Kryeministri Edi Rama ka ndarë pamje nga punimet në gjimnazin “Dhaskal Todri” në Elbasan.

Rama shprehet se investimi do t’u japë 600 nxënësve një shkollë të re me klasa moderne, laboratorë, terrene sportive, bibliotekë si edhe salla pune për mësuesit.

Reagimi në Facebook;

MIRËMËNGJES dhe me rilindjen e një gjimnazi emblemë si “Dhaskal Todri” në Elbasan, që po realizohet përmes një investimi që do t’u japë rreth 600 nxënësve një shkollë krejt të re me klasa moderne, laboratorë, terrene sportive, bibliotekë dhe salla pune për mësuesit, duke zbatuar edhe sistemin e eficiencës energjetike, ju uroj një ditë të mbarë

Varësia e Europës nga sistemet e pagesave të kontrolluara nga SHBA-ja e lë bllokun të ekspozuar ndaj presionit politik dhe përçarjeve ekonomike, paralajmëroi të mërkurën kryetarja e komitetit për çështjet ekonomike dhe monetare të Parlamentit Evropian.

“Duhet ta pranoj se jam e shqetësuar kur dëgjoj fjalimin e presidentes”, tha Aurore Lalucq, duke iu referuar deklaratave të presidentes së Komisionit Evropian Ursula von der Leyen.

Lalucq tha se po injorohen dobësitë kyç, duke theksuar se teknologjia digjitale dhe sistemet e pagesave mungojnë në diskutim.

“Por pikërisht aty qëndron dobësia jonë sot”. shtoi ajo. “Gati të gjitha sistemet tona të pagesave sot janë amerikane”, tha Lalucq.

Ajo paralajmëroi se presidenti amerikan Donald Trump mund t’ia ndërpresë këto sisteme Evropës brenda natës.

“Donald Trump mund t’i ndërpresë ato gjatë natës. Ai e ka bërë tashmë më parë”, tha Lalucq, duke iu referuar presionit që më parë është ushtruar ndaj gjyqtarëve të Gjykatës Ndërkombëtare dhe sundimit të ligjit.

Duke kërkuar veprime të menjëhershme, Lalucq tha se ka bërë një “kërkesë shumë specifike” ndaj Komisionit Evropian.

“Unë kërkoj urgjentisht që të organizoni një takim javën tjetër, brenda disa javëve të ardhshme, për të krijuar një ‘Airbus’ të sistemeve të pagesave”, tha ajo, duke pohuar se një projekt i tillë nuk do të kushtonte shumë.

“Nuk mund të themi se nuk na paralajmëruan”, shtoi Lalucq, duke thënë se distributorët, shitësit me pakicë dhe gjyqtarët janë të gjithë të shqetësuar.

“Nuk kushton asgjë, shpëton ekonominë tonë, shpëton demokracinë tonë”, përfundoi ajo.

Kuvendi mblidhet sot në orën 10:00 në seancë plenare për shqyrtimin dhe miratimin e projektligjit “Për ratifikimin e marrëveshjes së pranimit të Republikës së Shqipërisë, përfaqësuar nga Kryeministri Edi Rama, në Kartën e Bordit të Paqes”.

Në urdhrin për thirrjen e seancës nga kryetari i Kuvendit Niko Peleshi thuhet se marrëveshja kërkon shumicë absolute votash për miratim.

Seanca do të nisë me fjalën e nismëtarit, më pas do shprehet komisioni përgjegjës për  Europën dhe Punët e Jashtme ndërsa parashikohen diskutime dhe votimi.

Duke qenë se pjesëmarrja e Republikës së Shqipërisë në Bordin e Paqes konsiderohet zhvillim me rëndësi të veçantë për politikën e jashtme dhe diplomacinë e
vendit, kërkesa për miratimin e këtij projektligji me procedurë të përshpejtuar
bëhet në përputhje me parashikimin e nenit 83, pika 2, të Kushtetutës.

Projektligji synon ratifikimin e marrëveshjes së pranimit të Republikës së Shqipërisë, përfaqësuar nga Kryeministri Edi Rama, në Kartën e Bordit të Paqes.
Këshilli i Ministrave ka miratuar, në parim marrëveshjen më 21 janar. Marrëveshja synon krijimin e Bordit të Paqes si një organizatë ndërkombëtare, me personalitet ligjor ndërkombëtar, me qëllim promovimin e stabilitetit, rivendosjen e një qeverisjeje të besueshme e të ligjshme, si dhe sigurimin e paqes së qëndrueshme në zonat e prekura ose të kërcënuara nga konflikti.

Bordi i Paqes do të ndërmarrë funksione të tilla të ndërtimit të paqes në përputhje me të drejtën ndërkombëtare dhe në përputhje me këtë Kartë, duke përfshirë zhvillimin dhe përhapjen e praktikave më të mira të mundshme për t’u zbatuar nga të gjitha shtetet dhe komunitetet që kërkojnë paqe.

Dy persona kanë humbur jetën pas motit të keq që goditi Atikën. Vendi u përfshi nga stuhi dhe reshje të dendura të shiut duke shkaktuar pasojnë të shumta.

Rrugët u kthyet lumenj duke marrë përpara automjetet. Si pasojë e stuhisë në shumë zona u ndërpre energjia elektrike, u anulua transporti, ndërsa qindra zjarrfikës u angazhuan për t’i ardhur në ndihmë banorë të bllokuar.

Nëse keni dashur gjithmonë të vizitoni Maldivet, por ju mungon koha dhe buxheti, kompania ajrore “Ryanair” mundëson fluturime të lira drejt alternativave evropiane ku mund të shijoni plazhe po aq të bukura, shkruan Natalie King në një artikull të botuar në të përditshmen “Mirror”.

Linja ajrore me kosto të ulët “Ryanair” ka lançuar një numër linjash të reja, përfshirë drejt Shqipërisë, që po bëhet gjithnjë e më popullore në mesin e turistëve britanikë, falë ngjashmërisë së plazheve të saj që shpesh krahasohen me Maldivet.

“Ryanair” do të ofrojë 20 linja të reja për në Tiranë, duke e rritur numrin e linjave të saj në qytet në 43.

Nga pranvera, turistët do të jenë në gjendje të vizitojnë qytetin shqiptar nga Liverpuli, Birminghami dhe Dublini, me fluturime që zgjasin pak më shumë se tre orë.

Fluturimet janë të disponueshme nga Liverpuli dhe Dublini për 23 £  vajtje), me temperatura maksimale që arrijnë 26 gradë Celsius gjatë majit maj.

Shqipëria po bëhet një destinacion popullor për turistët që kërkojnë të pushojnë në diell me një buxhet të kufizuar, në pranverë.

Nëse jeni duke kërkuar pushime në plazh, ju rekomandojmë të udhëtoni në Shqipëri!

Ksamili në jug të vendit është një nga zonat më të njohura të plazhit dhe mund të merrni një autobus direkt për në vendpushim nga aeroporti, i cili zgjat pak më pak se katër orë.

Ksamili është një fshat bregdetar që ndodhet midis një lagune dhe detit Jon, me Korfuzin përballë tij.

Plazhet e tij me rërë të bardhë, deti bruz dhe ishujt e vegjël, të krahasuara me Maldivet, mund të eksplorohen me varkë.

Për një përvojë të plotë në stilin e Maldiveve, rezervoni një ditë në vendpushimin “Pema e Thatë”, ku mund të merrni me qira kabina.

Gjithashtu do të gjeni disa kasolle plazhi me rrjeta mbi ujë, ku mund të uleni dhe të relaksoheni, duke parë valët e buta të detit poshtë.

Mund të porosisni një birrë për rreth 2,25 paund dhe ta pini ndërsa shijoni pamjet.

Durrësi është rreth gjysmë ore larg nga Tirana dhe është një qytet port që ndodhet në një zonë të gjatë bregdeti me rërë.

Plazhi i Durrësit ka një shëtitore të rrethuar me palma dhe ujëra të kaltra, dhe ndodhet vetëm disa minuta larg qendrës historike të qytetit.

Gjithashtu, do të gjeni Plazhin e Currilave, pranë portit. Ju mund të merrni me qira një shezlong dhe të uleni në një nga baret dhe restorantet e plazhet, që krijojnë një atmosferë të gjallë.

Durrësi është gjithashtu i famshëm për amfiteatrin e tij romak, dhe pjesë të kësaj strukture të shekullit II janë ende “në këmbë”, përfshirë shkallët prej guri.

Një nga pamjet më ikonike të qytetit është Kulla Veneciane e shekullit V e Durrësit, një fortifikim mesjetar ku mund të shijoni pamje spektakolare bregdetare nga kullat e saj të vjetra të rojeve.

Ia vlen gjithashtu të vizitoni Muzeun Arkeologjik, një muze arkeologjik lokal plot me objekte që datojnë mijëra vjet më parë.

Tirana është gjithashtu një destinacion magjepsës për pushime në qytet.

Sheshi Skënderbej është një vend i shkëlqyer për të nisur turin. Do të gjeni ndërtesa të tilla si Xhamia e Et’hem Beut e shekullit XVII, e vendosur pranë Teatrit të Operas në stilin sovjetik, dhe Muzeut Historik Kombëtar – i cili është i zbukuruar me një mural të madh që përshkruan njerëz që luftojnë për lirinë e vendit.

Gjithashtu mund të vizitoni Bunk’Art 2 unik – një muze i vendosur brenda një bunkeri bërthamor të epokës komuniste.

Zbritni shkallët e pjerrëta dhe do të hyni në një botë gjithëpërfshirëse ku mund të mësoni rreth historisë magjepsëse të Shqipërisë dhe si ishte jeta gjatë dekadave të saj si një shtet i fshehtë komunist./ata.

Për ditën e enjte vendi ynë do të ndikohet nga kushte atmosferike të paqëndrueshme.

Moti parashikohet me vranësira mesatare deri të dendura si dhe intervale të herëpashershme me kthjellime.

Përgjatë ultësirës perëndimore dhe zonave bregdetare reshje shiu të herëpashershme me intensitet kryesisht të ulët. Këto reshje në periudha tepër afatshkurtra në formën e shtrëngatave. Mjegull e dendur/mjegullinë në zonat luginore në orët e mëngjesit si dhe në momentin e reshjeve të shiut. Në zonën e Alpeve reshje dëbore me intensitet të ulët kryesisht në orët e mëngjesit dhe ato të mbrëmjes vonë.

 Era do të fryjë me drejtim verilindje – juglindje, me shpejtësi mesatare 7 m/s, përgjatë vijës bregdetare dhe zonat luginore era me shpejtësi deri në 16 m/s.

 Deti – Valëzimi forcës 2-4 ballë.

Dashi

Me vullnet dhe dëshirë mund të arrini ta përmirësoni situatën ne jetën tuaj sentimentale. Nëse nga ana tjetër i lini gjërat të rregullohen vete, nuk keni për të arritur askund. Beqarët do afrohen me tepër me disa persona të cilët kanë kohë që i joshin. Në planin financiar duhet të ruani gjakftohtësinë në mënyrë qe t’i zgjidhni sa më shpejt problemet.

Demi

Duhet t’ua vini veshin mire sot këshillave që do iu japë partneri sepse vetëm ne këtë mënyrë mund ta përmirësoni gjendjen ndërmjet jush. Beqarët do kenë disa takime, por asnjeri nga personat nuk do i përmbushë te gjitha kërkesat. Mos kërkoni perfeksionin. Financiarisht do njihni momente të vështira, të cilat vetëm me maturi dhe kujdes do i kaloni.

Binjakët

Do filloni te bëni projekte afatgjata gjatë kësaj dite me partnerin tuaj sepse tashme ndiheni të sigurte që ai është personi me të cilin doni të kaloni gjithë jetën. Beqaret do jene pasionante dhe gati të fillojnë edhe aventura kalimtare dhe të çmendura. Në planin financiar do i kaloni vështirësitë dhe do ndiheni më të qetë. Nuk do e keni të vështirë të kryeni shpenzimet më të nevojshme.

Gaforrja

Do ndiheni të lire të bëni atë që dëshironi gjate kësaj dite dhe gjërat do shkojnë më së miri. Do dashuroheni plot pasion me partnerin. Nëse zemra juaj është e lirë mos i refuzoni disa ftesa që do ju bëhen. Mundësi të tilla rralle vijnë në jetë. Financat do jenë përgjithësisht të mira. Nëse tregoheni të matur me shpenzimet gjendja do mbetet e qëndrueshme.

Luani

Të dashuruarit do bashkëpunojnë me njeri-tjetrin dhe do mundohen te zgjidhin problemet e hershme. Me dëshirë dhe optimizëm gjithçka mund të rregullohet. Beqarët do kenë shume sukses në dashuri dhe e gjithë jeta do ju ndryshojë në një moment të vetëm. Financat do jenë mjaft delikate kështu që shmangni çdo lloj çmendurie nëse nuk doni të mbeteni pa para.

Virgjëresha

Tregohuni sa më spontane në jetën tuaj në çift gjatë kësaj dite dhe bëni atë që ndjeni. Do e shihni që do përjetoni me tepër kënaqësi. Beqarët do kenë mundësi pa fund për aventura, por nuk do ndihen gati dhe do preferojnë të qëndrojnë vetëm. Financat do jenë mjaft delikate dhe gabimi me i vogël mund të sjellë probleme të paimagjinueshme.

Peshorja

Duhet të ndryshoni rrënjësisht sjelljen tuaj përkundrejt partnerit gjatë kësaj dite në mënyrë që edhe gjerat t’iu ecin mire. Kokëfortësia dhe mungesa e tolerancës nuk ju çon askund. Beqarët ka mundësi të njihen me persona interesante gjatë mbrëmjes. Financat do jenë goxha më të mira se disa ditë më parë, prandaj mund të kryeni investime dhe transaksione.

Akrepi

Ditë shumë normale dhe pa ndonjë emocion të veçantë kjo e sotmja për ata që janë në një lidhje. Merrini gjërat ashtu si t’iu vijnë. Beqarët do takohen me disa persona të urtë dhe tolerantë me të cilët mund të krijojnë një lidhje afatgjate. Në planin financiar do keni fat me shumicë kështu që nuk duhet të shqetësoheni aspak. Gjendja do jetë mjaft e mirë.

Shigjetari

Jeta juaj në çift do jetë e mrekullueshme gjatë kësaj ditë. Do merreni vesh për çdo gjë me atë që keni në krah dhe nuk do hidhni asnjë hap pa rënë të dy dakord. Beqarët më mirë të qëndrojnë edhe sot vetëm sepse në të kundërt mund të përballen me zhgënjime. Për financat do përkujdeseni tej mase dhe gjendja do vije duke u përmirësuar.

Bricjapi

Ditë e mrekullueshme për çiftet. Do e përforconi edhe me shumë lidhjen që keni krijuar dhe do e shihni me optimizëm edhe të ardhmen. Beqarët do jenë të parezistueshëm prandaj do marrin plot ftesa e propozime. Ka mundësi që shumë shpejt statusi të ndryshoje. Financat nuk do jenë në gjendjen më të mirë të mundshme kështu që kryejini me kujdes shpenzimet.

Ujori

Problemet e se shkuarës mund të rishfaqen serish ne jetën tuaj ne çift sot dhe do ua prishin qetësinë që ekzistonte. Tregohuni shume të kujdesshëm me gjithçka që do thoni. Beqarët nuk do e kërkojnë dashurinë sepse edhe ashtu si janë ndihen mire. Në planin financiar do e ruani gjithë kohës ekuilibrin. Nuk do keni vështirësi për të kryer shpenzimet e domosdoshme.

Peshqit

Ditë shumë delikate dhe e mbushur me probleme te mëdha kjo e sotmja për te dashuruarit. Asgjë nuk ka për të shkuar si e kishit menduar dhe kjo për shkak te pamaturisë dhe këmbënguljes suaj boshe. Beqarët do kenë një dite normale dhe pa takime vendimtare. Në planin financiar mundohuni të mos kryeni çmenduri edhe sikur gjendja të jetë e mirë.

Gazetari Fatos Mahmutaj, i cili mbeti i plagosur në protestën e 21 janarit, rrëfeu për Orën e fundit detaje nga dita ku plumbat e shtetit u derdhën drejt qytetarëve.

Mahmutaj tha se Berisha e ka marrë damkën e vrasësit dhe se prokurori i çështjes po bën çmos që të shtyhet shqyrtimi sepse është i përdorur nga familja e Berishës.

”

Berisha e ka marrë damkën e vrasësit dhe kriminelit. Berisha, si të jetë si mos të jetë në këtë botë, do të ikë me njollë dhe turp. Thonë që vdekja është shpëtim. Në momentin që Berishës t’i vijë ajo ditë, ishalla jeton 500 vjet, por shqiptarët do të shpëtojnë nga ai.

Në 21 janarin e parë, Berisha ka qenë edhe më i ashpër; ka thënë se do të vriste 4 mijë, jo 4. Ai e ka zbutur këtë deklaratë, sepse damkën ia kanë vënë shqiptarët.

Prokurori që ka marrë përsipër dosjen, apo që ia kanë ngecur dosjen, ka treguar zell për mosnisjen e hetimeve. Prokurori është i përdorur kokë e këmbë nga familja e Berishës.

Një ditë para 21 janarit, Prokuroria i dha dorë Berishës duke goditur gjyqtaren Irena Gjoka. 21 janari po hallakatet, po përpiqet që çështja të shkojë drejt parashkrimit.

Drejtësia le të bëjë si të dojë; unë kam qenë dhe jam skeptik për këtë çështje. Asnjëherë nuk ka për t’u zgjidhur, por le të mbetet etalon i turpit. Prokurorët po marrin rroga të jashtëzakonshme dhe nuk po arrijnë as t’i justifikojnë këto rroga.”

Gazetari Fatos Mahmutaj, i cili mbeti i plagosur në protestën e 21 janarit, rrëfeu për Orën e fundit detaje nga dita ku plumbat e shtetit u derdhën drejt qytetarëve.

Mahmutaj tha se të gjithë gardistët qëlluan dhe se plumbi që preku atë dhe Hekuran Dedën dolën nga e njëjta armë.
Gazetari shtoi më tej se prokuroria nuk ka asnjë të akuzuar dhe se Berisha vijon me mashtrime.

” Nuk kam arritur të zbuloj kush më ka goditur. Është qëlluar nga Agim Llupo dhe Arjan Adhami. Të dy kanë qëlluar me armë të vogla automatike “Thompson”, ndërsa Ndrea Prendi ka qëlluar me pistoletë. Unë jam goditur me plumbat e njërës nga këto armë, ashtu si edhe Hekuran Deda, i cili u varros pa u kryer ekspertiza.

Janë dy persona të akuzuar prej meje në këtë çështje, por ende prokuroria nuk ka një të akuzuar real.

Berisha ka akuzuar se edhe dritaret janë qëlluar me snajper nga protestuesit.
Garda ka qëlluar me kallashnikovë, pistoleta, automatikë dhe armë me plumba plastikë. Të gjithë gardistët kanë qëlluar, disa në ajër dhe disa drejt njerëzve.

Nuk është qëlluar asnjë fishek drejt Kryeministrisë, sepse askush nuk kishte armë, përveçse janë hedhur gurë dhe sende të forta. Berisha është mashtrues dhe këto mashtrime i beson edhe vetë.“

Japonia ka rinisur punën në reaktor në centralin bërthamor më të madh në botë, gati 15 vjet pas një katastrofe në centralin e Fukushimës që e detyroi vendin të mbyllte të gjithë reaktorët e tij bërthamorë.

Reaktori numër 6 në centralin Kashiwazaki-Kariwa, i vendosur në veriperëndim të Tokios, rinisi punën të mërkurën. Ai u vonua me një ditë për shkak të një mosfunksionimi të alarmit dhe pritet të fillojë të funksionojë komercialisht muajin tjetër.

Ky është instalimi i fundit në rinisjen e energjisë bërthamore të Japonisë, e cila ka ende shumë punë për të bërë. Reaktori i shtatë nuk pritet të rikthehet në punë deri në vitin 2030, dhe pesë të tjerët mund të çmontohen.

Kjo e lë centralin me shumë më pak kapacitet sesa kishte dikur kur të shtatë reaktorët ishin në funksion: 8.2 gigavat.

Japonia, e cila gjithmonë ishte mbështetur shumë në importet e energjisë, ishte një nga adaptuesit e hershëm të energjisë bërthamore. Por këto ambicie u prishën në vitin 2011, nga ajo që tani mbahet mend si një nga katastrofat më të këqija bërthamore në histori.

I shkaktuar nga tërmeti më i fuqishëm i regjistruar ndonjëherë në Japoni, shkrirja e reaktorëve në Fukushima Daiichi çoi në rrjedhje radioaktive.

Kjo traumatizoi komunitetet lokale që u evakuuan dhe shumë prej tyre nuk janë kthyer pavarësisht garancive zyrtare se ishte e sigurt për ta bërë këtë.

Kritikët thonë se pronari i centralit, Tokyo Electric Power Company, ose Tepco, nuk ishte i përgatitur dhe përgjigja e tyre dhe e qeverisë nuk ishte e koordinuar mirë.

Një raport i pavarur qeveritar e quajti atë një “katastrofë të shkaktuar nga njeriu” dhe fajësoi Tepco-n, megjithëse një gjykatë më vonë liroi tre nga drejtuesit e tyre nga neglizhenca.

Megjithatë, frika dhe mungesa e besimit nxitën kundërshtimin publik ndaj energjisë bërthamore, dhe Japonia pezulloi të gjithë flotën e saj prej 54 reaktorëve menjëherë pas katastrofës së Fukushimës.

I dërguari i posaçëm i Shteteve të Bashkuara, Steve Witkoff – duke folur në emër të administratës Trump – tha se SHBA-ja nuk është në bisedime me Iranin tani për tani, megjithëse “kemi pasur kontakt me ta”.

Duke folur në një intervistë për CNBC, në margjinat e Forumit Ekonomik Botëror në Davos të Zvicrës, Witkoff tha se “Irani është një marrëveshje që duhet të ndodhë”.

I pyetur për hollësi, ai e shmangu përgjigjen, por e përsëriti se ka mundësi për një marrëveshje.

Protestat në Iran nisën më 28 dhjetor 2025, në tregjet e kryeqytetit Teheran, nga tregtarë të zemëruar për kushtet e këqija ekonomike, përfshirë inflacionin e madh dhe rënien e lirë të monedhës.

Trazirat u përshkallëzuan me shpejtësi, duke u shndërruar në demonstrata të gjera kundër autoriteteve për shkak të përkeqësimit të standardeve të jetesës dhe shtypjes të lirive themelore.

Tensionet SHBA–Iran

Tensionet e kahershme mes Uashingtonit dhe Teheranit po thuajse kanë arritur pikën kulmore gjatë kësaj krize.

Presidenti amerikan, Donald Trump, fillimisht paralajmëroi se Shtetet e Bashkuara ishin “të gatshme dhe të armatosura” dhe të përgatitura për të vepruar nëse forcat iraniane të sigurisë do të vrisnin protestues.

Më vonë, ai u zotua për “veprime shumë të fuqishme”, nëse Irani do të vazhdonte me ekzekutimin e protestuesve.

Trump më pas tha se kishte zgjedhur personalisht të mos urdhëronte sulme ushtarake kundër Iranit, duke ia atribuuar këtë vendim anulimit të raportuar nga Teherani të qindra ekzekutimeve të planifikuara.

Në një tjetër intervistë në Davos, Witkoff i tha Arab News se Irani duhet të vijë dhe të ulet në tryezën diplomatike.

“Kjo duhet të ndodhë [që Irani të negociojë]”, tha ai. “Është e rëndësishme. Nëse shkon Irani, shkon edhe rajoni, ndaj duhet ta sqarojmë këtë”.

Witkoff këmbënguli se Lindja e Mesme po lëviz në drejtimin e duhur.

“Mendoj se është e jashtëzakonshme ajo që po ndodh. Të gjithë, mendoj, po punojnë së bashku drejt paqes”, tha ai. “Të gjithë janë angazhuar me idetë e presidentit Trump për paqen kufitare dhe jam kam shumë shpresa”./REL

Një pasqyrë e gjallë e trashëgimisë arbëreshe dhe lidhjes së saj me identitetin shqiptar u soll në emisionin “Të Gjitha Rrugët të Çojnë në Romë” në ABC Neës, përmes një interviste me Marco Altobellon, president i Institucionit të Kulturës të Bashkisë së Campomarinos.

Gjatë bisedës me gazetarin Artur Nura, Altobello foli për misionin e institucionit në promovimin kulturor dhe turistik të qytetit, vlerësimin e rrënjëve arbëreshe, si edhe për pasurinë historiko-kulturore që përfaqësojnë Pallati Norante, Biblioteka “Kodra” dhe Borgo i Pikturuar i Campomarinos, me muralet kushtuar Valljes arbëreshe, Skënderbeut dhe Shën Kristinës, shenjta mbrojtëse e qytetit.

Artur Nura: Me çfarë merret institucioni juaj?

Marco Altobello: Institucioni ynë merret me promovimin kulturor dhe turistik të qytetit dhe, në veçanti, me vlerësimin e rrënjëve tona arbëreshe dhe shqiptare, pasi Campomarino është një nga komunat më të mëdha në Itali me origjinë arbëreshe.

Artur Nura: Ndodhemi në një sallë që ka një emër të veçantë, apo jo?

Marco Altobello: Po, ndodhemi në Pallatin Norante, që është selia e Bibliotekës “Kodra”. Biblioteka i është kushtuar Ibrahim Korrës dhe kjo sallë, e dedikuar atij, quhet Salla Kodra. Ajo është gjithashtu selia e sportelit gjuhësor arbëresh dhe strehon disa vepra origjinale të Korrës, të dhuruara nga vetë artisti në vitin 2002, gjatë vizitës së tij në Campomarino. Vepra të tjera janë dhuruar nga Liliana Corfioti, nxënëse e Korrës. Këto janë vepra që pasurojnë trashëgiminë tonë historiko-kulturore dhe, mbi të gjitha, forcojnë lidhjen e komunitetit tonë me rrënjët arbëreshe.

Artur Nura: A ka vepra origjinale këtu në sallë?

Marco Altobello: Po, kemi dy vepra origjinale: një skulpturë të Korrës dhe një pikturë, gjithashtu të Korrës. Të dyja veprat i referohen totemit. Korra zakonisht pikturonte ose skaliste këtë simbol, i cili sipas tij përfaqëson paqen dhe vëllazërimin mes popujve. Për ne kjo ka një domethënie të veçantë, sepse komuniteti ynë ka pritur shqiptarët dhe arbëreshët, dhe vlera si mikpritja, paqja dhe vëllazërimi janë thelbësore për Campomarino-n.

Artur Nura: E ndaj plotësisht këtë mendim. Faleminderit shumë.

Marco Altobello: Faleminderit juve. Punë të mbarë.

Artur Nura: Muralët e Borgos së Pikturuar të Campomarinos paraqesin traditën arbëreshe, ndër to Vallja, Skënderbeu dhe Shën Kristina.

Zëvendëskryetar bashkie, çfarë përfaqëson kjo shesh?

Marco Altobello: Ky është Sheshi Largo Santa Maria, nga ku fillojnë lagjet tona të pikturuara dhe afresket murale. Pas meje ndodhet Kisha Nënë, për të cilën folëm edhe më parë, dhe nën të gjendet kripta, të cilën do t’ju çojmë ta vizitoni. Prej këtu nisin të gjitha muralet që shoqërojnë hyrjen në borgun e vjetër të Campomarinos.

Artur Nura: Tani i japim fjalën presidentit të Institucionit të Kulturës.

Zoti Altobello, a mund t’u shpjegoni shikuesve të ABC Neës simbolikën e këtyre muraleve?

Marco Altobello: Po, ndodhemi në Borgon e Pikturuar të Campomarinos, ku janë realizuar rreth tridhjetë murale të kushtuara traditës arbëreshe. Ky mural në veçanti paraqet Valljen, një valle tipike arbëreshe, e njohur në italisht si “ballo tondo”. Është një valle me veshje tradicionale, ku gratë arbëreshe formojnë një lloj rrethi dhe ndërrohen gjatë kërcimit. Është një traditë që ne e ruajmë ende sot.

Artur Nura: Ndër muralet është edhe ai kushtuar Skënderbeut, apo jo?

Marco Altobello: Po, Skënderbeu është një figurë shumë e rëndësishme si për shqiptarët ashtu edhe për arbëreshët. Ai udhëhoqi arbëreshët në ikjen nga osmanët, të cilët më pas mbërritën në brigjet tona, veçanërisht në shekullin XV. Në atë periudhë, Campomarino u godit nga një tërmet i fortë që e shpopulloi vendbanimin dhe më pas u ripopullua nga shqiptarët e udhëhequr nga Skënderbeu.

Artur Nura: Po murali që shohim në fund, çfarë paraqet?

Marco Altobello: Murali në fund paraqet Shën Kristinën, shenjtën mbrojtëse të Campomarinos. Të gjitha muralet e tjera të Borgos së Pikturuar kanë tematikë arbëreshe dhe rikujtojnë rrënjët dhe traditat tona.

Në Campomarino të Molises, një qytet me rrënjë të thella arbëreshe dhe identitet të fortë kulturor, gjuha, tradita dhe kujtesa historike shqiptare vijojnë të mbahen gjallë prej më shumë se pesë shekujsh.

I ftuar në emisionin “Të gjitha Rrugët të Çojnë në Romë”, nënkryetari i bashkisë Michele De Giglio rrëfen për bashkëjetesën harmonike mes komunitetit italian dhe atij arbëresh, rolin e institucioneve lokale në ruajtjen e trashëgimisë kulturore, si dhe përpjekjet për ta kthyer Campomarinon në një qendër turistike dhe kulturore të rëndësishme.

Nga biblioteka “Ibrahim Kodra” dhe enoteka e parë komunale e Molises, deri te Pallati Norante dhe “borgu i pikturuar”, Campomarino shfaqet si një shembull i gjallë i një identiteti që ka mbijetuar pa shtet, por jo pa zë.

Artur Nura: Pse keni zgjedhur ta bëni këtë intervistë pikërisht në këtë vend?
Michele De Giglio: Sepse ky është qendra e kulturës së Campomarinos.

Artur Nura: Ndodhemi në bibliotekën e Campomarinos, e cila mban edhe emrin e Ibrahim Kodrës?
Michele De Giglio: Po, biblioteka e Campomarinos i është kushtuar edhe Ibrahim Kodrës dhe kemi një sallë të dedikuar posaçërisht për të.

Artur Nura: Pra, nuk është një vend i zgjedhur rastësisht.
Michele De Giglio: Jo, aspak. Është një vend i lidhur me kulturën, veçanërisht atë verë-bujqësore.

Artur Nura: Campomarino është një qytet i lidhur me verën?
Michele De Giglio: Po, Campomarino është një qytet me rreth 8.000 banorë, me një thirrje të fortë turistike dhe tradita të rëndësishme në verë dhe vaj ulliri.

Artur Nura: Ideja për këtë laborator vere është e juaja?
Michele De Giglio: Po, kjo është enoteka e parë komunale në rajonin e Molises.

Artur Nura: Kur ka lindur ky projekt?
Michele De Giglio: Projekti ka lindur në vitin 2019.

Artur Nura: Si lindi ideja e enotekës?
Michele De Giglio: Patëm idenë e krijimit të një enoteke brenda bibliotekës komunale, duke shfrytëzuar ambientet ngjitur.

Artur Nura: A mund të na tregoni historinë e projektit?
Michele De Giglio: Projekti lindi disa vite më parë, me synimin për të krijuar një vitrinë të vogël të produkteve tipike të Campomarinos.

Artur Nura: Çfarë produktesh ekspozohen këtu?
Michele De Giglio: Vera e kantinave ekskluzivisht campomarinese dhe gjithashtu vaji i ullirit, sepse ne jemi qyteti i verës dhe i vajit.

Artur Nura: A prodhohen të gjitha këto vera këtu?
Michele De Giglio: Po, janë vetëm produkte të Campomarinos, pra produkte italiane.

Artur Nura: A ndihet prania arbëreshe në këto produkte?
Michele De Giglio: Po, në Campomarino ndihet gjithmonë prania arbëreshe. Jemi me origjinë shqiptare dhe ka shumë sipërmarrës me origjinë shqiptare këtu.

Artur Nura: A jeni arbëresh?
Michele De Giglio: Jo, unë jam italian.

Artur Nura: Si janë marrëdhëniet me komunitetin arbëresh?
Michele De Giglio: Janë shumë të mira, ekzistojnë marrëdhënie të shkëlqyera.

Artur Nura: Sa për qind e punonjësve të bashkisë janë arbëreshë?
Michele De Giglio: Nuk di një përqindje të saktë, por ka ende disa punonjës me origjinë arbëreshe.

Artur Nura: A e keni vizituar ndonjëherë Shqipërinë?
Michele De Giglio: Po, vetëm një herë.

Artur Nura: Dhe pse nuk jeni kthyer më?
Michele De Giglio: Do të kthehemi së shpejti, në varësi të angazhimeve familjare, institucionale dhe të punës.

Artur Nura: A keni më shumë punë gjatë verës?
Michele De Giglio: Po, Campomarino është një qytet turistik. Në dimër jemi rreth 8.000 banorë, ndërsa në verë arrijmë deri në 100.000 turistë.

Artur Nura: Sipas jush, a është e drejtë përvoja e sporteleve dygjuhëshe?
Michele De Giglio: Është shumë e drejtë, sepse ndihmon në ruajtjen e origjinës së qytetit tonë. Është e rëndësishme që të rinjtë të mos humbasin traditën arbëreshe të Campomarinos.

Artur Nura: Doja t’ju pyesja edhe për këtë pallat historik.
Michele De Giglio: Ky është Pallati Norante.

Artur Nura: A mund të bëjmë një xhiro?
Michele De Giglio: Sigurisht, do t’ju shpjegoj shkurtimisht.

Artur Nura: Çfarë gjejmë këtu?
Michele De Giglio: Këtu kemi një institucion turistik-kulturor që na ndihmon në promovimin e turizmit.

Artur Nura: Çfarë përfaqësojnë këto piktura?
Michele De Giglio: Janë piktura të dhuruara nga zonja Corfiati dhe artistë të tjerë, që paraqesin elemente të kulturës arbëreshe dhe të qytetit.

Artur Nura: Tani jemi në Sallën Kodra?
Michele De Giglio: Po, kjo është Salla Kodra, kushtuar Ibrahim Kodrës.

Artur Nura: A e keni njohur personalisht?
Michele De Giglio: Jo, për fat të keq nuk pata këtë nder.

Artur Nura: A janë këto vepra të tijat?
Michele De Giglio: Po, disa piktura janë dhuruar prej tij. Ka edhe flamurin shqiptar, të cilin e respektojmë shumë.

Artur Nura: A përdoret kjo sallë edhe gjatë verës?
Michele De Giglio: Po, falë institucioneve turistiko-kulturore organizojmë vizita të udhëzuara.

Artur Nura: Çfarë u ofroni turistëve?
Michele De Giglio: Përveç plazheve dhe bregdetit të bukur, organizojmë vizita falas në “borgun e pikturuar”, me afreske dhe murale, të shoqëruara nga guidat tona.

Artur Nura: A ka edhe vende të tjera të rëndësishme për t’u vizituar?
Michele De Giglio: Sigurisht. Pak metra më tutje ndodhet kisha amë, e cila ka brenda një kriptë historike që do t’jua tregoj.

Artur Nura: Atëherë, të shkojmë ta shohim.
Michele De Giglio: Po, të shkojmë.

Sekretari i Përgjithshëm i NATO-s, Mark Rutte, tha të mërkurën në Forumit Ekonomik Botëror se është e nevojshme “diplomaci e menduar mirë” për të zgjidhur tensionet rreth Grenlandës, ndërsa njëkohësisht nënvizon meritat e Donald Trumpit për rritjen e shpenzimeve të mbrojtjes ndër aleatët evropianë.

Ndërsa presidenti amerikan Donald Trump udhëtoi drejt Davosit për të promovuar pretendimet amerikane mbi Grenlandën, Rutte përpoq të zhvendoste fokusin nga mosmarrëveshjet territoriale në një vizion më të gjerë të sigurisë, duke thënë se ky diskutim duhet zhvilluar “prapa skenave”.

Rutte u shpreh se pajtohet me Trumpin për rëndësinë strategjike të veriut.

“Kur bëhet fjalë për Arktikun, mendoj se presidenti Trump është i drejtë. Ne duhet të mbrojmë Arktikun nga ndikimi rus dhe kinez”, tha udhëheqësi i aleancës më të fuqishme ushtarake në botë.

Megjithatë, ai theksoi edhe rëndësinë e buxhetit të mbrojtjes. Rutte tha se pa presionin e Trumpit, shumë ekonomi të mëdha evropiane – përfshirë Spanjën, Italinë dhe Belgjikën – nuk do të arrinin objektivin e shpenzimeve prej dy për qind të GDP-së për mbrojtje në vitin 2025.

Ai përmendi gjithashtu Poloninë si një aleat të ngushtë të SHBA-së dhe vuri në dukje sfidat në prodhimin e pajisjeve ushtarake.

Duke iu referuar dyshimeve të Trumpit për gatishmërinë e Evropës për të ndihmuar nën aktivizimin e Nenit 5 të NATO-s (se sulmi mbi një anëtar është sulm mbi të gjithë), Rutte tha se Europa do ta bënte këtë, duke përmendur ndihmën pas 11 shtatorit si shembull.

Ai shtoi se për sigurinë e SHBA-së është e domosdoshme një Arktik, një Atlantik dhe një Evropë të sigurtë.

Me gjithë tensionet rreth Grenlandës – të cilat çuan Trumpin të kërcënonte me tarifa ndaj aleatëve evropianë dhe BE-në të konsiderojë masa kundër – Rutte theksoi se NATO është thelbësore jo vetëm për Evropën, por edhe për çdo mbrojtje të Amerikës.

Abc News Live

Kremlini ka deklaruar se Presidenti rus, Vladimir Putin do të zhvillojë bisedime mbi Ukrainën me të dërguarin e SHBA-së Steve Witkoff ditën e nesërme.

“Nesër, supozohet të takohemi me Putinin”, tha Witkoff.

Ai shtoi se “është pala ruse ajo që kërkoi këtë takim”, duke theksuar se vetë kërkesa ishte “një sinjal i rëndësishëm”.

Ky takim vjen ndërsa udhëheqësit evropianë diskutojnë për një konflikt të mundshëm me Rusinë në Forumin Ekonomik Botëror në Davos.

Ndërkohë Rusia vijon me sulmet në Ukrainë. Dy persona u vranë dhe një grua u plagos gjatë natës në bombardimet ruse të qytetit qendror ukrainas të Krivyi Rih.

Krivyi Rih, vendlindja e Presidentit Volodymyr Zelensky dhe një qendër e madhe e industrisë së hekurit në Evropën Lindore, ndodhet afërsisht 80 kilometra nga vija e frontit dhe ka qenë një objektiv i shpeshtë i sulmeve ruse që nga fillimi i pushtimit në shkurt 2022.

Presidenti amerikan, Donald Trump deklaroi gjatë Forumit Ekonomik të Davosit se sot do të takohet me homologun ukrainas, Volodymyr Zelensky.

Por këshilltari i lartë i Zelensky, tha se presidenti ukrainas ndodhet në Kiev, pasi Rusia ka zhvilluar sulme të reja në kryeqytetin ukrainas.

Ministri ukrainas i Mbrojtjes: Synojmë të vrasim 50 mijë rusë në muaj

“Ukraina synon të vrasë 50,000 rusë në muaj”. Kështu u shpreh ministri i ri i mbrojtjes në vend, Mykhailo Fedorov, gjatë një deklarate për median.

Duke shpalosur planin në rolin e tij të ri, Fedorov tha se kishte dy prioritete, i pari prej të cilëve është “menaxhimi”.

“Menaxhimi duhet të ndërtohet rreth atyre që janë të aftë të arrijnë qëllime të përcaktuara. Nëse njerëzit nuk demonstrojnë rezultate të matshme, ata nuk mund të qëndrojnë në sistem. Objektivi i dytë strategjik është të vriten 50,000 rusë në muaj “, tha ai.

Moska dhe Kievi rrallë i raportojnë zyrtarisht humbjet e tyre. Ukraina vlerëson se viktimat nga ana e Rusisë kanë tejkaluar 1,200,000.

Presidenti amerikan, Donald Trump, njoftoi se nuk do të vendosë tarifat që ishin planifikuar të hynin në fuqi më 1 shkurt për Groenlandwn.

Në një postim në Truth Social, Trump tha se pas një “takimi shumë produktiv” me Sekretarin e Përgjithshëm të NATO-s, Mark Rutte, është krijuar “korniza e një marrëveshjeje të ardhshme për Grenlandën”.

“Bazuar në një takim shumë produktiv që kam zhvilluar me Sekretarin e Përgjithshëm të NATO-s, Mark Rutte, kemi formuar kornizën e një marrëveshjeje të ardhshme në lidhje me Groenlandën dhe, në fakt, me të gjithë Rajonin Arktik. Kjo zgjidhje, nëse finalizohet, do të jetë shumë e favorshme për Shtetet e Bashkuara të Amerikës dhe për të gjitha vendet anëtare të NATO-s. Bazuar në këtë mirëkuptim, nuk do të vendos tarifat që ishin planifikuar të hynin në fuqi më 1 shkurt. Po zhvillohen gjithashtu diskutime shtesë lidhur me “Kupolën e Artë” (The Golden Dome) sa i përket Groenlandës. Informacione të mëtejshme do të bëhen të ditura ndërsa diskutimet përparojnë. Zëvendëspresidenti JD Vance, Sekretari i Shtetit Marco Rubio, i Dërguari i Posaçëm Steve Witkoff dhe të tjerë, sipas nevojës, do të jenë përgjegjës për negociatat, ata do të raportojnë drejtpërdrejt tek unë. Faleminderit për vëmendjen tuaj ndaj kësaj çështjeje!”, shkroi Trump.

Ai bëri me dije se diskutimet mbi çështjen e “Kupolës së Artë” në lidhje me Grenlandën vazhdojnë, ndërsa negociatat do të udhëhiqen nga Zëvendës-Presidenti JD Vance, Sekretari i Shtetit Marco Rubio dhe Përfaqësuesi Special Steve Witkoff, të cilët do t’i raportojnë direkt presidentit.

“Informacione të mëtejshme do të bëhen të disponueshme ndërsa diskutimet vazhdojnë”, përfundoi Trump.

Read More...

Read More...