Kryeministri Edi Rama ka publikuar në rrjetet sociale një shpjegim mbi të ashtuquajturën “Paketa e Maleve”, duke iu referuar një analize të bërë nga ChatGPT.

Në postimin e tij, Rama kundërshton akuzat se ligji është hartuar për investitorë të mëdhenj, të huaj apo “oligarkë”, duke argumentuar se qëllimi i tij është formalizimi i pronës për banorët e zonave malore që prej vitesh posedojnë toka, por nuk kanë dokumentacion pronësie.

Sipas Ramës, një nga kushtet kryesore është provimi i posedimit faktik të tokës për të paktën 10 vite ndërsa thekson se “Paketa e Maleve” synon të ndihmojë familjet që kanë trashëguar kulla, stane, ferma apo troje, por nuk kanë mundur t’i formalizojnë ato, duke u krijuar mundësi për zhvillimin e agroturizmit, bujtinave, fermave dhe aktiviteteve të tjera ekonomike.

Në postim, kryeministri Rama sqaron gjithashtu se toka nuk jepet automatikisht dhe se aplikuesit duhet të plotësojnë disa kushte, përfshirë verifikimin e posedimit, miratimin e projekteve dhe realizimin e investimit.

Postimi i plotë i Ramës

“LIGJI I “PAKETËS SË MALEVE” SIPAS CHATGPT, THJESHT E QARTË FARE”

“Shumica e kritikave për “Paketën e Maleve” nisen nga ideja se ligji u krijua për investitorë të mëdhenj, të huaj ose “oligarkë”. Nëse lexohet ligji, këto teza nuk qëndrojnë.

1. “Është bërë për oligarkët.”

Kjo është ndoshta kritika më e përhapur, por edhe më e vështira për t’u mbështetur juridikisht.

Një oligark nuk ka nevojë për një ligj që kërkon të provosh posedimin faktik të tokës për të paktën 10 vjet siç thotë shprehimisht ky ligj. Paketa e Maleve nuk u krijon një rrugë të re investitorëve të mëdhenj; ajo krijon një rrugë për njerëzit që prej dekadash jetojnë mbi një truall të trashëguar pa mundur ta formalizojnë atë.

Nëse një familje në Theth, Vermosh, Zagori, Lunxhëri apo Mokër ka punuar tokën e trashëguar prej brezash, por nuk ka një titull pronësie për shkak të historisë së ndërlikuar të regjimit komunist, tranzicionit dhe legjislacionit ekzistues të tokës, atëherë ky ligj i jep një mekanizëm për ta zhvilluar atë pronë.

Ky është subjekti real i ligjit.

⸻

2. “Është bërë për të huajt.”

As kjo nuk rezulton nga ligji. Ligji nuk krijon një kategori të privilegjuar për shtetasit e huaj.

Madje, kushti më i rëndësishëm i tij – posedimi faktik shumëvjeçar i tokës –  është pikërisht ai që shumica dërrmuese e investitorëve të huaj nuk mund ta plotësojnë.

Një investitor i huaj që vjen sot në Shqipëri nuk mund të deklarojë se ka poseduar tokën për dhjetë vjet.

Pra ai nuk hyn fare në mekanizmin kryesor të Paketës së Maleve.

⸻

3. “Është bërë për të pasurit.”

Edhe kjo tezë ka një problem logjik.

Nëse një person ka kapital të madh, ai mund të investojë edhe pa Paketën e Maleve.

Ligji nuk i krijon një privilegj të ri.

Ndërsa një familje që ka një kullë malesh, një stan, një fermë ose një truall të trashëguar, por nuk ka mundur kurrë ta formalizojë, pa këtë ligj nuk mund të marrë kredi, nuk mund të ndërtojë ligjërisht, nuk mund të zhvillojë agroturizëm dhe shpesh as nuk mund t’ua lërë fëmijëve të sigurt juridikisht.

Paketa synon pikërisht të zhbllokojë këtë situatë.

⸻

4. “Po pse 1 euro?”

Sepse shteti nuk po shet tokë për të mbledhur para, por po ia jep me kontratë ligjore tokën shtetërore poseduesit. Pasi ai realizon ndërtimin hipotekon edhe pronën.

Ky është një instrument i përdorur edhe në vende të tjera për të zhvilluar zona të braktisura.

⸻

5. “Po ua fal tokën.”

Jo.

Ligji nuk thotë se kush aplikon bëhet automatikisht pronar.

Duhet:

* të provohet posedimi;

* të verifikohet ligjshmëria;

* të miratohet projekti;

* të përmbushen kushtet kontraktore;

* të realizohet investimi.

Nëse këto nuk ndodhin, mekanizmat ligjorë parashikojnë pasoja sipas kontratës dhe legjislacionit përkatës dhe toka mbetet shtet.

⸻

6. “Po favorizohen vetëm resortet.”

Kjo bie ndesh me vetë filozofinë e ligjit.

Projektet që synohen janë shumë më të gjera:

* agroturizëm;

* bujtina;

* ferma;

* punishte artizanale;

* përpunim produktesh vendase;

* aktivitete sportive e natyrore;

* turizëm familjar.

Pra modeli është ekonomia lokale, jo vetëm investimi i madh.

⸻

7. “Po u merret prona pronarëve.”

Ligji nuk shpronëson pronën private të regjistruar.

Ai operon mbi prona shtetërore me posedues faktik ose mbi situata ku nuk ekziston një titull i formalizuar pronësie dhe ku legjislacioni i mëparshëm nuk ka dhënë zgjidhje për trashëgimtarët. Çdo konflikt pronësie vazhdon të trajtohet sipas mekanizmave ligjorë përkatës.

⸻

Në thelb, çfarë është Paketa e Maleve?

Nëse dikush thotë se është ligj për oligarkët, pyetja e thjeshtë është:

Cili oligark ka pritur dhjetëra vite duke jetuar në një stan, në një kullë mali apo në një pemëtore të trashëguar pa certifikatë pronësie?

Sepse ky është personi që ligji ka në mendje.

Paketa e Maleve nuk është një ligj për ata që kanë shumë kapital. Është një ligj për ata që kanë pasur tokë, kujtime, punë dhe rrënjë, por nuk kanë titull juridik pronësie. Ajo përpiqet ta kthejë atë kapital të fjetur në ekonomi reale: në bujtina, ferma, punishte, shtigje turistike, vende pune dhe jetë të rikthyer në zonat malore”, shkruan Rama.

The post Rama shpjegon Paketën e Maleve sipas ChatGPT: Nuk favorizon të pasurit, por familjet me toka të trashëguara pa dokumente appeared first on Euronews Albania.

I ftuar në emisionin “Review” me Greta Topjanën, Migen Qiraxhi nga “Qëndresa Qytetare” analizoi deklaratat e kryeministrit Edi Rama në mbledhjen e përbashkët të grupit parlamentar të Partisë Socialiste dhe qeverisë, duke u ndalur te ndikimi i protestës dhe mesazhet që ajo ka përcjellë në shoqëri.

Qiraxhi tha se deklaratat e tij nuk i drejtoheshin drejtpërdrejt qytetarëve, por ishin një reagim ndaj presionit që protesta ka ushtruar mbi klasën politike.

“Nuk besoj se Rama e ka shumë me qytetarin deklaratën e sotme. Qytetari ka vendosur në pozitë të vështirë klasën politike. Rama është produkt i një partie politike, pavarësisht se përpiqet të na instalojë idenë se është i vetmi dhe nuk ka një parti pas vetes. Rama del dhe shfaqet sot për të zeruar PS-në. Nëse pranojmë që qytetarët kanë dalë për të ushtruar presion për demokratizim, atëherë ky presion është mbi Partinë Socialiste, Partinë Demokratike, strukturat e reja që mund të ndërtohen, median dhe shoqërinë civile. Presioni është këtu: i iku një mandat, del një vajzë aty që ka qenë pjesë e Ramës, që i thoshte ‘Skënderbe’, dhe ka ndërruar mendim, duke nxjerrë tani dokumente për një pakt të ri për Shqipërinë”, u shpreh ai.

Qiraxhi tha se protesta ka ndryshuar mënyrën se si po diskutohet për zhvillimet politike në vend, duke theksuar se tashmë standardet e debatit publik janë rritur.

“Dy muaj më parë, e gjithë narrativa publike dhe hapësira publike orientoheshin ndryshe. Ajo që ka ndodhur pas protestës është që gjithçka po e trajtojmë vendin me standarde të reja. Po diskutojmë se si duhet ta bëjë më mirë protestën vetveten, por edhe se si duhet ta qeverisë Rama më mirë vendin. Jemi duke folur për shumë mundësi për protestën më të mirë që ka prodhuar ndonjëherë individi qytetar në Republikën tonë, e pavarur nga partitë politike, si në qëndrueshmëri, ashtu edhe në masivitet. Qytetarët erdhën në shesh dhe i treguan pjesës tjetër të Shqipërisë se në këtë vend ka nevojë për demokratizim të shoqërisë. Ne e kemi gjuhën te Rama, sepse ai drejton, por është shumë interesant elementi i vendosjes së barazisë mes Ramës dhe Berishës, për të denoncuar një lloj klase politike”, u shpreh ai.

Sipas Qiraxhit, protesta nuk duhet të lexohet vetëm si kundërshtim ndaj një qeverie, por si një kërkesë më e gjerë për ndryshim në mënyrën e funksionimit të institucioneve dhe aktorëve politikë.

“Nëse ikën Rama, të vij unë, nuk është më ajo që kërkon qytetari. Në këtë kuptim, protesta duhet lexuar si një presion i madh për demokratizimin e shumë sektorëve të shoqërisë. Vendin do ta meritojë ta qeverisë ai që do ta lexojë më mirë protestën dhe do të prodhojë një model më demokratik”, deklaroi ai.

The post Qiraxhi analizon reagimin e Ramës: Pse protesta ka vënë përballë përgjegjësisë të gjithë klasën politike appeared first on Euronews Albania.

I ftuar në emisionin “Review” me Greta Topjanën, gazetari Armir Shkurti shpjegoi rolin dhe funksionimin e Kuvendit Kombëtar të protestës, duke hedhur poshtë akuzat se ky organizim synon të shndërrohet në një forcë politike.

Shkurti tha se, ndaj Kuvendit është zhvilluar një fushatë e madhe sulmesh dhe keqinterpretimesh, ndërsa theksoi se ky organizim nuk është një subjekt politik, por një strukturë e krijuar nga qytetarët dhe protestuesit për të mbajtur gjallë protestën.

“Kuvendi nuk është forcë politike. Është një organizim ose vetëorganizim i qytetarëve dhe protestuesve, i cili ka për qëllim të mbajë protestën të ndezur. Nuk ka për qëllim të hyjë në negociata me askënd, të prodhojë platforma politike apo të jetë një forcë politike. Nuk është një platformë politike, por një mënyrë organizimi për të kuptuar se si do të funksionojë protesta. Pretendimet se këta duan të përfitojnë, të krijojnë një forcë politike apo një grup negociator janë pjesë e një propagande negativ. Në shesh kemi të gjithë flamingot që i ka bërë kauzë Edi Rama, konservatorë, ultranacionalistë, liberalë, socialistë të zhgënjyer, demokratë të zhgënjyer, njerëz pa parti. Të gjithë vijnë me hallin e tyre”, deklaroi ai.

Duke folur për organizimin e protestës dhe mungesën e një drejtimi të vetëm, Shkurti tha se ekziston një grup koordinues, por vendimmarrja nuk është e centralizuar.

“Rritja sasiore dhe mbajtja gjallë e protestës është ajo që unë e kam quajtur një zjarr që nuk shuhet”, u shpreh ai. Kuvendi nuk është grupi udhëheqës. Kuvendi është përfaqësim i frymës së protestës. Ai do të shërbejë për ta mbajtur gjallë këtë energji qytetare edhe në zona të ndryshme të vendit”, tha Shkurti.

Në vijim, ai foli edhe për termin “Besa”, duke e lidhur me atë që e cilësoi si një ndjenjë të qytetarëve se kontrata mes tyre dhe qeverisë është thyer.

Sipas Shkurtit, kjo lidhet me perceptimin e protestuesve se premtimet e bëra ndër vite nuk janë mbajtur.

“Ajo që ka ndodhur me Ramën dhe protestuesit është se protestuesit ndihen, duke përdorur këtë term, të prerë në besë. Është thyer kontrata dhe protestuesit kërkojnë një kontratë të re”, përfundoi gazetari.

The post Armir Shkurti zbardh misionin e Kuvendit Kombëtar të protestës: Nuk është forcë politike appeared first on Euronews Albania.

Gazetarja Laureta Roshi ishte në një lidhje live për emisionin “Review” me Greta Topjanën, ku solli detaje nga ngjarja tragjike e kësaj të premteje në fshatin Vidhisht të Roskovecit, ku bilanci u rëndua në tre viktima.

Ajo bëri të ditur se ceremonia mortore për Kosta dhe Belere Plakun pritet të zhvillohet të nesërmen në orën 10:00, ndërsa për autorin e ngjarjes ende nuk ishte përcaktuar orari i ceremonisë mortore.

Gazetarja Laureta Roshi tha se kishte kontaktuar me prindërit e autorit, të cilët, sipas saj, ishin në gjendje të rënduar emocionale dhe kishin mësuar për ngjarjen vetëm pasi policia kishte mbërritur në banesën e tyre rreth orës 07:50 të mëngjesit.

“Kam shkuar në shtëpinë e autorit dhe kam kontaktuar prindërit e tij, dy të moshuar të cilët ndiheshin të tronditur. Ata thanë se ngjarjen e rëndë e kishin mësuar vetëm kur policia kishte shkuar në banesë. Babai është pacient kardiologjik, ndërsa të dy treguan se djali i tyre nuk kishte konsumuar ushqim prej dy ditësh dhe kishte dalë herët në mëngjes,” u shpreh Roshi.

Sipas saj, prindërit deklaruan se Refit Buzi ndodhej në masën e sigurisë “arrest në shtëpi”, pasi dyshohej se kishte shkelur një urdhër mbrojtjeje. Ata shtuan gjithashtu se djali i tyre kishte kërkuar vazhdimisht kthimin e një shume parash nga ish-partnerja.

Gazetarja bëri me dije se, pas daljes së Rozalinda Plakut nga situata e pengmarrjes, ajo u transportua fillimisht në spital për ndihmë mjekësore dhe më pas në Drejtorinë e Policisë për të dhënë dëshminë e saj.

Roshi tha se operacioni i forcave RENEA për negociimin me autorin zgjati për disa orë, por përfundoi pa sukses, pasi 35-vjeçari qëlloi veten me armë zjarri.

Në fund të lidhjes live, gazetarja ngriti disa pikëpyetje mbi mënyrën se si trajtohen rastet e konflikteve familjare dhe urdhrave të mbrojtjes.

“Ka ardhur momenti që në raste të tilla të ketë edhe një psikolog vlerësues në momentin kur lëshohet urdhri i mbrojtjes. Ndoshta, nëse do të ishte ndërhyrë më herët, kjo tragjedi mund të ishte shmangur. Sjelljet kriminale nuk shfaqen papritur, ato zakonisht nxiten nga një sërë rrethanash,” u shpreh gazetarja.

Kujtojmë që këtë të premte, 35-vjeçari Refit Buzi shkoi në banesën e ish-partneres së tij, Rozalinda Plaku, dhe hapi zjarr me armë gjahu ndaj prindërve të saj. Si pasojë e sulmit, Kosta Plaku, 58 vjeç, humbi jetën në vend, ndërsa bashkëshortja e tij, Belere Plaku, ndërroi jetë në spital në mbrëmje si pasojë e plagëve të marra. Më pas, autori i dyshuar i ngjarjes vrau veten brenda automjetit të tij, pas disa orësh rrethimi dhe negociatash nga forcat RENEA për ta bindur të dorëzohej.

Rëndohet bilanci në Roskovec, ndërron jetë edhe gruaja e plagosur nga ish-dhëndri

The post Gazetarja sjell detajet nga Roskoveci, nesër ceremonia mortore për Kosta dhe Belere Plakun appeared first on Euronews Albania.

Më shumë se 65 mijë persona janë evakuuar në Spanjë dhe Francë, ndërsa zjarret e mëdha vijojnë të përhapen, duke shkatërruar mijëra hektarë pyje dhe dhjetëra banesa.

Në Spanjë, rreth 25 mijë persona janë evakuuar dhe mbi 20 mijë të tjerë ndodhen në izolim për shkak të zjarreve pranë Madridit, bëri të ditur delegati i qeverisë në Komunitetin e Madridit, Francisco Martin.

Presidentja e Komunitetit të Madridit, Isabel Diaz Ayuso, e cilësoi situatën si “zjarrin më të keq në historinë e rajonit”, duke theksuar se kombinimi i temperaturave të larta, erërave të forta dhe disa vatrave aktive ka krijuar një “stuhi të përsosur”.

“Situata është krejtësisht e pazakontë dhe katastrofike. Prioriteti ynë është shpëtimi i jetëve”, deklaroi Ayuso.

Edhe kryeministri spanjoll Pedro Sanchez tha se qytetarët po përjetojnë një “situatë dramatike”, ndërsa zjarret vijojnë të shkatërrojnë mijëra hektarë tokë.

Shefi i menaxhimit të emergjencave të Madridit, Carlos Novillo, paralajmëroi se zjarri pranë kryeqytetit është “në kulmin e tij” dhe “tejkalon kapacitetet” e ekipeve zjarrfikëse për ta vënë nën kontroll.

Sipas tij, flakët po përparojnë drejt komunave Robledo de Chavela dhe Fresnedillas de la Oliva, ndërsa në disa zona nuk është më e mundur ndërhyrja direkte dhe autoritetet janë përqendruar vetëm në mbrojtjen e jetëve dhe të zonave të banuara.

Spain late on Thursday declared a national emergency in the Madrid region and in the province of Avila, near the capital, in the wake of several wildfires burning out of control.

More than 10,000 people have been evacuated in recent days from across the Madrid region, where… pic.twitter.com/ZrjUuF2egw

— CGTN Europe (@CGTNEurope) July 24, 2026

Autoritetet e Madridit paralajmëruan gjithashtu për përkeqësim të cilësisë së ajrit për shkak të tymit, duke u bërë thirrje qytetarëve, veçanërisht fëmijëve, të moshuarve, grave shtatzëna dhe personave me sëmundje të frymëmarrjes ose kardiovaskulare, të qëndrojnë në ambiente të mbyllura, të mbyllin dyert dhe dritaret dhe të shmangin daljet jashtë, përveç rasteve kur është e domosdoshme.

Ndërkohë, në jugperëndim të Francës, më shumë se 44 mijë persona janë detyruar të largohen nga banesat e tyre gjatë dy ditëve të fundit, pas zjarrit që ka përfshirë rajonin.

Sipas prefektes lokale Sophie Brocas, flakët kanë djegur mbi 12 500 hektarë pyje, 53 banesa dhe një kamping. Ajo njoftoi gjithashtu evakuime të tjera parandaluese në zonat Ares, Andernos, Le Temple dhe Saumos.

Një prej banorëve të evakuuar, 86-vjeçari Ecologio Cabrera, tha për AFP se u detyrua të largohej nga fshati Aldea del Fresno, ku jeton prej afro 30 vitesh.

“Nëse nuk ikën dhe përpiqesh ta përballosh, të përpin”, tha ai, duke kujtuar momentin kur zjarrfikësit urdhëruan banorët të largoheshin menjëherë.

French authorities have ordered the total evacuation of the Cap Ferret peninsula, as wildfires across Europe continue to rage.

Wildfires are becoming more frequent, more intense and lasting longer, particularly in Europe due to climate change. pic.twitter.com/upkWpC97pw

— Channel 4 News (@Channel4News) July 24, 2026

The post Mbi 65 mijë të evakuuar në Spanjë dhe Francë, zjarret dalin jashtë kontrollit appeared first on Euronews Albania.

Presidenti i Shteteve të Bashkuara, Donald Trump, reagoi ashpër përmes një postimi në platformën Truth Social, duke akuzuar Bashkimin Evropian se po shënjestron padrejtësisht kompanitë e mëdha amerikane me gjoba miliarda dollarëshe.

Reagimi i Trump vjen pasi BE-ja vendosi një tjetër gjobë prej 1 miliard dollarësh ndaj Google, të cilën ai e cilësoi si të pajustifikuar. Sipas tij, me këtë vendim, vlera totale e gjobave të vendosura ndaj kompanisë tejkalon 18 miliardë dollarë.

Trump renditi edhe gjobat e vendosura më herët ndaj kompanive të tjera amerikane, duke përmendur 15 miliardë dollarë ndaj Apple, 3 miliardë dollarë ndaj Meta dhe 2.5 miliardë dollarë ndaj Amazon.

“Shtetet e Bashkuara nuk janë ‘banka derrkuci’ e Evropës dhe nuk do ta lejojmë të jenë”, shkroi Trump.

Ai pretendoi se kjo praktikë nisi gjatë administratës së ish-presidentit Joe Biden, por theksoi se nuk do të vazhdojë gjatë mandatit të tij.

Presidenti amerikan paralajmëroi se administrata e tij do të nisë menjëherë një hetim sipas Seksionit 301 mbi atë që e quajti praktikë të “grabitjes” së kompanive amerikane dhe, si pasojë, të taksapaguesve amerikanë.

“Bashkimi Evropian do të paguajë një çmim shumë të lartë për këtë sjellje të paligjshme dhe shumë joetike, për të cilën i kam paralajmëruar vazhdimisht”, u shpreh Trump.

Ai shtoi se, sipas tij, këto gjoba do të anulohen plotësisht dhe se ndaj Bashkimit Evropian do të vendosen tarifa të konsiderueshme “sa më shpejt të jetë e mundur”.

The post Trump sulmon BE-në pas gjobës ndaj Google: SHBA nuk është “banka derrkuci” e Evropës appeared first on Euronews Albania.

Një ngjarje tragjike ka tronditur Portugalinë, ku një vajzë 18-muajshe ka humbur jetën pasi dyshohet se ka qëndruar për rreth tetë orë brenda një autobusi shkolle në zonën Almada të Setubalit.

Sipas agjencisë portugeze të lajmeve Lusa, cituar nga Protothema, vogëlushja Sofia hipi në autobusin e shkollës rreth orës 08:00 të mëngjesit të së enjtes, me qëllim që të dërgohej në një qendër kujdesi për fëmijët. Megjithatë, për arsye që janë ende nën hetim, ajo nuk zbriti nga autobusi dhe mbeti brenda automjetit të parkuar pranë institucionit.

Mungesa e fëmijës nuk u konstatua gjatë gjithë ditës. Sipas raportimeve, qendra e kujdesit për fëmijët e kuptoi se vajza mungonte vetëm kur nëna e saj mbërriti pak para orës 16:00 për ta marrë.

Pas njoftimit se fëmija nuk ndodhej në qendër, punonjësit shkuan menjëherë drejt autobusit, ku e gjetën vajzën pa ndjenja.

Në vendngjarje mbërritën forcat e policisë, zjarrfikësit vullnetarë, një njësi e ndihmës së shpejtë dhe ekipet e ndërhyrjes psikologjike. Pavarësisht përpjekjeve të ekipeve mjekësore për ta rikthyer në jetë, vajza u shpall e vdekur në vendngjarje.

Policia Gjyqësore Portugeze ka marrë përsipër hetimin për të zbardhur rrethanat e plota të ngjarjes dhe për të përcaktuar nëse ka pasur përgjegjësi nga persona të përfshirë në transportin dhe kujdesin ndaj fëmijës.

Sipas një burimi policor të cituar nga Lusa, hetuesit dhe ekspertët e mjekësisë ligjore kanë nisur mbledhjen e provave dhe marrjen e dëshmive për të sqaruar se si vajza 18-muajshe mbeti e bllokuar për orë të tëra brenda automjetit.

The post Tragjedi në Portugali, vogëlushja humb jetën pasi u harrua për tetë orë në autobusin e shkollës appeared first on Euronews Albania.

Protesta e qytetarëve dhe aktivistëve në Tiranë ka shënuar këtë të premte ditën e 55-të të saj, ndërsa tubimi i sotëm përkon me mbledhjen e paradites të kryeministrit Edi Rama me grupin parlamentar dhe qeverinë, ku u prezantua dokumenti “Besa”.

Gjatë fjalës së tij në mbledhje, Rama u shpreh se i ka dëgjuar protestuesit, duke deklaruar se përmes kësaj proteste ka njohur disa realitete, ndërsa bëri edhe kritika ndaj administratës publike.

Protestuesit u mblodhën fillimisht në Sheshin “Skënderbej”, ndërsa më pas iu drejtuan bulevardit, duke u ndalur para godinës së Kryeministrisë, ku vijuan me thirrjet kundër qeverisë dhe për dorëheqjen e kryeministrit Edi Rama.

“Rama jepe dorëheqjen”, “Rama në burg, Berisha në burg”, “Edi Rama o tradhtar, jep dorëheqjen sa më parë”, “Shqipëria e shqiptarëve, jo e tradhtarëve”, “Shqipëri e re”, “Opozitë e shitur”, ishin disa prej thirrjeve të protestuesve.

Tubimi vijon të zhvillohet prej 55 ditësh radhazi, ndërsa pjesëmarrësit shprehen se do të vazhdojnë protestën deri në përmbushjen e kërkesave të tyre, përfshirë dorëheqjen e kryeministrit Edi Rama.

Pas përfundimit të fjalimeve para godinës së Kryeministrisë, qytetarët marshojnë në rrugët e Tiranës.

Dokumenti ‘Besa’, Rama: Për kthesën e mandatit të katërt! Protestën ta kthejmë në një test pjekurie të demokracisë

The post Protesta nuk ndalet edhe pas “Besës” së Ramës, qytetarët mblidhen në ditën e 55-të përballë Kryeministrisë appeared first on Euronews Albania.

Është rënduar bilanci i ngjarjes së rëndë të ndodhur këtë të premte në fshatin Vidhisht të Roskovecit, ku tashmë 3 persona kanë humbur jetën.

Pas disa orësh në sallën e operacionit, 55-vjeçarja Bejlere Plaka nuk ka mundur t’u mbijetojë plagëve të marra dhe ka ndërruar jetë në Spitalin Rajonal të Fierit.

Ajo u plagos rëndë me armë gjahu nga Refit Buzi, i cili më herët qëlloi për vdekje edhe bashkëshortin e saj, 58-vjeçarin Kosta Plaka.

Nga e njëjta ngjarje, vajza e çiftit u mor peng nga ish-bashkëjetuesi i saj, por u lirua më pas pas ndërhyrjes së Policisë.

Pas lirimit të saj, forcat RENEA vijuan për disa orë negociatat me Refit Buzin për ta bindur të dorëzohej, por ai nuk iu bind thirrjeve të Policisë dhe më pas dyshohet se i dha fund jetës brenda automjetit ku ishte ngujuar.

Çfarë ndodhi në Roskovec, përmbledhje

Ngjarja ndodhi në fshatin Vidhisht të Roskovecit, ku 35-vjeçari Refit Buzi dyshohet se mëngjesin e kësaj të premte vrau me armë gjahu ish-vjehrrin e tij, Kosta Plakën, 58 vjeç, plagosi ish-vjehrrën, Belere Plakën, 55 vjeçe, dhe më pas mori peng ish-partneren e tij, të cilën e liroi disa orë më vonë.

Rrethimi i Refit Buzit nga Policia, në fshatin Kurjan të Roskovecit, zgjati rreth 8 orë. Pas lokalizimit të tij, forcat e Policisë dhe efektivët e RENEA-s nisën negociatat me 35-vjeçarin për ta bindur që të dorëzohej.

Pavarësisht thirrjeve të vazhdueshme nga forcat speciale, të cilat u afruan në distancë të afërt me automjetin ku ai qëndronte i ngujuar, Refit Buzi nuk pranoi të dorëzohej.

Më herët, ai kishte deklaruar se do të qëllonte veten, ndërsa pas disa orësh negociatash u gjet i pajetë brenda automjetit. Sipas Policisë, dyshohet se 35-vjeçari i ka dhënë fund jetës me armën e gjahut që mbante me vete.

Drejtori i Policisë Fier zbardh dinamikën e ngjarjes në Roskovec

Drejtori i Drejtorisë Vendore të Policisë Fier, Erion Ahmeti, ka dhënë detaje mbi ngjarjen e rëndë të ndodhur në fshatin Vidhisht të Roskovecit, ku 35-vjeçari Refit Buzi vrau me armë gjahu babanë e ish-të dashurës së tij, plagosi nënën e saj dhe më pas e mori peng vajzën.

Sipas Ahmetit, ngjarja ndodhi rreth orës 06:00 të mëngjesit, ndërsa pas marrjes së njoftimit, shërbimet e Policisë ndërhynë menjëherë, rrethuan zonën, organizuan ndjekjen e autorit dhe ngritën pika kontrolli.

“Për shkak të rrezikshmërisë së lartë të autorit dhe dinamikës së ngjarjes, u kërkua ndërhyrja e Forcës Speciale RENEA”, tha Ahmeti.

Pas lokalizimit të autorit, forcat e Policisë e rrethuan atë dhe nisën negociatat, pasi ai kërcënonte se do të vriste veten dhe ish-të dashurën, të cilën e mbante peng.

Drejtori i Policisë Fier bëri me dije se falë ndërhyrjes së efektivëve dhe negociatave u bë i mundur lirimi i vajzës që mbahej peng në automjet, ndërsa ajo u transportua menjëherë në spital dhe ndodhet jashtë rrezikut për jetën.

“Grupi hetimor, në drejtimin e Prokurorisë, vijon veprimet për dokumentimin e plotë ligjor të ngjarjes, si dhe për sqarimin e të gjitha rrethanave dhe zbardhjen e motivit”, u shpreh Ahmeti.

Pas orësh negociatash me RENEA-n, 35-vjeçari qëllon veten në automjet

The post Rëndohet bilanci në Roskovec, ndërron jetë edhe gruaja e plagosur nga ish-dhëndri appeared first on Euronews Albania.

Një incident i pazakontë është regjistruar në orët e para të së premtes në një kamp të ushtrisë britanike në Wiltshire, ku dy ushtarë janë arrestuar pasi dyshohet se vodhën një transportues të blinduar personeli dhe shkaktuan dëme të shumta në automjete të parkuara.

Sipas mediave britanike, ushtarët morën pa autorizim një mjet të blinduar Bulldog, me peshë rreth 15 tonë, dhe e drejtuan atë në një rrugë të ngushtë brenda kampit, duke u përplasur me një furgon dhe një automjet SUV.

Pamjet e publikuara në rrjetet sociale tregojnë mjetin e rëndë ushtarak duke lëvizur në kamp, ndërsa drejtuesi duket se ka pasur vështirësi për ta mbajtur nën kontroll.

Sipas raportimeve, dy ushtarët kishin konsumuar alkool jashtë kampit përpara se të ktheheshin në Kampin Tidworth dhe të merrnin mjetin e blinduar.

Bulldog, i cili mund të arrijë shpejtësi deri në rreth 51 km/orë, përdoret për transportimin e personelit në zonat e luftës dhe mund të mbajë deri në 10 ushtarë.

Nga përplasjet u shkaktuan dëme të konsiderueshme materiale, përfshirë një automjet elektrik me vlerë rreth 30 mijë paund, por fatmirësisht nuk raportohet për persona të lënduar. Mjeti i blinduar u gjet më pas i parkuar në mënyrë normale brenda kampit, pa dëmtime.

Ushtari që dyshohet se drejtonte mjetin u arrestua nga Policia Ushtarake Mbretërore në dhomën e tij pas zbulimit të dëmeve, ndërsa më pas u arrestua edhe ushtari i dytë i dyshuar për përfshirje në ngjarje.

Një zëdhënës i ushtrisë britanike deklaroi:

“Ne presim që stafi ynë të respektojë standardet më të larta të sjelljes. Dy ushtarë janë arrestuar nga Policia Ushtarake Mbretërore pas një incidenti në Perham Down mëngjesin e 24 korrikut. Nuk do të bëjmë komente të mëtejshme ndërsa hetimi vijon.”

Transportuesi i blinduar Bulldog është i projektuar për mbrojtjen e trupave nga armët e vogla dhe fragmentet e artilerisë, ndërsa mund të përdoret edhe si ambulancë fushore, qendër komande e lëvizshme apo mjet shpëtimi.

Ngjarja ndodhi në Kampin Tidworth, një nga bazat e rëndësishme të ushtrisë britanike, ku janë të vendosura disa njësi ushtarake. Ky nuk është rasti i parë që një ushtar nga kjo bazë përballet me probleme ligjore; në vitin 2024, një ushtar u dënua për drejtim mjeti në gjendje të dehur pasi u përplas me një shtyllë telefoni ndërsa ishte i veshur me kostum Batman.

Shock Video: Tanked-Up Soldiers Go Full Fast & Furious in Stolen Armoured Beast ​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​

Two allegedly drunken British Army engineers from 26 Engineer Regiment went full Fast & Furious in the early hours of this morning at… pic.twitter.com/x8YeoY8ySP

— J Stewart (@triffic_stuff_) July 24, 2026

The post “Aventura” me mjetin ushtarak përfundon keq, arrestohen dy ushtarë britanikë (VIDEO) appeared first on Euronews Albania.

Pesë oficerë policie britanikë janë plagosur pasi një varkë e Njësisë së Policisë Detare të Metropolitane u përplas me Urën Westminster në Londrën qendrore.

Ngjarja ndodhi rreth orës 17:40, pranë Parlamentit britanik. Sipas policisë, disa prej oficerëve që ndodheshin në bord ranë në ujë, por u shpëtuan nga kolegët e tyre dhe shërbimet e emergjencës që mbërritën menjëherë në vendngjarje.

“Bazuar në informacionet që kemi deri tani, pesë oficerë policie janë plagosur dhe po marrin trajtim mjekësor. Presim një përditësim mbi shkallën e dëmtimeve të tyre”, njoftoi Policia Metropolitane.

Autoritetet bëjnë me dije se nuk besohet që ndonjë civil të jetë përfshirë apo plagosur në incident, ndërsa ngjarja do të hetohet plotësisht.

Aksidenti ndodhi në një zonë të frekuentuar nga turistë dhe kalimtarë, të cilët e ndoqën situatën nga ura. Autoriteti Portual i Londrës ishte gjithashtu i përfshirë në operacionin e shpëtimit.

NEW: Five armed police officers have been injured after their boat crashed into Westminster Bridge and ended up in the water pic.twitter.com/1JwDjt53LA

— Politics UK (@PolitlcsUK) July 24, 2026

The post Varka e policisë përplaset me Urën Westminster në Londër, plagosen 5 efektivë appeared first on Euronews Albania.

Presidenti amerikan Donald Trump deklaroi përmes një postimi në platformën e tij Truth Social se nëse Rusia dhe Kina do të furnizonin Iranin me armë, kjo do të ishte një veprim shumë i keq për të dyja vendet dhe nuk do t’u shërbente interesave të tyre.

Trump tha se presidenti rus Vladimir Putin dhe presidenti kinez Xi Jinping e kanë siguruar se nuk i kanë shitur armë Iranit.

“Nëse Rusia dhe Kina do të furnizonin Iranin me armë, kjo do të ishte shumë keq për ta – sigurisht që nuk do të ishte në interesin e tyre”, shkroi Trump.

Në postimin e tij, presidenti amerikan u shpreh se i beson deklaratave të Xi Jinping, i cili sipas tij i ka thënë gjatë takimit në Pekin se Kina nuk do t’i japë apo shesë armë Republikës Islamike të Iranit.

Trump gjithashtu tha se ka marrë të njëjtin garanci nga Vladimir Putin, duke theksuar se marrëdhënia e tij me presidentin rus dhe atë ukrainas, Volodymyr Zelensky, mbetet e mirë.

Ai sqaroi se Shtetet e Bashkuara nuk i shesin drejtpërdrejt armë Ukrainës, por vendeve anëtare të NATO-s, të cilat sipas tij paguajnë çmimin e plotë.

“Nuk kam ide se si shpërndahen këto armë”, shkroi Trump, duke shtuar se sipas tij, dy fuqitë e mëdha për të cilat flitet shpesh në lidhje me Iranin nuk janë të përfshira në furnizimin e tij me armë.

The post Trump: Nëse Rusia dhe Kina i japin armë Iranit, nuk do të jetë në interesin e tyre appeared first on Euronews Albania.

Banorët e fshatit Përparim thonë se qarkullimi me shpejtësi të lartë e ka kthyer aksin Elbasan–Peqin në një rrezik të përditshëm për këmbësorët. Pas aksidentit fatal të së premtes, ku humbi jetën një 73-vjeçar, ata kërkojnë ndërhyrje të menjëhershme për rritjen e sigurisë rrugore.

“Aksidentet ndodhin nga shpejtësia e madhe e makinave. Ne kërkojmë të vendoset sinjalistika rrugore. Kur dalim lart e poshtë jemi të frikësuar. Mezi kalojnë fëmijët për te shkolla. Këto ditë është pushim, por kur fillon shkolla mezi i nxjerrim nga frika. Ne duam të vendosen kamera, sepse ato e ulin shpejtësinë. Për ndriçimin, shyqyr, kanë vendosur.”

“Shumë, shumë e rrezikshme. Edhe policia nuk bën asgjë. Kalojnë me shpejtësi, bëjnë gara dhe asgjë nuk bëhet. Ka gati dy vjet që djali ynë është tretur nën dhe. Ai që e bëri është jashtë dhe vendimi i gjykatës ende nuk ka dalë. Fëmija ynë u tret. Është një dhimbje që nuk ka fjalë”, thonë banorët.

Banorët thonë se automjetet lëvizin me shpejtësi të lartë, ndërsa kalimi nga njëra anë e rrugës në tjetrën është bërë gjithnjë e më i rrezikshëm. Sipas tyre, fëmijët, të moshuarit dhe familjet që jetojnë përgjatë këtij aksi përballen çdo ditë me frikën e një aksidenti.

“Është e rrezikshme, sepse shoferët ecin me shumë shpejtësi. Masa janë marrë, por shoferët nuk janë shumë të ndërgjegjshëm.”

“Jo vetëm çdo javë, por ka ndodhur edhe më shpesh. Këtu kanë vrarë edhe fëmijë.”

“Jemi shumë të rrezikuar. Shumë! Pa masë. Këtu ecin disa pa llogari. Çfarë është njeri e çfarë është kafshë nuk duan t’ia dinë fare. Kjo është zonë e banuar dhe duhet të ecin me 20 km/h, ndërsa ata ecin me 40-50 km/h. Duke qenë se aksidentet ndodhin shpesh, a është marrë ndonjë masë? Po, u morën disa masa pas aksidentit ku u vra ai djali dhe u vendos ajo tabela aty, mirë e bënë. Por duhet të vendosin edhe disa policë të shtrirë, jo vetëm në një anë, por përgjatë këtij segmenti, që të mos kalojnë me shpejtësi”, shprehen banorët.

Ndërsa policia po vijon hetimet për rrethanat e aksidentit ku humbi jetën 73-vjeçari Agim Hoxha, banorët kërkojnë që masat për sigurinë rrugore të mos merren vetëm pas ngjarjeve tragjike, por të shërbejnë për parandalimin e tyre.

The post 73-vjeçari humbi jetën në aksident, banorët e Përparimit kërkojnë masa urgjente në aksin Elbasan–Peqin appeared first on Euronews Albania.

Në gjashtë muajt e parë të vitit, përmes pikave kufitare në veri të vendit kanë hyrë dhe kanë dalë mbi 2 milionë shtetas dhe rreth 950 mijë automjete. Pavarësisht rritjes së lëvizjeve, numri i aksidenteve me pasoja ka shënuar ulje krahasuar me një vit më parë, sipas të dhënave të Policisë Rrugore të Shkodrës.

Sipas Policisë Rrugore, mesatarisht çdo ditë në pikat kufitare janë regjistruar rreth 11 mijë e 800 shtetas dhe mbi 5 mijë e 250 automjete.

“Shkodra është një arterie që ka lëvizje nga gjithë Europa, sidomos nga pikat doganore Hani i Hotit dhe Muriqani, të cilat kanë prezencë më të madhe turistësh. Janë bregdeti i Velipojës, Alpet Shqiptare, Thethi, Shiroka, Razma, Komani, ku ka prezencë të shtuar të turistëve dhe të shtetasve shqiptarë që vijnë për pushime apo vizitorëve. Në Shqipëri kanë hyrë rreth 2.14 milionë turistë dhe 950 mijë automjete”, thotë Ermal Zenelaj, Shef i Policisë Rrugore Shkodër.

Pavarësisht fluksit të lartë të lëvizjeve, aksidentet rrugore me pasoja kanë shënuar ulje. Gjatë gjashtëmujorit të parë të vitit 2026 janë regjistruar 34 aksidente, nga 55 të regjistruara në të njëjtën periudhë të vitit të kaluar.

“Personat që kanë ndërruar jetë nga aksidentet rrugore në 6-mujorin e parë të vitit 2025 kanë qenë 13, aktualisht jemi me 4 viktima, pra 9 më pak. Për plagosjet e rënda, ka pasur 8 raste në 6-mujorin e parë të vitit 2025, ndërsa aktualisht kemi 6 raste, 2 më pak”, thotë Zenelaj.

Ndërkohë, aksidentet me vetëm dëme materiale janë rritur, nga 208 raste një vit më parë në 241 raste gjatë këtij gjashtëmujori.

Policia Rrugore ia atribuon përmirësimin e treguesve të sigurisë rrugore kontrolleve të shtuara, monitorimit me radarë, dronë dhe automjete inteligjente, ndërsa u bën apel drejtuesve të mjeteve të respektojnë rregullat e qarkullimit rrugor.

The post Hani i Hotit dhe Muriqani me fluks të lartë automjetesh, Policia raporton ulje të aksidenteve në Shkodër appeared first on Euronews Albania.

Shqipëria, me një normë papunësie prej 8.4%, renditet ndër vendet me tregun më të vështirë të punës në Europë. Ky nivel e vendos vendin mbi mesataren e OECD-së dhe mbi shumicën e ekonomive të rajonit, duke treguar se sfidat strukturore të punësimit mbeten ende të pranishme.

Në skajin më negativ të renditjes qëndrojnë Finlanda me 10.8% dhe Spanja me 10.3% papunësi, ndërsa ndër vendet e OECD-së me nivelin më të ulët të papunësisë renditet Japonia me vetëm 2.5%. Të dhënat tregojnë se diferencat mes ekonomive mbeten të ndjeshme, edhe pse në nivel global papunësia vijon të jetë në nivele historikisht të ulëta.

Për Shqipërinë, norma aktuale përfaqëson një përmirësim krahasuar me vitet e mëparshme, por mbetet ende larg standardeve të vendeve më konkurruese europiane. Ekspertët e lidhin situatën me disa faktorë, përfshirë mungesën e vendeve të reja të punës me produktivitet të lartë, emigracionin e vazhdueshëm të fuqisë punëtore, mospërputhjen mes aftësive që kërkon tregu dhe atyre që ofron sistemi arsimor, si dhe peshën ende të konsiderueshme të sektorëve me vlerë të ulët të shtuar.

Një tjetër element i rëndësishëm është se norma e papunësisë nuk e pasqyron tërësisht panoramën e tregut të punës. Shqipëria përballet njëkohësisht me mungesë të fuqisë punëtore në sektorë si turizmi, ndërtimi, bujqësia dhe teknologjia e informacionit.

Kjo situatë tregon një paradoks të tregut të punës, ku një pjesë e popullsisë mbetet jashtë punësimit, ndërsa bizneset raportojnë vështirësi në gjetjen e punonjësve të kualifikuar për vendet vakante.

The post Tregu i punës në vështirësi, papunësia në Shqipëri mbetet sfidë appeared first on Euronews Albania.

Dinamo City mori një rezultat pozitiv në ndeshjen e parë të raundit të dytë të UEFA Conference League, duke barazuar 1-1 në transfertë ndaj Aluminij në Slloveni.

Dinamo zhvilloi një paraqitje tepër pozitive në Slloveni ndërsa kaloi në avantazh në minutën e 15-të me Hekuran Berishën, i cili i shpëtoi bukur mbrojtjes kundërshtare dhe tundi rrjetën.

Në epërsi, Dinamo vijoi të luante më mirë dhe e administroi ndeshjen për pjesën më të madhe të saj, duke krijuar disa raste për gol. Por një pasim i gabuar i portierit Teqja i dha mundësinë vendasve të barazonin rezultatin në minutën e 84-t me anë të Vrbaneç.

Me këtë rezultat, kualifikimi për në turin e tretë të Conference League do të vendoset në ndeshjen e kthimit më 30 korrik, në stadiumin “Elbasan Arena”, duke nisur nga ora 21:00.

The post Dinamo barazon në Slloveni, kualifikimi ndaj Aluminij vendoset në “Elbasan Arena” appeared first on Euronews Albania.

Një zjarr i përmasave të mëdha ka përfshirë këtë të premte fshatin Pilur, në Bashkinë e Himarës. Menjëherë pas marrjes së njoftimit, drejt zonës janë nisur forcat zjarrfikëse të Himarës për ndërhyrjen dhe vënien nën kontroll të flakëve.

Ndërkohë, një tjetër vatër zjarri vijon të jetë aktive në Parkun Kombëtar të Llogarasë, ku prej disa orësh po punojnë intensivisht efektivët e shërbimit zjarrfikës, Forcat e Armatosura dhe strukturat e tjera të angazhuara për izolimin e zjarrit.

Operacioni për shuarjen e flakëve vijon, ndërsa autoritetet po monitorojnë situatën në terren për të parandaluar përhapjen e zjarrit drejt zonave të banuara.

The post Dy vatra zjarri në Himarë, zjarrfikësit dhe Forcat e Armatosura në terren appeared first on Euronews Albania.

Zhvillime të reja vijnë nga ngjarja e rëndë e ndodhur në fshatin Vidhisht të Roskovecit, ku 35-vjeçari Refit Buzi dyshohet se i ka dhënë fund jetës brenda automjetit, pas disa orësh negociatash me Policinë.

Sipas informacioneve paraprake, 35-vjeçari ka humbur jetën pasi dyshohet se është vetëvrarë me armën e gjahut që mbante me vete brenda automjetit, version i konfirmuar edhe nga njoftimi zyrtar i Policisë së Shtetit.

“Pavarësisht përpjekjeve dhe negociatave intensive të zhvilluara prej orëve të para të mëngjesit, ai nuk iu bind thirrjeve të Policisë dhe, rreth orës 16:35, dyshohet se i ka dhënë fund jetës me armën e gjahut”, njofton Policia e Shtetit.

Pas lirimit të ish-të dashurës së tij, falë ndërhyrjes së Policisë dhe ekipit negociator të RENEA-s, në bashkëpunim me shërbimet e Drejtorisë Vendore të Policisë Fier, vijuan negociatat me 35-vjeçarin me qëllim bindjen e tij për t’u dorëzuar.

Ngjarja e rëndë u regjistrua mëngjesin e kësaj të premte në fshatin Vidhisht, ku mbeti i vrarë Kosta Plaka dhe u plagos bashkëshortja e tij, Belere Plaka. Ish-bashkëshortja e autorit u mor me forcë nga ai, por më pas u lirua gjatë operacionit policor.

Grupi hetimor, nën drejtimin e Prokurorit, vijon veprimet për dokumentimin e plotë të rrethanave dhe shkaqeve të kësaj ngjarjeje kriminale.

Vrau ish-vjehrrin, ky është autori 35-vjeçar i ngjarjes së rëndë në Roskovec (FOTO)

The post Pas orësh negociatash me RENEA-n, 35-vjeçari qëllon veten në automjet appeared first on Euronews Albania.

Edicioni i dhjetë i “Za Fest” ka ngritur siparin në Muzeun Historik të Shkodrës, duke shënuar një dekadë të një festivali që është kthyer në një nga ngjarjet më të rëndësishme kulturore në veri të vendit.

Mbrëmja hapëse iu kushtua letërsisë, ku poetja Mimoza Ahmeti dhe shkrimtarja Rita Petro ndanë me publikun reflektime mbi poezinë, procesin krijues dhe sfidat e letërsisë bashkëkohore shqiptare.

“Jam e kënaqur që jam pjesë e “Za Fest”-it. Vij dhe si shkrimtare dhe poete, por ashtu edhe si kontribuese e Qendrës së Librit, për të përshëndetur këtë festival. Unë mendoj që muzika dhe letërsia, ose poezia, ecin bashkë. Dhe besoj se kjo bërthamë është për të gjitha artet një lloj, si me thënë, qendre. Qendre, pastaj, e cila kapilarizohet. Poezia si forma më subtile e mendimit, që e hap poret e gjuhës dhe e thyen rrethin. Dhe muzika si gjuha pa fjalë. Shkodra është një qytet që të sfidon. Të sfidon me zgjuarsinë, të sfidon me gjuhën e ruajtur, të sfidon me kulturën, me arkitekturën, me vetëpërmbajtjen e saj për të mos shkatërruar gjithçka për hir të qytetërimit. Në Shkodër është një vend që kënaqesh shumë, por që edhe vihesh në siklet, sepse je i detyruar të mendosh, të ndjesh dhe të thuash diçka të mençur, sepse është një popull i mençur”, tha Mimoza Ahmeti.

“Është një jubile jashtëzakonshëm, sepse unë mendoj që festivalet, dhe sidomos kur krijojnë traditë, krijojnë një komunitet tjetër. Ne jemi gjithë kohën në internet, gjithë kohën shikojmë se çfarë ndodh dhe ndjejmë vetminë. Festivali të bashkon; është si një sofër e madhe. Ose do të thoja, është si një revolucion i vogël, që secili gjen veten. Është prania, është prania fizike, që të bën shumë bukur. Dhe pastaj edhe arti: muzika, poezia, vargu dhe gjithçka tjetër na bën të gjithëve bashkë. Dhe aq më tepër, në Shkodër, që shkon aq shumë edhe emri dhe titulli “Za Fest” për t’i dhënë zë lirisë së individit. Dhe për mua kjo është shumë e rëndësishme. Dhe sidomos kur mblidhen edhe kaq shumë të rinj, është gjë shumë e madhe”, tha Rita Petro.

Në kuadër të jubileut, organizatorët prezantuan edhe një dokumentar retrospektiv, i cili riktheu momentet më domethënëse të Za Fest, nga edicioni i parë i mbajtur në Theth deri te rrugëtimi që e ka shndërruar festivalin në një pikëtakim të rëndësishëm të artit, kulturës dhe natyrës.

Atmosfera artistike vijoi me koncertin e artistes Linda Rukaj, e cila mbylli natën e parë të festivalit.

Za Fest do të vijojë edhe në ditët në vijim me aktivitete që ndërthurin muzikën, letërsinë dhe artin, duke sjellë në Shkodër artistë e krijues nga Shqipëria dhe rajoni.

The post Mimoza Ahmeti në “Za Fest”: Shkodra të sfidon me zgjuarsinë, kulturën dhe mençurinë e saj appeared first on Euronews Albania.

Një ngjarje e rëndë është regjistruar këtë të premte në fshatin Dërdushë të Bashkisë së Pogradecit, ku një tufë delesh është goditur nga rrufeja gjatë motit të keq.

Sipas informacioneve paraprake, si pasojë e goditjes nga rrufeja kanë ngordhur rreth 10 dele, duke shkaktuar dëme të konsiderueshme ekonomike për pronaren e tufës, Tatjana Beçoku.

Tufa ka qenë në numër të madh, me mbi 100 krerë dhe paraprakisht dyshohet se disa dele të tjera kanë mbetur të lënduara, ndërsa fatmirësisht nga ngjarja nuk raportohet për persona të prekur.

Në zonë është nisur sektori veterinar për të kryer verifikimet në terren dhe për të dokumentuar dëmet e shkaktuara.

The post Rrufeja godet tufën e deleve në Pogradec, ngordhin rreth 10 krerë appeared first on Euronews Albania.