Gjykimi për sulmin terrorist në Banjskë ka vijuar edhe të premten në Gjykatën Themelore të Prishtinës, me zhvillime të reja procedurale dhe përplasje mes mbrojtjes dhe Prokurorisë Speciale.

Seanca është mbajtur me përbërje të re të trupit gjykues, pasi kryesimin e procesit e ka marrë gjyqtari Ngadhnjim Arrni, duke zëvendësuar Arben Hotin, i cili është avancuar në detyrë.

Ndryshimi i trupit gjykues ka bërë që gjykata të shtyjë paraqitjen e një dëshmitari, ndërsa shqyrtimi gjyqësor ka vazhduar me kërkesat e palëve lidhur me administrimin e provave.

Në fokus të seancës ka qenë kërkesa e mbrojtjes së të akuzuarit Dushan Maksimoviq, e cila ka propozuar edhe nëntë dëshmitarë shtesë, si dhe ekspertizë të fotografive dhe të një arme, duke pretenduar se këto prova janë thelbësore për të vërtetuar vendndodhjen e të akuzuarit në natën e sulmit në Banjskë.

“Ditën kritike kanë qenë vazhdimisht me të akuzuarin në vikendicë. Ata mund të dëshmojnë se ku ka qëndruar dhe ku ka fjetur mes 24 dhe 25 shtatorit, prandaj konsiderojmë se këta dëshmitarë janë vendimtarë për të sqaruar se ku, kur dhe çfarë ka bërë Dushan Maksimoviq në periudhën që e ngarkon aktakuza”, tha Jovana Filipoviq, avokate e Dushan Maksimoviq.

Këto kërkesa janë mbështetur edhe nga mbrojtja e dy të akuzuarve të tjerë, Bllagoje Spasojeviq dhe Vlladimir Toliq.

Në anën tjetër, Prokuroria Speciale dhe përfaqësuesit e të dëmtuarve i kanë kundërshtuar propozimet, duke vlerësuar se ato përbëjnë përpjekje për zvarritje të qëllimshme të procesit gjyqësor.

Pas shqyrtimit të kërkesave, trupi gjykues ka vendosur t’i refuzojë ato. Sipas gjykatës, edhe në aktakuzën e Prokurorisë Speciale, Maksimoviq përshkruhet me rol ndihmës në kuadër të grupit të organizuar terrorist, çka, sipas arsyetimit, nuk e justifikon zgjerimin e listës së dëshmitarëve dhe ekspertizave në këtë fazë të procedurës.

Gjykata ka caktuar gjithashtu datat e seancave të radhës, më 18, 19 dhe 20 shkurt, me synimin që brenda këtyre tri ditëve të përmbyllet shqyrtimi gjyqësor për njërin nga rastet më të rënda penale pas luftës në Kosovë.

Sipas aktakuzës, Bllagoje Spasojeviq, Vlladimir Toliq dhe Dushan Maksimoviq akuzohen për terrorizëm. Rasti i tyre është ndarë nga procedura penale ndaj edhe 42 personave të tjerë që ndodhen në arrati, përfshirë Milan Radojiçiqin, i cili publikisht ka marrë përgjegjësinë për organizimin dhe kryerjen e sulmit terrorist në Banjskë, më 24 shtator 2023.

Një i ri ka vënë në alarm Policinë e Vlorës, pasi ka pretenduar se po ndiqej nga një automjet me xhama të zinj, teksa ishte duke ecur në zonën e Lungomares.

Sipas burimeve, i riu ka njoftuar menjëherë policinë, duke deklaruar se një automjet i dyshimtë ishte vënë në ndjekje të tij. Menjëherë pas telefonatës, patrullat e Policisë së Vlorës janë afruar në vendngjarje për të verifikuar situatën.

Pas raportimit dhe verifikimeve të kryera, rezultoi se automjeti në fjalë ishte i Policisë së Shtetit, i cili po patrullonte zonën me një mjet pa logo zyrtare.

Kjo situatë ka shkaktuar frikë te i riu, i cili është afruar pranë patrullës rrugore me bindjen se po ndiqej. Fatmirësisht, gjithçka është sqaruar brenda një kohe të shkurtër dhe nuk ka pasur incidente të tjera.

Më pas këngëtari e pyet nëse do t’a takojë ndonjëherë dhe balerina iu përgjigj: “Nuk e di, ndoshta edhe e ke mërzitur”.

Ndërkohë kujtojmë se babai i Selin ka bërë deklarata të forta kundër Mirit, duke e quajtur atë ‘zhigolo dhe pervers’. Gjatë një bisede telefonike me emisionin “Shqipëria Live”, ai shtoi se sipas tij, Miri bën çdo gjë për famë dhe lekë.

Pjesë nga biseda-

Selin: Nuk e beson njeri. Po je fiks, fiks, fiks.

Miri: Fiks si çfarë?

Selin: Fiks si ta kam lënë emrin. Fiks sikur e kam përballë, por s’e beson njeri.

Miri: A do ta takoj ndonjëherë?

Selin: S’e di. Ndoshta edhe e ke mërzitur.

Miri: Jo, s’kam mërzitur njeri. Edhe ai e di se çfarë bëj unë këtu.

Selin: S’e di.

Miri: E di pra. Kur thua fiks, ai e kupton se çfarë bëj unë.

Komanda e Përbashkët Arktike e Danimarkës në Groenlandë është e përqendruar në kundërshtimin e aktivitetit të mundshëm rus, jo në mbrojtjen kundër kërcënimeve ushtarake të SHBA-ve, tha të premten kreu i saj, Gjeneral Major Soren Andersen, mes vëmendjes së re ndaj rajonit Arktik.

Presidenti amerikan Donald Trump e ka përshkruar vazhdimisht Groenlandën si jetike për sigurinë e SHBA-ve dhe madje nuk ka përjashtuar përdorimin e forcës për të marrë kontrollin e ishullit të madh autonom arktik, që është pjesë e Mbretërisë së Danimarkës.

Andersen hodhi poshtë sugjerimet për konflikt mes aleatëve të NATO-s, duke e përshkruar një skenar të tillë si “hipotetik”.

“Nuk e shoh një aleat të NATO-s të sulmojë një tjetër aleat të NATO-s,” tha ai. Duke iu referuar planeve të mbrojtjes së Danimarkës, shtoi: “Ne punojmë mbi to, por është gjë normale për ne. Detyra ime është të punoj këtu për mbrojtjen e mbretërisë së bashku me NATO-n.”

Në përgjigje të shqetësimeve të SHBA-ve, vendet evropiane dërguan këtë javë një numër të vogël personeli ushtarak në Groenlandë në përgatitje për stërvitjen ushtarake të NATO-s “Arctic Endurance”.

Komanda Arktike ka ftuar SHBA-të të marrin pjesë në “Arctic Endurance”, e cila këtë vit do të testojë forcat në kushte dimërore.

“Kishim një takim sot me shumë partnerë të NATO-s, përfshirë SHBA-të, dhe i ftuam të marrin pjesë në këtë stërvitje,” tha Andersen, duke shtuar se ende nuk e dinte nëse SHBA-të do të bashkoheshin. Danimarka nuk i kishte ftuar amerikanët në një stërvitje të ngjashme në shtator.

Komanda e Përbashkët Arktike e Danimarkës, përgjegjëse për mbrojtjen rreth Groenlandës dhe Ishujve Faroe, kryen misione survejimi dhe kërkim-shpëtimi, duke përdorur anije patrullimi, avionë, helikopterë dhe teknologji satelitore. Ajo gjithashtu ka patrullën Sirius me slita qensh për operacione arktike në distanca të gjata.

Andersen tha se nuk kishte anije kineze apo ruse pranë Groenlandës, megjithëse shtoi se një anije kërkimore ruse ndodhej 310 milje detare larg. “Kjo është më e afërta,” tha ai, duke shtuar se aleatët e NATO-s mbajnë “një pasqyrë të mirë të situatës këtu lart”.

“Ne në fakt presim një rritje të aktiviteteve ruse në vitet e ardhshme, dhe… duhet të fillojmë stërvitjet dhe të rrisim praninë këtu në Arktik për të mbrojtur kufirin verior të NATO-s,” tha Andersen.

Danimarka caktoi një paketë mbrojtjeje për Arktikun prej 42 miliardë kronash daneze (6.54 miliardë dollarë) në vitin 2022 si përgjigje ndaj shqetësimeve në rritje për sigurinë.

Andersen theksoi se bashkëpunimi me personelin ushtarak amerikan mbetet i shpeshtë. Ai kohët e fundit u takua me komandantin e U.S. NORTHCOM, komandantin e Alaska Command, dhe zhvilloi diskutime në bazën amerikane Pituffik në Groenlandë, me angazhime të tjera të planifikuara më vonë për këtë muaj.

Kryetari i Partisë Republikane, Fatmir Mediu, është shprehur se Edi Rama dëshiron që në Shqipëri të mos ketë më as ministra dhe as kryebashkiakë, pasi sipas tij, kryeministri kërkon që ta përqëndrojë të gjithë pushtetin në duart e veta.

Komentet Mediu i bëri në emisionin ‘ÇdoKënd’ me gazetaren Merita Haklaj në A2 CNN, ku tha se me veprimet e tij Rama po shkon drejt kësaj rruge, pra asaj të përqëndrimit të të gjitha pushteteve në duart e veta.

Mediu propozoi gjithashtu se opozita duhet të shkojë në tryezën për Reformën Zgjedhore me një koncept të përbashkët, pra me një qëndrim të unifikuar të të gjithë faktorit opozitar.

Kjo pasi sipas tij, do t’i jepte opozitës më shumë kredo politike, përcjell A2 CNN.

“Opozita reformën zgjedhore duhet ta fillojë me një koncept opozitar të përbashkët. Pra duhet ndërtuar një qëndrim i përbashkët opozitar i të gjitha forcave politike opozitare, për sistemin zgjedhor dhe duhet bërë patjetër me një platformë konkrete, e cila do të përcaktojë kush janë piketat e analizës opozitare për këtë reformë zgjedhore. Brenda këtij koncepti, kur ne arrijmë në një qëllim të përbashkët, e kemi më të lehtë për të ndikuar, edhe për faktin sepse kemi edhe një negociatë për një zgjidhje të caktuar me faktorin ndërkombëtar. E njëjta gjë edhe për reformën territoriale.

Marritë mund të shkojnë se s’ka nevojë për pushtet lokal, por vetëm për pushtet qëndror. Se sot në fakt nuk ka qeverisje lokale, por ka vetëm kryeministër që heq dhe shkarkon çdo lloj nëpunësi të administratës lokale. Dhe padyshim që ky është edhe qëllimi final i Ramës. Pa bashki opozita, vetëm një kryeministër, mos të ketë as ministra se i bën të gjitha vetë, mos të ketë as kryetar bashkie se i bën të gjitha vetë. Vetëm të ketë emisar të emëruar që s’kanë asnjë lidhje as me PS-në e as me historinë e pluralizmit në Shqipëri”, tha mes të tjerash Mediu.

Imazhet satelitore të analizuara nga BBC Verify zbulojnë se Izraeli po zhvendos blloqet e betonit që shënojnë “Linjën e Verdhë” më thellë brenda territorit të Gazës.

Kjo linjë, e cila supozohej të përcaktonte zonën e kontrollit pas armëpushimit të ndërmjetësuar nga SHBA, po lëvizet vazhdimisht në terren, duke krijuar konfuzion vdekjeprurës për palestinezët që jetojnë aty pranë.

Sipas të dhënave, ushtria izraelite ka zhvendosur pozicionet e blloqeve në të paktën 16 pika të ndryshme, duke u futur mesatarisht deri në 300 metra më shumë brenda Rripit të Gazës sesa parashikonin hartat zyrtare.

Ky ndryshim ka pasoja të rënda, pasi ministri i Mbrojtjes, Israel Katz, ka paralajmëruar se kushdo që kalon këtë linjë do të përballet me zjarr. Analiza tregon se që nga tetori, ushtria ka hapur zjarr në të paktën 69 raste ndaj njerëzve që janë afruar ose kanë kaluar këto shenja.

Situata është veçanërisht alarmante në zona si Beit Lahia dhe Jabalia, ku lëvizja e blloqeve ka lënë shumë banorë të “ngujuar” brenda zonës së rrezikut pa e ditur.

Dëshmitarët raportojnë ngjarje tragjike, si vrasja e fëmijëve që mblidhnin dru apo goditja e një shkolle gjatë një dasme, e cila ndodhej brenda zonës që hartat e quanin të sigurt, por që blloqet e reja e kishin përfshirë si zonë luftimi.

Ekspertët e sigurisë e cilësojnë këtë veprim si një “inxhinieri territoriale”. Duke mbajtur një linjë ligjore në letër dhe duke vendosur blloqe fizike diku tjetër, Izraeli ruan mundësinë të ndryshojë kufirin në heshtje, duke i kthyer pjesë të Gazës në një “brez të sterilizuar”.

Ndërkohë që ushtria izraelite mohon lëvizjen e qëllimshme të linjës, imazhet satelitore tregojnë se pas vendosjes së blloqeve shpesh pasojnë rrënime të ndërtesave dhe fortifikime të reja ushtarake, duke e bërë jetën e banorëve të mbetur një kurth të vërtetë.

Ish-deputeti Dashamir Shehi, i ftuar në studion e emisionit “Kjo Javë”, ka komentuar aktualitetin politik në vend, duke u ndalur te mbledhja e zhvilluar sot e grupit parlamentar të Partisë Socialiste në Pallatin e Brigadave dhe fjalimi i kryeministrit Edi Rama.

Sipas Shehit, kryeministri Rama nuk ka më të njëjtën atmosferë dhe besueshmëri sa i përket procesit të integrimit evropian. Ai u shpreh se në fjalimin e tij Rama lëshoi sinjale të rrezikshme në raport me aleatët perëndimorë. “Rama lëshoi një sinjal që, po nuk na deshët ju, kemi Kinën. Kjo është temë e rrezikshme”, deklaroi Shehi, duke shtuar se kjo qasje i ngjan praktikave të së shkuarës.

Ish-deputeti krahasoi këtë retorikë me politikën e izolimit të ndjekur nga regjimi i Enver Hoxhës, që sipas tij lëvizte mes Jugosllavisë, Bashkimit Sovjetik dhe Kinës, në varësi të interesave. “Jo se Kina nuk ka para, por kjo është historia që bënte Enver Hoxha. Ne jemi një pikë në ujë në gjeopolitikë”, theksoi Shehi, duke nënvizuar se Shqipëria nuk ka peshë për të luajtur me balancat ndërkombëtare.

Ai shtoi se Rama përpiqet të krijojë idenë se ai kontrollon mbështetjen ndërkombëtare, por sipas Shehit kjo është një iluzion. “Ata që më mbajnë mua, thotë ai, i mbaj unë nga ndërkombëtarët, por e gënjen mendja kot, nuk do ta mbërrijë”, u shpreh ish-deputeti.

Në analizën e tij, Shehi u ndal edhe te simbolika e vendit ku u zhvillua mbledhja e grupit parlamentar të PS-së. Ai e cilësoi të papërshtatshme zhvillimin e saj në Pallatin e Brigadave, duke theksuar se ai është “pallati i popullit dhe jo i qeverisë apo i një partie politike”. “Çfarë do grupi parlamentar atje? Nuk ka sallë grupi? Ka salla sa të duash, edhe qeveria ka”, tha ai.

Sipas Shehit, zgjedhja e këtij ambienti kishte si qëllim t’u jepte kurajë deputetëve socialistë dhe të përcillte një mesazh force. “Pse i mbledh atje? Për t’u nxjerrë frikën atyre, për t’u thënë se ‘pushteti jemi ne’. Mos u trembni, ndiqni udhëheqësin dhe do ta kapërcejmë edhe këtë”, përfundoi Shehi, duke e cilësuar këtë si një përpjekje për të konsoliduar kontrollin politik në kohë të vështira për mazhorancën.

Skuadra U-20 e Águia de Marabá-s, nga shteti i Pará-s, në Brazil, pësoi një aksident të rëndë gjatë kthimit nga Copinha, garë tradicionale e futbollit të të rinjve që zhvillohet në São Paulo.

Autobusi i ekipit u përplas me një kamion të ndalur në mes të rrugës, pa sinjalizimin e duhur, në shtetin fqinj të Tocantins. Përgatitësi fizik, Hecton Alves, humbi jetën në vendngjarje, ndërsa trajneri, Ronan Tyezer, vazhdon të jetë i shtruar në kujdesin intensiv. Fatmirësisht, asnjë lojtar nuk pësoi lëndime të rënda dhe pjesëtarët e tjerë të delegacionit që shpëtuan janë kthyer tashmë në Marabá.

Klubi publikoi një mesazh ngushëllimi në rrjetet sociale:

“Në këtë moment trishtimi, shprehim solidaritetin tonë ndaj familjarëve, miqve, kolegëve të punës dhe të gjithë atyre që vuajnë për këtë humbje të pakthyeshme. Në shenjë nderimi dhe respekti, bashkohemi në lutje, duke u dëshiruar forcë dhe ngushëllim zemrave të pikëlluara.”

Ky incident nënvizon rreziqet që përballen ekipet e futbollit gjatë udhëtimeve dhe ka lënë komunitetin e Águia de Marabá-s në gjendje shoku, veçanërisht skuadrën e të rinjve që po merrte pjesë në Copinha.

Maria Corina Machado, udhëheqësja e opozitës venezueliane dhe fituese e Çmimit Nobel për Paqen për vitin 2025, ditën e djeshme zhvilloi një takim me Presidentin amerikan Donald Trump, por nuk zbuloi shumë detaje të bisedës që zhvilluan sëbashku.

Sipas mediave të huaja, duke folur sot në Uashington DC, Machado tha se ishte e bindur se do të kishte një tranzicion të rregullt në Venezuelë pas ndërhyrjes së SHBA-së dhe se përfundimisht do të kishte zgjedhje të lira dhe të ndershme.

Ajo tha gjithashtu në fjalimin e saj në Fondacionin Konservator të Trashëgimisë se i kishte thënë Presidentit amerikan se do të kthehej në Venezuelë sa më shpejt të ishte e mundur.

Ajo pohoi se opozita në Venezuelë ishte “e përgatitur të bënte atë që duhej si një qeveri legjitime”, shkruan A2 CNN.

Kujtojmë se Machado ditën e djeshme i dha Trumpit medaljen e saj të Çmimit të Paqes, edhe pse komiteti i Nobelit thotë se çmimi nuk mund të transferohet dhe ajo është ende fituesja zyrtare.

Trump tha sot se dhurata e medaljes nga Machado ishte një “gjest i mrekullueshëm” dhe e përshkroi atë si një “grua të mrekullueshme”.

Ish-ambasadori Roland Bimo tha se politika botërore po përballet mes dy sistemeve, globalistët, që kanë dominuar skenën ndërkombëtare, dhe sovranistët, ku bën pjesë edhe presidenti amerikan Donald Trump.

“Sot kemi të bëjmë me një shpalosje të dy sistemeve të qeverisjes botërore. Nga njëra anë janë globalistët që kanë dominuar situatën ndërkombëtare, dhe nga ana tjetër janë sovranistët, siç është Trump. Problemi është se Perëndimi në tërësi ka humbur influencën për të thënë të vërtetën, pasi krizat që po kalon janë institucionale. Është sistemi politik që prodhon të gjitha këto kriza në botë, dhe SHBA ndërhyn jo vetëm për të shkaktuar luftëra, por edhe për të zgjidhur konflikte”, tha Bimo.

Në emisionin “3D” në RTSH, Bimo u ndal te interesat strategjike të SHBA për Groenlandën, por shtoi se por prioriteti i tij është shkatërrimi i NATO-s, të cilën e konsideron një barrë ekonomike dhe jo të dobishme për SHBA.

“Pjesë e sistemit që nuk funksionon për SHBA janë edhe NATO dhe BE. SHBA kërkon Groenlandën, e para për lidhjen satelitore, ka interes si pjesë e luftës kibernetike që zhvillohet mes fuqive të mëdha. E dyta është korridori detar, ku futen nëndetëset ruse drejt Oqeanit Atlantik, që kërcënon Amerikën dhe pasuritë minerale. Por të gjitha këto Trump mund ti bëjë në Groenlandë edhe pa e aneksuar. I vetmi kurth është për të shkatërruar NATO-n, me Kongresin i duhen 45 vite, sepse nuk do të miratohet. Ai nuk e do NATO-n; e sheh si një barrë ekonomike që nuk i shërben për asgjë”, tha ish-ambasadori.

Presidenti i Republikës së Shqipërisë, Bajram Begaj, ka liruar nga detyra këtë të premte, 16 janar, Nënadmiralin Adnand Dëfrim Agastra nga detyra e Komandantit të Forcës Detare.

Vendin e tij, do ta zërë Kundëradmirali Arsen Burhan Mullaj.

Tiranë, më 16 janar 2026

Presidenti i Republikës Sh.T.Z. Bajram Begaj, me Dekret nr. 25, datë 16.1.2026, dekretoi sot lirimin e Nënadmiral Adnand Dëfrim Agastra nga detyra e Komandantit të Forcës Detare.

Presidenti i Republikës Sh.T.Z. Bajram Begaj, me Dekret nr. 26, datë 16.1.2026, dekretoi sot emërimin e Kundëradmiral Arsen Burhan Mullaj në detyrën e Komandantit të Forcës Detare.

Presidenti i Republikës Sh.T.Z. Bajram Begaj, me Dekret nr. 27, datë 16.1.2026, dekretoi sot dhënien e gradës madhore “Gjeneral Brigade” për Kolonel Razije Kadri Mehmeti, me detyrë “Drejtor” në Drejtorinë e Bashkëpunimit Civilo-Ushtarak J-9 në Shtabin e Përgjithshëm të Forcave të Armatosura.

Presidenti i Republikës Sh.T.Z. Bajram Begaj, me Dekret nr. 28, datë 16.1.2026, dekretoi sot dhënien e gradës madhore “Gjeneral Brigade” për Kolonel Fatmir Sadri Neziraj, me detyrë “Drejtor” në Drejtorinë e Operacioneve dhe Stërvitjes J-3/7 në Shtabin e Përgjithshëm të Forcave të Armatosura.
Presidenti i Republikës Sh.T.Z. Bajram Begaj, me Dekret nr. 29, datë 16.1.2026, dekretoi sot dhënien e gradës madhore “Gjeneral Brigade” për Kolonel Edmond Abaz Voci, me detyrë “Komandant i Qendrës së Kontroll Raportimit” në Forcën Ajrore.

Dashi

Marrëdhënia ne çift do jete edhe me e ngrohte gjate kësaj dite. Do flisni lirshëm për gjithçka qe iu shqetëson dhe se bashku do arrini te zgjidhni çdo gjë. Beqaret do kenë mundësi me shumice për te takuar dashurinë e jetës se tyre. Bëjini sytë katër! Ne planin financiar duhet te vazhdoni te tregoheni vigjilente dhe te mos kryeni investime shume te mëdha.

Demi

Dite shume e zymte kjo e sotmja për te gjithë ata qe janë ne një lidhje. Nuk do arrini dot te flisni qetësisht me partnerin dhe mosmarrëveshjet do vazhdojnë te thellohen. Beqaret do kenë një dite paksa me ndryshe. Mundësitë për njohje te reja me persona te veçante do jene te shumta. Ne planin financiar mos i lini pas dore problemet e vogla sepse ato mund te zmadhohen shume.

Binjaket

Asnjë planet nuk do mund ta turbulloje jetën tuaj ne çift gjate kësaj dite. Ju dhe partneri do jeni si një ekip i forte qe mund te përballoni çdo lloj sfide. Beqaret do kenë shume besim tek vetja e tyre dhe do arrijnë ta bëjnë për vete personin qe pëlqejnë. Ne planin financiar situata do jete me e përshtatshme për te kryer edhe ndonjë investim me tepër sesa zakonisht.

Gaforrja

Edhe për ju kjo dite do jete mjaft e vështirë. Do keni shume debate me atë qe keni ne krah dhe nuk do arrini t’i zgjidhni dot telashet. Beqaret do vazhdojnë te jene gjithë kohës ne kërkim, por nuk do kenë shume fat. Mundohuni te qëndroni me tepër kohe me miqtë. Ne planin financiar çdo gjë do shkoje me se miri. Do mund te kryeni edhe ndonjë shpenzim me tepër.

Luani

Te dashuruarit do jene te gatshëm te bëjnë çfarëdo lloj sakrifice vetëm për t’ia kaluar sa me mire me personat qe kane ne krah. Beqaret do kenë takime pafund dhe do mund te zgjedhin cilin person te duan. Shfrytëzojeni ditën sepse nuk vijnë gjithmonë kohe te tilla. Financat do kenë tronditje te mëdha, kështu qe matuni mire para se te hidhni çdo lloj hapi.

Virgjeresha

Nuk do kuptoheni shume mire me atë qe keni ne krah gjate kësaj dite dhe here pas here mund te debatoni. Ju do jeni me kokëfortët ne fakt sepse ai do beje edhe ndonjë lëshim. Kujdes! Beqaret do kenë takime, por duhet te reflektojnë me kujdes para se te hedhin çdo hap. Situata financiare do ketë përmirësime, megjithatë nuk duhen bere menjëherë shpenzime marramendëse.

Peshorja

Do jeni shume besnike ndaj partnerit tuaj gjate kësaj dite dhe askush nuk do mund t’iu beje dot për vete edhe pse do mundohet. Dashuria pe rate qe keni ne krah kalon çdo kufi. Beqaret nuk do kenë shume dëshirë te njihen me persona te rinj dhe do mbeten me te njëjtin status. Ne planin financiar mos bëni asnjë çmenduri sepse do keni probleme serioze.

Akrepi

Do keni shume rivale ne dashuri gjate kësaj dite kështu qe mbajeni pranë partnerin dhe surporizojeni atë gjate gjithë kohës. Beqaret nuk do jene shume te sigurte për atë qe duan dhe nuk do dine çfarë te bëjnë kur t’iu bëhen ftesa. Mos u nxitoni për asgjë! Ne planin financiar duhet te jeni me te arsyeshëm dhe nuk do kryeni asnjë shpenzim te tepruar.

Shigjetari

Konfigurimi i yjeve do jete shume i mire sot për jetën sentimentale te çifteve. Do jeni me te dashur dhe me tolerante me personin qe keni ne krah prandaj lidhja juaj do marre një drejtim edhe me pozitiv. Beqaret do kenë propozime te shumta, por do kenë frike te marrin vendime. Me financat duhet te tregoheni vigjilente sepse situata mund te përkeqësohet ndjeshëm.

Bricjapi

Jeta ne çift do jete shume e qëndrueshme sot dhe nuk do keni as problemin me te vogël me personin qe iu ndodhet pranë. Komunikimi dhe toleranca do vazhdoje te jete pika juaj me e forte. Beqaret do vazhdojnë te jene ne kërkim te shpirtit te tyre binjak, por pa ndonjë rezultat konkret. Financat do jene te dobëta për shkak te disa shpenzimeve te detyrueshme qe do iu duhet te kryeni.

Ujori

Dita e sotme do jete një nga me te bukurat e këtij viti. Do kuptoheni me se miri me personin qe keni ne krah dhe do shihni me optimizëm drejt se ardhmes. Beqaret do jene edhe me realiste dhe nuk do kërkojnë me ngulm te krijojnë menjëherë një lidhje. Ne planin financiar duhet te tregoheni paksa me te matur me shpenzimet qe te mos keni probleme serioze.

Peshqit

Dite pozitive kjo për gjithë te dashuruarit. Do flisni për gjithçka me partnerin tuaj dhe nuk do keni as mosmarrëveshjen me te vogël me te. Beqaret do jene sensuale dhe joshës. Te shumte do jene personat qe do kërkojnë t’iu bëjnë për vete, por vetëm njeri prej tyre do jete fatlumi. Ne planin financiar do jeni me fat dhe do kryeni investimet e nevojshme.

Kryedemokrati Sali Berisha ka reaguar pas vendimit të SHBA-së për pezullimin e vizave për 75-vende, mes të cilave përfshihet edhe Shqipëria.

Kryedemokrati u shpreh se përgjigjen më të saktë për këtë gjë, e dha ambasada amerikane në reagimin e saj ditën e djeshme.

“Mendoj se përgjigjen kësaj pyetje ia dha qartësisht ambasada e SHBA. Dhe unë nuk mund të shtoj as të heq ndonjë gjë nga shpjegimi i djeshëm i ambasadës”, deklaroi Berisha.

Sipas Ambasadës Amerikane, aplikantët për vizë emigruese që janë shtetas të vendeve të prekura mund të dorëzojnë aplikimet për vizë dhe të marrin pjesë në intervista, dhe Departamenti do të vazhdojë të caktojë takime për aplikantët, por asnjë vizë emigruese nuk do të lëshohet për ta gjatë kësaj periudhe pezullimi.

Ambasada Amerikane i ka dhënë përgjigje edhe disa pyetjeve në lidhje me këtë vendim, duke sqaruar se ky pezullim do të zbatohet vetëm për aplikantët e vizave emigruese dhe jo ato turistike.

Në lidhje me vizat aktuale të vlefshme, Ambasada thekson se asnjë vizë emigrimi nuk është hequr si pjesë e këtij udhëzimi.

Përjashtim nga ky vendim bëjnë shtetasit me dyshtetësi që aplikojnë me një pasaportë të vlefshme të një vendi që nuk është i përfshirë në listën e 75 vendeve.

Ky vendim do të hyjë në fuqi më 21 janar të këtij viti, teksa Ambasada Amerikane sqaron se Departamenti i Shtetit po kryen një rishikim të plotë të të gjitha politikave, rregulloreve dhe udhëzimeve.

Mijëra njerëz kanë nënshkruar një peticion, duke shprehur zemërim, pasi i nominuari i Donald Trump për ambasador të SHBA-së në Islandë raportohet se ka bërë shaka se vendi nordik duhet të bëhet shteti i 52-të i Shteteve të Bashkuara.

Të mërkurën, vetëm disa orë përpara se zyrtarë të lartë nga Groenlanda dhe Danimarka të takoheshin me zyrtarë të SHBA-ve, në përpjekje për të shmangur kërcënimet e Trump për të marrë kontrollin e ishullit arktik, media ‘Politico’ raportoi për komente të ngjashme edhe për një tjetër ishull nordik.

Reagimi në Reikjavik ishte i menjëhershëm. Në një deklaratë për ‘Guardian’, ministria e Jashtme e Islandës tha se kishte kontaktuar ambasadën amerikane për sqarime. “Ministria për Punët e Jashtme kontaktoi ambasadën e SHBA-së në Islandë për të verifikuar vërtetësinë e komenteve të pretenduara”, thuhej në deklaratë.

“Këto fjalë, të thëna nga Billy Long, të nominuar nga Donald Trump si ambasador në Islandë, mund të jenë thënë me shaka. Megjithatë, ato janë fyese për Islandën dhe popullin islandez, të cilët kanë luftuar për lirinë e tyre dhe kanë qenë gjithmonë miq të Shteteve të Bashkuara”.

Brenda pak orësh nga nisja e tij, më shumë se 3.200 persona kishin nënshkruar peticionin, duke mbështetur thirrjen që SHBA-ja të emërojë një person tjetër që tregon më shumë respekt për Islandën dhe popullin islandez.

Të mërkurën, Long raportohet se ka kërkuar falje për komentet në një intervistë për ‘Arctic Today’, një faqe lajmesh që mbulon rajonin. Sipas medias, ai tha se komentet ishin bërë me shaka, ndërsa të tjerë po bënin shaka për Jeff Landry, të dërguarin special të Trump për Groenlandën. “Nuk kishte asgjë serioze në këtë, isha me disa njerëz që nuk i kisha takuar prej tre vitesh dhe ata po bënin shaka për Jeff Landry si guvernator i Groenlandës, pastaj filluan të bënin shaka për mua. Nëse dikush u ofendua, atëherë kërkoj falje”, citohet të ketë thënë Long.

Edhe pse Long tha se e kuptonte pse komentet kishin shkaktuar reagime, ai këmbënguli se ishte vetëm një shaka dhe nuk duhej marrë seriozisht. “Kërkoj falje dhe ky është komenti im i vetëm. Pres me padurim të punoj me popullin e Islandës dhe më vjen keq që u interpretua në këtë mënyrë. Isha me një grup miqsh dhe nuk kishte asgjë serioze”, shtoi ai.

Të enjten, Sigmar Guomundsson, deputet islandez nga partia centriste Liberale Reform, e cila është pjesë e koalicionit qeverisës, i përshkroi komentet si “jo një shaka veçanërisht qesharake” duke pasur parasysh tensionet rreth Groenlandës.

“Është e vetëkuptueshme që kjo është jashtëzakonisht serioze për një vend të vogël si Islanda”, i tha ai gazetës islandeze Morgunblaoio. “Duhet të kuptojmë se të gjitha argumentet e sigurisë që amerikanët përmendin për Groenlandën vlejnë edhe për Islandën. Kjo ka të bëjë me pozicionin gjeografik të këtyre dy ishujve”.

Ai i përshkroi komentet si shenjë të një mungese respekti në rritje në SHBA ndaj sovranitetit të shteteve të vogla. “Islandezët duhet gjithashtu të kenë guximin, pavarësisht marrëdhënieve tona shumë miqësore me Shtetet e Bashkuara, jo më pak përmes NATO-s, të diskutojnë se ku dhe si shërbehen më mirë interesat tona të sigurisë në këtë botë që po ndryshon”.

Vetëm një ditë më parë, 15 janar 2026, Gjykata e Apelit të Tiranës, vendosi lirimin e tre të dyshuarve për vrasjen e Martin Çeços, duke i lënë në arrest shtepiak.

Nevzat Tarelli, avokati i dy të dyshuarve, me inicialet V.M dhe E.M.,  në një reagim për mediat këtë të premte, 16 janar, lidhur me këtë çështje, është shprehur se ndryshimi i masës së sigurisë vjen për shkak të humbjes së fuqisë së afateve të paraburgimit.

Sipas avokatit, Apeli duhej të caktonte ose masën e sigurisë “detyrim paraqitje”, ose “ndalim i daljes jashtë shtetit”, duke e cilësuar atë të “arrest shtëpie” si absurd procedurial.

“Vendimmarrja e Gjykatës së Apelit dje, ka shkelur këtë vendim të gjykatës kushtetuese duke caktuar përsëri një tjetër paraburgim, siç është arresti në shtëpi. Gjykata dje kishte vetëm një zgjidhje ligjore, që mund të caktonte masa të tjera siç është “detyrim paraqitje” ndoshta edhe me “ndalim të daljes jashtë shtetit”. Këtë kam kërkuar dhe kjo ishte zgjidhja e drejtë e çështjes. Gjykata ka pranuar të konstatojë humbjen e fuqisë së paraburgimit “arrest me burg” dhe ka caktuar një paraburgim tjetër “arrest në shtëpi” e cila është një absurd procedurial”, tha ai.

Sakaq, Tarelli shprehet se masa e sigurisë “arrest në shtëpi” është antikushtetues në raste të tilla, kur ka mbaruar afati i paraburgimit, e se diçka e tillë duhet të sqarohet në Gjykatën Kushtetuese.

“Ndaj unë me padurim po pres që të zbardhet për ta çuar në gjykatën e lartë e më tej në gjykatën kushtetuese për të sqaruar në mënyrë përfundimtare dhe për ti hequr mekanizmin joproçedurial që po përdorin një pjesë e gjykatave duke dhënë pas mbarimit të afateve të paraburgimit, arrestin në shtëpi që është antikushtetues. Kishim vetëm një llogaritje matematikore, nuk është zgjidhur çështja në themel”, tha ai.

Prokuroria e Tiranës ka vendosur sekuestrimin e bizneseve dhe pasurive të një shtetasi spanjoll i cili kishte ngritur një skemë mashtrimi duke krijuar kompani fiktive në shtete të ndryshme, përfshi dhe Shqipërinë.

Ky shtetas në bashkëpunim me babanë dhe partneren e tij, vepronin në Shqipëri përmes një kompanie dhe 2 shoqërive të tjera me objekt veprimtarie “Aktivitet në fushën e turizmit, hapja e menaxhimi i hoteleve, godinave etj”, “Menaxhim i pasurive të paluajishme, shërbime agjenci turisitike”, me anë të të cilave kryenin transfertra dhe shkëmbime tregtare me shoqëri të huaja me vendodhje në Bullgari, Sllovaki, Malajzi, (Labuan vend offshore).

Përmes këtyre shoqërive, shtetasi spanjoll ka përfituar mbi 23 ha tokë në Dhërmi dhe automjete me vlerë më të uleta se vlera e tregut, shoqëri tregtare e llogari bankare.

Nga verifikimet e kryera, subjektet rezultojnë me status “pezulluar”, çka ka rritur dyshimet për ekzistencën e një aktiviteti të përbashkët ekonomik të mundshëm dhe përdorim formal të subjekteve për qëllime të fshehjes apo transferimit të të ardhurave me origjinë të dyshimtë, veprime që mund të përbëjnë elementë të veprës penale të “Pastrimit të produkteve të veprës penale”.

Shtetasi spanjoll, komunikonte përmes platformës Telegram me klientët e tij duke I biindur që të investonin në shumën 1.5 milionë euro, pa pasur detyrimin të identifikoheshin, çka e bënte gjurmimin e këtyre transaksioneve financiare të pamundur.

Sipas hetimeve, rrjeti kriminal kishte ngritur kompani fiktive në Portugali, SHBA, Estoni, Republikën Dominikane dhe Shqipëri, për të fshehur qarkullimin e parave.

Njoftimi i plotë i Prokurorisë:

Me kërkesë të Prokurorisë Pranë Gjykatës së Shkallës së Parë të Juridiksionit të Përgjithshëm, Tiranë, u sekuestruan pasuritë: shoqëri tregtare, mbi 23 ha tokë në Dhërmi, automjete e llogari bankare të shtetasit spanjoll A.C. në Shqipëri, të dyshuara se janë produkt i veprës penale ‘Pastrimi i produkteve të veprës penale ose veprimtarisë kriminale’ parashikuar nga neni 287 i Kodit Penal.

Nga hetimet mbi procedimin penal nr.6905 të vitit 2025, rezultoi se shtetasit A.C., i ati shtetasi D.I. dhe partnerja e tij, shtetasja M.M., rezultuan të përfshirë në një skemë mashtrimi duke krijuar kompani një shtete të ndryshme si Spanjë, Portugali, Shqipëri, Shtetet e Bashkuara të Amerikës, Republika Dominikane dhe Estonia. Vlera e përfituar përmes kësaj skeme arrin shumën 30 milionë Euro.

Në territorin e shtetit shqiptar, shtetasit e mësipërmn, vepruan nëpërmjet shoqërisë “Ëingëort” sh.p.k dhe 2 (dy) shoqërive të tjera të regjistruara në Regjistrin Tregtar, me të njëjtin objekt veprimtarie “Aktivitet në fushën e turizmit, hapja e menaxhimi i hoteleve, godinave etj”, “Menaxhim i pasurive të paluajishme, shërbime agjenci turisitike”, nëpërmjet shoqërive të krijuara të përfshirë në kontrata, transferta dhe shkëmbime tregtare me shoqëri të huaja me vendndodhje në Bullgari, Sllovaki, Malajzi, (Labuan vend offshore). Këto shoqëri ka nënshkruar kontratë shitblerje pasuri e paluajtshme dhe ka blerë pasuri të paluajtshme në Dhërmi me vlera dukshëm më të ulëta se sa vlera e tregut.

Nga verifikimet e kryera ka rezultuar se këto subjekte ushtrojnë të njëjtin aktivitet dhe kanë të njëjtën adresë, me administratorë këta shtetas. Subjektet rezultojnë me status “pezulluar”, çka rrit dyshimet për ekzistencën e një aktiviteti të përbashkët ekonomik të mundshëm dhe përdorim formal të subjekteve për qëllime të fshehjes apo transferimit të të ardhurave me origjinë të dyshimtë, veprime që mund të përbëjnë elementë të veprës penale të “Pastrimit të produkteve të veprës penale”, parashikuar nga neni 287 i Kodit Penal.

Shtetasi D.I., është subjekt i një hetimi nga Audiencia Nacional në Spanjë për mashtrim piramidal dhe pastrim parash, lidhur me veprimtarinë e tij financiare ndërkombëtare. Hetimi lidhet kryesisht me aktivitetet e tij në kompaninë Madeira Invest Club dhe shoqëri të tjera të tij financiare. Në qëndër të skemës qëndron A.C., i njohur në rrjetet e koduara si “Luis” apo “Cryptospain”. Ai komunikonte me klientët në platformën Telegram, duke i bindur të investonin shuma që nisnin nga 1.5 milionë euro, pa pasur detyrimin të identifikoheshin. Kjo e bënte të pamundur gjurmimin e transaksioneve financiare. Sipas hetimeve, rrjeti kriminal kishte ngritur kompani fiktive në Portugali, SHBA, Estoni, Republikën Dominikane dhe Shqipëri, për të fshehur qarkullimin e parave. Dy prej këtyre kompanive, “Wortned” dhe “Wortonova”, u regjistruan në Qëndrën Kombëtare të Biznesit në Tiranë në qershor 2024, me adresë në rrugën “Teodor Keko”. Të dyja kompanitë kishin si objekt aktivitetin turistik dhe menaxhimin e hoteleve, por sipas dokumenteve, ato nuk zhvilluan ndonjë veprimtari të vërtetë. Pronari i “Wortned” ishte vetë A C., ndërsa “Ëortonova” figuron në pronësi të shtetases rumune M.M. me administrator të përbashkët D. I. babai i tij.

Bazuar në veprimet hetimore të kryera dhe provat e mbledhura, rezulton se është kryer vepra penale “Pastrimi i produkteve të veprës penale ose veprimtarisë kriminale”, parashikuar nga neni 287 i Kodit Penal. Në përputhje me ligjin, duke pasur parasysh seriozitetin e veprës, dëmin e shkaktuar dhe mundësinë e fshehjes ose shfrytëzimit të pasurive të fituara në mënyrë të paligjshme, sugjerojmë dërgimin e çështjes në gjykatë për gjykim për veprën penale të sipërpërmëndur si dhe vendosjen e masës së sekuestros mbi pasuirtë e identifikuara gjatë hetimit, si më poshtë:

Pasuria e ndodhur në Zonën Kadastrale nr. 1481, me sipërfaqe 13.66 Hektarë, në adresën Dhërmi, Vlorë, në vendin e quajtur Kolia, “Tokë Kullotë”;

Pasuria në Zonën Kadastrale nr. 1481, me sipërfaqe 9.5 Hektarë, në adresën Dhërmi, Vlorë, në vendin e quajtur Megali-Langadhea, “Tokë Kullotë”;

Shoqëria ‘Wortend’;

Shoqëria ‘Wingwort’;

Shoqëria ‘Wortnova’;

Automjeti, Toyota, Land Cruiser;

Automjeti Mercedez Benz, AMG G 63; dhe

Llogaritë bankare në të gjitha bankat e nivelit të dytë ku mund të ketë llogari aktive bankare.

Kreu i grupit parlamentar të Partisë Socialiste, Taulant Balla, theksoi po njësoj si kryeministri Edi Rama nevojën për përshpejtim të punës lidhur me procesin e negociatave me BE-në.

“Duhet të jemi gati për ditë shumë të gjata pune, në komisione dhe seanca plenare, kërkon angazhim më të madh, i referohem performancës, korrektesës…”, iu drejtua ai kolegëve socialistë.

“Kemi miratuar 9 ligje, sot që flasim janë në proces një numër shumë i madh projektligjesh”, bëri me dije ai, duke shtuar se “motorët” do të ndizen që prej nisjes së sesionit parlamentar për vitin 2026.

“Duhet të zbatojmë të njëjtat mekanizma dhe procedura, jo raportime formale, na duhet një qasje krejtësisht e re. Legjislatura jonë arriti të zhbllokojë ngërcin 3-vjeçar për zgjedhjen e Avokatit të Popullit, një proces model ku shumica votoi një kandidaturë me propozim ekskluziv të deputetëve të opozitës”, tha Balla.

Balla njoftoi se mes 15 prillit dhe 15 majit 2027, do mbahen zgjedhjet e ardhshme vendore.

“Në fillim të sesionit të tretë parlamentar, që i bie diku në vjeshtë, do dekretohet nga Presidenti i Republikës data e zgjedhjeve vendore 2027”, tha Balla.

“Nga e hëna e 19 janarit, dita e parë e sesionit për këtë vit, deri të enjten e fundit të korrikut 2026 duhet të kemi miratuar ligjin organik për funksionimin e Kuvendit”, tha kreu i grupit të PS-së.

Pavarësisht se formula e bashkëdrejtimit të dy komisioneve të posaçme parlamentare është dakordësuar nga dy partitë më të mëdha në vend, Balla tha se “nuk mund të vijohet njësoj nëse nuk ka konsensus për të punuar”.

“Kush nuk punon, ka thyer dakordësinë e për pasojë na duhet të zhbllokojmë formulën. Ne nuk do të jemi asnjëherë të gatshëm të presim qoftë edhe 1 ditë madje as 1 orë, për të punuuar së bashku që reformat të ecin përpara.”

Përveç sa më sipër, shtoi se edhe përbërja e komisioneve duhet ndryshuar dhe se ministrat duhet të jenë më aktivë në mbledhjet e grupit.

Komisioni Evropian, nëpërmjet Gert Jan Koopman, drejtor për zgjerimin, ka vlerësuar se Shqipëria dhe Mali i Zi kanë arritur rezultatet më të mira në reformat e nevojshme për marrjen e fondeve nga Plani i Rritjes së BE-së për Ballkanin Perëndimor.

Deri më tani, Shqipëria kryeson pasi ka zbatuar 21 reforma, ndërsa Mali i Zi 12.

Ndërkaq, Komisioni Evropian ka konfirmuar se Kosovës, brenda disa javësh, mund t’i hiqen të gjitha masat ndëshkuese dhe ndaj asaj do t’i jepen mbi 400 milionë euro.

“Ne kemi filluar të heqim tashmë masat ndaj Kosovës dhe tani jemi në një fazë shumë vendimtare, ku do të donim të akordonim më shumë se 400 milionë euro. Prandaj, jemi në diskutime shumë të thella me autoritetet e Kosovës, ndaj shpresoj të jem në gjendje ta finalizojmë planin këtë muaj“, tha Koopman.

Ndryshimi i qëndrimit nga BE erdhi pas pjesëmarrjes së serbëve në zgjedhjet e fundvitit të kaluar, që i risollën në pushtet në komunat e veriut.

Në total, deri më tani, nga plani i rritjes rreth 453 milionë euro u janë paguar shteteve ballkanike. Sipas Koopman, vijimi i pagesave për këto shtete varet vetëm nga zbatimi i axhendave të reformave, kryesisht në fushën e sundimit të ligjit.

E Ngarkuara me Punë e SHBA në Shqipëri, Nancy VanHorn mori pjesë në ceremoninë e mbylljes së trajnimit të udhëhequr nga FBI për hetuesit e SPAK dhe BKH në Akademinë e Sigurisë.

VanHorn përmendi gjatë fjalës së saj, tha se do të ndjekë me këmbëngulje prioritetet e presidentit Trump në Shqipëri, për të forcuar institucionet që luftojnë krimin e organizuar dhe trafikun e narkotikëve, si SPAK, BKH dhe Akademinë e Sigurisë.

Ndër të tjera, VanHorn theksoi se organizatat ndërkombëtare kriminale dhe terroriste, veçanërisht ato të angazhuara në trafikimin e narkotikëve.

Fjala e Nancy VanHorn

“Faleminderit Rektor Mandro, Kryeprokuror i Posaçëm Braho dhe Drejtor Keta që na jeni bashkuar për të shënuar përfundimin e këtij trajnimi të rëndësishëm. Dhe dua të falënderoj gjithashtu kolegët tanë të FBI-së Brendan Collins dhe Kala, është kënaqësi t’ju shoh përsëri, Joe Danneff nga Ekipi i FBI-së për Mbikëqyrjen e Analizës së Celularëve, të cilët ndanë ekspertizën e tyre.

Pra, kushdo që ndjek Ambasadën e Shteteve të Bashkuara këtu në Shqipëri e di se lufta e krimit të organizuar dhe trafikimit të narkotikëve janë përparësi kryesore për ne. Dhe kur Presidenti Trump bëri thirrje për eliminimin e plotë të krimit të organizuar ndërkombëtar, ai nënvizoi se këta kriminelë përdorin sjellje “të ndërlikuara të përshtatjes”, duke krijuar kërcënime të pazakonta dhe në zhvillim për sigurinë tonë kombëtare.

Dhe siç tha Sekretari Rubio, organizatat ndërkombëtare kriminale dhe terroriste, veçanërisht ato të angazhuara në trafikimin e narkotikëve, janë kërcënimi më i madh për sigurinë e Shteteve të Bashkuara në Hemisferën Perëndimore, ku këto grupe po destabilizojnë shtet-kombet dhe po i çojnë në emigrim masiv.

Ne do të ndjekim me këmbëngulje prioritetet e Presidentit Trump në Shqipëri, duke forcuar institucionet që luftojnë krimin e organizuar dhe trafikun e narkotikëve si SPAK, BKH dhe Akademia e Sigurisë.

Rrjetet kriminale, përfshirë grupet shqiptare që bashkëpunojnë me kartelet e Amerikës Latine të përmendura nga Sekretari Rubio, përbëjnë kërcënime të konsiderueshme për sigurinë dhe përparimin ekonomik të Shqipërisë përmes aktiviteteve si trafiku i drogës dhe pastrimi i parave. Sikurse e keni parë përmes këtij kursi, këto krime po mundësohen nga teknologjitë moderne.

Dhe përmes këtij trajnimi, ju tani keni mjete të reja hetimore dhe aftësi analitike për të shfrytëzuar të dhënat celulare në hetimet penale. Kjo përmirëson hetimet tuaja, duke siguruar gjithashtu respektimin e standardeve më të larta ligjore dhe etike.

Dhe ju tani keni pajisje dhe aftësi të reja për hetime të përmirësuara që do të çojnë në më shumë ndjekje penale dhe dënime më të forta të pjesëtarëve të krimit të organizuar.

Ndaj, urime për përfundimin e këtij kursi dhe faleminderit që më lejuat të jem me ju sot.”

Vendet që kanë pritur me vite për t’u anëtarësuar në BE janë të ndara mbi planet që po hartohen në Bruksel për t’i lejuar ato të bëhen anëtare pa të drejtat e plota të votimit të zakonshme.

Midis pak kombeve në Evropën Lindore dhe Ballkanin Perëndimor që janë në radhë për t’u anëtarësuar në bllok, po shfaqet një përçarje lidhur me kushtet e lidhura me aplikimet e tyre. Disa këmbëngulin se duhet të marrin përfitimet e plota të bllokut, ndërsa të tjerët janë të lumtur vetëm që janë rreth tryezës.

Kjo shtytje do ta bënte më të vështirë për vendet individuale të ushtronin veton e tyre dhe do të parandalonte devijimin e politikave. Aktualisht, anëtarët e rinj marrin të drejta të plota vote menjëherë, siç ndodhi kur vendi më i fundit që iu bashkua BE-së, Kroacia, hyri në vitin 2013.

Ndër fuqitë që fillimisht mund të kufizohen është e drejta e anëtarëve të rinj për të bllokuar sanksionet, ndër çështje të tjera që aktualisht kërkojnë që çdo vend i BE-së të jetë dakord. Lundrimi përreth kërcënimeve për veto nga qeveritë populiste në Hungari dhe Sllovaki ka rezultuar të jetë kohë-humbëse për udhëheqësit.

Perspektiva e anëtarësimit pa të drejta të plota vote po shkakton reagime të përziera nga vendet kandidate.

Edi Rama, kryeministri i Shqipërisë, vend që tani ka hapur të gjitha të ashtuquajturat grupe negociuese që do të duhet të përpunojë, i tha Politico-s se masat janë një “ide e mirë” dhe se vendi i tij madje do të pranonte për një periudhë kohore të mos kishte një komisioner të vetin në Bruksel.

Ai tha se Shqipëria nuk donte të sfidonte vullnetin e anëtarëve të mëdhenj themelues si Franca dhe Gjermania.

“Në fund të fundit, ata janë të rriturit në familje që marrin vendimet e rëndësishme”, tha ai, duke shtuar se një avantazh për anëtarët më të vegjël të BE-së është se nëse vendet më të mëdha “gabojnë”, nuk është faji i anëtarëve të rinj.

Salome Zourabichvili, presidentja e fundit e zgjedhur drejtpërdrejt e Gjeorgjisë, tha se e kishte mbështetur prej kohësh një veprim të tillë në diskutimet me zyrtarët e BE-së. Roli i saj u shfuqizua nga partia në pushtet Ëndrra Gjeorgjiane në një veprim të kritikuar nga Brukseli, dhe bisedimet e pranimit tani kanë ndaluar mes paralajmërimeve për prapambetje demokratike.

“Si një vend i vogël, është shumë e qartë se interesi ynë është të jemi pjesë e një komuniteti, e një familjeje dhe të jemi pjesë e programeve që përbëjnë BE-në, dhe aspak të jemi vendimmarrës të barabartë si vendet që kanë qenë në origjinën e kësaj organizate dhe janë shumë më të fuqishme”, tha Zourabichvili për Politico. “Mendoj se është shumë logjike nëse doni të keni një organizatë që mund të marrë vendime në mënyrë efikase.”

Moldavia, kërkesa e së cilës për anëtarësim është binjakëzuar me atë të Ukrainës, ka thënë se dëshiron të shohë detajet e propozimeve.

“Ne jemi të gatshëm të marrim përgjegjësi në një fazë të hershme dhe do të mirëprisnim mundësinë për të marrë pjesë dhe për të ndihmuar në formësimin e këtyre diskutimeve”, tha një zyrtar i lartë moldav, i cili mbeti anonim për të folur hapur.

“Në të njëjtën kohë, anëtarësimi i plotë me të drejta të barabarta dhe pjesëmarrje të plotë në vendimmarrjen e BE-së, duhet të mbetet objektivi i qartë dhe përfundimtar.”

Ukraina, e cila ka kryer reforma të gjera si pjesë e procesit të pranimit, edhe pse përballet me agresionin e Rusisë, ka hezituar ta mbështesë idenë.

“Nëse flasim për anëtarësim në BE, ai duhet të jetë i plotë”, tha Presidenti Volodymyr Zelenskyy në nëntor.

Mali i Zi, vendi kandidat më i përparuar në rrugën e tij të pranimit, këmbëngul gjithashtu se nuk ka nevojë të rishikohen kushtet sipas të cilave i është dhënë anëtarësimi dhe pret të përfundojë procesin e verifikimit këtë vit.

“Fakti është se BE-ja tashmë përbëhej nga 28 shtete anëtare”, tha Presidenti malazez Jakov Milatoviç për Politico. “Dhe aktualisht, kemi 27 për shkak të Brexit-it. Pra, në këtë drejtim, nëse Mali i Zi bëhet shteti i 28-të anëtar i BE-së deri në vitin 2028, atëherë përgjigjja (nëse ka nevojë për reforma) është jo, apo jo? … Por kjo është padyshim pyetja që duhet t’u përgjigjet udhëheqësve të BE-së.”

Plani në lidhje me të drejtat e reduktuara të votës u propozua në fund të vitit të kaluar nga zyrtarët dhe qeveritë pro-BE-së për t’i dhënë jetë një procesi zgjerimi që po bllokohet gjithashtu nga Hungaria dhe disa kryeqytete të tjera nga frika se mund të sjellë konkurrencë të padëshiruar për tregjet lokale ose të kompromentojë interesat e sigurisë. Hungaria ka kërcënuar vazhdimisht të vërë veton ndaj anëtarësimit të Ukrainës në BE.

Komisionerja e zgjerimit të BE-së, Marta Kos, i tha Politico-s se propozimet konkrete do të paraqiten “në shkurt ose mars”.

Ajo shtoi se “një element krejtësisht i ri” po nxit një ndjenjë të re urgjence.

“Kemi forca të jashtme shkatërruese që do të donin të na shihnin të dështonim – ato po punojnë kundër vendeve tona kandidate, por ne jemi objektivi kryesor.”

Plani do të duhet të zhvillohet në detaje nga Komisioni përpara se t’u paraqitet udhëheqësve kombëtarë dhe me shumë gjasa të diskutohet në samitet e ardhshme të Këshillit Evropian, si dhe të vlerësohet nga juristët për të parë se si përshtatet me traktatet themelore të BE-së.

Ndërsa kandidatët janë thellësisht të zhytur në reformat e nevojshme për t’u bërë anëtarë të bllokut, Kos tha se ka ende punë për t’u bërë për të bindur anëtarët ekzistues se do të ketë mbrojtje të mjaftueshme. “Negociatat janë një pjesë teknike; ne duhet të marrim në konsideratë pjesën politike, që janë shtetet anëtare”, tha ajo.

/Marrë nga Politico