Kryeministri Edi Rama ka komentuar vendimin e Gjykatës Kushtetuese për lënien në fuqi të vendimit të GJKKO-së për pezullimin nga detyra të zv/kryeministren Belinda Balluku.

Kështu, Shqipëria bëhet për herë të dytë, në dy muaj, shembulli i parë i një budallallëku botëror sepse Gjykata Kushtetuese u mbyt me lugën e ujit të turbullt të tyre që Servantes në librin e tij të famshëm Don Kishoti i Mançës i quan arsyet e Mosarsyes.

Por fakti është që mosvendimmarrja e Gjykatës Kushtetuese e kthen në fuqi pezullimin e ministers, e cila, që të jemi shumë të qartë, pavarësisht se qartësia është një luks dhe një luks i rrallë që mund ta kërkosh, por vështirë ta gjesh në turbullirën e 700 tenxhereve politike e mediatike, nuk akuzohet për korrupsion, as nga vetë prokurori që shpiku pezullimin e anëtarit të qeverisë me vendim të një seance të mbyllur të përgatitjes së një gjyqi.

Sidoqoftë, zhbërja e kësaj shpikjeje 100% “Made in Albania” e drejtësisë së re dhe e drejtësisë ende të papjekur shqiptare, e cila nuk ka lidhje me rastin dhe çështjen konkrete po me një parim të panegociueshëm të demokracisë mbetet një domosdoshmëri për të rigarantuar pavarësinë ekzekutive  të parlamentit nga pushteti gjyqësor.

Kështu që, ne do ta vazhdojmë këtë betejë, ku na thirri me pahir çartja antidemokratike e pezullimit të një anëtari qeverie dhe ku fatkeqësisht na mban akoma sot pafuqia e Gjykatës Kushtetuese për të marrë një vendim sa të thjeshtë, – është vendim shumë i thjeshtë se mjafton të marrësh shembull çdo vend të botës që do apo të gjithë vendet e botës bashkë dhe nuk do të gjesh dot një gjë të ngjashme, – por një vendim po aq dhe të nevojshëm për të mos e lënë Shqipërinë vendin e vetëm në planet, ku sot aktualisht me këtë brutalitet të rilegjitimuar nga kjo mosvendimmarrje vetë Presidenti i Republikës mund të pezullohet nga i pari prokuror që gdhihet me këtë ide në kokë.

Në ndërkohë, kam dhe diçka tjetër.

Kujtdo që ka vënë buzën në gaz apo ka nxjerrë gjuhën jashtë pas mosvendimit të Kushtetueses dhe e bën hosana dhe fërkon duart me kuturisjet e modës së re të arresteve pa gjyq, të cilat arritën një kulm të ri këtë javë me 30 e kusur fletë-arresti të prera nga një prokuror në Durrës, i cili në fakt nuk paraburgosi vetëm veten e vet, – se të gjitha çfarë kishte rreth e rrotull për një çështje që nuk përmbush asnjë kusht, zero, hiç nga ato që Këshilli i Europës dhe drejtësia demokratike përcakton si kushte të domosdoshme për arrestin, – i futi në një thes, – u them një gjë, – kush beson se përpjekja e natyrshme për shtetin ligjor e të gjithëve bashkë, e jona, qeveri, parlament, drejtësi, me të gjitha të përpjetat dhe të tatëpjetat e saj, arritjet dhe lajthitjet e drejtësisë së re, do të prodhojë ndonjëherë kosto për këtë shumicë qeverisëse, të cilat do ta kthejnë në punë mullirin e prishur të opozitave, gabon ditë dhe natë sepse nuk kupton atë që e kupton shumë qartë populli shqiptar, njeriu i zakonshëm i Shqipërisë. Lufta për drejtësi, për shtet ligjor demokratik, për Shqipërinë europiane në Bashkimin Europian, ka vetëm një garant, ende sot për sot, mua dhe këtë shumicë qeverisëse.

Kaq e thjeshtë është!”, tha Rama.

Kryeministri Edi Rama ka komentuar vendimin e Këshillit të Ministrave për hapjen e Tik Tok, duke theksuar se ky vendim erdhi pas vendosjes së filtrave dhe mekanizmave të reja mbrojtës.

Komentet Rama i bëri në podkastin e tij ‘Flasim’, ku tha se Shqipëria vendosi një komunikim konstruktiv me Tik-Tokun për rritjen e parametrave të sigurisë, teksa shtoi se vendi ynë nuk është në gjyq me këtë platformë.“Këtë javë doli edhe vendimi i Këshillit të Ministrave për të hequr masën e bllokimit të Tik-Tokut, është një vendim që e pata lajmëruar kur pata shpjeguar në më shumë se një rast, që për befasinë tonë të këndshme, Tik Tok ishte shumë i hapur dhe shumë aktiv ndërtimin e një dialogu me ne, pasi ne bëmë bllokimin. Dhe nuk është Tik Tok që na ka çuar në gjyq, por dihet kush na ka çuar në gjyq edhe për Tik Tok. Me Tik Tok kemi vendosur jo vetëm një komunikim, por edhe një bazë të re. Kështu që vendimi i Këshillit të Ministrave nuk është tëheqje, nuk është dorëzim, e aq më shumë mbyllje sysh. Por është rezultat i një procesi serioz rishikimi dhe një pune konkrete adresimi real të shqetësimeve për sigurinë dhe filtrat e nevojshëm, që të ketë shumë më tepër kontroll në kuptimin e mirë të fjalës. Jo censurë, por kontroll mbi gjithë aktivitetin, për mbrojtjen e fëmijëve dhe më të rinjve. Sot Tik Tok është i aksesueshëm sepse janë vendosur mekanizma të reja sigurie”, tha mes të tjerash Rama.

Kryeministri Edi Rama ka folur dhe njëherë për debatin me gjykatësit lidhur me kërkesën e këtyre të fundit për rritje të pagave. Rama tha se nuk do të ndodhë që gjyqtarët të marrin rritje të pagave mbi gjithë të tjerët duke përmbysur rendin.

Me nje vendim te Keshillit te Ministave pagat  për 144 mijë punonjës të administratës u indeksuan me 2.5% Paga referuese për funksionet gjyqësore dhe të prokurorisë shkon 156.825 lekë/ muaj.“Përsëri çështja e pagave, ka qëndruar në rendin e ditës, ka pasur shumë komente, shumë çudi dhe shumë absurditete ku për fat të keq përmes disa shoqatash, gjykatësit janë vetëvendosur në syrin e një cikloni popullor në kuptimin e një pakënaqësie popullore lidhur me kërkesën për rritje pagash.

Vetë gjykatësit pretendojnë ne duam t’iu ulim pagat, në një insistim të një arsyetimi absolutisht të pajustifikuar për nga shëndeti logjik, zërat që e përfaqësojnë këtë kategori, tonë se pagat e tyre po ulen se pagat e të tjerëve po rriten, çfarë ne kemi bërë me reformën në drejtësi ka qenë shprehja e një vullneti të fortë dhe në drejtim të rritjes së pagave të gjyqtareve.

U kemi dhënë atyre mesazhin që taksapaguesit shqiptarë do të bëjnë një sakrificë dhe do të paguajnë ekstra për të gjithë ata që, pasi të kalojnë procesin e vettingut, do të përballen me sfidën e madhe të pavarësisë së pushtetit gjyqësor dhe të ndërtimit të një ngrehine solide, bazuar mbi parimet dhe vlerat e Kushtetutës të atij pushteti, në shërbim të qytetarëve dhe si garant për barazinë para ligjit.

Thyem piramidën e pagave, që fillon me presidentin dhe zbret. Ndërkohë që në mënyrën më të vetëdijshëm pagat e gjyqtarëve ne i rritëm mbi të gjithë, por nuk i vendosmë  mbi të gjithë që sa herë do rriten të tejrat, do u rriten dhe atyre. Jam sulmuar personalisht dhe është sulmuar qeveria nga autorët e një deklarate së një shoqate. Gjykatësit nuk mund të kenë një rritje pagash të përjetshme mbi gjithë të tjerët. Shpresoj që GJK t’i vendosi vulën”, tha ndër të tjera Rama.

Rruga që lidh Rrëshenin me Njësinë Administrative Kurbnesh është bllokuar plotësisht gjatë natës si pasojë e rrëshqitjes së një masivi të madh dheu. Prej më shumë se 4 orësh, dhjetëra banorë kanë mbetur të izoluar, pa asnjë mundësi lëvizjeje.

Qytetarë të bllokuar në vendngjarje kanë dërguar pamje që tregojnë qartë shembjen e masivit të dheut dhe ndërprerjen totale të qarkullimit. Mes tyre ka familjarë që duhet të shkojnë urgjentisht në Kurbnesh për të hapur varrin e një të afërmeje që ka ndërruar jetë ditën e djeshme, por janë të detyruar të qëndrojnë të bllokuar në rrugë.

Sipas banorëve, organet kompetente janë njoftuar, por deri tani asnjë strukturë shtetërore nuk është paraqitur në terren. Edhe më shqetësuese është heshtja e firmës kontraktore “Albutingu”, e cila ka detyrimin për mirëmbajtjen e rrugës dhe nuk ka kthyer asnjë përgjigje, pavarësisht telefonatave dhe njoftimeve.

Kjo rrugë është aksi që të çon drejt Lurës, një zonë turistike për të cilën qeveria bëri propagandë të fortë pas ndërtimit, duke e cilësuar investimin si një “punë të shkëlqyer”. Realiteti i sotëm, megjithatë, tregon një histori tjetër: një rrugë e re, por e pasigurt, pa reagim emergjent dhe pa përgjegjësi institucionale.

Banorët kërkojnë ndërhyrje të menjëhershme, hapjen e rrugës dhe mbajtjen e përgjegjësive nga institucionet dhe firma kontraktore, pasi situata nuk është vetëm problem qarkullimi, por çështje humanitare dhe sigurie.

Ernest Muçi vazhdon të shkëlqejë në Turqi, aty ku është pjesë e Trabzonspor. Pas Kupës, sulmuesi shqiptar ka gjetur golin edhe në kampionat.

Muçi shënoi golin e tretë me penallti në minutën e 90-të, në fitoren 0-3 të skuadrës së tij ndaj Samsunspor në transfertë.

Ky është goli i 12-të mes kampionatit dhe Kupës për 24-vjeçarin, që vazhdon të mahnisë te Trabzonspor, skuadër e cila ka të drejtën e blerjes së kartonit nga Besiktas.

Sa i përket ndeshjes së sotme, përveç golit, ai asistoi edhe te goli i parë, i shënuar nga Onuachu në minutën e 23-të.

Përmbledhja e ndeshjes: 

Dy shqiptarë janë arrestuar nga autoritetet gjermane pasi kultivonin lëndë narkotike në një plantacion profesional.

Mediat gjermane shkruajnë se operacioni u zhvillua në qarkun fqinj të Giessen. Shkak për operacionin ishin hetimet që kishin zgjatur rreth një vit nga policia kriminale, për shkak të dyshimeve për tregti të paligjshme të lëndëve narkotike.

Në fillim të kontrollit të një magazine të martën në mëngjes, dy persona u arratisën në këmbë. Forcat e policisë i ndoqën, i kapën dhe i arrestuan përkohësisht. Nuk pati të lënduar. Brenda objektit, hetuesit gjetën një plantacion kanabisi të organizuar në mënyrë profesionale.

Sipas hetimeve të para, bëhet fjalë për rreth 1.400 bimë kanabisi. Vlera e tyre e vlerësuar në treg arrin rreth dy milionë euro. Me mbështetjen e një njësie teknike speciale, policia konfiskoi bimët dhe pajisjet përkatëse. Në operacion morën pjesë një numër dyshifror efektivësh.

Të arrestuarit janë dy shtetas shqiptarë të moshës 29 vjeç. Me urdhër të Prokurorisë së Giessenit, ata u paraqitën para një gjyqtari të paraburgimit në Gjykatën e Qarkut Giessen, i cili urdhëroi arrest me paraburgim ndaj të dyshuarve për vepra të rënda penale. Të dy ndodhen tani në institucione të vuajtjes së dënimit.

Mbrëmjen e së premtes nga Gjykata Kushtetuese u shënua atentati më i rëndë ndaj Kushtetutës dhe ndarjes së pushteteve në Republikën e Shqipërisë.
Atentatet zakonisht kërkojnë burra apo burrnesha, por ja që kryhen edhe nga qenie hibride, të vendosura në pozicione kyçe, si kunati i Mimi Kodhelit dhe i besuari i Partisë Socialiste.

Gent Ibrahimi do të mbahet mend për asgjë tjetër, përveç vendimit të së premtes, si atentator i Kushtetutës, i shantazhuar nga një prej elementëve kriminalë më në zë, dhe si ai që, pasi u fut në Gjykatën Kushtetuese, e la pas dore motrën e Mimi Kodhelit, e cila e kishte ndihmuar gjatë gjithë jetës.

Genti njihet si një jurist mediokër, pasi nuk është magjistrat; si qejfli femrash, madje thonë se edhe përshëndetjen e ka të çuditshme dhe me konotacione seksuale për kë e njeh.

Ai nuk njihet për asgjë tjetër, përveçse si një person lehtësisht i shantazhueshëm, pasi historitë rozë dhe historitë me SKY ECC e kanë shndërruar në një figurë prej letre, që përdoret nga kush ka nevojë të kryejë interesa personale.

Por Gent Ibrahimi, i shantazhuar apo jo me gjithë ato sekrete që ka të fshehura, dje e tejkaloi veten: shkatërroi njëherë e përgjithmonë sistemin e pushteteve të pavarura.

Gent Ibrahimi duhet të japë dorëheqjen menjëherë dhe t’i hapë rrugë një gjyqtari tjetër me integritet.

Manchester United vazhdon momentin pozitiv nën drejtimin e Michael Carrick, duke regjistruar fitoren e katërt radhazi në të gjitha kompeticionet.

“Djajtë e Kuq” triumfuan 2-0 ndaj Tottenhamit, në një përballje ku kontrolluan lojën dhe përfituan maksimalisht nga avantazhi numerik.

Carrick, i cili fillimisht u pa si një zgjidhje e përkohshme në stolin e United, po fiton gjithnjë e më shumë besimin e drejtuesve të klubit, me Sir Jim Ratcliffe dhe bordi drejtues që tashmë po e konsiderojnë seriozisht si kandidat për të marrë postin në mënyrë të përhershme.

Ndeshja u ndikua ndjeshëm nga dalja me karton të kuq e Cristian Romero-s në minutën e 29-të. Mbrojtësi argjentinas u ndëshkua me të kuq direkt pas një faulli të rëndë ndaj Casemiros, duke lënë Tottenhamin me një lojtar më pak për më shumë se një orë lojë.

United përfitoi nga superioriteti numerik dhe kaloi në avantazh në pjesën e parë me golin e Bryan Mbeumo.

Në fraksionin e dytë, Bruno Fernandes vulosi fitoren 2-0, duke konfirmuar formën e tij të shkëlqyer.

Goli i Mbeumos ishte veçanërisht i dhimbshëm për trajnerin e Spurs, Thomas Frank, i cili kishte qenë një nga figurat kyçe në zhvillimin e francezit gjatë kohës së tij te Brentford.

Edhe para kartonit të kuq, Manchester United dukej një skuadër plot vetëbesim, e çliruar taktikisht pas ndryshimeve të fundit. Bruno Fernandes ishte protagonist absolut në fushë, duke lëvizur në çdo sektor dhe duke krijuar vazhdimisht rrezik për mbrojtjen kundërshtare.

Paraqitje pozitive zhvilluan edhe Kobbie Mainoo, i rikthyer në formacion dhe dukshëm më energjik, si dhe Matheus Cunha e Amad Diallo, të cilët u shfaqën të lirë dhe kreativë në fazën ofensive.

Banorët e Rrjollit protestuan sërish kundër punimeve në resortin që po ndërton në zonë biznesmeni Bashkim Ulaj.

Prej gjashtë ditësh ata protestojnë, ndërsa u kanë bërë edhe një thirrje kreut të PD Sali Berishës.

Sipas tyre, ata janë thirrur në protestën që do të mbahet të martën më 10 shkurt, por vetë Berisha nuk po i mbështet në protestën e tyre.

“Pse Sali Berisha na thërret me datën 10 kur ka interesa veta që të bëjmë rrëmujë. Kur e sheh 6 ditë këtë popull dhe nuk e çoi një përfaqësues, apo pse nuk erdhi për të na përfaqësuar e mbështetur në grevën tonë, në tokën tonë. A mos vallë ka dorë edhe Sali Berisha në këtë mes? I lutemi, mos na thirr kur ke interesat e tua, por na mbështet edhe në interesat tona”, shprehet një prej protestuesve.

Banorët e tjerë thonë se punimet do të ndërpriten çdo ditë.

“Çfarë kemi mbetur këtu jemi, çfarë do të vijë do e shohim. Do të jetë një protestë që nuk do të mbyllet as sot as pas një muaji, i bëjmë thirrje shtetit t’i vërë këto letra në dukje”- shprehen protestuesit.

Edhe në ditën e gjashtë punimet u ndërprenë përkohësisht, teksa banorët shprehen të vendosur për të mos lejuar punimet.

Deri tani është hapur rruga drejt kantierit të ndërtimit, ndërsa vendasit thonë se në momentin që do të preket zona e plazhit dhe pylli, atëherë protestat do të jenë më të ashpra.

LEXO EDHE: VIDEO/ “Gazermë” me 150 policë, Rrjolli nën rrethim për të mbrojtur resortin e Bashkim Ulajt

Andrea Formiga është kirurgu nën hetim nga prokuroria e Padovës në Itali, i cili operoi sipërmarrësin italian në një klinikë private në Shqipëri.

Pacienti kreu ndërhyrjen për zvogëlimin e stomakut dhe më pas kaloi në arrest kardiak në klinikë dhe ndërroi jetë në QSUT, ku ishte dërguar për ndihmë.

LEXO EDHE: Ndërhyrje për zvogëlimin e stomakut, biznesmeni italian humb jetën në një klinikë në Tiranë

Formiga është një kirurg italian i cili prej disa vitesh bashkëpunon me qendrën shëndetësore Trita Hospital në Shqipëri. Kjo qendër operon gjithashtu edhe klinikën esetike DermoLife.

Në një video të ndarë në faqet zyrtare të Trita Hospital, shkruhet se “pacientët e quajnë doktori i mrekullive’”. Mjeku rrëfen se ka më shumë se 30 vjet në këtë profesion. Veç Shqipërisë, thotë se është i aktivizuar në Liguria dhe “pak a shumë në të gjithë Italinë.”

Në Tiranë vinte 1 ose 2 herë në muaj ku në qendrën shëndetësore aplikon kirurgjinë bariatrike të stomakut ose që trajton problemet që lidhen me peshën. Gjithashtu kryen edhe procedura si fibrogastroskopia dhe kolonoskopia, ndërsa rendit edhe shërbime të tjera.

Dr. Andrea Formiga është Kirurg i Përgjithshëm si dhe Drejtor i Qendrës Ndërdisiplinore Bariatrike (C.I.B.O.) në Milano. Pas diplomimit në Mjekësi dhe Kirurgji nga Universiteti i Milanos (1996), ai u specializua përsëri në të njëjtin universitet, në Kirurgjinë e Përgjithshme (2002). Në vitet 1994-1997 Dr. Formiga hodhi hapat e tij të parë profesional si student/mjek në Spitalin San Giuseppe të Milanos. Në vitin 1998 filloi punë, fillimisht si rezident dhe më pas si specialist i pavarur në Kirurgjinë e Përgjithshme, në Poliklinikën San Marco, nën drejtimin e Prof. Carlo Rebuffat. Në vitin 2008 filloi t’i përkushtohej aktivitetit Bariatrik në Klinikën San Carlo në Milano, ndërsa nga viti 2014 deri në vitin 2015 ishte Shef i Kirurgjisë së Përgjithshme dhe Endoskopisë Digjestive në Institutin Auxologjik. Që nga viti 2002, Dr. Formiga ka qenë profesionist i pavarur në Casa di Cura La Madonnina, një aktivitet të cilin me kalimin e viteve ai e ka shtuar edhe në Casa di Cura Columbus, Casa di Cura Villa Arbe në Milano, Casa di Cura Montanari, në Morciani di Romagna, si dhe në Spitalin Nigrisoli në Bolonja. Dr. Formiga ka historinë më të madhe të rasteve italiane për trajtimet endobariatrike të kryera dhe një listë të gjatë të ndërhyrjeve nariatrike për të mposhtur obezitetin.”

E njëjta përmbledhje edhe në faqen e DermoLife, por shtohen disa detaje, si:

“Nga viti 2008 – në vazhdim, Dr. Formiga ka realizuar mbi 500 procedura bariatrike ndërkombëtarisht. Ky angazhim ka çuar në krijimin e qendrës së parë italiane për trajtimin e obezitetit me teknika endoskopike mininvasive, një arritje që ka pasur ndikim të madh në përmirësimin e kujdesit për pacientët me obezitet.”

Ndërsa më tej theksohet “qasja e kujdesshme” e Formigas ndaj pacientëve.

“Dr. Formiga është i njohur për qasjen e tij të kujdesshme dhe të personalizuar ndaj pacientëve, duke ofruar një mbështetje të plotë gjatë gjithë procesit të trajtimit dhe pas interventit.”

Momente tensioni u regjistruan në minutën e 24-t në duelin mes Kastriotit dhe Kukësit të zhvilluar në stadiumin “Redi Maloku” të Fushë-Krujës.

Një faull i vendasve në krahun e majtë të fushës, solli një përleshje masive mes lojtarëve, teksa ai që e pësoi ishte sulmuesi i Kukësit, Tajo, i afruar me bujë në merkaton e dimrit nga skuadra e Skënderbeut.

20-vjeçari u ndëshkua nga gjyqtari Dyrmishi me karton të kuq në debutimin e tij me Kukësin, ndërkohë që Samuel, Uilson dhe Hasa, u ndëshkuan me karton të verdhë.

Shikoni pamjet:

Pasi pranuan që të dëshmojnë para Kongresit amerikan lidhur me çështjen “Epstein”, ish-presidenti amerikan Bill Klinton dhe ish-Sekretarja e Shtetit Hillary Clinton, kërkuan që ajo të jetë publike.

Ish-çifti presidencial demokrat u thirr të jepte dëshmi me dyer të mbyllura para komitetit mbikëqyrës të Dhomës së Përfaqësuesve, i drejtuar nga republikanët, që po heton lidhjet e Epstein me figura të fuqishme dhe mënyrën se si është trajtuar informacioni rreth krimeve të tij. Bill Clinton theksoi se një seancë e mbyllur mund të përdoret për qëllime politike, ndërsa Hillary Clinton deklaroi se çifti kishte ndarë tashmë atë që dinë rreth asaj çështjeje.

“Nëse e doni këtë betejë, le ta bëjmë publikisht”- tha ish-sekretarja e Shtetit , – Ju pëlqen të flisni për transparencën. Nuk ka asgjë më transparente se një seancë dëgjimore publike, me kamera të ndezura. Ne do të jemi atje.”- theksoi ajo.

Ish-presidenti Clinton dhe një sërë figurash të rëndsishme botërore, përfshirë kreun e Shtëpisë së Bardhë Donald Trump, kanë patur një marrëdhënie të mirë me Jeffrey Epstein në fund të viteve 1990 dhe fillim të viteve 2000.

Të dy përmenden dhe kanë fotografi në dosjet e çështjes Epstein të publikuara nga Departamentit të Drejtësisë, por as Trump dhe as Clinton nuk janë akuzuar për ndonjë shkelje në ndërveprimet e tyre me financierin e ndjerë.

Ish- çifti presidencial tha se nuk ka patur dijeni se Epstein abuzonte seksualisht me vajza të mitura përpara se prokurorët të ngrinin akuza kundër tij.

Sipas FOX News, Hillary Clinton do të dëshmojë para Komitetit Mbikëqyrës të Dhomës së Përfaqësuesve më 26 shkurt, ndërsa bashkëshorti i saj, Bill Clinton do të paraqitet më 27 shkurt.

Juristi i njohur Bledi Dervishaj thotë se vendimin e djeshëm, për të mos marrë vendim, Gjykata Kushtetuese ka dështuar në misionin e saj sublim, sepse nuk e zgjidhi në mënyrë përfundimtare mosmarrëveshjen e lindur mes Qeverisë dhe Drejtësisë për rastin “Balluku”.

Sipas tij, duke e lënë çështjen pa zgjidhje dhe në konflikt të hapur midis pushteteve, atëherë kjo çështje tashmë ligjërisht, rikthehet edhe njëherë për shqyrtim në tryezën e një gjyqtari në Gjykatën e Posaçme të Apelit, për shkak se ende nuk është shqyrtuar ankimi individual, ndaj masës së sigurimit “pezullim nga detyra”.

“Efektet që sjell dhe pasojat që krijohen nga lënia pa zgjidhje nga Gjykata Kushtetuese, e një çështje me kaq rëndësi të lartë shtetërore, mbi një mosmarrëveshje të kësaj natyre midis tre degëve kryesore të pushteteve në Republikën tonë Parlamentare, janë shumë herë më të rënda, se sa ato pasoja me karakter individual”, shkruan Blendi Dervishaj.

Juristi sqaron se në këtë situatë të përkohshme pa zgjidhje, pra pa vendim të Gjykatës Kushtetuese, struktura e posaçme (gjyqësori dhe prokuroria), në kushtet kur nuk ka një zgjidhje përfundimtare të vendosjes së qartë të kufijve, balancës, dhe kompetencave midis pushteteve (ekzekutiv, legjislativ dhe gjyqësor), ka në dorë praktikisht të zgjedhë, që rast pas rasti, ta luajë ose jo, një rol me karakter politik, kryesisht, për shkarkimin e një anëtari të Këshillit të Ministrave, duke diktuar, rast pas rasti, se kush dhe me kë do të qeverisë.

“Kjo qasje, nuk ka lidhje me emra individë lsh, apo fatin e tyre, politik apo ligjor. Jo”, thekson ai.

Sipas Bledi Dervishaj, Shqipëria po përjeton një situatë të paqartë dhe kaos organizativ e ligjor, që nuk e ka asnjë vend tjetër me standarde europiane, sepse të gjithë bëjnë siç ju thotë mendja dhe Gjykata Kushtetuese, si arbitër, nuk ka kurajo që të përmbushë detyrimet e tij për ta zgjidhur çështjen në themel.

“Kjo është e papranueshme”, thekson ai.

Lexoni shënimin e juristit Bledi Dervishaj, ish-Këshilltar për Çështjet ligjore i Presidentit të Republikës

Në Kushtet, kur Gjykata Kushtetuese ditën e djeshme në datë 06.02.2026, nuk e përmbushi misionin e saj sublim, pra nuk e zgjidhi në mënyrë përfundimtare mosmarrëveshjen e lindur, duke e lënë çështjen pa zgjidhje dhe në konflikt të hapur midis pushteteve, atëherë kjo çështje tashmë ligjërisht, rikthehet edhe njëherë për shqyrtim në tryezën e një gjyqtari në Gjykatën e Posaçme të Apelit, për shkak se ende nuk është shqyrtuar ankimi individual, ndaj masës së sigurimit “pezullim nga detyra”.

Kujtoj që, Gjykata e Posaçme e Apelit, në datën 18 dhjetor 2025, ka vendosur:

Pezullimin e shqyrtimit gjyqësor të çështjes nr.86 (61007-00414-87-2025), datë regjistrimi 11.12.2025, përsa i përket shqyrtimit të ankimit të ankueses B.B. ndaj vendimeve 118, datë 19.11.2025 dhe nr. 120, datë 22.11.2025 të Gjykatës së Posaçme të Shkallës së Parë për Korrupsionin dhe Krimin e Organizuar, për pjesën që ajo ka kundërshtuar caktimin dhe vazhdimin e masës së sigurimit personal me karakter ndalues “Pezullimi i ushtrimit të një detyre a shërbimi publik”, të parashikuar nga neni 242 i K.Pr.Penale, deri në zgjidhjen me vendim përfundimtar nga Gjykata Kushtetuese të çështjes së regjistruar për gjykim në atë gjykatë, me kërkues: Kryeministri i Republikës së Shqipërisë, me objekt:

“(i) zgjidhjen e mosmarrëveshjes së kompetencës së krijuar ndërmjet Kryeministrit e Këshillit të Ministrave dhe Gjykatës së Posaçme të Shkallës së Parë;

(ii) shfuqizimin e vendimit të Gjykatës së Posaçme të Shkallës së Parë, që ka vendosur masën ndaluese të pezullimit të ushtrimit të detyrës së zëvendëskryeministres dhe ministres së Infrastrukturës dhe Energjisë, shtetases B.B. dhe pezullimin e këtij vendimi;

(iii) interpretimin e pikës 3 të nenit 103 të Kushtetutës”, çështje për të cilën Gjykata Kushtetuese ka disponuar me vendimin datë 12.12.2025: “Pezullimin e zbatimit të vendimeve gjyqësore nr. 118, datë 19.11.2025 dhe nr. 120, datë 22.11.2025 të Gjykatës së Posaçme të Shkallës së Parë për Korrupsionin dhe Krimin e Organizuar, për pjesën që kanë disponuar caktimin dhe vazhdimin e masës ndaluese

“Pezullimi i ushtrimit të një detyre a shërbimi publik” ndaj shtetases B.B., sipas nenit 45 të ligjit organik të Gjykatës”.

Efektet që sjell dhe pasojat që krijohen nga lënia pa zgjidhje nga Gjykata Kushtetuese, e një çështje me kaq rëndësi të lartë shtetërore, mbi një mosmarrëveshje të kësaj natyre midis tre degëve kryesore të pushteteve në Republikën tonë Parlamentare, janë shumë herë më të rënda, se sa ato pasoja me karakter individual.

Praktikisht, në këtë situatë amorfe, edhe pse e përkohshne pa zgjidhje, pra pa vendim të Gjykatës Kushtetuese, struktura e posaçme (gjyqësori dhe prokuroria), në kushtet kur nuk ka një zgjidhje përfundimtare të vendosjes së qartë të kufijve, balancës, dhe kompetencave midis pushteteve (ekzekutiv, legjislativ dhe gjyqësor), ka në dorë praktikisht të zgjedhë, që rast pas rasti, ta luajë ose jo, një rol me karakter politik, kryesisht, për shkarkimin e një anëtari të Këshillit të Ministrave, duke diktuar, rast pas rasti, se kush dhe me kë do të qeverisë. Kjo qasje, nuk ka lidhje me emra individë lsh, apo fatin e tyre, politik apo ligjor. Jo.

Por Shqipëria, si vend i çudirave, po përjeton pikërisht një situatë të paqartë, dhe kaosi organiziativ dhe ligjor, që nuk e ka asnjë vend tjetër me standarte europiane, e krijuar apo e përkeqësuar pikërisht për shkak se, secili bën si i thotë mendja, ndërsa arbitri kushtetues, nuk ka kurajo, që të përmbushë detyrimet e tij për ta zgjidhur çështjen në themel.

Kjo është e papranueshme.

Pasi u mësuan katër skuadrat gjysmëfinaliste të “Copa del Rey”, Kupa e Mbretit në Spanjë për këtë sezon, shorti i hedhur ka rezervuar përballje spektakolare në fazën gjysmëfinale të turneut.

Atletico Madrid do të përballet me Barcelonën, ndërsa çifti tjetër gjysmëfinalist do të jetë derbi bask Athletic Bilbao – Real Sociedad.

Ndeshjet e para gjysmëfinale do të zhvillohen javën e ardhshme në Madrid dhe Bilbao (11 dhe 12 shkurt), ndërsa takimet e kthimit janë planifikuar për javën e parë të muajit mars në Barcelonë dhe ‘San Sebastian’ (3 dhe 4 mars).

Dy duelet pritet të dhurojnë emocione të forta, me katër ekipe që synojnë finalen e madhe të Kupës së Mbretit.

Nëse ju vjen një mesazh nga një mik i njohur, me të cilin keni pasur biseda të mëparshme, dhe ju kërkohet ndihmë për një “konkurs” apo “votim”, duhet të tregoni kujdes të shtuar.

Në shumicën e rasteve, nuk bëhet fjalë për mikun tuaj, por për një haker që ka marrë ose po tenton të marrë kontrollin e profilit të tij. Skema funksionon duke shfrytëzuar faktin që mesazhi vjen nga një kontakt i besuar dhe nga një bisedë ekzistuese, çka e ul vigjilencën e marrësit.

Sipas ekspertëve të sigurisë kibernetike, mashtruesi sillet dhe shkruan si miku juaj, duke u referuar bisedave të mëparshme dhe duke ju kërkuar një “ndihmë të vogël”, zakonisht të lidhur me një konkurs apo votim online. Në realitet, ajo që kërkohet është kodi i verifikimit për rivendosjen e fjalëkalimit të llogarisë në rrjetet sociale.

Kodi 6 ose 8-shifror që ju vjen me mesazh është, në fakt, çelësi që i jep akses mashtruesit për të marrë kontrollin e plotë të llogarisë. Ekspertët apelojnë që këto kode të mos shpërndahen në asnjë rast, pavarësisht se kush i kërkon.

Më të rrezikuarit nga ky lloj mashtrimi janë moshat e treta, për shkak të mungesës së informacionit teknik dhe besimit më të lartë ndaj personit që u shkruan. Sipas specialistëve, një pjesë e madhe e këtyre sulmeve vijnë nga vende të Azisë dhe Afrikës, ku përdorimi i llogarive false dhe skemat e mashtrimit online janë më të përhapura.

Ekspertët këshillojnë qytetarët të tregojnë vigjilencë maksimale, pasi një klikim i gabuar ose dërgimi i një kodi pa u menduar mund të sjellë humbjen e llogarisë, aksesin në të dhënat personale dhe përdorimin e tyre për mashtrime të mëtejshme.

“Për gati 10 vite Edi Rama drejtoi me “sukses të plotë” edhe opozitën, përveçse Qeverinë, Parlamentin dhe çdo institucion tjetër, veç Presidencës deri më 24 korrik 2022. Kjo është një “meritë” dhe nuk mund t’i mohohet.

Por kjo më shumë se “meritë” e tij për të korruptuar edhe lidershipin e opozitës ka qenë dobësi dhe pabesi e atyre që kanë pranuar të shiten për interesa personale, por edhe për hallet e tyre edhe me drejtësinë”.

Kështu e nis reagimin e tij të gjatë në rrjetet sociale, ish presidenti dhe kreu i Partisë së Lirisë, Ilir Meta.

Sipas Metës, debatet për Reformën Territoriale dhe rëndësinë e pjesëmarrjes së opozitës në të edhe pse mazhoranca ka 83 + 3 votat për ta miratuar për përqëndrimin e pakufishëm të pushtetit në duart e tij.

Ish presidenti shton se, fatkeqësisht Edi Rama e miratoi variantin që dëshironte edhe kur kishte vetëm 65 vota nga 84 që i duheshin 11 vite më parë.

“Kjo ndodhi me vetëdijen e plotë të lidershipit të PD-së në ato kohë që jo vetëm bojkotoi Komisionin e Reformës, por mbi të gjitha kurrë nuk dha një alternativë të sajën që iu kërkua në atë kohë deri në 100 apo 110 njësi vendore“, shkruan Meta.

Postimi i plotë i Metës:

𝐓𝐞𝐳𝐚𝐭 𝐞 𝐄𝐝𝐢 𝐑𝐚𝐦𝐞̈𝐬 𝐧𝐮𝐤 𝐦𝐮𝐧𝐝 𝐭𝐚 𝐛𝐚𝐬𝐡𝐤𝐨𝐣𝐧𝐞̈ 𝐨𝐩𝐨𝐳𝐢𝐭𝐞̈𝐧

Për gati 10 vite Edi Rama drejtoi me “sukses të plotë” edhe opozitën, përveçse Qeverinë, Parlamentin dhe çdo institucion tjetër, veç Presidencës deri më 24 korrik 2022.

Kjo është një “meritë” dhe nuk mund t’i mohohet.

Por kjo më shumë se “meritë” e tij për të korruptuar edhe lidershipin e opozitës ka qenë dobësi dhe pabesi e atyre që kanë pranuar të shiten për interesa personale, por edhe për hallet e tyre edhe me drejtësinë.

Sot me të drejtë debatohet për Reformën Territoriale dhe rëndësinë e pjesëmarrjes së opozitës në të edhe pse Edi Rama i ka 83 + 3 votat për ta miratuar në fund, sipas oreksit të tij, për përqëndrimin e pakufishëm të pushtetit në duart e tij.

Fatkeqësisht Edi Rama e miratoi variantin që dëshironte edhe kur kishte vetëm 65 vota nga 84 që i duheshin 11 vite më parë.

Kjo ndodhi me vetëdijen e plotë të lidershipit të PD-së në ato kohë që jo vetëm bojkotoi Komisionin e Reformës, por mbi të gjitha kurrë nuk dha një alternativë të sajën që iu kërkua në atë kohë deri në 100 apo 110 njësi vendore.

Të gjithë ata që kanë qenë në Konferencën Kombëtare të Partisë Demokratike në atë kohë, dedikuar vetëm pushtetit vendor, besoj e kujtojnë pjesëmarrjen atje të të ndjerit Z. Bashkim Fino, por edhe të Z. Petrit Vasili, që në emër të mazhorancës (PS-LSI) i kërkuan PD që të paraqiste një variant të sajin për t’u miratuar me konsensus.

Pjesëmarrja e Z. Fino dhe Z. Vasili u bë vetëm falë insistimit tim që kjo Reformë të bëhej vetëm me konsensusin e PD dhe opozitës.

Por kurrë nuk u paraqit një platformë nga ana e PD (edhe pse në dijeninë time ishte përgatitur një e tillë nga ekspertët e saj). Kjo ndodhi sepse “matematikani” i shquar që drejtonte PD kishte marrë një ofertë jopublike nga Edi Rama se atij i dilte llogaria më mirë të bojkotonte deri në fund dhe bojkotimin ta paraqiste si alibi, por edhe se në disa bashki ku do kandidonin përfaqësues të LSI në emër të koalicionit PS-LSI nën rrogoz PS do punonte për kandidatët e “matematikanit”.

Dhe kështu ndodhi.

“Matematikani” kurrë nuk paraqiti një projekt alternativë pranë Komisionit Parlamentar dhe si shpërblim mori mbështetjen e “nëndheshme” nga strukturat e PS në Lezhë, Pogradec, etj., që në atë kohë u cilësuar si “pazari i Roskovecit”.

Edhe pse nuk jam optimist se pjesëmarrja e opozitës në këtë Komision do të jetë ndikuese në vendimin përfundimtar të shumicës (83 + 3), përsëri në respekt të qytetarëve që vujanë shkatërrimin e shërbimeve publike sot nga pushteti vendor besoj se opozita e ka për detyrë të paraqesë alternativën e saj përpara qytetarëve shqiptarë, por edhe Komisionit Parlamentar.

“Matematikani” i madh pasi mori në 2015 Lezhën dhe Pogradecin, në 2019 bëri një lëvizje prej “shahisti” të paparë dhe ia dorëzoi të gjitha bashkitë “Rilindjes” me qëllimin “strategjik”, që duke ia lënë gjithë pushtetet të pangopurit, ai të rrëzohej përtokë nga mbipushteti absolut, siç ndodh me lopën kur ha shumë jonxhë.

Për të realizuar këtë qëllim madhor nuk pranoi të regjistronte as formalisht PD-në në KQZ për të marrë pjesë në datën e zgjedhjeve lokale, të shtyra me kërkesë të tij (por edhe Bundestagut), pikërisht në datën që ai kishte zgjedhur vetë.

Dhe që të mos zgjatem më tej, kulmi i “matematikës” ishte Kuvendi “historik” i 2 mijë karrigeve me 5 mijë delegatë.
Këto “kryevepra” që as “Diella” nuk i imagjinon dot më kujtohen kur dëgjoj plot teza që krijuesi i “Diellës” i shpërndan përmes “matematikanëve” më pak të shquar sot opozitarë.

Sidomos sot, me përballjen me një diktaturë, de facto opozitarizmi duhet të mbështetet së pari te guximi për t’u përballur pa komplekse me regjimin dhe së dyti te gjithëpërfshirja demokratike dhe transparente, e cila si emërues të përbashkët duhet të ketë unifikimin e çdo aktori opozitar për realizimin e një sistemi zgjedhor, që rikthen parlamentarizmin e cënuar që në 2008 dhe i jep fuqi qytetarëve të zgjedhin deputetët e tyre (dhe jo kryetarëve).
Ky do të ishte pikëtakimi i parë i të gjithë atyre që kërkojnë ndryshimin e sistemit.
Të vetmit që ky ndryshim nuk i intereson është Edi Rama (sepse edhe socialistët janë lodhur me emërime deputetësh).

𝐌𝐛𝐢 𝐤𝐞̈𝐭𝐞̈ 𝐛𝐚𝐳𝐞̈ 𝐦𝐚𝐝𝐡𝐨𝐫𝐞 𝐦𝐮𝐧𝐝 𝐭𝐞̈ 𝐧𝐝𝐞̈𝐫𝐭𝐨𝐡𝐞𝐧 𝐟𝐨𝐫𝐦𝐚𝐭 𝐦𝐞̈ 𝐤𝐨𝐧𝐬𝐭𝐫𝐮𝐤𝐭𝐢𝐯𝐞 𝐭𝐞̈ 𝐛𝐚𝐬𝐡𝐤𝐞̈𝐩𝐮𝐧𝐢𝐦𝐢𝐭 𝐝𝐡𝐞 𝐨𝐫𝐠𝐚𝐧𝐢𝐳𝐢𝐦𝐢𝐭 𝐨𝐩𝐨𝐳𝐢𝐭𝐚𝐫, 𝐝𝐮𝐤𝐞 𝐫𝐮𝐚𝐣𝐭𝐮𝐫 𝐢𝐝𝐞𝐧𝐭𝐢𝐭𝐞𝐭𝐢𝐧 𝐞 𝐬𝐞𝐜𝐢𝐥𝐢𝐭, 𝐩𝐨𝐫 𝐧𝐞̈ 𝐟𝐮𝐧𝐤𝐬𝐢𝐨𝐧 𝐭𝐞̈ 𝐧𝐝𝐫𝐲𝐬𝐡𝐢𝐦𝐢𝐭 𝐭𝐞̈ 𝐤𝐞̈𝐭𝐢𝐣 𝐬𝐢𝐬𝐭𝐞𝐦𝐢, 𝐢 𝐜𝐢𝐥𝐢 𝐧𝐞̈ 𝐭𝐡𝐞𝐥𝐛 𝐞̈𝐬𝐡𝐭𝐞̈ 𝐚𝐧𝐭𝐢𝐤𝐮𝐬𝐡𝐭𝐞𝐭𝐮𝐞𝐬, 𝐬𝐞𝐩𝐬𝐞 𝐜𝐞̈𝐧𝐨𝐧 𝐛𝐚𝐫𝐚𝐳𝐢𝐧𝐞̈ 𝐝𝐡𝐞 𝐯𝐥𝐞𝐟𝐬𝐡𝐦𝐞̈𝐫𝐢𝐧𝐞̈ 𝐞 𝐯𝐨𝐭𝐞̈𝐬 𝐦𝐢𝐝𝐢𝐬 𝐬𝐮𝐛𝐣𝐞𝐤𝐭𝐞𝐯𝐞, 𝐩𝐨𝐫 𝐞𝐝𝐡𝐞 𝐪𝐚𝐫𝐪𝐞𝐯𝐞 𝐭𝐞̈ 𝐧𝐝𝐫𝐲𝐬𝐡𝐦𝐞.

Garantimi i një marrëveshjeje gjithëpërfshirëse zgjedhore që mundëson mosdjegien e votave opozitare, u jep mundësi të gjithë faktorëve të marrin atë që meritojnë.

𝐍𝐝𝐞̈𝐫𝐬𝐚 𝐯𝐞𝐧𝐝𝐨𝐬𝐣𝐚 𝐞 “𝐤𝐮𝐬𝐡𝐭𝐞𝐯𝐞 𝐦𝐨𝐫𝐚𝐥𝐞” 𝐧𝐞̈ 𝐦𝐞̈𝐧𝐲𝐫𝐞̈ 𝐣𝐨𝐩𝐚𝐫𝐢𝐦𝐨𝐫𝐞 𝐞 𝐬𝐮𝐛𝐣𝐞𝐤𝐭𝐞𝐯𝐞 𝐞̈𝐬𝐡𝐭𝐞̈ 𝐯𝐞𝐭𝐞̈𝐦 𝐧𝐞̈ 𝐬𝐡𝐞̈𝐫𝐛𝐢𝐦 𝐧𝐝𝐚𝐣 𝐑𝐚𝐦𝐞̈𝐬, 𝐪𝐞̈ 𝐫𝐞𝐠𝐣𝐢𝐦𝐢 𝐭𝐞̈ 𝐯𝐚𝐳𝐡𝐝𝐨𝐣𝐞̈ 𝐭𝐞̈ 𝐯𝐣𝐞𝐝𝐡𝐞̈ 𝐧𝐞̈ 𝐦𝐞̈𝐧𝐲𝐫𝐞̈ 𝐬𝐤𝐢𝐳𝐨𝐟𝐫𝐞𝐧𝐢𝐤𝐞, 𝐬𝐞 𝐨𝐩𝐨𝐳𝐢𝐭𝐚 𝐞̈𝐬𝐡𝐭𝐞̈ “𝐞 𝐩𝐞̈𝐫𝐜̧𝐚𝐫𝐞̈”.
𝐒𝐡𝐩𝐢𝐤𝐣𝐚 𝐞 𝐩𝐚𝐫𝐭𝐢𝐯𝐞 𝐬𝐢 𝐆𝟗𝟗, 𝐪𝐞̈ 𝐛𝐞̈𝐣𝐧𝐞̈ 𝐬𝐢𝐤𝐮𝐫 𝐤𝐫𝐢𝐭𝐢𝐤𝐨𝐣𝐧𝐞̈ 𝐫𝐞𝐠𝐣𝐢𝐦𝐢𝐧 𝐩𝐞̈𝐫 𝐭𝐞̈ 𝐛𝐞̈𝐫𝐞̈ 𝐨𝐩𝐨𝐳𝐢𝐭𝐞̈𝐧 𝐞 𝐨𝐩𝐨𝐳𝐢𝐭𝐞̈𝐬, 𝐧𝐮𝐤 𝐛𝐞𝐬𝐨𝐣 𝐬𝐞 𝐝𝐨 𝐭𝐞̈ 𝐟𝐮𝐧𝐬𝐢𝐨𝐧𝐨𝐣𝐞̈ 𝐦𝐞̈ 𝐧𝐞̈ 𝐭𝐞̈ 𝐚𝐫𝐝𝐡𝐦𝐞𝐧.
𝐊𝐣𝐨 𝐧𝐮𝐤 𝐦𝐮𝐧𝐝 𝐭𝐞̈ 𝐣𝐞𝐭𝐞̈ 𝐛𝐞𝐭𝐞𝐣𝐞̈ 𝐩𝐞̈𝐫 𝐦𝐛𝐢𝐣𝐞𝐭𝐞𝐬𝐞̈𝐧 𝐩𝐨𝐥𝐢𝐭𝐢𝐤𝐞 𝐭𝐞̈ 𝐚𝐬𝐧𝐣𝐞̈ 𝐩𝐚𝐫𝐭𝐢𝐞 𝐚𝐩𝐨 𝐢𝐧𝐝𝐢𝐯𝐢𝐝𝐢 𝐪𝐞̈ “𝐮𝐬𝐡𝐪𝐞𝐡𝐞𝐭” 𝐮𝐧𝐝𝐞𝐫𝐠𝐫𝐨𝐮𝐧𝐝 𝐧𝐠𝐚 𝐫𝐞𝐠𝐣𝐢𝐦𝐢.

𝐊𝐣𝐨 𝐞̈𝐬𝐡𝐭𝐞̈ 𝐧𝐣𝐞̈ 𝐛𝐞𝐭𝐞𝐣𝐞̈ 𝐞𝐤𝐳𝐢𝐬𝐭𝐞𝐧𝐜𝐢𝐚𝐥𝐞 𝐩𝐞̈𝐫 𝐒𝐡𝐪𝐢𝐩𝐞̈𝐫𝐢𝐧𝐞̈ 𝐦𝐞 𝐬𝐡𝐪𝐢𝐩𝐭𝐚𝐫𝐞̈.

Dështimi nuk mund të jetë alternativë. Justifikimet do i shërbenin vetëm regjimit antishqiptar dhe antifamilje në fuqi.

𝐍𝐝𝐚𝐣 𝐞𝐝𝐡𝐞 𝐤𝐫𝐲𝐞𝐭𝐞𝐳𝐚 𝐞 𝐩𝐫𝐨𝐱𝐲-𝐨𝐩𝐨𝐳𝐢𝐭𝐚𝐫𝐞̈𝐯𝐞 𝐭𝐞̈ 𝐑𝐚𝐦𝐞̈𝐬, 𝐬𝐞 𝐩𝐚 𝐡𝐞𝐪𝐮𝐫 𝐁𝐞𝐫𝐢𝐬𝐡𝐞̈𝐧 𝐧𝐮𝐤 𝐦𝐮𝐧𝐝 𝐭𝐞̈ 𝐡𝐞𝐪𝐢𝐦 𝐑𝐚𝐦𝐞̈𝐧, 𝐞̈𝐬𝐡𝐭𝐞̈ 𝐭𝐞𝐣𝐞𝐭 𝐚𝐛𝐬𝐮𝐫𝐝𝐞, 𝐞 𝐩𝐚 𝐦𝐨𝐫𝐚𝐥𝐬𝐡𝐦𝐞 𝐝𝐡𝐞 𝐝𝐞𝐬𝐭𝐫𝐮𝐤𝐭𝐢𝐯𝐞. 𝐊𝐣𝐨 𝐤𝐫𝐲𝐞𝐭𝐞𝐳𝐞̈ 𝐞̈𝐬𝐡𝐭𝐞̈ 𝐚𝐛𝐬𝐮𝐫𝐝𝐞 𝐬𝐞 𝐭’𝐢 𝐢𝐦𝐩𝐨𝐧𝐨𝐡𝐞𝐬𝐡 𝐧𝐣𝐞̈ 𝐩𝐚𝐫𝐭𝐢𝐞 𝐦𝐞̈ 𝐭𝐞̈ 𝐦𝐚𝐝𝐡𝐞 𝐬𝐞 𝐜𝐢𝐥𝐢𝐧 𝐝𝐮𝐡𝐞𝐭 𝐭𝐞̈ 𝐤𝐞𝐭𝐞̈ 𝐮𝐝𝐡𝐞̈𝐡𝐞𝐪𝐞̈𝐬, 𝐞̈𝐬𝐡𝐭𝐞̈ 𝐭𝐞𝐣𝐞𝐭 𝐚𝐮𝐭𝐨𝐫𝐢𝐭𝐚𝐫𝐞 𝐝𝐡𝐞 𝐟𝐲𝐞𝐬𝐞, 𝐚𝐪 𝐦𝐞̈ 𝐭𝐞𝐩𝐞̈𝐫 𝐤𝐮𝐫 𝐟𝐥𝐞𝐭 𝐧𝐞̈ 𝐞𝐦𝐞̈𝐫 𝐭𝐞̈ 𝐯𝐨𝐭𝐞̈𝐬 𝐬𝐞̈ 𝐥𝐢𝐫𝐞̈ 𝐝𝐡𝐞 𝐝𝐞𝐦𝐨𝐤𝐫𝐚𝐜𝐢𝐬𝐞̈.

Kjo kryetezë është e pamoralshme, se të krahasosh Berishën që është përballur dhe përballet me drejtësinë që e kapi Edi Rama në mënyrë antikushtetuese, ndërsa ky i fundit ka terren edhe nga drejtësia e tij, të cilën tani po e linçon edhe publikisht, sepse (pusetat) e korrupsionit të tij kanë shpërthyer e qelbur dynjanë, është hipokrizia më cipëplasur.

Të krahasosh Berishën që po përndiqet familjarisht për një vendim Qeverie të iniciuar nga ministrat socialistë dhe ku i vetmi dëmtues i interesit publik është ish-kryebashkiaku i Tiranës, Edi Rama dhe të (harrosh) se ky i marrosur pas korrupsionit, ka një firmë të zezë në të bardhë ku i jep bonusin 8% kompanisë së inceneratorëve kohë përpara se kompania të ekzistonte (lindte ose regjistrohej) do të thotë të vetshpallesh “rilindas”.

Kjo kryetezë është destruktive dhe mashtuese njëkohësisht, sepse e planifikon “ndryshimin” pas disa dekadave, por duke shpresuar në votat e banorëve të ardhshëm të Shqipërisë si bangladeshasit, filipinasit e plotë kombësi të tjera të respektuara, me të cilat “Rilindja” synon të zëvendësojë shqiptarët ( që kanë mbetur).

Dhe deri atëherë “palloshi i gjatë” do i ketë bërë qokë ndonjë “arabi” dhe Krujën me gjithë kalanë, muzeun dhe shtatoren e Skënderbeut.

Gjatë qëndrimit të saj në Uashington të SHBA-ve, Ministrja për Europën dhe Punët e Jashtme, Elisa Spiropali, zhvilloi një takim në Departamentin Amerikan të Tregtisë me Zëvendëssekretarin për Tregtinë Ndërkombëtare, William P. J. Kimmitt, dhe Zëvendëssekretarin për Industrinë dhe Sigurinë, Jeffrey I. Kessler.

Takimi me dy zyrtarët e lartë u fokusua në forcimin e bashkëpunimit ekonomik mes Shqipërisë dhe Shteteve të Bashkuara, sidomos për rritjen e investimeve amerikane, energjinë, infrastrukturën dhe projektet me rëndësi strategjike.

Spiropali theksoi se “Shqipëria mbetet një aleate e besueshme në NATO dhe një vend i hapur për biznesin amerikan në Ballkanin Perëndimor.”

“Partneriteti ynë me SHBA-të po forcohet jo vetëm në fushën e sigurisë, por edhe në zhvillimin ekonomik dhe investimet konkrete“, tha Spiropali.

Postimi i plotë:

Gjatë vizitës në Uashington zhvillova një takim në Departamentin Amerikan të Tregtisë, me Zëvendëssekretarin për Tregtinë Ndërkombëtare, William P. J. Kimmitt, dhe Zëvendëssekretarin për Industrinë dhe Sigurinë, Jeffrey I. Kessler.

Folëm për forcimin e bashkëpunimit ekonomik mes Shqipërisë dhe Shteteve të Bashkuara, sidomos për rritjen e investimeve amerikane, energjinë, infrastrukturën dhe projektet me rëndësi strategjike.
Shqipëria mbetet një aleate e besueshme në NATO dhe një vend i hapur për biznesin amerikan në Ballkanin Perëndimor.

Partneriteti ynë me SHBA-të po forcohet jo vetëm në fushën e sigurisë, por edhe në zhvillimin ekonomik dhe investimet konkrete.