Një incident i përgjakshëm ndodhi në orët e para të së hënës në Agios Dimitrios në Athinë, ku u plagos pronari i një restoranti suvlaki, 70-vjeçar, dhe djali i tij, 39-vjeçar.

Sipas informacionit zyrtar, tre persona mbërritën me makinë në orën 2:40 në biznesin që ndodhet në rrugën Agoniston Polytechneiou dhe qëlluan me armë ndaj pronarit dhe djalit të tij. Pronari 70-vjeçar, me origjinë nga Shqipëria, u plagos në këmbë, ndërsa djali i tiju plagosnë kofshë dhe pulpë.

Oficerët e policisë që mbërritën në vendngjarje gjetën dhe mblodhën katër gëzhoja. Pas të shtënave, tre autorët u larguan me makinë në drejtim të paditur. Hetimin e rastit e ka marrë përsipër FBI-ja greke.

Në qarkun Elbasan, temperaturat kanë rënë ndjeshëm, duke arritur në zonat malore mbi -10°C dhe deri -15°C në aksin Elbasan-Q.Thane, ku rruga është trajtuar me kripë.

Aksi Elbasan-Gjinar dhe Elbasan-Tiranë nuk ka prezencë debore, por vijon kriposja në pikat problematike.

Prurjet e lumit Shkumbin dhe perroit të Zaranikës janë ulur dhe nuk paraqesin rrezik, ndërsa shkarkimet nga HEC Banje arrijnë 390 m³/sek.

Furnizimi me energji elektrike është kryesisht normal, përveç fiderit që furnizon Njësitë Administrative Tunjë, Kushovë dhe Skënderbegas, problem që pritet të zgjidhet në orët në vijim.

Ndryshime janë bërë në nivel drejtuesish në Policinë e Shtetit.

Gazetarja Vanesa Rrahmani bën me dije se Vilson Bala është emëruar Drejtor i Drejtorisë Vendore të Policisë Korçë.

Drejtues Islor Islami caktohet përkohësisht Drejtor i Drejtorisë Vendore të Policisë Lezhë.

Drejtues Afrim Tafa caktohet përkohësisht Drejtor i Drejtorisë Vendore të Policisë Durrës.

Drejtorit të DVP Elbasan, Drejtues Fatmir Hoxha, për rezultatet e larta të arritura gjatë fundvitit 2025 në DVP Elbasan, Drejtori i Përgjithshëm i Policisë së Shtetit Drejtues Madhor Ilir Proda i ka revokuar dorëheqjen e tij, dhe për këtë fakt do të vijojë në detyrën e Drejtorit të Drejtorisë Vendore të Policisë Elbasan.

Nuk ka fitues në supersfidën e javës së 20-të të Serie A mes Interit dhe Napolit, me ekipet që ndanë pikët në një barazim spektakolar 2-2.

Sfida e luajtur në “San Siro” nisi mjaft mirë për vendasit të cilët kaluan në avantazh në minutën e 9’ me anë të Dimarcos, por në të 26’, ishte McTominay që riktheu baraspeshën.

Në pjesën e dytë, Calhanoglu kaloi për herë të dytë në avantazh zikaltrit me anë të një penalltie në minutën e 73’, ndërsa dy minuta më parë Conte u ndëshkua me karton të kuq për protesta.

Gjithsesi, ishte sërish McTominay që barazoi sfidën në të 81’, duke mos lënë zikaltrit të shkëputeshin në krye.

Kështu Interi ruan sërish kreun e kampionatit me 43 pikë, tre më shumë se Milani i vendit të dytë dhe katër më shumë se Napoli i vendit të tretë.

Barcelona fiton Superkupën e Spanjës.

Finalja e luajtur në Jeddah të Arabisë Saudite mes klubit katalanas dhe Real Madrid u mbyll në shifrat 3-2.

Pjesa e parë u mbyll pas 4 golash, në barazim 2-2.

E para shënoi Barcelona me Raphina në minutën e 26, ndërsa në minutat shtesë u shënuan plot 3 gola me autorë Vinicius Jr, Raphina dhe Garcia.

Pjesa e dytë nisi gjithashtu me ritëm por me Barcelonën më konkrete.

Në minutën e 73-të Barça gjeti edhe golin e avantazhit, sërish me Raphinan.

Pavarësisht përpjekjeve të shumta, rezultati nuk ndryshoi deri në fund të sfidës.

Kjo është Superkupa e 15-të për Barcelonën, ndërsa Real Madrid mbetet në 13.

Dy gjigandët e futbollit spanjoll tani duhet të përqëndrohen në kampionat dhe Champions League, ku rivaliteti mbetet sërish i fortë.

Në tremujorin e tretë të vitit 2025, çmimet e shtëpive në Bashkimin Evropian u rritën me 5.5%, ndërsa qiratë u rritën me 3.1%, krahasuar me tremujorin e tretë të vitit 2024.

Nga gjetjet e fundit të Eurostat, lidhur me çmimet dhe qiratë e shtëpive për tremujorin e tretë të vitit 2025, vihet në pah se ka pasur një trend rritës të vlerës së banesave.

Kështu, gjatë dekadës së fundit, midis vitit 2015 dhe tremujorit të tretë të vitit 2025, çmimet e shtëpive në BE u rritën me 63.6% dhe qiratë me 21.1%.

Duke bërë një krahasim të tremujorit të tretë të vitit 2015 dhe të 2025-ës, çmimet e shtëpive u rritën më shumë se qiratë në 25 nga vendet e BE-së për të cilat ka të dhëna të disponueshme.

Brenda këtij 10-vjeçari, çmimet e shtëpive u trefishuan në Hungari (+275%) dhe janë dyfishuar në 11 vende, me rritjet më të mëdha të vërejtura në Portugali (+169%), Lituani (+162%) dhe Bullgari (+156%).

Finlanda ishte i vetmi vend ku çmimet e shtëpive ranë gjatë kësaj periudhe (-2%).

Gjatë së njëjtës periudhë, pati rritje të theksuar të qirave së banesave. Rritjen më e lartë e regjistruar është në Hungari (+107%), e ndjekur nga Lituania (+85%), Sllovenia (+76%), Polonia (+75%) dhe Irlanda (+74%).

Vlera e pronave në Shqipëri

Në trend rritës shfaqet dhe Shqipëria sa i përket vlerave të pronave.

Bazuar nga të dhënat për 9 muaj të vitit 2025, çmimet e apartamenteve në kryeqytet kanë shënuar rritje të shpejtë.

Duke krahasuar aktualisht çmimet me ato të muajit shkurt 2025, vlerësohet një rritje prej 10%-33%, në varësi të zonës dhe objektit.

Deri në qershor të vitit të kaluar, çmimi mesatar për një metër katror apartament në Tiranë arriti në 1,830 euro.

Krahasuar 2005-ën me 2025-ën, brenda këtij 20-vjeçari çmimi i apartamenteve janë trefishuar.

Në 2024, Shqipëria u rendit gjithashtu ndër vendet që kanë shënuar rritjen më të lartë të çmimeve në Europë, sipas raportit “Për indeksin e pasurive të paluajtshme 2025”, i hartuar nga kompania ndërkombëtare “Deloitte”.

Në raport theksohej se, çmimi mesatar i shitjeve të apartamenteve në vend arriti në 1,620 euro/m². Krahasuar me 2023, çmimi mesatar u rrit me rreth 17%.

Olta Sheta ka qenë e ftuar ditën e sotme në Fan Club, ku ka folur hapur për jetën private të Brikenës, një nga konkurrentet më të përfolura të Big Brother VIP 5.

Gjatë diskutimit në studio, Olta deklaroi se Brikena ka pasur një lidhje me ish-konkurrentin e ‘Për’puthen’, Atdheun.

Olta: Unë do ta bëj një deklaratë. Brikena ka qenë e lidhur me ish-konkurrentin e Për’puthen, me Atdheun, por kjo është e vërtetuar. Kjo është para se të bëhej Miss Kosova, por nuk ka bërë asgjë të keqe se ka qenë e lidhur.

Sa është e vërtetuar kjo gjë?

Olta: Tani mund të pyesim edhe të zotin e punës, se nuk ka qenë e lidhur me mua, ka qenë e lidhur me Atdheun.

Kujtojmë se Brikena gjatë klipit prezantues në Big Brother VIP 5 ka deklaruar se nuk ka qenë kurrë në një lidhje dashurie.

Presidenti i SHBA, Donald Trump, po shqyrton një sërë opsionesh të mundshme ushtarake ndaj Iranit, pas protestave antiqeveritare që kanë shkaktuar dhjetëra viktima.

Sipas “CNN“, Trump është informuar ditët e fundit mbi plane të ndryshme ndërhyrjeje, përfshirë edhe opsione që nuk përfshijnë përdorimin e drejtpërdrejtë të forcës ushtarake amerikane.

Disa nga skenarët e diskutuar fokusohen në shënjestrimin e shërbimeve të sigurisë iraniane që po përdoren për shtypjen e protestave.

Megjithatë, brenda administratës amerikane ka shqetësime se një ndërhyrje ushtarake mund të ketë efekt të kundërt, duke bashkuar popullin iranian rreth regjimit ose duke nxitur hakmarrje ushtarake nga Teherani. Zyrtarët amerikanë theksojnë se Trump ende nuk ka marrë një vendim përfundimtar dhe se opsionet në shqyrtim nuk përfshijnë dërgimin e trupave tokësore në Iran.

Ndërkohë, Sipas Agjencisë së Lajmeve të Aktivistëve të të Drejtave të Njeriut, “HRANA)”, numri total i viktimave që nga nisja e protestave ka shkuar në të paktën 203 persona, përfshirë 41 efektivë të forcave të sigurisë.

“HRANA” bën të ditur se të paktën tetë nga protestuesit e vrarë ishin nën moshën 18 vjeç, ndërsa mbi 3,285 persona janë arrestuar nga autoritetet iraniane.

Grupi thekson se shifrat mund të jenë më të larta, për shkak të kufizimit të aksesit në internet dhe komunikimeve telefonike në të gjithë vendin.

Një ngjarje e rëndë dhune ka tronditur mbrëmjen e djeshme fshatin Vjosë, njësia administrative Cakran, bashkia Fier.

Rreth orës 22:00, babë e bir, Ylli dhe Altin Meçe banorë të zonës, janë sulmuar brutalisht nga tre persona.

Shkak për dhunën pretendohet të jetë bërë një “Like” në Facebook-un e motrës së policit.

Para se të dhunohej ai kishte qenë në një local ku kishte takuar policin dhe ky i kishte thënë “nuk e di se me kë je mpleksur”.

Dëshmia e të dhunuarit Altin Meçe

Mbrëmë unë kam marrë një kërcënim në telefon nga një person që ai është bashkëfshatari im, Fredi Astrit Lamaj. Është polic… më thanë që është me grupin e gatshëm.

Faktikisht kam bërë like tek disa postime të motrës së atij. Edhe ai më flet shumë ashpër. E më thotë nuk e di me kë je pleksur.

I kthej një mesazh atij, e i them, ti zotëri, motra jote është e madhe, nuk është e vogël. Po të thotë ajo që Altin më bezdis, stop. Në rregull? Unë e lë kaq. Edhe ishim te lokali neve, po rrinim atje me vëllain edhe me një kushëri, edhe nga ora 11:00, iki për në shtëpi. Marr makinën edhe në shtëpi hap portën e madhe.

Porta e madhe me portën e shtëpisë ka një diferencë diku te 50-60 metra. Hap portën e madhe, parkoj makinën, vij e mbyll portën prapë, edhe futem brenda në shtëpi. Në moment që futem unë brenda në shtëpi, fiken dritat. Vetëm në shtëpinë time.

Edhe në atë moment, unë po mundohesha të ndizja dritën e telefonit, edhe më thërret dikush nga jashtë, “O Altin”.

Edhe zëri i atij mua më kumboi direkt. Unë mendova për moment se mos ishte vëllai. Po që nga momenti që dal jashtë, edhe nuk arrita as të hedh këmbën jashtë derës, më qëllojnë edhe ashtu siç e pashë unë në mjegull, nuk ka qenë një, po ka qenë të paktën tre persona.

LEXO EDHE: FOTO/ Çfarë ka ndodhur në Fier? Babë e bir dhunohen para derës së shtëpisë. Autori, dyshohet se është…

Ndërkohë, nuk ka ende një njoftim zyrtar të policisë për ngjarjen.

Pas denoncimeve të publikuara në media lidhur me abuzimet me çmimet e produkteve nga rrjeti “Rossmann Lala”, ka reaguar edhe deputeti i Partisë Socialiste, Erion Braçe.

Përmes një postimi në rrjetet sociale, Braçe shkruan se çmimet e produkteve në Shqipëri janë deri dyfish më të larta krahasuar me vendet e BE, duke hedhur poshtë pretendimet se kjo situatë shkaktohet nga taksat dhe tatimet.

Sipas tij, arsyeja e vërtetë është abuzimi dhe fitimi i lartë nga tregtarët.

Çmimet deri dyfish më shumë; Nuk është tatimi, as taksa, është abuzimi dhe fitimi i lartë prej abuzimit!

E mbani mend këtë djalin? Ishte pak para vitit të ri; Bëri një vëzhgim krahasues dhe denoncoi publikisht! Iu turrën plot: taksat, tatimet, tvsh-ja – këto i rrisin çmimet!

A është e vërtetë kjo? Po e çoj unë më tej krahasimin dhe denoncimin: Tatimi mbi vlerën e shtuar:
Në Gjermani – 19%, në Itali – 22%, në Shqipëri – 20%;
Tatimi mbi fitimin:
Në Gjermani – 29–33%, në Itali – 24%, në Shqipëri – 15%;
Rroga minimale:
Në Gjermani – 12.82 € për orë pune = 2.050 € bruto në muaj;
Në itali – nuk ka pagë minimale, por kontratat kolektive të punës nisin me 7–9.5 € për orë pune bruto = 1.520 € bruto në muaj;
Në shqipëri është 500 € në muaj bruto.
Besoj është e qartë që nuk janë taksat që na bëjnë deri dy herë më të shtrenjtë; Nndërkohë,
mos harroni euron, rënien e fortë të saj, që praktikisht duhet t’i bënte më të lira për qytetarët produktet e importit, jo më të shtrenjta!

Milani shmangu një humbje në minutat shtesë në Firence.

Ndeshja e tyre kundër Fiorentinës në javën e 20-të (e para e gjysmës së dytë të sezonit) përfundoi 1-1 në Artemio Franchi.

Gjatë pjesës së parë, ekipi “Viola” sulmoi kryesisht nga krahu i majtë me Gudmundsson dhe Gosens që dërguan shumë krose, por nuk ishte e thjeshtë të kaloje mbrojtjen dhe portierin e Milanit

Kuqezinjtë dukeshin se po kishin vështirësi, por puna e Fullkrug krijoi dy raste të mëdha: gjermani ia kaloi topin dy herë Pulisic, i cili megjithatë humbi mundësinë për ta bërë rezultatin 1-0 në të dyja rastet.

Pas mbylljes së pjesë së parë, skuadra Violë vazhdoi të shtynte për gjetjen e golit të avantazhi dhe ja del në minutën e 66-të.

Një goditje këndi perfekte nga Gudmundsson dhe nmë pas Comuzzo me kokë e kishte të thjeshtë ta shtynte në rrjetë.

Nga ana tjetër Allegri aktivizoi francezin Nkunku dhe ishte pikërisht ish-lojtari i Chelseat ai që evitoi humbjen e ekipit të tij një goditje e fuqishme me të djathtën në minutën e 90-të nga një asist i Fofanës për ta rikthyer barazpeshën në 1-1.

Në minutat e fundit (97′), skuadra vendase goditi edhe traversën me Brescianini që rezultoi I pafat.

Deri në fërshëllimën përfundimtare nuk pati më ndryshim rezultati dhe gjithçka u mbyll në 1-1.

Milani vazhdon serinë e rezultateve pozitive radhazi, por mbetet dy pikë prapa Interit (i cili luan sonte në San Siro kundër Napolit). Fiorentina arrin në kuotën e 14 pikëve, duke kaluar për momentin në zonën e sigurisë.

Arktiku po kthehet në një nga skenat më të nxehta të politikës botërore. Në qendër të vëmendjes është Groenlanda, ishulli i mbuluar nga akulli, i varur politikisht nga Danimarka, por me autonomi të gjerë dhe me ambicie të forta për vetëvendosje në të ardhmen.

Tensionet janë thelluar pasi presidenti amerikan Donald Trump ka rikonfirmuar publikisht se Shtetet e Bashkuara “kanë nevojë për Groenlandën për arsye sigurie kombëtare”, duke hapur jo vetëm debate diplomatike, por edhe shqetësime për një konfigurim të ri gjeopolitik në Arktik.
Groenlanda shtrihet në një nga pikat më strategjike të globit, përgjatë rrugës më të shkurtër midis Evropës dhe Amerikës së Veriut, në afërsi të korridoreve detare dhe ajrore që përdoren për lëvizjen e nëndetëseve dhe avionëve ushtarakë.

Për këtë arsye, prej dekadash ajo është kyçe për sistemet e vëzhgimit të NATO-s dhe për paralajmërimet e hershme raketore.

Në kryeqytetin Nuuk, mesazhi politik është i prerë dhe drejtpërdrejtë, Groenlanda nuk është objekt tregtimi.

“Groenlanda kurrë nuk do të bëhet pjesë e Amerikës. Duam respekt, duam partneritet të fortë, duam tregti dhe bashkëpunim për sigurinë, por mbi bazën e respektit të ndërsjellë. Ne nuk jemi për shitje dhe kurrë nuk do të bëhemi amerikanë”, u shpreh kryeministri i Groenlandës.

Deklaratat e tij erdhën pas retorikës së presidentit amerikan, i cili e ka quajtur ishullin “strategjikisht të domosdoshëm”. Trump ka theksuar se rajoni i Arktikut po shndërrohet në arenë aktiviteti të shtuar të flotave ruse dhe kineze, dhe se Danimarka nuk do të ketë mundësi ta mbrojë e vetme Groenlandën.

“Na duhet Groenlanda nga këndvështrimi i sigurisë kombëtare. Është jashtëzakonisht strategjike. Tani rreth saj shihen anije ruse dhe kineze. Ne kemi nevojë për Groenlandën për siguri kombëtare, dhe Danimarka nuk do të jetë në gjendje ta përballojë vetë këtë”, ka shprehur Trump.

Në terren, SHBA mbajnë tashmë një prani të rëndësishme ushtarake në bazën ajrore Pituffik në veri të Groenlandës, e cila është pjesë e sistemit të paralajmërimit të NATO-s në Arktik. Marrëveshja ushtarake midis Danimarkës dhe SHBA-ve daton që nga viti 1951 dhe lejon ngritjen e bazave amerikane në ishull.
Ekspertët danezë thonë se shqetësimi kryesor amerikan lidhet me dy elemente, mbulimin radaro-ajror ndaj avionëve rusë dhe gjurmimin e nëndetëseve në të ashtuquajturin “korridori GIUK” Groenlandë, Islandë, Britani.

“Këtu flitet për radarë, për mbulimin ajror dhe për gjurmimin e nëndetëseve ruse. Të dy këto detyra janë shumë të kushtueshme dhe kërkojnë investime të mëdha. Pikërisht ndaj, SHBA kërkojnë që Danimarka të bëjë më shumë në Groenlandë”, tha Mikkel Runge Olesen.

Danimarka ka reaguar duke rritur fondet për sigurinë në Arktik, mes tyre 42 miliardë korona vetëm në vitin 2025. Por politikanë të Kopenhagës theksojnë se çdo skenar presioni ushtarak do të trondiste aleancat perëndimore.

Kryeministrja daneze, Mette Frederiksen, paralajmëroi se një veprim i njëanshëm ushtarak amerikan kundër territorit danez do të vinte në pikëpyetje vetë NATO-n.

“Presidenti amerikan duhet të merret seriozisht kur thotë se dëshiron Groenlandën. Por dua ta them qartë se nëse Shtetet e Bashkuara zgjedhin të sulmojnë ushtarakisht një vend tjetër të NATO-s, atëherë gjithçka ndalet, përfshirë edhe vetë NATO-n dhe sigurinë që ajo ka garantuar prej Luftës së Dytë Botërore”, tha kryeministrja e Danimarkës.

Edhe vendet evropiane kanë reaguar. Ministri i jashtëm gjerman tha se e ardhmja e Groenlandës varet vetëm nga populli i saj dhe Mbretëria e Danimarkës, në respekt të plotë të parimeve të sovranitetit dhe paprekshmërisë së kufijve. Qëndrim të ngjashëm mbajti edhe Kanadaja, e cila e sheh Arktikun si zonë strategjike të NATO-s ku kërkohen investime të reja.

Por pse Groenlanda është kaq e rëndësishme?

Përveç pozicionit ushtarak, ishulli është i pasur me burime natyrore, minerale të rralla, naftë dhe gaz. Megjithatë, terreni i ashpër, klimë e ftohtë dhe kostoja e lartë e shfrytëzimit e bëjnë procesin ekonomikisht problematik. Shumë kompani ndërkombëtare janë të rezervuara për të investuar. Kjo është arsyeja pse, rezultatet konkrete deri tani janë të kufizuara.

Në planin e brendshëm politik, Groenlanda gëzon autonomi të gjerë që prej vitit 2009. Sipas sondazheve, shumica e banorëve e mbështesin idenë e pavarësisë, por paralelisht kanë shqetësime për ekonominë.

Sot rreth gjysmës së buxhetit publik financohet nga subvencionet daneze, ndërsa eksportet bazohen pothuajse tërësisht te peshkimi.

Shumë groenlandezë paralajmërojnë se pavarësia e nxituar mund ta bëjë ishullin të varur nga një fuqi tjetër, veçanërisht nga SHBA, nëse nuk garantohet stabilitet ekonomik.

Analistët ndërkombëtarë vlerësojnë se ideja e “blerjes së Groenlandës” bie ndesh me të drejtën ndërkombëtare dhe me parimin e vetëvendosjes. Çdo ndryshim i statusit kërkon referendum në ishull dhe marrëveshje politike midis parlamentit të Groenlandës dhe atij të Danimarkës.

Ndërkohë, Uashingtoni ka emëruar një të dërguar të posaçëm për Groenlandën, duke sinjalizuar se interesi amerikan është afatgjatë.

Në thelb, çështja e Groenlandës tejkalon kufijtë e një debati territorial. Arktiku po hap rrugë të reja detare për shkak të shkrirjes së akujve, po shndërrohet në zonë të re ushtarake dhe ekonomike dhe po rrit interesin e fuqive të mëdha botërore.

Vedat Muriqi, vazhdon të shënojë pa u ndalur në Spanjë, aty ku është pjesë e skuadrës së Mallorcas.

Sulmuesi i Kosovës, ka gjetur sërish rrugën e rrjetës në La Liga, ndaj Rayo Vallecano në transfertë.

Në minutën e 30-të, Muriqi shfrytëzoi një krosim të Lato nga e majta dhe me kokë e dërgoi topin në fundin e rrjetës.

Vendasit kishin kaluar të parët në avantazh, ndërsa Mallorca barazoi me golin e Muriqit.

Ky është goli i 11-të në La Liga për 31-vjeçarin, duke konfirmuar formën e shkëlqyer në Spanjë, në 18 ndeshje të luajtura.

Sa i përket ndeshjes, Rayo Vallecano, me Ivan Balliun në fushë, të futur si zëvendësues, fitoi me rezultatin 2-1.

Policia e Shtetit ka finalizuar sot në 11 janar operacionin e koduar “Skema”, pas një hetimi për mashtrim dhe kultivim të bimëve narkotike. Sipas njoftimit zyrtar të Policisë, K. T., I. Gj., A. L., E. B. dhe L. M., në bashkëpunim me njëri-tjetrin, duke iu prezantuar si i njohur i tyre, personit që ra pre e mashtrimit, i kanë marrë shumën prej 40.000 euro.

Ngjarja ndodhi pranë rrethrrotullimit të Rinasit, ku një biznesmen 55-vjeçar nga Shkodra, i cili merret me këmbimin e parave, u mashtrua nëpërmjet aplikacionit Viber.

Të akuzuarit i shkruan duke u prezantuar si persona të njohur dhe të afërt, duke i kërkuar të sillte 40 mijë euro për t’i këmbyer. Kur i dëmtuari shkoi në Rinas, ata i morën paratë. Pas kësaj, ai bëri kallëzim në polici, e cila nisi hetimin.

Gjatë hetimit, Policia identifikoi 5 persona të përfshirë, vunë në pranga 3 prej tyre dhe shpallën në kërkim 2 të tjerë. Sipas Policisë, K. T., 36 vjeç, banues në Divjakë, I. Gj., 24 vjeç, banues në Divjakë, A. L., 39 vjeç dhe E. Rr., 38 vjeç, banues në Kavajë janë vënë në pranga, ndërsa E. B., 34 vjeç dhe L. M., 35 vjeç janë shpallur në kërkim.

Gjatë kontrollit të kryer në banesën e A. L., ku u gjet edhe E. Rr., u zbulua një ambient i përshtatur me pajisje elektrike për kultivimin e bimëve narkotike. Gjatë operacionit u sekuestrua edhe kokainë dhe 1 automjet tip “Audi Q5”, me të cilin 5 personat janë larguar pas marrjes së shumës prej 40.000 euro.

Vijojnë kërkimet për gjetjen e 30-vjeçarit Jurgen Karaj, i cili dyshohet se është marrë nga rrjedha e një përroi në fshatin Darsë në Klos.

Operacionit të kërkimit i janë bashkuar edhe forcat speciale “Shqiponja”, si dhe efektivë të ushtrisë, të cilët po punojnë intensivisht në zonë në bashkëpunim me strukturat vendore.

Përmes një postimi në rrjetet sociale, ministri i Mbrojtjes Pirro Vengu shkruan se, me ndihmën e dronëve dhe pajisjeve të specializuara, çdo metër terreni po kontrollohet, nga ura e Darsës në Klos deri në bashkinë e Matit.

Postimi i Vengut:

“Kërkimet nuk ndalen në Klos

Me përkushtim maksimal, polumbarët e Regjimentit të Operacioneve Speciale dhe 22 efektivë të Forcave të Armatosura po vijojnë pa ndërprerje kërkimet për gjetjen e të riut që dyshohet se u mor nga rrjedha e lumit Mat pas një aksidenti me makinë.

Me ndihmën e dronëve dhe pajisjeve të specializuara, çdo metër terreni po kontrollohet, nga ura e Darsës në Klos deri në bashkinë e Matit.

Shpresojmë në një përfundim sa më të shpejtë të operacionit”, shkruan ministri Vengu në rrjetet sociale.

Një ngjarje e rëndë dhune ka tronditur mbrëmjen e djeshme fshatin Vjosë, njësia administrative Cakran, bashkia Fier.

Rreth orës 22:00, babë e bir, Ylli dhe Altin Meçe  banorë të zonës, janë sulmuar brutalisht nga tre persona, ku sipas dyshimeve njëri prej tyre është punonjës i Policisë Vendore të Fierit.

Të plagosurit në spital

Pas ngjarjes është thirrur ambulanca dhe të plagosurit janë transportuar me urgjencë në Spitalin Rajonal të Fierit.

Babai ka marrë ndihmën e parë, ndërsa Altini vijojnë të jenë të shtruar në repartin e kirurgjisë, nën kujdesin e mjekëve, ku gjendja e tij shëndetësore paraqitet serioze, por jashtë rrezikut për jetën.

Hetimet: pista e përfshirjes së një efektivi policie

Gjatë ditës së sotme, në vendngjarje kanë mbërritur ekspertët e kriminalistikës, të cilët kanë kryer veprimet e nevojshme hetimore dhe kanë marrë në pyetje familjarët.

Sipas burimeve zyrtare nga Drejtoria Vendore e Policisë Fier, ngjarja është marrë në hetim dhe po punohet intensivisht për identifikimin dhe arrestimin e autorëve, si dhe për zbardhjen e plotë të motiveve.

Dëshmia e familjes: Konflikti i nisur nga rrjetet sociale

Familjarët e të plagosurit pohojnë se Altini jeton dhe punon prej rmbi 5 vjet me familjen  ku ndodhet edhe bashkëshortja dhe fëmijët e tij. Ai kishte ardhur në Shqipëri për të vizituar familjen në 20 dhjetor.

Sipas dëshmisë së tij, një nga autorët e dyshuar është vëllai i një vajze, i cili punon si polic  Pas disa komenteve dhe pëlqimeve (“like”) në profilin e saj, çka dyshohet se ka çuar në përshkallëzimin e dhunës nga vëllai i saj, polic në Fier.

Lidhur me këtë ngjarje ka reaguar edhe deputeti i PD për Fierin, Luan Baçi.