Banorët e fshatit Denjë në Rahovec kanë nisur vitin 2026 me aksionin vullnetar të dhurimit të gjakut. Sipas Qendrës Kombëtare të Kosovës për Transfuzionin e Gjakut, ky aktivitet organizohet pa ndërprerje që 24 vite.
“Falënderojmë secilin dhurues për kontributin e vazhdueshëm dhe organizatorët për këtë traditë humanizmi”, thuhet në njoftim.
Zenun Elezaj, kryetari i Komunës së Klinës, ka njoftuar më 05.01.2026 se ka vizituar disa zona të prekura nga vërshimet në territorin e komunës.
Kryetari Elezaj është shoqëruar nga Qëndrim Millaku, drejtori i Shërbimeve Publike dhe Emergjente si dhe Qemajl Sejdija, drejtori i Arsimit.
Qëllimi i vizitës së tyre ishte vlerësimi nga afër i gjendjes në terren.
“Ekipet e angazhuara nga komuna kanë qenë të angazhuara gjatë gjithë ditës në terren, duke ndërmarrë intervenimet e nevojshme për menaxhimin e situatës dhe minimizimin e dëmeve të shkaktuara. Po ashtu, jemi në koordinim të vazhdueshëm për të siguruar reagim të shpejtë dhe efikas.” – ka shkruar Elezaj në Facebook, më 05.01.2026.
Sipas Elezajt, situata po përcillet në mënyrë të vazhdueshme dhe Komuna e Klinës mbetet në gjendje të plotë gatishmërie për të intervenuar kudo që paraqitet nevoja.
“U bëjmë thirrje qytetarëve që të kenë kujdes të shtuar dhe, në rast nevoje, të raportojnë te shërbimet emergjente të komunës.” – ka shtuar Elezaj.
Sipas fotografive të publikuara nga kryetari Elezaj në disa zona ka pasur rrëshqitje dheu, e diku vërshime të oborreve dhe bodrumeve të shtëpive.
Prokuroria Speciale, Departamenti për Krime të Luftës, me vetëm pesë prokurorë, ka ngritur 80 aktakuza për krime lufte ndaj 260 personave gjatë 10 viteve të fundit, ndërsa lejimi i gjykimeve në mungesë ka rritur ndjeshëm numrin e rasteve të trajtuara. Sfidë kryesore mbetet mungesa e bashkëpunimit me Serbinë, gjë që vështirëson hetimet dhe gjykimet për krimet e luftës.
Me rreth 1,000 lëndë të trashëguara nga misioni i EULEX-it dhe një numër të konsiderueshëm aktakuzash të ngritura për krime lufte, vetëm pesë prokurorë të Prokurorisë Speciale përballen me mbledhjen e fakteve që ndërtojnë një aktakuzë. Gjatë dekadës së fundit janë ngritur 80 aktakuza ndaj 260 personave.
Trajtimi i çështjeve penale për krime lufte shkakton vështirësi për shkak të mosbashkëpunimit të Serbisë. Megjithatë, lehtësim ka sjellë ndryshimi i Kodit të Procedurës Penale, i cili që nga viti 2023 parashikon gjykimin në mungesë. Që nga hyrja në fuqi e këtij ligji, Prokuroria Speciale ka ngritur 20 aktakuza në mungesë ndaj 102 personave, përfshirë rastin e masakrës së Mejës dhe dëbimin e popullsisë civile.
"Për 20 vite nuk kemi pasur një autoritet për hetimin e këtyre veprave penale. Mundësitë tona janë brenda këtyre pesë viteve të fundit, me aq sa kemi kapacitete. Vetë fakti që kemi një numër të konsiderueshëm aktakuzash tregon që po shkojmë në drejtimin e duhur. Zgjidhja për këtë çështje është një strategji nacionale për adresimin e të gjitha problemeve në fushën e krimeve të luftës", tha Ilir Morina, prokuror i Prokurorisë Speciale.
Gjatë vitit 2025, Departamenti i Krimeve të Luftës në Prokurorinë Speciale ka ngritur 11 aktakuza për krime lufte, prej të cilave 7 në mungesë. Ndërkohë, janë shpallur 9 aktgjykime, 8 dënuese dhe 1 lirues, me 9 persona të arrestuar.
"Zhvillimet më të mëdha kanë ndodhur si pasojë e ndryshimit të Kodit të Procedurës Penale, me lejimin e gjykimeve në mungesë. Duke qenë se prokurorisë dhe gjykatës u është lejuar të vazhdojnë gjykimet në mungesë, ka pasur rritje të numrit të aktakuzave, por edhe të gjykimeve në përgjithësi. Bashkëpunimi mes Kosovës dhe Serbisë është zero. Nuk ka as shkëmbim informacionesh, as dokumentacioni, nuk lejohet as shkëmbimi i ftesave dhe njoftimeve për rastet që po hetohen ndaj shtetasve të tyre. Çdo refuzim për bashkëpunim është pengesë për një hetim të mirëfilltë dhe për një gjykim të drejtë, si dhe pengon vërtetimin e fakteve", theksoi Nisa Ferati nga FDHK.
Aktualisht, për masakrën e Mejës është ngritur aktakuzë në mungesë ndaj 53 personave, pjesëtarë të policisë dhe ushtrisë serbe. Për këtë rast është mbajtur shqyrtimi fillestar.
Prokuroria Speciale e Republikës së Kosovës ka ngritur aktakuzë, me propozim për gjykim në mungesë, ndaj 21 personave për veprën penale “Krim i luftës kundër popullsisë civile”.
Sfidë e vazhdueshme mbetet gjithashtu numri i vogël i gjyqtarëve, për shkak të avancimeve në gjykata, gjë që ndikon drejtpërdrejt në efikasitetin e proceseve për krimet e luftës./RTK
Analistët politikë kanë diskutuar në emisionin Debat Plus skenarët e mundshëm për zgjedhjen e presidentit të ardhshëm të Kosovës, duke theksuar se vendi nuk duhet të shkojë në zgjedhje të reja vetëm për një emër të vetëm.
Analisti Sadri Ramabaja ka deklaruar se kandidati për president mund të vijë nga bota akademike apo edhe përtej Atlantikut, duke nënkuptuar diasporën. Sipas tij, vendimi politik tashmë është marrë nga qytetarët dhe nuk ia vlen që vendi të futet në zgjedhje për postin e presidentit.
“Dorën në zemër, nuk ia vlen barra qiranë që të shkohet në zgjedhje për president”, ka thënë Ramabaja, duke shtuar se kjo vlen jo vetëm për presidenten aktuale Vjosa Osmani, por për këdo që do të ishte kandidat. Ai ka theksuar se është luks i tepruar që sistemi politik të dërgohet në zgjedhje për pozitën e një individi.
Ramabaja nuk ka përjashtuar as mundësinë që Glauk Konjufca të jetë kandidat për president, por ka theksuar se mund të kërkohet një figurë konsensuale, e pranueshme edhe për opozitën, pasi nevojiten 80 vota për zgjedhjen e presidentit.
Ndërkohë, analisti Imer Mushkolaj ka deklaruar se nuk e sheh të mundshme që kryeministri Albin Kurti ta propozojë sërish Vjosa Osmanin për një mandat tjetër. Sipas tij, sinjalet e Kurtit lënë të kuptohet se mund të ketë një emër tjetër konsensual, me mbështetje më të gjerë sesa vetëm brenda Lëvizjes Vetëvendosje.
“S’besoj se do të ketë zgjedhje vetëm për një emër”, ka thënë Mushkolaj, duke shtuar se mungesa e kandidatëve konkretë për momentin e bën të vështirë analizën më të thellë të situatës.
Analisti Ylli Hoxha ka theksuar se gjithçka varet nga qasja politike dhe gatishmëria për kompromis. Ai ka thënë se pas zgjedhjeve të fundit, Albin Kurti ka një mandat të fortë elektoral dhe nuk e ka problem rizgjedhjen si kryeministër.
Sipas Hoxhës, nëse krijohet një klimë bashkëpunimi politik, nuk ka arsye për mosakordancë dhe kjo mund të hapë rrugën për ndërtimin e një konsensusi për zgjedhjen e presidentit, pa e çuar vendin në zgjedhje të reja./Telegrafi/
- YouTube youtu.be
Reshjet e konsiderueshme të shiut që kanë rënë nga data 3 deri më 5 janar 2026 kanë shkaktuar rritje të ndjeshme të niveleve dhe prurjeve të ujit në pjesën perëndimore të Kosovës, veçanërisht në pellgun e Drinit të Bardhë.
Sipas Institutit Hidrometeorologjik të Kosovës, lumenjtë që burojnë nga Alpet Shqiptare, si Ereniku, Bistrica e Pejës, Bistrica e Deçanit dhe Lumi i Istogut, kanë shënuar rritje të theksuar të niveleve, duke rritur rrezikun për dalje nga shtrati në disa zona.
Sasitë më të mëdha të reshjeve janë regjistruar në Junik (231.5 mm), Gllogjan (151.6 mm), Kuqishtë (130.4 mm) dhe Radoniq (124.7 mm). Ndërkohë, niveli i lumit Erenik në Gjakovë ka arritur në 3.4 metra, ndër më të lartët e matur gjatë kësaj periudhe.
Institucionet u bëjnë thirrje qytetarëve që jetojnë pranë rrjedhave lumore në perëndim të vendit të tregojnë kujdes të shtuar dhe të ndjekin njoftimet zyrtare, pasi situata kërkon vëmendje të vazhdueshme.
Përveç PDK-së, që ende nuk ka qëndrim sa i përket votës për marrëveshjeve ndërkombëtare, LDK-ja e AAK-ja kanë thënë se do i votojnë sepse nuk janë bllokuese të proceseve të tilla. Njohësit e politikës thonë se duhet gjetur gjuhë e përbashkët për këtë çështje sepse Kosova mjaftueshëm ka humbur deri tash.
Për konstituimin e Kuvendit e për formimin e qeverisë i ka hequr dilemat, kryetari i Lëvizjes Vetëvendosje Albin Kurti.
Por dilema ka nëse legjislatura e dhjetë do të votoj “pro” buxhetit të 2026-ës dhe marrëveshjeve ndërkombëtare
”As zgjedhja e presidentit dhe as miratimi i marrëveshjeve ndërkombëtare nuk kalojnë pa vota të deputetëve të opozitës”.
“Prandaj unë nuk e di çfarë qëndrimesh do të mbajnë partitë opozitare në javët dhe muajt në vijim. A është e qartë që as marrëveshjet ndërkombëtare dhe as rizgjedhjen e presidentes, zgjedhjen e presidentit, ne nuk mund t’i kalojmë pa pasur edhe deputetë nga opozita. Ndërkohë që bllokadat sa i përket konstituimit të Kuvendit dhe formimit të qeverisë i ka larguar populli me 28 dhjetor”, ka deklaruar Albin Kurti - kryetar i LVV-së.
Në Partinë Demokratike të Kosovës, që doli e dyta në zgjedhjet e 28 dhjetorit nuk kanë ende qëndrim sa i përket këtyre çështjeve, sepse po presin që fillimit të konstituohet Kuvendi.
E në Lidhjen Demokratike të Kosovës thonë se kanë votuar dhe do të votojnë për marrëveshjet që janë në interes të Kosovës.
“LDK-ja është parti shtetformuese dhe ne asnjëherë nuk i shohim marrëveshjet ndërkombëtare si mjet për luftë politike ditore. Ne e kuptojmë se këto marrëveshje janë jetike për zhvillimin ekonomik dhe projektet kapitale që prekin drejtpërdrejt jetën e qytetarëve si dhe ruajtjen e raporteve me partnerët tanë strategjikë, pasi dështimi i votimit të tyre dëmton kredibilitetin e Kosovës në arenën ndërkombëtare. Sa i përket deklaratës së z.Kurti, duhet të jemi të qartë: përgjegjësia kryesore për sigurimin e votave dhe mbarëvajtjen e punëve në Kuvend i takon mazhorancës. LDK-ja ka votuar dhe do të vazhdojë t’i votojë ato marrëveshje që janë në interes të Republikës së Kosovës. Nëse qeveria e radhes nuk i ka votat, kjo vjen si pasojë e paaftëisë së tyre për të menaxhuar numrat e vet brenda grupit parlamentar dhe mungesës së bashkëpunimit me opozitën. Ne mbetemi të përkushtuar në rolin tonë konstruktive, duke mos bllokuar proceset që i shërbejnë shtetit, por duke kërkuar llogaridhënie për çdo dështim të cilës do qeveri në menaxhimin e proceseve legjislative”, ka deklaruar Anton Çuni nga LDK
Për këtë e qartë është edhe Aleanca për Ardhmërinë e Kosovës. Ata po thonë se asnjëherë nuk kanë qenë pengesë e marrveshjeve që janë në interes të vendit.
Ndërkohë, profesori universitar, Dritëro Arifi po thotë se këto marrëveshje janë të rëndësishme dhe duhet gjetur gjuhë e përbashkët për ti kaluar.
“Sidomos marrëveshjet ndërkombëtare që lidhen me Bashkimin Evropian për planin e rritjes me Bankën Botërore por edhe marrëveshjet tjera, është i rëndësishëm koordinimi dhe bashkëpunimi sepse duhet të jenë 2 të tretat e votave për të kaluar marrëveshjet ndërkombëtare apo me numra mbi 80 veta duhet të jenë me votu pro që ato marrëveshje me u ratifiku në Kuvendin e Kosovës, nuk e shoh që opozita do të bëjë problem për këto marrëveshje sepse janë impuls i madh për Kosovën dhe ekonomin që duhet bërë Kosova në ditët në vazhdim.”, ka deklaruar Dritëro Arifi – profesor i marrëdhënieve ndërkombëtare
Vitin e kaluar, pas shumë dështimesh për konstituimin e Kuvendit, presidentja e Kosovës, Vjosa Osmani më 11 nëntor thirri seancë me disa pika të rendit të ditës, ndër to për formimin e komisioneve parlamentare, më pas shqyrtimi i parë i projektligjit për ndarjet buxhetore, e ratifikimi i disa marrëveshjeve ndërkombëtare. Por kjo seancë u bojkotua nga PDK-ja, LDK-ja e AAK-ja duke e quajtur të jashtëligjshme./Tv Dukagjini/
- YouTube youtu.be
Shqipëria po përjeton një rritje të dukshme të rikthimit të emigrantëve.
Sipas të dhënave të Anketës Kombëtare të Migracionit 2024, e realizuar nga INSTAT në bashkëpunim me Bankën Botërore, 22% e emigrantëve shqiptarë janë rikthyer në vend.
Të dhënat tregojnë se vetëm gjatë 12 viteve të fundit, 109 mijë shqiptarë janë kthyer në Shqipëri. Nga këta, gati gjysma, ose 45%, janë rikthyer midis viteve 2020 dhe 2024, duke treguar se ritmi i kthimeve është përshpejtuar ndjeshëm në vitet e fundit.
Sa i përket moshës, shumica e personave të rikthyer janë mbi 35 vjeç, ndërsa 29% janë 25-34 vjeç. Vetëm 9% janë të rinj 15-24 vjeç, që tregon se rikthimi i emigrantëve përqendrohet kryesisht tek të rriturit që janë të gatshëm për të punuar.
Shumica e të rikthyerve vijnë nga Italia dhe Greqia, ndërsa emigrantët që jetojnë në vende më të largëta kthehen më rrallë.
Sa i përket punësimit, meshkujt e rikthyer punësohen në masën 67%, krahasuar me shkallën prej 59% për meshkujt jomigrantë.
Ndërsa femrat e rikthyera kanë një performancë të ngjashme me femrat jomigrante (34% krahasuar me 36%).
Shkalla e vetëpunësimit te të rikthyerit është rritur me kalimin e kohës. Nga 7% për ata që u kthyen midis viteve 2000-2004 në 29% për ata që u kthyen gjatë viteve 2015-2024, duke arritur kulmin, 34% për ata që u kthyen në periudhën 2010-2014.
Gratë që kthehen herët kanë një shkallë më të lartë të vetëpunësimit (41%) krahasuar me meshkujt (25%), shkruan ATSh.
Shumica e vetëpunësimeve janë punë individuale (91-93%), por të rikthyerit janë më të prirur të bëhen punëdhënës me punonjës të paguar, veçanërisht ata që kanë kaluar më shumë se gjashtë vjet jashtë vendit.
Ka përfunduar procesi i vlerësimit dhe numërimit të 27,600 pakove me fletëvotime, të cilat kanë ardhur nga dy kutitë postare të Komisionit Qendror të Zgjedhjeve (KQZ) në Berlin dhe Bernë.
Sipas rezultateve përfundimtare nga ky proces, Lëvizja Vetëvendosje ka dalë e para, duke siguruar 72.20 për qind, përkatësisht 19,344 vota.
Rezultatet e partive të tjera janë si në vijim:
Lidhja Demokratike e Kosovës (LDK) – 10.15% ose 2,720 vota
Partia Demokratike e Kosovës (PDK) – 9.56% ose 2,560 vota
Aleanca për Ardhmërinë e Kosovës (AAK) – 3.90% ose 1,045 vota
Procesi i numërimit të këtyre fletëvotimeve kishte nisur të shtunën, më 3 janar 2026, në ora 16:00, dhe ka përfunduar gjatë ditës së sotme, më 5 janar 2026.
Ndërsa sot KQZ ka tërhequr edhe rreth 20 mijë pako të supozuara me fletëvotime nga diaspora.
Në total, rreth 58 mijë shtetas të Kosovës ishin regjistruar për të votuar përmes postës në zgjedhjet e parakohshme për Kuvendin e Republikës së Kosovës, të mbajtura më 28 dhjetor 2025./Telegrafi/
Valmir Elezi, Zëdhënës i Komisionit Qendror të Zgjedhjeve (KQZ), ka konfirmuar se më 5 janar 2026 është përmbyllur procesi i tërheqjes së pakove me fletëvotime që i përkasin votimit me postë jashtë Kosovës, sipas planifikimeve të KQZ-së.
Sipas Elezit, fillimisht më 23 dhe 29 dhjetor 2025, nga dy kutitë postare të KQZ-së në Berlin dhe Bernë, janë tërhequr gjithsej 28,555 pako me fletëvotime.
Pas procesit të vlerësimit 27,600 pako janë aprovuar, ndërsa 955 janë refuzuar, kryesisht për shkak të mungesës së dëftesës së regjistrimit të votuesit.
Numërimi i këtyre fletëvotimeve ka nisur të shtunën, më 3 janar 2026, në orën 16:00, dhe pritet të përfundojë gjatë ditës së sotme, më 5 janar 2026.
Procesi i tërheqjes së pakove ka vazhduar edhe më 2 janar 2026, kur nga kutitë postare të KQZ-së në Pragë, Londër, Paris, Zagreb, Stokholm, Stamboll, New York, Kanbera dhe Kopenhagë, janë tërhequr edhe 8,180 pako të tjera me fletëvotime, të cilat gjatë ditës së hënë janë sjellë në Kosovë.
Elezi ka bërë të ditur se procesi i tërheqjes së pakove me fletëvotime është përmbyllur përfundimisht më 5 janar 2026, ndërsa nga 13 kuti postare në Tiranë, Berlin, Vjenë, Bernë, Bruksel, Hagë, Podgoricë, Oslo, Shkup, Otavë, Ljublanë, Romë dhe Prishtinë, janë tërhequr edhe 11,867 pako të tjera.
Në total, rreth 58 mijë shtetas të Kosovës ishin regjistruar për të votuar përmes postës në zgjedhjet e parakohshme për Kuvendin e Republikës së Kosovës, të mbajtura më 28 dhjetor 2025.
Sipas KQZ-së, pakot me fletëvotime të tërhequra më 2 dhe 5 janar 2026 do t’i nënshtrohen procesit të vlerësimit dhe verifikimit, ndërsa ato që do të aprovohen do të numërohen në Qendrën e Numërimit dhe Rezultateve (QNR).
Me qëllim të lehtësimit të votimit jashtë Kosovës, për votuesit e regjistruar për votim me postë, KQZ ka bërë të ditur se kutitë postare kanë qenë funksionale në 23 shtete, përfshirë: Australi, Austri, Belgjikë, Çeki, Danimarkë, Francë, Gjermani, Holandë, Hungari, Itali, Kanada, Kosovë, Kroaci, Mali i Zi, Maqedonia e Veriut, Mbretëria e Bashkuar, Norvegji, Shtetet e Bashkuara të Amerikës, Shqipëri, Slloveni, Suedi, Turqi dhe Zvicër./Telegrafi/
Autorja Alketa Gashi-Fazliu ka sjellë para lexuesit librin e saj më të ri, të titulluar “Klithma”, një vepër që përmbledh dëshmi të fuqishme dhe rrëfime tronditëse nga pasojat e luftës.
Libri shpalos klithmat e një realiteti që harrohet vetëm nga autorët dhe shkaktuesit e tij, por që mbetet i gdhendur thellë në shpirtin e një populli të mbushur me martirë dhe plagë të pashërueshme.
“Klithma” sjell rrëfimet e fëmijëve të dikurshëm, sot të rritur, të cilët u gjymtuan nga bombat dhe minat e një shteti shovinist. Përmes tregimeve të tyre, autorja ndriçon dhimbjen, traumën dhe forcën e mbijetesës së atyre që lufta ua ndryshoi jetën përgjithmonë.
telegrafi.com
Në faqet e librit, klithmat shndërrohen në fjalë të ndërgjegjes dhe shpresës.
Janë zëra të viktimave fëmijë, tashmë në moshë madhore, që kërkojnë një botë më të drejtë, më të bukur dhe me shpirt njerëzor.
“Klithma” është një homazh për guximin dhe qëndresën, por edhe një thirrje për mosharresë.
Autorja shpreh krenarinë e saj për këta heronj të heshtur, të cilët sot janë qytetarë të Republikës së Kosovës dhe bartës të kujtesës kolektive të një populli.
Instituti i Gjeoshkencave (IGJEO) ka paralajmëruar reshje me intensitet të lartë gjatë ditës së sotme (e hënë) dhe nesër (e martë), kryesisht në veri dhe jug të Shqipërisë, duke rritur rrezikun për përmbytje dhe vërshime të shpejta të lumenjve.
Sipas njoftimit zyrtar, qarqet më të rrezikuara janë Shkodër, Kukës, Lezhë, Vlorë dhe Gjirokastër, ku priten reshje intensive deri lokalisht shumë intensive. Në këto zona mund të ketë vërshime të shpejta të lumenjve të vegjël malorë, si dhe rrëshqitje dherash. Në zonat urbane pritet të shfaqen probleme me përmbytje të lokalizuara, në varësi të gjendjes së sistemeve të kanalizimeve.
IGJEO njofton se, si pasojë e reshjeve të rëna gjatë ditëve të kaluara dhe atyre që pritet të vazhdojnë deri të enjten, më 8 janar, do të ketë rritje të rrezikshme të prurjeve dhe niveleve të ujit në lumenjtë Drin-Buna, Mat, Shkumbin dhe Vjosë, si dhe në Liqenin e Shkodrës. Veçanërisht Drini, Buna dhe Liqeni i Shkodrës paraqesin rrezik të shtuar për përmbytje gjatë ditës së sotme dhe nesër.
Parashikimi i motit
Reshjet:
Reshje intensive deri lokalisht shumë intensive në qarqet Shkodër, Kukës, Vlorë dhe Gjirokastër
Reshje mesatare deri lokalisht intensive në Lezhë, Berat dhe Korçë
Reshje të dobëta deri mesatare në qarqet e tjera
Reshjet do të shoqërohen me shtrëngata
Temperaturat (e martë, 6 janar):
Bregdeti: 13 – 17°C
Vendet e ulëta: 12 – 17°C
Vendet malore: 5 – 11°C
Era:
Era pritet të fryjë mesatare deri e fortë, veçanërisht në bregdet dhe në veri.
Autoritetet u bëjnë thirrje qytetarëve të tregojnë kujdes të shtuar, sidomos në zonat pranë lumenjve dhe në zonat me rrezik për rrëshqitje dherash./Telegrafi/
Barometri i Ballkanit për vitin 2025 tregon rezultate pozitive për Shqipërinë, lidhur me dëshirën dhe ambicien për anëtarësimin tonë në Bashkimin Evropian.
Kështu, sipas Barometrit, 64% e Ballkanit Perëndimor ndihet “e sigurt” se bashkëpunimi rajonal mund të përmirësojë situatën ekonomike të vendeve.
Në këtë aspekt, Shqipëria mban rekordin me 77% për nga besueshmëria e qytetarëve se bashkëpunimi rajonal është një mjet i madh ndihmës. Në vend të dytë vjen Maqedonia e Veriut (71%), më pas Kosova (67%), Mali i Zi (67%), Serbia (61%) e në fund Bosnje Hercegovinë (52%).
Mbështetja e qytetarëve për integrimin e vendit në unionin evropian është shumë i rëndësishëm, ku dhe këtu Shqipëria kryeson me 86% përkrahje.
Në vend të dytë vjen Kosova me 78% të qytetarëve që suportojnë integrimin në BE, e më pas Maqedonia e Veriut (62%), Bosnja Hercegovinë (59%), Mali i Zi (59%), e në fund Serbia (42%).
Sa i përket mbështetjes civile për anëtarësimin në BE, sipas Barometrit janë rreth 64% e qytetarëve të Ballkanit Perëndimor që e suportojnë këtë hap, pra rreth 10% më shumë krahasuar me vitin 2024.
Kryeministri Edi Rama ka pasur si slogan në zgjedhjet e 11 majit “Shqipëria 2030 në BE”, zgjedhje këto të cila i fitoi bindshëm. Edhe një herë tjetër, popullsia shqiptare krahasuar me ato të rajonit, kanë më shumë besueshmëri se vendi ynë mund të jetë pjesë e BE-së në 2030-ën.
Sipas Barometrit, 43% e shqiptarëve presin anëtarësimin në 2030, ndërsa Kosova dhe Mali i Zi renditen me 39% secila. Bosnja Hercegovina ka besueshmërinë më të ulët për anëtarësimin e tyre në BE, me rreth 9%. Pritshmëri të ulëta vijnë dhe nga Serbia e Maqedonia e Veriut, nga të cilat 15% e secilës popullsi duket optimiste për bashkimin e tyre me BE brenda kësaj dekade.
66% e bizneseve të Ballkanit Perëndimor parashikojnë përfitime nga udhëtimi vetëm me kartë identiteti brenda rajonit, pra rreth 6% më shumë krahasuar me vitin 2024.
Lidhur me këto përfitime, shqiptarët shprehen 69% me besim për udhëtimin përmes ID Card, ashtu sikurse dhe Bosnje Hercegovina (69%). Por, lista kryesohet nga Serbia, ku rreth 77% e qytetarëve të saj besojnë se mund të kenë përfitime nga lëvizja përmes kartës së identitetit. Kosova shpreh 58% besueshmëri.
39% e bizneseve të Ballkanit Perëndimor thonë se regjimi i lirë i roaming-ut brenda rajonit uli kostot e operacioneve të biznesit, ndërsa 35% thonë se përfituan nga ulja e tarifave të roaming-ut të të dhënave me BE-në.
Sa i përket shërbimit roaming, vetëm 31% e shqiptarëve janë shprehur për benefite nga ulja e tarifave me BE. Duket se përfitimi më i madh ka ardhur nga Bosnja Hercegovina, ku 63% e qytetarëve kanë shprehur kenaqësi, ndërsa më e ulëta shënohet për Kosovëm (12%).
Në tërësi, Barometri i Ballkanit 2025 e pozicionon Shqipërinë si vendin më optimist dhe më të konsoliduar në rajon në rrugën drejt Bashkimit Evropian, me mbështetje të gjerë qytetare dhe pritshmëri konkrete për anëtarësim brenda kësaj dekade. Kosova paraqitet me një nivel të qëndrueshëm mbështetjeje për integrimin evropian, por me pritshmëri më të ulëta për afatin e anëtarësimit krahasuar me Shqipërinë./Tv Klan
Policia e Kosovës ka arrestuar një person të dyshuar për gjuajtje me armë zjarri në Kryeqytet.
Rasti ka ndodhur më 05.01.2026, ndërsa arrestimi është realizuar pas një pune intensive hetimore dhe operacionale nga Drejtoria e Policisë së Kryeqytetit.
Sipas njoftimit zyrtar, Sektori i Hetimeve të Kryeqytetit ka arritur të identifikojë dhe arrestojë të dyshuarin A.K., 29 vjeç.
Gjatë operacionit policor është sekuestruar edhe arma e zjarrit, e cila dyshohet se është përdorur në këtë rast.
Në koordinim me Prokurorin e Shtetit, ndaj të dyshuarit është iniciuar rasti për veprën penale “Përdorim i armës apo mjetit të rrezikshëm”, ndërsa ai është dërguar në mbajtje për 48 orë.
Policia e Kosovës ka bërë të ditur se hetimet lidhur me rastin janë duke vazhduar./Telegrafi/
Policia e Kosovës ka shpallur në kërkim Riza (Rrustem) Thaqin, i lindur më 15.10.1983 në Rogovë të Hasit, Komuna e Gjakovës, me vendbanim në Prizren, i cili është raportuar i zhdukur që nga data 23 dhjetor 2025.
Sipas njoftimit zyrtar, rasti është raportuar nga familjarët më 25 dhjetor 2025. Menjëherë pas raportimit, Sektori Rajonal i Hetimeve i Drejtorisë Rajonale të Policisë në Prizren ka iniciuar rastin dhe ka ndërmarrë të gjitha veprimet e nevojshme hetimore, por deri më tani personi i zhdukur nuk është gjetur.
Me autorizim të Prokurorisë Themelore në Prizren, në përputhje me nenin 76, paragrafi 2 të Kodit të Procedurës Penale të Republikës së Kosovës, Policia ka publikuar fotografitë e Riza Thaqit në media televizive dhe rrjete sociale, me qëllim të ndriçimit të rastit dhe lokalizimit të tij.
Policia e Kosovës u bën thirrje të gjithë qytetarëve që, nëse kanë çfarëdo informate apo dinë diçka për vendndodhjen e personit në fjalë, të raportojnë menjëherë në numrin emergjent 192, në faqen zyrtare të Policisë së Kosovës në Facebook, ose në cilindo stacion policor në Kosovë.
Në Qendrën e Numërimit dhe Rezultateve (QNR) po vazhdon procesi i numërimit të fletëvotimeve nga votimi përmes postës. Sipas të dhënave të deritanishme, pas numërimit të 18 kutive të votave, Lëvizja Vetëvendosje vazhdon të prijë bindshëm.
Rezultatet aktuale tregojnë këtë renditje:
Lëvizja Vetëvendosje – 68.02% (3,826 vota)
Lidhja Demokratike e Kosovës (LDK) – 11.68% (657 vota)
AAK – Aleanca për Ardhmërinë e Kosovës – 10.44% (587 vota)
Partia Demokratike e Kosovës (PDK) – 8.11% (546 vota)
Procesi i numërimit po vazhdon, ndërsa rezultatet përfundimtare do të qartësojnë ndikimin e plotë të votave me postë në shpërndarjen e mandateve/Telegrafi/
Një ngjarje e rëndë ka ndodhur mbrëmjen e sotme në Gjakovë, ku një vajzë e mitur ka mbetur e plagosur nga një plumb aksidental gjatë një incidenti me të shtëna me armë zjarri.
Vajza, e cila ishte kalimtare e rastit, është goditur në shpinë dhe ka pësuar lëndime.
Zëdhënësi i Policisë per Rajonin e Gjakovës, Sheremet Elezaj, ka deklaruar se rasti ka ndodhur rreth orës 21:25, në rrugën “Bardhyl Qaushi”.
Ai bëri të ditur se një person mashkull i moshës madhore dyshohet se ka shtënë me armë zjarri në drejtim të disa individëve, me të cilët kishte pasur një mosmarrëveshje.
“Si pasojë e të shtënave, vajza ka mbetur e plagosur dhe është dërguar për trajtim mjekësor. Sipas personelit mjekësor, gjendja e saj është stabile,” ka deklaruar Elezaj.
Policia ka dalë në vendin e ngjarjes dhe ka nisur hetimet intensive për zbardhjen e plotë të rastit, ndërsa po punohet për identifikimin dhe arrestimin e të dyshuarit si dhe për sekuestrimin e armës së përdorur.
Me përfshirjen e votave të diasporës në sistemin e numërimit, gara për mandatet e fundit brenda Lëvizjes Vetëvendosje është ashpërsuar ndjeshëm. Derisa për një kohë dilema ishte për dy mandate, tashmë mandati i 53-të është konsoliduar, ndërsa beteja kryesore është zhvilluar për mandatin e 56-të.
Sipas gjendjes aktuale, Ilir Kërçeli është futur në “zonën e sigurt”, duke u renditur i 53-ti me 17,952 vota.
Ndërkohë, Naim Bardiqi ka arritur ta mbajë mandatin e 56-të me 17,569 vota, vetëm 6 vota më shumë se Vigan Qorrolli, i cili mbetet i 57-ti me 17,563 vota.
Dallimi minimal e bën këtë një nga garat më të ngushta brenda listës së LVV-së në këto zgjedhje, ndërsa çdo ndryshim eventual nga votat e mbetura do të ishte vendimtar.
Sistemi gjyqësor i Kosovës gjatë vitit 2025, ka shënuar përparime në aspektin e transparencës dhe hartimit të dokumenteve që e mbështesin funksionimin e tij. Megjithatë, të njëjtën rrugë nuk e ndoqi Këshilli Prokurorial i Kosovës, i cili aktualisht ndodhet në fazën e një reforme të parashikuar me Ligjin për Këshillin Prokurorial, ligj që hyri në fuqi gjatë vitit të kaluar.
Kështu po vlerësojnë monitorues e njohës të sistemit të drejtësisë në vend, të cilët potencojnë se udhëheqja e pozitës së kryeprokurorit të shtetit me ushtrues detyre dhe sulmet publike karshi këtyre dy institucioneve që ndodhën edhe gjatë vitit të kaluar, e kanë goditur rëndë sistemin e drejtësisë.
Ish-kryetari i Gjykatës Supreme, Fejzullah Hasani thotë se sistemi prokurorial po pëson dëm si pasojë e asaj që pozita e kryeprokurorit të shtetit vazhdon të jetë me ushtrues detyre nga viti 2022.
“Ajo është një, është një proces që, dhe ose një precedent që rrallë e hasni në institucionet e drejtësisë kudo në glob. Nga viti 2022 jemi pa kryeprokuror, që për bindjen time ka shkaktuar dëm të parikuperueshëm në sistemin e ndjekjes së shtetit, në sistemin prokurorial, po edhe në sistemin e drejtësisë në përgjithësi. Ani pse ata arsyetohen se jo, ushtruesi i detyrës i ka të njëjtat juridiksione, po ndryshe është kur e ke kryeprokurorin…. sistemit të drejtësisë i ka pasur probleme të shumta, përkundër, punëve të mëdha që janë bërë në sistem, edhe në sistemin prokurorial, edhe në sistemin gjyqësor. Mirëpo, sulmet e shpeshta që kanë ndodhur karshi sistemit të drejtësisë, qoftë prokurorial, gjyqësor, pastaj Gjykatës Kushtetuese, mos-emërimi i kryeprokurorit, unë këtë e vlerësoj si një goditje e rëndë e sistemit të drejtësisë dhe tendencë e hapur për të ndërhyrë në sistemin e drejtësisë”, theksoi Hasani.
Ndërsa, hulumtuesi nga Instituti i Kosovës për Drejtësi, Flamur Kabashi thotë se sistemit gjyqësor ka avancuar në kuptim të transparencës, por për dallim nga Këshilli Gjyqësor, ai Prokurorial ka qenë i mbyllur.
“Sistemi gjyqësor ka pasur avancim në kuptimin e transparencës. Sistemi gjyqësor ka pasur përmirësim në kuptimin e hartimit të dokumenteve që e zhvillojnë këtë sistem. Në anën tjetër, në sistemin prokurorial kemi pasur dhe po e shohim tash edhe së fundmi një tendencë për vazhdim të korporatizmit, një tendencë për vazhdim të qasjes korporatiste që një grup i caktuar t'i shërbejnë individëve për interesa personale. Pra, janë këto çështje dhe kjo është situata që ka ndodhur brenda dy sistemeve. Në anën tjetër, te Këshilli Gjyqësor i Kosovës e keni një ftesë standarde për monitorim të procesit, prej procesit të pozitës më të ulët qysh është referenti deri tek ajo më e larta. Në anën tjetër e keni Këshillin Prokurorial që duhet të dërgoni njoftim që dëshirojmë të monitorojmë një proces. Por kjo është situata midis këtyre dy këshillave dhe ky zhvillim apo ngecje që kanë ndodhur midis këtyre këshillave gjatë vitit 2025”, tha ai.
Duke theksuar se gjatë vitit 2025 janë ngritur disa aktakuza për korrupsion, Kabashi konsideron se ato aktakuza duhet të kenë karakter hetimor penal dhe jo administrativ.
“Aktakuzat të mos jenë të karakterit hetimit administrativ, por të jenë të një karakteri të hetimit penal në administrimin me prodhimin e masave, me zbatimin e masave të ndryshme që i njeh Kodi i Procedurës, Kodi Penal i Republikës së Kosovës, legjislacioni ynë në fuqi. Sepse, nga përshtypjet që jep leximi i aktakuzave, më shumë i ngjajnë një karakteri administrativ sesa ndoshta një karakteri penal….Probleme me politikën ndëshkimore brenda për brenda vendimeve gjyqësore kemi parë dhe vazhdimisht çdo ditë hasim. Pra, politika ndëshkimore që është e rregulluar edhe përmes një udhëzuesi të Gjykatës Supreme nuk gjen jetësim në vendimet gjyqësore. E kjo duhet të gjejë jetësim, thjesht standardi i dënimeve të jetë asisoj që personit t'i arrihet preventiva që i njëjti mos ta përsërisë veprën në të ardhmen, por edhe për shoqërinë që të mos përsëriten veprat”, theksoi ai.
Zhvillimet pozitive në sistemin gjyqësor drejtë transparencës i nënvizon edhe drejtoresha ekzekutive e Lëvizjes Fol, Mexhide Demolli-Nimani.
Sipas saj, reforma në sistemin prokurorial nuk duhet të pengohet, pasi çdo tentim për pengim në këtë drejtim do të dështojë.
“KGjK viteve të fundit ka ecur me hapa më të shpejt është bërë shumë më transparentë, llogaridhënës në çdo hartim të politikave dhe rregulloreve kërkohet edhe impute i shoqërisë civile në hartimin e këtyre dokumenteve ftohemi të monitorojmë çdo proces të rekrutimit qoftë për gjyqtar apo pjesëtarë të administratës. Është shumë i hapur në përgjithësi në krahasim me KPK e kuptojmë edhe natyrën e Prokurorisë që duhet disa gjëra t’i ketë konfidenciale, për shkak të hetimeve që zhvillojnë, por nuk duhet të jetë i mbyllur hermetikisht... 02’16 Është një reformë në proces e cila duhet të vazhdoj, nuk ka kthim prapa pavarësisht a iu pëlqen apo jo disa personave brenda KPK reformat duhet të ndodhin, mos të harrojmë shumica nga anëtarët nga janari nuk do të jenë pjesë e KPK, andaj edhe çdo tentim për ndërhyrje në reformë konsideroj se do të jetë i dështuar nga ajo pjesë e cila do të jetë pa mandat”, thotë ajo.
Nga Këshilli Prokurorial i Kosovës si sfidë kryesore e konsiderojnë reformën nëpër të cilën po kalojnë, si dhe mungesën e prokurorëve.
Visar Krasniqi, anëtari në Këshillin Prokurorial të Kosovës nga shoqëria civile, për KosovaPress, thotë se ndryshimet ligjore nuk janë pranuar lehtë nga këshilli, duke sjellë probleme në funksionimin e komisioneve dhe trupave të tjera.
Por, ai shton se problematike gjatë vitit 2025 ka qenë dhe çështja e buxhetit dhe mungesa e prokurorëve.
“Sfida kryesore është shfaqur kjo çështja e reformës, e thashë e kam thënë, në qershor kur ka filluar hyrja në fuqi e ligjit të ri, do të thotë kanë filluar këto sfidat. Nuk është pranuar lehtë le të bëhem realist, nuk është pranuar lehtë në Këshill ndryshimet e reja ligjore ndonëse kanë qenë të pritshme sepse me vite janë diskutuar. Këto kanë qenë problematika të vazhdueshme dhe si rrjedhojë këto kanë sjellë mandej edhe çështje të tjera problematike, qoftë në përbërjen e komisioneve, qoftë në trupa të tjerë që i ka formuar Këshilli….rrjedhimisht vazhdon me qenë problem çështja e buxhetit. Këshilli ka nevojë për prokurorë të rinj, ka nevojë për kapacitete të reja, qoftë në kuptim të prokurorëve të rinj, qoftë të stafit administrativ, bashkëpunëtorëve profesionalë. Krejt këto janë sfida që po përballemi për çdo ditë”, tha ai.
KosovaPress ka kërkuar një përgjigje edhe nga Këshilli Gjyqësor i Kosovës por deri në momentin e publikimit të këtij artikulli nuk ka marrë ndonjë përgjigje.
Edhe gjatë vitit 2025 raporti i Monitorimit të Drejtësisë 2025 i publikuar nga Misioni i Bashkimit Evropian për Sundimin e Ligjit në Kosovë (EULEX) ka vu në pah se drejtësia kosovare vazhdon të sfidohet nga rastet e profilit të lartë, të cilat kanë ngecur për vite të tëra dhe disa nuk kanë arritur në fazën e aktgjykimeve edhe një dekadë pas kryerjes së veprave. Po ky raport ka ngritur si shqetësim mosaplikimin e dënimeve plotësuese, si dhe shqiptimi në numër të madh i masës së paraburgimit.
Kujtojmë që në fundin e vitit të kaluar Këshilli Prokurorial i Kosovës e shkarkoi Besim Kelmendin nga pozita e ushtruesit të detyrës së kryeprokurorit të shtetit pas raportimeve se ai gjoja kishte bashkëpunuar më 1999 me një gjyqtare serbe për rastin e Masakrës së Reçakut, të cilën ajo e konsideronte ngjarje të trilluar. Kelmendi në një konferencën për medie i kishte mohuar të gjitha pretendimet.
Më pas, Kelmendi u ankua në Gjykatën Supreme e cila më pas më 16 dhjetor 2025 e ka anuluar vendimin e Këshillit Prokurorial të Kosovës për shkarkimin e Besim Kelmendit nga detyra e ushtruesit të detyrës së kryeprokuror të shtetit, duke thënë se shkarkimi i tij ishte i kundërligjshëm.
Ndërsa, aktualisht ushtrues i detyrës së kryeprokurorit të shtetit është Agron Qalaj.
Kosova ka përmbyllur vitin 2025 duke siguruar katër njohje të reja ndërkombëtare. Kenia, Sudani, Siria dhe Bahamet kanë njohur pavarësinë e vendit, një zhvillim që është mirëpritur në përgjithësi nga spektri politik dhe njohësit e marrëdhënieve ndërkombëtare. Megjithatë, këto arritje po shoqërohen edhe me kritika ndaj Ministrisë së Punëve të Jashtme për mungesën e anëtarësimeve në organizata ndërkombëtare dhe për, siç thuhet, regres në raportet bilaterale me vendet aleate.
Madje edhe njohjet e reja nuk konsiderohen direkt si sukses i drejtpërdrejtë i diplomacisë kosovare, pasi sipas tyre kanë ardhur kryesisht si pasojë e zhvillimeve gjeopolitike globale. Në Ministrinë e Punëve të Jashtme dhe Diasporës, nuk kthyen përgjigje për KosovaPress, në lidhje me angazhimin e tyre për vitin 2025.
Anëtari i kryesisë së PDK-së, Artan Behrami, ka kritikuar ashpër Qeverinë Kurti dhe drejtimin e diplomacisë së vendit. Sipas tij, politika e jashtme e Kosovës është “suspenduar”.
“Qeveria Kurti, edhe zonja Donika Gërvalla bashkë me presidenten, e kanë suspenduar politikën e jashtme. E kanë suspenduar fushatën për njohje të Kosovës. E kanë suspenduar aspiratat e Kosovës për anëtarësim në organizatat ndërkombëtare. Ministria e Punëve të Jashtme është boshatisur nga diplomatët me përvojë që kanë pasur trashëgimi në njohje dhe anëtarësim. Janë larguar mbi tridhjetë diplomatë karriere dhe diplomatë të cilët kanë pasur suksese të prekshme. Në vend të tyre, ministria, misionet diplomatike dhe ambasadat janë mbushur me militantë të cilët i shërbejnë jo interesit nacional të Kosovës, por interesave të LVV-së”, thotë ai.
Edhe nga Lidhja Demokratike e Kosovës janë shprehur kritika për mungesë të rezultateve konkrete në diplomaci. Anëtarja e kryesisë së LDK-së, Jehona Lushaku, ka vlerësuar se nuk ka pasur intensifikim të veprimeve diplomatike gjatë qeverisjes aktuale.
“Diplomacia dhe raporti i Kosovës bilateral me shtetet e ndryshme të botës ndërtohet me seriozitet të hatashëm, ku ke edhe shkëmbim të ambasadorëve dhe përfaqësive, pastaj bën lobim për çështje të cilat janë në interes. Ne nuk kemi parë një intensifikim të këtyre veprimeve diplomatike. S’kemi parë anëtarësime të reja të Kosovës në organizata ndërkombëtare, ndërkohë ka pasur njohje simbolike për të cilat edhe kemi aplauduar. Duhet thënë që Kosova ka potencial të jashtëzakonshëm për të ndërtuar raporte dhe për t’i mirëmbajtur miqësitë, të cilat nuk janë bërë gjatë qeverisjes Kurti. Kosova ka humbur pozicionin e vet, ka humbur aleancat e veta, s’ka pasur intensifikim ose nënshkrim të marrëveshjeve bilaterale me shtetet mike. Po ashtu, s’ka pasur koordinim për shumë politika, ku do të duhej që Kosova të përfitonte nga situatat e caktuara politike. Për këtë mendoj që ka shumëçka për t’u përmirësuar dhe Kosova e ka humbur pozicionin e saj, për çka do të na kushtojë për vitet e ardhshme”, deklaron ai.
Ndërkohë, profesori i marrëdhënieve ndërkombëtare, Dritëro Arifi, vlerëson se politika e jashtme e Kosovës duhet parë në një konteksti më të gjerë dhe si reflektim i politikës së brendshme.
Sipas tij, njohjet e fundit nuk mund të quhen sukses i drejtpërdrejtë i diplomacisë kosovare, pasi kanë ardhur kryesisht si pasojë e zhvillimeve gjeopolitike globale.
“Në politikën e jashtme gjithmonë ekziston një teori që thotë se politika e jashtme është reflektim i politikës së brendshme. Edhe po të kishte qenë Bill Gates dhe Elon Musk ministër i jashtëm, nuk do të mund ta rregullonte politikën e jashtme të Kosovës, pasi ajo lidhet me politikat dhe vendimmarrjen e brendshme, e cila reflekton më pas në politikën e jashtme. Nuk mund ta quaj sukses, pasi njohjet kanë ardhur si pasojë e ndryshimeve gjeopolitike në botë. Duhet kuptuar se normalisht shteti i Kosovës ka merita, por personat shumë pak. Duhet një koherencë e gjatë e punës që të vijë deri te një njohje. Duhet të ndryshojnë rrethanat te një vend për të na njohur. Njohja nga Siria nuk ka ardhur sepse kemi lobuar fuqishëm, por ka ardhur si rrjedhojë e ndryshimeve brenda Sirisë dhe raporteve Siri–SHBA. Më pas involvimi i Turqisë, Arabisë Saudite dhe disa faktorëve të tjerë kanë ndikuar që të arrihet kjo çështje”, thotë ai.
Kosova para katër njohjeve të reja në vitin 2025, njohjen e fundit e ka pasur në vitin 2020 nga Izraeli, e cila erdhi si rezultat i Marrëveshjes së Uashingtonit ndërmjet Kosovës dhe Serbisë.
Kosova gjatë viteve 2023–2024, ka kaluar dy faza për anëtarësim në Këshillin e Evropës, mirëpo nuk u përfshi në agjendë në mbledhjen e ministrave të punëve të jashtme të KiE-së, ku vendoset për anëtarësim.
Krahas kësaj, aplikimi i vitit 2022 për marrjen e statusit të vendit kandidat për anëtarësim në Bashkimin Evropian nuk është shqyrtuar ende./KosovaPress
Në Qendrën e Numërimit dhe Rezultateve (QNR) po vazhdon procesi i numërimit të fletëvotimeve që i takojnë votimit përmes postës.
Sipas të dhënave të deritanishme, pas numërimit të 11 kutive të votave me postë, Lëvizja Vetëvendosje vazhdon të prijë me 62.69 për qind, duke grumbulluar 1,687 vota.
Befasia në këtë fazë të procesit është Aleanca për Ardhmërinë e Kosovës (AAK), e cila renditet e dyta me 422 vota apo 15.68 për qind.
Në vendin e tretë pozicionohet Lidhja Demokratike e Kosovës (LDK) me 337 vota (12.52 për qind), ndërsa Partia Demokratike e Kosovës (PDK) ka marrë 192 vota, që përbëjnë 7.13 për qind.
Numërimi i votave me postë po vazhdon, ndërsa pritet të shihet nëse këto rezultate do të ndikojnë në ndarjen përfundimtare të mandateve në Kuvendin e Kosovës.
Login