë për mua për të shprehur veten, si në fushë ashtu edhe jashtë saj”, tha Sabalenka, duke e lidhur stilin e saj personal me mënyrën se si shfaqet edhe si sportiste.

“Ky bashkëpunim më dukej si një hap i natyrshëm në evolucionin e stilit tim”, shtoi ajo.

Në aspektin sportiv, bashkëpunimi i Sabalenkës me Djokovic nuk pati një fund të gjatë në turne. Dyshja u eliminua në raundin e 16-shes së garës së dysheve të përziera./mxh

Last Updated on 28/08/2026 by Monika

Kryeministri Edi Rama ka zbuluar diskutimet e zhvilluar në mbledhjes e kësaj të premteje me ministrat dhe drejtuesit e qarqeve.

Rama tha se diskutimet u përqendruan te kalendarizimi i “Pranisë Besnike” në çdo territor, si dhe te mekanizmat e rinj të ndërveprimit mes qeverisë dhe deputetëve.

Sipas kryeministrit, ky bashkëpunim synon përmirësimin e mëtejshëm të shërbimeve publike, si në nivel qendror, ashtu edhe në atë vendor.

Në mbledhje është diskutuar gjithashtu për hartimin e ndryshimeve ligjore për “PasqyrAlbania”, ndërsa vëmendje i është kushtuar edhe progresit në hartimin e nismës së integruar “Shqipëria Sociale”.

Kryeministri Rama bëri të ditur se kësaj nisme do t’i kushtohet një Konferencë e posaçme Kombëtare, e cila pritet të zhvillohet në muajin nëntor.

“Vijuam sot punën intensive për detajimin e programit të sezonit të ri, duke nisur nga

kalendarizimi i Pranisë Besnike në çdo territor, mekanizmat e rinj të ndërveprimit qeveri – deputetë në funksion të përmirësimit të mëtejshëm të shërbimeve publike qendrore e vendore, si edhe hartimi i ndryshimeve ligjore për PasqyrAlbania.

Po ashtu u diskutua progresi i bërë me hartimin e nismës së integruar Shqipëria Sociale, të cilës do t’i kushtohet një Konferencë e posaçme Kombëtare në muajin nëntor”, tha Rama./MXH

Lady Gaga ka zbuluar një tjetër dimension të angazhimit të saj përtej muzikës dhe modës, duke qenë e përfshirë prej vitesh në një kompani bioteknologjike që zhvillon kërkime mbi lëkurën njerëzore.

Sipas raportimeve të “la Repubblica”, këngëtarja, emri i vërtetë i së cilës është Stefani Germanotta, ka qenë për rreth gjashtë vite pjesë e bordit drejtues të një startup-i të fokusuar në kërkimin shkencor. Roli i saj nuk ishte bërë publik dhe nuk lidhej me markën e saj të kozmetikës, Haus Labs.

Kompania ka zhvilluar një platformë të quajtur “Yuna”, e cila synon të mbajë lëkurën njerëzore me trashësi të plotë të gjallë jashtë trupit për rreth 30 ditë. Ky është një interval dukshëm më i gjatë krahasuar me shumë modele tradicionale ex vivo, ku mostrat e indeve mund të ruhen vetëm për disa ditë.

Zgjatja e kohës së mbijetesës së indit mund t’u japë studiuesve mundësi të reja për të ndjekur procese biologjike që nuk mund të analizohen plotësisht brenda një periudhe shumë të shkurtër. Mes tyre janë ndryshimet e kolagjenit, inflamacioni dhe proceset që lidhen me plakjen e qelizave.

Sipas informacionit të raportuar, kjo teknologji mund të jetë veçanërisht e vlefshme për studimin e sëmundjeve kronike të lëkurës, mekanizmave të plakjes, shërimit të plagëve dhe kancerit të lëkurës.

Avantazhi i një modeli të tillë është se studiuesit mund të punojnë me një ind që ruan strukturën komplekse të lëkurës njerëzore, në vend që të mbështeten vetëm te qeliza të izoluara apo modele artificiale. Kjo mund ta bëjë laboratorin një mjedis më të përshtatshëm për të vëzhguar se si reagon indi ndaj proceseve të ndryshme.

Për Gaga-n, e cila ka ndërtuar edhe një markë të lidhur me kujdesin ndaj lëkurës, ky angazhim përfaqëson një aspekt shumë më pak të njohur të interesit të saj për shkencën dhe biologjinë.

Fakti që ajo ka qenë pjesë e bordit të kompanisë duke përdorur emrin e saj të vërtetë, Stefani Germanotta, tregon se përfshirja e saj ka qenë më shumë sesa një marrëdhënie promocionale. Projekti është përqendruar në kërkim dhe zhvillim shkencor, me laboratorë dhe punë akademike.

Nëse kjo teknologji arrin të zgjerohet dhe të përdoret gjerësisht, ajo mund të ndihmojë në krijimin e modeleve më të sakta për studimin e sëmundjeve dhe proceseve të ndryshme të lëkurës, duke i afruar kërkimet laboratorike me atë që ndodh realisht në trupin e njeriut./mxh

Last Updated on 28/08/2026 by Monika

Sipas informacionit operacional të datës 28.08.2026, ora 20:00, në territorin e vendit janë raportuar 17 vatra zjarri, nga të cilat 8 mbeten aktive, 4 janë nën mbikëqyrje dhe 5 janë shuar plotësisht.

Vatrat aktive:

Mali i Dajtit, Tiranë – vijojnë tre vatra të riaktivizuara në zonën e Qafë Priskës dhe kreshpën e malit. Në terren janë angazhuar 25 forca zjarrfikëse dhe AZM.

Qafë e Helmës, Bulqizë – zjarr në shkurre dhe pisha; po punohet me prita dhe pompa shpine. Nuk ka rrezik për zonat e banuara.

Vajkal, Bulqizë – vijon zjarri në terren shkëmbor me shkurre e dëllinja. Janë angazhuar 95 forca, përfshirë 20 efektivë të FA, si dhe 1 helikopter i FA. Nuk ka rrezik për banesat.

Sllatinë, Dibër – situata u rëndua gjatë mesditës për shkak të temperaturave dhe erës, duke kaluar në pyll me pisha të larta. Në terren janë mbi 100 forca dhe është angazhuar 1 helikopter i FA. Nuk rrezikohen zonat e banuara.

Xhyrë, Librazhd – vatër aktive e favorizuar nga era; 2 banesa u evakuuan dhe mjetet zjarrfikëse janë pozicionuar pranë tyre. Në operacion është angazhuar edhe 1 helikopter i FA.

Tërbuq, Gjirokastër – zjarri ka përshkuar rreth 30 ha, por aktualisht është nën kontroll të plotë dhe nuk paraqet më rrezik për banorët.

Dragot, Tepelenë – Krahas MZSH-ve janë nisur në mbështetje 30 forca ushtarake dhe 3 automjete zjarrfikëse të FA.

Çorrush, Mallakastër – vijon puna për shuarjen e zjarrit në kullota dhe bimësi të ulët; janë angazhuar 2 automjete zjarrfikëse dhe 8 efektivë të MZSH.

Në fshatin Tërbaç, Vranisht, njësia administrative Horë-Vranisht, bashkia Himarë, vijon puna për shuarjen e zjarrit në një sipërfaqe pyjore me shkurre. Në terren janë angazhuar 2 automjete zjarrfikëse me 9 efektivë të MZSH Himarë, ndërsa operacionet nga ajri u mbështeten nga 2 helikopterë dhe 1 avion Air Tractor.

Në mbështetje të operacioneve në rang vendi janë angazhuar gjithsej 50 forca ushtarake, 4 helikopterë dhe 1 avion Air Tractor të FA./MXH

Last Updated on 28/08/2026 by Monika

Ka përfunduar takimi i kryeministrit Edi Rama me ministrat dhe drejtuesit politikë të qarqeve. Mbledhja zgjati rreth dy orë.

Gjatë mbledhjes, Rama ka kërkuar që e gjithë forca politike të jetë e përqëndruar te terreni, te njerëzit, që të zhvillojnë takime me qytetarët, të dëgjojnë problematikat e tyre.

Rama ka kërkuar zbatim të nismës “Pasqyrë Albania”, si një rregull që duhet përmbushur dhe zbatuar nga të gjithë./MXH

Ylli i muzikës duket se po mendon për një rikthim në Los Angeles dhe tashmë i ka vënë syrin një prej pronave më të famshme të Hollywood-it. Madonna është interesuar për vilën luksoze të Angelina Jolie, e cila është nxjerrë në shitje për 29.85 milionë dollarë në muajin maj.

Madonna mund të rikthehet së shpejti në Los Angeles dhe duket se ka nisur të mendojë edhe për një shtëpi të re.

Këngëtarja, e cila së fundmi festoi 68-vjetorin në Greqi, ka shprehur interes për vilën madhështore të Angelina Jolie-t në kodrat mbi Hollywood. Edhe pse aktualisht nuk ndodhet në Los Angeles, për Madonna-n është organizuar një vizitë virtuale e pronës përmes një videoje, raporton New York Post.

“Njerëzit e Madonna-s telefonuan dhe u organizua një vizitë”, tha një burim për gazetën, duke përshkruar zonën si një komunitet të mrekullueshëm në kodrat mbi Hollywood, ku jetojnë shumë personazhe të famshëm.

Interesi i Madonna-s nuk i ka surprizuar agjentët imobiliarë. Në fund të fundit, bëhet fjalë për një pronë me një histori të rrallë, e lidhur ngushtë me Hollywood-in e vjetër.

Vila dikur i përkiste regjisorit legjendar Cecil B. DeMille, i cili e bleu në vitin 1916. Katër vjet më vonë, ai zgjeroi pronën duke blerë edhe pasurinë ngjitur, ku kishte jetuar më parë Charlie Chaplin.

Dy shtëpitë u bashkuan përmes një korridori prej xhami, ndërsa sot janë sërish prona të ndara. Familja DeMille e mbajti pasurinë deri në fund të viteve 1980.

Angelina Jolie e bleu vilën në qershor të vitit 2017 për 24.5 milionë dollarë, rreth nëntë muaj pasi kishte paraqitur kërkesën për divorc nga Brad Pitt./mxh

Mijëra pacientë në Rripin e Gazës vazhdojnë të presin evakuimin mjekësor, ndërsa shumë prej tyre kanë nevojë urgjente për trajtim jashtë enklavës, tha të premten drejtori i Përgjithshëm i Organizatës Botërore të Shëndetësisë (OBSH), Tedros Adhanom Ghebreyesus.

Sipas Tedros, OBSH-ja javën e kaluar ndihmoi në evakuimin e 106 pacientëve, mes tyre 19 fëmijë, përmes pikave kufitare Rafah dhe Kerem Shalom. Pacientët u shoqëruan nga 132 persona.

Që nga tetori 2023, gjithsej 13.237 pacientë, përfshirë 6.276 fëmijë, janë evakuuar nga Gaza, së bashku me 16.406 shoqërues, bëri të ditur kreu i OBSH-së.

Tedros theksoi se evakuimet mjekësore mund t’u japin pacientëve që kanë nevojë për kujdes urgjent një mundësi për të mbijetuar, ndërsa kërkoi qasje të qëndrueshme dhe përdorimin e disa pikave kufitare për të garantuar trajtimin në kohë.

Lufta në Gaza ka shkaktuar zhvendosjen e qindra mijëra palestinezëve, shumë prej të cilëve janë detyruar të strehohen në kampe dhe struktura të përkohshme.

Sipas Ministrisë së Shëndetësisë në Gaza, që nga armëpushimi i ndërmjetësuar nga SHBA-ja, më shumë se 1.300 palestinezë janë vrarë dhe mbi 4.000 janë plagosur, ndërsa që nga tetori 2023 numri i viktimave ka kaluar 73.400 dhe i të plagosurve 174.400./mxh

Vëllezërit Tate mohojnë akuzat për përdhunim dhe trafikim seksual, ndërsa autoritetet amerikane i konsiderojnë rrezik arratisjeje. Vendimi për lirimin me kusht pritet më vonë.

Andrew dhe Tristan Tate i kanë kërkuar një gjykate në Florida që t’i lirojë nga paraburgimi, ndërsa përballen me procedurat për ekstradimin drejt Mbretërisë së Bashkuar, ku janë nën akuzë për përdhunim, trafikim seksual dhe vepra të tjera penale.

Dy vëllezërit u paraqitën në gjykatë të prangosur dhe të veshur me uniforma burgu. Gjatë seancës, ata mohuan kategorikisht se kanë kryer krimet për të cilat akuzohen dhe kritikuan kushtet e ndalimit në SHBA.

Andrew Tate, 39 vjeç, deklaroi para gjykatës se “nuk ka kryer kurrë krimet për të cilat akuzohet”.

Ndërkohë, vëllai i tij Tristan, 38 vjeç, u ankua për kushtet e paraburgimit, duke i përshkruar ato si të nxehta dhe të ngushta, me pak dritë dielli dhe mundësi të kufizuara për aktivitet fizik.

“Po fillon të më rëndojë, sepse nuk mund të marr pjesë në përgatitjen e mbrojtjes sime”, tha ai gjatë seancës, sipas CBS News.

Tristan Tate tha gjithashtu se kishte humbur rreth 6.3 kilogramë gjatë qëndrimit në paraburgim.

Avokatët e qeverisë amerikane kundërshtuan kërkesën për lirimin e tyre, duke argumentuar se vëllezërit përbëjnë rrezik arratisjeje.

Sipas tyre, Tates kanë akses në burime financiare që mund t’u mundësonin largimin nga vendi dhe kanë deklaruar publikisht se posedojnë disa pasaporta.

Mbrojtja, nga ana tjetër, pretendoi se fama e madhe e dy influencerëve do ta bënte thuajse të pamundur që ata të arratiseshin pa u identifikuar.

Gjykatësja magjistrate amerikane Lauren Louis pritet të marrë një vendim me shkrim në një datë të mëvonshme për kërkesën e tyre për lirim me kusht.

Mbretëria e Bashkuar ka ngritur gjithsej 59 akuza penale ndaj vëllezërve Tate, përfshirë akuza për përdhunim, trafikim seksual dhe vepra që lidhen me imazhe të pahijshme të një fëmije.

Autoritetet britanike kishin ngritur 21 akuza ndaj tyre vitin e kaluar, ndërsa muajin e kaluar u shtuan edhe 38 akuza të tjera.

Sipas prokurorëve britanikë, akuzat lidhen me shtatë persona që pretendojnë se janë viktima.

Autoritetet e Mbretërisë së Bashkuar kanë afat deri më 16 shtator për të paraqitur kërkesën e plotë për ekstradimin e vëllezërve.

Vëllezërit Tate janë përballur gjithashtu me akuza për trafikim seksual në Rumani që prej vitit 2022. Tristan Tate tha gjatë seancës se çështja rumune “i ka shkatërruar të gjithë jetën”.

“Nëse shkoj në Angli, do të më fusin në burg dhe do të më marrin gjithçka për të cilën kam punuar ndonjëherë”, deklaroi ai.

Andrew Tate, ish-kickboksier profesionist, mohoi gjithashtu se ishte trafikant qeniesh njerëzore.

Ai pranoi se kishte bërë “disa deklarata idiote” në internet, por pretendoi se kjo ishte pjesë e mënyrës së tij për të tërhequr vëmendjen.

“Ky është realiteti i internetit”, tha Tate, duke shtuar se po trajtohej “si El Chapo”, duke iu referuar ish-bosit meksikan të drogës.

Gjatë seancës, mbrojtja thirri edhe Natasha Sesay, nga Anglia, e cila dëshmoi në mbështetje të lirimit të Andrew Tate.

Sesay tha se kishte pasur një marrëdhënie romantike pesëvjeçare me të, se kishin një fëmijë së bashku dhe se ishte në pritje të fëmijës së dytë.

Ajo deklaroi gjithashtu se, pavarësisht imazhit të tij publik në rrjetet sociale, Andrew Tate “nuk ka qenë kurrë i dhunshëm ndaj grave”.

Vëllezërit Tate kanë ndërtuar një audiencë prej miliona ndjekësish në rrjetet sociale, veçanërisht mes burrave të rinj, duke promovuar një stil jetese të lidhur me pasurinë, luksin dhe të ashtuquajturën “manosferë”.

Ndërkohë, Shtëpia e Bardhë ka deklaruar se Presidenti Donald Trump nuk do të ndërhyjë në çështjen e ekstradimit të vëllezërve Tate, pavarësisht se ata kanë qenë mbështetës të tij./mxh