Të paktën tre persona janë vrarë dhe disa të tjerë janë plagosur nga sulmet ruse me dronë në Ukrainë, ndërsa goditjet ndaj infrastrukturës energjetike kanë shkaktuar ndërprerje të energjisë elektrike për më shumë se një milion njerëz, njoftuan autoritetet ukrainase të premten.

Në qytetin e Kharkivit, në lindje të vendit, sulmet në tre distrikte shkaktuan viktima dhe plagosën 12 persona, sipas guvernatorit rajonal Oleh Syniehubov.

Ndërkohë, në rajonin veriperëndimor të Volynit, pranë kufirit me Poloninë, një sulm me dron ndaj një fabrike për përpunimin e ushqimeve vrau një person dhe plagosi tetë të tjerë. Rreth 370 mijë banorë mbetën përkohësisht pa energji elektrike, ndërsa autoritetet paralajmëruan se ndërprerjet në qytetin e Lutskut mund të zgjasin të paktën 24 orë.

Sulmet goditën gjithashtu një terminal doganor në qytetin e Kovelit, ku morën flakë rreth 10 kamionë, si dhe të paktën dy qendra tregtare në qytetet Sumy dhe Rivne.

Në Rivne, shtatë persona u plagosën nga sulmet ndaj një qendre të madhe tregtare dhe objekteve të tjera. Autoritetet raportuan gjithashtu ndërprerje të energjisë elektrike në pjesë të mëdha të qytetit dhe zonave përreth.

Ministria ukrainase e Energjisë bëri të ditur se ekipet e riparimit kishin rikthyer furnizimin me energji për më shumë se një milion persona që kishin mbetur pa energji pas sulmeve ndaj rrjetit elektrik./mxh

Ministri i Jashtëm gjerman, Johann Wadephul ka minimizuar rëndësinë e kritikave të presidentit amerikan, Donald Trump, ndaj homologut të tij ukrainas, Volodymyr Zelensky.

Ai tha se deklaratat e Trump lidhen me fushatën zgjedhore në SHBA dhe theksoi se më e rëndësishmja është që Shtetet e Bashkuara të Amerikës të vazhdojnë të mbështesin Ukrainën.

Trump ka shtuar kritikat ndaj presidentit ukrainas ditët e fundit, duke e paraqitur Zelensky si një pengesë për arritjen e një marrëveshjeje paqeje me Rusinë dhe duke kërkuar zëvendësimin e tij.

Këto deklarata duhet të shihen, patjetër në kontekstin e fazës përfundimtare të fushatës zgjedhore në Shtetet e Bashkuara të Amerikës”, tha sot Wadephul, gjatë një takimi në Berlin me homologun e tij portugez, Paulo Rangel.

“Për këtë arsye, duhet të përqendrohemi te ajo që ka më shumë rëndësi, veprimet konkrete të SHBA-së”, tha ai.

“Duhet të shohim thelbin e asaj që Shtetet e Bashkuara të Amerikës vazhdojnë të bëjnë. Dhe kjo është mbështetja që i japin Ukrainës, së bashku me ne”, u shpreh Wadephul.

Nga ana e tij, Rangel tha se vendet evropiane po përpiqen ta bindin SHBA-në, të vazhdojë mbështetjen për Ukrainën, ndërsa afrojnë muajt e dimrit.

Më 3 nëntor, në SHBA do të mbahen zgjedhjet e mesmandatit, ku do të votohet për vendet në Dhomën e Përfaqësuesve dhe për rreth një të tretën e vendeve në Senat.

Këto zgjedhje do të përcaktojnë nëse republikanët e Trump do të ruajnë shumicën në të dyja dhomat e Kongresit amerikan.

Rezultati mund të ndikojë ndjeshëm në aftësinë e presidentit për të zbatuar politikat e tij gjatë dy viteve të ardhshme./mxh

Një komision i ngritur nga qeveria norvegjeze ka propozuar ndryshimin e rregullave etike të fondit sovran të pasurisë së Norvegjisë, më i madhi në botë, për t’i lejuar të investojë sërish në kompani të mëdha të industrisë së mbrojtjes që prodhojnë armë bërthamore ose pjesët e tyre, sipas “Reuters”.

Fondi, me vlerë rreth 2,3 trilionë dollarë, mund të investojë sërish në kompani si “Airbus”, “Boeing”, “BAE Systems”, “Lockheed Martin” dhe “Safran”, nëse propozimi miratohet.

Sipas rregullave aktuale, fondi nuk mund të investojë në kompani të përfshira në prodhimin e armëve bërthamore.

Komisioni propozon që ky ndalim të hiqet për prodhuesit me qendër në shtetet aleate të Norvegjisë në NATO, që zotërojnë armë të tilla.

Rishikimi i rregullave vjen pas polemikave për investimet e fondit në kompaninë amerikane “Caterpillar”, prodhuese e makinerive të rënda, të cilat, sipas akuzave të ngritura në këtë çështje, janë përdorur nga Izraeli në operacionet në Gaza dhe në Bregun Perëndimor.

Vendimi për të shitur aksionet e kompanisë nxiti kundërshtime nga administrata amerikane.

Komisioni propozon gjithashtu ndryshimin e mënyrës se si kontrollohen investimet për respektimin e standardeve etike.

Ndër të tjera, ai rekomandon që Këshilli i Etikës të mos ketë më të drejtën të propozojë drejtpërdrejt përjashtimin e kompanive nga fondi.

Rekomandimet do të jenë në konsultim publik deri më 15 janar 2027.

Qeveria norvegjeze pritet t’i paraqesë parlamentit qëndrimin e saj në pranverën e vitit të ardhshëm.

Fondi sovran u krijua për të investuar të ardhurat e Norvegjisë nga nafta dhe gazi, në mënyrë që pasuria e vendit të ruhet edhe për brezat e ardhshëm./mxh

Mijëra studentë, pedagogë dhe punonjës të universiteteve protestuan në Buenos Aires dhe qytete të tjera të Argjentinës, duke kërkuar nga qeveria e presidentit Javier Milei zbatimin e ligjit për financimin e universiteteve publike.

Protesta u shoqërua me përplasje mes demonstruesve dhe policisë, e cila përdori gaz lotsjellës dhe autobotë uji për të shpërndarë turmën.

Sipas autoriteteve, 25 persona u arrestuan dhe tetë efektivë policie u plagosën.

Protestuesit kërkojnë rritjen e fondeve për universitetet, përmirësimin e pagave të pedagogëve dhe rikthimin e bursave studentore.

Ligji, i miratuar nga Kongresi në vitin 2025, parashikon financim shtesë për arsimin e lartë, por qeveria nuk e ka zbatuar plotësisht, duke argumentuar se masat do të rëndonin financat publike.

Sipas një studimi të Qendrës për Kërkime Ekonomike të Universitetit të Buenos Airesit, shpenzimet publike për universitetet ranë me rreth 41% në terma realë, gjatë gjysmës së parë të vitit 2026, krahasuar me të njëjtën periudhë të vitit 2023.

Përfaqësuesit e universiteteve paralajmërojnë se shkurtimet po ulin fuqinë blerëse të pagave dhe po vështirësojnë funksionimin e institucioneve, mësimdhënien dhe kërkimin shkencor.

Në protestë morën pjesë edhe sindikata, studiues, pensionistë dhe organizata të personave me aftësi të kufizuara, të cilët kundërshtojnë politikën e kursimit të shpenzimeve publike të qeverisë Milei./mxh

Zëdhënësja e Shtëpisë së Bardhë, Katie Zacharia, është shkarkuar nga detyra pas vetëm pesë ditësh, në një zhvillim të papritur brenda administratës amerikane.

Lajmi bëhet i ditur nga gazeta amerikane “The New York Times”, e cila citon disa burime të njohura me çështjen.

Shkarkimi i saj vjen pas një periudhe shumë të shkurtër në këtë detyrë, duke ngritur pikëpyetje mbi arsyet që çuan në përfundimin e angazhimit të saj.

Megjithatë, deri më tani nuk janë bërë publike detaje të mëtejshme mbi rrethanat e vendimit dhe as nëse pasuesi i saj është përcaktuar.

Shtëpia e Bardhë nuk ka dhënë ende një shpjegim zyrtar për këtë zhvillim, ndërsa informacioni i raportuar nga media amerikane mbështetet në burime që nuk janë identifikuar publikisht./mxh

Presidenti ukrainas, Volodymyr Zelensky, paralajmëroi se rënia e Ukrainës mund të shkaktojë një valë të madhe refugjatësh drejt Evropës, duke përmendur shifrën prej 20 milionë ukrainasish.

“Çfarë do të ndodhë nëse biem? Nuk e di sa refugjatë do të vijnë në Evropë, 20 milionë ukrainas”, deklaroi Zelensky në Bruksel.

“Sepse ata do të na shkatërrojnë dhe do të na dëbojnë. Për këtë arsye, ju kërkojmë të mbroni vendin tonë”, shtoi presidenti ukrainas.

Zelensky u bëri thirrje partnerëve evropianë të mbështesin Ukrainën përballë agresionit rus./mxh

Last Updated on 16/10/2026 by EL

Kryetari i Grupit Parlamentar të Partisë Socialiste, Taulant Balla, ka ironizuar kreun e Partisë Demokratike, Sali Berisha, përmes një postimi në rrjetet sociale, pas publikimit të një videoje ku deputeti Klevis Balliu shihet duke kaluar me vrap lumin e Lanës.

Gjatë ditës, Balla i kërkoi Berishës, përmes një postimi në rrjetet sociale, të tërhiqte deputetët nga protesta.

Ndërkohë, në mbrëmje qarkulloi një video ku pretendohet se protestuesit e kanë larguar deputetin Klevis Balliu nga protesta dhe se, për t’u shpëtuar atyre, ai ka kaluar lumin e Lanës.

Krahas videos së publikuar në rrjetet sociale, Balla shkruan:

“O Saaaaali, po të thashë hiqi deputetët nga protesta! Shko merre në Lanë tani Klevis Balliun”, shkruan Balla në postimin e tij./et

Ish-kancelarja gjermane Angela Merkel ka kundërshtuar bashkëpunimin politik me partinë e djathtës ekstreme Alternativa për Gjermaninë (AfD), duke deklaruar se nuk do ta votonte kandidatin e saj për kryetar të parlamentit të Saksonisë-Anhaltit, sipas “Merkur”.

Deklarata e Merkel erdhi gjatë një diskutimi me nxënës nga pesë lande gjermane, në Berlin, ku foli për rreziqet që, sipas saj, paraqesin disa qëndrime të AfD-së për demokracinë dhe institucionet e vendit.

Ajo përmendi si shqetësuese, planet e partisë për të shfuqizuar transmetuesit publikë dhe për të ndërprerë financimin e institucionit të njohur të artit Bauhaus.

Merkel kritikoi gjithashtu synimin për të zëvendësuar traditat e krishtera me tradita gjermanike.

Duke folur për bashkëpunimin me partitë e tjera, ish-kancelarja bëri dallimin mes AfD-së dhe partisë së majtë “Die Linke”.

Ajo pranoi se ka qëndrime të kësaj të fundit me të cilat nuk pajtohet, por tha se, në përgjithësi, “Die Linke” nuk i kundërvihet Kushtetutës gjermane në të njëjtën mënyrë siç shqetësohet ajo për AfD-në.

Merkel u bëri thirrje partive demokratike, veçanërisht unionit konservator CDU dhe Partisë Socialdemokrate (SPD), të mos përqendrohen vetëm te kundërshtimi i AfD-së, por të paraqesin zgjidhje konkrete për problemet e qytetarëve.

Sipas saj, vëmendja e vazhdueshme ndaj kësaj partie mund të rrisë më tej praninë e saj në debatin publik.

Ajo theksoi se kompromisi është pjesë thelbësore e demokracisë, pasi kërkon dëgjimin e palës tjetër dhe përpjekjen për të kuptuar këndvështrimin e saj.

Megjithatë, nënvizoi se kompromisi nuk mund të bëhet me çdo kusht, sidomos kur vihen në pikëpyetje të drejtat themelore të njeriut ose justifikohet dhuna.

Gjatë diskutimit, Merkel komentoi edhe disa deklarata të kancelarit aktual, Friedrich Merz për ndryshimet në pamjen e qyteteve gjermane dhe për shërbimet dentare për azilkërkuesit.

Ajo tha se nuk do të përdorte personalisht një gjuhë të tillë dhe paralajmëroi për rrezikun e përgjithësimeve për grupe të tëra njerëzish.

Megjithatë, ish-kancelarja pranoi se Merz po drejton Gjermaninë në një periudhë të vështirë, të shoqëruar nga kriza ndërkombëtare dhe nevoja për reforma të brendshme.

Merkel, e cila drejtoi qeverinë gjermane për 16 vjet, pranoi se gjatë mandatit të saj nuk u arritën të gjitha objektivat, duke përmendur veçanërisht digjitalizimin dhe mbrojtjen.

Ajo u bëri thirrje të rinjve të angazhohen për mbrojtjen e demokracisë dhe shprehu bindjen se forcat që mbështesin vlerat demokratike mund t’u përgjigjen sfidave aktuale./mxh

Last Updated on 16/10/2026 by Monika

Protestuesit hedhin në Lanë deputetin e PD, Klevis Balliu

Një grup protestuesish kanë përzënë nga sheshi përfaqësues të Partisë Demokratike, mes të cilëve ishte edhe deputeti Klevis Balliu.

Ai ka ikur me vrap, kanë kaluar përmes lumit Lana.

Aty pranë është gjendur edhe gazetari Osman Stafa, i cili u lutet protestuesve të ndalen./mxh

Last Updated on 16/10/2026 by EL

Blerjet e valutës në shuma të mëdha po zgjerojnë më tej bilancin e Bankës së Shqipërisë në rekorde të reja historike. Statistikat e Bankës së Shqipërisë tregojnë se totali i aktiveve arriti vlerën e pothuajse 926 miliardë lekëve, vlera më e lartë e regjistruar ndonjëherë.

Vlera e aktiveve në bilanc u zgjerua me 1.2% krahasuar me gushtin dhe me 9.4% krahasuar me të njëjtën periudhë të një viti më parë.

Duke analizuar rritjen e bilancit sipas zërave kryesorë, efektin kryesor në zgjerimin vjetor të aktiveve e kanë dhënë letrat me vlerë të jorezidentëve. Vlera e këtij portofoli arriti në afërsisht 633 miliardë lekë, në rritje me 23% krahasuar me të njëjtën periudhë të një viti më parë.

Rritja e këtij zëri në mënyrë të tërthortë tregon se zgjerimi i bilancit është i lidhur në një masë të madhe me rritjen e vlerës së rezervës valutore që administrohet nga Banka e Shqipërisë.

Sipas të dhënave më të fundit, të muajit shtator, rezerva valutore arriti vlerën më të lartë historike, në 8.4 miliardë euro, 16% më shumë krahasuar me një vit më parë.

Banka Qendrore prej më shumë se një dekade po ndjek një politikë të shtimit e rezervave valutore, në funksion të nevojave të mundshme të ekonomisë dhe sektorit financiar. Rezerva është rritur me blerje të vazhdueshme dhe në rritje të valutës në tregun e brendshëm, nëpërmjet ankandeve të planifikuara.

Por, në tre vitet e fundit rolin kryesor në këtë drejtim e kanë dhënë blerjet e drejtpërdrejta të valutës, në funksion të frenimit të mbiçmimit të mëtejshëm të Lekut në kursin e këmbimit. Rritja e blerjeve të valutës nënkupton injektime të reja në gjendjen e rezervës valutore dhe paralelisht shtim të injektimit të Lekut në ekonomi.

Në periudhën 2024-2025 Banka e Shqipërisë më shumë se dy miliardë euro në tregun e brendshëm valutor. Ndërkohë, vetëm për gjysmën e parë të këtij viti blerjet e valutës nga Banka Qendrore arritën një rekord të ri për periudhën, prej 664 milionë eurosh.

Presionet e tregut valutor mbi Euron këtë vit janë forcuar ndjeshëm. Pavarësisht ndërhyrjeve të vazhdueshme të Bankës së Shqipërisë, rënia vjetore e kursit Euro-Lek është shpejtuar në 5.6%. të enjten, kursi i këmbimit Euro-Lek shënoi një rekord të ri historik, në nivelin e 91.28 lekëve.

Blerjet e valutës po i japin politikës monetare tipare stimuluese, duke rritur injektimin e parasë në ekonomi, ndërkohë që inflacioni ka kaluar objektivin ligjor prej 3%, raporton Monitor.al.

Last Updated on 16/10/2026 by EL

Last Updated on 16/10/2026 by EL

“Pas një vendimi të drejtuesve të Top Channel, u mor vendimi që emisioni të mos transmetohej. Duke qenë se emisioni im ka argëtim, lojëra dhe muzike, nuk është momenti për të tilla gjëra. Nëse do të merremi me gurët, semaforët apo 3 kazanë që digjen, po i largohemi arsyes përse ata njerëz janë aty.

Ata njerëz janë plot halle dhe shteti duhet t’i thirrë dhe të përpiqet të flasë dhe t’i zgjidhë problemet. Jo t’i kërkojë llogari se kush ju ka sjellë këtu.

Protesta paqësore ishte shembull në botë, por u përball me indiferencë. Unë mbaj mend 1997 dhe 21 janarin 2011 dhe nuk dua të them se Rama erdhi në pushtet me gjak dhe po largohet njësoj. Unë njoh plot policë dhe nuk mund ta imagjinoj se ata mund të godasin ata të rinj nga hiçi.

Populli po injorohet, deputetët dhe ministrat janë urdhëruar të mos flasin. Presidenti foli? Nuk flitet të Facebook, bëhet siç duhet. Të rinjtë e mbulojnë fytyrën se kanë prindërit në punë, identifikohen dhe i bëjnë presion”, u shpreh Ejlli./et

Last Updated on 16/10/2026 by EL

Aktori dhe regjisori Hervin Çuli, i ftuar në Top Story me Grida Dumën, ka zbuluar se hyrja e banesës së tij është vandalizuar dhe është kërcënuar pas shkrimeve të bëra kundër dhunës në protestë.

“Kur hapa derën e shtëpisë gjeta një shenjë që s’më pëlqeu. Diçka që nxjerr njeriu nga trupi i tij me një X të madh. Unë jam njeri i thjeshtë, jetoj në një lagje jo të paqtë, por jam i identifikueshëm. Kam bërë disa shkrime në lidhje me protestën.

Besoj se është për shkak të këtyre reagimeve, jam i identifikueshëm kollaj, njerëzit më gjejnë. Unë nuk kam vila, nuk jetoj si Edi Rama. Ne që themi fjalën tonë dhe jemi njerëz të thjeshtë, mund të themi fjalën tonë. Shteti ka rënë, unë do të mbyll qepenat, të marr një armë dhe të ruaj veten.

Shteti ka rënë, Edi Rama ka rënë. Ai djali sapo më tha rrugës se është shoku i ngushtë i vajzës sime. Se nuk dua ta zmathoj këtë çështje (emocionohet). Vajza ime është kundër meje ndoshta, unë kam përjetuar 1997-ën. Unë nuk bëj shkrime për interes, bëj shkrime kundër dhunës.

Shkrimet tregojnë se nuk mbroj një qeveri të korruptuar që kam 4 vite që i bie. Jam njeri i braktisur tashmë, edhe nga punët më kanë lënë në harresë, puna e tyre, janë në pushtet. Detyra e shtetit është të mbrojë jetën e individit, por edhe ana tjetër ka një kulturë agresive”, u shpreh mes të tjerash Çuli./et

Last Updated on 16/10/2026 by EL

Kryetari i Lëvizjes për Zhvillim Kombëtar, ish-deputeti Dashamir Shehi, është filmuar në protestën e dhunshme që po zhvillohet në Tiranë.

I vetëm, i qetë dhe me një cigare ndezur, Shehi duket se po vëzhgon nga afër situatën e krijuar në kryeqytet gjatë këtyre 4 ditëve protesta të dhunshme./et

Last Updated on 16/10/2026 by Monika

Disa të rinj të maskuar kanë hedhur bomba molotov në drejtim të Bashkisë së Shkodrës mbrëmjen e së premtes.

Nga sulmi nuk raportohet për dëme materiale, ndërsa ende nuk ka të dhëna të tjera lidhur me rrethanat e ngjarjes./mxh

Last Updated on 16/10/2026 by Monika

Erald Noj, protestues që në ditën e parë të “Flamingove” u shpreh në emisionin “Të Paekspozuarit” në Vizion Plus se nuk ka negociata me Ramën, por vetëm qeveri teknike, ndërsa e paralajmëroi se pot ë ndodhë një vrasje nga agjenturat e huaja fundi i tij do të jetë katastrofik. Analisti Anri Bala replikoi me protestuesin duke thënë se nëse ndodh kjo vrasje përgjegjësia është edhe e protestuesve.

Pjesë nga biseda

Erald Noj: Unë besoj që jam me mendimin e shumicës së protestuesve. I vetmi moment kur mund të ulemi në negociatë me Ramën është me qeveri teknike. Jemi të gatshëm të përdorim çdo mjet demokratik dhe jo për të arritur dorëheqjen e Ramës. Ai ka vrarë PS-në dhe ëndrrat në këtë vend. Ka ekzekutuar edhe PS-në, e ka degjeneruar. PS nuk ka figura me integritet dhe dinjitet që t’i dalin përballë Ramës sot. Si nuk doli njeri të thotë mendoj ndryshe.

Me çdo mjet demokratik ose jo.

I bëj thirrje zotit Kryeministër, a e ka menduar ai dhe këshilltarët, që mjafton një vrasje nga agjenturat e huaja dhe qeveria dorëzohet në mënyrën më katastrofike?

Me kë e mbron popullin? Më vjen keq që të kam ty kryeministër, e di që je i kapur. Nuk kam gjë me ty dhe PS. E kam me sistemin. Edhe Berisha ju ka ndihmuar jashtëzakonisht. Shqipëria është në rrezik të madh.

Anri Bala: Pra zotëria thotë se mund të përshkallëzojë situata për shkak të ndërhyrjes nga jashtë.

Erald Noj: Po dhe kryeministri nuk ka marrë masa sepse i ka rënë pushteti në llum.

Artan Hoxha: A ke vërejtur gjë, se kryeministri thotë është e stisur nga jashtë. Unë di që po protestojnë shqiptarët? Ka të serbëve, rusëve, iranianëve?

Erald Noj: Po ka.. Ka rryma të huaja, sepse Rama midis shumë budallëqeve ka bërë edhe ndonjë gjë të saktë. Ka shërbime që tentojnë të fusin tentakula. Ka grupe koordinuese, por asnjëri nuk është për interes kombëtar. Secili ka parti politike.

Anri Bala: Ju që e keni Ramën përballë, që ky është maskara, etj, keni shqetësim të madh. Jeni më shumë se Rama përgjegjës, që me turmën mund të ndodhë ndonjë ngjarje tragjike nga jashtë. Kur të ndodhë, nëse ndodh, është më përgjegjës Rama që nuk ju ka mbrojtur ju që të digjni Tiranën, apo është përgjegjësi e atyre që janë në protestë?

Erald Noj: Përgjegjësia është e kryeministrit, nëse ka ndonjë influencë, sepse ai duke ndejtur 13 vjet ne pushtet mban përgjegjësi për SHISH që e ka futur në shtrat me krimin. Kaq naiv është ai kryeministër. Tani t’i dalë zot, përgjegjësia është e Ramës.

Konkretisht jam kontaktuar nga një person që ka folur në emër të shërbimeve të huaja dhe ka tentuar të më shantazhojë. Ku të shkojmë ne zoti kryeministër? Kam marrë dy herë, nuk është përgjigjur njeri./mxh

Last Updated on 16/10/2026 by Monika

Deputeti dhe nënkryetari i PD-së, Belind Këlliçi, ndau një reagim të ashpër ndaj dhunës policore që po shfaqet në protestën studentore.

Në një postim në rrjetin social “Facebook”, Këlliçi ka publikuar një pamje nga protesta dhe hedh akuza drejtuar kryeministrit Edi Rama se dhuna po kryhet nën urdhrat e tij.

Sipas demokratit, arsyet që e shtyjnë Ramën në këtë qasje janë privilegjet e karriges së tij.

“Pamje që flasin vetë. Dhunë kafshërore që tregon tërbimin e Edi Ramës dhe urdhrave të tij për gjak, vetëm e vetëm për të mbajtur karrigen që i jep privilegje dhe e mbron nga drejtësia!”,-shkruan Këlliçi./mxh

Last Updated on 16/10/2026 by EL

Shtetasi amerikan Philip Gilpin Jr., përmes një denoncimi publik, rishperndarë nga gazetari Lutfi Dervishi, tregon se është ndaluar fizikisht dhe është marrë në pyetje nga një grup personash të veshur me të zeza e të paidentifikuar, në mes të Sheshit “Skënderbej”.

Sipas dëshmisë së Gilpin, ngjarja ka ndodhur rreth orës 11:00 të mëngjesit, teksa ai po kthehej në apartamentin e tij pasi kishte parë disa ambiente për zyra me një agjent imobiliar.

Amerikani tregon se po bisedonte me një grup prej pesë adoleshentësh në shesh, kur papritur drejt tyre janë turrur rreth 10 persona të veshur me të zeza dhe me shkopinj gome në duar, pa asnjë shenjë dalluese apo identifikuese si forcë rendi.

“Nga asgjëja, rreth 10 burra të veshur me të zeza, pa asnjë identifikim dhe me shkopinj gome, u turrën drejt nesh dhe na ndaluan. Adoleshentët i morën, ndërsa mua më mbajtën dy persona. Njëri më kapi nga kyçi i dorës, më mori telefonin dhe nisi të kontrollonte përmbajtjen, ndërsa tjetri më kërkoi mjetin e identifikimit,” shkruan Gilpin.

Pasi i ka informuar se është shtetas amerikan nga Bostoni dhe u ka treguar patentën e tij amerikane, personat në fjalë e kanë fotografuar atë bashkë me dokumentin dhe, pas rreth 10 minutash “përpjekjeje për ta frikësuar”, e kanë lënë të lirë.

Gilpin ngre alarm mbi sigurinë në qendër të Tiranës, duke deklaruar se brenda vetëm 15 minutave ka qenë dëshmitar i tri incidenteve të tjera të ngjashme, ku grupe personash që silleshin si “banda dhunuesish” ndalonin çdo të ri që kalonte në shesh.

Përmes një përditësimi në shkrimin e tij, shtetasi amerikan njofton se ka vënë menjëherë në dijeni përfaqësitë diplomatike:

“PËRDITËSIM: Kam folur me Ambasadën Amerikane dhe jam në kontakt me përfaqësuesit e mi në Kongresin Amerikan, në Uashington.”

Deri më tani nuk ka një reagim zyrtar nga Policia e Shtetit lidhur me praninë e personave të maskuar pa uniformë në qendër të Tiranës apo për procedurën e ndalimit të shtetasit amerikan./ET

Last Updated on 16/10/2026 by Monika

Pasi policia i shpërndau nga bulevardi, protestuesit kanë dalë në marshim në rrugët e Tiranës. Gjatë marshimit, ata janë ndalur në zonën e Ushtarit të Panjohur, ku disa prej tyre janë futur brenda një banke private, pasi kanë thyer xhamat.

Ndërkohë, protestuesit po gjuajnë me gurë në drejtim të efektivëve të policisë që ndodhen në zonë./mxh

Last Updated on 16/10/2026 by Monika

Ndërtesa publike të dëmtuara nga zjarri, xhama të thyer dhe dyqane të plaçkitura, rrugë të mbushura me gurë e kontejnerë mbeturinash të djegur. Këto janë pamjet në Tiranë, teksa protestat e studentëve kanë hyrë në ditën e katërt dhe janë përhapur edhe në qytete të tjera të Shqipërisë.

Përleshjet mes policisë dhe grupeve të protestuesve, kryesisht të maskuar, kanë lënë dhjetëra të lënduar, shumica policë, sipas autoriteteve. Policia ka përdorur gaz lotsjellës dhe topa uji për t’i shpërndarë protestuesit.

Studentët thonë se protestojnë kundër kostove të larta të arsimit dhe korrupsionit qeveritar, ndërsa kërkesë kryesore kanë dorëheqjen e Qeverisë së udhëhequr nga Edi Rama. Atyre u janë bashkuar edhe nxënës të shkollave të mesme. Mësimi është bojkotuar në universitete në Tiranë dhe në disa qytete të tjera, si dhe në disa gjimnaze të kryeqytetit.

Përtej studentëve, pakënaqësi që bashkojnë brezat
Pas katër ditësh protestash dhe përplasjesh me policinë, studentët vazhdojnë të dalin në rrugët e Tiranës. Sipas autoriteteve, vetëm mbrëmjen e 15 tetorit u ndaluan 160 protestues. Por studentët thonë se do të vazhdojnë të protestojnë.

‘Nuk kemi rrugë tjetër, nuk na është lënë zgjidhje tjetër. Çfarë duhet të bëjë një student që nuk përballon dot kostot e arsimit, të jetesës edhe pse punon. Çfarë të bëjë kur nuk dëgjohet, kur nëpërkëmbet. Nuk ka asnjë vlerë diploma sepse nuk ka meritokraci, vendet e punës janë për fëmijët e politikanëve, administratës, oligarkëve”, thotë për Radio Evropën e Lirë Blerta, studente në fakultetin Ekonomik në Tiranë.

Në rrugët e Tiranës, përkrah studentëve janë edhe profesorë. Lush Susaj, profesor në Universitetin Bujqësor të Tiranës, thotë se proteston për studentët e tij dhe për të gjithë ata që janë detyruar të largohen nga vendi.

“Njëra nga studentet e mia mbaroi masterin shkencor me rezultate të shkëlqyera. E dini çfarë pune bën? Bën byrekë në një biznes në një lagje të Tiranës. Kjo është e dhimbshme për mua”, thotë Susaj për REL.
Ai ia atribuon situatën politizimit të shkollave dhe universiteteve, si dhe mungesës së meritokracisë në punësim.

“Nuk futesh në punë në shkolla dhe universitete pa mbështetjen e partisë në pushtet. Partia vendos për gjithçka. Studenti le të mbarojë me rezultate të shkëlqyera, punën do ta fitojë patronazhisti i partisë, pa aftësitë e duhura dhe pa lidhje me shkollimin. Situata që shohim sot është pasojë e keqqeverisjes, korrupsionit dhe nepotizmit. Faji nuk është i studentëve. Ata janë në të drejtën e tyre. Do të vinte dita që të shpërthenin”, thotë Susaj.

Krahas studentëve dhe profesorëve, në protestë janë edhe pensionistë. Mes tyre është Syrja Xhani, ish-punonjës i trupës së Cirkut Kombëtar dhe një nga organizatorët e protestave kundër shembjes së Teatrit Kombëtar në vitin 2020. Ai thotë se prej 140 ditësh proteston kundër Qeverisë Rama.

Pakënaqësitë me Qeverinë Rama kanë nxjerrë qytetarë në rrugë prej muajsh. Protestat fillimisht u nxitën nga një projekt i diskutueshëm turistik në Zvërnec të Vlorës, i lidhur me Jared Kushner. Sipas protestuesve, ky projekt, ashtu si edhe të tjerë, tregon se politika po vendos interesat e saj mbi ato të qytetarëve dhe po shpërfill interesin publik.

“Pushtetarët fitojnë pasuri përrallore, ndërsa qytetarët bëjnë llogaritë për të mbijetuar. Kam punuar gjithë ato vite dhe çfarë pensioni marr? Duhet të zgjedh nëse do të blej ilaçe apo do të ushqehem”, thotë ai për REL.

Xhani e cilëson protestën të vonuar. Një tjetër pensionist pranë Xhanit, i cili nuk deshi të identifikohej, mendon se brezi i tij mban një pjesë të përgjegjësisë për situatën dhe se duhet të jetë çdo ditë në krah të studentëve.

“Është gabimi ynë që nuk ditëm ta përmbysnim komunizmin, ta shkulnim me rrënjë. Le t’i vuajmë pasojat, por duhet të jemi në shesh për fëmijët tanë. Kthim pas nuk ka”, thotë ai për REL.

Situata socio-ekonomike në Shqipëri
Paga mesatare mujore bruto: 92.150 lekë, ose rreth 1.000 euro, në tremujorin e dytë të vitit 2026, para tatimit dhe kontributeve.
Papunësia te të rinjtë 15–24 vjeç: 21,5% më 2025, për të gjitha nivelet arsimore, kundrejt 8,4% në nivel vendi.
Rreziku nga varfëria: 19% e popullsisë më 2025, me të ardhura të disponueshme nën pragun relativ të varfërisë.
Privimi i rëndë material dhe social: 31,2% e popullsisë më 2025 nuk përballonte të paktën 7 nga 13 nevoja materiale dhe sociale.

Protestuesit fajësojnë qeverinë për përshkallëzimin
Studentët dhe qytetarët e tjerë që marrin pjesë në protestë thonë se përshkallëzimi ishte e vetmja rrugë që u kishte mbetur për t’u dëgjuar.

Aurel Kujtimi, aktivist i kauzave studentore, thotë se situata u përshkallëzua për shkak të arrogancës së qeverisë.

“Qytetarët nuk u dëgjuan, përkundrazi, u tallën dhe u përçmuan. Përshkallëzimin e solli qeveria, ndërsa dhuna që policia e shtetit po ushtron ndaj të rinjve i revolton ata edhe më shumë”, thotë Kujtimi për REL.

Ai shpreh keqardhje për bizneset e vogla të dëmtuara gjatë protestës, por jo për bizneset e mëdha që, sipas tij, janë të lidhura me pushtetin dhe kanë përfituar nga taksat e qytetarëve. Të premten, në rrjetet sociale qarkulluan fotografi të bizneseve që kishin vendosur në hyrje letra të bardha me mbishkrimin: “Mbështesim studentët, mos na dëmtoni”.

Ndërkaq, në një video të publikuar të premten në Facebook, kryeministri Rama tha se protestat nuk lidhen me shqetësimet dhe aspiratat legjitime të qytetarëve për një jetë më të mirë. Ai akuzoi “duar të huaja”, pa i identifikuar ato, se po nxisin trazirat për të penguar përparimin e Shqipërisë drejt anëtarësimit në Bashkimin Evropian. Një ditë më parë, ai i tha agjencisë Reuters se nuk do të japë dorëheqje.

Edhe profesori Lush Susaj e sheh përshkallëzimin si pasojë të mënyrës se si është menaxhuar protesta dhe akuzon policinë për dhunë ndaj protestuesve.

“Ditën e parë që protesta u përshkallëzua, kam qenë para Ministrisë së Arsimit. Pas gazit lotsjellës, u futëm në një nga rrugicat me studentët e mi për t’u ardhur në ndihmë. Policët erdhën për t’i qëlluar, edhe pse ishin të shtrirë në tokë. Kur më panë, më njohën dhe u larguan. Policia ka dëshmuar sjellje aspak profesionale këto ditë. Të rinjtë janë të mbingarkuar me mllef ndaj kësaj qeverie dhe, kur dhunohen edhe nga policia, si mund të reagojnë ndryshe?”, thotë ai.

Delegacioni i BE-së në Shqipëri dënoi përshkallëzimin e dhunës dhe shkatërrimin e pronës publike e private, duke u bërë thirrje protestuesve të tregojnë vetëpërmbajtje. Ai kërkoi që policia të përdorë forcën në mënyrë proporcionale dhe që pretendimet për përdorim të tepruar të saj ndaj protestuesve dhe gazetarëve të hetohen me përparësi.
Policia ka paralajmëruar se çdo tejkalim i kompetencave do të sjellë përgjegjësi, ndërsa Avokati i Popullit ka nisur shqyrtimin nëse përdorimi i forcës ndaj protestuesve ka qenë proporcional.

Përplasjet kanë ngritur shqetësime edhe për sigurinë e fëmijëve në shkollat pranë zonave të protestës. Elona Gjylmi, gazetare me mbi 20 vjet përvojë dhe nënë e një fëmije që mëson pranë Ministrisë së Arsimit, thotë se mbështet protestat dhe mirëkupton zemërimin e të rinjve, por shqetësohet për ekspozimin e nxënësve ndaj gazit lotsjellës.

“Si prind, me fëmijën në një shkollë rreth 100 metra larg Ministrisë së Arsimit, jam jashtëzakonisht e shqetësuar. Sot në mësim ishin vetëm gjashtë fëmijë dhe prindërit i morën para përfundimit të procesit mësimor. Ministria e Arsimit, për mendimin tim, duhet të pezullojë mësimin në shkollat pranë institucioneve që po sulmohen gjatë protestës. Fëmijët po ekspozohen ndaj sasive të mëdha të gazit dhe kimikateve”, thotë ajo për REL.
Sipas protestuesve, zgjidhja e krizës politike kalon përmes dorëheqjes së kryeministrit Edi Rama, krijimit të një qeverie teknike dhe mbajtjes së zgjedhjeve të parakohshme. Ata kërkojnë gjithashtu hapjen e dialogut politik./mxh