Kryeministri Albin Kurti, ka njoftuar se bashkëshortja e ambasadorit William Walker, është shtrirë në emergjencën e Vitisë.
Këtë njoftim, Kurti e bëri gjatë fjalimit të tij në Akademinë e “Flakës së Janarit” mbrëmjen e sotme në Gjilan.
“I bashkëngjitem urimeve për shëndetin e gruas së William Walker, e cila për shkak të një problemi shëndetësor, ndoshta edhe arrest kardiak, është duke u trajtuar në emergjencë në komunën e Vitisë dhe shpresojmë në rikuperim të plotë dhe të shpejtë të saj”, tha Kurti në fjalën e tij, kur ishte duke folur për kontributin e Ambasadorit Walker në denoncimin e Masakrës së Reçkaut.
Kurti theksoi se duhet të përkujtojmë rolin unik të ambasadorit William Walker, si dëshmitar dhe denoncues i Masakrës së Reçakut, si krim kundër njerëzimit, e pikërisht kjo deklaratë e ambasadorit Walker ia bëri të qartë botës të vërtetën për krimet shtetërore të Serbisë në Kosovë./Telegrafi/
Përfaqësuesi i LVV-së në KQZ, Alban Krasniqi ka deklaruar se kushdo që qëllimshëm ka tjetërsuar vullnetin e votuesve në Qendrat Komunale të Numërimit do të përballet me drejtësinë.
Krasniqi theksoi se KQZ-ja disponon të gjithë mekanizmat e nevojshëm për të identifikuar saktësisht si shkeljet, ashtu edhe shkelësit.
Ai gjithashtu shprehu respekt për angazhimin e pashoq të stafit të Sekretariatit të KQZ-së dhe të më shumë se 150 numëruesve, të cilët me përkushtim dhe profesionalizëm po punojnë pa ndërprerje, çdo ditë nga ora 08:00 deri në 24:00, në procesin e rinumërimit të kutive në QNR.
Po ashtu, Krasniqi falënderoi edhe vëzhguesit e subjekteve politike për punën dhe kujdesin e treguar gjatë procesit në QNR./Telegrafi/
Procesi i rinumërimit të Gjysmës së vendvotimeve për zgjedhjet e parakohshme parlamentare të 28 dhjetorit ka sjellë ndryshime të dukshme në numrin e votave të kandidatëve për deputetë.
Sipas Komisionit Qendror të Zgjedhjeve (KQZ), janë numëruar pothuajse gjysma e vendvotimeve, nga gjithsej 914 sosh që janë përfshirë në procesin e verifikimit.
Me vendvotimet e rinumëruara deri më tani, dallimet në votat e kandidatëve brenda partive politike janë të theksuara. Komuna që del të jetë më së shumti e prekur nga këto mospërputhje është Prizreni, ku janë rinumëruar 145 nga 169 kutitë e dedikuara për verifikim, apo 85.80 për qind e tyre.
Të dhënat e KQZ-së tregojnë se pothuajse në të gjitha partitë politike ka mospërputhje të votave në Prizren, por në disa raste ndryshimet shkojnë në mijëra vota për vetëm një kandidat, njofton Telegrafi.
Në Lëvizjen Vetëvendosje (LVV), kandidati që rezulton të ketë përfituar më së shumti nga numërimi fillestar është Arbër Rexhaj, i cili pas rinumërimit ka 439 vota më pak. Pas tij vijnë Rea Krasniqi me 402 vota më pak, Valon Ramadani me 308 vota më pak dhe Dafina Alishani me 250 vota më pak.
Në Partinë Demokratike të Kosovës (PDK) dallimet janë edhe më të thella.
Fetah Paçarizi rezulton me 4,006 vota më pak pas rinumërimit, ndërsa Nait Hasani ka humbur 2,213 vota. Kujtim Gashi ka 1,551 vota më pak, ndërsa Arianit Çollaku 1,397 vota më pak.
Ndryshime të konsiderueshme janë vërejtur edhe në Lidhjen Demokratike të Kosovës (LDK). Kandidati Xhavit Uka pas rinumërimit ka 1,020 vota më pak, Driton Selmanaj 757 vota më pak, Anton Quni 412 vota më pak, ndërsa Visar Azemi 321 vota më pak.
Lista e kandidatëve sipas partive (bazuar në rinumërimin e votave):
Partia Demokratike e Kosovës (PDK)
Fetah Paçarizi (-4,006)
Nait Hasani (-2,213)
Kujtim Gashi a (-1,551)
Arianit Çollaku (-1,397)
Lidhja Demokratike e Kosovës (LDK)
Xhavit Uka (-1,020)
Driton Selmanaj (-757)
Anton Quni (-412)
Visar Azemi (-321)
Lëvizja Vetëvendosje (LVV)
Arbër Rexhaj (-439)
Rea Krasniqi (-402)
Valon Ramadani (-308)
Dafina Alishani (-250)
Procesi i rinumërimit pritet të vazhdojë edhe në ditët në vijim, ndërsa KQZ-ja ka bërë të ditur se rezultatet përfundimtare do të publikohen vetëm pas përfundimit të plotë të verifikimit të të gjitha vendvotimeve të përfshira në këtë proces./Telegrafi/
Mijëra njerëz në Kosovë dhe Shqipëri, që kishin ëndërruar për vizat e emigrimit për në SHBA, po përballen me një pasiguri të papritur.
E hënë, 4 prill 2022. Me valixhe në duar, çantë në krahë dhe shumë ëndrra në mendje e zemër, Artina - emër i vendosur nga redaksia e Radios Evropa e Lirë për ta ruajtur anonimitetin e së intervistuarës - u nis drejt SHBA-së.
Në maj të vitit paraprak, ajo ishte përzgjedhur fituese e asaj që njihej si ‘llotaria e Kartës së Gjelbër’, por që në të vërtetë quhet Programi i Vizave të Diversitetit.
Artina ishte nxitur të aplikonte nga partneri i saj. Ky i fundit kishte 12 vjet rresht që aplikonte, pasi të ardhmen e tij s’e shihte askund tjetër përveç në SHBA.
Por, fati deshi që Artina të ishte ajo që ta fitonte mundësinë për të emigruar në SHBA. Që atëherë, zemra e saj ishte e dyzuar mes dy shtëpive: të sajën në SHBA dhe asaj pranë partnerit në Shqipëri.
Qysh në gusht të vitit 2022 ata nisën procesin për bashkim familjar. Të bashkuar i mbanin vetëm vizitat e herëpashershme të Artinës në vendlindje.
Kjo distancë iu bë edhe më e vështirë kur ajo mori vesh se ishte shtatzënë.
“Çdo gjë e kam përballuar vetë. Gjatë kësaj periudhe bëja udhëtime pafund drejt Shqipërisë, sepse duhet të ruaja edhe martesën, por edhe vajza të kalonte kohë me babanë… Me shpresën se do të bashkohemi shpejt...”, thotë ajo për Radion Evropa e Lirë.
E vetme në SHBA, pa familjarë e shoqëri përreth, Artina tregon se ka punuar deri në muajin e fundit të shtatzënisë, ndërsa edhe muajt e parë të mëmësisë u detyrua t’i kalonte e vetme.
Tani, ajo më shumë ankohet për “lodhjen mendore” sesa atë fizike.
“Qenka e shëmtuar ndjesia kur e fut jetën tënde në një valixhe, largohesh me ëndrra, punon, sakrifikon që ta bashkosh familjen atje ku po e ndërton jetën nga e para dhe dëgjon se, fiks kur ti arrin afër fundit të sfidës…”, lë në gjysmë fjalinë Artina.
E, pikërisht kur procesi i bashkimit të tyre familjar po i afrohej fundit, SHBA-ja vendosi ta pezullonte përkohësisht lëshimin e vizave të emigrimit nga 75 vende të botës, përfshirë Kosovën dhe Shqipërinë.
Ky vendim erdhi pasi presidenti i SHBA-së, Donald Trump, tha se të huajt që emigrojnë në SHBA, duhet ta mbajnë veten me punë dhe jo të bëhen barrë e shtetit.
Sipas një fotografie të publikuar nga ai, rreth 41 për qind e migrantëve nga Shqipëria marrin ndihma sociale në SHBA, ndërsa nga Kosova përqindja ishte edhe më e lartë: 46.
“Nga i thati digjet edhe i njomi”, thotë Artina, duke shtuar se ajo ka qenë një qytetare e përkushtuar e punëtore, që s’ka tentuar thjesht të përfitojë nga shteti amerikan.
Por, tani kur të gjitha proceset e vizave të emigrimit janë pezulluar, ajo do të duhet sërish ta bëjë pa partnerin e jetës rrugën drejt SHBA-së. Këtë herë, edhe me një vajzë 2 vjeçe në krahë.
Në gjendje të ngjashme janë mijëra banorë në Kosovë e Shqipëri. Disa nga ta, të kontaktuar nga Radio Evropa e Lirë, kanë hezituar t’i ndajnë historitë e tyre, nga frika se kjo mund t’i dëmtojë gjasat e tyre për emigrim në SHBA.
Vitin e kaluar, rreth 3.800 shtetas të Shqipërisë fituan viza të emigrimit drejt SHBA-së, si dhe rreth 650 të tjerë nga Kosova.
Artid Hila nga Shqipëria, i cili punon si konsulent për ndjekje të procedurave të emigracionit dhe vizave të tjera, ka vite që udhëheq edhe një grup në Facebook, ku ndihmon të interesuarit për emigracion në SHBA.
Ai thotë se është shqetësuar, por jo befasuar nga vendimi i 14 janarit i SHBA-së.
“Shqetësimi kryesor që dëgjoj çdo ditë, lidhet me pasigurinë totale që ka krijuar pezullimi i përpunimit të vizave të emigracionit. Aplikantët kanë frikë se po ecin përpara me të gjithë hapat e kërkuar nga Departamenti i Shtetit, ndërkohë që ekziston rreziku real që viti fiskal të përfundojë pa u lëshuar vizat”, thotë Hila për REL-in.
Ai tregon se procesi nuk është i thjeshtë: duhet plotësim i disa formularëve, ekzaminime mjekësore, përgatitje e dokumenteve dhe pagesë e tarifave.
“Shumë aplikantë kanë investuar vite pritjeje [në rastet e bashkimeve familjare], qindra apo mijëra dollarë në dokumente, përkthime, kontrolle mjekësore, udhëtime për intervista dhe plane konkrete jetese”, thotë Hila.
Tani, shton ai, ata po përballen me informacione gjysmake dhe shumë lajme të pasakta e të ekzagjeruara, pasi që nuk dihet se deri kur do të zgjasë pezullimi.
Situata të ngjashme, sipas Hilës, ka pasur edhe në të kaluarën, si gjatë pandemisë COVID-19. Por, të ngjashme s’do të thotë identike.
“Dallimi kryesor me situatën aktuale është se sot aplikantët lejohen t’i ndjekin të gjithë hapat proceduralë dhe t’i paguajnë tarifat, por në fund rrezikojnë të mbeten pa vizë, vetëm për shkak të mbylljes së vitit fiskal - një situatë që juridikisht është shumë problematike”, shpjegon Hila.
Ai shton se në shqetësimin e aplikantëve ndikon edhe një vendim tjetër. Në dhjetor të vitit të kaluar, SHBA-ja pauzoi për kohë të pacaktuar Programin e Vizave të Diversitetit, deri kur “ta dimë se kë saktësisht po e lëmë të hyjë në vendin tonë”, siç kishte thënë sekretari amerikan i Shtetit, Marco Rubio.
Edhe nga ky program kanë fituar shumë shtetas të Kosovës e Shqipërisë ndër vite. Sipas të dhënave të Departamentit amerikan të Shtetit, në mesin e listës së fundit të përfituesve të këtij programi ishin edhe 1.598 shtetas të Shqipërisë dhe 260 shtetas të Kosovës.
Si fituese e para disa viteve, Artina kishte ndërtuar shumë ëndrra. Por, tani ka shumë pasiguri.
“Po më duket sikur këta katër vjet po fshihen nga jeta sikur të mos ishin asgjë”, thotë ajo, e shqetësuar se ndoshta opsioni i saj i vetëm do të mbetet heqja dorë nga ëndrra amerikane./Radio Evropa e Lirë/
Sateliti i Bashkimit Evropian ka publikuar pamje që tregojnë qartë përmasat e përmbytjeve të shkaktuara nga reshjet e dendura të shiut në Shqipëri.
Sipas të dhënave të Shërbimit të Menaxhimit të Emergjencave Copernicus, zonat më të prekura ndodhen në Shqipërinë qendrore dhe perëndimore, ku dalja e lumenjve nga shtrati ka përmbytur sipërfaqe të mëdha toke dhe ka shkaktuar dëme të konsiderueshme në bujqësi dhe infrastrukturë.
Postimi i plotë:
Reshjet e dendura të shiut në fillim të janarit 2026 shkaktuan përmbytje të lumenjve në pjesë të Shqipërisë qendrore dhe perëndimore, duke çuar në përmbytje në zonat e ulëta dhe përgjatë korridoreve kryesore të lumenjve.
Ngjarja preku disa qytete, përfshirë Fierin dhe Beratin, ku ujërat e përmbytjes përmbytën tokën bujqësore dhe prishën infrastrukturën lokale.
Shërbimi i Menaxhimit të Emergjencave Copernicus (CEMS) u aktivizua (EMSR856) më 9 janar 2026 për të vlerësuar shkallën e përmbytjeve. Ky vizualizim i të dhënave, i prodhuar duke përdorur produktin e përcaktimit të CEMS, tregon zonat e përmbytura që nga 10 janari 2026, me zonat e përmbytura të përfaqësuara me ngjyrë blu.
Informacioni i ofruar nga CEMS është thelbësor për monitorimin dhe hartëzimin e fatkeqësive. Më shumë informacion rreth këtij aktivizimi është i disponueshëm këtu./Euronews Albania
Ndryshimi i madh në numrin e votave te disa kandidatë për deputetë, në rezultatet brenda partive, sipas juristëve përbën lëndë për Prokurorinë. Teksa përjashtuan mundësinë e “gabimeve njerëzore” te rastet e dallimeve deri në qindra ose mijëra, juristët thanë se duhet të veprohet mbi bazën e dyshimeve për kryerjen e veprës penale “falsifikim i rezultateve të votimit”.Procesi i rinumërimit, deri tani, vuri në pah ndryshime nga disa vota, në dhjetëra, qindra, e te kandidatë të caktuar brenda partive deri në mijëra sish, në raport me rezultatet e nxjerra në Qendrat Komunale të Numërimit.
Në vlerësimin e juristëve, rastet ku dallimi në rezultat arrin në numra tre dhe katër shifror përbëjnë lëndë për Prokurorinë.
Edhe pse përmendi një “hapësirë për gabime njerëzore e teknike”, avokati Arbër Jashari tha se rinumërimi po dëshmon që në raste të caktuara nuk bëhet fjalë për të tilla.
“Konsideroj se është normale që aty ku punohet edhe mund të gabohet sidomos kur kemi të bëjmë me shifra dhe numërime të votave, por gabimet që po dalin në pah tash me rastin e një rinumërimi të votave po shihet që ka një tendencë të qartë të manipulimit të rezultateve të votimit në favor të disa kandidatëve për deputetë”, ka thënë Arbër Jashari.
Rastet e ndryshimeve e mëdha, sipas avokatit Visar Rrecaj, duhet të hetohen për kryerjen eventuale të veprës penale falsifikim i rezultateve të votimit.
“Gabimi njerëzor me një, me dy, me pesë, hajde edhe me dhjetë në nivel vendi, kur kemi me i numërua 1 milion fletëvotime. Mirëpo, fletëvotimet për një kandidatë që shkojnë plus-minus 1900 aty nuk ka më gabim, aty ka vjedhje. Aty ka vepër penale. Dhe, Prokuroria e Shtetit qysh në ditën kur ka dalë kjo diskrepancë, ka qenë dashtë të shkojë në atë vendvotim dhe të urdhërojë arrestimin e të gjithë atyre që kanë numëruar vota aty”, ka thënë Visar Rrecaj.
Krahas dënimeve nga një deri në tre vjet burg për këtë vepër penale, të parapara në paragrafin e parë të Nenit 216 të Kodit Penal, për siç u shpreh, “deformim të vullnetit qytetar”, avokati Rrecaj përmendi mundësinë e ndëshkimit më të madh.
“Dënimet shkojnë, me burgim, prej tri deri në pesë vjet burgim. Dhe natyrisht gjykata besoj që nuk duhet të ketë mëshirë dhe duhet të shqiptojë, brenda kuadrit, në drejtim të maksimumit për këto vepra penale, sepse vullneti i qytetarëve nuk guxon të preket”, ka thënë Visar Rrecaj.
Deri në këtë fazë të procesit të ri-numërimit të votave të zgjedhjeve të parakohshme parlamentare, të paktën publikisht, Prokuroria nuk ka njoftuar për hapjen e ndonjë rasti apo nisjen e ndonjë hetimi./Tv Dukagjini/
Lidhja Demokratike e Kosovës është vendosur në një udhëkryq politik, vlerësojnë ish-deputetë të kësaj partie dhe analistë. Dy ditë para mbledhjes së kryesisë së Lidhjes Demokratike të Kosovës, po kërkohet qartësim i drejtimit politik dhe trajtim i përgjegjësisë së udhëheqjes së kësaj partie, pas rezultatit të dobët në zgjedhjet e 28 dhjetorit.
Kryetari i LDK-së, Lumir Abdixhiku, ditë më parë tha se do të ofrojë dorëheqjen para kuvendit të përgjithshëm të LDK-së, ku delegatët do të vendosin për qëndrimin ose jo të tij në krye të LDK-së.
Kjo nxiti edhe reagimet e eksponentëve të lartë të tjerë të partisë më të vjetër në Kosovë. Hykmete Bajrami njoftoi se ka dhënë dorëheqje të parevokueshme nga posti i nënkryetares së LDK-së, derisa të njëjtën gjë ia kërkoi edhe Abdixhikut.
Kërkesë të njëjtën adresoi edhe anëtari i kryesisë së LDK-së, ish-kryeministri Avdullah Hoti.
Dorëheqje të parevokueshme të Abdixhikut po kërkon edhe ish-deputeti i LDK-së, Blerim Grainca.
Ai për KosovaPress, thotë se kuvendi i përgjithshëm i LDK-së s’ka obligim të miratojë dorëheqje, mirëpo i njëjti vetëm njoftohet për një gjë të tillë dhe shpallen zgjedhjet e reja.
“Kryetari në bazë të statutit të LDK-së konsiderohet i dorëhequr nëse ka dhënë dorëheqje. Kuvendi s’ka obligim të miratojë dorëheqjen. Kuvendi vetëm njoftohet dhe shpallen zgjedhjet e reja. Nëse respektohet statuti, tjerat janë lojëra fjalësh… Duhet të ftohet kuvendi dhe të mbahen zgjedhjet. Ky kuvend nuk ka kompetencë të miratojë apo jo dorëheqjen. Dorëheqja si akt moral nuk rregullohet me statut. Jep dorëheqje, shkon, s’ka nevojë të miratohet”, thotë ai.
E analisti politik, Albinot Maloku, thotë për KosovaPress, se LDK-ja ka nevojë për një qartësim të pozicionit të saj në raport me rezultatin dëshpërues të zgjedhjeve të fundit, por edhe cili do të jetë qëndrimi karshi pushtetit të ri në vend.
Ai e konsideron të nevojshëm ndryshimin e lidershipit në LDK përmes dorëheqjes së parevokueshme të Lumir Abdixhikut.
“Lidhja Demokratike e Kosovës ka nevojë për një qartësim të pozicionit të vet, distancim i fuqishëm nga kultura e mëlëngonisë, nga kopja e keqe që është munduar të bëhet në momente të caktuara, sidomos nga zotëri Abdixhiku. Këtu po aludoj te mënyra e funksionimit siç bën zotëri Kurti dhe për mua kjo është e papranueshme. Megjithatë, LDK-ja e ka një identitet të vetin i cili gjithsesi në momente të caktuara duhet të përshtatet me rrethanat shoqërore politike. Kjo nuk ka ndodhur në LDK. Zotëri Abdixhiku problemi më i madh që e ka pasur është se nuk ka pas qëndrimet e definuara. Kjo po vërehet edhe tani pas 28 dhjetorit 2025, kur në fillim tha se do të angazhohet në obligimet familjare dhe do të marrë përgjegjësinë për pozicionin politik të LDK-së. Kjo kuptohej si një përgjegjësi si dorëheqja. Do të kishte qenë e shëndetshme dhe aspak tragjike në procese demokratike dorëheqja e kreut të subjektit politik që nuk ka dalë suksesshëm në proces zgjedhor”, thotë ai.
Dorëheqjen e Abdixhikut e kërkon edhe ish-deputeti i LDK-së, Blerim Grainca, i cili thotë se i njëjti s’ka çka i ofron më partisë.
“Është e domosdoshme ndryshimi. Edhe e gjithë LDK-ja ta mbështesë zotëri Abdixhikun, ai s’ka çka i ofron më LDK-së. Ka dëshmuar se nuk ka arritur t’i shtyjë përpara proceset, pasi ka pasur gabime në menaxhim dhe ka marrë ndëshkimin prej votuesve. Krejt çka po kërkohet është një reflektim i tij dhe hapje e garës”, deklaron ai.
Kryetari i Lidhjes Demokratike të Kosovës, Lumir Abdixhiku, paralajmëroi të martën, 13 janar, dorëheqjen nga pozita lidere në këtë subjekt politik.
Arsye për këtë është rezultati jo i mirë i kësaj partie në zgjedhjet nacionale të 28 dhjetorit, që nuk shkoi më lart se 13.11 për qind. Se a do ta pranojë dorëheqjen e kryetarit kuvendi i përgjithshëm i LDK-së, mbetet të shihet.
Nëse Abdixhiku lejohet të largohet nga lidershipi, atëherë bëhet i dyti kryetar i Lidhjes Demokratike që dorëzohet pas rezultateve të dobëta zgjedhore.
Ngjashëm kishte vepruar paraardhësi i tij, Isa Mustafa, më 2021. Në votimet e 14 shkurtit të atij viti, LDK, nën lidershipin e tij, pati shënuar rezultatin më të dobët në histori të partisë me vetëm 12.7 për qind të votave në nivel vendi.
Abdixhiku pati thënë në atë kohë se dorëheqja pas rezultateve të dobëta, është bërë praktikë në LDK./KosovaPress
Eugen Cakolli nga KDI ka reaguar për debatin që po zhvillohet në vend për manipulimet me vota që janë bërë brenda partive politike.
Cakolli përmes një shkrimi në profilin e tij, ka thënë e shtrimi i debatit në formën se kush ka vjedhur më shumë ose më pak, është mbrojtje e hapur e hajnisë.
“Mos me ta marrë mendja që, pas gjithë këtij “zhvillimi shoqëror”, vijmë në pikën kur militantët e hibridët partiak relativizojnë manipulimin e votave duke u përpjekë me zhvendosë debatin te “kush ka manipuluar më shumë”, e jo te pyetja thelbësore: a ka pasur manipulim apo jo.
Madje, për disa, paska ma shumë rëndësi gjatësia e kolonave në grafe sesa faktet, emrat dhe numrat konkretë. Logjika e tyre është e tipit “po, kemi keqpërdorë, po tjerët edhe ma shumë”.
Çdo përpjekje me e kthy krimin elektoral në garë krahasimore partiake është ose padituri, ose mbrojtje e hapur e hajnisë. Në të dyja rastet, është pjesë e problemit. Sepse përgjegjësi duhet me dhanë krejt, për secilën votë – dhe në burg duhet me përfundu secili që ka manipulu, pa përjashtim”, ka shkruar Cakolli.
Rektori i UBT-së, Prof. Dr. Edmond Hajrizi, është ftuar dhe regjistruar për të marrë pjesë në Forumin Ekonomik Botëror 2026, i cili do të mbahet në Davos, Zvicër.
Pjesëmarrja e Rektorit në Open Forum Davos – The Future Starts Now 2050 përfaqëson një njohje të rëndësishme ndërkombëtare për UBT-në dhe rolin e saj në arsimin e lartë, inovacion dhe zhvillim të qëndrueshëm.
Kjo pjesëmarrje paraqet gjithashtu një mundësi të veçantë për të kontribuar drejtpërdrejt në diskutime dhe takime globale që formësojnë të ardhmen, si dhe për të prezantuar modelin UBT 5S dhe konceptin UBT Smart Self-Sustainable City, si modele të së ardhmes.
Ky model përputhet plotësisht me temat kyçe që do të trajtohen në Open Forum Davos, duke reflektuar një qasje bashkëkohore ndaj zhvillimit të qëndrueshëm dhe përgatitjes së kapitalit njerëzor për sfidat e së ardhmes.
Modeli, i konceptuar nga Prof. Dr. Edmond Hajrizi dhe i zbatuar edhe në praktikë, po gjenë gjithnjë e më shumë interes për prezantime, studime dhe publikime, si dhe po vlerësohet si një model praktik tashmë i implementuar në ekosistemin e UBT-së. Programi i këtij viti në Davos fokusohet në pesë sfida kryesore globale, ku dialogu dhe bashkëpunimi publiko-privat janë thelbësore për progres.
Në qendër të diskutimeve janë rritja ekonomike, qëndrueshmëria dhe inovacioni si imperativa ndërsektoriale, të cilat do të udhëheqin qasjen e liderëve ndaj kompleksitetit global dhe krijimit të mundësive të së ardhmes.
Forumi Ekonomik Botëror në Davos mbledh liderë botërorë nga qeveritë, biznesi, shoqëria civile dhe akademia, me qëllim zhvillimin e dialogut të avancuar dhe bashkëpunimit global për adresimin e sfidave më të rëndësishme të kohës sonë.
Kryeministri i Shqipërisë Edi Rama njoftoi sot në 17 janar përmes rrjeteve sociale se Shqipëria është ftuar të bëhet pjesë e Bordit të Paqes për Gazën, një iniciativë ndërkombëtare e ideuar nga presidenti amerikan Donald Trump.
Në postimin e tij, Rama shprehet se ndihet tepër i nderuar nga ftesa personale dhe e konsideron këtë një hap të rëndësishëm për vendin në arenën ndërkombëtare. Sipas tij, Shqipëria përfaqësohet si anëtar themelues, duke ngjitur një tjetër majë të paimagjinueshme vetëm pak vite më parë, dhe kjo pasqyron edhe rritjen e ndikimit të vendit në arenën ndërkombëtare.
Rama thekson gjithashtu se kjo ftesë është një reflektim i marrëdhënieve të thella të partneritetit strategjik mes Shqipërisë dhe Shteteve të Bashkuara të Amerikës, që janë forcuar ndjeshëm gjatë viteve të fundit. Ai shprehet se ndihet krenar për transformimin e Shqipërisë dhe për respektin që vendi ka fituar ndërkombëtarisht.
“Shumë i nderuar nga ftesa personale e presidentit Trump, për ta përfaqësuar Shqipërinë në bordin e paqes, një organizatë e re ndërkombëtare e ideuar prej tij, ku Shqipëria ftohet si anëtar themelues, duke ngjitur kështu ndërkombëtarisht një tjetër majë krejt të paimagjinueshme vetëm deri pak vite më parë. Nuk mund të jem dot më krenar për Shqipërinë, për gjithçka kemi bërë në këto vite duke e kthyer në një Shqipëri tjetër, të dinjitetshme e të respektuar botërisht si asnjëherë, e padiskutim edhe për nivelin ku e kemi ngritur marrëdhënien e partneritetit tonë strategjik me Shtetet e Bashkuara të Amerikës, duke u ftuar me një respekt e vlerësim krejt të posaçëm nga presidenti Donald J. Trump, për t’u bërë pjesë e një bordi ndërkombëtar të krijuar e kryesuar prej atij vetë dhe për të punuar së bashku me të”, shkruan Rama.
Bordi i Paqes për Gazën u shpall nga Donald Trump si një organizatë ndërkombëtare me qëllim promovimin e paqes dhe stabilitetit në rajonin e Lindjes së Mesme. Ai përfshin figura të njohura ndërkombëtarisht, duke përfshirë liderë politikë, diplomatë dhe përfaqësues të shoqërisë civile, të cilët do të punojnë për dialog dhe zgjidhje paqësore në konfliktin midis Izraelit dhe Palestinës. Përfshirja e Shqipërisë si anëtar themelues shfaq jo vetëm një njohje për rolin e saj diplomatik, por edhe një mundësi të re për të kontribuar në një çështje me rëndësi globale.
57 nxënës me nevoja të veçanta përfitojnë arsim, rehabilitim dhe aftësim profesional në Qendrën Burimore “Nëna Terezë” në Mitrovicë. Në këtë qendër një prej institucioneve kryesore edukativo-arsimore dhe rehabilituese për fëmijët me nevoja të veçanta, funksionojnë programet dhe ekipet mobile profesionale.
Drejtori i Qendrës Burimore “Nëna Terez”, Skender Avdiu në një prononcim për KosovaPress thekson se kjo qendër është institucion edukativ-arsimor, që çdo ditë sipas tij, zhvillohen aktivitete mësimore dhe rehabilituese për nxënës me nevoja të veçanta.
Skender Avdiu, tregon se këta nxënës përfshihen në programe nga intervenimi i hershëm deri te aftësimi profesional, ku punojnë në profilet e zdrukthëtarisë dhe rrobaqepësisë.
“Në qendër vijojnë mësimin gjithsej 57 nxënës, duke përfshirë të gjitha nivelet e arsimit parauniversitar, duke filluar prej intervenimit të hershëm, nivelit 1 (klasat 1-5), nivelit 2 (klasat 6-9) dhe nivelit 3 që është arsimi dhe aftësimi profesional në dy drejtime apo profile profesionale, profili i zdrukthëtarisë dhe profili i rrobaqepësisë”, tha drejtori i kësaj qendre.
Avdiu tha se krahas punës që bëhet brenda institucionit, në Qendrën Burimore “Nëna Terezë” funksionon edhe ekipi mobil profesional.
“Përveç mbështetjes profesionale që zhvillohet në qendër, në qendër është funksional edhe ekipi mobil profesional, i cili jo vetëm që ofron shërbime në qendër por ofron edhe shërbime profesionale për mësuesit, nxënësit dhe prindërit që i ndjekin shkollat e rregullta në 9-të komunat e Republikës së Kosovës, duke filluar nga Peja, Istogu, Klina, Vushtrri, Skenderaj, Leposaviqi, Zubin Potoku dhe Mitrovica”-tha ai.
Drejtori Avdiu tha po ashtu se procesi mësimor në Qendrën Burimore “Nëna Terezë” zhvillohet sipas kornizës kurrikulare të Kosovës. Ai shtoi se mësimi realizohet në tre nivele dhe përmes planit individual të arsimit.
“Procesi mësimor zhvillohet sipas kornizës kurrikulare të Kosovës dhe kurrikulave bërthamë të tri niveleve dhe realizohet përmes planit individual të arsimit dhe programit të mësimdhënies në fushat e aktiviteteve”, përfundoi Avdiu.
Ndërsa, Labinot Dervishaj, psikolog në Qendrën Burimore “Nëna Terezë”, ka thënë për KosovaPress se aktiviteti i tij kryesor është vlerësimi dhe interpretimi i nevojave të nxënësve.
Psikologu i kë saj Qendre Burimore “Nëna Terezë”, tha se në këtë qendër përfshihen zakonisht nxënësit që nuk mund të integrohen në shkollat gjithëpërfshirëse për shkak të specifikave të tyre të veçanta.
“Në qendrën burimore përfshihen zakonisht nxënësit që nuk mund të përfshihen në shkollat gjithë përfshirë se për shkak të specifikave të tyre te theksuara. Por paraprakisht, para se të regjistrohen në Qendrën Burimore ata duhet të vlerësohen nga ekipi vlerësues komunal, pra ekipi pedagogjik që është atje; ai e vlerëson në se ai nxënës është për Qendrën Burimore. Në momentin që bëhet ky vlerësim atëherë ne e pranojmë, dhe fillimisht është një periudhë tre mujore observuese apo vëzhguese të cilën e bëjmë me secilin nxënës që regjistrohet së pari. Pastaj përcaktohen aftësitë apo objektivat të cilat duhet të punohen me atë nxënës më tutje, edhe vlerësohet nëse është për lëndë te individualizuara apo për mësimin sipas fushave dhe aktiviteteve”- tha ai.
Labinot Dervishaj tha se puna me këtë kategori fëmijësh është gjithmonë e veçantë.
“Vlerësoj dhe konstatoj se është kënaqësi dhe disfatksion me punua me këtë kategori të fëmijëve sepse qoftë edhe një rezultat minimal nëse e arrijmë ata fëmijë, është shpresëdhënës dhe konsiderohet i madh, qoftë vetëm për punën tonë apo rezultatin që ia prezantojmë prindërve”, potencoi Dervishaj.
Ai tha se në kuadër të Qendrës Burimore “Nëna Terezë” janë themeluara edhe ekipet mobile profesionale.
Psikologu, ndër të tjera, tregon se ritmi i mësimit tek shkollat e mesme në këtë qendër është më i shpejtë dhe më dinamik.
Ndërsa te shkollat e mesme (10-11-12) është puna më dinamike sepse janë në një nivel pak më të avancuar në potencialin e tyre të arritjeve, falë punës së bërë në qendër, dhe ata vazhdimisht janë të angazhuar edhe në aspektin profesional, qoftë me mjetet e zdrukthëtarisë apo të rrobaqepësisë, themi më shumë tek këto sepse janë më të avancuara mjetet, por edhe me punë kreative dhe punë dore” – tha Dervishaj.
Labinot Dervishaj përfundoi duke thënë se nxënësit e Qendrës Burimore janë kategoria më e sinqertë e fëmijëve.
Me punën e përkushtuar të stafit dhe mbështetjen e ekipeve profesionale, Qendra Burimore “Nëna Terezë” vazhdon t’u ofrojë fëmijëve me nevoja të veçanta mundësi për zhvillim, mësim dhe përparim, duke i ndihmuar ata të arrijnë potencialin e tyre të plotë.
Një gardiane në Angli është burgosur pasi u kap duke kryer marrëdhënie seksual me një të burgosur ndërsa kamera e trupit që ajo mbante gjatë shërbimit kishe qenë duke regjistruar.
Sipas The Sun, i burgosuri rezulton të jetë shtetas shqiptar, i identifikuar si Erion Nakdi, 42 vjeç, i dënuar për trafikim droge.
Rebecca Pinckard, 46 vjeçe, kishte pranuar më parë fajësinë për sjellje të pahijshme në një zyrë publike në HMP Highpoint, Stradishall.
Incidenti u zbulua kur pamjet e regjistruara nga kamera e saj e trupit treguan çiftin në një dollap dyqani duke kryer marrëdhënie intime.
Gjykata dëgjoi gjithashtu se Pinckard kishte qenë më parë paralajmëruar për një afërsi të tepërt me të burgosurit, duke u dhënë atyre torta dhe ëmbëlsira.
Pinckard u burgos për 32 javë, ndërkohë, Nakidi, i cili pranoi posedimin e një telefoni celular në burg, u dënua me 10 muaj shtesë burgim përveç dënimit ekzistues, duke qenë se më parë kishte marrë mbi 16 vjet për shitje droge të klasit A.
Pas 45 vitesh u publikua online fjalori i madh i gjuhës shqipe. Gjuhëtarja Anila Kananaj, njëherësh edhe koordinatorja e projektit, thotë se ai do t’i vijë në ndihmë drejtshkrimit të saktë të gjuhës.
“Presim ndryshim në nivelin e drejtshkrimit në të gjitha nivelet. Në shkollë, në dokumentacion zyrtar, në legjislacion, në media. Ky fjalor do të jetë shumë ndihmues, duke filluar që nga fjalët android, fjala online…”
Fjalori, i cili ka rreth 125 mijë njësi leksikore, mund të përdoret nga të gjithë online.
“Ke të gjitha konceptet e reja që brezi i ri i njeh dhe i përdor. Ke lëvizje masive të popullsisë, bashkë me lëvizjen e popullsisë hyjnë fjalë të reja, koncepte të reja. Ke fjalë të vjela nga dialektet. Fjala hajgara (shaka), përdoret shumë në Kosovë. Ne përdorim variant tjetër, ama kjo nuk do të thotë që nuk duhet ta fusim si fjalë”.
Por publikimi i këtij fjalori nga Akademia e Shkencave në Shqipëri ka nxitur reagime në Kosovë. Akademikët atje thonë se u lanë jashtë projektit për shkak të parimeve të diskutimit.
“Në Këshillin Ndërakademik ishte paraparë të diskutoheshin çështjet e leksikut. Së pari, pra, do të përcaktoheshin parimet e punës dhe do të zgjidheshin dilemat. Ne, në Akademinë e Kosovës, nuk e kemi parë të arsyeshme të punojmë pa ato parime dhe nuk kemi pranuar të përfshihemi në atë mënyrë”, tha Bardh Rugova.
Për këto rezerva, grupi i punës në Shqipëri thotë se ka bashkëpunuar me Institutin e Albanologjisë në Prishtinë.
“Kemi grup pune atje në Kosovë, të Institutit të Albanologjisë, që ka qenë pjesëmarrës që nga fillimi. Mendimi i tyre nuk ka munguar kurrë në fjalor. Ata na kanë sjellë vazhdimisht pasuri leksikore nga Kosova”, u shpreh Kananaj.
Për 9 muaj fjalori do të jetë i hapur për të marrë sugjerime nga publiku, të cilat do të reflektohen nga grupi i punës./Tv Klan
Në Qendrën e Numërimit dhe Rezultateve (QNR) janë rinumëruar 309 nga gjithsej 914 vendvotime të përfshira në procesin e rinumërimit, që përbën rreth 34 për qind të totalit.
Sipas njoftimit të Komisionit Qendror të Zgjedhjeve (KQZ), procesi i verifikimit dhe rinumërimit të votave ka përfunduar në 20 komuna, ndërsa komunat e tjera do të përfshihen në këtë proces sipas radhës së përcaktuar.
Nga verifikimi i votave janë evidentuar ndryshime të konsiderueshme, ku disa kandidatëve u janë hequr qindra vota, ndërsa disa të tjerëve u janë shtuar dhjetëra e qindra vota.
Megjithatë, sipas të dhënave aktuale, këto ndryshime nuk pritet të sjellin lëvizje në listat e kandidatëve që kanë fituar ulëse në Kuvendin e Kosovës.
Kandidatët me më së shumti vota të hequra pas verifikimit
Lëvizja Vetëvendosje (LVV):
Ejup Maqedonci: -252 vota
Vendenis Lahu: -239 vota
Filiz Mustafa: -224 vota
Adelina Stublla: -165 vota
Albin Kurti: -152 vota
Dafina Alishani: -141 vota
Partia Demokratike e Kosovës (PDK):
Fetah Paçarizi: -1,323 vota
Nait Hasani: -667 vota
Arianit Çollaku: -507 vota
Xhavit Haliti: -477 vota
Luljeta Veselaj Gutaj: -450 vota
Kujtim Gashi: -434 vota
Enver Hoxhaj: -430 vota
Fadil Demaku: -306 vota
Lidhja Demokratike e Kosovës (LDK):
Xhavit Uka: -355 vota
Visar Azemi: -193 vota
Driton Selmanaj: -169 vota
Anton Quni: -144 vota
Kandidatët që kanë përfituar më së shumti nga rinumërimi
Lëvizja Vetëvendosje (LVV):
Driton Hyseni: +61 vota
Alban Bajrami: +49 vota
Mefail Bajqinovci: +44 vota
Fatos Geci: +32 vota
Partia Demokratike e Kosovës (PDK):
Uran Ismaili: +166 vota
Përparim Gruda: +129 vota
Vlora Çitaku: +104 vota
Arian Tahiri: +100 vota
Lidhja Demokratike e Kosovës (LDK):
Paris Guri: +60 vota
Shaban Osmanaj: +27 vota
Doarsa Kica-Xhelili: +23 vota
Ukë Rugova: +20 vota
Ndryshime më të pakta të votave në AAK.
KQZ ka bërë të ditur se procesi i rinumërimit do të vazhdojë deri në përfundimin e verifikimit të të gjitha vendvotimeve të parapara, ndërsa rezultatet përfundimtare do të certifikohen pas përmbylljes së të gjitha procedurave ligjore./Telegrafi/
Serbia po vazhdon të mos heq dorë nga përpjekjet e saj destabilizuese në Kosovë. Më 12 janar të këtij viti, dy dronë të cilët vinin nga ana serbe, shkelën hapësirën ajrore të Kosovës pranë fshatit Muqivërcë të Kamenicës, kështu duke përçuar edhe një mesazh të heshtur provokimi.
Mjetet ajrore pa pilot ishin në vëzhgim të forcave policore të Kosovës. Njoftimi i Policisë për këtë veprim ishte i menjëhershëm në drejtim të forcave të KFOR-it.
Këta të fundit thonë se kontaktuan autoritetet serbe nga të cilat kërkuan sqarime. Në një përgjigje për RTK-në, KFOR-i tha se vazhdojnë ta monitorojnë nga afër situatën dhe të kontribuojnë në një mjedis të sigurt.
“KFOR është njoftuar për këtë zhvillim të pretenduar më 12 janar 2026. Policia e Kosovës i ka komunikuar KFOR-it se kishte vëzhguar dy mjete ajrore pa pilot që vinin nga ana serbe e vijës kufitare pranë fshatit Kamenicë. Pas kësaj, KFOR kontaktoi Forcat e Armatosura të Serbisë përmes procedurave të mirëpërcaktuara. Këto përfshinë një komunikim telefonik dhe një notë zyrtare me shkrim, ku kërkohej një përgjigje e detajuar lidhur me këtë çështje. Përgjigjja e menjëhershme e Forcave të Armatosura të Serbisë përmes telefonit ishte se ato nuk kishin kryer asnjë aktivitet në atë lokacion, në atë kohë të caktuar", thuhet në përgjigjen e KFOR-it.
Sipas njohësve të sigurisë ky është provokim nga Serbia e cila duhet t'u kërkojë vigjilencë institucioneve të sigurisë pasi Serbia qëllimisht i përdorë këta dron për interesat e tyre ushtarake.
"Serbia po vazhdon me kërcënimet hibride, ndër to është edhe përdorimi i dronëve. Sa kemi informacione janë këta dronët komercial po shkojnë në baza private por krejt janë me regji të sistemit të inteligjencës serbe për nevoja edhe të Forcave të Armatosura edhe të policisë e tjera. Vetë koncentrimi i forcave aty dhe me kujdes po vëzhgohet e gjithë kjo situatë", tha Nuredin Ibishi, njohës i çështjeve të sigurisë.
Edhe njohës të tjerë thonë se autoritet vendore të sigurisë duhet të jenë të kujdesshme në këto raste, duke nënvizuar se KFOR-i është përgjegjës për hapësirën ajrore të Kosovës, andaj edhe reagimi i tyre duhet të jetë më i qartë.
"Misioni i NATO-s, KFOR është përgjegjës për territorin e Republikës së Kosovës në këtë rast edhe për ajrin, paqen dhe sigurinë. Në Republikën e Kosovës si reagues i tretë përgjegjës është KFOR. Duhet të jemi gjithmonë vigjilent në aspektin e sigurisë", deklaroi Arben Dashevci, njohës i çështjeve të sigurisë.
Nuk është rasti i parë që Serbia provokon Kosovën përmes lëshimit të dronëve në drejtim të vijave kufitare me vendin tonë. Një shkelje e hapësirës ajrore të Kosovës nga shteti serb përmes dronëve e kishte konfirmuar në shtator të vitit të kaluar edhe ministri në detyrë i Punëve të Brendshme, Xhelal Sveçla./RTK
Policia e Kosovës ka bërë të ditur se pas veprimeve operative dhe angazhimit të njësive relevante policore, si dhe falë bashkëpunimit me qytetarët dhe mediat, është gjetur personi i raportuar më herët si i humbur, Xhengiz (Aliriza) Hyzeiri, i lindur më 15 korrik 2008, me vendbanim në rrugën “Lufta e Gjilanit” në Gjilan.
Sipas njoftimit zyrtar, i mituri është gjetur në gjendje të mirë shëndetësore dhe aktualisht ndodhet në ambientet e Policisë së Kosovës, ku po zhvillohen procedurat e nevojshme ligjore, në përputhje me legjislacionin në fuqi.
Drejtoria Rajonale e Policisë në Gjilan ka falënderuar mediat dhe qytetarët për bashkëpunimin dhe informacionet e ofruara gjatë kërkimit, duke vlerësuar lart kontributin e tyre në zbardhjen e këtij rasti.
Kryeministri i Shqipërisë Edi Rama ka shfaqur pakënaqësinë e tij në lidhje me mënyrën se si po menaxhohet Radio Televizioni Publik Shqiptar (RTSH).
Komentet Rama i bëri në fjalën përmbyllëse të mbledhjes së Grupit Parlamentar të Partisë Socialiste, ku tha se RTSH nuk do të përfitojë më asnjë lek nga taksat e shqiptarëve.
Shefi i qeverisë tha po ashtu se çdo opsion do të shqyrtohet për RTSH, që nga reformimi, privatizimi e deri te mbyllja e kësaj mediaje.
“Kemi tentuar të krijojmë kushtet që RTSH të reformohet dhe kemi dështuar me suksesin më të plotë. Se di çfarë do të bëjë drejtuesja e re, por deri tani bilanci i RTSH është dështim i suksesshëm, nga borxhi në borxh dhe nga mospërfillja e publikut në mospërfillje. Ne s’kemi televizion publik sot në Shqipëri, kemi një kanal atje, por hera e fundit kur e kam parë është në vitin 1990. Që atëherë televizion publik s’kam parë, kam vajtur i ftuar po as veten s’kam parë dhe janë të vetmet intervista pas të cilave nuk marr asnjë mesazh.
S’kemi për të dhënë asnjë lek nga taksat e shqiptarëve, deri kur t’i meritojë. Çdo opsion duhet të jetë në tryezë, edhe mbyllja përfundimtare, edhe privatizimi, edhe partneriteti, edhe çdo gjë përveç kësaj që është. Unë nuk marr pjesë në këtë, siç nuk marr pjesë në asnjë lloj tentative për të rregulluar median”, tha mes të tjerash Rama./A2 CNN
Në Qendrën e Numërimit dhe Rezultateve (QNR) janë rinumëruar 262 nga gjithsej 914 vendvotime që janë përfshirë në procesin e rinumërimit, që përbën rreth 30 për qind të totalit.
Sipas njoftimit të Komisionit Qendror të Zgjedhjeve (KQZ), procesi i verifikimit dhe rinumërimit të votave ka përfunduar në 18 komuna, ndërsa komunat e tjera do të përfshihen në këtë proces sipas radhës së përcaktuar.
Nga verifikimi i votave, disa kandidatëve u janë shtuar vota, ndërsa disa të tjerëve u janë hequr qindra vota.
Megjithatë, bazuar në të dhënat aktuale, këto ndryshime nuk pritet të ndikojnë në listat e kandidatëve që kanë siguruar ulëse në Kuvendin e Kosovës.
Sipas rezultateve të deritanishme të rinumërimit, ndryshimet më të theksuara të votave janë si në vijim:
Lëvizja Vetëvendosje (LVV):
Ejup Maqedoncit pas verifikimit i hiqen 263 vota
Venedis Lahu: -244 vota
Filiz Mustafa: -227 vota
Albin Kurti: -137 vota
Driton Hyseni: +61 vota
Në PDK pas rinumërimit Fetah Paçarizit i janë hequr 461 vota, derisa Bekim Haxhiut i janë shtuar 62 vota.
Partia Demokratike e Kosovës (PDK):
Fetah Paçarizi: -461 vota
Arianit Qollaku: -186 vota
Nait Hasani: -178 vota
Bekim Haxhiu: +62 vota
Në LDK kandidati më "i favorizuar" nga komisionerët deri më tani del të ketë qenë Xhavit Uka të cilit i janë shtuar 153 vota, derisa Partis Guri është dëmtuar më shumë.
Lidhja Demokratike e Kosovës (LDK):
Xhavit Uka: -153 vota
Paris Guri: +54 vota
Në partitë tjera ndryshimet janë të vogla deri më tani.
KQZ ka bërë të ditur se procesi i rinumërimit do të vazhdojë deri në përfundimin e verifikimit të të gjitha vendvotimeve të parapara, ndërsa rezultatet përfundimtare do të publikohen pas përmbylljes së të gjitha procedurave ligjore./Telegrafi/
Një fëmijë i lindur në vitin 2013, i gjinisë mashkullore, është dërguar për ndihmë mjekësore mbrëmjen e sotme në Shërbimin Emergjent të Spitalit të Përgjithshëm “Dr. Sami Haxhibeqiri” në Mitrovicë, si pasojë e goditjes nga një automjet.
Sipas njoftimit të spitalit, fëmija është paraqitur rreth orës 19:55, ku menjëherë ka marrë trajtim dhe ekzaminim emergjent nga ekipi mjekësor, përfshirë edhe masat reanimatore.
Në bashkëpunim me Shërbimin e Radiologjisë, është realizuar Tomografia e Kompjuterizuar (CT), si dhe janë kryer analizat laboratorike të nevojshme. Po ashtu, rasti është konsultuar edhe me mjekun kujdestar ortoped.
Mjekët kanë bërë të ditur se fëmija është jashtë rrezikut për jetë, ndërsa për shkak të natyrës së lëndimeve, është referuar për në Qendrën Klinike Universitare të Kosovës (QKUK) për konsultë të mëtejshme me specialistët e Neurokirurgjisë dhe Kirurgjisë Maksilofaciale.
Sipas spitalit, lëndimet janë kryesisht në zonën e fytyrës dhe sinuseve, por gjendja e fëmijës është stabile dhe jashtë rrezikut jetësor./Telegrafi/
Paralajmërimi i Bashkimit Evropian për largimin e tërësishëm të masave ndëshkuese ndaj Kosovës po mirëpritet nga qeveria në detyrë. Sipas tyre, lirimi i fondeve për Kosovën dhe mbështetja financiare që nga ky fillim është një vendim i duhur i BE-së, sado që, siç thonë ata, është i vonuar ky hap. Përkitazi me këtë, në ekzekutiv presin që këtë vit të ketë edhe hapa të tjerë të rëndësishëm përpara në integrimin evropian dhe avancimin në procese, siç është marrja e statusit të vendit kandidat për anëtarësim në BE.
Bashkimi Evropian të enjten për KosovaPress, konfirmoi se ka nisur heqjen e masave ndaj Kosovës, duke hapur rrugën për lirimin e mbi 400 milionë eurove këtë fillim viti, në mbështetje financiare për vendin.
Bashkimi Evropian (BE) vendosi masa ndëshkuese ndaj Kosovës më 2023. Masat u vendosën si përgjigje për shkak të tensioneve në veriun e Kosovës, të banuar me shumicë serbe, pasi kryetarët shqiptarë të katër komunave në veri morën mandatin.
Klisman Kadiu, këshilltar i zëvendëskryeministrit në detyrë për Integrime Evropiane, Besnik Bislimi, thotë për KosovaPress, se lirimi i mjeteve financiare për Kosovën nga ky fillim viti, është pozitiv për vendin, siç shton, sado i vonuar që është ky hap.
Madje, thekson nevojën që BE-ja të ndërmarrë edhe hapa të tjerë të rëndësishëm përpara në integrimin evropian.
“Bashkimi Evropian përmes presidentes Ursula von der Leyen veçse ka njoftuar publikisht se do të vazhdojë me heqjen e masave, përmes së cilës do të lirohen fondet për Kosovën dhe mbështetja financiare që nga ky fillim viti. E mirëpresim vendimin e Bashkimit Evropian, sado i vonuar që është ky hap. Në vijim presim që të ketë edhe hapa të tjerë të rëndësishëm përpara në integrimin evropian dhe avancim në procese po ashtu të vonuara, siç është marrja e statusit të vendit kandidat”, thuhet në përgjigjen e Kadiut për KosovaPress.
Zëdhënësja e Komisionit Evropian, Anitta Hipper, në një përgjigje për KosovaPress, thotë se krahas 216 milionë eurove që janë liruar në dhjetor të vitit 2025, synojnë që shumë shpejt të lirojnë edhe 205 milionë euro në fillim të këtij viti.
Ajo tha se ky vendim është marrë pas transferimit të qetë dhe të rregullt të qeverisjes lokale në veri të Kosovës, pas zgjedhjeve të fundit lokale. Derisa tregoi në detaje edhe se në cilat projekte do të përfitojë Kosova.
“Kemi liruar afërsisht 50% të ndihmës financiare që arrin në rreth 216 milionë euro. Kjo do të lejojë nënshkrimin e kontratave për katër projekte (që përfaqësojnë gjithsej 34.6 milionë euro kontribut të BE-së) dhe fillimin e zbatimit; për të përfunduar programimin e të gjitha fondeve të mbetura IPA III të destinuara për Kosovën (181 milionë euro; miratimi i planifikuar i vendimit të financimit të Komisionit në pranverën e vitit 2026 që do të lejonte që projektet e para të fillonin në gjysmën e dytë të vitit 2026). Për më tepër, Komisioni synon të lirojë shumën e mbetur prej 205 milionë eurosh në fillim të këtij viti, në përputhje me Përfundimet e Presidencës për Zgjerimin të miratuara më 16 dhjetor”, thuhet në përgjigjen e zëdhënëses së BE-së.
Në anën tjetër, hulumtuesja në Grupin për Studime Juridike dhe Politike (GLPS), Arbëreshë Loxha, thotë për KosovaPress, se largimi i masave karshi përfitimit të mjeteve financiare është i rëndësishëm edhe në imazhin e Kosovës në aspektin ndërkombëtar.
Sipas saj, posa të formohen institucionet e reja në vend, duhet të punohet shumë në sanimin e çdo dëmi eventual që masat i kanë bërë Kosovës.
“Heqja tashmë e plotë e masave të BE-së është një hap i duhur, ndonëse i vonuar. Gjithsesi, përtej faktit që është i vonuar, në vazhdimësi ne si GLPS dhe si shtet kemi bërë thirrje që të njëjtat të hiqen, sidomos pas tejkalimit të krizës në veri me çështjen e zgjedhjeve. Ne konsiderojmë se është një hap i duhur dhe do t’i hapë rrugën zhbllokimit të fondeve që Kosova ka rrezikuar t’i humbë për shkak të masave. Të njëjtat do të jenë shumë të dobishme në momentin që do të hyjnë në ekonominë e Kosovës. Gjithashtu, largimi i masave është pozitiv dhe i rëndësishëm edhe sa i përket imazhit të Kosovës. Kosova nuk do të ketë një barrë mbi imazhin e saj në rrafshin ndërkombëtar, pasi nuk ka qenë e mirë që Kosova ka qenë e dënuar nga BE-ja. Unë uroj që sa më shpejt, me krijimin e institucioneve të reja, të punohet shumë në sanimin e çdo dëmi eventual që masat i kanë bërë Kosovës dhe imazhit të saj në rrafshin ndërkombëtar dhe atë të brendshëm”, thekson ajo.
Gjatë së enjtes, edhe Komisioni Evropian (KE) ka konfirmuar se pret heqjen e plotë të masave ndaj Kosovës në javët e ardhshme.
Jan Gert Koopman, drejtor i Drejtorisë për Zgjerim në KE, theksoi se bëhet fjalë për lirimin e më shumë se 400 milionë eurove, përfshirë edhe masat që KE-ja i kishte hequr fillimisht në dhjetor të vitit të kaluar.
Ai shpjegoi se institucionet po punojnë paralelisht në programimin e mjeteve dhe në kontraktimin e projekteve që do të financohen po punojnë paralelisht në programimin e mjeteve dhe në kontraktimin e projekteve që do të financohen.
Login
