BRUKSEL, 15 janar /ATSH-DPA/- Komisioni Evropian i ofroi sot Egjiptit 1 miliard euro mbështetje buxhetore, si pjesë e një marrëveshjeje partneriteti të nënshkruar në vitin 2024.

“Ky financim do t’i shërbejë stabilitetit ekonomik, demokracisë dhe qëndrueshmërisë dhe shtetit të së drejtës”, tha presidentja e Komisionit Evropian, Ursula von der Leyen.

“Financimi është paketa e dytë e mbështetjes me një total prej 5 miliardë eurosh dhe i nënshtrohet disa kushteve”, tha komisioni.

“Egjipti ka zbatuar reforma për të forcuar stabilitetin ekonomik, ka ndërmarrë hapa konkretë dhe të besueshëm drejt respektimit të mekanizmave efektivë demokratikë dhe ka qëndruar në rrugën e duhur me reformat e kërkuara nga Fondi Monetar Ndërkombëtar (FMN)”, sipas një njoftimi për shtyp.

BE synon të zgjerojë bashkëpunimin e bllokut me Egjiptin në luftën kundër emigracionit të padëshiruar, pavarësisht kritikave nga organizatat e të drejtave të njeriut.

Aktivistët thonë se shtypja e zërave kritikë në Egjipt ka vazhduar që nga fillimi i bashkëpunimit me Brukselin.

Kritikët vazhdojnë të arrestohen në mënyrë arbitrare dhe të dënohen me burgim në gjyqe të padrejta.

Praktika e ekzekutimeve jashtëgjyqësore vazhdon gjithashtu me pandëshkueshmëri pothuajse të plotë. //a.i/

The post BRUKSEL – BE-ja i ofron Egjiptit 1 miliard euro mbështetje financiare appeared first on Agjencia Telegrafike Shqiptare.

UASHINGTON, 15 janar /ATSH/- NASA kreu sot në mëngjes evakuimin e parë mjekësor nga hapësira sot në mëngjes, duke kthyer katër astronautë sërish në Tokë, më shumë se një muaj më herët, pasi një anëtar i ekuipazhit raportoi probleme shëndetësore në bordin e Stacionit Ndërkombëtar Hapësinor, sipas “Fox News”.

“SpaceX” e drejtoi anijen kozmike “Dragon” drejt Oqeanit Paqësor pranë brigjeve të San Diegos, duke përfunduar kthimin në më pak se 11 orë pasi ekuipazhi u largua nga laboratori orbital.

“Kthimi i “Dragon” është konfirmuar – mirë se vini sërish në Tokë”, tha “SpaceX” në një postim në X.

NASA tha se astronauti ishte në gjendje të qëndrueshme gjatë kohës që ishte në orbitë, por menaxherët e misionit vendosën që, një kthim i hershëm ishte rruga më e sigurt për të lejuar vlerësimin e duhur mjekësor dhe testimin diagnostik në Tokë.

Zyrtarët theksuan se kthimi nuk kërkonte ndonjë procedurë të veçantë dhe se ekipet standarde mjekësore ishin në dispozicion gjatë rikuperimit.

Përfundimi i hershëm i misionit e la stacionin hapësinor të përkohshëm me vetëm tre astronautë – një amerikan dhe dy rusë – një konfigurim që NASA tha se është i menaxhueshëm, por kufizon disa operacione.

Zyrtarët e agjencisë thanë se nuk mund të kryhen shëtitje në hapësirë, përfshirë riparimet emergjente, deri në mbërritjen e ekuipazhit tjetër.

NASA theksoi se vendimi ishte paraprak dhe jo rezultat i një emergjence.

Problemi shëndetësor i astronautit u shfaq më 7 janar, duke shkaktuar anulimin e një shëtitjeje në hapësirë ​​të planifikuar të nesërmen dhe duke çuar në fundin e misionit.

Kjo shënon herën e parë që NASA ndërpret një fluturim hapësinor për arsye mjekësore, megjithëse vendime të ngjashme u morën nga programet hapësinore ruse disa dekada më parë.

NASA dhe “SpaceX” thanë se po punojnë për të përshpejtuar nisjen e një ekuipazhi zëvendësues prej katër personash, aktualisht i planifikuar për mesin e shkurtit. //a.i/

The post Katër astronautë të NASA-s kthehen në Tokë, evakuimi i parë mjekësor kryhet me sukses appeared first on Agjencia Telegrafike Shqiptare.

KATAR, 15 janar /ATSH-DPA/- Katari, i cili po ndihmon në ndërmjetësimin e një marrëveshjeje paqeje midis Izraelit dhe Hamasit, ka mirëpritur dje njoftimin e SHBA-së për fillimin e fazës tjetër të planit të paqes në Gaza.

“Shteti i Gjirit shpreson që fillimi i fazës së dytë do të kontribuojë në përmirësimin e situatës humanitare”, tha zëdhënësi i Ministrisë së Jashtme, Majid al-Ansari.

“Të gjitha palët duhet ta zbatojnë marrëveshjen plotësisht”, tha ai, duke shtuar se ndihma humanitare duhej të lejohej pa kufizime në mënyrë që të mundësohej një jetë dinjitoze.

Ai gjithashtu bëri thirrje për rindërtim të shpejtë të territorit palestinez, i cili u shkatërrua kryesisht nga dy vjet luftë.

Dje në mbrëmje, al-Ansari i bëri thirrje unionit ndërkombëtar të vazhdojë të mbështesë armëpushimin e përhershëm.

“Faza e dytë e planit të paqes do të përqendrohet në çarmatosjen e Hamasit – të cilën deri më tani ka refuzuar ta bëjë – krijimin e një qeverie kalimtare teknokratike dhe fillimin e rindërtimit të Rripit të Gazës”, njoftoi dje i dërguari special i SHBA-së Steve Witkoff.

Burime egjiptiane të sigurisë thanë se Hamasi kishte rënë dakord për emërimet për qeverinë kalimtare teknokratike të planifikuar. Asnjë anëtar i Hamasit nuk lejohet në grup. //a.i/

The post FOKUS – Katari mirëpret fazën e dytë të planit të paqes në Gaza appeared first on Agjencia Telegrafike Shqiptare.

LISBONË, 15 janar /ATSH-AFP/- Portugalia njoftoi sot mbylljen e përkohshme të ambasadës së saj në Teheran dhe i këshilloi shtetasit e saj të mos udhëtonin në Iran.

Ministria e Jashtme e Portugalisë tha në një deklaratë se tetë shtetas portugezë ishin larguar tashmë nga Irani dhe të tjerë po përgatiteshin të bënin të njëjtën gjë.

Vendimi per mbylljen e ambasadës u mor dje, një ditë pasi qeveria thirri ambasadorin e Iranit për të shprehur kundërshtimin ndaj shtypjes së dhunshme të demonstratave kundër regjimit dhe për t’i kërkuar Teheranit të respektonte të drejtat e qytetarëve iranianë.

Në një deklaratë të postuar në X, ministri i Jashtëm, Paulo Rangel tha se Portugalia ishte gati të bashkohej me çdo masë shtrënguese të përbashkët të sanksioneve kundër Iranit nga Bashkimi Evropian. //a.i/

The post PORTUGALI – Mbyllet përkohësisht ambasada në Teheran, pas tensioneve nga protestat antiqeveritare appeared first on Agjencia Telegrafike Shqiptare.

UASHINGTON, 15 janar /ATSH-DPA/- Presidenti i SHBA-së Donald Trump tha sot se ishte i kënaqur me marrëdhëniet e tij me udhëheqjen aktuale të Venezuelës, pas një bisede telefonike të gjatë me presidenten e përkohshme, Delcy Rodríguez.

“Mendoj se po shkojmë shumë mirë me Venezuelën”, tha ai në Shtëpinë e Bardhë, duke e përshkruar Rodríguez si një “person të mrekullueshëm”. Ai nuk specifikoi se në çfarë bazohej vlerësimi i tij.

Trump tha në platformën e tij “Truth Social” se diskutimi mbuloi disa tema, duke përfshirë naftën, mineralet, tregtinë dhe sigurinë kombëtare.

“Ky partneritet midis Shteteve të Bashkuara të Amerikës dhe Venezuelës do të jetë spektakolar për të gjithë. Venezuela së shpejti do të jetë sërish e shkëlqyer dhe e begatë”, shkroi ai.

Këtë muaj, SHBA-ja largoi dhe arrestoi udhëheqësin autoritar Nicolás Maduro në një operacion ushtarak në Karakas.

Uashingtoni akuzon Maduro për trafikimin e lëndëve narkotike në SHBA, një akuzë që ai e ka mohuar. Maduro aktualisht mbahet në një burg amerikan. //a.i/

The post SHBA – Trump: I kënaqur me marrëdhëniet me udhëheqjen aktuale të Venezuelës appeared first on Agjencia Telegrafike Shqiptare.

TEHERAN, 15 janar /ATSH/- Ministri i Jashtëm iranian, Abbas Araghchi tha dje në mbrëmje se nuk kishte plane për të ekzekutuar protestuesit pas demonstratave mbarëkombëtare, duke i bërë jehonë deklaratave të mëparshme të presidentit të SHBA-së, Donald Trump.

Në një intervistë për “Fox News”, Araghchi tha se nuk kishte plan ndëshkonte askënd dhe përsëriti akuzat se pas përshkallëzimeve të protestave fshiheshin “elementë terroristë” të huaj.

Ai gjithashtu pretendoi se disa vdekje kishin për qëllim të tërhiqnin SHBA-në në konflikt, duke iu referuar një plani të supozuar izraelit pa dhënë prova.

Më herët, Trump tha se kishte marrë informacione se nuk kishte plane për ekzekutime në Iran.

Duke folur në Shtëpinë e Bardhë, ai citoi burime shumë të rëndësishme nga pala tjetër dhe tha se shpresonte që informacioni të ishte i saktë. Ai nuk dha më shumë detaje.

Në Iran, dënimet me vdekje zakonisht kryhen me varje.

Trump paralajmëroi Iranin, këtë javë për rrezikun e ekzekutimit të protestuesve, duke theksuar se SHBA-ja do të reagonte ashpër nëse demonstruesit vriteshin.

Ai nuk dha detaje mbi natyrën e një përgjigjeje të mundshme, por ka paralajmëruar vazhdimisht Iranin për rrezikun e shtypjes brutale të protestave. Trump nuk i përjashtoi veprimet ushtarake.

Protestat shpërthyen mes një krize të thellë ekonomike, inflacionit të lartë dhe pakënaqësive ndaj udhëheqjes së Teheranit.

Forcat e sigurisë së Iranit janë përgjigjur me forcë ekstreme.

Araghchi tha se kishin ndodhur qindra vdekje dhe se numri i saktë do të publikohej së shpejti, një pretendim që nuk përputhej me informacionin e aktivistëve.

Sipas organizatës së të drejtave të njeriut Iran Human Rights (IHRNGO) me qendër në Oslo, të paktën 3 428 demonstrues janë vrarë që nga fundi i dhjetorit, me numrin aktual që ka të ngjarë të jetë më i lartë. Mijëra protestues thuhet se janë arrestuar.

Protestat shënojnë një nga sfidat më të rëndësishme për udhëheqjen e Republikës Islamike ndër vite. //a.i/

The post IRAN – Ministri i Jashtëm mohon planet për ekzekutimin e protestuesve appeared first on Agjencia Telegrafike Shqiptare.

LONDËR, 15 janar /ATSH/- Udhëheqësit e kanë ashpërsuar gjuhën e tyre në mbështetje të Danimarkës, por çmimi i përballjes është i lartë, sipas “The Guardian”.

Paralajmërimi i presidentit amerikan, Donald Trump për të marrë kontrollin e Groenlandës në një mënyrë ose në tjetrën, e ka lënë territorin dhe fuqinë e saj sovrane, Danimarkën, të tronditur dhe pjesën tjetër të Evropës duke kërkuar mënyra për ta ndaluar atë.

Pas tronditjes nga sulmi ushtarak i SHBA-së ndaj Venezuelës, ambicia e Trump për të aneksuar Groenlandën, nuk shihet më në Evropë si mburrje apo fantazi, por si një qëllim serioz, i nxitur nga ideologjia, ekspansionizmi neo-imperial dhe interesi i SHBA-së për minerale të rëndësishme.

Mospërfillja e vetërrëfyer e Trump për të drejtën ndërkombëtare po ekspozon sërish dilemën e dhimbshme të shkaktuar nga varësia paralizuese e Evropës ndaj SHBA-së për sigurinë ushtarake: a duhet të përballet me SHBA-në apo ta qetësojë atë?

Menjëherë pas bastisjes në Venezuelë – e cila u prit me heshtje nga Evropa – ndihmësi i Trump, Stephen Miller, tha në një intervistë për CNN se askush nuk do të luftonte Shtetet e Bashkuara të Amerikës për Groenlandën.

A ka të drejtë Miller? Në ditët e fundit ka pasur një ndryshim tonesh.

Udhëheqësit e gjashtë fuqive evropiane – Franca, Gjermania, Spanja, Italia, Polonia dhe Britania e Madhe lëshuan një deklaratë të rrallë të përbashkët, duke rikonfirmuar mbështetjen e tyre për sovranitetin danez dhe, në fakt, duke paralajmëruar Trump të mos prekë Groenlandën.

“Groenlanda i përket popullit të saj. Është detyrë e Danimarkës dhe Groenlandës dhe vetëm ata mund të vendosin për çështjet që kanë të bëjnë me Danimarkën dhe Groenlandën”, tha BE-ja.

Por se çfarë lloj “lufte” janë të gatshme të bëjnë këto fuqi evropiane për Groenlandën nëse diplomacia dështon, mbetet e paqartë!

Në një takim dje në Uashington,  Danimarka kërkoi të ulte tensionet e krizës me premtime sigurie, ndërsa këmbënguli se Groenlanda nuk ishte në shitje.

Shumë banorë të Groenlandës janë të pavendosur për Danimarkën për shkak të trashëgimisë së saj koloniale, por të dy qeveritë, për momentin, janë në një linjë të drejtë.

Zëvendëspresidenti amerikan, JD Vance, pritej të risillte më shumë ide të shekullit XIX, siç është “blerja” e shkëputjes së territorit.

“Justifikimi i Trump për të përdorur armë kundër një aleati besnik të NATO-s, për të mbrojtur Groenlandën nga agresioni i supozuar i ardhshëm nga Rusia ose Kina, nuk qëndron”, thanë analistët.

Shqetësimet e sigurisë së SHBA-së mund të përmbushen pa aneksuar Groenlandën.

Groenlanda ka qenë një territor gjysmëautonom që nga viti 1979, por si pjesë e Danimarkës, ajo mbrohet nga NATO.

Trump mund të kërkojë që aleatët e SHBA-së në NATO të forcojnë mbrojtjen e kufijve të jashtëm të territorit, të vendit strategjik.

Traktatet ekzistuese të epokës së luftës së ftohtë midis Danimarkës dhe SHBA-së për mbrojtjen e përbashkët të Groenlandës – i japin Uashingtonit dorë të lirë për të dislokuar më shumë trupa.

Gjithashtu, mund të rihapë 16 nga 17 bazat ushtarake amerikane që operonin më parë, por më pas i mbylli.

Ndërsa alarmi rritet në Danimarkë dhe në vetë Groenlandën – Britania e Madhe mund të luajë një rol më aktiv për të çaktivizuar këtë krizë.

Qeveria e Keir Starmer shpreson të ndërmjetësojë një “modus vivendi” me Uashingtonin.

Duke mbajtur një profil të ulët në Venezuelë, Starmer shpreson që shqetësimet amerikane për sigurinë në të gjithë rajonin e Arktikut, mund të adresohen sipas traktateve ekzistuese, duke zbutur frikën e Danimarkës në lidhje me “pronësinë”.

Starmer dhe Trump kanë zhvilluar biseda telefonike dy herë javën e fundit, për të mbrojtur “veriun e lartë” nga një pushtim i mundshëm rus.

Sipas pikëpamjes britanike ekziston një marrëveshje për Groenlandën.

Vështirësia me administratën amerikane, është identifikimi i saktë i motiveve të presidentit Trump kur ai flet për ‘pronësinë’.”

Greonlanda duket se ka një cilësi mistike për Trump, por a do të thotë kjo që ai dëshiron të jetë në gjendje të tregojë hartën e SHBA-së dhe të tregojë se territori i saj është zgjeruar duke përfshirë Grenlandën? Kjo është ajo që mbetet e paqartë.

Starmer ka dërguar sekretaren e tij të jashtme, Yvette Cooper, në Finlandë dhe Norvegji.

Përpara vizitës së saj, ajo nuk përmendi drejtpërdrejt Groenlandën apo nevojën për të zmbrapsur kërcënimet e Trump, por i bëri thirrje NATO-s të rriste përpjekjet në Arktik për të mbrojtur interesat euroatlantike në rajon.

“Ndërsa ndryshimi i klimës hap Arktikun, rajoni do të bëhet një kufi gjithnjë e më i rëndësishëm për NATO-n”, tha Cooper.

“Duke iu referuar ndryshimit të klimës, shkrirjes së akullit të Arktikut dhe thellimit pasues të kërcënimeve që paraqet Rusia – Britania e Madhe po pranon vlefshmërinë e shqetësimeve të Trump, por sigurisht jo zgjidhjen e tij përmes pushtimit amerikan.

Megjithatë, ndërsa Trump duket se është gati të shkatërrojë NATO-n për hir të kontrollit të Groenlandës, cilado qofshin motivet e tij, opsionet e Evropës duken se paraqesin rrezik.

Por, ka karta strategjike që Evropa mund të luajë. Robert Habeck, ish-zëvendëskancelari i Gjermanisë, tha të hënën se Evropa duhej t’i ofronte Groenlandës një kthim në anëtarësimin në BE, së bashku me një paketë masive investimesh, për të shmangur kërcënimet e SHBA-së.

Groenlanda u largua nga Komunitetet e atëhershme Evropiane në vitin 1985, për të rifituar kontrollin e peshkimit të saj.

Fabian Zuleeg, drejtori ekzekutiv i Qendrës së Politikave Evropiane në Bruksel, tha se nëse BE-ja qëndronte e bashkuar, mund t’i tregonte Trump se masa e tij e ashpër do të kishte pasoja.

Ai tha se Evropa duhet të shmangte gjestet simbolike dhe të merrte masa që jehonin brenda SHBA-së dhe dëmtonin Trump dhe zgjedhjet e tij politike aty ku ka më shumë rëndësi, me bazën e tij politike.

“Tregtia, qasja në treg, bashkëpunimi rregullator dhe partneritetet industriale kanë të gjitha ndikim”, shtoi ai. //a.i/

The post “The Guardian”: Sa larg do të shkojë Evropa për të mbrojtur Groenlandën nga Trump? appeared first on Agjencia Telegrafike Shqiptare.

TEHERAN, 15 janar /ATSH/- “Starlink” raportohet se ka hequr pagesat mujore të abonimit për përdoruesit brenda Iranit pasi qeveria e vendit ndërpreu internetin të enjten e kaluar, duke i shkëputur miliona njerëz nga familjet, puna dhe qasja në informacion, në një shtypjeje të përgjakshme të protestave, sipas BBC.

Teknologjia satelitore është bërë një linjë jetike komunikimi për disa prej personave që përpiqen t’i tregojnë botës se çfarë po ndodh në terren ditët e fundit.

Drejtori i një organizate që ndihmon iranianët të lidhen online gjithashtu për “BBC Persian” se “Starlink” ishte bërë falas.

Teknologjia satelitore, që i përket kompanisë “SpaceX'” të Elon Musk, ofron internet për dhjetëra mijëra njerëz në Iran, pavarësisht se është e paligjshme atje.

Që nga ndërprerja e internetit, ajo është bërë një nga kanalet e fundit, në mos i vetmi, për iranianët që të komunikojnë me botën e jashtme.

Përdorimi i shërbimit në Iran sjell dënim deri në dy vjet burg dhe autoritetet raportohet se po kërkojnë antenat e “Starlink” për të ndaluar njerëzit të lidhen me internetin.

Pajisja funksionon si një antenë celulare në hapësirë, duke përdorur një konstelacion satelitësh për të komunikuar me objekte të vogla në tokë që kanë një router WiFi të integruar.

Por pajisja është e kushtueshme dhe përtej mundësive të shumë iranianëve, ndaj fakti që është bërë falas mund të çojë në përdorim më të gjerë.

Duke folur për “Al Jazeera TV” të hënën, ministri i Jashtëm iranian Abbas Araghchi tha se interneti ishte ndërprerë pasi qeveria ishte përballur me operacione terroriste.

Agjencia e lajmeve “Fars”, e lidhur me Gardën Revolucionare Islamike (IRGC), pretendoi se kufizimet e internetit ishin vendosur për të ndaluar platformat e huaja si “WhatsApp” dhe “Instagram” që përdoreshin për të organizuar dhunë dhe trazira.

Grupet e të drejtave të njeriut e kanë dënuar ndërprerjen totale të internetit si abuzim me pushtetin dhe një zëdhënës i zyrës së OKB-së për të drejtat e njeriut tha se kjo ndikonte në punën e atyre që dokumentonin shkeljet e të drejtave të njeriut.

Deri tani, një grup i të drejtave të njeriut ka konfirmuar vrasjen e mbi 2400 protestuesve gjatë trazirave, si dhe gati 150 personave të lidhur me forcat e sigurisë, megjithëse besohet se shifrat janë shumë më të larta.

Megjithatë është e vështirë të vlerësohet shkalla e vërtetë e vdekjeve.

Ndërprerja e internetit e ka bërë gjithashtu të vështirë mbledhjen dhe verifikimin e provave për atë që po ndodh në terren.

Sipas organizatës së të drejtave të njeriut “Witness”, të paktën 50 000 persona po përdorin “Starlink” për të hyrë në internet.

Mahsa Alimardani, drejtoreshë e asociuar për teknologjine në këtë organizatë, tha se autoritetet iraniane ishin përpjekur të bllokonin agresivisht “Starlink” për të ndaluar qasjen, por nuk kishin pasur sukses. “Prandaj po i konfiskojnë fizikisht pajisjet”, shtoi ajo.

Qeveria iraniane ka një histori të gjatë spiunimi ndaj qytetarëve të saj, përfshirë në mënyrë digjitale, për të forcuar kontrollin mbi shoqërinë.

Raportohet se janë përdorur teknika “phishing” për të hakeruar telefonat dhe për të hyrë në të dhënat e njerëzve, ndërsa qasja në internetin iranian është kryesisht e kufizuar në një shërbim të brendshëm që imiton një intranet privat.

Qasja në platformat perëndimore si “Instagram”, “WhatsApp” dhe “Telegram” është e bllokuar, që do të thotë se iranianët duhet të përdorin VPN për t’i aksesuar.

Megjithatë, “Instagram” mbetet një nga platformat më të përdorura në Iran, me rreth 50 milion përdorues.

Edhe pse disa lajme po shpërndahen online, ekspertët thonë se qeveria iraniane synon të kontrollojë narrativën duke kufizuar informacionin që del jashtë.

Ana Diamond, bashkëpunëtore kërkimore në “Oxford Disinformation and Extremism Lab”, thotë se qeveria po e përdor informacionin si armë duke e kuruar me kujdes.

Pavarësisht rreziqeve, “Starlink” është bërë i domosdoshëm për shumë iranianë që komunikojnë me botën për atë që po ndodh brenda vendit.

Të martën, forcat e inteligjencës iraniane thanë se kishin sekuestruar një sasi të madhe pajisjesh “Starlink”, të cilat sipas tyre ishin destinuar për operacione spiunazhi dhe sabotimi brenda vendit.

Megjithatë, “BBC Persian” ka konfirmuar përmes burimeve të shumta në Iran se pajisjet po përdoren nga shumë njerëz që duan të komunikojnë pa censurë. //a.i/

The post “Starlink” ofrohet falas në Iran ndërsa regjimi vazhdon shtypjen brutale të protestave appeared first on Agjencia Telegrafike Shqiptare.

BRUKSEL, 14 janar /ATSH-DPA/-  Në një intervistë për “Euronews”, presidentja e Parlamentit Evropian Metsola tha se BE-ja nuk duhet të presë që Trump të ndërmarrë veprime të shpejta kundër regjimit iranian – nga sanksionet deri te përcaktimi i Gardës Revolucionare si terroriste.

“Regjimi është në prag të fundit të jetës së tij”, theksoi Metsola.

“Udhëheqësit e BE-së duhet të rrisin presionin mbi regjimin iranian ndërsa ai shtyp protestuesit”, tha Metsola.

Sipas saj, BE është e tronditur nga ajo që po ndodh në Iran dhe nuk mund të rrijë duarkryq kur shohin se regjimi po përdor dhunën dhe shtypjen.

Presidentja e Parlamentit Evropian, Roberta Metsola, u bëri thirrje udhëheqësve të BE-së të rrisin presionin mbi regjimin iranian, duke shtuar se ditët e diktatorëve do të merrnin fund në vitin 2026.

“Jemi të tmerruar nga ajo që po ndodh në Iran dhe nuk mund të qëndrojmë duarkryq kur shohim se regjimi po përdor dhunë, represion dhe abuzim për të shtypur ato që ne i besojmë të jenë liri themelore”, tha ajo.

Këtë javë, shefja e Parlamentit Evropian ndaloi diplomatëT iranianë të hynin në ambientet e parlamentit.

Ajo gjithashtu i ka bërë thirrje BE-së të zbatojë një përgjigje të shpejtë ndaj shtypjes së dhunshme të protestuesve në Iran, të cilën unioni ndërkombëtar, e quajti një vijë të kuqe.

Grupet civile kanë raportuar më shumë se 2 000 të vrarë. //a.i/

The post BRUKSEL – Metsola bën thirrje për masa të shpejta kundër regjimit iranian appeared first on Agjencia Telegrafike Shqiptare.

BANGKOK, 14 janar /ATSH-DPA/- Të paktën 30 persona u vranë dhe dhjetëra të tjerë u plagosën sot, pasi një tren pasagjerësh doli nga shinat në Tajlandën verilindore, kur një vinç i madh çeliku u shemb gjatë punimeve hekurudhore, thanë shërbimet e shpëtimit dhe autoritetet.

Shkaku i saktë i aksidentit mbeti i paqartë disa orë pas incidentit.

Raportet fillestare thanë se vinçi kishte rënë mbi shina, disa sekonda përpara se të mbërrinte treni, duke shkaktuar një përplasje me shpejtësi.

Raportet e mëvonshme sugjeruan se vinçi mund të ishte shembur direkt mbi trenin në lëvizje.

Raportet e medias tajlandeze thanë se treni po udhëtonte me rreth 120 kilometra në orë kur vinçi u shemb.

Treni, që mbante gati 200 persona, po udhëtonte në qarkun Sikhio të provincës Nakhon Ratchasima, rreth 230 kilometra në verilindje të Bangkokut, rreth orës 9:00 të mëngjesit.

Operatori shtetëror hekurudhor në Tajlandë, SRT tha se të paktën 195 pasagjerë dhe personel ishin në bord.

Portali lokal i lajmeve “Thaiger” raportoi se shumë nga pasagjerët ishin studentë dhe udhëtarë.

Aksidenti ndodhi pranë punimeve të ndërtimit në një urë hekurudhore, pjesë e projektit hekurudhor me shpejtësi të lartë Tajlando-Kinë, i cili synon të lidhë Tajlandën me Kinën nëpërmjet Laosit dhe është pjesë e iniciativës infrastrukturore “Një Brez, një Rrugë” të Pekinit.

Raportet e medias tajlandeze thanë se materiale të tjera të rënda ndërtimi ranë gjithashtu mbi vagonët.

Disa vagona dolën nga shinat dhe të paktën një prej tyre u përfshi nga flakët.

Sipas vlerësimeve, numri i të plagosurve varion nga 55 në 80, disa prej të cilëve në gjendje të rëndë. //a.i/

The post TAJLANDË – Treni del nga shinat, të paktën 30 të vdekur appeared first on Agjencia Telegrafike Shqiptare.

UASHINGTON, 14 janar /ATSH-DPA/- Ministri i Jashtëm danez, Lars Løkke Rasmussen do të takohet sot me zëvendëspresidentin e SHBA-së, JD Vance dhe sekretarin amerikan të Shtetit, Marco Rubio në Uashington , për të diskutuar kërcënimet e SHBA-së për të marrë kontrollin e Groenlandës.

Ministrja e Punëve të Jashtme e Groenlandës, Vivian Motzfeldt, pritet gjithashtu të marrë pjesë në takimin e Shtëpisë së Bardhë, i cili fillimisht ishte planifikuar në nivelin e ministrave të Jashtëm, përpara se Vance të vendoste në një njoftim të shkurtër, për t’ju bashkuar bisedimeve.

Duke folur në një konferencë të përbashkët për shtyp me kryeministrin e Groenlandës Jens-Frederik Nielsen dje në Kopenhagë, Frederiksen tha se Danimarka dhe Groenlanda do ta bënin të qartë se Shtetet e Bashkuara të Amerikës nuk kishin të drejtë të kontrollonin Groenlandën dhe se territori i saj nuk ishte në shitje.

“Nëse duhet të zgjedhim midis SHBA-së dhe Danimarkës, atëherë ne zgjedhim Danimarkën”, tha Nielsen.

Presidenti i SHBA-së, Donald Trump, kohët e fundit ka shprehur interes për ishullin e madh Arktik, i cili ka qenë pjesë e Mbretërisë Daneze për më shumë se 300 vjet. Trump nuk e ka përjashtuar përdorimin e forcës për ta marrë atë.

Trump tha se SHBA-ja kishte nevojë për Groenlandën për arsye sigurie kombëtare, duke përmendur rëndësinë e saj strategjike në Arktik, burimet e saj minerale dhe aktivitetin në rritje rus dhe kinez në rajon.

Groenlanda, me një popullsi prej rreth 57,000 banorësh, shtrihet midis Amerikës së Veriut dhe Evropës dhe në Rrethin Arktik.

Groenlanda kontrollon shumicën e çështjeve të brendshme, megjithatë mbrojtja dhe politika e jashtme janë kryesisht në kompetencë të Danimarkës.

Frederiksen tha se Danimarka po përballet me presion krejtësisht të papranueshëm nga aleatët më të ngushtë, duke paralajmëruar se faza më e vështirë e mosmarrëveshjes mund të ishte në vijim.

Në bisedime, Danimarka planifikon të ofrojë bashkëpunim më të ngushtë me SHBA-në për sigurinë e Arktikut brenda kornizës së NATO-s dhe përkrah aleatëve evropianë.

Një opsion i diskutuar javët e fundit midis anëtarëve të NATO-s është një prani më e fortë e aleancës në Arktik, duke përfshirë potencialisht misione të reja mbikëqyrjeje, për të adresuar shqetësimet e SHBA-së në lidhje me sigurinë në rajon pa ndryshuar statusin politik të Groenlandës.

Trump ka argumentuar se Danimarka nuk është në gjendje ta mbrojë në mënyrë të mjaftueshme Groenlandën dhe nuk e ka përjashtuar përdorimin e presionit ekonomik ose ushtarak.

Qeveritë evropiane kanë shprehur alarm për një retorikë të tillë, duke paralajmëruar se kjo mund të minojë besueshmërinë e NATO-s nëse një anëtar kryesor do të kërcënonte një aleat tjetër.

Shtetet e Bashkuara të Amerikës operojnë Bazën Hapësinore “Pituffik” në Groenlandë, sipas marrëveshjeve ekzistuese të mbrojtjes me Danimarkën.

Zyrtarët danezë thanë se janë të hapur për një prani të vazhdueshme ose të zgjeruar ushtarake amerikane në ishull, por vetëm brenda aleancave dhe marrëveshjeve ekzistuese.

Bisedimet në Uashington vijnë mes shqetësimeve më të gjera në Evropë se një mosmarrëveshje e zgjatur mbi Groenlandën mund të tendosë më tej marrëdhëniet transatlantike në një kohë tensioni të shtuar gjeopolitik, duke pasur parasysh luftën e Rusisë në Ukrainë dhe ndikimin global në rritje të Kinës. //a.i/

The post KOMENT – Groenlanda vë në provë lidhjet SHBA-Danimarkë appeared first on Agjencia Telegrafike Shqiptare.

TEHERAN, 14 janar /ATSH-DPA/-  Forcat iraniane të sigurisë kanë njoftuar arrestimin e udhëheqësve të dyshuar të protestave në provincën perëndimore Chaharmahal dhe Bakhtiari, raportoi sot media shtetërore.

Disa figura kyçe, përgjegjëse për pasigurinë në provincën Chaharmahal dhe Bakhtiari u arrestuan nga krahu i shërbimeve sekrete të Korpusit të Gardës Revolucionare Islamike.

Provinca përjetoi disa nga përplasjet më të ashpra midis forcave të sigurisë dhe demonstruesve antiqeveritarë, në fillim të protestave mbarëkombëtare në fund të dhjetorit.

Pasi forcat e sigurisë hapën zjarr ndaj protestuesve, në qytetin Lordegan shpërthyen trazira të rënda, duke rezultuar në vdekje të shumta.

Chaharmahal dhe Bakhtiari, është një rajon ekonomikisht i pazhvilluar, ku mosbesimi ndaj shtetit është i lartë.

Përgjigja e ashpër e forcave të sigurisë kontribuoi në përshkallëzimin e shpejtë të protestave. //a.i/

The post TEHERAN – Irani raporton arrestime të udhëheqësve të dyshuar të protestave appeared first on Agjencia Telegrafike Shqiptare.

PARIS, 14 janar /ATSH-DPA/- Ministri i Jashtëm i Iranit, Abbas Araghchi zhvilloi dje në mbrëmje një bisedë telefonike me homologun e tij francez, Jean-Noël Barrot, pas kritikave evropiane ndaj shtypjes së dhunshme të protestave nga forcat iraniane të sigurisë.

“Gjatë bisedës me ministrin e Jashtëm francez, Jean-Noël Barrot, diskutuan ngjarjet e fundit ne Iran”, tha ministri i Jashtëm iranian, Abbas Araghchi në një postim sot në “Telegram”.

Barrot dënoi ashpër shtypjen vdekjeprurëse të protestave masive në Iran dhe thirri ambasadorin e Iranit në Paris.

Duke folur në parlament, ai i përshkroi demonstratat si një “thirrje për liri” dhe një “revoltë paqësore” që po shtypej në një mënyrë çnjerëzore.

Disa vende të tjera evropiane kanë thirrur gjithashtu diplomatë iranianë në protestë për shkak të shtypjes së demonstratave.

Gjatë telefonatës, Araghchi mbrojti veprimet e forcave të sigurisë së Iranit, duke thënë se protestat që, fillimisht kishin filluar në mënyrë paqësore ishin bërë të dhunshme për shkak të përfshirjes së “elementeve terroriste të trajnuara”.

Ai gjithashtu pretendoi se ishin kryer ndërhyrje nga vendet e huaja në Iran. //a.i/

The post FOKUS – Ministrat e Iranit dhe Francës diskutojnë protestat pas kritikave evropiane appeared first on Agjencia Telegrafike Shqiptare.

ROMË, 14 janar /ATSH/- Shkrimi i dorës zhvillon përqendrimin dhe kreativitetin. Lufton lodhjen digjitale dhe mundëson memorizimin më të mirë të informacionit, sipas “Il Sole 24 Ore”.

Të shkruarit me stilolaps dhe letër, në një botë kryesisht të digjitalizuar, nuk është thjesht një modë e së kaluarës, por një ushtrim në shkathtësinë manuale dhe durimin për të përqendruar mendimin, shumë shpesh të shpërqendruar nga bombardimi i imazheve në lëvizje.

Gjithashtu një mënyrë për të dalluar veten: një shënim i shkruar me dorë është aq i rrallë saqë padyshim ngulitet në kujtesë më shumë sesa një mesazh i shkruar shpejt në “WhatsApp”.

Një projekt për ruajtjen e shkrimit të dorës sapo është paraqitur në UNESCO.

Aktualisht, ka nisur puna për mbledhjen publike të nënshkrimeve, me qëllim nominimin e shkrimit të dorës si një trashëgimi jomateriale e njerëzimit.

Komiteti Promovues i iniciativës është formuar, ndër të tjera, nga Instituti Grafologjik “Moretti i Urbino”, Shoqata Italiane e Grafologëve dhe Ossmed, Observatori i Ndërmjetësimit Gjuhësor.

Debati mbi nevojën për të mësuar sërish shkrimin e dorës në shkollën fillore, është i gjallë në botë dhe në Itali, ku Edicioni i III i Festivalit “Manu Scribere”, i promovuar nga Shoqata Italiane e Grafologjisë, u organizua në Bolonjë në fund të shtatorit.

Në Kaliforni, kthimi në shkrimin e dorës për afërsisht 2,6 milion studentë midis moshës 6-12 vjeç, vendas digjitalë, është bërë kohët e fundit ligj, ndërsa një studim i kohëve të fundit nga një grup neuroshkencëtarësh – në Universitetin Norvegjez të Shkencës dhe Teknologjisë – ka treguar se si shkrimi i dorës zgjeron dhe intensifikon lidhjet e trurit dhe ndihmon memorizimin.

Një nga stilolapsat më të çmuar në koleksionin “Kryevepra të Pineider” quhet, jo çuditërisht, “Psycho”, për të evokuar kompleksitetin e psikikës njerëzore.

Në ngjyrë argjendi me majë ari, ka një dizajn të ndërlikuar labirinti dhe gjysmëtransparent të endur.

Një modë, ajo e kthimit te stilolapsi?

TikTok-u regjistroi një rritje prej 63% në vitin 2024 për hashtagun #calligraphy, dhe influencër të shkrimit si vietnamezi Nhuan Dao dhe peruani Paola Gallegos kanë midis 2 dhe 9 milionë ndjekës.

“Të mësuarit e këtij arti është një ushtrim durimi: kërkon kohë dhe qetësi dhe, ashtu si kur jeni në shkollën fillore, duhet të fillosh nga vizat, për të mësuar format dhe proporcionet”, tha Aldo Iotti, një kaligraf mjeshtër i “Manu Scribere”.

Iotti u jep pjesëmarrësve kalamusin, një majë standarde që duhet të ndryshohet sipas lëvizjes së secilit person mbi letër, pasi edhe në një botë të standardizuar kjo është një risi e këndshme, asnjë dorëshkrim nuk është krejtësisht identik.

“Aurora”, një markë historike shkrimi në Itali, krenohet me kryeveprat e saj, të ekspozuara në “MoMA” në Nju Jork.

Marka ka krijuar dhe menaxhon “Officina della Scrittura”, pranë Torinos, një muze që ofron kurse në grafologji dhe psikologji, dhe rrëfen gjithçka që lidhet me kulturën e shkrimit të dorës së njeriut, nga pikturat në shpella te pllakat, të cilat evoluan për të lejuar shkrimin me një majë digjitale që është gjithnjë e më e ngjashme me letrën.

Mania më e fundit për koleksionistët?

Forma e majës, me skaje më të mprehta dhe më pak të rrumbullakosura se ajo standarde, është projektuar posaçërisht për praktikimin e artit të kaligrafisë.

Stilolapsa të mrekullueshëm me gurë të çmuar që zbukurojnë vijën, ndoshta për t’u përdorur me atë që njihet si boja më e shtrenjtë në botë, “boja japoneze sumi”.

Duhen katër vjet për ta prodhuar në formë të ngurtë. Asgjë nuk krahasohet me pigmentin vjollcë që gjendet në rrënojat e banjove romake që datojnë që nga shekulli III pas Krishtit në Carlisle, Angli.

Kjo është e ashtuquajtura ‘vjollcë tiriane’, një bojë e marrë nga mijëra guaska të thërrmuara nga Mesdheu, veçanërisht nga bregu i Marokut, e cila në atë kohë ishte më e shtrenjtë se ari – për shkak të procesit të vështirë të prodhimit. //a.i/

The post UNESCO propozon mbrojtjen e shkrimit të dorës si trashëgimi jomateriale e njerëzimit appeared first on Agjencia Telegrafike Shqiptare.

UASHINGTON, 14 janar /ATSH-DPA/- Ministri i Jashtëm danez, Lars Løkke Rasmussen do të diskutojë sot pretendimet e SHBA-së për Groenlandën me zëvendëspresidentin e SHBA-së JD Vance dhe sekretarin amerikan të Shtetit, Marco Rubio në Uashington.

Ministrja e Punëve të Jashtme e Groenlandës, Vivian Motzfeldt, pritet gjithashtu të marrë pjesë në takim.

Kryeministrja daneze, Mette Frederiksen ka lënë të kuptohet se Vance mori një vendim të minutës së fundit për të marrë pjesë.

“Takimi në fakt, ishte rënë dakord në nivel ministrash të Jashtëm”, tha Frederiksen në një konferencë të përbashkët për shtyp me kryeministrin e Groenlandës, Jens-Frederik Nielsen dje në Kopenhagë.

Si Frederiksen ashtu edhe Nielsen theksuan se Groenlanda nuk ishte në shitje dhe nuk mund të aneksohej nga SHBA-të.

Kryeministrja daneze tha se nuk kishte qenë e lehtë të përballohej presioni krejtësisht i papranueshëm nga aleatët më të ngushtë dhe paralajmëroi se pjesa më e vështirë nuk kishte mbaruar ende.

Në bisedime, Danimarka kërkon t’i ofrojë SHBA-së bashkëpunim më të ngushtë për mbrojtjen e Arktikut brenda kornizës së NATO-s dhe me aleatët evropianë. //a.i/

The post SHBA – Zyrtarët amerikanë dhe ministri i Jashtëm danez do të diskutojnë për Groenlandën appeared first on Agjencia Telegrafike Shqiptare.

UASHINGTON, 14 janar /ATSH/- Presidenti amerikan, Donald Trump ka paralajmëruar se Shtetet e Bashkuara të Amerikës do të ndërmarrin “masa shumë të forta” nëse autoritetet iraniane fillojnë të ekzekutojnë protestuesit antiqeveritarë – të arrestuar gjatë protestave masive – që kanë përfshirë vendin në javët e fundit, sipas BBC.

Deklarata e Trump vjen në një kohë kur numri i të vdekurve nga përleshjet midis forcave të sigurisë dhe protestuesve ka tejkaluar 2 500.

“Nëse bëjnë diçka të tillë, ne do të ndërmarrim masa shumë të forta”, tha Trump, duke shtuar se ishte në dijeni të numrit shumë të lartë të viktimave në demonstratat që kanë zgjatur më shumë se dy javë në të gjithë Iranin.

Shqetësimi ndërkombëtar është rritur pas raportimeve se një nga protestuesit e arrestuar, 26-vjeçari Erfan Soltani, mund të përballet me ekzekutim të menjëhershëm.

Ai u arrestua në qytetin Karaj, në periferi veriperëndimore të Teheranit, gjatë kulmit të protestave, përpara mbylljes së internetit.

“Amnesty International” ka ngritur alarmin për rastin e tij, duke paralajmëruar se autoritetet iraniane mund të rifillojnë gjyqet e shkurtra dhe ekzekutimet arbitrare për të shtypur çdo formë mospajtimi.

Sipas Agjencisë së Lajmeve të Aktivistëve të të Drejtave të Njeriut (HRANA), deri në orët e para të mëngjesit, numri i të vdekurve kishte arritur në të paktën 2 571 persona, përfshirë 12 fëmijë, ndërsa më shumë se 18 100 protestues janë arrestuar.

Ky është numri më i madh i viktimave në dekadat e fundit dhe kujton trazirat e Revolucionit Islamik të vitit 1979.

Trump, gjatë intervistës, iu referua gjithashtu veprimeve të mëparshme ushtarake amerikane, të tilla si sulmet në Venezuelë dhe vrasjes së ish-liderit të ISIS-it, Abu Bakr al-Baghdadi, duke lënë të kuptohet se Uashingtoni nuk do të qëndronte pasiv.

“Nuk duam të shohim mijëra njerëz duke u vrarë. Nëse ata fillojnë të zbatojnë dënimin me vdekje, do të shohim se si do të shkojë. Nuk do të shkojë mirë”, tha presidenti amerikan, Donald Trump.

Në rrjetin e tij social “Truth Social”, Trump postoi gjithashtu një mesazh të drejtpërdrejtë për protestuesit iranianë, duke i nxitur ata të vazhdonin protestat dhe duke paralajmëruar se “ndihma ishte në rrugë e sipër”.

Në përgjigje, misioni i Iranit në OKB deklaroi se “skenari amerikan do të dështonte sërish”, duke akuzuar Shtetet e Bashkuara të Amerikës se po përpiqeshin të ndryshonin regjimin përmes sanksioneve dhe presionit politik.

Ndërkohë, Rusia ka kritikuar presionin amerikan mbi Iranin, duke thënë se forcat e jashtme po synojnë të shfrytëzojnë tensionet e brendshme për të destabilizuar shtetin iranian.

Autoritetet iraniane këmbëngulin se situata është nën kontroll, megjithëse prania e forcave të sigurisë mbetet e lartë dhe ka raporte të shumta për konfiskim të pajisjeve satelitore dhe rrëfime të detyruara të transmetuara në mediet shtetërore.

Situata në Iran mbetet e tensionuar, ndërsa bashkësia ndërkombëtare po ndjek me shqetësim zhvillimet dhe rrezikun e përshkallëzimit të mëtejshëm të dhunës. //a.i/

The post SHBA – Trump: Nëse Irani ekzekuton protestuesit, do të ndërhyjmë appeared first on Agjencia Telegrafike Shqiptare.

PRAGË, 13 janar /ATSH-DPA/- Një muaj pas marrjes së detyrës, qeveria e re e krahut të djathtë, e miliarderit, Andrej Babis në Republikën Çeke ka paraqitur një votëbesim, në përputhje me kushtetutën çeke.

Kushtetuta kërkon që çdo kabinet i ri të paraqesë një votëbesim brenda 30 ditëve nga emërimi i tij nga presidenti.

“Dua ta bëj të qartë se Republika Çeke dhe qytetarët çekë janë të parët për qeverinë tonë”, tha 71-vjeçari, Babis.

Votimi pritet të zhvillohet jo më herët se mbrëmja e së mërkurës.

Babis tha se kërkon të zbatojë deportimin e shpejtë të të huajve kriminelë dhe kundërshton futjen e euros, të cilën Bullgaria e miratoi këtë vit.

Ai gjithashtu kritikoi politikën e BE-së për klimën – duke e quajtur atë të dëmshme për industrinë.

Prioritetet e kabinetit përfshijnë çmime më të ulëta të energjisë dhe kursime në administratën shtetërore.

Ai përjashtoi mundësinë që Republika Çeke të ofrojë ushtarë për një forcë të mundshme paqeruajtëse në Ukrainë.

Koalicioni, i përbërë nga partia populiste e krahut të djathtë ANO e Babis, partia e pronarëve të automjeteve “Motorists” dhe partia e ekstremit të djathtë “Liri dhe Demokraci e Drejtpërdrejtë” (SPD), mban 108 nga 200 vendet në Dhomën e Deputetëve. //a.i/

The post REPUBLIKA ÇEKE – Qeveria e Babis do të përballet me votëbesim appeared first on Agjencia Telegrafike Shqiptare.

PARIS, 13 janar /ATSH-DPA/- Qindra fermerë francezë drejtuan sot traktorët e tyre drejt parlamentit për të protestuar kundër marrëveshjes tregtare të BE-së me katër vende të Amerikës së Jugut që pritet të nënshkruhet në fundjavë.

Fermerët thanë se marrëveshja BE-Mercosur do të ndikonte në tregjet evropiane me importe të lira bujqësore, duke kërcënuar jetesën e tyre.

Traktorët u drejtuan drejt qendrës së Parisit përpara se të rreshtoheshin para ndërtesës së Asamblesë Kombëtare.

Shumica e vendeve të Bashkimit Evropian i dhanë dritën jeshile të premten, nënshkrimit të marrëveshjes tregtare të vonuar prej kohësh me Brazilin, Argjentinën, Uruguain dhe Paraguain. Franca votoi kundër paktit.

Marrëveshja është planifikuar të nënshkruhet të shtunën në Paraguai.

Qeveria franceze është përpjekur të lehtësojë tensionet me masa lehtësuese, pasi kjo është hera e dytë brenda një jave që traktorët rreshtohen në Paris.

Ministrja franceze e Bujqësisë, Annie Genevard tha se Kabineti po punonte për mbështetje shtesë për sektorin, pasi njoftoi së fundmi një ndihmë me vlerë 300 milionë euro.

Fermerët gjithashtu kanë shprehur zhgënjimin për atë – që ata e përshkruajnë – si burokraci të tepruar dhe rregullore tepër të rrepta mjedisore. //a.i/

The post PARIS – Fermerët francezë protestojnë kundër marrëveshjes BE-Mercosur appeared first on Agjencia Telegrafike Shqiptare.

GJENEVË, 13 janar /ATSH-DPA/- Kombet e Bashkuara dënuan sot dhunën e përdorur nga forcat iraniane të sigurisë kundër protestuesve paqësorë dhe u bënë thirrje autoriteteve të rivendosnin shërbimet e internetit dhe telefonisë.

“Vrasja e demonstruesve paqësorë duhet të ndalet dhe etiketimi i protestuesve si ‘terroristë’ për të justifikuar dhunën kundër tyre është i papranueshëm”, tha në një deklaratë komisioneri i Lartë i OKB-së për të Drejtat e Njeriut, Volker Türk.

“Njerëzit kanë të drejtën që kërkesat e tyre të dëgjohen”, shtoi ai.

“Zyra e OKB-së për të Drejtat e Njeriut tha se nuk ka qenë në gjendje të verifikojë në mënyrë të pavarur raportet për qindra vdekje dhe mijëra arrestime pasi nuk ka akses në Iran”, sipas një zëdhënësi.

Zyra është e shqetësuar për atë që do të ndodhë me të arrestuarit.

“Të paktën 12 protestues u ekzekutuan pas protestave në vitin 2022”, tha zëdhënësi. //a.i/

The post GJENEVË – OKB i bën thirrje Iranit të ndalojë dhunën dhe të rivendosë aksesin në internet appeared first on Agjencia Telegrafike Shqiptare.

TEHERAN, 13 janar /ATSH/- Irani është nën një ndërprerje të koordinuar që synon jo vetëm kontrollin e sigurisë, por edhe fshehjen e së vërtetës.

Ndërprerjet e internetit, komunikimet e gjymtuara, mbylljet e mediave dhe frikësimi i gazetarëve dhe dëshmitarëve tregojnë një qëllim: parandalimin e shfaqjes së një krimi të madh dhe historik.

Gjatë ditëve të fundit, pas raporteve tronditëse dhe thellësisht shqetësuese, “Iran International”  është përqendruar në verifikimin e informacionit për të ndërtuar një vlerësim më të qartë të shkallës së shtypjes dhe vrasjeve gjatë protestave të fundit.

Në një vend ku autoritetet qëllimisht kufizojnë aksesin në informacion, një vlerësim i tillë është i vështirë dhe kërkon kohë – veçanërisht pasi nxitimi për të publikuar shifra të paplota të viktimave rrezikon gabime në dokumentimin e ngjarjeve dhe mund të shtrembërojë shkallën e vërtetë të kësaj tragjedie.

Që nga e diela, numri i provave dhe konvergjenca e rrëfimeve arritën në një pikë ku një vlerësim relativisht i saktë u bë i mundur.

Gjatë dy ditëve të fundit, bordi editorial i “Iran International” ka shqyrtuar – përmes një procesi rigoroz, shumëfazor dhe në përputhje me standardet e përcaktuara profesionale – informacionin e marrë nga një burim pranë Këshillit Suprem të Sigurisë Kombëtare; dy burime në zyrën presidenciale; rrëfime nga disa burime brenda Korpusit të Gardës Revolucionare Islamike në qytetet Mashhad, Kermanshah dhe Isfahan; dëshmi nga dëshmitarë okularë dhe familje të të vrarëve; raporte nga terreni; të dhëna të lidhura me qendrat mjekësore; dhe informacione të ofruara nga mjekë dhe infermierë në qytete të ndryshme.

Bazuar në këto rishikime, kemi arritur në përfundimin se:

Në vrasjen më të madhe në historinë bashkëkohore të Iranit – të kryer kryesisht gjatë dy netëve radhazi, të enjten dhe të premten, 8 dhe 9 janar – u vranë të paktën 12 000 njerëz.

Për sa i përket shtrirjes gjeografike, intensitetit të dhunës dhe numrit të vdekjeve në një kohë të shkurtër, kjo vrasje është e pashembullt në historinë e Iranit.

Bazuar në informacionin e marrë, të vrarët u qëlluan kryesisht nga forcat e Korpusit të Gardës Revolucionare Islamike dhe Basij.

Kjo vrasje ishte plotësisht e organizuar, dhe jo rezultat i përleshjeve “sporadike” dhe “të paplanifikuara”.

Informacioni i marrë nga Këshilli i Lartë i Sigurisë Kombëtare dhe zyra presidenciale tregon se vrasja u krye me urdhër të drejtpërdrejtë të Ali Khamenei, me dtë lëshuar nga Këshilli i Lartë i Sigurisë Kombëtare.

Informacioni i marrë nga Këshilli i Lartë i Sigurisë Kombëtare dhe zyra presidenciale tregon se vrasja u krye me urdhër të drejtpërdrejtë të Ali Khamenei, me dijeninë dhe miratimin e qartë të krerëve të të tre degëve të qeverisë, dhe me një urdhër të lëshuar nga Këshilli i Lartë i Sigurisë Kombëtare.

Shumë prej të vrarëve ishin të rinj nën moshën 30 vjeç.

https://www.iranintl.com/en/202601130145

The post FOKUS – Mijëra të vdekur në protestat antiqeveritare në Iran, ndërsa ndërprerja e energjisë elektrike thellohet appeared first on Agjencia Telegrafike Shqiptare.