Planet e Izraelit për të zgjeruar kontrollin në Bregun Perëndimor të pushtuar kanë nxitur sot kritika të ashpra nga Bashkimi Evropian dhe disa vende arabe.

Sipas mediave izraelite, Kabineti i Sigurisë i Izraelit ka miratuar dje një sërë masash që, sipas kritikëve, do të përshpejtojnë ndërtimin e vendbanimeve izraelite në Bregun Perëndimor.

“Bashkimi Evropian dënon vendimet e fundit të Kabinetit të Sigurisë së Izraelit për të zgjeruar kontrollin izraelit në Bregun Perëndimor”, deklaroi sot zëdhënës i përfaqësueses së lartë të BE-së për politikën e jashtme, Kaja Kallas.

Ai e përshkroi këtë hap si “një tjetër lëvizje në drejtimin e gabuar”.

Arabia Saudite, Turqia dhe vende të tjera me shumicë myslimane e kritikuan gjithashtu këtë vendim në një deklaratë të përbashkët, duke paralajmëruar se masa të tilla do ta bënin të pamundur zgjidhjen me dy shtete, e cila parashikon krijimin e një shteti palestinez përkrah Izraelit.

Qeveria e djathtë izraelite e kundërshton kornizën e dy shteteve, duke argumentuar se një shtet palestinez do të përbënte kërcënim për ekzistencën e Izraelit.

Kritika erdhën edhe nga Autoriteti Palestinez, i cili administron pjesë të Bregut Perëndimor.

Sipas mediave izraelite, masat përfshijnë shfuqizimin e rregulloreve të mëparshme që u ndalonin kolonëve izraelitë të blinin tokë, si dhe hapjen për herë të parë të regjistrave të pronësisë së tokës në Bregun Perëndimor për publikun.

45 vite burg kërkon Prokuroria Speciale për secilin nga anëtarët e UÇK.

Në një intervistë në emisionin “Balkan Update”, Faton Mehmeti gazetar në Kosovë e ka cilësuar një vendim të padrejtë.

Gjatë intervistës, ai u shpreh se qëllimi kryesor i gjykatës nuk është drejtësia, por njollosja e luftës së UÇK-së, ndërsa theksoi se akuzat nuk janë arritur të vërtetohen.

“Kjo gjykata në themel nuk ka vënien e drejtësisë, por për të ndëshkuar njërën palë që në këtë rast është pala shqiptare. Në asnjë rast nuk janë arritur të vërtetohen akuzat dhe pretendimet e Prokurorisë. Nuk ka asnjë dëshmitar direkt që të ketë pranuar se ka qenë në ato kampe përqendrimi”, tha ai.

Më tej ai nënvi8zoi se që në fillim procesi nga Gjykata e Hagës ishte e njëanshme dhe se sipas tij pret vetëm vendim skandaloz nga Specialja.

“Ky proces pritet që në fillim të majit të jepet fjala përfundimtare. Dëshira e  madhe është që katërshja të dalë në liri, Kjo gjykatë që në fillim ka qenë e paanshme, pra u duk që në start. Por mbetet për t’u parë. Dëshira është që katërshja të kthehet në Kosovë e lirë”, tha ndër të tjera ai.

Ish-presidenti i Kosovës, Hashim Thaçi, ish-kryeparlamentarët Kadri Veseli dhe Jakup Krasniqi, dhe ish-deputeti Rexhep Selimi janë deklaruar të pafajshëm për akuzat, ndërsa fjalën e tyre përfundimtare pritet ta mbajnë në seancën përmbyllëse të 18 shkurtit.

Të katërt ndodhen në paraburgim, në një proces të shoqëruar me shumë dritëhije që prej 2020-tës.

Zyra e prokurorit të specializuar ka paraqitur 125 dëshmitarë, ndërsa 117 të tjerë dorëzuan dëshmitë e tyre me shkrim, ndërsa mbrojtja e nisi sagën e saj shtatorin e 2025 me emra të rëndësishëm të politikës ndërkombëtare, si James Rubin, ish-ndihmësi i sekretarit amerikan të shtetit, Christopher Hill apo ish-komandanti suprem i forcave aleate të NATO-s, Wesley Clark. Të gjithë deklaruan se UÇK-ja nuk ishte organizatë terroriste, roli i Thaçit ishte politik dhe se pjesëtarët e saj luftuan për lirinë e Kosovës.

/abcnews.al/

Gjykata Supreme ka njoftuar se ka shqyrtuar të gjitha ankesat kundër vendimeve të Panelit Zgjedhor për Ankesa dhe Parashtresa për rezultatin zgjedhor pas rinumërimit të votave.

Kjo gjykatë tashmë përpilon dhe dorëzon vendimet e saj tek palët, konkretisht shqyrtimin e gjashtë ankesave kundër vendimeve të Panelit Zgjedhor.

Dy ankesa janë bërë nga kandidati i Partisë Demokratike të Kosovës (PDK), Bekim Haxhiu, një nga Partia Rome e Bashkuar e Kosovës dhe tre nga partitë e pakicave.

Pas këtij veprimi i hapet rrugë rruga certifikimit të rezultateve. Pas certifikimit, brenda 30 ditësh duhet të thirret seanca për konstituimin e Kuvendit.

Nga krahu tjetër, vijojnë aksionet e Prokurorisë së Prishtinës, që ka njoftuar se ka nisur intervistimin e anëtarëve të Qendrës së Numërimit dhe Rezultateve, konkretisht për Qendrën Komunale në Drenas.

Këto veprime po zhvillohen në bashkëpunim me Policinë e Kosovës dhe në kuadër të hetimeve intensive që janë duke u zhvilluar. Hetimet lidhen me dyshimet për keqpërdorime gjatë procesit të numërimit të votave të kandidatëve të subjekteve politike.

Një vit pas zgjedhjeve parlamentare të 9 shkurtit 2025 dhe pa formim të institucioneve të reja, Kosova ka funksionuar me qeveri në detyrë, ndërsa bllokada politike, ka prodhuar pasoja serioze në legjislacion, administratë dhe jetën e përditshme të qytetarëve.

Për më shumë se një vit vendi ka qenë i paralizuar në aspektin institucional, me mungesë reformash dhe me mbikëqyrje të dobët parlamentare, ndërsa këto zhvillime janë reflektuar edhe në marrëdhëniet ndërkombëtare dhe në perceptimin e partnerëve të huaj ndaj Kosovës.

/abcnews.al/

Policia e Vlorës ka parandaluar një ngjarje të mundshme kriminale.

Mësohet se më datë 08.02.2026, policia e Vlorës ka ushtruar kontrolle të imtësishme në aksin rrugor dhe në territorin e fshatit Babicë e Madhe për dy automjete.

Si rezultat i kontrolleve, shërbimet e Policisë kanë konstatuar të fshehura në një sipërfaqe ullishteje, në fshatin Babicë e Madhe, dy automjete të dyshuara të vjedhura, konkretisht:

-një automjet tip “Nissan”, me targa të huaja;

-një automjet tip “Audi Q5”, me targa të huaja; si dhe 3 bidona me lëndë djegëse (benzinë).

Nga veprimet e para hetimore rezulton këto automjete do të përdoreshin për kryerjen e një ngjarjeje të rëndë kriminale.

Automjetet dhe provat e tjera të sekuestruara po i nënshtrohen ekzaminimeve shkencore.

Grupi i posaçëm hetimor i DVP Vlorë, nën drejtimin e Prokurorisë, vijon punën për sqarimin e plotë të rrethanave si dhe për identifikimin dhe dokumentimin e autorësisë.

Sekretari i Shtetit i SHBA-së, Marco Rubio pritet të udhëheqë një delegacion në Konferencën e Sigurisë në Mynih.

Bëhet fjalë për një ngjarje që do të përqendrohet në gjeopolitikën e trazuar, sipas organizatorëve, raportojnë mediat e huaja.

Më shumë se 60 krerë shtetesh dhe qeverish dhe rreth 100 ministra të jashtëm dhe të mbrojtjes do të marrin pjesë në bisedimet për politikën e sigurisë nga 13 deri më 15 shkurt.

Siç theksohet më tej, Rubio do të kryesojë një delegacion amerikan që do të përfshijë gjithashtu rreth 50 anëtarë të Kongresit të SHBA-së, theksoi Ëolfgang Ischinger, drejtor i ngjarjes në një konferencë për shtyp.

I pyetur nëse priste që Rubio të përsëriste sulmin e JD Vance ndaj Evropës, Ischinger u përgjigj: “Po supozoj… se mund të presim që Sekretari i Shtetit i SHBA-së të flasë për politikën e jashtme të SHBA-së dhe jo për çështje që nuk i përkasin fushës së tij”.

Bota ka hyrë në një epokë të rrezikshme të “politikës së shkatërrimit” që i jep përparësi shkatërrimit të institucioneve në vend të përpjekjeve sociale dhe politike që synojnë nxitjen e ndryshimit përmes përshtatjeve graduale, sipas një raporti të kryer nga Konferenca e Sigurisë së Mynihut, para takimit të saj vjetor këtë javë.

Konferenca e MSC-së do të mbledhë rreth 65 liderë botërorë, së bashku me gati 100 ministra të Jashtëm dhe të Mbrojtjes, zyrtarë të lartë ushtarakë dhe politikbërës të nivelit të lartë për tre ditë diskutimesh që fillojnë të premten.

Ndër të ftuarit më të shquar që priten në Mynih është sekretari amerikan i Shtetit, Marco Rubio, presidenti ukrainas Volodymyr Zelensky dhe kancelari gjerman, Friedrich Merz.

I mbajtur për herë të parë në vitin 1963, eventi është rritur nga një takim relativisht i panjohur i strategëve të Luftës së Ftohtë në një forum kryesor për mbështetësit e NATO-s, lidhjeve transatlantike dhe rendit global të udhëhequr nga Perëndimi.

Megjithatë, konferenca e këtij viti do të përqendrohet në shkatërrimin e këtyre marrëdhënieve dhe normave diplomatike.

Raporti i Sigurisë i Mynihut 2026, i publikuar sot, i cili përcakton temat e konferencës, ia hedh pjesën më të madhe të fajit, ndryshimit radikal të presidentit të SHBA-së Donald Trump, i cili përshkruhet si një person që po “shmang rregullat ekzistuese” dhe po angazhohet në “politikë buldozeri”.

Por, Trump është vetëm manifestimi më i fuqishëm i një trendi më të gjerë që po zhvillohet në shumë vende.

“Në shumë shoqëri perëndimore, forcat politike që favorizojnë shkatërrimin kundrejt reformës po fitojnë vrull”, tha ekipi i ekspertëve në raportin e titulluar “Nën Shkatërrim”.

Vendimmarrësit e establishmentit shihen gjithnjë e më shumë jo si udhëheqës, por si “rojtarë të status quo-së” dhe administratorë të një sistemi politik të paralizuar që nuk i përgjigjet më nevojave të shumicës.

Perspektivë e zymtë për të ardhmen

Si pjesë e raportit, konferenca publikoi rezultatet e një ankete të kryer në disa vende. Pjesëmarrësit u pyetën nëse politikat aktuale qeveritare po përmirësonin perspektivat për brezat e ardhshëm.

Në Kinë, 80% e të anketuarve thanë se prisnin përmirësime, dhe 61% në Indi shprehën të njejtat pritshmëri.

Në Shtetet e Bashkuara të Amerikës, vetëm 31% ndanin këtë pikëpamje. Pritshmëritë ishin edhe më të ulëta midis të anketuarve në Evropë, me 22% në Itali, 20% në Britani të Madhe, 13% në Gjermani dhe vetëm 12% në Francë prisnin rezultate më të mira.

“Një pasiguri e thellë po trondit globin, Evropën në veçanti”, shkruan kryetari i MSC, Wolfgang Ischinger në një parathënie të raportit.

“Rrallë në historinë e kohëve të fundit të konferencës ka pasur kaq shumë pyetje themelore në tryezë në të njëjtën kohë: në lidhje me sigurinë e Evropës, qëndrueshmërinë e partneritetit transatlantik dhe aftësinë e unionit ndërkombëtar për të menaxhuar një botë gjithnjë e më komplekse dhe të kontestuar”, sipas Ischinger.

Vlerësimet për politikat e Trump ishin të dobëta në shumë vende

Edhe në SHBA, vetëm 39% mendojnë se politikat e tij janë të mira për vendin dhe 37% mendojnë se ato i sjellin dobi botës, ndërsa afërsisht gjysma e të anketuarve thonë se ato janë të dëmshme.

Skepticizmi është më i fortë në Kanada dhe Gjermani. Rreth 77% e kanadezëve presin pasoja negative për vendin e tyre dhe 71% për botën. Në Gjermani, shifrat janë përkatësisht 72% dhe 69%.

Jashtë Shteteve të Bashkuara të Amerikës, pikëpamjet më të favorshme për politikat e Trump gjenden në Brazil, Indi dhe Kinë.

Rezultatet bazohen në anketa të rreth 1000 personave nga secili vend i G7, përfshirë Brazilin, Kinën, Indinë dhe Afrikën e Jugut, në nëntor.

Thirrje për pavarësi më të madhe nga Uashingtoni

Raporti thotë se vendet që janë ende të përkushtuara ndaj një rendi të bazuar në rregulla duhet të organizohen dhe të ndjekin qasje që shkëput varësinë nga Uashingtoni.

Ai paralajmëron se ata që mbeten vëzhgues rrezikojnë të përfundojnë “në mëshirën e politikës së fuqive të mëdha”.

Për të shmangur këtë, qeveritë do të duhet të “përparojnë” duke investuar më shumë në mbrojtjen e tyre dhe duke bashkëpunuar më ngushtë, ndërsa u tregojnë gjithashtu votuesve se reformat kuptimplote mund të japin rezultate më të mira sesa “një politikë shkatërrimi të përhapur”.

Presidenti Ukrainas Volodymyr Zelensky ka deklaruar se Shtetet e Bashkuara të Amerikës kanë vendosur një afat deri në muajin qershor për arritjen e një marrëveshje mes Moskes dhe Kievit, marrëveshje kjo që do ti jepte fund luftës në Europën Lindore.

Kreu I Shtetit Ukrainas deklaroi se nëse një marrëveshje paqeje nuk do të arrihej deri në fillim të Verës, atëherë Shtetet e Bashkuara do të ushtrojnë presion maksimal ndaj të dyja palëve.
Associated Press shkruan se Volodymir Zelensky e bëri këtë deklaratë në një takim që pati me gazetarët e mediave ndërkombëtare, takim ky I cili ishte privat dhe pa kamera .

“Amerikanët propozojnë që palët të përfundojnë luftën deri në fillim të verës dhe, sipas gjasave, do të ushtrojnë presion pikërisht bazuar në këtë afat,” deklaroi Zelensky.

“Ata thonë se duan të kenë gjithçka të përfunduar deri në qershor dhe do të bëjnë gjithçka për të sjellë fundin e luftës. Duan një plan të qartë për të gjitha fazat,” shtoi Zelensky.

Presidenti Ukrainas Volodymir Zelensky zbuloi se Shtetet e Bashkuara kanë propozuar që raundi I ardhshëm I bisedimeve trepalëshe të zhvillohet javën e ardhme dhe me shumë gjasë këto bisedime do të mbahen për here të parë në token Amerikane, me Miami si opsionin më të mundshëm.

Rusia po ushtron presion mbi Ukrainën për t’u tërhequr nga Rajoni  Donbasit, ku luftimet vazhdojnë të jenë të ashpra.  Ukraina e ka bërë të qartë se nuk do të pranojë lëshime territoriale nëse vendi nuk merr garanci të forta sigurie.

Gjithmonë mendohet se ndryshimi mund të fillojë tani.

Kjo gjë nuk po ndodh dhe Reali vazhdon të pësojë disfatë pas disfatash në El Klasikon për vajza ndaj Barcelonës.

Ndryshe nga derbi i meshkujve, që është shumë më i ekuilibruar, madje me një epërsi të lehtë të madrilenëve, tek gjinia tjetër dominojnë ngjyrat “blaugrana”.

Barcelona arriti një tjetër fitore, këtë herë 4-0, në çerekfinale të Kupës së Mbretit.

Një përballje në ministadiumin “Alfredo di Sfetano” në Madrid, në të cilën vendaset u përpoqën shumë dhe krijuan ndonjë rast, por diferenca në cilësi dhe përvojë ishte e kobshme.

Dy gola u shënuan nga Pahor, dhe nga një realizuan Aleksia Putehas dhe Salma.

Barça e trajnerit Pere Romeu, zotëroi më shumë topin, 61 për qind, dhe bëri dyfishin e gjuajtjeve gjithsej, e sidomos trefishin në kuadrat, 9-3.

Kampionia në fuqi e Spanjës dhe trofembajtësja në Kupën e Mbretëreshës arriti në gjysmëfinale, ku do të ketë përballë Badalonën, ndërsa çifti tjetër është Atletiko Madrid-Kosta Adehe Tenerife.

Barcelona dominon El Klasikon ndaj Realit për vajza me 21 fitore dhe vetëm një humbje në të gjitha konkurrimet, në Spanjë dhe në Europë, ndërsa objektivi kryesor mbetet rifitimi I Championsit, pas disfatës së sezonit të kaluar në finale kundër Arsenali

Juristi i njohur Bledi Dervishaj thotë se vendimin e djeshëm, për të mos marrë vendim, Gjykata Kushtetuese ka dështuar në misionin e saj sublim, sepse nuk e zgjidhi në mënyrë përfundimtare mosmarrëveshjen e lindur mes Qeverisë dhe Drejtësisë për rastin “Balluku”.

Sipas tij, duke e lënë çështjen pa zgjidhje dhe në konflikt të hapur midis pushteteve, atëherë kjo çështje tashmë ligjërisht, rikthehet edhe njëherë për shqyrtim në tryezën e një gjyqtari në Gjykatën e Posaçme të Apelit, për shkak se ende nuk është shqyrtuar ankimi individual, ndaj masës së sigurimit “pezullim nga detyra”.

“Efektet që sjell dhe pasojat që krijohen nga lënia pa zgjidhje nga Gjykata Kushtetuese, e një çështje me kaq rëndësi të lartë shtetërore, mbi një mosmarrëveshje të kësaj natyre midis tre degëve kryesore të pushteteve në Republikën tonë Parlamentare, janë shumë herë më të rënda, se sa ato pasoja me karakter individual”, shkruan Blendi Dervishaj.

Juristi sqaron se në këtë situatë të përkohshme pa zgjidhje, pra pa vendim të Gjykatës Kushtetuese, struktura e posaçme (gjyqësori dhe prokuroria), në kushtet kur nuk ka një zgjidhje përfundimtare të vendosjes së qartë të kufijve, balancës, dhe kompetencave midis pushteteve (ekzekutiv, legjislativ dhe gjyqësor), ka në dorë praktikisht të zgjedhë, që rast pas rasti, ta luajë ose jo, një rol me karakter politik, kryesisht, për shkarkimin e një anëtari të Këshillit të Ministrave, duke diktuar, rast pas rasti, se kush dhe me kë do të qeverisë.

“Kjo qasje, nuk ka lidhje me emra individë lsh, apo fatin e tyre, politik apo ligjor. Jo”, thekson ai.

Sipas Bledi Dervishaj, Shqipëria po përjeton një situatë të paqartë dhe kaos organizativ e ligjor, që nuk e ka asnjë vend tjetër me standarde europiane, sepse të gjithë bëjnë siç ju thotë mendja dhe Gjykata Kushtetuese, si arbitër, nuk ka kurajo që të përmbushë detyrimet e tij për ta zgjidhur çështjen në themel.

“Kjo është e papranueshme”, thekson ai.

Lexoni shënimin e juristit Bledi Dervishaj, ish-Këshilltar për Çështjet ligjore i Presidentit të Republikës

Në Kushtet, kur Gjykata Kushtetuese ditën e djeshme në datë 06.02.2026, nuk e përmbushi misionin e saj sublim, pra nuk e zgjidhi në mënyrë përfundimtare mosmarrëveshjen e lindur, duke e lënë çështjen pa zgjidhje dhe në konflikt të hapur midis pushteteve, atëherë kjo çështje tashmë ligjërisht, rikthehet edhe njëherë për shqyrtim në tryezën e një gjyqtari në Gjykatën e Posaçme të Apelit, për shkak se ende nuk është shqyrtuar ankimi individual, ndaj masës së sigurimit “pezullim nga detyra”.

Kujtoj që, Gjykata e Posaçme e Apelit, në datën 18 dhjetor 2025, ka vendosur:

Pezullimin e shqyrtimit gjyqësor të çështjes nr.86 (61007-00414-87-2025), datë regjistrimi 11.12.2025, përsa i përket shqyrtimit të ankimit të ankueses B.B. ndaj vendimeve 118, datë 19.11.2025 dhe nr. 120, datë 22.11.2025 të Gjykatës së Posaçme të Shkallës së Parë për Korrupsionin dhe Krimin e Organizuar, për pjesën që ajo ka kundërshtuar caktimin dhe vazhdimin e masës së sigurimit personal me karakter ndalues “Pezullimi i ushtrimit të një detyre a shërbimi publik”, të parashikuar nga neni 242 i K.Pr.Penale, deri në zgjidhjen me vendim përfundimtar nga Gjykata Kushtetuese të çështjes së regjistruar për gjykim në atë gjykatë, me kërkues: Kryeministri i Republikës së Shqipërisë, me objekt:

“(i) zgjidhjen e mosmarrëveshjes së kompetencës së krijuar ndërmjet Kryeministrit e Këshillit të Ministrave dhe Gjykatës së Posaçme të Shkallës së Parë;

(ii) shfuqizimin e vendimit të Gjykatës së Posaçme të Shkallës së Parë, që ka vendosur masën ndaluese të pezullimit të ushtrimit të detyrës së zëvendëskryeministres dhe ministres së Infrastrukturës dhe Energjisë, shtetases B.B. dhe pezullimin e këtij vendimi;

(iii) interpretimin e pikës 3 të nenit 103 të Kushtetutës”, çështje për të cilën Gjykata Kushtetuese ka disponuar me vendimin datë 12.12.2025: “Pezullimin e zbatimit të vendimeve gjyqësore nr. 118, datë 19.11.2025 dhe nr. 120, datë 22.11.2025 të Gjykatës së Posaçme të Shkallës së Parë për Korrupsionin dhe Krimin e Organizuar, për pjesën që kanë disponuar caktimin dhe vazhdimin e masës ndaluese

“Pezullimi i ushtrimit të një detyre a shërbimi publik” ndaj shtetases B.B., sipas nenit 45 të ligjit organik të Gjykatës”.

Efektet që sjell dhe pasojat që krijohen nga lënia pa zgjidhje nga Gjykata Kushtetuese, e një çështje me kaq rëndësi të lartë shtetërore, mbi një mosmarrëveshje të kësaj natyre midis tre degëve kryesore të pushteteve në Republikën tonë Parlamentare, janë shumë herë më të rënda, se sa ato pasoja me karakter individual.

Praktikisht, në këtë situatë amorfe, edhe pse e përkohshne pa zgjidhje, pra pa vendim të Gjykatës Kushtetuese, struktura e posaçme (gjyqësori dhe prokuroria), në kushtet kur nuk ka një zgjidhje përfundimtare të vendosjes së qartë të kufijve, balancës, dhe kompetencave midis pushteteve (ekzekutiv, legjislativ dhe gjyqësor), ka në dorë praktikisht të zgjedhë, që rast pas rasti, ta luajë ose jo, një rol me karakter politik, kryesisht, për shkarkimin e një anëtari të Këshillit të Ministrave, duke diktuar, rast pas rasti, se kush dhe me kë do të qeverisë. Kjo qasje, nuk ka lidhje me emra individë lsh, apo fatin e tyre, politik apo ligjor. Jo.

Por Shqipëria, si vend i çudirave, po përjeton pikërisht një situatë të paqartë, dhe kaosi organiziativ dhe ligjor, që nuk e ka asnjë vend tjetër me standarte europiane, e krijuar apo e përkeqësuar pikërisht për shkak se, secili bën si i thotë mendja, ndërsa arbitri kushtetues, nuk ka kurajo, që të përmbushë detyrimet e tij për ta zgjidhur çështjen në themel.

Kjo është e papranueshme.

Një ditë pasi u emërua kryeinspektor i përgjithshëm, Sali Berisha e shpalli tradhtar Dashnor Sulën, ish deputetin e Peqinit, i cili ndau përfundimisht rrugët me të duke pranuar postin e propozuar nga kryeministri Edi Rama.

“Në qoftë se tradhtia ndaj atdheut, quhet tradhti e lartë, edhe tradhtia ndaj idealeve më të shenjta të demokracisë, nuk ka pse të mos quhet tradhti e lartë. Të kapësh flamurin e Edi Ramës, ke kryer aktin më të lartë të tradhtisë. Ndaj dhe ne, çfarë e shtyu atë në një moment kaq kritik t’i gjendet Edi Ramës në krah? E kuptoni vetë se ç’mollë e kalbur ka qenë ai”, theksoi Berisha.

Sula ishte i fundit ndër dhjetëra demokratë të zhgënjyer nga Berisha të cilët I janë bashkuar socialistëve apo kanë nisur lëvizjet e tyre.   Por jo I vetmi tradhtar. Kryedemokratit nuk i del e keqja me Salianjin, të cilit pak ditë më parë ju bashkuan demokratët e Fierit, aty ku në 11 maj, PD humbi mandat dhe nga lista e mbyllur.

“E thashë edhe para disa ditësh, doktorin 32 vjet mjek, thotë jam anëtar PD-je, të dalë në krah të Salianjit të krimit, të bandave, dhe të përcjellë mesazhet e Subashit, i cili në pallatin e tij ka vendosur KESH-in. Nuk humbasim ne nga këta, përkundrazi u them ju se ne do ndahemi me këta. Ne nuk duam më kurrë në gjirin tonë shërbëtorë të Edi Ramës”, tha Berisha.

Berisha komentoi dhe vendimin e Gjykatës Kushtetuese e cila të premten nuk arriti të marrë një vendim shumice, pasi trupa gjykuese u nda 4 me 4, duke rrëzuar padinë e kryeministrit Rama.

“Me atë ndarje katër me katër, të paktën vendimi, kërkesa e Edi Ramës nuk u miratua dhe përfundoi në kosh të plehrave. Ajo kishte të bënte me pezullimin e Edi Ramës nga detyra. Dhe ai donte të krijonte një mur nga gjykata”, tha Berisha.

Read More...

Presidenti  Amerikan Donald Trump ka deklaruar se nuk e kishte parë pjesën e një videoje të publikuar në rrjetet sociale që përmbante një klip me përmbajtje raciste, ku Barack dhe Michelle Obama paraqiteshin si majmunë.

Videoja 62-sekondëshe, e shoqëruar me këngën The Lion Slëps Tonight, ishte publikuar në platformën Truth Social dhe përfshinte pretendime për mashtrime zgjedhore në zgjedhjet presidenciale të vitit 2020.

Në fund të saj ishte shtuar klipi fyes ndaj çiftit  Obama. Postimi u fshi disa ore pas publikimit te tij te premten në llogarinë e Presidentit Amerikan. Duke folur për gazetarët ne Avionin e tij Air Force One , Trump u shpreh se nuk kishte bërë gabim dhe se nuk kishte arsye për të kërkuar ndjesë.

Ai tha se kishte parë vetëm fillimin e videos përpara se ajo të publikohej nga një anëtar i stafit dhe se nuk ishte në dijeni të përmbajtjes raciste.

“Pashë vetëm pjesët e para dhe ua dhashë stafit për ta kontrolluar. Nëse do ta kisha parë të gjithë videon, ndoshta do ta kishim publikua” deklaroi Trump nga avioni presidencial Air Force One. Ai shtoi se videoja u hoq sapo u kuptua përmbajtja e saj. Megjithatë kjo deklaratë e Trump nuk është besuar as nga qytetaret dhe as nga spektrit politik ne Shtetet e Bashkuara.

Trump posts new video that depicts Barack and Michelle Obama as monkeys pic.twitter.com/3ns9QgDwKe

— Catch Up (@CatchUpFeed) February 6, 2026

Reagimet ishin të forta edhe nga brenda Partisë Republikane. Senatori Tim Scott nga Karolina e Jugut e quajti videon “gjënë më raciste që kam parë nga kjo Shtëpi e Bardhë”. Deputeti republikan Mike Lawler e cilësoi postimin “të gabuar dhe thellësisht fyes”, duke kërkuar fshirjen e menjëhershme dhe një ndjesë publike. Edhe pas heqjes së videos, kritikat vazhduan. Senatori republikan John Curtis nga Utah e përshkroi klipin si “racizëm të hapur dhe të pajustifikueshëm”.

Zëdhënësja e Shtëpisë së Bardhë, Karoline Leavitt, tha se videoja ishte një “meme interneti” që paraqiste Trumpin si “mbret të xhunglës” dhe demokratët si personazhe nga filmi The Lion King, duke u bërë thirrje kritikëve të “ndalojnë zemërimin e rremë”.

Shoqata Kombëtare për Avancimin e Personave me Ngjyrë (NAACP) e quajti videon “të neveritshme dhe thellësisht fyese”, duke akuzuar Trump se po përpiqet të shpërqendrojë opinionin publik nga çështja Epstein dhe problemet ekonomike. Ngjarja vjen në vazhdën e një historie të gjatë tensionesh mes Trump dhe Obamës.

Para mandatit të tij të parë, Trump kishte përhapur pretendime të rreme se Obama nuk kishte lindur në SHBA, por në Kenia — pretendime të cilat më pas i pranoi si të pavërteta.

Një ngjarje e rëndë ka ndodhur ditën e djeshme në Vlorë, kur një i mitur vetëm 4-vjeçar ka ndërruar jetë.

Policia bën me dije se vogëlushi është dërguar pa shenja jete në Spitalin Rajonal. Nga këqyrja paraprake nuk janë konstatuar shenja dhune apo dëmtime të tjera.

“Specialistët referuan materialet në Prokurori, pasi më datë 06.02.2026, në Spitalin Rajonal Vlorë, është çuar pa shenja jete një fëmijë 4-vjeçar. Nga këqyrja paraprake nuk janë konstatuar shenja dhune apo dëmtime të tjera. Vijojnë ekzaminimet e mëtejshme mjeko-ligjore për përcaktimin e shkakut të ndërrimit të jetës”, thuhet në njoftim.

Materialet procedurale iu referuan Prokurorisë së Vlorës për veprime të mëtejshme.

Se si do të përfundojë kjo punë askush nuk e di.

Kryengritjet zakonisht ose fitojnë ose shuhen, ndërsa për Kristiano Ronaldon triumfi është I pamundur.

Superylli portugez refuzoi për të dytën herë radhazi të dilte në fushë për ekipin e tij, Al Nasr, në Ligën Profesioniste Saudite, këtë radhë në sfidën shtëpiake ndaj Al Itihadit kampion, pasi mungoi edhe kundër rivalit Al Riad.

Shkaku dihet dhe është sepse CR7 është tepër I zemëruar që autoritetet nuk I dhanë mundësi të barabartë klubit të tij me rivalin për titull, Al Hilal, gjatë fazës së transferimeve në janar.

Afati zyrtar i transferimeve përfundoi në 2 shkurt dhe Al Hilal mori një yll të rëndësishëm si sulmuesin francez, Karim Benzema, kapitenin e Al Itihadit.

Ish-heroi i Realit e tregoi vlerën me 3 gola shënuar në fitoren 6-0 kundër Al Ahdudit.

Të katër klubet kryesorë, përfshi Al Hilalin dhe Al Nasrin, I zotëron Fondi Publik Saudit, dhe Ronaldo proteston se këtu u bë një padrejtësi.

Gara për kampionatin mbetet e ashpër, pasi rekormenët e titujve kryesojnë me vetëm një pikë më shumë sesa skuadra e Kristianos, 50 ndaj 49, ndjekur nga Al Ahli me 47.

Rusia ka nisur një sulm të ri masiv ndaj sistemit energjetik të Ukrainës, duke goditur rrjetin elektrik, termocentralet dhe nënstacionet, tha sot presidenti ukrainas Volodymyr Zelensky.

“Sulmi i natës së kaluar përfshinte më shumë se 400 dronë dhe rreth 40 raketa të llojeve të ndryshme”, shkroi Zelensky në X.

Dëme u raportuan në rajonet perëndimore të Ukrainës, Volyn, Ivano-Frankivsk, Lviv dhe Rivne.

“Çdo ditë, Rusia mund të zgjidhte diplomacinë e vërtetë, por ajo zgjedh sulme të reja”, tha presidenti, duke i bërë thirrje mbështetësve të procesit aktual të negociatave të ndërmjetësuara nga SHBA-ja që të reagojnë ndaj sulmeve të fundit.

Zelensky theksoi se Moskës duhet t’i mohohet mundësia për të ushtruar presion mbi Ukrainën përmes motit të ftohtë, dhe shtoi se Ukraina ka nevojë për raketa për sistemet e mbrojtjes ajrore për të arritur këtë qëllim.

Është vetëm 22 vjeç, është tepër simpatike, dhe gjithashtu e pasur.

Lojërat Olimpike të Dimrit në Milano dhe Kortina d’Ampeco do të kenë një vajzë në krye të klasifikimit të të ardhurave financiare, dhe kjo është një sportiste me origjinë kineze, që fillimisht garoi si amerikane, dhe tani po mbron flamurin e Kinës.

Ailin Fen Gu, që në vendin e saj njihet si Gu Ailin, është një skiatore e stilit të lirë.

Sipas revistës së shquar amerikane, “Forbs”, ajo ka fitime prej 23 milionë USD në vit, duke lënë prapa të gjithë yjet e tjerë që marrin pjesë në Olimpiadë.

Katër vjet më parë, në Pekin, ajo u bë kampionia më e re olimpike në stilin e lirë, dhe e para që fiton 3 medalje në një Olimpiadë të vetme.

Me nënë kineze, por baba amerikan, ajo vendosi të përfaqësonte Kinën, besohet sepse shteti duhet ta ketë mbështetur më shumë.

Në vendin e dytë për të ardhurat vjen një yll I madh nga Liga e Hokejit në Akull në Amerikën e Veriut, që përfshin Shtetet e Bashkuara dhe Kanadanë.

Amerikani Ostën Metjus fiton 20 milionë USD në vit, nga të cilat 15 milionë në skuadrën e tij të Torontos dhe 5 milionë nga kontrata sponsorizimi.

Pas tyre vijnë dy amerikane të tjera.

Veterania 41-vjeçare Lindsi Von, që pritet të marrë pjesë për herë të pestë dhe rekord në Lojrat Olimpike, besohet se fiton 8 milionë USD në vit.

Von ka 84 fitore në garat për Kupën e Botës, e dyta në histori.

Legjendarja tjetër amerikane, Mikaela Shifrin, I ka rritur shumë të ardhurat e saj, dhe I është afruar rivales më të vjetër, por mbetet prapa vetëm për pak.

Ajo fiton 7 milionë USD në vit.

Këtu nuk jemi në piskun e vapës.

Lojërat Olimpike Dimërore kanë gara e kushte të tjera në krahasim me ato të verës, dhe po ashtu kandidatët për fitore ndryshojnë.

Nëse në Olimpiadat më të shquara, që janë mbajtur që në kohën e grekëve të lashtë, dominojnë Shtetet e Bashkuara të Amerikës, e dikur e ndanin Olimpin me Bashkimin Sovjetik, këtu numri 1 është Norvegjia.

Pikërisht skuadra skandinave pritet të fitojë numrin më të madh të medaljeve, të arta, të argjendit dhe të bronzit, ashtu siç bëri 4 vjet më parë në Pekin.

Norvegjezët i lanë prapa të gjithë, madje me distancë, duke marrë 16 të arta dhe 37 medalje gjithsej.

Garat e preferuara të tyre janë biatloni, apo dygarëshi, si dhe ato që quhen garat e skive nordike.

Po ashtu, mund të fitohen medalje në kërcimet nga trampoline dhe në disiplina të tjera.

Gjermania doli e dytë në Olimpiadën kineze në 2022 me 12 të arta dhe 27 medalje në përgjithësi.

Gjermanët kontrollojnë garat me rrëshqitje në një mjet në një shteg akulli të rrethuar me bordura, në bobsled, si dhe në skeleton, që është një disiplinë e ngjashme, por me një garues të vetëm.

Shtetet e Bashkuara të Amerikës janë pretendentët e tretë për medalje duke marrë 25 të tilla, nga të cilat 9 të arta, ndërsa pranë tyre pritet të jenë Kina, Suedia, Holanda, Austria, Zvicra, por besohet edhe Koreja e Jugut.

Përfaqësuesja më e shkëlqyer amerikane është Mikaela Shifrin, skiatorja alpine më e madhe e të gjitha kohëve me 108 fitore në garat e Kupës së Botës, që ka fituar tre medalje olimpike në karrierë.

Read More...

Shteti Islamik ISIS ka marrë përgjegjësinë mbi sulmin Kamikaz të ndodhur përgjatë lutjeve të së premtes në një Xhami Shiite në kryeqytetin e Pakistanit, ku si pasojë e shpërthimit humbën jetën 31 persona dhe u plagosën 169 të tjerë.

Isis në deklaratën që bëri ku mori përgjegjësinë e sulmit deklaroi se vijon ti shohë shiitët pakistanezë si objektiva legjitime, duke I quajtur ato një rezervuar njerëzish që punojnë për të rekrutuar militant që të luftojnë Shtetin Islamik në SIRI.

Bombardimi I Xhamisë në lutjet e së premtes ku në mesin e viktimave kishte edhe fëmijë ishte më vdekjeprurësi në Islambad që nga një sulm kamikaz I ndodhur brenda një hoteli në qytetin e Pakistanit në vitin 2008 ku humbën jetën 63 persona dhe u plagosën më shumë se 250 të tjerë.

Shiitët, të cilët janë pakicë në kombin me shumicë myslimane sunite prej 241 milionë banorësh, janë shënjestruar në dhunë sektare në të kaluarën, përfshirë edhe nga grupe militante talibane në Pakistan, që I konsiderojnë ata heretikë.

Bombardimet janë të rralla në kryeqytetin e ruajtur me masa të rrepta, megjithëse Pakistani është goditur nga një valë në rritje e sulmeve nga grupet militante përgjatë viteve të fundit.

Nuk u rritën me ëndrra për qiellin as nuk e kishin planifikuar këtë rrugë, por sot Adea dhe Alida janë dy vajzat e vetme që pilotojnë helikopterë në bazën ajrore në Farkë.

Dy 26-vjeçaret prej katër vitesh janë pjesë e Forcave të Armatosura të Republikës së Shqipërisë dhe prej tre vitesh  pjesë e Forcës Ajrore.

“Nuk ishte e menduar. Një dëshirë e momentit.  Nuk jam nisur për Forcë Ajrore, por pasi është hapur kursi për pilot e kam parë dhe kam shprehur dëshirën. Kam babain që është ushtarak. Isha e mirëinformuar tek kjo pjese”, shprehet pilotja Adea Ahmeti.

“Zgjedhja për tu bërë pjesë e ushtrisë ka qenë zgjedhje spontane ndikuar kryesisht nga rrjetet sociale. Që në momentin e përfundimit të Akademisë së Forcave të Armatosura u emërova në Forcën Ajrore në Rinas dhe aty mësove dëshirën për të fluturuar”, tregon pilotja Alida Bego.

Hynë në një botë të panjohur me vullnetin për të sfiduar veten dhe kufijtë që shoqëria shpesh u vendos vajzave. Piloti, prej vitesh është konsideruar një profesion kryesisht për djem megjithëse këto vajza mendojnë ndryshe.

“Në këtë profesion nuk shihet gjinia po vlerësohet aftësia”, thotë adea.

Fluturimi i parë vetëm ishte plot dyshime.

“Atë ditë që kam pasur fluturimin solo kam qenë duke bërë kontrollet rutinë  që ne bëjmë  të helikopterit  dhe aty kam pasur shumë, shumë emocion, por  në momentin që kam hip në helikopter nuk kisha më emocion.  Jam kthyer dhe kam parë që nuk kisha njëri tjetër dhe  unë thash ouu, unë mund ta bëj”, tregon Adea Ahmeti.

“Emocionet më të mëdha kanë qenë para fillimit të fluturimit sepse aty  fillon të mendosh çfarë do ndodhi, mendon idenë që do jesh vetëm,  megjithatë në momentin e hipjes në helikopter mbledh mendjen në thonjëza, I thua vetes je gati,  në rregull, mund t’ja dalësh dhe vazhdon fluturimin”, thotë pilotja tjetër Alida.

Një profesion sfidues, me përgjegjësi të madhe. Një betejë e heshtur mes frikës dhe guximit.

“Ne kemi një shprehje që thotë se ndjenja e frikës nuk duhet të ekzistojë në fluturim se humb toruan dhe nuk je në gjendje ti përgjigjesh  periudhave të emergjencës në kohën e duhur dhe në mënyrën e duhur për këtë arsye përpiqemi ta lëmë frikën në tokë”, shprehet pilotja Alida Bego.

Në ajër gjejnë qetësinë.  Aty ku përballen me veten, ku çdo vendim ka peshë dhe çdo sekondë kërkon përqendrim maksimal.

“Duhet të jesh i qetë mendërisht që të përballosh gjithçka që vjen në fluturim”, tregon Alida.

“Gati tu në ajër, nuk tolerohet as gjëja më e vogël, duhet të jesh gjithmonë serioz”, nënvizon Adea.

Më e sigurt në tokë kur nget një makinë apo në ajër kur drejton një helikopter?

Padyshim që në ajër duke pilotuar një helikopter.  Në ajër je më e kontrolluar e di se nga do të vijë një helikopter tjetër. Sepse ke komunikimin e vazhdueshëm. Toka s’ta jep këtë siguri. Ti se di çfarë ka në mend të bëjë ai tjetri.  Në ajër nuk ka veprime të menjëhershme nga koka jote pa I komunikuar më parë.

Synimi është pilotimi i Coguarit.

“Është helikopter që i përfshinë të gjitha”, thotë pilotja Adea.

“Misionet që merr pjesë Cougar janë një rang misionesh, duke filluar nga kërkim shpëtimi, misionet e fikjes së zjarrit dhe çfarëdo lloj misioni që të jetë e rëndësishme është të jesh pjesë e atij lloj misioni dhe e di që je ti që po bën diçka për të ndihmuar.”, tregon pilotja Alida.

“Shpresojmë koha të jetë sa më e afërt.  Dëshira është e madhe”.

“Është një procedurë e gjatë stërvitje dhe studimi. Ndoshta mendoj se kërkon një periudhë e gjatë kohore.

Ne që jemi mësuar me helikopter me një motor as 350 b do ta kemi periudhën e kalimit më të vështirë dhe për ambientimin me instrumentet me peshën e helikopterit dhe teknikat e pilotimit”

Adea dhe Alida janë të vetmet vajza që ngrenë në fluturim helikopterët në bazën e Farkës mes shumë djemsh.

Por pavarësisht gjinisë Forcat Ajrore kanë nevojë për pilot dhe nënkolonel Klajdi Tushe fton të rinjtë të aplikojnë për tu bërë pjesë e Forcave të Armatosura.

“Interesat tona kombëtare janë të lidhura me zhvillimet që ndodhin pranë NATOS-s pranë sigurisë së përgjithshme të atdheut tonë. Ne kemi shtuar ngarkesën, kërkesën ndaj vetes duke shtuar numrin e operacionalitetit, stërvitjeve dhe misioneve që Ministria e Mbrojtjes mund të marrë për jashtë shtetit kjo kërkon shtim të  personelit bashkëlidhur më këto kemi shtim të numrit të helikopterëve që na çon nevojë për burime njerëzore.  Njëkohësisht Baza Ajrore e Farkës ofron dhe shërbime të brendshme të vendit që kanë nevojë për tu mbështetur me pilotë e teknikë”, thotë Tushe.

Por nëse deri tani për tu bërë pilot duhet fillimisht të veshësh uniformën ushtarake, shumë shpejt  për të përgatitur të rinjtë  pritet dhe hapja e shkollës së aviacionit.  Ku mund të certifikohesh jo vetëm si pilot helikopteri, por dhe avioni.

“Nëse tani duhet të mbarosh Akademinë Ushtarake, të bëhesh ushtarak,  pastaj bëhesh pilot, me hapjen e shkollës së aviacionit  një person pasi ka mbarura shkollën  e mesme mund të kryej shkollën e aviacionit, të kryejë akademinë atje dhe shkurton këtë periudhë për pilot”, shprehet ai.

Jo çdo sukses nis me një ëndërr fëmijërie. Disa nisin me një vendim të vështirë dhe ndërtohen me guxim.

Alida dhe Adea dëshmojnë se ndonjëherë pasioni lind gjatë rrugës dhe mund të të çojë shumë lart.

“Forca Ajrore ofron kënaqësi, adrenalinë dhe shumë sfida”

“Provojeni se ja vlen”.